3. அம்ப³ட்ட²ஸுத்தங்
254. ஏவங் மே ஸுதங் – ஏகங் ஸமயங் ப⁴க³வா கோஸலேஸு சாரிகங் சரமானோ மஹதா பி⁴க்கு²ஸங்கே⁴ன ஸத்³தி⁴ங் பஞ்சமத்தேஹி பி⁴க்கு²ஸதேஹி யேன இச்சா²னங்க³லங் நாம கோஸலானங் ப்³ராஹ்மணகா³மோ தத³வஸரி. தத்ர ஸுத³ங் ப⁴க³வா இச்சா²னங்க³லே விஹரதி இச்சா²னங்க³லவனஸண்டே³.
பொக்க²ரஸாதிவத்து²
255. தேன கோ² பன ஸமயேன ப்³ராஹ்மணோ பொக்க²ரஸாதி உக்கட்ட²ங் பொக்க²ரஸாதீ (ஸீ॰), பொக்க²ரஸாதி³ (பீ॰) அஜ்ஜா²வஸதி ஸத்துஸ்ஸத³ங் ஸதிணகட்டோ²த³கங் ஸத⁴ஞ்ஞங் ராஜபொ⁴க்³க³ங் ரஞ்ஞா பஸேனதி³னா கோஸலேன தி³ன்னங் ராஜதா³யங் ப்³ரஹ்மதெ³ய்யங். அஸ்ஸோஸி கோ² ப்³ராஹ்மணோ பொக்க²ரஸாதி – ‘‘ஸமணோ க²லு, போ⁴, கோ³தமோ ஸக்யபுத்தோ ஸக்யகுலா பப்³ப³ஜிதோ கோஸலேஸு சாரிகங் சரமானோ மஹதா பி⁴க்கு²ஸங்கே⁴ன ஸத்³தி⁴ங் பஞ்சமத்தேஹி பி⁴க்கு²ஸதேஹி இச்சா²னங்க³லங் அனுப்பத்தோ இச்சா²னங்க³லே விஹரதி இச்சா²னங்க³லவனஸண்டே³. தங் கோ² பன ப⁴வந்தங் கோ³தமங் ஏவங் கல்யாணோ கித்திஸத்³தோ³ அப்³பு⁴க்³க³தோ – ‘இதிபி ஸோ ப⁴க³வா அரஹங் ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி² ஸத்தா² தே³வமனுஸ்ஸானங் பு³த்³தோ⁴ ப⁴க³வா’ ப⁴க³வாதி (ஸ்யா॰ கங்॰), உபரிஸோணத³ண்ட³ஸுத்தாதீ³ஸுபி பு³த்³த⁴கு³ணகதா²யங் ஏவமேவ தி³ஸ்ஸதி. ஸோ இமங் லோகங் ஸதே³வகங் ஸமாரகங் ஸப்³ரஹ்மகங் ஸஸ்ஸமணப்³ராஹ்மணிங் பஜங் ஸதே³வமனுஸ்ஸங் ஸயங் அபி⁴ஞ்ஞா ஸச்சி²கத்வா பவேதே³தி. ஸோ த⁴ம்மங் தே³ஸேதி ஆதி³கல்யாணங் மஜ்ஜே²கல்யாணங் பரியோஸானகல்யாணங், ஸாத்த²ங் ஸப்³யஞ்ஜனங், கேவலபரிபுண்ணங் பரிஸுத்³த⁴ங் ப்³ரஹ்மசரியங் பகாஸேதி. ஸாது⁴ கோ² பன ததா²ரூபானங் அரஹதங் த³ஸ்ஸனங் ஹோதீ’’தி.
அம்ப³ட்ட²மாணவோ
256. தேன கோ² பன ஸமயேன ப்³ராஹ்மணஸ்ஸ பொக்க²ரஸாதிஸ்ஸ அம்ப³ட்டோ² நாம மாணவோ அந்தேவாஸீ ஹோதி அஜ்ஜா²யகோ மந்தத⁴ரோ திண்ணங் வேதா³னங் பே³தா³னங் (க॰) பாரகூ³ ஸனிக⁴ண்டு³கேடுபா⁴னங் ஸாக்க²ரப்பபே⁴தா³னங் இதிஹாஸபஞ்சமானங் பத³கோ வெய்யாகரணோ லோகாயதமஹாபுரிஸலக்க²ணேஸு அனவயோ அனுஞ்ஞாதபடிஞ்ஞாதோ ஸகே ஆசரியகே தேவிஜ்ஜகே பாவசனே – ‘‘யமஹங் ஜானாமி, தங் த்வங் ஜானாஸி; யங் த்வங் ஜானாஸி தமஹங் ஜானாமீ’’தி.
257. அத² கோ² ப்³ராஹ்மணோ பொக்க²ரஸாதி அம்ப³ட்ட²ங் மாணவங் ஆமந்தேஸி – ‘‘அயங், தாத அம்ப³ட்ட², ஸமணோ கோ³தமோ ஸக்யபுத்தோ ஸக்யகுலா பப்³ப³ஜிதோ கோஸலேஸு சாரிகங் சரமானோ மஹதா பி⁴க்கு²ஸங்கே⁴ன ஸத்³தி⁴ங் பஞ்சமத்தேஹி பி⁴க்கு²ஸதேஹி இச்சா²னங்க³லங் அனுப்பத்தோ இச்சா²னங்க³லே விஹரதி இச்சா²னங்க³லவனஸண்டே³. தங் கோ² பன ப⁴வந்தங் கோ³தமங் ஏவங் கல்யாணோ கித்திஸத்³தோ³ அப்³பு⁴க்³க³தோ – ‘இதிபி ஸோ ப⁴க³வா, அரஹங் ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி² ஸத்தா² தே³வமனுஸ்ஸானங் பு³த்³தோ⁴ ப⁴க³வா’. ஸோ இமங் லோகங் ஸதே³வகங் ஸமாரகங் ஸப்³ரஹ்மகங் ஸஸ்ஸமணப்³ராஹ்மணிங் பஜங் ஸதே³வமனுஸ்ஸங் ஸயங் அபி⁴ஞ்ஞா ஸச்சி²கத்வா பவேதே³தி. ஸோ த⁴ம்மங் தே³ஸேதி ஆதி³கல்யாணங் மஜ்ஜே²கல்யாணங் பரியோஸானகல்யாணங், ஸாத்த²ங் ஸப்³யஞ்ஜனங் கேவலபரிபுண்ணங் பரிஸுத்³த⁴ங் ப்³ரஹ்மசரியங் பகாஸேதி. ஸாது⁴ கோ² பன ததா²ரூபானங் அரஹதங் த³ஸ்ஸனங் ஹோதீதி. ஏஹி த்வங் தாத அம்ப³ட்ட², யேன ஸமணோ கோ³தமோ தேனுபஸங்கம; உபஸங்கமித்வா ஸமணங் கோ³தமங் ஜானாஹி, யதி³ வா தங் ப⁴வந்தங் கோ³தமங் ததா²ஸந்தங்யேவ ஸத்³தோ³ அப்³பு⁴க்³க³தோ, யதி³ வா நோ ததா². யதி³ வா ஸோ ப⁴வங் கோ³தமோ தாதி³ஸோ, யதி³ வா ந தாதி³ஸோ, ததா² மயங் தங் ப⁴வந்தங் கோ³தமங் வேதி³ஸ்ஸாமா’’தி.
258. ‘‘யதா² கத²ங் பனாஹங், போ⁴, தங் ப⁴வந்தங் கோ³தமங் ஜானிஸ்ஸாமி – ‘யதி³ வா தங் ப⁴வந்தங் கோ³தமங் ததா²ஸந்தங்யேவ ஸத்³தோ³ அப்³பு⁴க்³க³தோ, யதி³ வா நோ ததா². யதி³ வா ஸோ ப⁴வங் கோ³தமோ தாதி³ஸோ, யதி³ வா ந தாதி³ஸோ’’’தி?
‘‘ஆக³தானி கோ², தாத அம்ப³ட்ட², அம்ஹாகங் மந்தேஸு த்³வத்திங்ஸ மஹாபுரிஸலக்க²ணானி, யேஹி ஸமன்னாக³தஸ்ஸ மஹாபுரிஸஸ்ஸ த்³வேயேவ க³தியோ ப⁴வந்தி அனஞ்ஞா. ஸசே அகா³ரங் அஜ்ஜா²வஸதி, ராஜா ஹோதி சக்கவத்தீ த⁴ம்மிகோ த⁴ம்மராஜா சாதுரந்தோ விஜிதாவீ ஜனபத³த்தா²வரியப்பத்தோ ஸத்தரதனஸமன்னாக³தோ . தஸ்ஸிமானி ஸத்த ரதனானி ப⁴வந்தி. ஸெய்யதி²த³ங் – சக்கரதனங், ஹத்தி²ரதனங், அஸ்ஸரதனங், மணிரதனங், இத்தி²ரதனங், க³ஹபதிரதனங், பரிணாயகரதனமேவ ஸத்தமங். பரோஸஹஸ்ஸங் கோ² பனஸ்ஸ புத்தா ப⁴வந்தி ஸூரா வீரங்க³ரூபா பரஸேனப்பமத்³த³னா. ஸோ இமங் பத²விங் ஸாக³ரபரியந்தங் அத³ண்டே³ன அஸத்தே²ன த⁴ம்மேன அபி⁴விஜிய அஜ்ஜா²வஸதி. ஸசே கோ² பன அகா³ரஸ்மா அனகா³ரியங் பப்³ப³ஜதி , அரஹங் ஹோதி ஸம்மாஸம்பு³த்³தோ⁴ லோகே விவட்டச்ச²தோ³. அஹங் கோ² பன, தாத அம்ப³ட்ட², மந்தானங் தா³தா; த்வங் மந்தானங் படிக்³க³ஹேதா’’தி.
259. ‘‘ஏவங், போ⁴’’தி கோ² அம்ப³ட்டோ² மாணவோ ப்³ராஹ்மணஸ்ஸ பொக்க²ரஸாதிஸ்ஸ படிஸ்ஸுத்வா உட்டா²யாஸனா ப்³ராஹ்மணங் பொக்க²ரஸாதிங் அபி⁴வாதெ³த்வா பத³க்கி²ணங் கத்வா வளவாரத²மாருய்ஹ ஸம்ப³ஹுலேஹி மாணவகேஹி ஸத்³தி⁴ங் யேன இச்சா²னங்க³லவனஸண்டோ³ தேன பாயாஸி. யாவதிகா யானஸ்ஸ பூ⁴மி யானேன க³ந்த்வா யானா பச்சோரோஹித்வா பத்திகோவ ஆராமங் பாவிஸி. தேன கோ² பன ஸமயேன ஸம்ப³ஹுலா பி⁴க்கூ² அப்³போ⁴காஸே சங்கமந்தி. அத² கோ² அம்ப³ட்டோ² மாணவோ யேன தே பி⁴க்கூ² தேனுபஸங்கமி; உபஸங்கமித்வா தே பி⁴க்கூ² ஏதத³வோச – ‘‘கஹங் நு கோ², போ⁴, ஏதரஹி ஸோ ப⁴வங் கோ³தமோ விஹரதி? தஞ்ஹி மயங் ப⁴வந்தங் கோ³தமங் த³ஸ்ஸனாய இதூ⁴பஸங்கந்தா’’தி.
260. அத² கோ² தேஸங் பி⁴க்கூ²னங் ஏதத³ஹோஸி – ‘‘அயங் கோ² அம்ப³ட்டோ² மாணவோ அபி⁴ஞ்ஞாதகோலஞ்ஞோ சேவ அபி⁴ஞ்ஞாதஸ்ஸ ச ப்³ராஹ்மணஸ்ஸ பொக்க²ரஸாதிஸ்ஸ அந்தேவாஸீ. அக³ரு கோ² பன ப⁴க³வதோ ஏவரூபேஹி குலபுத்தேஹி ஸத்³தி⁴ங் கதா²ஸல்லாபோ ஹோதீ’’தி. தே அம்ப³ட்ட²ங் மாணவங் ஏதத³வோசுங் – ‘‘ஏஸோ அம்ப³ட்ட² விஹாரோ ஸங்வுதத்³வாரோ, தேன அப்பஸத்³தோ³ உபஸங்கமித்வா அதரமானோ ஆளிந்த³ங் பவிஸித்வா உக்காஸித்வா அக்³க³ளங் ஆகோடேஹி, விவரிஸ்ஸதி தே ப⁴க³வா த்³வார’’ந்தி.
261. அத² கோ² அம்ப³ட்டோ² மாணவோ யேன ஸோ விஹாரோ ஸங்வுதத்³வாரோ, தேன அப்பஸத்³தோ³ உபஸங்கமித்வா அதரமானோ ஆளிந்த³ங் பவிஸித்வா உக்காஸித்வா அக்³க³ளங் ஆகோடேஸி. விவரி ப⁴க³வா த்³வாரங். பாவிஸி அம்ப³ட்டோ² மாணவோ. மாணவகாபி பவிஸித்வா ப⁴க³வதா ஸத்³தி⁴ங் ஸம்மோதி³ங்ஸு, ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³ங்ஸு. அம்ப³ட்டோ² பன மாணவோ சங்கமந்தோபி நிஸின்னேன ப⁴க³வதா கஞ்சி கஞ்சி கிஞ்சி கிஞ்சி (க॰) கத²ங் ஸாரணீயங் வீதிஸாரேதி, டி²தோபி நிஸின்னேன ப⁴க³வதா கிஞ்சி கிஞ்சி கத²ங் ஸாரணீயங் வீதிஸாரேதி.
262. அத² கோ² ப⁴க³வா அம்ப³ட்ட²ங் மாணவங் ஏதத³வோச – ‘‘ஏவங் நு தே, அம்ப³ட்ட², ப்³ராஹ்மணேஹி வுத்³தே⁴ஹி மஹல்லகேஹி ஆசரியபாசரியேஹி ஸத்³தி⁴ங் கதா²ஸல்லாபோ ஹோதி, யத²யித³ங் சரங் திட்ட²ங் நிஸின்னேன மயா கிஞ்சி கிஞ்சி கத²ங் ஸாரணீயங் வீதிஸாரேதீ’’தி?
பட²மஇப்³ப⁴வாதோ³
263. ‘‘நோ ஹித³ங், போ⁴ கோ³தம. க³ச்ச²ந்தோ வா ஹி, போ⁴ கோ³தம, க³ச்ச²ந்தேன ப்³ராஹ்மணோ ப்³ராஹ்மணேன ஸத்³தி⁴ங் ஸல்லபிதுமரஹதி, டி²தோ வா ஹி, போ⁴ கோ³தம, டி²தேன ப்³ராஹ்மணோ ப்³ராஹ்மணேன ஸத்³தி⁴ங் ஸல்லபிதுமரஹதி, நிஸின்னோ வா ஹி, போ⁴ கோ³தம, நிஸின்னேன ப்³ராஹ்மணோ ப்³ராஹ்மணேன ஸத்³தி⁴ங் ஸல்லபிதுமரஹதி, ஸயானோ வா ஹி, போ⁴ கோ³தம, ஸயானேன ப்³ராஹ்மணோ ப்³ராஹ்மணேன ஸத்³தி⁴ங் ஸல்லபிதுமரஹதி. யே ச கோ² தே, போ⁴ கோ³தம, முண்ட³கா ஸமணகா இப்³பா⁴ கண்ஹா கிண்ஹா (க॰ ஸீ॰ பீ॰) ப³ந்து⁴பாதா³பச்சா, தேஹிபி மே ஸத்³தி⁴ங் ஏவங் கதா²ஸல்லாபோ ஹோதி, யத²ரிவ போ⁴தா கோ³தமேனா’’தி. ‘‘அத்தி²கவதோ கோ² பன தே, அம்ப³ட்ட², இதா⁴க³மனங் அஹோஸி, யாயேவ கோ² பனத்தா²ய ஆக³ச்செ²ய்யாத² ஆக³ச்செ²ய்யாதோ² (ஸீ॰ பீ॰), தமேவ அத்த²ங் ஸாது⁴கங் மனஸி கரெய்யாத² மனஸிகரெய்யாதோ² (ஸீ॰ பீ॰). அவுஸிதவாயேவ கோ² பன போ⁴ அயங் அம்ப³ட்டோ² மாணவோ வுஸிதமானீ கிமஞ்ஞத்ர அவுஸிதத்தா’’தி.
264. அத² கோ² அம்ப³ட்டோ² மாணவோ ப⁴க³வதா அவுஸிதவாதே³ன வுச்சமானோ குபிதோ அனத்தமனோ ப⁴க³வந்தங்யேவ கு²ங்ஸெந்தோ ப⁴க³வந்தங்யேவ வம்பெ⁴ந்தோ ப⁴க³வந்தங்யேவ உபவத³மானோ – ‘‘ஸமணோ ச மே, போ⁴, கோ³தமோ பாபிதோ ப⁴விஸ்ஸதீ’’தி ப⁴க³வந்தங் ஏதத³வோச – ‘‘சண்டா³, போ⁴ கோ³தம, ஸக்யஜாதி; ப²ருஸா, போ⁴ கோ³தம, ஸக்யஜாதி; லஹுஸா, போ⁴ கோ³தம, ஸக்யஜாதி; ப⁴ஸ்ஸா, போ⁴ கோ³தம, ஸக்யஜாதி; இப்³பா⁴ ஸந்தா இப்³பா⁴ ஸமானா ந ப்³ராஹ்மணே ஸக்கரொந்தி, ந ப்³ராஹ்மணே க³ருங் கரொந்தி க³ருகரொந்தி (ஸீ॰ ஸ்யா॰ கங்॰ பீ॰), ந ப்³ராஹ்மணே மானெந்தி, ந ப்³ராஹ்மணே பூஜெந்தி, ந ப்³ராஹ்மணே அபசாயந்தி. தயித³ங், போ⁴ கோ³தம, நச்ச²ன்னங், தயித³ங் நப்பதிரூபங், யதி³மே ஸக்யா இப்³பா⁴ ஸந்தா இப்³பா⁴ ஸமானா ந ப்³ராஹ்மணே ஸக்கரொந்தி, ந ப்³ராஹ்மணே க³ருங் கரொந்தி, ந ப்³ராஹ்மணே மானெந்தி, ந ப்³ராஹ்மணே பூஜெந்தி, ந ப்³ராஹ்மணே அபசாயந்தீ’’தி. இதிஹ அம்ப³ட்டோ² மாணவோ இத³ங் பட²மங் ஸக்யேஸு இப்³ப⁴வாத³ங் நிபாதேஸி.
து³தியஇப்³ப⁴வாதோ³
265. ‘‘கிங் பன தே, அம்ப³ட்ட², ஸக்யா அபரத்³து⁴’’ந்தி? ‘‘ஏகமிதா³ஹங், போ⁴ கோ³தம, ஸமயங் ஆசரியஸ்ஸ ப்³ராஹ்மணஸ்ஸ பொக்க²ரஸாதிஸ்ஸ கேனசிதே³வ கரணீயேன கபிலவத்து²ங் அக³மாஸிங். யேன ஸக்யானங் ஸந்தா⁴கா³ரங் தேனுபஸங்கமிங். தேன கோ² பன ஸமயேன ஸம்ப³ஹுலா ஸக்யா சேவ ஸக்யகுமாரா ச ஸந்தா⁴கா³ரே ஸந்தா²கா³ரே (ஸீ॰ பீ॰) உச்சேஸு ஆஸனேஸு நிஸின்னா ஹொந்தி அஞ்ஞமஞ்ஞங் அங்கு³லிபதோத³கேஹி அங்கு³லிபதோத³கேன (பீ॰) ஸஞ்ஜக்³க⁴ந்தா ஸங்கீளந்தா, அஞ்ஞத³த்து² மமஞ்ஞேவ மஞ்ஞே அனுஜக்³க⁴ந்தா, ந மங் கோசி ஆஸனேனபி நிமந்தேஸி. தயித³ங், போ⁴ கோ³தம, நச்ச²ன்னங், தயித³ங் நப்பதிரூபங், யதி³மே ஸக்யா இப்³பா⁴ ஸந்தா இப்³பா⁴ ஸமானா ந ப்³ராஹ்மணே ஸக்கரொந்தி, ந ப்³ராஹ்மணே க³ருங் கரொந்தி, ந ப்³ராஹ்மணே மானெந்தி, ந ப்³ராஹ்மணே பூஜெந்தி, ந ப்³ராஹ்மணே அபசாயந்தீ’’தி. இதிஹ அம்ப³ட்டோ² மாணவோ இத³ங் து³தியங் ஸக்யேஸு இப்³ப⁴வாத³ங் நிபாதேஸி.
ததியஇப்³ப⁴வாதோ³
266. ‘‘லடுகிகாபி கோ², அம்ப³ட்ட², ஸகுணிகா ஸகே குலாவகே காமலாபினீ ஹோதி. ஸகங் கோ² பனேதங், அம்ப³ட்ட², ஸக்யானங் யதி³த³ங் கபிலவத்து²ங், நாரஹதாயஸ்மா அம்ப³ட்டோ² இமாய அப்பமத்தாய அபி⁴ஸஜ்ஜிது’’ந்தி. ‘‘சத்தாரோமே, போ⁴ கோ³தம, வண்ணா – க²த்தியா ப்³ராஹ்மணா வெஸ்ஸா ஸுத்³தா³. இமேஸஞ்ஹி, போ⁴ கோ³தம, சதுன்னங் வண்ணானங் தயோ வண்ணா – க²த்தியா ச வெஸ்ஸா ச ஸுத்³தா³ ச – அஞ்ஞத³த்து² ப்³ராஹ்மணஸ்ஸேவ பரிசாரகா ஸம்பஜ்ஜந்தி. தயித³ங், போ⁴ கோ³தம , நச்ச²ன்னங், தயித³ங் நப்பதிரூபங், யதி³மே ஸக்யா இப்³பா⁴ ஸந்தா இப்³பா⁴ ஸமானா ந ப்³ராஹ்மணே ஸக்கரொந்தி, ந ப்³ராஹ்மணே க³ருங் கரொந்தி, ந ப்³ராஹ்மணே மானெந்தி, ந ப்³ராஹ்மணே பூஜெந்தி, ந ப்³ராஹ்மணே அபசாயந்தீ’’தி. இதிஹ அம்ப³ட்டோ² மாணவோ இத³ங் ததியங் ஸக்யேஸு இப்³ப⁴வாத³ங் நிபாதேஸி.
தா³ஸிபுத்தவாதோ³
267. அத² கோ² ப⁴க³வதோ ஏதத³ஹோஸி – ‘‘அதிபா³ள்ஹங் கோ² அயங் அம்ப³ட்டோ² மாணவோ ஸக்யேஸு இப்³ப⁴வாதே³ன நிம்மாதே³தி, யங்னூனாஹங் கொ³த்தங் புச்செ²ய்ய’’ந்தி. அத² கோ² ப⁴க³வா அம்ப³ட்ட²ங் மாணவங் ஏதத³வோச – ‘‘கத²ங் கொ³த்தோஸி, அம்ப³ட்டா²’’தி? ‘‘கண்ஹாயனோஹமஸ்மி, போ⁴ கோ³தமா’’தி. போராணங் கோ² பன தே அம்ப³ட்ட² மாதாபெத்திகங் நாமகொ³த்தங் அனுஸ்ஸரதோ அய்யபுத்தா ஸக்யா ப⁴வந்தி; தா³ஸிபுத்தோ த்வமஸி ஸக்யானங். ஸக்யா கோ² பன, அம்ப³ட்ட², ராஜானங் ஓக்காகங் பிதாமஹங் த³ஹந்தி.
‘‘பூ⁴தபுப்³ப³ங், அம்ப³ட்ட², ராஜா ஓக்காகோ யா ஸா மஹேஸீ பியா மனாபா, தஸ்ஸா புத்தஸ்ஸ ரஜ்ஜங் பரிணாமேதுகாமோ ஜெட்ட²குமாரே ரட்ட²ஸ்மா பப்³பா³ஜேஸி – ஓக்காமுக²ங் கரகண்ட³ங் உக்காமுக²ங் கரகண்டு³ங் (ஸீ॰ ஸ்யா॰) ஹத்தி²னிகங் ஸினிஸூரங் ஸினிபுரங் (ஸீ॰ ஸ்யா॰). தே ரட்ட²ஸ்மா பப்³பா³ஜிதா ஹிமவந்தபஸ்ஸே பொக்க²ரணியா தீரே மஹாஸாகஸண்டோ³, தத்த² வாஸங் கப்பேஸுங். தே ஜாதிஸம்பே⁴த³ப⁴யா ஸகாஹி ப⁴கி³னீஹி ஸத்³தி⁴ங் ஸங்வாஸங் கப்பேஸுங்.
‘‘அத² கோ², அம்ப³ட்ட², ராஜா ஓக்காகோ அமச்சே பாரிஸஜ்ஜே ஆமந்தேஸி – ‘கஹங் நு கோ², போ⁴, ஏதரஹி குமாரா ஸம்மந்தீ’தி? ‘அத்தி², தே³வ, ஹிமவந்தபஸ்ஸே பொக்க²ரணியா தீரே மஹாஸாகஸண்டோ³ , தத்தே²தரஹி குமாரா ஸம்மந்தி. தே ஜாதிஸம்பே⁴த³ப⁴யா ஸகாஹி ப⁴கி³னீஹி ஸத்³தி⁴ங் ஸங்வாஸங் கப்பெந்தீ’தி. அத² கோ², அம்ப³ட்ட², ராஜா ஓக்காகோ உதா³னங் உதா³னேஸி – ‘ஸக்யா வத, போ⁴, குமாரா, பரமஸக்யா வத, போ⁴, குமாரா’தி. தத³க்³கே³ கோ² பன அம்ப³ட்ட² ஸக்யா பஞ்ஞாயந்தி; ஸோ ச நேஸங் புப்³ப³புரிஸோ.
‘‘ரஞ்ஞோ கோ² பன, அம்ப³ட்ட², ஓக்காகஸ்ஸ தி³ஸா நாம தா³ஸீ அஹோஸி. ஸா கண்ஹங் நாம ஸா கண்ஹங் (பீ॰) ஜனேஸி. ஜாதோ கண்ஹோ பப்³யாஹாஸி – ‘தோ⁴வத² மங், அம்ம, நஹாபேத² மங் அம்ம, இமஸ்மா மங் அஸுசிஸ்மா பரிமோசேத², அத்தா²ய வோ ப⁴விஸ்ஸாமீ’தி. யதா² கோ² பன அம்ப³ட்ட² ஏதரஹி மனுஸ்ஸா பிஸாசே தி³ஸ்வா ‘பிஸாசா’தி ஸஞ்ஜானந்தி; ஏவமேவ கோ², அம்ப³ட்ட², தேன கோ² பன ஸமயேன மனுஸ்ஸா பிஸாசே ‘கண்ஹா’தி ஸஞ்ஜானந்தி. தே ஏவமாஹங்ஸு – ‘அயங் ஜாதோ பப்³யாஹாஸி, கண்ஹோ ஜாதோ, பிஸாசோ ஜாதோ’தி. தத³க்³கே³ கோ² பன, அம்ப³ட்ட² கண்ஹாயனா பஞ்ஞாயந்தி, ஸோ ச கண்ஹாயனானங் புப்³ப³புரிஸோ. இதி கோ² தே , அம்ப³ட்ட², போராணங் மாதாபெத்திகங் நாமகொ³த்தங் அனுஸ்ஸரதோ அய்யபுத்தா ஸக்யா ப⁴வந்தி, தா³ஸிபுத்தோ த்வமஸி ஸக்யான’’ந்தி.
268. ஏவங் வுத்தே, தே மாணவகா ப⁴க³வந்தங் ஏதத³வோசுங் – ‘‘மா ப⁴வங் கோ³தமோ அம்ப³ட்ட²ங் அதிபா³ள்ஹங் தா³ஸிபுத்தவாதே³ன நிம்மாதே³ஸி. ஸுஜாதோ ச, போ⁴ கோ³தம அம்ப³ட்டோ² மாணவோ, குலபுத்தோ ச அம்ப³ட்டோ² மாணவோ, ப³ஹுஸ்ஸுதோ ச அம்ப³ட்டோ² மாணவோ, கல்யாணவாக்கரணோ ச அம்ப³ட்டோ² மாணவோ, பண்டி³தோ ச அம்ப³ட்டோ² மாணவோ, பஹோதி ச அம்ப³ட்டோ² மாணவோ போ⁴தா கோ³தமேன ஸத்³தி⁴ங் அஸ்மிங் வசனே படிமந்தேது’’ந்தி.
269. அத² கோ² ப⁴க³வா தே மாணவகே ஏதத³வோச – ‘‘ஸசே கோ² தும்ஹாகங் மாணவகானங் ஏவங் ஹோதி – ‘து³ஜ்ஜாதோ ச அம்ப³ட்டோ² மாணவோ, அகுலபுத்தோ ச அம்ப³ட்டோ² மாணவோ, அப்பஸ்ஸுதோ ச அம்ப³ட்டோ² மாணவோ, அகல்யாணவாக்கரணோ ச அம்ப³ட்டோ² மாணவோ, து³ப்பஞ்ஞோ ச அம்ப³ட்டோ² மாணவோ, ந ச பஹோதி அம்ப³ட்டோ² மாணவோ ஸமணேன கோ³தமேன ஸத்³தி⁴ங் அஸ்மிங் வசனே படிமந்தேது’ந்தி, திட்ட²து அம்ப³ட்டோ² மாணவோ, தும்ஹே மயா ஸத்³தி⁴ங் மந்தவ்ஹோ அஸ்மிங் வசனே. ஸசே பன தும்ஹாகங் மாணவகானங் ஏவங் ஹோதி – ‘ஸுஜாதோ ச அம்ப³ட்டோ² மாணவோ, குலபுத்தோ ச அம்ப³ட்டோ² மாணவோ, ப³ஹுஸ்ஸுதோ ச அம்ப³ட்டோ² மாணவோ, கல்யாணவாக்கரணோ ச அம்ப³ட்டோ² மாணவோ, பண்டி³தோ ச அம்ப³ட்டோ² மாணவோ, பஹோதி ச அம்ப³ட்டோ² மாணவோ ஸமணேன கோ³தமேன ஸத்³தி⁴ங் அஸ்மிங் வசனே படிமந்தேது’ந்தி, திட்ட²த² தும்ஹே; அம்ப³ட்டோ² மாணவோ மயா ஸத்³தி⁴ங் படிமந்தேதூ’’தி.
‘‘ஸுஜாதோ ச, போ⁴ கோ³தம, அம்ப³ட்டோ² மாணவோ, குலபுத்தோ ச அம்ப³ட்டோ² மாணவோ, ப³ஹுஸ்ஸுதோ ச அம்ப³ட்டோ² மாணவோ, கல்யாணவாக்கரணோ ச அம்ப³ட்டோ² மாணவோ, பண்டி³தோ ச அம்ப³ட்டோ² மாணவோ, பஹோதி ச அம்ப³ட்டோ² மாணவோ போ⁴தா கோ³தமேன ஸத்³தி⁴ங் அஸ்மிங் வசனே படிமந்தேதுங், துண்ஹீ மயங் ப⁴விஸ்ஸாம, அம்ப³ட்டோ² மாணவோ போ⁴தா கோ³தமேன ஸத்³தி⁴ங் அஸ்மிங் வசனே படிமந்தேதூ’’தி.
270. அத² கோ² ப⁴க³வா அம்ப³ட்ட²ங் மாணவங் ஏதத³வோச – ‘‘அயங் கோ² பன தே, அம்ப³ட்ட², ஸஹத⁴ம்மிகோ பஞ்ஹோ ஆக³ச்ச²தி, அகாமா ப்³யாகாதப்³போ³. ஸசே த்வங் ந ப்³யாகரிஸ்ஸஸி, அஞ்ஞேன வா அஞ்ஞங் படிசரிஸ்ஸஸி, துண்ஹீ வா ப⁴விஸ்ஸஸி, பக்கமிஸ்ஸஸி வா எத்தே²வ தே ஸத்ததா⁴ முத்³தா⁴ ப²லிஸ்ஸதி. தங் கிங் மஞ்ஞஸி, அம்ப³ட்ட², கிந்தி தே ஸுதங் ப்³ராஹ்மணானங் வுத்³தா⁴னங் மஹல்லகானங் ஆசரியபாசரியானங் பா⁴ஸமானானங் குதோபபு⁴திகா கண்ஹாயனா, கோ ச கண்ஹாயனானங் புப்³ப³புரிஸோ’’தி?
ஏவங் வுத்தே, அம்ப³ட்டோ² மாணவோ துண்ஹீ அஹோஸி. து³தியம்பி கோ² ப⁴க³வா அம்ப³ட்ட²ங் மாணவங் ஏதத³வோச – ‘‘தங் கிங் மஞ்ஞஸி, அம்ப³ட்ட², கிந்தி தே ஸுதங் ப்³ராஹ்மணானங் வுத்³தா⁴னங் மஹல்லகானங் ஆசரியபாசரியானங் பா⁴ஸமானானங் குதோபபு⁴திகா கண்ஹாயனா, கோ ச கண்ஹாயனானங் புப்³ப³புரிஸோ’’தி? து³தியம்பி கோ² அம்ப³ட்டோ² மாணவோ துண்ஹீ அஹோஸி. அத² கோ² ப⁴க³வா அம்ப³ட்ட²ங் மாணவங் ஏதத³வோச – ‘‘ப்³யாகரோஹி தா³னி அம்ப³ட்ட², ந தா³னி, தே துண்ஹீபா⁴வஸ்ஸ காலோ. யோ கோ², அம்ப³ட்ட², ததா²க³தேன யாவததியகங் ஸஹத⁴ம்மிகங் பஞ்ஹங் புட்டோ² ந ப்³யாகரோதி, எத்தே²வஸ்ஸ ஸத்ததா⁴ முத்³தா⁴ ப²லிஸ்ஸதீ’’தி.
271. தேன கோ² பன ஸமயேன வஜிரபாணீ யக்கோ² மஹந்தங் அயோகூடங் ஆதா³ய ஆதி³த்தங் ஸம்பஜ்ஜலிதங் ஸஜோதிபூ⁴தங் ஸஞ்ஜோதிபூ⁴தங் (ஸ்யா॰) அம்ப³ட்ட²ஸ்ஸ மாணவஸ்ஸ உபரி வேஹாஸங் டி²தோ ஹோதி – ‘‘ஸசாயங் அம்ப³ட்டோ² மாணவோ ப⁴க³வதா யாவததியகங் ஸஹத⁴ம்மிகங் பஞ்ஹங் புட்டோ² ந ப்³யாகரிஸ்ஸதி, எத்தே²வஸ்ஸ ஸத்ததா⁴ முத்³த⁴ங் பா²லெஸ்ஸாமீ’’தி. தங் கோ² பன வஜிரபாணிங் யக்க²ங் ப⁴க³வா சேவ பஸ்ஸதி அம்ப³ட்டோ² ச மாணவோ.
272. அத² கோ² அம்ப³ட்டோ² மாணவோ பீ⁴தோ ஸங்விக்³கோ³ லோமஹட்ட²ஜாதோ ப⁴க³வந்தங்யேவ தாணங் க³வேஸீ ப⁴க³வந்தங்யேவ லேணங் க³வேஸீ ப⁴க³வந்தங்யேவ ஸரணங் க³வேஸீ – உபனிஸீதி³த்வா ப⁴க³வந்தங் ஏதத³வோச – ‘‘கிமேதங் கிங் மே தங் (க॰) ப⁴வங் கோ³தமோ ஆஹ? புனப⁴வங் கோ³தமோ ப்³ரவிதூ’’தி ப்³ரூது (ஸ்யா॰).
‘‘தங் கிங் மஞ்ஞஸி, அம்ப³ட்ட², கிந்தி தே ஸுதங் ப்³ராஹ்மணானங் வுத்³தா⁴னங் மஹல்லகானங் ஆசரியபாசரியானங் பா⁴ஸமானானங் குதோபபு⁴திகா கண்ஹாயனா, கோ ச கண்ஹாயனானங் புப்³ப³புரிஸோ’’தி? ‘‘ஏவமேவ மே, போ⁴ கோ³தம, ஸுதங் யதே²வ ப⁴வங் கோ³தமோ ஆஹ. ததோபபு⁴திகா கண்ஹாயனா; ஸோ ச கண்ஹாயனானங் புப்³ப³புரிஸோ’’தி.
அம்ப³ட்ட²வங்ஸகதா²
273. ஏவங் வுத்தே, தே மாணவகா உன்னாதி³னோ உச்சாஸத்³த³மஹாஸத்³தா³ அஹேஸுங் – ‘‘து³ஜ்ஜாதோ கிர, போ⁴, அம்ப³ட்டோ² மாணவோ; அகுலபுத்தோ கிர, போ⁴, அம்ப³ட்டோ² மாணவோ; தா³ஸிபுத்தோ கிர, போ⁴, அம்ப³ட்டோ² மாணவோ ஸக்யானங். அய்யபுத்தா கிர, போ⁴, அம்ப³ட்ட²ஸ்ஸ மாணவஸ்ஸ ஸக்யா ப⁴வந்தி. த⁴ம்மவாதி³ங்யேவ கிர மயங் ஸமணங் கோ³தமங் அபஸாதே³தப்³ப³ங் அமஞ்ஞிம்ஹா’’தி.
274. அத² கோ² ப⁴க³வதோ ஏதத³ஹோஸி – ‘‘அதிபா³ள்ஹங் கோ² இமே மாணவகா அம்ப³ட்ட²ங் மாணவங் தா³ஸிபுத்தவாதே³ன நிம்மாதெ³ந்தி, யங்னூனாஹங் பரிமோசெய்ய’’ந்தி. அத² கோ² ப⁴க³வா தே மாணவகே ஏதத³வோச – ‘‘மா கோ² தும்ஹே, மாணவகா, அம்ப³ட்ட²ங் மாணவங் அதிபா³ள்ஹங் தா³ஸிபுத்தவாதே³ன நிம்மாதே³த². உளாரோ ஸோ கண்ஹோ இஸி அஹோஸி. ஸோ த³க்கி²ணஜனபத³ங் க³ந்த்வா ப்³ரஹ்மமந்தே அதீ⁴யித்வா ராஜானங் ஓக்காகங் உபஸங்கமித்வா மத்³த³ரூபிங் தீ⁴தரங் யாசி. தஸ்ஸ ராஜா ஓக்காகோ – ‘கோ நேவங் ரே அயங் மய்ஹங் தா³ஸிபுத்தோ ஸமானோ மத்³த³ரூபிங் தீ⁴தரங் யாசதீ’’’ தி, குபிதோ அனத்தமனோ கு²ரப்பங் ஸன்னய்ஹி ஸன்னஹி (க॰). ஸோ தங் கு²ரப்பங் நேவ அஸக்கி² முஞ்சிதுங், நோ படிஸங்ஹரிதுங்.
‘‘அத² கோ², மாணவகா, அமச்சா பாரிஸஜ்ஜா கண்ஹங் இஸிங் உபஸங்கமித்வா ஏதத³வோசுங் – ‘ஸொத்தி², ப⁴த்³த³ந்தே ப⁴த³ந்தே (ஸீ॰ ஸ்யா॰), ஹோது ரஞ்ஞோ; ஸொத்தி², ப⁴த்³த³ந்தே, ஹோது ரஞ்ஞோ’தி. ‘ஸொத்தி² ப⁴விஸ்ஸதி ரஞ்ஞோ, அபி ச ராஜா யதி³ அதோ⁴ கு²ரப்பங் முஞ்சிஸ்ஸதி, யாவதா ரஞ்ஞோ விஜிதங், எத்தாவதா பத²வீ உந்த்³ரியிஸ்ஸதீ’தி. ‘ஸொத்தி², ப⁴த்³த³ந்தே, ஹோது ரஞ்ஞோ, ஸொத்தி² ஜனபத³ஸ்ஸா’தி. ‘ஸொத்தி² ப⁴விஸ்ஸதி ரஞ்ஞோ, ஸொத்தி² ஜனபத³ஸ்ஸ, அபி ச ராஜா யதி³ உத்³த⁴ங் கு²ரப்பங் முஞ்சிஸ்ஸதி, யாவதா ரஞ்ஞோ விஜிதங், எத்தாவதா ஸத்த வஸ்ஸானி தே³வோ ந வஸ்ஸிஸ்ஸதீ’தி. ‘ஸொத்தி², ப⁴த்³த³ந்தே, ஹோது ரஞ்ஞோ ஸொத்தி² ஜனபத³ஸ்ஸ தே³வோ ச வஸ்ஸதூ’தி. ‘ஸொத்தி² ப⁴விஸ்ஸதி ரஞ்ஞோ ஸொத்தி² ஜனபத³ஸ்ஸ தே³வோ ச வஸ்ஸிஸ்ஸதி, அபி ச ராஜா ஜெட்ட²குமாரே கு²ரப்பங் பதிட்டா²பேது, ஸொத்தி² குமாரோ பல்லோமோ ப⁴விஸ்ஸதீ’தி. அத² கோ², மாணவகா, அமச்சா ஓக்காகஸ்ஸ ஆரோசேஸுங் – ‘ஓக்காகோ ஜெட்ட²குமாரே கு²ரப்பங் பதிட்டா²பேது. ஸொத்தி² குமாரோ பல்லோமோ ப⁴விஸ்ஸதீ’தி. அத² கோ² ராஜா ஓக்காகோ ஜெட்ட²குமாரே கு²ரப்பங் பதிட்ட²பேஸி, ஸொத்தி² குமாரோ பல்லோமோ ஸமப⁴வி. அத² கோ² தஸ்ஸ ராஜா ஓக்காகோ பீ⁴தோ ஸங்விக்³கோ³ லோமஹட்ட²ஜாதோ ப்³ரஹ்மத³ண்டே³ன தஜ்ஜிதோ மத்³த³ரூபிங் தீ⁴தரங் அதா³ஸி. மா கோ² தும்ஹே, மாணவகா, அம்ப³ட்ட²ங் மாணவங் அதிபா³ள்ஹங் தா³ஸிபுத்தவாதே³ன நிம்மாதே³த², உளாரோ ஸோ கண்ஹோ இஸி அஹோஸீ’’தி.
க²த்தியஸெட்ட²பா⁴வோ
275. அத² கோ² ப⁴க³வா அம்ப³ட்ட²ங் மாணவங் ஆமந்தேஸி – ‘‘தங் கிங் மஞ்ஞஸி, அம்ப³ட்ட², இத⁴ க²த்தியகுமாரோ ப்³ராஹ்மணகஞ்ஞாய ஸத்³தி⁴ங் ஸங்வாஸங் கப்பெய்ய, தேஸங் ஸங்வாஸமன்வாய புத்தோ ஜாயேத². யோ ஸோ க²த்தியகுமாரேன ப்³ராஹ்மணகஞ்ஞாய புத்தோ உப்பன்னோ, அபி நு ஸோ லபே⁴த² ப்³ராஹ்மணேஸு ஆஸனங் வா உத³கங் வா’’தி? ‘‘லபே⁴த², போ⁴ கோ³தம’’. ‘‘அபினு நங் ப்³ராஹ்மணா போ⁴ஜெய்யுங் ஸத்³தே⁴ வா தா²லிபாகே வா யஞ்ஞே வா பாஹுனே வா’’தி? ‘‘போ⁴ஜெய்யுங், போ⁴ கோ³தம’’. ‘‘அபினு நங் ப்³ராஹ்மணா மந்தே வாசெய்யுங் வா நோ வா’’தி? ‘‘வாசெய்யுங், போ⁴ கோ³தம’’. ‘‘அபினுஸ்ஸ இத்தீ²ஸு ஆவடங் வா அஸ்ஸ அனாவடங் வா’’தி? ‘‘அனாவடங் ஹிஸ்ஸ, போ⁴ கோ³தம’’. ‘‘அபினு நங் க²த்தியா க²த்தியாபி⁴ஸேகேன அபி⁴ஸிஞ்செய்யு’’ந்தி? ‘‘நோ ஹித³ங், போ⁴ கோ³தம’’. ‘‘தங் கிஸ்ஸ ஹேது’’? ‘‘மாதிதோ ஹி, போ⁴ கோ³தம, அனுபபன்னோ’’தி.
‘‘தங் கிங் மஞ்ஞஸி, அம்ப³ட்ட², இத⁴ ப்³ராஹ்மணகுமாரோ க²த்தியகஞ்ஞாய ஸத்³தி⁴ங் ஸங்வாஸங் கப்பெய்ய, தேஸங் ஸங்வாஸமன்வாய புத்தோ ஜாயேத². யோ ஸோ ப்³ராஹ்மணகுமாரேன க²த்தியகஞ்ஞாய புத்தோ உப்பன்னோ, அபினு ஸோ லபே⁴த² ப்³ராஹ்மணேஸு ஆஸனங் வா உத³கங் வா’’தி? ‘‘லபே⁴த², போ⁴ கோ³தம’’. ‘‘அபினு நங் ப்³ராஹ்மணா போ⁴ஜெய்யுங் ஸத்³தே⁴ வா தா²லிபாகே வா யஞ்ஞே வா பாஹுனே வா’’தி? ‘‘போ⁴ஜெய்யுங், போ⁴ கோ³தம’’. ‘‘அபினு நங் ப்³ராஹ்மணா மந்தே வாசெய்யுங் வா நோ வா’’தி? ‘‘வாசெய்யுங், போ⁴ கோ³தம’’. ‘‘அபினுஸ்ஸ இத்தீ²ஸு ஆவடங் வா அஸ்ஸ அனாவடங் வா’’தி? ‘‘அனாவடங் ஹிஸ்ஸ, போ⁴ கோ³தம’’. ‘‘அபினு நங் க²த்தியா க²த்தியாபி⁴ஸேகேன அபி⁴ஸிஞ்செய்யு’’ந்தி? ‘‘நோ ஹித³ங், போ⁴ கோ³தம’’. ‘‘தங் கிஸ்ஸ ஹேது’’? ‘‘பிதிதோ ஹி, போ⁴ கோ³தம, அனுபபன்னோ’’தி.
276. ‘‘இதி கோ², அம்ப³ட்ட², இத்தி²யா வா இத்தி²ங் கரித்வா புரிஸேன வா புரிஸங் கரித்வா க²த்தியாவ ஸெட்டா², ஹீனா ப்³ராஹ்மணா. தங் கிங் மஞ்ஞஸி, அம்ப³ட்ட², இத⁴ ப்³ராஹ்மணா ப்³ராஹ்மணங் கிஸ்மிஞ்சிதே³வ பகரணே கு²ரமுண்ட³ங் கரித்வா ப⁴ஸ்ஸபுடேன வதி⁴த்வா ரட்டா² வா நக³ரா வா பப்³பா³ஜெய்யுங். அபினு ஸோ லபே⁴த² ப்³ராஹ்மணேஸு ஆஸனங் வா உத³கங் வா’’தி? ‘‘நோ ஹித³ங், போ⁴ கோ³தம’’ . ‘‘அபினு நங் ப்³ராஹ்மணா போ⁴ஜெய்யுங் ஸத்³தே⁴ வா தா²லிபாகே வா யஞ்ஞே வா பாஹுனே வா’’தி? ‘‘நோ ஹித³ங், போ⁴ கோ³தம’’. ‘‘அபினு நங் ப்³ராஹ்மணா மந்தே வாசெய்யுங் வா நோ வா’’தி? ‘‘நோ ஹித³ங், போ⁴ கோ³தம’’. ‘‘அபினுஸ்ஸ இத்தீ²ஸு ஆவடங் வா அஸ்ஸ அனாவடங் வா’’தி? ‘‘ஆவடங் ஹிஸ்ஸ, போ⁴ கோ³தம’’.
‘‘தங் கிங் மஞ்ஞஸி, அம்ப³ட்ட², இத⁴ க²த்தியா க²த்தியங் கிஸ்மிஞ்சிதே³வ பகரணே கு²ரமுண்ட³ங் கரித்வா ப⁴ஸ்ஸபுடேன வதி⁴த்வா ரட்டா² வா நக³ரா வா பப்³பா³ஜெய்யுங். அபினு ஸோ லபே⁴த² ப்³ராஹ்மணேஸு ஆஸனங் வா உத³கங் வா’’தி? ‘‘லபே⁴த², போ⁴ கோ³தம’’. ‘‘அபினு நங் ப்³ராஹ்மணா போ⁴ஜெய்யுங் ஸத்³தே⁴ வா தா²லிபாகே வா யஞ்ஞே வா பாஹுனே வா’’தி? ‘‘போ⁴ஜெய்யுங், போ⁴ கோ³தம’’. ‘‘அபினு நங் ப்³ராஹ்மணா மந்தே வாசெய்யுங் வா நோ வா’’தி? ‘‘வாசெய்யுங், போ⁴ கோ³தம’’. ‘‘அபினுஸ்ஸ இத்தீ²ஸு ஆவடங் வா அஸ்ஸ அனாவடங் வா’’தி? ‘‘அனாவடங் ஹிஸ்ஸ, போ⁴ கோ³தம’’.
277. ‘‘எத்தாவதா கோ², அம்ப³ட்ட², க²த்தியோ பரமனிஹீனதங் பத்தோ ஹோதி, யதே³வ நங் க²த்தியா கு²ரமுண்ட³ங் கரித்வா ப⁴ஸ்ஸபுடேன வதி⁴த்வா ரட்டா² வா நக³ரா வா பப்³பா³ஜெந்தி. இதி கோ², அம்ப³ட்ட², யதா³ க²த்தியோ பரமனிஹீனதங் பத்தோ ஹோதி, ததா³பி க²த்தியாவ ஸெட்டா², ஹீனா ப்³ராஹ்மணா. ப்³ரஹ்முனா பேஸா, அம்ப³ட்ட² ப்³ரஹ்முனாபி அம்ப³ட்ட² (க॰), ப்³ரஹ்முனாபி ஏஸோ அம்ப³ட்ட² (பீ॰), ஸனங்குமாரேன கா³தா² பா⁴ஸிதா –
‘க²த்தியோ ஸெட்டோ² ஜனேதஸ்மிங்,
யே கொ³த்தபடிஸாரினோ;
விஜ்ஜாசரணஸம்பன்னோ,
ஸோ ஸெட்டோ² தே³வமானுஸே’தி.
‘‘ஸா கோ² பனேஸா, அம்ப³ட்ட², ப்³ரஹ்முனா ஸனங்குமாரேன கா³தா² ஸுகீ³தா நோ து³க்³கீ³தா, ஸுபா⁴ஸிதா நோ து³ப்³பா⁴ஸிதா, அத்த²ஸங்ஹிதா நோ அனத்த²ஸங்ஹிதா, அனுமதா மயா. அஹம்பி ஹி, அம்ப³ட்ட², ஏவங் வதா³மி –
‘க²த்தியோ ஸெட்டோ² ஜனேதஸ்மிங்,
யே கொ³த்தபடிஸாரினோ;
விஜ்ஜாசரணஸம்பன்னோ,
ஸோ ஸெட்டோ² தே³வமானுஸே’தி.
பா⁴ணவாரோ பட²மோ.
விஜ்ஜாசரணகதா²
278. ‘‘கதமங் பன தங், போ⁴ கோ³தம, சரணங், கதமா ச பன ஸா விஜ்ஜா’’தி? ‘‘ந கோ², அம்ப³ட்ட², அனுத்தராய விஜ்ஜாசரணஸம்பதா³ய ஜாதிவாதோ³ வா வுச்சதி, கொ³த்தவாதோ³ வா வுச்சதி, மானவாதோ³ வா வுச்சதி – ‘அரஹஸி வா மங் த்வங், ந வா மங் த்வங் அரஹஸீ’தி. யத்த² கோ², அம்ப³ட்ட², ஆவாஹோ வா ஹோதி, விவாஹோ வா ஹோதி, ஆவாஹவிவாஹோ வா ஹோதி, எத்தே²தங் வுச்சதி ஜாதிவாதோ³ வா இதிபி கொ³த்தவாதோ³ வா இதிபி மானவாதோ³ வா இதிபி – ‘அரஹஸி வா மங் த்வங், ந வா மங் த்வங் அரஹஸீ’தி. யே ஹி கேசி அம்ப³ட்ட² ஜாதிவாத³வினிப³த்³தா⁴ வா கொ³த்தவாத³வினிப³த்³தா⁴ வா மானவாத³வினிப³த்³தா⁴ வா ஆவாஹவிவாஹவினிப³த்³தா⁴ வா, ஆரகா தே அனுத்தராய விஜ்ஜாசரணஸம்பதா³ய. பஹாய கோ², அம்ப³ட்ட², ஜாதிவாத³வினிப³த்³த⁴ஞ்ச கொ³த்தவாத³வினிப³த்³த⁴ஞ்ச மானவாத³வினிப³த்³த⁴ஞ்ச ஆவாஹவிவாஹவினிப³த்³த⁴ஞ்ச அனுத்தராய விஜ்ஜாசரணஸம்பதா³ய ஸச்சி²கிரியா ஹோதீ’’தி.
279. ‘‘கதமங் பன தங், போ⁴ கோ³தம, சரணங், கதமா ச ஸா விஜ்ஜா’’தி? ‘‘இத⁴, அம்ப³ட்ட², ததா²க³தோ லோகே உப்பஜ்ஜதி அரஹங் ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி² ஸத்தா² தே³வமனுஸ்ஸானங் பு³த்³தோ⁴ ப⁴க³வா. ஸோ இமங் லோகங் ஸதே³வகங் ஸமாரகங் ஸப்³ரஹ்மகங் ஸஸ்ஸமணப்³ராஹ்மணிங் பஜங் ஸதே³வமனுஸ்ஸங் ஸயங் அபி⁴ஞ்ஞா ஸச்சி²கத்வா பவேதே³தி. ஸோ த⁴ம்மங் தே³ஸேதி ஆதி³கல்யாணங் மஜ்ஜே²கல்யாணங் பரியோஸானகல்யாணங் ஸாத்த²ங் ஸப்³யஞ்ஜனங் கேவலபரிபுண்ணங் பரிஸுத்³த⁴ங் ப்³ரஹ்மசரியங் பகாஸேதி. தங் த⁴ம்மங் ஸுணாதி க³ஹபதி வா க³ஹபதிபுத்தோ வா அஞ்ஞதரஸ்மிங் வா குலே பச்சாஜாதோ. ஸோ தங் த⁴ம்மங் ஸுத்வா ததா²க³தே ஸத்³த⁴ங் படிலப⁴தி. ஸோ தேன ஸத்³தா⁴படிலாபே⁴ன ஸமன்னாக³தோ இதி படிஸஞ்சிக்க²தி…பே॰… (யதா² 191 ஆத³யோ அனுச்சே²தா³, ஏவங் வித்தா²ரேதப்³ப³ங்).…
‘‘ஸோ விவிச்சேவ காமேஹி, விவிச்ச அகுஸலேஹி த⁴ம்மேஹி, ஸவிதக்கங் ஸவிசாரங் விவேகஜங் பீதிஸுக²ங் பட²மங் ஜா²னங் உபஸம்பஜ்ஜ விஹரதி…பே॰… இத³ம்பிஸ்ஸ ஹோதி சரணஸ்மிங்.
‘‘புன சபரங், அம்ப³ட்ட², பி⁴க்கு² விதக்கவிசாரானங் வூபஸமா அஜ்ஜ²த்தங் ஸம்பஸாத³னங் சேதஸோ ஏகோதி³பா⁴வங் அவிதக்கங் அவிசாரங் ஸமாதி⁴ஜங் பீதிஸுக²ங் து³தியங் ஜா²னங் உபஸம்பஜ்ஜ விஹரதி…பே॰… இத³ம்பிஸ்ஸ ஹோதி சரணஸ்மிங்.
‘‘புன சபரங், அம்ப³ட்ட², பி⁴க்கு² பீதியா ச விராகா³ உபெக்க²கோ ச விஹரதி ஸதோ ச ஸம்பஜானோ, ஸுக²ஞ்ச காயேன படிஸங்வேதே³தி, யங் தங் அரியா ஆசிக்க²ந்தி – ‘‘உபெக்க²கோ ஸதிமா ஸுக²விஹாரீ’தி, ததியங் ஜா²னங் உபஸம்பஜ்ஜ விஹரதி…பே॰… இத³ம்பிஸ்ஸ ஹோதி சரணஸ்மிங்.
‘‘புன சபரங், அம்ப³ட்ட², பி⁴க்கு² ஸுக²ஸ்ஸ ச பஹானா து³க்க²ஸ்ஸ ச பஹானா, புப்³பே³வ ஸோமனஸ்ஸதோ³மனஸ்ஸானங் அத்த²ங்க³மா அது³க்க²மஸுக²ங் உபெக்கா²ஸதிபாரிஸுத்³தி⁴ங் சதுத்த²ங் ஜா²னங் உபஸம்பஜ்ஜ விஹரதி…பே॰… இத³ம்பிஸ்ஸ ஹோதி சரணஸ்மிங். இத³ங் கோ² தங், அம்ப³ட்ட², சரணங்.
‘‘ஸோ ஏவங் ஸமாஹிதே சித்தே பரிஸுத்³தே⁴ பரியோதா³தே அனங்க³ணே விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே ஞாணத³ஸ்ஸனாய சித்தங் அபி⁴னீஹரதி அபி⁴னின்னாமேதி…பே॰… இத³ம்பிஸ்ஸ ஹோதி விஜ்ஜாய…பே॰… நாபரங் இத்த²த்தாயாதி பஜானாதி, இத³ம்பிஸ்ஸ ஹோதி விஜ்ஜாய. அயங் கோ² ஸா, அம்ப³ட்ட², விஜ்ஜா.
‘‘அயங் வுச்சதி, அம்ப³ட்ட², பி⁴க்கு² ‘விஜ்ஜாஸம்பன்னோ’ இதிபி, ‘சரணஸம்பன்னோ’ இதிபி, ‘விஜ்ஜாசரணஸம்பன்னோ’ இதிபி. இமாய ச அம்ப³ட்ட² விஜ்ஜாஸம்பதா³ய சரணஸம்பதா³ய ச அஞ்ஞா விஜ்ஜாஸம்பதா³ ச சரணஸம்பதா³ ச உத்தரிதரா வா பணீததரா வா நத்தி².
சதுஅபாயமுக²ங்
280. ‘‘இமாய கோ², அம்ப³ட்ட², அனுத்தராய விஜ்ஜாசரணஸம்பதா³ய சத்தாரி அபாயமுகா²னி ப⁴வந்தி. கதமானி சத்தாரி? இத⁴, அம்ப³ட்ட², ஏகச்சோ ஸமணோ வா ப்³ராஹ்மணோ வா இமஞ்ஞேவ அனுத்தரங் விஜ்ஜாசரணஸம்பத³ங் அனபி⁴ஸம்பு⁴ணமானோ கா²ரிவித⁴மாதா³ய கா²ரிவிவித⁴மாதா³ய (ஸீ॰ ஸ்யா॰ பீ॰) அரஞ்ஞாயதனங் அஜ்ஜோ²கா³ஹதி – ‘பவத்தப²லபோ⁴ஜனோ ப⁴விஸ்ஸாமீ’தி. ஸோ அஞ்ஞத³த்து² விஜ்ஜாசரணஸம்பன்னஸ்ஸேவ பரிசாரகோ ஸம்பஜ்ஜதி. இமாய கோ², அம்ப³ட்ட², அனுத்தராய விஜ்ஜாசரணஸம்பதா³ய இத³ங் பட²மங் அபாயமுக²ங் ப⁴வதி.
‘‘புன சபரங், அம்ப³ட்ட², இதே⁴கச்சோ ஸமணோ வா ப்³ராஹ்மணோ வா இமஞ்சேவ அனுத்தரங் விஜ்ஜாசரணஸம்பத³ங் அனபி⁴ஸம்பு⁴ணமானோ பவத்தப²லபோ⁴ஜனதஞ்ச அனபி⁴ஸம்பு⁴ணமானோ குதா³லபிடகங் குத்³தா³லபிடகங் (ஸீ॰ ஸ்யா॰ பீ॰) ஆதா³ய அரஞ்ஞவனங் அஜ்ஜோ²கா³ஹதி – ‘கந்த³மூலப²லபோ⁴ஜனோ ப⁴விஸ்ஸாமீ’தி. ஸோ அஞ்ஞத³த்து² விஜ்ஜாசரணஸம்பன்னஸ்ஸேவ பரிசாரகோ ஸம்பஜ்ஜதி. இமாய கோ², அம்ப³ட்ட², அனுத்தராய விஜ்ஜாசரணஸம்பதா³ய இத³ங் து³தியங் அபாயமுக²ங் ப⁴வதி.
‘‘புன சபரங், அம்ப³ட்ட², இதே⁴கச்சோ ஸமணோ வா ப்³ராஹ்மணோ வா இமஞ்சேவ அனுத்தரங் விஜ்ஜாசரணஸம்பத³ங் அனபி⁴ஸம்பு⁴ணமானோ பவத்தப²லபோ⁴ஜனதஞ்ச அனபி⁴ஸம்பு⁴ணமானோ கந்த³மூலப²லபோ⁴ஜனதஞ்ச அனபி⁴ஸம்பு⁴ணமானோ கா³மஸாமந்தங் வா நிக³மஸாமந்தங் வா அக்³யாகா³ரங் கரித்வா அக்³கி³ங் பரிசரந்தோ அச்ச²தி. ஸோ அஞ்ஞத³த்து² விஜ்ஜாசரணஸம்பன்னஸ்ஸேவ பரிசாரகோ ஸம்பஜ்ஜதி. இமாய கோ², அம்ப³ட்ட², அனுத்தராய விஜ்ஜாசரணஸம்பதா³ய இத³ங் ததியங் அபாயமுக²ங் ப⁴வதி.
‘‘புன சபரங், அம்ப³ட்ட², இதே⁴கச்சோ ஸமணோ வா ப்³ராஹ்மணோ வா இமங் சேவ அனுத்தரங் விஜ்ஜாசரணஸம்பத³ங் அனபி⁴ஸம்பு⁴ணமானோ பவத்தப²லபோ⁴ஜனதஞ்ச அனபி⁴ஸம்பு⁴ணமானோ கந்த³மூலப²லபோ⁴ஜனதஞ்ச அனபி⁴ஸம்பு⁴ணமானோ அக்³கி³பாரிசரியஞ்ச அனபி⁴ஸம்பு⁴ணமானோ சாதுமஹாபதே² சதுத்³வாரங் அகா³ரங் கரித்வா அச்ச²தி – ‘யோ இமாஹி சதூஹி தி³ஸாஹி ஆக³மிஸ்ஸதி ஸமணோ வா ப்³ராஹ்மணோ வா, தமஹங் யதா²ஸத்தி யதா²ப³லங் படிபூஜெஸ்ஸாமீ’தி. ஸோ அஞ்ஞத³த்து² விஜ்ஜாசரணஸம்பன்னஸ்ஸேவ பரிசாரகோ ஸம்பஜ்ஜதி. இமாய கோ², அம்ப³ட்ட², அனுத்தராய விஜ்ஜாசரணஸம்பதா³ய இத³ங் சதுத்த²ங் அபாயமுக²ங் ப⁴வதி. இமாய கோ², அம்ப³ட்ட², அனுத்தராய விஜ்ஜாசரணஸம்பதா³ய இமானி சத்தாரி அபாயமுகா²னி ப⁴வந்தி.
281. ‘‘தங் கிங் மஞ்ஞஸி, அம்ப³ட்ட², அபினு த்வங் இமாய அனுத்தராய விஜ்ஜாசரணஸம்பதா³ய ஸந்தி³ஸ்ஸஸி ஸாசரியகோ’’தி? ‘‘நோ ஹித³ங், போ⁴ கோ³தம’’. ‘கோசாஹங், போ⁴ கோ³தம, ஸாசரியகோ, கா ச அனுத்தரா விஜ்ஜாசரணஸம்பதா³? ஆரகாஹங், போ⁴ கோ³தம, அனுத்தராய விஜ்ஜாசரணஸம்பதா³ய ஸாசரியகோ’’தி.
‘‘தங் கிங் மஞ்ஞஸி, அம்ப³ட்ட², அபினு த்வங் இமஞ்சேவ அனுத்தரங் விஜ்ஜாசரணஸம்பத³ங் அனபி⁴ஸம்பு⁴ணமானோ கா²ரிவித⁴மாதா³ய அரஞ்ஞவனமஜ்ஜோ²கா³ஹஸி ஸாசரியகோ – ‘பவத்தப²லபோ⁴ஜனோ ப⁴விஸ்ஸாமீ’’’தி? ‘‘நோ ஹித³ங், போ⁴ கோ³தம’’.
‘‘தங் கிங் மஞ்ஞஸி, அம்ப³ட்ட², அபினு த்வங் இமஞ்சேவ அனுத்தரங் விஜ்ஜாசரணஸம்பத³ங் அனபி⁴ஸம்பு⁴ணமானோ பவத்தப²லபோ⁴ஜனதஞ்ச அனபி⁴ஸம்பு⁴ணமானோ குதா³லபிடகங் ஆதா³ய அரஞ்ஞவனமஜ்ஜோ²கா³ஹஸி ஸாசரியகோ – ‘கந்த³மூலப²லபோ⁴ஜனோ ப⁴விஸ்ஸாமீ’’’தி? ‘‘நோ ஹித³ங், போ⁴ கோ³தம’’.
‘‘தங் கிங் மஞ்ஞஸி, அம்ப³ட்ட², அபினு த்வங் இமஞ்சேவ அனுத்தரங் விஜ்ஜாசரணஸம்பத³ங் அனபி⁴ஸம்பு⁴ணமானோ பவத்தப²லபோ⁴ஜனதஞ்ச அனபி⁴ஸம்பு⁴ணமானோ கந்த³மூலப²லபோ⁴ஜனதஞ்ச அனபி⁴ஸம்பு⁴ணமானோ கா³மஸாமந்தங் வா நிக³மஸாமந்தங் வா அக்³யாகா³ரங் கரித்வா அக்³கி³ங் பரிசரந்தோ அச்ச²ஸி ஸாசரியகோ’’தி? ‘‘நோ ஹித³ங், போ⁴ கோ³தம’’.
‘‘தங் கிங் மஞ்ஞஸி, அம்ப³ட்ட², அபினு த்வங் இமஞ்சேவ அனுத்தரங் விஜ்ஜாசரணஸம்பத³ங் அனபி⁴ஸம்பு⁴ணமானோ பவத்தப²லபோ⁴ஜனதஞ்ச அனபி⁴ஸம்பு⁴ணமானோ கந்த³மூலப²லபோ⁴ஜனதஞ்ச அனபி⁴ஸம்பு⁴ணமானோ அக்³கி³பாரிசரியஞ்ச அனபி⁴ஸம்பு⁴ணமானோ சாதுமஹாபதே² சதுத்³வாரங் அகா³ரங் கரித்வா அச்ச²ஸி ஸாசரியகோ – ‘யோ இமாஹி சதூஹி தி³ஸாஹி ஆக³மிஸ்ஸதி ஸமணோ வா ப்³ராஹ்மணோ வா, தங் மயங் யதா²ஸத்தி யதா²ப³லங் படிபூஜெஸ்ஸாமா’’’தி? ‘‘நோ ஹித³ங், போ⁴ கோ³தம’’.
282. ‘‘இதி கோ², அம்ப³ட்ட², இமாய சேவ த்வங் அனுத்தராய விஜ்ஜாசரணஸம்பதா³ய பரிஹீனோ ஸாசரியகோ. யே சிமே அனுத்தராய விஜ்ஜாசரணஸம்பதா³ய சத்தாரி அபாயமுகா²னி ப⁴வந்தி , ததோ ச த்வங் பரிஹீனோ ஸாசரியகோ. பா⁴ஸிதா கோ² பன தே ஏஸா, அம்ப³ட்ட², ஆசரியேன ப்³ராஹ்மணேன பொக்க²ரஸாதினா வாசா – ‘கே ச முண்ட³கா ஸமணகா இப்³பா⁴ கண்ஹா ப³ந்து⁴பாதா³பச்சா, கா ச தேவிஜ்ஜானங் ப்³ராஹ்மணானங் ஸாகச்சா²’தி அத்தனா ஆபாயிகோபி அபரிபூரமானோ. பஸ்ஸ, அம்ப³ட்ட², யாவ அபரத்³த⁴ஞ்ச தே இத³ங் ஆசரியஸ்ஸ ப்³ராஹ்மணஸ்ஸ பொக்க²ரஸாதிஸ்ஸ.
புப்³ப³கஇஸிபா⁴வானுயோகோ³
283. ‘‘ப்³ராஹ்மணோ கோ² பன, அம்ப³ட்ட², பொக்க²ரஸாதி ரஞ்ஞோ பஸேனதி³ஸ்ஸ கோஸலஸ்ஸ த³த்திகங் பு⁴ஞ்ஜதி. தஸ்ஸ ராஜா பஸேனதி³ கோஸலோ ஸம்முகீ²பா⁴வம்பி ந த³தா³தி. யதா³பி தேன மந்தேதி, திரோது³ஸ்ஸந்தேன மந்தேதி. யஸ்ஸ கோ² பன, அம்ப³ட்ட², த⁴ம்மிகங் பயாதங் பி⁴க்க²ங் படிக்³க³ண்ஹெய்ய, கத²ங் தஸ்ஸ ராஜா பஸேனதி³ கோஸலோ ஸம்முகீ²பா⁴வம்பி ந த³தெ³ய்ய. பஸ்ஸ, அம்ப³ட்ட², யாவ அபரத்³த⁴ஞ்ச தே இத³ங் ஆசரியஸ்ஸ ப்³ராஹ்மணஸ்ஸ பொக்க²ரஸாதிஸ்ஸ.
284. ‘‘தங் கிங் மஞ்ஞஸி, அம்ப³ட்ட², இத⁴ ராஜா பஸேனதி³ கோஸலோ ஹத்தி²கீ³வாய வா நிஸின்னோ அஸ்ஸபிட்டே² வா நிஸின்னோ ரதூ²பத்த²ரே வா டி²தோ உக்³கே³ஹி வா ராஜஞ்ஞேஹி வா கிஞ்சிதே³வ மந்தனங் மந்தெய்ய. ஸோ தம்ஹா பதே³ஸா அபக்கம்ம ஏகமந்தங் திட்டெ²ய்ய. அத² ஆக³ச்செ²ய்ய ஸுத்³தோ³ வா ஸுத்³த³தா³ஸோ வா, தஸ்மிங் பதே³ஸே டி²தோ ததே³வ மந்தனங் மந்தெய்ய – ‘ஏவம்பி ராஜா பஸேனதி³ கோஸலோ ஆஹ, ஏவம்பி ராஜா பஸேனதி³ கோஸலோ ஆஹா’தி. அபினு ஸோ ராஜப⁴ணிதங் வா ப⁴ணதி ராஜமந்தனங் வா மந்தேதி? எத்தாவதா ஸோ அஸ்ஸ ராஜா வா ராஜமத்தோ வா’’தி? ‘‘நோ ஹித³ங், போ⁴ கோ³தம’’.
285. ‘‘ஏவமேவ கோ² த்வங், அம்ப³ட்ட², யே தே அஹேஸுங் ப்³ராஹ்மணானங் புப்³ப³கா இஸயோ மந்தானங் கத்தாரோ மந்தானங் பவத்தாரோ, யேஸமித³ங் ஏதரஹி ப்³ராஹ்மணா போராணங் மந்தபத³ங் கீ³தங் பவுத்தங் ஸமிஹிதங், தத³னுகா³யந்தி தத³னுபா⁴ஸந்தி பா⁴ஸிதமனுபா⁴ஸந்தி வாசிதமனுவாசெந்தி, ஸெய்யதி²த³ங் – அட்ட²கோ வாமகோ வாமதே³வோ வெஸ்ஸாமித்தோ யமதக்³கி³ யமத³க்³கி³ (க॰) அங்கீ³ரஸோ பா⁴ரத்³வாஜோ வாஸெட்டோ² கஸ்ஸபோ ப⁴கு³ – ‘த்யாஹங் மந்தே அதி⁴யாமி ஸாசரியகோ’தி, தாவதா த்வங் ப⁴விஸ்ஸஸி இஸி வா இஸித்தா²ய வா படிபன்னோதி நேதங் டா²னங் விஜ்ஜதி.
286. ‘‘தங் கிங் மஞ்ஞஸி, அம்ப³ட்ட², கிந்தி தே ஸுதங் ப்³ராஹ்மணானங் வுத்³தா⁴னங் மஹல்லகானங் ஆசரியபாசரியானங் பா⁴ஸமானானங் – யே தே அஹேஸுங் ப்³ராஹ்மணானங் புப்³ப³கா இஸயோ மந்தானங் கத்தாரோ மந்தானங் பவத்தாரோ, யேஸமித³ங் ஏதரஹி ப்³ராஹ்மணா போராணங் மந்தபத³ங் கீ³தங் பவுத்தங் ஸமிஹிதங், தத³னுகா³யந்தி தத³னுபா⁴ஸந்தி பா⁴ஸிதமனுபா⁴ஸந்தி வாசிதமனுவாசெந்தி, ஸெய்யதி²த³ங் – அட்ட²கோ வாமகோ வாமதே³வோ வெஸ்ஸாமித்தோ யமதக்³கி³ அங்கீ³ரஸோ பா⁴ரத்³வாஜோ வாஸெட்டோ² கஸ்ஸபோ ப⁴கு³, ஏவங் ஸு தே ஸுன்ஹாதா ஸுவிலித்தா கப்பிதகேஸமஸ்ஸூ ஆமுக்கமணிகுண்ட³லாப⁴ரணா ஆமுத்தமாலாப⁴ரணா (ஸீ॰ ஸ்யா॰ பீ॰) ஓதா³தவத்த²வஸனா பஞ்சஹி காமகு³ணேஹி ஸமப்பிதா ஸமங்கீ³பூ⁴தா பரிசாரெந்தி, ஸெய்யதா²பி த்வங் ஏதரஹி ஸாசரியகோ’’தி? ‘‘நோ ஹித³ங், போ⁴ கோ³தம’’.
‘‘…பே॰… ஏவங் ஸு தே ஸாலீனங் ஓத³னங் ஸுசிமங்ஸூபஸேசனங் விசிதகாளகங் அனேகஸூபங் அனேகப்³யஞ்ஜனங் பரிபு⁴ஞ்ஜந்தி, ஸெய்யதா²பி த்வங் ஏதரஹி ஸாசரியகோ’’தி ? ‘‘நோ ஹித³ங், போ⁴ கோ³தம’’.
‘‘…பே॰… ஏவங் ஸு தே வேட²கனதபஸ்ஸாஹி நாரீஹி பரிசாரெந்தி, ஸெய்யதா²பி த்வங் ஏதரஹி ஸாசரியகோ’’தி? ‘‘நோ ஹித³ங், போ⁴ கோ³தம’’.
‘‘…பே॰… ஏவங் ஸு தே குத்தவாலேஹி வளவாரதே²ஹி தீ³கா⁴ஹி பதோத³லட்டீ²ஹி வாஹனே விதுதெ³ந்தா விபரியாயந்தி, ஸெய்யதா²பி த்வங் ஏதரஹி ஸாசரியகோ’’தி? ‘‘நோ ஹித³ங், போ⁴ கோ³தம’’.
‘‘…பே॰… ஏவங் ஸு தே உக்கிண்ணபரிகா²ஸு ஒக்கி²த்தபலிகா⁴ஸு நக³ரூபகாரிகாஸு தீ³கா⁴ஸிவுதே⁴ஹி தீ³கா⁴ஸிப³த்³தே⁴ஹி (ஸ்யா॰ பீ॰) புரிஸேஹி ரக்கா²பெந்தி, ஸெய்யதா²பி த்வங் ஏதரஹி ஸாசரியகோ’’தி? ‘‘நோ ஹித³ங், போ⁴ கோ³தம’’.
‘‘இதி கோ², அம்ப³ட்ட², நேவ த்வங் இஸி ந இஸித்தா²ய படிபன்னோ ஸாசரியகோ. யஸ்ஸ கோ² பன, அம்ப³ட்ட², மயி கங்கா² வா விமதி வா ஸோ மங் பஞ்ஹேன, அஹங் வெய்யாகரணேன ஸோதி⁴ஸ்ஸாமீ’’தி.
த்³வேலக்க²ணாத³ஸ்ஸனங்
287. அத² கோ² ப⁴க³வா விஹாரா நிக்க²ம்ம சங்கமங் அப்³பு⁴ட்டா²ஸி. அம்ப³ட்டோ²பி மாணவோ விஹாரா நிக்க²ம்ம சங்கமங் அப்³பு⁴ட்டா²ஸி. அத² கோ² அம்ப³ட்டோ² மாணவோ ப⁴க³வந்தங் சங்கமந்தங் அனுசங்கமமானோ ப⁴க³வதோ காயே த்³வத்திங்ஸமஹாபுரிஸலக்க²ணானி ஸமன்னேஸி. அத்³த³ஸா கோ² அம்ப³ட்டோ² மாணவோ ப⁴க³வதோ காயே த்³வத்திங்ஸமஹாபுரிஸலக்க²ணானி யேபு⁴ய்யேன ட²பெத்வா த்³வே . த்³வீஸு மஹாபுரிஸலக்க²ணேஸு கங்க²தி விசிகிச்ச²தி நாதி⁴முச்சதி ந ஸம்பஸீத³தி – கோஸோஹிதே ச வத்த²கு³ய்ஹே பஹூதஜிவ்ஹதாய ச.
288. அத² கோ² ப⁴க³வதோ ஏதத³ஹோஸி – ‘‘பஸ்ஸதி கோ² மே அயங் அம்ப³ட்டோ² மாணவோ த்³வத்திங்ஸமஹாபுரிஸலக்க²ணானி யேபு⁴ய்யேன ட²பெத்வா த்³வே. த்³வீஸு மஹாபுரிஸலக்க²ணேஸு கங்க²தி விசிகிச்ச²தி நாதி⁴முச்சதி ந ஸம்பஸீத³தி – கோஸோஹிதே ச வத்த²கு³ய்ஹே பஹூதஜிவ்ஹதாய சா’’தி. அத² கோ² ப⁴க³வா ததா²ரூபங் இத்³தா⁴பி⁴ஸங்கா²ரங் அபி⁴ஸங்கா²ஸி யதா² அத்³த³ஸ அம்ப³ட்டோ² மாணவோ ப⁴க³வதோ கோஸோஹிதங் வத்த²கு³ய்ஹங். அத² கோ² ப⁴க³வா ஜிவ்ஹங் நின்னாமெத்வா உபோ⁴பி கண்ணஸோதானி அனுமஸி படிமஸி, உபோ⁴பி நாஸிகஸோதானி அனுமஸி படிமஸி, கேவலம்பி நலாடமண்ட³லங் ஜிவ்ஹாய சா²தே³ஸி. அத² கோ² அம்ப³ட்ட²ஸ்ஸ மாணவஸ்ஸ ஏதத³ஹோஸி – ‘‘ஸமன்னாக³தோ கோ² ஸமணோ கோ³தமோ த்³வத்திங்ஸமஹாபுரிஸலக்க²ணேஹி பரிபுண்ணேஹி, நோ அபரிபுண்ணேஹீ’’தி. ப⁴க³வந்தங் ஏதத³வோச – ‘‘ஹந்த³ ச தா³னி மயங், போ⁴ கோ³தம, க³ச்சா²ம, ப³ஹுகிச்சா மயங் ப³ஹுகரணீயா’’தி . ‘‘யஸ்ஸதா³னி த்வங், அம்ப³ட்ட², காலங் மஞ்ஞஸீ’’தி. அத² கோ² அம்ப³ட்டோ² மாணவோ வளவாரத²மாருய்ஹ பக்காமி.
289. தேன கோ² பன ஸமயேன ப்³ராஹ்மணோ பொக்க²ரஸாதி உக்கட்டா²ய நிக்க²மித்வா மஹதா ப்³ராஹ்மணக³ணேன ஸத்³தி⁴ங் ஸகே ஆராமே நிஸின்னோ ஹோதி அம்ப³ட்ட²ங்யேவ மாணவங் படிமானெந்தோ. அத² கோ² அம்ப³ட்டோ² மாணவோ யேன ஸகோ ஆராமோ தேன பாயாஸி. யாவதிகா யானஸ்ஸ பூ⁴மி, யானேன க³ந்த்வா யானா பச்சோரோஹித்வா பத்திகோவ யேன ப்³ராஹ்மணோ பொக்க²ரஸாதி தேனுபஸங்கமி; உபஸங்கமித்வா ப்³ராஹ்மணங் பொக்க²ரஸாதிங் அபி⁴வாதெ³த்வா ஏகமந்தங் நிஸீதி³.
290. ஏகமந்தங் நிஸின்னங் கோ² அம்ப³ட்ட²ங் மாணவங் ப்³ராஹ்மணோ பொக்க²ரஸாதி ஏதத³வோச – ‘‘கச்சி, தாத அம்ப³ட்ட², அத்³த³ஸ தங் ப⁴வந்தங் கோ³தம’’ந்தி? ‘‘அத்³த³ஸாம கோ² மயங், போ⁴, தங் ப⁴வந்தங் கோ³தம’’ந்தி. ‘‘கச்சி, தாத அம்ப³ட்ட², தங் ப⁴வந்தங் கோ³தமங் ததா² ஸந்தங்யேவ ஸத்³தோ³ அப்³பு⁴க்³க³தோ நோ அஞ்ஞதா²; கச்சி பன ஸோ ப⁴வங் கோ³தமோ தாதி³ஸோ நோ அஞ்ஞாதி³ஸோ’’தி ? ‘‘ததா² ஸந்தங்யேவ, போ⁴, தங் ப⁴வந்தங் கோ³தமங் ஸத்³தோ³ அப்³பு⁴க்³க³தோ நோ அஞ்ஞதா², தாதி³ஸோவ ஸோ ப⁴வங் கோ³தமோ நோ அஞ்ஞாதி³ஸோ. ஸமன்னாக³தோ ச ஸோ ப⁴வங் கோ³தமோ த்³வத்திங்ஸமஹாபுரிஸலக்க²ணேஹி பரிபுண்ணேஹி நோ அபரிபுண்ணேஹீ’’தி. ‘‘அஹு பன தே, தாத அம்ப³ட்ட², ஸமணேன கோ³தமேன ஸத்³தி⁴ங் கோசிதே³வ கதா²ஸல்லாபோ’’தி? ‘‘அஹு கோ² மே, போ⁴, ஸமணேன கோ³தமேன ஸத்³தி⁴ங் கோசிதே³வ கதா²ஸல்லாபோ’’தி. ‘‘யதா² கத²ங் பன தே, தாத அம்ப³ட்ட², அஹு ஸமணேன கோ³தமேன ஸத்³தி⁴ங் கோசிதே³வ கதா²ஸல்லாபோ’’தி? அத² கோ² அம்ப³ட்டோ² மாணவோ யாவதகோ யாவதிகோ (க॰ பீ॰) அஹோஸி ப⁴க³வதா ஸத்³தி⁴ங் கதா²ஸல்லாபோ, தங் ஸப்³ப³ங் ப்³ராஹ்மணஸ்ஸ பொக்க²ரஸாதிஸ்ஸ ஆரோசேஸி.
291. ஏவங் வுத்தே, ப்³ராஹ்மணோ பொக்க²ரஸாதி அம்ப³ட்ட²ங் மாணவங் ஏதத³வோச – ‘‘அஹோ வத ரே அம்ஹாகங் பண்டி³தக பண்டி³தகா, அஹோ வத ரே அம்ஹாகங் ப³ஹுஸ்ஸுதக ப³ஹுஸ்ஸுதகா, அஹோ வத ரே அம்ஹாகங் தேவிஜ்ஜக தேவிஜ்ஜகா, ஏவரூபேன கிர, போ⁴, புரிஸோ அத்த²சரகேன காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங் நிரயங் உபபஜ்ஜெய்ய. யதே³வ கோ² த்வங், அம்ப³ட்ட², தங் ப⁴வந்தங் கோ³தமங் ஏவங் ஆஸஜ்ஜ ஆஸஜ்ஜ அவசாஸி, அத² கோ² ஸோ ப⁴வங் கோ³தமோ அம்ஹேபி ஏவங் உபனெய்ய உபனெய்ய அவச. அஹோ வத ரே அம்ஹாகங் பண்டி³தக, அஹோ வத ரே அம்ஹாகங் ப³ஹுஸ்ஸுதக, அஹோ வத ரே அம்ஹாகங் தேவிஜ்ஜக, ஏவரூபேன கிர, போ⁴, புரிஸோ அத்த²சரகேன காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங் நிரயங் உபபஜ்ஜெய்யா’’தி, குபிதோ ஸோ குபிதோ (பீ॰) அனத்தமனோ அம்ப³ட்ட²ங் மாணவங் பத³ஸாயேவ பவத்தேஸி. இச்ச²தி ச தாவதே³வ ப⁴க³வந்தங் த³ஸ்ஸனாய உபஸங்கமிதுங்.
பொக்க²ரஸாதிபு³த்³து⁴பஸங்கமனங்
292. அத² கோ² தே ப்³ராஹ்மணா ப்³ராஹ்மணங் பொக்க²ரஸாதிங் ஏதத³வோசுங் – ‘‘அதிவிகாலோ கோ², போ⁴, அஜ்ஜ ஸமணங் கோ³தமங் த³ஸ்ஸனாய உபஸங்கமிதுங். ஸ்வேதா³னி தா³னி ஸ்வே (ஸீ॰ க॰) ப⁴வங் பொக்க²ரஸாதி ஸமணங் கோ³தமங் த³ஸ்ஸனாய உபஸங்கமிஸ்ஸதீ’’தி. அத² கோ² ப்³ராஹ்மணோ பொக்க²ரஸாதி ஸகே நிவேஸனே பணீதங் கா²த³னீயங் போ⁴ஜனீயங் படியாதா³பெத்வா யானே ஆரோபெத்வா உக்காஸு தா⁴ரியமானாஸு உக்கட்டா²ய நிய்யாஸி, யேன இச்சா²னங்க³லவனஸண்டோ³ தேன பாயாஸி. யாவதிகா யானஸ்ஸ பூ⁴மி யானேன க³ந்த்வா, யானா பச்சோரோஹித்வா பத்திகோவ யேன ப⁴க³வா தேனுபஸங்கமி. உபஸங்கமித்வா ப⁴க³வதா ஸத்³தி⁴ங் ஸம்மோதி³, ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³.
293. ஏகமந்தங் நிஸின்னோ கோ² ப்³ராஹ்மணோ பொக்க²ரஸாதி ப⁴க³வந்தங் ஏதத³வோச – ‘‘ஆக³மா நு கோ² இத⁴, போ⁴ கோ³தம, அம்ஹாகங் அந்தேவாஸீ அம்ப³ட்டோ² மாணவோ’’தி? ‘‘ஆக³மா கோ² தே தேத⁴ (ஸ்யா॰), தே இத⁴ (பீ॰), ப்³ராஹ்மண, அந்தேவாஸீ அம்ப³ட்டோ² மாணவோ’’தி. ‘‘அஹு பன தே, போ⁴ கோ³தம, அம்ப³ட்டே²ன மாணவேன ஸத்³தி⁴ங் கோசிதே³வ கதா²ஸல்லாபோ’’தி? ‘‘அஹு கோ² மே, ப்³ராஹ்மண, அம்ப³ட்டே²ன மாணவேன ஸத்³தி⁴ங் கோசிதே³வ கதா²ஸல்லாபோ’’தி. ‘‘யதா²கத²ங் பன தே, போ⁴ கோ³தம, அஹு அம்ப³ட்டே²ன மாணவேன ஸத்³தி⁴ங் கோசிதே³வ கதா²ஸல்லாபோ’’தி? அத² கோ² ப⁴க³வா யாவதகோ அஹோஸி அம்ப³ட்டே²ன மாணவேன ஸத்³தி⁴ங் கதா²ஸல்லாபோ, தங் ஸப்³ப³ங் ப்³ராஹ்மணஸ்ஸ பொக்க²ரஸாதிஸ்ஸ ஆரோசேஸி. ஏவங் வுத்தே, ப்³ராஹ்மணோ பொக்க²ரஸாதி ப⁴க³வந்தங் ஏதத³வோச – ‘‘பா³லோ, போ⁴ கோ³தம, அம்ப³ட்டோ² மாணவோ, க²மது ப⁴வங் கோ³தமோ அம்ப³ட்ட²ஸ்ஸ மாணவஸ்ஸா’’தி. ‘‘ஸுகீ² ஹோது, ப்³ராஹ்மண, அம்ப³ட்டோ² மாணவோ’’தி.
294. அத² கோ² ப்³ராஹ்மணோ பொக்க²ரஸாதி ப⁴க³வதோ காயே த்³வத்திங்ஸமஹாபுரிஸலக்க²ணானி ஸமன்னேஸி. அத்³த³ஸா கோ² ப்³ராஹ்மணோ பொக்க²ரஸாதி ப⁴க³வதோ காயே த்³வத்திங்ஸமஹாபுரிஸலக்க²ணானி யேபு⁴ய்யேன ட²பெத்வா த்³வே. த்³வீஸு மஹாபுரிஸலக்க²ணேஸு கங்க²தி விசிகிச்ச²தி நாதி⁴முச்சதி ந ஸம்பஸீத³தி – கோஸோஹிதே ச வத்த²கு³ய்ஹே பஹூதஜிவ்ஹதாய ச.
295. அத² கோ² ப⁴க³வதோ ஏதத³ஹோஸி – ‘‘பஸ்ஸதி கோ² மே அயங் ப்³ராஹ்மணோ பொக்க²ரஸாதி த்³வத்திங்ஸமஹாபுரிஸலக்க²ணானி யேபு⁴ய்யேன ட²பெத்வா த்³வே. த்³வீஸு மஹாபுரிஸலக்க²ணேஸு கங்க²தி விசிகிச்ச²தி நாதி⁴முச்சதி ந ஸம்பஸீத³தி – கோஸோஹிதே ச வத்த²கு³ய்ஹே, பஹூதஜிவ்ஹதாய சா’’தி. அத² கோ² ப⁴க³வா ததா²ரூபங் இத்³தா⁴பி⁴ஸங்கா²ரங் அபி⁴ஸங்கா²ஸி யதா² அத்³த³ஸ ப்³ராஹ்மணோ பொக்க²ரஸாதி ப⁴க³வதோ கோஸோஹிதங் வத்த²கு³ய்ஹங். அத² கோ² ப⁴க³வா ஜிவ்ஹங் நின்னாமெத்வா உபோ⁴பி கண்ணஸோதானி அனுமஸி படிமஸி, உபோ⁴பி நாஸிகஸோதானி அனுமஸி படிமஸி, கேவலம்பி நலாடமண்ட³லங் ஜிவ்ஹாய சா²தே³ஸி.
296. அத² கோ² ப்³ராஹ்மணஸ்ஸ பொக்க²ரஸாதிஸ்ஸ ஏதத³ஹோஸி – ‘‘ஸமன்னாக³தோ கோ² ஸமணோ கோ³தமோ த்³வத்திங்ஸமஹாபுரிஸலக்க²ணேஹி பரிபுண்ணேஹி நோ அபரிபுண்ணேஹீ’’தி. ப⁴க³வந்தங் ஏதத³வோச – ‘‘அதி⁴வாஸேது மே ப⁴வங் கோ³தமோ அஜ்ஜதனாய ப⁴த்தங் ஸத்³தி⁴ங் பி⁴க்கு²ஸங்கே⁴னா’’தி. அதி⁴வாஸேஸி ப⁴க³வா துண்ஹீபா⁴வேன.
297. அத² கோ² ப்³ராஹ்மணோ பொக்க²ரஸாதி ப⁴க³வதோ அதி⁴வாஸனங் விதி³த்வா ப⁴க³வதோ காலங் ஆரோசேஸி – ‘‘காலோ, போ⁴ கோ³தம, நிட்டி²தங் ப⁴த்த’’ந்தி. அத² கோ² ப⁴க³வா புப்³ப³ண்ஹஸமயங் நிவாஸெத்வா பத்தசீவரமாதா³ய ஸத்³தி⁴ங் பி⁴க்கு²ஸங்கே⁴ன யேன ப்³ராஹ்மணஸ்ஸ பொக்க²ரஸாதிஸ்ஸ நிவேஸனங் தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³. அத² கோ² ப்³ராஹ்மணோ பொக்க²ரஸாதி ப⁴க³வந்தங் பணீதேன கா²த³னீயேன போ⁴ஜனீயேன ஸஹத்தா² ஸந்தப்பேஸி ஸம்பவாரேஸி, மாணவகாபி பி⁴க்கு²ஸங்க⁴ங். அத² கோ² ப்³ராஹ்மணோ பொக்க²ரஸாதி ப⁴க³வந்தங் பு⁴த்தாவிங் ஓனீதபத்தபாணிங் அஞ்ஞதரங் நீசங் ஆஸனங் க³ஹெத்வா ஏகமந்தங் நிஸீதி³.
298. ஏகமந்தங் நிஸின்னஸ்ஸ கோ² ப்³ராஹ்மணஸ்ஸ பொக்க²ரஸாதிஸ்ஸ ப⁴க³வா அனுபுப்³பி³ங் கத²ங் கதே²ஸி, ஸெய்யதி²த³ங் – தா³னகத²ங் ஸீலகத²ங் ஸக்³க³கத²ங்; காமானங் ஆதீ³னவங் ஓகாரங் ஸங்கிலேஸங், நெக்க²ம்மே ஆனிஸங்ஸங் பகாஸேஸி. யதா³ ப⁴க³வா அஞ்ஞாஸி ப்³ராஹ்மணங் பொக்க²ரஸாதிங் கல்லசித்தங் முது³சித்தங் வினீவரணசித்தங் உத³க்³க³சித்தங் பஸன்னசித்தங், அத² யா பு³த்³தா⁴னங் ஸாமுக்கங்ஸிகா த⁴ம்மதே³ஸனா, தங் பகாஸேஸி – து³க்க²ங் ஸமுத³யங் நிரோத⁴ங் மக்³க³ங். ஸெய்யதா²பி நாம ஸுத்³த⁴ங் வத்த²ங் அபக³தகாளகங் ஸம்மதே³வ ரஜனங் படிக்³க³ண்ஹெய்ய; ஏவமேவ ப்³ராஹ்மணஸ்ஸ பொக்க²ரஸாதிஸ்ஸ தஸ்மிஞ்ஞேவ ஆஸனே விரஜங் வீதமலங் த⁴ம்மசக்கு²ங் உத³பாதி³ – ‘‘யங் கிஞ்சி ஸமுத³யத⁴ம்மங், ஸப்³ப³ங் தங் நிரோத⁴த⁴ம்ம’’ந்தி.
பொக்க²ரஸாதிஉபாஸகத்தபடிவேத³னா
299. அத² கோ² ப்³ராஹ்மணோ பொக்க²ரஸாதி தி³ட்ட²த⁴ம்மோ பத்தத⁴ம்மோ விதி³தத⁴ம்மோ பரியோகா³ள்ஹத⁴ம்மோ திண்ணவிசிகிச்சோ² விக³தகத²ங்கதோ² வேஸாரஜ்ஜப்பத்தோ அபரப்பச்சயோ ஸத்து²ஸாஸனே ப⁴க³வந்தங் ஏதத³வோச – ‘‘அபி⁴க்கந்தங், போ⁴ கோ³தம, அபி⁴க்கந்தங், போ⁴ கோ³தம. ஸெய்யதா²பி, போ⁴ கோ³தம, நிக்குஜ்ஜிதங் வா உக்குஜ்ஜெய்ய, படிச்ச²ன்னங் வா விவரெய்ய, மூள்ஹஸ்ஸ வா மக்³க³ங் ஆசிக்கெ²ய்ய , அந்த⁴காரே வா தேலபஜ்ஜோதங் தா⁴ரெய்ய, ‘சக்கு²மந்தோ ரூபானி த³க்க²ந்தீ’தி; ஏவமேவங் போ⁴தா கோ³தமேன அனேகபரியாயேன த⁴ம்மோ பகாஸிதோ. ஏஸாஹங், போ⁴ கோ³தம, ஸபுத்தோ ஸப⁴ரியோ ஸபரிஸோ ஸாமச்சோ ப⁴வந்தங் கோ³தமங் ஸரணங் க³ச்சா²மி த⁴ம்மஞ்ச பி⁴க்கு²ஸங்க⁴ஞ்ச. உபாஸகங் மங் ப⁴வங் கோ³தமோ தா⁴ரேது அஜ்ஜதக்³கே³ பாணுபேதங் ஸரணங் க³தங். யதா² ச ப⁴வங் கோ³தமோ உக்கட்டா²ய அஞ்ஞானி உபாஸககுலானி உபஸங்கமதி, ஏவமேவ ப⁴வங் கோ³தமோ பொக்க²ரஸாதிகுலங் உபஸங்கமது. தத்த² யே தே மாணவகா வா மாணவிகா வா ப⁴வந்தங் கோ³தமங் அபி⁴வாதெ³ஸ்ஸந்தி வா பச்சுட்டி²ஸ்ஸந்தி பச்சுட்ட²ஸ்ஸந்தி (பீ॰) வா ஆஸனங் வா உத³கங் வா த³ஸ்ஸந்தி சித்தங் வா பஸாதெ³ஸ்ஸந்தி, தேஸங் தங் ப⁴விஸ்ஸதி தீ³க⁴ரத்தங் ஹிதாய ஸுகா²யா’’தி. ‘‘கல்யாணங் வுச்சதி, ப்³ராஹ்மணா’’தி.
அம்ப³ட்ட²ஸுத்தங் நிட்டி²தங் ததியங்.