8. உணாதி³கப்ப
ச²ட்ட²கண்ட³
624, 563. கத்தரி கித.
கத்துஇச்சேதஸ்மிங் அத்தே² கித பச்சயா ஹொந்தி.
காரு, காருகோ, காரகோ, பாசகோ, கத்தா, ஜனிதா, பசிதா, நேதா.
625, 605. பா⁴வகம்மேஸு கிச்சத்த க²த்தா².
பா⁴வகம்மஇச்சேதெஸ்வத்தே²ஸு கிச்ச த்த க²த்த²இச்சேதே பச்சயா ஹொந்தி.
உபஸம்பாதே³தப்³ப³ங் உபஸம்பாத³னீயங் ப⁴வதா, ஸயிதப்³ப³ங் ப⁴வதா, கத்தப்³ப³ங் ப⁴வதா, பொ⁴த்தப்³போ³ ஓத³னோ ப⁴வதா, அஸிதப்³ப³ங் போ⁴ஜனங் ப⁴வதா, அஸிதங் ப⁴வதா, ஸயிதங் ப⁴வதா, பசிதங் ப⁴வதா, அஸிதங் அஸனங் ப⁴வதா, ஸயிதங் ஸயனங் ப⁴வதா, பசிதோ ஓத³னோ ப⁴வதா, கிஞ்சிஸ்ஸயோ, ஈஸஸ்ஸயோ, து³ஸ்ஸயோ, ஸுஸ்ஸயோ ப⁴வதா.
626, 634. கம்மனி து³தியாய த்தோ.
கம்மனி இச்சேதஸ்மிங் அத்தே² து³தியாயங் விப⁴த்தியங் கத்தரி த்தபச்சயோ ஹோதி.
தா³னங் தி³ன்னோ தே³வத³த்தோ, ஸீலங் ரக்கி²தோ தே³வத³த்தோ, ப⁴த்தங் பு⁴த்தோ தே³வத³த்தோ, க³ருங் உபாஸிதோ தே³வத³த்தோ.
627, 652. க்²யாதீ³ஹி மான ம ச தோ வா.
கி² பீ⁴ ஸு ரு ஹு வா தூ⁴ ஹி லூ பீ அத³இச்சேவமாதீ³ஹி தா⁴தூஹி மன பச்சயோ ஹோதி, மஸ்ஸ ச தோ ஹோதி வா.
கீ²யந்தி உபத்³த³வா எத்தா²தி கே²மோ, பா⁴யிதப்³போ³தி பே⁴மோ, பா⁴யந்தி ஏதஸ்மாதி வா பே⁴மோ, ரங்ஸியோ அபி⁴ஸ்ஸவேதீதி ஸோமோ, ரவதி க³ச்ச²தீதி ரோமோ, ஹுவதி ஜுஹ்வதி ஏதேனாதி ஹோமோ, படிலோமவஸேன வாதி க³ச்ச²தீதி வாமோ, லாமகவஸேன வாதி க³ச்ச²தி பவத்ததீதி வா வாமோ, து⁴னாதி கம்பதீதி தூ⁴மோ, ஸெட்ட²பா⁴வேன ஹினோதி பவத்ததி சித்தங் ஏதஸ்மிந்தி ஹேமோ, லுனிதப்³போ³தி லோமோ, மங்ஸசம்மானி லுனாதி சி²ந்த³தீதி வா லோமோ, பியனங் பேமோ, பியாயிதப்³போ³தி வா பேமோ, ஸுக²து³க்க²ங் அத³தி ப⁴க்க²தீதி அத்தா, ஜாதிஜராமரணாதீ³ஹி அதீ³யதே ப⁴க்கீ²யதேதி வா அத்தா, ஆதுமா.
628, 653. ஸமாதீ³ஹி த² மா.
ஸமு த³மு த³ர ரஹ து³ ஹி ஸி பீ⁴ தா³ யா ஸா டா²ப⁴ஸஇச்சேவமாதீ³ஹி தா⁴தூஹி த² ம பச்சயா ஹொந்தி.
ஸமேதீதி ஸமதோ², த³மதீதி த³மதோ², த³மனங் வா த³மதோ², த³மிதப்³போ³தி வா த³மதோ², த³ரதீதி த³ரதோ², ஜிண்ணபா⁴வங் ரஹிஸ்ஸதி க³ண்ஹிஸ்ஸதீதி ரதோ², த³ப்³ப³ஸம்பா⁴ரே ரஹதி க³ண்ஹாதீதி வா ரதோ², த³வதி க³ச்ச²தீதி து³மோ, த³வதி வுத்³தி⁴ விருள்ஹி க³ச்ச²தி பவத்ததீதி உத்³த⁴ங் வா து³மோ, பத²வீபப்³ப³தாதீ³ஸு க³ச்ச²தி பததீதி ஹிமோ, கம்மவாசாய ப³ந்த⁴தி எத்தா²தி ஸீமா. ப³ந்தி⁴தப்³பா³தி வா ஸீமா. பா⁴யந்தி ஏதஸ்மாதி பீ⁴மோ, ஸத்தே அவக²ண்டெ³ந்தி நிவாரெந்தி ஏதேனாதி தா³மோ, மூஸிகாதீ³ஹி கா²தீ³யதி அவக²ண்டீ³யதீதி வா தா³மோ, யாதி க³ச்ச²தீதி யாமோ, பரேஸங் சித்தங் க³ண்ஹிதுங் ஸமத்தே²தீதி ஸாமோ, திட்ட²ந்தி ஏதேனாதி தா²மோ, ப⁴ஸதி ப⁴ஸ்மீகரீயதீதி ப⁴ஸ்மா.
629, 569. க³ஹஸ்ஸு’பத⁴ஸ்ஸே வா.
க³ஹஇச்சேதஸ்ஸ தா⁴துஸ்ஸ உபத⁴ஸ்ஸ அகாரஸ்ஸ எத்த ஹோதி வா.
த³ப்³ப³ஸம்பா⁴ர க³ண்ஹாதீதி கே³ஹங், க³ஹங்.
630, 654. மஸுஸ்ஸ ஸுஸ்ஸ ச்ச²ர ச்சே²ரா.
மஸுஇச்சேதஸ்ஸ பாடிபதி³கஸ்ஸ ஸுஸ்ஸ ச்ச²ரச்சே²ராதே³ஸா ஹொந்தி.
மச்ச²ரதீதி மச்ச²ரோ, ஏவங் மச்சே²ரோ.
631, 655. ஆபுப்³ப³சரஸ்ஸ ச.
ஆபுப்³ப³ஸ்ஸ சரஇச்சேதஸ்ஸ தா⁴துஸ்ஸ ச்ச²ரியச்ச²ரச்சே²ரா தே³ஸா ஹொந்தி, ஆபுப்³ப³ஸ்ஸ ச ரஸ்ஸோ ஹோதி.
ஆபு⁴ஸோ சரிதப்³ப³ந்தி அச்ச²ரியங். ஏவங் அச்ச²ரங், அச்சே²ரங்.
சக்³க³ஹணேன மஸுஸ்ஸ ஸுஸ்ஸாபி ச்ச²ரியாதே³ஸோ ஹோதி, மச்ச²ரியங்.
632, 656. அல கல ஸலேஹி லயா.
அல கல ஸலஇச்சேதேஹி தா⁴தூஹி ல யபச்சயா ஹொந்தி.
அலதி ஸமத்தே²தீதி அல்லங், கலிதப்³ப³ங் ஸங்க்²யாதப்³ப³ந்தி கல்லங், ஸலதி க³ச்ச²தி பவிஸதீதி ஸல்லங். ஏவங் அல்யங், கல்யங், ஸல்யங்.
633, 657. யாண லாணா.
தேஹி கல ஸலஇச்சேதேஹி தா⁴தூஹி யாண லாணபச்சயா ஹொந்தி.
கலிதப்³ப³ங் ஸங்க்²யாதப்³ப³ந்தி கல்யாணங், க³ணதோ படிக்கமித்வா ஸலந்தி எத்தா²தி படிஸல்யாணங். ஏவங் ஸல்லாணோ, படிஸல்லாணோ.
634, 658. மதி²ஸ்ஸ த²ஸ்ஸ லோ ச.
மத²இச்சேதஸ்ஸ தா⁴துஸ்ஸ த²ஸ்ஸ லாதே³ஸோஹோதி. அஞ்ஞமஞ்ஞங் மத²தி விலோளதீதி மல்லோ, மல்லங்.
சக்³க³ஹணேன லதோ கோ ச ஆக³மோ ஹோதி. மல்லகோ, மல்லகங்.
635, 559. பேஸாதிஸக்³க³பத்தகாலேஸுகிச்சா.
பேஸ அதிஸக்³க³ பத்தகாலஇச்சேதெஸ்வத்தே²ஸு கிச்சபச்சயா ஹொந்தி.
கத்தப்³ப³ங் கம்மங் ப⁴வதா, கரணீயங் கிச்சங் ப⁴வதா, பொ⁴த்தப்³ப³ங் போ⁴ஜனங் ப⁴வதா, போ⁴ஜனீயங் போ⁴ஜனங் ப⁴வதா, அஜ்ஜ²யிதப்³ப³ங் அஜ்ஜெ²ய்யங் ப⁴வதா, அஜ்ஜ²யனீயங் அஜ்ஜெ²ய்யங் ப⁴வதா.
636, 659. அவஸ்ஸகா’த⁴மிணேஸு ணீ ச.
அவஸ்ஸக அத⁴மிணஇச்சேதெஸ்வத்தே²ஸு ணீபச்சயோ ஹோதி, கிச்சா ச.
அவஸ்ஸதே தாவ – காரீஸி மே கம்மங் அவஸ்ஸங் ஹாரீஸி மே பா⁴ரங் அவஸ்ஸங்.
அத⁴மிணே – தா³யீஸி மே ஸதங் இணங், தா⁴ரீஸி மே ஸஹஸ்ஸங் இணங்.
கிச்சா ச – தா³தப்³ப³ங் மே ப⁴வதா ஸதங் இணங். தா⁴ரயிதப்³ப³ங் மே ப⁴வதா ஸஹஸ்ஸங் இணங், கத்தப்³ப³ங் மே ப⁴வதா கே³ஹங், கரணீயங் மே ப⁴வதா கிச்சங், காரியங் மே ப⁴வதா ஸயனங்.
637, 0. அரஹஸக்காதீ³ஹி துங்.
அரஹ ஸக்க ப⁴ப்³ப³இச்சேவமாதீ³ஹி பயோகே³ ஸதி ஸப்³ப³தா⁴தூஹி துங்பச்சயோ ஹோதி.
அரஹா ப⁴வங் வத்துங், அரஹா ப⁴வங் கத்துங், ஸக்கா ப⁴வங் ஹந்துங், ஸக்கா ப⁴வங் ஜனேதுங், ஜனிதுங், ப⁴விதுங், ஸக்கா ப⁴வங் தா³துங், ஸக்கா ப⁴வங் க³ந்துங், தப்³போ³ ப⁴வங் ஜனேதுங் இச்சேவமாதி³.
638, 660. வஜாதீ³ஹிபப்³ப³ஜ்ஜாத³யோ நிப்பஜ்ஜந்தே.
வஜஇச்சேவமாதீ³ஹி தா⁴தூஹி, உபஸக்³க³பச்சயாதீ³ஹி ச பப்³ப³ஜ்ஜாத³யோ ஸத்³தா³ நிப்பஜ்ஜந்தே.
பட²மமேவ வஜிதப்³பா³தி பப்³ப³ஜ்ஜா, இஞ்ஜனங் ஏஜ்ஜா, ஸமஜ்ஜனங் ஸமஜ்ஜா, நிஸீத³னங் நிஸஜ்ஜா, விஜானநங் விஜ்ஜா விஸஜ்ஜனங் விஸஜ்ஜா, பத³னங் பஜ்ஜா, ஹனநங் வஜ்ஜா², ஏஸனங் இச்சா², அதிஏஸனங் அதிச்சா², ஸத³னங் ஸஜ்ஜா, ஸயந்தி எத்தா²தி ஸெய்யா, ஸம்மா சித்தங் நிதே⁴தி ஏதாயாதி ஸத்³தா⁴, சரிதப்³பா³ சரியா, கரணங் கிரியா, ருஜனங் ருச்சா², பத³னங் பச்சா², ரிஞ்சனங் ரிச்சா², திகிச்ச²னங் திதிச்சா², ஸங்கோசனங் ஸங்குச்சா², மத³னங் மச்சா², லப⁴னங் லச்சா², ரதி³ஹப்³பா³தி ரச்சா², ரத³னங் விலேக²னங் வாரச்சா², அதோ⁴ பா⁴கே³ன க³ச்ச²தீதி திரச்சா², திரச்சா²னோ, அஜனங் அச்சா², திதிக்க²தீதி திதிக்கா², ஸஹ ஆக³மனங் ஸாக³ச்சா², து³ட்டு² ப⁴க்க²னங் தோ³ப⁴ச்சா², து³ட்டு² ரோஸனங் து³ருச்சா², புச்ச²னங் புச்சா², முஹனங் முச்சா², வஸனங் வச்சா², கசனங் கச்சா², ஸஹ கத²னங் ஸாகச்சா², துத³னங் துச்சா², விஸனங் விச்சா², பிஸனங் பிச்சி²ல்லா, ஸுக²து³க்க²ங் முத³தி ப⁴க்க²தீதி மச்சோ²
639, 585. க்விலோபோ ச.
க்விலோபோ ஹோதி, புன ச நிப்பஜ்ஜந்தே.
விவிதே⁴ஹி ஸீலாதி³கு³ணேஹி ப⁴வதீதி விபூ⁴, விஸேஸேன வா ப⁴வதீதி விபூ⁴, ஸயங் அத்தனா ப⁴வதீதி ஸயம்பூ⁴, அபி⁴வித்வா ப⁴வதீதி அபி⁴பூ⁴, ஸங் ஸுட்டு² து⁴னாதி கம்பதீதி ஸந்தூ⁴, விஸேஸேன பா⁴தி தி³ப்³ப³தீதி விபா⁴, நிஸ்ஸேஸேன பா⁴தி தி³ப்³ப³தீதி நிபா⁴, பகாரேன பா⁴தி தி³ப்³ப³தீதி பபா⁴, ஸஹ பா⁴ஸந்தி எத்தா²தி ஸபா⁴, ஆபு⁴ஸோ பா⁴தி தி³ப்³ப³தீதி ஆபா⁴, பு⁴ஜேன குடிலேன க³ச்ச²தீதி பு⁴ஜகோ³, துரிததுரிதோ க³ச்ச²தீதி துரகோ³, ஸங் ஸுட்டு² பத²விங் க²னதீதி ஸங்கோ², விஸேஸேன யமதி உபரமதீதி வியோ, ஸுட்டு² மனதி ஜானாதீதி ஸுமோ, பரி ஸமந்ததோ தனோதி வித்தா²ரேதீதி பரிதோ இச்சேவமாதி³.
640, 0. ஸசஜானங் ககா³ ணானுப³ந்தே⁴.
ஸச ஜாநங் தா⁴தூனமந்தானங் சஜானங் ககா³தே³ஸா ஹொந்தி யதா²ஸங்க்²யங் ணாநுப³ந்தே⁴ பச்சயே பரே.
ஓகோ
641, 572. நுதா³தீ³ஹி யுண்வூனமனானநாகானநகா ஸகாரிதேஹி ச.
நுத³ ஸூத³ ஜன ஸு லூ ஹு பு பூ⁴ ஞா அ ஸ ஸமுஇச்சேவமாதீ³ஹி தா⁴தூஹி, ப²ந்த³ சிதி ஆண இச்சேவமாதீ³ஹி ஸகாரிதேஹி ச யுண்வூனங் பச்சயானங் அன ஆனந அக ஆனநகாதே³ஸா ஹொந்தி யதா²ஸங்க்²யங் கத்தரி, பா⁴வகரணேஸு ச.
கத்தரி தாவ – பனுத³தீதி பனூத³னோ. ஏவங் ஸூத³னோ, ஜனநோ, ஸவணோ, லவனோ, ஹவனோ, பவனோ, ப⁴வனோ, ஞாணோ, அஸனோ, ஸமணோ.
பா⁴வே ச – பனுத³தே பனூத³னங். ஏவங் ஸூத³னங், ஜனநங், ஸவணங், லவனங், ஹவனங், பவனங், ப⁴வனங், ஞாணங், அஸனங், ஸமணங், ஸஞ்ஜானநங், குயதே கானநங்.
காரிதே ச – ப²ந்தா³பீயதே ப²ந்தா³பனங், சேதாபீயதே சேதாபனங், ஆணாபீயதே ஆணாபனங்.
கரணே – நுத³ந்தி அனேனாதி நூத³னங், ஏவங் ஸூத³னங், ஜனநங், ஸவணங், லவணங், ஹவனங், பவனங், ப⁴க³னங், ஞாணங், அஸனங், ஸவணங்.
புன கத்தரி – நுத³தீதி நூத³கோ, ஸூத³தீதி ஸூத³த⁴கா, ஜனேதீதி ஜனகோ, ஸுணோதீதி ஸாவகோ, லுனாதீதி லாவகோ, ஜுஹோதீதி ஹாவகோ, புனாதீதி பாவகோ, ப⁴வதீதி பா⁴வகோ, ஜானாதீதி ஜானகோ, அஸதீதி அஸகோ, உபாஸதீதி உபாஸகோ, ஸமேதீதி ஸமகோ.
காரிதே து – ப²ந்தா³பயதீதி ப²ந்தா³பயகோ. ஏவங் ஆணாபயகோ, சேதாபயகோ, ஸஞ்ஜானநகோ.
642, 588. இ ய த ம கி ஏ ஸான’மந்தஸ்ஸரோ தீ³க⁴ங் க்வசி து³ ஸ ஸ்ஸ கு³ணங் தோ³ ரங் ஸக்கீ² ச.
இய த ம கி ஏ ஸஇச்சேதேஸங் ஸப்³ப³னாமானமந்தோ ஸரோ தீ³க⁴மாபஜ்ஜதே, க்வசி து³ஸஇச்சேதஸ்ஸ தா⁴துஸ்ஸ உகாரோ கு³ணமாபஜ்ஜதே, த³காரோ ரகாரமாபஜ்ஜதே, தா⁴த்வந்தஸ்ஸ ஸஸ்ஸ ச ஸ க்க² ஈஇச்சேதே ஆதே³ஸா ஹொந்தி யதா²ஸம்ப⁴வங். ஏதே ஸத்³தா³ ஸகேன ஸகேன நாமேன யதா²னுபரோதே⁴ன பு³த்³த⁴ஸாஸனே பச்சா² புன நிப்பஜ்ஜந்தே.
இமமிவ நங் பஸ்ஸதீதி ஈதி³ஸோ, யமிவ நங் பஸ்ஸதீதி யாதி³ஸோ, தமிவ நங் பஸ்ஸதீதி தாதி³ஸோ, மமிவ நங் பஸ்ஸதீதி மாதி³ஸோ, கிமிவ நங் பஸ்ஸதீதி கீதி³ஸோ, ஏதமிவ நங் பஸ்ஸதீதி ஏதி³ஸோ, ஸமானமிவ நங் பஸ்ஸதீதி ஸாதி³ஸோ
சக்³க³ஹணேன தேஸமேவ ஸத்³தா³னங் இயஇச்சேவமாதீ³னமந்தோ ச ஸரோ க்வசி தீ³க⁴த்த²மாஹு. ஈதி³க்கோ², யாதி³க்கோ², தாதி³க்கோ², மாதி³க்கோ², கீதி³க்கோ², ஏதி³க்கோ², ஸாதி³க்கோ². இதி³ஸோ, ஸதி³ஸோ, ஸரிஸோ, ஸரிக்கோ².
643, 635. ப்⁴யாதீ³ஹி மதி பு³தி⁴ பூஜாதீ³ஹி ச த்தோ.
பீ⁴இச்சேவமாதீ³ஹி தா⁴தூஹி, மதி. பு³தி⁴ பூஜாதி³தோ ச த்த பச்சயோ ஹோதி.
பா⁴யிதப்³போ³தி பீ⁴தோ, ஸுபிதப்³போ³தி ஸுத்தோ, மிஜ்ஜிதப்³போ³ ஸினேஹேதப்³போ³தி மித்தோ, ஸம்மன்னிதப்³போ³தி ஸம்மதோ, ஸங் ஸுட்டு² மானிதப்³போ³ பூஜேதப்³போ³தி ஸம்மதோ, ஸம்மானீயித்தா²தி ஸம்மதோ, ஸங்கப்பீயதேதி ஸங்கப்பிதோ
644, 661. வேபு ஸீ த³வ வமு கு தா³ பூ⁴ ஹ்வாதீ³ஹி து² த்திம ணிமா நிப்³ப³த்தே.
வேபு ஸீ த³வ வமு கு தா³ பூ⁴ ஹுஇச்சேவமாதீ³ஹி தா⁴தூஹி யதா²ஸம்ப⁴வங் து² த்திம ணிமபச்சயா ஹொந்தி நிப்³ப³த்தத்தே².
வேபனங் வேபோ, தேன நிப்³ப³த்தோ வேபது², ஸயனங் ஸயோ, தேன நிப்³ப³த்தோ ஸயது², த³வனங் த³வோ, தேன நிப்³ப³த்தோ த³வது². வமனங் வமோ, தேன நிப்³ப³த்தோ வமது². குத்தி கரணங், தேன நிப்³ப³த்தங் குத்திமங். தா³தி தா³னங், தேன நிப்³ப³த்தங் த³த்திமங். பூ⁴தி ப⁴வனங், தேன நிப்³ப³த்தங் பொ⁴த்திமங். அவஹுதி அவஹனங், தேன நிப்³ப³த்தங் ஓஹாவிமங்.
645, 662. அக்கோஸே நம்ஹானி.
அக்கோஸஇச்சேதஸ்மிங் அத்தே² நம்ஹி படிஸேத⁴யுத்தே ஆனிபச்சயோ ஹோதி தா⁴தூஹி.
ந க³மிதப்³ப³ங் அக³மானி தே ஜம்ம தே³ஸங், ந கத்தப்³ப³ங் அகராணி தே ஜம்ம கம்மங்.
நம்ஹீதி கிமத்த²ங்? விபத்தி தே ஜம்ம, விகதி தே ஜம்ம.
அக்கோஸேதி கிமத்த²ங்? ந க³ந்தப்³பா³ அக³தி தே.
646, 419. ஏகாதி³தோ ஸகிஸ்ஸ க்க²த்துங்.
ஏகாதி³தோ ஸகிஸ்ஸ க்க²த்துங் ஹோதி.
ஏகஸ்ஸ பத³த்த²ஸ்ஸ ஸகிங் வாரங் ஏகக்க²த்துங், த்³வின்னங் பத³த்தா²னங் ஸகிங் வாரங் த்³விக்க²த்துங், திண்ணங் பத³த்தா²னங் ஸகிங் வாரங் திக்க²த்துங், ஏவங் சதுக்க²த்துங், பஞ்சக்க²த்துங், ச²க்க²த்துங், ஸத்தக்க²த்துங், அட்ட²க்க²த்துங், நவக்க²த்துங், த³ஸக்க²த்துங். இச்சேவமாத³யோ ஸத்³தா³ யோஜேதப்³பா³.
647, 663. ஸுனஸ்ஸுனஸ்ஸோண வானுவானூனுனகு²னானா.
ஸுனஇச்சேதஸ்ஸ பாடிபதி³கஸ்ஸ உனஸ்ஸ ஓண வான உவான ஊன உனக² உன ஆ ஆனாதே³ஸா ஹொந்தி.
ஸாமிகஸ்ஸ
648, 664. தருணஸ்ஸ ஸுஸு ச.
தருணஇச்சேதஸ்ஸ பாடிபதி³கஸ்ஸ ஸுஸு ஆதே³ஸோ ஹோதி.
ஸுஸு காளகேஸோ.
649, 665. யுவஸ்ஸுவஸ்ஸுவுவானுனூனா.
யுவஇச்சேதஸ்ஸ பாடிபதி³கஸ்ஸ உவஸ்ஸ உவஉவான உனஊனாதே³ஸா ஹொந்தி.
யுவா, யுவானோ, யுனோ, யூனோ.
650, 651. காலே வத்தமானாதீதே ண்வாத³யோ.
காலே வத்தமானத்தே² ச அதீதத்தே² ச ணு யு தபச்சயா ஹொந்தி.
அகாஸி, கரோதீதி காரு, அக³ச்சி², க³ச்ச²தீதி, வாயு, அப⁴வி, ப⁴வதீதி பூ⁴தங்.
651, 647. தவிஸ்ஸதி க³மாதீ³ஹி ணீ கி⁴ண.
ப⁴விஸ்ஸதிகாலத்தே² க³மு ப⁴ஜ ஸு டா²இச்சேவமாதீ³ஹி தா⁴தூஹி ணீ கி⁴ண பச்சயா ஹொந்தி.
ஆயதிங் க³மிதுங் ஸீலங் யஸ்ஸ, ஸோ ஹோதீதி கா³மீ, ஆயதிங் ப⁴ஜிதுங் ஸீலங் யஸ்ஸ, ஸோ ஹோதீதி பா⁴ஜீ, ஆயதிங் பஸ்ஸாபிதுங் ஸீலங் யஸ்ஸ, ஸோ ஹோதீதி பஸ்ஸாவி, ஆயதிங் பட்டா²யிதுங் ஸீலங் யஸ்ஸ, ஸோ ஹோதீதி பட்டா²யி.
652, 648. க்ரியாயங் ண்வு தவோ.
க்ரியாயமத்தே² ண்வு துஇச்சேதே பச்சயா ஹொந்தி ப⁴விஸ்ஸதிகாலே.
‘‘கரிஸ்ஸ’’ந்தி காரகோ வஜதி, ‘‘பு⁴ஞ்ஜிஸ்ஸ’’ந்தி பொ⁴த்தா வஜதி.
653, 306. பா⁴வவாசிம்ஹி சதுத்தீ².
பா⁴வவாசிம்ஹி சதுத்தீ²விப⁴த்தி ஹோதி ப⁴விஸ்ஸதிகாலே,
பசிஸ்ஸதே, பசனங் வா பாகோ, பாகாய வஜதி. பு⁴ஞ்ஜிஸ்ஸதே, போ⁴ஜனங் வா போ⁴கோ³, போ⁴கா³ய வஜதி. நச்சிஸ்ஸதே, நச்சனங் வா நச்சங், நச்சாய வஜதி.
654, 649. கம்மனி ணோ.
கம்மனி உபபதே³ ணபச்சயோ ஹோதி ப⁴விஸ்ஸதிகாலே.
நக³ரங் கரிஸ்ஸதி நக³ரகாரோ வஜதி, ஸாலிங் லாவிஸ்ஸதி ஸாலிலாவோ வஜதி, த⁴ஞ்ஞங் வபிஸ்ஸதி த⁴ஞ்ஞவாபோ வஜதி, போ⁴க³ங் த³தி³ஸ்ஸதி போ⁴க³தா³யோ வஜதி, ஸிந்து⁴ங் பிவிஸ்ஸதி ஸிந்து⁴பாயோ வஜதி.
655, 650. ஸேஸே ஸ்ஸங் ந்துமானானா.
ஸேஸஇச்சேதஸ்மிங் அத்தே² ஸ்ஸங் ந்து மான ஆன இச்சேதே பச்சயா ஹொந்தி ப⁴விஸ்ஸதிகாலே கம்மூபபதே³.
கம்மங் கரிஸ்ஸதி கம்மங் கரிஸ்ஸங், ஏவங் கம்மங் கரொந்தோ, கம்மங் குருமானோ, கம்மங் கரானோ வஜதி. போ⁴ஜனங் பு⁴ஞ்ஜிஸ்ஸதி போ⁴ஜனங் பு⁴ஞ்ஜிஸ்ஸங், ஏவங் போ⁴ஜனங் பு⁴ஞ்ஜந்தோ, போ⁴ஜனங் பு⁴ஞ்ஜமானோ, போ⁴ஜனங் பு⁴ஞ்ஜானோ வஜதி. கா²த³னங் கா²தி³ஸ்ஸதி கா²த³னங் கா²தி³ஸ்ஸங், ஏவங் கா²த³னங் கா²த³ந்தோ, கா²த³னங் கா²த³மானோ, கா²த³னங் கா²தா³னோ வஜதி. மக்³க³ங் சரிஸ்ஸதி மக்³க³ங் சரிஸ்ஸங், ஏவங் மக்³க³ங் சரந்தோ, மக்³க³ங் சரமானோ, மக்³க³ங் சரானோ வஜதி. பி⁴க்க²ங் பி⁴க்கி²ஸ்ஸதி பி⁴க்க²ங் பி⁴க்கி²ஸ்ஸங், ஏவங் பி⁴க்க²ங் பி⁴க்க²ந்தோ, பி⁴க்க²ங் பி⁴க்க²மானோ, பி⁴க்க²ங் பி⁴க்கா²னோ வஜதி.
656, 666. ச²வாதீ³தி தத்ரண.
ச² த³ சி தி ஸு நீ வி த³ பத³ தனு யத அத³ மத³ யுஜ வதுமித³ மா பு க ல வர வே பு கு³ப தா³ இச்சேவமாதீ³ஹி தா⁴தூஹி தத்ரண இச்சேதே பச்சயா ஹொந்தி யதா²ஸம்ப⁴வங்.
ஆதபங் சா²தே³தீதி ச²த்தங், ச²த்ரங். ஆரம்மணங் சிந்தேதீதி சித்தங், சித்ரங். சிந்தெந்தி ஸம்பயுத்தத⁴ம்மா ஏதே²னாதி வா சித்தங், சித்ரங். அத்தே² அபி⁴ஸ்ஸவேதீதி ஸுத்தங், ஸுத்ரங். அத்தே² ஸூசேதீதி வா ஸுத்தங், ஸுத்ரங். ஸத்தே நேதீதி நெத்தங், நெத்ரங். ஸத்தே இச்சி²தட்டா²னங் நெந்தி ஏதேனாதி வா நெத்தங், நெத்ரங். பகாரேன வித³தீதி பவித்தங், பவித்ரங். விவிதே⁴ன ஆகாரேன மங்க³ பாபங் புனாதி, ஸோதே⁴தீதி பவித்தங், பவித்ரங். ஸுசிபா⁴வங் வா பாபுணாதீதி பவித்தங், பவித்ரங். பத³தி பாபுணாதீதி பத்தோ, பத்ரோ. ஆஹாரா பதந்தி எத்த² பா⁴ஜனேதி பத்தங், பத்ரங். பத³தி பவத்ததீதி வா பத்தங், பத்ரங். தனோதி வித்தா²ரேதீதி தந்தங், தந்த்ரங், தனிதப்³ப³ங் வித்தா²ரேதப்³ப³ந்தி வா தந்தங், தந்த்ர. யததீதி யத்தங், யத்ரங். யததி வீரியங் கரோதி ஏதேனாதி வா யத்தங், யத்ரங். யதனங் வா யத்தங், யத்ரங். ஸுக²து³க்க²ங் அத³தி ப⁴க்க²தீதி அத்தா, அத்ரா. மத³தீதி மத்தங், மத்ரங். வத்து²ங் யுஜ்ஜந்தி ஏதேனாதி யொத்தங், யொத்ரங். வத்ததீதி வத்தங், வத்ரங். மித³தி
657, 667. வதா³தீ³ஹி ணித்தோ க³ணே.
வத³ சர வரஇச்சேவமாதீ³ஹி தா⁴தூஹி ணித்தபச்சயோ ஹோதி க³ணத்தே².
வாதி³தானங் க³ணோ வாதி³த்தங். ஏவங் சாரித்தங், வாரித்தங், இச்சேவமாதி³.
658, 668. மிதா³தீ³ஹி த்திதியோ.
மித³ பத³ ரந்ஜ தனு தா⁴இச்சேவமாதீ³ஹி தா⁴தூஹி த்தி தி இச்சேதே பச்சயா ஹொந்தி.
மித³தி ஸினேஹதீதி மெத்தி, பத³தி க³ச்ச²தீதி பத்தி, ரன்ஜதி எத்தா²தி ரத்தி, தனோதி வித்தா²ரேதீதி தந்தி, அத்தனோ
659, 669. உஸு ரன்ஜ த³ங்ஸானங் த³ங்ஸஸ்ஸ த³ட்³டோ⁴ட⁴ டா² ச.
உஸு ரன்ஜ த³ங்ஸஇச்சேதேஸங் தா⁴தூனங் த³ங்ஸஸ்ஸ த³ட்³டா⁴தே³ஸோ ஹோதி, ட⁴ ட²பச்சயா ச ஹொந்தி.
உஸீயதே உட்³டோ⁴, ரன்ஜந்தி எத்தா²தி ரட்ட²ங், த³ங்ஸீயதேதி த³ட்³டோ⁴.
660, 670. ஸூவுஸானமூவுஸானமதோதோ²ச.
ஸூவு அஸஇச்சேதேஸங் தா⁴தூனங் ஊஉஅஸாநங் அதாதே³ஸோ ஹோதி, த²பச்சயோ ச.
ஸவதி ஹிங்ஸதி ஏதேனாதி ஸத்த²ங், ஹிரொத்தப்பங் ஸங்வரதி ஏதேனாதிவத்த²ங், ஸத்³தா³னுரூபங் அஸதிப⁴வதீதி அத்தோ²,
661, 671. ரன்ஜுதா³தீ³ஹி த⁴ தி³த்³த³ கிரா க்வசி ஜத³லோபோச.
ரன்ஜ உத³ இதி³ சதி³ மதி³ கு²த³ சி²தி³ ருதி³ த³ல ஸுஸ ஸுச வச வஜ இச்சேவமாதீ³ஹி தா⁴தூஹி த⁴ த³ இத்³த³ க இரஇச்சேதே பச்சயா ஹொந்தி, க்வசி ஜ த³ லோபோ ச, புன நிப்பஜ்ஜந்தே.
ரஞ்ஜிதப்³ப³ந்தி ரந்த⁴ங், ரன்ஜயித்தா²தி வா ரந்த⁴ங், அத்தனி ஸன்னிஸ்ஸிதானங் மச்ச²மகரானங் பீதிஸோமனஸ்ஸங் உந்த³தி பஸவதி ஜனேதீதி ஸமுத்³தோ³, இந்த³தி பரமிஸ்ஸரியங் கரோதீதி இந்தோ³, இந்த³த்தங் அதி⁴பதிபா⁴வங் கரோதீதி வா இந்தோ³, சந்தி³தப்³போ³ இச்சி²தப்³போ³தி சந்தோ³, மந்த³தி ஹாஸேதீதி மந்தோ³, மதி³தப்³போ³ ஹாஸேதப்³போ³தி வா மந்தோ³, கு²த³தி பிபாஸேதீதி கு²த்³தோ³, சி²ந்தி³தப்³போ³தி சி²த்³தோ³, ருத³தி ஹிங்ஸதீதி ருத்³தோ³, த³லதி து³க்³க³தபா⁴வங் க³ச்ச²தீதி த³லித்³தோ³, ஸுஸ்ஸதீதி ஸுக்கங், ஸுசதீதிஸோகோ, வசிதப்³ப³ந்தி வக்கங், அப்படிஹதோ ஹுத்வா வஜதி க³ச்ச²தீதி வஜிரங் இச்சேவமாதி³.
662, 672. படிதோ ஹிஸ்ஸ ஹேரண ஹீரண.
படிஇச்சேதஸ்மா ஹிஸ்ஸ தா⁴துஸ்ஸ ஹேரண ஹீரண ஆதே³ஸா ஹொந்தி.
படிபக்கே²மத்³தி³த்வாக³ச்ச²தி பவத்ததீதி பாடிஹேரங், பாடிஹீரங்.
663, 673. கட்³யாதீ³ஹி கோ.
கடி³ க⁴டி³ வடி³ கரடி³ மடி³ ஸடி³ குடி² ப⁴டி³ படி³ த³டி³ ரடி³ தடி³ இஸிடி³ சடி³ க³டி³ அடி³ லடி³ மேடி³ ஏரடி³ க²டி³ இச்சேவமாதீ³ஹி தா⁴தூஹி கபச்சயோ ஹோதி ஸஹ பச்சயேன ச நிப்பஜ்ஜந்தே யதா²ஸம்ப⁴வங்.
கண்டி³தப்³போ³ சி²ந்தி³தப்³போ³தி கண்டோ³, க⁴ண்டி³தப்³போ³ க⁴டேதப்³போ³தி க⁴ண்டோ³, வண்ட³ந்தி எத்தா²தி வண்டோ³, கரண்டி³தப்³போ³ பா⁴ஜேதப்³போ³தி கரண்டோ³, மண்டீ³யதே விபூ⁴ஸீயதே ஏதேனாதி மண்டோ³, ஸண்ட³ந்தி கு³ம்ப³ந்தி எத்தா²தி ஸண்டோ³, அங்க³மங்கா³னி குண்ட²தி சி²ந்த³தீதி குட்ட²ங், ப⁴ண்டி³தப்³ப³ந்தி ப⁴ண்ட³ங், பண்ட³தி லிங்க³வேகல்லபா⁴வங் க³ச்ச²தீதி பண்ட³கோ. த³ண்ட³தி ஆணங் கரோதி ஏதேனாதி த³ண்டோ³, ரண்ட³தி ஹிங்ஸதீதி ரண்டோ³, விஸேஸேன தண்ட³தி சாலேதி பரேஸங் விஞ்ஞூனங் ஹத³யங் கம்பேதீதி விதண்டோ³, இஸிண்ட³தி பரேஸங் மத்³த³தீதி இஸிண்டோ³, சண்ட³தி சண்டி³க்கபா⁴வங் கரோதீதி சண்டோ³, க³ண்ட³தி ஸன்னிசயதி ஸமூஹங் கரோதி எத்தா²தி க³ண்டோ³, அண்டீ³யதி நிப்³ப³த்தீயதீதி அண்டோ³, லண்டி³தப்³போ³ ஜிகு³ச்சி²தப்³போ³தி லண்டோ³, மெண்ட³தி
664, 674. கா²தா³மக³மானங் க² ந்த⁴’ந்த⁴ க³ந்தா⁴.
கா²த³ அம க³முஇச்சேதேஸங் தா⁴தூனங் க²ந்த⁴ அந்த⁴ க³ந்தா⁴தே³ஸா ஹொந்தி, கபச்சயோ ச ஹோதி.
ஜாதிஜராமரணாதீ³ஹி ஸங்ஸாரது³க்கே²ஹி கா²தி³தப்³போ³தி க²ந்தோ⁴, அமதி அங்க³மங்க³ஸ்ஸ ருஜ்ஜனபா⁴வங் க³ச்ச²தீதி அந்தோ⁴, சக்கு²னா அமதி ருஜ்ஜதீதி வா அந்தோ⁴, தங் தங் டா²னங் வாதேன க³ச்ச²தீதி க³ந்தோ⁴. ஏவங் க²ந்த⁴கோ, அந்த⁴கோ, க³ந்த⁴கோ.
665, 675. படாதீ³ஹ்யலங்.
பட கல குஸ கத³ ப⁴க³ந்த³ மேக² வக்க தக்க பல்ல ஸத்³த³ மூல பி³ல வித³ சட³ங் பஞ்ச வா வஸ பசி மச முஸ கொ³த்து² புது² ப³ஹு மங்க³ ப³ஹ கம்ப³ ஸம்ப³ அக்³க³இச்சேவமாதீ³ஹி தா⁴தூஹி பாடி பதி³கேஹி ச உத்தரபதே³ஸு அலபச்சயோ ஹோதி, பச்சா² புன நிப்பஜ்ஜந்தே.
படே அலந்தி படலங், கலே அலந்தி கலலங், பாபகே அகுஸலே த⁴ம்மே குஸதி சி²ந்த³தீதி குஸலங், குஸபூ⁴தே யதா²ஸபா⁴வத⁴ம்மே அலந்தி வா குஸலங், குஸே உத்³தி³ஸ்ஸ தா³னே அலந்தி வா குஸலங், குஸே ஸஞ்சயே த⁴ம்மஸமுதா³யே அலந்தி
666, 676. புத²ஸ்ஸ புது² பதா² மோ வா.
புத²இச்சேதஸ்ஸ பாடிபதி³கஸ்ஸ புது² பதா²தே³ஸா ஹொந்தி, க்வசி அமபச்சயோ ஹோதி.
புத² ஹுத்வா ஜாதந்தி புத²வீ பத²மே ஜாதோ பத²மோ, பத²வீ, பட²மோ வா, புது² கிலேஸே ஜனேதீதி புது²ஜ்ஜனோ, புது² ஹுத்வா ஜாதந்தி பத²வீ, பத²வீ வா.
667, 677. ஸஸ்வாதீ³ஹி து த³வோ.
ஸஸு த³த³ அத³ மத³இச்சேவமாதீ³ஹி தா⁴தூஹி து து³இச்சேதே பச்சயா ஹொந்தி.
அஞ்ஞே ஸத்தே ஸஸதி ஹிங்ஸதீதி ஸத்து, து³க்க²ங் த³தா³தீதி த³த்³து³, து³க்கே²ன அத³தி ப⁴க்க²தி எத்தா²தி அத்³து³, து³க்க²ங் அத³தி அனுப⁴வதி ஜனோ ஏதேனாதி வா அத்³து³, து³க்க²ங் பா⁴ஜனங்
668, 678. ஜா²தீ³ஹி ஈவரோ.
சி பா தா⁴இச்சேவமாதீ³ஹி தா⁴தூஹி ஈவரபச்சயோஹோதி.
சீயதீதி சீவரங், பிவதீதி பீவரோ, பாதப்³ப³ங் ரக்கி²தப்³ப³ந்தி வா பீவரங். தா⁴ரேதி தா⁴ரெத்வா ஜீவிதங் கப்பேதீதி தீ⁴வரோ, தீ⁴வரங்.
669, 679. முனாதீ³ஹி சி.
முன யத அக்³க³ பத கவ ஸுச ருச மஹால ப⁴த்³தா³ல மனஇஇச்சேவமாதீ³ஹி தா⁴தூஹி, பாடிபதி³கேஹி ச இபச்சயோ ஹோதி.
அத்தா²னத்த²ங் முனாதி, ஞெய்யத⁴ம்மங் லக்க²ணாதி³வஸேன வா ஜானாதீதி முனி, யததி வீரியங் கரோதீதி யதி, அக்³க³தி குடிலபா⁴வங் க³ச்ச²தீதி அக்³கி³, பததி ஸெட்டோ² ஹுத்வா புரதோ க³ச்ச²தீதி பதி, கப்³யங் ப³ந்த⁴தீதி கவி, கந்தங் மனாபவசனங் வத³தீதி வா கவி. ஸுசதி பரிஸுத்³த⁴ங் ப⁴வதீதி ஸுசி, ருசதி தி³ப்³ப³தீதி ருசி, மஹந்தங் விபா⁴வங் போ⁴க³க்க²ந்த⁴ங் லாதீதி மஹாலி, ப⁴த்³த³ங் யஸங் லாதீதி ப⁴த்³தா³லி, மனங் தத்த² ரதனே நயதீதி மணி.
670, 680. விதா³தீ³ஹ்யூரோ
வித³ வல்ல மஸ ஸித³ து³குகபு மய உதி³ க²ஜ்ஜ குரஇச்சேவமாதீ³ஹி தா⁴தூஹி, பாடிபதி³கேஹி ச ஊரபச்சயோஹோதி.
விதி³துங் அலந்தி விதூ³ரோ, விதூ³ரட்டா²னே ஜாதோ வேதூ³ரோ, வல்லதி வல்லபா⁴வேன ப⁴வதீதி வல்லூரோ, வல்லதி அஞ்ஞமஞ்ஞங் ப³ந்த⁴தீதி வா வல்லூரோ, ஆமஸிதப்³போ³தி மஸூரோ, ஸிந்த³தி ஸிங்கா³ரபா⁴வங் க³ச்ச²தீதி ஸிந்தூ³ரோ, ஸிந்த³தி விரோசதீதி வா ஸிந்தூ³ரோ, க³மிதுங் அலங் அனாஸன்னத்தாதி தூ³ரோ, குதி ஸத்³த³ங் கரோதீதி கூரோ, அத்தனோ க³ந்தே⁴ன அஞ்ஞங் க³ந்த⁴ங் கபதி ஹனதி ஹிங்ஸதீதி கப்பூரோ, கப்பதி ரோகா³பனயனே ஸமத்தே²தீதி வா கப்பூரோ, மஹியங் ரவதீதி மயூரோ, மஹியங் யாதி க³ச்ச²தீதி மயூரோ, பங்ஸுங் உந்த³தி பஸவதீதி உந்தூ³ரோ, க²ஜ்ஜிதப்³போ³ கா²தி³தப்³போ³தி க²ஜ்ஜூரோ, குரதி அக்கோஸதீதி குரூரோ.
671, 681. ஹனாதீ³ஹி நு ணுதவோ.
ஹன ஜன பா⁴ரி க²னு அம வே வேதா⁴ ஸிகி ஹி இச்சேவமாதீ³ஹி தா⁴தூஹி நு ணு குஇச்சேதே பச்சயா ஹொந்தி.
போ⁴ஜனங்
672, 682. குடாதீ³ஹி டோ².
குட குஸ கடஇச்சேவமாதீ³ஹி தா⁴தூஹி, பாடிபதி³கேஹி ச ட²பச்சயோ ஹோதீ.
அங்க³மங்க³ங் குடதி சி²ந்த³தீதீ குட்ட²ங், த⁴ஞ்ஞேன சா²தே³தப்³போ³ பூரேதப்³போ³தீ கொட்டோ², கடிதப்³ப³ங் மத்³தி³தப்³ப³ந்தி, கட்ட²ங்.
673, 683. மனு பூர ஸுணாதீ³ஹி உஸ்ஸ நுஸிஸா.
மனு பூர ஸுண குஸு இல அல மஹ ஸி கி இச்சேவமாதீ³ஹி தா⁴தூஹி, பாடிபதி³கேஹி ச உஸ நுஸ இஸஇச்சேதே பச்சயா ஹொந்தி, புன நிப்பஜ்ஜந்தே.
குஸலாகுஸலே இல்லிஸோ, தண்ஹாய து³ப்³ப³லோ ஹுத்வா இலதி கம்பதீதி வா இல்லிகோ⁴, பாபகரணே அலதி ஸமத்தே²தீதி அலஸோ, மஹிதப்³போ³ பூஜேதப்³போ³தி மஹிஸோ, ஸீயதி ப³ந்தீ⁴யதீதி ஸீஸங், கிதப்³ப³ங் ஹிங்ஸிதப்³ப³ந்தி கிஸங், இச்சேவமாதி³.
இதி கிப்³பி³தா⁴னகப்பே உணாதி³கப்போ ச²ட்டோ² கண்டோ³.
உணாதி³கப்போ நிட்டி²தோ.
கச்சாயனபகரணங் நிட்டி²தங்.