12. லோஹிச்சஸுத்தவண்ணனா
லோஹிச்சப்³ராஹ்மணவத்து²வண்ணனா
501. ஸாலவதிகாதி தஸ்ஸ கா³மஸ்ஸ நாமங். கா³மணிகாபா⁴வேனாதி கேசி. லோஹிதோ நாம தஸ்ஸ குலே புப்³ப³புரிஸோ, தஸ்ஸ வஸேன லோஹிச்சோதி தஸ்ஸ ப்³ராஹ்மணஸ்ஸ கொ³த்ததோ ஆக³தங் நாமங்.
502. ‘‘தி³ட்டி²க³த’’ந்தி லத்³தி⁴மத்தங் அதி⁴ப்பேதந்தி ஆஹ ‘‘ந பன உச்சே²த³ஸஸ்ஸதானங் அஞ்ஞதர’’ந்தி. ந ஹி உச்சே²த³ஸஸ்ஸதகா³ஹவினிமுத்தோ கோசி தி³ட்டி²கா³ஹோ அத்தி². ‘‘பா⁴ஸதி யேவா’’தி தஸ்ஸா லத்³தி⁴யா லோகே பாகடபா⁴வங் த³ஸ்ஸேதி. அத்ததோ அஞ்ஞோ பரோதி யதா² அனுஸாஸகதோ அனுஸாஸிதப்³போ³ பரோ, ஏவங் அனுஸாஸிதப்³ப³தோபி அனுஸாஸகோ பரோதி வுத்தங் ‘‘பரோ பரஸ்ஸாதி பரோ யோ’’திஆதி³. கிங்-ஸத்³தா³பெக்கா²ய செத்த² ‘‘கரிஸ்ஸதீ’’தி அனாக³தகாலவசனங், அனாக³தேபி வா தேன தஸ்ஸ காதப்³ப³ங் நத்தீ²தி த³ஸ்ஸனத்த²ங். குஸலங் த⁴ம்மந்தி அனவஜ்ஜத⁴ம்மங் நிக்கிலேஸத⁴ம்மங் விமொக்க²த⁴ம்மந்தி அத்தோ². ‘‘பரேஸங் த⁴ம்மங் கதெ²ஸ்ஸாமீ’’தி தேஹி அத்தானங் பரிவாராபெத்வா விசரணங் கிங் அத்தி²யங் ஆஸயபு³த்³த⁴ஸ்ஸாபி அனுரோதே⁴ன வினா தங் ந ஹோதீதி தஸ்மா அத்தனா படிலத்³த⁴ங்…பே॰… விஹாதப்³ப³ந்தி வத³தி. தேனாஹ ‘‘ஏவங் ஸம்பத³மித³ங் பாபகங் லோப⁴த⁴ம்மங் வதா³மீ’’தி.
504. ஸோதி லோஹிச்சோ ப்³ராஹ்மணோ.
508. கதா²பா²ஸுகத்த²ந்தி கதா²ஸுக²த்த²ங், ஸுகே²ன கத²ங் கதே²துஞ்சேவ ஸோதுஞ்சாதி அத்தோ². அப்பேவ நாம ஸியாதி எத்த² பீதிவஸேன ஆமேடி³தங் த³ட்ட²ப்³ப³ங். ததா² ஹி தங் ‘‘பு³த்³த⁴க³ஜ்ஜித’’ந்தி வுச்சதி ‘‘அயங் கிரெத்த² அதி⁴ப்பாயோ’’திஆதி³.
லோஹிச்சப்³ராஹ்மணானுயோக³வண்ணனா
509. ஸமுத³யஸஞ்ஜாதீதி ஆயுப்பாதோ³. அனுபுப்³போ³ கம்பீ-ஸத்³தோ³ ஆகங்க²னத்தோ² ஹோதீதி ‘‘இச்ச²தீதி அத்தோ²’’தி வுத்தங். ஸாதிஸயேன வா ஹிதானுகம்பீ. ஸம்பஜ்ஜதீதி ஆஸேவனலாபே⁴ன நிப்பஜ்ஜதி ப³லவதீ ஹோதி, அவக்³க³ஹாதி அத்தோ², தேனாஹ ‘‘நியதா ஹோதீ’’தி. நிரயே நிப்³ப³த்ததி மிச்சா²தி³ட்டி²கோ.
510-11. து³தியங் உபபத்திந்தி ‘‘நனு ராஜா பஸேனதீ³ கோஸலோ’’திஆதி³னா து³தியங் உபபத்திங் ஸாத⁴னயுத்திங். காரணஞ்ஹி ப⁴க³வா உபமாமுகே²ன த³ஸ்ஸேதி. யே சிமேதி யே ச இமே குலபுத்தா தி³ப்³பா³ க³ப்³பா⁴ பரிபாசெந்தீதி யோஜனா. அஸக்குணந்தா உபனிஸ்ஸயஸம்பத்தியா, ஞாணபரிபாகஸ்ஸ வா அபா⁴வேன. யே பன ‘‘பரிபச்சந்தீ’’தி பட²ந்தி, தேஸங் ‘‘தி³ப்³பே³ க³ப்³பே⁴’’தி வசனவிபல்லாஸேன பயோஜனங் நத்தி². அத்தோ² ச து³தியவிகப்பே வுத்தனயேன வேதி³தப்³போ³. அஹிதானுகம்பிதா ச தங்ஸமங்கி³ஸத்தவஸேன. தி³வி ப⁴வாதி தி³ப்³பா³. க³ப்³பெ⁴ந்தி பரிபச்சனவஸேன ஸந்தானங் பப³ந்தெ⁴ந்தீதி க³ப்³பா⁴. ‘‘ச²ன்னங் தே³வலோகான’’ந்தி நித³ஸ்ஸனவசனமேதங். ப்³ரஹ்மலோகஸ்ஸாபி ஹி தி³ப்³ப³க³ப்³ப⁴பா⁴வோ லப்³ப⁴தேவ தி³ப்³ப³விஹாரஹேதுகத்தா. ஏவஞ்ச கத்வா ‘‘பா⁴வனங் பா⁴வயமானா’’தி இத³ம்பி வசனங் ஸமத்தி²தங் ஹோதி. ப⁴வந்தி எத்த² யதா²ருசி ஸுக²ஸமப்பிதாதி ப⁴வா, விமானானி. தே³வபா⁴வாவஹத்தா தி³ப்³பா³. வுத்தனயேனேவ க³ப்³பா⁴. தா³னாத³யோ தே³வலோகஸங்வத்தனியபுஞ்ஞவிஸேஸா. தி³ப்³பா³ ப⁴வாதி தே³வலோகபரியாபன்னா உபபத்திப⁴வா. ததா³வஹோ ஹி கம்மப⁴வோ புப்³பே³ க³ஹிதோ.
தயோசோத³னாரஹவண்ணனா
513. அனியமிதேனேவாதி அனியமேனேவ ‘‘த்வங் ஏவங்தி³ட்டி²கோ ஏவங் ஸத்தானங் அனத்த²ஸ்ஸ காரகோ’’தி ஏவங் அனுத்³தே³ஸிகேனேவ மானந்தி ‘‘அஹமேதங் ஜானாமி, அஹமேதங் பஸ்ஸாமீ’’தி ஏவங் பண்டி³தமானங். பி⁴ந்தி³த்வாதி வித⁴மெத்வா, ஜஹாபெத்வாதி அத்தோ². தயோ ஸத்தா²ரேதி அஸம்பாதி³தஅத்தஹிதோ அனோவாத³கரஸாவகோ, அஸம்பாதி³தஅத்தஹிதோ ஓவாத³கரஸாவகோ, ஸம்பாதி³தஅத்தஹிதோ அனோவாத³கரஸாவகோதி இமே தயோ ஸத்தா²ரே. சதுத்தோ² பன ஸம்மாஸம்பு³த்³தோ⁴ ந சோத³னாரஹோ ஹோதீதி ‘‘தேன புச்சி²தே ஏவ கதெ²ஸ்ஸாமீ’’தி சோத³னாரஹே தயோ ஸத்தா²ரே பட²மங் த³ஸ்ஸேஸி
அஞ்ஞாதி ய-காரலோபேன நித்³தே³ஸோ ‘‘ஸயங் அபி⁴ஞ்ஞா’’தி ஆதீ³ஸு (தீ³॰ நி॰ 1.28, 37, 52; ம॰ நி॰ 1.284; 2.341; அ॰ நி॰ 2.5; 10.11; மஹாவ॰ 11; த⁴॰ ப॰ 353; கதா²॰ 405) விய. அஞ்ஞாயாதி ச தத³த்தி²யே ஸம்பதா³னவசனந்தி ஆஹ ‘‘ஆஜானநத்தா²யா’’தி. ஸாவகத்தங் படிஜானித்வா டி²தத்தா ஏகதே³ஸேனஸ்ஸ ஸாஸனங் கரொந்தீதி ஆஹ ‘‘நிரந்தரங் தஸ்ஸ ஸாஸனங் அகத்வா’’தி. உக்கமித்வா வத்தந்தீதி யதி²ச்சி²தங் கரொந்தீதி அத்தோ². படிக்கமந்தியாதி அனபி⁴ரதியா அகா³ரவேன அபக³ச்ச²ந்தியா, தேனாஹ ‘‘அனிச்ச²ந்தியா’’திஆதி³. ஏகாயாதி ஏகாய இத்தி²யா. ஏகோ இச்செ²ய்யாதி ஏகோ புரிஸோ தாய அனிச்ச²ந்தியா ஸம்பயோக³ங் காமெய்ய. ஓஸக்கனாதி³முகே²ன த³ட்டு²ம்பி அனிச்ச²மானங். லோபே⁴னாதி பரிவாரவஸேன உப்பஜ்ஜனகலாப⁴ஸக்காரலோபே⁴ன. தத்த² ஸம்பாதே³ஹீதி தஸ்மிங் படிபத்தித⁴ம்மே பதிட்டி²தங் கத்வா ஸம்பாதே³ஹி. உஜுங் கரோஹி காயவங்காதி³விக³மேன.
515. ஏவங் சோத³னங் அரஹதீதி ஏவங் வுத்தனயேன ஸாவகேஸு அப்பொஸ்ஸுக்கபா⁴வாபாத³னே நியோஜனவஸேன சோத³னங் அரஹதி, ந பட²மோ விய ‘‘ஏவரூபோ தவ லோப⁴த⁴ம்மோ’’திஆதி³னா, ந ச து³தியோ விய ‘‘அத்தானமேவ தாவ தத்த² ஸம்பாதே³ஹீ’’திஆதி³னா. கஸ்மா? ஸம்பாதி³தஅத்தஹிததாய ததியஸ்ஸ.
நசோத³னாரஹஸத்து²வண்ணனா
516. ‘‘ந சோத³னாரஹோ’’தி எத்த² யஸ்மா சோத³னாரஹதா நாம ஸத்து²விப்படிபத்தியா வா ஸாவகவிப்படிபத்தியா வா உப⁴யவிப்படிபத்தியா வா, தயித³ங் ஸப்³ப³ம்பி இமஸ்மிங் ஸத்த²ரி நத்தி², தஸ்மா ந சோத³னாரஹோதி இமமத்த²ங் த³ஸ்ஸேதுங் ‘‘அயஞ்ஹீ’’திஆதி³ வுத்தங்.
517. மயா க³ஹிதாய தி³ட்டி²யாதி ஸப்³ப³ஸோ அனவஜ்ஜே ஸம்மாபடிபன்னே பரேஸங் ஸம்மதே³வ ஸம்மாபடிபத்திங் தெ³ஸ்ஸெந்தே ஸத்த²ரி அபூ⁴ததோ³ஸாரோபனவஸேன மிச்சா²க³ஹிதாய நிரயகா³மினியா பாபதி³ட்டி²யா நரகபபாதந்தி நரகஸங்கா²தங் மஹாபபாதங். பபதந்தி தத்தா²தி ஹி பபாதோ. ஸக்³க³மக்³க³த²லேதி ஸக்³க³கா³மிமக்³க³பூ⁴தே புஞ்ஞத⁴ம்மத²லே. ஸேஸங் ஸுவிஞ்ஞெய்யமேவ.
லோஹிச்சஸுத்தவண்ணனாய லீனத்த²ப்பகாஸனா.