3. அதி⁴பதிபச்சயோ
து³விதோ⁴ அதி⁴பதிபச்சயோ ஆரம்மணாதி⁴பதிபச்சயோ ஸஹ ஜாதாதி⁴பதிபச்சயோ ச. தத்த² கதமோ ஆரம்மணாதி⁴பதிபச்சயோ. ஆரம்மணபச்சயே வுத்தேஸு ஆரம்மணேஸு யானி ஆரம்மணானி அதிஇட்டா²னி ஹொந்தி அதிகந்தானி அதிமனாபானி க³ருகதானி. தானி ஆரம்மணானி ஆரம்மணாதி⁴பதிபச்சயோ. தத்த² அதிஇட்டா²னீதி ஸபா⁴வதோ இட்டா²னி வா ஹொந்து அனிட்டா²னி வா, தேன தேன புக்³க³லேன அதிஇச்சி²தானி ஆரம்மணானி இத⁴ அதிஇட்டா²னி நாம.
தானி பன த⁴ம்மதோ த்³வே தோ³ஸமூலசித்துப்பாதே³ ச த்³வே மோமூஹ சித்துப்பாதே³ ச து³க்க²ஸஹக³தகாயவிஞ்ஞாணசித்துப்பாதே³ ச ட²பெத்வா அவஸேஸானி ஸப்³பா³னி காமாவசரசித்தசேதஸிகானி ச ரூபாரூப லோகுத்தரசித்தசேதஸிகானி ச ஸப்³பா³னி அதிஇட்ட²ரூபானி ச ஹொந்தி.
தேஸுபி
கதமே த⁴ம்மா தஸ்ஸ பச்சயஸ்ஸ பச்சயுப்பன்னா. அட்ட² லோப⁴ மூலசித்தானி அட்ட² காமாவசரகுஸலசித்தானி சத்தாரி காமாவசர ஞாணஸம்பயுத்தகிரியசித்தானி அட்ட² லோகுத்தரசித்தானி தஸ்ஸ பச்சயஸ்ஸ பச்சயுப்பன்னா.
தத்த² லோகியானி ச²ளாரம்மணானி லோப⁴மூலசித்தானங் பச்சயோ. ஸத்தரஸ லோகியகுஸலானி சதுன்னங் ஞாணவிப்பயுத்த குஸலானங். தானி குஸலானிசேவ ஹெட்டி²மமக்³க³ப²லானி ச நிப்³பா³னஞ்ச சதுன்னங் ஞாணஸம்பயுத்தகுஸலானங். அரஹத்தமக்³க³ப²லானி ச நிப்³பா³னஞ்ச சதுன்னங் ஞாணஸம்பயுத்தகிரியானங். நிப்³பா³னங் அட்ட²ன்னங் லோகுத்தர சித்தானந்தி.
கேனட்டே²ன ஆரம்மணங், கேனட்டே²ன அதி⁴பதி. ஆலம்பி³ தப்³ப³ட்டே²ன ஆரம்மணங், ஆதி⁴பச்சட்டே²ன அதி⁴பதி. கோ ஆதி⁴பச்சட்டோ². அத்தானங் க³ருங் கத்வா பவத்தேஸு சித்தசேதஸிகேஸு இஸ்ஸரபா⁴வோ ஆதி⁴பச்சட்டோ². லோகே ஸாமிகா விய ஆரம்மணாதி⁴பதிபச்சய த⁴ம்மா த³ட்ட²ப்³பா³, தா³ஸா விய பச்சயுப்பன்னத⁴ம்மா த³ட்ட²ப்³பா³.
ஸுதஸோமஜாதகே ராஜா போரிஸாதோ³ மனுஸ்ஸமங்ஸங் க³ருங் கரொந்தோ மனுஸ்ஸமங்ஸஹேது ரஜ்ஜங் பஹாய அரஞ்ஞே விசரதி. தத்த² மனுஸ்ஸமங்ஸே க³ந்த⁴ரஸ த⁴ம்மா ஆரம்மணாதி⁴பதிபச்சயோ. ரஞ்ஞோ போரிஸாத³ஸ்ஸ லோப⁴மூலசித்தங் பச்சயுப்பன்னத⁴ம்மோ. ராஜா ஸுத ஸோமோ ஸச்சத⁴ம்மங் க³ருங் கத்வா ஸச்சத⁴ம்மஹேது ரஜ்ஜஸம்பத்திஞ்ச ஞாதி ஸங்க⁴ஞ்ச அத்தனோ ஜீவிதஞ்ச ச²ட்டெத்வா புன ரஞ்ஞோ போரிஸாத³ஸ்ஸ ஹத்த²ங் உபக³தோ. தத்த² ஸச்சத⁴ம்மோ ஆரம்மணாதி⁴பதிபச்சயோ. ரஞ்ஞோ ஸுதஸோமஸ்ஸ குஸலசித்தங் பச்சயுப்பன்னத⁴ம்மோ. ஏஸனயோ ஸப்³பே³ஸு க³ருகதேஸு ஆரம்மணேஸு.
கதமோ ஸஹஜாதாதி⁴பதிபச்சயோ. அதி⁴பதிபா⁴வங் பத்தா சத்தாரோ த⁴ம்மா அதி⁴பதிபச்சயோ, ச²ந்தோ³ சித்தங் வீரியங் வீமங்ஸா.
கதமே த⁴ம்மா தஸ்ஸ பச்சயஸ்ஸ பச்சயுப்பன்னா. அதி⁴பதி ஸம்பயுத்தா சித்தசேதஸிகா ச அதி⁴பதிஸமுட்டி²தா சித்தஜரூபத⁴ம்மா ச தஸ்ஸ பச்சயஸ்ஸ பச்சயுப்பன்னா.
கேனட்டே²ன ஸஹஜாதோ, கேனட்டே²ன அதி⁴பதி.
ஸஹுப்பாத³னட்டே²ன ஸஹஜாதோ, ஸஹஜாதானங் த⁴ம்மானங் அபி⁴ப⁴வனட்டே²ன அதி⁴பதி. தத்த² ஸஹுப்பாத³னட்டே²னாதி
அபி⁴ப⁴வனட்டே²னாதி அஜ்ஜொ²த்த²ரணட்டே²ன. யதா² ராஜா சக்கவத்தி அத்தனோ புஞ்ஞித்³தி⁴யா ஸகலதீ³பவாஸினோ அபி⁴ப⁴வந்தோ அஜ்ஜொ²த்த²ரந்தோ அத்தனோ வஸே வத்தாபேதி, ஸகலதீ³பவாஸினோ ச தஸ்ஸ வஸே வத்தந்தி. ததா² அதி⁴பதிட்டா²னபத்தா இமே சத்தாரோ த⁴ம்மா அத்தனோ அத்தனோ விஸயே ஸஹஜாதத⁴ம்மே அபி⁴ப⁴வந்தா அஜ்ஜொ²த்த²ரந்தா அத்தனோ வஸே வத்தாபெந்தி, ஸஹஜாதத⁴ம்மா ச தேஸங் வஸே வத்தந்தி. யதா² வா ஸிலாத²ம்பே⁴ பத²விதா⁴து உத³கக்க²ந்தே⁴ ஆபோதா⁴து அக்³கி³க்க²ந்தே⁴ தேஜோதா⁴து வாதக்க²ந்தே⁴ வாயோதா⁴து அத்தனா ஸஹஜாதா திஸ்ஸோ தா⁴துயோ அபி⁴ப⁴வந்தா அஜ்ஜொ²த்த²ரந்தா அத்தனோ க³திங் க³மாபெந்தி, ஸஹஜாததா⁴துயோ ச தாஸங் க³திங் க³ச்ச²ந்தி, ஏவமேவ அதி⁴பதிட்டா²னபத்தா இமே சத்தாரோ த⁴ம்மா அத்தனோ ப³லேன ஸஹஜாதத⁴ம்மே அத்தனோ க³திங் க³மாபெந்தி, ஸஹஜாதத⁴ம்மா ச தேஸங் க³திங் க³ச்ச²ந்தி, ஏவங் ஸஹஜாதத⁴ம்மானங் அபி⁴ப⁴வனட்டே²ன.
எத்த² வதெ³ய்யுங், யதி³ ஸஹஜாதத⁴ம்மானங் அபி⁴ப⁴வனட்டே²ன அதி⁴பதினாம ஸியா. ஏவங் ஸதி திட்ட²து ச²ந்தோ³, லோபோ⁴ ஏவ அதி⁴பதினாம ஸியா, ஸோ ஹி ச²ந்த³தோபி ப³லவதரோ ஹுத்வா ஸஹ ஜாதத⁴ம்மே அபி⁴ப⁴வந்தோ பவத்ததீதி. வுச்சதே, பா³லபுது²ஜ்ஜனேஸு ஏவ லோபோ⁴ ச²ந்த³தோ ப³லவதரோ ஹோதி, பண்டி³தேஸு பன ச²ந்தோ³ ஏவ லோப⁴தோ ப³லவதரோ ஹுத்வா ஸஹஜாதத⁴ம்மே அபி⁴ ப⁴வந்தோ பவத்ததி. ஸசே ஹி லோபோ⁴ ஏவ ச²ந்த³தோ ப³லவதரோ ஸியா, கத²ங் இமே ஸத்தா லோப⁴ஸ்ஸ ஹத்த²க³தா ப⁴வஸம்பத்தி போ⁴க³ஸம்மத்தியோ ச²ட்டெத்வா நெக்க²ம்மத⁴ம்மே பூரெத்வா வட்டது³க்க²தோ நிஸ்ஸரெய்யுங். யஸ்மா பன ச²ந்தோ³ ஏவ லோப⁴தோ ப³லவதரோ ஹோதி, தஸ்மா இமே ஸத்தா லோப⁴ஸ்ஸ ஹத்த²க³தா ப⁴வஸம்பத்தி போ⁴க³ஸம்பத்தியோ ச²ட்டெத்வா நெக்க²ம்மத⁴ம்மே பூரெத்வா வட்டது³க்க²தோ நிஸ்ஸரந்தி. தஸ்மா ச²ந்தோ³ ஏவ லோப⁴தோ ப³லவதரோ ஹோதி, ச²ந்தோ³ ஏவ அதி⁴பதி, ந லோபோ⁴தி. ஏஸ நயோ தோ³ஸாதீ³ஸுபீதி.
தத்த² லோகே மஹந்தேஸு ஸுது³க்கரேஸு புரிஸகம்மேஸு பச்சுபட்டி²தேஸு இமே சத்தாரோ த⁴ம்மா கம்மஸித்³தி⁴யா ஸங்வத்தந்தி. கத²ங்.
ஹீனச்ச²ந்தா³ ப³ஹுஜ்ஜனா மஹந்தானி ஸுது³க்கரானி புரிஸகம்மானி தி³ஸ்வா நிவத்தச்ச²ந்தா³ ஹொந்தி. காதுங் ந இச்ச²ந்தி, அம்ஹாகங் அவிஸயோதி நிரபெக்கா² ட²பெந்தி. ச²ந்தா³தி⁴கோ பன தாதி³ஸானி புரிஸகம்மானி தி³ஸ்வா உக்³க³தச்ச²ந்தோ³ ஹோதி, அதிவிய
ஹீனவீரியா ச ப³ஹுஜ்ஜனா தாதி³ஸானி கம்மானி தி³ஸ்வா நிவத்த வீரியா ஹொந்தி, இத³ங் மே கம்மங் கரொந்தஸ்ஸ ப³ஹுங் காயது³க்க²ங் வா சேதோது³க்க²ங் வா ப⁴விஸ்ஸதீதி நிவத்தந்தி. வீரியாதி⁴கோ பன தாதி³ஸானி புரிஸகம்மானி தி³ஸ்வா உக்³க³தவீரியோ ஹோதி, இதா³னேவ உட்ட²ஹித்வா காதுங் இச்ச²தி. ஸோ சிரகாலங்பி தங் கம்மங் கரொந்தோ ப³ஹுங் காயது³க்க²ங் வா சேதோது³க்க²ங் வா அனுப⁴வந்தோபி தஸ்மிங் வீரிய கம்மே நனிப்³பி³ந்த³தி, மஹந்தேன கம்மவீரியேன வினா ப⁴விதுங் ந ஸக்கோதி, தாதி³ஸேன வீரியேன ரத்திதி³வங் கே²பெந்தோ சித்தஸுக²ங் விந்த³தி. ஏவஞ்ச ஸதி அதிமஹந்தங்பி தங் கம்மங் ஏகஸ்மிங் காலே ஸித்³த⁴ங் ப⁴விஸ்ஸதி.
ஹீனசித்தா ச ப³ஹுஜ்ஜனா தாதி³ஸானி கம்மானி தி³ஸ்வா நிவத்தசித்தா ஹொந்தி. புன ஆரம்மணங்பி ந கரொந்தி. சித்தாதி⁴கோ பன தாதி³ஸானி கம்மானி தி³ஸ்வா உக்³க³தசித்தோ ஹோதி, சித்தங் வினோதே³துங்பி ந ஸக்கோதி, நிச்சகாலங் தத்த² நிப³ந்த⁴சித்தோ ஹோதி. ஸோ சித்தவஸிகோ ஹுத்வா சிரகாலங்பி தங் கம்மங் கரொந்தோ ப³ஹுங் காயது³க்க²ங்வாபீதிஆதி³னா ச²ந்தா³தி⁴பதினயேன வத்தப்³ப³ங்.
மந்த³பஞ்ஞா ச ப³ஹுஜ்ஜனா தாதி³ஸானி கம்மானி தி³ஸ்வா நிவத்தபஞ்ஞா ஹொந்தி, கம்மானங் ஆதி³ம்பி ந பஸ்ஸந்தி, அந்தபி ந பஸ்ஸந்தி, அந்த⁴காரே பவிஸந்தா விய ஹொந்தி, தானி கம்மானி காதுங் சித்தங்பி ந நமதி. பஞ்ஞாதி⁴கோ பன தாதி³ஸானி கம்மானி தி³ஸ்வா உக்³க³தபஞ்ஞோ ஹோதி, கம்மானங் ஆதி³ங்பி பஸ்ஸதி, அந்தங்பி பஸ்ஸதி, ப²லங்பி பஸ்ஸதி, ஆனிஸங்ஸங்பி பஸ்ஸதி. ஸுகே²ன கம்மஸித்³தி⁴யா நானாஉபாயங்பி பஸ்ஸதி. ஸோ சிரகாலங்பி தங் கம்மங் கரொந்தோதிஆதி³னா வீரியாதி⁴பதினயேன வத்தப்³ப³ங். இத⁴ பன மஹதியா கம்மவீமங்ஸாயாதி ச தாதி³ஸியா கம்ம வீமங்ஸாயாதி ச வத்தப்³ப³ங்.
ஏவங் லோகே மஹந்தேஸு ஸுது³க்கரேஸு புரிஸகம்மேஸு பச்சுபட்டி²தேஸு இமே சத்தாரோ த⁴ம்மா கம்மஸித்³தி⁴யா ஸங்வத்தந்தி. இமேஸஞ்ச சதுன்னங் அதி⁴பதீனங் விஜ்ஜமானத்தா லோகே புரிஸவிஸேஸா நாம தி³ஸ்ஸந்தி, ஸப்³ப³ஞ்ஞுபு³த்³தா⁴ நாம தி³ஸ்ஸந்தி, ஸப்³ப³ஞ்ஞுபோ³தி⁴ஸத்தா நாம தி³ஸ்ஸந்தி, பச்சேகபு³த்³தா⁴ நாம தி³ஸ்ஸந்தி, பச்சேகபோ³தி⁴ஸத்தானாம தி³ஸ்ஸந்தி, அக்³க³ஸாவகானாம மஹாஸாவகா நாம ஸாவகபோ³தி⁴ஸத்தா நாம தி³ஸ்ஸந்தி. லோகேபி ஏவரூபானங் புரிஸவிஸேஸானங் வஸேன ஸத்த லோகஸ்ஸ அத்தா²ய ஹிதாய ஸுகா²ய பஞ்ஞாஸிப்பவிஸேஸா ச பரிபோ⁴க³வத்து²விஸேஸா ச தி³ஸ்ஸந்தீதி. அதி⁴பதிபச்சயதீ³பனா நிட்டி²தா.