10. லிங்க³த்தயமிஸ்ஸகனாமிகபத³மாலா
அதி⁴கூனகதோ சேக-க்க²ரதோ ச இதோ பரங்;
தீணி லிங்கா³னி மிஸ்ஸெத்வா, பத³மாலமனாகுலங்.
நானாஸுகு²மஸங்கேத-க³தெஸ்வத்தே²ஸு விஞ்ஞுனங்;
க³ம்பீ⁴ரபு³த்³தி⁴சாரத்த²ங், பவக்கா²மி யதா²ப³லங்.
இத்தீ² தீ² ச பபா⁴ பா⁴ ச, கி³ரா ரா பவனங் வனங்;
உத³கஞ்ச த³கங் கஞ்ச, விதக்கோ இதி சாத³யோ.
பூ⁴
பஞ்ஞா பஞ்ஞாணங் ஞாணஞ்ச, இச்சாதீ³ ச திதா⁴ ஸியுங்.
கோ வி ஸா சேவ பா⁴ ரா ச, தீ² தீ⁴ கு பூ⁴ ததே²வ கங்;
க²ங் கோ³ மோ மா ச ஸங் யங் தங், கிமிச்சாதீ³ ச ஏகிகாதி.
அயங் லிங்க³த்தயமிஸ்ஸகோ நாமிகபத³மாலாஉத்³தே³ஸோ. தத்ர இத்தீ², இத்தீ², இத்தி²யோ. இத்தி²ங்…பே॰… போ⁴தியோ இத்தி²யோ.
தீ² தீ², தி²யோ. தி²ங், தீ², தி²யோ. தி²யா, தீ²ஹி, தீ²பி⁴. தி²யா, தீ²னங். தி²யா, தீ²ஹி, தீ²பி⁴. தி²யா, தீ²னங். தி²யா, தி²யங், தீ²ஸு. போ⁴தி தி², போ⁴தியோ தீ², போ⁴தியோ தி²யோ. எத்த² –
‘‘குக்குடா மணயோ த³ண்டா³, தி²யோ ச புஞ்ஞலக்க²ணா;
உப்பஜ்ஜந்தி அபாபஸ்ஸ, கதபுஞ்ஞஸ்ஸ ஜந்துனோ;
தி²யா கு³ய்ஹங் ந ஸங்ஸெய்ய; தீ²னங் பா⁴வோ து³ராஜானோ’’தி
ஆதீ³னி நித³ஸ்ஸனபதா³னி.
பபா⁴, பபா⁴, பபா⁴யோ. பப⁴ங்…பே॰… போ⁴தியோ பபா⁴யோ.
பா⁴, பா⁴, பா⁴யோ. ப⁴ங், பா⁴, பா⁴யோ. பா⁴ய, பா⁴ஹி, பா⁴பி⁴. பா⁴ய, பா⁴னங். பா⁴ய, பா⁴ஹி, பா⁴பி⁴. பா⁴ய, பா⁴னங். பா⁴ய, பா⁴யங், பா⁴ஸு. போ⁴தி பே⁴, போ⁴தியோ பா⁴, போ⁴தியோ பா⁴யோ. எத்த² ச ‘‘பா⁴கரோ பா⁴னு’’இச்சாதீ³னி நித³ஸ்ஸனபதா³னி.
கி³ரா கி³ராஸத்³த³ஸ்ஸ இத்தி²லிங்க³பா⁴வே நித³ஸ்ஸனபதா³னி.
ஸுவண்ணவாசகோ ராஸத்³தோ³ புல்லிங்கோ³, இத⁴ பன ஸத்³த³வாசகோ ராஸத்³தோ³ இத்தி²லிங்கோ³.
ரா, ரா, ராயோ. ரங், ரா, ராயோ. ராய, ராஹி, ராபி⁴. ராய, ரானங். ராய, ராஹி, ராபி⁴. ராய, ரானங். ராய, ராயங், ராஸு. போ⁴தி ரே, போ⁴தியோ ரா, போ⁴தியோ ராயோ.
ரா வுச்சதி ஸத்³தோ³. அக்³க³ஞ்ஞஸுத்தடீகாயஞ்ஹி ‘‘ரா ஸத்³தோ³ தியதி சி²ஜ்ஜதி எத்தா²தி ரத்தி, ஸத்தானங் ஸத்³த³ஸ்ஸ வூபஸமகாலோ’’தி வுத்தங். தஸ்மா ராஸத்³த³ஸ்ஸ ஸத்³த³வாசகத்தே ‘‘ரத்தீ’’தி பத³ங் நித³ஸ்ஸனங்.
பவனங், பவனானி, பவனா. பவனங், பவனானி, பவனே.
வனங், வனானி, வனா. வனங், வனானி, வனே. ஸேஸங் ஸப்³ப³ங் நெய்யங்.
பவன வனஸத்³தா³ கதா³சி ஸமானத்தா² கதா³சி பி⁴ன்னத்தா². தே ஹி அரஞ்ஞவாசகத்தே ஸமானத்தா² ‘‘தே த⁴ம்மே பரிபூரெந்தோ, பவனங் பாவிஸிங் ததா³. ஸபுத்தோ பாவிஸிங் வன’’ந்திஆதீ³ஸு. யதா²க்கமங் பன தே வாயுதண்ஹாவனவாசகத்தே பி⁴ன்னத்தா² ‘‘பரமது³க்³க³ந்த⁴பவனவிசரிதே. செ²த்வா வனஞ்ச வனத²ங், நிப்³ப³னா ஹோத² பி⁴க்க²வோ’’திஆதீ³ஸு.
உத³கங், உத³கானி, உத³கா. உத³கங், உத³கானி, உத³கே.
த³கங், த³கானி, த³கா. த³கங், த³கானி, த³கே. ஸேஸங் ஸப்³ப³ங் நெய்யங்.
‘‘அம்ப³பக்கங் உத³ஸத்³தே³னேவ உத³கத்தோ² வுத்தோ ‘‘ரித்தஸ்ஸாத³’’ந்தி வத்தப்³ப³ட்டா²னே ‘‘ரித்தஸ்ஸ’’ந்தி ஸத்³தே³ன ரித்தஸ்ஸாத³த்தோ² விய. பாளியஞ்ஹி கேவலோ உத³ஸத்³தோ³ ந தி³ட்ட²புப்³போ³. அத்தி² சே, ஸுட்டு² மனஸி காதப்³போ³.
கங், கானி, கா. கங், கானி, கே. கேன, கேஹி, கேபி⁴. கஸ்ஸ, கானங். கா, கஸ்மா, கம்ஹா, கேஹி, கேபி⁴. கஸ்ஸ, கானங். கே, கஸ்மிங், கம்ஹி, கேஸு. போ⁴ க, ப⁴வந்தோ கா, ப⁴வந்தோ கானி. போ⁴ஸத்³தே³ன வா ப³ஹுவசனங் யோஜேதப்³ப³ங் ‘‘போ⁴ கானி, போ⁴ கா’’தி.
எத்த² கங் வுச்சதி உத³கங் ஸீஸங் ஸுக²ஞ்ச. அத்ர ‘‘கந்தாரோ கந்த³ரோ கேவட்டா கேஸா கருணா நாகோ’’திஆதீ³னி பயோகா³னி வேதி³தப்³பா³னி. தத்ர கந்தாரோதி கங் வுச்சதி உத³கங், தேன தரிதப்³போ³ அதிக்கமிதப்³போ³தி கந்தாரோ, நிருத³கப்பதே³ஸோ. சோரகந்தாரந்திஆதீ³ஸு பன ரூள்ஹியா து³க்³க³மனட்டா²னேபி கந்தாரஸத்³தோ³ பவத்ததீதி த³ட்ட²ப்³ப³ங். கந்த³ரோதி எத்தா²பி கங் வுச்சதி உத³கங், தேன தா³ரிதோ பி⁴ன்னோதி கந்த³ரோ. கேவட்டாதிஆதீ³ஸு பன கே உத³கே வத்தனதோ க³ஹணத்த²ங் பவத்தனதோ கேவட்டா. கே ஸீஸே ஸெந்தி உப்பஜ்ஜந்தீதி கேஸா. கங் ஸுக²ங் ருந்த⁴தீதி கருணா. நாகோதி ஸக்³கோ³. கந்தி ஹி ஸுக²ங், ந கங் அகங், து³க்க²ங், தங் நத்தி² எத்தா²தி நாகோதி அத்தோ² க³ஹேதப்³போ³ இத்தீ²ஸத்³தா³தீ³னங் நாமிகபத³மாலா யோஜிதா, ஏவங் ‘‘விதக்கோ விசாரோ ஆபா⁴ பதீ³போ’’திஆதீ³னம்பி யோஜேதப்³பா³.
பூ⁴, பூ⁴, பு⁴யோ. பு⁴ங், பூ⁴, பு⁴யோ. பு⁴யா, பூ⁴ஹி, பூ⁴பி⁴. பு⁴யா, பூ⁴னங். பு⁴யா, பூ⁴ஹி, பூ⁴பி⁴. பு⁴யா, பூ⁴னங். பு⁴யா, பு⁴யங், பூ⁴ஸு. போ⁴தி பு⁴, போ⁴தியோ பூ⁴, போ⁴தியோ பு⁴யோ. எத்த² ச ‘‘பூ⁴ருஹோ பூ⁴பாலோ பூ⁴பு⁴ஜோ பூ⁴தல’’ந்தி நித³ஸ்ஸனபதா³னி.
பூ⁴மி, பூ⁴மீ, பூ⁴மியோ; ஸேஸங் வித்தா²ரேதப்³ப³ங்;
அரஞ்ஞங், அரஞ்ஞானி, அரஞ்ஞா; ஸேஸங் வித்தா²ரேதப்³ப³ங்.
அரஞ்ஞானீ வுச்சதி மஹாஅரஞ்ஞங், ‘‘க³ஹபதானீ’’தி பத³மிவ இனீபச்சயவஸேன ஸாதே⁴தப்³ப³ங் பத³ங் இத்தி²லிங்க³ஞ்ச. ‘‘அரஞ்ஞானீ’’தி ஹி அட்ட²கதா²பாடோ²பி தி³ஸ்ஸதி.
அரஞ்ஞானீ, அரஞ்ஞானீ, அரஞ்ஞானியோ. அரஞ்ஞானிங், அரஞ்ஞானீ, அரஞ்ஞானியோ. அரஞ்ஞானியா, அரஞ்ஞானீஹி, அரஞ்ஞானீபி⁴. அரஞ்ஞானியா, அரஞ்ஞானீனங். அரஞ்ஞானியா, அரஞ்ஞானீஹி, அரஞ்ஞானீபி⁴. அரஞ்ஞானியா, அரஞ்ஞானீனங். அரஞ்ஞானியா, அரஞ்ஞானியங், அரஞ்ஞானீஸு. போ⁴தி அரஞ்ஞானி, போ⁴தியோ அரஞ்ஞானீ, போ⁴தியோ அரஞ்ஞானியோ.
யதெ²த்த² உத்தராதி⁴கவஸேன யோஜிதா, ஏவங் ‘‘ஸபா⁴, ஸபா⁴ய’’ந்திஆதீ³ஸுபி யோஜேதப்³பா³. ஸபா⁴யந்தி ஸபா⁴ ஏவ
பஞ்ஞா, பஞ்ஞா, பஞ்ஞாயோ. பஞ்ஞங், பஞ்ஞா, பஞ்ஞாயோ. பஞ்ஞாய.
பஞ்ஞாணங், பஞ்ஞாணானி, பஞ்ஞாணா. பஞ்ஞாணங், பஞ்ஞாணானி, பஞ்ஞாணே. பஞ்ஞாணேன.
‘‘ததா² ஹி ப⁴ந்தே ப⁴க³வதோ ஸீலபஞ்ஞாணங். ஸாது⁴ பஞ்ஞாணவா நரோ’’திஆதீ³னெத்த² நித³ஸ்ஸனபதா³னி.
ஞாணங், ஞாணானி, ஞாணா. ஞாணங், ஞாணானி, ஞாணே. ஞாணேன. ஸேஸங் ஸப்³ப³ங் நெய்யங். ‘‘அக்³கி³ அக்³கி³னி கி³னி’’இச்சாதீ³ஸுபி உத்தராதி⁴கவஸேன நாமிகபத³மாலா யோஜேதப்³பா³.
கோ வீ ஸாதீ³ஸுபி ஏகக்க²ரேஸு கோ வுச்சதி ப்³ரஹ்மா வாதோ ச ஸரீரஞ்ச, தஸ்ஸ தப்³பா³சகத்தே இமே பயோகா³. ஸெய்யதி²த³ங்?
‘‘ஜினேன யேன ஆனீதங், லோகஸ்ஸ அமிதங் ஹிதங்;
தஸ்ஸ பாத³ம்பு³ஜங் வந்தே³, கமோளிஅலிஸேவிதங்.
ககுத⁴ருக்கோ². கரஜகாயோ’’ இச்சேவமாத³யோ. தத்த² கமோளிஅலிஸேவிதந்தி வந்த³ந்தானங் அனேகஸதானங் ப்³ரஹ்மானங் மோளிப⁴மரஸேவிதந்தி கவயோ இச்ச²ந்தி. ககுத⁴ருக்கோ²தி எத்த² பன கோ வுச்சதி வாதோ, தஸ்ஸ யோ குஜ்ஜ²தி, வாதரோகா³பனயனவஸேன தங் நிவாரேதி, தஸ்மா ஸோ ருக்கோ² ககுதோ⁴தி வுச்சதீபி⁴ ஆசரியா. கரஜகாயோதி எத்த² து கோ வுச்சதி ஸரீரங், தத்த² பவத்தோ ரஜோ கரஜோ. கிங் தங் கஸத்³தே³ன விஸேஸெத்வா ப²லவோஹாரேன ‘‘கரஜோ’’தி வுச்சதி. தேன ஸுக்கஸோணிதஸங்கா²தேன கரஜேன ஸம்பூ⁴தோ காயோ கரஜகாயோதி ஆசரியா. ததா² ஹி ‘‘காயோ மாதாபெத்திகஸம்ப⁴வோ’’தி வுத்தோ, மஹாஅஸ்ஸபூரஸுத்தடீகாயங் பன ‘‘கரியதி க³ப்³பா⁴ஸயே கி²பியதீதி கரோ, ஸம்ப⁴வோ. கரதோ ஜாதோதி கரஜோ, மாதாபெத்திகஸம்ப⁴வோதி அத்தோ². மாதுஆதீ³னங் ஸண்டா²பனவஸேன கரதோ ஜாதோதி அபரே, உப⁴யதா²பி கரஜகாயந்தி சதுஸந்ததிரூபமாஹா’’தி வுத்தங். அயங் பனத்தோ² இத⁴ நாதி⁴ப்பேதோ, புரிமோயேவத்தோ² அதி⁴ப்பேதோ கஸத்³தா³தி⁴காரத்தா.
கோ, கா. கங், கே. கேன, கேஹி, கேபி⁴. கஸ்ஸ, கானங். கா, கஸ்மா, கம்ஹா, கேஹி, கேபி⁴. கஸ்ஸ, கானங். கே, கஸ்மிங், கம்ஹி, கேஸு. போ⁴ க, ப⁴வந்தோ கா.
தத்ர வி வுச்சதி பக்கீ². ததா² ஹி பக்கீ²னங் இஸ்ஸரோ ஸுபண்ணராஜா விந்தோ³தி கதி²யதி. ஏதமத்த²ஞ்ஹி ஸந்தா⁴ய புப்³பா³சரியேனபி அயங் கா³தா² பா⁴ஸிதா –
‘‘ஸத்³தா⁴னதே முத்³த⁴னி ஸண்ட²பேமி, முனிந்த³ நிந்தா³பக³தங் தவக்³க³ங்;
தே³விந்த³னாகி³ந்த³னரிந்த³விந்த³-ந தங் விபி⁴ன்னங் சரணாரவிந்த³’’ந்தி.
தத்த² வீனங் இந்தோ³தி விந்தோ³, பக்கி²ஜாதியா ஜாதானங் ஸுபண்ணானங் ராஜாதி அத்தோ².
விங், வீ, வயோ. விங், வீ, வயோ. வினா, வீஹி, வீபி⁴. விஸ்ஸ, வினோ, வீனங். வினா, விஸ்மா, விம்ஹா, வீஹி, வீபி⁴. விஸ்ஸ, வினோ, வீனங். விஸ்மிங், விம்ஹி, வீஸு. போ⁴ வி, ப⁴வந்தோ வயோ.
ஸா ஸாஸத்³தோ³ ஸப்³ப³னாமிகபரியாபன்னோ பரம்முக²வசனோ தஸத்³தே³ன ஸம்பூ⁴தோ த³ட்ட²ப்³போ³. ஸாஸத்³த³ஸ்ஸ பா⁴ ரா தீ² பூ⁴ கஸத்³தா³னஞ்ச நாமிகபத³மாலா ஹெட்டா² பகாஸிதா.
தீ⁴ வுச்சதி பஞ்ஞா. எத்த² ச ‘‘அமச்சே தாத ஜானாஹி, தீ⁴ரே அத்த²ஸ்ஸ கோவிதே³’’தி. ‘‘தீ⁴மா, தீ⁴மதி, ஸுதீ⁴, ஸுதி⁴னீ, தீ⁴யுத்த’’ந்தி ச ஆதீ³னி நித³ஸ்ஸனபதா³னி.
தீ⁴, தீ⁴, தி⁴யோ. தி⁴ங், தீ⁴, தி⁴யோ. தி⁴யா, தீ⁴ஹி, தீ⁴பி⁴. தி⁴யா, தீ⁴னங். தி⁴யா, தீ⁴ஹி, தீ⁴பி⁴. தி⁴யா, தீ⁴னங். தி⁴யா, தி⁴யங், தீ⁴ஸு. போ⁴தி தி⁴, போ⁴தியோ தீ⁴, போ⁴தியோ தி⁴யோ.
கு வுச்சதி பத²வீ. எத்த² ச ‘‘குதா³லோ. குமுத³ங். குஞ்ஜரோ’’தி இமானி நித³ஸ்ஸனபதா³னி. தத்ர குங் பத²விங் தா³லயதி பதா³லேதி பி⁴ந்த³தி ஏதேனாதி குதா³லோ. குயங் பத²வியங் மோத³தீதி குமுத³ங். குங் ஜரதீதி குஞ்ஜரோ. ததா² ஹி விமானவத்து²அட்ட²கதா²யங் வுத்தங் ‘‘குங் பத²விங் தத³பி⁴கா⁴தேன ஜரயதீதி குஞ்ஜரோ’’தி.
கு, கூ, குயோ. குங், கூ, குயோ. குயா, கூஹி, கூபி⁴. குயா, கூனங். குயா, கூஹி, கூபி⁴. குயா, கூனங். குயா, குயங், கூஸு. போ⁴தி கு, போ⁴தியோ கூ, போ⁴தியோ குயோ.
க²’மிந்த்³ரியங் பகதி²தங், க²’மாகாஸமுதீ³ரிதங்;
ஸக்³க³ட்டா²னம்பி க²ங் வுத்தங், ஸுஞ்ஞத்தம்பி ச க²ங் மதங்.
தத்ரிந்த்³ரியங்
க²ங், கா²னி, கா². க²ங், கா²னி, கே². கே²ன, கே²ஹி, கே²பி⁴. க²ஸ்ஸ, கா²னங். கா², க²ஸ்மா, க²ம்ஹா, கே²ஹி, கே²பி⁴. க²ஸ்ஸ, கா²னங். கே², க²ஸ்மிங், க²ம்ஹி, கே²ஸு. போ⁴ க², ப⁴வந்தோ கா²னி, ப⁴வந்தோ கா².
கோ³ஸத்³த³ஸ்ஸ அத்து²த்³தா⁴ரோ வுச்சதே –
கோ³ கோ³ணே சிந்த்³ரியே பூ⁴ம்யங், வசனே சேவ பு³த்³தி⁴யங்;
ஆதி³ச்சே ரஸ்மியஞ்சேவ, பானீயேபி ச வத்ததே;
தேஸு அத்தே²ஸு கோ³ணே தி²-புமா ச இதரே புமா.
ததா² ஹி ‘‘கோ³ஸு து³ய்ஹமானாஸு க³தோ. கோ³பஞ்சமோ’’திஆதீ³ஸு கோ³ஸத்³தோ³ கோ³ணே வத்ததி. கோ³சரோதி எத்தி²ந்த்³ரியேபி வத்ததி கா³வோ சக்கா²தீ³னிந்த்³ரியானி சரந்தி எத்தா²தி கோ³சரோ. ததா² ஹி போராணா கத²யிங்ஸு ‘‘கா³வோ சரந்தி எத்தா²தி கோ³சரோ, கோ³சரோ விய கோ³சரோ, அபி⁴ண்ஹங் சரிதப்³ப³ட்டா²னங். கா³வோவாசக்கா²தீ³னிந்த்³ரியானி, தேஹி சரிதப்³ப³ட்டா²னங் கோ³சரோ’’தி. ‘‘கோ³மதிங் கோ³தமங் நமே’’தி போராணகவிரசனாயங் பன பத²வியங் வத்ததி. ‘‘பூ⁴ரிபஞ்ஞங் கோ³தமங் ஸம்மாஸம்பு³த்³த⁴ங்வந்தா³மீ’’தி ஹி அத்தோ². ததா² ஸுத்தனிபாதட்ட²கதா²யவாஸெட்ட²ஸுத்தஸங்வண்ணனப்பதே³ஸே ‘‘கோ³ரக்க²ந்தி கெ²த்தரக்க²ங், கஸிரக்க²ந்தி வுத்தங் ஹோதி. பத²வீ ஹி ‘‘கோ³’’தி வுச்சதி, தப்பபே⁴தோ³ ச கெ²த்த’’ந்தி வுத்தங்.
‘‘கொ³த்தவஸேன
ததா² கோ³ஸத்³தோ³ ஆதி³ச்சே வத்ததி. ‘‘கோ³கொ³த்தங் கோ³தமங் நமே’’தி போராணகவிரசனா எத்த² நித³ஸ்ஸனங், ஆதி³ச்சப³ந்து⁴ங் கோ³தமங் ஸம்மாஸம்பு³த்³த⁴ங் வந்தா³மீதி அத்தோ². ஆதி³ச்சோபி ஹி கோ³தமகொ³த்தே ஜாதோ ப⁴க³வாபி, ஏவங் தேன ஸமானகொ³த்ததாய தத்த² தத்த² ‘‘ஆதி³ச்சப³ந்தூ⁴’’திஆதி³னா ப⁴க³வதோ தோ²மனா தி³ஸ்ஸதி ‘‘புச்சா²மி தங் ஆதி³ச்சப³ந்து⁴, விவேகங் ஸந்திபத³ஞ்ச மஹேஸீ’’தி ச, ‘‘வந்தே³ ஜேதவனங் நிச்சங், விஹாரங் ரவிப³ந்து⁴னோ’’தி ச, ‘‘லோகேகப³ந்து⁴’மரவிந்த³ஸஹாயப³ந்து⁴’’ந்தி ச. ‘‘உண்ஹகூ³’’தி எத்த² பன கோ³ஸத்³தோ³ ரஸ்மியங் ச²ந்தோ³விசிதிஸத்தே² இமமேவத்த²ங் ப்³யாகரிங்ஸு.
‘‘கோ³ஸீதசந்த³ன’’ந்தி எத்த² பானீயே வத்ததி. கோ³ஸத்³தே³ன ஹி ஜலங் வுச்சதி. கோ³ விய ஸீதங் சந்த³னங், தஸ்மிங் பன உத்³த⁴னதோ உத்³த⁴ரிதபக்குதி²ததேலம்ஹி பக்கி²த்தே தங்க²ணஞ்ஞேவ தங் தேலங் ஸுஸீதலங் ஹோதி.
எத்தே²கே வத³ந்தி ‘‘கஸ்மா போ⁴ ‘கோ³பத³த்தே² வத்தமானோ கோ³ஸத்³தோ³ இத்தி²லிங்கோ³ சேவ புல்லிங்கோ³ சா’தி வத³த², கஸ்மா ச பன ‘இந்த்³ரியபத²வீவசனபு³த்³தி⁴ஸூரியரஸ்மிபானீயேஸு வத்தமானோ புல்லிங்கோ³’தி வத³த², ஏதேஸு ஸூரியத்தே² வத்தமானோ புல்லிங்கோ³ ஹோது, நனு இந்த்³ரியவசனபானீயேஸு வத்தமானேன பன கோ³ஸத்³தே³ன நபுங்ஸகலிங்கே³ன ப⁴விதப்³ப³ங், பத²வீபு³த்³தி⁴ரஸ்மீஸு வத்தமானேன இத்தி²லிங்கே³ன ப⁴விதப்³ப³ங் இந்த்³ரியாதி³பத²வாதி³பத³த்தே²ஸு வத்தமானானங் இந்த்³ரியஸத்³தா³தி³பத²வீஸத்³தா³தீ³னங் நபுங்ஸகித்தி²லிங்க³வஸேன நித்³தே³ஸஸ்ஸ த³ஸ்ஸனதோ’’தி? தன்ன, நியமாபா⁴வதோ. இத்தி²பத³த்தே² வத்தமானஸ்ஸாபி ஹி ஸதோ கஸ்ஸசி ஸத்³த³ஸ்ஸ புல்லிங்க³வஸேன நித்³தே³ஸோ தி³ஸ்ஸதி யதா² ‘‘ஓரோதோ⁴’’தி. புரிஸபத³த்தே² வத்தமானஸ்ஸாபி ச ஸதோ கஸ்ஸசி இத்தி²லிங்க³வஸேன நித்³தே³ஸோ தி³ஸ்ஸதி, யதா² ‘‘அத்த²காமோஸி மே யக்க², ஹிதகாமாஸி தே³வதே’’தி. இத்தி²புரிஸபத³த்தே²ஸு பன அவத்தமானானம்பி ஸதங் கேஸஞ்சி ஸத்³தா³னங் ஏகஸ்மிங்யேவ ஞாணாதி³அத்தே² வத்தமானானங் இத்தி²புமனபுங்ஸகலிங்க³வஸேன நித்³தே³ஸோ தி³ஸ்ஸதி யதா² ‘‘பஞ்ஞா அமோஹோ ஞாண’’ந்தி, ‘‘தடங்தடீதடோ’’தி ச. ததா² ஹி அனித்தி²பூ⁴தோபி ஸமானோ ‘‘மாதுலா’’தி இத்தி²லிங்க³வஸேன ருக்கோ²பி சக்கவத்திஸுத்தடீகாயங் ‘‘மாதுலாதி இத்தி²லிங்க³வஸேன லத்³த⁴னாமோ ஏகோ ருக்கோ², தாய ஆஸன்னப்பதே³ஸே மாபிதத்தா நக³ரம்பி ‘மாதுலா’த்வேவ பஞ்ஞாயித்த². தேன வுத்தங் மாதுலாயந்தி ஏவங்னாமகே நக³ரே’’தி.
கோ³ஸத்³த³ஸ்ஸ நாமிகபத³மாலா ஹெட்டா² பகாஸிதா.
மோ வுச்சதி சந்தோ³, அட்ட²கதா²யங் பன ‘‘மா வுச்சதி சந்தோ³’’தி ஆகாரந்தபாடோ² தி³ஸ்ஸதி, ஓகாரந்தபாடே²ன தேன ப⁴விதப்³ப³ங் ஸக்கடபா⁴ஸாய ஏகக்க²ரகோஸதோ நயங் க³ஹெத்வா ‘‘மோ ஸிவோ சந்தி³மா சேவா’’தி ஓகாரந்தவஸேன வத்தப்³ப³த்தா. எத்த² ச ஓகாரந்தவஸேன வுத்தஸ்ஸ மஸத்³த³ஸ்ஸ சந்த³வாசகத்தே ‘‘புண்ணமீ, புண்ணமா’’தி ச நித³ஸ்ஸனபதா³னி. தத்த² புண்ணோ மோ எத்தா²தி புண்ணமீ, ஏவங் புண்ணமா, ரத்தாபெக்க²ங் இத்தி²லிங்க³வசனங். எத்த² பன ‘‘விஸாக²புண்ணமாய ரத்தியா பட²மயாமேபுப்³பே³னிவாஸங் அனுஸ்ஸரீ’’தி இத³ங் நித³ஸ்ஸனங். எத்த² ஸியா – யதி³ ‘‘புண்ணமா’’தி அயங்ஸத்³தோ³ ரத்தாபெக்கோ² இத்தி²லிங்கோ³.
‘‘புண்ணமாயே யதா² சந்தோ³, பரிஸுத்³தோ⁴ விரோசதி;
ததே²வ த்வங் புண்ணமனோ, விரோச த³ஸஸஹஸ்ஸியங்.
அன்வத்³த⁴மாஸே பன்னரஸே, புண்ணமாயே உபோஸதே²;
பச்சயங் நாக³மாருய்ஹ, தா³னங் தா³துமுபாக³மி’’ந்தி
ஆதீ³ஸு கத²ங் ‘‘புண்ணமாயே’’தி பத³ஸித்³தீ⁴தி? யகாரஸ்ஸ யேகாராதே³ஸவஸேன. த⁴ம்மிஸ்ஸரேன ஹி ப⁴க³வதா ‘‘புண்ணமாயா’’தி வத்தப்³பே³ ‘‘புண்ணமாயே’’தி வத³தா யகாரஸ்ஸ டா²னே யேகாரோ படி²தோ இத்தி²லிங்க³விஸயே த்தாகாரஸ்ஸ டா²னே த்தேகாரோ நீகாரஸ்ஸ டா²னே நேகாரோ விய ச. ததா² ஹி யதா² ‘‘அப்³யயதங் விலபஸி விரத்தே கோஸியாயனே’’தி இமஸ்மிங் ராத⁴ஜாதகே ‘‘விரத்தா’’தி வத்தப்³பே³ ‘‘விரத்தே’’தி வத³ந்தேன த்தாகாரஸ்ஸ டா²னே த்தேகாரோ படி²தோ, ‘‘கோஸியாயனீ’’தி ச வத்தப்³பே³ ‘‘கோஸியாயனே’’தி வத³ந்தேன நீகாரஸ்ஸ டா²னே நேகாரோ படி²தோ. ஏவங் ‘‘புண்ணமாயா’’தி வத்தப்³பே³ ‘‘புண்ணமாயே’’தி வத³தா யகாரஸ்ஸ டா²னே யேகாரோ படி²தோ. யதா² ச ‘‘த³க்கி²தாயே அபராஜிதஸங்க⁴’’ந்தி இமஸ்மிங் மஹாஸமயஸுத்தப்பதே³ஸே ‘‘த³க்கி²தாயா’’தி வத்தப்³பே³ ‘‘த³க்கி²தாயே’’தி வத³தா யகாரஸ்ஸ டா²னே யேகாரோ படி²தோ, ஏவமிதா⁴பி. யதா² பன ‘‘ஸபா⁴யே வா த்³வாரமூலே வா’’தி எத்த² ‘‘ஸபா⁴ய’’ந்தி லிங்க³ப்³யத்தயவஸேன ஸபா⁴ வுத்தா, ந ததா² இத⁴ ‘‘புண்ணமாய’’ந்தி லிங்க³ப்³யத்தயேன புண்ணமா வுத்தா, அத² கோ² ‘‘புண்ணமா’’தி ஆகாரந்தித்தி²லிங்க³வஸேன வுத்தா. ததா² ஹி ‘‘புண்ணமாயோ’’தி பத³ங் யகாரட்டா²னே யேகாருச்சாரணவஸேன ஸம்பூ⁴தங் பு⁴ம்மவசனந்தி த³ட்ட²ப்³ப³ங்.
மா வுச்சதி ஸிரீ. ததா² ஹி வித்³வமுக²மண்ட³னடீகாயங் ‘‘மாலினீ’’தி பத³ஸ்ஸத்த²ங் வத³தா ‘‘மா வுச்சதி லக்கீ², அலினீ ப⁴மரீ’’தி வுத்தங். லக்கீ²ஸத்³தோ³ ச ஸிரீஸத்³தே³ன ஸமானத்தோ², தேன ‘‘மா வுச்சதி ஸிரீ’’தி அத்தோ² அம்ஹேஹி அனுமதோ, ததா² போராணேஹிபி ‘‘மங் ஸிரிங் தா⁴ரேதி வித³தா⁴தி சாதி மந்தா⁴தா’’தி அத்தோ² பகாஸிதோ, தஸ்மா ‘‘மாலினீ மந்தா⁴தா’’தி ச இமானெத்த² நித³ஸ்ஸனபதா³னி. தத்ர புல்லிங்க³ஸ்ஸ தாவ மஸத்³த³ஸ்ஸ அயங் நாமிகபத³மாலா –
மோ, மா. மங், மே. மேன, மேஹி, மேபி⁴. மஸ்ஸ, மானங். மா, மஸ்மா, மம்ஹா, மேஹி, மேபி⁴. மஸ்ஸ, மானங். மே, மஸ்மிங், மம்ஹி, மேஸு. போ⁴ ம, ப⁴வந்தோ மா.
அயங் மாஸத்³த³ஸ்ஸ நாமிகபத³மாலா –
மா, மா, மாயோ. மங், மா, மாயோ. மாய, மாஹி, மாபி⁴. மாய, மானங். மாய, மாஹி, மாபி⁴. மாய, மானங். மாய, மாயங், மாஸு. போ⁴தி மே, போ⁴தியோ மாயோ.
எத்த² பன ஸிரீவாசகோ மாஸத்³தோ³ ச ஸத்³த³வாசகோ ராஸத்³தோ³ சாதி இமே ஸமானக³திகா ஏகக்க²ரத்தா நிச்சமாகாரந்தபகதிகத்தா இத்தி²லிங்க³த்தா ச.
தத்ர ஸங் வுச்சதி ஸந்தசித்தோ புரிஸோ. யங் லோகே ‘‘ஸப்புரிஸோ’’தி ச, ‘‘அரியோ’’தி ச, ‘‘பண்டி³தோ’’தி ச வத³ந்தி, தஸ்ஸேதங் அதி⁴வசனங் யதி³த³ங் ‘‘ஸ’’ந்தி. ஏவங் ஸப்புரிஸாரியபண்டி³தவாசகஸ்ஸ ஸங்ஸத்³த³ஸ்ஸ பச்சத்தவசனவஸேன அத்தி²பா⁴வே ‘‘ஸமேதி அஸதா அஸ’’ந்தி இத³ங் பயோக³னித³ஸ்ஸனங். எத்த² ஹி ‘‘ந ஸங் அஸ’’ந்தி ஸமாஸசிந்தாய ஸப்புரிஸாஸப்புரிஸபத³த்தா² ஸங் அஸங்ஸத்³தே³ஹி வுத்தாதி ஞாயந்தி, தஸ்மா ‘‘ஸப்புரிஸபத³த்தோ² பச்சத்தவசனேன ஸங்ஸத்³தே³ன வுத்தோ நத்தீ²’’தி வசனங் ந வத்தப்³ப³ங். யே ‘‘நத்தீ²’’தி வத³ந்தி, தேஸங் வசனங் ந க³ஹேதப்³ப³ங். நாமிகபத³மாலா பனஸ்ஸ ‘‘ஸங், ஸந்தங், ஸந்தே’’திஆதி³னா ஹெட்டா² பகாஸிதா. நபுங்ஸகலிங்க³த்தே ஸங் வுச்சதி த⁴னங், ‘‘மனுஸ்ஸஸ்ஸங். பரஸ்ஸங். ஸப்³ப³ஸ்ஸங். ஸப்³ப³ஸ்ஸஹரணங். பரஸ்ஸஹரண’’ந்திஆதீ³னெத்த² நித³ஸ்ஸனபதா³னி. தத்த² மனுஸ்ஸஸ்ஸ ஸங் மனுஸ்ஸஸ்ஸங். ஏவங் பரஸ்ஸ ஸங் பரஸ்ஸங். ஸப்³ப³ஸ்ஸ ஸங் ஸப்³ப³ஸ்ஸங். தஸ்ஸ ஹரணங் பரஸ்ஸஹரணங் ஸப்³ப³ஸ்ஸஹரணந்தி ஸமாஸோ. ததா² ஸங் வுச்சதி ஸுக²ங் ஸந்தி ச. வுத்தஞ்ஹி தப்³பா³சகத்தங் போராணகவிரசனாயங் –
‘‘தே³வதே³வோ
ஹதோபபாதஸங்ஸாரோ, ஸாரோ ஸங் தே³து தே³ஹின’’ந்தி.
தஸ்மா அயமெத்த² கா³தா², ‘‘ஸகலலோகஸங்கரோ தீ³பங்கரோ’’தி எத்த² ‘‘ஸங்கரோ’’தி பத³ஞ்சனித³ஸ்ஸனங். ‘‘ஸங், ஸானி, ஸா. ஸங், ஸானி, ஸே. ஸேன’’இச்சாதி³ புப்³பே³ பகாஸிதனயேன ஞெய்யங். எத்த² ச ஸோதூனங் ஸுக³தமதவரே கோஸல்லஜனநத்த²ங் ஸமாஸந்தக³தஸ்ஸ ஸங்ஸத்³த³ஸ்ஸ நாமிகபத³மாலங் பரிபுண்ணங் கத்வா கத²யாம –
மனுஸ்ஸஸ்ஸங், மனுஸ்ஸஸ்ஸானி, மனுஸ்ஸஸ்ஸா. மனுஸ்ஸஸ்ஸங், மனுஸ்ஸஸ்ஸானி, மனுஸ்ஸஸ்ஸே. மனுஸ்ஸஸ்ஸேன, மனுஸ்ஸஸ்ஸேஹி, மனுஸ்ஸஸ்ஸேபி⁴. மனுஸ்ஸஸ்ஸஸ்ஸ, மனுஸ்ஸஸ்ஸானங். மனுஸ்ஸஸ்ஸா, மனுஸ்ஸஸ்ஸஸ்மா, மனுஸ்ஸஸ்ஸம்ஹா, மனுஸ்ஸஸ்ஸேஹி, மனுஸ்ஸஸ்ஸேபி⁴. மனுஸ்ஸஸ்ஸஸ்ஸ, மனுஸ்ஸஸ்ஸானங். மனுஸ்ஸஸ்ஸே, மனுஸ்ஸஸ்ஸஸ்மிங், மனுஸ்ஸஸ்ஸம்ஹி, மனுஸ்ஸஸ்ஸேஸு. போ⁴ மனுஸ்ஸஸ்ஸ, பொ⁴ந்தோ மனுஸ்ஸஸ்ஸானி, மனுஸ்ஸஸ்ஸா. ஏஸ நயோ ‘‘பரஸ்ஸங் ஸப்³ப³ஸ்ஸ’’ந்திஆதீ³ஸுபி, ஸப்³பா³னேதானி பதா³னி அபி⁴தெ⁴ய்யலிங்கா³னீதி க³ஹேதப்³பா³னி.
யங் தங் கிமிதிஸத்³தா³னங், நாமமாலங் பனத்தரி;
ஸப்³ப³னாமபரிச்சே²தே³, பகாஸிஸ்ஸங் திலிங்க³தோ.
இச்சேவங் ஹெட்டா² உத்³தி³ட்டா²னங் கோ வி ஸாதீ³னங் நாமிகபத³மாலா ஸத்³தி⁴ங் அத்த²ந்தரனித³ஸ்ஸனபதே³ஹி விப⁴த்தா. தத்ரித³ங் லிங்க³வவத்தா²னங் –
கோ வி ஸா ஹொந்தி புல்லிங்கே³, பா⁴ ரா தீ² தீ⁴ கு பூ⁴ தி²யங்;
கங் க²ங் நபுங்ஸகே கோ³ து, புமே சேவித்தி²லிங்க³கே.
மோ புமே இத்தி²லிங்கே³ மா, ஸங் புமே ச நபுங்ஸகே;
யங் தங் கிமிதி ஸப்³ப³த்ர, லிங்கெ³ஸ்வேவ பவத்தரே.
இதோ அஞ்ஞானிபி ஏகக்க²ரானி உபபரிக்கி²த்வா க³ஹேதப்³பா³னி.
ஏவங்
ஸத்³தே³ ப⁴வந்தி குஸலா ந து கேசி அத்தே²,
அத்தே² ப⁴வந்தி குஸலா ந து கேசி ஸத்³தே³.
கோஸல்லமேவ பரமங் து³ப⁴யத்த² தஸ்மா,
யோக³ங் கரெய்ய ஸததங் மதிமா வரந்தி.
இதி நவங்கே³ ஸாட்ட²கதே² பிடகத்தயே ப்³யப்பத²க³தீஸு
விஞ்ஞூனங் கோஸல்லத்தா²ய கதே ஸத்³த³னீதிப்பகரணே
லிங்க³த்தயமிஸ்ஸகோ நாமிகபத³மாலாவிபா⁴கோ³
த³ஸமோ பரிச்சே²தோ³.