வீதி²முத்த ஸங்க³ஹ பரமத்த²தீ³பனீ
143. ஏவங்
[141] விபா⁴வனியங் பன
பரதோ மரணுப்பத்தியங் பத²மங் சுதிங் த³ஸ்ஸெத்வா பச்சா² அனந்தரே படிஸந்தி⁴யா வக்க²மானத்தா இத⁴ ஸந்தி⁴க்³க³ஹணேன அதீதா நந்தர சுதிபி க³ஹேதப்³பா³தி அதி⁴ப்பாயேன யங் வுத்தங் ‘‘ததா³ஸன்னதாய தங்க³ஹணேனேவ க³ஹிதசுதிகாலேசா’’தி. தங் ந யுஜ்ஜதியேவ.
வீதி²முத்தானஞ்ஹி விஸயப்பவத்தினாம அதீதானந்தரப⁴வே மரணுப்பத்தியங்ஏவ ஸித்³தா⁴தி ஏகஸ்மிங் ப⁴வே விஸயப்பபத்தியா ஸஹ தேஸங் படிஸந்தி⁴பமுகா²னங் வீதி²முத்தசித்தானங் பவத்தித³ஸ்ஸனத்த²ங்ஏவ தாய அதீதானந்தரசுதியா ஸத்³தி⁴ங் மரணுப்பத்திவிதா⁴னங் தே²ரேன த³ஸ்ஸிதந்தி. ப⁴வந்தி ஸத்தா ஸங்கா²ராச ஏதாஸூதி பூ⁴மியோ. அயோதி வட்³டி⁴. அத்த²தோ பன ஸுக²ங்ச ஸுக²ஹேது ஸுக²பச்சயாச வேதி³தப்³பா³. யேபு⁴ய்யேன ததோ அயதோ அபக³தா எத்த² நிப்³ப³த்தா ஸத்தாதி அபாயோ. ஸோஏவ பூ⁴மீதி அபாயபூ⁴மி. ஓளாரிகேன காமராகே³ன காமீயதீதி காமோ. க³ந்தப்³பா³ உபக³ந்தப்³பா³தி க³தி. க³ச்ச²ந்தி ஸத்தா எத்தா²திவா க³தி. அனேகவித⁴ஸம்பத்தீனங் அதி⁴ட்டா²னதாய ஸோப⁴ணாக³தி ஸுக³தி. காமோச ஸோ ஸுக³திசாதி ஸமாஸோ. நத்தி² யதா²வுத்தோ அயோ எத்தா²தி நிரயோ. நிச்சங் வா ரயந்தி கம்பந்தி ப²ந்த³ந்தி
விபா⁴வனியங் பன
க²ந்தா⁴னங் பவத்திவிஸேஸோதி வுத்தங்.
திரச்சா²னானங் யோனி திரச்சா²னயோனி. பேச்ச இதா க³தாதி பேதா. இதோ அபக்கம்ம சவித்வா ப⁴வந்தரே க³தாதி அத்தோ². யேகேசி காலங்கதா. தி³வங்க³தாபி ஹி லோகே காலங்கதா பேதாதி வுச்சந்தி. இத⁴ பன ஸுக²ஸமுஸ்ஸயதோ பேச்ச பகட்ட²ங் பவாஸங் தூ³ரங் க³தாதி அத்தே²ன யாவ ததோ ந முச்சந்தி. தாவ நிச்சங் து³க்க²ப்பத்தா லக்க²ணஸங்யுத்தாதீ³ஸு ஆக³தா ததீயா அபாயிகஸத்தா அதி⁴ப்பேதா. பேதானங் ஸமூஹோ பெத்தி. பெத்தியா விஸயோதி பெத்தி விஸயோ. விஸயோதிச பவத்திதே³ஸோ வுச்சதி. அஸுரகாயோதி எத்த² ஸுரா வுச்சந்தி உபரி தே³வா ஸுரந்தி இத்³தி⁴விஸேஸேஹி தி³ப்³ப³ந்தி, ஸுட்டு²வா ரமந்தி காமஸுக²ரதிங் பச்சனுப⁴வந்தீதி கத்வா. ந ஸுராதி அஸுரா. வேபசித்தி பஹாராதா³த³யோ ஸந்தா⁴ய ஸுரபடிபக்கா² ஸுர ஸதி³ஸாவாதி அத்தோ². வியங்கரமாதா உத்தரமாதாத³யோ வினி பாதிகே ஸந்தா⁴ய கு²த்³த³கஸுரா சூளகஸுராதி அத்தோ². யமராஜா த³யோ வேமானிகபேதே ஸந்தா⁴ய ஏகதே³ஸேன ஸுரஸதி³ஸாதி அத்தோ². வேமானிகபேதாபி ஹி கத்த²சி அஸுரகாயாதி ஆக³தா. லோகந்தரிக நேரயிகே ஸந்தா⁴ய ஸப்³ப³ஸோ ஸுரகு³ண ரஹிதாதி அத்தோ². தேபி ஹி பு³த்³த⁴வங்ஸனிதா³னட்ட²கதா²யங் ஜாதிது³க்க² நித்³தே³ஸேஸுச அஸுரகாயாதி வுத்தா. ததா² காலகஞ்சிகபேதே ஸந்தா⁴ய ஸப்³ப³ஸோ ஸுரபா⁴வரஹிதாதி அத்தோ². இதி பஞ்சன்னங் அஸுரானங் வஸேன அத்த²விபா⁴கோ³ வேதி³தப்³போ³. தி³ப்³பா³ வத போ⁴காயா பரிஹாயிஸ்ஸந்தி, பரிபூரிஸ்ஸந்தி அஸுரகாயாதி இமஸ்மிங் ஸுத்தபதே³ சத்தாரோபி அபாயா அஸுரகாயாதி அட்ட²கதா²யங் வண்ணிதா.
தத்த²
உஸ்ஸிதோ உக்³க³தோ உஸ்ஸன்னோவா மனோ ஏதேஸந்தி மனுஸ்ஸா. தேஹி அனந்தேஸு சக்கவாளேஸுபி இதரபூ⁴மிகானங் ஸத்தானங் திக்க²தரஸூர விசித்ரசித்தா ஹொந்தி. பரிபுண்ணானங் குஸலாகுஸலகம்ம பதா²னங்
ஆடானாடியஸுத்தங்செத்த²வத்தப்³ப³ங். தத்த² ஹி யக்கோ²யக்கி²னீக³ந்த⁴ப்போ க³ந்த⁴ப்பீ கும்ப⁴ண்டோ³ கும்ப⁴ண்டீ³ நாகோ³ நாகீ³திசதஸ்ஸோ அவருத்³த⁴கஜாதியோ ஆக³தா. தத்த² ஸரீரோபா⁴ஸஸிரிஸம்பத்தியுத்தோ அமனுஸ்ஸோ யக்கோ²திச தே³வோதிச தே³வதாதிச வுச்சதி. ஸரீரோ பா⁴ஸ ஸிரிஸம்பத்திரஹிதோ விக³ச்ச²ரூபோ அமனுஸ்ஸோ யக்கொ²த்வேவ வுச்சதி. ருக்க²ட்ட²கவிமானே ஜாதோ ருக்க²தே³வதானாம. ருக்க²ஸ்ஸ அப்³ப⁴ந்தரே ஜாதோ க³ந்த⁴ப்போனாம. யோ லோகே கட்ட²யக்கோ²தி வுச்சதி. புப்³பே³ நிஹீனகம்மகதா காசி க³ந்த⁴ப்பியோ மனுஸ்ஸித்தீ²னங் ஸரீரப்³ப⁴ந்தரேஸுபி ஜாயந்தி. யா வேத³க³ந்தே²ஸு யோகி³னீதிச லோகே
ஸஹ புஞ்ஞகாரினோ தெத்திங்ஸ ஜனா மாகே⁴னநாம ஜெட்ட²புரிஸேன ஸஹ எத்த² நிப்³ப³த்தாதி தெத்திங்ஸா. ஸாஏவ தாவதிங்ஸா நிருத்தி நயேன. காமஞ்செத்த² ஸப்³ப³சக்கவாளேஸுபி அயங் து³தீயதே³வ லோகோ ஜனவஸதஸுத்தே ஆக³த நயேன ஸக்கட்டா²னியானங் பஜாபதி வருண ஈஸானாதீ³னங் தெத்திங்ஸ தே³வராஜூனங் நிப³ந்த⁴னோ காஸோ ஹோதி. ஸஹஸ்ஸங் சாதுமஹாராஜிகானங். ஸஹஸ்ஸங் தாவதிங்ஸானந்தி ஹி அங்கு³த்தரே வுத்தங். மாக⁴புரிஸா பன தேஸு ஸமுதா³க³தேஸு தே³வராஜட்டா²னேஸு பச்சாஜாதா ஹொந்தி. ஏதரஹி த⁴ரமானாச தஸ்மா தேஸங் வஸேன அயங் வசனத்தோ² கதோதி வேதி³தப்³போ³. அபரே பன யதா² இந்த³கோ³பகவண்ணாபா⁴. தாவ தி³ஸ்ஸந்தி திங்ஸதீதி இமஸ்மிங் விது⁴ரஜாதகே தாவ ஸத்³தோ³ திங்ஸஸத்³த³பரிவாரமத்தோ ஹோதி. ததா² இதா⁴பீதி கத்வா திங்ஸமத்தானங் ஸக்கட்டா²னியானங் தே³வராஜகுலானங் நிவாஸட்டா² நத்தா யாமோதி தஸ்மிங் தே³வலோகே இஸ்ஸரதே³வகுலஸ்ஸ நாமங். ததா² ஸுயாமோதிச. தங் ஸஹசரிதத்தா பன ஸோ தே³வ லோகோபி தத்த² நிப்³ப³த்ததே³வாபி யாமாத்வேவ வுச்சந்தி. விபுலாய ஸிரிஸம்பத்தியா ஸமன்னாக³தத்தா நிச்சங் துஸந்தி அதிவிய ஹட்ட²துட்ட²முகா² ஹொந்தி எத்தா²தி துஸிதா. யதா²ருசிதே போ⁴கே³ ஸயமேவ நிம்மினித்வா நிம்மினித்வா ரமந்தி எத்தா²தி நிம்மானரதீ. அத்தனோ ருசிங் ஞத்வா பரேஹி நிம்மிதேஸு போ⁴கே³ஸு வஸங் வத்தெந்தி எத்தா²தி பரனிம்மிதவஸவத்தீ. ப்³ரூஹந்தி வட்³ட⁴ந்தி அதிபணீதேஹி ஜா²னாதி³ கு³ணேஹி வுத்³தி⁴ங் விருள்ஹிங் வேபுல்லங் ஆபஜ்ஜந்தீதி ப்³ரஹ்மானோ. மஹந்தா ப்³ரஹ்மானோ மஹாப்³ரஹ்மானோதி வத்தப்³பே³ மஹாஸத்³த³ஸ்ஸ லோபோ.
பரிஸதி ப⁴வாதி பாரிஸஜ்ஜா. பரிஸாஸு ஜாதாதிவா பாரிஸஜ்ஜா. பரிசாரிகாதி அத்தோ². மஹாப்³ரஹ்மானங் பாரிஸஜ்ஜாதி ப்³ரஹ்ம பாரிஸஜ்ஜா. புரே உச்சே டா²னே ஓத³ஹந்தி திட்ட²ந்தீதி புரோஹிதா. மஹாப்³ரஹ்மானங் புரோஹிதாதி ப்³ரஹ்மபுரோஹிதா. மஹந்தா ப்³ரஹ்மானோ மஹாப்³ரஹ்மானோ. ஸஹஸ்ஸொப்³ரஹ்மா த்³விஸஹஸ்ஸொப்³ரஹ்மா. திஸஹஸ்ஸொப்³ரஹ்மாதிஆதி³னா ஸங்கா²ருபபத்திஸுத்தே ஆக³தா அதி⁴பதிப்³ரஹ்மானோதி அத்தோ². தத்த² ஸஹஸ்ஸொப்³ரஹ்மாதி சக்கவாளஸஹஸ்ஸம்ஹி இஸ்ஸரோ ப்³ரஹ்மா. த்³விஸஹஸ்ஸோதி த்³வீஸு சக்கவாள ஸஹஸ்ஸேஸு இஸ்ஸரோதி அத்தோ². தயோபேதே ஏகதல வாஸினோ ஹொந்தி. தத்த² லோகே மஹாஜனா விஸுங் விஸுங் குலதே³வதாயோனாம உபட்ட²ஹந்தி. கேசி மஹாதே³வங்னாம உபட்ட²ஹந்தி. கேசி வாஸுதே³வங்னாம. கேசி மஹேஸரங்னாம. கேசி பரமெஸ்வாரங் நாமாதி. க⁴ரதே³வதா கா³மதே³வதா ருக்க²தே³வதாத³யோபி தேஸங் மஹாதே³வராஜானங் உபட்ட²காஏவ ஸம்பஜ்ஜந்தி. தத்த² மஹாதே³வரா ஜானோவிய மஹாப்³ரஹ்மானோ த³ட்ட²ப்³பா³. க⁴ரதே³வதாத³யோவிய ப்³ரஹ்ம புரோஹிதாத³ட்ட²ப்³பா³, பரித்தாபா⁴தி ப்³ரஹ்மபாரிஸஜ்ஜாஏவ. அப்பமாணாபா⁴தி ப்³ரஹ்மபுரோஹிதா ஏவ. ஆப⁴ஸ்ஸராதி மஹாப்³ரஹ்மானோஏவ. தஸ்மிங் தலே அதி⁴பதி ப்³ரஹ்மானோஏவாதி அத்தோ². ஹெட்டி²மதலதோ பன விஸேஸ கரணத்த²ங் ஆபா⁴வஸேன நாமக³ஹணங் ஹோதீதி த³ட்ட²ப்³ப³ங்.
தத்த² பரித்தா ஆபா⁴ ஏதேஸந்தி பரித்தாபா⁴. அப்பமாணா ஆபா⁴ ஏதேஸந்தி அப்பமாணாபா⁴. ஆபா⁴ஸரந்தி நிச்ச²ரந்தி ஏதேஸூதி ஆப⁴ஸ்ஸராதி. ததீயதலே பரித்தஸுபா⁴தி ப்³ரஹ்மபாரிஸஜ்ஜாஏவ. அப்பமாணஸுதாதி ப்³ரஹ்மபுரோஹிதாஏவ. ஸுதகிண்ணாதி மஹாப்³ரஹ்மனோஏவ. தஸ்மிங் தலே அதி⁴பதிப்³ரஹ்மானோ ஏவாதி அத்தோ². தத்த² ஸுபா⁴தி ஏகக்³க⁴னா அசலஸண்டி²தா ஆபா⁴ஏவ வுச்சந்தி. பரித்தா ஸுபா⁴ ஏதேஸந்தி பரித்தஸுபா⁴. அப்பமாணா ஸுபா⁴ ஏதேஸந்தி அப்பமாணஸுபா⁴. ஸுதேஹி ஆகிண்ணாதி ஸுபா⁴கிண்ணா. ஸுப⁴கிண்ஹாதிபி பட²ந்தி. தேஸங் ஆகாரஸ்ஸ ரஸ்ஸோ அந்திமணகாரஸ்ஸ ச ஹகாரோ த³ட்ட²ப்³போ³. இமேஸு பன த்³வீஸு தலேஸு பகதிகாயப்பபா⁴ அதி⁴மத்தா ஹொந்தி. தஸ்மா தாஸங் வஸேன பரித்தாபா⁴திஆதி³கங் நாமங் ஸித்³த⁴ங். ந ப்³ரஹ்மபாரி ஸஜ்ஜாதிஆதி³கங். வேஹப்ப²லா. அத²வா இஞ்ஜனஜாதிகேஹி ஸோமனஸ்ஸஜ்ஜா²னேஹி நிப்³ப³த்தானங் திண்ணங் ஹெட்டி²மதலானங் தேஜோஸங் வட்டாதி³கேன அந்தராயேன பூ⁴மிதலேன ஸஹ ஆயுகப்பனிவத்திவஸேன இஞ்ஜிதங் புஞ்ஞப²லங் அத்தி². தேஸு ஹி யங் ஸுபா⁴கிண்ணானங் தே³வானங் சதுஸட்டி²கப்பானீதி வுத்தங். தங் தஸ்மிங் தலே ஆதி³கப்பிகானங் வஸேன வுத்தங். பச்சி²மிகானங் பன தேஸட்டி²கப்ப த்³வாஸட்டி²கப்ப ஏகஸட்டி² கப்பாதி³ வஸேன இஞ்ஜிதங் படிலீனங் புஞ்ஞப²லங் ஹோதீதி. ஆனேஞ்ஜஜாதிகேன உபெக்கா²ஜா²னேன நிப்³ப³த்தானங் பன கேனசி அந்தராயேன தாதி³ஸங் இஞ்ஜிதங் புஞ்ஞப²லங் நாம நத்தி². தஸ்மா ஜா²ன ஸாமத்தி²யானுரூபங் விஸேஸேன ஈஹிதங் அபி⁴வட்³டி⁴தங் புஞ்ஞப²லங் எத்த² அத்தீ²தி வேஹப்ப²லா.
நத்தி² ஸஞ்ஞாமுகே²ன க³ஹிதா சத்தாரோ அரூபக்க²ந்தா⁴ ஏதேஸந்தி அஸஞ்ஞா. அஸஞ்ஞாச தே ஸத்தாசாதி அஸஞ்ஞஸத்தா. சித்தசே தஸிகானங் பன நத்தி²தாய தேஸங் அஸத்தபஸங்க³தா ஸம்ப⁴வதீதி ஸத்தக³ஹணங் கதந்தி த³ட்ட²ப்³ப³ங். ஏதே த்³வேபி ஏகதலவாஸினோ ஏவ ஹொந்தி. எத்த²பி நிப்³ப³த்தகஜ்ஜா²னஸ்ஸ ஹீனமஜ்ஜி²மபணீததா விஸேஸஸ்ஸ அத்தி²தாய தத³னுரூபங் ப்³ரஹ்மானங்பி பாரிஸஜ்ஜ புரோஹித மஹாப்³ரஹ்மத்த விஸேஸோ ஸம்ப⁴வதியேவ. ஆயுவேமத்ததாய பன அஞ்ஞமஞ்ஞ அத³ஸ்ஸனாதீ³னஞ்ச நத்தி²தாய பாரிஸஜ்ஜாதி³வஸேன பூ⁴மிவிபா⁴கோ³ நத்தீ²தி வேதி³தப்³போ³. ஏவங் அவிஹாதீ³ஸுபி. ஓளாரிகானங் காமராக³படிகா⁴னுஸயானங் நத்தி²தாய ஸுத்³தா⁴னங் அனாகா³மிஅரஹந்தானமேவ ஆவாஸாதி ஸுத்³தா⁴வாஸா. தத்த² பத²மபூ⁴மிவாஸினோ அப்பகேன காலேன அத்தனோ டா²னங் நவிஜஹந்தீதி அவிஹா. அத²வா, ஓளாரிகானங் பஞ்சன்னங் ஸங்யோஜனானங் பஹீனத்தா நத்தி² சித்தஸ்ஸ விஹஞ்ஞனங் ஸமத²விபஸ்ஸ நாத⁴ம்மேஸு அவிப்பா²ரிகதாபத்தி ஏதேஸந்தி அவிஹா. து³தீயபூ⁴மி வாஸினோ ந கேனசி சித்தபரிளாஹேன தப்பந்தீதி அதப்பா. ததீய தலவாஸினோ பரிஸுத்³தே⁴ஹி பஸாத³சக்கு² தி³ப்³ப³சக்கு² த⁴ம்மசக்கு² பஞ்ஞா சக்கூ²ஹி ஸம்பன்னத்தா ஸுட்டு² பஸ்ஸந்தீதி ஸுத³ஸ்ஸா. சதுத்த²பூ⁴மிவாஸினோ பன ஸுத³ஸ்ஸினோ. அதிஸயத்தே² ஹி அயங் ஈகாரோதி. பஞ்சமபூ⁴மி வாஸினோ உபரி அஞ்ஞஸ்ஸ பூ⁴மந்தரக³தஸ்ஸ ரூபிப்³ரஹ்முனோ நத்தி²தாய நத்தி² ரூபீனங் ஸத்தானங் மஜ்ஜே² கேனசி கு³ணேன கனிட்ட²பா⁴வோ ஏதேஸந்தி அகனிட்டா².
ஆகாஸானஞ்சாயதனபூ⁴மீதி எத்த² யத்தகங் ஆகாஸபதே³ஸங் ப²ரித்வா ஆகாஸானஞ்சாயதன ஸஞ்ஞிதா சதுக்க²ந்தா⁴ பவத்தந்தி. ஸோ க²ந்த⁴ஸஹிதோ ஆகாஸபதே³ஸோ ஆகாஸானஞ்சாயயனபூ⁴மி. ஏவங் ஸேஸாஸு. புது²ஜ்ஜனா ஸோதாபன்னா ஸகதா³கா³மினோசாபி புக்³க³லா ஸுத்³தா⁴வாஸேஸு ஸப்³ப³தா² ஸப்³ப³பகாரேனபி நலப்³ப⁴ந்தீதி யோஜனா. எத்த²ச ஸகதா³கா³மீனங் படிக்கே²பேன அனாகா³மி மக்³க³ட்ட²ஸ்ஸபி தத்த² படிக்கே²போ ஸித்³தோ⁴ ஹோதீதி உபரிமானங் திண்ணங் அரியானமேவ தத்த² படிலாபோ⁴ இமாய கா³தா²ய வுத்தோதி வேதி³தப்³போ³. ஸேஸட்டா²னேஸூதி பஞ்சஸுத்³தா⁴வாஸதோ அஸஞ்ஞாபாயதோச அவஸேஸேஸு ஏகவீஸதியா டா²னேஸு, அனரியாதி புது²ஜ்ஜனா. [பூ⁴மிசதுக்கங்]
144. ஓக்கந்திக்க²ணேதி படிஸந்தி⁴க்க²ணே. படிஸந்தி⁴ஹி ப⁴வந்தரே ஓக்கமனங் அனுபவிஸனந்தி² அத்தே²ன ஓக்கந்தீதி வுச்சதி. ததோ பரங் ப⁴வங்க³ங் ஹுத்வாதி யோஜனா. கேசி பன ப⁴வங்க³பரியோஸானேதி பட²ந்தி. தங் ந யுஜ்ஜதி. ஜாதியா அந்தோ⁴ ஜச்சந்தோ⁴. ஆதி³ஸத்³தே³ன ஜாதி ப³தி⁴ர ஜச்சகா⁴னக ஜாதிமூக³ ஜச்சேள ஜச்சும்மத்தக பண்ட³க உப⁴தோ ப்³யஞ்ஜனக நபுங்ஸக மம்மாத³யோ ஸங்க³ண்ஹாதி. தத்த² யஸ்ஸ சக்கு²ங் உப்பாதே³துங் அஸமத்தே²ன கம்மேன படிஸந்தி⁴ லத்³தா⁴. ஸோ ஜச்சந்தோ⁴ நாம. ஏஸனயோ ஸேஸேஸுபி. தத்த² பஸாத³ஸோத ரஹிதோ ஜாதிப³தி⁴ரோ நாம. பஸாத³ கா⁴னரஹிதோ ஜச்ச கா⁴னகோ நாம. பஸாத³ஜிவ்ஹாரஹிதோ நாம நத்தி². வசனரஹிதோ ஜாதிமூகோ³னாம. தி³ஸாவிதி³ஸாமத்தங்பி ஸஞ்ஞாபேதுங் அஸக்குணெய்யோ ஜாதிஏளோ நாம. ஸப்³ப³காலங்பி விபல்லட்ட²சித்தோ ஜச்சும்மத்தகோனாம. காமஹேது ஆஸித்தகாதி³பா⁴வேன விப்பகாரபத்தோ பண்ட³கோனாம. த்³வீஹி ப்³யஞ்ஜனேஹி ஸமன்னாக³தோ உப⁴தோ ப்³யஞ்ஜனகோனாம. பா⁴வத்³வய ரஹிதோ நபுங்ஸகோனாம. பகதிவசனேபி ஏகமேகங் அக்க²ரங் மஹுஸ்ஸாஹேன
[142] யங் பன விபா⁴வனியங்
‘‘அபரே பன ஜச்சந்தோ⁴தி பஸுதியங்யேவ அந்தோ⁴. மாது குச்சி²யங் அந்தோ⁴ ஹுத்வா நிக்க²ந்தோதி அத்தோ². தேன து³ஹேதுகதிஹேதுகானங் மாதுகுச்சி²யங் சக்கு²ஸ்ஸ அவிபஜ்ஜனங் ஸித்³த⁴ந்தி வத³ந்தீதி’’ வுத்தங். தங் ந யுத்தங்.
லோகே மாதுகுச்சி²யங்யேவ அந்தோ⁴ ஹுத்வா நிக்க²ந்தஸ்ஸபி ஏகச்சஸ்ஸ தங் தங் ஸிப்பவிஜ்ஜாடா²னேஸு பஞ்ஞாவெய்யத்தியபா⁴வஸ்ஸ தி³ட்ட²த்தா. த²பெத்வா ஹி மஹாபோ³தி⁴ஸத்தே அஞ்ஞேச பச்சி²மப⁴விகே ஸத்தே அவஸேஸானங் த்³விஹேதுக திஹேதுகானங்பி மாதுகுச்சி²ம்ஹி பரூபக்கமேனவா மாதுயா விஸமபயோகே³னவா நானாபா³தே⁴னவா உப்பன்னானங்பி சக்கு²ஸோதானங் விபத்தினாம நத்தீ²தி ந ஸக்கா நியமேதுந்தி. பு⁴ம்மஸ்ஸிதானஞ்ச வினிபாதிகாஸுரானந்தி எத்த² பூ⁴மியங் ஜாதாதி பு⁴ம்மா. பூ⁴மிஸம்ப³ந்தே⁴ஸு ருக்க²ட்ட²க பப்³ப³தட்ட²க விமானேஸு நிப்³ப³த்தா ஆளவக ஸாதாகி³ர ஹேமவதாத³யோ மஹித்³தி⁴கா பு⁴ம்மாதே³வா. யே லோகே ப³லிஹரண வஸேன பூஜனீயட்டே²ன யக்கா²திபி வுச்சந்தி. யே பன பு⁴ம்மதே³வஜாதிகாபி ஸமானா அத்தனோ புஞ்ஞனிப்³ப³த்தஸ்ஸ கஸ்ஸசி போ⁴க³ஸுக²ஸ்ஸ அபா⁴வா கிச்ச²ஜீவி கப்பத்தா
தேஸூதி யதா²வுத்தபடிஸந்தி⁴ யுத்தேஸு புக்³க³லேஸு. யஸ்மா ஆயுபரிச்சே²தோ³னாம ஏகபூ⁴மிபரியாபன்னானங் ஸப்³ப³ஸத்தானங் அஸேஸஸா தா⁴ரணனியமபரிமாணவஸேன பவத்தோ. அபாயானங் மனுஸ்ஸானங் பு⁴ம்ம தே³வானஞ்ச தாதி³ஸோ நியமபரிமாணோனாம நத்தி². ந ஹி ஸகலசக்க வாளபரியாபன்னா ஏகபூ⁴மகா ஸப்³ப³னிரயா ஏகஆயுபரிச்சே²தா³ ஹொந்தி. திரச்சா²னாதீ³ஸுபி ஏஸேவனயோ. தஸ்மா வுத்தங் சதுன்னங் அபாயானந்திஆதி³. சதுன்னங் அபாயானங் ஆபாயிகபுக்³க³லானங் ஆயுப்பமாண க³ணனாய நியமோ நத்தி², தத்த² யேபு⁴ய்யேன கம்மபமாணத்தா. தத்த² நிரயேஸு அப்³பு³தா³தீ³னங் த³ஸன்னங் நிரயானங் ப⁴க³வதா வுத்தோ ஆயுபரிச்சே²தோ³பி தத்த² தத்த² நிப்³ப³த்தகேன கம்மேனேவஸித்³தோ⁴தி வேதி³தப்³போ³. மனுஸ்ஸானந்தி இத³ங் ஜம்பு³தீ³பகா³ஸீனங் வஸேன வுத்தந்தி வத³ந்தி. தே ஸஞ்ஞேவ
வினிபாதிகாஸுரானந்தி இத³ங் நித³ஸ்ஸனமத்தங் த³ட்ட²ப்³ப³ங். ஸப்³பே³ஸங்பி மஹேஸக்கா²னங் அப்பேஸக்கா²னஞ்ச பு⁴ம்மதே³வானங் வேமானிகபேதாதீ³னஞ்ச இத⁴ அதி⁴ப்பேதத்தா. தேஸஞ்ஹி ஸப்³பே³ஸங்பி கம்மமேவ பமாணந்தி. சாதுமஹாராஜிகானங்பனதே³வானந்தி இத³ங் உபரிமே சாதுமஹாராஜிகே ஸந்தா⁴ய வுத்தங். தி³ப்³பா³னீதி தஸ்மிங் தே³வலோகே ஸித்³தா⁴னி. பஞ்ச வஸ்ஸஸதானீதி இத³ஞ்ச யேபு⁴ய்யவஸேன வுத்தந்தி க³ஹேதப்³ப³ங். யஸ்மா பன கஸ்ஸபபு³த்³த⁴ஸ்ஸ ஸாவகபூ⁴தா ஸோதாபன்னதே³வ புத்தா ஆகாஸட்ட²க விமானேஸு நிப்³ப³த்தா யாவ நிமிராஜகாலாபி திட்ட²ந்தீதி ஜாதகட்ட²கதா²யங் வுத்தா. தஸ்மா கேஸஞ்சி ஆகாஸட்ட²கதே³வானங்பி கம்மபமாணதா ஸித்³தா⁴ ஹோதீதி வேதி³தப்³ப³ங். ந செத்த² புனப்புனங் நிப்³ப³த்தி சிந்தேதப்³பா³. ந ஹி ஸோதா பன்னானங் ஸத்தக்க²த்துதோ பரங் காமப⁴வே படிஸந்தி⁴னாம அத்தி². ந ச தஸ்மிங் தே³வலோகே ஸஹஸ்ஸக்க²த்துங் நிப்³ப³த்தமானாபி தத்தகங் காலங் ஸங்பாபுணிதுங் ஸக்கொந்தீதி. மனுஸ்ஸக³ணனாயாதி மனுஸ்ஸானங் வஸ்ஸக³ணனாய. மனுஸ்ஸலோகே ஹி பஞ்ஞாஸவஸ்ஸானி சாதுமஹாராஜிகே ஏகோ தி³ப்³ப³ரத்திதி³வோ ஹோதி. திங்ஸரத்திதி³வா ஏகோ தி³ப்³ப³மாஸோ. த்³வாத³ஸமாஸா ஏகங் தி³ப்³ப³வஸ்ஸங். தேன தி³ப்³ப³வஸ்ஸேன தேஸங் பஞ்சவஸ்ஸஸதானி ததோதி சாதுமஹாராஜிகானங் தே³வானங் ஆயுப்பமாணதோ. சதுகு³ணந்தி ஆயுபமாணஸ்ஸ தி³கு³ணவுத்³தி⁴யாசேவ தி³ப்³ப³ஸ்ஸ ரத்திதி³வஸ்ஸ தி³கு³ணவுத்³தி⁴யாச வஸேன சதூஹி பா⁴கே³ஹி கு³ணிதங் வட்³டி⁴தந்தி அத்தோ². ஏஸனயோ ஸேஸேஸுபி. தத்த² ஆயுபமாணஸ்ஸ தி³கு³ணவுத்³தி⁴னாம ஹெட்டி²மானங் தே³வானங் ஆயுபமாணதோ உபரிமானங் தே³வானங் ஆயுபமாணஸ்ஸ தி³கு³ணவுத்³தி⁴. ஏதேன தாவதிங்ஸானங் தி³ப்³ப³ங் ஏகங் வஸ்ஸஸஹஸ்ஸங். யாமானங் த்³வேவஸ்ஸஸஹஸ்ஸானி. துஸிதானங் சத்தாரி, நிம்மானரதீனங் அட்ட². வஸவத்தீனங் தி³ப்³பா³னி ஸோளஸவஸ்ஸ ஸஹஸ்ஸானி ஆயுப்பமாணங் ஹோதீதி ஸித்³த⁴ங் ஹோதி.
தி³ப்³ப³ஸ்ஸ ரத்திதி³வஸ்ஸ தி³கு³ணவுத்³தி⁴னாம ஹெட்டி²மானங் தே³வானங் ரத்திதி³வதோ உபரிமானங் ரத்திதி³வஸ்ஸ தி³கு³ணவுத்³தி⁴. ஏதேன மனுஸ்ஸலோகே ஏகங் வஸ்ஸஸதங் தாவதிங்ஸே ஏகோ தி³ப்³ப³ரத்திதி³வோ. த்³வேவஸ்ஸஸதானி யாமே. சத்தாரி துஸிதே. அட்ட² நிம்மானரதியங். ஸஹஸ்ஸங் ச² சவஸ்ஸஸதானி வஸவத்தியங் ஏகோ தி³ப்³ப³ரத்திதி³வோதி ஸித்³த⁴ங் ஹோதி. ரத்திதி³வானஞ்ச தி³கு³ணவுத்³தி⁴யா ஸித்³தா⁴ய மாஸஸங்வச்ச²ரானங்பி தி³கு³ணவுத்³தி⁴ ஸித்³தா⁴வ ஹோதீதி. ஏவஞ்சஸதி யதா²வுத்தானி தாவதிங்ஸாதீ³னங் தி³ப்³ப³வஸ்ஸஸஹஸ்ஸாதி³னிபி அத்தனோ அத்தனோ ரத்திதி³வமாஸஸங்வச்ச²ரேதிஏவ வேதி³தப்³பா³னீதி ஸித்³த⁴ங் ஹோதி. ததா²ச ஸதி உபரிமானங் ஆயுபரிமாணானி ஹெட்டி²மானங் ஆயுபரிமாணதோ சதுகு³ணானீதி ஸித்³த⁴ங் ஹோதி. தேன வுத்தங். ததோ சதுகு³ணங் தாவதிங்ஸானங். ததோ சதுகு³ணங் யாமானந்திஆதி³. தி³ப்³ப³க³ணனாய ச ததா² ஸித்³தா⁴ய ஸதி மனுஸ்ஸக³ணனாயபி சதுகு³ணபா⁴வோ ஸித்³தோ⁴யேவ ஹோதி. தஸ்மா மனுஸ்ஸக³ணனாயபி ஹெட்டி²மானங் நவுதிவஸ்ஸஸதஸஹஸ்ஸாதீ³னி சதூஹி உபரூபரிகு³ணிதானி உபரிமானங் திகோடிஸட்டி²வஸ்ஸஸத ஸஹஸ்ஸாதி³னி ப⁴வந்தீதி கத்வா தானி ஸப்³பா³னிபி ஆதி³அந்தத³ஸ்ஸன வஸேன நித்³தி³ஸந்தோ நவஸதந்தி கா³த²மாஹ. வஸ்ஸானங் நவஸதங் கோடியோ ச ஏகவீஸ கோடியோ ச ததா²ஸட்டி²வஸ்ஸ ஸதஸஹஸ்ஸானி ச வஸவத்தீஸு தே³வேஸு ஆயுப்பமாணங் ஹோதீதி யோஜனா.
யஸ்மா து³தீயஜ்ஜா²னவிபாகங் ததியஜ்ஜா²னவிபாகஞ்ச து³தீயஜ்ஜா²னபூ⁴மியந்தி. தேனேவச பூ⁴மீனங் டி²திக்கமோபி சதுத்த²ஜ்ஜா²ன வஸேனேவ ஸித்³தோ⁴. தே²ரேன பன ஹெட்டா² பஞ்சகனயவஸேனேவ ஜா²னானி வுத்தானி. தஸ்மா இத⁴பி தேனேவ நயேன விபாகானி க³ஹெத்வா சதுத்த²ஜ்ஜா²னவிபாகங் ததீயஜ்ஜா²னபூ⁴மியந்திஆதி³ வுத்தங். தேஸூதி தாஹி ச²ஹி படிஸந்தீ⁴தி க³ஹிதபடிஸந்தி⁴கேஸு. கப்பஸ்ஸாதி இத³ங் அஸங்க்²யெய்யகப்பங் ஸந்தா⁴ய வுத்தங். சதுப்³பி³தா⁴ ஹி கப்பாமஹாகப்போ அஸங்க்²யெய்யகப்போ அந்தரகப்போ ஆயுகப்போதி, தத்த² ஆயுகப்போனாம தேஸங் தேஸங் ஸத்தானங் தங்தங் ஆயுபரிச்சே²தோ³ வுச்சதி. அந்தரகப்போனாம ஏகஸ்ஸவிவட்டட்டா²யிஅஸங்க்²யெய்யஸ்ஸ அப்³ப⁴ந்தரே மனுஸ்ஸானங் ஆயுகப்பஸ்ஸ ஹாயனவட்³ட⁴னவஸேன தி³ஸ்ஸமானந்தரா சதுஸட்டி²பபே⁴தா³ சூளகப்பா வுச்சந்தி. பீஸதிபே⁴தா³தி கேசி. அஸீதிபே⁴தா³தி அபரே. சுத்³த³ஸப்ப பே⁴தா³தி வேத³விது³. யே லோகே மன்வந்தரகப்பாதி வுச்சந்தி. ஏகமேகேன மனுனாமகேன மஹாஸம்மதராஜேன உபலக்கி²தா அந்தரகப்பாதி வுத்தங் ஹோதி. கேசி பன ஏகஸ்மிங் விவட்டட்டா²யிம்ஹி மஹாஸம்மதரா ஜானங் ஏகமேவ இச்ச²ந்தி. சதுஸட்டி²அந்தரகப்பா பன ஏகோ அஸங்க்²யே கப்போனாம. ஸோ சதுப்³பி³தோ⁴ ஸங்வட்டோ ஸங்வட்டட்டா²யீ விவட்டோ விவட்டட்டா²யீதி. தத்த² வினஸ்ஸமானோ கப்போ ஸங்வட்டோ. யதா² வினட்ட²ங் திட்ட²மானோ கப்போ ஸங்வட்டட்டா²யீ. வட்³ட⁴மானோ கப்போ விவட்டோ. யதா² விவட்டங் திட்ட²மானோ கப்போ விவட்டட்டா²யீதி வேதி³தப்³போ³. தே பன சத்தாரோ அஸங்க்²யெய்யகப்பா ஏகோ மஹாகப்போனாம. எத்த²ச யோ ஜனாயாமவித்தா²ரே ஸேதஸாஸபராஸிம்ஹி வஸ்ஸஸத வஸ்ஸஸதச்சயேன ஏகேகபீ³ஜஹரணேன பரிக்கீ²ணேபி ஏகோ மஹாகப்போ பரிக்க²யங் நக³ச்ச²தி. ஏவங் தி³கோ⁴ மஹாகப்போதி வேதி³தப்³போ³.
தத்த² யதா³ கப்போ தேஜேன ஸங்வட்டதி. ஆப⁴ஸ்ஸரதோ ஹெட்டா² அக்³கி³னா த³ய்ஹதி. யதா³ ஆபேன ஸங்வட்டதி. ஸுபா⁴கிண்ணதோ ஹெட்டா² உத³கேன ஆப⁴ஸ்ஸரானங் அட்ட²கப்பானீதி. ஏதேன அட்ட²மே வாரே ஆபோஸங்வட்டோ ஹோதி. அந்தரா ஸத்தஸு ஸத்தஸு வாரேஸு தேஜோஸங்வட்டா ஹொந்தீதி ஸித்³த⁴ங். யஞ்ச வுத்தங் ஸுபா⁴கிண்ணானங் சதுஸட்டி²கப்பானீதி. ஏதேன சதுஸட்டி²மே சதுஸட்டி²மே வாரே வாதஸங்வட்டோஹோதி. அந்தரா தேஸட்டி²யா வாரேஸு தேஜோஸங்வட்டா ஆபோஸங்வட்டாச ஹொந்தீதி ஸித்³த⁴ங் ஹோதீதி. தேனாஹு போராணா –
அக்³கி³னா ப⁴ஸ்ஸரா ஹெட்டா², ஆபேன ஸுபா⁴கிண்ணதோ;
வேஹப்ப²லதோ வாதேன, ஏவங் லோகோ வினஸ்ஸதி.
ஸத்தஸத்தக்³கி³னா வாரா, அட்ட²மே அட்ட²மே த³கா;
சதுஸட்டி² யதா³ புண்ணா, ஏகோ வாயுவாரோ ஸியாதி.
ஏவஞ்ச வினட்டே² லோகே ஏகஸ்மிங் கப்பேபி பத²மஜ்ஜா²னபூ⁴மி அவினட்டா²னாம நத்தி². தஸ்மா ப்³ரஹ்மபாரிஸஜ்ஜானங்தே³வானங் கப்பஸ்ஸததீயோ பா⁴கோ³ ஆயுப்பமாணங், ப்³ரஹ்மபுரோஹிதானங்உபட்³ட⁴கப்போ, மஹா ப்³ரஹ்மானங்ஏகோகப்போதி எத்த² அஸங்க்²யெய்ய கப்போவ ஸம்ப⁴வதி. நமஹாகப்போ. தேன வுத்தங் கப்பஸ்ஸாதி இத³ங் அஸங்க்²யெய்யகப்பங் ஸந்தா⁴ய வுத்தந்தி. ஆயுகப்பங் ஸந்தா⁴ய வுத்தந்திபி யுஜ்ஜதியேவ. தேஜோஸங்வட்டகப்பேஸு ஹி பத²மஜ்ஜா²னதலங் விவட்டமானங் ஸப்³ப³பத²மங் விவட்டதி. ஸங்வட்டமானங் ஸப்³ப³பச்சா² ஸங்வட்டதி. தஸ்மா விவட்டஸ்ஸ பச்சி²மட்³டே⁴ன ஸங்வட்டஸ்ஸச புப்³ப³ட்³டே⁴ன ஸஹ ஏகங் விவட்டட்டா²யிகப்பங் க³ஹெத்வா த்³வே அஸங்க்²யெய்யானி தஸ்மிங் தலே ஏகோ ஆயுகப்போதி ஸக்கா வத்துந்தி. து³தீய தலதோ பட்டா²ய பன மஹாகப்போவ க³ஹேதப்³போ³. அப்பகங் ஊனகங்வா அதி⁴கங்வா க³ணனூபக³ங் ந ஹோதீதி கத்வா உபட்³டே⁴ஹி ஆகாஸானஞ்சாயதனுபகா³, தேஸங். ஏகோவ விஸயோ ஆரம்மணங் யஸ்ஸ தங் ஏகவிஸயங். ஏகஜாதியந்தி ஏகஸ்மிங் ப⁴வே. [படிஸந்தி⁴சதுக்கங்.]
145. ஜனேதீதி ஜனகங் உபத்த²ம்பே⁴தீதி உபத்த²ம்ப⁴கங். உபபீளேதீதி உபபீளகங். உபகா⁴தேதீதி உபகா⁴தகங். தத்த² ஜனகங் நாம படிஸந்தி⁴பவத்தீஸு விபாகக்க²ந்த⁴ கடத்தாரூபானங் நிப்³ப³த்திகா குஸலாகுஸலசேதனா. தத்த² படிஸந்தி⁴னிப்³ப³த்திகா கம்மபத²பத்தாவ த³ட்ட²ப்³பா³. பவத்தினிப்³ப³த்திகா பன கம்மபத²ங் பத்தாபி அபத்தாபி அந்தமஸோ பஞ்சத்³வாரிகஜவனசேதனாபி ஸுபினந்தே குஸலாகுஸலசேதனாபீதி. உபத்த²ம்ப⁴கங்னாம விபச்சிதுங் அலத்³தோ⁴காஸாவா விபக்கவிபாகா வா ஸப்³பா³பி குஸலாகுஸலசேதனா. ஸா ஹி ஜனகபூ⁴தாபி ஸமானா அத்தனோவிபாகவாரதோ புரேவா பச்சா²வா ஸபா⁴ங்க³ங் கம்மந்த ரங்வாகம்மனிப்³ப³த்தக்க²ந்த⁴ஸந்தானங்வாஉபத்த²ம்ப⁴மானா பவத்ததி. யதா² க³ந்தா²ரப்³பே⁴ ரதனத்தயபணாமசேதனாதி. யங் பன விஸுத்³தி⁴மக்³கே³ உபத்த²ம்ப⁴கங் பன விபாகங் ஜனேதுங் நஸக்கோதீதி வுத்தங். தங் அலத்³த⁴விபாகவாரங் ஸந்தா⁴ய வுத்தந்தி க³ஹேதப்³ப³ங். ந ஹி பச்சயஸாமக்³கி³யங் ஸதி கிஞ்சிகம்மங் பவத்திவிபாகமத்தஸ்ஸபி அஜனகங்னாம அத்தீ²தி. தத்த² கம்மந்தரஸ்ஸ உபத்த²ம்ப⁴னங்னாம அலத்³தோ⁴காஸஸ்ஸ அஞ்ஞஸ்ஸ ஜனககம்மஸ்ஸ ஓகாஸகரணங். தங் பன மரணாஸன்னகாலே பாகடங். ததா³ ஹி குஸலே ஜவிதே அஞ்ஞங் படிஸந்தி⁴ஜனகங் குஸலகம்மங் ஓகாஸங் லப⁴தி. அகுஸலே ஜவிதே அஞ்ஞங் அகுஸலகம்மந்தி. வுத்தஞ்ஹேதங் இதி வுத்தகே –
இமஸ்மிங் சாயங் ஸமயே, காலங்கரியாத² புக்³க³லோ;
ஸக்³க³ம்ஹி உபபஜ்ஜெய்ய, சித்தஞ்ஹிஸ்ஸ பஸாதி³தங்.
இமஸ்மிங் சாயங் ஸமயே, காலங்கரியாத² புக்³க³லோ;
நிரயே உபபஜ்ஜெய்ய, சித்தஞ்ஹிஸ்ஸ பதூ³ஸிதந்தி.
பவத்திகாலேபி ஏதங் ப³ஹுலங் லப்³ப⁴தியேவ. கம்மனிப்³ப³த்தக²ந்த⁴ஸந்தானஸ்ஸ உபத்த²ம்ப⁴னங்னாம அஞ்ஞேன லத்³தோ⁴காஸேன குஸலகம்மேனவா அகுஸலகம்மேனவா
அபி⁴வாத³னஸீலிஸ்ஸ, நிச்சங் வுத்³தா⁴பசாயினோ;
சத்தாரோ த⁴ம்மா வட்³ட⁴ந்தி, ஆயு வண்ணோ ஸுக²ங் ப³லந்தி.
எத்த² பன குஸலங்பி அகுஸலகம்மனிப்³ப³த்தஸ்ஸ க²ந்த⁴ஸந்தானஸ்ஸ அகுஸலங்பி குஸலகம்மனிப்³ப³த்தஸ்ஸ உபத்த²ம்ப⁴கங்னாம நத்தீ²தி நவத்தப்³ப³ங். அகுஸல கம்ம நிப்³ப³த்தஸ்ஸபி ஹி மஹித்³தி⁴கானங் நாக³ஸுபண்ணாதீ³னங் க²ந்த⁴ஸந்தானஸ்ஸ பவத்திகாலே புப்³ப³கதங் குஸலங் வுத்தனயேன உபப்³ரூஹனங் கரோதியேவ. ததா²குஸலகம்மனிப்³ப³த்தஸ்ஸபி கேஸஞ்சி வினிபாதிகாஸுராதீ³னங் க²ந்த⁴ஸந்தானஸ்ஸ பவத்திகாலே புப்³ப³கதங் அகுஸலங் சிரதரப்பவத்திங் கரோதியேவாதி. உபபீளகஉபகா⁴தகானிபி வுத்தப்பகாரா குஸலாகுஸல சேதனாயோஏவ. தாபி ஹி ஜனகபூ⁴தாபி ஸமானா அத்தனோ விபாகவாரதோ புரேவா பச்சா² வா விபாகவார க³ஹண காலேபி வா கம்மந்தரங்வா கம்மனிப்³ப³த்த க²ந்த⁴ஸந்தானங்வா து³ப்³ப³லதரங் கத்வாவா விபா³த⁴யமானா ஸப்³ப³ஸோவா உபச்சி²ந்த³மானா பவத்தந்தீதி. தத்த² உபபீளகே தாவ கம்மந்தரஸ்ஸ விபா³த⁴னங்னாம அஞ்ஞஸ்ஸ ஜனககம்மஸ்ஸ து³ப்³ப³லபா⁴வகரணங். கம்மஞ்ஹி நாம ஆயூஹனகாலே ப³லவந்தங்பி பச்சா² கதேன உஜுபடிபக்கே²ன கம்மந்தரேன விபா³தி⁴யமானங் புன விஹதஸாமத்தி²யங் ஹோதி. உபரிபூ⁴மி நிப்³ப³த்தகங்பி ஸமானங் ஹெட்டா²பூ⁴மியங் நிப்³ப³த்தேதி. மஹேஸக்கே²ஸு மஹித்³தி⁴கேஸு நிப்³ப³த்தகங்பி ஸமானங் அப்பேஸக்கே²ஸு நிப்³ப³த்தேதி. ததா² உச்சகுலேஸு நிப்³ப³த்தகங்பி நீசகுலேஸு. தீ³கா⁴யுகேஸு நிப்³ப³த்தகங்பி அப்பாயுகேஸு. மஹாபோ⁴கே³ஸு நிப்³ப³த்தகங்பி அப்பபோ⁴கே³ஸு. புரிஸத்த பா⁴வனிப்³ப³த்தகங்பி ஸமானங் இத்த²த்தபா⁴வங்வா நபுங்ஸகபா⁴வங் வா நிப்³ப³த்தேதி. வண்ணஸம்பத்தினிப்³ப³த்தகங்பி து³ப்³ப³ண்ணபா⁴வங். இந்த்³ரியஸம்பத்தினிப்³ப³த்தகங்பி அந்த⁴ங்வா ப³தி⁴ரங்வா யங்கிஞ்சி இந்த்³ரியவேகல்லங். அங்க³பச்சங்க³ ஸம்பத்திஜனகங்பி ஹத்த²பாதா³தி³ அங்க³வேகல்லங் ஜனேதி. ததா² ஆயூஹனகாலே மஹானிரயேஸு நிப்³ப³த்தகங்பி அகுஸலங் பச்சா²கதேன ப³லவகுஸலேன விபா³தி⁴யமானங்
உபத்த²ம்ப⁴கங்பி தப்³பி³பரியாயேன வேதி³தப்³ப³மேவ. ததா² ஹி கம்மங் நாம கதகாலேது³ப்³ப³லங்பிஸமானங் பச்சா²ஸபா⁴கே³னப³லவதாகுஸலேனவா அகுஸலேனவா உபத்த²ம்பீ⁴யமானங் ஸுட்டு² ப³லவங் ஹோதீதி. கம்மனிப்³ப³த்த க²ந்த⁴ஸந்தானஸ்ஸ விபா³த⁴னங்னாம அஞ்ஞேன கம்மேன நிப்³ப³த்தஸ்ஸ ஸத்தஸ்ஸ க³ஹிதபடிஸந்தி⁴தோ பட்டா²ய யதா³கதா³சி ஸரீரே நானாஅந்தராயே உப்பாதெ³த்வாவா டா²னந்தரகெ²த்தவத்து² கோ³மஹிங்ஸ த⁴ன த⁴ஞ்ஞபோ⁴க³ ஸம்பத்தீனங் புத்ததா³ரஞாதி மித்தானஞ்ச விபத்திங் கத்வாவா து³க்கு²ப்பத்தி கரணங். து³வித⁴ஞ்ஹி கம்மப²லங்னாம விபாகப²லங் நிஸந்த³ப²லந்தி. தத்த² விபாகப²லங்னாம கம்மகாரகஸ்ஸேவ ஹோதி. ந அஞ்ஞஸ்ஸ. நிஸந்த³ ப²லங் பன அஞ்ஞேஸங்பி ஸாதா⁴ரணமேவ. த⁴ம்மபதே³ ஆனந்த³ஸெட்டி²வத்து² எத்த² வத்தப்³ப³ங். சக்கா²தீ³ஸு பன கம்மஜஸந்ததி²ஸீஸேஸு யேன கம்மேன யங்கிஞ்சி ஏகங்வா த்³வேவா தீணிவா ஸப்³ப³ஸோ பி⁴ஜ்ஜந்தி. சக்கு²பாலத்தே² ராதீ³னங் விய. தங் கம்மங் உபகா⁴தகே ஸங்க³ஹிதந்தி யுத்தங். உபகா⁴ தகந்தி பன உபச்சே²த³கந்திச அத்த²தோ ஏகங். ததா² ஹி மஜ்ஜி²மட்ட² கதா²யங் பத²மங் உபச்சே²த³கனாமேன வத்வா உபகா⁴தகந்திபி ஏதஸ்ஸேவ நாமந்தி வுத்தங். அங்கு³த்தரட்ட²கதா²யங் பத²மங் உபகா⁴தகனாமேன வத்வா உபச்சே²த³கந்திபி தஸ்ஸேவேதங் நாமந்தி வுத்தங். விஸுத்³தி⁴ மக்³கே³பி மரணஸ்ஸதினித்³தே³ஸே ததே³வ கம்முபச்சே²த³ககம்மந்தி வுத்தங். இத⁴ச பரதோ உபச்சே²த³ககம்முனாதி வக்க²தி.
இமஸ்ஸபி கம்மந்தருபச்சே²த³னங் மரணாஸன்னகாலே பாகடங். ததா³ஹி பத²மங் பாபகம்மப³லேன து³க்³க³தினிமித்தே உபட்ட²ஹந்தே புன கல்யாண கம்மங் தங் படிபா³ஹித்வா ஸுக³தினிமித்தங் த³ஸ்ஸெத்வா ஸக்³கே³ நிப்³ப³த்தேதி. கல்யாணகம்மப³லேன ஸுக³தினிமித்தே உபட்ட²ஹந்தே புன பாபகம்மங் தங் படிபா³ஹித்வா து³க்³க³தினிமித்தங் த³ஸ்ஸெத்வா அபாயே நிப்³ப³த்தேதி. து³ட்ட² கா³மணிரஞ்ஞோ ஸோணத்தே²ரபிதுச வத்தூ²னி கதே²தப்³பா³னி. அங்கு³த்தரட்ட²கதா²யங் பன குஸலாகுஸலகம்மக்க²ய கரஸ்ஸ மக்³க³கம்மஸ்ஸபி கம்மந்தருபச்சே²த³கஹா
எத்த²ச கம்மந்தரஸ்ஸவா கம்மனிப்³ப³த்தக²ந்த⁴ஸந்தானஸ்ஸவா உபத்த²ம்ப⁴னா தீ³னி ஸந்தா⁴ய இமேஸங் சதுன்னங்பி கம்மானங் குஸலாகுஸலபா⁴வோ விஸுத்³தி⁴மக்³கே³ அங்கு³த்தரட்ட²கதா²யஞ்ச வுத்தோ. மஜ்ஜி²மட்ட²கதா²யங் பன ஸங்வண்ணேதப்³ப³ஸுத்தானுரூபங் கம்மனிப்³ப³த்தக²ந்த⁴ஸந்தானஸ்ஸேவ உபத்த²ம்ப⁴னாதீ³னி ஸந்தா⁴ய உபத்த²ம்ப⁴கஸ்ஸ குஸலபா⁴வோ உபபீளகஉபகா⁴தகானங் அகுஸலபா⁴வோ வுத்தோ. ஸோ பன மஜ்ஜி²மடீகாயங் அங்கு³த்தரடீகாயஞ்ச அருச்சமானோ விய வுத்தோ. மஹாடீகாயங் பன ஸோ கேசி வாதோ³பி கதோ. தத்த²பன ஸங்வண்ணேதப்³ப³ஸுத்தானுரூபங் வுத்தத்தா விஸுங் பாளினயோதி த³ட்ட²ப்³போ³. ந ச கேசிவாதோ³ கத்தப்³போ³. ஸுத்தஸ்மிங்ஹி அப்பாயுகஸங்வத்தனிகாஏஸா மாணவபடிபதா³, யதி³த³ங் பாணாதிபாதீ ஹோதீதிஆதி³னா உபகா⁴தகங் பாணாதிபாதவஸேனேவ வுத்தங். உபபீளகஞ்ச ப³த்வாபா³த⁴ஸங்வத்தனிகா ஏஸா மாணவ படிபதா³, யதி³த³ங் ஸத்தானங் விஹேட²கஜாதிகோ ஹோதீதிஆதி³னா விஹிங்ஸாதீ³னங் வஸேன வுத்தங். உபத்த²ம்ப⁴கஞ்ச தீ³கா⁴யுகஸங்வத்தனிகா ஏஸா மாணவ படிபதா³. யதி³த³ங் பாணாதிபாதங் பஹாய பாணாதிபாதா படிவிரதோ ஹோதீதிஆதி³னா பாணாதிபாதவிரதிஆதீ³னங் வஸேன வுத்தங். ஸப்³ப³ஞ்சேதங் மனுஸ்ஸத்தங் ஆக³தஸ்ஸேவ ஸத்தஸ்ஸ வஸேனாதி ஏவங் விஸுங் பாளினயோ வேதி³தப்³போ³தி. மஹாடீகாயங் பன அங்கு³த்தரடீகாயஞ்ச கம்மந்தருபத்த²ம்ப⁴னாதீ³னி அனிச்ச²ந்தேஹி ஜனகாதி³பா⁴வோனாம விபாகங் படிஇச்சி²தப்³போ³. நகம்மந்தி விபாகஸ்ஸேவ உபகா⁴தகதா யுத்தா விய தி³ஸ்ஸதீதி வுத்தங்.
கிச்சவஸேனாதி ஜனநங் உபத்த²ம்ப⁴னங் உபபீளனங் உபச்சி²ந்த³னந்தி சதுன்னங் கிச்சானங் வஸேன. தத்த² ஏகா பாணாதிபாதசேதனா சத்தாரி கிச்சானி
அபிச பவத்தியங்பி கம்மந்தரஜனிதங் ப⁴வங்க³ஸந்தானங் அனுபச்சி²ந்தி³த்வா பஞ்சஸு சக்கு² ஸோத கா⁴ன ஜிவ்ஹா பா⁴வ த³ஸக ஸங்கா²தேஸு ஸந்ததி ஸீஸேஸு அஞ்ஞதரஸ்ஸ ஸந்ததிஸீஸஸ்ஸ ஸப்³ப³ஸோ உபச்சி²ந்த³னங்பி இமஸ்ஸேவ கிச்சந்தி யுத்தங். யங் பன மஹாடீகாயங் அங்கு³த்தரடீகாயஞ்ச உபபீளிகங் அஞ்ஞஸ்ஸ விபாகங் சி²ந்த³தி. ந ஸயங் அத்தனோ விபாகங் ஜனேதீதி வுத்தங். தங் அட்ட²கதா²யங் ஸுக²து³க்க²ங் பீளேதி, அத்³தா⁴னங் பவத்திதுங் ந தே³தீதி இத³ங் தி³ஸ்வா வுத்தங் ஸியா. அத்³தா⁴னங் பவத்திதுங் நதே³தீதி எத்த² பன
[143] யங்பன விபா⁴வனியங்
‘‘ஜனகங் கம்மந்தரஸ்ஸ விபாகங் அனுபச்சி²ந்தி³த்வாவ விபாகங் ஜனேதி. உபகா⁴தகங் உபச்சே²த³னபுப்³ப³கந்தி இத³ங் தாவ அட்ட²கதா²ஸு ஸன்னிட்டா²னந்தி வுத்தங்’’. தங் ந ஸுந்த³ரங்.
இத⁴ புப்³ப³கதேன உபச்சே²த³னககம்மேன மரித்வா ஸக்³கே³ நிப்³ப³த்தானங் வத்தூ²னங் அட்ட²கதா²ஸுயேவ ஆக³தத்தாதி.
[144] யஞ்ச தத்த²
அபரே பன ஆசரியா வத³ந்தீதிஆதி³னா உபகா⁴தகஸ்ஸ ஸயங் விபாகனிப்³ப³த்தகத்தா பா⁴வவசனங் வுத்தங். தங்பி ந ஸுந்த³ரங்.
தேனேவ கம்மேன அபாயே நிப்³ப³த்தானங் து³ஸ்ஸிமார கலாபு³ராஜா தீ³னங் தஸ்ஸ கம்மஸ்ஸ உபச்சே²த³ககம்மபா⁴வேன அட்ட²கதா²ஸு ஆக³தத்தாதி. [ஜனகசதுக்கங்]
146. க³ருகந்தி அஞ்ஞேன கம்மேன படிபா³ஹிதுங் அஸக்குணெய்யங் குஸலபக்கே² மஹக்³க³தகம்மங் அகுஸலபக்கே² நியதமிச்சா²தி³ட்டி²யா ஸஹ பஞ்சானந்தரியகம்மங். எத்த² ஸியா. மஹக்³க³தகம்மந்தி கஸ்மா வுத்தங். தஞ்ஹி பமாத³வஸேனவா நீவரணத⁴ம்மபவத்தியாவா பரிஹாயியமானங் நிகந்திப³லேனவா படிபா³ஹியமானங் விபாகங் ந தே³தீதி. ததா² ஏகஸ்ஸ ப³ஹூஸு ஆனந்தரியகம்மேஸு கதேஸு ஏகஸ்மிங் விபச்சந்தே ஸேஸானி ந விபச்சந்தீதி. வுச்சதே, மஹக்³க³தகம்மங் தாவத²பெத்வா பமாத³த⁴ம்மனீவரணத⁴ம்மனிகந்தித⁴ம்மே அத்தனோ ப³லவதரஞ்ச மஹக்³க³தகம்மந்தரங் அஞ்ஞேன புஞ்ஞகம்மேன அப்படிபா³ஹனியட்டே²ன க³ருகங் நாம ஹோதி. ஆனந்தரியகம்மானி பன த²பெத்வா அத்தனோ ப³லவதரங் ஆனந்தரியகம்மங் அஞ்ஞேன கேனசி த⁴ம்மேன அப்படிபா³ஹனியட்டே²னாதி ஏவங் யதா²ரஹங் தேஸங் க³ருகதா வேதி³தப்³பா³தி. ஆஸன்னந்தி மரணகாலே ஆசிண்ணந்தி தீ³க⁴ரத்தங் அபி⁴ண்ஹஸோ கதங். ஸகிங் கரித்வாபிவா பச்சா² புனப்புனங் ஸோமனஸ்ஸஜனகங் ஸந்தாபஜனகஞ்ச. கடத்தாகம்மந்தி காரியித்தா²தி கம்மந்தி ஏவங் கதகாரணாஏவ கம்மந்தி வத்தப்³ப³ங் கம்மங். க³ருகாதி³பா⁴வேன வத்தப்³ப³ங் கம்மங் ந ஹோதீதி அத்தோ². தத்த² புரிமானி தீணி இமஸ்மிங் ப⁴வே கதானி உபபஜ்ஜவேத³னீயகம்மானிஏவ. கடத்தாகம்மங் பன அதீதப⁴வேஸு கதேஹி அபரபரியாயவேத³னீயேஹி ஸஹ இமஸ்மிங் ப⁴வே கதங் க³ருகா ஸன்னாசிண்ணபா⁴வரஹிதங் கம்மபத²பத்தங் யங்கிஞ்சி உபபஜ்ஜவேத³னீயகம்மங். மஹாடீகாயங் பன கடத்தாகம்மங் புரிம ஜாதீஸு கதங்ஏவ க³ஹிதங். தங் அட்ட²கதா²ய ந ஸமேதி. ஏதேஹி பன தீஹி முத்தங் புனப்புனங் லத்³தா⁴ஸேவனங் கடத்தாவா பன கம்மங்னாம ஹோதீதி ஹி வுத்தங். ந ச அதீதப⁴வேஸு கதானி மாதுகா⁴தகாதீ³னிபி அபரபரியாய கம்மானி ஏதேஹி தீஹி முத்தானீதிவா அமுத்தானீதிவா புனப்புனங் லத்³தா⁴ஸேவனானீதிவா அலத்³தா⁴ஸேவனானீதிவா ஸக்கா விஸேஸேதுங். ததா³ ஹி தானி க³ருக கம்மஸந்தானே பவத்தானிபி ஹொந்தி. ஆஸன்னவசிண்ணகம்மஸந்தானே பவத்தானிபீதி.
அங்கு³த்தரட்ட²கதா²யஞ்ச ஏதேஹி பன தீஹி முத்தங் அஞ்ஞாணவஸேனகதங் கடத்தாவா பன கம்மங்னாமாதி வுத்தங். ந தானி அஞ்ஞாணவஸேன கபா⁴னீதி ஸக்கா விஸேஸேதுங். தானி ஹி புரிமப⁴வேஸு அஞ்ஞாண வஸேன கதானிபி ஹொந்தி. ஞாணவஸேன கதானிபீதி. தானி பன விஸேஸனானி இமஸ்மிங் ப⁴வே கதானங் க³ருகாதீ³ஹி தீஹி முத்தானங் ஸத்தமஜவன கம்மானங் வஸேன வுத்தானீதி தேஹி ஸஹ புரிமஜாதீஸு கதானி அபரபரியாய கம்மானி கடத்தா கம்மங்னாமாதி வேதி³தப்³பா³னி. ஏவஞ்ச கத்வா யத்த² தங்புப்³ப³கதங் கம்மந்தி ஆக³தங். தத்த²பி இமஸ்மிங் ப⁴வேவா பாகதா³னபரியாயேனாதி. பாகதா³னவாரேனாதி அத்தோ². எத்த² ஸியா. கஸ்மா இத⁴ ஆஸன்னங் ஆசிண்ணதோ பத²மங் வுத்தங். நனு பாளியங் ஆஸன்னதோ ஆசிண்ணமேவ பத²மங் வுத்தங். யதா²ஹ-யங் க³ருகங் யங் ப³ஹுலங். யதா³ஸன்னங். கடத்தாவா பன கம்மந்தி. அட்ட²கதா²ஸுச தேனேவ கமேன பாகதா³னவாரோ விஹிதோதி. வுச்சதே, ஸபா⁴வதோ ப³லவது³ப்³ப³லக்கமேன பாளியங் ஆசிண்ணங் பத²மங் வுத்தங். ஸோ பன கமோ கதா³சி பாகதா³னபரியாயோபி ஸம்ப⁴வதீதி கத்வா அட்ட²கதா²ஸு தேனேவ கமேன பாகதா³னவாரோ விஹிதோ. ஆஸன்னங்பி ஹிஸமானங் சித்தங் தோஸேதுங்வா ஸந்தாபேதுங்வா அஸக்கொந்தங் ஹுத்வா து³ப்³ப³லங் ப³லவதோ ஆசிண்ணஸ்ஸ நிவத்தகங் ந ஹோதீதி. யஸ்மா பன மஹாகம்மவிப⁴ங்க³ஸுத்தே புப்³பே³வாஸ்ஸதங் கதங் ஹோதி கல்யாணகம்மங் ஸுக²வேத³னீயங். பச்சா²வாஸ்ஸதங் கதங் ஹோதி கல்யாணகம்மங் ஸுக²வேத³னீயங். மரணகாலேவாஸ்ஸ ஹோதி ஸம்மாதி³ட்டி² ஸமத்தா ஸமாதி³ன்னாதி ஏவங் ஆசிண்ணது³ச்சரிதஸ்ஸபி ஏகச்சஸ்ஸ ஆஸன்னேன கல்யாண கம்மேன ஸக்³க³க³மனங் வுத்தங். ததா² புப்³பே³வாஸ்ஸதங் கதங் ஹோதி பாபகம்மங் து³க்க²வேத³னியங்.ல. மிச்சா²தி³ட்டி² ஸமத்தா ஸமாதி³ன்னாதி ஏவங் ஆசிண்ண ஸுசரிதஸ்ஸபி ஏகச்சஸ்ஸ ஆஸன்னேன பாபகம்மேன அபாயக³மனங் வுத்தங். யஸ்மாச உபி⁴ன்னங்பி ப³லவபா⁴வே ஸதி ஆஸன்னமேவ பரியத்தங் ப⁴விதுங் அரஹதி. தஸ்மா இத⁴ தே²ரேன ஆஸன்னமேவ பத²மங் வுத்தந்தி த³ட்ட²ப்³ப³ங். எத்த²ச புப்³பே³வாஸ்ஸகதங் ஹோதீதி இத³ங் ஆஸன்னானுஸ்ஸரிதகம்மவஸேன வுத்தந்தி வேதி³தப்³ப³ங். தம்ப³தா³டி²கனாமஸ்ஸ சோரகா⁴தகஸ்ஸ மஹாவாதகாலனாமஸ்ஸச உபாஸகஸ்ஸ வத்து² எத்த² கதே²தப்³ப³ந்தி.
[145] விபா⁴வனியங் பன
அட்ட²கதா²யங் ஆக³தங் ஜரக்³க³வோபமங் த³ஸ்ஸெத்வா ஆஸன்னமேவ பத²மங் விபாகங் தே³தீதி ஏகங்ஸேன வுத்தங். தங் ந ஸுந்த³ரங்.
ந
147. தி³ட்ட²த⁴ம்மோ வுச்சதி பச்சக்க²பூ⁴தோ பச்சுப்பன்னோ அத்தபா⁴வோ. வேதி³தப்³ப³ங் அனு ப⁴விதப்³ப³ந்தி வேத³னீயங். ப²லங். தி³ட்ட²த⁴ம்மே வேத³னீயங் ப²லங் ஏதஸ்ஸாதி தி³ட்ட²த⁴ம்மவேத³னீயங்.
[146] விபா⁴வனியங் பன
‘‘தி³ட்ட²த⁴ம்மே வேதி³தப்³ப³ங் விபாகானுப⁴வன வஸேனாதி தி³ட்ட²த⁴ம்மவேத³னீய’’ந்தி வுத்தங். தங் ந ஸுந்த³ரங்.
தி³ட்டே²வ த⁴ம்மே விபாகங் படிஸங்வேதே³தீதி ஹி பாளியங் வுத்தங். எத்த² ஹி விபாகங் படிஸங்வேதே³தீதி ஏதேன இத⁴ வேத³னீயஸத்³தோ³ கம்மஸாத⁴னோ விபாகாதிதெ⁴ய்யோச ஹோதீதி த³ஸ்ஸேதி. ஏவஞ்ச ஸதி இத⁴ அஞ்ஞபத³த்த²ஸமாஸோ ஏவ லப்³ப⁴தி. ந உத்தரபத³த்த²ஸமாஸோதி. தி³ட்ட²த⁴ம்மங் உபேச்ச தஸ்ஸ அனந்தரே பஜ்ஜித்வா பாபுணித்வா வேதி³தப்³ப³ங் ப²லங் ஏதஸ்ஸாதி உபபஜ்ஜவேத³னீயங். தேனேவ ஹி அட்ட²கதா²யங் உபபஜ்ஜ ஸத்³த³ஸ்ஸ அத்த²ங் வத³ந்தேன உபபஜ்ஜித்வாதி வுத்தங். ஸுத்தபதே³ஸு பன உபபஜ்ஜேவாதி பாடோ² தி³ட்டோ². தஸ்மா தி³ட்ட²த⁴ம்மஸ்ஸ ஸமீபே அனந்தரே பஜ்ஜிதப்³போ³ க³ந்தப்³போ³தி உபபஜ்ஜோ. து³தீயோ அத்தபா⁴வோ உபபஜ்ஜேவேதி³தப்³ப³ங் ப²லங் ஏதஸ்ஸாதி உபபஜ்ஜவேத³னீயந்தி ஏவமத்தோ² பாட²ஸ்ஸ வஸேன வேதி³தப்³போ³. உபபஜ்ஜாதிவா அனந்தரே ப⁴வே பவத்தோ ஏகோ நிபாதோ. யதா² பச்சாதி.
[147] விபா⁴வனியங் பன
‘‘தி³ட்ட²த⁴ம்மதோ அனந்தரங் உபபஜ்ஜித்வா வேதி³தப்³ப³ந்தி உபவஜ்ஜவேத³னீய’’ந்தி வுத்தங். தங் ந ஸுந்த³ரங்.
உபபஜ்ஜவா விபாகங் படிஸங்வேதே³தீதி ஹி பாளியங் வுத்தங். பரியாயதி புனப்புனங் ஆக³ச்ச²தீதி பரியாயோ. அபரோச ஸோ பரியா யோசாதி அபரபரியாயோ. தி³ட்ட²த⁴ம்மா நாக³தா நந்தர ப⁴வேஹி அஞ்ஞோ
[148] யஞ்ச விபா⁴வனியங்
‘‘அபரே அபரே தி³ட்ட²த⁴ம்மதோ அஞ்ஞஸ்மிங் யத்த²கத்த²சி அத்தபா⁴வே வேதி³தப்³ப³ங் கம்மங் அபராபரிய வேத³னீய’’ந்தி வுத்தங். தத்த² தி³ட்ட²த⁴ம்மதோதி இத³ங் தாவ நயுஜ்ஜதி.
ந ஹி மஜ்ஜே² உபபஜ்ஜப⁴வங் வஜ்ஜெத்வா பத²மோ தி³ட்ட²த⁴ம்மோவ இத⁴ ததீயே பதே³ அதி⁴கதோதி யுத்தோ.
[149] அத்த²தோ பன ப்³யஞ்ஜனதோச ஸப்³ப³ங் பாளியா ந ஸமேதி.
அபரேவா பரியாயே விபாகங் படிஸங்வேதே³தீதி ஹி பாளியங் வுத்தங். அபராபரேவா பரியாயேதிவா. அஹோஸினாமகங் கம்மங் அஹோஸிகம்மங். அஹோஸிகம்மங். ப⁴விஸ்ஸதிகம்மங். அத்தி²கம்மங். நதஸ்ஸ விபாகோதி ஏவங் வுத்தபாட²வஸேன ஆசரியேஹி ததா²க³ஹிதனாம தெ⁴ய்யங் ஸப்³ப³ஸோ அலத்³த⁴விபாகவாரங் கம்மந்தி வுத்தங் ஹோதி. தத்த² ஸத்தஸு குஸலாகுஸலஜவனேஸு பத²மஜவனசேதனா தி³ட்ட²த⁴ம்மவே த³னீயங்னாம. ஸா ஹி அலத்³தா⁴ஸேவனதாய ஸப்³ப³து³ப்³ப³லத்தா அசிரட்டி² திகாச ஹோதி அப்பதரவிபாகாசாதி. பச்சயங் லத்³தா⁴ தி³ட்ட²த⁴ம்மேஏவ அஹேதுகமத்தங் ப²லங் த³த்வா விக³ச்ச²தி. ந ஏகங்பி மரணகாலங் அதிக்கம்ம ஸந்தானங் அனுப³ந்தி⁴துங் ஸக்கோதி. பச்சயங் பன அலப⁴மானா அஹோஸிகங்னாம ஹோதி. பச்சயோதிச அத்தனோ ப²லுப்பத்தியா ஓகாஸதா³யகோ
[150] யங் பன விபா⁴வனியங்
‘‘ஸாச
யதா²வுத்தவத்தூ²ஹி ஸத்³தி⁴ங் விருஜ்ஜ²னதோ.
[151] யஞ்ச தத்த²
‘‘சுதி அனந்தரஞ்ஹி உபபஜ்ஜவேத³னீயஸ்ஸ ஓகாஸோ’’தி காரணங் வுத்தங். தங்பி அகாரணங்.
புதிஅனந்தரதோ பட்டா²ய யாவஜீவங்பி ஓகாஸஸம்ப⁴வதோ.
[152] யஞ்ச தத்த²
‘‘படிஸந்தி⁴யா பன தி³ன்னாய ஜாதிஸதேபி பவத்திவிபாகங் தே³தீதி வுத்தங்’’. தங்பி ந க³ஹேதப்³ப³ங்.
கம்மஸங்கராபத்திதோ. அங்கு³த்தரட்ட²கதா²யஞ்ச தி³ட்ட²த⁴ம்மவேத³னீயங் உபபஜ்ஜவேத³னீயங் அபரபரியாய வேத³னீயந்தி தேஸங் ஸங்கமனங் நத்தி². யதா²டா²னேயேவ பதிட்ட²ந்தீதி வுத்தங். ந செத்த² படிஸந்தி⁴வஸேன ஏவங் வுத்தந்தி ஸக்கா வத்துங். தத³த்த²ஸாத⁴கஸ்ஸ அட்ட²கதா²பதே³ஸஸ்ஸவா வத்து²ஸ்ஸவா யுத்தியாவா அபா⁴வதோதி. மஜ்ஜே² பன பஞ்சஜவன சேதனா அபரபரியாய வேத³னீயங்னாம. ஏதா ஹி ஸுட்டு² ப³லவந்தீ ஸாரபூ⁴தாச ஹொந்தீதி ந ஸீக⁴ங் விபச்சிதுங் ஸக்கொந்தி. சிரட்டி²திகா பன ஹொந்தி. தஸ்மா ததீயப⁴வதோ பட்டா²ய யதா³ ஓகாஸங் லப⁴ந்தி. ததா³ பஞ்சவாரே படிஸந்தி⁴ங் த³த்வா ஸங்ஸாரபவத்தியா ஸதி கப்பஸதஸஹஸ்ஸேபி பவத்திவிபாகங் தெ³ந்தீதி. இமானியேவ பன தீணி கம்மானி அத்தனோ அத்தனோ கெ²த்தே ஸப்³ப³ஸோ விபாகவாரங் அலப⁴மானானி அஹோஸிகம்மங்னாம. கெ²த்தஞ்ச நேஸங் பத²மஸ்ஸ தி³ட்ட² த⁴ம்மசுதியா பரிச்சி²ன்னங். து³தீயஸ்ஸ அனாக³தானந்தரப⁴வசுதியா. ததீயஸ்ஸ பரினிப்³பா³னசுதியாதி த³ட்ட²ப்³ப³ங். [தி³ட்ட²த⁴ம்மசதுக்கங்]
148. பாகட்டா²னவஸேனாதி தத்தா²தி தேஸு அகுஸலாதீ³ஸு சதூஸு கம்மேஸு. கம்மத்³வாரவஸேனாதி கம்மஸித்³தி⁴யா அங்க³பூ⁴தானங் காயாதி³ கம்மத்³வாரானங் வஸேன. பாணங் அதிபாதெந்தி ஏதேனாதி பாணாதிபாதோ. அதிபாதனஞ்செத்த² ஸரஸதோ பதிதுங் அத³த்வா அந்தராஏவ பயோக³ப³லேன பாதனங் த³ட்ட²ப்³ப³ங். அதி³ன்னங் ஆதி³யந்தி ஏதேனாதி அதி³ன்னாதா³னங். அக³மனீ யவத்து²ஸங்கா²தேஸு வத்து²காமேஸு மிச்சா² சரந்தி ஏதேனாதி காமேஸுமிச்சா²சாரோ. தத்த² பரபாணே பாணஸஞ்ஞினோ தஸ்ஸ ஜீவிதிந்த்³ரியஸந்தானுபச்சே²த³கஸ்ஸ காயவசீபயோக³ஸ்ஸ ஸமுட்டா²பிகா வத⁴கசேதனா பாணாதிபாதோனாம. ஸயமேவ அத்தனோ ஜீவிதிந்த்³ரியங் பாதெந்தஸ்ஸ பாணாதிபாதோனாம நத்தி². பரபரிக்³க³ஹிதே பரபரிக்³க³ஹிதஸஞ்ஞினோ ததோ வியோக³காரணஸ்ஸ காய வசீபயோக³ஸ்ஸ ஸமுட்டா²பிகா அச்சி²ந்த³கசேதனா அதி³ன்னாதா³னங்னாம. அக³மனீயவத்தூ²ஸு மக்³கே³னமக்³க³படிபாத³கஸ்ஸ காயபயோக³ஸ்ஸ ஸமுட்டா²பிகா அஸ்ஸாத³சேதனா காமேஸுமிச்சா²சாரோனாம. கேசி பனஎத்த²பி அக³மனீய வத்து²ஸஞ்ஞினோதி பத³ங் இச்ச²ந்தி. தங் அட்ட²கதா²ய ந ஸமேதி. அக³மயனீவத்து² தஸ்மிங் ஸேவனசித்தந்தி ஹி தத்த² வுத்தங். ஏதேன அக³மனீயவத்து²ம்ஹி ஸதி க³மனீய ஸஞ்ஞாயவா அக³மனீய ஸஞ்ஞாயவா ஸேவந்தஸ்ஸ கம்மபதோ² ஹோதி யேவாதி ஸித்³த⁴ங் ஹோதி. இதரதா² அக³மனீயவத்து² ததா² ஸஞ்ஞிதா தஸ்மிங் ஸேவனசித்தந்தி வுத்தங் ஸியாதி.
அபரே பன ஸயங் பயோக³ங் கத்வா அத்தனி பரேன கரீயமானங் மக்³கே³ன மக்³க³படிபாத³னங் அஸ்ஸாதெ³ந்தஸ்ஸ ஸேவனசித்தே ஸதிபி நத்தி² கம்மப்பத²பே⁴தோ³. பயோக³ஸ்ஸ அபா⁴வாதி வத³ந்தி. ஸேவனசித்தே பன ஸதி பயோகோ³ அப்பமாணந்தி ஏகே. ஏவஞ்ச ஸதி தியங்கி³கோவ மிச்சா²சாரோ, ந சதுரங்கி³கோதி ஆபஜ்ஜதி. அட்ட²கதா²யங் பன ஸேவன பயோகே³ன ஸஹ சதுரங்கி³கோவ வுத்தோதி அஞ்ஞே. ஸேவனபயோகோ³ பன யேபு⁴ய்யேன லப்³ப⁴மானத்தாயேவ வுத்தோ. ந பன ஏகந்தஅங்க³பா⁴வதோ. இதரதா² இத்தீ²னங் யேபு⁴ய்யேன பயோக³கிச்சங்
கஸ்மாபனெத்த² ஸுராபானங் நக³ஹி தங். தங்பிஹி அபாயஸங்வத்தனி கபா⁴வேன வுத்தங். யதா²ஹ-ஸுராமேரயபானங் பி⁴க்க²வே ஆஸேவிதங் பா⁴விதங் ப³ஹுலீகதங் நிரயஸங்வத்தனிகங் திரச்சா²னயோனிஸங்வத்தனிகங் பெத்திவிஸயஸங்வத்தனிகங். யோச ஸப்³ப³லஹுகோ ஸுராமேரய பானஸ்ஸ விபாகோ. ஸோ மனுஸ்ஸபூ⁴தஸ்ஸ உம்மத்தகஸங்வத்தனிகோ ஹோதீதி. அட்ட²கதா²ஸுபி கொட்டா²ஸதோ பஞ்சபி பாணாதிபாதா த³யோ கம்மபதா²ஏவாதி வுத்தந்தி. வுச்சதே, மூலடீகாயங் தாவ தஸ்ஸ ஸபா⁴க³த்தேன மிச்சா²சாரே உபகாரகத்தேன த³ஸஸுபி கம்மபதே²ஸு அனுபவேஸோதி வுத்தங். தத்த² ஸபா⁴க³த்தங் க³ஹெத்வா விபா⁴வனியங் ஸுராபானங்பி எத்தே²வ ஸங்க³ய்ஹதீதி வத³ந்தி ரஸஸங்கா²தேஸு காமேஸு மிச்சா²சாரபா⁴வதோதி வுத்தங். உபகாரகத்தங் க³ஹெத்வா படிஸம்பி⁴தா³மக்³க³டீகாயங் குஸலாகுஸலாபிச படிஸந்தி⁴ஜனகாயேவ கம்மபதா²தி வுத்தா. வுத்தாவஸேஸா படிஸந்தி⁴ஜனநே அனேகந்தி கத்தா கம்ம பதா²தி ந வுத்தாதி இமஸ்ஸ வாக்யஸ்ஸ ஸங்வண்ணனாயங் வுத்தாவஸே ஸாதி ஸுராபானாத³யோ தப்³பி³ரமணாத³யோச. ஸுராபானஞ்ஹி மத³ஸ்ஸ பச்சயோ. மதோ³ அபுஞ்ஞபத²ஸ்ஸ. தப்³பி³ரதிபி நிம்மத³தாய. ஸாச புஞ்ஞபத²ஸ்ஸாதி கம்மபதூ²பனிஸ்ஸயானி தானி ததா³ஸன்னகம்மவஸேன ஸந்தி⁴ஜனகானிபி ஹொந்தீதி வுத்தங். தத்த² ததா³ஸன்னகம்மவஸேனாதி தஸ்ஸ ஸுராபானஸ்ஸவா ஸுராபானவிரதியாவா ஆஸன்னே பவத்தானங் தம்மூலகானங் அபுஞ்ஞகம்மானங்வா புஞ்ஞகம்மானங்வா வஸேனாதி அத்தோ². இத³ங்
யங் வே விவித்வா து³ச்சரிதங் சரந்தி,
காயேன வாசாய சேதஸாச;
நிரயங் வஜந்தி து³ச்சரிதங் சரித்வா,
தஸ்ஸா புண்ணங் கும்ப⁴மிமங் கிணாதா²தி.
ஏவங் ததா³ஸன்னகம்மவஸேனேவ தஸ்ஸ அபாயகா³மிதா வுத்தா. தது³ப⁴யங் பனஸ்ஸ கிச்சங் க³ஹெத்வா ஸுராமேரயபானங் பி⁴க்க²வே ஆஸேவிதங்.ல. ஸங்வத்தனிகந்தி அங்கு³த்தரே வுத்தந்தி வேதி³தப்³ப³ங். அயஞ்ஹிஸுத்தபதே³ஸு த⁴ம்மதா. யதி³த³ங் ஸங்வத்தனிகந்தி வுத்தட்டா²னே யதா²லாப⁴யோஜனாதி. ததா²ஹி மூலடீகாயங்புனப்³ப⁴வங்தே³திபுனப்³ப⁴வாய ஸங்வத்தேதீதி பாடே² கம்மஸஹஜாதா புனப்³ப⁴வங்தே³தி. கம்மஸஹாயபூ⁴தா அகம்மஸஹஜா தாபுனப்³ப⁴வங்
கு²த்³த³கபாட²ட்ட²கதா²யங் பன ஸப்³பே³னஸப்³ப³ங் தஸ்ஸ கம்மபத²பா⁴வோ படிக்கி²த்தோயேவ, தத்த² ஹி புரிமானங் சதுன்னங் காயகம்மாதி³பா⁴வஞ்ச கம்மபத²பா⁴வஞ்ச விஸுங் வத்வா ஸுராபானங்பத்வா காயகம்மமேவாதி வுத்தங். ஏதேன வசீகம்மபா⁴வஞ்ச கம்மபத²பா⁴வஞ்ச படிக்கி²பதீதி. தா⁴துஸங்யுத்தட்ட²கதா² யஞ்ச படிக்கி²த்தோ. யதா²ஹ-ததீயங்பஞ்சகம்மவஸேன பு³ஜ்ஜ²னகானங் அஜ்ஜா²ஸயவஸேன வுத்தங். சதுத்த²ங் ஸத்தகம்மபத²வஸேன பஞ்சமங் த³ஸ கம்மபத²வஸேனாதி. தத்த² ஹி ததீயே ஸுராபானமிஸ்ஸகத்தா பஞ்சகம்மவஸேன இச்சேவ வுத்தங். ந பஞ்சகம்மபத²வஸேனாதி. ஏதாஸுபிச படிஸந்தி⁴ஜனநே அனேகந்தி கத்தாஏவ படிக்கி²த்தோதி ந நஸக்கா வத்துங் ஏவஞ்ஹி ஸதி ஸப்³பா³ பாளிட்ட²கதா²டீகாயோ ஸங்ஸந்தி³தா ஹொந்தீதி. காயகம்மந்தி எத்த² காயோ திவிதோ⁴ ஸஸம்பா⁴ரகாயோ பஸாத³காயோ சோபனகாயோதி. இத⁴ காயவிஞ்ஞத்திஸங்கா²தோ சோபனகாயோ அதி⁴ப்பேதோதி வுத்தங் காயவிஞ்ஞத்திஸங்கா²தேதி. சோபனகாயோ ஹி கதா³சி காயங்கே³ன அத்தனோஅதி⁴ப்பாயங் பரஸ்ஸ விஞ்ஞா பனத்தா²யபி கரீயதீதி காயவிஞ்ஞத்தீதி வுச்சதீதி. ஸோ யேவச கம்மானங் பவத்திமுக²த்தா த்³வாரந்தி காயத்³வாரங். தஸ்மிஞ்ஹி தேன தேன உபக்கம கிச்சேன பவத்தமானேஏவ ஜீவிதிந்த்³ரியுபச்சே²தா³தி³கிச்சஸித்³தி⁴தோ தங்ஜன கஸ்ஸ சேதனாத⁴ம்மஸ்ஸ ஆயூஹன கிச்சனிப்³ப³த்திச காயகம்மனாம லாபோ⁴ச ஹோதீதி. தஸ்மிங் காயத்³வாரே. எத்த²ச யஸ்மாஸப்³பா³னிபி கம்மானி புப்³ப³ங்க³மபூ⁴தேன ஸம்பயுத்தமனேன வினா நஸிஜ்ஜ²ந்தி. மனோபுப்³ப³ங்க³மா த⁴ம்மா. காயத்³வாரேதி. பரதோ வசீத்³வாரேதி ச.
யஸ்மா பன காயத்³வாரே வுத்திதோ காயகம்மங் நாம. வசீத்³வாரே வுத்திதோ வசீகம்மங்னாமாதி எத்தகமத்தே வுத்தே பாணாதிபாதாதீ³னி தீணி காயகம்மங்னாம. முஸாவாதா³தீ³னி சத்தாரி வசீகம்மங்னாமாதி ஏவங் த்³வாரேன கம்மானங் நாமவவத்தா²னங் அஸித்³த⁴ங் ஸியா. கத²ங். யதா³ ஹி புரிமானி த்³வே ஆணத்திவஸேன அப்பகேன வசீத்³வாரே பி⁴ஜ்ஜ²ந்தி. ததா³ தானி காயகம்மந்தி நாமங் ஜஹெய்யுங். வசீகம்மந்தி ஸங்க்²யங் க³ச்செ²ய்யுங் கஸ்மா வசீத்³வாரே வுத்திதோ வசீகம்மங்னாமாதி வுத்தத்தா. த்³வேவா நேஸங் நாமானி ப⁴வெய்யுங். உப⁴யத்³வாரேஸுபி ஸந்தி³ஸ்ஸனதோ. யதா³பன மஜ்ஜி²மானி சத்தாரி ஹத்த²முட்டா²தி³வஸேன அப்பகேன காயத்³வாரே ஸிஜ்ஜ²ந்தி. ததா³ தானிபி வசீகம்மந்தி நாமங் ஜஹெய்யுங். காயகம்மந்தி ஸங்க்²யங் க³ச்செ²ய்யுங். கஸ்மா காயத்³வாரே வுத்திதோ காயகம்மங்னாமாதி வுத்தத்தா. த்³வேவா நேஸங் நாமானி ப⁴வெய்யுங். உப⁴யத்³வாரேஸுபி ஸந்தி³ஸ்ஸனதோ. ஏவஞ்சஸதி பாணாதிபாதோ.ல. மிச்சா²சாரோசேதி காயகம்மங்னாமாதி இத³ங் வவத்தா²னமேவ நிரத்த²கங் ஸியா. ததா² பரதோ முஸாவாதோ³.ல. ப்பலாபோசேதி வசீகம்மங்னாமாதி. பா³ஹுல்லவுத்திதோதி வுத்தேபன ஏகமேகேன பா³ஹுல்லஸத்³தே³ன ச²ப்³பி³தா⁴னி தானி வஜ்ஜானி வஜ்ஜெத்வா வுத்தப்பகாரங் த்³வாரேன கம்மவவத்தா²னங் ஸித்³த⁴ங் ப⁴வதி. யதா² வனசரகோ ஸங்கா³மாவசரோதி.
மனோகம்மானி பன த்³வாரந்தரேஸு சரந்தானிபி சரணமத்தானி ஏவ ஹொந்தி. ந த்³வாரந்தரானி தேஸங் கம்மஸித்³தி⁴யா அங்க³ங் ஹொந்தி. தஸ்மா தானி விஸுங் கதானீதி வேதி³தப்³ப³ங். யஸ்மா பன காயத்³வாரஸ்ஸ காயோதி நாமங் அனேகேஸு ஸுத்தஸஹஸ்ஸேஸு ஸயமேவ ஸித்³த⁴ங் பாகடஞ்ச.
[153] ஏதேன யங் வுத்தங் விபா⁴வனியங்
‘‘காயகம்மஸ்ஸச பவத்திமுக²பூ⁴தங் காயத்³வாரந்தி வுச்சதீதி’’. தங் படிக்கி²த்தங் ஹோதி.
[154] யஞ்ச தத்த²
‘‘ததா² முஸாவாதா³தி³ங் காயவிகாரேன கரொந்தஸ்ஸ வசீகம்மங் காயத்³வாரேபி பவத்ததீதி கம்மேன த்³வாரவவத்தா²னங்பி நஸியாதி’’ வுத்தங். தங்பி ந யுஜ்ஜதி.
ந ஹி காயவிகாரேன கரீயமானங் வசீகம்மங் காயத்³வாரே பவத்தமானங்பி தஸ்ஸ த்³வாரஸ்ஸ நாமங் பி⁴ந்தி³துங்வா அத்தனோ நாமங் தா³துங்வா ஸக்கோதி. ஸபா⁴வ ஸித்³த⁴த்தா தஸ்ஸ நாமஸ்ஸாதி.
[155] ஏதேனேவ யஞ்ச தத்த²
வுத்தங் ‘‘ததா² காயகம்மமேவ யேபு⁴ய்யேன காயத்³வாரே பவத்ததி. ந இதரானி. தஸ்மா காயகம்மஸ்ஸ யேபு⁴ய்யேன எத்தே²வ பவத்தனதோ காயகம்மத்³வாரபா⁴வோ ஸித்³தோ⁴. ப்³ராஹ்மணகா³மாதீ³னங் ப்³ராஹ்மணகா³மாதி³ பா⁴வோவியாதி’’. தங்பி படிக்கி²த்தங் ஹோதி.
ந ஹி காயகம்மத்³வாரந்தி நாமங் இத⁴ வுத்தங் அத்தீ²தி. [காயகம்மங்]
149. முஸாதி அபூ⁴தத்தே² நிபாதோ. முஸா வத³ந்தி ஏதேனாதி முஸாவாதோ³. விஸதி பரேஸங் அஞ்ஞமஞ்ஞஸம்மோத³பா⁴வஸங்கா²தங் ஸாமக்³கி³ரஸங் ஸங்சுண்ணேதி பரிபி⁴ந்த³தி மிது² பே⁴த³ங் கரோதி ஏதாயாதி பிஸுணா. அத்தனோ பியபா⁴வங் பரேஸஞ்ச மித்தஸுஞ்ஞபா⁴வங் கரோதி ஏதாயாதிவா பிஸுணா. நிருத்தினயேன. வத³ந்தி ஏதாயாதி பிஸுணவாசா. யேன ஸுய்யதி, தஸ்ஸ ஹத³யங் ப²ரமானா உஸதி த³ஹதீதி ப²ருஸா. ப²ருஸாச ஸா வாசாசாதி ப²ருஸவாசா. ஸாது⁴ஜனேஹி அதி⁴க³ந்தப்³ப³ங் ஸங்ஸுக²ங் ஹிதஞ்ச ப²லதி விஸரதி வினாஸேதி ஹிதஸுக²மக்³க³ங் பி⁴ந்த³தீதி ஸம்ப²ங். தங்வா ப²லதி பி⁴ஜ்ஜதி ஏதேனாதி ஸம்ப²ங். அத்த²த⁴ம்மாபக³தஸ்ஸ படிபா⁴ணசித்தஸ்ஸ பா⁴ரதயுத்³த⁴ஸீதாஹரணா தி³கஸ்ஸ வாசா வத்து²மத்தஸ்ஸேதங் நாமங். யத்த² தி³ட்ட²த⁴ம்மஹிதபு³த்³தி⁴யாவா ஸம்பராயிக ஹிதபு³த்³தி⁴யாவா உபாயதீ³பகங் கிஞ்சி அத்த²த⁴ம்மவினயபத³ங் நத்தி². ஸம்ப²ங் பலபந்திபகாரேன கத²யந்தி ஏதேனாதி ஸப்ப²ப்பலாபோ. தத்த² பரஸ்ஸவிஸங் வாத³னபுரெக்கா²ரேன விஸங் வாத³க காயவசீபயோக³ஸமுட்டா²பிகா அகுஸலசேதனா முஸாவாதோ³. ஸோ பரஸ்ஸ அத்த²ப⁴ஞ்ஜனகோவ கம்மபத²பே⁴தோ³. இதரோ கம்மமேவ. எத்த² ச கம்ம பதோ²தி படிஸந்தி⁴ஜனகானங் கம்மானங் உட்டா²னமுக²மக்³கோ³ வுச்சதி. யதா² ஹி ரஜானங் உட்டா²னபதே³ஸோ ரஜபதோ²தி வுச்சதி. ததா² லோகே ஸந்தி³ஸ்ஸமானேஸு ஸத்தானங் காயவசீசித்தாபி⁴ஸங்க²ரணகிச்சேஸுயேஹி கிச்சேஹி படிஸந்தி⁴ஜனகானி கம்மானி உட்ட²ஹந்தி. யேஸுவா கிச்சேஸு தானி உட்ட²ஹந்தி பவத்தந்தி. தானி காயவசீசித்தா பி⁴ஸங்க²ரணகிச்சானி படிஸந்தி⁴ஜனகானங் கம்மானங் உட்டா²னமுக²மக்³க³த்தா கம்மபதோ²தி வுச்சந்தி. கதமானி பன தானீதி. அங்க³ஸம்பன்னானி அகுஸலேஸு பாணகா⁴த கிச்சாதீ³னி குஸலேஸு தப்³பி³ரமணகிச்சாதீ³னி த³ஸவிதா⁴னி கிச்சானீதி. கம்மானியேவ ஸுக³திது³க்³க³தீனங் தது³ப்பஜ்ஜனகஸுக²து³க்கா²னஞ்ச பத²பூ⁴தத்தா கம்மபதோ²னாமாதிபி வத³ந்தி.
பரஸ்ஸ பே⁴த³புரெக்கா²ரேன பே⁴த³ககாயக³சீபயோக³ஸமுட்டா² பிகா ஸங்கிலிட்ட²சேதனா பிஸுணாவாசா. ஸாபி பரே பி⁴ன்னேயேவ கம்மபத²பே⁴தோ³. அபி⁴ன்னே கம்மமேவ. பரஸ்ஸ மம்மச்சே²த³ககாய வசீபயோக³ஸமுட்டா²பிகா து³ட்ட²சேதனா ப²ருஸவாசா. எத்த²ச மரந்தி ஸத்தா, மரணமத்தங்வா து³க்க²ங் நிக³ச்ச²ந்தி ஏதஸ்மிங் க⁴ட்டியமானேதி மம்மங். து³ட்ட²வணோ. மம்மங் சி²ந்த³தி பி⁴ந்த³தி க⁴ட்டேதீதி மம்மச்சே²த³கோ. வணக⁴ட்டனபயோகோ³. இத⁴ பன மம்மங்வியாதி மம்மங். ஜாதிஆதீ³ஸு த³ஸஸு அக்கோஸவத்தூ²ஸு யங்கிஞ்சி. மம்மச்சே²த³கோதி ஜாதிஆதீ³ஸு க⁴ட்டன வஸேன
அனத்த²விஞ்ஞாபன காயவசீபயோக³ ஸமுட்டா²பிகா பாபசேதனா ஸம்ப²ப்பலாபோ. ஸோபி பா⁴ரதயுத்³த⁴ ஸீதாஹரணாதி³கேஸு படிபா⁴ணசித்தேஸு வாசாவத்து²மத்தேஸுஏவ கம்மபத²பே⁴தோ³. ஸோசகோ² பரே தங் அனத்த²ங் ஸச்சதோ க³ண்ஹந்தேயேவ. அக³ண்ஹந்தே பன கம்மமேவ. ததா² ராஜகதா²தீ³ஸு த்³வத்திங்ஸ திரச்சா²ன கதா²பபே⁴தே³ஸுபி கம்மமேவ. தஞ்ச கோ² தத³ஸ்ஸாத³வஸேன கதெ²ந்தஸ்ஸேவ. அத்த²த⁴ம்மவினயனிஸ்ஸிதங் கத்வா கதெ²ந்தஸ்ஸ பன ஸப்³ப³ங்பி ஸத்த²கமேவ ஹோதீதி வேதி³தப்³ப³ங். வசீகம்மந்தி எத்த² வசீதி வாசாயேவ. ஸா சதுப்³பி³தா⁴ ஸத்³த³வாசா விரதிவாசா சேதனாவாசா சோபனவாசாதி. இத⁴ பன ஸத்³த³ஸஹிதா வசீவிஞ்ஞத்திஸங்கா²தா சோபன வாசா அதி⁴ப்பேதாதி வுத்தங் வசீவிஞ்ஞத்திஸங்கா²தேதி. சோபனவாசா ஹி கதா³சி வாசங்கே³ன அத்தனோ அதி⁴ப்பாயங் பரஸ்ஸ விஞ்ஞாபனத்தா²யபி கரீயதீதி வசீவிஞ்ஞத்தீதி வுச்சதீதி. ஸாயேவச கம்மானங் பவத்தி முக²த்தா த்³வாரந்தி வசீத்³வாரங். தாய ஹி தங்தங்வசீபயோக³கிச்சேன பவத்தமானாய ஏவ விஸங்வாத³னாதி³கிச்சஸித்³தி⁴தோ தங்ஸமுட்டா²பகஸ்ஸ சேதனாத⁴ம்மஸ்ஸ ஆயூஹனக்ரியானிப்³ப³த்திச வசீகம்மனாமலாபோ⁴ச ஹோதீதி. தஸ்மிங் வசீத்³வாரே. யமெத்த² வத்தப்³ப³ங், தங் காயகம்மே வுத்தமேவாதி. [வசீகம்மங்]
150. அபி⁴ஜ்ஜா²யந்தி அபி⁴ஜ்ஜா². ப்³யாபாதெ³ந்தி பரஸத்தே வினாஸங் ஆபன்னே கத்வா சிந்தெந்தி ஏதேனாதி ப்³யாபாதோ³. மிச்சா²தி³ட்டீ²தி எத்த² மிச்சா²தி விபரீதத்தே² நிபாதோ. அத்தி²தி³ன்னந்திஆதி³னயபவத்தங் ஸப்³ப³ங் ஸப்புரிஸ மக்³க³ங் ஸப்புரிஸபஞ்ஞத்தங் பி⁴ந்தி³த்வா நத்தி² தி³ன்னந்திஆதி³னயேன தப்³பி³பரீ ததோ பஸ்ஸந்தி ஏதாயாதி மிச்சா²தி³ட்டி². தத்த² பரஸந்தகங் தி³ஸ்வா கேவலங் அஸ்ஸாத³னாபி⁴னந்த³னரஜ்ஜனமத்தேஸு அட்ட²த்வா அஹோவத இத³ங் மமஸ்ஸாதி ஏவங் அத்தனோ கத்வா சித்தேன பரிணாமெந்தஸ்ஸேவ அபி⁴ஜ்ஜா²கம்மபத²பே⁴தோ³ ஹோதி. பரஸந்தகபா⁴வேயேவ த²பெத்வா லாபா⁴வதிமே. யே ஈதி³ஸங் பரிபு⁴ஞ்ஜந்தி. அஹோவதாஹங்பி தாவகாலிகங் பரிபு⁴ஞ்ஜெய்யங். யாசித்வாவா கிணித்வாவா அத்தனோ கரெய்யங். அஞ்ஞங்வா ஈதி³ஸங் லபெ⁴ய்யந்தி ஏவங் அஸ்ஸாதெ³ந்தஸ்ஸ கம்மமேவ. வுத்தஞ்ஹேதங் அட்ட²கதா²ஸு பரப⁴ண்ட³வத்து²கே ஹி லோபே⁴ உப்பன்னேபி ந தாவ கம்மபத²பே⁴தோ³ ஹோதி. யாவ ந அஹோவத இத³ங் மமஸ்ஸாதி அத்தனோ பரிணாமேதீதி. அந்தமஸோ ட³ங்ஸமகஸாதி³கேபி ஆரப்³ப⁴ இமே நஸ்ஸந்து வினஸ்ஸந்து. அஹோவதிமே நஸ்ஸெய்யுங் வினஸ்ஸெய்யுங். அவட்³டி⁴தாவா ப⁴வெய்யுங் சிரங்வா நதிட்டெ²ய்யுங். கதா³வா நஸ்ஸந்தி வினஸ்ஸந்தீதி ஏவங் பர ஸத்தஸ்ஸ க²ந்த⁴ஜீவவினாஸங் சிந்தெந்தஸ்ஸேவ ப்³யாபாதோ³. இதரோ கம்மமேவ. வுத்தஞ்ஹேதங் பரஸத்தவத்து²கே ஹி கோதே⁴ உப்பன்னேபி ந தாவ கம்மபத²பே⁴தோ³ ஹோதி. யாவ ந அஹோவதாயங் உச்சி²ஜ்ஜெய்ய வினாஸெய்யாதி தஸ்ஸ வினாஸங் சிந்தேதீதி. கம்மஸ்ஸவா கம்மவிபாகஸ்ஸவா ஸப்³ப³ஸோ படிபா³ஹிகா நத்தி²காஹே துகாக்ரியவஸேன திவிதா⁴ நியத மிச்சா²தி³ட்டி²ஏவ கம்மபத²பே⁴தோ³. த³ஸவத்து²கமிச்சா²தி³ட்டி² பன நத்தி²கதி³ட்டி²பபே⁴தா³ஏவ. ஸப்³ப³ஞ்ஞுதே³ஸனங் படிபா³ஹித்வா பவத்தா அரிட்ட²கண்டகாதீ³னங் தி³ட்டி²யோபி கம்மபதா²ஏவாதி வத³ந்தி. வீஸதிவத்து²கா ஸக்காயதி³ட்டி²வா த்³வாஸட்டி²தி³ட்டி²க³தானிவாகம்மமேவாதி.
நியதாதி
அஞ்ஞத்ராபிவிஞ்ஞத்தியாதி விஞ்ஞத்தித்³வயேன வினாபி. விஞ்ஞத்தித்³வயங் அஸமுட்டா²பெத்வாபீதி அத்தோ². அபிஸத்³தே³ன பன விஞ்ஞத்தித்³வயேன ஸஹாபீதி த³ஸ்ஸேதி. இமானி ஹி தீணி கம்மானி யதா³ காயங்க³வா சங்கா³னி அசோபெத்வா மனஸ்மிங்ஏவ ஸிஜ்ஜ²ந்தி. ததா³விஞ்ஞத்தியா வினாவ பவத்தந்தி. யதா³ பன தானி சோபெத்வா காயவசீத்³வாரேஸு ஸிஜ்ஜ²ந்தி, ததா³ விஞ்ஞத்தியா ஸஹேவ பவத்தந்தீதி. ஏதேன இமேஸங் தீஸுபி த்³வாரேஸு பவத்திங் தீ³பேதி. ஏவங்ஸந்தேபி இமானி மனொத்³வாரேஏவ ப³ஹுலங் பவத்தந்தி. காயவசீத்³வாரேஸு பன அப்பகமேவ பவத்தந்தீதி வுத்தங் மனஸ்மிங்யேவபா³ஹுல்லவுத்திதோதி. தத்த² மனஸ்மிங் யேவாதி குஸலா குஸலஜவனசித்தஸங்கா²தே மனொத்³வாரேஏவ. ஏதேன புரிமேஸுபி காயத்³வாரே வசீத்³வாரேதி பதே³ஸு ஏவஸத்³த³ஸம்ப⁴வோ தீ³பிதோ ஹோதி. ஏவஞ்ஹி ஸதி தத்த²பி த்³வாரேன கம்மவவத்தா²னங் ஸுட்டு²தரங் உபபன்னங் ஹோதீதி. இதரதா² உபலக்க²ணாதி³வஸேன அத்த²ந்தரபஸங்கோ³பி ஸியாதி. அபிச, இத⁴ ஏவஸத்³தே³ன அயங்பி விஸேஸத்தோ² தீ³பிதோ ஹோதி. பாணவதா⁴தீ³ஸு ஹி வதா⁴மி நங் அவஹராமி ந ந்திஆதி³னா
[156] யங் பன விபா⁴வனியங்
‘‘விஞ்ஞத்திஸமுட்டா²பக சித்தஸம்பயுத்தாசெத்த² அபி⁴ஜ்ஜா²த³யோ சேதனாபக்கி²காவ ஹொந்தீதி’’ வுத்தங். தங் இத⁴ ந யுஜ்ஜதி.
ந ஹி விஞ்ஞத்திஸமுட்டா²பகசித்தஸம்பயுத்தாபி கேவலங் மனோகம்ம கிச்சவிஸேஸேன பவத்தமானா அபி⁴ஜ்ஜா²த³யோ சேதனாபக்கி²கா ஹொந்தி. சேதனாஏவ பன அபி⁴ஜ்ஜா²தி³பக்கி²கா ஹோதீதி. [மனோகம்மங்]
151. எத்த² ச த³ஸன்னங்பி இமேஸங் கம்மபதா²னங் புப்³பா³பரசேதனாயோ படிஸந்தி⁴ஆகட்³ட⁴னே அனேகந்திகபக்க²ங் க³தாதி படிஸம்பி⁴தா³ மக்³க³டீகாயங் வுத்தா. தஸ்மா தாபி இமங் ஸத்தங் மாரெஸ்ஸாமி இமங் ப⁴ண்ட³ங் அதி³ன்னங் ஆதி³யிஸ்ஸாமீதிஆதி³னா நயேன ஆதி³தோ பட்டா²ய பவத்தா ப³லவபச்சயே லத்³தா⁴ படிஸந்தி⁴ங் ஆகட்³ட⁴ந்தி. அலத்³தா⁴ நாகட்³ட⁴ந்தீதி யுத்தா. யானி பன குஸலாகுஸலானி கம்மபத²பே⁴த³ங் அப்பத்தானி ஹொந்தி. தானி காயத்³வாரே தி³ஸ்ஸமானானி காயகம்மானினாம ஹொந்தி. வசீத்³வாரே தி³ஸ்ஸமானானி வசீகம்மானினாம. ஸுத்³தே⁴ மனொத்³வாரே தி³ஸ்ஸமானானி மனோகம்மானினாமாதி வேதி³தப்³பா³னீதி. தோ³ஸமூலேனாதி தோ³ஸஸங்கா²தமூலேன தோ³ஸமூலகசித்தேனாதி த்³விதா⁴ அத்தோ². தத்த² புரிமோ ப்³யாபாத³வஜ்ஜேஹி த்³வீஹி யுஜ்ஜதி, பச்சி²மோ தீஹிபி. லோப⁴மூலேனாதி எத்த² ஏஸனயோ. தத்தா²பிதி புரிமோ அபி⁴ஜ்ஜா²வஜ்ஜேஹி த்³வீஹி யுஜ்ஜதி. பச்சி²மோ தீஹீதி. த்³வீஹி மூலேஹீதி கதா³சி தோ³ஸமூலேன கதா³சி லோப⁴மூலேனாதி ஏவங் த்³வீஹி மூலேஹி ஸம்ப⁴வந்தி. மோஹோ பன ஸப்³ப³ஸாதா⁴ரணத்தா விஸேஸகரோ ந ஹோதீதி இத⁴ ந க³ஹிதோ.
[157] யங் பன விபா⁴வனியங்
‘‘நிதி⁴பாட²கபமாணதோ து³ட்ட²னிக்³க³ஹத்த²ங் பரஸந்தகங் ஹரந்தானங் ராஜூனங் ப்³ராஹ்மணானஞ்ச ஸப்³ப³மித³ங் ப்³ராஹ்மணானங் ராஜூஹி தி³ன்னங். தேஸங் பன ஸப்³ப³து³ப்³ப³லபா⁴வேன அஞ்ஞே பு⁴ஞ்ஜந்தி. அத்தஸந்தகமேவ ப்³ராஹ்மணா பரிபு⁴ஞ்ஜந்தீதி ஏவமாதீ³னி வத்வா ஸகஸஞ்ஞாய ஏவ யங்கிஞ்சி ஹரந்தானங் கம்மப²லஸம்ப³ந்தா⁴பவாதீ³னஞ்ச மோஹமூலேனா’’தி வுத்தங். தங் இத⁴ ந யுஜ்ஜதி.
ஸஹஜாதமூலஞ்ஹி இத⁴ அதி⁴ப்பேதங் அஸாதா⁴ரணபூ⁴தஞ்ச. தேஸஞ்ச ததா²ஹரந்தானங் ஹரணங் ஹரணகாலே கதா³சிதோ³ஸமூலேன கதா³சி லோப⁴மூலேனாதி ஏவங் த்³வீஹி மூலேஹி ஏவ ஸம்ப⁴வதீதி. யோ பன மோஹோ மஹாஸம்மதாதீ³னங்த⁴ம்மிகராஜூனங் காலே பவத்தங் போராணக நிதி⁴ஸத்த²ங் த²பெத்வா பச்சா² அத⁴ம்மிகானங்ராஜூனங் காலே பவத்தேஸு யேபு⁴ய்யேன அத⁴ம்மிகேஸு த⁴ம்மஸத்த² ராஜஸத்த² ஸங்கா²தேஸு நிதி⁴பாடே²ஸு த⁴ம்மிகஸஞ்ஞீனங் ராஜூனங் உப்பன்னோ. யோச ராஜூனங் அபி⁴ஸேககாலே தி³ன்னஞ்ஞேவஸமணப்³ராஹ்மணானங்திணகட்டோ²த³கந்தி வசனங் உபாதா³ய ஸப்³ப³மித³ங் ப்³ராஹ்மணானங் ராஜூஹி தி³ன்னந்தி ஏவங் ஸஞ்ஞீனங் ப்³ராஹ்மணானங் உப்பன்னோ. யோச நத்தி² ஸுகத து³க்கடானங் கம்மானங் ப²லங் விபாகோதி ஏவங் தி³ட்டி²கானங் கம்மப²லஸம்ப³ந்தா⁴ பவாதீ³னங் உப்பன்னோ. ஸோஸப்³போ³பி உபனிஸ்ஸயமோஹோ நாம ஹோதி. ஸோ இத⁴ நாதி⁴ப்பேதோ. இதரதா² லோபோ⁴ நிதா³னங் கம்மானங் ஸமுத³யாய. தோ³ஸோ நிதா³னங் கம்மானங் ஸமுத³யாய. மோஹோ நிதா³னங் கம்மானங் ஸமுத³யாயாதி வசனதோ ஸப்³பே³பி அகுஸலகம்ம பதா²தி மூலகாஏவ இத⁴ வத்தப்³பா³ ஸியுந்தி. ஏவங்பனெத்த² வத்தப்³ப³ங் ஸியா, கம்மேஸுச கம்மப²லேஸுச ஸஞ்ஜாதகங்கா²னங் ஜனானங் கங்கா² பரியுட்டா²ன சித்தேனஸஹேவதத³னுரூபானிஅதி³ன்னாதா³னாதீ³னி சத்தாரிகம்மானி கரொந்தானங் தானி
152. காமாவசரகுஸலங்பி காயத்³வாரே பவத்தங் காய கம்மந்தி எத்த² த்³வே பரியாயா வேதி³தப்³பா³. கத²ங், வக்க²மானேஸு ஹி புஞ்ஞக்ரியவத்தூ²ஸு யங்கிஞ்சி புஞ்ஞக்ரியவத்து²ங் காயங்க³ங் சோபெத்வா பவத்திதங் காயகம்மங் நாம. வாசங்க³ங் சோபெத்வா பவத்திதங் வசீகம்மங் நாம. காயங்க³ வாசங்கா³னி அசோபெத்வா மனொத்³வாரேஏவ பவத்திதங் மனோகம்மங் நாமாதி அயமேகோ பரியாயோ. அயங் பன மெத்தங் காயகம்மங் பச்சுபட்டி²தங் ஹோதி ஸப்³ரஹ்மசாரீஸு ஆவிசேவ ரஹோ ச. மெத்தங் வசீகம்மங் பச்சுபட்டி²தங் ஹோதி ஸப்³ரஹ்மசாரீஸு ஆவிசேவ ரஹோச. மெத்தங் மனோகம்மங் பச்சுபட்டி²தங் ஹோதி ஸப்³ரஹ்மசாரீஸு ஆவிசேவ ரஹோசாதிச. ஸப்³ப³ங் காயகம்மங் ஞாணபுப்³ப³ங்க³மங் ஞாணானுபரிவத்தங். ஸப்³ப³ங் வசீகம்மங் ஞாணபுப்³ப³ங்க³மங் ஞாணானுபரிவத்தங். ஸப்³ப³ங் மனோகம்மங் ஞாணபுப்³ப³ங்க³மங் ஞாணானுபரிவத்தந்தி ச.
பத³க்கி²ணங் காயகம்மங், வாசாகம்மங் பத³க்கி²ணங்;
பத³க்கி²ணங் மனோகம்மங், பணீஹிதே பத³க்கி²ணே திச.
ஏவமாதீ³ஸு ஸுத்தபதே³ஸு ஆக³தோ. அபிச, அட்ட²ஸாலினியங் ஸகலாய நவகம்மத்³வாரகதா²ய அயமத்தோ² தீ³பேதப்³போ³. தத்த² ஹி தா³னமயங்பி காயவசீ மனோகம்மவஸேன திதா⁴ விப⁴த்தங். ததா² ஸீலமயங் பா⁴வனாமயஞ்சாதி. யஸ்மிங் பன து³ஸ்ஸில்யே பவத்தமானே காயோ அபரிஸுத்³தோ⁴ ஹோதி. காயஸங்வரோ பி⁴ஜ்ஜதி. யங் பன குஸலங் பவத்தமானங் தத³ங்க³பஹானாதி³வஸேன தங் து³ஸ்ஸில்யங் பஜஹித்வா காயத்³வாரங் ஸோத⁴யமானங் காயஸங்வரங் பூரயமானங் பவத்ததி. தங் காயசோபன ரஹிதங்பி காயங்க³ ஸங்வரண கிச்சத்தா கிச்சஸீஸேன காயத்³வாரே பவத்தங் காயகம்மங்னாம. காயஸுசரிதந்திபி வுச்சதி. எத்த²ச தங் து³ஸ்ஸில்யங் பஜஹித்வாதி யஸ்மிங் சித்தே உப்பஜ்ஜமானே பாணகா⁴தாதி³கங் காயது³ஸ்ஸில்யங் உப்பஜ்ஜெய்ய. தஸ்ஸ சித்தஸ்ஸ உப்பஜ்ஜிதுங் அப்பதா³னவஸேன தங் காயது³ஸ்ஸில்யங் பஜஹித்வா. காயத்³வாரங் ஸோத⁴ யமானந்தி தா³னங். வத்து²பரிச்சாக³சேதனா. ஸீலயதீதி ஸீலங். காய வசீகம்மானி ஸாவஜ்ஜானி நீவாரெத்வா அனவஜ்ஜானி ஸுஸமாஹிதானி கத்வா ஸம்மாத³ஹதி த²பேதி, உபரிமே குஸலத⁴ம்மேச உபதா⁴ரேதி. தேஸங் பதிட்டா² ஹுத்வா தா⁴ரேதீதி அத்தோ². பா⁴வெந்தி ஏதாயாதி பா⁴வனா. அதி⁴குஸலத⁴ம்மே அனுப்பன்னேவா உப்பாதெ³ந்தி உப்பன்னேவா வட்³டெ⁴ந்தீதி அத்தோ². அபசாயந்தி ஏதேனாதி அபசாயனங். பூஜெந்தி காயவாசாஹி அத்தானங் நீசவுத்திங் த³ஸ்ஸெந்தீதி அத்தோ².
விஸேஸேன ஆவரந்தி உஸ்ஸுக்கங் ஆபஜ்ஜந்தீதி ப்³யாவடானங் பா⁴வோ கம்மங்வா வெய்யாவச்சங். பஜ்ஜித்தா²தி பத்தி. அத்தனி லத்³த⁴புஞ்ஞகொட்டா²ஸஸ்ஸ நாமங். பாபீயதீதிவா பத்தி. பரேஹி அனுமோத³ந்தேஹி லத்³த⁴ப்³ப³ஸ்ஸ புஞ்ஞானிஸந்த³ஸ்ஸேதங் நாமங். பத்திங் த³த³ந்தி ஏதேனாதி பத்திதா³னங். ததே³வ பரேஹி தி³ன்னங் அனுமோத³ந்தி. ஸாது⁴காரங் த³த³ந்தி ஏதேனாதி பத்தானுமோத³னங். த⁴ம்மங் ஸுணந்தி ஏதேனாதி த⁴ம்மஸவனங். த⁴ம்மங் தே³ஸெந்தி ஏதாயாதி த⁴ம்மதே³ஸனா. அத்தி² தி³ன்னங், அத்தி² யிட்ட²ங், அத்தி² ஹுதங், அத்தி² ஸுகதது³க்கடானங் கம்மானங் ப²லங் விபாகோதிஆதி³னா த³ஸவத்து²கங் ஸம்மாதி³ட்டி²ங் உஜுங் கரொந்தி ஏதேனாதி தி³ட்டி²ஜுகம்மங். ஸப்³பா³னி பன தானி புனெந்தி சித்தஸந்தானங் ஸோதெ⁴ந்தி ஏதேஹீதி புஞ்ஞானி. பூஜனீயபா⁴வங் நிப்³ப³த்தெந்தீதி புஞ்ஞானீதிபி வத³ந்தி. தானிஏவ அவஸ்ஸங் கத்தப்³ப³ட்டே²ன க்ரியானிசாதி புஞ்ஞக்ரியவத்தூ²னீதி. எத்த² ஏகமேகங் திவித⁴ங் ஹோதி புரிமங் மஜ்ஜி²மங் பச்சி²மந்தி. தத்த² தா³னே தாவ படிக்³கா³ஹகஸ்ஸ பரிச்சாக³கரணங் மஜ்ஜி²மங்னாம. ததோ புப்³பே³ இமினா பச்சயேன தா³னமயங் புஞ்ஞங் பவத்தயிஸ்ஸாமீதி ஏவங் பச்சயுப்பாத³னதோ பட்டா²ய தா³னங் ஆரப்³ப⁴ தா³னங் உத்³தி³ஸ்ஸ தீஸு த்³வாரேஸு பவத்தா குஸலசேதனா புரிமங்னாம. பச்சா² பா⁴கே³ பன அத்தனா தி³ன்னதா³னங் ஆரப்³ப⁴ புனப்புனங் அத்தமனசித்தங் உப்பாதெ³ந்தஸ்ஸ பவத்தா குஸலசேதனா பச்சி²மங்னாமங். ஸப்³ப³ங்பி சேதங் அகுஸலே வுத்தனயேன ப³லவபச்சயே லத்³தா⁴ படிஸந்தி⁴ங் தே³தி. அலத்³தா⁴ ந தே³தீதி வேதி³தப்³ப³ங்.
புன ஹீன மஜ்ஜி²மபணீதவஸேன திவித⁴ங் ஹோதி. தத்த² ஹீனேன ச²ந்தே³ன சித்தேன வீரியேன வீமங்ஸாயவா பவத்திதங் ஹீனங், மஜ்ஜி²மேன ச²ந்தா³தி³னா பவத்திதங் மஜ்ஜி²மங், பணீதேன பணீதங். யஸகாமதாயவா பவத்திதங் ஹீனங். புஞ்ஞப²லகாமதாயவா பவத்திதங் மஜ்ஜி²மங். கத்தப்³ப³மே வித³ந்தி அரியபா⁴வங் நிஸ்ஸாய பவத்திதங் பணீதங். அத்துக்கங்ஸன பரவம்ப⁴னாதீ³ஹி உபக்கிலிட்ட²ங்வா ஹீனங். அனுபக்கிலிட்ட²ங் லோகியஸுக²பா⁴கி³தாய பவத்திதங் மஜ்ஜி²மங். மக்³க³ப²லஸுக²பா⁴கி³தாய பவத்திதங் பணீதங். தண்ஹாவஸேனவா ப⁴வபோ⁴க³த்தா²ய பவத்திதங் ஹீனங். அத்தனோ விமொக்க²த்தா²ய பவத்திதங் மஜ்ஜி²மங். ஸப்³ப³ஸத்தவிமொக்க²த்தா²ய பவத்திதங் பாரமிதாதா³னங் பணீதந்தி அயமத்தோ² விஸுத்³தி⁴மக்³கே³ ஸீலனித்³தே³ஸங் நிஸ்ஸாய வேதி³தப்³போ³தி. யதா² செத்த², ஏவங் ஸேஸேஸுபியதா² ஸம்ப⁴வங் திகத்³வயங் விப⁴ஜித்வா வத்தப்³ப³ந்தி. தத்த² ஸீலங் நாமபி⁴க்கு²ஸீலங், பி⁴க்கு²னிஸீலங், ஸாமணேரஸீலங், க³ஹட்ட²ஸீலந்தி சதுப்³பி³த⁴ங் ஹோதி. தத்த² புரிமானங் த்³வின்னங் ஸமாதா³னகிச்சங் கம்மவாசாய ஸித்³த⁴ங்ஹோதி. அந்திமவத்து²அஜ்ஜா²பன்னேனவா ஸிக்கா²பச்சக்கா²னேனவா கம்மவாசாய பி⁴ன்னாய ஸப்³ப³ங் ஸமாதா³னங் பி⁴ன்னங் ஹோதி. ஸப்³பா³னி உபஸம்பன்ன ஸீலானி பி⁴ன்னானி ஹொந்தி. ததா³ பி⁴க்கு²படிஞ்ஞங் அவிஜஹித்வா டி²தோ து³ஸ்ஸீலோனாம ஹோதி. த²பெத்வாபன அந்திமவத்து²ங் அஞ்ஞஸிக்கா² பதா³னி வீதிக்கமந்தஸ்ஸ யங் வீதிக்கமதி. தஸ்மிங்யேவ ஸங்வரபே⁴தோ³ ஹோதி. ந ஸமாதா³ன பே⁴தோ³. ந ஹி தங் புன கம்மவாசாய ஸமாதா³தப்³ப³ந்தி அத்தீ²தி. படிகம்மங் கரொந்தஸ்ஸ
க³ஹட்ட²ஸீலே பன பகதி க³ஹட்டா²னங் க³ஹணவஸேனேவ ஸமாதா³னங் ஸித்³த⁴ங் ஹோதி. தஸ்மா ஏகதோக³ண்ஹந்தே ஸப்³பா³னி ஸமாதி³ன்னானி ஹொந்தி. ஏகஸ்மிங்ச பி⁴ன்னே ஸப்³பா³னி பி⁴ன்னானி ஹொந்தி. ஸப்³பா³னி புன ஸமாதா³தப்³பா³னி. விஸுங் விஸுங் க³ண்ஹந்தே பன யங் வீதிக்கமதி, ஏததே³வபி⁴ஜ்ஜதி. ததே³வ புன ஸமாதா³தப்³ப³ங் ஹோதீதி. பரிச்சி²ன்னகாலா திக்கமனே பன ஸப்³ப³ங் ஸமாதா³னங் வூபஸம்மதியேவ. து³ஸ்ஸீலபா⁴வோ பனெத்த² பஞ்சன்னங் நிச்சஸீலானங் பே⁴தே³ன வேதி³தப்³போ³. நிச்சானிச்சேஸு பன யங் நிச்சமேவ வட்டதி. அனிச்சங் நவட்டதி ஸாவஜ்ஜங் ஹோதி. தங் நிச்சஸீலங் நாம. யங் பன நிச்சங்பி வட்டதி. மஹந்தங் புஞ்ஞாபி⁴ஸந்த³ங் ஹோதி. அனிச்சங்பி வட்டதி ஸாவஜ்ஜங் ந ஹோதி. தங் அனிச்சஸீலங்னாம. தத்த² பி⁴க்கு² பா⁴வே டி²தஸ்ஸ பி⁴க்கு²ஸீலங் ஸாமணேரபா⁴வே டி²தஸ்ஸ ஸாமணேரஸீலங் பகதிக³ஹட்டா²னங்பஞ்சஸீலங் பப்³ப³ஜிதஸங்கே²பக³தானங் உபாஸகானங் தாபஸபரிப்³பா³ஜகானஞ்ச த³ஸஸீலங் நிச்சஸீலங்னாம. தேஸஞ்ஹி தங் தங் யதா²ஸகங் ஸீலங் நிச்சங் ஸுத்³த⁴ங் கத்வா ரக்கி²துமேவ வட்டதி. அரக்க²ந்தானங் பி⁴க்கு²பா⁴வாதி³கோ ஸாவஜ்ஜோ ஹோதி அஸுத்³தோ⁴. கஸ்மா, அத்தனோ அனுரூபஸ்ஸ ஆசாரஸ்ஸ விபத்திதோ. பகதிக³ஹட்டா²னங் பன அட்ட²ங்கு³போஸத²ஸீலங் அனிச்சஸீலங்னாம. தஞ்ஹி தேஸங் வுத்தனயேன நிச்சங்பி வட்டதி. அனிச்சங்பி வட்டதி. ததா² த³ஸஸீலஞ்ச. தஞ்ஹி பகதி க³ஹட்டா²னங் அனிச்சஸீலமேவ ஹோதி. கி³ஹினிவத்த²ங் பஹாய காஸாயவத்த²தா⁴ரணேன பப்³ப³ஜிதஸங்கே²பக³தானங் ஏவ நிச்சஸீலங். யதா² ஹி பகதிமனுஸ்ஸானங் பஞ்சஸீலங் ஸமாதி³ன்னங்பி அஸமாதி³ன்னங்பி நிச்சங் ரக்கி²துமேவ வட்டதி. வீதிக்கமிதுங் நவட்டதி. ததா² பப்³ப³ஜிதவேஸதா⁴ரீனங் த³ஸஸீலங் ஸமாதி³ன்னங்பி அஸமாதி³ன்னங்பி நிச்சங் ரக்கி²துமேவ வட்டதி. வீதிக்கமிதுங் நவட்டதி. வேஸதா⁴ரணேன ஸஹ ஸித்³த⁴த்தாதி.
உபரி
நத்தி² தி³ன்னங் நத்தி²யிட்ட²ந்திஆதி³னயபவத்தாய த³ஸவத்து²காய மிச்சா² தி³ட்டி²யாவா இஸ்ஸரனிம்மானாதி³தி³ட்டி²யாவா தி³ட்ட²மங்க³லாதி³தி³ட்டி²யாவா விஸுத்³த⁴ங் கத்வா தேஹி தேஹி வத்தூ²ஹிவா யுத்தீஹிவா காரணேஹிவா கம்மஸகதா ஞாணஸங்கா²தாய ஸம்மாதி³ட்டி²யா வோதா³னகரணங் தி³ட்டு²ஜுகம்மங்னாமாதி. யத்த² பன திவித⁴மேவ புஞ்ஞக்ரியவத்து² ஆக³தங். தத்த² பத்திதா³னானுமோத³னானி தா³னே ஸங்க³ய்ஹந்தி. இஸ்ஸாமச்சே²ரானங் மனோகம்மமேவாதி மனஸ்மிங்ஏவ கம்மபத² கிச்சஸித்³தி⁴தோ மனோகம்மங்ஏவ.
[158] விபா⁴வனியங் பன
‘‘விஞ்ஞத்திஸமுட்டா²பகத்தா பா⁴வேன காய த்³வாராதீ³ஸு அப்பவத்தனதோதி’’ வுத்தங். தங் ந ஸுந்த³ரங்.
ந ஹி விஞ்ஞத்திஸமுட்டா²பகங் அபி⁴ஞ்ஞாகுஸலங் காயத்³வாராதீ³ஸு பவத்தமானங்பி காயவசீகம்மஸங்க்²யங் க³ச்ச²தி, காயவாசானங் கம்மபத² அங்க³பா⁴வாஸம்ப⁴வதோதி. தஞ்ச பா⁴வனாமயந்தி தா³னஸீலவஸேன அப்பவத்தனதோ. கேவலங் பா⁴வனாகம்மவிஸேஸத்தா தஞ்ச மஹக்³க³த குஸலங் பா⁴வனாகம்ம மேவ ஹோதி. யங் பன படிஸம்பி⁴தா³ மக்³கே³ பத²மஜ்ஜா²னேன நீவரணானங். து³தீயேன விதக்கவிசாரானங். ததீயேன பீதியா. சதுத்தே²ன ஸுக²து³க்கா²னங் பஹானங் ஸீலங். வேரமணி ஸீலங். சேதனா ஸீலங். ஸங்வரோ ஸீலங். அவீதிக்கமோ ஸீலந்தி வுத்தங். தங் பரியாயேன வுத்தந்தி வேதி³தப்³ப³ங். அப்பனாபத்தந்தி பா⁴வனா ப³லேன ஆரம்மணே அனுபவிஸித்வா அசலட்டி²திபா⁴வேன பவத்தனதோ அப்பனாபத்தங் கம்மங் ஹோதி.
[159] விபா⁴வனியங் பன
‘‘புப்³ப³பா⁴க³பவத்தானங் காமாவசரபா⁴வதோதி’’ காரணங் வுத்தங். தங் ந ஸுந்த³ரங்.
ந ஹி தேஸங் காமாவசரதாமத்தங் அப்பனாபத்தியா காரணங் ஹோதீதி. ஜா²னங்க³பே⁴தே³னாதி வுத்தங். ஜா²னபே⁴தே³னாதி பன வத்தப்³ப³ங். ஜா²னங்க³பே⁴தே³னாதிவா ஜா²னங்க³ஸமுதா³யபே⁴தே³னாதி அத்தோ², ஜா²னபே⁴தே³ன இச்சேவ வுத்தங் ஹோதி. குஸலகம்மங்
153. எத்தா²தி உத்³த⁴ச்சரஹிதந்தி உத்³த⁴ச்சஸஹக³தசேதனாவஜ்ஜிதங். கஸ்மா பன உத்³த⁴ச்சசேதனா இத⁴ பஜ்ஜிதாதி. படிஸந்தி⁴அனாகட்³ட⁴னதோ. கத²ங் விஞ்ஞாயதீதி சே. த⁴ம்மஸங்க³ஹே த³ஸ்ஸனேன பஹாதப்³பே³ஸு தங் அவத்வா பா⁴வனாய பஹாதப்³பே³ஸு ஏவ வுத்தத்தா. யதா²ஹ-சத்தாரோ தி³ட்டி²க³தஸம்பயுத்தசித்துப்பாதா³ விசிகிச்சா²ஸஹக³தோ சித்துப்பாதோ³, இமே த⁴ம்மா த³ஸ்ஸனேன பஹாதப்³பா³திச, உத்³த⁴ச்சஸஹக³தோ சித்துப்பாதோ³, இமேத⁴ம்மா பா⁴வனாயபஹா தப்³பா³திச, ஸேஸா பன சத்தாரோ தி³ட்டி²க³தவிப்பயுத்தசித்துப்பாதா³ த்³வே படிக⁴ஸம்பயுத்தசித்துப்பாதா³ச ஸியா த³ஸ்ஸனேனபஹாதப்³பா³ ஸியா பா⁴வனாய பஹாதப்³பா³தி தத்த² வுத்தா. கத²ஞ்ச விஞ்ஞாயதி. யோ த³ஸ்ஸனேனபஹாதப்³பே³ஸு ந வுத்தோ, ஸோ அகுஸலத⁴ம்மோ படிஸந்தி⁴ங் நாகட்³ட⁴தீதி. பட்டா²னே த³ஸ்ஸனேனபஹாதப்³ப³த⁴ம்மேஸுஏவ நானாக்க²ணிக கம்மபச்சயஸ்ஸ உத்³த⁴டத்தா இதரத்த² தஸ்ஸ அனுத்³த⁴டத்தாதி. யதா²ஹ-ஸஹஜாதா த³ஸ்ஸனேனபஹாதப்³பா³ சேதனா ஸம்பயுத்தகானங் த⁴ம்மானங் சித்தஸமுட்டா²னானஞ்ச ரூபானங் கம்மபச்சயேனபச்சயோ. நானாக்க²ணிகா த³ஸ்ஸனேன பஹாதப்³பா³ சேதனா விபாகானங் க²ந்தா⁴னங் கடத்தாச ரூபானங் கம்மபச்சயேன பச்சயோதிச ஸஹஜாதா பா⁴வனாய பஹாதப்³பா³ சேதனாஸம்பயுத்தகானங்த⁴ம்மானங் சித்தாஸமுட்டா²னானஞ்சரூபானங் கம்மபச்சயேன பச்சயோதிச. நச நானாக்க²ணிக கம்மபச்சயஸத்தியா வினா விபாகுப்பாத³னங்னாம அத்தீ²தி. யதி³ஏவங் ஸா பவத்திவிபாகங்பி நஜனேதீதி ஸக்கா வத்துந்திசே.ந. படிஸம்பி⁴தா³விப⁴ங்கே³ தஸ்ஸா விபாகஸ்ஸ உத்³த⁴டத்தா. யதா²ஹ-கதமே த⁴ம்மா அகுஸலா. யஸ்மிங் ஸமயே அகுஸலங் சித்தங் உப்பன்னங் ஹோதி உபெக்கா²ஸஹக³தங் உத்³த⁴ச்சஸம்பயுத்தங் ரூபாரம்மணங்வா.ல. இமே த⁴ம்மா அகுஸலா. இமேஸு த⁴ம்மேஸு ஞாணங் த⁴ம்மபடிஸம்பி⁴தா³. தேஸங் விபாகே ஞாணங் அத்த²படிஸம்பி⁴தா³தி. தேனாஹ பவத்தியங் பன ஸப்³ப³ங்பி த்³வாத³ஸவித⁴ந்திஆதி³.
[160] யங் பன விபா⁴வனியங்
‘‘அதி⁴மொக்க²விரஹேன ஸப்³ப³து³ப்³ப³லங்பி விசிகிச்சா²ஸஹக³தங் படிஸந்தி⁴ங் ஆகட்³ட⁴தி. அதி⁴மொக்க²ஸம்பயோகே³ன ததோ ப³லவந்தங்பி உத்³த⁴ச்சஸஹக³தங் நாகட்³ட⁴தீதி’’ வுத்தங். தங் ந ஸுந்த³ரங்.
ந ஹி ஸப்³ப³த்தா²பீதி ஸுக³திது³க்³க³திவஸேன ஸப்³ப³ஸ்மிங்பி. யதா²ரஹந்தி தேஸு லோகேஸு லத்³த⁴வத்து²த்³வாரானுரூபங். விபச்சதீதி விபாசேதி விபக்கபா⁴வங் ஆபாதே³தி. ஸப்³ப³ங்பிவாத்³வாத³ஸவித⁴ங் அகுஸலகம்மங் ஸத்தா குஸலபாகானி ஹுத்வா விபச்சதி, விபக்கபா⁴வங் க³ச்ச²தீதி அத்தோ².
யஸ்மா குஸலகம்மானி அபாயபூ⁴மியங்பி பவத்தியங் மஹாஸம்பத்தியோ ஸமுட்டா²பெத்வா மஹித்³தி⁴கானங் நாக³ஸுபண்ணாதீ³னங் ஸந்தானே ஸயமேவ அத்தனோவிபாகஸ்ஸ ஓகாஸங் கத்வா ஸுக²விபாகங் ஜனயந்தி. அஞ்ஞேஸங்பி ஆபாயிகானங் தேன தேன காரணேன இட்டா²ரம்மண ஸமாயோகே³ ஸதி அத்தனோ விபாகஸ்ஸ ஓகாஸங் லபி⁴த்வா ஸுக²விபாகங் ஜனயந்தி. தஸ்மா ததா²பவத்தியஞ்சாதிஆதி³ மாஹ. ந ஹி தானி ஸுக²விபாகானி அகுஸகம்மஸ்ஸ விபாகானி ப⁴விதுங் அரஹந்தி. வுத்தெஞ்ஹேதங் விப⁴ங்கே³ அட்டா²னமேதங் அனவகாஸோ, யங் காயது³ச்சரிதஸ்ஸ இட்டோ² கந்தோ மனாபோ விபாகோ நிப்³ப³த்தெய்யாதிஆதி³. தத்த² மஹாவிபாகானி ஸுக³தி காமலோகே அஹேதுகானி அட்ட²பி ஸப்³ப³ஸ்மிங் காமலோகே தேஸுச பஞ்சசக்கு²விஞ்ஞாண ஸோதவிஞ்ஞாண ஸம்படிச்ச²ன ஸந்தீரண யுக³ளானி ரூபலோகே விபச்சதீதி வுத்தங் யதா²ரஹங் விபச்சதீதி. ரூபாவசர குஸலஞ்ஹி கம்மஸமுட்டா²னரூபானி ஜனயந்தங்பி ஸயங் விபச்சமானங் ஆரம்மணந்தரே அஞ்ஞபூ⁴மிக விபாகபா⁴வேன நவிபச்சதி. காமவிராக³பா⁴வனாபா⁴வேன பன அப்பனாபத்த கம்ம விஸேஸத்தா காமதண்ஹாய அவிஸயபூ⁴தே நிமித்தா ரம்மணே அத்தனா ஸப்³ப³ஸோ ஸதி³ஸேன மஹக்³க³தபா⁴வபத்தேன ரூப விபாகபா⁴வேனேவ
குஸலங் து³வித⁴ங் ஸம்பஜானகதங் அஸம்பஜானகதந்தி. தத்த² கம்மா யூஹனகாலே அந்தமஸோ ஹெட்டா² வுத்தங் தி³ட்டு²ஜுகம்மஞாணங்பி ஸுட்டு² யோஜெத்வா கதங் ஸம்பஜானகதங்னாம. யதா²ஹ-கம்மஞ்ச கம்மப²லஞ்ச ஸத்³த³ஹித்வா கதங் ஸம்பஜானகதங் நாமாதி. தி³ட்டு²ஜுகம்மஞாண மத்தங்பி அயோஜெத்வா தங் அஸம்பஜானகதங் நாம. யதா²ஹ-கம்மங்பி கம்மப²லம்பி அஜானித்வா கதங் அஸம்பஜானகதங் நாமாதி. தத்த² ஸம்பஜானகதங் திஹேதுகங் ஹோதி. அஸம்பஜானகதங் து³ஹேதுகங். யதா²ஹ-ஸம்பஜானகரணங் பன சதுஞாணஸம்பயுத்தேஹி ஹோதி. அஸம்பஜான கரணங் சதூஹி ஞாணவிப்பயுத்தேஹீதி. தத்த² ஏகமேகங் உக்கட்ட²ங் ஓமகந்தி து³வித⁴ங் ஹோதி. தத்த² குஸலஸமயே பரியுட்டி²தே நீவரணத⁴ம்மேவா அத்துக்கங்ஸன பரவம்ப⁴னாதி³கே பாபத⁴ம்மேவா ஸுட்டு² ஸோதெ⁴த்வா கதங் உக்கட்ட²ங் நாம. அஸோதெ⁴த்வா கதங் தேஹிவோகிண்ணங் ஓமகங்னாம. அபிச, யங் கத்வா பச்சா² லாபா⁴ வத மே. நச வத மே அலாபா⁴. ஸுலத்³த⁴ங் வத மே. நச வத மே து³ல்லத்³த⁴ங். யஸ்ஸ மே ஈதி³ஸங் புஞ்ஞங் பஸுதந்தி ஏவங் புனப்புனங் அனுமோதி³தங். தங் உக்கட்ட²ங். யங் கத்வா பச்சா² யேனகேனசி காரணேன து³ட்டு²கதங் மயாதி விப்படிஸாரோ உப்பஜ்ஜதி. தங்ஓமகங். ஏவங் சதுப்³பி³த⁴ஸ்ஸ கம்மஸ்ஸ வஸேன சதுப்³பி³த⁴ங் விபாக கொட்டா²ஸங் விப⁴ஜித்வா த³ஸ்ஸேதுங் ததா²பீதிஆதி³ மாஹ. தத்தா²பீதி திஹேதுகமுக்கட்ட²ந்தி உக்கட்ட²பூ⁴தங் பணீதபூ⁴தங் சதுப்³பி³த⁴ங் திஹேதுகங். திஹேதுகபடிஸந்தி⁴ந்தி சதுப்³பி³த⁴ங் திஹேதுக படிஸந்தி⁴விபாகங். எத்த²ச ஏகசேதனா ஏகமேவ படிஸந்தி⁴ங் தே³தி. பவத்திவிபாகங் பன அஸங்க்²யெய்யேஸுபி ப⁴வேஸு தே³தியேவ. எத்த² ஸியா –
ஏகபுப்ப²ங் யஜித்வான, ஸஹஸ்ஸகப்பகோடியோ;
தே³வேஸுச மனுஸ்ஸேஸு, ஸேஸேன பரினிப்³பு³தோதி ஹி வுத்தங்.
தஸ்மா ஏகா சேதனா ஏகமேவ படிஸந்தி⁴ங் தே³தீதி இத³ங் ந யுஜ்ஜதீதி. ந ந யுஜ்ஜதி. புப்³பா³பரசேதனாஹி ஸத்³தி⁴ங் ஸஹஸ்ஸகப்ப கோடி பரிமாணஸ்ஸ வத்தப்³ப³த்தா. சித்தஞ்ஹினாம ஏகச்ச²ரக்க²ணேபி அனேகஸத ஸஹஸ்ஸ கோடிஸங்க²ங் உப்பஜ்ஜதி. ததோசிரதரேகாலேவத்தப்³ப³மேவ நத்தீ²தி. ஸஹஸ்ஸ கப்பகோடியோதி ச ஸஹஸ்ஸஆயுகப்பகோடியோ ஸஹஸ்ஸ அத்தபா⁴வகோடியோதி நெத்திஅட்ட²கதா²யங் வுத்தங். புப்³பா³பரசேதனானஞ்ச படிஸந்தி⁴தா³னபா⁴வோ கோஸலஸங்யுத்தகேன தீ³பேதப்³போ³. ஏகபிண்ட³பாததா³னஸ்மிங்ஹி ஏகாசேதனாத்³வே படிஸந்தி⁴யோ ந தே³தி. புப்³ப³பச்சி²மசேதனாவஸேன ஸத்தக்க²த்துங் ஸக்³கே³ ஸத்தக்க²த்துங் ஸெட்டி²குலே நிப்³ப³த்தோதி ஹி ஸங்யுத்தட்ட²கதா²யங் வுத்தங். திஹேது கங்பி கம்மங் படிபக்கே²ஹி அபி⁴பு⁴ய்யமானங் விஹதஸாமத்தி²யங் ஹுத்வா திஹேதுகவிபாகங் ஜனேதுங் ந ஸக்கோதி. நச தங் அதிது³ப்³ப³லங்பி ஸமானங் கோஸல்லஸங்கா²தேன ஞாணேன யுத்தத்தா அதிப்³யாமுள்ஹபச்சய பூ⁴ஹங் ஜச்சந்தா⁴தி³விபத்திஸஹிதங் அஹேதுகவிபாகங் ஜனேதீதி வுத்தங் திஹேதுகமோமகந்திஆதி³. த்³வாத³ஸவிபாகானிவிபச்சதி. அயங் த்³வாத³ ஸகமக்³கோ³னாம அஹேதுகவிபாகானேவ விபச்சதி. இத³ங் அஹேது கட்ட²கங்னாம. ஏவங் திபிடகசூளனாக³த்தே²ரவாத³வஸேன விபாகப்பவத்திங் த³ஸ்ஸெத்வா இதா³னி மோரவாபிவாஸி மஹாத³த்தத்தே²ரவாத³ங் த³ஸ்ஸேதுங் கா³த²மாஹ. ஸோ ஹி தே²ரோவிபாகானங் அஸங்கா²ரிகதா ஸஸங்கா²ரிகதாச கம்மவஸேனேவ ஸித்³தா⁴பி கத்வா அஸங்கா²ரங் கம்மங் ஸஸங்கா²ரவிபாகானி ந பச்சதி. ஸஸங்கா²ரங்கம்மங் அஸங்கா²ரவிபாகானி நவச்சதீதி வத³தி.
யதா² கேசனாதி ஆஹ.
இமஸ்மிங் கேசிவாதே³ அஸங்கா²ரிககம்மே ஸஸங்கா²ரிக விபாகானி ஸஸங்கா²ரிககம்மேச அஸங்கா²ரிகவிபாகானி வஜ்ஜெத்வா சதூஸு திஹே துகுக்கட்டே²ஸு கம்மேஸு அஸங்கா²ரிகத்³வயே விபாகானி படிஸந்தி⁴யங் த்³வே, பவத்தியங் த்³வாத³ஸ. ஸஸங்கா²ரிகத்³வயே படிஸந்தி⁴யங் த்³வே, பவத்தியங் த்³வாத³ஸ. சதூஸு த்³விஹேதுகோமககம்மேஸு அஸங்கா²ரிகத்³வயே படிஸந்தி⁴யங் த்³வே, பவத்தியங் த³ஸ. ஸஸங்கா²ரிகத்³வயே படிஸந்தி⁴யங் த்³வே, பவத்தியங் த³ஸ. ததா² சதூஸு த்³விஹேதுகுக்கட்டே²ஸு. சதூஸு த்³விஹேதுகோமகேஸு பன படிஸந்தி⁴யங் ஏகங் அஹேதுகங் பவத்தியங் அட்ட²அஹேதுகானீதி ஏவங் விபாகானங் த்³வே த்³வாத³ஸகமக்³கா³ சத்தாரோ த³ஸகமக்³கா³ ஏகங் அஹேதுகட்ட²கஞ்ச ஹொந்தி, தங்ஸப்³ப³ங் ஸங்க³ஹெத்வா த³ஸ்ஸேதுங் தேஸந்தி கா³த²மாஹ.
தேஸந்தி தேஸங் கேஸஞ்சி தே²ரானங் வாதே³. அட்ட²ஸாலினியங் பன திஹேதுகேன கம்மேன படிஸந்தி⁴திஹேதுகாவ ஹோதி. ந து³ஹேதுகா நசஅஹேதுகா. து³ஹேதுகேன கம்மேன படிஸந்தி⁴ து³ஹேதுகாபி ஹோதி அஹேதுகாபி. திஹேதுகா பன நஹோதீதி ஏவங் பவத்தோ மஹாத⁴ம்மரக்கி²தத்தே²ரவாதோ³பி ஆக³தோ. தத்த² யதா² து³ஹேதுகேன ஹீனேன கம்மேன அஹேதுகா படிஸந்தி⁴ அவஸ்ஸங் இச்சி²தப்³பா³ ஹோதி. ததா² திஹேதுகேனபி ஹீனேன கம்மேன து³ஹேதுகாபி
தத்த² பன தீஸு க²ணேஸு ஸஹஜாத ஹேதூனங் வஸேன ஹேது மூலகோவ அயங் தே³ஸனாவாரோதி கத்வா அனோகாஸதாய அஹேதுகபடிஸந்தி⁴ தத்த² நவுத்தா. ந பன அலப்³ப⁴மானதாய. த்³விஹேதுக படிஸந்தி⁴ பன அனோகாஸாயேவ நஹோதி. அலப்³ப⁴ மானத்தாயேவ ஸா நவுத்தாதி ஸக்கா விஞ்ஞாதுங். தஸ்மா யுத்திதோ பாளியேவ ப³லவதராதி கத்வா மஹாத⁴ம்மரக்கி²தத்தே²ரவாதோ³வ பாளியா ஸமேதீதி படிஸம்பி⁴தா³மக்³க³ட்ட²கதா²யங் வுத்தோ. டீகாகாரா பன கம்மஸரிக்க²க விபாகத³ஸ்ஸனத்த²ங் ஸாவஸேஸ பாடோ²வ மஹாதே²ரேன வுத்தோதி இச்ச²ந்தி. ஏவஞ்ச கத்வா அட்ட²ஸாலினியங்பி திபிடகசூளனாக³த்தே²ரவாதோ³வ பமாணங் கத்வா வுத்தோதி.
விபா⁴வனியங் இதா³னி ஏகாய சேதனாய த்³வாத³ஸவிபாகானி எத்தே²வ த³ஸகமக்³கோ³பி அஹேதுகட்ட²கம்பிதி ஆக³தஸ்ஸ மோரவாபிவாஸி மஹாத⁴ம்மரக்கி²தத்தே²ரஸ்ஸாதி பாடோ².
மோரவாபிவாஸிமஹாத³த்தத்தே²ரஸ்ஸாதி பன வத்தப்³போ³. மஹாத⁴ம்ம ரக்கி²தத்தே²ரவாதோ³பி பன எத்த² ஏகதே³ஸேன ஸங்க³ஹிதோயேவ. தஸ்மிங்பி ஹி அஸங்கா²ரிகங் கம்மங் அஸங்கா²ரிகவிபாகமேவ தே³தி. நோ ஸஸங்கா²ரிகங்
154. ரூபாவசரகம்மே பரித்தந்தி து³வித⁴ங் பரித்தங் அபகு³ணதா யவா ஹீனதாயவா. தத்த² யங் பணீதேஹி ச²ந்தா³தீ³ஹி யுத்தங்பி அபா⁴விதங் ஹோதி படிலத்³த⁴மத்தங், தங் அபகு³ணதாய பரித்தங்னாம. யங் ஸந்தா⁴ய யங் அபகு³ணங் ஹோதி, உபரி ஜா²னஸ்ஸ பச்சயோ ப⁴விதுங் ந ஸக்கோதி, இத³ங் பரித்தங்னாமாதி அட்ட²ஸாலினியங் வுத்தங். யங் பன ஸுபா⁴விதங்பி ஸமானங் ஹீனேஹி ச²ந்தா³தீ³ஹி யுத்தங் ஹோதி. தங் ஹீனதாய பரித்தங்னாம. யங் ஸந்தா⁴ய யஸ்ஸ ஆயூஹனக்க²ணே ச²ந்தோ³வா ஹீனோ ஹோதி. வீரியங்வா, சித்தங்வா, வீமங்ஸாவா, தங் ஹீனங்னாமாதி தத்தே²வ வுத்தங். மஜ்ஜி²மங்பி து³வித⁴ங். தத்த² நாதிபகு³ண தாய மஜ்ஜி²மங் ஸந்தா⁴ய நாதிஸுபா⁴விதோ மஜ்ஜி²மோதி விஸுத்³தி⁴மக்³கே³ வுத்தங். மஜ்ஜி²மேஹி ச²ந்தா³தீ³ஹி யுத்ததாய மஜ்ஜி²மங் ஸந்தா⁴ய யஸ்ஸ ஆயூஹனக்க²ணே தே த⁴ம்மா மஜ்ஜி²மா ஹொந்தி. தங் மஜ்ஜி²மந்தி அட்ட² ஸாலினியங் வுத்தங். பணீதங்பி து³வித⁴ங். தத்த² அதிபகு³ணதாய பணீதங் ஸந்தா⁴ய ஸுபா⁴விதோ வஸிப்பத்தோ பணீதோதி விஸுத்³தி⁴மக்³கே³ வுத்தங். பணீதேஹி பன ச²ந்தா³தீ³ஹி யுத்ததாய பணீதங் ஸந்தா⁴ய யஸ்ஸ ஆயூஹனக்க²ணே தே த⁴ம்மா பணீதா ஹொந்தி. தங் பணீதந்தி அட்ட²ஸாலினியங் வுத்தங். தத்த² யானி அபகு³ணதாதி³ வஸேன பரித்தாதீ³னி வுத்தானி, தானி இத⁴ நாதி⁴ப்பேதானி. யானி பன ஹீனாதீ³ஹி ச²ந்தா³தீ³ஹி யுத்ததாய பரித்தாதீ³னி வுத்தானி, தானேவ இதா⁴தி⁴ப்பேதானி. இமானேவ ஹி திவிதா⁴ஸு பூ⁴மீஸு திவித⁴ங் ப்³ரஹ்முபபத்திபே⁴த³ங் ஸாதெ⁴ந்தீதி. இத்தீ²னங் ஜா²னேஸு வஸீபத்தானங்பி ச²ந்தா³தீ³னங் அபணீததாய மஹாப்³ரஹ்மேஸு அனுப்பஜ்ஜனஞ்செத்த² ஸாத⁴கங். தேனேவச அட்ட²கதா²யங் ச²ந்தா³தி³வஸேன ஸித்³தா⁴னி ஹீன மஜ்ஜி²ம பணீதானி அட்டா²ரஸபபே⁴தே³ன விப⁴ஜித்வா இமானி அட்டா²ரஸ கம்மத்³வாரானி நாம இமேஹி பபா⁴விதத்தா இமேஸங் வஸேன அட்டா²ரஸக²த்தியா அட்டா²ரஸ ப்³ராஹ்மணா அட்டா²ரஸ வெஸ்ஸா அட்டா²ரஸ ஸுத்³தா³ அட்ட²சத்தா லீஸ கொ³த்த சரணானி வேதி³தப்³பா³னீதி வுத்தங். ஏதேன ஹி தே³வானங்பி ப்³ரஹ்மூனங்பி லப்³ப⁴மானங் உபபத்திபே⁴த³ங் உபலக்கே²தீதி.
[161] விபா⁴வனியங் பன
‘‘படிலத்³த⁴மத்தங்
தஞ்ஹி உபரி ஜா²னஸ்ஸ பச்சயோ ப⁴விதுங் ஸமத்தா²ஸமத்த²ங்வா ஹான பா⁴கி³யதாதி³ விஸேஸங் வா ஸந்தா⁴ய வுத்தங். ந பன உபபத்தி பே⁴த³ஜனக விஸேஸந்தி.
[162] யஞ்ச தத்த²
‘‘ஆசரியேன பனெத்த² பரித்தங்பி ஈஸகங் லத்³தா⁴ஸேவனமேவ அதி⁴ப்பேதந்தி தி³ஸ்ஸதி. ததா² ஹானேன நாமரூபபரிச்சே²தே³-
ஸமானாஸேவனே லத்³தே⁴, விஜ்ஜமானே மஹப்³ப³லே;
அலத்³தா⁴ தாதி³ஸங் ஹேது, மபி⁴ஞ்ஞா ந விபச்சதீதி.
ஸமானபூ⁴மிகதோவ ஆஸேவன லாபே⁴ன ப³லவ பா⁴வதோ மஹக்³க³தத⁴ம்மானங் விபாகதா³னங் வத்வா தத³பா⁴வதோ அபி⁴ஞ்ஞாய அவிபச்சனங் வுத்த’’ந்தி வுத்தங். தங்பி விசாரேதப்³ப³மேவ.
யதா² ஹி அரியமக்³க³சேதனா அத்தனா ஸமானபூ⁴மகஜவனதோ அலத்³தா⁴ஸேவனாபி ஸமானா விபாகங் ந தே³தீதி நத்தி². ததா² ஆதி³ கம்மிகவீதி²யங் ஏகவாரமத்தபூ⁴தா ஸப்³ப³ஸமாபத்தி வீதீ²ஸுச ஸப்³ப³பத² மபூ⁴தா மஹக்³க³தசேதனாபி ஸமானபூ⁴மகத⁴ம்மதோ அலத்³தா⁴ஸேவன தாய து³ப்³ப³லத்தா விபாகங் நதே³தீதி நத்தீ²தி ந ந ஸக்கா விஞ்ஞாதுந்தி. எத்த² ஸியா- தஸ்ஸேவ ரூபாவசரஸ்ஸ குஸலஸ்ஸ கம்மஸ்ஸ கதத்தா உபசிதத்தா விபாகங்.ல. பத²மங் ஜா²னங் உபஸம்பஜ்ஜ விஹரதீதி வுத்தங். ந ச ஸா சேதனா உபசிதானாம ஹோதி. ஸமானபூ⁴மக த⁴ம்மதோ அலத்³தா⁴ஸேவனத்தாதி.ந. மக்³க³சேதனாயபி அவிபாகதாபத்திதோ. ஸாபிஹி தஸ்ஸேவ லோகுத்தரஸ்ஸ குஸலஸ்ஸ ஜா²னஸ்ஸ கதத்தா பா⁴விதத்தா விபாகங். ல. பத²மங் ஜா²னங் உபஸம்பஜ்ஜ விஹரதீதி வுத்தா. நச ஸாபி ஸமானபூ⁴மகத⁴ம்மதோ லத்³தா⁴ஸேவனா ஹோதீதி. உப⁴யத்த² பஞ்சமஜ்ஜா²னந்தி அபி⁴ஞ்ஞாபா⁴வங் அபத்தங் பரித்தாதி³பே⁴தே³ன திவித⁴ங் பஞ்சமஜ்ஜா²னங். ததே³வாதி பஞ்சமஜா²னமேவ. ஸஞ்ஞாவிராக³ங் பா⁴வெத்வாதி சித்தே ஸதி ரஜ்ஜன து³ஸ்ஸன முய்ஹனானி ஹொந்தி. தஸ்மிங் அஸதி தி³ட்ட²த⁴ம்மனிப்³பா³னப்பத்தோனாம ஹோதீதி ஏவங் சித்தே ஏவ ஆதீ³னவங் தி³ஸ்வா அசித்தகப⁴வபத்த²னா ஸஹிதங் வாயோகஸிணேவா கேஸஞ்சி மதேன பரிச்சி²ன்னாகாஸ கஸிணேவா ஸஞ்ஞாவிராக³ங் பா⁴வெத்வா. அஸஞ்ஞஸத்தேஸு உப்பஜ்ஜந்தீதி யேன யேன இரியாபதே²ன இத⁴ மரந்தி, தேனேவ தத்த² உப்பஜ்ஜந்தி. கம்மகிரியவாதி³தித்தி²யா ஏவாதி அதி⁴ப்பாயோ. ந ஹி அகம்மகிரியவாதீ³னங் ஜா²னபா⁴வனா நாம அத்தீ²தி. அனாகா³மினோ பன ஸுத்³தா⁴வாஸேஸு உப்பஜ்ஜந்தீதி ஸுத்³தா⁴வாஸேஸு பன அனாகா³மினோ ஏவ உப்பஜ்ஜந்தி. ந அஞ்ஞே ஸகதா³கா³மிஆத³யோதி அத்தோ². ஏதேன அனாகா³மீனங் அஞ்ஞஸ்மிங்பி ப்³ரஹ்மலோகே உப்பத்தி அப்படிஸித்³தா⁴ பத²மஜ்ஜா²னங் பரித்தங் பா⁴வெத்வாதிஆதி³ ஸப்³ப³ங் பத²மஜ்ஜா²னாதீ³னங் யதா² ஸகங் விபச்சனபூ⁴மி வவத்தா²னவஸேன வுத்தங். ஸமாபத்திலாபி⁴னோ பன புது²ஜ்ஜன ஸோதாபன்ன ஸகதா³கா³மினோ அத்தனா லத்³த⁴ஸமாபத்தீனங் விபச்சனபூ⁴மீஸு இச்சி²தபூ⁴மியங் நிப்³ப³த்தந்தி. தேஸு புது²ஜ்ஜனோ நிகந்தியா ஸதி காமலோகேபி நிப்³ப³த்ததியேவ. இதரே பன ஜா²னே அபரி ஹீனே ஸதி காமலோகேபி நிப்³ப³த்ததியேவ. இதரே பன ஜா²னே அபரிஹீனே ஸதி காமப⁴வே நிகந்தினாம தேஸங் ந ஸம்ப⁴வதீதி பரிஹீனஜ்ஜா²னாஏவ தத்த² நிப்³ப³த்தந்தி.
[163] விபா⁴வனியங் பன
தேஸங்பி ஸோதாபன்னஸகதா³கா³மீனங் நிகந்திவஸேன காமப⁴வேனிப்³ப³த்திங் இச்ச²ந்தேன ‘‘ததா² காமப⁴வேபி காமாவசர கம்மப³லேன. இஜ்ஜ²தி பி⁴க்க²வே ஸீலவதோ சேதோபணிதி⁴ விஸுத்³த⁴த்தாதி ஹி வுத்த’’ந்தி வுத்தங். தங் ந யுஜ்ஜதி.
தேஹி ஜா²னே அபரிஹீனே ஏகந்தேன ப்³ரஹ்மலோககா³மினோஏவ ஹொந்தி. யதோ தே ஜா²னஅனாகா³மினோனாமாதி வுச்சந்தி. ஜா²னபரி ஹானிச தேஸங் தங்தங் பலிபோ³த⁴ வஸேனேவ ஹோதி. ந பன காம ராகா³தி³வஸேன. கஸ்மா, மக்³க³ஸஹாயேன ஜா²னேன ஸுட்டு² விக்க²ம்பி⁴தத்தா. வுத்தஞ்ஹேதங் அங்கு³த்தரே-ஸஹத³ஸ்ஸனுப்பாதா³ பி⁴க்க²வே அரியஸாவகஸ்ஸ தீணி ஸங்யோஜனானி மஹீயந்தி.ல. ஸோ விவிச்சேவ.ல. பத²மங் ஜா²னங் உபஸம்பஜ்ஜ விஹரதி. தஸ்மிங் சே ஸமயே பி⁴க்க²வே அரியஸாவகோ காலங்கரெய்ய. நத்தி² தஸ்ஸ ஸங்யோஜனங். யேன ஸங்யோஜனேன ஸங்யுத்தோ அரியஸாவகோ புன யிமங் லோகங் ஆக³ச்செ²ய்யாதி. எத்த²ச தஸ்மிங் சே ஸமயேதிஆதி³னா ஸோ லத்³த⁴ஜ்ஜா²னங் அபரிஹாபெத்வா சே காலங்கரோதி. ஏகந்தேன ப்³ரஹ்மலோகமேவ க³மிஸ்ஸதி. பரிஹாபெந்தஸ்ஸ பன தங் ஸங்யோஜனங் பாகதிமேவாதி த³ஸ்ஸேதி.
தஸ்மா தேஸங் த்³வின்னங் ஸேகா²னங் குப்பத⁴ம்மானங்பி ஸதங் ஜா²னே விஜ்ஜமானே காமப⁴வே நிகந்தி நாம நத்தீ²தி வேதி³தப்³ப³ங். அனாகா³மிஸ்ஸ பன நித்³தா³யந்தஸ்ஸேவ ஸத்தே²ன கீ³வங் சி²ந்தி³த்வா மாரீயமானஸ்ஸபி ஜா²னங் அலபி⁴த்வா சவனங்னாம நத்தி². ஸோ ஹி ஸமாதி⁴ஸ்மிங் பரிபூரகாரீதி வுத்தோ. இத்தி²யோ பன அட்ட²ஸமாபத்தியோ லபி⁴த்வா அனந்தரே ப⁴வே அகனிட்டே² நிப்³ப³த்தமானாபி அதி⁴பதிபூ⁴தேஸு மஹாப்³ரஹ்மேஸு ந நிப்³ப³த்தந்தி. ஹீனஜ்ஜா²ஸயத்தா புரோஹித பாரிஸஜ்ஜேஸுஏவ நிப்³ப³த்தந்தி. ததா²ஹி அட்ட²கதா²ஸு யங் இத்தீ² ப்³ரஹ்மத்தங் கரெய்ய, நேதங் டா²னங் விஜ்ஜதீதி ஸுத்தபத³ஸ்ஸ அத்த²வசனே ப்³ரஹ்மத்தந்தி மஹாப்³ரஹ்மத்தங் அதி⁴ப்பேதங். இத்தீ² ச இத⁴ ஜா²னங் பா⁴வெத்வா காலங் கத்வா ப்³ரஹ்மபாரிஸஜ்ஜானங் ஸஹப்³யதங் உபபஜ்ஜதி, ந மஹாப்³ரஹ்மானந்தி வுத்தங். ப்³ரஹ்மபாரிஸஜ்ஜானந்தி செத்த² ப்³ரஹ்மபுரோஹிதானங்பி ஸங்க³ஹணங் வேதி³தப்³ப³ங். தே ஹி ப்³ரஹ்மானங் பரிஸபூ⁴தா ஹொந்தீதி. வுத்தஞ்ஹேதங் ஸங்யுத்தகே –
அத²கோ² பி⁴க்க²வே ஸிகீ²ப⁴க³வா அபி⁴துங் பி⁴க்கு²ங் ஆமந்தேஸி. படிபா⁴து தங் ப்³ராஹ்மண ப்³ரஹ்முனோச ப்³ரஹ்மபரிஸாயச ப்³ரஹ்மபாரிஸஜ்ஜானஞ்ச த⁴ம்மிகதா²தி.
பரிஸபா⁴வேச ஸதி பரிஸாஸு ஜாதாபினாம ஹொந்தீதி. தத்த² ப்³ரஹ்முனோதி மஹாப்³ரஹ்முனோ. ப்³ரஹ்மபரிஸாயாதி ப்³ரஹ்மபுரோஹித க³ணஸ்ஸாதி அத்தோ². நனு ப்³ரஹ்மபாரிஸஜ்ஜானந்தி வுத்தத்தா ந மஹாப்³ரஹ்மானந்தி எத்தே²வ தேஸங் ஸங்க³ஹணங் யுத்தந்தி சே. ந. யங் இத்தீ² ஸக்கத்தங் கரெய்ய, மாரத்தங் கரெய்ய, ப்³ரஹ்மத்தங் கரெய்ய, நேதங்டா²னங் விஜ்ஜதீதி ஏவங் அதி⁴பதி பூ⁴தேஹி ஸக்காதீ³ஹி ஸஹ வுத்தத்தா இத⁴ அதி⁴பதிபடிக்கி²பனஸ்ஸேவ ஸம்ப⁴வதோ. தேனேவ ஹி நெத்தியங்-இத்தீ² மஹாப்³ரஹ்மா ஸியாதி, நேதங் டா²னங் விஜ்ஜதீதி வுத்தங். எத்தாவதா வேஹப்ப²லாதீ³ஸு
விபா⁴வனியங் பன
‘‘இத்தி²யோபி பன அரியாவா அனரியாவா அட்ட²ஸமாபத்திலா பி⁴னியோ ப்³ரஹ்மபாரிஸஜ்ஜேஸுயேவ நிப்³ப³த்தந்தீதி அட்ட²கதா²யங் வுத்த’’ந்தி வுத்தங்.
தத்த² ப்³ரஹ்மபாரிஸஜ்ஜேஸுயேவாதி அகனிட்டே² நிப்³ப³த்தமானாபி ப்³ரஹ்மானங் பரிசாரிக ப்³ரஹ்மேஸுஏவ நிப்³ப³த்தந்தி. ந மஹாப்³ரஹ்மேஸூதி அத்தோ² த³ட்ட²ப்³போ³.
மணிமஞ்ஜூஸாயங் பன
ப்³ரஹ்மபாரிஸஜ்ஜேஸுயேவ நிப்³ப³த்தந்தி, ந ப்³ரஹ்மபுரோஹிதாதீ³ஸூதி வுத்தங். தங் ந க³ஹேதப்³ப³ங்.
யஞ்ச தத்த²
ஸாமாவதியாதீ³னங் பத²மங் ப்³ரஹ்மபாரிஸஜ்ஜேஸு நிப்³ப³த்தனங் வுத்தங். தங்பி அட்ட²கதா²ய ந ஸமேதி.
யஸ்மா பன தா இமஸ்மிங் அத்தபா⁴வே அரியப²லானி ஸச்சா²கங்ஸு. தஸ்மா தத்த² அனாகா³மினியோ ஸுத்³தா⁴வாஸேஸு உப்பன்னா. இதரா காசி தாவதிங்ஸேஸு காசி பரனிம்மிதவஸவத்தீஸு உப்பன்னா இச்சேவ உதா³னட்ட²கதா²யங் வுத்தந்தி. அபிசெத்த² வேஹப்ப²லே அகனிட்டே² சதுத்தா²ருப்பேதி தீஸு ப⁴வக்³கே³ஸு நிப்³ப³த்தா அரியா அஞ்ஞத்த² நுப்பஜ்ஜந்தி. ஸேஸப்³ரஹ்மலோகேஸு நிப்³ப³த்தா ஹெட்டா²பூ⁴மீஸு நுப்பஜ்ஜந்தீதி. [கம்மசதுக்கங்].
155. ஆயுக்க²யேன மரணங் கம்மக்க²யேன மரணந்திஆதி³னா யோஜேதப்³ப³ங். தத்த² அபரிக்கீ²ணேயேவ கம்மானுபா⁴வே தஸ்மிங் தஸ்மிங் ஆயுக்க²ய மரணங்னாம. தஸ்மிங் தஸ்மிங் ப⁴வே து³ப்³ப³லேன கம்மேன நிப்³ப³த்தஸ்ஸ ஸத்தஸ்ஸ அபரிக்கீ²ணேயேவ ஆயுபரிமாணே கேவலங் கம்மஸத்திபரிக்க²யேன அந்தராவ மரணங் கம்மக்க²ய மரணங்னாம. தது³ப⁴யஸ்ஸ ஸமங் பரிக்க²யேன மரணங் உப⁴யக்க²ய மரணங்னாம. த⁴ரமானேபி தது³ப⁴யே புரிமப⁴வேஸுவா இமஸ்மிங்வாப⁴வே கதேன உபகா⁴தககம்மேன அஜ்ஜ²த்தப³ஹித்³தா⁴பூ⁴தே நானாரோகா³பா³த⁴ பத²வீபவேஸ அஸனிபாதாதி³கே ஜீவிதந்தராயே ஸமுட்டா²பெத்வா து³ஸ்ஸிமாரகலாபு³ராஜாதீ³னங்விய அந்தராவ உபரோதி⁴த க²ந்த⁴ஸந்தானஸ்ஸ ஸத்தஸ்ஸ மரணங் உபச்சே²த³க மரணங்னாம. நனு செத்த² மரந்தானங் நாம ஸப்³பே³ஸங்பி தங்தங்ப⁴வங் ஜனெந்தங் கம்மங் கி²ய்யதியேவ. அத²கஸ்மா இதரேபி வுத்தாதி. வுச்சதே, ஸரஸவஸேனேவ ஹி கம்மஸாமத்தி²யஸ்ஸ க²யோ இத⁴ கம்மக்க²யோதி அதி⁴ப்பேதோ. யே பன த³ஸவஸ்ஸ வீஸதிவஸ்ஸ யாவ அஸங்க்²யெய்ய வஸ்ஸாதி³ வஸேன நானாஆயுகப்பவிதா⁴யகா தஸ்மிங் தஸ்மிங் ஸத்தனிகாயே ஸப்³ப³ஜன ஸாதா⁴ரணா ஸத்தானங் அஜ்ஜ²த்தப³ஹித்³த⁴ஸம்பூ⁴தா உதுஆஹாரானாம ஹொந்தி. தே தஸ்ஸ தஸ்ஸ ஆயுகப்பஸ்ஸ டி²திகரா வுத்³தி⁴கரா ஹானிகராசாதி திவிதா⁴ ஹொந்தி. தத்த² அகுஸலமூலேஸு வட்³ட⁴மானேஸு ஹானிகரா வட்³ட⁴ந்தி. குஸலமூலேஸு வட்³ட⁴மானேஸு பு³த்³தி⁴கரா வட்³ட⁴ந்தி. உப⁴யமூலேஸு ஸமங் டி²தேஸு டி²திகரா ஸமங் பவத்தந்தி. தேஸங் வஸேன ஸத்தானங் ஆயுகப்போ கத்த²சி ஸதா³ டி²திபா⁴கோ³ ஹோதி. கத்த²சி கதா³சி ஹானிபா⁴கோ³ கதா³சி வுத்³தி⁴பா⁴கோ³ ஹோதி. தயோபி சேதே டி²திகராத³யோ தங்தங்ஸத்தனிகாயங் அஜ்ஜொ²த்த²ரமானா ஆயுங் பரிச்சி²ந்த³ந்தா பவத்தந்தீதி அஸங்க்²யெய்யாயுக ஸங்வத்தனிகங் சக்கவத்திஸம்பத்தி ஸங்வத்தனிகஞ்ச கம்மங் த³ஸவஸ்ஸிகே காலே விபச்சமானங் தத³னுரூபங்ஏவ போ⁴க³ஞ்ச இஸ்ஸரியஞ்ச த³த்வா த³ஸவஸேன கி²ய்யதி. தங் தங் ஸத்தனிகாய பரியாபன்னா ஸத்தா ஸந்தானபூ⁴தா ரூபத⁴ம்மா ஸப்³ப³ஞ்ஞு பு³த்³தா⁴னங் க²ந்த⁴ஸந்தான பூ⁴தாபி தக்³க³திகா தத³னூவத்திகா ஏவ ஹுத்வா பரிணமந்தி அஞ்ஞத்ர இத்³தி⁴மய விஜ்ஜாமய ரஸாயனவிதி⁴ ஜீவித ஸங்கா²ர விதூ³ஹீதி. வுத்தஞ்ஹேதங் மஹாபதா³னஸுத்தட்ட²கதா²யங் –
ஸப்³பே³பி
தஸ்மா பதா⁴னநிஸ்ஸயபூ⁴தேஸு த்³விஸமுட்டா²னிக ரூபத⁴ம்மேஸு தங் தங் ஆயுகப்பவஸேன பரிணமந்தேஸு ஜிய்யமானேஸு யாவமஹந்தங்பி கம்மங் அத்தனோ விபாகாதி⁴ட்டா²னஸ்ஸ அபா⁴வா கி²ய்யதியேவ. ஸோசஸ்ஸ க²யோ ந ஸரஸேன ஹோதி. அத²கோ² ஆயுஸங்கா²ரவிபத்தியா ஏவ ஹோதீதி இத⁴ ஆயுக்க²யோ விஸுங் க³ஹிதோதி. ஏஸனயோ உபச்சே²த³கமரணேபி நேதப்³போ³. தத்த² உபச்சே²த³கமரணந்தி அகாலமரணங் வுச்சதி. தஞ்ஹிபவத்தமானங் உபச்சே²த³ககம்முனாவா பவத்ததி. அஞ்ஞேஹிவா அனேக ஸஹஸ்ஸேஹி காரணேஹி. தானி பன பாளியங் மூலபே⁴த³தோ ஸங்கி²பித்வா அட்ட²தா⁴ வுத்தானி. கதமானி பன தானீதி. அத்தி² வாதஸமுட்டா²னா ஆபா³தா⁴. அத்தி² வித்தஸமுட்டா²னா. அத்தி² ஸெம்ஹ ஸமுட்டா²னா. அத்தி² ஸன்னிபாதிகா. அத்தி² உதுஸமுட்டா²னா. அத்தி² விஸமபரிஹாரஜா. அத்தி² ஓபக்கமிகா. அத்தி² கம்மவிபாகஜா ஆபா³தா⁴தி. தத்த² கம்மவிபாகஜா கேசி உபபீளககம்மஜாகேசி உபச்சே²த³ககம்மஜா. யஸ்மா பன வாதோ குப்பமானோ ஸீதுண்ஹாதீ³ஹி த³ஸஹி காரணேஹி குப்பதி. தேஸுச ஏகமேவ கம்ம விபாகஜங் ஹோதி. ஸேஸானி பன அகம்மவிபாகஜானீதி மிலிந்த³ பஞ்ஹே வுத்தங். யஸ்மாச கம்மவிபாகஜாபி ஆபா³தா⁴ உப்பஜ்ஜமானா வாத குப்பனாதீ³ஹி வினா ந உப்பஜ்ஜந்தி. தஸ்மா கேசி வாதஸமுட்டா²னாத³யோபி கம்மவிபாகஜா ஹொந்தியேவாதி த³ட்ட²ப்³பா³.
தத்த² ஸன்னிபாதிகாதி வாதாதீ³னங் த்³வின்னங் திண்ணங்வா ஸன்னிபதிதானங் வஸேன பவத்தா. யே பன லோகே ஸத்தானங் பயோக³முத்தா ஸயங் ஜாதா நானாப⁴யுபத்³த³வா. தே உதுஸமுட்டா²னேஸு ஸங்க³ஹிதாதி த³ட்ட²ப்³பா³. விஸமபரிஹாரஜாதி அனிஸம்மகாரீனங் அனேகவிதே⁴ விஸமே விபத்திமுகே² அத்தானங் பயோஜந்தானங் ததோ ததோவா தத்த² தத்த² வா பதன பக்க²லனாதி³வஸேன பவத்தா. ஓபக்கமிகாதி அத்தனாவா பரேஹி ராஜசோரவேரீஹிவா அமனுஸ்ஸவாளயக்க²தே³வதாஹிவா வாளமிகா³தீ³ஹிவா கதானங் பயோகா³னங் வஸேன பவத்தா. குப்பிதா ஹி தே³வதா
யதா² சதுமஹாபதே² த²பிதே லக்க²ம்ஹி ஸப்³ப³தி³ஸாஹி ஆக³தா ஸரஸத்திதோமரபாஸாணாத³யோ நிபதந்தி. ஏவங் காயேபி ஸப்³பு³பத்³த³வா நிபதந்தீதி.
யேஸுச ரஜ்ஜரட்டா²தீ³ஸு தே உப்பஜ்ஜந்தி. தத்த² யேஜனா உபாய குஸலாவா ந ஹொந்தி. நச படிகாரகுஸலா. நாபி பரிஹார குஸலா. கம்மஞ்ச யேஸங் து³ப்³ப³லங் ஹோதி. உப்பன்னோ அனத்தோ² ப³ல வா. தேஜனா
ஆயுனாமேதங் அப³லங் து³ப்³ப³லங். ததா² ஹி ஸத்தானங் ஜீவிதங் அஸ்ஸாஸபஸ்ஸாஸுபனிப³ந்த⁴ஞ்சேவ இரியாபது²பனிப³ந்த⁴ஞ்ச ஸீதுண்ஹு பனிப³ந்த⁴ஞ்ச மஹாபூ⁴துபனிப³ந்த⁴ஞ்ச ஆஹாருபனிப³ந்த⁴ஞ்சாதிஆதி³.
ததா² காயப³ஹுஸாதா⁴ரணதோ அனிமித்ததோதி இமேஸங் பதா³னங் நித்³தே³ஸேனபி பாகடோயேவ. கம்மனிப்³ப³த்தஸ்ஸ ஹி ஆயுனோ திணக்³கே³ உஸ்ஸாவபி³ந்து³ஸ்ஸேவ பரிது³ப்³ப³லபா⁴வே பாளியங் அட்ட²கதா² யஞ்ச வுத்தே கம்மஸாபி ததே²வ பரிது³ப்³ப³லதா ஸித்³தா⁴ ஹோதீதி. ஏவஞ்சேதங் ஸம்படிச்சி²தப்³ப³ங். இதரதா² ஸப்³ப³ங் புப்³பே³கதஹேதுதி³ட்டி²னாம ஸியா. யதா²ஹ –
இதே⁴கச்சோ ஸமணோவா ப்³ராஹ்மணோவா ஏவங்வாதீ³ ஹோதி ஏவங் தி³ட்டீ². யங் கிஞ்சாயங்புரிஸபுக்³க³லோ படிஸங்வேதே³தி ஸுக²ங்வா து³க்க²ங்வா அது³க்க²மஸுக²ங்வா. ஸப்³ப³ங் தங் புப்³பே³கதஹேதூதி.
அயஞ்ச அத்தோ² மிலிந்த³பஞ்ஹே தீஸு டா²னேஸு வித்தா²ரதோ ஆக³தோ. யதா²வுத்தேஹி பன அனேகஸஹஸ்ஸேஹி காரணேஹி பவத்தமரணங்பி அகாலமரணதாஸாமஞ்ஞேன இத⁴ உபச்சே²த³கமரணே ஸங்க³ஹிதந்தி த³ட்ட²ப்³ப³ங்.
விபா⁴வனியங்
‘‘இத³ங் பன நேரயிகானங் உத்தரகுருவாஸினங் கேஸஞ்சி தே³வானஞ்ச நஹோதீதி’’ வுத்தங்.
யதா² ததா²சாதி தேஹி பகாரேஹிச. மரந்தானங் ச²ன்னங் த்³வாரானங் அஞ்ஞதரஸ்மிங் பச்சுபட்டா²தீதி ஸம்ப³ந்தோ⁴. மரணகாலேதி மரணாஸன்னகாலே. யதா²ரஹந்தி ஸுக³திது³க்³க³திகா³மீனங் அரஹானுரூபங். யேபன கீ²ணாஸவா கத்த²சி நுப்பஜ்ஜந்தி. தேஸு ஸுக்க²விபஸ்ஸகானங் பகதியா யதோ² பட்டி²தங் நாமரூப மேவ அந்திம ஜவனானங் ஆரம்மணங்ஹோதி. ஸமாபத்திலாபீ⁴னங் பன ஜா²னஸமனந்தரே பரினிப்³பா³யந்தானங் கஸிணனிமித்தாதி³கங். பச்சவெக்க²னஸமனந்தரே பரினிப்³பா³யந்தானங் ஜா²னங்கா³னி அபி⁴ஞ்ஞாஸமனந்தரே பரினிப்³பா³யந்தானங் அத்தனோ கரஜரூபங். ஜீவித ஸமஸீஸீனங் பன அக்³க³மக்³க³ஸ்ஸ பச்சவெக்க²னஸமனந்தரே பரினிப்³பா³யந்தானங் மக்³க³ங்கா³தி³னி அந்திமஜவனானங் ஆரம்மணங் ஹோதீதி. பரினிப்³பா³னசுதிசித்தஸ்ஸ பன ஸப்³பே³ஸங்பி ஆதி³தோ அத்தனோ அத்தனோ படிஸந்தி⁴யாயதா²க³ஹிதங் கம்மாதீ³ஸு அஞ்ஞதரமேவ ஆரம்மணங் ஹோதீதி த³ட்ட²ப்³ப³ங். யேபன அனேஜோஸந்தி மாரப்³ப⁴யங் காலமகரீமுனீதி இமங் ஸுத்தபத³ங் தி³ஸ்வா நிப்³பா³னமேவ ப⁴க³வதோ பரினிப்³பா³னசுதியா ஆரம்மணந்தி வத³ந்தி. தே தேன ஸயமேவ அபி⁴த⁴ம்மே ஆரம்மணத்திகேஸு அத்தனோ அகோவித³தங் த³ஸ்ஸெந்தி. யதா²ஹ –
கதமே
யஸ்மா பன பரினிப்³பா³னங்னாம ஸந்தி அத்தா²யேவ ஹோதி. அஜ்ஜா²ஸயோ சஸ்ஸ ஏகந்தேன ஸந்தினின்னோயேவ ஹோதி. தஸ்மா அனேஜோஸந்தி மாரப்³பா⁴தி ஸுத்தபத³ங் வுத்தங். ததா² ஹி அட்ட²கதா²யங் ஸந்திமாரப்³பா⁴தி அனுபாதி³ஸேஸங் நிப்³பா³னங் ஆரப்³ப⁴ படிச்ச ஸந்தா⁴யாதி வுத்தங். ந பன வுத்தங் ஆரப்³ப⁴ ஆலம்பி³த்வா ஆரம்மணங் கத்வாதி. தே²ரகா³த²ட்ட²கதா²யங் பன ஸந்திமாரப்³பா⁴தி ஸந்திங் அனுபாதி³ஸேஸங் நிப்³பா³னங் ஆரம்மணங் கத்வாதி வுத்தங். தங் மஹாபரினிப்³பா³னபாளியா தத³ட்ட²கதா²யச நஸமேதி. தாஸு ஹி ப⁴க³வதோ பரினிப்³பா³னங் ஜா²னங்க³ பச்சவெக்க²னஸமனந்தரந்தி வுத்தங். எத்த²ச புரிமானி த்³வே ஸமனந்தரானி பரினிப்³பா³னஸுத்தட்ட²கதா²ஸு வுத்தானி. அபி⁴ஞ்ஞாஸமனந்தரங் உதா³னட்ட²கதா²தி³ஸு ஆக³தங். யதா²ஹ-வுட்ட²ஹித்வா பரினிப்³பா³யீதி இத்³தி⁴சித்ததோ வுட்ட²ஹித்வா ப⁴வங்க³சித்தேன பரினிப்³பா³யீதி. அக்³க³மக்³க³ஸ்ஸ பச்சவெக்க²னஸமனந்தரங் புக்³க³லபஞ்ஞத்திட்ட²கதா²தீ³ஸு ஆக³தங். யதா²ஹ-ஏகூனவீஸதி மே பச்சவெக்க²னஞ்ஞாணே பதிட்டா²ய ப⁴வங்க³ங் ஓதரித்வா பரினிப்³பா³யதீதி. ஸங்யுத்தட்ட²கதா²யங் பன அரஹத்தமக்³கா³னந்தரங் ப²லங். ப²லானந்தரங் ப⁴வங்க³தோ வுட்டா²ய பச்சவெக்க²னங். தங் பன பரிபுண்ணங்வா ஹோதி அபரிபுண்ணங்வா. திகி²ணேன அஸினா ஸீஸே சி²ஜ்ஜமானேபி ஏகங்வா த்³வேவா பச்சவெக்க²னானி உப்பஜ்ஜந்தியேவாதி வுத்தங்.
[164] விபா⁴வனியங் பன
ஏவங் வவத்தா²னங் அகத்வா யங் வுத்தங். ‘‘கத்த²சி பன அனுப்பஜ்ஜமானஸ்ஸ கீ²ணாஸவஸ்ஸ யதோ²பட்டி²தங் நாமரூபத⁴ம்மாதி³கமேவ சுதிபரியோஸானானங் கோ³சரபா⁴வங் க³ச்ச²தி. ந கம்ம கம்மனி மித்தாத³யோதி.’’ தங் ந ஸுந்த³ரங்.
ந ஹி தஸ்ஸ சுதிசித்தங் கம்மகம்மனிமித்தாத³யோ ஆரம்மணங் நகரோதி. நச சுதியா க³ஹிதானி கம்மாதீ³னினாம ஸப்³ப³ஸத்தானங்பி ப⁴வந்தரஸ்ஸ அத்தா²ய ப⁴வந்தீதி. அபி⁴முகீ²பூ⁴தந்தி கம்மந்தரஸ்ஸ ஓகாஸங் அத³த்வா அத்தனோ ஓகாஸங் கத்வா பச்சுபட்டி²தங். கம்மங்வா பச்சுபட்டா²தீதி உபலத்³த⁴புப்³ப³ந்தி தஸ்ஸ கம்மஸ்ஸ ஆரம்மண பூ⁴தானி தெ³ய்யத⁴ம்ம வத்தா²தீ³னி பரபாணாதீ³னிச ஸந்தா⁴ய வுத்தங். உபகரணபூ⁴தந்தி கம்மஸித்³தி⁴யா உபகரணபூ⁴தானி பரிவாரபூ⁴தானிச படிக்³கா³ஹகாதீ³னி ஆவுத⁴ப⁴ண்டா³தி³னிச ஸந்தா⁴ய வுத்தங். யஸ்மாச லக்க²ண ஸங்யுத்தே க³வாதீ³னி வதி⁴த்வா ராஸிகதானி அட்டி²புஞ்ஜாதீ³னி கம்மனிமித்தானி ஹுத்வா உபட்ட²ஹந்தீதி அட்ட²கதா²யங் வுத்தங். தஸ்மா கம்மஸம்ப³ந்தா⁴னி யானி கானிசி வத்தூ²னி வா ஆரம்மணானிவா இத⁴ உபகரணே ஸங்க³ஹி தானீதி த³ட்ட²ப்³பா³னி. உபலபி⁴தப்³ப³ந்தி து³க்³க³தினிமித்தங் ஸந்தா⁴ய வுத்தங். உபபோ⁴க³பூ⁴தந்தி ஸுக³தினிமித்தங். உப⁴யங்பி வா யங் காயபடிப³த்³த⁴ங் ஹுத்வா லபி⁴தப்³ப³ங் ஹோதி. தங் உபலபி⁴தப்³ப³ங்னாம. அபடிப³த்³த⁴ங் ஹுத்வா கேவலங் ஸுக²து³க்கா²னுப⁴வனத்தா²ய லபி⁴தப்³ப³ங் உபபோ⁴க³ பூ⁴தங்னாம. எத்த²ச அக்³கி³ஜால லோஹகும்பி⁴ நிரயபால நிரயஸுனகா²தீ³னி நிரயனிமித்தங். தங் பன கேஸஞ்சி ஜனானங் அத்தனோ வஸனட்டா²னேவிய உபட்டா²தி. கேஸஞ்சி ததோ ததோ ஆக³ந்த்வா அத்தானங் ஸங்பரிவாரெந்தங் விய உபட்டா²தி. யதா²ஹ-தஸ்ஸ கி³லானஸெய்யாய நிப்பன்னஸ்ஸ நிரயோ உபட்டா²தி. ஸோணகி³ரிபாத³தோ மஹந்தா மஹந்தா ஸுனகா² ஆக³ந்த்வா கா²தி³துகாமாவிய ஸங்பரிவாரேஸுந்தி. ததா² தே³வ நிமித்தேபி. யதா²ஹ-நந்த³வன சித்தலதாவன மிஸ்ஸகவன பா²ருஸகவன விமானானிசேவ தே³வனாடகானிச பரிவாரெத்வா டி²தானிவிய அஹேஸுந்தி. கேஸஞ்சி பன ஸயங் தத்த² தத்த² பத்வா தி³ட்ட²ங்விய உபட்டா²தி. கம்ப³லயானஸதி³ஸோ மாதுகுச்சி²வண்ணோ மனுஸ்ஸனிமித்தங். பப்³ப³தபாத³ வனஸண்ட³ நரகபபாதாதீ³னி திரச்சா²னக³தானங் நிமித்தானீதி. கம்மப³லேனாதி இதா³னி படிஸந்தி⁴ங் ஜனேதுங் பச்சுபட்டி²தஸ்ஸ கம்மஸ்ஸ ஆனுபா⁴வேன. இத³ஞ்ச யேபு⁴ய்யவஸேன வுத்தங். பகதியா பன ஆசிண்ண பூ⁴தங்வா தங்க²ணகதங்வா பரேன ஸராபிதங்வா ஸயமேவ அனுஸ்ஸரிதங்வா பகதியாவ குக்குச்சங்வா ஸோமனஸ்ஸங்வா ஜனெத்வா டி²தங்வா கம்மங்வா தஸ்ஸனிமித்தங்வா அஞ்ஞேனபி காரணப³லேன பச்சுபட்டா²தியே வாதி த³ட்ட²ப்³ப³ங். தமேவ ததோபட்டி²தங் ஆரம்மணங் ஆரப்³பா⁴தி இத³ஞ்ச யேபு⁴ய்யவஸேன வுத்தங். ததோ ஹி கேஸஞ்சி பத²மங் கம்மப³லேனவா காரணந்தரேனவா பாபபக்கி²யேஸு உபட்ட²ஹந்தேஸு புன து³ட்ட² கா³மணி ரஞ்ஞோ விபச்சமானக கம்மானுரூபந்தி யஸ்ஸ விபச்சமானகங் கம்மங் குஸலங் ஹோதி. தஸ்ஸ பரிஸுத்³த⁴ங் குஸலசித்தஸந்தானங் அபி⁴ண்ஹங் பவத்ததி. யஸ்ஸ தங் அகுஸலங் ஹோதி. தஸ்ஸ உபகிலிட்ட²ங் அகுஸல சித்தஸந்தானங் அபி⁴ண்ஹங் பவத்ததீதி அத்தோ². ததா² ஹி அட்ட²கதா²யங்பி ஸுக³திகா³மீனங் குஸலுப்பத்தி ஹேதுபூ⁴தங் பணீதங் ஆரம்மணங் ஆபாதமாக³ச்ச²தீதிச து³க்³க³திகா³மீனங் அகுஸலுப்பத்தி ஹேதுபூ⁴தங் ஹீனாரம்மணங் ஆபாத மாக³ச்ச²தீ திச வுத்தங். மூலடீகாயங் மஹாடீகாயஞ்ச ஆஸன்னே அகுஸலங் து³க்³க³தியங் குஸலஞ்ச ஸுக³தியங் படிஸந்தி⁴யா உபனிஸ்ஸயோ ஹோதீதி வுத்தங். எத்த² ஸியா, யதா³ தே³வச்ச²ராதீ³னி ஸக்³க³னிமித்தானி உபட்ட²ஹந்தி. ததா³ தானி தண்ஹாய அஸ்ஸாதெ³ந்தஸ்ஸேவ ஸதோ சவந்தஸ்ஸ கத²ந்தி. வுச்சதே. உபகிலிட்ட²ங்யேவ தஸ்ஸ சித்தங். தஸ்மா து³க்³க³திஏவ தஸ்ஸ பாடிகங்கி²தப்³பா³தி வத³ந்தி. யஸ்மா பன படிஸம்பி⁴தா³ மக்³கே³ தாதி³ஸியா தண்ஹாய குஸலகம்மஸ்ஸ ஸஹகாரி காரண பா⁴வோ வுத்தோ. யதா²ஹ-நிகந்திக்க²ணே த்³வே ஹேதூ அகுஸலாதி. தஸ்மா ஸுக³திப⁴வனிப்³ப³த்தனேபி அயங் தண்ஹா ஏகந்தேன குஸல கம்மஸ்ஸ நியாமகஸஹகாரிபச்சயபூ⁴தாதி கத்வா தஸ்ஸ தானிவா தே³வச்ச²ராதீ³னி குஸலகம்ம கம்மனிமித்தானிவா அஸ்ஸாதெ³ந்தஸ்ஸேவ ஸதோ சவந்தஸ்ஸ ஸாதண்ஹா தது³பத்த²ம்பி⁴காஏவ ப⁴விதுங் அரஹதி. ந தங் படிபா³ஹிகாதி ஸக்கா விஞ்ஞாதுங். யஞ்ச நிமித்தஸ்ஸாத³க³தி⁴தங்வா பி⁴க்க²வே விஞ்ஞாணங் திட்ட²மானங் திட்ட²தி, அனுப்³யஞ்ஜனஸ்ஸாத³க³தி⁴தங் வா. தஸ்மிங் சே பி⁴க்க²வே ஸமயே காலங்கரெய்ய, டா²னமேதங் விஜ்ஜதி. யங் த்³வின்னங்க³தீனங் அஞ்ஞதரக³திங் க³ச்செ²ய்ய, நிரயங்வா திரச்சா²ன யோனிங்வாதிஆதி³த்தபரியாயே வுத்தங். தங்பி அத்தனோ பரேஸங் வா ஹத்த²பாதா³தீ³ஸு க³தி⁴தங் தண்ஹங் ஸந்தா⁴ய வுத்தங். நகம்மாதீ³ஸூதி ஸக்கா வத்துந்தி. உபலபி⁴தப்³ப³ ப⁴வானுரூபந்தி உபலபி⁴தப்³போ³ ப⁴வோ யதி³ ஸுக³திப⁴வோ ஹோதி, தங் அஸ்ஸாத³னாகாரேன. யதி³ து³க்³க³திப⁴வோ ஹோதி, தங் அனஸ்ஸாத³னாகாரேனாதி ஏவங் உபலபி⁴ தப்³ப³ஸ்ஸ ப⁴வஸ்ஸ அனுரூபங். தத்தோ²ணதங்வாதி தஸ்மிங் யதோ² பட்டி²தே ஆரம்மணே ஓணமந்தங்ஏவ. ததா² ஹி பா³லபண்டி³தஸுத்தே தானிஸ்ஸ தஸ்மிங் ஸமயே ஓலம்ப³ந்தி அஜ்ஜோ²லம்ப³ந்தி அபி⁴ப்பலம்ப³ந்தீதி வுத்தங். தத்த² தானிஸ்ஸாதி அஸ்ஸ புக்³க³லஸ்ஸ தானி புஞ்ஞாபுஞ்ஞ கம்மானி. கம்மஸீஸேன வுத்தானி கம்மனிமித்த க³தினிமித்தானிச. ஓலம்ப³ந்தீதி தஸ்ஸ சித்தஸந்தானங் அத்தனிஏவ ஓணமந்தங் அஜ்ஜோ²ணமந்தங் அபி⁴முகீ²பூ⁴தங் கத்வா லம்ப³ந்தி பலம்ப³ந்தி. ப³ந்தி⁴த்வா ஆகட்³ட⁴ந்தானி விய உபட்ட²ஹந்தீதி அத்தோ². ஏவங் பன தேஸு ததா² ஓலம்ப³ந்தேஸு தங்சித்தஸந்தானங் தேஸு நின்னபோணபப்³பா⁴ரமேவ ஹோதீதி வுத்தங் தத்தோ²ணதங்வாதி. ததா² ஹி அட்ட²கதா²யங் கிலேஸப³லவினாமிதங் ஸுத்வா ததே³வங் பவத்தமானங் தண்ஹாஅவிஜ்ஜானங் அப்பஹீனத்தா அவிஜ்ஜாய படிச்சா² தி³தாதீ³னவே தஸ்மிங் விஸயே தண்ஹா நாமேதி ஸஹஜாத ஸங்கா²ரா கி²பந்தீதி வுத்தங். தத்த² தந்தி விஞ்ஞாணங். சித்தஸந்தானங் இச்சேவ அத்தோ². தஸ்மிங்விஸயேதி கம்மாதி³ஆரம்மணே. தண்ஹானாமேதீதி வட்டமூலக தண்ஹா தங் தஸ்மிங் ஓணமந்தங் கத்வா நியோஜேதீதி அத்தோ².
[165] விபா⁴வனியங் பன
‘‘தத்தோ²ணதங்வாதி தஸ்மிங் உபபஜ்ஜிதப்³ப³ப⁴வே ஓணதங் விய ஓணதங்ஏவ வா’’தி வுத்தங். தங் அட்ட²கதா²ய ந ஸமேதி.
அபி⁴ண்ஹந்தி நிரந்தரங். ததா²பவத்தி பன ஸணிகங் மரந்தானங் ஏவ லப்³ப⁴தி. லஹுக மரணேன மரந்தானங் பன ந லப்³ப⁴தீதி வுத்தங். பா³ஹுல்லேனாதி
[166] யங் பன விபா⁴வனியங்
‘‘பா³ஹுல்லேனாதிஎத்த² அதி⁴ப்பாயோ யேபு⁴ய்யேன ப⁴வந்தரேதி எத்த² வுத்தனயேன த³ட்ட²ப்³போ³’’தி வுத்தங். தங் ந யுஜ்ஜதி.
ந ஹி தஸ்மிங் வுத்தானங் அஸஞ்ஞிஸத்தானங் சித்தஸந்தானஸ்ஸ அபி⁴ண்ஹப்பக³த்திபஸங்கோ³னாம அத்தி². சித்தஸந்தானஸ்ஸேவ தேஸங் அபா⁴வதோதி. இதா³னி தமேவவா பன.ல. த்³வாரபத்தங் ஹோதீதி வுத்தங். தத்த² அபி⁴னவகரணவஸேன த்³வாரப்பத்தங் ஹோதீதி புப்³பே³ கதஸஞ்ஞங் அஜனெத்வா தங்க²ணே ஏவ கரணாகாரங் ஜனெத்வா அத்தானங் அபி⁴னவங் விய கத்வா மனொத்³வாரே தங்ஸதி³ஸஜவனப்பவத்திவஸேன பத்தங் பாதுபூ⁴தங் ஹோதீதி அத்தோ². யதா² ஹி இமஸ்மிங்ப⁴வேபவத்தங் கிஞ்சி பாகடங் கம்மங் அஸுகஸ்மிங் காலே இத³ங்னாமமயாகதந்தி ஏவங் புப்³பே³கதஸஞ்ஞங் ஜனெத்வாபி உபட்டா²தி. ந ததா² ப⁴வந்தரே பவத்தங் ப⁴வபடிச்ச²ன்னங்ஞ்ச இமஸ்மிங் ப⁴வே பவத்தங் அபாகடஞ்சாதி. அபிச, இதே⁴கச்சே பு³த்³தா⁴தீ³ஸு தீஸு வத்து²ஸு தா³னபூஜாதி³வஸேன ஆசிண்ணப³ஹுலா ஹொந்தி. தே மரணந்தி காபா³த⁴ப³லேன விஸீத³ப்பத்தா கிஞ்சி து³க்க²ங்அஜானித்வா விஸீத³ந்தரே புப்³பே³ விய பி⁴க்கு²ஸங்க⁴ஸ்ஸ தா³னங் தெ³ந்தாசேதியங் வந்த³ந்தா பூஜங் கரொந்தா விப்பஸன்னசித்தா பமோத³சித்தா ஏவ ஹொந்தி. தப்³பி³பரீதேன பாபகம்மப³ஹுலாபி வத்தப்³பா³தி. இத³ங்பி த்³வாரபத்தமேவாதி. ஸப்³ப³ஞ்சேதங் லக்க²ண ஸங்யுத்தட்ட²கதா²ய தீ³பேதப்³ப³ங். தத்த² அஸிலோமபேதாதி³ பத்தூ²ஸு தஸ்ஸ உக்கி²த்தாஸிகபா⁴வோவ நிமித்தங் அஹோஸீதி ச. தஸ்ஸ ஸத்தியா விஜ்ஜ²னக பா⁴வோவ நிமித்தங் அஹோஸீதிச. தஸ்ஸ உஸுனா விஜ்ஜ²னகபா⁴வோவ நிமித்தங் அஹோஸீதிச. தஸ்ஸ பதோத³ஸூசியா விஜ்ஜ²னகபா⁴வோவ நிமித்தங் அஹோஸீதிச. தஸ்ஸ ஸூசீஹி பதோத³னது³க்க²ங் பச்சனுப⁴விதுங் கம்மமேவ நிமித்தங் கத்வா ஸூசிலோமபேதோ ஜாதோதிச ஏவங் ப³ஹுங்த்³வார பத்தவஸேன கம்முபட்டா²னங் வுத்தந்தி. தத்த² ஹி தஸ்ஸ உக்கி²த்தாஸிக பா⁴வோவ நிமித்தங் அஹோஸீதி தஸ்ஸ நிரயே பசித்வா புன ஆஸன்ன மரணஸ்ஸ தங்கம்மங் ததா³ தஸ்ஸ உக்கி²த்தாஸிகஸஞ்ஞங் ஜனெத்வா த்³வார பத்தவஸேன நிமித்தங் அஹோஸீதி அத்தோ². ஏஸனயோ ஸேஸேஸுபீதி. ஸோச த்³வாரப்பத்தாகாரோ கம்மகொட்டா²ஸிகோ ஏவ ஹோதி. தஸ்ஸ ஸத்தஸ்ஸச அபாகடோனாம நத்தீ²தி தஸ்ஸ படிஸந்தி⁴யா க³ஹணயொக்³யதா ஜாதாதி. பச்சாஸன்ன மரணஸ்ஸாதி அந்திம ஜவனபவத்திவஸேன புன ஆஸன்னமரணஸ்ஸ. வீதி²சித்தா வஸானேவாதி காமப⁴வதோ சவித்வா காமப⁴வேயேவ உப்பஜ்ஜமானானங் ஜவன பரியோஸானானங்வா ததா³ரம்மண பரியோஸானானங்வா வீதி²சித்தானங் அவஸானே.
[167] விபா⁴வனியங் பன
‘‘தத்த² காமப⁴வதோ சவித்வா தத்தே²வ உப்பஜ்ஜமானானங் ததா³ரம்மணபரியோஸானானி ஸேஸானங் ஜவனபரியோஸானானீதி த⁴ம்மானுஸாரணியங் வுத்த’’ந்தி வுத்தங். தங் ந ஸுந்த³ரங்.
அட்ட²கதா²யஞ்ஹி பரிபுண்ணங் கத்வா வுத்தே கிங்அபரிபுண்ணாய த⁴ம்மா நுஸாரணியாதி. ப⁴வங்க³க்க²யேவாதி ப⁴வங்கா³வஸானேவா இச்சேவத்தோ². யதி³ து³வித⁴பீதி²சித்ததோ பரங் பஞ்சவோகாரே வத்து²ரூபங் சதுவோகாரே சித்தஸந்தானங் த்³விசித்தக்க²ணாயுஸேஸங் ஹோதி. ததா³ ஏகஸ்ஸ ப⁴வங்க³ஸ்ஸ அவஸானேதி வுத்தங் ஹோதி. எத்த²ச ஸோமனஸ்ஸ படிஸந்தி⁴கஸ்ஸ தோ³மனஸ்ஸசித்தேன சவந்தஸ்ஸ ஆக³ந்துகப⁴வங்க³ ஸம்ப⁴வோ. தங் ஸம்ப⁴வேச ஸதி அஞ்ஞப⁴வங்க³ஸம்ப⁴வோபி அவாரி தோதி ஸுவுத்தமேதங் ப⁴வங்க³க்க²யேவாதி. தஸ்மிங்னிருத்³தா⁴வஸானேதி தஸ்மிங் நிருத்³தே⁴ தஸ்ஸ நிருத்³த⁴ஸ்ஸ அவஸானே. யே பன லோகே சுதி படிஸந்தீ⁴னங் அந்தரே ஏகோ அந்தராப⁴வோனாம அத்தி². யத்த² உப்பன்னோ ஸத்தோ தி³ப்³ப³சக்கு²கோ விய இத்³தி⁴மா விய ச க²ணேன இச்சி²தங் டா²னங் க³ந்துங் ஸமத்தோ². இதோ சுதா கேசி தத்த² உப்பஜ்ஜித்வா மாதாபிது ஸமாக³மாதீ³னி ஆக³மெந்தா ஸத்தாஹங்வா அதிரேக ஸத்தாஹங்வா திட்ட²ந்தீதி லத்³தி⁴ங் க³ண்ஹந்தி. தேஸங் தங்னிஸேதே⁴துங் தஸ்ஸானந்தரமேவாதி வுத்தங். ஸவத்து²கங் பஞ்சவோகாரே அவத்து²கமேவவா சதுவோகாரே. யதா²ரஹந்தி குஸலபூ⁴தஸ்ஸவா அகுஸலபூ⁴தஸ்ஸ வா ஸங்கா²ரஸ்ஸ அரஹானுரூபங். அவிஜ்ஜாதண்ஹானுஸயா குஸலபூ⁴தஸ்ஸ அப்பஹீனட்டே²ன அகுஸலபூ⁴தஸ்ஸ பன ஸஹஜாதபா⁴வேனாபி பரிவாரபூ⁴தா மூலபூ⁴தாச ஹொந்தீதி அத்தோ². பரியுட்டா²னாவத்த²ங் அபத்வா குஸலாப்³யாகதசித்தஸந்தானேனபி அவிருத்³த⁴பா⁴வேன அனுரூபங். அனுப³ந்த⁴மானோவா ஸேதி, அனுஅனுவானிரந்தரங் ஸேதீதி அனுஸயோ. அனுஸயபூ⁴தாய அவிஜ்ஜானுஸயபரிக்கி²த்தோ. தண்ஹானுஸயோ மூலங் ஏதஸ்ஸாதி தண்ஹானுஸய மூலகோ. அவிஜ்ஜானுஸய மூலகேன தண்ஹானுஸய பரிக்கி²த்தேனாதி பன வுத்தே ஸுட்டு²தரங் யுஜ்ஜதி. அவிஜ்ஜா ஹி தண்ஹாயபி மூலபூ⁴தா ஹோதி. தாய படிச்சா²தி³தாதீ³னவே ஏவ ஆரம்மணே தண்ஹாபவத்திஸம்ப⁴வதோ. தண்ஹா ச பன ஸஹகாரி காரண பா⁴வேன தங் தங் ஸங்கா²ரங் நியோஜெந்தீ பவத்ததீதி ஸங்கா²ரஸ்ஸ பரிவாரபூ⁴தா ப³லவஆஸன்ன ஸஹாயபூ⁴தா ஹோதீதி.
எத்த²ச அகுஸலகம்ம ஸஹஜாதானங்வா கம்மனிகந்தி நிமித்தனிகந்தி ஸஹஜாதானங்வா விப்படிஸார ஸஹ ஜாதானங்வா மரணாஸன்ன ஜவன ஸஹஜாதானங்வா அவிஜ்ஜாதண்ஹானங்பி த⁴ம்மதோ அனுஸயஸதி³ஸதாய அனுஸய வோஹாரஸம்ப⁴வோ வேதி³தப்³போ³. அபிச, அனுஸயானாம படிஸந்தி⁴ஜனநே குஸலஸங்கா²ரஸ்ஸபி ப³லவஸஹாயபூ⁴தா ஹொந்தி. தஸ்மா இத⁴ ஏகந்தானுஸயபூ⁴தாஏவ பரியத்தாதி கிங்ஸஹஜாதானங் க³ஹணேனாதி. தேனேவ அட்ட²கதா²யங்பி தண்ஹா அவிஜ்ஜானங் அப்பஹீனத்தாதி ஏவங் அப்பஹீனஸத்³தே³ன ஏகந்தானுஸயாஏவ க³ஹிதாதி. ஸங்கா²ரேனாதி படிஸந்தி⁴ஜனககம்மஸங்கா²தேன சேதனாஸங்கா²ரேன. தங் ஸஹஜாதப²ஸ்ஸாதி³த⁴ம்மஸமூஹேனபிவா. ஸோபி ஹி உபனிஸ்ஸயபா⁴வே ந படிஸந்தி⁴ங் ஜனேதியேவாதி. அத²வா, ஸங்கா²ரேனாதி மரணஸன்ன ஜவனவிஞ்ஞாண ஸஹஜாதேன சேதனாஸங்கா²ரேன. தங் ஸஹஜாத ப²ஸ்ஸாதி³த⁴ம்மஸமூஹேனபிவா. தது³ப⁴யங்பி ஹி கம்மாதி³விஸயே கி²பனக ஸங்கா²ரபா⁴வேன படிஸந்தி⁴ங் ஜனேதீதி. ததா² ஹி அட்ட²கதா²யங் தண்ஹா அவிஜ்ஜானங் அப்பஹீனத்தா அவிஜ்ஜாய படிச்சா²தி³தாதீ³னவே தஸ்மிங் விஸயே தண்ஹா நாமேதி. ஸஹஜாதஸங்கா²ரா கி²பந்தீதி வுத்தங். மூலடீகாயஞ்ச ஸஹஜாதஸங்கா²ராதி சுதிஆஸன்னஜவனவிஞ்ஞாணஸஹஜாதா சேதனா. ஸப்³பே³பிவா ப²ஸ்ஸாத³யோதி வுத்தங். ஸகலேன பன வசனேன அக்³க³மக்³கே³ன அப்பஹீனா அவிஜ்ஜாகம்மாதி³விஸயேவா ப⁴வந்தரேவா ஆதீ³னவங் படிச்சா²தே³தி, ததா² ரூபாயேவ தண்ஹா தது³ப⁴யஸ்மிங் சித்தஸந்தானங் நாமேதி. யதா²வுத்தஸங்கா²ரா தங் தத்த² கி²பந்தி. தஸ்மிங் அபி⁴னவ விஞ்ஞாணபாதுபா⁴வங் ஸாதெ⁴ந்தீதி த³ஸ்ஸேதீதி.
ஸம்பயுத்தேஹி பரிக்³க³ய்ஹமானந்தி ப²ஸ்ஸாதீ³ஹி ஸம்பயுத்தத⁴ம்மேஹி பரிவாரெத்வா க³ய்ஹமானங். ஸஹஜாதானந்தி நாமரூபத⁴ம்மானங். அதி⁴ட்டா²ன பா⁴வேனாதி நிஸ்ஸயபா⁴வேன. புப்³ப³ங்க³மபூ⁴தந்தி பதா⁴னபூ⁴தங். பத³ த்³வயேன விஜானநதா⁴துயா அதிவிய மஹானுபா⁴வபா⁴வங் த³ஸ்ஸேதி. யதா² ஹி லோகே ஏகஸ்மிங் மஹானுபா⁴வே புரிஸவிஸேஸே ஜாயமானே பரிவாரபூ⁴தா ஸஹஜாதஜனாச தஸ்ஸ உபபோ⁴க³ பரிபோ⁴க³பூ⁴தா பாஸாத³கப்பருக்கா²த³யோவ தேன ஸஹ ஜாயந்தி. ஏவங் ஸம்பத³மித³ங் த³ட்ட²ப்³ப³ங். ப⁴வந்தரபடிஸந்தா⁴னவஸேனாதி ஏகஸ்மிங்ப⁴வே நிருத்³தே⁴ தேன ஸஹ நிரந்தரங் கத்வா ப⁴வந்தரஸ்ஸ படிஸந்த³ஹன வஸேன. உப்பஜ்ஜமானமேவ பதிட்டா²தி ந புரிமப⁴வே உப்பஜ்ஜித்வா அனிருஜ்ஜி²த்வா டி²திபா⁴வேன க³ந்த்வா ப⁴வந்தரே பதிட்டா²தீதி அதி⁴ப்பாயோ. ந ஹி உப்பன்னுப்பன்னா த⁴ம்மா பகதிகாலேபி தே³ஸந்தரங்வா க²ணந்தரங்வாஸங்கந்தா நாம அத்தி². குதோ மரணகாலே ப⁴வந்தரங். யஞ்ச அனமதக்³கோ³ யங் பி⁴க்க²வே ஸங்ஸாரோ. புப்³ப³கோடி நபஞ்ஞாயதி அவிஜ்ஜானீவரணானங் ஸத்தானங் தண்ஹாஸங்யோஜனானங் ஸந்தா⁴வதங் ஸங்ஸரதந்தி வுத்தங், தங்பி பரியாயேன வுத்தங். யேஸஞ்ஹி அவிஜ்ஜா தண்ஹாஸங்கா²ரானங் வஸேன ப⁴வந்தரே படிஸந்தி⁴ பாதுப⁴வதி. தேச புப்³பே³ யஸ்ஸ ஸந்தானே பவத்தந்தி, ஸோ தேஸங் ஹேதுப²லஸம்ப³ந்தே⁴ன ப⁴வந்தரங் ஸந்தா⁴வதி ஸங்ஸரதீதி வுச்சதீதி. ததோயேவச தஸ்ஸா படிஸந்தி⁴யா புரிமப⁴வபரி யாபன்னேஹி ஹேதூஹி வினா அனுப்பஜ்ஜனங்பி ஸித்³த⁴ங் ஹோதீதி. படிகோ⁴ஸ பதீ³பமுத்³தா⁴தீ³னி செத்த² நித³ஸ்ஸனானீதி.
எத்தா²தி மரணுப்பத்திட்டா²னே. மந்த³ப்பவத்தானீதி கம்மது³ப்³ப³லபா⁴வேன வத்து²து³ப்³ப³லபா⁴வேனச மந்த³ங் ஹுத்வா பவத்தானி. தஸ்மா பச்சுப்பன்னா லம்ப³ணகா லப்³ப⁴தீதி ஸம்ப³ந்தோ⁴. த⁴ரந்தெஸ்வேவாதி திட்ட²ந்தேஸு ஏவ. படிஸந்தி⁴ ப⁴வங்கா³னங்பீதி படிஸந்தி⁴யாபி கதிபயப⁴வங்கா³னங்பி. இதி கத்வாதி இமினா காரணேன. காமஞ்செத்த² அட்ட²கதா²யங் க³தினிமித்தங்னாம நிப்³ப³த்தனகஓகாஸே ஏகோ வண்ணோ உபட்டா²தீதி வத்வா ஸப்³பே³ஸு க³தினிமித்தவாரேஸு க³பி⁴னிமித்தங் வண்ணாயதனமேவ மனொத்³வார க³ஹிதமேவ பச்சுப்பன்னமேவச த³ஸ்ஸிதங். ததா²பி ச²தே³வலோகதோ அத்தனோ ஸந்திகங் ஆக³தே தி³ப்³ப³ரதே²யேவ க³தினிமித்தங் கத்வா சவந்தானங் காமாவசரபடிஸந்தி⁴யா.ல. உபலப்³ப⁴தீதி வுத்தங். ததா² சவந்தா ஹி தி³ப்³ப³வண்ணோபி தே³வதானங் ஆனுபா⁴வேன சக்கு²னா தி³ட்டோ²யேவ ஹோதி. தி³ப்³போ³ ரத²ஸத்³தோ³வா தூரியஸத்³தோ³வா வசனஸத்³தோ³வா ஸோதேன ஸுதோயேவ. தி³ப்³ப³க³ந்தோ⁴பி கா⁴னேன கா⁴யிதோயேவ. நிரயதோ உக்³க³தேன அக்³கி³ஜாலேன த³ய்ஹமானகாயேன சவந்தானங் தே³வத³த்த நந்த³யக்க² நந்த³மாண வகாதீ³னங் கு²ரசக்கே ஆஸஜ்ஜமானானங் மித்தவிந்த³காதீ³னஞ்ச வஸேன பொ²ட்ட²ப்³ப³ங்பி ஸம்ப⁴வதியேவ. ரஸத⁴ம்மாபி யதா² ஸம்ப⁴வங் யோஜேதப்³பா³தி. வுத்தஞ்ச ஸச்சஸங்கே²பே –
பஞ்சத்³வாரே ஸியா ஸந்தி⁴, வினா கம்மங் த்³விகோ³சரேதி.
மஹாடீகாயங்பி அயமத்தோ² வுத்தோயேவ. யதா³ பன அந்திம ஜவனவீதி²தோ புப்³ப³பா⁴கே³ யதோ²பட்டி²தங் க³தினிமித்தங் அந்திமஜவனஸ்ஸ ஆரம்மணங் ஹோதி. ததா³ தங் அதீதங்பி ஹோதியேவாதி. அட்ட²கதா²யங் பன ஸந்ததிவஸேன தஸ்ஸ பச்சுப்பன்னதாவ வுத்தா. ததா² வண்ணாரம்மணபா⁴வோ மனொத்³வாரேன க³ஹிதபா⁴வோச யேபு⁴ய்யேன வுத்தோதி வேதி³தப்³போ³. இதரதா² கம்மனிமித்தங்பி பச்சுப்பன்னபூ⁴தங் பஞ்சத்³வாரேஏவ அட்ட²கதா²யங் த³ஸ்ஸிதந்தி தங்பி மனொத்³வாரக³ஹிதங் பச்சுப்பன்னபூ⁴தங் பஞ்சாரம்மணங்வா த⁴ம்மாரம்மணங்வா நஸம்ப⁴வதீதி வத்தப்³ப³ங் ஸியா. நச ஸக்கா ததா² வத்துங். கஸ்மா, சக்கு²ங் அனிச்சதோ து³க்க²தோ அனத்ததோ விபஸ்ஸந்தீதிஆதி³னா பட்டா²னே வுத்தஸ்ஸ ச²ளாரம்மண பூ⁴தஸ்ஸ புரேஜாதபச்சயஸ்ஸ மனொத்³வாரிக மரணாஸன்ன ஜவனானம்பி இச்சி²தப்³ப³த்தா. ததோயேவச தத³னுப³ந்தா⁴ய படிஸந்தி⁴யாபி ஸம்ப⁴வ தோதி.
[168] விபா⁴வனியங் பன
ததா² அவிசாரெத்வா யங்வுத்தங் ‘‘பச்சுப்பன்னாரம்மணேஸு ஆபாதமாக³தேஸு மனொத்³வாரே க³தினிமித்தவஸேன பஞ்சத்³வாரே கம்மனிமித்தவஸேனா’’தி. தங் ந ஸுந்த³ரங்.
[169] யஞ்ச தத்த²
‘‘ச²த்³வாரக³ஹிதந்தி கம்மனிமித்தங் ச²த்³வாரக³ஹிதங் க³தினிமித்தங் ச²ட்ட²த்³வாரக³ஹிதந்தி யதா²ஸம்ப⁴வங் யோஜேதப்³ப³’’ந்தி வுத்தங். தங்பி ந யுஜ்ஜதி.
ஏவஞ்ஹி ஸதி கம்மங் விய க³தினிமித்தங்பி தே²ரேன பி⁴ந்தி³த்வா வுத்தங் ஸியா. நச தங் வுத்தனயேன பஞ்சத்³வாரக³ஹிதங் ந ஸம்ப⁴வதீதி.
[170] யஞ்ச தத்த²
அட்ட²கதா²யங் மூல டீகாதீ³ஸுச யேபு⁴ய்யவஸேன வுத்தங் ஸாவஸேஸபாட²ங் அவிசாரெத்வா ‘‘அட்ட²கதா²யங் பன க³தினிமித்தங் மனொத்³வாரே ஆபாதமாக³ச்ச²தீதி வுத்தத்தா ததா³ரம்மணாயச பஞ்சத்³வாரிகபடிஸந்தி⁴யா அத³ஸ்ஸிதத்தா மூலடீகாதீ³ஸுச கம்ம ப³லேன உபட்டா²பிதங் வண்ணாயதனங் ஸுபினங் பஸ்ஸந்தஸ்ஸவிய தி³ப்³ப³ சக்கு²ஸ்ஸ வியச மனொத்³வாரேயேவ கோ³சரபா⁴வங் க³ச்ச²தீதி நியமெத்வா வுத்தத்தா தேஸங் வசனங் நஸம்படிச்ச²ந்தி ஆசரியா’’தி வுத்தங். தத்த²பி அஸம்படிச்ச²ந்தானங் அஞ்ஞங் காரணங் நத்தி² அஞ்ஞத்ர அவிசாரணாயாதி.
பச்சுப்பன்னமதீதந்தி எத்த² யஸ்ஸ ஜவனாவஸானாய பஞ்சத்³வாரிகவீதி²யா சவனங் ஹோதி. தஸ்ஸ படிஸந்தி⁴யா த்³வின்னஞ்ச ப⁴வங்கா³னங் பச்சுப்பன்னா ரம்மணதா உபலப்³ப⁴தி. யஸ்ஸ ததா³ரம்மணாவஸானாய, தஸ்ஸ படிஸந்தி⁴யா ஏவ. யஸ்ஸ பன ஜவனாவஸானாய பச்சுப்பன்னாரம்மணாய மனொத்³வாரிகவீதி²யா சவனங் ஹோதி, தஸ்ஸ படிஸந்தி⁴யா ச²ன்னஞ்ச ப⁴வங்கா³னங். யஸ்ஸ பன ததா³ரணாவஸானாய, தஸ்ஸ படிஸந்தி⁴யா சதுன்னஞ்ச ப⁴வங்கா³னந்தி. எத்த²ச ஆரம்மணே ப³ஹுதராயுகே ப³லவந்தேபி வத்து²து³ப்³ப³லபா⁴வே ஸதி காமஸத்தானங்பி ஜவனாவஸானா வீதி² ஹோதியேவாதி த³ட்ட²ப்³ப³ங். அட்ட²கதா²யங் பன ததா³ரம்மணாவஸானாய ஏவ யோஜிதத்தா மனொத்³வாரே படிஸந்தி⁴தோ பரங் சதுன்னங் ப⁴வங்கா³னங் பஞ்சத்³வாரே படிஸந்தி⁴யாஏவ பச்சுப்பன்னாரம்மணதா வுத்தா. ததா³ரம்மண பரியோஸானாயவா ஸுத்³தா⁴யவா ஜவனவீதி²யாதி வுத்தத்தா பன இத⁴ ஜவனாவஸானாபி யோஜிதாதி வேதி³தப்³பா³.
[171] விபா⁴வனியங் பன
ஏவங்
எத்த²ச யஸ்மா படிஸந்தி⁴ஜனகஸ்ஸேவ கம்மஸ்ஸ ஆரம்மணங்வா உபகரணங்வா கம்மனிமித்தந்தி அதி⁴ப்பேதங். பஞ்சத்³வாரிககம்மஞ்ச படிஸந்தி⁴ஜனகமேவ ந ஹோதி. தஸ்மா ததா³ படிஸந்தி⁴ஜனகங் கம்மங் புரிமபா⁴கே³ஏவ மனொத்³வாரவஸேன ஸித்³த⁴ங் ஹோதி. தஸ்ஸச ஆரம்மணபூ⁴தமேவ உபகரணபூ⁴தமேவவா ஏகந்தேன கம்மனிமித்தங்னாம ஹோதி. யங் பன பஞ்சத்³வாரிகஸ்ஸ அந்திமஜவனஸ்ஸ ஆரம்மணங் ஹோதி. தங் புரிமேன நிருத்³தே⁴ன ஆரம்மணேன வத்து²தோ அபி⁴ன்னத்தாவா தஸ்ஸதி³ஸத்தாவா கம்மனிமித்தந்தேவ வுச்சதீதி. ததா² ஹி வுத்தங் மூலடீகாயங் பஞ்சத்³வாரே ஆபாதங் ஆக³ச்ச²ந்தங் பச்சுப்பன்னங் கம்மனிமித்தங் ஆஸன்னகதகம்மாரம்மண ஸந்ததியங் உப்பன்னங் தங்ஸதி³ஸஞ்ச த³ட்ட²ப்³ப³ந்தி. தத்த² யேஸு தெ³ய்யத⁴ம்மவத்தூ²ஸு சேதியாதீ³ஸுவா யேஹி ஸத்தா²தீ³ஹிவா புப்³பே³ கம்மங் ஸித்³த⁴ங். தேஸங் பச்சக்கே² த⁴ரமானதங் ஸந்தா⁴ய ஸந்ததியங் உப்பன்னந்தி வுத்தங். தேஹி ஸதி³ ஸவத்தூ²னங் த⁴ரமானதங் ஸந்தா⁴ய தங்ஸதி³ஸஞ்சாதி வுத்தங். ஸதி³ஸவத்தூ²னிபி ஹி கம்மஸ்ஸ லத்³தோ⁴காஸகாரணானி ஹொந்தியேவ. யதா² தங் இதோ பரித்தகேன பாபகம்மேன நிரயே உஸ்ஸத³ஸாமந்தே நிப்³ப³த்தானங் புப்³பே³ புஞ்ஞகரணகாலே லத்³த⁴னிமித்தஸதி³ஸங் நிரயக்³கி³ஜாலானங் ஸத்³த³ங் ஸுத்வாவா வண்ணங் தி³ஸ்வாவா புஞ்ஞங் ஸரித்வா சவித்வா ஸக்³கே³ நிப்³ப³த்தானங் அக்³கி³ஜாலானி வியாதி.
[172] விபா⁴வனியங் பன
மூலடீகாபாட²ங் அவிசாரெத்வா தங்ஸதி³ஸஞ்சாதிஎத்த² நட்ட²சகாரங் பாட²ங் தி³ஸ்வா ‘‘மனொத்³வாரிக ஜவனானங் ஆரம்மணபூ⁴தேன ஸஹ ஸமானத்தா ததே³கஸந்ததிபதிதங் சுதிஆஸன்னஜவனக³ஹி தங்பி பச்சுப்பன்னங் வண்ணாதி³கங் கம்மனிமித்த பா⁴வேன வுத்த’’ந்தி வுத்தங். தங் அனுபபன்னமேவ.
அபிச, யதா²ரஹந்தி. ஆருப்பேஸு உபரிபூ⁴மினிப்³ப³த்தானங் அரூபீனங் ஹெட்டி²மஜ்ஜா²னானி படிபஸ்ஸம்ப⁴ந்தி. ந ச தே தானி புன ஆயூஹந்தீதி வுத்தங் ஹெட்டி²மாருப்ப வஜ்ஜிதாதி. பமாத³பக்கே² பதித்வா விஸ்ஸட்ட²ஜ்ஜா²னானங் ததோயேவச அப்பஹீனேஹி ஓரம்பா⁴விய ஸங்யோஜனேஹி ஹெட்ட²பா⁴க³ங் ஆகட்³டி⁴த மானஸானங் காமப⁴வே உப்பஜ்ஜமானானங் தேஸங் த²பெத்வா திஹேது குக்கட்ட²பூ⁴தங் உபசாரஜ்ஜா²னசேதனங் அஞ்ஞங் து³ப்³ப³லகம்மங் ஓகாஸங் நலப⁴தீதி வுத்தங் ததா² காமதிஹேதுகாதி. ததா² ஹி அங்கு³த்தரட்ட² கதா²யங்-ந ஹி தஸ்ஸ உபசாரஜ்ஜா²னதோ ப³லவதரங்னாம கம்மங் அத்தீ²தி வுத்தங். டீகாயஞ்ச ந ஹி தஸ்ஸ.ல. அத்தீ²தி இமினா ததோ சவந்தானங் உபசாரஜ்ஜா²னமேவ படிஸந்தி⁴ஜனகங் கம்மந்தி தீ³பேதீதி வுத்தந்தி. ரூபாவசரபடிஸந்தி⁴ பன தேஸங் நத்தி²யேவ. ஏவஞ்ச கத்வா யமகேஅரூபதா⁴துயா சுதஸ்ஸ அரூபதா⁴துங் உபபஜ்ஜந்தஸ்ஸாதிவா அரூப தா⁴துயா சுதஸ்ஸ காமதா⁴துங் உபபஜ்ஜந்தஸ்ஸாதிவா வுத்தங். ந பன வுத்தங் அரூபதா⁴துயா சுதஸ்ஸ ரூபதா⁴துங் உபபஜ்ஜந்தஸ்ஸாதி. ரூப லோகதோ அஹேதுக ரஹிதா ஸியுந்தி.
[173] விபா⁴வனியங் பன
‘‘உபசாரஜ்ஜா²னா நுபா⁴வேனேவ து³ஹேதுக திஹேதுக படிஸந்தி⁴யோ ஸியு’’ந்தி வுத்தங். தங் விசாரேதப்³ப³ங்.
யதி³ ஹி தங் படிஸந்தி⁴தா³னங் ஸந்தா⁴ய வுத்தங் ஸியா. து³ஹேதுகபடி ஸந்தி⁴ ந யுஜ்ஜதி. ந ஹி ஸுட்டு² விக்க²ம்பி⁴தனீவரணானங் அப்பனாவீதி²யங் பவத்தங் உபசாரஜ்ஜா²னங் திஹேதுகோமகங்னாம ஸம்ப⁴வதீதி. அத² கம்மந்தரஸ்ஸ உபத்த²ம்ப⁴னங் ஸந்தா⁴ய வுத்தங் ஸியா. ஸயங் ப³லவதரஸ்ஸபி ஸதோ படிஸந்தி⁴ங் அத³த்வா து³ப்³ப³லஸ்ஸ கம்மந்தரஸ்ஸ உபத்த²ம்ப⁴னே காரணங் நத்தீ²தி. யஸ்மா பன ரூபப்³ரஹ்மானங் உபசாரஜ்ஜா²னதோ அஞ்ஞானிபி காயவசீமனோகம்மகுஸலானி உப்பஜ்ஜந்தியேவ தானியேவச கானிசி திஹேதுகோமகானிபி கானிசி த்³விஹேதுகுக்கட்டா²னிபி ப⁴வந்தி. ஓளாரிகானங் பன நீவரணானங் ஸுட்டு² விக்க²ம்பி⁴தத்தா ஸவிபத்திகபடி ஸந்தி⁴ஜனகானி த்³விஹேதுகோமகானி தேஸங் நுப்பஜ்ஜந்தி. அபரபரியாய பூ⁴தானிச தாதி³ஸானி தேஸங் ஓகாஸங் நலப்³ப⁴ந்தி. நானாரம்மணேஸுச நேஸங் ச²ந்தோ³வா நிகந்திவா பவத்ததியேவ. யேன நானாகம்மானிபி விபச்சிதுங் ஓகாஸங் லப⁴ந்தி. யேனச தே சக்கு² ஸோதத்³வாரேஹிபி ததோ சவந்தி. தஸ்மா எத்த² உபசாரஜ்ஜா²னேன காரணங் அவத்வா வுத்தனயேனேவ தங்காரணங் வத்துங் யுத்தந்தி த³ட்ட²ப்³ப³ங். காமதிஹேதும்ஹா சுதியா பரங் ஸப்³பா³ வீஸதி படிஸந்தி⁴யோ ஸியுங். இதரா து³ஹேதுகாஹேதுகசுதிதோ பரங் காமெஸ்வேவ ப⁴வேஸு த³ஸபடிஸந்தி⁴யோ ஸியுந்தி யோஜனா. ஏவங் படிஸந்தி⁴க்க²ணே விஸயப்பவத்தியா ஸஹ வீதி²முத்தசித்தானங் பவத்தாகாரங் த³ஸ்ஸெத்வா இதா³னி பவத்திகாலே பரங்பரப⁴வேஸுச த³ஸ்ஸேதுங் இச்சேவந்திஆதி³மாஹ. படிஸந்தி⁴னிரோதா⁴னந்தரதோதி படிஸந்தி⁴யா நிரோத⁴ஸ்ஸ ப⁴ங்க³ஸ்ஸ அனந்தரகாலதோ. தமேவசித்தந்தி தஸ்ஸதி³ஸே தப்³போ³ஹாரோ த³ட்ட²ப்³போ³. யதா² தானியேவ ஓஸதா⁴னீதி. யாவ சுதிசித்துப்பாதா³தி எத்த² சுதிக்³க³ஹணேன ததா³ஸன்ன வீதி²சித்தானம்பி க³ஹணங் த³ட்ட²ப்³ப³ங். அஸதி வீதி²சித்துப்பாதே³தி அந்தரந்தரா வீதி²சித்தானங் உப்பத்தியா அஸதி. ப⁴வஸ்ஸஅங்க³பா⁴வேனாதி உபபத்திப⁴வஸ்ஸ அவிச்சே²த³ காரணபா⁴வேன. தஸ்மிங்தி அவத்தமானே பச்சா²ஜாதபச்சயரஹிதானங் ரூபத⁴ம்மானங் வஸ்ஸோத³க ரஹிதானங் தருணஸஸ்ஸானங் விய மிலாத பா⁴வபத்தியா உபபத்திப⁴வோ ஒச்சி²ஜ்ஜதீதி. சுதிசித்தங் ஹுத்வா நிருஜ்ஜ²தி தமேவ சித்தந்தி ஸம்ப³ந்தோ⁴. யதா²க்கமங் ஏவ பரிவத்தந்தா பவத்தந்தீதி யாவ பரினிப்³பா³னசுதியா யதா²க்கமங் பரிவத்தந்தா பவத்தந்திஏவ. ந பன பரஸமயே விய கதா³சி கத்த²சி நிவத்திங் பாபுணந்தீதி அத்தோ².
[174] விபா⁴வனியங் பன
‘‘யாவ வட்ட மூல ஸமுச்சே²தா³’’தி வுத்தங், வட்டமூலஸமுச்சே²தோ³ வுச்சதி அரஹத்தமக்³கோ³. ததோ பரங்பி யாவக²ந்த⁴பரினிப்³பா³னா பவத்தந்தியேவ.
இஹாதி இமஸ்மிங் ப⁴வே. இச்சயந்தி இதி அயங். இதிஸத்³தோ³ ஆதி³அத்தோ². யதா² இஹ படிஸந்தி⁴ச ப⁴வங்க³ஞ்ச ஆவஜ்ஜனாதி³ வீதி²யோச சுதிசாதி அயங் சித்தஸந்ததி பவத்ததி. ததா² புன ப⁴வந்தரேபி ஸந்தி⁴ப⁴வங்கா³தி³கா அயங்சித்தஸந்ததி பரிவத்ததி பரிவத்தமானா பவத்ததீதி அத்தோ². இதா³னி யஸ்ஸ விபஸ்ஸனா மக்³க³ப²லனிப்³பா³னஸ்ஸ அத்தா²ய சித்தசேதஸிகானங் பபே⁴த³பவத்திஸங்க³ஹா பட்ட²பியந்தி. தத³த்த²ங் த³ஸ்ஸெந்தோ கா³த²மாஹ. தத்த² படிஸங்கா²யாதி படிஸங்கா²ன ஸங்கா²தேன விபஸ்ஸனா ஞாணேன புனப்புனங் ஞத்வா. ஏதந்தி யதா²வுத்தங் சித்தசேதஸிகானங் பபே⁴த³பவத்திவிதா⁴னங். அது⁴வந்தி அனிச்சங். அதி⁴க³ந்த்வாதி அதி⁴க³மஸங்கா²தேன சதுமக்³க³ஞ்ஞாணேன பதிலபி⁴த்வா ஸச்சி²கத்வா. பத³ந்தி ஸஉபாதி³ஸேஸங் நிப்³பா³னங். பு³தா⁴தி பண்டி³தா. ஸுட்டு² அனுஸய மத்தங்பி அஸேஸெத்வா ஸேஸகிலேஸேஹி ஸத்³தி⁴ங் உச்சி²ன்னங் யதா² வுத்தேஸு சித்தசேதஸிகேஸு அதி⁴ஸயிதங் தண்ஹாஸினேஹ ஸங்கா²தங் ஸுஸமுச்சி²ன்ன ஸினேஹ ப³ந்த⁴னா. ஸமந்தி வூபஸமந்தி வட்டது³க்க²ஸந்தாபா ஏதஸ்மிந்தி ஸமோ. அனுபாதி³ஸேஸனிப்³பா³னங். எஸ்ஸந்தீதி க³மிஸ்ஸந்தி. சிராயாதி சிரகாலங். ஸுந்த³ரங் அதி⁴க³மாவஹங் ஸீல து⁴தங்க³ஸங்கா²தங் வதங் ஏதேஸந்தி ஸுப்³ப³தா. ஸுபரிஸுத்³த⁴ஸீலஸல்லேக² வுத்தினோதி அத்தோ². சிராய ஸுப்³ப³தா பு³தா⁴ ஏதங் அது⁴வங் படிஸங்கா²ய அச்சுதங் பத³ங் அதி⁴க³ந்த்வா ஸுஸமுச்சி²ன்னஸினேஹப³ந்த⁴னா ஸமங் எஸ்ஸந்தீதி யோஜனா.
இதி பரமத்த²தீ³பனியானாம அபி⁴த⁴ம்மத்த²ஸங்க³ஹஸ்ஸ
சதுத்த²வண்ணனாய வீதி²முத்த ஸங்க³ஹஸ்ஸ
பரமத்த²தீ³பனா நிட்டி²தா.