பகிண்ணககண்டோ³
இதா³னி
‘‘பியோ க³ரு பா⁴வனீயோ, வத்தா ச வசனக்க²மோ;
க³ம்பீ⁴ரஞ்ச கத²ங் கத்தா, நோசாடா²னே நியோஜயே’’தி.
ஏவமாதி³கு³ணஸமன்னாக³தோ வட்³டி⁴பக்கே² டி²தபண்டி³தபுக்³க³லோ லோகே து³ல்லபோ⁴வ. கதமோ பண்டி³தபுக்³க³லோ பு³த்³த⁴பச்சேகபு³த்³தா⁴ அஸீதி ச மஹாஸாவகா அஞ்ஞே ச ததா²க³தஸ்ஸ ஸாவகா ஸுனெத்தமஹாகோ³விந்த³விது⁴ரஸரப⁴ங்க³மஹோஸத⁴ஸுதஸோமனிமிராஜஅயோக⁴ரகுமாரக அகத்திபண்டி³தாத³யோ ச பண்டி³தாதி வேதி³தப்³பா³. தே ப⁴யே விய ரக்கா², அந்த⁴காரே விய பதீ³பா, கு²ப்பிபாஸாதி³து³க்கா²பி⁴ப⁴வே விய அன்னபானாதி³படிலாபோ⁴, அத்தனோ வசனகரானங் ஸப்³ப³ப⁴யஉபத்³த³வூபஸக்³க³வித்³த⁴ங்ஸனஸமத்தா² ஹொந்தி ததா² ஹி ததா²க³தங் ஆக³ம்ம அஸங்க்²யெய்யா அபரிமாணா தே³வமனுஸ்ஸா ஆஸவக்க²யங் பத்தா ப்³ரஹ்மலோகே பதிட்டி²தா, தே³வலோகே உப்பன்னா. ஸாரிபுத்தத்தே²ரே சித்தங் பஸாதெ³த்வா சதூஹி ச பச்சயேஹி தே²ரங் உபட்ட²ஹித்வா அஸீதி குஸலஹஸ்ஸானி ஸக்³கே³ நிப்³ப³த்தானி, ததா² மஹாமொக்³க³லானமஹாகஸ்ஸபபபு⁴தி ஸுனெத்தஸ்ஸ ஸத்து²னோ ஸாவகா அப்பேகச்சே ப்³ரஹ்மலோகே உபபஜ்ஜிங்ஸு, அப்பேகச்சே பரனிம்மிதவஸவத்தீனங் தே³வானங் ஸஹப்³யதங்…பே॰… அப்பேகச்சே க³ஹபதிமஹாஸாலகுலானங் ஸஹப்³யதங் உபபஜ்ஜிங்ஸு, வுத்தஞ்ஹேதங் ‘‘நத்தி² பி⁴க்க²வே பண்டி³ததோ ப⁴யங், நத்தி² பண்டி³ததோ உபத்³த³வோ, நத்தி² பண்டி³ததோ உபஸக்³கோ³’’தி. அபிச தக்³க³ரமாலாதி³க³ந்த⁴ப⁴ண்ட³ஸதி³ஸோ பண்டி³தோ, தக்³க³ரமாலாதி³க³ந்த⁴ப⁴ண்ட³பலிவேட²னபத்தஸதி³ஸோ தது³பஸேவீ வுத்தஞ்ஹேதங் நாரத³ஜாதகே.
‘‘தக்³க³ரஞ்ச
பத்தாபி ஸுரபி⁴ வாயந்தி, ஏவங் தீ⁴ரூபஸேவனா’’தி.
அகித்திபண்டி³தோ ஸக்கேன தே³வானமிந்தே³ன வரே தி³ய்யமானே ஏவமாஹ
‘‘தீ⁴ரங் பஸ்ஸே ஸுணே தீ⁴ரங், தீ⁴ரேன ஸஹ ஸங்வஸே;
தீ⁴ரேனா’லாபஸல்லாபங், தங் கரே தஞ்ச ரோசயே.
கிங் நு தே அகரங் தீ⁴ரோ, வத³ கஸ்ஸப காரணங்;
கேன கஸ்ஸப தீ⁴ரஸ்ஸ, த³ஸ்ஸனங் அபி⁴கங்க²ஸி.
நயங் நயதி மேதா⁴வீ, அது³ராயங் ந யுஞ்ஜதி;
ஸனரோ ஸெய்யஸோ ஹோதி, ஸம்மா வுத்தோ ந குப்பதி;
வினயங் ஸோ பஜானாதி, ஸாது⁴ தேன ஸமாக³மோ’’தி.
அபிச தேபி ஸப்புரிஸே ஸங்க³ம்ம அஸ்ஸுதபுப்³ப³ம்பி உப⁴யலோகஹிதாவஹங் வாசங் ஸுய்யதேவ, வுத்தம்பி சேதங்.
‘‘ஸுபா⁴ஸிதங் உத்தமமாஹு ஸந்தோ, த⁴ம்மங் ப⁴ணே நாத⁴ம்மங் தங் து³தியங்;
பியங் ப⁴ணே நாப்பியங் தங் ததியங், ஸச்சங் ப⁴ணே நாலீகங் தங் சதுத்த²’’ந்தி ச.
‘‘யங் பு³த்³தோ⁴ பா⁴ஸதி வாசங், கே²மங் நிப்³பா³னபத்தியா;
து³க்க²ஸ்ஸந்தகிரியாய, ஸா வே வாசானமுத்தமா’’தி.
ஸப்புரிஸூபனிஸ்ஸயஸேவனபச்சயாயேவ தா³னாதி³குஸலஸமாயோகே³ன அபாயது³க்க²தோ முச்சந்தி வுத்தஞ்ஹேதங் ‘‘அபிச நேரயிகாதி³து³க்க²பரித்தாணதோ புஞ்ஞானி ஏவ பாணீனங் ப³ஹூபகாரானி, யதோ தேஸம்பி உபகாரானுஸ்ஸரணதா கதஞ்ஞுதா ஸப்புரிஸேஹி பஸங்ஸனீயாதி³னானப்பகாரவிஸேஸாதி⁴க³மஹேதூச ஹொந்தி வுத்தஞ்ஹேதங் ப⁴க³வதா, ‘‘த்³வே மே பி⁴க்க²வே புக்³க³லா து³ல்லபா⁴ லோகஸ்மிங், கதமே த்³வே, யோ ச புப்³ப³காரீ, யோ ச கதஞ்ஞு கதவேதீ³’’தி. அபிச விது⁴ரமஹோஸத⁴ஜாதகாதி³காலேபி இத⁴லோகபரலோகஸம்பத்திஅத்த²மேவ அத்தனோ வசனகரே ஸம்மா யோஜெந்தி. அனாகுலகம்மந்தாதி⁴ட்டா²னேன காலஞ்ஞுதாய பதிரூபகாரிதாய அனலஸதாய உட்டா²னவீரியஸமதாய அப்³யஸனியதாச காலானதிக்கமனஅப்பதிரூபகரணஅகரணஸிதி²லகரணாஹி அகுஸலாதீ³ஹி ரஹிதகஸிகோ³ரக்க²வாணிஜ்ஜாத³யோ கம்மந்தா, ஏதே அத்தனோ வா புத்ததா³ரஸ்ஸ வா தா³ஸகம்மகரானங் வா ப்³யத்ததாய ஏவங் பயோஜிதா தி³ட்டே²வ த⁴ம்மே த⁴னத⁴ஞ்ஞவித்தி படிலாப⁴ஹேதூ ஹொந்தி, வுத்தஞ்ஹேதங் ப⁴க³வதா.
பதிரூபகாரீரி
ந தி³வா ஸொப்பஸீலே, ரத்திங் உட்டா²னத³ஸ்ஸினா;
நிச்சப்பமத்தேன ஸொண்டே³ன, ஸக்கா ஆவஸிதுங் க⁴ரங்.
அதீஸிதங் அதிஉண்ஹங், அதிஸாரமித³ங் அஹு;
இதி விஸ்ஸட்ட²கம்மந்தே, அத்தா² அச்செந்தி மாணவே.
யோ ச ஸீதஞ்ச உண்ஹஞ்ச; திணானி யோ ந மஞ்ஞதி;
ஸப்புரிஸகிச்சானி, ஸோ ஸுக²ங் ந விஹாயதீ’’தி ச.
போ⁴கே³ ஸங்ஹரமானஸ்ஸ, பரஸ்ஸேவ இரயதோ;
போ⁴கா³ ஸன்னிசயங் யந்தி, வம்மிகோவூபசீயதீதி.
ஏவமாதி³ப்பபே⁴தா³ ஸப்புரிஸா லோகே அதிது³ல்லபா⁴வ. தப்³பி³க³மேன து³ப்புரிஸா பா³லஜனா அக³வேஸந்தோபி லப்³ப⁴ந்தேவ தே பா³லா அத்தானங் ஸேவமானே பரஜனே ஸங்ஸாரது³க்கே²யேவ ஓஸீதெ³ந்தி ப⁴வதோ வுட்டா²னங் ந தெ³ந்தி ததா² ஹி பூரணகஸ்ஸபாத³யோ ச²ஸத்தா²ரா தே³வத³த்தகோகாலிக-மோத³கதிஸ்ஸ க²ண்ட³தே³வியாபுத்தஸமுத்³த³த³த்தசிஞ்சமாணவிகாத³யோ அதீதகாலே ச தீ³க⁴து³க்க²ஸ்ஸ லாபா⁴தி இமே அஞ்ஞே ச ஏவரூபா ஸத்தா பா³லா அக்³கி³பதி³த்தமிவ அகா³ரங் அத்தனா து³க்³க³ஹிதேன அத்தானஞ்ச அத்தனோ வசனகாரகே ச வினாஸெந்தி ததா² ஹி தே³வத³த்தமாக³ம்ம ராஜா அஜாதஸத்து-கோகாலிகாத³யோ தத³ஞ்ஞேபி புக்³க³லா அபாயே நிப்³ப³த்தந்தி. ராஜா அஜாதஸத்து ஸாமஞ்ஞப²லஸுத்தந்தஸவனகாலே யதி³ பிதரங் அகா⁴தெய்ய, ஸோதாபன்னோ ப⁴வெய்ய பிதரங் கா⁴திதத்தா மக்³க³ப²லம்பி அப்பத்வா லோஹகும்பி⁴யங் ஸட்டி²வஸ்ஸஸஹஸ்ஸானி பச்சித்வா முச்சிஸ்ஸதி அனாக³தேபி பச்சேகபு³த்³தோ⁴ ப⁴விஸ்ஸதி. கோகாலிகோபி ஸாரிபுத்தமொக்³க³லானத்தே²ரே அனபசாயித்வா மஹானிரயே பது³மக³ணனாய பச்சனோகாஸே நிரயபதே³ஸே பது³மனிரயே…பே॰… பது³மங் கோ² பன அஞ்ஞதரோ பி⁴க்கு² நிரயங் கோகாலிகோ பி⁴க்கு² உபபன்னோ ஸாரிபுத்தமொக்³க³லானேஸு சித்தங் ஆகா⁴தெத்வா’’தி ஆஹ. தத்த² அஞ்ஞதரோ பி⁴க்கூ²தி நாமகொ³த்தேன அபாகடங் ‘‘கிங் வ தீ³க⁴ங் நுகோ² ப⁴ந்தே பது³மே நிரயே ஆயுப்பமாண’’ந்தி பஞ்ஹங் புச்சி²த்வா நிஸின்னங் ஏகங் பி⁴க்கு²ங் ஏவமாஹ ‘‘தீ³க⁴ங் கோ² பி⁴க்கு² நிரயே ஆயுப்பமாணங், தங் ந ஸுகரங் ஸங்கா²துங் எத்தகானி வஸ்ஸானீதி வா எத்தகானி வஸ்ஸஸதானீதி வா எத்தகானி வஸ்ஸஸஹஸ்ஸானீதி வா எத்தகானி வஸ்ஸஸதஸஹஸ்ஸானீ’’தி
‘‘பூதிமச்ச²ங் குஸக்³கே³ன, யோ நரோ உபனய்ஹதி;
குஸாபி பூதி வாயந்தி, ஏவங் பா³லூபஸேவனா’’தி.
அகத்திபண்டி³தோசாபி ஸக்கேன தே³வானமிந்தே³ன வரே தி³ய்யமானே ஏவமாஹ
‘‘பா³லங் ந பஸ்ஸே ந ஸுணே, ந ச பா³லேன ஸங்வஸே;
பா³லேனா’ல்லாபஸல்லாபங், ந கரே ந ச ரோசயே.
கிங்னு தே அகரங் பா³லோ, வத³ கஸ்ஸப காரணங்;
கேன கஸ்ஸப பா³லஸ்ஸ, த³ஸ்ஸனங் நாபி⁴கங்க²ஸி.
அனயங் நயதி து³ம்மேதோ⁴, அது⁴ராயங் நியுஞ்ஜதி;
து³ன்னயோ ஸெய்யஸோ ஹோதி, ஸம்மா வுத்தோ பகுப்பதி;
வினயங் ஸோ ந ஜானாதி, ஸாது⁴ தஸ்ஸ அத³ஸ்ஸன’’ந்தி.
ஏவங் பா³லது³ஜ்ஜனஸங்ஸக்³க³வஸேனேவ ஸப்³பா³னி ப⁴யுபத்³த³வானி உப்பஜ்ஜந்தி, நோ பண்டி³தஸேவனவஸேனாதிஸப்³ப³ஸோ ஸப்புரிஸா அதிது³ல்லபா⁴வ.
இதா³னி.
‘‘து³ல்லப⁴ஞ்ச மனுஸ்ஸத்தங், பு³த்³து⁴ப்பாதோ³ ச து³ல்லபோ⁴;
து³ல்லபா⁴ க²ணஸம்பத்தி, ஸத்³த⁴ம்மோ பரமது³ல்லபோ⁴’’தி.
இமிஸ்ஸா கா³தா²ய வண்ணனாக்கமோ ஸம்பத்தோ. தத்த² து³ல்லப⁴ஞ்ச மனுஸ்ஸத்தந்தி மனுஸ்ஸபா⁴வோபி து³ல்லபோ⁴யேவ மனுஸ்ஸஸ்ஸ து³ல்லப⁴பா⁴வோ காணகச்ச²போபமாதீ³ஹி வேதி³தப்³போ³ ஏகோ கிர கஸ்ஸகோ க³ங்கா³தீரே தீணி ஸங்வச்ச²ரானி கஸித்வா கிஞ்சிமத்தம்பி அலபி⁴த்வா நங்க³லபா²லங் த்³வேதா⁴ பி⁴ந்தி³த்வா க³ங்கா³யங் கி²பி தேன க³ங்கா³னதி³யா வாஹேன ஏகோ உத்³த⁴ங் ஏகோ ஹெட்டா²தி ஏவங் த்³வே நங்க³லபா²லகா க³ங்கா³யங் வுய்ஹந்தா சிரேன ஏகோ உத்³த⁴ங் ஏகோ ஹெட்டா²தி த்³வே ஏகதோ ஹுத்வா பாகதிகா யுஜ்ஜந்தி தஸ்மிங் க²ணே வஸ்ஸஸதவஸ்ஸஸஹஸ்ஸச்சயேன ஏகவாரங் உம்முஜ்ஜமானோ காணகச்ச²போ உம்முஜ்ஜமானக்க²ணே தஸ்ஸ கீ³வா த்³வின்னங் நங்க³லபா²லானமந்தரே ஹோதி அயங் காலோ து³ல்லபா⁴ க²ணஸம்பத்தீதி குஸலூபபத்திஸங்கா²தா க²ணஸம்பத்தி து³ல்லபா⁴யேவ ததா² ஹி பச்சந்தவிஸய அரூபஅஸஞ்ஞஸத்ததிரச்சா²னபேதனேரயிககாலே வா மஜ்ஜி²மதே³ஸேபி சக்கா²தி³அங்க³விகலேவா பரிபுண்ணஅங்க³பா⁴வேபி மிச்சா²தி³ட்டி²பூ⁴தா வா குஸலூபபத்திஸங்கா²தா க²ணா ந ஹொந்தி பச்சந்தவிஸயே ஹி பவத்தா ஜனா பாணாதிபாதாதி³த³ஸஅகுஸலகம்மபதே²யேவ ரமந்தி அபி⁴ரமந்தி, சண்ட³ஸபா⁴வா ச தே ஹொந்தி, ரதனத்தயகு³ணம்பி ந ஜானந்தி. அரூபினோபி புக்³க³லா பரதோகோ⁴ஸவிரஹிதத்தா ஸோதாபத்திமக்³க³படிலாபோ⁴பி தேஸங் நத்தி², பு³த்³த⁴த³ஸ்ஸனாதீ³னிபி ந லப⁴ந்தி. அஸஞ்ஞஸத்ததிரச்சா²னபேதனேரயிககாலேஸு பன பகே³வ பூரிதபாரமீனங் ஸத்தானங் பவத்தனம்பி அப்³போ³ஹாரிகங், ஸம்மாதி³ட்டி²குலே ஜாயமானாபி சக்கு²விகலேன பு³த்³த⁴ஸங்க⁴ரதனானங் அத³ஸ்ஸனங், ஸோதவிகலேன த⁴ம்மஸவனதோபி ஹாயதி ஏளமூகா³தி³பா⁴வேன குஸலஸமாதா³னா ந ஹொந்தி. அங்க³ஸம்பன்னேபி மிச்சா²தி³ட்டி²பா⁴வேன த்³வத்திங்ஸமஹாபுரிஸலக்க²ணஅஸீதிஅனுப்³யஞ்ஜனப்³யாமப்பபா⁴பரிக்கி²த்தங் ஸப்³ப³ஜனானங்
‘‘து³ல்லப⁴ஞ்ச மனுஸ்ஸத்தங், பு³த்³து⁴ப்பாதோ³ ச து³ல்லபோ⁴;
து³ல்லபா⁴ க²ணஸம்பத்தி, ஸத்³த⁴ம்மோ பரமது³ல்லபோ⁴’’தி.
இமிஸ்ஸா கா³தா²ய அத்தோ² வுத்தோயேவ.
இதி ஸாக³ரபு³த்³தி⁴த்தே²ரவிரசிதே ஸீமவிஸோத⁴னே
பகிண்ணககண்டோ³ நாம பஞ்சமோ பரிச்சே²தோ³.
ஏவங் ஸத்து²பரினிப்³பா³னதோ வஸ்ஸஸதச்சயேன பதிட்டி²தே இஸினா காரிதத்தா’ இஸினக³ர’ந்தி லத்³த⁴னாமே த்³வத்தபாதி³பூ⁴பாலானங் நிவாஸட்டா²னபூ⁴தே ஸீரிகெ²த்தனக³ரே ஏராவதியா நதி³யா பாரிமதீரபூ⁴தே பப்³ப³தஸானும்ஹி பதிட்டி²தஸ்ஸ கஞ்சனவரமஹாதூ²பஸ்ஸ தா³யகஸ்ஸ ஸத்விவமஹாத⁴ம்மரஞ்ஞோ காலே ஸாஸனஸ்ஸ த்³விஸஹஸ்ஸஸதாதி⁴கஏகதிங்ஸதிமே வஸ்ஸே ஸாஸனே படிலத்³த⁴ஸத்³தா⁴னங் குலபுத்தானங் மஹாஜானிகரணவஸேன விமதிவினோத³னியா வுத்தவசனங் ஸத்³த³யுத்திஅத்த²யுத்திவஸேன ஸாது⁴கங் அவிசினித்வா நதி³யா உத³குக்கே²பங் அகத்வா உபஸம்பதா³ கம்மஸ்ஸ காரிதத்தா ஸாஸனே பராஜயமாபன்னே குலபுத்தே உபாரம்ப⁴கரணவஸேன ஸீமவிபத்திஹாரகோ ஸீமஸம்பத்திப்பகாஸகோ க³ந்தோ² பவத்ததி.
எத்தாவதா ச ஸிரிகெ²த்தனக³ரகோ³சரகா³மேன ஸத்விவமஹாத⁴ம்மராஜகு³ருபூ⁴தேன மஹாவெய்யாகரணேன திபிடகத⁴ரேன’ஸத்³த⁴ம்மகோவிதோ³’தி பாகட நாமதெ⁴ய்யேன மஹாதே²ரேன உபஜ்ஜா²யோ ஹுத்வா பஞ்ஞாதி⁴பதீனங் நிவாஸபூ⁴தே பச்சி²மஜினசக்கஸாஸனவரே வாஸிக³ணாசரியேன க³ணவாசகேன வினயத⁴ரேன மஹாஸாமினா ச, ராஜகு³ருனா திபிடகனாக³த்தே²ரேன ச ஆசரியோ ஹுத்வா வேஜ்ஜகம்மஜங்க⁴பேஸனகம்மாதி³வஸேன அனேஸனங் பஹாய ஸம்மா ஆஜீவேன விஸுத்³தா⁴ஜீவேஹி ஸங்க⁴க³ணேஹி காரகஸங்கா⁴ ஹுத்வா ஸிரிகெ²த்தனக³ரஸ்ஸ த³க்கி²ணதி³ஸாபா⁴கே³ தீ³க⁴பப்³ப³தஸானும்ஹி ஏராவதியா நதி³யா தீரே வாலிகபுளினே ஸீமாபெக்கா²ய ஸஹ உத³குக்கே²பங் ஸாக³ரபு³த்³தீ⁴தி க³ரூஹி க³ஹிதனாமதெ⁴ய்யேன பி⁴க்கு²னா ரசிதோ ஸாஸனவிபத்திஹாரகோ ஸீமவிஸோத⁴னீ நாம க³ந்தோ² ஸமத்தோ.
எத்தாவதா விப⁴த்தா ஹி, ஸப்பபே⁴த³ப்பவத்திகா;
ஸீமவிஸோத⁴னீஹேஸா, நிபுணா ஸாது⁴சிந்திதா.
ஸிரிகெ²த்தாதி பஞ்ஞாதே, புரே அபரனாமகே;
த³க்கி²ணெய்யதி³ஸாபா⁴கே³, உச்சனேன கதாலயே.
வஸந்தோ பி⁴க்கு² நாமேன, ஸாக³ரபு³த்³தீ⁴தி விஸ்ஸுதோ;
புண்ணே வீஸதிவஸ்ஸம்ஹி, க³ந்தோ²யங் ஸாது⁴சிந்திதோ.
மயாயங் ரசிதோ க³ந்தோ², நிட்ட²ப்பத்தோ அனாகுலோ;
ஏவங் பாணினங் ஸப்³பே³, ஸீக⁴ங் ஸிஜ்ஜ²ந்து ஸங்கப்பா.
யாவ பு³த்³தோ⁴தினாமம்பி லோகஜெட்ட²ஸ்ஸ தாதி³னோ;
தாவ திட்ட²து யங் க³ந்தோ², ஸாஸனே ஹாரயங் தமங்.
உத்³த⁴ங் யாவ ப⁴வக்³கா³ ச, அதோ⁴ யாவ அவீசிதோ;
ஸமந்தா சக்கவாளேஸு, யே ஸத்தா பத²வீசரா.
தேபி ஸப்³பே³ மயா ஹொந்து, ஸமஸமவிபாகினோ;
சிரங் ஜீவது நோ ராஜா, ஸாஸனஸ்ஸ உஜ்ஜோதகோ.
தி³ப்³ப³ந்தோ ராஜத⁴ம்மேன, அரோகோ³ ஸஹ ஞாதிபி⁴;
அனேன புஞ்ஞகம்மேன, ப⁴வெய்யங் ஜாதிஜாதியங்.
ஸாஸனங் ஜோதயந்தோவ, ஸக்யபுத்தஸ்ஸ ஸாஸனே;
யதா³ நஸ்ஸதி ஸத்³த⁴ம்மோ, அந்தீ⁴பூ⁴தோ மஹீதலே;
தே³வலோகே ததா³ ஹெஸ்ஸங், துஸிதே டா²னமுத்தமேதி.
ஸீமவிஸோத⁴னீ நிட்டி²தா.