பதஞ்ஜலிவாத³விசாரணா
3. அத² தேன ‘‘பாதஞ்ஜலீமதங் பரிவத்தேதீ’’தி வசனம்பி ஏவங் விசாரிதங்.
(க) ‘‘பு³த்³த⁴கோ⁴ஸோ பதஞ்ஜலிஸ்ஸ வா அஞ்ஞேஸங் வா உத்தரஇந்தி³யரட்டி²கானங் வாத³ங் அப்பகமேவ அஞ்ஞாஸி. பதஞ்ஜலிவாதே³ஸு ஹி அணிமா லகி⁴மாதி இத³மேவ த்³வயங் த³ஸ்ஸேஸி விஸுத்³தி⁴மக்³கே³ பன பஞ்ஞாபூ⁴மினித்³தே³ஸே ‘பகதிவாதீ³னங் பகதி வியா’தி
தங் பன ஸப்³ப³ம்பி கேவலங் ஆசரியஸ்ஸ அப்³பா⁴சிக்க²ணமத்தமேவ. அதிக³ம்பீ⁴ரஸ்ஸ ஹி அதிக³ருகாதப்³ப³ஸ்ஸ ஸுபரிஸுத்³த⁴ஸ்ஸ பிடகத்தயஸ்ஸ அத்த²ஸங்வண்ணனங் கரொந்தேன ஸுபரிஸுத்³தோ⁴யேவ பாளினயோ ச அட்ட²கதா²னயோ ச போராணதே²ரவாதா³ சாதி ஈதி³ஸாயேவ அத்தா² பகாஸேதப்³பா³, யங் வா பன அத்த²ஸங்வண்ணனாய உபகாரகங் ஸத்³த³வினிச்ச²யபடிஸங்யுத்தங் லோகியக³ந்த²வசனங், ததே³வ ச யதா²ரஹங் பகாஸேதப்³ப³ங், ந பன அனுபகாரானிபி தங்தங்க³ந்த²தக்கத்துனாமானி ச, தேஹி வுத்தவசனானி ச ப³ஹூனி, ந ச தேஸங் அப்பகாஸனேன ‘‘ந தே அட்ட²கதா²சரியோ ஜானாதீ’’தி வத்தப்³போ³. யதி³ ஹி யங் யங் லோகியக³ந்த²ங் அத்தனா ஜானாதி, தங் ஸப்³ப³ங் அனுபகாரம்பி அத்தனோ அட்ட²கதா²யமானெத்வா பகாஸெய்ய, அதிவித்தா²ரா ச ஸா ப⁴வெய்ய அபரிஸுத்³தா⁴ ச அஸம்மானிதா ச ஸாஸனிகவிஞ்ஞூஹீதி ஆசரியேன பதஞ்ஜலிவாதா³த³யோ ந வித்தா²ரேன பகாஸிதாதி ஞாதப்³ப³ங், அஞ்ஞத³த்து² யேஹி யேஹி லோகியக³ந்தே²ஹி கிஞ்சி கிஞ்சி ஆசரியேன ஆனெத்வா பகாஸிதங், தே தே ச க³ந்தா², அஞ்ஞேபி ச தாதி³ஸா ஆசரியேன ஞாதாத்வேவ ஜானிதப்³பா³ விஞ்ஞூஹி, யதா² ஸமுத்³த³ஸ்ஸ ஏகதே³ஸங் தி³ஸ்வா ஸப்³போ³பி ஸமுத்³தோ³ ஏதி³ஸோதி ஞாயதி. ஆசரியோ பன யத்த² யத்த² வேத³படிஸங்யுத்தவசனானி ஆக³தானி, தத்த² தத்த² வேத³க³ந்தே²ஹிபி கிஞ்சி கிஞ்சி ஆனெத்வா பகாஸேஸியேவ. ததா² ஹி ஆசரியேன ஸுமங்க³லவிலாஸினியங் நாம தீ³க⁴னிகாயட்ட²கதா²யங் –
‘‘திண்ணங் வேதா³னந்தி இருவேத³யஜுவேத³ஸாமவேதா³ன’’ந்தி
‘‘இதிஹாஸபஞ்சமானந்தி அத²ப்³ப³ணவேத³ங் சதுத்த²ங் கத்வா இதிஹ ஆஸ இதிஹ ஆஸாதி ஈதி³ஸவசனபடிஸங்யுத்தோ புராணகதா²ஸங்கா²தோ இதிஹாஸோ பஞ்சமோ ஏதேஸந்தி இதிஹாஸபஞ்சமா, தேஸங் இதிஹாஸபஞ்சமானங் வேதா³ன’’ந்தி
‘‘யிட்ட²ங் வுச்சதி மஹாயாகோ³’’தி
‘‘அக்³கி³ஹோமந்தி
‘‘ஸாஸபாதீ³னி பன முகே²ன க³ஹெத்வா அக்³கி³ம்ஹி பக்கி²பனங், விஜ்ஜங் பரிஜப்பித்வா ஜுஹனங் வா முக²ஹோம’’ந்தி
ஏவமாதி³னா வேத³படிஸங்யுத்தவசனானி வேத³க³ந்தா²னுரூபதோ வண்ணிதானி. தானி ச போராணட்ட²கதா²தோ பா⁴ஸாபரிவத்தனவஸேன வுத்தானிபி ப⁴வெய்யுங், வேத³க³ந்தே²ஸு பன அகோவிதே³ன யாதா²வதோ பா⁴ஸாபரிவத்தனங் காதும்பி ந ஸுகரமேவ, தஸ்மா ஆசரியஸ்ஸ வேத³க³ந்தே²ஸு கோவித³பா⁴வோபி பாகடோயேவ. ஏவங் வேத³க³ந்தே²ஸு ச தத³ஞ்ஞலோகியக³ந்தே²ஸு ச ஸுகோவித³ஸ்ஸேவ ஸமானஸ்ஸ தேஸங் வித்தா²ரதோ அப்பகாஸனங் யதா²வுத்தகாரணேனேவாதி வேதி³தப்³ப³ங்.
அபி ச ஆசரியோ அத்தனோ க³ந்தா²ரம்பே⁴யேவ –
‘‘ததோ ச பா⁴ஸந்தரமேவ ஹித்வா,
வித்தா²ரமக்³க³ஞ்ச ஸமாஸயித்வா;
வினிச்ச²யங் ஸப்³ப³மஸேஸயித்வா…பே॰…
யஸ்மா அயங் ஹெஸ்ஸதி வண்ணனாபீ’’தி
‘‘அபனெத்வான ததோஹங், ஸீஹளபா⁴ஸங் மனோரமங் பா⁴ஸங்;
தந்தினயானுச்ச²விகங், ஆரோபெத்வா விக³ததோ³ஸங்.
ஸமயங் அவிலோமெந்தோ, தே²ரானங் தே²ரவங்ஸபதீ³பானங்;
ஸுனிபுணவினிச்ச²யானங், மஹாவிஹாரே நிவாஸினங்;
ஹித்வா புனப்புனாக³த-மத்த²ங் அத்த²ங் பகாஸயிஸ்ஸாமீ’’தி
ஏவங் போராணட்ட²கதா²னங் பா⁴ஸாபரிவத்தனஸங்கி²பனவஸேனேவ விஸேஸெத்வா அபி⁴னவட்ட²கதா²யோ கரிஸ்ஸாமீதி படிஞ்ஞங் கத்வா யதா²படிஞ்ஞாதமேவ அகாஸி, ந அத்தனோ ஞாணப்பபா⁴வேன விஸேஸெத்வாதிபி வேதி³தப்³ப³ங். தஸ்மா அட்ட²கதா²ஸு