7. ஜாலியஸுத்தவண்ணனா
த்³வேபப்³ப³ஜிதவத்து²வண்ணனா
378. ‘‘கோ⁴ஸிதேன ‘‘புப்³பே³ கிரா’’திஆதி³ வுத்தங். ததோதி அல்லகப்பரட்ட²தோ. ததா³தி தேஸங் தங் கா³மங் பவிட்ட²தி³வஸே. ப³லவபாயாஸந்தி க³ருதரங் ப³ஹுபாயாஸங். அஸன்னிஹிதேதி கே³ஹதோ ப³ஹி க³தே. பு⁴ஸ்ஸதீதி ரவதி. கோ⁴ஸகதே³வபுத்தொத்வேவ நாமங் அஹோஸி ஸரகோ⁴ஸஸம்பத்தியா. வெய்யத்தியேனாதி பஞ்ஞாவெய்யத்தியேன. கோ⁴ஸிதஸெட்டி² நாம ஜாதோ தாய ஏவ சஸ்ஸ ஸரஸம்பத்தியா கோ⁴ஸிதனாமதா.
ஸரீரஸந்தப்பனத்த²ந்தி ஹிமவந்தே ப²லமூலாஹாரதாய கிலந்தஸரீரா லோணம்பி³லஸேவனேன தஸ்ஸ ஸந்தப்பனத்த²ங் பீனநத்த²ங். தஸிதாதி பிபாஸிதா. கிலந்தாதி பரிஸ்ஸந்தகாயா. தே கிர தங் வடருக்க²ங் பத்வா தஸ்ஸ ஸோபா⁴ஸம்பத்திங் தி³ஸ்வா மஹானுபா⁴வா மஞ்ஞே எத்த² அதி⁴வத்தா² தே³வதா, ‘‘ஸாது⁴ வதாயங் தே³வதா அம்ஹாகங் அத்³தா⁴னபரிஸ்ஸமங் வினோதெ³ய்யா’’தி சிந்தேஸுங், தேன வுத்தங் ‘‘தத்த² அதி⁴வத்தா²…பே॰… நிஸீதி³ங்ஸூ’’தி. ஸோதி அனாத²பிண்டி³கோ க³ஹபதி. ப⁴தகானந்தி ப⁴தியா வெய்யாவச்சங் கரொந்தானங் தா³ஸபேஸகம்மகரானங். பகதிப⁴த்தவேதனந்தி பகதியா தா³தப்³ப³ப⁴த்தவேதனங், ததா³ உபோஸதி²கத்தா கஞ்சீதி கஞ்சிபி ப⁴தகங்.
உபேச்ச பரஸ்ஸ வாசாய ஆரம்ப⁴னங் பா³த⁴னங் உபாரம்போ⁴, தோ³ஸத³ஸ்ஸனவஸேன க⁴ட்டனந்தி அத்தோ², தேனாஹ ‘‘உபாரம்பா⁴தி⁴ப்பாயேன வாத³ங் ஆரோபேதுகாமா ஹுத்வா’’தி. வத³ந்தி நிந்த³னவஸேன கதெ²ந்தி ஏதேனாதி ஹி வாதோ³, தோ³ஸோ. தங் ஆரோபேதுகாமா, பதிட்டா²பேதுகாமா ஹுத்வாதி அத்தோ². ‘‘தங் ஜீவங் தங் ஸரீர’’ந்தி, இத⁴ யங் வத்து²ங் ஜீவஸஞ்ஞிதங், ததே³வ ஸரீரஸஞ்ஞிதந்தி ‘‘ரூபங் அத்ததோ ஸமனுபஸ்ஸதீ’’தி பி⁴ஜ்ஜதீதி நிருத³யவினாஸவஸேன வினஸ்ஸதி. தேன ஜீவஸரீரானங் அனஞ்ஞத்தானுஜானநதோ, ஸரீரஸ்ஸ ச பே⁴த³த³ஸ்ஸனதோ. ந ஹெத்த² யதா² பே⁴த³வதா ஸரீரதோ அனஞ்ஞத்தா அதி³ட்டோ²பி ஜீவஸ்ஸ பே⁴தோ³ வுத்தோ, ஏவங் அதி³ட்ட²பே⁴த³தோ அனஞ்ஞத்தா ஸரீரஸ்ஸாபி அபே⁴தோ³தி ஸக்கா விஞ்ஞாதுங் தஸ்ஸ பே⁴த³ஸ்ஸ பச்சக்க²ஸித்³த⁴த்தா, பூ⁴துபாதா³யரூபவினிமுத்தஸ்ஸ ச ஸரீரஸ்ஸ அபா⁴வதோதி ஆஹ ‘‘உச்சே²த³வாதோ³ ஹோதீ’’தி.
‘‘அஞ்ஞங் ஜீவங் அஞ்ஞங் ஸரீர’’ந்தி அஞ்ஞதே³வ வத்து²ங் ஜீவஸஞ்ஞிதங், அஞ்ஞங் வத்து²ங் ஸரீரஸஞ்ஞிதந்தி ‘‘ரூபவந்தங் அத்தானங் ஸமனுபஸ்ஸதீ’’திஆதி³னயப்பவத்தங் ‘‘தும்ஹாகங்…பே॰… ஆபஜ்ஜதீ’’தி.
379-380. தயித³ங் நேஸங் வஞ்ஜா²ஸுதஸ்ஸ தீ³க⁴ரஸ்ஸதாபரிகப்பனஸதி³ஸந்தி கத்வா ட²பனீயோயங் பஞ்ஹோதி தத்த² ராஜனிமீலனங் கத்வா ஸத்தா² உபரி நேஸங் ‘‘தேன ஹாவுஸோ ஸுணாதா²’’திஆதி³னா த⁴ம்மதே³ஸனங் ஆரபீ⁴தி ஆஹ ‘‘அத² ப⁴க³வா’’திஆதி³. தஸ்ஸா யேவாதி மஜ்ஜி²மாய படிபதா³ய.
ஸத்³தா⁴பப்³ப³ஜிதஸ்ஸாதி ஸத்³தா⁴ய பப்³ப³ஜிதஸ்ஸ ‘‘ஏவமஹங் இதோ வட்டது³க்க²தோ நிஸ்ஸரிஸ்ஸாமீ’’தி ஏவங் பப்³ப³ஜ்ஜங் உபக³தஸ்ஸ தத³னுரூபஞ்ச ஸீலங் பூரெத்வா பட²மஜ்ஜா²னேன ஸமாஹிதசித்தஸ்ஸ. ஏதங் வத்துந்தி ஏதங் கிலேஸவட்டபரிபு³த்³தி⁴தீ³பனங் ‘‘தங் ஜீவங் தங் ஸரீர’’ந்திஆதி³கங் தி³ட்டி²ஸங்கிலேஸனிஸ்ஸிதங் வசனங் வத்துந்தி அத்தோ². நிப்³பி³சிகிச்சோ² ந ஹோதீதி த⁴ம்மேஸு திண்ணவிசிகிச்சோ² ந ஹோதி, தத்த² தத்த² ஆஸப்பனபரிஸப்பனவஸேன பவத்ததீதி அத்தோ².
ஏதமேவங் ஜானாமீதி யேன ஸோ பி⁴க்கு² பட²மங் ஜா²னங் உபஸம்பஜ்ஜ விஹரதி, ஏதங் ஸஸம்பயுத்தத⁴ம்மங் சித்தந்தி ஏவங் ஜானாமி. நோ ச ஏவங் வதா³மீதி யதா² தி³ட்டி²க³திகா தங் த⁴ம்மஜாதங் ஸனிஸ்ஸயங் அபே⁴த³தோ க³ண்ஹந்தா ‘‘தங் ஜீவங் தங் ஸரீர’’ந்தி வா தது³ப⁴யங் பே⁴த³தோ க³ண்ஹந்தா ‘‘அஞ்ஞங் ஜீவங் அஞ்ஞங் ஸரீர’’ந்தி வா அத்தனோ மிச்சா²கா³ஹங் பவேதெ³ந்தி, அஹங் பன ந ஏவங் வதா³மி தஸ்ஸ த⁴ம்மஸ்ஸ ஸுபரிஞ்ஞாதத்தா, தேனாஹ ‘‘அத² கோ²’’திஆதி³ ‘‘கஸிணபரிகம்மங் பா⁴வந்தெஸ்ஸா’’தி. யஸ்மா பா⁴வனானுபா⁴வேன ஜா²னாதி⁴க³மோ, பா⁴வனா ச பத²வீகஸிணாதி³ஸஞ்ஜானநமுகே²ன ஹோதீதி ஸஞ்ஞாஸீஸேன ‘‘ஸஞ்ஞாப³லேன உப்பன்ன’’ந்தி. தேனாஹ – ‘‘பத²வீகஸிணமேகோ ஸஞ்ஜானாதீ’’திஆதி³. ‘‘ந கல்லங் தஸ்ஸேத’’ந்தி இத³ங் யஸ்மா ப⁴க³வதா தத்த² தத்த² ‘‘அத² ச பனாஹங் ந வதா³மீ’’தி வுத்தங், தஸ்மா ந வத்தப்³ப³ங் கிரேதங் கேவலினா உத்தமபுரிஸேனாதி அதி⁴ப்பாயேனாஹ, தேன வுத்தங் ‘‘மஞ்ஞமானா வத³ந்தீ’’தி. ஸேஸங் ஸப்³ப³த்த² ஸுவிஞ்ஞெய்யமேவ.
ஜாலியஸுத்தவண்ணனாய லீனத்த²ப்பகாஸனா.