கம்மட்டா²ன ஸங்க³ஹ பரமத்த²தீ³பனீ
170. ஏவங் ஸமத²விபஸ்ஸனானந்திஆதி³ மாஹ. இதோ பச்சய ஸங்க³ஹதோ பரங் ஸமத²விபஸ்ஸனானங் பா⁴வனானங் து³வித⁴ங்பி கம்மட்டா²னங் யதா²க்கமங் பவக்கா²மீதி யோஜனா. தத்த² கிலேஸே அஞ்ஞேபிவா விதக்காத³யோ ஓளாரிகத⁴ம்மே ஸமேதீதி ஸமதோ². ததா² பவத்தோ ஏகக்³க³தாஸங்கா²தோ ஸமாதி⁴. விஸேஸேன பஸ்ஸந்தி ஏதாயாதி விபஸ்ஸனா. அனிச்சானுபஸ்ஸனாதி³கா பா⁴வனாபஞ்ஞா. தாய ஹி யோகி³னோ க²ந்தே⁴ஸு லோகியமஹாஜனேன பஸ்ஸிதங் இத்தி²புரிஸாதி³கங் நிச்சஸுகா²தி³கஞ்ச அதிக்கமித்வா விஸேஸேன அனிச்சாதி³கமேவ பஸ்ஸந்தீதி. பா⁴வேதப்³பா³தி பா⁴வனா. பா⁴வெந்திவா சித்தஸந்தானங் ஏதாஹீதி பா⁴வனா. கிரியா கம்மங். திட்ட²தி எத்தா²தி டா²னங். கம்மஸ்ஸ டா²னந்தி கம்மட்டா²னங். வீரியாரப்³ப⁴ஸங்கா²தஸ்ஸ யோக³கம்மஸ்ஸ பவத்திட்டா²னந்தி அத்தோ². கஸிணமண்ட³லாதி³கங் கஸிணபா⁴வனாதி³கஞ்ச. ஆதி³மஜ்ஜ² பரியோஸானானஞ்ஹி ஸமுதா³யபூ⁴கங் ஏகமேதங் பத²வீகஸிண பா⁴வனாதி³கங் பா⁴வனாகம்மங்பி அத்தனோ அவயவபூ⁴தஸ்ஸ யோக³ கம்மஸ்ஸ பவத்திட்டா²னங் ஸம்ப⁴வதீதி.
விபா⁴வனியங் பன
உத்தருத்தர யோக³கம்மஸ்ஸ பத³ட்டா²னதாய கம்மட்டா²னபூ⁴தங் பா⁴வனாவிதி⁴ஞ்சாதிபி வுத்தங். தம்பி யுஜ்ஜதியேவ.
யோக³கம்மமேவவா ஸுக²விஸேஸானங் அதி⁴ட்டா²னட்டே²னடா²னந்தி கம்மட்டா²னங். தத்தா²தி தஸ்மிங் து³விதே⁴பி கம்மட்டா²னே. ஸமத²ஸங்க³ஹேதி ஸமத² கம்மட்டா²னஸங்க³ஹே. த³ஸகஸிணானீதி த³ஸகஸிணமண்ட³லானி கஸிணஜ்ஜா²னானிச. தது³ப⁴யானிபி ஹி யோகா³னுயோக³ஸங்கா²தஸ்ஸ ஸமத² கம்மஸ்ஸ பவத்திட்டா²னத்தா ஸமத²கம்மட்டா²னானினாம ஹொந்தீதி. த³ஸஅஸுபா⁴தி த³ஸஅஸுப⁴வத்தூ²னி அஸுப⁴ஜ்ஜா²னானிச. த³ஸஅனுஸ்ஸதி யோதி ராக³சரியா. ராக³சரிதாதி பாடோ², ஸோ அட்ட²கதா²யங் நத்தி², புக்³க³லட்டா²னேஏவ ஸோ யுத்தோதி. ஏஸனயோ ஸேஸேஸுபி.
[243] யோ பன விபா⁴வனியங்
சரியானங் ஸங்ஸக்³க³பே⁴தோ³ வுத்தோ. ஸோ இத⁴ நாதி⁴ப்பேதோ.
நஹி கம்மட்டா²னானங்னாம ஸங்ஸக்³க³சரிதஸ்ஸபி ஏகஸ்ஸ த்³வே தீணி தா³தப்³பா³னி ஹோதீதி. தேனேவ ஹி ஸோ பே⁴தோ³ அட்ட²கதா²யங் நக³ருகதோதி. ஸப்³பா³பி அப்பனாய புப்³ப³பா⁴க³பவத்தா காமாவசர பா⁴வனா பரிகம்மபா⁴வனானாம. ஸா பன அப்பனாய ஆஸன்னே தூ³ரேதி து³விதா⁴ ஹோதி. தத்த² யா ஆஸன்னே, ஸா அப்பனங் உபேச்ச ஸமீபே ட²த்வா பவத்தத்தா உபசாரபா⁴வனாதி வுச்சதி. இதரா பன பரிகம்ம பா⁴வனாஏவனாம. இதி பரிகம்மபா⁴வனாபி ஸமானா புப்³பா³பரவிஸேஸ பாகடபா⁴வத்த²ங் அட்ட²கதா²ஸு த்³வீஹி நாமேஹி க³ஹிதாதி வுத்தங் பரிகம்மபா⁴வனா.ல. திஸ்ஸோபா⁴வனாதி தாஸங் பன விஸேஸோ பரதோ ஆக³மிஸ்ஸதி. பரிகம்மனிமித்தந்தி பரிகம்மபா⁴வனாய ஆரம்மணபூ⁴தங் கஸிணமண்ட³லாதி³னிமித்தங். தஞ்ச தஸ்ஸா ஆரம்மண பா⁴வேன ஏகங்பி ஸமானங் புப்³பா³பரவிஸேஸபாகடபா⁴வத்த²ங் பரிகம்மனிமித்தங் உக்³க³ஹனிமித்தந்தி த்³விதா⁴ பி⁴ந்தி³த்வா வுத்தங். தேஸங்பி விஸேஸோ ஆக³மிஸ்ஸதி. வித³த்தி²சதுரங்கு³லஸங்கா²தேன பரித்தபமாணேனவா க²ல மண்ட³லாதி³ஸங்கா²தேன மஹந்தபமாணேனவா கதங் அகதங்வா பத²வீ மண்ட³லதலமேவ அஸேஸப²ரிதப்³ப³ட்டே²ன கஸிணந்தி பத²வீகஸிணங். ஸகலஸத்³த³பரியாயோ ஹி கஸிணஸத்³தோ³. யதா² கஸிணேன ஜம்பு³தீ³பஸ்ஸாதி. தஸ்மா யத்தகே பத²வீதலே நிமித்தங் க³ண்ஹாதி, தத்தகங் சித்தேன அஸேஸங் ப²ரித்வா ஏவ க³ஹேதப்³ப³ங் ஹோதி. ந பன தஸ்ஸ ஏகதே³ஸே ட²த்வாதி, தேன வுத்தங் பத²வீமண்ட³லதலமேவ அஸேஸப²ரிதப்³ப³ட்டே²ன கஸிணந்தி பத²வீகஸிணந்தி. ஏஸனயோ ஸேஸகஸிணேஸுபீதி. எத்த²ச, அவிபூ⁴தவண்ணாய பத²வியா ஏக தலபா⁴வேனஸன்னிவிட்டா²ஸண்டா²னபஞ்ஞத்திஇத⁴பத²வீகஸிணங்நாம ஆபோகஸிணங் தேஜோகஸிணஞ்ச. பு²ட்ட²ட்டா²னே சித்தேன ஸண்டா²னங் கத்வா க³ஹிதா வாயுவட்டி வாயோகஸிணங்நாம. நீலவண்ணவிஸிட்டா²ஏகா ஸண்டா²னபஞ்ஞத்தி நீலகஸிணங்நாம. ததா² பீதலோஹிதோ தா³தகஸிணானிபி. சந்த³ஸூரியஅக்³கோ³பா⁴ஸவிஸிட்டா² கத்த²சி தி³ஸ்ஸமானா ஸண்டா²னபஞ்ஞத்தி ஆலோககஸிணங்நாம. தித்திசி²த்³த³வாத பானசி²த்³தா³தீ³ஸு தி³ஸ்ஸமானா ஆகாஸவிஸிட்டா² ஸண்டா²னபஞ்ஞத்தி ஆகாஸகஸிணங்நாமாதி. அதிவிய து⁴மாதங் ஸுனபா⁴வங் க³தந்தி உத்³து⁴மாதங். ததே³வ குச்சி²தத்தா உத்³து⁴மாதகங். ததா²பூ⁴தஸ்ஸ ச²வஸரீரஸ்ஸேதங் நாமங். ததே³வ பூதிபா⁴வங் க³தகாலே புரிமவண்ணங் விஜஹித்வா புன நீலபா⁴வங் பத்தங் வினீலகங். ததே³வ புன பச்சித்வா ததோ ததோ விஸந்த³மானபுப்³ப³யுத்தங் விபுப்³ப³கங். யுத்³த⁴பூ⁴மியாதீ³ஸு ஸத்தே²ன மஜ்ஜே² சி²ந்தி³த்வா த²பிதங் விரூபசி²ன்னஸரீரங் விச்சி²ன்னகங்நாம. ஸோண ஸிங்கா³லாதீ³ஹி விவிதா⁴காரேன கா²யிதபதே³ஸயுத்தங் ஸரீரங் விக்கா²யிதகங்நாம. ஸோணஸிங்கா³லாதீ³ஹி ஏவ க²ண்டா³க²ண்டி³கங் கத்வா அபகட்³டி⁴த்வா ததோ ததோ கி²த்தஅங்க³பச்சங்க³யுத்தங் ஸரீரங் வித்தக்கி²கங் நாம. அங்க³பச்சங்கே³ஸு ஸத்தே²ன ஹனித்வா க²ண்டா³க²ண்டி³கங் கத்வா ததோ ததோ கி²த்தஅங்க³பச்சங்க³யுத்தங் ஸரீரங் ஹதவிக்கி²த்தகங்நாம. பக்³க⁴ரித லோஹிதஸரீரங் லோஹிதகங் நாம. புளுவபரிபூரங் ஸரீரங் புளுவகங். ஸகலோ அட்டி²ஸங்கா⁴டோவா ஏகமேகங்வா அட்டி² அட்டி²கங் நாம. புனப்புனங் நிரந்தரங் ஸரணங் அனுஸ்ஸதி. பு³த்³த⁴கு³ணஸ்ஸ அனுஸ்ஸதி பு³த்³தா⁴னுஸ்ஸதி. ஏஸ நயோ ஸேஸாஸுபீதி. தத்த² அரஹதாதி³கு³ணோ பு³த்³த⁴கு³ணோனாம. ஸ்வக்கா²ததாதி³கு³ணோ த⁴ம்மகு³ணோனாம. ஸுப்படிபன்னதாதி³கு³ணோ ஸங்க⁴கு³ணோ நாம. அத்தனோ ஸீலஸ்ஸ அக²ண்ட³தாதி³ கு³ணோ ஸீலகு³ணோனாம. அத்தனோ தா³னஸ்ஸ விக³தமலமச்சே²ரதாதி³ கு³ணோ சாக³கு³ணோனாம. அத்தானங் தே³வத்தங்வா ஸக்கத்தங்வா ப்³ரஹ்மத்தங்வா வஹிதுங் ஸமத்தா² அத்தனோ ஸத்³தா⁴தி³கு³ணா தே³வதாகு³ணானாம. வத்த படிபத்திவஸேனவா து⁴தங்க³ஸமாதா³னவஸேனவா ஜா²னஸமாபத்திவஸேனவா விபஸ்ஸனாவஸேனவா அத்தனோ ஸந்தானே சிரங்விகாலங் விக்க²ம்பி⁴தானங் காமராகா³தீ³னங் வூபஸமோ அத்தனாஅதி⁴க³தனிப்³பா³னஞ்ச உபஸமோனாம. ஏகப⁴வபரியாபன்னஸ்ஸ மெத்தா. யங் ஆரப்³ப⁴ உப்பஜ்ஜதி. தஸ்ஸ ஹிதஸுக²ங் அவிப்பகிண்ணங் கத்வா ஸங்க³ண்ஹதீதி அத்தோ². மித்தஸ்ஸவா ஏஸா மித்தேஸுவா ப⁴வாதி மெத்தா. அத்த²தோ பன பரஸத்தானங் ஹிதூபஸங்ஹாரவஸேன பவத்தோ அதோ³ஸோஏவ. பரஸத்தானங் ஹிதூபஸங்ஹார ஹிதமோத³ன அஹிதாபனயனஸங்கா²தங் ப்³யாபாரத்தயங் பஹாய தேஸங் கம்மஸகதானுப்³ரூஹனவஸேன உபபத்திதோ யுத்திதோ பெக்க²தீதி உபெக்கா². ததா² பவத்தா தத்ரமஜ்ஜ²த்ததாஏவ. அப்பமாணேஸுஸத்தேஸு ப⁴வாதி அப்பமஞ்ஞா. ந ஹி எத்தகேஸு ஏவ ஸத்தேஸு ஏதா பவத்தேதப்³பா³. ந ததோ அஞ்ஞேஸூதி ஏவங் ஏதாஸங் விஸயபரிச்சே²தோ³னாம அத்தீ²தி. ஏவங்ஸந்தேபி ஆதி³கம்மி கேன ஆதி³தோ ஏகஸ்மிங் புக்³க³லே அத்தனோ பா⁴வனாசித்தங் லத்³தா⁴ஸேவனங் லத்³த⁴விஸேஸஞ்ச கத்வா பச்சா² த்³வீஸு தீஸூதிஆதி³னா வட்³டி⁴த்வா ஸீமஸம்பே⁴தோ³ச ஓதி⁴ஸோப²ரண அனோதி⁴ஸோப²ரண தி³ஸாப²ரணானிவ கத்தப்³பா³னீதி. யங் பன விப⁴ங்கே³ மெத்தாஸஹக³தேன சேதஸா ஏகங் தி³ஸங் ப²ரித்வா விஹரதீதிஆதி³னா படிஸம்பி⁴தா³மக்³கே³ச ஸப்³பே³ஸத்தா அவேரா ஹொந்தூதிஆதி³னா மெத்தாவிதா⁴னங் நாம வுத்தங். தங் மெத்தாஜா²னே வஸீபா⁴வப்பத்தானங் வஸேன வுத்தந்தி த³ட்ட²ப்³ப³ங். ஏதா பன விஸேஸேன தோ³ஸபக்கி²கானங் கிலேஸானங் உஜுபடிபக்க²பூ⁴தா ஹொந்தீதி தங்ஸமங்கி³னோச நிச்சங் ஸொம்மஹத³யபா⁴வேன ப்³ரஹ்மஸதி³ ஸத்தா ப்³ரஹ்மானோனாம. தேஸங் விஹாரோதி ப்³ரஹ்மவிஹாரோ. ஸெட்டா²னங்வா ஸெட்ட²பூ⁴தோவா விஹாரோதி ப்³ரஹ்மவிஹாரோதி. ஆஹாரேதி அஸித பீத கா²யித ஸாயித வஸேன சதுப்பபே⁴தே³ அஜ்ஜோ²ஹடாஹாரே. படிகூலஸஞ்ஞாதி ஆஹாரஹேது அனுப⁴விதப்³பா³னங் து³க்க²த⁴ம்மானங் பச்சவெக்க²னவஸேன ஸரஸபடிகூலதா பச்சவெக்க²னவஸேன ஆஸயனிதா⁴ன பக்காபக்கப²லனிஸ்ஸந்த³பச்சவெக்க²ன வஸேன ச தத்த² நிகந்தி பஹானஸஞ்ஞா. சதுதா⁴துவவத்தா²னந்தி ஸரீரக³தானங் பத²விஆதீ³னங் சதுன்னங் மஹாதா⁴தூனங் ஸலக்க²ணா தி³வஸேன த³ஸஅஸுபா⁴.ல. ராக³சரிதஸ்ஸ ஸப்பாயாதி வுத்தங். தத்த² ராகே³ன சரதீதி ராக³சரிதோ. ஸோ ஹி காமங் கதா³சி தோ³ஸேன சரதி. கதா³சி மோஹேன. கதா³சி ஸத்³தா⁴தீ³ஸுபி அஞ்ஞதரேன. ராகோ³ பனஸ்ஸ உஸ்ஸன்னோ. தஸ்மா உஸ்ஸன்னேன ராகே³ன ஸோ ராக³சரிதோதி ஸங்க்²யங் க³ச்ச²தீதி. ஏஸனயோ ஸேஸேஸுபி. மெத்தா பா⁴வேதப்³பா³ ப்³யாபாத³ஸ்ஸ பஹானாயாதி வசனதோ மெத்தாதீ³னங் திண்ணங் ப்³ரஹ்மவிஹாரானங் யதா²க்கமங் ப்³யாபாத³விஹிங்ஸா அரதீனங் நிஸ்ஸரணதாவசனதோ ஸுபரிஸுத்³தா⁴னஞ்ச வண்ணகஸிணானங் தோ³ஸவத்து²த்தாபா⁴வதோ சதஸ்ஸோஅப்பமஞ்ஞாயோ.ல. தோ³ஸசரிதஸ்ஸாதி வுத்தங். எத்த²ச ஆதி³கம்மிகஸ்ஸேவாயங் சரியவிபா⁴கோ³. உபெக்கா²ச ஆதி³கம்மிகஸ்ஸ நஸம்ப⁴வதி. வக்க²திஹி உபெக்கா²பஞ்சமஜ்ஜா²னிகாதி. தஸ்மா யஸ்ஸ புரிமா திஸ்ஸோ ஸப்பாயா. தஸ்ஸ தத³னுக³திகா உபெக்கா²பி ஸப்பாயானாம ஹோதீதி கத்வா சதஸ்ஸோ அப்பமஞ்ஞாயோதி வுத்தந்தி த³ட்ட²ப்³ப³ங். இதரதா² நிஸ்ஸரணஞ்ஹேதங் ராக³ஸ்ஸ. யதி³த³ங் உபெக்கா² சேதோ விமுத்தீதி வசனதோ உபெக்கா² ராக³சரிதஸ்ஸாதி வத்தப்³ப³ங் ஸியாதி. நீலாதீ³னிச சத்தாரி கஸிணானீதி இத³ஞ்ச மனாபியரூபானி நீலாதீ³னி ஸந்தா⁴ய வுத்தங். அமனாபியானி பன தானி ராக³சரிதஸ்ஸேவ ஸப்பாயானீதி. ஆனாபாணஸதி பா⁴வேதப்³பா³ விதக்குபச்சே²தா³யாதி வசனதோ ஆனாபாணங்விதக்கசரிதஸ்ஸாதி வுத்தங். மோஹசரிதோ பன பகதியா பமாத³ப³ஹுலோ ஹோதி விக்கி²த்தசித்தோச. ஆனாபாணஞ்சனாம நிரந்தரங் பவத்தமானங் தஸ்ஸ ஸதிங் உப்பாதெ³ந்தங் விய பவத்ததீதி தங் மோஹசரிதஸ்ஸஸப்பாயந்தி வுத்தங் ஸியா.
[244] விபா⁴வனியங் பன
பு³த்³தி⁴விஸயபா⁴வேன மோஹபடிபக்க²த்தாதி காரணங் வுத்தங். தங் யுத்தங் விய ந தி³ஸ்ஸதி.
ஏவஞ்ஹி பு³த்³தா⁴னுஸ்ஸதி ஆத³யோ.ல. ஸத்³தா⁴சரிதஸ்ஸாதி. பரமத்த²தோ ஸுகு²மதரானி மரணாதீ³னி விபுலபு³த்³தீ⁴னங் ஏவ விஸயானாம ஹொந்தீதி வுத்தங் மரண. ல. பு³த்³தி⁴சரிதஸ்ஸாதி. ஸேஸானிபனஸப்³பா³னிபீதி சத்தாரி பூ⁴த கஸிணானி த்³வே ஆலோகாகாஸகஸிணானி சத்தாரோ ஆருப்பாசாதி த³ஸவிதா⁴னி கம்மட்டா²னானி. தத்தா²பீதி தேஸு த³ஸஸு ஸேஸ கம்மட்டா²னேஸுபி. புது²லங் க²லமண்ட³லாதி³பமாணங் மோஹசரிதஸ்ஸ ஸப்பாயங். ஸம்பா³த⁴ஸ்மிஞ்ஹி ஓகாஸே சித்தங் பி⁴ய்யோ ஸங்மோஹங் ஆபஜ்ஜதீதி. கு²த்³த³கங் வித³த்தி²சதுரங்கு³லபமாணங் விதக்கசரிதஸ்ஸேவ ஸப்பாயங். மஹந்தஞ்ஹி விதக்கஸந்தா⁴வனஸ்ஸ பச்சயோ ஹோதீதி. தத்த²ச விதக்கசரிதஸ்ஸேவாதி எத்த² ஏவஸத்³தோ³ கு²த்³த³கந்திபதே³ யுஜ்ஜதி. விதக்கசரிதஸ்ஸ கு²த்³த³கமேவ ஸப்பாயங். ந புது²லந்தி. ஸப்³ப³ஞ்சேதங் உஜுவிபச்சனிகவஸேனசேவ அதிஸப்பாயதாயச வுத்தங். ராகா³தீ³னங் பன அவிக்க²ம்பி⁴கா ஸத்³தா⁴தீ³னஞ்ச அனுபகாரிகா குஸலபா⁴வனானாம நத்தீ²திபி அட்ட²கதா²யங் வுத்தங். ஸப்³ப³த்தா²பீதி ஸப்³பே³ஸுபி சத்தாலீஸ கம்மட்டா²னேஸு. பரிகம்மபா⁴வனா லப்³ப⁴தேவ பரிகம்மேன வினா ஏகஸ்ஸபி கம்மட்டா²னஸ்ஸ அஸம்பஜ்ஜனதோ. த³ஸஸுகம்மட்டா²னேஸுஉபசாரபா⁴வனாவ ஸம்பஜ்ஜதி நத்தி² அப்பனா. கஸ்மா இதி சே. பு³த்³த⁴ த⁴ம்ம ஸங்க⁴ ஸீல சாக³ தே³வதா உபஸம கு³ணானங் தாவ க³ம்பீ⁴ரதாய நானாப்பகாரகு³ணா நுஸ்ஸரணாதி⁴முத்ததாயகா³தி ஹி அட்ட²கதா²யங் வுத்தங். தத்த² க³ம்பீ⁴ர தாயாதி ஏதேன ஏகேகஸ்ஸபி கு³ணபத³ஸ்ஸ க³ம்பீ⁴ரத்தா தப்³பி³ஸயோ ஸமாதி⁴ மஹாஸமுத்³தே³ ஸஸகோ விய தத்த² அப்பனங் பத்வா நிச்சலபா⁴வேன பதிட்டா²துங் நஸக்கோதீதி த³ஸ்ஸேதி. நானாப்பகார கு³ணானுஸ்ஸரணாதி⁴முத்ததாயவாதி ஏதேன தேஸங் கு³ணானங் அதப்ப நியஸபா⁴வத்தா எத்தகேஏவ கு³ணபதே³ ட²த்வா அப்பனங் பாபெஸ்ஸாமீதி அத்தனோ சித்தங் ஸந்தா⁴ரேதுங்பி நஸக்கோதீதி த³ஸ்ஸேதீதி. ஸேஸேஸு பன மரணஸஞ்ஞாவவத்தா²னேஸு மரணங் தாவ ஸபா⁴வ த⁴ம்மத்தா ஸங்வேஜனீயத⁴ம்மத்தாச இதரானிச த்³வே ஸபா⁴வத⁴ம்மதாய க³ம்பீ⁴ரத்தா தத்தா²பீதி தேஸு ஸமதிங்ஸஅப்பனாகம்மட்டா²னேஸுபி. பஞ்சகஜ்ஜா²னே நியுத்தானி பஞ்சகஜ்ஜா²னி கானி. ஜா²னபஞ்சகஸ்ஸ ஆரம்மணபா⁴வயொக்³யானீதி வுத்தங்ஹோதி. படிகூலாரம்மணானினாம அதிஅனிட்டா²னி லூகா²னி சித்தரபி⁴ஜனநே பரிது³ப்³ப³லானி ஹொந்தீதி ந தானி அத்தனி சித்தங் ரோசெத்வா த²பேதுங் ஸக்கொந்தி. தஸ்மா விதக்கேன வினா சித்தங் தத்த² ஏகக்³க³ங் ஹுத்வா ந திட்ட²தி. விதக்கப³லேனேவ திட்ட²தீதி வுத்தங் த³ஸஅஸுபா⁴.ல. பத²மஜ்ஜா²னிகாதி. யதி³ஏவங் கத²ங் தேஸு ஸோமனஸ்ஸஜ்ஜா²னங் ஹோதீதி நீவரணஸந்தாபங் பஹானப³லேனசேவ தங் தங் ஆனிஸங்ஸத³ஸ்ஸன ஞாணப³லேனச. ப்³யாதி⁴து³க்க²பீளிதஸ்ஸ ரோகி³னோ வமனவிரேசனபவத்தியங் விய ப³ஹுங் தா³னி வெத்தனங் லபி⁴ஸ்ஸாமீதி ஆனிஸங்ஸத³ஸ்ஸாவினோ புப்ப²ச்ச²ட்டகஸ்ஸ கூ³த²ராஸித³ஸ்ஸனே விய சாதி த³ட்ட²ப்³ப³ங். மெத்தாத³யோ தயோ ப்³ரஹ்மவிஹாரா தோ³மனஸ்ஸஸமுட்டி²தானங் ப்³யாபாத³விஹிங் ஸாஅரதீனங் நிஸ்ஸரணபூ⁴தா ஹொந்தீதி ந தே கதா³சி ஸோமனஸ்ஸேன வினா அப்பனங் பாபுணந்தீதி வுத்தங் மெத்தாத³யோ தயோ சதுக்கஜ்ஜா²னிகாதி. உபெக்கா² பன ஸத்தேஸு ஸப்³ப³ஸோ உதா³ஸினபக்கே² ட²த்வா பா⁴விதப்³ப³த்தா கதா³சிபி உபெக்கா²வேத³னாய வினா அப்பனங் நபாபுணாதீதி வுத்தங் உபெக்கா²பஞ்சமஜ்ஜா²னிகாதி. சத்தாரோபனஆருப்பாதி கஸிணுக்³கா⁴டிமாகாஸாதீ³னி சத்தாரி ஆருப்பாரம்மணானி. ஸப்³ப³த்தா²பீதி ஸப்³பே³ஸுபி சத்தாலீஸகம்மட்டா²னேஸு. யதா²ரஹந்தி தங்தங்ஆரம்மணானுரூபங். ஆரம்மணேன வினா பரிகம்மங்னாம ந ஸிஜ்ஜ²தி. ஆரம்மணஸ்ஸ ஸுட்டு² பரிகம்மனிமித்தங்.ல. லப்³ப⁴ந்தேவாதி. தத்த² ஸப்³ப³த்தா²பீதி ஸப்³பே³ஸுபி சத்தாலீஸகம்மட்டா²னேஸு. யதா²ரஹந்தி தங்தங்கம்மட்டா²னானுரூபங். பரியாயேனாதி இத³ங் பன கஸ்ஸசி ஆரம்மணஸ்ஸ சக்கு²னா பஸ்ஸந்தஸ்ஸேவ அவிபூ⁴ததரத்தா வுத்தங். யத்த² பன பத²மங் ஸபா⁴வத⁴ம்மங் க³ண்ஹித்வா பச்சா² தாதி³ஸே ததா³காரே தங்ஸண்டா²னே பஞ்ஞத்தாரம்மணே உபசாரோவா அப்பனாவா பவத்ததி. தத்தே²வ படிபா⁴க³னிமித்தங்னாம லப்³ப⁴தீதி வுத்தங் படிபா⁴க³ நிமித்தங்பனாதிஆதி³. வுத்தமேவத்த²ங் த³ள்ஹங் கரொந்தோ தத்த²ஹீதிஆதி³மாஹ. ஏவங் ஸமத²கம்மே பத²மங் உக்³க³ஹகோஸல்லங் த³ஸ்ஸெத்வா இதா³னி ஆதி³தோ பட்டா²ய பா⁴வனாவிதா⁴னங் த³ஸ்ஸெந்தோ கத²ந்திஆதி³ மாஹ. நிமித்தங் உக்³க³ண்ஹந்தஸ்ஸாதி ஆரம்மணஸ்ஸ யதா² ஸண்டி²தங் ஆகாரங் சித்தே உபருபரி விபூ⁴தங் கத்வா க³ண்ஹந்தஸ்ஸ ஸமனுபஸ்ஸந்தஸ்ஸ. ஸாசபா⁴வனாதி உக்³க³ஹணாகாரேன பவத்த ஜவனவீதி²பரங்பரஸங்கா²தா ஸா சித்தபா⁴வனா பரிகம்மபா⁴வனா நாம. புனப்புனங் கரணவஸேன வட்³ட⁴னாகாரஸண்டி²தத்தா. ஸமுக்³க³ஹிதங் ஹோதீதி வத்வா யதா² ஸுட்டு² உக்³க³ஹிதங் ஸமுக்³க³ஹிதங்னாம ஹோதி தங் த³ஸ்ஸேதுங் சக்கு²னாபஸ்ஸந்தஸ்ஸேவமனொத்³வாரஸ்ஸ ஆபாதமாக³தந்தி வுத்தங். தத்த² மனொத்³வாரஸ்ஸஆபாதமாக³தந்தி சக்கூ²னி நிம்மிலித்வாவா அஞ்ஞஸ்மிங் டா²னே ட²த்வாவா ஆவஜ்ஜந்தஸ்ஸ சக்கு²னா தி³ட்ட²ஸதி³ஸங் மனொத்³வாரே பச்சுபட்டி²தங் ஹோதி. உக்³க³ஹனிமித்தங்னாம. ஸுட்டு² அவினஸ்ஸமானங் கத்வா க³ஹிதத்தா. ஸாச பா⁴வனா ஸமாதி⁴யதி. ந தாவ பா⁴வனந்தரபா⁴வங் பாபுணாதீதி அதி⁴ப்பாயோ. ததா² ஸமாஹிதஸ்ஸாதி தேன மத்த²கபத்தேன பரிகம்மஸமாதி⁴னா ஸமாஹிதஸ்ஸ ஏதஸ்ஸ யோகி³னோ. ததோபரந்தி உக்³க³ஹனிமித்துப்பத்தி தோ பரங். பா⁴வனமனுயுஞ்ஜந்தஸ்ஸ சித்தே ஸன்னிஸின்னந்தி ஸம்ப³ந்தோ⁴. தத்த² அனுயுஞ்ஜந்த²ஸ்ஸாதி நிரந்தரங் பத³ஹந்தஸ்ஸ. தப்படிபா⁴க³ந்தி ஸபா⁴வ த⁴ம்மபூ⁴தேன தேன உக்³க³ஹனிமித்தேன ஸதி³ஸங். வத்து²த⁴ம்மவிமுச்சிதந்தி மேக⁴வலாஹகந்தரதோவா ராஹுமுக²தோவா நிக்க²ந்தசந்த³மண்ட³லங் விய பா⁴வனா மயந்தி கேவலங் பா⁴வனாசித்தப³லேன பஸித்³த⁴ங். ஆலம்ப³ணந்தி ததே³வ ஸமுக்³க³ஹிதங் நிமித்தாலம்ப³ணங் சித்தேஸன்னிஸன்னங்ஸமப்பிதங்ஹோதீதி மனொத்³வாரிகசித்தஸந்தானே ஸன்னிஸின்னங் நிச்சலபா⁴வேன ஸண்டி²தங் ஹுத்வா ஸுட்டு² அப்பிதங் பவேஸிதங் ஹோதி. தந்தி நிமித்தாலம்ப³ணங் பவுச்சதீதி ஸம்ப³ந்தோ⁴. யஸ்மா சந்த³மண்ட³லாதி³கஸ்ஸ விய தஸ்ஸ நிமித்தாலம்ப³ணஸ்ஸ பரிஸுத்³த⁴பரியோதா³தபா⁴வேன உபட்டி²ததானாம கிலேஸமலவிக்க²ம்ப⁴னேன பரிஸுத்³த⁴பரியோதா³தபா⁴வங் பத்வா ஓபா⁴ஸஜாதஸ்ஸ சித்தஸ்ஸ வஸேனேவ ஹோதி. ந தஸ்ஸ ஆலம்ப³ணஸ்ஸ வஸேன. நஹி பஞ்ஞத்தி த⁴ம்மே தாதி³ஸோ கு³ணோனாம உபலப்³ப⁴தீதி. தஸ்மா படிபா⁴க³ நிமித்தே ஸமுப்பன்னே நீவரணஸங்கா²தானங் படிப³ந்த⁴கத⁴ம்மானங் விக்க²ம்பி⁴ததா ஸித்³தா⁴ ஹோதீதி வுத்தங் ததோபட்டா²யாதிஆதி³. படிப³ந்த⁴ந்தி நீவாரெந்தி நிஸ்ஸரணபக்கி²கங் சித்தங் பாதெந்தீதி படிப³ந்தா⁴. நீவரண த⁴ம்மா. விஸேஸேன பஹீனா படிப³ந்தா⁴ ஏதாயாதி படிப³ந்த⁴விப்பஹீனா. ஸமாஸேவந்தஸ்ஸாதி ஸுட்டு² ஆஸேவந்தஸ்ஸ. ஸத்தவித⁴ங் நிமித்த ரக்க²ணவிதா⁴னங் ஸம்பாதெ³த்வா சக்கவத்திக³ப்³ப⁴ங் விய ஸுட்டு² ரக்கி²த்வா புனப்புனங் பா⁴வனாவஸேன ஸேவந்தஸ்ஸாதி அத்தோ².
ஆவாஸோ கோ³சரோ ப⁴ஸ்ஸங், புக்³க³லோ போ⁴ஜனங் உது;
இரியாபதோ²தி ஸத்தே தே, அஸப்பாயே விவஜ்ஜயே.
ஸப்பாயே ஸத்த ஸேவேத², ஏவஞ்ஹி படிபஜ்ஜதோ;
நசிரேனேவ காலேன, ஹோதி கஸ்ஸசி அப்பனாதி ஹி வுத்தங்.
ரூபாவசரபத²மஜ்ஜா²னங்அப்பேதீதி காமதண்ஹாய விஸயபா⁴வங் அதிக்கமித்வா ஸாதிஸயங் ஸண்ஹஸுகு²மபா⁴வப்பத்தங் உபசாரஜ்ஜா²னதோ ஸதகு³ணேனவா ஸஹஸ்ஸகு³ணேனவா தி²ரதரஜ்ஜா²னங்க³யுத்தங் ரூபாவசர ஸங்கா²தங் பத²மஜ்ஜா²னங் தஸ்மிங் நிமித்தே அனுபவிஸித்வா விய வத்ததீதி அத்தோ². தமேவ பத²மஜ்ஜா²னங் வஸீபூ⁴தங் கத்வாதி ஸம்ப³ந்தோ⁴. பஞ்சஸு வஸீதாஸு பன பத²மஜ்ஜா²னதோ வுட்டா²ய பத²மங் விதக்கங் ஆவஜ்ஜதி. ததோ விசாரங். ததோ பீதிங். ததோ ஸுக²ங். ததோ ஸமாதி⁴ங். ததோ
விபா⁴வனியங் பன
யத்தகங் காலங் இச்ச²தி. தத்தகங் சிரதரங் ஜா²னங் த²பேதுங் ஸமத்த²தா அதி⁴ட்டா²னவஸிதானாமாதிபி வுத்தங். ததா² பரிச்சி²ன்ன காலதோ அந்தோ அவுட்ட²ஹித்வா யதா²பரிச்சி²ன்னகாலவஸேனேவ வுட்டா²னஸமத்த²தா வுட்டா²னவஸிதானாமாதி. தங்பி யுஜ்ஜதியேவ.
பாளியஞ்ஹி பத²மஜ்ஜா²னங் யத்தி²ச்ச²கங் யதி³ச்ச²கங் யாவதிச்ச²கங் அதி⁴ட்டா²தி. அதி⁴ட்டா²னாய த³ந்தா⁴யிதத்தங் நத்தீ²திஆதி³னா ஸீக⁴தரங்வா ஹோது. விதக்காதி³கங் ஓளாரிகங்க³ங் பஹானாயாதி எத்த² பத²மஜ்ஜா²னங் தாவ வஸீபூ⁴தங் கத்வா டி²தஸ்ஸ விதக்கோ ஓளாரிகதோ உபட்டா²தி. ததா³ அஹோவதமே அவிதக்கங் ஜா²னங் அஸ்ஸாதி ஏவமஸ்ஸ அஜ்ஜா²ஸயோ ஸண்டா²தி. ததா³ அவிதக்கங் ஜா²னங் ஸமாபஜ்ஜிஸ்ஸாமீதி புன தஸ்மிங் படிபா⁴க³னிமித்தே பரிகம்மங் கரொந்தஸ்ஸ ஸா பா⁴வனா விதக்கவிராக³பா⁴வனானாம ஹோதி. ஸாபி யாவ விதக்கே நிகந்தி ந பரியாதி³யதி, தாவ பரிகம்மபா⁴வனானாம. பரியாதி³ன்னாய பன விதக்கனிகந்தியா உபசார பா⁴வனானாம ஹோதி. ஏஸனயோ ஸேஸஜ்ஜா²னுபசாரேஸுபி. ஏவங் தங்தங்ஜா²னங்க³விராக³பா⁴வனாப³லேன விதக்காதி³கஸ்ஸ ஓளாரிகஸ்ஸ தஸ்ஸ தஸ்ஸ ஜா²னங்க³ஸ்ஸ பஜஹனத்தா²ய. விசாராதி³ஸுகு²மங்கு³ப்பத்தியாதி விசாராதீ³னங் ஸுகு²மானங் சதுன்னங் திண்ணங் த்³வின்னங் புன த்³வின்னங்வா ஜா²னங்கா³னங் தேன தேன விதக்காதி³னா ஓளாரிகேன அங்கே³ன வினா புன உப்பத்தியா. பாஹதோதி பத³ஹந்தஸ்ஸ. பதா⁴னநாமகங் ஆதாபவீரியங் கரொந்தஸ்ஸாதி அத்தோ². து³தீயஜ்ஜா²னாத³யோதி து³தீயஜ்ஜா²னாதீ³னி ஸேஸரூபாவசரஜ்ஜா²னானி. யதா²ரஹந்தி இத³ங் த்³வாவீஸகம்மட்டா²னேஸு து³தீயஜ்ஜா²னாதீ³னங் அனுரூபானி கஸிணஆனாபாணானி ஸந்தா⁴ய வுத்தங். அவஸேஸேஸு பன அட்டா²ரஸகம்மட்டா²னேஸு யஸ்மா அரூபஜ்ஜா²னானி நாம ஆரம்மணாதிக்கமனவஸேனேவ பவத்தந்தி. தத³திக்கமனத்த²ஞ்ச கஸிணுக்³கா⁴டனங்னாம ஹோதி. தஸ்மா யேஸு தது³க்³கா⁴டனங் ஸம்ப⁴வதி. தானியேவ கஸிணானி த³ஸ்ஸேதுங் ஆகாஸவஜ்ஜிதகஸிணேஸூதி வுத்தங். ஆகாஸகஸிணஞ்ஹி உக்³கா⁴டீயமானங்பி ஆகாஸ மேவ ஹோதீதி நத்தி² தத்த² தத³திக்கமனஸம்ப⁴வோதி. உக்³கா⁴டெத்வாதி யதா²தி³ட்டே² அனந்தவஸேனாதி அனந்தங் ஆகாஸந்தி ஏவங் பவத்தமனஸிகாரவஸேன. ஸந்தமேதங் பணீதமேதந்தி பரிகம்மங் கரொந்தஸ்ஸாதி எத்த² ததா² ஸம்பா⁴வெத்வா பரிகம்மங் கரொந்தஸ்ஸபி ஆரம்மணஸ்ஸ ஸமதிக்கந்தத்தா உபரி ஜா²னங் ஹோதியேவாதி வுத்தங் சதுத்தா²ருப்பமப்பேதீதி. பரிகம்மங்கத்வாதி ஸோ ப⁴க³வா இதிபி அரஹந்திஆதி³னா ஸமனுஸ்ஸரணபரிகம்மங் கத்வா. தஸ்மிந்தி தஸ்மிங் பு³த்³த⁴கு³ணாதி³கே ஆலம்ப³ணே. பூ⁴மத்தே² சேதங் பு⁴ம்மவசனங். நிமித்தேதி தஸ்ஸ ஆரம்மணஸ்ஸ ஆகாரஸங்கா²தே நிமித்தே. பா⁴வலக்க²ணே சேதங் பு⁴ம்மவசனங். ஸாது⁴கமுக்³க³ஹிதேதி ஆரம்மணஸ்ஸ விபூ⁴ததர வஸேனவா சித்தஸ்ஸ தஸ்மிங் நின்னபோணபப்³பா⁴ரவஸேனவா ஸுட்டு² உக்³க³ஹிதே. உபசாரோச ஸம்பஜ்ஜதி அரியஸாவகானங் தி³ட்ட²ஸச்சானந்தி அதி⁴ப்பாயோ. இதரேஸங்பி வா மரணஸஞ்ஞாவவத்தா²னேஸூதி. எத்த²ச நீவரணவிக்க²ம்ப⁴னேன ஜா²னங்க³பாதுபா⁴வேனசஉபசாரஸம்பதா³ வேதி³தப்³பா³. ஏவங் சத்தாலீஸகம்மட்டா²னேஸுயதா²ரஹங்ஸமத²ஜ்ஜா²னானங் பவத்திங் த³ஸ்ஸெத்வாஇதா³னிதேஸுஸமத²ஜ்ஜா²னேஸுகஸிணஜ்ஜா²னானங் நிஸந்த³பூ⁴தங்அபி⁴ஞ்ஞா பவத்திங் த³ஸ்ஸேதுங் அபி⁴ஞ்ஞாவஸேனபவத்தமானந்திஆதி³ வுத்தங். தத்த² யோ கதாதி⁴காரோ ஹோதி. ஆஸன்னப⁴வே ஸமத²ஜ்ஜா²னேஸு கதாபி⁴யோகோ³வா ஹோதி, பூரிதபோ³தி⁴ஸம்பா⁴ரோ மஹாபுரிஸ ஜாதிகோவா. தஸ்ஸ அட்ட²விதே⁴ஸு நவவிதே⁴ஸுவா ஸமத²ஜ்ஜா²னேஸுஸிஜ்ஜ² மானேஸு அபி⁴ஞ்ஞாபி ஸிஜ்ஜ²தியேவ. ரூபஜ்ஜா²னமத்தேஸுபி ஸிஜ்ஜ²ந்தேஸு ஸிஜ்ஜ²தி யேவாதிபி வத³ந்தி. தேனேவ ஹி அட்ட²ஸாலினியங் விஸுத்³தி⁴மக்³கே³ச ஆருப்பஜ்ஜா²னானங்பச்சயபா⁴வங்அனுபக³தஸ்ஸபிஆகாஸகஸிணஜ்ஜா²னஸ்ஸ அபி⁴ஞ்ஞாபாத³கதாஸம்ப⁴வோ வுத்தோதி. தீ³க⁴னிகாயட்ட²கதா²யங் பன நஹி அட்ட²ஸு ஸமாபத்தீஸு சுத்³த³ஸஹாகாரேஹி சிண்ணவஸீபா⁴வங் வினா உபரி அபி⁴ஞ்ஞாபாத³கபஞ்சமஜ்ஜா²னா வுட்ட²ஹித்வாதி அபி⁴ஞ்ஞாய பாத³கத்தா²ய யங்அபி⁴ஞ்ஞாஜாதிகங் ரூபாவசரபஞ்சமஜ்ஜா²னங் ஸப்³ப³பத²மங் ஸமாபஜ்ஜியதி. ததோ ப⁴வங்க³பவத்திவஸேன வுட்ட²ஹித்வா. அதி⁴ட்டா²தப்³ப³ந்தி அதி⁴ட்டெ²ய்யங். ஸவத்து²கங் ஸதரூபஸஹஸ்ஸரூபாதி³கங் நிம்மிதரூபங். தங் அதி⁴ட்டெ²ய்யங் ஆதி³ யஸ்ஸ அவத்து²கஸ்ஸ ஆவிபா⁴வதிரோபா⁴வாதி³கஸ்ஸ கம்மஸ்ஸாதி அதி⁴ட்டெ²ய்யாதி³கங். ஆவஜ்ஜித்வா பரிகம்மங்கரொந்தஸ்ஸாதி எத்த² இத்³தி⁴விதே⁴ தாவ யங்யங்ஸதாதி³கங் நிம்மிதரூபங்வா ஆவிபா⁴வாதி³கங் நிம்மிதகம்மங்வா நிப்பா²தே³துங் இச்ச²தி. தங் தங் அவஜ்ஜித்வா ஸல்லக்கெ²த்வா ஸதங் ஹோமி ஸஹஸ்ஸங் ஹோமீதிவா ஸதங் ஹோது ஸஹஸ்ஸங் ஹோதூதிவா இத³ஞ்சித³ஞ்ச ஹோது ஏவஞ்சேவஞ்ச ஹோதூதிவா பரிகம்மங் கரொந்தஸ்ஸ. தி³ப்³ப³ஸோதாதீ³ஸு பன யங் யங் ஆரம்மணங் ஸோதுங்வா பஸ்ஸிதுங்வா ஜானிதுங்வா அனுஸ்ஸரிதுங்வா இச்ச²தி. தங் தங் ஸல்லக்கெ²த்வா அஸுகஸ்ஸ அஸுகானங்வா ஸத்³த³ங் ஸுணோமீதிஆதி³னா பரிகம்மங் கரொந்தஸ்ஸ. அட்ட²கதா²யங் பன பரிகம்மங் கத்வா புன பாத³கஜ்ஜா²னஸமாபஜ்ஜனங் ஆக³தமேவ. யதா²ஹ அபி⁴ஞ்ஞாபாத³கஜ்ஜா²னங் ஸமாபஜ்ஜித்வா வுட்டா²ய ஸசே ஸதங் இச்ச²தி. ஸதங் ஹோமீதி பரிகம்மங் கத்வா புன அபி⁴ஞ்ஞாபாத³கங் ஜா²னங் ஸமாபஜ்ஜித்வா வுட்டா²ய அதி⁴ட்டா²தி. அதி⁴ட்டா²னசித்தேன ஸஹேவ ஸதங் ஹோதீதி. ரூபாதீ³ஸுஆலம்ப³ணேஸுயதா²ரஹமப்பேதீதி எத்த² இத்³தி⁴வித⁴ஞாணங் தாவ தேகாலிகபூ⁴தேஸு ச²ஸு ஆரம்மணேஸு பவத்ததி. தஞ்ஹி ரூபாதீ³ஸு ச²ஸு ஆரம்மணத⁴ம்மேஸு யங் யங் நிப்பா²தே³தி. தங் தங் ஆரம்மணங் கத்வா பவத்ததி. பாத³கஜ்ஜா²னசித்தங் பன காயக³திகங் அதி⁴ட்ட²ஹித்வா தி³ஸ்ஸமானேனகாயேன ஆகாஸேக³மனகாலே அதீதங் பாத³கஜ்ஜா²னசித்தங் ஆரப்³ப⁴ பவத்ததி. காயங் சித்தக³திகங் அதி⁴ட்ட²ஹித்வா அதி³ஸ்ஸமானேன காயேன க³மனகாலே பச்சுப்பன்னங் ரூபகாயங் ஆரப்³ப⁴ பவத்ததி. ததா²பவத்தமானஸ்ஸ பன தஸ்ஸ ஞாணஸ்ஸ கிஞ்சிரூபங் ஆரம்மண மத்தங் ஹோதி. கிஞ்சி ஆரம்மணபுரேஜாதங். கிஞ்சி வத்தா²ரம்மண புரேஜாதங் ஹோதீதி த³ட்ட²ப்³ப³ங். அனாக³தே இத³ங்னாம ஹோதூதி அதி⁴ட்டா²ன காலே அனாக³தங் தங்தங்ரூபத⁴ம்மங் ஆரப்³ப⁴ பவத்ததீதி. பச்சுப்பன்னோ ஸத்³தோ³ தி³ப்³ப³ஸோதஸ்ஸ ஆரம்மணங் ஹோதி. அதீதே ஸத்ததி³வஸானி அனாக³தே ஸத்ததி³வஸானீதி எத்த²ந்தரே காலே அதீதா நாக³தபச்சுப்பன்னபூ⁴தங் பரஸ்ஸசித்தங் சத்தாரோவா க²ந்தா⁴ சேதோபரிய ஞாணஸ்ஸ. சித்தஞ்ஹி ஜானந்தோ தங் ஸம்பயுத்தத⁴ம்மங்பி இச்ச²ந்தோ ஜானிஸ்ஸதியேவ. ஏவஞ்ச கத்வா பட்டா²னே குஸலா க²ந்தா⁴ சேதோ பரியஞாணஸ்ஸ யதா²கம்முபக³ஞாணஸ்ஸ ஆரம்மணபச்சயேன பச்சயோதி ஞாணத்³வயங் ஏகதோ கத்வா வுத்தங். எத்த²ச அட்ட²கதா²யங் தாவ பரசித்தஸ்ஸ பச்சுப்பன்னாலம்ப³ணதானாம ஸந்ததிவஸேனவா அத்³தா⁴ வஸேனவா இத்³தி⁴வித⁴ங். தங் பன திவித⁴ங் அதி⁴ட்டா² நித்³தி⁴ விகுப்³ப³னித்³தி⁴ மனோமயித்³தி⁴ வஸேன. தத்த² அத்தனோ பகதிவண்ணங் அவிஜஹித்வா தஸ்ஸேவ ஸத ஸஹஸ்ஸாதி³ ப³ஹுபா⁴வ கரண வஸேனவா ஆகாஸக³மனாதி³வஸேன வா ப³ஹித்³தா⁴ நானாவண்ண பாடிஹாரிய அதி⁴ட்டா²னித்³தி⁴னாம. பகதிவண்ணங் பன விஜஹித்வா அத்தானமேவ குமாரவண்ணனாக³வண்ணாதி³கங் கத்வா த³ஸ்ஸனவஸேன பவத்திதா இத்³தி⁴ விகுப்³ப³னித்³தி⁴னாம. அத்தனோ ஸரீரப்³ப⁴ந்தரே அஞ்ஞங் ஸப்³ப³ஸோ அத்தனா ஸதி³ஸங் ஸரீரங் நிம்மினித்வா நீஹரித்வா த³ஸ்ஸனவஸேன பவத்திதா இத்³தி⁴ மனோமயித்³தி⁴னாம. தி³வே ப⁴வங் தி³ப்³ப³ங். தே³வலோகே ஜாதந்தி அத்தோ². தி³ப்³ப³ஞ்ச தங் ஸோதஞ்சாதி தி³ப்³ப³ஸோதங். தே³வானங் உளாரகம்மனிப்³ப³த்தா தூ³ரேபி படிச்ச²ன்னேபி ஆரம்மணஸம்படிச்ச²னஸமத்த²ங் பஸாத³ஸோதங். தி³ப்³ப³ஸோதஸதி³ஸத்தா பன இத³ங் அபி⁴ஞ்ஞாஞாணங்பி தி³ப்³ப³ஸோதந்தி வுச்சதி. கஸிணஜ்ஜா²ன ஸங்கா²தேனவா தி³ப்³ப³விஹாரேன படிலத்³த⁴த்தா ஸயஞ்ச தஸ்மிங் தி³ப்³ப³விஹாரே பரியாபன்னத்தா தி³ப்³ப³ஞ்ச தங் ஸோதஞ்சாதி தி³ப்³ப³ஸோதங். பரஸ்ஸ சித்தங் விஜானந்தி ஏதேனாதி பரசித்தவிஜானநங். ததே³வ சேதோபரியாயந்தி பரிச்சி²ஜ்ஜ ஜானந்தி ஏதேனாதி கத்வா சேதோபரியஞாணந்திபி வுச்சதி. புப்³பே³ நிவாஸோ வுச்சதி அதீதப⁴வேஸு அத்தனோ ச²ஸு த்³வாரேஸு ஆபாதங் ஆக³தா ஸுட்டு² விதி³தா த⁴ம்மா. புப்³பே³ அதீதஜாதீஸு கோ³சர நிவாஸவஸேன நிவஸிங்ஸு அத்தனோ ச²த்³வாரிகானி சித்தானி எத்தா²தி கத்வா. ஸப்³ப³ஞ்ஞுபு³த்³தா⁴னங் பன பரேஸங் ச²த்³வாரக³ஹிதாபி த⁴ம்மா புப்³பே³ நிவாஸோ ஹோதியேவ, புப்³பே³ நிவாஸஸ்ஸ அனுஸ்ஸரணங் புப்³பே³னிவாஸானுஸ்ஸதி. இத⁴ பன தங் ஸம்பயுத்தஞாணங் அதி⁴ப்பேதங். புப்³பே³ வுத்தனயேன தி³ப்³ப³ஞ்ச தங் சக்கு²சாதி தி³ப்³ப³சக்கு². தங் ஸதி³ஸத்தா இத³ங் அபி⁴ஞ்ஞாஞாணங்பி தி³ப்³ப³சக்கூ²தி வுச்சதி. தி³ப்³ப³விஹார வஸேன படிலத்³த⁴த்தா ஸயஞ்ச தி³ப்³ப³விஹாரஸன்னிஸ்ஸிதத்தா தி³ப்³ப³ஞ்ச தங் சக்கு²சாதி தி³ப்³ப³சக்கு². யதா²கம்முபக³ஞாணங் அனாக³தங்ஸஞாணந்தி இமானி த்³வே ஞாணானி இமஸ்ஸேவ பரிப⁴ண்ட³ஞாணானினாம. நஹி தேஸங் படிலாப⁴த்தா²ய விஸுங் சித்தபரித³மனபரிகம்மங்னாம அத்தி². தி³ப்³ப³சக்கு²ஞாணே படிலத்³தே⁴ தேஸங்பி படிலத்³த⁴த்தாதி. தத்த² தி³ப்³ப³சக்கு²னா நிரயேஸு து³க்க²ங் தே³வேஸுவா ஸுக²ங் அனுப⁴வந்தே ஸத்தே தி³ஸ்வா தேஸங் அதீதங் கம்மங் ஜானிஸ்ஸாமீதி பரிகம்மங் கரொந்தஸ்ஸ தங் கம்மாரம்மணங் யதா²கம்முபக³ஞாணங் பவத்ததி. ததோ சவித்வா கத்த² ப⁴விஸ்ஸந்தீதி தேஸங் அனாக³தே பவத்திங் பஸ்ஸிஸ்ஸாமீதி பரிகம்மங்
விபா⁴வனியங் பன
அனாக³தே ஸத்ததி³வஸதோ பட்டா²ய சித்தசேதஸிகத⁴ம்மா து³தீயதி³வஸதோ பட்டா²ய யங்கிஞ்சி ஆரம்மணங் ஏதஸ்ஸ விஸயோதி அதி⁴ப்பேதங். தம்பி யுத்தங்விய தி³ஸ்ஸதி.
நஹி ப⁴வந்தரேபி அனாவதத⁴ம்மே ஜானிதுங் ஸமத்த²ங் ஏதங் இமஸ்மிங் ப⁴வே அனாக³தத⁴ம்மே நஜானாதீதி ஸக்கா ப⁴விதுங். யதா² சேதங், ததா² புப்³பே³னிவாஸஞாணங்பி இமஸ்மிங் ப⁴வே பரஸந்தானக³தே அதீதத⁴ம்மேதி. பாளியங் பன அட்ட²கதா²ஸுச ப⁴வந்தரக³தத⁴ம்மேஹி ஏவ ஞாணத்³வயங் யோஜிதங். தங் பன அஸாதா⁴ரணகாலவஸேன ஆனுபா⁴வவிஸேஸபாகடத்த²ங் யோஜிதந்தி யுத்தங் ஸியாதி. கோ³சரபே⁴தோ³தி த³ஸகஸிணாதீ³ஸு கோ³சரேஸு ஸமத²ஜ்ஜா²னானங் பவத்திபே⁴தோ³.
ஸமத²கம்மட்டா²னநயோ.
171. ஸப்³ப³லோகியமஹாஜனேஹி யதா²தி³ட்ட²ங் புக்³க³லஸத்தஇத்தி² புரிஸாதி³கங் நிச்ச து⁴வ ஸுக² அத்த நிமித்தஞ்ச அதிக்கமித்வா விஸேஸேன பஸ்ஸந்தி ஏதாயாதி விபஸ்ஸனா. கிரியா கம்மங். பா⁴வனாபயோகோ³. விபஸ்ஸனாய கம்மங் விபஸ்ஸனாகம்மங். விபஸ்ஸனா ஏவ வா கம்மந்தி விபஸ்ஸனா கம்மங். விபஸ்ஸனாகம்மஸ்ஸ டா²னங் அதி⁴ட்டா²னங் பு⁴மீதி விபஸ்ஸனாகம்மட்டா²னங். க²ந்தா⁴தி³த⁴ம்மஜாதங். விபஸ்ஸனா கம்மமேவ வா உத்தருத்தரஸ்ஸ பா⁴வனா விஸேஸஸ்ஸ ஆனிஸங்ஸவிஸேஸஸ்ஸவா டா²னங் ஆஸன்னகாரணந்தி விபஸ்ஸனாகம்மட்டா²னங். தஸ்மிங் விபஸ்ஸனாகம்மட்டா²னே ஸத்தவிதே⁴ன விஸுத்³தி⁴ ஸங்க³ஹோ தீணி லக்க²ணானீதிஆதி³னா ஸம்ப³ந்தோ⁴. நிச்சஸீலமேவ ஸயஞ்ச து³ஸ்ஸில்யமலதோ விஸுத்³த⁴த்தா காயங் வாசஞ்ச ததோ விஸோத⁴னதோ விஸுத்³தீ⁴தி ஸீலவிஸுத்³தி⁴. ஸுபா⁴வித சித்தஸந்தானமேவ ஸயஞ்ச சித்தவிஸுத்³தி⁴. சித்தஸீஸேன செத்த² ஸமாதி⁴ அதி⁴ப்பேதோ. த⁴ம்மவவத்தா²னஞாணஸங்கா²தா தி³ட்டி²ஏவ தங் ஸமங்கி³புக்³க³லங் ஸக்காயதி³ட்டி²மலதோ விஸோத⁴னதோ விஸுத்³தீ⁴தி தி³ட்டி²விஸுத்³தி⁴. ஸோளஸவித⁴ங் அட்ட²வித⁴ங் கங்க²ங் விதரந்தி அதிக்கமந்தி ஏதாயாதி கங்கா²விதரணா. பச்சயபரிக்³க³ஹஞாணங். ஸா ஏவ தங்ஸமங்கி³புக்³க³லங் அஹேது தி³ட்டி² விஸமஹேதுதி³ட்டீ²ஹி ஸத்³தி⁴ங் யதா²வுத்தாஹி து³விதா⁴ஹி கங்கா²ஹி விஸோத⁴னதோ விஸுத்³தீ⁴தி கங்கா²விதரணவிஸுத்³தி⁴. மக்³கோ³ச அமக்³கோ³ச மக்³கா³மக்³கா³. தத்த² ஞாணத³ஸ்ஸனவிஸுத்³தா⁴தி⁴க³மனஸ்ஸ உபாயபூ⁴தோ மனஸிகாரவிதி⁴வா அரியமக்³கோ³வா மக்³கோ³னாம. தஸ்ஸ அனுபாயபூ⁴தோ மனஸிகாரோவா அதி⁴மானவத்தூ²னிவா அமக்³கோ³னாம. மக்³க³ஸ்ஸ மக்³க³தோ அமக்³க³ஸ்ஸச அமக்³க³தோ ஜானநங் த³ஸ்ஸனஞ்ச மக்³கா³மக்³க³ஞாணத³ஸ்ஸனங். தமேவ தங்ஸமங்கீ³புக்³க³லங் அமக்³கே³ மக்³க³ஸஞ்ஞாய விஸோத⁴னதோ விஸுத்³தீ⁴தி மக்³கா³மக்³க³ஞாணத³ஸ்ஸனவிஸுத்³தி⁴ நாம. உபரி விஸேஸங் படிபஜ்ஜந்தி ஏதாயாதி படிபதா³. விபஸ்ஸனாபரங்பரஸங்கா²தோ புப்³ப³பா⁴க³மக்³கோ³. படிபதா³பூ⁴தங் ஞாணத³ஸ்ஸனந்தி படிபதா³ஞாணத³ஸ்ஸனங். தமேவ நிச்சஸஞ்ஞாதி³தோ விஸுத்³த⁴த்தா விஸுத்³தீ⁴தி படிபதா³ஞாணத³ஸ்ஸனவிஸுத்³தி⁴நாம, அரியமக்³க³ஞாணஸங்கா²த ஞாணத³ஸ்ஸனமேவ ஸம்மோஹமலதோ விஸுத்³த⁴த்தா விஸுத்³தீ⁴தி ஞாணத³ஸ்ஸனவிஸுத்³தி⁴நாம. எத்த²ச ஸுதமயாதி³வஸேன ஸித்³த⁴ங் அனுமான ஞாணங்பி ஞாணமேவாதி தங் படிக்கி²பித்வா அத்த²பச்சக்க²ஞாணமேவ க³ஹேதுங் ஸப்³ப³த்த² த³ஸ்ஸனக³ஹணங் கதந்தி வேதி³தப்³ப³ங். லக்கீ²யந்தி ஸல்லக்கீ²யந்தி இமே அனிச்சாஏவாதி ஏகந்தேன வினிச்சீ²யந்தி த⁴ம்மா ஏதேனாதி லக்க²ணங் அனிச்சதா ஏவ லக்க²ணந்தி அனிச்சலக்க²ணங். புப்³ப³பதே³ பா⁴வபச்சயலோபோ. அஞ்ஞோஹி அனிச்சோ, அஞ்ஞா அனிச்சதாதி. தத்த² யதா²க³மனக்ரியாயோகே³ன புரிஸோ க³தோதி வுச்சதி. ந பன க³மன க்ரியா புரிஸோ. நச புரிஸோ க³மனக்ரியா. அஞ்ஞா ஹி க்ரியா, அஞ்ஞோ புரிஸோ. ததா² அனிச்சதாயோகே³ன ஸப்³போ³ ஸங்க²தத⁴ம்மோ அனிச்சோதி வுச்சதி. ந பன அனிச்சதா ஸோ த⁴ம்மோ, நச ஸோ த⁴ம்மோ அனிச்சதா. அஞ்ஞா ஹி அனிச்சதா, அஞ்ஞோ ஸோ த⁴ம்மோதி. கதமா பன ஸா அனிச்சதாதி. விபரிணாமா காரோ. ஜீரணாகாரோ அனிச்சானுபஸ்ஸனா. ஏஸ நயோ ஸேஸாஸுபி த்³வீஸு. யாவ ஸரீரே த⁴ம்மானங் திவித⁴லக்க²ணயுத்ததா அத்தனோ ஞாணேன பஞ்ஞாயதி. தாவ தேஸு திவித⁴லக்க²ணவிபா⁴வனவஸேன புனப்புனங் மஸனங் ஆமஸனங் ஸம்மஸனங். ஸம்மஸனாகாரேன பவத்தங் ஞாணங் ஸம்மஸனஞாணங். உத³யோ வுச்சதி தங்தங் க²ணானுரூபங் தங்தங் பச்சயானுரூபஞ்ச நவனவானங் த⁴ம்மானங் பாது பா⁴வோ சேவ உபருபரி வட்³ட⁴னஞ்ச. வயோ வுச்சதி யத்த² யத்த² லத்³த⁴பச்சயா நவனவா த⁴ம்மா பாதுப⁴வந்தி சேவ வட்³ட⁴ந்திச. தத்த² தத்த² அலத்³த⁴பச்சயானங் புராணத⁴ம்மானங் அந்தரதா⁴னங். ஸமூஹ ஸந்ததிவஸேன பன உத³யபக்க²ஸ்ஸவா வயபக்க²ஸ்ஸவா ஸமனுபஸ்ஸனஞாணங் உத³யப்³ப³யஞாணங். தேஸு பன த்³வீஸு பக்கே²ஸு உத³யகொட்டா²ஸோனாம உபருபரி பாகடோ ஹுத்வா ஆக³ச்ச²தி. வயகொட்டா²ஸோ பன அபாகடோ. ஸோ ஏவ ச அனிச்சதாய பரமா கோடீதி தஸ்ஸேவ ஸுட்டு²தரங் ஸமனுபஸ்ஸனஞாணங் ப⁴ங்க³ஞாணங். ப⁴ங்கே³ தி³ட்டே² ஏவங் பி⁴ஜ்ஜனஸபா⁴வானங் த⁴ம்மானங் அனேகஸஹஸ்ஸஸோக து³க்க²வத்து²பா⁴வேன ததா² ததா² பா⁴யிதப்³ப³பகாரஸமனுபஸ்ஸனஞாணங் ப⁴யஞாணங் நாம. லோகே பன கிஞ்சி ப⁴யவத்து²ங் பஸ்ஸந்தாபி ஆஸன்னே அஞ்ஞஸ்மிங் படிஸரணே ஸதி ந பா⁴யந்தி. அஸதி ஏவ பா⁴யந்தி. ஏவங் பா⁴யிதப்³பா³னங் தேஸங் ஸப்³ப³ஸோ அஞ்ஞபடிஸரணாபா⁴வத³ஸ்ஸனங் ஆதீ³னவஞாணங் நாம. குதோசி படிஸரணாபா⁴வேன தேஹி உக்கண்ட²தாகார ஸஹிதங் விபஸ்ஸனாஞாணங் நிப்³பி³தா³ஞாணங்நாம. நிப்³பி³ந்தீ³யமானேஹி தேஹி அத்தானங் விமுச்சிதுங் அஜ்ஜா²ஸயஸஹிதங் விபஸ்ஸனாஞாணங் முச்சிதுகம்யதாஞாணங் நாம. ஸுட்டு² முச்சிதுங் இச்ச²ந்தஸ்ஸ ஸீக⁴ங் முச்சனத்த²ங் தேஸங் த⁴ம்மானங் சத்தாலீஸாய ஆகாரேஹி அனேகாதீ³னவராஸி பா⁴வ படிஸங்கா²ஞாணங் நாம. தேஸங் பன அனேகாதீ³னவராஸிபா⁴வே ஸுட்டு² தி³ட்டே² ஸங்கா²ரேஸு நிகந்தியா பரியாதி³ன்னாய இதா³னி முச்சனுபாயோ லத்³தோ⁴தி அதி⁴மத்தப்³யாபாரங் அகத்வா ஸமேன வாயாமேன ஸங்கா²ரே பரிக்³க³ண்ஹந்தஸ்ஸ ஸங்கா²ரபரிக்³க³ஹே மஜ்ஜ²த்தாகாரஸஹிதங் ஸங்கா²ரேஸுவா ப⁴யஞ்ச நந்தி³ஞ்ச பஹாய உதா³ஸினபா⁴வஸஹிதங் விபஸ்ஸனாஞாணங் ஸங்கா²ருபெக்கா²ஞாணங்நாம. உபரி மக்³க³ப்பவத்திங் வஹிதுங் ஸமத்த²பா⁴வேன மக்³கு³ப்பத்தியா அனுலோமேஹி தா²மப³லேஹி ஸம்பன்னங் விபஸ்ஸனாஞாணங் அனுலோமஞாணங் நாம. ஹெட்டி²மானங்வா ஞாணானங்தங் அனுலோமங் ஹோதி லக்க²ணத்தயஸ்ஸ ஸுட்டு²தரங் விபா⁴வனதோ. உபரிமக்³க³ஸ்ஸவா அனுலோமங் ஹோதி தஸ்ஸ பரிகம்மபா⁴வதோ, பத³ட்டா²னத்தாசாதிபி அனுலோமஞாணங் நாமாதி. அத்த ஜீவஸுஞ்ஞதாத³ஸ்ஸன ப³லேன க²ந்தே⁴ஸு கிலேஸப³ந்த⁴னதோ விமுச்சமானோ மக்³கோ³ ஸுஞ்ஞதாவிமொக்கோ² நாம. ஸங்கா²ரானங் யானி நிமித்தானி கிலேஸானங் அவஸ்ஸயோ ஹோதி. தானி வித⁴மித்வா ஸப்³ப³ஸோ த⁴ம்மானங் அனாத² பா⁴வ த³ஸ்ஸன ப³லேன விமுச்சமானோ மக்³கோ³ அனிமித்தோவிமொக்கோ² நாம. ஸங்கா²ரேஸு ஸப்³ப³ஸோ அஸ்ஸாஸாபா⁴வ த³ஸ்ஸனப³லேன விமுச்சமானோ மக்³கோ³ அப்பணிஹிதோவிமொக்கோ²நாம. ஸுஞ்ஞதானுபஸ்ஸனாதி அனத்தானுபஸ்ஸனா. ஸா ஹி த⁴ம்மானங் ஸமூஹக⁴ன ஸந்ததிக⁴ன கிச்சக⁴ன ஆரம்மணக⁴னேஸு தங்தங்க⁴ன வினிப்³பு⁴ஜ்ஜன வஸேன பவத்தத்தா அத்தா இதி க³ஹேதப்³ப³ஸ்ஸ கஸ்ஸசி ஸாரஸ்ஸ அபா⁴வானுபஸ்ஸனதோ ஸுஞ்ஞதானுபஸ்ஸனாதி வுச்சதி. அனிமித்தா நுபஸ்ஸனாதி அனிச்சானுபஸ்ஸனா. ஸாபி ஹி ஸந்ததி விச்சே²த³ன வஸேன பவத்தத்தா அஹந்தி க³ஹிதஸ்ஸ நிமித்தஸ்ஸ வித⁴மனதோ அனிமித்தானுபஸ்ஸனாதி வுச்சதி. அபணிஹிதானுபஸ்ஸனாதி து³க்கா² நுபஸ்ஸனா. ஸாபி ஹி மஹாஆதீ³னவராஸி பா⁴வ விபா⁴வனவஸேன பவத்தத்தா இத³ங் மம ஏதங் மமாதி க³ஹேதப்³ப³ஸ்ஸ கஸ்ஸசி பணிஹித கு³ணஸ்ஸ அபா⁴வானுபஸ்ஸனதோ அப்பணிஹிதானுபஸ்ஸனாதி வுச்சதீதி. பாதிமொக்க²ஸங்வரஸீலந்தி வினயபஞ்ஞத்திஸீலங். தஞ்ஹி ஸப்³ப³லோ கியஸீலானங் ஜெட்ட²கத்தா பதிச ஹோதி. சதுபூ⁴மககுஸலானங் ஆதி³பப⁴வபூ⁴தத்தா இந்த்³ரியஸங்வரஸீலங். ஆஜீவந்தி ஜீவிதங் கப்பெந்தி ஏதேனாதி ஆஜீவோ. பச்சயபரியேஸனவாயாமோ. ஸோயேவ பு³த்³த⁴படிகுட்டே²ஹி புப்ப²தா³னாதீ³ஹி மிச்சா²பயோகே³ஹி திவித⁴குஹனவத்து²ஹிச பரிஸுத்³த⁴த்தா ஆஜீவபாரிஸுத்³தி⁴நாம. ஸா ஏவ ஸீலந்தி ஸமாஸோ. ததா²ரூபேன பரிஸுத்³தே⁴ன பி⁴க்கா²சாராதி³னா பயோகே³ன படிலத்³தா⁴னங் பச்சயானங் படிக்³க³ஹண பரிபு⁴ஞ்ஜனகாலேஸு ஸம்மோஹஸ்ஸ கே³த⁴ஸ்ஸ மத³ஸ்ஸ பமாத³ஸ்ஸச பஹானத்த²ங் தங்தங்பயோஜனமரியாத³ங்வா படிகூலலக்க²ணங்வா தா⁴துமத்தலக்க²ணங்வா பரிக்³க³ஹண பச்சவெக்க²னவஸேன பவத்தங் பச்சயஸேவனே படிஸங்கா²ஞாணங் பச்சய ஸன்னிஸ்ஸிதஸீலங்நாம. பரிஸுஜ்ஜ²தீதி பரிஸுத்³தி⁴. பரிஸுத்³தி⁴ஏவ பாரிஸுத்³தி⁴. ஸா ஏவ ஸீலந்தி ஸமாஸோ. சத்தாரி பாரிஸுத்³தி⁴ஸீலானீதி சதுபாரி ஸுத்³தி⁴ஸீலங். சித்தவிஸுத்³தீ⁴தி எத்த² சித்தஸத்³தே³ன ஸமாதி⁴ நித்³தி³ட்டோ²தி வுத்தங் து³விதோ⁴பிஸமாதி⁴ சித்தவிஸுத்³தி⁴நாமாதி. லக்க²ணரஸபச்சுபட்டா²னபத³ட்டா²ன வஸேனாதி எத்த² த⁴ம்மானங் பச்சத்தஸபா⁴வோ லக்க²ணங்னாம. அக்³கி³ஸ்ஸ உண்ஹத்தங் விய. தேன ஸபா⁴வேன ஸாதே⁴தப்³ப³ங் கிச்சங்வா ஸாத⁴னபச்சயா படிலத்³த⁴கு³ணஸங்கா²தா ஸம்பத்திவா ரஸோனாம. அக்³கி³ஸ்ஸ பரிவாசன ஜோதனானி விய. ஸா ஏவ ஸம்பத்திவா காரியஸங்கா²தங் ப²லங்வா பச்சுபட்டா²னங்னாம. அக்³கி³ஸ்ஸ தூ⁴மோ விய. அத்தனோ உப்பத்தியா அஸாதா⁴ரணபச்சயஸங்கா²தங் ஆஸன்னகாரணங் பத³ட்டா²னங்னாம. தேஸங் வஸேன நாமஸ்ஸச ரூபஸ்ஸச பரிக்³க³ஹோ ஞாணேன பரிச்சி²ந்தி³த்வா க³ஹணங் நாமரூபவவத்தா²னங் தி³ட்டி²விஸுத்³தி⁴நாம. எத்த²ச பரிக்³க³ஹோ து³விதோ⁴ ஸங்கே²ப பரிக்³க³ஹோ வித்தா²ரபரிக்³க³ஹோதி. தத்த² அஜ்ஜ²த்தத⁴ம்மே த்³விதா⁴ கத்வா இத³ங் நாமமேவ, ந ரூபங். இத³ங் ரூபமேவ, ந நாமங். அஞ்ஞங் நாமங் அஞ்ஞங் ரூபங். தது³ப⁴யதோச அஞ்ஞோ அத்தாவா ஜீவோவா ஸத்தோவா புக்³க³லோவா மனுஸ்ஸோவா தே³வோவா ப்³ரஹ்மாவா நத்தீ²தி ஏவங் பச்சக்க²தோ ஸுதி³ட்ட²ங் கத்வா பச்சயபரிக்³க³ஹோதி எத்த²பி து³விதோ⁴ பச்சயபரிக்³க³ஹோ ஸங்கே²பதோ வித்தா²ரதோ சாதி. தத்த² வத்தா²ரம்மணவஸேன நாமஸ்ஸ சித்தோதுகாஹாரவஸேன ரூபஸ்ஸ அவிஜ்ஜாதண்ஹுபாதா³னகம்மவஸேன தது³ப⁴யஸ்ஸச பச்சயங் பரிக்³க³ண்ஹந்தோ ஸங்கே²பதோ பரிக்³க³ண்ஹாதினாம. ஹெட்டா² பச்சயஸங்க³ஹே விப⁴த்தேஹி படிச்சஸமுப்பாத³னய பட்டா²னநயேஹி பரிக்³க³ண்ஹந்தோ வித்தா²ரதோ பரிக்³க³ண்ஹாதினாம. எத்த²பி பட்டா²னநயேன பரிக்³க³ஹோ ஆதி³கம்மிகானங் அவிஸயோஏவ. பச்சயங் பரிக்³க³ண்ஹந்தஸ்ஸபன யதா²வவத்தி²தஸ்ஸ ஸப்³ப³ஸ்ஸ நாமரூபஸ்ஸ ஸப்³ப³ஸோ பச்சயாயத்தவுத்திகதாத³ஸ்ஸனதோ அஹேதுகதி³ட்டி² பஹீயதி. அத்தனோ அனுரூபபச்சயஸாமக்³கி³யா வினா அஞ்ஞதா² பவத்தியா அத³ஸ்ஸனதோ இஸ்ஸரனிம்மான காலனிம்மானாதி³கா விஸமஹேதுதி³ட்டி²ச பஹீயதி. ஹேதுஸம்பா⁴ரபச்சயேஹி கம்மப்பவத்தியா விபாகப்பவத்தியாச அஞ்ஞஸ்ஸ கம்மகாரகஸ்ஸவா விபாக வேத³கஸ்ஸவா கத்துனோ அபா⁴வத³ஸ்ஸனதோ காரக வேத³க தி³ட்டி² பஹீயதி. அனமதக்³கே³ச ஸங்ஸாரே தீஸு அத்³தா⁴ஸு ஹேதுப²ல பரங்பராவஸேன கேவலஸ்ஸ நாமரூபமத்தஸ்ஸேவ பவத்தித³ஸ்ஸனதோ அஹோஸிங் நுகோ² அஹமதீதமத்³தா⁴னந்தி ஏவமாதி³காய புக்³க³லஸத்த விஸயாய ஸோளஸவிதா⁴ய கங்கா²யச அதிக்கமோ ஹோதி. ஸபா⁴வத⁴ம்மபவத்தியாச ஸுட்டு² தி³ட்டா²ய தே³ஸனாத⁴ம்மஸ்ஸ ஸுத⁴ம்மதா த³ஸ்ஸனதோ பு³த்³த⁴ஸுபு³த்³த⁴தஞ்ச தி³ஸ்வா ஸத்த²ரி கங்க²தி த⁴ம்மே கங்க²தீதிஆதி³னயபவத்தா அட்ட²விதா⁴பி கங்கா² பஹீயதீதி. லோகுத்தரத⁴ம்மானங் ஸங்க²தானங்பி ஸதங் அஸம்மஸனுபக³த்தா தேபூ⁴மகஸங்கா²ரேஸூதி வுத்தங். அனுஸயஸமூஹனத்த²ஞ்ச ஸம்மஸனந்தி கத்வா யத்த² காமராகா³த³யோ அனுஸயா அனுஸெந்தி. தேயேவ த⁴ம்மா ஸம்மஸனாரஹா ஹொந்தீதி வுத்தங் தேபூ⁴மகஸங்கா²ரேஸூதி. இமஸ்ஸ ச பத³ஸ்ஸ லக்க²ணத்தயங் ஸம்மஸந்தஸ்ஸாதி இமினா ஸம்ப³ந்தோ⁴. அதீதாதி³பே⁴த³பி⁴ன்னேஸூதி அதீதானாக³தபச்சுப்பன்னஜ்ஜ²த்தப³ஹித்³தா⁴தீ³ஹி க²ந்தா⁴தி³னயங்ஆரப்³பா⁴தி படிஸம்பி⁴தா³மக்³கே³ விப⁴த்தங் க²ந்த⁴பஞ்சகங் த்³வாரச²க்கங் ஆரம்மணச²க்கங் விஞ்ஞாணச²க்கங் ப²ஸ்ஸச²க்கங் வேத³னாச²க்கங் ஸஞ்ஞாச²க்கந்தி ஏவமாதி³கங் ஸம்மஸனபூ⁴மிவிபா⁴க³னயங் ஆரப்³ப⁴ அனுக³ந்த்வா தங்னயானுஸாரேனாதி அத்தோ². தத்த² பன தேவீஸதியா த⁴ம்மகொட்டா²ஸேஸு யஸ்ஸ யோ கொட்டா²ஸோ பாகடோ ஹோதி. தேன தங் க³ஹெத்வா ஸம்மஸனங் ஆரபி⁴தப்³ப³ங். ஸக்கொந்தேன பன ஸப்³ப³ம்பி க³ஹெத்வா ஆரபி⁴தப்³ப³மேவ. கலாபவஸேனஸங்கி²பித்வாதி க²ந்த⁴பஞ்சகேன யே ரூபங் தாவ அதீதானாக³தபச்சுப்பன்னாதி³பே⁴த³பி⁴ன்னங்பி ஸமானங் ஸப்³ப³ங் ஏகரூபபிண்ட³பா⁴வேன ஸங்கி²பித்வா ஏஸ நயோ வேத³னா தீ³ஸுபீதி. தத்ராயங் நயோ. யங்கிஞ்சி ரூபங் அதீதானாக³தபச்சுப்பன்னங் அஜ்ஜ²த்தங்வா ப³ஹித்³தா⁴வா ஓளாரிதங்வா ஸுகு²மங்வா ஹீனங்வா பணீதங்வா யங் தூ³ரே ஸந்திகேவா. ஸப்³ப³ங் ரூபங் அனிச்சங் க²யட்டே²ன து³க்க²ங் ப⁴யட்டே²ன அனத்தா அஸாரகட்டே²ன. யாகாசி வேத³னா.ல. யாகாசி ஸஞ்ஞா.ல. யேகேசி ஸங்கா²ரா.ல. யங்கிஞ்சி விஞ்ஞாணங்.ல. ஸப்³ப³ங் விஞ்ஞாணங் அனிச்சங் க²யட்டே²ன. து³க்க²ங் ப⁴யட்டே²ன அனத்தா அஸாரகட்டே²னாதி. எத்த²ச ஸப்³ப³ங் ரூபங்.ல. ஸப்³ப³ங் விஞ்ஞாணந்தி க³ஹணமேவ கலாபவஸேன ஸங்கி²பனந்தி த³ட்ட²ப்³ப³ங். அனிச்சங்க²யட்டே²னாதி எத்த² ரூபங் அனிச்சங் க²யட்டே²ன. வேத³னா அனிச்சா. ஸஞ்ஞா அனிச்சா. ஸங்கா²ரா அனிச்சா. விஞ்ஞாணங் அனிச்சங் க²யட்டே²னாதிஆதி³னா நயேன ஸம்மஸிதப்³ப³த⁴ம்மபரிக்³க³ஹேன ஸஹேவ ஸம்மஸனங் காதப்³ப³ங். இதரதா² ஸம்மஸனங் ந ருஹதி. தத³த்த²ஸ்ஸ பன பாகடத்தா இத⁴ அனிச்சங் க²யட்டே²னாதிஆதி³னா ஸம்மஸனபத³மேவ தே²ரேன க³ஹிதந்தி த³ட்ட²ப்³ப³ங். தத்த² ரூபங் அனிச்சங் க²யட்டே²னாதி தங்தங்ரூபங் ஞாணேன த³ள்ஹங் க³ஹெத்வா அயங் பத²விதா⁴து அனிச்சா க²யட்டே²ன. அயங் ஆபோதா⁴து அனிச்சா க²யட்டே²னாதிஆதி³னா ஸம்மஸனங் காதப்³ப³ங். தத்த² இமஸ்மிங் காயே ஸப்³ப³ங் த²த்³த⁴க்ரியாமத்தங் பத²வீனாம. ஸாச க்ரியா ஸீதுண்ஹபரிவத்தியாவா பரிவத்ததி. நானாஹாரபரிவத்தியா வா நானாசித்தபரிவத்தியாவா நானிரியாபத²பரிவத்தியாவா நானா காயிகக்ரியா பரிவத்தியாவா பரிவத்ததி. நானாஸந்ததி ஸங்கந்தி ஹோதீதி அத்தோ². தத்த² நவனவாஸு க்ரியாஸந்ததீஸு பாதுபொ⁴ந்தீஸு ப⁴யட்டே²னாதி பா⁴யிதப்³ப³ட்டே²ன. யஞ்ஹி அனிச்சங் ஹோதி. க²ணமத்தேபி விபரிணாமத⁴ம்மங். தங் ஏகந்தேன பா⁴யிதப்³ப³மேவ. கஸ்மா, தஞ்ஹி யோ அபா⁴யித்வா விஸ்ஸாஸங் கரோதி. ஏதங் மேதி அத்தனோ அங்க³ங் கத்வா பரிஹரதி. தங் அபரியந்தேஹி அனேகஸஹஸ்ஸேஹி அபி⁴ஸங்க²ரணது³க்கே²ஹிவா விபரிணாமது³க்கே²ஹிவா அபி⁴ண்ஹங் பீளேதி. பா³த⁴தி. இதி நானாது³க்க²த⁴ம்மேஹி அபி⁴ண்ஹங் ஸம்படிபீளனஸபா⁴வத்தா ஏகந்தேன பா⁴யிதப்³ப³ட்டே²ன து³க்க²ங்னாமாதி. அத்தபடிபக்க²த்தா அனத்தா. யோ ஹி இதோ உத்³த⁴ங் மய்ஹங் அப்³ப⁴ந்தரிமதரோனாம நத்தீ²தி ஏவங் பரமஜ்ஜ²த்தபா⁴வேன பரிக்³க³ஹிதோ ஹோதி. ஸோ அத்தாதி வுச்சதி. கதமோ பன ததா²பரிக்³க³ஹி தப்³போ³தி. யோ அத்தனோ வஸே ஸப்³ப³ஸோ வத்ததி. யதா² வுத்தேஹி அபி⁴ஸங்க²ரணகிச்சேஹி வினா கேவலங் அத்தனோ ச²ந்தே³னவா வஸேனவா அஜ்ஜா²ஸயேனவா ஆணாவிதா⁴னேனவா நிச்சங் அவிரஜ்ஜ²மானோ பவத்ததி. ஸோ ததா² பரிக்³க³ஹேதப்³போ³தி. ததா²ரூபோ ஏவ ஹி த⁴ம்மோ அஸாரகட்டே²னாதி. தத்த² ஸாரோனாம பச்சயஸாமக்³கி³யா வினா கேவலங் அஜ்ஜா²ஸயமத்தேன உப்பஜ்ஜிதுங்வா உப்பஜ்ஜித்வாச பச்சயுபத்த²ம்பே⁴ன வினா யதி³ச்ச²கங் பதிட்டா²துங் வா ஸமத்த²பா⁴வஸங்கா²தோ தா²மப³லவிஸேஸோ வுச்சதி. ரூபங் பன ஸயங்பி ஏவரூபோ ஸாரோனாம ந ஹோதி. நச ஏவரூபேன ஸாரேன யுத்தந்தி. நஹி தஸ்ஸ பச்சயஸாமக்³கி³யா வினா உப்பஜ்ஜிதுங்வா உப்பஜ்ஜித்வாபி பச்சயுபத்த²ம்பே⁴ன வினா க²ணமத்தங்பி பதிட்டா²துங்வா தா²மோவா ப³லங்வா அத்தி². யஞ்ச அத்தனோ தா²மேன ப³லேன வினா கேவலங் பச்சயஸாமக்³கி³ ப³லேனேவ உப்பஜ்ஜதி. பச்சயுபத்த²ம்பே⁴னேவ பதிட்டா²தி. தங் அனேக ஸஹஸ்ஸானி பச்சயாபி⁴ஸங்க²ரணது³க்கா²னி ஜனெத்வா ஏகந்தேன நிச்சங் அத்தபடிபக்க²கிச்சங் கரோதி, பீளேதி, பா³த⁴தியேவாதி. ஏஸனயோ வேத³னா அனிச்சா க²யட்டே²னாதிஆதீ³ஸு. இதி லக்க²ணத்தயங் ஸம்ம ஸந்தஸ்ஸாதி ஸம்ப³ந்தோ⁴. அத்³தா⁴னவஸேனாதி ஏகேகப⁴வபரிச்சி²ன்னஸ்ஸ பவத்தகாலஸ்ஸ வஸேன. நஹி ப⁴வந்தரே உப்பன்னங் க²ந்த⁴பஞ்சகங் அஞ்ஞங் ப⁴வந்தரங் க³ச்ச²தி. தஸ்மிங் தஸ்மிங் ப⁴வேஏவ அஸேஸங் நிருஜ்ஜ²தீதி. அபிச, ஏகஸ்மிங் ப⁴வேபி திண்ணங் வயானங் மந்தா³தீ³னங் த³ஸன்னங் த³ஸகானங் ஸங்வச்ச²ரஉது மாஸ பக்க²திதி² அஹோரத்தி யாம பஹாராதீ³னஞ்ச வஸேன அத்³தா⁴னபே⁴தோ³ யோஜேதப்³போ³. ஸந்ததிவஸேனாதி ஸபா⁴கே³கஸந்தானவஸேன பவத்தமானாய ரூபஸந்ததியாவா அரூப ஸந்ததியாவா வஸேன. க²ணவஸேனாதி ரூபாரூபத⁴ம்மானங் ஆயு பரிமாணஸங்கா²தஸ்ஸ க²ணஸ்ஸ வஸேன. எத்த²ச க²ணவஸேன ஸம்மஸனங்னாம ஸப்³ப³ஞ்ஞுபு³த்³தா⁴னங் ஏவ விஸயோ ஸியா, ந ஸாவகானங். நஹி தே ஏவங் பரித்தகே க²ணே உப்பாத³ங்வா நிரோத⁴ங்வா ஸம்பாபுணிதுங் ஸக்கொந்தீதி. லக்க²ணத்தயங்ஸம்மஸந்தஸ்ஸாதி தேஸு தேபூ⁴மக ஸங்கா²ரேஸு த⁴ம்மேஸு திலக்க²ணானி ஆரோபெத்வா தே த⁴ம்மே புனப்புனங் ஆமஸந்தஸ்ஸ பரிமஜ்ஜந்தஸ்ஸ. தேஸங் த⁴ம்மானங் அனிச்ச ஜாதிகதங்வா து³க்க²ஜாதிகதங்வா அனத்தஜாதிகதங்வா ஞாணே ஸுட்டு² பாகடங் கரொந்தஸ்ஸாதி அத்தோ². விஸேஸதோ பன இமஸ்மிங் ஞாணே அனிச்சலக்க²ணத³ஸ்ஸனமேவ பதா⁴னங். தஸ்மிங் தி³ட்டே²யேவ இதரானி கமேன தி³ட்டா²னி ஹொந்தி. அதி³ட்டே²ச அதி³ட்டா²னீதி. தஸ்மா ஆதி³தோ அனிச்சலக்க²ணஸ்ஸேவ ஸுட்டு² பாகடபா⁴வோ அதி⁴ப்பேதோதி. தெஸ்வேவாதி தேபூ⁴மகஸங்கா²ரேஸு ஏவ. பச்சயவஸேனாதி ரூபக்க²ந்தே⁴ தாவ அவிஜ்ஜாதண்ஹுபாதா³னகம்மாஹாரஸங்கா²தானங் பச்சயானங் வஸேன. வேத³னாஸஞ்ஞாஸங்கா²ரேஸு பன ஆஹாரட்டா²னே ப²ஸ்ஸோ வத்தப்³போ³. விஞ்ஞாணேச நாமரூபங். தத்ராயங் நயோ. அதீதானந்தரப⁴வே அவிஜ்ஜாதண்ஹுபாதா³ன கம்மேஸு அப்பஹீனவஸேன ஸமுதி³தேஸு இமஸ்மிங் ப⁴வே படிஸந்தி⁴தோ பட்டா²ய ரூபஸந்ததியோ வேத³னாஸஞ்ஞாஸங்கா²ர விஞ்ஞாணஸந்ததியோச ஸமுதெ³ந்தி. யாவ மரணகாலா க²ணே க²ணே நானாகலாபவஸேன உதெ³ந்தி பஸவந்தி. தேஸு பன தஸ்மிங் ப⁴வே ஏவ பஹீனவஸேன நிருத்³தே⁴ஸு தா ரூபாரூபஸந்ததியோ நிருஜ்ஜ²ந்தி. ப⁴வந்தரே புன அனுப்பாத³ஸங்கா²தங் நிரோத⁴ங் பாபுணந்தி. எத்த² பன யதா² உத³கே ஸதி மச்சா²னாம ஹொந்தி, அஸதி ந ஹொந்தி. ஏவங் கம்மஜேஸு நாமரூபேஸு ஸதி இதரானி நாமரூபானி ஹொந்தி. அஸதி ந ஹொந்தீதி இதரானி ஸப்³பா³னி கம்மஜேஸு ஸங்க³ஹெத்வா கம்மவஸேன உத³யப்³ப³யவிதா⁴னங் க³ஹிதந்தி த³ட்ட²ப்³ப³ங். ஏவங் அவிஜ்ஜாதண்ஹுபாதா³னகம்மபச்சயானங் வஸேன பஞ்சக்க²ந்த⁴ஸ்ஸ உத³யப்³ப³யபவத்தி ஹோதீதி. கம்மவஸேன பன இமஸ்மிங் ப⁴வே ஸமுதெ³ந்தானிபி படிஸந்தி⁴தோ பட்டா²ய க²ணே க²ணே கப³ளீகாராஹாரூபத்த²ம்ப⁴னங் லத்³தா⁴ ஏவ யதா² பவத்தரூபஸந்ததியோ அனுப³ந்த⁴ மானா நவனவா ரூபஸந்ததியோ ஸமுதெ³ந்தி. அலத்³தா⁴ பன நிருஜ்ஜ²ந்தி. தங் ஸந்ததியங் புன அனுப்பாத³ஸங்கா²தங் ஏகப⁴வனிரோத⁴ங் பாபுணந்தி, யதா² பவத்தஸந்ததியோ வா சி²ஜ்ஜந்தி பி⁴ஜ்ஜந்தி அந்தரதா⁴யந்தீதி.
வேத³னாஸஞ்ஞாஸங்கா²ரா க²ணவஸேனாதி வுத்தப்பகாரே பச்சயே அனபெக்கி²த்வா கேவலங் நாமரூபானங் பவத்திக்க²ணவஸேன. க²ணஸத்³தே³ன செத்த² ஸம்மஸனஞாணே வுத்தரூபஸந்ததி நாமஸந்ததியோபி க³ஹேதப்³பா³. நஹி ஸாவகானங் ஞாணங் க²ணவஸேன நாமரூபானங் உத³யங்வா வயங் வா ஸம்பாபுணிதுங் ஸக்கோதீதி. யதா² பன ரத்தந்த⁴காரே அந்தோ லேணே மஹந்தோ தமோக²ந்தோ⁴ ஜாயதி. தீ³பங் ஜாலெந்தஸ்ஸ பன தீ³போபா⁴ஸோ ஏகக்க²ணே ஏவ ஸகலங் அந்தோலேணங் ப²ரமானோ உதே³தி. தமோக²ந்தோ⁴ வேதி. ஆலோகஸ்ஸ உத³யோ ஹோதி. தமோக²ந்த⁴ஸ்ஸ வயோ. புன தீ³பே நிப்³பா³பீயமானே தமோக²ந்த⁴ஸ்ஸ உத³யோ ஹோதி. ஆலோகஸ்ஸ வயோ. ஏவ மேவங் ஸரீரே நானாஉதுவஸேனவா நானாஹாரவஸேனவா நானாசித்த வஸேனவா நானிரியாபத²வஸேனவா நானாபயோக³வஸேனவா உத³யபக்கா²னங் வயபக்கா²னஞ்ச நானாஸந்ததீனங் உத³யஞ்ச உத³யதோ வயஞ்ச வயதோ ஸுதி³ட்ட²ங் கத்வா ஸமனுபஸ்ஸந்தஸ்ஸாதி அத்தோ². ஏவங் ஸமனுபஸ்ஸந்தஸ்ஸ பன ஆரத்³த⁴விபஸ்ஸகபா⁴வங் பத்தஸ்ஸ உத³யப்³ப³ய ஞாணே திக்கே² ஸூரே வஹந்தே த³ஸவிதா⁴ விபஸ்ஸனுபக்கிலேஸஸங்கா²தா பாரிபந்த²கத⁴ம்மா உப்பஜ்ஜந்தி. தே த³ஸ்ஸேதுங் ஓபா⁴ஸோதிஆதி³கா³த² மாஹ. தத்த² ஓபா⁴ஸோதி விபஸ்ஸனா சித்தஸமுட்டி²தோ ஸரீரோபா⁴ஸோ. பீதீதி விபஸ்ஸனாசித்தஸம்பயுத்தா பஞ்சவிதா⁴ பீதி. பஸ்ஸத்³தீ⁴தி து³விதா⁴பஸ்ஸத்³தி⁴. அதி⁴மொக்கோ²தி ஸத்³தா⁴தி⁴மொக்கோ². பக்³க³ஹோதி வீரியங். ஸுக²ந்தி ஸோமனஸ்ஸங். ஞாணந்தி விபஸ்ஸனா ஞாணங். உபட்டா²னந்தி ஸதி. உபெக்கா²தி தத்ரமஜ்ஜ²த்துபெக்கா² சேவ ஆவஜ்ஜனுபெக்கா² ச. நிகந்தீதி ஓபா⁴ஸாதீ³ஹி ஸஹ விபஸ்ஸனாய ஆலயங் குருமானா ஸுகு²மா தண்ஹா. அயமேவ பன ஏகந்ததோ விபஸ்ஸனுபக்கிலேஸோ ஹோதி. ஓபா⁴ஸாத³யோ பன தஸ்ஸா வத்து²பூ⁴தத்தா
[245] விபா⁴வனியங் பன
அனிச்சாதி³வஸேன ஓபா⁴ஸாதி³ படிப³ந்த⁴பரிக்³க³ஹங் விஸுங் அவத்வா மக்³கா³மக்³க³ஜானநமத்தேனேவ மக்³கா³மக்³க³ஞாணத³ஸ்ஸனவிஸுத்³தி⁴னாம வுத்தா. ஸா அட்ட²கதா²ய ந ஸமேதி.
ததா² பரிபந்த²விமுத்தஸ்ஸாதி ததா² பரிக்³க³ஹெத்வா ததோ விபஸ்ஸனுபக்கிலேஸபரிபந்த²தோ விமுத்தஸ்ஸ யாவானுலோமாதி யாவஅனுலோமஞாணா. விபஸ்ஸனாபரிபாகங்ஆக³ம்மாதி ஸங்கா²ருபெக்கா²பா⁴வங் பத்வா திவித⁴ விமொக்க²முக²பா⁴வப்பத்தியாசேவ ஸத்தஅரியபுக்³க³லவிபா⁴க³ஸ்ஸ பச்சய பா⁴வப்பத்தியாச விபஸ்ஸனாஞாணஸ்ஸ பரிபாகங் ஆக³ம்ம படிச்ச. இதா³னி அப்பனா உப்பஜ்ஜிஸ்ஸதீதி வத்தப்³ப³க்க²ணேதி ஸம்ப³ந்தோ⁴. அப்பனா திச ஸோதாபத்திமக்³க³அப்பனா. த்³வேதீணிவிபஸ்ஸனாசித்தானீதி திக்க²பஞ்ஞஸ்ஸ த்³வே விபஸ்ஸனாசித்தானி. மந்த³பஞ்ஞஸ்ஸ தீணி விபஸ்ஸனாசித்தானி. யங்கிஞ்சீதி தீஸு லக்க²ணேஸு அஞ்ஞதரங் யங்கிஞ்சி. யாஸிகா²பத்தாஸானுலோமாஸங்கா²ருபெக்கா²தி மத்த²கபத்தா அனுலோமஞாணஸஹிதா யா ஸங்கா²ருபெக்கா² அத்தி². ஸா வுட்டா²னகா³மினிவிபஸ்ஸனாதிச வுச்சதீதி யோஜனா. ஸங்கா²ருபெக்கா²ஞாணங் அனுலோமஞாணந்தி இமானி த்³வே ஞாணானி வுட்டா²னகா³மினி விபஸ்ஸனானாமாதி வுச்சந்தீதி வுத்தங் ஹோதி. இத³ங் பன பரிபாகக³தவிபஸ்ஸனா த³ஸ்ஸனவசனங். எத்த²ச வுட்டா²னந்தி மக்³கோ³ வுச்சதி. ஸோ ஹி விபஸ்ஸனாஞாணஸ்ஸ ஆரம்மணபூ⁴த ஸங்கா²ரனிமித்ததோவா ஸயங் ஸங்யோஜனவத்து²பா⁴வதோவா வுட்டா²தி. தங் ஸமங்கி³புக்³க³லங்வா புது²ஜ்ஜனபா⁴வதோ ஸமுத³யபஹானவஸேன வட்ட பவத்ததோச வுட்டா²பேதி. தஸ்மா வுட்டா²னந்தி வுச்சதி. அவஸ்ஸங் வுட்டா²னங் க³ச்ச²ந்தி ஏதாயாதி வுட்டா²னகா³மினீதி ஏவங் த்³வின்னங் ஞாணானங் வுட்டா²ன கா³மினிபா⁴வோ வேதி³தப்³போ³. ததோபரந்தி த்³வின்னங்வா திண்ணங்வா விபஸ்ஸனா சித்தானங் பவத்தியா பரங் நிப்³பா³னங் ஆலம்பி³த்வாதி மக்³க³ஸ்ஸ ஆவஜ்ஜனட்டா²னியங் ஹுத்வா தஸ்ஸ புரேசரபா⁴வேன நிப்³பா³னமேவ ஆரம்மணங் கத்வா. ததோ யேவச தங் விபஸ்ஸனானாமங் நலப⁴தீதி. புது²ஜ்ஜன கொ³த்தமபி⁴ப⁴வந்தந்தி ஏதேன கொ³த்தங் ப⁴வதி அபி⁴ப⁴வதீதி கொ³த்ரபு⁴. கொ³த்தந்தி செத்த² பரிபுண்ணகிலேஸ ஸமாயோகே³ன அனரியபா⁴வஸங்கா²தா புது²ஜ்ஜனஜாதி வுச்சதீதி இமமத்த²ங் த³ஸ்ஸேதி. அரியகொ³த்தமபி⁴ஸம்பொ⁴ந்தஞ்சாதி ஏதேன கொ³த்தங் ப⁴வதி பாபுணாதீதி கொ³த்ரபு⁴. கொ³த்தந்திச தங்தங் கிலேஸ விஸுத்³த⁴பா⁴வ ஸங்கா²தா அரியஜாதி வுச்சதீதி இமமத்த²ங் த³ஸ்ஸேதி. மக்³கோ³ அப்பனா வீதி²ங் ஓதரதீதி ஸம்ப³ந்தோ⁴. து³க்க²ஸச்சங்பரிஜானந்தோதி தேபூ⁴மக த⁴ம்மானங் ஏகந்தது³க்க²பா⁴வங் பரிச்சி²ஜ்ஜ ஜானந்தோ. பரிஜானநஞ்செத்த² தேஸங் து³க்க²பா⁴வ ஸமுத³ய ஸச்சங்பஜஹந்தோதி அத்தனோ சித்தஸந்தானே அனுஸயபா⁴வேன பவத்தமானங் தண்ஹாஸங்கா²தங் ஸமுத³யஸச்சங் ஏகதே³ஸேனவா அனவஸேஸேனவா அபச்சா²வத்திகங் கத்வா பஜஹந்தோ. நிரோத⁴ஸச்சங்ஸச்சி²கரொந்தோதி சக்கு²மா விய நப⁴மஜ்ஜே² விரோசமானங் சந்த³மண்ட³லங் அத்தனோ ஸந்தானே ஏகதே³ஸஸ்ஸவா ஸகலஸ்ஸவா கிலேஸ வட்டஸ்ஸவா ஆயதிங் பா⁴வினோ விபாகவட்டஸ்ஸங்வா அத்தனோ ஸந்தானே புன அனுப்பாத³த⁴ம்மபா⁴பத்திவஸேன நிரோத⁴ஸங்கா²தங் நிப்³பா³னங் பச்சக்க²ங் கரொந்தோ. மக்³க³ஸச்சங்பா⁴வனாவஸேனாதி இதோ புப்³பே³ அனமதக்³கே³ ஸங்ஸாரே அனுப்பன்னபுப்³ப³ஸ்ஸ அட்ட²ங்கி³கஸ்ஸ மக்³க³ஸச்சஸ்ஸ உப்பாத³னஸங்கா²தாய பா⁴வனாய வஸேன. மக்³க³சேதனாய பன ஆனந்தரிகப²லத்தா தங்க²ணே அபனீதக்³கி³கே பதே³ஸே புன உத³கங் ஆஸிஞ்சித்வா நிப்³பா³பெந்தோ விய மக்³கா³னுகூலபவத்திவஸேன து³க்க²பரிஜானநாதீ³னி சத்தாரி கிச்சானி அனுகுப்³ப³ந்தானி ததோபரங் த்³வேவா தீணிவா ப²லசித்தானி பவத்தந்தி. ததோபரங் ப⁴வங்க³பாதோ ஹோதீதி த³ஸ்ஸேதுங் ததோபரந்திஆதி³மாஹ. யதா² பன பஸாத³சக்கு²னாவா தி³ப்³ப³சக்கு²னாவா கிஞ்சிரூபங் பஸ்ஸந்தஸ்ஸ தானி சக்கூ²னி தங் ரூபங் பச்சக்க²ங் கத்வா பச்சா² தஸ்ஸ புக்³க³லஸ்ஸபி பச்சக்க²தோ பாதுபூ⁴தங் கத்வா நிருஜ்ஜ²ந்தி. ந தாவ தேஸங் உப்பத்திக்க²ணே தங் ரூபங் தஸ்ஸ அஹங் இத³ங்னாம பஸ்ஸாமீதி பாகடங் ஹோதி. பச்சா² பன பச்சவெக்க²ன வாரேஸு பவத்தமானேஸுஏவ தங்ரூபங் தத³னுப³ந்தா⁴ச நானாகாரா தஸ்ஸ பாதுபூ⁴தா ஹொந்தி. ஏவமேவங் இத⁴பி பச்சவெக்க²னவாரேஸு பவத்தமானேஸுஏவ நிப்³பா³னஞ்ச தத³னுப³ந்தா⁴னி மக்³க³ப²லாதீ³னிச பாதுப⁴வந்தீதி வுத்தங் புனப⁴வங்க³ங்.ல. பவத்தந்தீதி. இதா³னி பச்சவெக்க²னஞாணஸ்ஸ பூ⁴மிங் த³ஸ்ஸேதுங் மக்³க³ங்ப²லஞ்சனிப்³பா³னந்திஆதி³கா³த² மாஹ. தத்த² பண்டி³தோதி அரியாய பஞ்ஞாய ஸமன்னாக³தோ ப²லட்டோ². ஹீனேதி பஹீனே. ஸேஸேதி அபஹீனே உபரிமக்³க³வஜ்ஜே². இமானி பன த்³வே பஹீனாவஸிட்ட²கிலேஸபச்சவெக்க²னானி கேஸஞ்சி ஜீவிதஸமஸீஸிபுக்³க³லானங் கிலேஸ விபா⁴கே³ஸு அகோவிதா³னஞ்ச நலப்³ப⁴ந்தீதி வுத்தங் பச்சவெக்க²திவானவாதி. எத்த²ச விஸுத்³தி⁴மக்³கே³ தாவ ஸப்³ப³பத²மங் மக்³க³பச்சவெக்க²னங் வுத்தங். ததோ ப²லபச்சவெக்க²னங். எத்தா²தி விபஸ்ஸனாகம்மட்டா²னே. தத்தா²தி தேஸு அனுபஸ்ஸனா மக்³க³ப²லேஸு. அபி⁴னிவிஸனங் அபி⁴னிவேஸோ. ஹெட்டா² ஸிலாபத²வியங் நிகா²தஸினேருபாத³ஸ்ஸ விய அஜ்ஜ²த்தக²ந்தே⁴ஸு த³ள்ஹங் க³ஹெத்வா பவத்தீதி அத்தோ². அத்தா இதி அபி⁴னிவேஸோ அத்தாபி⁴னிவேஸோ. தங் அத்தாபி⁴னிவேஸங். முஞ்சந்தீதி அஜ்ஜ²த்தத⁴ம்மானங் கேவலங் பச்சயாயத்த வுத்திதாய க²ணப⁴ங்க³ஸ்ஸச அதி³ட்ட²த்தா ஸோ அபி⁴னிவேஸோ பவத்ததி. தஸ்மா தங் த்³வயங் ஸுதி³ட்ட²ங் கத்வா ரூபங் அனத்தா வேத³னா அனத்தாதிஆதி³னா புனப்புனங் ஸமனுபஸ்ஸனாவஸேன தங் அபி⁴னிவேஸங் விமோசயமானாதி அத்தோ². விமொக்க²முக²ங் ஹோதி, ஸுஞ்ஞதவிமொக்க² ஸங்கா²தஸ்ஸ மக்³க³ஸ்ஸ ப²லஸ்ஸச பவேஸனத்³வாரபூ⁴தத்தா, விபல்லாஸ நிமித்தந்தி விபரீதவஸேன ஆஸனங் உபக³மனங் பவத்தனங்வா விபல்லாஸோ. அனிச்சே நிச்சந்தி உபக³மனங் பவத்தனங்வாதி அத்தோ². ஸோ ஏவ கிலே ஸுப்பத்தியா ஆஸன்னகாரணத்தா நிமித்தந்தி விபல்லாஸனிமித்தங். முஞ்சந்தீதி அஜ்ஜ²த்தத⁴ம்மானங் க²ணப⁴ங்க³ஸ்ஸ அதி³ட்ட²த்தா தங்னிமித்தங் ஹோதீதி தேஸங் க²ணப⁴ங்க³ங் ஸுதி³ட்ட²ங் கத்வா ரூபங் அனிச்சங் வேத³னா அனிச்சாதிஆதி³னா புனப்புனங் ஸமனுபஸ்ஸனாவஸேன தங்னிமித்தங் விமோசயமானாதி அத்தோ². தண்ஹாபணிதி⁴ந்தி தண்ஹாஏவ அபி⁴ஸங்க³வஸேன ஆரம்மணே சித்தஸ்ஸ பணித³ஹனதோ த³ள்ஹங் த²பனதோ பணிதீ⁴தி தண்ஹாபணிதி⁴. தங்தண்ஹா பணிதி⁴ங். முஞ்சந்தீதி அஜ்ஜ²த்தத⁴ம்மானங் மஹாஆதீ³னவராஸிபா⁴வஸ்ஸ அதி³ட்ட²த்தா ஸோபணிதி⁴ ஹோதீதி தேஸங் மஹாஆதீ³னவராஸிபா⁴வங் ஸுதி³ட்ட²ங் கத்வா ரூபங்து³க்க²ங் வேத³னாது³க்கா²திஆதி³னா புனப்புனங் ஸமனுபஸ்ஸனாவஸேன தங்பணிதி⁴ங் விமோசயமானாதி அத்தோ². தஸ்மாதி யஸ்மா ஏதா விமொக்க²முக²பூ⁴தா திஸ்ஸோ அனுபஸ்ஸனா ஏவங் விஸேஸ நாமிகா ஹொந்தி. தஸ்மா. யஸ்மா ஸங்கா²ரேஸு ஸுஞ்ஞதத³ஸ்ஸனவஸேன அத்த²ஸித்³தி⁴னாம கேவலங் அத்தாகினிவேஸபூ⁴தஸ்ஸ தி³ட்டி²கா³ஹஸ்ஸ படிபக்க²பூ⁴தஸ்ஸ ஞாணஸ்ஸேவ ஆனுபா⁴வோ ஹோதி, தஸ்மா ததா² ஸமனுபஸ்ஸித்வா விமுஞ்சந்தஸ்ஸ விபஸ்ஸனாபி மக்³கோ³பி ஸஹஜாதஞாண கிச்சேன நாமங் லப⁴தீதி வுத்தங் யதி³வுட்டா²ன.ல. ஸுஞ்ஞதோவிமொக்கோ² நாமஹோதிமக்³கோ³தி. யதி³அனிச்சதோ.ல. அனிமித்தோ விமொக்கோ²னாமாதி. து³க்க²த³ஸ்ஸனவஸேன அத்த²ஸித்³தி⁴னாம பணிதி⁴ஸங்கா²த தண்ஹாகா³ஹபடிபக்க²பூ⁴தஸ்ஸ ஸமாதி⁴ஸ்ஸபி ஆனுபா⁴வோ. தஸ்மா ததா² ஸமனுபஸ்ஸித்வா விமுச்சந்தஸ்ஸ விபஸ்ஸனாபி மக்³கோ³பி ஸஹஜாதஸமாதி⁴கிச்சேன நாமங் லப⁴தீதி வுத்தங். யதி³ து³க்க²தோ. ல. அப்பணிஹிதோ விமொக்கோ²னாமாதி. வுத்தஞ்ஹேதங் படிஸம்பி⁴தா³மக்³கே³ அனிச்சதோ மனஸிகரோதோ ஸத்³தி⁴ந்த்³ரியங் அதி⁴மத்தங் ஹோதி. து³க்க²தோ மனஸிகரோதோ ஸமாதி⁴ந்த்³ரியங் அதி⁴மத்தங் ஹோதி. அனத்ததோ மனஸிகரோதோ பஞ்ஞிந்த்³ரியங் அதி⁴மத்தங் ஹோதீதி. மக்³கே³ பன திண்ணங் த⁴ம்மானங் கிச்சவிஸேஸோனாம விபஸ்ஸனாக³மனவஸேனேவ ஸித்³தோ⁴தி வுத்தங் மக்³கோ³. ல. நாமானி லப⁴தீதி. தத்த² ஸுஞ்ஞதவிமொக்கே²ன விமுத்தோ அரியஸாவகோ ஸோதாபத்திமக்³க³க்க²ணே த⁴ம்மானுஸாரீனாம ஹோதி. மஜ்ஜே² ச²ஸு மக்³க³ப²லக்க²ணேஸு தி³ட்டி²ப்பத்தோ நாம. அரஹத்தப²லக்க²ணே பஞ்ஞாவிமுத்தோனாம. அனிமித்தவிமொக்கே²ன விமுத்தோ ஸோதாபத்திமக்³க³க்க²ணே ஸத்³தா⁴னுஸாரீனாம. உபரி ஸத்தஸு டா²னேஸு ஸத்³தா⁴விமுத்தோனாம. அபணிஹிதவிமொக்கே²ன விமுத்தோ பன அட்ட²ஸுபி டா²னேஸு காயஸக்கி²னாம. ஸோயேவ அரூபஜ்ஜா²னங் பாத³கங் கத்வா விமுத்தோ அரஹத்தப²லே டி²தோ உப⁴தோபா⁴க³விமுத்தோ நாமாதி எத்தாவதா யங் ஹெட்டா² வுத்தங் விபஸ்ஸனாபரிபாகமாக³ம்மாதி ஸங்கா²ருபெக்கா²பா⁴வங் பத்வா திவித⁴விமொக்க²முக²பா⁴வப்பத்தியாசேவ ஸத்தஅரியபுக்³க³லவிபா⁴க³ஸ்ஸ பச்சயபா⁴வப்பத்தியாச விபஸ்ஸனாஞாணஸ்ஸ பரிபாகங் ஆக³ம்ம படிச்சாதி. தங் ஸரூபதோ நித்³தி³ட்ட²ங் ஹோதீதி. மக்³க³வீதி²யங் ப²லஞ்ச மக்³கா³க³மன வஸேன ததா² தீணி நாமானி லப⁴தீதி யோஜனா. யதா²வுத்தனயேன விபஸ்ஸந்தானந்தி யதி³ அனத்ததோ விபஸ்ஸதீதிஆதி³னா வுத்தப்பகாரனயேன விபஸ்ஸந்தானங் சதுன்னங் ப²லட்டா²னங் புக்³க³லானங். யதா²ஸகங்ப²லந்தி ஸோதாபன்னஸ்ஸ ஸோதாபத்திப²லங். ஸகதா³கா³மிஸ்ஸ ஸகதா³கா³மிப²லந்திஆதி³னா நயேன ஆரம்மணவஸேனாதிஆதி³ வுத்தங். தத்த² ஸரஸவஸேனாதி அத்தனோ ஸபா⁴வேன. நாமத்தயந்தி ஸுஞ்ஞதாதி³ நாமத்திகங். ஸப்³ப³த்தா²தி ஸப்³பா³ஸு மக்³க³வீதி² ப²லஸமாபத்திவீதீ²ஸு. ஸப்³பே³ஸங்பீதி ஸப்³பே³ஸங்பி மக்³க³ப²லானங். ஸமமேவாதி ஸமானமேவ. ஸதி³ஸமேவ. எத்த²பனாதி ஏதேஸு பன யதா²வுத்தேஸு மக்³க³ப²லேஸு. யஸ்மா ஸப்³பா³தி³ட்டி²யோச ஸோளஸவிதா⁴ விசிகிச்சா²ச அத்ததி³ட்டி²மூலிகா ஏவ ஹொந்தி. அத்ததி³ட்டி²யா நிருத்³தா⁴ய நிருஜ்ஜ²ந்தி ஸப்³பா³னிச அபாயகா³மி கம்மானினாம அத்ததி³ட்டி²யா ஸதியாஏவ விபச்சந்தி. அஸதியா ந விபச்சந்தி. தி³ட்ட²ஸச்சானஞ்ச ஸா தி³ட்டி² ஸப்³ப³ஸோ பஹீனா ஹோதி. தஸ்மா ஸோதாபத்திமக்³க³ங்.ல. பஹீனாபாய க³மனோதி வுத்தங். அபாயங் க³ச்ச²ந்தி ஸத்தக்க²த்துபரமோஸோதாபன்னோனாம ஹோதீதி, தத்த² ஸத்தக்க²த்துஸத்³தே³ன ஸத்தபடிஸந்தி⁴க³ஹணவாரா வுச்சந்தி. பரமோதி உக்கங்ஸபரிச்சே²தோ³. இதி ஸத்தக்க²த்துங் பரமோ ஏதஸ்ஸாதி. ஸத்தக்க²த்துபரமோ. ஸோ பன தே³வேஸு ஸத்தக்க²த்து பரமோ, மனுஸ்ஸேஸு ஸத்தக்க²த்து பரமோ, உப⁴யத்த² ஸத்தக்க²த்து பரமோதி திவிதோ⁴ ஹோதி. யதா²ஹ –
கதமோச புக்³க³லோ ஸத்தக்க²த்துபரமோ இதே⁴கச்சோ புக்³க³லோ திண்ணங் ஸங்யோஜனானங் பரிக்க²யா ஸோதாபன்னோ ஹோதி, அவினிபாதத⁴ம்மோ நியதோ, ஸம்போ³தி⁴பராயனோ, ஸோ ஸத்தக்க²த்துங் தே³வேச மனுஸ்ஸேச ஸந்தா⁴வித்வா ஸங்ஸரித்வா து³க்க²ஸ்ஸந்தங் கரோதி. அயங் வுச்சதி புக்³க³லோ ஸத்தக்க²த்து பரமோதி.
எத்த² ஹி ச ஸத்³தோ³ அனியமத்தோ². ஏதேன யோச தே³வேஏவ ஸத்தக்க²த்துங் ஸங்ஸரதி. யோச மனுஸ்ஸேஏவ ஸத்தக்க²த்துங் ஸங்ஸரதி. யோச தே³வேச மனுஸ்ஸேச மிஸ்ஸகப⁴வ வஸேன ஸத்தக்க²த்துங் ஸங்ஸரதி. திவிதோ⁴ பேஸோ ஸத்தக்க²த்து பரமோனாமாதி த³ஸ்ஸேதி. அட்ட²கதா²யங் பன மிஸ்ஸகப⁴வ வஸேனஸ்ஸ அத்தோ² வுத்தோ. எத்த²ச யஸ்மா மஹக்³க³தஜ்ஜா²னஸ்ஸச உபரிமக்³க³ விபஸ்ஸனா யச ஆனுபா⁴வங் அனபெக்கி²த்வா கேவலங் இமஸ்ஸ மக்³க³ஸ்ஸ ஆனுபா⁴வக³தியா ஏவ ஸத்தக்க²த்துபரமோனாம வுத்தோ. ஸோச பாளியங் கதமேஸங் பஞ்சன்னங் இத⁴ நிட்டா². ஸத்தக்க²த்துபரமஸ்ஸ கோலங் கோலஸ்ஸ ஏகபீ³ஜிஸ்ஸ ஸகதா³கா³மிஸ்ஸ யோச தி³ட்டே²வத⁴ம்மே அரஹாதி வுத்தத்தா காமப⁴வேஏவ ஜா²னரஹிதோ ஸுக்க²விபஸ்ஸகோவா
இதோ ஸத்த ததோ ஸத்த, ஸங்ஸரானி சதுத்³த³ஸாதி வுத்தங். ததா² அங்கு³த்தரேச திகனிபாதே ஸசே உதா³யி ஆனந்தோ³ அவிதராகோ³ காலங் கரெய்ய, தேன சித்தபஸாதே³ன ஸத்தக்க²த்துங் தே³வேஸு தே³வரஜ்ஜங் கரெய்ய. ஸத்தக்க²த்துங் இமஸ்மிங்யேவ ஜம்பு³தீ³பே மஹாரஜ்ஜங் கரெய்ய. அபிச உதா³யி ஆனந்தோ³ தி³ட்டே²வத⁴ம்மே பரினிப்³பா³ யிஸ்ஸதீதி வுத்தங். கேசி பன இமேஹி ஸுத்தபதே³ஹி ஸத்தக்க²த்து பரமஸ்ஸ ஸோதாபன்னஸ்ஸ காமப⁴வே சுத்³த³ஸ படிஸந்தி⁴யோ இச்ச²ந்தி. மஹாவக்³க³ஸங்யுத்தடீகாயஞ்ச கேசி பன காமப⁴வே ஸத்தக்க²த்துங்ஏவ உப்பஜ்ஜதி, ந ததோ உத்³த⁴ந்தி வத³ந்தி. தங் வீமங்ஸிதப்³ப³ந்தி வுத்தங். விப⁴ங்கே³ பன தத்த² தத்த² அட்டா²னஸுத்தேஸுச அட்டா²னமேதங் அனவகாஸோ யங் தி³ட்டி²ஸம்பன்னோ புக்³க³லோ அட்ட²மங் ப⁴வங் நிப்³ப³த்தெய்ய, நேதங் டா²னங் விஜ்ஜதீதிச, அங்கு³த்தரே ச²க்கனிபாதே அப⁴ப்³போ³ தி³ட்ட²ஸம்பன்னோ புக்³க³லோ அட்ட²மங் ப⁴வங் நிப்³ப³த்தேதுந்தி ராக³தோ³ஸமோஹானந்தி காமராக³ஸ்ஸ தோ³ஸஸ்ஸ ததே³கட்ட²மோஹஸ்ஸச. தனுகரத்தாதி யதா² ஸோதாபன்னஸந்தானே உப்பஜ்ஜந்தா த⁴ம்மிகேஸு காமவத்தூ²ஸு ப³லவந்தா ஹுத்வா உப்பஜ்ஜந்தி. யதோ தேஸங் மேது²னவத்து²ஸமாயோகோ³பி பவத்ததி, ததா² உப்பஜ்ஜிதுங் அஸமத்தே² கத்வா ஸங்லிக²னவஸேன தனுகரணதோ. அதி⁴ச்சுப்பத்திவஸேனச பரியுட்டா²னமந்த³தாவஸேனச தனுகபா⁴வங் ஸாத⁴னதோதி அத்தோ². தத்த² அதி⁴ச்சுப்பத்திவஸேனாதி கதா³சி சிரேன உப்பத்திவஸேன. பரியுட்டா²னமந்த³தாயாதி சிரேன உப்பஜ்ஜந்தானங்பி மந்த³தரங் பரியுட்டா²னவஸேன. மஹாஸிவத்தே²ரேன பன தேஸங்பி மேது²னவத்து² ஸமாயோகோ³ இச்சி²தோ. ஸோ மஹாட்ட²கதா²யங் படிக்கி²த்தோ. யஞ்ச ச²க்கனிபாதே மிகா³ஸாலவத்து²ம்ஹி அப்³ரஹ்மசாரினோபி இஸித³த்தஸ்ஸ ப்³ராஹ்மணஸ்ஸ ஸகதா³கா³மித்தங் ப⁴க³வதா ப்³யாகதங், தங்பி தஸ்ஸ ஆஸன்னமரணகாலே அதி⁴க³மவஸேன ப்³யாகதந்தி வேதி³தப்³ப³ங். ஸகிங்தே³வ இமங் லோகங் ஆக³ந்த்வா ஆக³மனதோ ஸகதா³கா³மீனாம ஹோதீதி யோஜனா. யமெத்த² வத்தப்³ப³ங், தங் ஹெட்டா² பத²மபரிச்சே²தே³ வுத்தமேவ. அரஹத்தங்பா⁴வெத்வாதி அரஹத்தமக்³க³ங் பா⁴வெத்வாகீ²ணா சத்தாரோ ஆஸவா யஸ்ஸாதி கீ²ணாஸவோ. த³க்கி²ணா வுச்சதி கம்மஞ்ச கம்மப²லஞ்ச ஸத்³த³ஹித்வா ஆயதிங் ப²லபடிலாப⁴த்தா²ய தி³ன்னதா³னங். த³க்க²ந்தி வட்³ட⁴ந்தி ஸத்தா ஏதாயாதி கத்வா. தாய பன த³க்கி²ணாய விபத்திகரானங் கிலேஸானங் ஸப்³ப³ஸோ அபா⁴வதோ ஸம்பத்திகரானஞ்ச ஸீலக்க²ந்தா⁴தி³கு³ணானங் ஸப்³ப³ஸோ பரிபுண்ணத்தா த³க்கி²ணெய்யேஸு அக்³கோ³ ஜெட்ட²கோ ஹுத்வா தங்த³க்கி²ணங் படிக்³க³ஹிதுங் அரஹதீதி அக்³க³த³க்கி²ணெய்யோ. புக்³க³லபே⁴தோ³தி சதுன்னங் ப²லட்ட²புக்³க³லானங் ஸங்கே²பபே⁴தோ³. வித்தா²ரபே⁴தோ³ பன ஏவங் வேதி³தப்³போ³, அட்ட²கதா²ஸு தாவ சதுவீஸதி ஸோதாபன்னா, த்³வாத³ஸ ஸகதா³கா³மினோ, அட்ட²சத்தாலீஸ அனாகா³மினோ, த்³வாத³ஸ எத்தா²தி ஏதஸ்மிங் புக்³க³லபே⁴தே³. ஸப்³பே³ஸங்பீதி சதுன்னங் ப²லட்டா²னங்பி ஸாதா⁴ரணாவ. ந நிரோத⁴ஸமாபத்தி விய ஏகச்சானங்ஏவ ஸாதா⁴ரணாதி அதி⁴ப்பாயோ. அதிவிய மமாயிதஸ்ஸ அபி⁴னிந்தி³ தஸ்ஸ அஜ்ஜோ²ஸிதஸ்ஸ அத்தனோ சித்தஸந்தானஸ்ஸ அபவத்திகரணங் நாம ப³ஹலராக³விமுத்தானங்ஏவ ஸிஜ்ஜ²தீதி வுத்தங், அனாகா³மீனஞ்சேவ அரஹந்தானஞ்சலப்³ப⁴தீதி. தேஸங்பி அட்ட²ஸமாபத்திலாபீ⁴னங் காமரூபப⁴வக³தானஞ்ஞேவ இத⁴ க³ஹணங் த³ட்ட²ப்³ப³ங். கஸ்மா, ஆதி³தோ பட்டா²ய அனுபுப்³ப³னிரோத⁴ப³லேனேவ க³ந்தப்³ப³த்தா. தேனாஹ தத்தா²திஆதி³. தத்ராயங் விதி⁴, பத²மஜ்ஜா²னங் ஸமாபஜ்ஜித்வா வுட்டா²ய தத்த² க³தே ஸங்கா²ரே அனிச்சதோ து³க்க²தோ அனத்ததோ விபஸ்ஸதி. ததோ து³தீயஜ்ஜா²னங் ஸமாபஜ்ஜித்வா வுட்டா²ய தத்த²க³தே ஸங்கா²ரே ததே²வ விபஸ்ஸதி. ததோ ததீயங் ஜா²னங். ததோ சதுத்த²ங் ஜா²னங். ததோ பஞ்சமங் ஜா²னங். ததோ ஆகாஸானஞ்சாயதனங். ததோ விஞ்ஞாணஞ்சா யதனங் ஸமாபஜ்ஜித்வா வுட்டா²ய தத்த²க³தே ஸங்கா²ரே ததே²வ விபஸ்ஸதி. நிரோத⁴ங் பு²ஸதீதி. தத்த²தத்தே²வாதி ததோ ததோ ஜா²னதோ தஸ்மிங் தஸ்மிங் வுட்டி²தகாலேஏவ. விபஸ்ஸந்தோதி நிரோத⁴ஸ்ஸ ஸமத² விபஸ்ஸனா யுக³னந்த⁴ப³லேனேவ பத்தப்³ப³த்தா விபஸ்ஸனாப³லேனபி சித்தஸந்தானஸ்ஸ ஸண்ஹஸுகு²மபா⁴வா பாத³னத்த²ங் இத³ங் பத²மஜ்ஜா²னங் அனிச்சந்திஆதி³னா நயேன விபஸ்ஸந்தோ. யாவஆகிஞ்சஞ்ஞாயதனங்க³ந்த்வாதி யாவ ஆகிஞ்சஞ்ஞாயதனஜ்ஜா²னங், தாவ ஸமாபஜ்ஜனவுட்டா²னவிபஸ்ஸனாவஸேன க³ந்த்வா. ஆவஜ்ஜனாதி⁴ட்டா²ன பச்சவெக்க²னானிபெத்த² இச்சி²தப்³பா³னியேவ. தேனேவ ஹி படிஸம்பி⁴தா³மக்³கே³ பஞ்சவிதா⁴ வஸியோ நிரோத⁴பரிகம்மேஸு வுத்தாதி. ததோபரந்தி ஆகிஞ்சஞ்ஞாயதனஜ்ஜா²னக³தே ஸங்கா²ரேவிபஸ்ஸனானந்தரங், அதி⁴ட்டா²தப்³ப³ந்தி அதி⁴ட்டெ²ய்யங். அத்தனோ ஸரீராப³ந்தே⁴ பரிக்கா²ரே த²பெத்வா நானாப³ந்தா⁴னி சிவராதீ³னி பரிக்கா²ரானி அக்³கி³ஆதி³னா பரிஸ்ஸயேன மாவினஸ்ஸந்தூதிவா, ஏகஸீமாயங் ஸங்க⁴கம்மே கரீயமானே ஸங்கோ⁴ மங் பபி⁴மானெஸ்ஸதி, ததா³ வுட்ட²ஹாமீதிவா, ஸத்தா² மங் கேனசிகாரணேன பக்கோஸா பெஸ்ஸதி, ததா³ வுட்ட²ஹாமீதிவா அதி⁴ட்டா²னகிச்சங். ஆதி³ஸத்³தே³ன நிரோத⁴ப்³ப⁴ந்தரேஏவ மரணங் நுகோ² மே ப⁴விஸ்ஸதீதி ஏவங் பவத்தோ அத்³தா⁴ன பரிச்சே²தோ³ க³ஹிதோ. த்³வின்னங்.ல. வொச்சி²ஜ்ஜதிசித்தஸந்ததி தத³த்தா²ய ஆதி³தோ பட்டா²ய ததா²ரூபஸ்ஸ பயோக³விஸேஸஸ்ஸ ஸுட்டு² கதத்தா. ததோதி தஸ்மிங் காலே. அனாகா³மினோ அனாகா³மி ப²லசித்தங் நிராவஜ்ஜனங்பி நிப்பரிகம்மங்பீதி அதி⁴ப்பாயோ. ததா²ஹி ஆதி³தோ பட்டா²ய புனப்புனங் பவத்திதங் விபஸ்ஸனாபரிகம்மமேவ தஸ்ஸ பரிகம்மட்டா²னே திட்ட²தி. ந விஸுங் ஆஸன்னபரிகம்மங் நாம அத்தீ²தி. பச்சவெக்க²னந்தி ப²லபச்சவெக்க²னங். ஏவங் து³வித⁴ங் கம்மட்டா²னநயங் நித்³தி³ஸித்வா இதா³னி யத³த்த²ங் ஸோ நித்³தி³ஸீயதி, தத³த்தே² ஸோதுஜனே நியோஜெந்தோ பா⁴வே தப்³ப³ந்தி கா³த²மாஹ. தத்த² படிபஜ்ஜிதப்³பா³தி படிபத்தி. படிபஜ்ஜந்திவா ஏதாய உபருபரி விஸேஸந்தி படிபத்தி. ஸீலாதி³த⁴ம்மோ. ரஸீயதி படிபத்தி ரஸஸ்ஸாதோ³. ஸாஸனே படிபத்திரஸஸ்ஸாத³ங் பத்த²யந்தேன பி⁴க்கு²னா இச்சேவங் மயா நித்³தி³ட்ட²ங் உத்தமங் பா⁴வனாத்³வயங் பா⁴வேதப்³ப³ந்தி ஸம்ப³ந்தோ⁴.
இதி பரமத்த²தீ³பனியானாம அபி⁴த⁴ம்மத்த²ஸங்க³ஹஸ்ஸ
சதுத்த²வண்ணனாய கம்மட்டா²னஸங்க³ஹஸ்ஸ
பரமத்த²தி³பனா நிட்டி²தா.