4. அனந்தரபச்சயோ
கதமோ
கதமோ த⁴ம்மோ அனந்தரபச்சயஸ்ஸ பச்சயுப்பன்னோ. பச்சி²மே அனந்தரே ஏவ க²ணே உப்பன்னோ சித்தசேதஸிகத⁴ம்மஸமூஹோ தஸ்ஸ பச்சயஸ்ஸ பச்சயுப்பன்னோ.
ஏகஸ்மிங் ப⁴வே படிஸந்தி⁴சித்தங் பட²மப⁴வங்க³சித்தஸ்ஸ அனந்தர பச்சயோ, பட²ம ப⁴வங்க³சித்தங் து³தியப⁴வங்க³சித்தஸ்ஸ அனந்தரபச்சயோதிஆதி³னா வத்தப்³போ³.
யதா³ பன த⁴ம்மயமகே ஸுத்³தா⁴வாஸானங் து³தியே அகுஸலே சித்தே வத்தமானேதி வுத்தனயேன தஸ்ஸ ஸத்தஸ்ஸ அத்தனோ அபி⁴னவங் அத்தபா⁴வங் ஆரப்³ப⁴ ஏதங் மம ஏஸோஹமஸ்மி ஏஸோ மே அத்தாதி பவத்தங் ப⁴வனிகந்திக தண்ஹாஸஹக³தசித்தங் உப்பஜ்ஜதி. ததா³ பட²மங் த்³விக்க²த்துங் ப⁴வங்க³ங் சலதி. ததோ மனொத்³வாராவஜ்ஜனசித்தங் உப்பஜ்ஜதி. ததோ ஸத்த ப⁴வனிகந்திகஜவனானி உப்பஜ்ஜந்தி. ததோ பரங் ப⁴வங்க³வாரோ.
அபி ச ஸோ ஸத்தோ ததா³ பச்சுப்பன்னப⁴வே கிஞ்சி ந ஜானாதி, புப்³ப³ப⁴வே அத்தனா அனுபூ⁴தங் ஆரம்மணங் அனுஸ்ஸரமானோ அச்ச²தி. வத்து²ஸ்ஸ பன அதிது³ப்³ப³லத்தா தஞ்ச ஆரம்மணங் அபரிப்³யத்தமேவ ஹோதி. தங் ஆரப்³ப⁴ உத்³த⁴ச்சஸஹக³தசித்தமேவ ப³ஹுலங் பவத்ததி.
யதா³ க³ப்³போ⁴ தோ²கங் வட்³ட⁴மானோ ஹோதி அதிரேகத்³வேமாஸங் க³தோ, ததா³ சக்கா²தீ³னி இந்த்³ரியானி பரிபுண்ணானி ஹொந்தி. ஏவங் ஸந்தேபி மாதுக³ப்³பே⁴ ஆலோகாதீ³னங் பச்சயானங் அபா⁴வதோ சக்கு²விஞ்ஞாணாதீ³னி சத்தாரி விஞ்ஞாணானி நுப்பஜ்ஜந்தி, காயவிஞ்ஞாணமனோவிஞ்ஞாணானி ஏவ உப்பஜ்ஜந்தி. ஸோ ஸத்தோ மாதுயா இரியாபத²பரிவத்தனாதீ³ஸு ப³ஹூனி து³க்க²தோ³மனஸ்ஸானி பச்சனுபோ⁴தி. விஜாயனகாலே பன பு⁴ஸங் து³க்க²ங் நிக³ச்ச²தியேவ. விஜாயித்வாபி யாவ வத்து²ரூபானி முதூ³னி ஹொந்தி, பரிபாகங் ந க³ச்ச²ந்தி, தாவ ஸோ அதிமந்த³ரூபோ உத்தானஸெய்யகோ ஹுத்வா அச்ச²தி. ந கிஞ்சி பச்சுப்பன்னங் ஆரம்மணங் ஸல்லக்கே²தி. யேபு⁴ய்யேன புரிம ப⁴வானுஸாரீ ஏவ தஸ்ஸ விஞ்ஞாணங் ஹோதி. ஸசே ஸோ நிரய ப⁴வதோ ஆக³தோ ஹோதி, ஸோ விரூபமுக²ப³ஹுலோ ஹோதி. புரிமானி நிரயாரம்மணானி ஆரப்³ப⁴ க²ணே க²ணே விரூபமுக²மஸ்ஸ பஞ்ஞாயதி. அத² தே³வலோகதோ ஆக³தோ ஹோதி, தி³ப்³பா³னி ஆரம்மணானி ஆரப்³ப⁴ விப்பஸன்னமுக²ப³ஹுலோ ஹோதி, க²ணே க²ணே மிஹிதமுக²மஸ்ஸ பஞ்ஞாயதி.
யதா³ பன வத்து²ரூபானி திக்கா²னி ஹொந்தி, பரிபாகங் க³ச்ச²ந்தி. விஞ்ஞாணானி சஸ்ஸ ஸுவிஸதா³னி பவத்தந்தி. ததா³ அமந்த³ரூபோ ஹுத்வா கீளந்தோ லீளந்தோ மோத³ந்தோ
கிங் பன ஸப்³போ³பி ஸத்தோ இமஸ்மிங் டா²னே ஏவ புரிமங் ஜாதிங் பமுஸ்ஸதீதி சே. ந ஸப்³போ³பி ஸத்தோ இமஸ்மிங் டா²னே ஏவ பமுஸ்ஸதி. கோசி அதிரேகதரங் க³ம்ப⁴வாஸது³க்கே²ன பரிபீளிதோ க³ப்³பே⁴ ஏவ பமுஸ்ஸதி. கோசி விஜாயனகாலே, கோசி இமஸ்மிங் டா²னே பமுஸ்ஸதி. கோசி இதோபரம்பி த³ஹரகாலே ந பமுஸ்ஸதி. வுட்³ட⁴காலே ஏவ பமுஸ்ஸதி. கோசி யாவஜீவங்பி ந பமுஸ்ஸதி. த்³வே தயோ ப⁴வே அனுஸ்ஸரந்தோபி அத்தி²யேவ. இமே ஜாதிஸ்ஸரஸத்தா நாம ஹொந்தி.
தத்த² விஜாயனகாலதோ பட்டா²ய ச²த்³வாரிகவீதி²சித்தானி பவத்தந்தி. பச்சுப்பன்னாரம்மணங் ஸல்லக்க²ணதோ பட்டா²ய ச²த்³வாரிகவீதி² சித்தானி பரிபுண்ணானி பவத்தந்தி. ஸப்³ப³த்த²பி புரிமங் புரிமங் அனந்தரே நிருத்³த⁴ங் சித்தங் பச்சி²மஸ்ஸ பச்சி²மஸ்ஸ அனந்தரே உப்பன்னஸ்ஸ சித்தஸ்ஸ அனந்தர பச்சயோ ஹோதி. அயஞ்ச அனந்தரபச்சயோ நாம அனமதக்³கே³ ஸங்ஸாரே ஏகஸ்ஸ ஸத்தஸ்ஸ ஏகப்பப³ந்தோ⁴ ஏவ ஹோதி. யதா³ ஸத்தோ அரஹத்த மக்³க³ங் லபி⁴த்வா க²ந்த⁴பரினிப்³பா³னங் பாபுணாதி, ததா³ ஏவ ஸோ பப³ந்தோ⁴ சி²ஜ்ஜதி.
கேனட்டே²ன அனந்தரோ, கேனட்டே²ன பச்சயோதி. அத்தனோ அனந்தரே அத்தஸதி³ஸஸ்ஸ த⁴ம்மந்தரஸ்ஸ உப்பாத³னட்டே²ன அனந்தரோ, உபகாரகட்டே²ன பச்சயோ. தத்த² அத்தஸதி³ஸஸ்ஸாதி ஸாரம்மண பா⁴வேன அத்தனா ஸதி³ஸஸ்ஸ. ஸாரம்மணபா⁴வேனாதி ச யோ த⁴ம்மோ ஆரம்மணேன வினா ந பவத்ததி, ஸோ ஸாரம்மணோ நாம, ஏவங் ஸாரம்மணபா⁴வேன. த⁴ம்மந்தரஸ்ஸ உப்பாத³னட்டே²னாதி புரிமஸ்மிங் சித்தே நிருத்³தே⁴பி தஸ்ஸ சிந்தனகிரியாவேகோ³ ந வூபஸம்மதி, பச்சி²மங் சித்தங் உப்பாதெ³த்வா ஏவ வூபஸம்மதி, ஏவங் பச்சி²மஸ்ஸ த⁴ம்மந்தரஸ்ஸ உப்பாத³னட்டே²ன.
தத்த² புரிமா புரிமா மாதுபரம்பரா விய அனந்தரபச்சயபரம்பரா த³ட்ட²ப்³பா³. பச்சி²மா பச்சி²மா தீ⁴துபரம்பரா விய தஸ்ஸ பச்சயுப்பன்னபரம்பரா த³ட்ட²ப்³பா³. ஏவங் ஸந்தே அரஹந்தானங் ஸப்³ப³பச்சி²மங் பரினிப்³பா³னசித்தம்பி புன படிஸந்தி⁴சித்தஸங்கா²தங் த⁴ம்மந்தரங் உப்பாதெ³ய்யாதி. ந உப்பாதெ³ய்ய. கஸ்மா, ததா³ கம்மகிலேஸவேகா³னங் ஸப்³ப³ஸோ படிப்பஸ்ஸத்³தி⁴பா⁴வேன அச்சந்தஸந்ததரத்தா தஸ்ஸ சித்தஸ்ஸாதி. அனந்தரபச்சய தீ³பனா நிட்டி²தா.