பூஜானிதா⁴னதீ³பனீகா³தா²
189.
தஸமா ஹி ஜாதோவரகம்ஹி தஸ்ஸ,
ஆயத்தகே மங்க³லசக்கவாளே;
பூ⁴தேஹி வத்தூ²ஹி மனோரமேஹி,
பூஜேமி தங் பூஜித்பூஜிதங் புரே.
190.
ஸோஹங் அஜ்ஜ பனேதஸ்மிங் சக்கவாளம்ஹி புப்பி²தே,
த²லஜே ஜலஜே வாபி ஸுக³ந்தே⁴ ச அக³ந்த⁴கே.
191.
மனுஸ்ஸேஸு அனேகத்த² தளாகுய்யானவாபிஸு,
பவனே ஹிமவந்தஸ்மிங் தத்த² ஸத்த மஹாஸரே.
192.
பரித்ததீ³பே த்³விஸஹஸ்ஸே மஹாதீ³பே ஸுபுப்பி²தே,
ஸத்தபரிப⁴ண்ட³ஸேலேஸு ஸினேருபப்³ப³துத்தமே.
193.
குமுது³ப்பலகாதீ³னி நாகா³னங் ப⁴வனேஸுபி,
பாடலாதீ³னி புப்பா²னி அஸுரானங் ஹி ஆலயே.
194.
கோவிளாராதி³கானி து தே³வதானங் ஹி ஆலயே,
ஏவமாதீ³ அனேகத்த² புப்பி²தே த⁴ரணீருஹே.
195.
சம்பகா ஸலலா நிம்பா³ நாக³புன்னாக³கேதகா,
வஸ்ஸிகா மல்லிகா ஸாலா கோவிளாரா ச பாடலி.
196.
இந்தீ³வரா அஸோகா ச கணிகாரா ச மகுலா,
பது³மா புண்ட³ரிகா ச ஸோக³ந்தி⁴குமுது³ப்பலா.
197.
ஏதே சஞ்ஞே ச ருக்கா² ச வல்லியோ சாபி புப்பி²தா,
ஸுக³ந்தா⁴ ஸுக²ஸம்ப²ஸ்ஸா நானாவண்ணனிபா⁴ ஸுபா⁴.
198.
விசித்ரா நீலானேகானி பீதா லோஹிதகானி ச,
காளா ஸேதா ச மஞ்ஜட்ட² நேகவண்ணா ஸுபுப்பி²தா.
199.
ஸோப⁴தே பப்³ப³தே ஹெட்டா² ஸரேஹி வனராஜிஹி,
ஸந்த³மானாஹி க³ங்கா³ஹி ஹிமவா ரதனாகரோ.
200.
பத்தகிஞ்ஜக்க²ரேணூஹி ஓகிண்ணங் ஹோதி தங் வனங்,
ப⁴மரா புப்ப்²க³ந்தே⁴ஹி ஸமந்தா அபி⁴னாதி³தா.
201.
அதெ²த்த ஸகுணா ஸந்தி தி³ஜா மஞ்ஜுஸ்ஸரா ஸுபா⁴,
கூஜந்தமுபகூஜந்தி உதுஸம்புப்பி²தே து³மே.
202.
நிச்ச²ரானங் நிபாதேன பப்³ப³தா அபி⁴னாதி³தா,
பஞ்சங்கி³கானி தூரியானி தி³ப்³பா³னி விய ஸுய்யரே.
203.
தத்த² நச்சந்தி தஸ்மிங் ஜலந்தக்³கி³ஸிகூ²பமா,
தஸ்மிங் ஹி கின்னரா கிச்சங் பதீ³பேன கரீயதி.
205.
முத்தாஜாலாவ தி³ஸ்ஸந்தி நிச்ச²ரானங் ஹி பாதகா,
பஜ்ஜலந்தா வ திட்ட²ந்தி மணிவேளுரியாத³யோ.
206.
காளானுஸாரி தக்³க³ரங் கப்பூரங் ஹரிசந்த³னங்,
ஸகுணானங் ஹி ஸத்³தே³ன மயூரானங் ஹி கேகயா.
207.
ப⁴மரானங் ஹி நின்னாதா³ கோஞ்சனாதே³ன ஹத்தி²னங்,
விஜம்பி⁴தேன வாளானங் கின்னரானங் ஹி கீ³தியா;
208.
பப்³ப³தானங் ஹி ஓபா⁴ஸா மணீனங் ஜோதியாபி ச,
விசித்ரப்³ப⁴விதானேஹி து³மானங் புப்ப²தூ⁴பியா;
ஏவங் ஸப்³ப³ங்க³ஸம்பன்னங் கிங் ஸியா நந்த³னங் வனங்.
209.
ஏவங் ஸுஸம்பு²ல்லவனங் ஹி யங் யங்,
தஹிங் தஹிங் புப்பி²தபுப்பி²தங் ஸுப⁴ங்;
மாலங் ஸுஸத்³த³ஞ்ச மனுஞ்ஞக³ந்த⁴ங்,
பூஜேமி தங் பூஜிதபூஜிதங் புரா.
210.
நாக³லோகே மனுஸ்ஸே ச தே³வே ப்³ரஹ்மே ச யங் ஸியா,
ஸாமுத்³தி³கங் பூ⁴மிக³தங் ஆகாஸட்ட²ஞ்ச யங் த⁴மங்.
211.
ரஜதங் ஜாதரூபஞ்ச முத்தா வேளுரியா மணி,
மஸாரக³ல்லங் ப²லிகங் லோஹிதங்க³ங் பவாளகங்.
212.
யோ ஸோ அனந்தகப்பேஸு பூரெத்வா த³ஸபாரமீ,
பு³த்³தோ⁴ போ³தே⁴ஸி ஸத்தானங் தஸ்ஸ பூஜேமி தங் த⁴னங்.
213.
கோ²மங் கோஸெய்யங் கப்பாஸங் ஸாணங் ப⁴ங்க³ஞ்ச கம்ப³லங்,
து³கூலானி ச தி³ப்³பா³னி து³ஸ்ஸானி விவிதா⁴னி தே.
214.
அனந்தவத்த²தா³னேன ஹிரொத்தப்பாதி³ஸங்வரங்,
யஸ்ஸ ஸித்³த⁴ங் ஸியா தஸ்ஸ து³ஸ்ஸானி புஜயாமஹங்.
215.
பவனே ஜாதருக்கா²னங் நானாப²லரஸுத்தமங்,
அம்பா³ கபிட்டா² பன்ஸா சோசமோசாதி³னப்பகா.
216.
தஸ்மிங் க³ந்த⁴ரஸங் ஓஜங் பு³த்³த⁴ஸெட்ட²ஸ்ஸ பூஜிதங்,
வந்தா³மி ஸிரஸா நிச்சங் விப்பஸன்னேன சேதஸா.
217.
பூஜேமி பட²மங் தஸ்ஸ பணிதா⁴னங் அசிந்தியங்,
சக்கவாளம்ஹி ஸப்³பே³ஹி விஜ்ஜமானேஹி வத்து²ஹி.
218.
த³ஸன்னங் பாரமீனந்து பூரிதட்டா²னமுத்தமங்,
ததோ ஸாலவனே ரம்மே ஜாதட்டா²னங் சரிமகங்.
219.
ச²ப்³ப³ஸானி பதா⁴னஸ்மிங் கரணங் து³க்கரகாரிகங்,
அப்பராஜிதபல்லங்கங் பு³த்³த⁴ங் பு³த்³த⁴கு³ணங் நமே.
220.
சுத்³த³ஸ பு³த்³த⁴ஞாணானி அட்ட²ர்ஸ ஆவேணிகங்,
பூஜேமி த³ஸப³லஞாணங் சதுவேஸாரஜ்ஜமுத்தமங்.
221.
ஆஸயானுஸயஞாணங் இந்த்³ரியானங் பரோபரங்,
யமகபாடிஹீரஞ்ச ஞாணங் ஸப்³ப³ஞ்ஞுதங் பி ச.
222.
மஹாகருணாபத்திஞாணங் அனாவரண்மிதி ச,
ச² அஸாதா⁴ரணானேதே ஞத்வான பூஜயாமஹங்.
223.
ததோ ச ஸத்தஸத்தாஹே த⁴ம்மஸம்மஸிதங் நமே,
ப்³ரஹ்முனா யாசிதட்டா²னங் த⁴ம்மங் தே³ஸயிதுங் வரங்.
224.
இஸிபதனே மிக³தா³யே த⁴ம்மசக்கபவத்தனங்,
ததோ வேளுவனாராமே வஸிதடா²னஞ்ச பூஜயே.
225.
ததோ ஜேதவனங் ரம்மங் சிரவுத்த²ங் மஹேஸினா,
அஸாதா⁴ரணமஞ்ஞேஸங் யமகபாடிஹரியங்.
226.
பாரிச்ச²த்தகமூலம்ஹி அபி⁴த⁴ம்மஞ்ச தே³ஸனங்,
ஸங்கஸ்ஸனக³ரத்³வாரே தே³வோரோஹணகங் பி ச.
227.
ததோ ச ஹிமவந்தஸ்மிங் மஹாஸமயதே³ஸனங்,
வுத்தானேதானி டா²னானி நத்வான புஜயாமஹங்.
228.
சதுராஸீதிஸஹஸ்ஸேஹி த⁴ம்மக்க²ந்தே⁴ஹி ஸங்க³ஹங்,
பிடகத்தயங் யதா²வுத்தவிதி⁴னா பூஜயாமஹங்.
229.
மாரஸ்ஸ அத்தனோ ஆயுஸங்கா²ரோஸஜ்ஜனங் நமே,
குஸினாராய மல்லானங் யமகஸாலமந்தரே.
230.
பணிதா⁴னம்ஹி பட்டா²ய கதங் கிச்சங் அஸேஸதோ,
நிட்ட²பெத்வான ஸோ ஸப்³ப³ங் பரினிப்³பா³யினாஸவோ.
231.
ஏவங் நிப்³பா³யமானஸ்ஸ கதகிச்சஸ்ஸ தாதி³னோ,
சிரக³தா மஹாகருணா ந நிப்³பா³யித்த² கிஞ்சிபி.
232.
ஸ்வாயங் த⁴ம்மோ வினயோ ச தே³ஸிதோ ஸாது⁴கங் மயா,
மமச்சயேன ஸோ ஸத்தா² தா⁴து சாபி ஸரீரஜா.
233.
அப்பராஜிதபல்லங்கங் போ³தி⁴ருக்க²ஞ்ச உத்தமங்,
மமச்சயேன ஸத்தா² தி அனுஜானி மஹாமுனி.
234.
மம ட²னே ட²பெத்வான தா⁴துபோ³தி⁴ஞ்ச பூஜிதங்,
அனுஜானாமி தும்ஹாகங் ஸாத⁴னத்த²ங் ஸிவஞ்ஜஸங்.
235.
தஸ்மா ஹி தஸ்ஸ ஸத்³த⁴ம்மங் உக்³க³ண்ஹித்வா யதா²தத²ங்,
யோ தே³ஸேதி ஸம்பு³த்³தோ⁴ தி நத்வான பூஜயாமஹங்.
236.
தஸ்மா ஸாஸபமத்தங் பி ஜினதா⁴துங் அஸேஸிய,
வித்தி²ன்னசக்கவாளம்ஹி நத்வான பூஜயாமஹங்.
237.
பரம்பராப⁴தானங் ஹி இமம்ஹா பொ³த்³தி⁴ருக்க²தோ,
ஸப்³பே³ஸங் போ³தி⁴ருக்கா²னங் நத்வான பூஜயாமஹங்.
238.
யங் யங் பரிபு⁴ஞ்ஜி ப⁴க³வா பத்தசீவரமாதி³கங்,
ஸப்³ப³ங் பரிபோ⁴க³தா⁴துங் நத்வான பூஜயாமஹங்.
239.
யத்த² கத்த²சி ஸயிதோ ஆஸின்னோ சங்கமேபி வா,
பாத³லஞ்ச²ன்கங் கத்வா டி²தோ நத்வான பூஜயே.
240.
ந ஸஞ்ஜானந்தி யே பு³த்³த⁴ங் ஏவரூபோ தி ஞாத்வே,
கதங் தங் படிமங் ஸப்³ப³ங் நத்வான பூஜயாமஹங்.
241.
ஏவங் பு³த்³த⁴ஞ்ச த⁴ம்மஞ்ச ஸங்க⁴ஞ்ச அனுத்தரங்,
சக்கவாளம்ஹி ஸப்³பே³ஹி வத்தூ²ஹி பூஜயாமஹங்.