2. உது³ம்ப³ரிகஸுத்தவண்ணனா
நிக்³ரோத⁴பரிப்³பா³ஜகவத்து²வண்ணனா
49. ஏவங் மே ஸுதந்தி உது³ம்ப³ரிகஸுத்தங். தத்ராயமபுப்³ப³பத³வண்ணனா – பரிப்³பா³ஜகோதி ச²ன்னபரிப்³பா³ஜகோ. உது³ம்ப³ரிகாய பரிப்³பா³ஜகாராமேதி உது³ம்ப³ரிகாய தே³வியா ஸந்தகே பரிப்³பா³ஜகாராமே. ஸந்தா⁴னோதி தஸ்ஸ நாமங். அயங் பன மஹானுபா⁴வோ பரிவாரெத்வா விசரந்தானங் பஞ்சன்னங் உபாஸகஸதானங் அக்³க³புரிஸோ அனாகா³மீ ப⁴க³வதா மஹாபரிஸமஜ்ஜே² ஏவங் ஸங்வண்ணிதோ –
‘‘ச²ஹி, பி⁴க்க²வே, அங்கே³ஹி ஸமன்னாக³தோ ஸந்தா⁴னோ க³ஹபதி ததா²க³தே நிட்ட²ங்க³தோ ஸத்³த⁴ம்மே இரியதி. கதமேஹி ச²ஹி? பு³த்³தே⁴ அவேச்சப்பஸாதே³ன த⁴ம்மே அவேச்சப்பஸாதே³ன ஸங்கே⁴ அவேச்சப்பஸாதே³ன அரியேன ஸீலேன அரியேன ஞாணேன அரியாய விமுத்தியா. இமேஹி கோ², பி⁴க்க²வே, ச²ஹி அங்கே³ஹி ஸமன்னாக³தோ ஸந்தா⁴னோ க³ஹபதி ததா²க³தே நிட்ட²ங்க³தோ ஸத்³த⁴ம்மே இரியதீ’’தி (அ॰ நி॰ 6.120-139).
ஸோ பாதோயேவ உபோஸத²ங்கா³னி அதி⁴ட்டா²ய புப்³ப³ண்ஹஸமயே பு³த்³த⁴ப்பமுக²ஸ்ஸ ஸங்க⁴ஸ்ஸ தா³னங் த³த்வா பி⁴க்கூ²ஸு விஹாரங் க³தேஸு க⁴ரே கு²த்³த³கமஹல்லகானங் தா³ரகானங் ஸத்³தே³ன உப்³பா³ள்ஹோ ஸத்து² ஸந்திகே ‘‘த⁴ம்மங் ஸொஸ்ஸாமீ’’தி நிக்க²ந்தோ. தேன வுத்தங் தி³வா தி³வஸ்ஸ ராஜக³ஹா நிக்க²மீதி. தத்த² தி³வா தி³வஸ்ஸாதி தி³வஸஸ்ஸ தி³வா நாம மஜ்ஜ²ன்ஹாதிக்கமோ, தஸ்மிங் தி³வஸஸ்ஸாபி தி³வாபூ⁴தே அதிக்கந்தமத்தே மஜ்ஜ²ன்ஹிகே நிக்க²மீதி அத்தோ². படிஸல்லீனோதி ததோ ததோ ரூபாதி³கோ³சரதோ சித்தங் படிஸங்ஹரித்வா நிலீனோ ஜா²னரதிஸேவனாவஸேன ஏகீபா⁴வங் க³தோ. மனோபா⁴வனீயானந்தி மனவட்³ட⁴கானங். யே ச ஆவஜ்ஜதோ மனஸிகரோதோ சித்தங் வினீவரணங் ஹோதி உன்னமதி வட்³ட⁴தி.
50. உன்னாதி³னியாதிஆதீ³னி பொட்ட²பாத³ஸுத்தே வித்தா²ரிதனயேனேவ வேதி³தப்³பா³னி.
51. யாவதாதி அயங் தேஸங் அஞ்ஞதரோதி அயங் தேஸங் அப்³ப⁴ந்தரோ ஏகோ ஸாவகோ, ப⁴க³வதோ கிர ஸாவகா கி³ஹிஅனாகா³மினோயேவ பஞ்சஸதா ராஜக³ஹே படிவஸந்தி. யேஸங் ஏகேகஸ்ஸ பஞ்ச பஞ்ச உபாஸகஸதானி பரிவாரா, தே ஸந்தா⁴ய ‘‘அயங் தேஸங் அஞ்ஞதரோ’’தி ஆஹ. அப்பேவ நாமாதி தஸ்ஸ உபஸங்கமனங் பத்த²யமானோ ஆஹ. பத்த²னாகாரணங் பன பொட்ட²பாத³ஸுத்தே வுத்தமேவ.
52. ஏதத³வோசாதி ஆக³ச்ச²ந்தோ அந்தராமக்³கே³யேவ தேஸங் கதா²ய ஸுதத்தா ஏதங் அஞ்ஞதா² கோ² இமேதிஆதி³வசனங் அவோச. தத்த² அஞ்ஞதித்தி²யாதி த³ஸ்ஸனேனபி ஆகப்பேனபி குத்தேனபி ஆசாரேனபி விஹாரேனபி இரியாபதே²னபி அஞ்ஞே தித்தி²யாதி அஞ்ஞதித்தி²யா. ஸங்க³ம்ம ஸமாக³ம்மாதி ஸங்க³ந்த்வா ஸமாக³ந்த்வா ராஸி ஹுத்வா நிஸின்னட்டா²னே. அரஞ்ஞவனபத்தா²னீதி அரஞ்ஞவனபத்தா²னி கா³மூபசாரதோ முத்தானி தூ³ரஸேனாஸனானி. பந்தானீதி தூ³ரதரானி மனுஸ்ஸூபசாரவிரஹிதானி. அப்பஸத்³தா³னீதி விஹாரூபசாரேன க³ச்ச²தோ அத்³தி⁴கஜனஸ்ஸபி ஸத்³தே³ன மந்த³ஸத்³தா³னி. அப்பனிக்³கோ⁴ஸானீதி அவிபா⁴விதத்தே²ன நிக்³கோ⁴ஸேன மந்த³னிக்³கோ⁴ஸானி. விஜனவாதானீதி அந்தோஸஞ்சாரினோ ஜனஸ்ஸ வாதேன விக³தவாதானி. மனுஸ்ஸராஹஸ்ஸெய்யகானீதி மனுஸ்ஸானங் ரஹஸ்ஸகரணஸ்ஸ யுத்தானி அனுச்ச²விகானி. படிஸல்லானஸாருப்பானீதி ஏகீபா⁴வஸ்ஸ அனுரூபானி. இதி ஸந்தா⁴னோ க³ஹபதி ‘‘அஹோ மம ஸத்தா² யோ ஏவரூபானி ஸேனாஸனானி படிஸேவதீ’’தி அஞ்ஜலிங் பக்³க³ய்ஹ உத்தமங்கே³ ஸிரஸ்மிங் பதிட்ட²பெத்வா இமங் உதா³னங் உதா³னெந்தோ நிஸீதி³.
53. ஏவங் வுத்தேதி ஏவங் ஸந்தா⁴னேன க³ஹபதினா உதா³னங் உதா³னெந்தேன வுத்தே. நிக்³ரோதோ⁴ பரிப்³பா³ஜகோ அயங் க³ஹபதி மம ஸந்திகே நிஸின்னோபி அத்தனோ ஸத்தா²ரங்யேவ தோ²மேதி உக்கங்ஸதி, அம்ஹே பன அத்தீ²திபி ந மஞ்ஞதி, ஏதஸ்மிங் உப்பன்னகோபங் ஸமணஸ்ஸ கோ³தமஸ்ஸ உபரி பாதெஸ்ஸாமீதி ஸந்தா⁴னங் க³ஹபதிங் ஏதத³வோச.
யக்³கே⁴தி சோத³னத்தே² நிபாதோ. ஜானெய்யாஸீதி பு³ஜ்ஜெ²ய்யாஸி பஸ்ஸெய்யாஸி. கேன ஸமணோ கோ³தமோ ஸத்³தி⁴ங் ஸல்லபதீதி கேன காரணேன கேன
ஸாகச்ச²ந்தி ஸங்ஸந்த³னங். பஞ்ஞாவெய்யத்தியந்தி உத்தரபச்சுத்தரனயேன ஞாணப்³யத்தபா⁴வங். ஸுஞ்ஞாகா³ரஹதாதி அபரிஸாவசரோதி அவிஸாரத³த்தா பரிஸங் ஓதரிதுங் ந ஸக்கோதி. நாலங் ஸல்லாபாயாதி ந ஸமத்தோ² ஸல்லாபங் காதுங். அந்தமந்தானேவாதி கோசி மங் பஞ்ஹங் புச்செ²ய்யாதி பஞ்ஹாபீ⁴தோ அந்தமந்தானேவ பந்தஸேனாஸனானி ஸேவதி. கோ³காணாதி ஏகக்கி²ஹதா காணகா³வீ. ஸா கிர பரியந்தசாரினீ ஹோதி, அந்தமந்தானேவ ஸேவதி. ஸா கிர காணக்கி²பா⁴வேன வனந்தாபி⁴முகீ²பி ந ஸக்கோதி ப⁴விதுங். கஸ்மா? யஸ்மா பத்தேன வா ஸாகா²ய வா கண்டகேன வா பஹாரஸ்ஸ பா⁴யதி. கு³ன்னங் அபி⁴முகீ²பி ந ஸக்கோதி ப⁴விதுங். கஸ்மா? யஸ்மா ஸிங்கே³ன வா கண்ணேன வா வாலேன வா பஹாரஸ்ஸ பா⁴யதி. இங்கா⁴தி சோத³னத்தே² நிபாதோ. ஸங்ஸாதெ³ய்யாமாதி ஏகபஞ்ஹபுச்ச²னேனேவ ஸங்ஸாத³னங் விஸாத³மாபன்னங் கரெய்யாம. துச்ச²கும்பீ⁴வ நந்தி ரித்தக⁴டங் விய நங். ஓரோதெ⁴ய்யாமாதி வினந்தெ⁴ய்யாம. பூரிதக⁴டோ ஹி இதோ சிதோ ச பரிவத்தெத்வா ந ஸுவினந்த⁴னீயோ ஹோதி. ரித்தகோ யதா²ருசி பரிவத்தெத்வா ஸக்கா ஹோதி வினந்தி⁴துங், ஏவமேவ ஹதபஞ்ஞதாய ரித்தகும்பி⁴ஸதி³ஸங் ஸமணங் கோ³தமங் வாத³வினந்த⁴னேன ஸமந்தா வினந்தி⁴ஸ்ஸாமாதி வத³தி.
இதி பரிப்³பா³ஜகோ ஸத்து² ஸுவண்ணவண்ணங் நலாடமண்ட³லங் அபஸ்ஸந்தோ த³ஸப³லஸ்ஸ பரம்முகா² அத்தனோ ப³லங் தீ³பெந்தோ அஸம்பி⁴ன்னங் க²த்தியகுமாரங் ஜாதியா க⁴ட்டயந்தோ சண்டா³லபுத்தோ விய அஸம்பி⁴ன்னகேஸரஸீஹங்
54. ப⁴க³வாபி தேஸங் தங் கதா²ஸல்லாபங் அஸ்ஸோஸியேவ. தேன வுத்தங் ‘‘அஸ்ஸோஸி கோ² இமங் கதா²ஸல்லாப’’ந்தி.
ஸுமாக³தா⁴யாதி ஸுமாக³தா⁴ நாம பொக்க²ரணீ, யஸ்ஸா தீரே நிஸின்னோ அஞ்ஞதரோ புரிஸோ பது³மனாளந்தரேஹி அஸுரப⁴வனங் பவிஸந்தங் அஸுரஸேனங் அத்³த³ஸ. மோரனிவாபோதி நிவாபோ வுச்சதி ப⁴த்தங், யத்த² மோரானங் அப⁴யேன ஸத்³தி⁴ங் நிவாபோ தி³ன்னோ, தங் டா²னந்தி அத்தோ². அப்³போ⁴காஸேதி அங்க³ணட்டா²னே. அஸ்ஸாஸபத்தாதி துட்டி²பத்தா ஸோமனஸ்ஸபத்தா. அஜ்ஜா²ஸயந்தி உத்தமனிஸ்ஸயபூ⁴தங். ஆதி³ப்³ரஹ்மசரியந்தி
தபோஜிகு³ச்சா²வாத³வண்ணனா
55. விப்பகதாதி மமாக³மனபச்சயா அனிட்டி²தா, வ ஹுத்வா டி²தா, கதே²ஹி, அஹமேதங் நிட்ட²பெத்வா மத்த²கங் பாபெத்வா த³ஸ்ஸேமீதி ஸப்³ப³ஞ்ஞுபவாரணங் பவாரேஸி.
56. து³ஜ்ஜானங் கோ²தி ப⁴க³வா பரிப்³பா³ஜகஸ்ஸ வசனங் ஸுத்வா ‘‘அயங் பரிப்³பா³ஜகோ மயா ஸாவகானங் தே³ஸேதப்³ப³ங் த⁴ம்மங் தேஹி பூரேதப்³ப³ங் படிபத்திங் புச்ச²தி, ஸசஸ்ஸாஹங் ஆதி³தோவ தங் கதெ²ஸ்ஸாமி, கதி²தம்பி நங் ந ஜானிஸ்ஸதி, அயங் பன வீரியேன பாபஜிகு³ச்ச²னவாதோ³, ஹந்தா³ஹங் ஏதஸ்ஸேவ விஸயே பஞ்ஹங் புச்சா²பெத்வா புது²ஸமணப்³ராஹ்மணானங் லத்³தி⁴யா நிரத்த²கபா⁴வங் த³ஸ்ஸேமி. அத² பச்சா² இமங் பஞ்ஹங் ப்³யாகரிஸ்ஸாமீ’’தி சிந்தெத்வா து³ஜ்ஜானங் கோ² ஏதந்திஆதி³மாஹ. தத்த² ஸகே ஆசரியகேதி அத்தனோ ஆசரியவாதே³. அதி⁴ஜேகு³ச்சே²தி வீரியேன பாபஜிகு³ச்ச²னபா⁴வே. கத²ங் ஸந்தாதி கத²ங் பூ⁴தா. தபோஜிகு³ச்சா²தி வீரியேன பாபஜிகு³ச்சா² பாபவிவஜ்ஜனா. பரிபுண்ணாதி பரிஸுத்³தா⁴. கத²ங் அபரிபுண்ணாதி கத²ங் அபரிஸுத்³தா⁴ ஹோதீதி ஏவங் புச்சா²தி. யத்ர ஹி நாமாதி யோ நாம.
57. அப்பஸத்³தே³ கத்வாதி நிரவே அப்பஸத்³தே³ கத்வா. ஸோ கிர சிந்தேஸி – ‘‘ஸமணோ கோ³தமோ ஏகங் பஞ்ஹம்பி ந கதே²தி, ஸல்லாபகதா²பிஸ்ஸ அதிப³ஹுகா நத்தி², இமே பன ஆதி³தோ பட்டா²ய ஸமணங் கோ³தமங் அனுவத்தந்தி சேவ பஸங்ஸந்தி ச, ஹந்தா³ஹங் இமே நிஸ்ஸத்³தே³ கத்வா ஸயங் கதே²மீ’’தி. ஸோ ததா² அகாஸி. தேன வுத்தங் ‘‘அப்பஸத்³தே³ கத்வா’’தி. ‘‘தபோஜிகு³ச்ச²வாதா³’’திஆதீ³ஸு தபோஜிகு³ச்ச²ங் வதா³ம, மனஸாபி தமேவ ஸாரதோ க³ஹெத்வா விசராம, காயேனபிம்ஹா தமேவ அல்லீனா, நானப்பகாரகங் அத்தகிலமதா²னுயோக³மனுயுத்தா விஹராமாதி அத்தோ².
உபக்கிலேஸவண்ணனா
58. தபஸ்ஸீதி தபனிஸ்ஸிதகோ. ‘‘அசேலகோ’’திஆதீ³னி ஸீஹனாதே³ (தீ³॰ நி॰ அட்ட²॰ 1.393) தபங் ஸமாதி³யதீதி அசேலகபா⁴வாதி³கங் தபங் ஸம்மா ஆதி³யதி, த³ள்ஹங் க³ண்ஹாதி. அத்தமனோ ஹோதீதி கோ அஞ்ஞோ மயா ஸதி³ஸோ இமஸ்மிங் தபே அத்தீ²தி துட்ட²மனோ ஹோதி. பரிபுண்ணஸங்கப்போதி அலமெத்தாவதாதி ஏவங் பரியோஸிதஸங்கப்போ, இத³ஞ்ச தித்தி²யானங் வஸேன ஆக³தங். ஸாஸனாவசரேனாபி பன தீ³பேதப்³ப³ங். ஏகச்சோ ஹி து⁴தங்க³ங் ஸமாதி³யதி, ஸோ தேனேவ து⁴தங்கே³ன கோ அஞ்ஞோ மயா ஸதி³ஸோ து⁴தங்க³த⁴ரோதி அத்தமனோ ஹோதி பரிபுண்ணஸங்கப்போ. தபஸ்ஸினோ உபக்கிலேஸோ ஹோதீதி து³வித⁴ஸ்ஸாபேதஸ்ஸ தபஸ்ஸினோ அயங் உபக்கிலேஸோ ஹோதி. எத்தாவதாயங் தபோ உபக்கிலேஸோ ஹோதீதி வதா³மி.
அத்தானுக்கங்ஸேதீதி ‘‘கோ மயா ஸதி³ஸோ அத்தீ²’’தி அத்தானங் உக்கங்ஸதி உக்கி²பதி. பரங் வம்பே⁴தீதி ‘‘அயங் ந மாதி³ஸோ’’தி பரங் ஸங்ஹாரேதி அவக்கி²பதி.
மஜ்ஜதீதி மானமத³கரணேன மஜ்ஜதி. முச்ச²தீதி முச்சி²தோ ஹோதி க³தி⁴தோ அஜ்ஜா²பன்னோ. பமாத³மாபஜ்ஜதீதி ஏததே³வ ஸாரந்தி பமாத³மாபஜ்ஜதி. ஸாஸனே பப்³ப³ஜிதோபி து⁴தங்க³ஸுத்³தி⁴கோ ஹோதி, ந கம்மட்டா²னஸுத்³தி⁴கோ. து⁴தங்க³மேவ அரஹத்தங் விய ஸாரதோ பச்சேதி.
59. லாப⁴ஸக்காரஸிலோகந்தி அபி⁴னிப்³ப³த்தேதீதி அசேலகாதி³பா⁴வங் தேரஸது⁴தங்க³ஸமாதா³னங் வா நிஸ்ஸாய மஹாலாபோ⁴ உப்பஜ்ஜதி, தஸ்மா ‘‘அபி⁴னிப்³ப³த்தேதீ’’தி வுத்தோ. ஸேஸமெத்த² புரிமவாரனயேனேவ து³வித⁴ஸ்ஸாபி தபஸ்ஸினோ வஸேன வேதி³தப்³ப³ங்.
60. வோதா³ஸங் ஆபஜ்ஜதீதி த்³வேபா⁴க³ங் ஆபஜ்ஜதி, த்³வே பா⁴கே³ கரோதி. க²மதீதி ருச்சதி. நக்க²மதீதி ந ருச்சதி. ஸாபெக்கோ² பஜஹதீதி ஸதண்ஹோ பஜஹதி. கத²ங்? பாதோவ கீ²ரப⁴த்தங் பு⁴த்தோ ஹோதி. அத²ஸ்ஸ மங்ஸபோ⁴ஜனங் உபனேதி. தஸ்ஸ ஏவங் ஹோதி ‘‘இதா³னி ஏவரூபங் கதா³ லபி⁴ஸ்ஸாம, ஸசே ஜானெய்யாம, பாதோவ கீ²ரப⁴த்தங் ந பு⁴ஞ்ஜெய்யாம, கிங் மயா ஸக்கா காதுங், க³ச்ச² போ⁴, த்வமேவ பு⁴ஞ்ஜா’’தி ஜீவிதங் பரிச்சஜந்தோ விய ஸாபெக்கோ² பஜஹதி. க³தி⁴தோதி கே³த⁴ஜாதோ. முச்சி²தோதி ப³லவதண்ஹாய முச்சி²தோ ஸங்முட்ட²ஸ்ஸதீ ஹுத்வா. அஜ்ஜா²பன்னோதி ஆமிஸே அதிலக்³கோ³, ‘‘பு⁴ஞ்ஜிஸ்ஸத², ஆவுஸோ’’தி த⁴ம்மனிமந்தனமத்தம்பி அகத்வா மஹந்தே மஹந்தே கப³ளே கரோதி. அனாதீ³னவத³ஸ்ஸாவீதிஆதீ³னவமத்தம்பி ந பஸ்ஸதி. அனிஸ்ஸரணபஞ்ஞோதி இத⁴ மத்தஞ்ஞுதானிஸ்ஸரணபச்சவெக்க²ணபரிபோ⁴க³மத்தம்பி லாப⁴ஸக்காரஸிலோகனிகந்திஹேதூதி லாபா⁴தீ³ஸு தண்ஹாஹேது.
61. ஸங்ப⁴க்கே²தீதி ஸங்கா²த³தி. அஸனிவிசக்கந்தி விசக்கஸண்டா²னா அஸனியேவ. இத³ங் வுத்தங் ஹோதி ‘‘அஸனிவிசக்கங் இமஸ்ஸ த³ந்தகூடங் மூலபீ³ஜாதீ³ஸு ந கிஞ்சி ந ஸங்பு⁴ஞ்ஜதி. அத² ச பன நங் ஸமணப்பவாதே³ன ஸமணோதி ஸஞ்ஜானந்தீ’’தி. ஏவங் அபஸாதே³தி அவக்கி²பதி. இத³ங் தித்தி²யவஸேன ஆக³தங். பி⁴க்கு²வஸேன பனெத்த² அயங் யோஜனா, அத்தனா து⁴தங்க³த⁴ரோ ஹோதி, ஸோ அஞ்ஞங் ஏவங் அபஸாதே³தி ‘‘கிங் ஸமணா நாம இமே ஸமணம்ஹாதி வத³ந்தி, து⁴தங்க³மத்தம்பி நத்தி², உத்³தே³ஸப⁴த்தாதீ³னி பரியேஸந்தா பச்சயபா³ஹுல்லிகா விசரந்தீ’’தி. லூகா²ஜீவிந்தி அசேலகாதி³வஸேன வா து⁴தங்க³வஸேன வா லூகா²ஜீவிங். இஸ்ஸாமச்ச²ரியந்தி பரஸ்ஸ ஸக்காராதி³ஸம்பத்திகீ²யனலக்க²ணங்
62. ஆபாத²கனிஸாதீ³ ஹோதீதி மனுஸ்ஸானங் ஆபாதே² த³ஸ்ஸனட்டா²னே நிஸீத³தி. யத்த² தே பஸ்ஸந்தி, தத்த² டி²தோ வக்³கு³லிவதங் சரதி, பஞ்சாதபங் தப்பதி, ஏகபாதே³ன திட்ட²தி, ஸூரியங் நமஸ்ஸதி. ஸாஸனே பப்³ப³ஜிதோபி ஸமாதி³ன்னது⁴தங்கோ³ ஸப்³ப³ரத்திங் ஸயித்வா மனுஸ்ஸானங் சக்கு²பதே² தபங் கரோதி, மஹாஸாயன்ஹேயேவ சீவரகுடிங் கரோதி, ஸூரியே உக்³க³தே படிஸங்ஹரதி, மனுஸ்ஸானங் ஆக³தபா⁴வங் ஞத்வா க⁴ண்டி³ங் பஹரித்வா சீவரங் மத்த²கே ட²பெத்வா சங்கமங் ஓதரதி, ஸம்முஞ்ஜனிங் க³ஹெத்வா விஹாரங்க³ணங் ஸம்மஜ்ஜதி.
அத்தானந்தி அத்தனோ கு³ணங் அத³ஸ்ஸயமானோதி எத்த² அ-காரோ நிபாதமத்தங், த³ஸ்ஸயமானோதி அத்தோ². இத³ம்பி மே தபஸ்மிந்தி இத³ம்பி கம்மங் மமேவ தபஸ்மிங், பச்சத்தே வா பு⁴ம்மங், இத³ம்பி மம தபோதி அத்தோ². ஸோ ஹி அஸுகஸ்மிங் டா²னே அசேலகோ அத்தி² முத்தாசாரோதிஆதீ³னி ஸுத்வா அம்ஹாகங் ஏஸ தபோ, அம்ஹாகங் ஸோ அந்தேவாஸிகோதிஆதீ³னி ப⁴ணதி. அஸுகஸ்மிங் வா பன டா²னே பங்ஸுகூலிகோ பி⁴க்கு² அத்தீ²திஆதீ³னி ஸுத்வா அம்ஹாகங் ஏஸ தபோ, அம்ஹாகங் ஸோ அந்தேவாஸிகோதிஆதீ³னி ப⁴ணதி.
கிஞ்சிதே³வாதி கிஞ்சி வஜ்ஜங் தி³ட்டி²க³தங் வா. படிச்ச²ன்னங் ஸேவதீதி யதா² அஞ்ஞே ந ஜானந்தி, ஏவங் ஸேவதி. அக்க²மமானங் ஆஹ க²மதீதி அருச்சமானங்யேவ ருச்சதி மேதி வத³தி. அத்தனா கதங் அதிமஹந்தம்பி வஜ்ஜங் அப்பமத்தகங் கத்வா பஞ்ஞபேதி, பரேன கதங் து³க்கடமத்தங் வீதிக்கமம்பி பாராஜிகஸதி³ஸங் கத்வா த³ஸ்ஸேதி. அனுஞ்ஞெய்யந்தி அனுஜானிதப்³ப³ங் அனுமோதி³தப்³ப³ங்.
63. கோத⁴னோ ஹோதி உபனாஹீதி குஜ்ஜ²னலக்க²ணேன கோதே⁴ன, வேரஅப்படினிஸ்ஸக்³க³லக்க²ணேன உபனாஹேன ச ஸமன்னாக³தோ. மக்கீ² ஹோதி பளாஸீதி பரகு³ணமக்க²னலக்க²ணேன மக்கே²ன, யுக³க்³கா³ஹலக்க²ணேன பளாஸேன ச ஸமன்னாக³தோ.
இஸ்ஸுகீ ஹோதி மச்ச²ரீதி பரஸக்காராதீ³ஸு உஸூயனலக்க²ணாய இஸ்ஸாய, ஆவாஸகுலலாப⁴வண்ணத⁴ம்மேஸு மச்ச²ராயனலக்க²ணேன பஞ்சவித⁴மச்சே²ரேன ச ஸமன்னாக³தோ ஹோதி. ஸடோ² ஹோதி மாயாவீதி கேராடிகலக்க²ணேன ஸாடெ²ய்யேன, கதப்படிச்சா²த³னலக்க²ணாய மாயாய ச ஸமன்னாக³தோ த²த்³தோ⁴ ஹோதி அதிமானீதி நிஸ்ஸினேஹனிக்கருணத²த்³த⁴லக்க²ணேன த²ம்பே⁴ன, அதிக்கமித்வா மஞ்ஞனலக்க²ணேன அதிமானேன ச ஸமன்னாக³தோ ஹோதி. பாபிச்சோ² ஹோதீதி அஸந்தஸம்பா⁴வனபத்த²னலக்க²ணாய பாபிச்ச²தாய ஸமன்னாக³தோ ஹோதி. பாபிகானந்தி தாஸங்யேவ லாமகானங் இச்சா²னங் வஸங் க³தோ. மிச்சா²தி³ட்டி²கோதி நத்தி² தி³ன்னந்திஆதி³னயப்பவத்தாய அயாதா²வதி³ட்டி²யா உபேதோ. அந்தக்³கா³ஹிகாயாதி ஸாயேவ தி³ட்டி² உச்சே²த³ந்தஸ்ஸ க³ஹிதத்தா ‘‘அந்தக்³கா³ஹிகா’’தி வுச்சதி, தாய ஸமன்னாக³தோதி அத்தோ². ஸந்தி³ட்டி²பராமாஸீதிஆதீ³ஸு ஸயங் தி³ட்டி² ஸந்தி³ட்டி², ஸந்தி³ட்டி²மேவ பராமஸதி க³ஹெத்வா வத³தீதி ஸந்தி³ட்டி²பராமாஸீ. ஆதா⁴னங் வுச்சதி த³ள்ஹங் ஸுட்டு² ட²பிதங், ததா² கத்வா க³ண்ஹாதீதி ஆதா⁴னக்³கா³ஹீ. அரிட்டோ² விய ந ஸக்கா ஹோதி படினிஸ்ஸஜ்ஜாபேதுந்தி து³ப்படினிஸ்ஸக்³கீ³. யதி³மேதி யதி³ இமே.
பரிஸுத்³த⁴பபடிகப்பத்தகதா²வண்ணனா
64. இத⁴, நிக்³ரோத⁴, தபஸ்ஸீதி ஏவங் ப⁴க³வா அஞ்ஞதித்தி²யேஹி க³ஹிதலத்³தி⁴ங் தேஸங் ரக்கி²தங் தபங் ஸப்³ப³மேவ ஸங்கிலிட்ட²ந்தி உபக்கிலேஸபாளிங் த³ஸ்ஸெத்வா இதா³னி பரிஸுத்³த⁴பாளித³ஸ்ஸனத்த²ங் தே³ஸனமாரப⁴ந்தோ இத⁴, நிக்³ரோதா⁴திஆதி³மாஹ. தத்த² ‘‘ந அத்தமனோ’’திஆதீ³னி வுத்தவிபக்க²வஸேனேவ வேதி³தப்³பா³னி. ஸப்³ப³வாரேஸு ச லூக²தபஸ்ஸினோ சேவ து⁴தங்க³த⁴ரஸ்ஸ ச வஸேன யோஜனா வேதி³தப்³பா³. ஏவங் ஸோ தஸ்மிங் டா²னே பரிஸுத்³தோ⁴ ஹோதீதி ஏவங் ஸோ தேன ந அத்தமனதா ந பரிபுண்ணஸங்கப்பபா⁴வஸங்கா²தேன காரணேன பரிஸுத்³தோ⁴ நிருபக்கிலேஸோ ஹோதி, உத்தரி வாயமமானோ கம்மட்டா²னஸுத்³தி⁴கோ ஹுத்வா அரஹத்தங் பாபுணாதி. இமினா நயேன ஸப்³ப³வாரேஸு அத்தோ² வேதி³தப்³போ³.
69. அத்³தா⁴ கோ², ப⁴ந்தேதி ப⁴ந்தே ஏவங் ஸந்தே ஏகங்ஸேனேவ வீரியேன பாபஜிகு³ச்ச²னவாதோ³ பரிஸுத்³தோ⁴ ஹோதீதி அனுஜானாதி. இதோ பரஞ்ச அக்³க³பா⁴வங் வா ஸாரபா⁴வங் வா அஜானந்தோ அக்³க³ப்பத்தா ஸாரப்பத்தா சாதி ஆஹ. அத²ஸ்ஸ ப⁴க³வா ஸாரப்பத்தபா⁴வங் படிஸேதெ⁴ந்தோ ந கோ² நிக்³ரோதா⁴திஆதி³மாஹ பபடிகப்பத்தா ஹோதீதி ஸாரவதோ ருக்க²ஸ்ஸ ஸாரங் பெ²க்³கு³ங் தசஞ்ச அதிக்கம்ம ப³ஹிபபடிகஸதி³ஸா ஹோதீதி த³ஸ்ஸேதி.
பரிஸுத்³த⁴தசப்பத்தாதி³கதா²வண்ணனா
70. அக்³க³ங் பாபேதூதி தே³ஸனாவஸேன அக்³க³ங் பாபெத்வா தே³ஸேது, ஸாரங் பாபெத்வா தே³ஸேதூதி த³ஸப³லங் யாசதி. சாதுயாமஸங்வரஸங்வுதோதி சதுப்³பி³தே⁴ன ஸங்வரேன பிஹிதோ. ந பாணங் அதிபாதேதீதி பாணங் ந ஹனதி. ந பா⁴விதமாஸீஸதீதி பா⁴விதங் நாம தேஸங் ஸஞ்ஞாய பஞ்ச காமகு³ணா, தே ந ஆஸீஸதி ந ஸேவதீதி அத்தோ².
அது³ங் சஸ்ஸ ஹோதீதி ஏதஞ்சஸ்ஸ இதா³னி வுச்சமானங் ‘‘ஸோ அபி⁴ஹரதீ’’திஆதி³லக்க²ணங். தபஸ்ஸிதாயாதி தபஸ்ஸிபா⁴வேன ஹோதி. தத்த² ஸோ அபி⁴ஹரதீதி ஸோ தங் ஸீலங் அபி⁴ஹரதி, உபரூபரி வட்³டே⁴தி. ஸீலங் மே பரிபுண்ணங், தபோ ஆரத்³தோ⁴, அலமெத்தாவதாதி ந வீரியங் விஸ்ஸஜ்ஜேதி. நோ ஹீனாயாவத்ததீதி ஹீனாய கி³ஹிபா⁴வத்தா²ய ந ஆவத்ததி. ஸீலதோ உத்தரி விஸேஸாதி⁴க³மத்தா²ய வீரியங் கரோதியேவ, ஏவங் கரொந்தோ ஸோ விவித்தங் ஸேனாஸனங் ப⁴ஜதி. ‘‘அரஞ்ஞ’’ந்திஆதீ³னி ஸாமஞ்ஞப²லே (தீ³॰ நி॰ அட்ட²॰ 1.216) வித்தா²ரிதானேவ. ‘‘மெத்தாஸஹக³தேனா’’திஆதீ³னி விஸுத்³தி⁴மக்³கே³ வண்ணிதானி. தசப்பத்தாதி பபடிகதோ அப்³ப⁴ந்தரங் தசங் பத்தா. பெ²க்³கு³ப்பத்தாதி தசதோ அப்³ப⁴ந்தரங் பெ²க்³கு³ங் பத்தா, பெ²க்³கு³ஸதி³ஸா ஹோதீதி அத்தோ².
74. ‘‘எத்தாவதா, கோ² நிக்³ரோத⁴, தபோஜிகு³ச்சா² அக்³க³ப்பத்தா ச ஹோதி ஸாரப்பத்தா சா’’தி இத³ங் ப⁴க³வா தித்தி²யானங் வஸேனாஹ. தித்தி²யானஞ்ஹி லாப⁴ஸக்காரோ ருக்க²ஸ்ஸ ஸாகா²பலாஸஸதி³ஸோ. பஞ்சஸீலமத்தகங் பபடிகஸதி³ஸங். அட்ட²ஸமாபத்திமத்தங் தசஸதி³ஸங். புப்³பே³னிவாஸஞாணாவஸானா அபி⁴ஞ்ஞா பெ²க்³கு³ஸதி³ஸா. தி³ப்³ப³சக்கு²ங் பனேதே அரஹத்தந்தி க³ஹெத்வா விசரந்தி. தேன நேஸங் தங் ருக்க²ஸ்ஸ ஸாரஸதி³ஸங். ஸாஸனே பன லாப⁴ஸக்காரோ ஸாகா²பலாஸஸதி³ஸோ. ஸீலஸம்பதா³ பபடிகஸதி³ஸா. ஜா²னஸமாபத்தியோ தசஸதி³ஸா. லோகியாபி⁴ஞ்ஞா பெ²க்³கு³ஸதி³ஸா. மக்³க³ப²லங் ஸாரோ. இதி ப⁴க³வதா அத்தனோ ஸாஸனங் ஓனதவினதப²லபா⁴ரப⁴ரிதருக்கூ²பமாய உபமிதங். ஸோ தே³ஸனாகுஸலதாய ததோ தசஸாரஸம்பத்திதோ மம ஸாஸனங் உத்தரிதரஞ்சேவ பணீததரஞ்ச, தங் துவங் கதா³ ஜானிஸ்ஸஸீதி தே பரிப்³பா³ஜகாதி தே தஸ்ஸ பரிவாரா திங்ஸஸதஸங்க்²யா பரிப்³பா³ஜகா. எத்த² மயங் அனஸ்ஸாமாதி எத்த² அசேலகபாளிஆதீ³ஸு, இத³ங் வுத்தங் ஹோதி ‘‘அம்ஹாகங் அசேலகபாளிமத்தம்பி நத்தி² இதோ பி⁴ய்யோ உத்தரிதரந்தி இதோ தி³ப்³ப³சக்கு²ஞாணாதி⁴க³மதோ பி⁴ய்யோ அஞ்ஞங் உத்தரிதரங் விஸேஸாதி⁴க³மங் மயங் ஸுதிவஸேனாபி ந ஜானாமாதி வத³ந்தி.
நிக்³ரோத⁴ஸ்ஸபஜ்ஜா²யனவண்ணனா
75. அத² நிக்³ரோத⁴ங் பரிப்³பா³ஜகந்தி ஏவங் கிரஸ்ஸ அஹோஸி ‘‘இமே பரிப்³பா³ஜகா இதா³னி ப⁴க³வதோ பா⁴ஸிதங் ஸுஸ்ஸூஸந்தி, இமினா ச நிக்³ரோதே⁴ன ப⁴க³வதோ பரம்முகா² கக்க²ளங் து³ராஸத³வசனங் வுத்தங், இதா³னி அயம்பி ஸோதுகாமோ ஜாதோ, காலோ தா³னி மே இமஸ்ஸ மானத்³த⁴ஜங் நிபாதெத்வா ப⁴க³வதோ ஸாஸனங் உக்கி²பிது’’ந்தி. அத² நிக்³ரோத⁴ங் பரிப்³பா³ஜகங் ஏதத³வோச. அபரம்பிஸ்ஸ அஹோஸி ‘‘அயங் மயி அகதெ²ந்தே ஸத்தா²ரங் ந க²மாபெஸ்ஸதி, தத³ஸ்ஸ அனாக³தே அஹிதாய து³க்கா²ய ஸங்வத்திஸ்ஸதி, மயா பன கதி²தே க²மாபெஸ்ஸதி, தத³ஸ்ஸ ப⁴விஸ்ஸதி தீ³க⁴ரத்தங் ஹிதாய ஸுகா²யா’’தி. அத² நிக்³ரோத⁴ங் பரிப்³பா³ஜகங் ஏதத³வோச. அபரிஸாவசரங் பன நங் கரோதா²தி எத்த² பனாதி நிபாதோ, அத² நங் அபரிஸாவசரங் கரோதா²தி அத்தோ². ‘‘அபரிஸாவசரேத’’ந்திபி பாடோ², அபரிஸாவசரங் வா ஏதங் கரோத², கோ³காணாதீ³னங் வா அஞ்ஞதரந்தி அத்தோ².
கோ³காணந்தி எத்தா²பி கோ³காணங் பரியந்தசாரினிங் விய கரோதா²தி அத்தோ². துண்ஹீபூ⁴தோதி துண்ஹீபா⁴வங் உபக³தோ. மங்குபூ⁴தோதி நித்தேஜதங் ஆபன்னோ. பத்தக்க²ந்தோ⁴தி ஓனதகீ³வோ. அதோ⁴முகோ²தி ஹெட்டா²முகோ².
76. பு³த்³தோ⁴ ஸோ ப⁴க³வா போ³தா⁴யாதி ஸயங் பு³த்³தோ⁴ ஸத்தானம்பி சதுஸச்சபோ³த⁴த்தா²ய த⁴ம்மங் தே³ஸேதி. த³ந்தோதி சக்கு²தோபி த³ந்தோ…பே॰… மனதோபி த³ந்தோ. த³மதா²யாதி அஞ்ஞேஸம்பி த³மனத்தா²ய ஏவ, ந வாத³த்தா²ய. ஸந்தோதி ராக³ஸந்ததாய ஸந்தோ, தோ³ஸமோஹஸந்ததாய ஸப்³ப³ அகுஸலஸப்³பா³பி⁴ஸங்கா²ரஸந்ததாய ஸந்தோ. ஸமதா²யாதி மஹாஜனஸ்ஸ ராகா³தி³ஸமனத்தா²ய த⁴ம்மங் தே³ஸேதி. திண்ணோதி சத்தாரோ ஓகே⁴ திண்ணோ. தரணாயாதி மஹாஜனஸ்ஸ ஓக⁴னித்த²ரணத்தா²ய. பரினிப்³பு³தோதி கிலேஸபரினிப்³பா³னேன பரினிப்³பு³தோ. பரினிப்³பா³னாயாதி மஹாஜனஸ்ஸாபி ஸப்³ப³கிலேஸபரினிப்³பா³னத்தா²ய த⁴ம்மங் தே³ஸேதி.
ப்³ரஹ்மசரியபரியோஸானாதி³வண்ணனா
77. அச்சயோதிஆதீ³னி உஜுஜாதிகோதி காயவங்காதி³விரஹிதோ உஜுஸபா⁴வோ. அஹமனுஸாஸாமீதி அஹங் தாதி³ஸங் புக்³க³லங் அனுஸாஸாமி, த⁴ம்மங் அஸ்ஸ தே³ஸேமி. ஸத்தாஹந்தி ஸத்ததி³வஸானி, இத³ங் ஸப்³ப³ம்பி ப⁴க³வா த³ந்த⁴பஞ்ஞங் புக்³க³லங் ஸந்தா⁴யாஹ அஸடோ² பன அமாயாவீ உஜுஜாதிகோ தங்முஹுத்தேனேவ அரஹத்தங் பத்துங் ஸக்கி²ஸ்ஸதி. இதி ப⁴க³வா ‘‘அஸட²’’ந்திஆதி³வசனேன ஸடோ² ஹி வங்கவங்கோ, மயாபி ந ஸக்கா அனுஸாஸிதுந்தி தீ³பெந்தோ பரிப்³பா³ஜகங் பாதே³ஸு க³ஹெத்வா மஹாமேருபாத³தலே விய கி²பித்த². கஸ்மா? அயஞ்ஹி அதிஸடோ², குடிலசித்தோ ஸத்த²ரி ஏவங் கதெ²ந்தேபி பு³த்³த⁴த⁴ம்மஸங்கே⁴ஸு நாதி⁴முச்சதி, அதி⁴முச்சனத்தா²ய ஸோதங் ந ஓத³ஹதி, கோஹஞ்ஞே டி²தோ ஸத்தா²ரங் க²மாபேதி. தஸ்மா ப⁴க³வா தஸ்ஸஜ்ஜா²ஸயங் விதி³த்வா ‘‘ஏது விஞ்ஞூ புரிஸோ அஸடோ²’’திஆதி³மாஹ. ஸட²ங் பனாஹங் அனுஸாஸிதுங் ந ஸக்கோமீதி.
78. அந்தேவாஸிகம்யதாதி அந்தேவாஸிகம்யதாய, அம்ஹே அந்தேவாஸிகே இச்ச²ந்தோ. ஏவமாஹாதி ‘‘ஏது விஞ்ஞுபுரிஸோ’’திஆதி³மாஹ. யோ ஏவ வோ ஆசரியோதி யோ ஏவ தும்ஹாகங் பகதியா ஆசரியோ. உத்³தே³ஸா நோ சாவேதுகாமோதி அத்தனோ அனுஸாஸனிங் கா³ஹாபெத்வா அம்ஹே அம்ஹாகங் உத்³தே³ஸதோ சாவேதுகாமோ. ஸோ ஏவ வோ உத்³தே³ஸோ ஹோதூதி யோ தும்ஹாகங் பகதியா உத்³தே³ஸோ, ஸோ தும்ஹாகங்யேவ ஹோது ஆஜீவாதி ஆஜீவதோ. அகுஸலஸங்கா²தாதி அகுஸலாதி கொட்டா²ஸங் பத்தா. அகுஸலா த⁴ம்மாதி த்³வாத³ஸ அகுஸலசித்துப்பாத³த⁴ம்மா தண்ஹாயேவ வா விஸேஸேன. ஸா ஹி புனப்³ப⁴வகரணதோ ‘‘போனொப்³ப⁴விகா’’தி வுத்தா. ஸத³ரதா²தி கிலேஸத³ரத²ஸம்பயுத்தா. ஜாதிஜராமரணியாதி ஜாதிஜராமரணானங் பச்சயபூ⁴தா. ஸங்கிலேஸிகா த⁴ம்மாதி த்³வாத³ஸ அகுஸலசித்துப்பாதா³. வோதா³னியாதி, ஸமத²விபஸ்ஸனா த⁴ம்மா. தே ஹி ஸத்தே வோதா³பெந்தி, தஸ்மா ‘‘வோதா³னியா’’தி வுச்சந்தி. பஞ்ஞாபாரிபூரிந்தி மக்³க³பஞ்ஞாபாரிபூரிங். வேபுல்லத்தஞ்சாதி ப²லபஞ்ஞாவேபுல்லதங், உபோ⁴பி வா ஏதானி அஞ்ஞமஞ்ஞவேவசனானேவ. இத³ங் வுத்தங் ஹோதி ‘‘ததோ தும்ஹே மக்³க³பஞ்ஞஞ்சேவ ப²லபஞ்ஞஞ்ச தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரிஸ்ஸதா²’’தி. ஏவங் ப⁴க³வா பரிப்³பா³ஜகே ஆரப்³ப⁴ அத்தனோ ஓவாதா³னுஸாஸனியா ப²லங் த³ஸ்ஸெந்தோ அரஹத்தனிகூடேன தே³ஸனங் நிட்ட²பேஸி.
79. யதா² தங் மாரேனாதி யதா² மாரேன பரியுட்டி²தசித்தா நிஸீத³ந்தி ஏவமேவ துண்ஹீபூ⁴தா…பே॰… அப்படிபா⁴னா நிஸின்னா.
மாரோ
தத்த² பு²ட்டா² பாபிமதாதி பாபிமதா மாரேன பு²ட்டா². யத்ர ஹி நாமாதி யேஸு நாம. அஞ்ஞாணத்த²ம்பீதி கிங் கரிஸ்ஸதி ஸத்தாஹோதி ஸமணேன கோ³தமேன பரிச்சி²ன்னஸத்தாஹோ அம்ஹாகங் கிங் கரிஸ்ஸதி. இத³ங் வுத்தங் ஹோதி ‘‘ஸமணேன கோ³தமேன ‘ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரிஸ்ஸதி ஸத்தாஹ’ந்தி வுத்தங், ஸோ ஸத்தாஹோ அம்ஹாகங் கிங் அப்பா²ஸுகங் கரிஸ்ஸதி. ஸீஹனாத³ந்தி பரவாத³பி⁴ந்த³னங் ஸகவாத³ஸமுஸ்ஸாபனஞ்ச அபீ⁴தனாத³ங் நதி³த்வா. பச்சுபட்டா²ஸீதி பதிட்டி²தோ. தாவதே³வாதி தஸ்மிஞ்ஞேவ க²ணே. ராஜக³ஹங் பாவிஸீதி ராஜக³ஹமேவ பவிட்டோ². தேஸங் பன பரிப்³பா³ஜகானங் கிஞ்சாபி இத³ங் ஸுத்தந்தங் ஸுத்வா விஸேஸோ ந நிப்³ப³த்தோ, ஆயதிங் பன நேஸங் வாஸனாய பச்சயோ ப⁴விஸ்ஸதீதி. ஸேஸங் ஸப்³ப³த்த² உத்தானமேவாதி.
ஸுமங்க³லவிலாஸினியா தீ³க⁴னிகாயட்ட²கதா²ய
உது³ம்ப³ரிகஸுத்தவண்ணனா நிட்டி²தா.