8. ஸிங்கா³லஸுத்தவண்ணனா
நிதா³னவண்ணனா
242. ஏவங் மே ஸுதந்தி ஸிங்கா³லஸுத்தங். தத்ராயமனுத்தானபத³வண்ணனா – வேளுவனே கலந்த³கனிவாபேதி வேளுவனந்தி தஸ்ஸ உய்யானஸ்ஸ நாமங். தங் கிர வேளூஹி பரிக்கி²த்தங் அஹோஸி அட்டா²ரஸஹத்தே²ன ச பாகாரேன கோ³புரட்டாலகயுத்தங் நீலோபா⁴ஸங் மனோரமங், தேன வேளுவனந்தி வுச்சதி. கலந்த³கானஞ்செத்த² நிவாபங் அத³ங்ஸு, தேன கலந்த³கனிவாபோதி வுச்சதி.
புப்³பே³ கிர அஞ்ஞதரோ ராஜா தத்த² உய்யானகீளனத்த²ங் ஆக³தோ ஸுராமதே³ன மத்தோ தி³வா நித்³த³ங் ஓக்கமி. பரிஜனோபிஸ்ஸ ‘‘ஸுத்தோ ராஜா’’தி புப்ப²ப²லாதீ³ஹி பலோபி⁴யமானோ இதோ சிதோ ச பக்காமி. அத² ஸுராக³ந்தே⁴ன அஞ்ஞதரஸ்மா ஸுஸிரருக்கா² கண்ஹஸப்போ நிக்க²மித்வா ரஞ்ஞோ அபி⁴முகோ² ஆக³ச்ச²தி, தங் தி³ஸ்வா ருக்க²தே³வதா ‘‘ரஞ்ஞோ ஜீவிதங் த³ம்மீ’’தி காளகவேஸேன ஆக³ந்த்வா கண்ணமூலே ஸத்³த³மகாஸி. ராஜா படிபு³ஜ்ஜி². கண்ஹஸப்போ நிவத்தோ. ஸோ தங் தி³ஸ்வா ‘‘இமாய காளகாய மம ஜீவிதங் தி³ன்ன’’ந்தி காளகானங் தத்த² நிவாபங் பட்ட²பேஸி, அப⁴யகோ⁴ஸஞ்ச கோ⁴ஸாபேஸி. தஸ்மா தங் ததோ பபு⁴தி ‘‘கலந்த³கனிவாபோ’’தி ஸங்க்²யங் க³தங். கலந்த³காதி ஹி காளகானங் ஏதங் நாமங்.
தேன கோ² பன ஸமயேனாதி யஸ்மிங் ஸமயே ப⁴க³வா ராஜக³ஹங் கோ³சரகா³மங் கத்வா வேளுவனே கலந்த³கனிவாபே விஹரதி, தேன ஸமயேன. ஸிங்கா³லகோ க³ஹபதிபுத்தோதி ஸிங்கா³லகோதி தஸ்ஸ நாமங். க³ஹபதிபுத்தோதி க³ஹபதிஸ்ஸ புத்தோ க³ஹபதிபுத்தோ. தஸ்ஸ கிர பிதா க³ஹபதிமஹாஸாலோ, நித³ஹித்வா ட²பிதா சஸ்ஸ கே³ஹே சத்தாலீஸ த⁴னகோடியோ
அத²ஸ்ஸ பிதா மரணமஞ்சே நிபன்னோ ‘‘மம புத்தஸ்ஸ ஓவாத³ங் தா³துங் வட்டதீ’’தி சிந்தெத்வா புன சிந்தேஸி – ‘‘தி³ஸா தாத நமஸ்ஸாஹீ’’தி ஏவமஸ்ஸ ஓவாத³ங் த³ஸ்ஸாமி, ஸோ அத்த²ங் அஜானந்தோ தி³ஸா நமஸ்ஸிஸ்ஸதி, அத² நங் ஸத்தா² வா ஸாவகா வா பஸ்ஸித்வா ‘‘கிங் கரோஸீ’’தி புச்சி²ஸ்ஸந்தி. ததோ ‘‘மய்ஹங் பிதா தி³ஸா நமஸ்ஸனங் கரோஹீதி மங் ஓவதீ³’’தி வக்க²தி. அத²ஸ்ஸ தே ‘‘ந துய்ஹங் பிதா ஏதா தி³ஸா நமஸ்ஸாபேதி, இமா பன தி³ஸா நமஸ்ஸாபேதீ’’தி த⁴ம்மங் தே³ஸெஸ்ஸந்தி. ஸோ பு³த்³த⁴ஸாஸனே கு³ணங் ஞத்வா ‘‘புஞ்ஞகம்மங் கரிஸ்ஸதீ’’தி. அத² நங் ஆமந்தாபெத்வா ‘‘தாத, பாதோவ உட்டா²ய ச² தி³ஸா நமஸ்ஸெய்யாஸீ’’தி ஆஹ. மரணமஞ்சே நிபன்னஸ்ஸ கதா² நாம யாவஜீவங் அனுஸ்ஸரணீயா ஹோதி. தஸ்மா ஸோ க³ஹபதிபுத்தோ தங் பிதுவசனங் அனுஸ்ஸரந்தோ ததா² அகாஸி. தஸ்மா ‘‘காலஸ்ஸேவ உட்டா²ய ராஜக³ஹா நிக்க²மித்வா’’திஆதி³ வுத்தங்.
243. புது²தி³ஸாதி ப³ஹுதி³ஸா. இதா³னி தா த³ஸ்ஸெந்தோ புரத்தி²மங் தி³ஸந்திஆதி³மாஹ. பாவிஸீதி ந தாவ பவிட்டோ², பவிஸிஸ்ஸாமீதி நிக்க²ந்தத்தா பன அந்தராமக்³கே³ வத்தமானோபி ஏவங் வுச்சதி. அத்³த³ஸா கோ² ப⁴க³வாதி ந இதா³னேவ அத்³த³ஸ, பச்சூஸஸமயேபி பு³த்³த⁴சக்கு²னா லோகங் வோலோகெந்தோ ஏதங் தி³ஸா நமஸ்ஸமானங் தி³ஸ்வா ‘‘அஜ்ஜ அஹங் ஸிங்கா³லஸ்ஸ க³ஹபதிபுத்தஸ்ஸ கி³ஹிவினயங் ஸிங்கா³லஸுத்தந்தங் கதெ²ஸ்ஸாமி, மஹாஜனஸ்ஸ ஸா கதா² ஸப²லா ப⁴விஸ்ஸதி, க³ந்தப்³ப³ங் மயா எத்தா²’’தி. தஸ்மா ஏதத³வோசாதி ஸோ கிர அவிதூ³ரே டி²தம்பி ஸத்தா²ரங் ந பஸ்ஸதி, தி³ஸாயேவ நமஸ்ஸதி. அத²ங் நங் ப⁴க³வா ஸூரியரஸ்மிஸம்ப²ஸ்ஸேன விகஸமானங் மஹாபது³மங் விய முக²ங் விவரித்வா ‘‘கிங் நு கோ² த்வங், க³ஹபதிபுத்தா’’திஆதி³கங் ஏதத³வோச.
ச²தி³ஸாதி³வண்ணனா
244. யதா² கத²ங் பன, ப⁴ந்தேதி ஸோ கிர தங் ப⁴க³வதோ வசனங் ஸுத்வாவ சிந்தேஸி ‘‘யா கிர மம பிதரா ச² தி³ஸா நமஸ்ஸிதப்³பா³’’தி வுத்தா, ந கிர தா ஏதா, அஞ்ஞா கிர அரியஸாவகேன ச² தி³ஸா நமஸ்ஸிதப்³பா³. ஹந்தா³ஹங் அரியஸாவகேன நமஸ்ஸிதப்³பா³ தி³ஸாயேவ புச்சி²த்வா நமஸ்ஸாமீதி. ஸோ தா புச்ச²ந்தோ யதா² கத²ங் பன, ப⁴ந்தேதிஆதி³மாஹ. தத்த² யதா²தி நிபாதமத்தங். கத²ங் பனாதி இத³மேவ புச்சா²பத³ங். கம்மகிலேஸாதி தேஹி கம்மேஹி ஸத்தா கிலிஸ்ஸந்தி, தஸ்மா கம்மகிலேஸாதி வுச்சந்தி. டா²னேஹீதி காரணேஹி. அபாயமுகா²னீதி வினாஸமுகா²னி. ஸோதி ஸோ ஸோதாபன்னோ அரியஸாவகோ. சுத்³த³ஸ பாபகாபக³தோதி ஏதேஹி சுத்³த³ஸஹி பாபகேஹி லாமகேஹி அபக³தோ. ச²த்³தி³ஸாபடிச்சா²தீ³தி ச² தி³ஸா படிச்சா²தெ³ந்தோ. உபோ⁴லோகவிஜயாயாதி உபி⁴ன்னங் இத⁴லோகபரலோகானங் விஜினநத்தா²ய. அயஞ்சேவ லோகோ ஆரத்³தோ⁴ ஹோதீதி ஏவரூபஸ்ஸ ஹி இத⁴ லோகே பஞ்ச வேரானி ந ஹொந்தி, தேனஸ்ஸ அயஞ்சேவ லோகோ ஆரத்³தோ⁴ ஹோதி பரிதோஸிதோ சேவ நிப்பா²தி³தோ ச. பரலோகேபி பஞ்ச வேரானி ந ஹொந்தி, தேனஸ்ஸ பரோ ச லோகோ ஆராதி⁴தோ ஹோதி. தஸ்மா ஸோ காயஸ்ஸ பே⁴தா³ பரம்மரணா ஸுக³திங் ஸக்³க³ங் லோகங் உபபஜ்ஜதி.
245. இதி ப⁴க³வா ஸங்கே²பேன மாதிகங் ட²பெத்வா இதா³னி தமேவ வித்தா²ரெந்தோ கதமஸ்ஸ சத்தாரோ கம்மகிலேஸாதிஆதி³மாஹ. கம்மகிலேஸோதி கம்மஞ்ச தங் கிலேஸஸம்பயுத்தத்தா கிலேஸோ சாதி கம்மகிலேஸோ. ஸகிலேஸோயேவ ஹி பாணங் ஹனதி, நிக்கிலேஸோ ந ஹனதி, தஸ்மா பாணாதிபாதோ ‘‘கம்மகிலேஸோ’’தி வுத்தோ. அதி³ன்னாதா³னாதீ³ஸுபி ஏஸேவ நயோ. அதா²பரந்தி அபரம்பி ஏதத³த்த²பரிதீ³பகமேவ கா³தா²ப³ந்த⁴ங் அவோசாதி அத்தோ².
சதுடா²னாதி³வண்ணனா
246. பாபகம்மங் கரோதீதி இத³ங் ப⁴க³வா யஸ்மா காரகே த³ஸ்ஸிதே அகாரகோ பாகடோ ஹோதி, தஸ்மா ‘‘பாபகம்மங் ந கரோதீ’’தி மாதிகங் ட²பெத்வாபி தே³ஸனாகுஸலதாய பட²மதரங் காரகங் த³ஸ்ஸெந்தோ ஆஹ ச²ந்தா³க³திங் க³ச்ச²ந்தோதி ச²ந்தே³ன பேமேன அக³திங் க³ச்ச²ந்தோ அகத்தப்³ப³ங் கரொந்தோ. பரபதே³ஸுபி ஏஸேவ நயோ. தத்த² யோ ‘‘அயங் மே மித்தோ வா ஸம்ப⁴த்தோ வா ஸந்தி³ட்டோ² வா ஞாதகோ வா லஞ்ஜங் வா பன மே தே³தீ’’தி ச²ந்த³வஸேன அஸ்ஸாமிகங் ஸாமிகங் கரோதி, அயங் ச²ந்தா³க³திங் க³ச்ச²ந்தோ பாபகம்மங் கரோதி நாம. யோ ‘‘அயங் மே வேரீ’’தி பகதிவேரவஸேன தங்க²ணுப்பன்னகோத⁴வஸேன
அரியஸாவகோ பன ஜீவிதக்க²யங் பாபுணந்தோபி ச²ந்தா³க³திஆதீ³னி ந க³ச்ச²தி. தேன வுத்தங் – ‘‘இமேஹி சதூஹி டா²னேஹி பாபகம்மங் ந கரோதீ’’தி.
நிஹீயதி யஸோ தஸ்ஸாதி தஸ்ஸ அக³திகா³மினோ கித்தியஸோபி பரிவாரயஸோபி நிஹீயதி பரிஹாயதி.
ச²அபாயமுகா²தி³வண்ணனா
247. ஸுராமேரயமஜ்ஜப்பமாத³ட்டா²னானுயோகோ³தி எத்த² ஸுராதி பிட்ட²ஸுரா பூவஸுரா ஓத³னஸுரா கிண்ணபக்கி²த்தா ஸம்பா⁴ரஸங்யுத்தாதி பஞ்ச ஸுரா. மேரயந்தி புப்பா²ஸவோ ப²லாஸவோ மத்⁴வாஸவோ கு³ளாஸவோ ஸம்பா⁴ரஸங்யுத்தோதி பஞ்ச ஆஸவா. தங் ஸப்³ப³ம்பி மத³கரணவஸேன மஜ்ஜங். பமாத³ட்டா²னந்தி பமாத³காரணங். யாய சேதனாய தங் மஜ்ஜங் பிவதி, தஸ்ஸ ஏதங் அதி⁴வசனங். அனுயோகோ³தி தஸ்ஸ ஸுராமேரயமஜ்ஜப்பமாத³ட்டா²னஸ்ஸ அனுஅனுயோகோ³ புனப்புனங் கரணங். யஸ்மா பனேதங் அனுயுத்தஸ்ஸ உப்பன்னா சேவ விகாலவிஸிகா²சரியானுயோகோ³தி அவேலாய விஸிகா²ஸு சரியானுயுத்ததா.
ஸமஜ்ஜாபி⁴சரணந்தி நச்சாதி³த³ஸ்ஸனவஸேன ஸமஜ்ஜாக³மனங். ஆலஸ்யானுயோகோ³தி காயாலஸியதாய யுத்தப்பயுத்ததா.
ஸுராமேரயஸ்ஸ ச²ஆதீ³னவாதி³வண்ணனா
248. ஏவங் ச² கோ² மே, க³ஹபதிபுத்த ஆதீ³னவாதிஆதி³மாஹ. தத்த² ஸந்தி³ட்டி²காதி ஸாமங் பஸ்ஸிதப்³பா³, இத⁴லோகபா⁴வினீ. த⁴னஜானீதி த⁴னஹானி. கலஹப்பவட்³ட⁴னீதி வாசாகலஹஸ்ஸ சேவ ஹத்த²பராமாஸாதி³காயகலஹஸ்ஸ ச வட்³ட⁴னீ. ரோகா³னங் ஆயதனந்தி தேஸங் தேஸங் அக்கி²ரோகா³தீ³னங் கெ²த்தங். அகித்திஸஞ்ஜனநீதி ஸுரங் பிவித்வா ஹி மாதரம்பி பஹரந்தி பிதரம்பி, அஞ்ஞங் ப³ஹும்பி அவத்தப்³ப³ங் வத³ந்தி, அகத்தப்³ப³ங் கரொந்தி. தேன க³ரஹம்பி த³ண்ட³ம்பி ஹத்த²பாதா³தி³சே²த³ம்பி பாபுணந்தி, இத⁴லோகேபி பரலோகேபி அகித்திங் பாபுணந்தி, இதி தேஸங் ஸா ஸுரா அகித்திஸஞ்ஜனநீ நாம ஹோதி. கோபீனநித³ங்ஸனீதி கு³ய்ஹட்டா²னஞ்ஹி விவரியமானங் ஹிரிங் கோபேதி வினாஸேதி, தஸ்மா ‘‘கோபீன’’ந்தி வுச்சதி, ஸுராமத³மத்தா ச தங் தங் அங்க³ங் விவரித்வா விசரந்தி, தேன நேஸங் ஸா ஸுரா கோபீனஸ்ஸ நித³ங்ஸனதோ ‘‘கோபீனநித³ங்ஸனீ’’தி வுச்சதி. பஞ்ஞாய து³ப்³ப³லிகரணீதி ஸாக³தத்தே²ரஸ்ஸ விய கம்மஸ்ஸகதபஞ்ஞங் து³ப்³ப³லங் கரோதி, தஸ்மா ‘‘பஞ்ஞாய து³ப்³ப³லிகரணீ’’தி வுச்சதி. மக்³க³பஞ்ஞங் பன து³ப்³ப³லங் காதுங் ந ஸக்கோதி. அதி⁴க³தமக்³கா³னஞ்ஹி ஸா அந்தோமுக²மேவ ந பவிஸதி. ச²ட்ட²ங் பத³ந்தி ச²ட்ட²ங் காரணங்.
249. அத்தாபிஸ்ஸ அகு³த்தோ அரக்கி²தோ ஹோதீதி அவேலாய சரந்தோ ஹி கா²ணுகண்டகாதீ³னிபி அக்கமதி, அஹினாபி யக்கா²தீ³ஹிபி ஸமாக³ச்ச²தி, தங் தங் டா²னங் க³ச்ச²தீதி ஞத்வா வேரினோபி நங் நிலீயித்வா க³ண்ஹந்தி வா ஹனந்தி வா. ஏவங் அத்தாபிஸ்ஸ அகு³த்தோ ஹோதி அரக்கி²தோ. புத்ததா³ராபி ‘‘அம்ஹாகங் பிதா அம்ஹாகங் ஸாமி ரத்திங் விசரதி, கிமங்க³ங் பன மய’’ந்தி இதிஸ்ஸ புத்ததீ⁴தரோபி ப⁴ரியாபி புத்ததா³ரோபிஸ்ஸ அகு³த்தோ அரக்கி²தோ ஹோதி. ஸாபதெய்யந்தி தஸ்ஸ புத்ததா³ரபரிஜனஸ்ஸ ரத்திங் சரணகபா⁴வங் ஞத்வா சோரா ஸுஞ்ஞங் ஸாபதெய்யம்பிஸ்ஸ அகு³த்தங் அரக்கி²தங் ஹோதி. ஸங்கியோ ச ஹோதீதி அஞ்ஞேஹி கதபாபகம்மேஸுபி ‘‘இமினா கதங் ப⁴விஸ்ஸதீ’’தி ஸங்கிதப்³போ³ ஹோதி. யஸ்ஸ யஸ்ஸ க⁴ரத்³வாரேன யாதி, தத்த² யங் அஞ்ஞேன சோரகம்மங் பரதா³ரிககம்மங் வா கதங், தங் ‘‘இமினா கத’’ந்தி வுத்தே அபூ⁴தங் அஸந்தம்பி தஸ்மிங் ரூஹதி பதிட்டா²தி. ப³ஹூனஞ்ச து³க்க²த⁴ம்மானந்தி எத்தகங் து³க்க²ங், எத்தகங் தோ³மனஸ்ஸந்தி வத்துங் ந ஸக்கா, அஞ்ஞஸ்மிங் புக்³க³லே அஸதி ஸப்³ப³ங் விகாலசாரிம்ஹி ஆஹரிதப்³ப³ங் ஹோதி, இதி ஸோ ப³ஹூனங் து³க்க²த⁴ம்மானங் புரக்க²தோ புரேகா³மீ ஹோதி.
250. க்வ நச்சந்தி ‘‘கஸ்மிங் டா²னே நடனாடகாதி³னச்சங் அத்தீ²’’தி புச்சி²த்வா யஸ்மிங் கா³மே வா நிக³மே வா தங் அத்தி², தத்த² க³ந்தப்³ப³ங் ஹோதி, தஸ்ஸ ‘‘ஸ்வே நச்சத³ஸ்ஸனங் க³மிஸ்ஸாமீ’’தி அஜ்ஜ வத்த²க³ந்த⁴மாலாதீ³னி படியாதெ³ந்தஸ்ஸேவ ஸகலதி³வஸம்பி கம்மச்சே²தோ³ ஹோதி, நச்சத³ஸ்ஸனேன ஏகாஹம்பி த்³வீஹம்பி தீஹம்பி தத்தே²வ ஹோதி, அத² வுட்டி²ஸம்பத்தியாதீ³னி லபி⁴த்வாபி வப்பாதி³காலே வப்பாதீ³னி அகரொந்தஸ்ஸ அனுப்பன்னா போ⁴கா³ நுப்பஜ்ஜந்தி, தஸ்ஸ ப³ஹி க³தபா⁴வங் ஞத்வா அனாரக்கே² கே³ஹே சோரா யங் இச்ச²ந்தி, தங் கரொந்தி, தேனஸ்ஸ உப்பன்னாபி போ⁴கா³ வினஸ்ஸந்தி. க்வ கீ³தந்திஆதீ³ஸுபி ஏஸேவ நயோ. தேஸங் நானாகரணங் ப்³ரஹ்மஜாலே வுத்தமேவ.
251. ஜயங் வேரந்தி ‘‘ஜிதங் மயா’’தி பரிஸமஜ்ஜே² பரஸ்ஸ ஸாடகங் வா வேட²னங் வா க³ண்ஹாதி, ஸோ ‘‘பரிஸமஜ்ஜே² மே அவமானங் கரோஸி, ஹோது, ஸிக்கா²பெஸ்ஸாமி ந’’ந்தி தத்த² வேரங் ப³ந்த⁴தி, ஏவங் ஜினந்தோ ஸயங் வேரங் பஸவதி. ஜினோதி அஞ்ஞேன ஜிதோ ஸமானோ யங் தேன தஸ்ஸ வேட²னங் வா ஸாடகோ வா அஞ்ஞங் வா பன ஹிரஞ்ஞஸுவண்ணாதி³வித்தங் க³ஹிதங், தங் அனுஸோசதி ‘‘அஹோஸி வத மே, தங் தங் வத மே நத்தீ²’’தி தப்பச்சயா ஸோசதி. ஏவங் ஸோ ஜினோ வித்தங் அனுஸோசதி. ஸபா⁴க³தஸ்ஸ வசனங் ந ரூஹதீதி வினிச்ச²யட்டா²னே ஸக்கி²புட்ட²ஸ்ஸ ஸதோ வசனங் ந ரூஹதி, ந பதிட்டா²தி, ‘‘அயங் அக்க²ஸொண்டோ³ ஜூதகரோ, மா தஸ்ஸ வசனங் க³ண்ஹித்தா²’’தி வத்தாரோ ப⁴வந்தி. மித்தாமச்சானங் பரிபூ⁴தோ ஹோதீதி தஞ்ஹி மிதாமச்சா ஏவங் வத³ந்தி – ‘‘ஸம்ம, த்வம்பி நாம குலபுத்தோ ஜூதகரோ சி²ன்னபி⁴ன்னகோ ஹுத்வா விசரஸி, ந தே இத³ங் ஜாதிகொ³த்தானங் அனுரூபங், இதோ பட்டா²ய மா ஏவங் கரெய்யாஸீ’’தி. ஸோ ஏவங் வுத்தோபி தேஸங் வசனங் ந கரோதி. ததோ தேன ஸத்³தி⁴ங் ஏகதோ ந திட்ட²ந்தி
ஆவாஹவிவாஹகானந்தி ஆவாஹகா நாம யே தஸ்ஸ க⁴ரதோ தா³ரிகங் க³ஹேதுகாமா. விவாஹகா நாம யே தஸ்ஸ கே³ஹே தா³ரிகங் தா³துகாமா. அபத்தி²தோ ஹோதீதி அனிச்சி²தோ ஹோதி. நாலங் தா³ரப⁴ரணாயாதி தா³ரப⁴ரணாய ந ஸமத்தோ². ஏதஸ்ஸ கே³ஹே தா³ரிகா தி³ன்னாபி ஏதஸ்ஸ கே³ஹதோ ஆக³தாபி அம்ஹேஹி ஏவ போஸிதப்³பா³ ப⁴விஸ்ஸதியேவ.
பாபமித்ததாய ச²ஆதீ³னவாதி³வண்ணனா
252. து⁴த்தாதி அக்க²து⁴த்தா. ஸொண்டா³தி இத்தி²ஸொண்டா³ ப⁴த்தஸொண்டா³ பூவஸொண்டா³ மூலகஸொண்டா³. பிபாஸாதி பானஸொண்டா³. நேகதிகாதி பதிரூபகேன வஞ்சனகா. வஞ்சனிகாதி ஸம்முகா²வஞ்சனாஹி ஸாஹஸிகாதி ஏகாகா³ரிகாதி³ஸாஹஸிககம்மகாரினோ. த்யாஸ்ஸ மித்தா ஹொந்தீதி தே அஸ்ஸ மித்தா ஹொந்தி. அஞ்ஞேஹி ஸப்புரிஸேஹி ஸத்³தி⁴ங் ந ரமதி க³ந்த⁴மாலாதீ³ஹி அலங்கரித்வா வரஸயனங் ஆரோபிதஸூகரோ கூ³த²கூபமிவ, தே பாபமித்தேயேவ உபஸங்கமதி. தஸ்மா தி³ட்டே² சேவ த⁴ம்மே ஸம்பராயஞ்ச ப³ஹுங் அனத்த²ங் நிக³ச்ச²தி.
253. அதிஸீதந்தி கம்மங் ந கரோதீதி மனுஸ்ஸேஹி காலஸ்ஸேவ வுட்டா²ய ‘‘ஏத² போ⁴ கம்மந்தங் க³ச்சா²மா’’தி வுத்தோ ‘‘அதிஸீதங் தாவ, அட்டீ²னி பி⁴ஜ்ஜந்தி விய, க³ச்ச²த² தும்ஹே பச்சா² ஜானிஸ்ஸாமீ’’தி அக்³கி³ங் தபந்தோ நிஸீத³தி. தே க³ந்த்வா கம்மங் கரொந்தி. இதரஸ்ஸ கம்மங் பரிஹாயதி. அதிஉண்ஹந்திஆதீ³ஸுபி ஏஸேவ நயோ.
ஹோதி பானஸகா² நாமாதி ஏகச்சோ பானட்டா²னே ஸுராகே³ஹேயேவ ஸஹாயோ ஹோதி. ‘‘பன்னஸகா²’’திபி பாடோ², அயமேவத்தோ². ஸம்மியஸம்மியோதி ஸம்ம ஸம்மாதி வத³ந்தோ ஸம்முகே²யேவ ஸஹாயோ ஹோதி, பரம்முகே² வேரீஸதி³ஸோ ஓதாரமேவ க³வேஸதி. அத்தே²ஸு ஜாதேஸூதி ததா²ரூபேஸு கிச்சேஸு ஸமுப்பன்னேஸு. வேரப்பஸவோதி வேரப³ஹுலதா. அனத்த²தாதி அனத்த²காரிதா. ஸுகத³ரியதாதி ஸுட்டு² கத³ரியதா த²த்³த⁴மச்ச²ரியபா⁴வோ உத³கமிவ இணங் விகா³ஹதீதி பாஸாணோ உத³கங் விய ஸங்ஸீத³ந்தோ இணங் விகா³ஹதி.
ரத்தினுட்டா²னதெ³ஸ்ஸினாதி ரத்திங் அனுட்டா²னஸீலேன. அதிஸாயமித³ங் அஹூதி இத³ங் அதிஸாயங் ஜாதந்தி யே ஏவங் வத்வா கம்மங் ந கரொந்தி. இதி விஸ்ஸட்ட²கம்மந்தேதி ஏவங் வத்வா பரிச்சத்தகம்மந்தே. அத்தா² அச்செந்தி மாணவேதி ஏவரூபே புக்³க³லே அத்தா² அதிக்கமந்தி, தேஸு ந திட்ட²ந்தி.
திணா பி⁴ய்யோதி திணதோபி உத்தரி. ஸோ ஸுக²ங் ந விஹாயதீதி ஸோ புரிஸோ ஸுக²ங் ந ஜஹாதி, ஸுக²ஸமங்கீ³யேவ ஹோதி. இமினா கதா²மக்³கே³ன இமமத்த²ங் த³ஸ்ஸேதி ‘‘கி³ஹிபூ⁴தேன ஸதா எத்தகங் கம்மங் ந காதப்³ப³ங், கரொந்தஸ்ஸ வட்³டி⁴ நாம நத்தி². இத⁴லோகே பரலோகே க³ரஹமேவ பாபுணாதீ’’தி.
மித்தபதிரூபகாதி³வண்ணனா
254. இதா³னி சத்தாரோமே, க³ஹபதிபுத்த அமித்தாதிஆதி³மாஹ. தத்த² அஞ்ஞத³த்து²ஹரோதி ஸயங் துச்ச²ஹத்தோ² ஆக³ந்த்வா ஏகங்ஸேன யங்கிஞ்சி ஹரதியேவ. வசீபரமோதி வசனபரமோ வசனமத்தேனேவ தா³யகோ காரகோ விய ஹோதி. அனுப்பியபா⁴ணீதி அனுப்பியங் ப⁴ணதி. அபாயஸஹாயோதி போ⁴கா³னங் அபாயேஸு ஸஹாயோ ஹோதி.
255. ஏவங் சத்தாரோ அமித்தே த³ஸ்ஸெத்வா புன தத்த² ஏகேகங் சதூஹி காரணேஹி விப⁴ஜந்தோ சதூஹி கோ², க³ஹபதிபுத்தாதிஆதி³மாஹ. தத்த² அஞ்ஞத³த்து²ஹரோ ஹோதீதி ஏகங்ஸேன ஹாரகோயேவ ஹோதி. ஸஹாயஸ்ஸ கே³ஹங் ரித்தஹத்தோ² ஆக³ந்த்வா நிவத்த²ஸாடகாதீ³னங் வண்ணங் பா⁴ஸதி, ஸோ ‘‘அதிவிய த்வங் ஸம்ம இமஸ்ஸ வண்ணங் பா⁴ஸஸீ’’தி அஞ்ஞங் நிவாஸெத்வா தங் தே³தி. அப்பேன ப³ஹுமிச்ச²தீதி யங்கிஞ்சி அப்பகங் த³த்வா தஸ்ஸ ஸந்திகா ப³ஹுங் பத்தே²தி. ப⁴யஸ்ஸ கிச்சங் கரோதீதி அத்தனோ ப⁴யே உப்பன்னே தஸ்ஸ தா³ஸோ விய ஹுத்வா தங் தங் கிச்சங் கரோதி, அயங் ஸப்³ப³தா³ ந கரோதி, ப⁴யே ஸேவதி அத்த²காரணாதி மித்தஸந்த²வவஸேன ந ஸேவதி, அத்தனோ அத்த²மேவ பச்சாஸீஸந்தோ ஸேவதி.
256. அதீதேன படிஸந்த²ரதீதி ஸஹாயே ஆக³தே ‘‘ஹிய்யோ வா பரே வா ந ஆக³தோஸி, அம்ஹாகங் இமஸ்மிங் வாரே ஸஸ்ஸங் அதிவிய நிப்ப²ன்னங், ப³ஹூனி ஸாலியவபீ³ஜாதீ³னி ட²பெத்வா மக்³க³ங் ஓலோகெந்தா நிஸீதி³ம்ஹ, அஜ்ஜ பன ஸப்³ப³ங் கீ²ண’’ந்தி ஏவங் அதீதேன ஸங்க³ண்ஹாதி. அனாக³தேனாதி ‘‘இமஸ்மிங் வாரே அம்ஹாகங் ஸஸ்ஸங் மனாபங் ப⁴விஸ்ஸதி, ப²லபா⁴ரப⁴ரிதா ஸாலிஆத³யோ, ஸஸ்ஸஸங்க³ஹே கதே தும்ஹாகங் ஸங்க³ஹங் காதுங் ஸமத்தா² ப⁴விஸ்ஸாமா’’தி ஏவங் அனாக³தேன ஸங்க³ண்ஹாதி. நிரத்த²கேனாதி ஹத்தி²க்க²ந்தே⁴ வா அஸ்ஸபிட்டே² வா நிஸின்னோ ஸஹாயங் தி³ஸ்வா ‘‘ஏஹி, போ⁴, இத⁴ நிஸீதா³’’தி வத³தி. மனாபங் ஸாடகங் நிவாஸெத்வா ‘‘ஸஹாயகஸ்ஸ வத மே அனுச்ச²விகோ அஞ்ஞோ பன மய்ஹங் நத்தீ²’’தி வத³தி, ஏவங் நிரத்த²கேன ஸங்க³ண்ஹாதி நாம. பச்சுப்பன்னேஸு கிச்சேஸு ப்³யஸனங் த³ஸ்ஸேதீதி ‘‘ஸகடேன மே அத்தோ²’’தி வுத்தே ‘‘சக்கமஸ்ஸ பி⁴ன்னங், அக்கோ² சி²ன்னோ’’திஆதீ³னி வத³தி.
257. பாபகம்பிஸ்ஸ அனுஜானாதீதி பாணாதிபாதாதீ³ஸு யங்கிஞ்சி கரோமாதி வுத்தே ‘‘ஸாது⁴ ஸம்ம ஸஹாயோ ஹோதீதி ‘‘அஸுகட்டா²னே ஸுரங் பிவந்தி, ஏஹி தத்த² க³ச்சா²மா’’தி வுத்தே ஸாதூ⁴தி க³ச்ச²தி. ஏஸ நயோ ஸப்³ப³த்த². இதி விஞ்ஞாயாதி ‘‘மித்தபதிரூபகா ஏதே’’தி ஏவங் ஜானித்வா.
ஸுஹத³மித்தாதி³வண்ணனா
260. ஏவங் ந ஸேவிதப்³பே³ பாபமித்தே த³ஸ்ஸெத்வா இதா³னி ஸேவிதப்³பே³ கல்யாணமித்தே த³ஸ்ஸெந்தோ புன சத்தாரோமே, க³ஹபதிபுத்தாதிஆதி³மாஹ. தத்த² ஸுஹதா³தி ஸுந்த³ரஹத³யா.
261. பமத்தங் ரக்க²தீதி மஜ்ஜங் பிவித்வா கா³மமஜ்ஜே² வா கா³மத்³வாரே வா மக்³கே³ வா நிபன்னங் தி³ஸ்வா ‘‘ஏவங்னிபன்னஸ்ஸ கோசிதே³வ நிவாஸனபாருபனம்பி ஹரெய்யா’’தி ஸமீபே நிஸீதி³த்வா பபு³த்³த⁴காலே க³ஹெத்வா க³ச்ச²தி. பமத்தஸ்ஸ ஸாபதெய்யந்தி ஸஹாயோ பீ⁴தஸ்ஸாதி கிஸ்மிஞ்சிதே³வ ப⁴யே உப்பன்னே ‘‘மா பா⁴யி, மாதி³ஸே ஸஹாயே டி²தே கிங் பா⁴யஸீ’’தி தங் ப⁴யங் ஹரந்தோ படிஸரணங் ஹோதி. தத்³தி³கு³ணங் போ⁴க³ந்தி கிச்சகரணீயே உப்பன்னே ஸஹாயங் அத்தனோ ஸந்திகங் ஆக³தங் தி³ஸ்வா வத³தி ‘‘கஸ்மா ஆக³தோஸீ’’தி? ராஜகுலே கம்மங் அத்தீ²தி. கிங் லத்³து⁴ங் வட்டதீதி? ஏகோ கஹாபணோதி. ‘‘நக³ரே கம்மங் நாம ந ஏககஹாபணேன நிப்ப²ஜ்ஜதி, த்³வே க³ண்ஹாஹீ’’தி ஏவங் யத்தகங் வத³தி, ததோ தி³கு³ணங் தே³தி.
262. கு³ய்ஹமஸ்ஸ ஆசிக்க²தீதி அத்தனோ கு³ய்ஹங் நிகூ³ஹிதுங் யுத்தகத²ங் அஞ்ஞஸ்ஸ அகதெ²த்வா தஸ்ஸேவ ஆசிக்க²தி. கு³ய்ஹமஸ்ஸ பரிகூ³ஹதீதி தேன கதி²தங் கு³ய்ஹங் யதா² அஞ்ஞோ ந ஜானாதி, ஏவங் ரக்க²தி. ஆபதா³ஸு ந விஜஹதீதி உப்பன்னே ப⁴யே ந பரிச்சஜதி. ஜீவிதம்பிஸ்ஸ அத்தா²யாதி அத்தனோ ஜீவிதம்பி தஸ்ஸ ஸஹாயஸ்ஸ அத்தா²ய பரிச்சத்தமேவ ஹோதி, அத்தனோ ஜீவிதங் அக³ணெத்வாபி தஸ்ஸ கம்மங் கரோதியேவ.
263. பாபா நிவாரேதீதி அம்ஹேஸு பஸ்ஸந்தேஸு பஸ்ஸந்தேஸு த்வங் ஏவங் காதுங் ந லப⁴ஸி, பஞ்ச வேரானி த³ஸ அகுஸலகம்மபதே² மா கரோஹீதி நிவாரேதி. கல்யாணே நிவேஸேதீதி கல்யாணகம்மே தீஸு ஸரணேஸு பஞ்சஸீலேஸு த³ஸகுஸலகம்மபதே²ஸு வத்தஸ்ஸு, தா³னங் தே³ஹி புஞ்ஞங் கரோஹி த⁴ம்மங் ஸுணாஹீதி ஏவங் கல்யாணே நியோஜேதி. அஸ்ஸுதங் ஸாவேதீதி அஸ்ஸுதபுப்³ப³ங் ஸுகு²மங் நிபுணங் ஸக்³க³ஸ்ஸ மக்³க³ந்தி இத³ங் கம்மங் கத்வா ஸக்³கே³ நிப்³ப³த்தந்தீதி ஏவங் ஸக்³க³ஸ்ஸ மக்³க³ங் ஆசிக்க²தி.
264. அப⁴வேனஸ்ஸ ந நந்த³தீதி தஸ்ஸ அப⁴வேன அவுட்³டி⁴யா புத்ததா³ரஸ்ஸ வா பரிஜனஸ்ஸ வா ததா²ரூபங் பாரிஜுஞ்ஞங் தி³ஸ்வா வா ஸுத்வா வா ந நந்த³தி, அனத்தமனோ ஹோதி. ப⁴வேனாதி வுட்³டி⁴யா ததா²ரூபஸ்ஸ ஸம்பத்திங் வா அவண்ணங் ப⁴ணமானங் நிவாரேதீதி ‘‘அஸுகோ விரூபோ ந பாஸாதி³கோ து³ஜ்ஜாதிகோ து³ஸ்ஸீலோ’’தி வா வுத்தே ‘‘ஏவங் மா ப⁴ணி, ரூபவா ச ஸோ பாஸாதி³கோ வண்ணங் ப⁴ணமானங் பஸங்ஸதீதி ‘‘அஸுகோ ரூபவா பாஸாதி³கோ ஸுஜாதோ ஸீலஸம்பன்னோ’’தி வுத்தே ‘‘அஹோ ஸுட்டு² வத³ஸி, ஸுபா⁴ஸிதங் தயா, ஏவமேதங், ஏஸ புரிஸோ ரூபவா பாஸாதி³கோ ஸுஜாதோ ஸீலஸம்பன்னோ’’தி ஏவங் அத்தனோ ஸஹாயகஸ்ஸ பரங் வண்ணங் ப⁴ணமானங் பஸங்ஸதி.
265. ஜலங் அக்³கீ³வ பா⁴ஸதீதி ரத்திங் பப்³ப³தமத்த²கே ஜலமானோ அக்³கி³ விய விரோசதி.
போ⁴கே³ ஸங்ஹரமானஸ்ஸாதி அத்தானம்பி பரம்பி அபீளெத்வா த⁴ம்மேன ஸமேன போ⁴கே³ ஸம்பிண்டெ³ந்தஸ்ஸ ராஸிங் கரொந்தஸ்ஸ. ப⁴மரஸ்ஸேவ இரீயதோதி யதா² ப⁴மரோ புப்பா²னங் வண்ணக³ந்த⁴ங் அபோத²யங் துண்டே³னபி பக்கே²ஹிபி ரஸங் ஆஹரித்வா அனுபுப்³பே³ன சக்கப்பமாணங் மது⁴படலங் கரோதி, ஏவங் அனுபுப்³பே³ன மஹந்தங் போ⁴க³ராஸிங் கரொந்தஸ்ஸ. போ⁴கா³ ஸன்னிசயங் யந்தீதி தஸ்ஸ போ⁴கா³ நிசயங் க³ச்ச²ந்தி. கத²ங்? அனுபுப்³பே³ன உபசிகாஹி ஸங்வட்³டி⁴யமானோ வம்மிகோ விய. தேனாஹ ‘‘வம்மிகோவுபசீயதீ’’தி. யதா² வம்மிகோ உபசியதி, ஏவங் நிசயங் யந்தீதி அத்தோ².
ஸமாஹத்வாதி ஸமாஹரித்வா. அலமத்தோ²தி யுத்தஸபா⁴வோ ஸமத்தோ² வா பரியத்தரூபோ க⁴ராவாஸங் ஸண்டா²பேதுங்.
இதா³னி யதா² வா க⁴ராவாஸோ ஸண்ட²பேதப்³போ³, ததா² ஓவத³ந்தோ சதுதா⁴ விப⁴ஜே போ⁴கே³திஆதி³மாஹ. தத்த² ஸ வே மித்தானி க³ந்த²தீதி ஸோ ஏவங் விப⁴ஜந்தோ மித்தானி க³ந்த²தி நாம அபே⁴ஜ்ஜமானானி ட²பேதி. யஸ்ஸ ஹி போ⁴கா³ ஸந்தி, ஸோ ஏவ மித்தே ட²பேதுங் ஸக்கோதி, ந இதரோ.
ஏகேன போ⁴கே³ பு⁴ஞ்ஜெய்யாதி ஏகேன கொட்டா²ஸேன போ⁴கே³ பு⁴ஞ்ஜெய்ய. த்³வீஹி கம்மங் பயோஜயேதி த்³வீஹி கொட்டா²ஸேஹி கஸிவாணிஜ்ஜாதி³கம்மங் பயோஜெய்ய. சதுத்த²ஞ்ச நிதா⁴பெய்யாதி சதுத்த²ங் கொட்டா²ஸங் நிதா⁴பெத்வா ட²பெய்ய. ஆபதா³ஸு ப⁴விஸ்ஸதீதி குலானஞ்ஹி ந ஸப்³ப³காலங் ஏகஸதி³ஸங் வத்ததி, கதா³சி ராஜாதி³வஸேன ஆபதா³பி உப்பஜ்ஜந்தி, தஸ்மா
ச²த்³தி³ஸாபடிச்சா²த³னகண்ட³வண்ணனா
266. இதி ப⁴க³வா எத்தகேன கதா²மக்³கே³ன ஏவங் க³ஹபதிபுத்தஸ்ஸ அரியஸாவகோ சதூஹி காரணேஹி அகுஸலங் பஹாய ச²ஹி காரணேஹி போ⁴கா³னங் அபாயமுக²ங் வஜ்ஜெத்வா ஸோளஸ மித்தானி ஸேவந்தோ க⁴ராவாஸங் ஸண்ட²பெத்வா தா³ரப⁴ரணங் கரொந்தோ த⁴ம்மிகேன ஆஜீவேன ஜீவதி, தே³வமனுஸ்ஸானஞ்ச அந்தரே அக்³கி³க்க²ந்தோ⁴ விய விரோசதீதி வஜ்ஜனீயத⁴ம்மவஜ்ஜனத்த²ங் ஸேவிதப்³ப³த⁴ம்மஸேவனத்த²ஞ்ச ஓவாத³ங் த³த்வா இதா³னி நமஸ்ஸிதப்³பா³ ச² தி³ஸா த³ஸ்ஸெந்தோ கத²ஞ்ச க³ஹபதிபுத்தாதிஆதி³மாஹ.
தத்த² ச²த்³தி³ஸாபடிச்சா²தீ³தி யதா² ச²ஹி தி³ஸாஹி ஆக³மனப⁴யங் ந ஆக³ச்ச²தி, கே²மங் ஹோதி நிப்³ப⁴யங் ஏவங் விஹரந்தோ ‘‘ச²த்³தி³ஸாபடிச்சா²தீ³’’தி வுச்சதி. ‘‘புரத்தி²மா தி³ஸா மாதாபிதரோ வேதி³தப்³பா³’’திஆதீ³ஸு மாதாபிதரோ புப்³பு³பகாரிதாய புரத்தி²மா தி³ஸாதி வேதி³தப்³பா³. ஆசரியா த³க்கி²ணெய்யதாய த³க்கி²ணா தி³ஸாதி. புத்ததா³ரா பிட்டி²தோ அனுப³ந்த⁴னவஸேன பச்சி²மா தி³ஸாதி. மித்தாமச்சா யஸ்மா ஸோ மித்தாமச்சே நிஸ்ஸாய தே தே து³க்க²விஸேஸே உத்தரதி, தஸ்மா உத்தரா தி³ஸாதி. தா³ஸகம்மகரா பாத³மூலே பதிட்டா²னவஸேன ஹெட்டி²மா தி³ஸாதி. ஸமணப்³ராஹ்மணா கு³ணேஹி உபரி டி²தபா⁴வேன உபரிமா தி³ஸாதி வேதி³தப்³பா³.
267. ப⁴தோ நே ப⁴ரிஸ்ஸாமீதி அஹங் மாதாபிதூஹி த²ஞ்ஞங் பாயெத்வா ஹத்த²பாதே³ வட்³டெ⁴த்வா முகே²ன ஸிங்கா⁴ணிகங் அபனெத்வா நஹாபெத்வா மண்டெ³த்வா ப⁴தோ ப⁴ரிதோ ஜக்³கி³தோ, ஸ்வாஹங் அஜ்ஜ தே மஹல்லகே பாத³தோ⁴வனந்ஹாபனயாகு³ப⁴த்ததா³னாதீ³ஹி ப⁴ரிஸ்ஸாமி.
கிச்சங் நேஸங் கரிஸ்ஸாமீதி அத்தனோ கம்மங் ட²பெத்வா மாதாபிதூனங் ராஜகுலாதீ³ஸு உப்பன்னங் கிச்சங் குலவங்ஸங் ஸண்ட²பெஸ்ஸாமீதி மாதாபிதூனங் ஸந்தகங் கெ²த்தவத்து²ஹிரஞ்ஞஸுவண்ணாதி³ங் அவினாஸெத்வா ரக்க²ந்தோபி
தா³யஜ்ஜங் படிபஜ்ஜாமீதி மாதாபிதரோ அத்தனோ ஓவாதே³ அவத்தமானே மிச்சா²படிபன்னே தா³ரகே வினிச்ச²யங் பத்வா அபுத்தே கரொந்தி, தே தா³யஜ்ஜாரஹா ந ஹொந்தி. ஓவாதே³ வத்தமானே பன குலஸந்தகஸ்ஸ ஸாமிகே கரொந்தி, அஹங் ஏவங் வத்திஸ்ஸாமீதி அதி⁴ப்பாயேன ‘‘தா³யஜ்ஜங் படிபஜ்ஜாமீ’’தி வுத்தங்.
த³க்கி²ணங் அனுப்பத³ஸ்ஸாமீதி தேஸங் பத்திதா³னங் கத்வா ததியதி³வஸதோ பட்டா²ய தா³னங் அனுப்பத³ஸ்ஸாமி. பாபா நிவாரெந்தீதி பாணாதிபாதாதீ³னங் தி³ட்ட²த⁴ம்மிகஸம்பராயிகங் ஆதீ³னவங் வத்வா, ‘‘தாத, மா ஏவரூபங் கரீ’’தி நிவாரெந்தி, கதம்பி க³ரஹந்தி. கல்யாணே நிவேஸெந்தீதி அனாத²பிண்டி³கோ விய லஞ்ஜங் த³த்வாபி ஸீலஸமாதா³னாதீ³ஸு நிவேஸெந்தி. ஸிப்பங் ஸிக்கா²பெந்தீதி அத்தனோ ஓவாதே³ டி²தபா⁴வங் ஞத்வா வங்ஸானுக³தங் முத்³தா³க³ணனாதி³ஸிப்பங் ஸிக்கா²பெந்தி. பதிரூபேனாதி குலஸீலரூபாதீ³ஹி அனுரூபேன.
ஸமயே தா³யஜ்ஜங் நிய்யாதெ³ந்தீதி ஸமயே த⁴னங் தெ³ந்தி. தத்த² நிச்சஸமயோ காலஸமயோதி த்³வே ஸமயா. நிச்சஸமயே தெ³ந்தி நாம ‘‘உட்டா²ய ஸமுட்டா²ய இமங் க³ண்ஹிதப்³ப³ங் க³ண்ஹ, அயங் தே பரிப்³ப³யோ ஹோது, இமினா குஸலங் கரோஹீ’’தி தெ³ந்தி. காலஸமயே தெ³ந்தி நாம ஸிகா²ட²பனஆவாஹவிவாஹாதி³ஸமயே தெ³ந்தி. அபிச பச்சி²மே காலே மரணமஞ்சே நிபன்னஸ்ஸ ‘‘இமினா குஸலங் கரோஹீ’’தி தெ³ந்தாபி ஸமயே தெ³ந்தி நாம. படிச்ச²ன்னா ஹோதீதி யங் புரத்தி²மதி³ஸதோ ப⁴யங் ஆக³ச்செ²ய்ய, யதா² தங் நாக³ச்ச²தி, ஏவங் பிஹிதா ஹோதி. ஸசே ஹி புத்தா விப்படிபன்னா, அஸ்ஸு, மாதாபிதரோ த³ஹரகாலதோ பட்டா²ய ஜக்³க³னாதீ³ஹி ஸம்மா படிபன்னா, ஏதே தா³ரகா, மாதாபிதூனங் அப்பதிரூபாதி ஏதங் ப⁴யங் ஆக³ச்செ²ய்ய. புத்தா ஸம்மா படிபன்னா, மாதாபிதரோ விப்படிபன்னா, மாதாபிதரோ புத்தானங் நானுரூபாதி ஏதங் ப⁴யங் ஆக³ச்செ²ய்ய. உபோ⁴ஸு விப்படிபன்னேஸு து³வித⁴ம்பி தங் ப⁴யங் ஹோதி. ஸம்மா
ஏவஞ்ச
268. உட்டா²னேனாதி ஆஸனா உட்டா²னேன. அந்தேவாஸிகேன ஹி ஆசரியங் தூ³ரதோவ ஆக³ச்ச²ந்தங் தி³ஸ்வா ஆஸனா வுட்டா²ய பச்சுக்³க³மனங் கத்வா ஹத்த²தோ ப⁴ண்ட³கங் க³ஹெத்வா ஆஸனங் பஞ்ஞபெத்வா நிஸீதா³பெத்வா பீ³ஜனபாத³தோ⁴வனபாத³மக்க²னானி காதப்³பா³னி. தங் ஸந்தா⁴ய வுத்தங் ‘‘உட்டா²னேனா’’தி. உபட்டா²னேனாதி தி³வஸஸ்ஸ திக்க²த்துங் உபட்டா²னக³மனேன. ஸிப்புக்³க³ஹணகாலே பன அவஸ்ஸகமேவ க³ந்தப்³ப³ங் ஹோதி. ஸுஸ்ஸூஸாயாதி ஸத்³த³ஹித்வா ஸவனேன. அஸத்³த³ஹித்வா ஸுணந்தோ ஹி விஸேஸங் நாதி⁴க³ச்ச²தி. பாரிசரியாயாதி அவஸேஸகு²த்³த³கபாரிசரியாய. அந்தேவாஸிகேன ஹி ஆசரியஸ்ஸ பாதோவ வுட்டா²ய முகோ²த³கத³ந்தகட்ட²ங் த³த்வா ப⁴த்தகிச்சகாலேபி பானீயங் க³ஹெத்வா பச்சுபட்டா²னாதீ³னி கத்வா வந்தி³த்வா க³ந்தப்³ப³ங். கிலிட்ட²வத்தா²தீ³னி தோ⁴விதப்³பா³னி, ஸாயங் நஹானோத³கங் பச்சுபட்ட²பேதப்³ப³ங். அபா²ஸுகாலே உபட்டா²தப்³ப³ங். பப்³ப³ஜிதேனபி ஸப்³ப³ங் அந்தேவாஸிகவத்தங் காதப்³ப³ங். இத³ங் ஸந்தா⁴ய வுத்தங் – ‘‘பாரிசரியாயா’’தி. ஸக்கச்சங் ஸிப்பபடிக்³க³ஹணேனாதி ஸக்கச்சங் படிக்³க³ஹணங் நாம தோ²கங் க³ஹெத்வா ப³ஹுவாரே ஸஜ்ஜா²யகரணங், ஏகபத³ம்பி விஸுத்³த⁴மேவ க³ஹேதப்³ப³ங்.
ஸுவினீதங் வினெந்தீதி ‘‘ஏவங் தே நிஸீதி³தப்³ப³ங், ஏவங் டா²தப்³ப³ங், ஏவங் கா²தி³தப்³ப³ங், ஏவங் பு⁴ஞ்ஜிதப்³ப³ங், பாபமித்தா வஜ்ஜேதப்³பா³, கல்யாணமித்தா ஸேவிதப்³பா³’’தி ஏவங் ஆசாரங் ஸிக்கா²பெந்தி வினெந்தி. ஸுக்³க³ஹிதங் கா³ஹாபெந்தீதி யதா² ஸுக்³க³ஹிதங் க³ண்ஹாதி, ஏவங் அத்த²ஞ்ச ப்³யஞ்ஜனஞ்ச ஸோதெ⁴த்வா பயோக³ங் த³ஸ்ஸெத்வா க³ண்ஹாபெந்தி. மித்தாமச்சேஸு படியாதெ³ந்தீதி ‘‘அயங் அம்ஹாகங் அந்தேவாஸிகோ ப்³யத்தோ ப³ஹுஸ்ஸுதோ மயா ஸமஸமோ, ஏதங் ஸல்லக்கெ²ய்யாதா²’’தி ஏவங் கு³ணங் கதெ²த்வா மித்தாமச்சேஸு பதிட்ட²பெந்தி.
தி³ஸாஸு பரித்தாணங் கரொந்தீதி ஸிப்பஸிக்கா²பனேனேவஸ்ஸ ஸப்³ப³தி³ஸாஸு
269. ததியதி³ஸாவாரே ஸம்மானநாயாதி தே³வமாதே திஸ்ஸமாதேதி ஏவங் ஸம்பா⁴விதகதா²கத²னேன. அனவமானநாயாதி யதா² தா³ஸகம்மகராத³யோ போதெ²த்வா விஹேடெ²த்வா கதெ²ந்தி, ஏவங் ஹீளெத்வா விமானெத்வா அகத²னேன. அனதிசரியாயாதி தங் அதிக்கமித்வா ப³ஹி அஞ்ஞாய இத்தி²யா ஸத்³தி⁴ங் பரிசரந்தோ தங் அதிசரதி நாம, ததா² அகரணேன. இஸ்ஸரியவொஸ்ஸக்³கே³னாதி இத்தி²யோ ஹி மஹாலதாஸதி³ஸம்பி ஆப⁴ரணங் லபி⁴த்வா ப⁴த்தங் விசாரேதுங் அலப⁴மானா குஜ்ஜ²ந்தி, கடச்சு²ங் ஹத்தே² ட²பெத்வா தவ ருசியா கரோஹீதி ப⁴த்தகே³ஹே விஸ்ஸட்டே² ஸப்³ப³ங் இஸ்ஸரியங் விஸ்ஸட்ட²ங் நாம ஹோதி, ஏவங் கரணேனாதி அத்தோ². அலங்காரானுப்பதா³னேனாதி அத்தனோ விப⁴வானுரூபேன அலங்காரதா³னேன. ஸுஸங்விஹிதகம்மந்தாதி யாகு³ப⁴த்தபசனகாலாதீ³னி அனதிக்கமித்வா தஸ்ஸ தஸ்ஸ ஸாது⁴கங் கரணேன ஸுட்டு² ஸங்விஹிதகம்மந்தா. ஸங்க³ஹிதபரிஜனாதி ஸம்மானநாதீ³ஹி சேவ பஹேணகபேஸனாதீ³ஹி ச ஸங்க³ஹிதபரிஜனா. இத⁴ பரிஜனோ நாம ஸாமிகஸ்ஸ சேவ அத்தனோ ச ஞாதிஜனோ. அனதிசாரினீதி ஸாமிகங் முஞ்சித்வா அஞ்ஞங் மனஸாபி ந பத்தே²தி. ஸம்ப⁴தந்தி கஸிவாணிஜ்ஜாதீ³னி கத்வா ஆப⁴தத⁴னங். த³க்கா² ச ஹோதீதி யாகு³ப⁴த்தஸம்பாத³னாதீ³ஸு சே²கா நிபுணா ஹோதி. அனலஸாதி நிக்கோஸஜ்ஜா. யதா² அஞ்ஞா குஸீதா நிஸின்னட்டா²னே நிஸின்னாவ ஹொந்தி டி²தட்டா²னே டி²தாவ, ஏவங் அஹுத்வா விப்பா²ரிதேன சித்தேன ஸப்³ப³கிச்சானி நிப்பா²தே³தி. ஸேஸமிதா⁴பி புரிமனயேனேவ யோஜேதப்³ப³ங்.
270. சதுத்த²தி³ஸாவாரே அவிஸங்வாத³னதாயாதி யஸ்ஸ யஸ்ஸ நாமங் க³ண்ஹாதி, தங் தங் அவிஸங்வாதெ³த்வா இத³ம்பி அம்ஹாகங் கே³ஹே அத்தி², இத³ம்பி அத்தி², க³ஹெத்வா க³ச்சா²ஹீதி ஏவங் அவிஸங்வாதெ³த்வா தா³னேன. அபரபஜா சஸ்ஸ படிபூஜெந்தீதி ஸஹாயஸ்ஸ புத்ததீ⁴தரோ பஜா நாம, தேஸங் பன புத்ததீ⁴தரோ ச நத்துபனத்தகா ச அபரபஜா நாம. தே படிபூஜெந்தி கேளாயந்தி மமாயந்தி மங்க³லகாலாதீ³ஸு தேஸங் மங்க³லாதீ³னி கரொந்தி. ஸேஸமிதா⁴பி புரிமனயேனேவ வேதி³தப்³ப³ங்.
271. யதா²ப³லங் கம்மந்தஸங்விதா⁴னேனாதி த³ஹரேஹி காதப்³ப³ங் மஹல்லகேஹி, மஹல்லகேஹி வா காதப்³ப³ங் த³ஹரேஹி, இத்தீ²ஹி காதப்³ப³ங் புரிஸேஹி, புரிஸேஹி வா காதப்³ப³ங் இத்தீ²ஹி அகாரெத்வா தஸ்ஸ தஸ்ஸ ப³லானுரூபேனேவ கம்மந்தஸங்விதா⁴னேன. ப⁴த்தவேதனானுப்பதா³னேனாதி அயங் கு²த்³த³கபுத்தோ, அயங் ஏகவிஹாரீதி கி³லானுபட்டா²னேனாதி அபா²ஸுககாலே கம்மங் அகாரெத்வா ஸப்பாயபே⁴ஸஜ்ஜாதீ³னி த³த்வா படிஜக்³க³னேன. அச்ச²ரியானங் ரஸானங் ஸங்விபா⁴கே³னாதி அச்ச²ரியே மது⁴ரரஸே லபி⁴த்வா ஸயமேவ அகா²தி³த்வா தேஸம்பி ததோ ஸங்விபா⁴க³கரணேன. ஸமயே வொஸ்ஸக்³கே³னாதி நிச்சஸமயே ச காலஸமயே ச வொஸ்ஸஜ்ஜனேன. நிச்சஸமயே வொஸ்ஸஜ்ஜனங் நாம ஸகலதி³வஸங் கம்மங் கரொந்தா கிலமந்தி. தஸ்மா யதா² ந கிலமந்தி, ஏவங் வேலங் ஞத்வா விஸ்ஸஜ்ஜனங். காலஸமயே வொஸ்ஸக்³கோ³ நாம ச²ணனக்க²த்தகீளாதீ³ஸு அலங்காரப⁴ண்ட³கா²த³னீயபோ⁴ஜனீயாதீ³னி த³த்வா விஸ்ஸஜ்ஜனங். தி³ன்னாதா³யினோதி சோரிகாய கிஞ்சி அக³ஹெத்வா ஸாமிகேஹி தி³ன்னஸ்ஸேவ ஆதா³யினோ. ஸுகதகம்மகராதி ‘‘கிங் ஏதஸ்ஸ கம்மேன கதேன, ந மயங் கித்திவண்ணஹராதி பரிஸமஜ்ஜே² கதா²ய ஸம்பத்தாய ‘‘கோ அம்ஹாகங் ஸாமிகேஹி ஸதி³ஸோ அத்தி², மயங் அத்தனோ தா³ஸபா⁴வம்பி ந ஜானாம, தேஸங் ஸாமிகபா⁴வம்பி ந ஜானாம, ஏவங் நோ அனுகம்பந்தீ’’தி கு³ணகதா²ஹாரகா. ஸேஸமிதா⁴பி புரிமனயேனேவ யோஜேதப்³ப³ங்.
272. மெத்தேன காயகம்மேனாதிஆதீ³ஸு மெத்தசித்தங் பச்சுபட்ட²பெத்வா கதானி காயகம்மாதீ³னி மெத்தானி நாம வுச்சந்தி. தத்த² பி⁴க்கூ² நிமந்தெஸ்ஸாமீதி விஹாரக³மனங் காயகம்மங் நாம. பி⁴க்கூ² பிண்டா³ய பவிட்டே² தி³ஸ்வா ‘‘ஸக்கச்சங் யாகு³ங் தே³த², ப⁴த்தங் தே³தா²’’திஆதி³வசனஞ்சேவ, ஸாது⁴காரங் த³த்வா த⁴ம்மஸவனஞ்ச ஸக்கச்சங் படிஸந்தா²ரகரணாதீ³னி ச மெத்தங் வசீகம்மங் நாம. ‘‘அம்ஹாகங் குலூபகத்தே²ரா அவேரா ஹொந்து அப்³யாபஜ்ஜா’’தி ஏவங் சிந்தனங் மெத்தங் மனோகம்மங் நாம. அனாவடத்³வாரதாயாதி அபிஹிதத்³வாரதாய. தத்த² ஸப்³ப³த்³வாரானி விவரித்வாபி ஸீலவந்தானங் அதா³யகோ அகாரகோ பிஹிதத்³வாரோயேவ. ஸப்³ப³த்³வாரானி பன பித³ஹித்வாபி தேஸங் தா³யகோ காரகோ விவடத்³வாரோயேவ. இதி ஸீலவந்தேஸு கே³ஹத்³வாரங் ஆக³தேஸு ஸந்தங்யேவ நத்தீ²தி அவத்வா தா³தப்³ப³ங். ஏவங் அனாவடத்³வாரதா நாம ஹோதி.
ஆமிஸானுப்பதா³னேனாதி புரேப⁴த்தங் பரிபு⁴ஞ்ஜிதப்³ப³கங் ஆமிஸங் நாம, தஸ்மா ஸீலவந்தானங் யாகு³ப⁴த்தஸம்பதா³னேனாதி அத்தோ². கல்யாணேன மனஸா அனுகம்பந்தீதி ‘‘ஸப்³பே³ ஸத்தா ஸுகி²தா ஹொந்து அவேரா அரோகா³ அப்³யாபஜ்ஜா’’தி ஏவங் ஹிதப²ரணேன. அபிச உபட்டா²கானங் கே³ஹங் அஞ்ஞே ஸீலவந்தே ஸப்³ரஹ்மசாரீ க³ஹெத்வா பவிஸந்தாபி கல்யாணேன சேதஸா அனுகம்பந்தி நாம. ஸுதங் பரியோதா³பெந்தீதி யங் தேஸங் பகதியா ஸுதங் அத்தி², தஸ்ஸ அத்த²ங் கதெ²த்வா கங்க²ங் வினோதெ³ந்தி, தத²த்தாய வா படிபஜ்ஜாபெந்தி. ஸேஸமிதா⁴பி புரிமனயேனேவ யோஜேதப்³ப³ங்.
273. அலமத்தோதி பண்டி³தோதி தி³ஸானமஸ்ஸனட்டா²னே பண்டி³தோ ஹுத்வா. ஸண்ஹோதி படிபா⁴னவாதி தி³ஸானமஸ்ஸனட்டா²னே படிபா⁴னவா ஹுத்வா நிவாதவுத்தீதி நீசவுத்தி. அத்த²த்³தோ⁴தி த²ம்ப⁴ரஹிதோ. உட்டா²னகோதி உட்டா²னவீரியஸம்பன்னோ. அனலஸோதி நிக்கோஸஜ்ஜோ. அச்சி²ன்னவுத்தீதி நிரந்தரகரணவஸேன அக²ண்ட³வுத்தி. மேதா⁴வீதி டா²னுப்பத்தியா பஞ்ஞாய ஸமன்னாக³தோ.
ஸங்கா³ஹகோதி சதூஹி ஸங்க³ஹவத்தூ²ஹி ஸங்க³ஹகரோ. மித்தகரோதி மித்தக³வேஸனோ. வத³ஞ்ஞூதி புப்³ப³காரினா, வுத்தவசனங் ஜானாதி. ஸஹாயகஸ்ஸ க⁴ரங் க³தகாலே ‘‘மய்ஹங் ஸஹாயகஸ்ஸ வேட²னங் தே³த², ஸாடகங் தே³த², மனுஸ்ஸானங் ப⁴த்தவேதனங் தே³தா²’’தி வுத்தவசனமனுஸ்ஸரந்தோ தஸ்ஸ அத்தனோ கே³ஹங் நேதாதி தங் தங் அத்த²ங் த³ஸ்ஸெந்தோ பஞ்ஞாய நேதா. விவிதா⁴னி காரணானி த³ஸ்ஸெந்தோ நேதீதி வினேதா. புனப்புனங் நேதீதி அனுனேதா.
தத்த² தத்தா²தி தஸ்மிங் தஸ்மிங் புக்³க³லே. ரத²ஸ்ஸாணீவ யாயதோதி யதா² ஆணியா ஸதியேவ ரதோ² யாதி, அஸதி ந யாதி, ஏவங் இமேஸு ஸங்க³ஹேஸு ஸதியேவ லோகோ வத்ததி, அஸதி ந வத்ததி. தேன வுத்தங் – ‘‘ஏதே கோ² ஸங்க³ஹா லோகே, ரத²ஸ்ஸாணீவ யாயதோ’’தி.
ந மாதா புத்தகாரணாதி யதி³ மாதா ஏதே ஸங்க³ஹே புத்தஸ்ஸ ந கரெய்ய, புத்தகாரணா மானங் வா பூஜங் வா ந லபெ⁴ய்ய.
ஸங்க³ஹா ஏதேதி உபயோக³வசனே பச்சத்தங். ‘‘ஸங்க³ஹே ஏதே’’தி வா பாடோ². ஸம்மபெக்க²ந்தீதி ஸம்மா பெக்க²ந்தி. பாஸங்ஸா ச ப⁴வந்தீதி பஸங்ஸனீயா ச ப⁴வந்தி.
274. இதி ப⁴க³வா யா தி³ஸா ஸந்தா⁴ய தே க³ஹபதிபுத்த பிதா ஆஹ ‘‘தி³ஸா நமஸ்ஸெய்யாஸீ’’தி, இமா தா ச² தி³ஸா. யதி³ த்வங் பிது வசனங் கரோஸி, இமா தி³ஸா நமஸ்ஸாதி த³ஸ்ஸெந்தோ ஸிங்கா³லஸ்ஸ புச்சா²ய ட²த்வா தே³ஸனங் மத்த²கங் பாபெத்வா ராஜக³ஹங் பிண்டா³ய கி³ஹிவினயோ நாமாயங் ஸுத்தந்தோ. தஸ்மா இமங் ஸுத்வா யதா²னுஸிட்ட²ங் படிபஜ்ஜமானஸ்ஸ வுத்³தி⁴யேவ பாடிகங்கா², நோ பரிஹானீதி.
ஸுமங்க³லவிலாஸினியா தீ³க⁴னிகாயட்ட²கதா²ய
ஸிங்கா³லஸுத்தவண்ணனா நிட்டி²தா.