நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ
பட்டா²னுத்³தே³ஸ தீ³பனீபாட²
1. ஹேதுபச்சயோ
கதமோ
கதமே த⁴ம்மா ஹேதுபச்சயஸ்ஸ பச்சயுப்பன்னா. லோப⁴ ஸஹஜாதா சித்தசேதஸிகா த⁴ம்மா ச ரூபகலாபாத⁴ம்மா ச தோ³ஸஸஹ ஜாதா மோஹஸஹஜாதா அலோப⁴ஸஹஜாதா அதோ³ஸஸஹ ஜாதா அமோஹஸஹஜாதா சித்தசேதஸிகா த⁴ம்மா ச ரூபகலாபா த⁴ம்மா ச ஹேதுபச்சயதோ உப்பன்னா ஹேதுபச்சயுப்பன்னா த⁴ம்மா.
ஸஹஜாதரூபகலாபா நாம ஸஹேதுகபடிஸந்தி⁴க்க²ணே கம்மஜரூபானி ச பவத்திகாலே ஸஹேதுகசித்தஜரூபானி ச. தத்த² படிஸந்தி⁴க்க²ணோ நாம படிஸந்தி⁴சித்தஸ்ஸ உப்பாத³க்க²ணோ. பவத்திகாலோ நாம படிஸந்தி⁴சித்தஸ்ஸ டி²திக்க²ணதோ பட்டா²ய யாவ சுதிகாலங் வுச்சதி.
கேனட்டே²ன ஹேது, கேனட்டே²ன பச்சயோதி. மூலட்டே²ன ஹேது, உபகாரகட்டே²ன பச்சயோதி. தத்த² மூலயமகே வுத்தானங் லோபா⁴தீ³னங் மூலத⁴ம்மானங் மூலபா⁴வோ மூலட்டோ² நாம. ஸோ மூலட்டோ² மூலயமகதீ³பனியங் அம்ஹேஹி ருக்கோ²பமாய தீ³பிதோயேவ.
அபி ச ஏகோ புரிஸோ ஏகிஸ்ஸங் இத்தி²யங் படிப³த்³த⁴ சித்தோ ஹோதி. ஸோ யாவ தங் சித்தங் ந ஜஹதி, தாவ தங் இத்தி²ங் ஆரப்³ப⁴ தஸ்ஸ புரிஸஸ்ஸ லோப⁴ஸஹஜாதானி காயவசீமனோகம்மானி ச லோப⁴ஸமுட்டி²தானி சித்தஜரூபானி ச சிரகாலங்பி பவத்தந்தி. ஸப்³பா³னி ச தானி சித்தசேதஸிகரூபானி தஸ்ஸங் இத்தி²யங் ரஜ்ஜனலோப⁴மூலகானி ஹொந்தி. ஸோ லோபோ⁴ தேஸங் மூலட்டே²ன ஹேது ச, உபகாரகட்டே²ன பச்சயோ ச. தஸ்மா ஹேதுபச்சயோ. ஏஸ நயோ ஸேஸானி ரஜ்ஜனீயவத்தூ²னி ஆரப்³ப⁴ரஜ்ஜனவஸேன உப்பன்னேஸு லோபே⁴ஸு, து³ஸ்ஸனீயவத்தூ²னி ஆரப்³ப⁴ து³ஸ்ஸனவஸேன உப்பன்னேஸு தோ³ஸேஸு, முய்ஹனீயவத்தூ²னி ஆரப்³ப⁴ முய்ஹனவஸேன உப்பன்னேஸு மோஹேஸு ச.
தத்த²
ஸுக்கபக்கே² ஸோ புரிஸோ யதா³காமேஸு ஆதீ³னவங் பஸ்ஸதி, ததா³ ஸோ தங் சித்தங்ஜஹதி, தங் இத்தி²ங் ஆரப்³ப⁴ அலோபோ⁴ ஸஞ்ஜா யதி. புப்³பே³ யஸ்மிங் காலே தங் இத்தி²ங் ஆரப்³ப⁴ லோப⁴மூலகானி அஸுத்³தா⁴னி காயவசீமனோகம்மானி வத்தந்தி. இதா³னி தஸ்மிங் காலேபி அலோப⁴மூலகானி ஸுத்³தா⁴னி காயவசீமனோகம்மானி வத்தந்தி. பப்³ப³ஜித ஸீலஸங்வரானி வா ஜா²னபரிகம்மானி வா அப்பனாஜா²னானி வா வத்தந்தி. ஸோ அலோபோ⁴ தேஸங் மூலட்டே²ன ஹேது ச ஹோதி, உபகாரகட்டே²ன பச்சயோச. தஸ்மா ஹேதுபச்சயோ. ஏஸ நயோ ஸேஸேஸு லோப⁴ படிபக்கே²ஸு அலோபே⁴ஸு, தோ³ஸபடிபக்கே²ஸு அதோ³ஸேஸு, மோஹ படிபக்கே²ஸு அமோஹேஸு ச.
தத்த² ருக்க²மூலானி விய அலோபோ⁴ லோப⁴னெய்யவத்தூ²ஸு லோப⁴ங் பஹாய லோப⁴விவேகஸுக²ரஸங் வட்³டெ⁴த்வா தேன ஸுகே²ன ஸம்பயுத்தத⁴ம்மே மோத³மானே பமோத³மானே கரொந்தோ விய யாவ ஜா²னஸமாபத்திஸுகா² வா யாவ மக்³க³ப²லஸுகா² வா வட்³டா⁴பேதி. ததா² அதோ³ஸோ ச தோ³ஸனெய்யவத்தூ²ஸு தோ³ஸவிவேகஸுக²ரஸங் வட்³டெ⁴த்வா, அமோஹோ ச மோஹனெய்யவத்தூ²ஸு மோஹவிவேகஸுக²ரஸங் வட்³டெ⁴த்வாதி வத்தப்³ப³ங். ஏவங் வட்³டா⁴பெந்தா தயோ த⁴ம்மா குஸலேஸு த⁴ம்மேஸு ஸம்பயுத்தத⁴ம்மே மோத³மானே பமோத³மானே கரொந்தோ விய சிர காலங்பி பவத்தெந்தி. ஸம்பயுத்தத⁴ம்மா ச ததா² பவத்தந்தி. ஸம்பயுத்த த⁴ம்மேஸு ச ததா² பவத்தமானேஸு ஸஹஜாதரூபகலாபாபி ததா² பவத்தந்தியேவ.
தத்த²
ஹத்தந்தனயோ பன அவிஜ்ஜாஸங்கா²தோ மோஹோ ச தண்ஹாஸங்கா²தோ லோபோ⁴ சாதி த்³வே த⁴ம்மா ஸப்³பே³ஸங்பி வட்டது³க்க²த⁴ம்மானங் மூலானி ஹொந்தி. தோ³ஸோ பன லோப⁴ஸ்ஸ நிஸ்ஸந்த³பூ⁴தங் பாபமூலங் ஹோதி. விஜ்ஜாஸங்கா²தோ அமோஹோ ச நிக்க²மதா⁴துஸங்கா²தோ அலோபோ⁴ சாதி த்³வே த⁴ம்மா விவட்டத⁴ம்மானங் மூலானி ஹொந்தி. அதோ³ஸோ பன அலோப⁴ஸ்ஸ நிஸ்ஸந்த³பூ⁴தங் கல்யாணமூலங் ஹோதி. ஏவங் ச²ப்³பி³தா⁴னி மூலானி ஸஹஜாதானங்பி அஸஹஜாதானங்பி நாமரூபத⁴ம்மானங் பச்சயா ஹொந்தீதி. அயங் ஸுத்தந்தேஸு நயோ. ஹேதுபச்சயதீ³பனா நிட்டி²தா.