3. நிப்³பா³னகண்டோ³
இதா³னி ‘‘ஸத்³த⁴ம்மஸவனம்பி சாதி இமஸ்ஸ ஸங்வண்ணனாக்கமோ ஸம்பத்தோ தத்த² ஸத்³த⁴ம்மஸவனம்பி ச லோகே து³ல்லப⁴மேவ ததா² ஹி ஸத்³த⁴ம்மோ நாம திவிதோ⁴ ஹோதி. பரியத்திஸத்³த⁴ம்மோ, படிபத்திஸத்³த⁴ம்மோ, படிவேத⁴ஸத்³த⁴ம்மோதி. தத்த² பரியத்திஸத்³த⁴ம்மோ நாம தேபிடகங் பு³த்³த⁴வசனங். படிபத்திஸத்³த⁴ம்மோ நாம தேரஸது⁴தங்கா³னி அஸீதி க²ந்த⁴கவத்தாத³யோ அபி⁴ஸமாசாரவத்தாதீ³னி. படிவேத⁴ஸத்³த⁴ம்மோ நாம சதுஸச்சப்படிவேதோ⁴. தேஸு பரியத்திஸத்³த⁴ம்மோ த்³வின்னங் ஸத்³த⁴ம்மானங் புப்³ப³ங்க³மோயேவ பத³ட்டா²னஞ்ச. கஸ்மா தங்மூலகத்தா ததா² ஹி பரியத்தியா அஸதி படிவேதோ⁴ நாம நத்தி². பரியத்தியா அந்தரஹிதாய படிபத்தி, படிபத்தியா அந்தரஹிதாய அதி⁴க³மோ அந்தரதா⁴யதி. கிங் காரணா அயஞ்ஹி பரியத்தி படிபத்தியா பச்சயோ ஹோதி. படிபத்திஅதி⁴க³மஸ்ஸாபி பரியத்தியேவ பமாணங். தத்த² படிவேதோ⁴ ச படிபத்தி ச ஹோதிபி நஹோதிபி. ஏகஸ்மிஞ்ஹி காலே படிவேத⁴த⁴ரா பி⁴க்கூ² ப³ஹூ ஹொந்தி, ‘‘ஏஸ பி⁴க்கு² புது²ஜ்ஜனோ’’தி அங்கு³லிங் பஹரித்வா த³ஸ்ஸேதப்³போ³ ஹோதி. இமஸ்மிங் யேவ தீ³பே ஏகவாரங் புது²ஜ்ஜனபி⁴க்கு²னாம நாஹோஸி. படிபத்திபூரகாபி கதா³சி ப³ஹூ ஹொந்தி கதா³சி அப்பா. இதி படிவேதோ⁴ ச படிபத்தி ச ஹோதிபி ந ஹோதிபி. ஸாஸனஸ்ஸ டி²தியா பன பரியத்தியேவ பமாணங் பண்டி³தோ ஹி தேபிடகங் ஸுத்வா த்³வேபி பூரேதி, யதா² அம்ஹாகங் போ³தி⁴ஸத்தோ ஆளாரஸ்ஸ ஸந்திகே பஞ்ச அபி⁴ஞ்ஞா ஸத்த ச ஸமாபத்தியோ நிப்³ப³த்தெத்வா நேவஸஞ்ஞானாஸஞ்ஞாயதன ஸமாபத்தியா பரிகம்மங் புச்சி². ஸோ ‘‘ந ஜானாமீ’’தி ஆஹ. ததோ உத³கஸ்ஸ ஸந்திகங் க³ந்த்வா அதி⁴க³தவிஸேஸங் ஸங்ஸந்தி³த்வா நேவஸஞ்ஞானாஸஞ்ஞாயதனஸ்ஸ பரிகம்மங் புச்சி². ஸோ ஆசிக்கி², தஸ்ஸ வசனஸமனந்தரமேவ மஹாஸத்தோ தங் ஸம்பாதே³ஸி ஏவமேவ பஞ்ஞவா பி⁴க்கு² பரியத்திங் ஸுத்வா த்³வேபி பூரேதி தஸ்மா பரியத்தியா டி²தாய ஸாஸனங் டி²தங் ஹோதி யதா² மஹாதளாகஸ்ஸ பாளியா தி²ராய உத³கங் ந ட²ஸ்ஸதீதி ந வத்தப்³ப³ங் உத³கே ஸதி பது³மாதீ³னி புப்பா²னி ந புப்பி²ஸ்ஸந்தீதி ந வத்தப்³ப³ங் ஏவமேவ மஹாதளாகஸ்ஸ தி²ரபாளிஸதி³ஸே தேபிடகே பு³த்³த⁴வசனே ஸதி மஹாதளாகே உத³கஸதி³ஸா படிபத்திபூரகா குலபுத்தா நத்தீ²தி ந வத்தப்³ப³ங். தேஸு ஸதி மஹாதளாகேஸு பது³மாதீ³னி புப்பா²னி விய ஸோதாபன்னாத³யோ அரியபுக்³க³லா நத்தீ²தி ந வத்தப்³ப³ங், ஏகந்ததோ பரியத்தியேவ பமாணங் பரியத்தியா அந்தரஹிதாய படிபத்திபடிவேதா⁴னங் அந்தரதா⁴னதோ. தத்த² பரியத்தினாம தேபிடகங் பு³த்³த⁴வசனங் ஸாட்ட²கதா² பாளியாவ ஸா திட்ட²தி, தாவ பரியத்தி பரிபுண்ணா ஹோதி. க³ச்ச²ந்தே காலே கலியுக³ராஜானோ அத⁴ம்மிகா ஹொந்தி தேஸு அத⁴ம்மிகேஸு ராஜாமச்சாத³யோ அத⁴ம்மிகா ஹொந்தி ததா² ரட்ட²ஜனபத³வாஸினோபி அத⁴ம்மிகா ஏதேஸங் அத⁴ம்மிகதாய ந தே³வோ ஸம்மா வஸ்ஸதி, ததோ ஸஸ்ஸானி ந ஸம்பஜ்ஜந்தி. தேஸு ஸம்பஜ்ஜந்தேஸு பச்சயதா³யகா பி⁴க்கு²ஸங்க⁴ஸ்ஸ பச்சயே தா³துங் ந ஸக்கொந்தி. பி⁴க்கூ² பச்சயேஹி கிலமந்தா அந்தேவாஸிகே ஸங்க³ஹேதுங் ந ஸக்கொந்தி. க³ச்ச²ந்தே க³ச்ச²ந்தே காலே பரியத்தி பரிஹாயதி, அத்த²வஸேன தா⁴ரேதுங் ந ஸக்கொந்தி, பாளிவஸேனேவ தா⁴ரெந்தி. ததோ காலே க³ச்ச²ந்தே பாளிம்பி ஸகலங் தா⁴ரேதுங் ந ஸக்கொந்தி பட²மங் அபி⁴த⁴ம்மபிடகங் பரிஹாயதி. பரிஹாயமானங் மத்த²கதோ பட்டா²ய பரியத்தி ஹாயதி பட²மஞ்ஹி மஹாபகரணங் பரிஹாயதி. தஸ்மிங் பரிஹாயமானே யமகங், கதா²வத்து², புக்³க³லபஞ்ஞத்தி, தா⁴துகதா², விப⁴ங்கோ³, த⁴ம்மஸங்க³ஹோதி ஏவங் அபி⁴த⁴ம்மபிடகே பரிஹீனே மத்த²கதோ பட்டா²ய ஸுத்தந்தபிடகங் பரிஹாயதி. பட²மஞ்ஹி அங்கு³த்தரனிகாயோ பரிஹாயதி. தஸ்மிம்பி பட²மங் ஏகாத³ஸனிபாதோ…பே॰… ததோ ஏகனிபாதோதி ஏவங் அங்கு³த்தரே பரிஹீனே மத்த²கதோ பட்டா²ய ஸங்யுத்தனிகாயோ பரிஹாயதி, பட²மங் மஹாவக்³கோ³ பரிஹாயதி. ததோ பட்டா²ய ஸளாயதனவக்³கோ³, க²ந்த⁴வக்³கோ³, நிதா³னவக்³கோ³, ஸகா³தா²வக்³கோ³தி ஏவங் ஸங்யுத்தனிகாயே பரிஹீனே மத்த²கதோ பட்டா²ய மஜ்ஜி²மனிகாயோ பரிஹாயதி பட²மஞ்ஹி உபரிபண்ணாஸகோ பரிஹாயதி. ததோ மஜ்ஜி²மபண்ணாஸகோ, ததோ மூலபண்ணாஸகோதி ஏவங் மஜ்ஜி²மனிகாயே பரிஹீனே மத்த²கதோ பட்டா²ய தீ³க⁴னிகாயோ பரிஹாயதி, பட²மஞ்ஹி பாதி²யவக்³கோ³ பரிஹாயதி ததோ மஹாவக்³கோ³, ததோ க²ந்த⁴கவக்³கோ³தி தீ³க⁴னிகாயே பரிஹீனே ஸுத்தந்தபிடகங் பரிஹீனங் நாம ஹோதி. வினயபிடகேன ஸத்³தி⁴ங் ஜாதகமேவ தா⁴ரெந்தி. வினயபிடகங் லஜ்ஜினோ தா⁴ரெந்தி. லாப⁴காமா பன ஸுத்தந்தே கதி²தேபி ஸல்லக்கெ²ந்தா நத்தீ²தி ஜாதகமேவ தா⁴ரெந்தி. க³ச்ச²ந்தே காலே ஜாதகம்பி தா⁴ரேதுங் ந ஸக்கொந்தி. அத² நேஸங் பட²மங் வெஸ்ஸந்தரஜாதகங் பரிஹாயதி. ததோ படிலோமக்கமேன புண்ணகஜாகதகங், மஹானாரத³கஸ்ஸபஜாதகங் பரிஹாயதி. வினயபிடகமேவ தா⁴ரெந்தி. க³ச்ச²ந்தே காலே தம்பி மத்த²கதோ பரிஹாயதி பட²மஞ்ஹி பரிவாரோ பரிஹாயதி, ததோ க²ந்த⁴கோ பி⁴க்கு²னீவிப⁴ங்கோ³ மஹாவிப⁴ங்கோ³தி அனுக்கமேன உபோஸத²க்க²ந்த⁴கமத்தமேவ தா⁴ரெந்தி, ததா³ பரியத்தி அனந்தரஹிதாவ ஹோதி. யாவ பன மனுஸ்ஸேஸு சதுப்பதி³ககா³தா²பி பவத்ததி, தாவ பரியத்தி அனந்தரஹிதாவ ஹோதி. யதா³ ஸத்³தோ⁴ பஸன்னோ ராஜா ஹத்தி²க்க²ந்தே⁴ ஸுவண்ணசங்கோடகம்ஹி ஸஹஸ்ஸத்த²விகங் ட²பாபெத்வா ‘‘பு³த்³தே⁴ஹி கதி²தங் சதுப்பதி³கங் கா³த²ங் ஜானந்தோ இமங் ஸஹஸ்ஸங் க³ண்ஹதூ’’தி நக³ரே பே⁴ரிங் சராபெத்வா க³ண்ஹகங் அலபி⁴த்வா ஏகவாரங் சராபிதே ந ஸுணந்தாபி ஹொந்தி அஸுணந்தாபி, யாவ ததியங் சராபெத்வா க³ண்ஹகங் அலபி⁴த்வா ராஜபுரிஸா ஸஹஸ்ஸத்த²விகங் புன ராஜகுலங் பவேஸெந்தி, ததா³ பரியத்திஅந்தரஹிதா நாம ஹோதி. ஏவங் பரியத்தியா அந்தரஹிதாய படிபத்திபி படிவேதோ⁴பி அந்தரஹிதோவ ஹோதி. ஸத்³த⁴ம்மஸவனஸ்ஸ து³ல்லப⁴பா⁴வோ த⁴ம்மஸொண்ட³கவத்து²னா தீ³பேதப்³போ³ அம்ஹாகங் கிர ஸம்மாஸம்பு³த்³தோ⁴ கஸ்ஸபஸம்மாஸம்பு³த்³த⁴ஸ்ஸ த⁴ம்மராஜஸ்ஸ ஸாஸனந்தரதா⁴னதோ நசிரேனேவ காலேன பா³ராணஸிரஞ்ஞோ புத்தோ த⁴ம்மஸொண்ட³கராஜகுமாரோ ஹுத்வா பிதுஅச்சயேன ரஜ்ஜே பதிட்டா²ய கஸ்ஸபத³ஸப³லேன தே³ஸிதங் த⁴ம்மங் ஸோதுகாமோ ஹுத்வா மாஸமத்தங் ரஜ்ஜங் கத்வா அம்ஹாகங் ஸம்மாஸம்பு³த்³தோ⁴ இமஸ்மிங் யேவ ப⁴த்³த³கப்பே ரஜ்ஜங் காரெத்வா தே³வனக³ரஸதி³ஸே பா³ராணஸினக³ரே சக்கவத்திரஜ்ஜஸதி³ஸங் ரஜ்ஜங் கரொந்தோ ஏவங் சிந்தேஸி… ‘‘மய்ஹங் ஏவரூபங் ரஜ்ஜங் கிங் விலாஸங் ரஜ்ஜானுபா⁴வங் ஸத்³த⁴ம்மவியோகே³ன, தி³வாகரவிரஹிதோ ஆகாஸோ விய, ஸஸங்கவிரஹிதரத்தி விய, தா³டா²விரஹிதக³ஜோ விய, வேலந்தவிரஹிதமஹாஸமுத்³தோ³ விய சக்கு²விரஹித ஸுஸஜ்ஜிதவத³னங் விய, ஸுக³ந்த⁴விரஹிதபாரிச²த்தபுப்ப²ங் விய, சதுஅக்க²ரனியமிதத⁴ம்மதே³ஸனாவியோகே³ன மய்ஹங் இத³ங் ரஜ்ஜங் ந ஸோப⁴தீ’’தி சிந்தெத்வா ஸுவண்ணசங்கோடகேன ஸஹஸ்ஸத்த²விகங் ப⁴ண்ட³கங் ஸுஸஜ்ஜிதங் மங்க³லஹத்தி²கும்பே⁴ ட²பெத்வா பா³ராணஸீனக³ரே மஹாவீதி²யங் பே⁴ரிங் சராபேதி ‘‘ஏகபதி³கங் வா த்³விபதி³கங் வா திபதி³கங் வா சதுப்பதி³கங் வா த⁴ம்மபத³ங் ஜானந்தஸ்ஸ த³ம்மீ’’தி ஏவங் பே⁴ரிங் சராபெத்வா த⁴ம்மஜானநகங் அலபி⁴த்வா புனப்புனங் த்³விஸஹஸ்ஸங் திஸஹஸ்ஸங் யாவ ஸதஸஹஸ்ஸங் கோடி த்³வே ஸஹஸ்ஸகோடி, ஸதஸஹஸ்ஸகோடி கா³மனிக³மஜனபத³ஸேனாபதிட்டா²னங் உபராஜட்டா²னங். பரியோஸானே த⁴ம்மதே³ஸகங் அலபி⁴த்வா அத்தனோ ஸுவண்ணபீட²கங் ஸேதச்ச²த்தங் சஜித்வாபி த⁴ம்மதே³ஸகங் அலபி⁴த்வா ரஜ்ஜஸிரிங் பஹாய அத்தானங் சஜித்வா ‘‘த⁴ம்மதே³ஸகஸ்ஸ தா³ஸோ ஹுத்வாபி த⁴ம்மங் ஸொஸ்ஸாமீ’’தி வத்வா ஏவம்பி த⁴ம்ம தே³ஸகங் அலபி⁴த்வா விப்படிஸாரீ ஹுத்வா ‘‘கிங் மே ஸத்³த⁴ம்மவியோகே³ன ரஜ்ஜேனாதி அமச்சானங் ரஜ்ஜங் நிய்யாதெத்வா ஸத்³த⁴ம்மக³வேஸகோ ஹுத்வா த⁴ம்மஸொண்ட³கமஹாராஜா மஹாவனங் பாவிஸி த⁴ம்மஸொண்ட³கமஹாராஜஸ்ஸ ஸத்³த⁴ம்மஸவனங் ஸந்தா⁴ய பவிட்ட²க்க²கே ஸக்கதே³வமஹாராஜஸ்ஸ வேஜயந்தபாஸாதோ³ ஸஹேவ கிண்ணிகாய கம்போ அஹோஸி, பண்டு³கம்ப³லஸிலாஸனங் உண்ஹாகாரங் அஹோஸி. ஸக்கோதே³வராஜா கேனகாரணேன பண்டு³கம்ப³லஸிலாஸனங் உண்ஹாகாரங் அஹோஸீ’’தி சிந்தெத்வா அத்தனோ ஸஹஸ்ஸனெத்தேன தே³வமனுஸ்ஸேஸு வித்தா²ரெத்வா ஓலோகெந்தோ த⁴ம்மக³வேஸகோ ஹுத்வா வனங் பவிட்ட²ங் த⁴ம்மஸொண்ட³கமஹாராஜானங் தி³ஸ்வா சிந்தேஸி… ‘‘அஜ்ஜ மே அத்தானம்பி ஜஹாய ரக்க²ஸவேஸங் மாபெத்வா ஏதங் அனிச்சபரிதீ³பனங் ஜாதிஜராப்³யாதி⁴மரணங் ஸகலஸரீரே தோ³ஸங் த³ஸ்ஸெத்வா த⁴ம்மங் தே³ஸெத்வா ஏதங் ஸகரஜ்ஜேயேவ பதிட்டா²பேதப்³ப³’’ந்தி சிந்தெத்வா ஸக்கோ தே³வராஜா யக்க²ஸரூபங் மாபெத்வா போ³தி⁴ஸத்தஸ்ஸ அபி⁴முகோ² அவிதூ³ரே அத்தானங் த³ஸ்ஸேஸி. தங் தி³ஸ்வா த⁴ம்மஸொண்ட³கமஹாராஜா ஏவங் சிந்தேஸி… ‘‘ஏவங்ரூபோ நாம ரக்க²ஸோ த⁴ம்மங் ஜானெய்யா’’தி, சிந்தெத்வா அவிதூ³ரே டா²னே ட²த்வா புச்சா²மீதி ரக்க²ஸேன ஸத்³தி⁴ங் ஸல்லபந்தோ ஆஹ ‘‘ஸாமிபுஞ்ஞதே³வராஜ இமஸ்மிங் பன வனக⁴னே வஸனகதே³வராஜா கிங் நுகோ² த⁴ம்மங் ஜானாஸீ’’தி, தே³வதா ‘‘மஹாராஜ த⁴ம்மங் ஜானாமீ’’தி ஆஹ. ‘‘யதி³ த⁴ம்மங் ஜானாஸி, மய்ஹங் த⁴ம்மகத²ங் கதே²தா²’’தி ஆஹ. ‘‘அஹங் துய்ஹங் த⁴ம்மங் கதெ²ஸ்ஸாமி, த்வங் மய்ஹங் கீதி³ஸங் த⁴ம்மகதி²கஸ்ஸ ஸக்காரங் கரிஸ்ஸஸீ’’தி ஆஹ. ‘‘ஏவங் ஸந்தே மய்ஹங் த⁴ம்மங் கதெ²த்வா பச்சா² மய்ஹங் ஸரீரே மங்ஸங் கா²தி³ஸ்ஸஸீ’’தி ஆஹ. ‘‘அஹங் மஹாராஜ சா²தோ ஹுத்வா த⁴ம்மங் கதே²துங் ந ஸக்கோமீ’’தி ஆஹ. ‘‘யதி³ தும்ஹே பட²மங் மங்ஸங் கா²த³த², த⁴ம்மங் கோ ஸுணிஸ்ஸதீ’’தி ஆஹ. புன ஸோ ரக்க²ஸோ ‘‘நாஹங் த⁴ம்மங் தே³ஸேதுங் ஸக்கோமீ’’தி. புன ராஜா ‘‘மய்ஹங் த⁴ம்மபடிலாப⁴ஞ்ச தும்ஹாகங் மங்ஸபடிலாப⁴ஞ்ச தும்ஹே ஜானித்வா மய்ஹங் த⁴ம்மங் தே³ஸேதா²’’தி ஆஹ. அத² ஸக்கோ தே³வராஜா ‘‘ஸாது⁴ ஹோதா²’’தி வத்வா அவிதூ³ரே டா²னே உப்³பே³தே⁴ன திகா³வுதமத்தங் மஹந்தங் அஞ்ஜனபப்³ப³தங் மாபெத்வா ஏவமாஹ… ‘‘ஸசே மஹாராஜ இமங் பப்³ப³தமுத்³த⁴னிங் ஆரூய்ஹ ஆகாஸா உப்பதித்வா த்வங் மம முகே² பதிஸ்ஸஸி, அஹங் தே ஆகாஸக³தகாலே த⁴ம்மங் தே³ஸெஸ்ஸாமி, ஏவங் ஸந்தே துய்ஹஞ்ச த⁴ம்மப்பலாபோ⁴ மய்ஹஞ்ச மங்ஸபடிலாபோ⁴ ப⁴விஸ்ஸதீ’’தி ஆஹ. தஸ்ஸ கத²ங் ஸுத்வா த⁴ம்மஸொண்ட³கமஹாராஜா ‘‘அனமதக்³கே³ ஸங்ஸாரே புரிஸோ ஹுத்வா அத⁴ம்மஸமங்கீ³ ஹுத்வா அத⁴ம்மஸ்ஸேவ அத்தா²ய பாணாதிபாதோ அதி³ன்னாதா³னோ காமேஸுமிச்சா²சாரோ ஸூகரிகோ ஓரப்³பி⁴கோ ஸாகுணி கோ சோரோ பரதா³ரிகோ தங் க³ஹெத்வா ஸீஸச்சி²ன்னானங் லோஹிதங் சதூஸு மஹாஸமுத்³தே³ஸு உத³கதோபி ப³ஹுதரங் மாதாபிதுஆதீ³னம்பி மனாபானங் அத்தா²ய ரோத³ந்தானங் அஸ்ஸு சதூஸுமஹாஸமுத்³தே³ஸு உத³கதோபி ப³ஹுதரங், இமங் பன ஸரீரங் த⁴ம்மஸ்ஸ அத்தா²ய விக்கிணாமி தங் மஹப்ப²லஞ்ச மனாபஞ்சா’’தி சிந்தெத்வா ‘‘ஸாது⁴ மாரிஸ ஏவங் கரோமீ’’தி பப்³ப³தங் ஆரூய்ஹ பப்³ப³தக்³கே³ டி²தோ ‘‘மம ரஜ்ஜேன ஸத்³தி⁴ங் மய்ஹங் ஸஜீவஸரீரங் ஸத்³த⁴ம்மஸ்ஸத்தா²ய த³ஸ்ஸாமீ’’தி ஸோமனஸ்ஸோ ஹுத்வா ‘‘த⁴ம்மங் கதே²தா²’’தி ஸத்³த⁴ம்மத்தா²ய ஜீவிதங் பரிச்சஜித்வா ஆகாஸதோ உப்பதித்வா த⁴ம்மங் கதே²தா²தி ஆஹ. அத² ஸக்கோ தே³வராஜா ஸகத்தபா⁴வேன ஸப்³பா³லங்காரேஹி படிமண்டி³தோ அதிவிய ஸோதுங் ஸோமனஸ்ஸோ ஆகாஸதோ பதந்தங் தி³ப்³ப³ப²ஸ்ஸேன பராமஸந்தோ உரேன படிக்³க³ண்ஹித்வா தே³வலோகங் நெத்வா பண்டு³கம்ப³லஸிலாஸனே நிஸீதா³பெத்வா மாலாக³ந்தா⁴தீ³ஹி பூஜெத்வா த⁴ம்மஸொண்ட³கமஹாராஜஸ்ஸ த⁴ம்மங் தே³ஸெந்தோ இமங் கா³த²மாஹ.
‘‘அனிச்சா வத ஸங்கா²ரா, உப்பாத³வயத⁴ம்மினோ;
உப்பஜ்ஜித்வா நிருஜ்ஜ²ந்தி, தேஸங் வூபஸமோ ஸுகோ²’’தி.
ஏவங் ஸக்கோ த⁴ம்மஸொண்ட³கமஹாராஜஸ்ஸ த⁴ம்மங் தே³ஸெத்வா தே³வலோகஸம்பத்திங் த³ஸ்ஸெத்வா தே³வலோகதோ ஆனெத்வா ஸகரஜ்ஜே பதிட்டா²பெத்வா அப்பமாதே³ன ஓவதி³த்வா தே³வலோகமேவ அக³மாஸி ஏவங் ஸத்³த⁴ம்மஸவனஸ்ஸாபி து³ல்லப⁴பா⁴வோ வேதி³தப்³போ³. ஏவங் பரியத்திஅந்தரதா⁴னேன படிபத்தி படிவேதா⁴பி அந்தரதா⁴யந்தி. எத்த² ச தீணி பரினிப்³பா³னானி வேதி³தப்³பா³னி கதமானி தீணி பரினிப்³பா³னானி. கிலேஸபரினிப்³பா³னங், க²ந்த⁴பரினிப்³பா³னங், தா⁴துபரினிப்³பா³னந்தி. தத்த² கிலேஸபரினிப்³பா³னங் போ³தி⁴மண்டே³யேவ ஹோதி, ப⁴க³வா ஹி போ³தி⁴மண்டே³யேவ வீரியபாதே³ஹி ஸீலபத²வியங் பதிட்டா²ய ஸத்³தா⁴ஹத்தே²ன கம்மக்க²யகரங் ஞாணப²ரஸுங் க³ஹெத்வா ஸப்³போ³ லோப⁴தோ³ஸமோஹவிபரீதமனஸிகாரஅஹிரீகானொத்தப்பகோதூ⁴பனாஹமக்க²பளாஸ- இஸ்ஸாமச்ச²ரியமாயாஸாடெ²ய்யத²ம்ப⁴ஸாரம்ப⁴மானாதி மானமத³பமாத³தண்ஹா’விஜ்ஜாதிவிதா⁴குஸலமூலது³ச்சரிதஸங்கிலேஸமலவிஸமஸஞ்ஞாவிதக்க பபஞ்சசதுப்³பி³த⁴விபரியேஸஆஸவக³ந்த²ஓக⁴யோகா³’க³திக³ந்து²’ பாதா³னபஞ்சசேதோகி²லவினிப³ந்த⁴னீவரணா’பி⁴னந்த³ன ச²விவாத³மூலதண்ஹாகாயஸத்தானுஸய அட்ட²மிச்ச²த்தனவதண்ஹாமூலகத³ஸாகுஸலகம்மபத² த்³வாஸட்டி²தி³ட்டி²க³த அட்ட²ஸததண்ஹாவிசரிதப்ப பே⁴த³ ஸப்³ப³த³ரத²பரிளாஹகிலேஸஸதஸஹஸ்ஸானி, ஸங்கே²பதோ வா பஞ்ச கிலேஸஅபி⁴ஸங்கா²ரக²ந்த⁴மச்சுதே³வபுத்தமாரே அஸேஸதோ ஹதா விஹதா அனபா⁴வங்கதா தஸ்மா ஸப்³பே³பி கிலேஸா போ³தி⁴மண்டே³யேவ நிப்³பா³னங் நிரோத⁴ங் க³ச்ச²ந்தீதி கிலேஸனிப்³பா³னங் போ³தி⁴மண்டே³யேவ ஹோதி எத்த² ச போ³தீ⁴தி அரஹத்தமக்³க³ஞ்ஞாணங் அதி⁴ப்பேதங் ததா² ஹி ஸப்³பே³ஸம்பி பு³த்³த⁴பச்சேகபு³த்³த⁴அரியஸாவகானங் அரஹத்தமக்³க³க்க²ணேயேவ ஸப்³பே³பி கிலேஸா அஸேஸங் நிரோத⁴ங் நிப்³பா³னங் க³ச்ச²ந்தி தேபி பு³த்³தா⁴ உக்³க⁴டிதவிஞ்ஞூவிப⁴ஜ்ஜிதஞ்ஞூனெய்யவஸேன திவிதா⁴ ஹொந்தி வுத்தஞ்ஹேதங் ஜாதத்தகீஸோதத்தகீனிதா³னே.
‘‘உக்³க⁴டிதஞ்ஞுனாமகோ, விப⁴ஜ்ஜிதஞ்ஞுனோ து³வே;
ததியோ நெய்யோ நாமேன, போ³தி⁴ஸத்தோ திதா⁴ மதோ.
உக்³க⁴டிதஞ்ஞுபோ³தி⁴ஸத்தோ, பஞ்ஞாதி⁴கோதி நாமஸோ;
விப⁴ஜ்ஜிதஞ்ஞுபோ³தி⁴ஸத்தோ, வுத்தோ வீரியாதி⁴கோ.
மதோ நெய்யோ ஸத்³தா⁴தி⁴கோ நாம, போ³தி⁴ஸத்தா இமே தயோ;
கப்பேச ஸதஸஹஸ்ஸே, சதுரோ ச அஸங்க்²யெய்யே.
பூரெத்வா போ³தி⁴ஸம்பா⁴ரே, லத்³த⁴ப்³யாகரணோ புரே;
உக்³க⁴டிதஞ்ஞுபோ³தி⁴ஸத்தோ, பத்தோ ஸம்போ³தி⁴முத்தமங்.
அட்ட²மே ச அஸங்க்²யெய்யே, கப்பே ச ஸதஸஹஸ்ஸே;
பூரெத்வா போ³தி⁴ஸம்பா⁴ரே, லத்³த⁴ப்³யாகரணோ புரே.
விபஞ்சிதஞ்ஞுபோ³தி⁴ஸத்தோ, பத்தோ ஸம்போ³தி⁴முத்தமங்;
நெய்யோ து போ³தி⁴ஸத்தோ ச, ஸோளஸே அஸங்க்²யெய்யே.
கப்பே ச ஸதஸஹஸ்ஸே, லத்³த⁴ப்³யாகரணோ புரே;
பூரெத்வா போ³தி⁴ஸம்பா⁴ரே, பத்தோ ஸம்போ³தி⁴முத்தம’’ ந்தி.
ஸுத்தனிபாதஅபதா³னட்ட²கதா²ஸு பன ‘‘பு³த்³தா⁴னங் ஆனந்த³ ஹெட்டி²மபரிச்சே²தே³ன சத்தாரி அஸங்க்²யெய்யானி கப்பஸதஸஹஸ்ஸஞ்ச, மஜ்ஜி²மபரிச்சே²தே³ன அட்ட² அஸங்க்²யெய்யானி கப்பஸதஸஹஸ்ஸஞ்ச, உபரிமபரிச்சே²தே³ன ஸோளஸாஸங்க்²ய்யெய்யானி கப்பஸதஸஹஸ்ஸஞ்ச. ஏதேச பஞ்ஞாதி⁴கஸத்³தா⁴தி⁴கவீரியாதி⁴கவஸேன வேதி³தப்³பா³தி வுத்தங் தேஸு பஞ்ஞாதி⁴கோ சத்தாரி அஸங்க்²யெய்யானி கப்பஸதஸஹஸ்ஸஞ்ச, ஸத்³தா⁴தி⁴கோ அட்ட²அஸங்கெ²ய்யெய்யானி கப்பஸதஸஹஸ்ஸஞ்ச, வீரியாதி⁴கோ ஸோளஸஅஸங்க்²யெய்யானி கப்பஸதஸஹஸ்ஸஞ்சாதி வேதி³தப்³ப³ங். தத்த² பஞ்ஞாதி⁴கோ யோனிக³திவிஞ்ஞாணட்டி²திஸத்தாவாஸேஸு ஸங்ஸரந்தோபி பஞ்ஞாப³ஹுல்லவஸேன ஸம்பன்னஜ்ஜா²ஸய ஸம்ப⁴வதோ கி²ப்பஞ்ஞேவ தஸ்ஸ ஸம்போ³தி⁴. ஸத்³தா⁴தி⁴கோ பன மந்த³பஞ்ஞத்தா அஸ்ஸத்³த³ஹிதப்³பே³பி ஸத்³த³ஹதி, தஸ்மா தஸ்ஸ மந்த³ஞ்ஞேவ ஸம்போ³தி⁴. வீரியாதி⁴கோ பன உப⁴யமந்தோ³ அஸ்ஸத்³த³ஹிதப்³ப³ம்பி ஸத்³த³ஹதி, அகத்தப்³ப³ம்பி கரோதி, ராஜா பஸ்ஸேனதீ³கோஸலோ யதா² ஸோ ஹி ஸப்³ப³ஞ்ஞுபு³த்³தே⁴ த⁴ரமானேயேவ அக³மனீயம்பி பரதா³ரங் க³ந்துங் சித்தங் உப்பாதெ³த்வா பரங் ஜீவிதா வோரோபேதுங் ஆரத்³தோ⁴ நேரயிகானங் விரவந்தானங் து³-ஸ-ந-ஸோதி ஸத்³த³ம்பி ஸுத்வா அதிவிமூள்ஹோ ஸப்³ப³ஞ்ஞுபு³த்³த⁴ங் ட²பெத்வா மிச்சா²தி³ட்டி²ப்³ராஹ்மணங் புச்சி²த்வா தஸ்ஸ வசனேன ஸப்³ப³ஜனானங் யஞ்ஞத்தா²ய து³க்க²ங் உப்பாதே³ஸி கோ பனவாதோ³ அனுப்பன்னே பு³த்³தே⁴, ததா² ஹி ஏஸ கஸ்ஸபப⁴க³வதோ ஸாஸனந்தரதா⁴னேன அந்த⁴பூ⁴தே லோகே பா³ராணஸியங் ராஜா ஹுத்வாபி நிக்³ரோத⁴ருக்க²தே³வதாய யஞ்ஞத்தா²ய ஏகஸதராஜானோ மஹேஸீஹி ஸத்³தி⁴ங் மாரேதுங் ஆரத்³தோ⁴. ஏவங் வீரியாதி⁴கோ உப⁴யமந்தோ³, தஸ்மா தஸ்ஸ ஸம்போ³தி⁴ அதிமந்தோ³தி ஏவங் பஞ்ஞாதி⁴கஸத்³தா⁴தி⁴கவீரியாதி⁴கவஸேன காலஸ்ஸாபி ரஸ்ஸதீ³க⁴பா⁴வோ வேதி³தப்³போ³தி. பச்சி²மனயோஏவ பஸங்ஸிதப்³போ³தி அயமெத்த² அம்ஹாகங் அத்தனோமதி. க²ந்த⁴பரினிப்³பா³னங் பன குஸினாராய உபவத்தனே மல்லானங் ஸாலவனே யமகஸாலானமந்தரே வேஸாக²புண்ணமதி³வஸே பச்சூஸஸமயே ஏகூனவீஸதியா சுதிசித்தேஸு மெத்தாபுப்³ப³பா⁴க³ஸ்ஸ ஸோமனஸ்ஸஞாணஸம்பயுத்தஅஸங்கா²ரிககுஸலசித்தஸதி³ஸேன மஹாவிபாகசித்தேன அப்³யாகதேன சரிமகங் கத்வா கத்த²சி ப⁴வே படிஸந்தி⁴விஞ்ஞாணஸ்ஸ அனந்தரபச்சயோ ஹுத்வா கம்மதண்ஹாகிலேஸேஹி அனுபாதா³னோ ஸப்³பு³பதி⁴படினிஸ்ஸக்³கோ³ உபாதி³ன்னகக்க²ந்த⁴பரிச்சாகோ³ ஹோதீதி வேதி³தப்³ப³ங். வித்தா²ரோ பன தீ³க⁴னிகாயே மஹாவக்³கே³ மஹாபரினிப்³பா³னஸுத்தவண்ணனாயங் ஓலோகேதப்³போ³. தத்த² விதே³ஸங் க³ச்ச²ந்தோ புரிஸோ ஸப்³ப³ங் ஞாதிஜனங் ஆலிங்கெ³த்வா ஸீஸே சும்பி³த்வா க³ச்ச²தி விய ப⁴க³வாபி நிப்³பா³னபுரங் பவிஸந்தோ ஸப்³பே³பி சதுவீஸதிகோடிஸதஸஹஸ்ஸஸமாபத்தியோ அனவஸேஸங் ஸமாபஜ்ஜித்வா யாவ ஸஞ்ஞாவேத³யிதங், ததோபி வுட்டா²ய யாவ நேவஸஞ்ஞானாஸஞ்ஞாயதனங் ஸமாபஜ்ஜித்வா வுட்டா²ய ஜா²னங்கா³னி பச்சவெக்கி²த்வா ப⁴வங்க³சித்தேன அப்³யாகதேன து³க்க²ஸச்சேன பரினிப்³பா³யி. பாளியங் பன ‘‘சதுத்த²ஜ்ஜா²னா வுட்ட²ஹித்வா ஸமனந்தரா ப⁴க³வா பரினிப்³பா³யீ’’தி வுத்தங் தத்த² த்³வே ஸமனந்தரா ஜா²னஸமனந்தரா, பச்சவெக்க²ணஸமனந்தராதி. தத்த² ஜா²னா வுட்டா²ய ப⁴வங்க³ங் ஓதிண்ணஸ்ஸ தத்தே²வ பரினிப்³பா³னங் ஜா²னஸமனந்தரங் நாம. ஜா²னா வுட்ட²ஹித்வா புன ஜா²னங்கா³னி பச்சவெக்கி²த்வா ப⁴வங்க³ங் ஓதிண்ணஸ்ஸ தத்தே²வ பரினிப்³பா³னங் பச்சவெக்க²ணஸமனந்தரங் நாம. ப⁴க³வா பன ஜா²னஸமனந்தரா அபரி நிப்³பா³யித்தா பச்சவெக்க²ணஸமனந்தரமேவ பரினிப்³பா³யீதி வேதி³தப்³ப³ங், தேனேவாஹ ‘‘ப⁴க³வா பன ஜா²னங் ஸமாபஜ்ஜித்வா ஜா²னா வுட்டா²ய ஜா²னங்கா³னி பச்சவெக்கி²த்வா ப⁴வங்க³சித்தேன அப்³யாகதேன து³க்க²ஸச்சேன பரினிப்³பா³யீ’’தி. எத்த² ப⁴க³வதோ பரினிப்³பா³னசித்தஸ்ஸ கிங் ஆரம்மணங் கம்மங் வா ஹோதி, உதா³ஹு கம்மனிமித்தக³தினிமித்தானி, அத² நிப்³பா³னந்தி அபரே ஏவங் வத³ந்தி.
நாஹு அஸ்ஸாஸபஸ்ஸாஸா, டி²தசித்தஸ்ஸ தாதி³னோ;
அனேஜோ ஸந்தி’மாரப்³ப⁴, யங்கால’மகரீ முனி.
அஸல்லீனேன சித்தேன, வேத³னங் அஜ்ஜ²வாஸயி;
பஜ்ஜோதஸ்ஸே’வ நிப்³பா³னங், விமொக்கோ² சேதஸோ அஹூ’தி.
இமிஸ்ஸாகா³தா²ய ‘‘யங் யோ முனி அனேஜோ ஸந்தி நிப்³பா³னங் ஆரப்³ப⁴ காலங் அகரீ’’தி யோஜெத்வா ப⁴க³வதோ பரினிப்³பா³னசித்தஸ்ஸ நிப்³பா³னாரம்மணந்தி தமயுத்தங், படிஸந்தி⁴ப⁴வங்க³சுதீனங் நிப்³பா³னாரம்மணஸ்ஸ அனாரஹத்தா ‘‘நிப்³பா³னங் கொ³த்ரபு⁴ஸ்ஸ வோதா³னஸ்ஸ மக்³க³ஸ்ஸ ஆரம்மணபச்சயேனபச்சயோ, நிப்³பா³னங் ப²லஸ்ஸ ஆவஜ்ஜனாயா’’தி பட்டா²னபாளியா ஜவனஆவஜ்ஜனானமேவ அதி⁴ப்பேதத்தா தஸ்மா எத்த² ‘‘யங் யோ முனி ப²லஸமாபத்தியா அனேஜோ அனேஜஸங்கா²தோ தண்ஹாரஹிதோ ஸந்திங் நிப்³பா³னங் ஆரப்³ப⁴ ஆரம்மணங் கத்வா காலங் அஸீதிவஸ்ஸபரிமாணங் அகரி அதிக்கமீ’’தி யோஜனா காதப்³பா³. கேசி பன ஏவங் வத³ந்தி… ‘‘கத்த²சி பன அனுப்பஜ்ஜமானஸ்ஸ கீ²ணாஸவஸ்ஸ யதோ²பட்டி²தங் நாமரூபத⁴ம்மாதி³கமேவ சுதிபரியோஸானானங் கோ³சரபா⁴வங் க³ச்ச²தி, ந கம்ம-கம்மனிமித்தாத³யோ’’தி வுத்தத்தா கம்மனித்தக³தினிமித்தானி அரஹதோ சுதிசித்தஸ்ஸ ஆரம்மணபா⁴வங் ந க³ச்ச²ந்தீதி தம்பி அயுத்தமேவ அயஞ்ஹெத்த²த்தோ² கத்த²சி பன ப⁴வே அனுப்பஜ்ஜமானஸ்ஸ கீ²ணாஸவஸ்ஸ அரஹதோ யதா² யதா² யேன யேன பகாரேன உபட்டி²தங் நாமரூபத⁴ம்மாதி³கமேவ சுதிபரியோஸானங் ஆவஜ்ஜனஜவனசித்தானங் கோ³சரபா⁴வங் க³ச்ச²தி, புன ப⁴வாபி⁴னிப்³ப³த்தியா அபா⁴வதோ. கிங் காரணங் பூ⁴தானி கம்மகம்மனிமித்தக³தினிமித்தானி கோ³சரபா⁴வங் ந க³ச்ச²ந்தீதி. சுதிசித்தஸ்ஸ பன படிஸந்தி⁴சித்தேன க³ஹிதங் அதீதாரம்மணமேவ கோ³சரபா⁴வங் க³ச்ச²தி. ‘‘நாமரூபாதி³கமேவா தி எத்த² நாம’’ந்தி சித்தசேதஸிகனிப்³பா³னங் ரூபந்தி அட்டா²ரஸவித⁴ங் ரூபங் ஸங்க³ண்ஹாதி. நாமஞ்ச ரூபஞ்ச நாமரூபா. நாமரூபா ச தே த⁴ம்மா சேதி ததா². தே ஆதி³ யேஸங் தேதி நாமரூபத⁴ம்மாதி³ தமேவ நாமரூபத⁴ம்மாதி³கங். ஆதி³ஸத்³தே³ன ச² பஞ்ஞத்தியோ ஸங்க³ண்ஹாதி, தேன நிப்³பா³னம்பி அரஹதோ மரணாஸன்னகாலே க்ரியஜவனஸ்ஸபி ஆரம்மணபா⁴வோ ப⁴வெய்யாதி அம்ஹாகங் க²ந்தி வீமங்ஸித்வா பன க³ஹேதப்³ப³ங். ப⁴க³வதோ நிப்³பா³னசித்தஸ்ஸ பன துஸிதபுரதோ சவித்வா ஸிரீமஹாமாயாய குச்சி²ம்ஹி வஸிதபடிஸந்தி⁴சித்தேன க³ஹிதாரம்மணமேவ ஆரம்மணங் ஹோதீதி த³ட்ட²ப்³ப³ங் தஞ்ச கோ² க³தினிமித்தமேவ, ந கம்மகம்மனிமித்தானி. யுத்திதோபி ஆக³மதோபி க³தினிமித்தமேவ யுஜ்ஜதி ததா² ஹி துஸிதபுரேயேவ ஸேதகேதுதே³வபுத்தோ ஹுத்வா தி³ப்³ப³க³ணனாய சத்தாரி ஸஹஸ்ஸானி, மனுஸ்ஸக³ணனாய ஸத்தபஞ்ஞாஸவஸ்ஸகோடி,ஸட்டி²வஸ்ஸஸதஸஹஸ்ஸானி ட²த்வா பரியோஸானே பஞ்ச புப்³ப³னிமித்தானி தி³ஸ்வா ஸுத்³தா⁴வாஸே அரஹந்தப்³ரஹ்முனா த³ஸஹி சக்கவாளஸஹஸ்ஸேஹி ஆக³ம்ம தே³வதாவிஸேஸேஹி ச.
‘‘காலோ தே³வ மஹாவீர, உப்பஜ்ஜ மாதுகுச்ச²யங்;
ஸதே³வகங் தாரயந்தோ, பு³ஜ்ஜ²ஸ்ஸு அமதங் பத³’’ந்தி.
யாசியமானோ ‘‘காலங் தீ³பஞ்ச தே³ஸஞ்ச, குலங் மாதரமேவ சா’’தி வுத்தானி பஞ்ச மஹாவிலோகனானி விலோகெத்வா துஸிதபுரதோ சவித்வா ஆஸாள்ஹீபுண்ணமாயங் உத்தராஸாள்ஹனக்க²த்தேனேவ ஸத்³தி⁴ங் ஏகூனவீஸதியா படிஸந்தி⁴சித்தேஸு மெத்தாபுப்³ப³பா⁴க³மஸ்ஸ ஸோமனஸ்ஸஞாணஸம்பயுத்தஅஸங்கா²ரிககுஸலசித்தஸ்ஸ ஸதி³ஸேன மஹாவிபாகசித்தேன படிஸந்தி⁴ங் அக்³க³ஹேஸி. ததா³ரம்மணாஸன்னவீதி²தோ புப்³ப³பா⁴கே³ ஆலோகிதானி காலதீ³பதே³ஸகுலமாதரவஸேன இமானி பஞ்ச படிஸந்தி⁴சித்தஸ்ஸ க³தினிமித்தாரம்மணபா⁴வேன கோ³சரபா⁴வங் க³ச்ச²ந்தீதி அம்ஹாகங் க²ந்தி தன்னின்னதப்போணதப்பப்³பா⁴ரவஸேன பா³ஹுல்லப்பவத்திதோ தேனேவ அபி⁴த⁴ம்மத்த²ஸங்க³ஹாதீ³ஸு அபி⁴த⁴ம்மத்த² விபா⁴வனியங் ‘‘மரணகாலே யதா²ரஹங் அபி⁴முகீ²பூ⁴தங் ப⁴வந்தரே படிஸந்தி⁴ஜனகங் கம்மங் வா தங் கம்மகரணகாலே ரூபாதி³கமுபலத்³த⁴புப்³ப³முபகரணபூ⁴தஞ்ச கம்மனிமித்தங் வா அனந்தரமுப்பஜ்ஜமானப⁴வே உபலபி⁴தப்³ப³ங் உபபோ⁴க³பூ⁴தங் க³தினிமித்தங் வா கம்மப³லேன ச²ன்னங் த்³வாரானமஞ்ஞதரஸ்மிங் பச்சுபட்டா²ஸி, ததோ பரங் தமேவ ததோ²பட்டி²தமாலம்ப³ணங் ஆரப்³ப⁴ விபச்சமானககம்மானுரூபங் பரிஸுத்³த⁴ங் வா, உபக்கிலிட்ட²ங் வா உபபஜ்ஜிதப்³ப³ப⁴வானுரூபங் தத்தோ²ணதங்வ சித்தஸந்தானமபி⁴ண்ஹங் பவத்ததி பா³ஹுல்லேன. தமேவ வா பன ஜனகபூ⁴தங் கம்மங் அபி⁴னவகரணவஸேன த்³வாரப்பத்தங் ஹோதி. பச்சாஸன்னமரணஸ்ஸ பன தஸ்ஸ வீதி²சித்தாவஸானே ப⁴வங்க³க்க²யேவா சவனவஸேன பச்சுப்பன்னப⁴வபரியோஸானபூ⁴தங் சுதிசித்தங் உப்பஜ்ஜித்வா நிருஜ்ஜ²தி. தஸ்மிங் நிருத்³தா⁴வஸானே தஸ்ஸானந்தரமேவ ததா² க³ஹிதமாலம்ப³ணமாரப்³ப⁴ ஸவத்து²கமவத்து²கமேவ வா யதா²ரஹங் அவிஜ்ஜானுஸயபரிக்கி²த்தேன தண்ஹானுஸயமூலகேன ஸங்கா²ரேன ஜனியமானங் ஸம்பயுத்தேஹி பரிக்³க³ய்ஹமானங் ஸஹஜாதானமதி⁴ட்டா²னபா⁴வேன புப்³ப³ங்க³மபூ⁴தங் ப⁴வந்தரபடிஸந்தா⁴னவஸேன படிஸந்தி⁴ஸங்கா²தங் மானஸமுப்பஜ்ஜமானமேவ பதிட்டா²தி ப⁴வந்தரே’’தி வுத்தங். தத்த² ‘‘தத்தோ²ணதங்வ சித்தஸந்தானமபி⁴ண்ஹங் பவத்ததி பா³ஹுல்லேனா’’தி இமினா கம்மப³லேன உபட்டி²தங் க³தினிமித்தங் மரணாஸன்னவீதி²தோ புப்³பே³ ஏகாஹத்³வீஹாதி³வஸேன ஸத்தாஹம்பி, ஸத்தாஹதோ உத்தரிபி உப்பஜ்ஜதே வாதி த³ஸ்ஸேதி ததா² ஹி பரிஸுத்³த⁴ங் வா உபக்கிலிட்ட²ங் வா விபச்சமானககம்மானுரூபங் க³தினிமித்தங் சிரகாலம்பி திட்ட²தி, அரியகா³லதிஸ்ஸசோரகா⁴தகாத³யோ விய ததா² ஹி அரியகா³லதிஸ்ஸோ நாம உபாஸகோ ஸீஹளதீ³பே அத்தனோ ப⁴ரியாய ஸுமனாய ஸத்³தி⁴ங் யாவஜீவங் தா³னாதி³ புஞ்ஞகம்மானி கத்வா ஆயூஹபரியோஸானே அரியகா³லதிஸ்ஸஸ்ஸ மரணமஞ்சே நிபன்னஸ்ஸ ச²தே³வலோகதோ ரத²ங் ஆனெத்வா அத்தனோ அத்தனோ தே³வலோகங் வண்ணேஸுங். உபாஸகோ தே³வதானங் கத²ங் ஸுத்வா துஸிதபுரதோ ஆஹடரத²ங் ட²பெத்வா அவஸேஸரதே² ‘‘க³ஹெத்வா க³ச்ச²தா²’’தி ஆஹ. ஸுமனா பன அத்தனோ ஸாமிகஸ்ஸ வசனங் ஸுத்வா ‘‘கிங் திஸ்ஸ மரணாஸன்னே விலாபங் அகாஸீ’’தி ஆஹ. திஸ்ஸோ அத்தனோ ப⁴ரியாய கத²ங் ஸுத்வா ஆஹ… ‘‘அஹங் விலாபங் ந கரோமி, தே³வலோகதோ தே³வதா ச² ரதே² ஆனேஸுங் தாஹி தே³வதாஹி ஸத்³த⁴ங் கதே²மீ’’தி. தங் நபஸ்ஸாமி குஹி’’ந்தி வுத்தே புப்ப²தா³மங் ஆஹராபெத்வா ஆகாஸே கி²பாபேஸி. ஸா தங் புப்ப²தா³மங் ரத²ஸீஸே ஓலம்ப³மானங் தி³ஸ்வா க³ப்³ப⁴ங் பவிஸித்வா ஸயனே ஸயித்வா நாஸிகவாதங் ஸன்னிருஜ்ஜி²த்வா சவித்வா பாதுரஹோஸி. ஸா அத்தனோ ஸாமிகஸ்ஸ ஸாஸனங் பேஸேஸி… ‘‘அஹங் பன பட²மங் ஆக³தொம்ஹி, த்வங் கஸ்மா சிராயஸீ’’தி. உபோ⁴பி ரதே² ட²த்வா ஸப்³பே³ ஓலோகெந்தானங்யேவ துஸிதபுரங் அக³மங்ஸு. இமஸ்மிஞ்ஹி வத்து²ஸ்மிங் ஸாமிகஸ்ஸ உபட்டி²தக³தினிமித்தங் ப⁴ரியாய பாகடங் ஹுத்வா புரேதரதுஸிதபுரே நிப்³ப³த்தித்வா ஸாமிகஸ்ஸ ஸாஸனங் பேஸேஸி தேன அரியகா³லதிஸ்ஸஸ்ஸ சிரகாலங் க³தினிமித்தங் உபட்டா²தீதி வேதி³தப்³ப³ங். மனுஸ்ஸலோகே ஹி சிரகாலங் துஸிதபுரே முஹுத்தங்வ ஹோதி. ஏவங் பரிஸுத்³த⁴ங் விபச்சமானககம்மானுரூபங் க³தினிமித்தங் சிரகாலங் பவத்ததி இமினா நயேன து³ட்ட²கா³மணிஅப⁴யத⁴ம்மிகஉப்ஸகாதீ³னம்பி வத்து² வித்தா²ரேதப்³ப³ங். சோரகா⁴தகஸ்ஸ பன மஹானிரயே விபச்சமானககம்மானுரூபங் நேரயக்³கி³ஜாலாதி³கங் ஸத்தாஹங் உபட்டா²தி. ஸாவத்தி²னக³ரே கிர பஞ்சஸதா சோரா ப³ஹினக³ரே சோரகம்மங் கரொந்தி. அதே²கதி³வஸங் ஜனபத³புரிஸோ தேஸங் அப்³ப⁴ந்தரோ ஹுத்வா சோரகம்மங் அகாஸி, ததா³ தே ஸப்³பே³பி ராஜபுரிஸா அக்³க³ஹேஸுங். ராஜா தே தி³ஸ்வா ‘‘தும்ஹாகங் அந்தரே இமே ஸப்³பே³ மாரேதுங் ஸமத்த²ஸ்ஸ ஜீவிதங் த³ம்மீ’’தி ஆஹ. பஞ்சஸதா சோரா அஞ்ஞமஞ்ஞங் ஸம்ப³ந்தா⁴ அஞ்ஞமஞ்ஞங் ஸஹாயகாதி அஞ்ஞமஞ்ஞங் மாரேதுங் ந இச்சி²ங்ஸு, ஜனபத³மனுஸ்ஸோ பன ‘‘அஹங் மாரேமீ’’தி வத்வா ஸப்³பே³ மாரேஸி. ராஜா தஸ்ஸ துஸ்ஸித்வா சோரகா⁴தககம்மங் அதா³ஸி. ஸோ பஞ்சவீஸதிவஸ்ஸானி சோரகா⁴தககம்மங் ஆகாஸி. ராஜா தஸ்ஸ மஹல்லகோதி வத்வா அஞ்ஞஸ்ஸ சோரகா⁴தக கம்மங் தா³பேஸி. ஸோ சோரகா⁴தககம்மா அபனீதோ அஞ்ஞதரஸ்ஸ ஸந்திகே நாஸிகவாதங் உக்³க³ண்ஹித்வா ஹத்த²பாத³கண்ணனாஸாதீ³ஹி சி²ந்தி³தப்³பா³னங் ஊரூத²னகட்டா²னங் பி⁴ந்த³ந்தமாரேதப்³ப³யுத்தானங் நாஸிகவாதங் விஸ்ஸஜ்ஜெத்வா மாரேதப்³ப³ங் மந்தங் லபி⁴. ஸோ ராஜானங் ஆரோசெத்வா நாஸிகவாதேன சோரகா⁴தககம்மங் கரொந்தஸ்ஸேவ திங்ஸ வஸ்ஸானி அதிக்கமி. ஸோ பச்சா² மஹல்லகோ ஹுத்வா மரணமஞ்சே நிபஜ்ஜி ‘‘ஸத்ததி³வஸேன காலங் கரிஸ்ஸதீ’’தி. மரணகாலே மஹந்தங் வேத³னங் அஹோஸி. ஸோ மஹானிரயே நிப்³ப³த்தோ விய மஹாஸத்³த³ங் கத்வா து³க்கி²தோ ஹோதி. தஸ்ஸ ஸத்³தே³ன பீ⁴தா மனுஸ்ஸா உப⁴தோபஸ்ஸே கே³ஹங் ச²ட்³டெ³த்வா பலாயிங்ஸு. தஸ்ஸ மரணதி³வஸே ஸாரிபுத்தத்தே²ரோ தி³ப்³ப³சக்கு²னா லோகங் ஓலோகெந்தோ ஏதஸ்ஸ காலங் கத்வா மஹானிரயே நிப்³ப³த்தமானங் தி³ஸ்வா தஸ்ஸ அனுகம்பங் படிச்ச கே³ஹத்³வாரே பாகடோ அஹோஸி. ஸோ குஜ்ஜி²த்வா நாஸிகவாதங் விஸ்ஸஜ்ஜேஸி. யாவ ததியங் விஸ்ஸஜ்ஜமானோபி விஸ்ஸஜ்ஜாபேதுங் அஸக்கொந்தோ தே²ரங் அதிரேகேன விரோசமானங் தி³ஸ்வா சித்தங் பஸாதெ³த்வா பாயாஸங் தே²ரஸ்ஸ தா³பேஸி. தே²ரோ மங்க³லங் வட்³டெ⁴த்வா அக³மாஸி. சோரகா⁴தகோ தே²ரஸ்ஸ தி³ன்னதா³னங் அனுஸ்ஸரித்வா சவித்வா ஸக்³கே³ நிப்³ப³த்தி, நிரயஜாலாத³யோ அந்தரதா⁴யந்தி. ஸோ அனாக³தேபி பச்சேகபு³த்³தோ⁴ ப⁴விஸ்ஸதி. ஏவங் உபக்கிலிட்ட²ங் வா விபச்சமான ககம்மானுரூபங் க³தினிமித்தம்பி ஸத்தாஹபரமங் உபட்டா²தி. அத்தி²கேஹி பன ஸஹஸ்ஸவத்து² ஸகா³தா²வக்³கே³ஸு ஓலோகேதப்³போ³. ப⁴க³வதோ பன பரிஸுத்³த⁴ங் மெத்தாபுப்³ப³பா⁴க³ஸ்ஸ ஸோமனஸ்ஸ ஞாணஸம்பயுத்தகுஸலஸ்ஸ கம்மஸ்ஸ வேகே³ன காலதீ³பதே³ஸகுலமாதரவஸேன இமானி பஞ்சக³தினிமித்தானி சிரகாலங் ஹுத்வா உபட்ட²ஹந்தி. சிரகாலந்தி மனுஸ்ஸலோகே ஸத்தாஹமத்தங், துஸிதபுரேமுஹுத்தமேவ, ததா²பி மனுஸ்ஸலோகே ஸத்தாஹமத்தே காலே தே³வதானங் பஞ்சபுப்³ப³னிமித்தானி பஞ்ஞாயந்தி தஞ்ச கோ² புஞ்ஞவந்தானங்யேவ பஞ்ஞாயந்தி, ந ஸப்³பே³ஸங் மனுஸ்ஸலோகே புஞ்ஞவந்தானங் ராஜராஜமஹாமத்தாதீ³னங் விய தங் தி³ஸ்வா மஹேஸக்கா² தே³வதா ஜானந்தி, ந அப்பேஸக்கா², மனுஸ்ஸலோகே நேமித்தகா ப்³ராஹ்மணபண்டி³தாத³யோவிய. மஹேஸக்கா² தே³வதா தங் புப்³ப³னிமித்தங் தி³ஸ்வா நந்த³வனங் நெத்வா ‘‘காலோ தே³வா’’தி ஆதீ³ஹி யாசந்தி. மஹாஸக்கோ தத்தே²வ நந்த³வனுய்யானே காலதீ³பதே³ஸகுலமாதரவஸேன பஞ்ச விலோகெத்வா சவித்வா தமாரம்மணங் கத்வா மஹாமாயாய குச்சி²ம்ஹி படிஸந்தி⁴ங் அக்³க³ஹேஸீதி ஸன்னிட்டா²னமவக³ந்தப்³ப³ங்.
தத்த² காலந்தி மனுஸ்ஸலோகே ஏகூனதிங்ஸதிமே வஸ்ஸே வேஸாக²புண்ணமதி³வஸே பு³த்³தோ⁴ ப⁴விஸ்ஸாமீதி காலங் ஓலோகேஸி. தீ³பந்தி ஜம்பு³தீ³பேயேவ ப⁴விஸ்ஸாமி, ந அஞ்ஞதீ³பேஸூதி தீ³பங் ஓலோகேஸி. தே³ஸந்தி மஜ்ஜி²மதே³ஸேயேவ, தஞ்ச கோ² மஹாபோ³தி⁴மண்டே³யேவ, ந அஞ்ஞதே³ஸேதி தே³ஸங் ஓலோகேஸி. குலந்தி த்³வே குலானி க²த்தியகுலப்³ராஹ்மணகுலவஸேன. தத்த² யஸ்மிங் காலே க²த்தியகுலங் லோகே ஸெட்ட²பா⁴வேன ‘‘அயமேவ லோகே அக்³கோ³’’தி ஸம்மன்னதி, ததா³ க²த்தியகுலேயேவ பு³த்³தா⁴ உப்பஜ்ஜந்தி. யஸ்மிங் பன காலே ப்³ராஹ்மணகுலங் அயமேவ லோகே அக்³கோ³தி, ததா³ ப்³ராஹ்மணகுலேயேவ பு³த்³தா⁴ உப்பஜ்ஜந்தி. இதா³னி பன க²த்தியகுலமேவ அக்³கோ³தி ஸம்மன்னந்தி. க²த்தியகுலேபி ஸக்யராஜானோவ லோகே உத்தமா, அஸம்பி⁴ன்னக²த்தியகுலத்தா தஸ்மா ஸக்யராஜகுலேயேவ ப⁴விஸ்ஸாமீதி குலங் ஓலோகேஸி. மாதரந்தி மம மாதரங் த³ஸ மாஸானி ஸத்த ச தி³வஸானி ட²ஸ்ஸதி, எத்த²ந்தரே மம மாதுயா அரோகோ³ ப⁴விஸ்ஸதீதி மாதரம்பி ஓலோகேஸி. போ³தி⁴ஸத்தமாதா பன பச்சி²மவயே டி²தா. ஏவங் யுத்திதோபி ஆக³மதோபி ப⁴க³வதோ நிப்³பா³னசித்தஸ்ஸ படஸந்தி⁴சித்தேன க³ஹிதனிமித்தமேவ ஆரம்மணங் ஹோதீதி வேதி³தப்³ப³ங்.
ஸப்³ப³ஞ்ஞுஜினநிப்³பா³ன, சித்தஸ்ஸ கோ³சரங் ஸுப⁴ங்;
விஞ்ஞெய்யங் க³தினிமித்தங், க³ந்தே²ஹி அவிரோத⁴தோ.
தா⁴துபரினிப்³பா³னம்பி போ³தி⁴மண்டே³யேவ ப⁴விஸ்ஸதி வுத்தஞ்ஹேதங் உபரிபண்ணாஸகே ‘‘தா⁴துபரினிப்³பா³னங் அனாக³தே ப⁴விஸ்ஸதி ஸாஸனஸ்ஸ ஹி ஓஸக்கனகாலே இமஸ்மிங் தம்ப³பண்ணிதீ³பே தா⁴துயோ ஸன்னிபதித்வா மஹாசேதியதோ நாக³தீ³பே ராஜாயதனசேதியங், ததோ மஹாபோ³தி⁴பல்லங்கங் க³மிஸ்ஸந்தி. நாக³ப⁴வனதோபி தே³வலோகதோபி தா⁴துயோ மஹாபோ³தி⁴பல்லங்கமேவ க³மிஸ்ஸந்தி ஸாஸபமத்தாபி தா⁴துயோ அந்தரா ந நஸ்ஸிஸ்ஸந்தி, ஸப்³பா³ தா⁴துயோ மஹாபோ³தி⁴பல்லங்கே ராஸிபூ⁴தா ஸுவண்ணக்க²ந்தா⁴ விய ஏகக்³க⁴னா ஹுத்வா ச²ப்³ப³ண்ணரஸ்மியோ விஸ்ஸஜ்ஜிஸ்ஸந்தி, தா த³ஸஸஹஸ்ஸலோகதா⁴துங் ப²ரிஸ்ஸந்தி. ததோ த³ஸஸஹஸ்ஸசக்கவாளேஸு தே³வதா ஸன்னிபதித்வா ''அஜ்ஜ ஸத்தா² பரினிப்³பா³யதி அஜ்ஜ ஸாஸனங் ஓஸக்கதி பச்சி²மத³ஸ்ஸனங் இத³ங் அம்ஹாக’’ந்தி த³ஸப³லஸ்ஸ பரினிப்³பு³ததி³வஸதோ மஹந்ததரங் காருஞ்ஞங் கரிஸ்ஸந்தி ட²பெத்வா அனாகா³மிகீ²ணாஸவே அவஸேஸா ஸகத்தபா⁴வேன ஸந்தா⁴ரேதுங் நாஸக்கி²ங்ஸு, தா⁴துஸரீரதோ தேஜோதா⁴து உட்ட²ஹித்வா யாவ ப்³ரஹ்மலோகா உக்³க³ச்சி²ஸ்ஸதி. ஸாஸபமத்தாயபி தா⁴துயா ஸதி ஏகஜாலா ப⁴விஸ்ஸதி தா⁴தூஸு பரியாதா³னங் க³தாஸு பச்சி²ஜ்ஜிஸ்ஸதி. ஏவங் மஹந்தங் ஆனுபா⁴வங் த³ஸ்ஸெத்வா தா⁴தூஸு அந்தரஹிதாஸு ஸாஸனங் அந்தரஹிதங் நாம ஹோதி. யாவ ஏவங் ந அந்தரதா⁴யதி, தாவ அனந்தரதா⁴னமேவ ஸாஸனங். பரினிப்³பா³னகாலதோ பட்டா²ய யாவ ஸாஸபமத்தா தா⁴து திட்ட²தி, தாவ பு³த்³த⁴காலதோ பச்சா²தி ந வேதி³தப்³ப³ங் தா⁴தூஸு ஹி டி²தாஸு பு³த்³தா⁴ டி²தா வ ஹொந்தி, தஸ்மா எத்த²ந்தரே அஞ்ஞஸ்ஸ பு³த்³த⁴ஸ்ஸ உப்பத்தி நிவாரிதாவ ஹோதி. தேனேவ வதா³ம.
பரினிப்³பா³னகாலதோ, பச்சா² த⁴ரந்தி தா⁴துயோ;
அனிப்³பு³தோவ ஸம்பு³த்³தோ⁴, அஞ்ஞபு³த்³த⁴ஸ்ஸ வாரிதா.
ஜீவமானேபி ஸம்பு³த்³தே⁴, நிப்³பு³தே வா ததா²க³தே;
யோ கரோதி ஸமங் பூஜங், ப²லங் தாஸ ஸமங் ஸியா’தி.
இதி ஸாக³ரபு³த்³தி⁴த்தே²ரவிசரிதே ஸீமவிஸோத⁴னே த⁴ம்மவண்ணனாய
நிப்³பா³னகண்டோ³ ததியோ பரிச்சே²தோ³.