3. சக்கவத்திஸுத்தவண்ணனா
அத்ததீ³பஸரணதாவண்ணனா
80. உத்தானங் அனுத்தானங் அபாகடங், படிச்ச²ன்னங், அபசுரங், து³விஞ்ஞெய்யஞ்ச. அனுத்தானானங் பதா³னங் வண்ணனா அனுத்தானபத³வண்ணனா. உத்தானபத³வண்ணனாய பயோஜனாபா⁴வதோ அனுத்தானக்³க³ஹணங். ‘‘மாதுலா’’தி இத்தி²லிங்க³வஸேன லத்³த⁴னாமோ ஏகோ ருக்கோ², தஸ்ஸா ஆஸன்னப்பதே³ஸே மாபிதத்தா நக³ரம்பி ‘‘மாதுலா’’ த்வேவ பஞ்ஞாயித்த². தேன வுத்தங் ‘‘மாதுலாயந்தி ஏவங் நாமகே நக³ரே’’தி. அவிதூ³ரேதி தஸ்ஸ நக³ரஸ்ஸ அவிதூ³ரே.
காமஞ்செத்த² ஸுத்தே ‘‘பூ⁴தபுப்³ப³ங், பி⁴க்க²வே, ராஜா த³ள்ஹனேமி நாம அஹோஸீ’’திஆதி³னா அதீதவங்ஸதீ³பிகா கதா² ஆதி³தோ பட்டா²ய ஆக³தா, ‘‘அட்³ட⁴தெய்யவஸ்ஸஸதாயுகானங் மனுஸ்ஸானங் வஸ்ஸஸதாயுகா புத்தா ப⁴விஸ்ஸந்தீ’’திஆதி³னா பன ஸவிஸேஸங் அனாக³தத்த²படிஸங்யுத்தா கதா² ஆக³தாதி வுத்தங் ‘‘அனாக³தவங்ஸதீ³பிகாய ஸுத்தந்தகதா²யா’’தி. அனாக³தத்த²தீ³பனஞ்ஹி அச்ச²ரியங், தத்தா²பி அனாக³தஸ்ஸ ஸம்மாஸம்பு³த்³த⁴ஸ்ஸ படிபத்திகித்தனங் அச்ச²ரியதமங். ஸமாக³மேனாதி ஸன்னிபாதேன.
‘‘ப⁴த்தக்³க³ங் அமனாப’’ந்திஆதி³ கேவலங் தேஸங் பரிவிதக்கமத்தங். அமனாபந்தி அமனுஞ்ஞங். பு³த்³தே⁴ஸு கதோ அப்பகோபி அபராதோ⁴ அப்பகோ காரோ விய க³ருதரவிபாகோதி ஆஹ ‘‘பு³த்³தே⁴ஹி ஸத்³தி⁴ங்…பே॰… ஸதி³ஸங் ஹோதீ’’தி. தத்ராதி தஸ்மிங் மாதுலனக³ரஸ்ஸ ஸமீபே, தஸ்ஸங் வா பரிஸாயங்.
அத்ததீ³பாதி எத்த² காமங் யோ பரோ ந ஹோதி, ஸோ அத்தாதி ஸஸந்தானோ ‘‘அத்தா’’தி வுச்சதி, ஹிதஸுகே²ஸிபா⁴வேன பன அத்தனிப்³பி³ஸேஸத்தா த⁴ம்மோ இத⁴ ‘‘அத்தா’’தி அதி⁴ப்பேதோ. தேனாஹ ‘‘அத்தா நாம லோகியலோகுத்தரோ த⁴ம்மோ’’தி. த்³விதா⁴ ஆபோ க³தோ எத்தா²தி தீ³போ, ஓகே⁴ன அனஜ்ஜொ²த்த²தோ தீ³போ, அத்தா தீ³போ பதிட்டா² ஏதேஸந்தி அத்ததீ³பா. தேனாஹ ‘‘அத்தானங் தீ³ப’’ந்திஆதி³. தீ³பபா⁴வோ செத்த² படிஸரணதாதி ஆஹ ‘‘இத³ங் தஸ்ஸேவ வேவசன’’ந்தி. அஞ்ஞஸரணபடிக்கே²பவசனந்தி அஞ்ஞஸரணபா⁴வபடிக்கே²பவசனங். இத³ஞ்ஹி ந அஞ்ஞங் ஸரணங் கத்வா ‘‘ந ஹீ’’திஆதி³. இதா³னி தமேவத்த²ங் ஸுத்தந்தரேன ஸாதே⁴துங் ‘‘வுத்தம்பி சேத’’ந்திஆதி³. யதி³ எத்த² பாகதிகோ அத்தா இச்சி²தோ, கத²ங் தஸ்ஸ தீ³பஸரணபா⁴வோ, தஸ்மா அதி⁴ப்பாயிகோ எத்த² அத்தா ப⁴வெய்யாதி புச்ச²தி ‘‘கோ பனெத்த² அத்தா நாமா’’தி. இதரோ யதா²தி⁴ப்பேதங் அத்தானங் த³ஸ்ஸெந்தோ ‘‘லோகியலோகுத்தரோ த⁴ம்மோ’’தி. து³தியவாரோபி பட²மவாரஸ்ஸேவ பரியாயபா⁴வேன தே³ஸிதோதி த³ஸ்ஸேதுங் ‘‘தேனாஹா’’திஆதி³ வுத்தங்.
கோ³சரேதி பி⁴க்கூ²னங் கோ³சரட்டா²னபூ⁴தே. தேனாஹ ‘‘சரிதுங் யுத்தட்டா²னே’’தி. ஸகேதி கத²ங் பனாயங் பி⁴க்கூ²னங் ஸகோதி ஆஹ ‘‘பெத்திகே விஸயே’’தி. பிதிதோ ஸம்மாஸம்பு³த்³த⁴தோ ஆக³தத்தா ‘‘அயங் தும்ஹாகங் கோ³சரோ’’தி தேன உத்³தி³ட்ட²த்தா பெத்திகே விஸயேதி. சரந்தந்தி ஸாமிஅத்தே² உபயோக³வசனந்தி ஆஹ ‘‘அயமேவத்தோ²’’தி, சரந்தானந்தி ச அத்தோ², தேனாயங் விப⁴த்திவிபல்லாஸேனபி வசனவிபல்லாஸேனபீதி த³ஸ்ஸேதி. கிலேஸமாரஸ்ஸ ஓதாராலாபே⁴னேவ இதரமாரானம்பி ஓதாராலாபோ⁴ வேதி³தப்³போ³. அயங் பனத்தோ²தி கோ³சரே சரணங் ஸந்தா⁴யாஹ, வத்து² பன ப்³யதிரேகமுகே²ன ஆக³தங்.
ஸகுணே ஹந்தீதி ஸகுணக்³கி⁴, மஹாஸேனஸகுணோ. அஜ்ஜ²ப்பத்தாதி அபி⁴ப⁴வனவஸேன பத்தா உபக³தா. ந ம்யாயந்தி மே அயங் ஸகுணக்³கி⁴ நாலங் அப⁴விஸ்ஸ. நங்க³லகட்ட²கரணந்தி நங்க³லேன கஸிதப்பதே³ஸோ. லெட்³டு³ட்டா²னந்தி லெட்³டூ³னங் ஸகே ப³லேதி அத்தனோ ப³லஹேது. அபத்த²த்³தா⁴தி அவகா³ள்ஹத்த²ம்பா⁴ ஸஞ்ஜாதத்த²ம்பா⁴. அஸ்ஸரமானாதி அவ்ஹாயந்தீ.
மஹந்தங் லெட்³டு³ந்தி நங்க³லேன பி⁴ன்னட்டா²னே ஸுக்க²தாய திகி²ணஸிங்க³அயோக⁴னஸதி³ஸங் மஹந்தங் லெட்³டு³ங். அபி⁴ருஹித்வாதி தஸ்ஸ அதோ⁴பா⁴கே³ன அத்தனா பவிஸித்வா நிலீனயொக்³க³ப்பதே³ஸங் ஸல்லக்கெ²த்வா தஸ்ஸுபரி சங்கமந்தோ அஸ்ஸரமானோ அட்டா²ஸி. ‘‘ஏஹி கோ²’’திஆதி³ தஸ்ஸ அஸ்ஸரமானாகாரத³ஸ்ஸனங். ஸன்னய்ஹாதி வாதக்³க³ஹணவஸேன உபோ⁴ பக்கே² ஸமங் ட²பெத்வா. பச்சுபாதீ³தி பாவிஸி. தத்தே²வாதி யத்த² புப்³பே³ லாபோ டி²தோ, தத்தே²வ லெட்³டு³ம்ஹி உரந்தி அத்தனோ உரப்பதே³ஸங். பச்சதாளேஸீதி பதி அதாளேஸி ஸாரம்ப⁴வஸேன வேகே³ன க³ந்த்வா பஹரணதோ விதா⁴ரெந்தீ பதாளேஸி. ஆரம்மணந்தி பச்சயங். ‘‘அவஸர’’ந்தி கேசி.
‘‘குஸலான’’ந்தி அனவஜ்ஜலக்க²ணானந்தி அவஜ்ஜபடிபக்க²ஸபா⁴வானங். ‘‘அவஜ்ஜரஹிதஸபா⁴வான’’ந்தி கேசி. தத்த² புரிமே அத்த²விகப்பே விபாகத⁴ம்மத⁴ம்மா ஏவ க³ஹிதா, து³தியே பன விபாகத⁴ம்மாபி. யதி³ ஏவங், கத²ங் தேஸங் ஸமாதா³ய வத்தனந்தி? ந கோ² பனேதங் ஏவங் த³ட்ட²ப்³ப³ங் ‘‘விபாகத⁴ம்மா ஸீலாதி³ விய ஸமாதா³ய வத்திதப்³பா³’’தி. ஸமாதா³னந்தி பன அத்தனோ ஸந்தானே ஸம்மா ஆதா³னங் பச்சயவஸேன பவத்தி யேவாதி த³ட்ட²ப்³ப³ங். விபாகத⁴ம்மா ஹி பச்சயவிஸேஸேஹி ஸத்தஸந்தானே ஸம்மதே³வ ஆஹிதா ஆயுஆதி³ஸம்பத்திவிஸேஸபூ⁴தா புஞ்ஞங் பவட்³ட⁴தீதி எத்த² புஞ்ஞந்தி உத்தரபத³லோபேனாயங் நித்³தே³ஸோதி ஆஹ ‘‘புஞ்ஞப²லங் வட்³ட⁴தீ’’தி. புஞ்ஞப²லந்தி ச ஏகதே³ஸஸரூபேகஸேஸேன வுத்தங் ‘‘புஞ்ஞஞ்ச புஞ்ஞப²லஞ்ச புஞ்ஞப²ல’’ந்தி ஆஹ ‘‘உபரூபரி புஞ்ஞம்பி புஞ்ஞவிபாகோபி வேதி³தப்³போ³’’தி.
‘‘மாதாபிதூன’’ந்திஆதி³ நித³ஸ்ஸனமத்தங், தஸ்மா அஞ்ஞம்பி ஏவரூபங் ஹேதூபனிஸ்ஸயங் குஸலங் த³ட்ட²ப்³ப³ங். ஸினேஹவஸேனாதி உபனிஸ்ஸயபூ⁴தஸ்ஸ ஸினேஹஸ்ஸ வஸேன, ந ஸம்பயுத்தஸ்ஸ. ந ஹி ஸினேஹஸம்பயுத்தங் நாம குஸலங் அத்தி². முது³மத்³த³வசித்தந்தி மெத்தாவஸேன அதிவிய மத்³த³வந்தங் சித்தங். யதா² மத்த²கப்பத்தங் வட்டகா³மிகுஸலங் த³ஸ்ஸேதுங் ‘‘மாதாபிதூனங் …பே॰… முது³மத்³த³வசித்த’’ந்தி வுத்தங், ஏவங் மத்த²கப்பத்தமேவ விவட்டகா³மிகுஸலங் த³ஸ்ஸேதுங் ‘‘சத்தாரோ ஸதி…பே॰… போ³தி⁴பக்கி²யத⁴ம்மா’’தி வுத்தங். தத³ஞ்ஞேபி பன தா³னஸீலாதி³த⁴ம்மா வட்டஸ்ஸ உபனிஸ்ஸயபூ⁴தா வட்டகா³மிகுஸலங் விவட்டஸ்ஸ உபனிஸ்ஸயபூ⁴தா விவட்டகா³மிகுஸலந்தி வேதி³தப்³பா³. பரியோஸானந்தி ப²லவிஸேஸாவஹதாய ப²லதா³ய கோடி ஸிகா²ப்பத்தி, தே³வலோகே ச பவத்திஸிரிவிப⁴வோதி பரியோஸானங் ‘‘மனுஸ்ஸலோகே’’தி விஸேஸிதங், மனுஸ்ஸலோகவஸேனேவ சாயங் விவட்டகா³மிகுஸலஸ்ஸ விபாகங் ஸுத்தபரியோஸானே த³ஸ்ஸிஸ்ஸதி ‘‘அத² கோ², பி⁴க்க²வே, ஸங்கோ² நாம ராஜா’’திஆதி³னா (தீ³॰ நி॰ 3.108).
த³ள்ஹனேமிசக்கவத்திராஜகதா²வண்ணனா
81. இதா⁴தி இமஸ்மிங் ‘‘குஸலானங், பி⁴க்க²வே, த⁴ம்மான’’ந்திஆதி³னா (தீ³॰ நி॰ 3.110) ஸுத்ததே³ஸனாய ஆரத்³த⁴ட்டா²னே வட்டவிவட்டகா³மிபா⁴வேன ஸாதா⁴ரணே குஸலக்³க³ஹணே. தத்த² வட்டகா³மிகுஸலானுஸந்தி⁴வஸேன ‘‘பூ⁴தபுப்³ப³ங் பி⁴க்க²வே’’தி தே³ஸனங் ஆரபி⁴, ஆரப⁴ந்தோ ச தே³ஸியமானமத்தங்
82. ஈஸகம்பீதி அப்பமத்தகம்பி. அவஸக்கிதந்தி ஓக³தப⁴ட்ட²ங். நேமிஅபி⁴முக²ந்தி நேமிப்பதே³ஸஸ்ஸ ஸம்முகா². ப³ந்தி⁴ங்ஸு சக்கரதனஸ்ஸ ஓஸக்கிதானோஸக்கிதபா⁴வங் ஜானிதுங். ததே³தந்தி யதா²வுத்தட்டா²னா சவனங். அதிப³லவதோ³ஸேதி ரஞ்ஞோ ப³லவதி அனத்தே² உபட்டி²தே ஸதி.
அப்பமத்தோதி ரஞ்ஞோ ஆணாய பமாத³ங் அகரொந்தோ.
ஏகஸமுத்³த³பரியந்தமேவாதி ஜம்பு³தீ³பமேவ ஸந்தா⁴ய வத³தி. ஸோ உத்தரதோ அஸ்ஸகண்ணபப்³ப³தேன பரிச்சி²ன்னங் ஹுத்வா அத்தானங் பரிக்கி²பித்வா டி²தஏகஸமுத்³த³பரியந்தோ. புஞ்ஞித்³தி⁴வஸேனாதி சக்கவத்திபா⁴வாவஹாய புஞ்ஞித்³தி⁴யா வஸேன.
83. ஏவங் கத்வாதி காஸாயானி வத்தா²னி அச்சா²தெ³த்வா. ஸுகதங் கம்மந்தி த³ஸகுஸலகம்மபத²மேவ வத³தி.
‘‘த³ஸவித⁴ங், த்³வாத³ஸவித⁴’’ந்தி ச வுத்தவிபா⁴கோ³ பரதோ ஆக³மிஸ்ஸதி. பூரெந்தேனேவாதி பூரெத்வா டி²தேனேவ. நித்³தோ³ஸேதி சக்கவத்திவத்தஸ்ஸ படிபக்க²பூ⁴தானங் தோ³ஸானங் அபக³மனே நித்³தோ³ஸே. சக்கவத்தீனங் வத்தேதி சக்கவத்திராஜூஹி வத்திதப்³ப³வத்தே. பா⁴வினி பூ⁴தே விய ஹி உபசாரோ யதா² ‘‘அக³மா ராஜக³ஹங் பு³த்³தோ⁴’’தி (ஸு॰ நி॰ 410). அதி⁴க³தசக்கவத்திபா⁴வாபி ஹி தே தத்த² வத்தந்தேவாதி ததா² வுத்தங்.
சக்கவத்திஅரியவத்தவண்ணனா
84. அஞ்ஞதா² தத³தி⁴ட்டா²னேன சேதஸா. ஸக்கரொந்தோதி ‘‘யதா²’’திஆதி³. க³ருங் கரொந்தோதி பாஸாணச்ச²த்தங் விய க³ருகரணவஸேன க³ருங் கரொந்தோ. தேனேவாஹ ‘‘தஸ்மிங் கா³ரவுப்பத்தியா’’தி. மானெந்தோதி ஸம்பா⁴வனாவஸேன மனேன பியாயந்தோ. தேனாஹ ‘‘தமேவா’’திஆதி³. ஏவங் பூஜயதோ அபசாயதோ ஏவஞ்ச யதா²வுத்தஸக்காராதி³ஸம்ப⁴வோதி தங் த³ஸ்ஸேதுங் ‘‘தங் அபதி³ஸித்வா’’திஆதி³ ‘‘த⁴ம்மாதி⁴பதிபூ⁴தோ ஆக³தபா⁴வேனா’’தி இமினா யதா²வுத்தத⁴ம்மஸ்ஸ ஜெட்ட²கபா⁴வேன புரிமபுரிமதரஅத்தபா⁴வேஸு ஸக்கச்ச ஸமுபசிதபா⁴வங் த³ஸ்ஸேதி. ‘‘த⁴ம்மவஸேனேவ ஸப்³ப³கிரியானங் கரணேனா’’தி ஏதேன டா²னநிஸஜ்ஜாதீ³ஸு யதா²வுத்தத⁴ம்மனின்னபோணபப்³பா⁴ரபா⁴வங் த³ஸ்ஸேதி. அஸ்ஸாதி ரக்கா²வரணகு³த்தியா. பரங் ரக்க²ந்தோ அஞ்ஞங் தி³ட்ட²த⁴ம்மிகாதி³அனத்த²தோ ரக்க²ந்தோ தேனேவ பரத்த²ஸாத⁴னேன க²ந்திஆதி³கு³ணேன அத்தானங் ததோ ஏவ ரக்க²தி. மெத்தசித்ததாதி மெத்தசித்ததாய. நிவாஸனபாருபனகே³ஹாதீ³னங் ஸீதுண்ஹாதி³படிபா³ஹனேன ஆவரணங். அந்தோ ஜனஸ்மிந்தி அப்³ப⁴ந்தரபூ⁴தே புத்ததா³ராதி³ஜனே.
‘‘ஸீலஸங்வரே பதிட்டா²பேஹீ’’தி இமினா ரக்க²ங் த³ஸ்ஸேதி, ‘‘வத்த²க³ந்த⁴மாலாதீ³னி தே³ஹீ’’தி இமினா ஆவரணங், இதரேன கு³த்திங். ப⁴த்தவேதனஸம்பதா³னேனபீதி பி-ஸத்³தே³ன ஸீலஸங்வரே பதிட்டா²பனாதீ³னி ஸம்பிண்டே³தி. ஏஸேவ நயோ இதோ பரேஸுபி பி-ஸத்³த³க்³க³ஹணேஸு. நிக³மோ நிவாஸோ ஏதேஸந்தி நேக³மா, ஏவங் ஜானபதா³தி ஆஹ ‘‘நிக³மவாஸினோ’’திஆதி³.
நவவிதா⁴ மானமதா³தி ‘‘ஸெய்யோஹமஸ்மீ’’திஆதி³ (ஸங்॰ நி॰ 4.108; த⁴॰ ஸ॰ 1121; விப⁴॰ 866; மஹானி॰ 21, 178) நயப்பவத்தியா ஸூரதோ உ-காரஸ்ஸ தீ³க⁴ங் கத்வா, தஸ்ஸ பா⁴வோ ஸோரச்சங், காயிகவாசஸிகோ அவீதிக்கமோ, ஸப்³ப³ங் வா காயவசீஸுசரிதங். ஸுட்டு² ஓரதோதி ஸோரதோ, தஸ்ஸ பா⁴வோ ஸோரச்சங், யதா²வுத்தமேவ ஸுசரிதங். ராகா³தீ³னந்தி ராக³தோ³ஸமோஹமானாதீ³னங். த³மனாதீ³ஹீதி த³மனஸமனபரினிப்³பா³பனேஹி. ஏகமத்தானந்தி ஏகமத்தானந்தி வா விவேகவஸேன ஏகங் ஏகாகினங் அத்தானங். காலே காலேதி தேஸங் ஸந்திகங் உபஸங்கமிதப்³பே³ காலே காலே.
இத⁴ ட²த்வாதி ‘‘இத³ங் கோ², தாத, த’’ந்தி ஏவங் நிக³மனவஸேன வுத்தட்டா²னே ட²த்வா. வத்தந்தி அரியசக்கவத்திவத்தங். ஸமானேதப்³ப³ந்தி ‘‘த³ஸவித⁴ங், த்³வாத³ஸவித⁴’’ந்தி ச ஹெட்டா² வுத்தக³ணனாய ச ஸமானங் காதப்³ப³ங் அனூனங் அனதி⁴கங் கத்வா த³ஸ்ஸேதப்³ப³ங். அத⁴ம்மராக³ஸ்ஸாதி அயுத்தட்டா²னே ராக³ஸ்ஸ. விஸமலோப⁴ஸ்ஸாதி யுத்தட்டா²னேபி அதிவிய ப³லவபா⁴வேன பவத்தலோப⁴ஸ்ஸ.
சக்கரதனபாதுபா⁴வவண்ணனா
85. வத்தமானஸ்ஸாதி ‘‘பூரெத்வா வத்தமானஸ்ஸா’’தி. கித்தாவதா பனஸ்ஸ பாரிபூரீ ஹோதீதி? தத்த² ‘‘கதாதி⁴காரஸ்ஸ தாவ ஹெட்டி²மபரிச்சே²தே³ன த்³வாத³ஸஹிபி ஸங்வச்ச²ரேஹி பூரதி, பஞ்சவீஸதியா, பஞ்ஞாஸாய வா ஸங்வச்ச²ரேஹி. அயஞ்ச பே⁴தோ³ த⁴ம்மச்ச²ந்த³ஸ்ஸபி திக்க²மஜ்ஜ²முது³தாவஸேன, இதரஸ்ஸ ததோ பி⁴ய்யோபீ’’தி வத³ந்தி.
து³தியாதி³சக்கவத்திகதா²வண்ணனா
90. அத்தனோ மதியாதி பரம்பராக³தங் புராணங் தந்திங் பவேணிங் லங்கி⁴த்வா அத்தனோ இச்சி²தாகாரேன. தேனாஹ ‘‘போராணக’’ந்திஆதி³.
ந பப்³ப³ந்தீதி ஸமித்³தி⁴யா ந பூரெந்தி, பீ²தா ந ஹொந்தீதி அத்தோ². தேனாஹ ‘‘ந வட்³ட⁴ந்தீ’’தி. ததா² சாஹ ‘‘கத்த²சி ஸுஞ்ஞா ஹொந்தீ’’தி. தத்த² தத்த² ராஜகிச்சே ரஞ்ஞா அமா ஸஹ வத்தந்தீதி அமச்சா, யேஹி வினா ராஜகிச்சங் நப்பவத்ததி. பரம்பராக³தா ஹுத்வா ரஞ்ஞோ பரிஸாய ப⁴வாதி பாரிஸஜ்ஜா. தேனாஹ ‘‘பரிஸாவசரா’’தி. தஸ்மிங் டா²னந்தரே ட²பிதா ஹுத்வா ரஞ்ஞோ ஆயங், வயஞ்ச யாதா²வதோ க³ணெந்தீதி க³ணகா. ஜாதிகுலஸுதாசாராதி³வஸேன புது²த்தங் க³தத்தா மஹதீ மத்தா ஏதேஸந்தி மஹாமத்தா, தே பன மஹானுபா⁴வா அமச்சா ஏவாதி ஆஹ ‘‘மஹாஅமச்சா’’தி. யே ரஞ்ஞோ ஹத்தா²னீகாதீ³ஸு அவட்டி²தா, தே அனீகட்டா²தி ஆஹ ‘‘ஹத்தி²ஆசரியாத³யோ’’தி மந்தஸ்ஸாஜீவினோ, மதிஸஜீவாதி அத்தோ², யே தத்த² தத்த² ராஜகிச்சே உபதே³ஸதா³யினோ. தேனாஹ ‘‘மந்தா வுச்சதி பஞ்ஞா’’திஆதி³.
ஆயுவண்ணாதி³பரிஹானிகதா²வண்ணனா
91. ப³லவலோப⁴த்தாதி ‘‘இமஸ்மிங் லோகே இதா³னி த³லித்³த³மனுஸ்ஸா நாம ப³ஹூ, தேஸங் ஸப்³பே³ஸங் த⁴னே அனுப்பதி³யமானே மய்ஹங் கோஸஸ்ஸ பரிக்க²யோ ஹோதீ’’தி ஏவங் உப்பன்னப³லவலோப⁴த்தா. உபரூபரிபூ⁴மீஸூதி ச²காமஸக்³க³ஸங்கா²தாஸு உபரூபரிகாமபூ⁴மீஸு. கம்மஸ்ஸ ப²லங் அக்³க³ங் நாம, தங் பனெத்த² உத்³த⁴கா³மீதி ஆஹ ‘‘உத்³த⁴ங் அக்³க³ங் அஸ்ஸா’’தி. ஸக்³கே³ நியுத்தா, ஸக்³க³ப்பயோஜனாதி வா ஸோவக்³கி³கா. த³ஸன்னங் விஸேஸானந்தி தி³ப்³ப³ஆயுவண்ணயஸஸுக²ஆதி⁴பதெய்யானஞ்சேவ தி³ப்³ப³ரூபாதீ³னஞ்ச ப²லவிஸேஸானங் வண்ணக்³க³ஹணேன செத்த² ஸகோ அத்தபா⁴வவண்ணோ க³ஹிதோ, ரூபக்³க³ஹணேன ப³ஹித்³தா⁴ ரூபாரம்மணங்.
92. ஸுட்டு² நிஸித்³த⁴ந்தி யதா²யங் இமினா அத்தபா⁴வேன அதி³ன்னங் ஆதா³துங் ந ஸக்கோதி, ஏவங் ஸம்மதே³வ ததோ நிஸேதி⁴தங் கத்வா. மூலஹதந்தி ஜீவிதா வோரோபனேன மூலே ஏவ ஹதங்.
96. ராக³வஸேன சரணங் சரித்தங், சரித்தமேவ சாரித்தங், மேது²னந்தி அதி⁴ப்பாயோ, தங் பன ‘‘பரேஸங் தா³ரேஸூ’’தி வுத்தத்தா ‘‘மிச்சா²சார’’ந்தி ஆஹ.
100. பச்சனீகதி³ட்டீ²தி ‘‘அத்தி² தி³ன்ன’’ந்திஆதி³காய (ம॰ நி॰ 1.441; 2.94; விப⁴॰ 793) ஸம்மாதி³ட்டி²யா படிபக்க²பூ⁴தா தி³ட்டி².
101. மாதுச்சா²தி³கா உபரி ஸயமேவ வக்க²தி. அதிப³லவலோபோ⁴தி அதிவிய ப³லவா ப³ஹலகிலேஸோ, யேன அகாலே, அதே³ஸே ச பவத்ததி. மிச்சா²த⁴ம்மோதி மிச்சா² விபரீதோ அவிஸபா⁴க³வத்து²கோ லோப⁴த⁴ம்மோ. தேனாஹ ‘‘புரிஸான’’ந்திஆதி³.
தஸ்ஸ பா⁴வோதி யேன மெத்தாகருணாபுப்³ப³ங்க³மேன சித்தேன புக்³க³லோ ‘‘மத்தெய்யோ’’தி வுச்சதி, ஸோ தஸ்ஸ யதா²வுத்தசித்துப்பாதோ³, தங்ஸமுட்டா²னா ச கிரியா மத்தெய்யதா. தேனாஹ ‘‘மாதரி ஸம்மா படிபத்தியா ஏதங் நாம’’ந்தி ‘‘தஸ்ஸா அபா⁴வோ சேவ தப்படிபக்க²தா ச அமத்தெய்யதா’’தி. குலே ஜெட்டா²னந்தி அத்தனோ குலே வுத்³தா⁴னங் மஹாபிதுசூளபிதுஜெட்ட²கபா⁴திகாதீ³னங்.
த³ஸவஸ்ஸாயுகஸமயவண்ணனா
103. ‘‘ய’’ந்தி இமினா ஸமயோ ஆமட்டோ², பு⁴ம்மத்தே² சேதங் பச்சத்தவசனந்தி ஆஹ ‘‘யஸ்மிங் ஸமயே’’தி. அலங் பதினோதி அலங்பதெய்யா. தஸ்ஸா பரியத்ததா ப⁴ரியாபா⁴வேனாதி ஆஹ ‘‘தா³துங் யுத்தா’’தி. அக்³க³ரஸானீதி மது⁴ரபா⁴வேன, பே⁴ஸஜ்ஜபா⁴வேன ச அக்³க³பூ⁴தரஸானி.
தி³ப்பிஸ்ஸந்தீதி அஹோ புரிஸோதி மாதாதீ³ஸுபி ஈதி³ஸோ, அஞ்ஞேஸங் கேஸங் கிங் விஸ்ஸஜ்ஜெஸ்ஸதி, அஹோ தேஜவபுரிஸோதி.
கே³ஹே மாதுகா³மங் வியாதி அத்தனோ கே³ஹே தா³ஸிப⁴ரியாபூ⁴தமாதுகா³மங் விய. மிஸ்ஸீபா⁴வந்தி மாதாதீ³ஸு ப⁴ரியாய விய சாரித்தஸங்கரங்.
ப³லவகோபோதி ஹந்துகாமதாவஸேன உப்பத்தியா ப³லவகோபோ. ஆகா⁴தேதீதி ஆஹனதி, அத்தனோ கக்க²ளப²ருஸபா⁴வேன சித்தங் விபா³த⁴தீதி அத்தோ². நிஸ்ஸயத³ஹனரஸோ ஹி தோ³ஸோ. ப்³யாபாதே³தீதி வினாஸேதி, மனோபதூ³ஸனதோ மனஸ்ஸ பகோபனதோ. திப்³ப³ந்தி திக்க²ங், ஸா பனஸ்ஸ திக்க²தா ஸரீரே அவஹந்தேபி ஸினேஹவத்து²ங் லங்கி⁴த்வாபி பவத்தியா வேதி³தப்³பா³தி ஆஹ ‘‘பியமானஸ்ஸபீ’’திஆதி³.
104. கப்பவினாஸோ கப்போ உத்தரபத³லோபேன, அந்தராவ கப்போ அந்தரகப்போ. தண்ஹாதி³பே⁴தோ³ கப்போ ஏதஸ்ஸ அத்தீ²தி கப்போ, ஸத்தலோகோதி ஆஹ ‘‘அந்தராவ லோகவினாஸோ’’தி. ஸ்வாயங் அந்தரகப்போ கதிவிதோ⁴, கத²ஞ்சஸ்ஸ ஸம்ப⁴வோ, கிங் க³திகோதி அந்தோக³த⁴ங் சோத³னங் ஸந்தா⁴யாஹ ‘‘அந்தரகப்போ ச நாமா’’திஆதி³. லோபு⁴ஸ்ஸதா³யாதி லோபா⁴தி⁴காய பஜாய வத்தமானாய.
ஏவங் சிந்தயிங்ஸூதி புப்³பே³ யதா²னுஸ்ஸவானுஸ்ஸரணேன, அத்தனோ ச ஆயுவிஸேஸஸ்ஸ லப⁴னதோ. கு³ம்ப³லதாதீ³ஹி க³ஹனங் டா²னந்தி கு³ம்ப³லதாதீ³ஹி ஸஞ்ச²ன்னதாய க³ஹனபூ⁴தங் டா²னங். ருக்கே²ஹி க³ஹனந்தி ருக்கே²ஹி நிரந்தரனிசிதேஹி க³ஹனபூ⁴தங் நதீ³விது³க்³க³ந்தி சி²ன்னதடாஹி நதீ³ஹி ஓரதோ, பாரதோ ச விது³க்³க³ங். தேனாஹ ‘‘நதீ³ன’’ந்திஆதி³. பப்³ப³தேஹி விஸமங் பப்³ப³தந்தரங். பப்³ப³தேஸு வா சி²ன்னதடேஸு து³ராரோஹங் விஸமட்டா²னங். ஸபா⁴கே³தி ஜீவனவஸேன ஸமானபா⁴கே³ ஸதி³ஸே கரிஸ்ஸந்தி.
ஆயுவண்ணாதி³வட்³ட⁴னகதா²வண்ணனா
105. ஆயதந்தி வா தீ³க⁴ங் சிரகாலிகங். மரணவஸேன ஹி ஞாதிக்க²யோ ஆயதோ அபுனராவத்தனதோ, ந ராஜப⁴யாதி³னா உக்கமனவஸேன புனராவத்தியாபி தஸ்ஸ லப்³ப⁴னதோ. ஓஸக்கெய்யாமாதி ஓரமெய்யாம. விரமணம்பி அத்த²தோ பஜஹனமேவ பரிச்சஜனபா⁴வதோதி ஆஹ ‘‘பஜஹெய்யாமாதி அத்தோ²’’தி. ஸீலக³ப்³பே⁴ வட்³டி⁴தத்தாதி மாது, பிது ச ஸீலவந்ததாய தத³வயவபூ⁴தே க³ப்³பே⁴ வட்³டி⁴ ‘‘ஸீலக³ப்³பே⁴ வட்³டி⁴தா’’தி வுத்தா, ஏதேன உதுஆஹாரஸ்ஸ விய தத³ஞ்ஞஸ்ஸாபி பா³ஹிரஸ்ஸ பச்சயஸ்ஸ வஸேன ஸத்தஸந்தானஸ்ஸ விஸேஸாதா⁴னங் ஹோதீதி த³ஸ்ஸேதி. யங் பனெத்த² வத்தப்³ப³ங், தங் ப்³ரஹ்மஜாலடீகாயங் கெ²த்தவிஸுத்³தி⁴யாதி அதி⁴ட்டா²னபூ⁴தவத்து²விஸுத்³தி⁴யா. நனு ச தங் விஸேஸாதா⁴னங் ஜாயமானங் ரூபஸந்ததியா ஏவ ப⁴வெய்யாதி? ஸச்சமேதங், ரூபஸந்ததியா பன ததா² ஆஹிதவிஸேஸாய அரூபஸந்ததிபி லத்³தூ⁴பகாரா ஏவ ஹோதி தப்படிப³த்³த⁴வுத்திபா⁴வதோ. யதா² கப³ளீகாராஹாரேன உபத்த²ம்பி⁴தே ரூபகாயே ஸப்³போ³பி அத்தபா⁴வோ அனுக்³க³ஹிதோ ஏவ நாம ஹோதி, யதா² பன ரஞ்ஞோ சக்கவத்தினோ புஞ்ஞவிஸேஸங் உபனிஸ்ஸாய தஸ்ஸ இத்தி²ரதனாதீ³னங் அனஞ்ஞஸாதா⁴ரணா தே தே விஸேஸா ஸம்ப⁴வந்தி தப்³பா⁴வே பா⁴வதோ, தத³பா⁴வே ச அபா⁴வதோ, ஏவமேவ எத்தா²தி இமஸ்மிங் மனுஸ்ஸலோகே, தத்தா²தி யதா²வுத்தங் குஸலத⁴ம்மங் ஸமாதா³ய வத்தமானே ஸத்தனிகாயே. தத்தே²வாதி தஸ்மிங்யேவ ஸத்தனிகாயே. ‘‘அத்தனோவ ஸீலஸம்பத்தியா’’தி வுத்தங் ஸஸந்ததிபரியாபன்னஸ்ஸ த⁴ம்மஸ்ஸ தத்த² விஸேஸப்பச்சயபா⁴வதோ. கெ²த்தவிஸுத்³தி⁴பி பன இதா⁴பி படிக்கி²பிதுங் ந ஸக்கா.
கொட்டா²ஸாதி அதி³ன்னாதா³னாதீ³ஹீதி ஆதி³-ஸத்³தே³ன குலே ஜெட்டா²பசாயிகாபரியோஸானானங் த³ஸன்னங் பாபகொட்டா²ஸானங் க³ஹணங்.
ஸங்க²ராஜஉப்பத்திவண்ணனா
106. ஏவங் உப்பஜ்ஜனகதண்ஹாதி ஏவங் வசீபே⁴த³ங் பாபனவஸேன பவத்தா பு⁴ஞ்ஜிதுகாமதா. அனஸனந்தி காயிககிரியாஅஸமத்த²தாஹேதுபூ⁴தோ ஸரீரஸங்கோசோ. தேனாஹ ‘‘அவிப்பா²ரிகபா⁴வோ’’திஆதி³. க⁴னநிவாஸதந்தி கா³மனிக³மராஜதா⁴னீனங் க⁴னநிவிட்ட²தங் அஞ்ஞமஞ்ஞஸ்ஸ நாதிதூ³ரவத்திதங். நிரந்தரபூரிதோதி நிரந்தரங் விய புண்ணோ தத்ருபகா³னங் ஸத்தானங் ப³ஹுபா⁴வதோ.
மெத்தெய்யபு³த்³து⁴ப்பாத³வண்ணனா
107. கிஞ்சாபி புப்³பே³ வட்³ட⁴மானகவஸேன தே³ஸனா ஆக³தங், இத³ங் பன ந வட்³ட⁴மானகவஸேன வுத்தங். கஸ்மாதி சே ஆஹ ‘‘ந ஹீ’’திஆதி³. ஸத்தானங் வட்³ட⁴மானாயுககாலே பு³த்³தா⁴ ந நிப்³ப³த்தந்தி ஸங்ஸாரே ஸங்வேக³ஸ்ஸ து³ப்³பி³பா⁴வனீயத்தா
108. ஸமுஸ்ஸிதட்டே²ன யூபோ, யூபந்தி எத்த² ஸத்தா அனேகபூ⁴மிகூடாகா³ரோவரகாதி³வந்ததாயாதி யூபோ, பாஸாதோ³. ரஞ்ஞோ ஹேதுபூ⁴தேனாதி ஹேதுஅத்தே² கரணவசனந்தித³ஸ்ஸேதிஉஸ்ஸாஹஸம்பத்திஆதி³னா. மஹதா ராஜானுபா⁴வேன, மஹதா ச கித்திஸத்³தே³ன ஸமன்னாக³தத்தா சதூஹி ஸங்க³ஹவத்தூ²ஹி மஹாஜனஸ்ஸ ரஞ்ஜனதோ மஹாபனாதோ³ நாம ராஜா ஜாதோ. ஜாதகேதி மஹாபனாத³ஜாதகே (ஜா॰ 1.3.40 மஹாபனாத³ஜாதகே).
பனாதோ³ நாம ஸோ ராஜாதி ‘‘அதீதே பனாதோ³ நாம ஸோ ராஜா அஸ்ஸோஸீ’’தி அத்தபா⁴வந்தரதாய அத்தானங் பரங் விய நித்³தி³ஸதி. ஆயஸ்மா ஹி ப⁴த்³த³ஜித்தே²ரோ அத்தனா அஜ்ஜா²வுத்த²புப்³ப³ங் ஸுவண்ணபாஸாத³ங் த³ஸ்ஸெத்வா ஏவமாஹ. யஸ்ஸ யூபோ ஸுவண்ணயோதி யஸ்ஸ ரஞ்ஞோ அயங் யூபோ பாஸாதோ³ ஸுவண்ணயோ ஸுவண்ணமயோ. திரியங் ஸோளஸுப்³பே³தோ⁴தி வித்தா²ரதோ ஸோளஸஸரபாதப்பமாணோ, ஸோ பன அட்³ட⁴யோஜனப்பமாணோ ஹோதி. உப்³ப⁴மாஹு ஸஹஸ்ஸதா⁴தி உப்³ப⁴ங் உச்சபா⁴வங் அஸ்ஸ பாஸாத³ஸ்ஸ ஸஹஸ்ஸதா⁴ ஸஹஸ்ஸகண்ட³ப்பமாணங் ஆஹு, ஸோ பன யோஜனதோ பஞ்சவீஸதியோஜனப்பமாணோ ஹோதி. கேசி பனெத்த² கா³தா²ஸுக²த்த²ங் ‘‘ஆஹூ’’தி தீ³க⁴ங் கதங், அஹு அஹோஸீதி அத்த²ங் வத³ந்தி.
ஸஹஸ்ஸகண்டோ³தி ஸஹஸ்ஸபூ⁴மிகோ, ‘‘ஸஹஸ்ஸக²ண்டோ³’’ திபி பாடோ², ஸோ ஏவ அத்தோ². ஸதகெ³ண்டூ³தி அனேகஸதனியூஹகோ. த⁴ஜாலூதி தத்த² தத்த² நியூஹஸிக²ராதீ³ஸு பதிட்ட²பிதேஹி ஸத்தித⁴ஜவீரங்க³த⁴ஜாதீ³ஹி த⁴ஜேஹி ஸம்பன்னோ. ஹரிதாமயோதி சாமீகரஸுவண்ணமயோ. கேசி பன ஹரிதாமயோதி ‘‘ஹரிதமணிபரிக்க²டோ’’தி வத³ந்தி. க³ந்த⁴ப்³பா³தி நடா. ச²ஸஹஸ்ஸானி ஸத்ததா⁴தி ச²மத்தானி க³ந்த⁴ப்³ப³ஸஹஸ்ஸானி ஸத்ததா⁴ தஸ்ஸ பாஸாத³ஸ்ஸ ஸத்தஸு டா²னேஸு ரஞ்ஞோ அபி⁴ரமாபனத்த²ங் நச்சிங்ஸூதி அத்தோ². தே
கோடிகா³மோ நாம மாபிதோ. வத்தூ²தி ப⁴த்³த³ஜித்தே²ரஸ்ஸ வத்து². தங் தே²ரகா³தா²வண்ணனாயங் (தே²ரகா³॰ அட்ட²॰ ப⁴த்³த³ஜித்தே²ரகா³தா²வண்ணனாய) வித்தா²ரதோ ஆக³தமேவ. இதரஸ்ஸாதி நளகாரதே³வபுத்தஸ்ஸ. ஆனுபா⁴வாதி புஞ்ஞானுபா⁴வனிமித்தங்.
தா³னவஸேன த³த்வாதி தங் பாஸாத³ங் அத்தனோ பரிக்³க³ஹபா⁴வவியோஜனேன தா³னமுகே² நியோஜெத்வா. விஸ்ஸஜ்ஜெத்வாதி சித்தேனேவ பரிச்சஜனவஸேன த³த்வா புன த³க்கி²ணெய்யானங் ஸந்தகபா⁴வகரணேன நிரபெக்க²பரிச்சாக³வஸேன விஸ்ஸஜ்ஜெத்வா. எத்தகேனாதி ‘‘பூ⁴தபுப்³ப³ங் பி⁴க்க²வே’’தி ஆதி³ங் கத்வா யாவ ‘‘பப்³ப³ஜிஸ்ஸதீ’’தி பத³ங் எத்தகேன தே³ஸனாமக்³கே³ன.
பி⁴க்கு²னோ ஆயுவண்ணாதி³வட்³ட⁴னகதா²வண்ணனா
110. இத³ங் பி⁴க்கு²னோ ஆயுஸ்மிந்தி ஆயுஸ்மிங் ஸாதே⁴தப்³பே³ இத³ங் பி⁴க்கு²னோ இச்சி²தப்³ப³ங் சிரஜீவிதாய ஹேதுபா⁴வதோதி. தேனாஹ ‘‘இத³ங் ஆயுகாரண’’ந்தி.
ஸம்பன்னஸீலஸ்ஸ அவிப்படிஸாரபாமோஜ்ஜபீதிபஸ்ஸத்³தி⁴ஸுக²ஸமாதி⁴யதா²பூ⁴தஞாணாதி³ஸம்ப⁴வதோ தங்ஸமுட்டா²னபணீதரூபேஹி காயஸ்ஸ பு²டத்தா ஸரீரே வண்ணதா⁴து ‘‘ஸீலவதோ ஹீ’’திஆதி³.
விவேகஜங் பீதிஸுகா²தீ³தி ஆதி³-ஸத்³தே³ன ஸமாதி⁴ஜங் பீதிஸுக²ங், அபீதிஜங் காயஸுக²ங், ஸதிபாரிஸுத்³தி⁴ஜங் உபெக்கா²ஸுக²ஞ்ச ஸங்க³ண்ஹாதி.
அப்படிக்கூலதாவஹோதி அப்பமாணானங் ஸத்தானங், அத்தனோ ச தேஸு அப்படிக்கூலபா⁴வதோ. ஹிதூபஸங்ஹாராதி³வஸேன பவத்தியா ஸப்³ப³தி³ஸாஸு ப²ரணஅப்பமாணவஸேன ஸப்³ப³தி³ஸாஸு விப்பா²ரிகதா.
‘‘அரஹத்தப²லஸங்கா²தங் ப³ல’’ந்தி வுத்தங் தஸ்ஸ அகுப்பத⁴ம்மதாய கேனசி அனபி⁴ப⁴வனீயபா⁴வதோ.
‘‘லோகே’’தி இத³ங் யதா² ‘‘ஏகப³லம்பீ’’தி இமினா ஸம்ப³ந்தீ⁴யதி, ஏவங் எத்தே²வாதி ஏதஸ்மிங் அரஹத்தப²லே ஏவ, தத³த்த²ந்தி அத்தோ².
லோகுத்தரபுஞ்ஞம்பீதி லோகுத்தரபுஞ்ஞம்பி புஞ்ஞப²லம்பி. யாவ ஆஸவக்க²யா பவட்³ட⁴தி விவட்டகா³மிகுஸலத⁴ம்மானங் ஸமாதா³னஹேதூதி யோஜனா. அமதபானங் பிவிங்ஸு ஹெட்டி²மமக்³க³ப²லஸமதி⁴க³மவஸேனாதி அதி⁴ப்பாயோ.
சக்கவத்திஸுத்தவண்ணனாய லீனத்த²ப்பகாஸனா.