4. ஸோணத³ண்ட³ஸுத்தவண்ணனா
300. ஏவங் ‘‘ஏவங் மே ஸுதங்…பே॰… அங்கே³ஸூதி ஸோணத³ண்ட³ஸுத்த’’ந்தி ஆஹ. ஸுந்த³ரபா⁴வேன ஸாதிஸயானி அங்கா³னி ஏதேஸமத்தீ²தி அங்கா³. தத்³தி⁴தபச்சயஸ்ஸ அதிஸயவிஸிட்டே² அத்தி²தாஅத்தே² பவத்திதோ, பதா⁴னதோ ராஜகுமாரா, ருள்ஹிவஸேன பன ஜனபதோ³தி வுத்தங் ‘‘அங்கா³ நாமா’’திஆதி³. இதா⁴பி அதி⁴ப்பேதா, ந அம்ப³ட்ட²ஸுத்தே ஏவ. ‘‘ததா³ கிரா’’திஆதி³ தஸ்ஸா சாரிகாய காரணவசனங். ஆக³மனே ஆதீ³னவங் த³ஸ்ஸெத்வா படிக்கி²பனவஸேன ஆக³ந்துங் ந த³ஸ்ஸந்தி, நானுஜானிஸ்ஸந்தீதி அதி⁴ப்பாயோ.
நீலாஸோககணிகாரகோவிளாரகுந்த³ராஜருக்கா²தி³ஸம்மிஸ்ஸதாய தங் சம்பகவனங் நீலாதி³பஞ்சவண்ணகுஸுமபடிமண்டி³தங், ந சம்பகருக்கா²னஞ்ஞேவ நீலாதி³பஞ்சவண்ணகுஸுமதாயாதி வத³ந்தி, ததா²ரூபாய பன தா⁴துயா சம்பகருக்கா²வ நீலாதி³பஞ்சவண்ணம்பி குஸுமங் புப்ப²ந்தி. இதா³னிபி ஹி கத்த²சி தே³ஸே தி³ஸ்ஸந்தி, ஏவஞ்ச யதா²ருதம்பி அட்ட²கதா²வசனங் உபபன்னங் ஹோதி. குஸுமக³ந்த⁴ஸுக³ந்தே⁴தி வுத்தனயேன ஸம்மிஸ்ஸகானங், ஸுத்³த⁴சம்பகானங் வா குஸுமானங் க³ந்தே⁴ஹி ஸுக³ந்தே⁴. ஏவங் பன வத³ந்தோ ந மாபனகாலேயேவ தஸ்மிங் நக³ரே சம்பகருக்கா² உஸ்ஸன்னா, அத² கோ² அபரபா⁴கே³பீதி த³ஸ்ஸேதி. மாபனகாலே ஹி சம்பகருக்கா²னமுஸ்ஸன்னதாய தங் நக³ரங் ‘‘சம்பா’’தி நாமங் லபி⁴. இஸ்ஸரத்தாதி அதி⁴பதிபா⁴வதோ. ஸேனா ஏதஸ்ஸ அத்தீ²தி ஸேனிகோ, ஸ்வேவ ஸேனியோ. ப³ஹுபா⁴வவிஸிட்டா² செத்த² அத்தி²தா தத்³தி⁴தபச்சயேன ஜோதிதாதி வுத்தங் ‘‘மஹதியா ஸேனாய ஸமன்னாக³தத்தா’’தி. ஸாரஸுவண்ணஸதி³ஸதாயாதி உத்தமஜாதிஸுவண்ணஸதி³ஸதாய. சூளது³க்க²க்க²ந்த⁴ஸுத்தட்ட²கதா²யங் பன ஏவங் வுத்தங் ‘‘ஸேனியோ’’தி தஸ்ஸ நாமங், பி³ம்பீ³தி அத்தபா⁴வஸ்ஸ நாமங் வுச்சதி, ஸோ தஸ்ஸ ஸாரபூ⁴தோ த³ஸ்ஸனீயோ பாஸாதி³கோ அத்தபா⁴வஸமித்³தி⁴யா பி³ம்பி³ஸாரோதி வுச்சதீ’’தி (ம॰ நி॰ அட்ட²॰ 1.180).
301-2. ஸங்ஹதாதி ஏகேகிஸ்ஸாய தி³ஸாயாதி ஏகேகாய பதே³ஸபூ⁴தாய தி³ஸாய. பாளியங் ப்³ராஹ்மணக³ஹபதிகானமதி⁴ப்பேதத்தா ‘‘ஸங்கி⁴னோ’’தி வத்தப்³பே³ ‘‘ஏதேஸ’’ந்தி இமினா. ஏவங் ஆசரியேன (தீ³॰ நி॰ டீ॰ 1.301, 302) வுத்தங், ஸங்கீ⁴தி பன தீ³க⁴வஸேன ப³ஹுவசனம்பி தி³ஸ்ஸதி. அக³ணாதி அஸமூஹபூ⁴தா அக³ணப³ந்தா⁴, ‘‘அக³ணனா’’திபி பாடோ², அயமேவத்தோ², ஸங்க்²யாத்த²ஸ்ஸ அயுத்தத்தா. ந ஹி தேஸங் ஸங்க்²யா அத்தீ²தி. இத³ங் வுத்தங் ஹோதி – புப்³பே³ அந்தோனக³ரே அக³ணாபி பச்சா² ப³ஹினக³ரே க³ணங் பூ⁴தா பத்தாதி க³ணீபூ⁴தாதி. அபூ⁴ததப்³பா⁴வே ஹி கராஸபூ⁴யோகே³ அ-காரஸ்ஸ ஈ-காராதே³ஸோ, ஈபச்சயோ வா. ராஜராஜஞ்ஞாதீ³னங் த³ண்ட³த⁴ரோ புரிஸோவ ததோ ததோ க²த்தியானங் தாயனதோ ரக்க²ணதோ க²த்தா நிருத்தினயேன. ஸோ ஹி யத்த² தேஹி பேஸிதோ, தத்த² தேஸங் தோ³ஸங் பரிஹரந்தோ யுத்தபத்தவஸேன புச்சி²தமத்த²ங் கதே²தி. தேனாஹ ‘‘புச்சி²தபஞ்ஹே ப்³யாகரணஸமத்தோ²’’தி. குலாபதே³ஸாதி³னா மஹதீ மத்தா பமாணமேதஸ்ஸாதி மஹாமத்தோ.
ஸோணத³ண்ட³கு³ணகதா²வண்ணனா
303. ஏகஸ்ஸ ரஞ்ஞோ ஆணாபவத்திட்டா²னானி ரஜ்ஜானி நாம, விஸிட்டா²னி ரஜ்ஜானி விரஜ்ஜானி, தானேவ வேரஜ்ஜானி, நானாவிதா⁴னி வேரஜ்ஜானி ததா², தேஸு ஜாதாதிஆதி³னா திதா⁴ தத்³தி⁴தனிப்³ப³சனங். விசித்ரா ஹி தத்³தி⁴தவுத்தீதி. யஞ்ஞானுப⁴வனத்த²ந்தி யஸ்ஸ கஸ்ஸசி யஞ்ஞஸ்ஸ அனுப⁴வனத்த²ங். தேதி நானாவேரஜ்ஜகா ப்³ராஹ்மணா. தஸ்ஸாதி ஸோணத³ண்ட³ப்³ராஹ்மணஸ்ஸ. உத்தமப்³ராஹ்மணோதி அபி⁴ஜனஸம்பத்தியா, வித்தஸம்பத்தியா, விஜ்ஜாஸம்பத்தியா ச உக்³க³ததரோ, உளாரோ வா ப்³ராஹ்மணோ. ஆவட்டனீமாயா வுத்தாவ. லாப⁴மச்சே²ரேன நிப்பீளிததாய அஸன்னிபாதோ ப⁴விஸ்ஸதி.
அங்கே³தி க³மேதி அத்தனோ ப²லங் ஞாபேதி, ஸயங் வா அங்கீ³யதி க³மீயதி ஞாயதீதி அங்க³ங், ஹேது. தேனாஹ ‘‘காரணேனா’’தி. லோகத⁴ம்மதானுஸ்ஸரணேன அபரானிபி காரணானி ஆஹங்ஸூதி த³ஸ்ஸெந்தோ ‘‘ஏவ’’ந்திஆதி³மாஹ.
த்³வீஹி பக்கே²ஹீதி மாதுபக்கே²ன, பிதுபக்கே²ன சாதி த்³வீஹி ஞாதிபக்கே²ஹி. ‘‘உப⁴தோ ஸுஜாதோ’’தி ஹி எத்த²கேயேவ வுத்தே யேஹி கேஹிசி த்³வீஹி பா⁴கே³ஹி ஸுஜாதத்தங் விஜானெய்ய, ஸுஜாதஸத்³தோ³ ச ‘‘ஸுஜாதோ சாருத³ஸ்ஸனோ’’திஆதீ³ஸு (ம॰ நி॰ 2.399) ஆரோஹஸம்பத்திபரியாயோபி ஹோதீதி ஜாதிவஸேனேவ ‘‘மாதிதோ ச பிதிதோ சா’’தி வுத்தங். தேனாஹ ‘‘போ⁴தோ மாதா ப்³ராஹ்மணீ’’திஆதி³. ஏவந்தி வுத்தப்பகாரேன, மாதுபக்க²தோ ச ‘‘ஸங்ஸுத்³தா⁴ தே மாதுக³ஹணீ’’தி, ஸங்ஸுத்³தா⁴வ அனஞ்ஞபுரிஸஸாதா⁴ரணாதி அத்தோ². அனோரஸபுத்தவஸேனாபி ஹி லோகே மாதாபிதுஸமஞ்ஞா தி³ஸ்ஸதி, இத⁴ பனஸ்ஸ ஓரஸபுத்தவஸேனேவ இச்சி²தாதி த³ஸ்ஸேதுங் ‘‘ஸங்ஸுத்³த⁴க³ஹணிகோ’’தி வுத்தங். க³ப்³ப⁴ங் க³ண்ஹாதி தா⁴ரேதீதி க³ஹணீ, ததியாவட்டஸங்கா²தோ க³ப்³பா⁴ஸயஸஞ்ஞிதோ மாதுகுச்சி²பதே³ஸோ ஸமவேபாகினியாதி ஸமவிபாசனியா. எத்தா²தி மஹாஸுத³ஸ்ஸனஸுத்தே. யதா²பு⁴த்தமாஹாரங் விபாசனவஸேன க³ண்ஹாதி ந ச²ட்³டே³தீதி க³ஹணீ, கம்மஜதேஜோதா⁴து, யா ‘‘உத³ரக்³கீ³’’தி லோகே பஞ்ஞாயதி.
பிதுபிதாதி பிதுனோ பிதா. பிதாமஹோதி ஆமஹ-பச்சயேன தத்³தி⁴தஸித்³தி⁴. ‘‘சதுயுக³’’ந்திஆதீ³ஸு விய தங் தத³த்தே² யுஜ்ஜிதப்³ப³தோ காலவிஸேஸோ யுக³ங் நாம. ஏதங் யுக³ஸத்³தே³ன ஆயுப்பமாணவசனங் அபி⁴லாபமத்தங் லோகவோஹாரவசனமத்தமேவ, அதி⁴ப்பேதத்த²தோ பன பிதாமஹோயேவ பிதாமஹயுக³ஸத்³தே³ன வுத்தோ தஸ்ஸேவ பதா⁴னபா⁴வேன அதி⁴ப்பேதத்தாதி அதி⁴ப்பாயோ. ததோ உத்³த⁴ந்தி பிதாமஹதோ உபரி. தேனாஹ ‘‘புப்³ப³புரிஸா’’தி, தத³வஸேஸா புப்³ப³கா ச² புரிஸாதி அத்தோ². புரிஸக்³க³ஹணஞ்செத்த² உக்கட்ட²னித்³தே³ஸேன கதந்தி த³ட்ட²ப்³ப³ங். ஏவஞ்ஹி ‘‘மாதிதோ’’தி பாளிவசனங் ஸமத்தி²தங் ஹோதி.
தத்ராயமட்ட²கதா²முத்தகனயோ – மாதா ச பிதா ச பிதரோ, பிதூனங் பிதரோ பிதாமஹா, தேஸங் யுகோ³ த்³வந்தோ³ பிதாமஹயுகோ³, தஸ்மா, யாவ ஸத்தமா பிதாமஹயுகா³ பிதாமஹத்³வந்தா³தி அத்தோ² வேதி³தப்³போ³, ஏவஞ்ச பிதாமஹக்³க³ஹணேனேவ மாதாமஹோபி க³ஹிதோ. யுக³ஸத்³தோ³ செத்த² ஏகஸேஸோ ‘‘யுகோ³ ச யுகோ³ ச யுகோ³’’தி, அதோ தத்த² தத்த² ஞாதிபரிவட்டே பிதாமஹத்³வந்த³ங் க³ஹிதங் ஹோதீதி.
‘‘யாவ ஸத்தமா பிதாமஹயுகா³’’தி இத³ங் காகாபெக்க²னமிவ உப⁴யத்த² ஸம்ப³ந்த⁴க³தந்தி ஆஹ ‘‘ஏவ’’ந்திஆதி³. யாவ ஸத்தமோ புரிஸோ, தாவ அக்கி²த்தோ அக்கி²த்தோதி அப்பத்தகே²போ. அனவக்கி²த்தோதி ஸத்³த⁴தா²லிபாகாதீ³ஸு ந ச²ட்³டி³தோ. ந உபகுட்டோ²தி ந உபக்கோஸிதோ. ‘‘ஜாதிவாதே³னா’’தி இத³ங் ஹேதும்ஹி கரணவசனந்தி த³ஸ்ஸேதுங் ‘‘கேன காரணேனா’’திஆதி³ வுத்தங். இதிபீதி இமினாபி காரணேன. எத்த² ச ‘‘உப⁴தோ…பே॰… யுகா³’’தி ஏதேன ப்³ராஹ்மணஸ்ஸ யோனிதோ³ஸாபா⁴வோ த³ஸ்ஸிதோ ஸங்ஸுத்³த⁴க³ஹணிகபா⁴வகித்தனதோ, ‘‘அக்கி²த்தோ’’தி ஏதேன கிரியாபராதா⁴பா⁴வோ. கிரியாபராதே⁴ன ஹி ஸத்தா கே²பங் பாபுணந்தி. ‘‘அனுபகுட்டோ²’’தி ஏதேன அயுத்தஸங்ஸக்³கா³பா⁴வோ. அயுத்தஸங்ஸக்³க³ஞ்ஹி படிச்ச ஸத்தா அக்கோஸங் லப⁴ந்தீதி.
இஸ்ஸரோதி ‘‘அட்³டோ⁴தி இஸ்ஸரோ’’தி ஆஹ. மஹந்தங் த⁴னமஸ்ஸ பூ⁴மிக³தங், வேஹாஸக³தஞ்சாதி மஹத்³த⁴னோ. தஸ்ஸாதி தஸ்ஸ தஸ்ஸ கு³ணஸ்ஸ, அயமேவ ச பாடோ² அது⁴னா தி³ஸ்ஸதி. அகு³ணங்யேவ த³ஸ்ஸேமாதி அன்வயதோ தஸ்ஸ கு³ணங் வத்வா ப்³யதிரேகதோ ப⁴க³வதோ அனுபஸங்கமனகாரணங் அகு³ணமேவ த³ஸ்ஸேம.
அதி⁴கரூபோதி விஸிட்ட²ரூபோ உத்தமஸரீரோ. த³ஸ்ஸனங் அரஹதீதி த³ஸ்ஸனீயோதி ஆஹ ‘‘த³ஸ்ஸனயொக்³கோ³’’தி. பஸாத³ங் ஆவஹதீதி பாஸாதி³கோ. தேனாஹ ‘‘பஸாத³ஜனநதோ’’தி. பொக்க²ரஸத்³தோ³ இத⁴ ஸுந்த³ரத்தே², ஸரீரத்தே² ச நிருள்ஹோ. வண்ணஸ்ஸாதி வண்ணதா⁴துயா. பகாஸனியேன பரிஸுத்³த⁴னிமித்தேன வண்ணஸத்³த³ஸ்ஸ வண்ணதா⁴துயங் பவத்தனதோ தன்னிமித்தமேவ வண்ணதா, ஸா ச வண்ணனிஸ்ஸிதாதி அபே⁴த³வஸேன வுத்தங் ‘‘உத்தமேன பரிஸுத்³தே⁴ன வண்ணேனா’’தி. ஸரீரங் பன ஸன்னிவேஸவிஸிட்ட²ங் கரசரணகீ³வாஸீஸாதி³ஸமுதா³யங், தஞ்ச அவயவபூ⁴தேன ஸண்டா²னநிமித்தேன க³ய்ஹதி, தஸ்மா தன்னிமித்தமேவ பொக்க²ரதாதி வுத்தங் ‘‘ஸரீரஸண்டா²னஸம்பத்தியா’’தி, உத்தமாய ஸரீரஸண்டா²னஸம்பத்தியாதிபி யோஜேதப்³ப³ங். அத்த²வஸா ஹி லிங்க³விப⁴த்திவிபரிணாமோ. ஸப்³பே³ஸு வண்ணேஸு ஸுவண்ணவண்ணோவ உத்தமோதி ஆஹ ‘‘பரிஸுத்³த⁴வண்ணேஸுபி ஸெட்டே²ன ஸுவண்ணவண்ணேன ஸமன்னாக³தோ’’தி. ததா² ஹி பு³த்³தா⁴, சக்கவத்தினோ ச ஸுவண்ணவண்ணாவ ஹொந்தி. யஸ்மா பன வச்ச²ஸஸத்³தோ³ ஸரீராபே⁴ பவத்ததி, தஸ்மா ப்³ரஹ்மவச்ச²ஸீதி உத்தமஸரீராபோ⁴, ஸுவண்ணாபோ⁴ இச்சேவ அத்தோ². இமமேவ ஹி அத்த²ங் ஸந்தா⁴ய ‘‘மஹாப்³ரஹ்முனோ ஸரீரஸதி³ஸேனேவ ஸரீரேன ஸமன்னாக³தோ’’தி ஓகாஸோதி ஸப்³ப³ங்க³பச்சங்க³ட்டா²னங். ஆரோஹபரிணாஹஸம்பத்தியா, அவயவபாரிபூரியா ச த³ஸ்ஸனஸ்ஸ ஓகாஸோ ந கு²த்³த³கோதி அத்தோ². தேனாஹ ‘‘ஸப்³பா³னேவா’’திஆதி³.
ஸீலந்தி யமனியமலக்க²ணங் ஸீலங், தங் பனஸ்ஸ ரத்தஞ்ஞுதாய வுத்³த⁴ங் வத்³தி⁴தந்தி விஸேஸதோ ‘‘வுத்³த⁴ஸீலீ’’தி வுத்தங். வுத்³த⁴ஸீலேனாதி ஸப்³ப³தா³ ஸம்மாயோக³தோ வுத்³தே⁴ன து⁴வஸீலேன. ஏவஞ்ச கத்வா பத³த்தயம்பேதங் அதி⁴ப்பேதத்த²தோ விஸிட்ட²ங் ஹோதி, ஸத்³த³த்த²மத்தங் பன ஸந்தா⁴ய ‘‘இத³ங் வுத்³த⁴ஸீலீபத³ஸ்ஸேவ வேவசன’’ந்தி வுத்தங். பஞ்சஸீலதோ பரங் தத்த² ஸீலஸ்ஸ அபா⁴வதோ, தேஸமஜானநதோ ச ‘‘பஞ்சஸீலமத்தமேவா’’தி ஆஹ.
வாசாய பரிமண்ட³லபத³ப்³யஞ்ஜனதா ஏவ ஸுந்த³ரபா⁴வோதி வுத்தங் ‘‘ஸுந்த³ரா பரிமண்ட³லபத³ப்³யஞ்ஜனா’’தி. டா²னகரணஸம்பத்தியா, ஸிக்கா²ஸம்பத்தியா ச கஸ்ஸசிபி அனூனதாய பரிமண்ட³லபதா³னி ப்³யஞ்ஜனானி அக்க²ரானி ஏதிஸ்ஸாதி பரிமண்ட³லபத³ப்³யஞ்ஜனா. அக்க²ரமேவ ஹி தங்தத³த்த²வாசகபா⁴வேன பத³ங். அத² வா பத³மேவ அத்த²ஸ்ஸ ப்³யஞ்ஜகத்தா ப்³யஞ்ஜனங், ஸிதி²லத⁴னிதாதி³அக்க²ரபாரிபூரியா ச பத³ப்³யஞ்ஜனஸ்ஸ பரிமண்ட³லதா, பரிமண்ட³லங் பத³ப்³யஞ்ஜனமேதிஸ்ஸாதி ததா². அபிச பஜ்ஜதி அத்தோ² ஏதேனாதி பத³ங், நாமாதி³, யதா²தி⁴ப்பேதமத்த²ங் ப்³யஞ்ஜேதீதி ப்³யஞ்ஜனங், வாக்யங், தேஸங் பரிபுண்ணதாய பரிமண்ட³லபத³ப்³யஞ்ஜனா. அத்த²விஞ்ஞாபனே ஸாத⁴னதாய வாசாவ கரணங் வாக்கரணந்தி துல்யாதி⁴கரணதங் த³ஸ்ஸேதுங் ‘‘உதா³ஹரணகோ⁴ஸோ’’தி வுத்தங், வசீபே⁴த³ஸத்³தோ³தி அத்தோ². தஸ்ஸ ப்³ராஹ்மணஸ்ஸ, தேன வா பா⁴ஸிதப்³ப³ஸ்ஸ அத்த²ஸ்ஸ கு³ணபரிபுண்ணபா⁴வேன பூரே கு³ணேஹி பரிபுண்ணபா⁴வே ப⁴வாதி போரீ. புன புரேதி ராஜதா⁴னீமஹானக³ரே. ப⁴வத்தாதி ஸங்வட்³ட⁴த்தா. ஸுகு²மாலத்தனேனாதி ஸுகு²மாலபா⁴வேன, இமினா தஸ்ஸா வாசாய முது³ஸண்ஹத்தமாஹ. அபலிபு³த்³தா⁴யாதி பித்தஸெம்ஹாதீ³ஹி அபரியோனத்³தா⁴ய, ஹேதுக³ப்³ப⁴பத³மேதங். ததோ ஏவ ஹி யதா²வுத்ததோ³ஸாபா⁴வோதி. ட³ங்ஸெத்வா விய ஏகதே³ஸகத²னங் ஸந்தி³ட்ட²ங், ஸணிகங் சிராயித்வா கத²னங் விலம்பி³தங், ‘‘ஸன்னித்³த⁴விலம்பி³தாதீ³’’திபி பாடோ². ஸத்³தே³ன அஜனகங் வசினங், மம்மகஸங்கா²தங் வா ஏகக்க²ரமேவ த்³வத்திக்க²த்துமுச்சாரணங் ஸன்னித்³த⁴ங். ஆதி³ஸத்³தே³ன து³க்க²லிதானுகட்³டி⁴தாதீ³னி ஸங்க³ண்ஹாதி. ஏளாக³ளேனாதி ஏளாபக்³க⁴ரணேன. ‘‘ஏளா க³ளந்தீ’’தி வுத்தஸ்ஸேவ த்³விதா⁴ அத்த²ங் த³ஸ்ஸேதுங் ‘‘லாலா வா பக்³க⁴ரந்தீ’’திஆதி³ கே²ளபு²ஸிதானீதி கே²ளபி³ந்தூ³னி.
தத்ராயமட்ட²கதா²முத்தகனயோ – ஏலந்தி தோ³ஸோ வுச்சதி ‘‘யா ஸா வாசா நேலா கண்ணஸுகா²’’திஆதீ³ஸு (தீ³॰ நி॰ 1.8, 194) விய. து³ப்பஞ்ஞா ச ஸதோ³ஸமேவ கத²ங் கதெ²ந்தா ஏலங் பக்³க⁴ராபெந்தி, தஸ்மா தேஸங் வாசா ஏலக³ளா நாம ஹோதி, தப்³பி³பரீதாயாதி அத்தோ². ‘‘ஆதி³மஜ்ஜ²பரியோஸானங் பாகடங் கத்வா’’தி இமினா தஸ்ஸா வாசாய அத்த²பாரிபூரிங் வத³தி. விஞ்ஞாபனஸத்³தே³ன ஏதஸ்ஸ ஸம்ப³ந்தோ⁴.
ஜராஜிண்ணதாய ஜிண்ணோதி க²ண்டி³ச்சபாலிச்சாதி³பா⁴வமாபாதி³தோ. வுத்³தி⁴மரியாத³ப்பத்தோதி வுத்³தி⁴யா பரிச்சே²த³ங் பரியந்தங் பத்தோ. ஜாதிமஹல்லகதாயாதி உபபத்தியா மஹல்லகபா⁴வேன. தேனாஹ ‘‘சிரகாலப்பஸுதோ’’தி. அத்³த⁴ஸத்³தோ³ அத்³தா⁴னபரியாயோ தீ³க⁴காலவாசகோ. கித்தகோ பன ஸோதி ஆஹ ‘‘த்³வே தயோ ராஜபரிவட்டே’’தி, த்³வின்னங் திண்ணங் ராஜூனங் ரஜ்ஜபஸாஸனபடிபாடியோதி அத்தோ². ‘‘அத்³த⁴க³தோ’’தி வத்வாபி கதங் வயோக³ஹணங் ஓஸானவயாபெக்க²ந்தி வுத்தங் ‘‘பச்சி²மவயங் ஸம்பத்தோ’’தி. பச்சி²மோ ததியபா⁴கோ³தி வஸ்ஸஸதஸ்ஸ திதா⁴ கதேஸு பா⁴கே³ஸு ததியோ ஓஸானபா⁴கோ³. பச்சேகங் தெத்திங்ஸவஸ்ஸதோ ச அதி⁴கமாஸபக்கா²தி³பி விப⁴ஜீயதி, தஸ்மா ஸத்தஸட்டி²மே வஸ்ஸே யதா²ரஹங் லப்³ப⁴மானமாஸபக்க²தி³வஸதோ பட்டா²ய பச்சி²மவயோ வேதி³தப்³போ³. ஆசரியஸாரிபுத்தத்தே²ரேனபி
ஏவங் கேவலஜாதிவஸேன பட²மவிகப்பங் வத்வா கு³ணமிஸ்ஸகவஸேனபி து³தியவிகப்பங் வத³ந்தேன ‘‘அபிசா’’திஆதி³ ஆரத்³த⁴ங். தத்த² நாயங் ஜிண்ணதா வயோமத்தேன, அத² கோ² குலபரிவட்டேன புராணதாதி ஆஹ ‘‘ஜிண்ணோதி போராணோ’’திஆதி³. சிரகாலப்பவத்தகுலன்வயோதி சிரகாலங் பவத்தகுலபரிவட்டோ, தேனாஸ்ஸ குலவஸேன உதி³தோதி³தபா⁴வமாஹ. ‘‘வயோஅனுப்பத்தோ’’தி இமினா ஜாதிவுத்³தி⁴யா வக்க²மானத்தா, கு³ணவுத்³தி⁴யா ‘‘வுத்³தோ⁴தி ஸீலாசாராதி³கு³ணவுத்³தி⁴யா யுத்தோ’’தி வுத்தங். வக்க²மானங் பதி பாரிஸேஸக்³க³ஹணஞ்ஹேதங். ததா² ஜாதிமஹல்லகதாயபி தேனேவ பதே³ன வக்க²மானத்தா, விப⁴வமஹத்ததாய ச அனவஸேஸிதத்தா ‘‘மஹல்லகோதி விப⁴வமஹந்ததாய ஸமன்னாக³தோ’’தி ஆஹ. மக்³க³படிபன்னோதி ப்³ராஹ்மணானங் யுத்தபடிபத்திவீதி²ங் அவோக்கம்ம சரணவஸேன உபக³தோதி அத்த²ங் த³ஸ்ஸேதி ‘‘ப்³ராஹ்மணான’’ந்திஆதி³னா. ஜாதிவுத்³த⁴பா⁴வமனுப்பத்தோ, தம்பி அந்திமவயங் பச்சி²மவயமேவ அனுப்பத்தோதி ஸாதி⁴ப்பாயயோஜனா. இமினா ஹி பச்சி²மவயவஸேன ஜாதிவுத்³த⁴பா⁴வங் த³ஸ்ஸேதீதி.
பு³த்³த⁴கு³ணகதா²வண்ணனா
304. தாதி³ஸேஹி மஹானுபா⁴வேஹி ஸத்³தி⁴ங் யுக³க்³கா³ஹவஸேன ட²பனம்பி ந மாதி³ஸானங் பண்டி³தஜாதீனமனுச்ச²விகங், குதோ பன உக்கங்ஸவஸேன ட²பனந்தி இத³ங் ப்³ராஹ்மணஸ்ஸ ந யுத்தரூபந்தி த³ஸ்ஸெந்தோ ‘‘ந கோ² பன மேத’’ந்திஆதி³மாஹ. தத்த² யேபி கு³ணா அத்தனோ கு³ணேஹி ஸதி³ஸா, தேபி கு³ணே உத்தரிதரேயேவ மஞ்ஞமானோ பகாஸேதீதி ஸம்ப³ந்தோ⁴. ஸதி³ஸாதி ச ஏகதே³ஸேன ஸதி³ஸா. ந ஹி பு³த்³தா⁴னங் கு³ணேஹி ஸப்³ப³தா² ஸதி³ஸா கேசிபி கு³ணா அஞ்ஞேஸு லப்³ப⁴ந்தி. ‘‘கோ சாஹ’’ந்திஆதி³ உத்தரிதராகாரத³ஸ்ஸனங். அஹஞ்ச கீதி³ஸோ நாம ஹுத்வா ஸதி³ஸோ ப⁴விஸ்ஸாமி, ஸமணஸ்ஸ…பே॰… கு³ணா ச கீதி³ஸா நாம ஹுத்வா ஸதி³ஸா ப⁴விஸ்ஸந்தீதி ஸாதி⁴ப்பாயயோஜனா. கேசி நவங் பாட²ங் கரொந்தி, அயமேவ மூலபாடோ² யதா² தங் அம்ப³ட்ட²ஸுத்தே ‘‘கோ சாஹங் போ⁴ கோ³தம ஸாசரியகோ, கா ச அனுத்தரா விஜ்ஜாசரணஸம்பதா³’’தி. இதரேதி அத்தனோ கு³ணேஹி அஸதி³ஸே கு³ணே, ‘‘பகாஸேதீ’’தி இமினாவ ஸம்ப³ந்தோ⁴. ஏகந்தேனேவாதி ஸதி³ஸகு³ணானங் விய பஸங்கா³பா⁴வேன.
ஏவங் நியாமெந்தோ ஸோணத³ண்டோ³ இத³ங் அத்த²ஜாதங் தீ³பேதி. யதா² ஹீதி எத்த² ஹி-ஸத்³தோ³ காரணே. தேனாஹ கோ³பத³கந்தி கா³வியா கு²ரட்டா²னே டி²தஉத³கங். கு³ணேதி ஸதி³ஸகு³ணேபி, பகே³வ அஸதி³ஸகு³ணே.
ஸட்டி²குலஸதஸஹஸ்ஸந்தி ஸட்டி²ஸஹஸ்ஸாதி⁴கங் குலஸதஸஹஸ்ஸங். த⁴ம்மபத³ட்ட²கதா²தீ³ஸு (த⁴॰ ப॰ அட்ட²॰ 16) பன கத்த²சி ப⁴க³வதோ அஸீதிகுலஸஹஸ்ஸதாவசனங் ஏகேகபக்க²மேவ ஸந்தா⁴யாதி வேதி³தப்³ப³ங்.
ஸுதா⁴மட்ட²பொக்க²ரணியோதி ஸத்தரதனானந்தி ஸத்தஹி ரதனேஹி. பூரயோகே³ ஹி கரணத்தே² ப³ஹுலங் ச²ட்டீ²வசனங். பாஸாத³னியூஹாத³யோதி உபரிபாஸாதே³ டி²ததுலாஸீஸாத³யோ. ‘‘ஸத்தரதனான’’ந்தி அதி⁴காரோ, அபே⁴தே³பி பே⁴த³வோஹாரோ ஏஸ. குலபரியாயேனாதி ஸுத்³தோ⁴த³னமஹாராஜஸ்ஸ அஸம்பி⁴ன்னக²த்தியகுலானுக்கமேன. தேஸுபீதி சதூஸு நிதீ⁴ஸுபி. க³ஹிதங் க³ஹிதங் டா²னங் பூரதியேவ த⁴னேன பாகதிகமேவ ஹோதி, ந ஊனங்.
ப⁴த்³த³கேனாதி ஸுந்த³ரேன. பச்சி²மவயே வுத்தனயேன பட²மவயோ வேதி³தப்³போ³. மாதாபிதூனங் அனிச்சா²ய பப்³ப³ஜ்ஜாவ அனாத³ரோ தேன யுத்தே அத்தே² ஸாமிவசனந்தி வுத்தங் ஹோதி. ஏதேஸந்தி மாதாபிதூனங். கந்தி³த்வாதி ‘‘கஹங் பியபுத்தகா’’திஆதி³னா பரிதே³வித்வா.
அபரிமாணோயேவாதி ‘‘எத்தகோ ஏஸோ’’தி கேனசி பரிச்சி²ந்தி³துமஸக்குணெய்யதாய அபரிச்சி²ன்னோயேவ. த்³வே வேளூ அதோ⁴கடிமத்தகமேவ ஹொந்தீதி ஆஹ ‘‘த்³வின்னங் வேளூனங் உபரி கடிமத்தமேவா’’தி. பாரமிதானுபா⁴வேன ப்³ராஹ்மணஸ்ஸ ஏவ பஞ்ஞாயதி, ப⁴க³வா பன ததா³ பகதிப்பமாணோவாதி த³ஸ்ஸேதுங் ‘‘பஞ்ஞாயமானோ’’தி வுத்தமிவ தி³ஸ்ஸதி, வீமங்ஸித்வா க³ஹேதப்³ப³ங். ‘‘ந ஹீ’’திஆதி³னா பாரமிதாப³லேனேவ ஏவங் அபரிமாணதா, ந இத்³தி⁴ப³லேனாதி த³ஸ்ஸேதீ’’தி வத³ந்தி. அதுலோதி அஸதி³ஸோ. ‘‘த⁴ம்மபதே³ கா³த²மாஹா’’தி கத்த²சி பாடோ² அயுத்தோவ. ந ஹி த⁴ம்மபதே³ அயங் கா³தா² தி³ஸ்ஸதி. ஸுதா⁴பிண்டி³யத்தே²ராபதா³னாதீ³ஸு (அப॰ 1.10.ஸுதா⁴பிண்டி³யத்தே²ராபதா³ன) பனாயங் கா³தா² ஆக³தா, ஸா ச கோ² அஞ்ஞவத்து²ஸ்மிங் ஏவ, ந இமஸ்மிங் வத்து²ம்ஹி, தஸ்மா பாளிவஸேன ஸங்கீ³திமனாருள்ஹா பகிண்ணகதே³ஸனாயேவாயங் கா³தா²தி த³ட்ட²ப்³ப³ங்.
தத்த² தே தாதி³ஸேதி பரியாயவசனமேதங் ‘‘அப்பங் வஸ்ஸஸதங் ஆயு, இதா³னேதரஹி விஜ்ஜதீ’’திஆதீ³ஸு (பு³॰ வங்॰ 27.21) விய, ‘‘ஏதாதி³ஸே’’திபி பட²ந்தி, தத³ஸுந்த³ரங் அபதா³னாதீ³ஸு பரினிப்³பு³தே குதோசிபி அப⁴யே தே தாதி³ஸே பூஜயதோ எத்த² இத³ங் புஞ்ஞங் கேனசி மஹானுபா⁴வேன அபி ஸங்கா²துங் ந ஸக்காதி அத்தோ².
பா³ஹந்தரந்தி த்³வாத³ஸ யோஜனஸதானீதி த்³வாத³ஸாதி⁴கானி யோஜனஸதானி. ப³ஹலந்தரேனாதி ஸமந்தா ஸரீரபரிணாஹப்பமாணேன. புது²லதோதி வித்தா²ரதோ. அங்கு³லிபப்³பா³னீதி ஏகேகானி அங்கு³லிபப்³பா³னி. ப⁴முகந்தரந்தி த்³வின்னங் ப⁴முகானமந்தரங். முக²ங் வித்தா²ரதோ த்³வியோஜனஸதங் பரிமண்ட³லதோ விஸுங் வுத்தத்தா. ‘‘ஏதி³ஸோ ப⁴க³வா’’தி யா பரேஹி வுத்தா கதா², தஸ்ஸா அனுரூபந்தி யதா²கத²ங், இமினா அஞ்ஞேஹி வுத்தங் ப⁴க³வதோ வண்ணகத²ங் ஸுத்வா ஓலோகேதுகாமதாய ஆக³தோதி த³ஸ்ஸேதி, யதா²கத²ந்தி வா கீதி³ஸங். ‘‘யதா²கத²ங் பன தும்ஹே பி⁴க்க²வே ஸமக்³கா³ ஸம்மோத³மானா அவிவத³மானா பா²ஸுகங் வஸ்ஸங் வஸித்தா²’’திஆதீ³ஸு (பாரா॰ 194) விய ஹி புச்சா²யங் ஏஸ நிபாதஸமுதா³யோ, ஏகோ வா நிபாதோ.
க³ந்த⁴குடிபரிவேணேதி க³ந்த⁴குடியா பரிவேணே, க³ந்த⁴குடிதோ ப³ஹி பரிவேணப்³ப⁴ந்தரேதி அத்தோ². தத்தா²தி மஞ்சகே. ‘‘ஸீஹஸெய்யங் கப்பேஸீ’’தி யதா² ராஹு அஸுரிந்தோ³ ஆயாமதோ, வித்தா²ரதோ, உப்³பே³த⁴தோ ச ப⁴க³வதோ ரூபகாயஸ்ஸ பரிச்சே²த³ங் க³ஹேதுங் ந ஸக்கோதி, ததா² ரூபங் இத்³தா⁴பி⁴ஸங்கா²ரங் அபி⁴ஸங்க²ரொந்தோ ஸீஹஸெய்யங் கப்பேஸீ’’தி (தீ³॰ நி॰ டீ॰ 1.304) ஏவங் ஆசரியேன வுத்தங், ‘‘ததே³தங் ‘ந மயா அஸுரிந்த³ அதோ⁴முகே²ன பாரமியோ பூரிதா, உத்³த⁴க்³க³மேவ கத்வா தா³னங் தி³ன்ன’’ந்தி அட்ட²கதா²வசனேன அச்சந்தமேவ விருத்³த⁴ங் ஹோதி. ஏதஞ்ஹி க³ந்த⁴குடித்³வாரவிவரணாதீ³ஸு விய பாரமிதானுபா⁴வஸித்³தி⁴த³ஸ்ஸனங், அஞ்ஞதா² ததே³வ வசனங் வத்தப்³ப³ங் ப⁴வெய்யா’’தி வத³ந்தி, வீமங்ஸித்வா ஸம்படிச்சி²தப்³ப³ங். அதோ⁴முகே²னாதி ஓஸக்கிதவீரியதங் ஸந்தா⁴ய வுத்தங், உத்³த⁴க்³க³மேவாதி அனோஸக்கிதவீரியதங், உப்³ப⁴கோடிகங் கத்வாதி அத்தோ². ததா³ ராஹு உபாஸகபா⁴வங் படிவேதே³ஸீதி ஆஹ ‘‘தங் தி³வஸ’’ந்திஆதி³.
கிலேஸேஹி ஆரகத்தா அரியங் நிருத்தினயேன, அதோயேவ உத்தமதா பரிஸுத்³த⁴தாதி வுத்தங் ‘‘உத்தமங் பரிஸுத்³த⁴’’ந்தி. அனவஜ்ஜட்டே²ன குஸலங், ந ஸுக²விபாகட்டே²ன தஸ்ஸ அரஹதமஸம்ப⁴வதோ. குஸலஸீலேனாதி அனவஜ்ஜேனேவ வித்³த⁴ஸ்தஸவாஸனகிலேஸேன ஸீலேன. ஏவஞ்ச கத்வா பத³சதுக்கம்பேதங் அதி⁴ப்பேதத்த²தோ விஸிட்ட²ங் ஹோதி, ஸத்³த³த்த²மத்தங் பன ஸந்தா⁴ய ‘‘இத³மஸ்ஸ வேவசன’’ந்தி வுத்தங்.
கத்த²சி ‘‘ப⁴க³வதோ ஏகேகாய த⁴ம்மதே³ஸனாயா’’திஆதி³மாஹ. மஹாஸமயஸுத்த (தீ³॰ நி॰ 2.331 ஆத³யோ) மங்க³லஸுத்த- (கு²॰ பா॰ 5.1 ஆத³யோ; ஸு॰ நி॰ 261 ஆத³யோ) தே³ஸனாதீ³ஸு ஹி சதுவீஸதியா டா²னேஸு அஸங்க்²யெய்யா அபரிமெய்யா தே³வமனுஸ்ஸா மக்³க³ப²லாமதங் பிவிங்ஸு. கோடிஸதஸஹஸ்ஸாதி³பரிமாணேனபி ப³ஹூ ஏவ, நித³ஸ்ஸனவஸேன பனேவங் வுத்தங். தஸ்மா அனுத்தரஸிக்கா²பகபா⁴வேன ப⁴க³வா ப³ஹூனங் ஆசரியோ, தேஸங் ஆசரியபூ⁴தானங் ஸாவகானமாசரியபா⁴வேன ஸாவகவேனெய்யானங் பாசரியோ. ப⁴க³வதா ஹி தி³ன்னநயே ட²த்வா ஸாவகா வேனெய்யங் வினெந்தி, தஸ்மா ப⁴க³வாவ தேஸங் பதா⁴னோ ஆசரியோதி.
வத³ந்தஸ்ஸாதி⁴ப்பேதோவ அத்தோ² பமாணங், ந லக்க²ணஹாராதி³விஸயோதி ஆஹ ‘‘ப்³ராஹ்மணோ பனா’’திஆதி³. ‘‘இமஸ்ஸ வா பூதிகாயஸ்ஸா’’தி பாடா²வஸானே பெய்யாலங் கத்வா ‘‘கேலனா படிகேலனா’’தி வுத்தங். அயஞ்ஹி கு²த்³த³கவத்து²விப⁴ங்க³பாளி (விப⁴॰ 854) ‘‘பா³ஹிரானங் வா பரிக்கா²ரானங் மண்ட³னா’’திஆதி³ பெய்யாலவஸேன க³ய்ஹதி. தத்த² இமஸ்ஸ வா பூதிகாயஸ்ஸாதி இமஸ்ஸ வா மனுஸ்ஸஸரீரஸ்ஸ. யதா² ஹி தத³ஹுஜாதோபி ஸிங்கா³லோ ‘‘ஜரஸிங்கா³லோ’’ த்வேவ, ஊருப்பமாணாபி ச க³லோசிலதா ‘‘பூதிலதா’’ த்வேவ ஸங்க்²யங் க³ச்ச²தி, ஏவங் ஸுவண்ணவண்ணோபி மனுஸ்ஸஸரீரோ ‘‘பூதிகாயோ’’ த்வேவ, தஸ்ஸ மண்ட³னாதி அத்தோ². கேலனாதி கீளனா. ‘‘கேலாயனா’’திபி பட²ந்தி. படிகேலனாதி படிகீளனா. சபலஸ்ஸ பா⁴வோ சாபல்யங், சாபல்லங் வா, யேன ஸமன்னாக³தோ புக்³க³லோ வஸ்ஸஸதிகோபி ஸமானோ தத³ஹுஜாததா³ரகோ விய ஹோதி, தஸ்ஸேத³மதி⁴வசனந்தி வேதி³தப்³ப³ங்.
அபாபே புரே கரோதி, ந வா பாபங் புரே கரோதீதி அபாபபுரெக்கா²ரோதி யுத்தாயுத்தஸமாஸேன து³வித⁴மத்த²ங் த³ஸ்ஸேதுங் ‘‘அபாபே நவலோகுத்தரத⁴ம்மே’’திஆதி³ வுத்தங். அபாபேதி ச பாபபடிபக்கே², பாபவிரஹிதே வா. ப்³ரஹ்மனி ஸெட்டே² ப⁴க³வதி ப⁴வா தஸ்ஸ த⁴ம்மதே³ஸனாவஸேன அரியாய ஜாதியா ஜாதத்தா, ப்³ரஹ்முனோ வா ப⁴க³வதோ அபச்சங் க³ருகரணாதி³னா, யதா²னுஸிட்ட²ங் படிபத்தியா ச, ப்³ரஹ்மங் வா ஸெட்ட²ங் அரியமக்³க³ங் ஜானாதீதி ப்³ரஹ்மஞ்ஞா, அரியஸாவகஸங்கா²தா பஜா. தேனாஹ ‘‘ஸாரிபுத்தமொக்³க³ல்லானா’’திஆதி³. ப்³ராஹ்மணபஜாயாதி ப³ஹிதபாபபஜாய. ‘‘அபாபபுரெக்கா²ரோ’’தி எத்த² ‘‘புரெக்கா²ரோ’’தி பத³மதி⁴காரோதி த³ஸ்ஸேதி ‘‘ஏதிஸ்ஸாய ச பஜாய புரெக்கா²ரோ’’தி இமினா. ச-ஸத்³தோ³ ஸமுச்சயத்தோ² ‘‘ந கேவலங் அபாபபுரெக்கா²ரோ ஏவ, அத² கோ² ப்³ரஹ்மஞ்ஞாய ச பஜாய ஸம்ப³ந்த⁴பூ⁴தாய புரெக்கா²ரோ’’தி. ‘‘அயஞ்ஹீ’’திஆதி³ அதி⁴ப்பாயமத்தத³ஸ்ஸனங். ‘‘அபாபபுரெக்கா²ரோ’’தி இத³ங் ‘‘ப்³ரஹ்மஞ்ஞாய பஜாயா’’தி இமினாவ ஸம்ப³ந்தி⁴தப்³ப³ங், ந ச பச்சேகமத்த²தீ³பகங், பகதிப்³ராஹ்மணஜாதிவஸேனபி சேதஸ்ஸ அத்தோ² வேதி³தப்³போ³தி த³ஸ்ஸெந்தோ ‘‘அபிசா’’திஆதி³மாஹ. அயுத்தஸமாஸோ சாயங். பாபந்தி பாபகம்மங், அஹிதங் து³க்க²ந்தி அத்தோ². தஸ்ஸ ‘‘கஸ்ஸா’’திஆதி³ வுத்தங். ‘‘அத்தனா’’திஆதி³ தத³த்த²விவரணங். ப்³ராஹ்மணபஜாயாதி ப்³ராஹ்மணஜாதிபஜாய.
ரஞ்ஜந்தி அட்டங் ப⁴ஜந்தி ராஜானோ ஏதேனாதி ரட்ட²ங், ஏகஸ்ஸ ரஞ்ஞோ ரஜ்ஜபூ⁴தகாஸிகோஸலாதி³மஹாஜனபதா³. ஜனா பஜ்ஜந்தி ஸுக²ஜீவிகங் பாபுணந்தி எத்தா²தி ஜனபதோ³, ஏகஸ்ஸ ரஞ்ஞோ ரஜ்ஜே ஏகேககொட்டா²ஸபூ⁴தா உத்தரபத²த³க்கி²ணபதா²தி³கு²த்³த³கஜனபதா³. தத்தா²தி ததா² ஆக³தேஸு. புச்சா²யாதி அத்தனா அபி⁴ஸங்க²தாய புச்சா²ய. விஸ்ஸஜ்ஜனாஸம்படிச்ச²னேதி விஸ்ஸஜ்ஜனாய அத்தனோ ஞாணேன ஸம்படிக்³க³ஹணே. கேஸஞ்சி உபனிஸ்ஸயஸம்பத்திங், ஞாணபரிபாகங், சித்தாசாரஞ்ச ஞத்வா ப⁴க³வாவ புச்சா²ய உஸ்ஸாஹங் ஜனெத்வா விஸ்ஸஜ்ஜேதீதி அதி⁴ப்பாயோ.
‘‘தத்த² கதமங் ஸாக²ல்ய’’ந்திஆதி³ நிக்கே²பகண்ட³பாளி (த⁴॰ ஸ॰ 1350). அத்³தா⁴னத³ரத²ந்தி தீ³க⁴மக்³கா³க³மனபரிஸ்ஸமங். அஸ்ஸாதி ப⁴க³வதோ, முக²பது³மந்தி ஸம்ப³ந்தோ⁴. பா³லாதபஸம்ப²ஸ்ஸனேனேவாதி அபி⁴னவுக்³க³தஸூரியரங்ஸிஸம்ப²ஸ்ஸனேன இவ. ததா² ஹி ஸூரியோ ‘‘பத்³மப³ந்தூ⁴’’தி லோகே பாகடோ, சந்தோ³ பன ‘‘குமுத³ப³ந்தூ⁴’’தி. புண்ணசந்த³ஸ்ஸ ஸிரியா ஸமானா ஸிரீ ஏதஸ்ஸாதி புண்ணசந்த³ஸஸ்ஸிரிகங். கத²ங் நிக்குஜ்ஜிதஸதி³ஸதாதி ஆஹ ‘‘ஸம்பத்தாயா’’திஆதி³. எத்த² பன ‘‘ஏஹி ஸ்வாக³தவாதீ³’’தி இமினா ஸுக²ஸம்பா⁴ஸபுப்³ப³கங் பியவாதி³தங் த³ஸ்ஸேதி, ‘‘ஸகி²லோ’’தி இமினா ஸண்ஹவாசதங், ‘‘ஸம்மோத³கோ’’தி இமினா படிஸந்தா⁴ரகுஸலதங், ‘‘அப்³பா⁴குடிகோ’’தி இமினா ஸப்³ப³த்தே²வ விப்பஸன்னமுக²தங், ‘‘உத்தானமுகோ²’’தி இமினா ஸுக²ஸல்லாபதங், ‘‘புப்³ப³பா⁴ஸீ’’தி இமினா த⁴ம்மானுக்³க³ஹஸ்ஸ ஓகாஸகரணேன ஹிதஜ்ஜா²ஸயதங் த³ஸ்ஸேதீதி வேதி³தப்³ப³ங்.
யத்த² கிராதி எத்த² கிர-ஸத்³தோ³ அருசிஸூசனே –
‘‘க²ணவத்து²பரித்தத்தா, ஆபாத²ங் ந வஜந்தி யே;
தே த⁴ம்மாரம்மணா நாம, யே’ஸங் ரூபாத³யோ கிரா’’தி. –
ஆதீ³ஸு (அபி⁴த⁴ம்மாவதார-அட்ட²கதா²யங் ஆரம்மணவிபா⁴கே³ ச²ட்ட²அனுச்சே²தே³ – 77) விய, தேன ப⁴க³வதா அதி⁴வுத்த²பதே³ஸே ந தே³வதானுபா⁴வேன மனுஸ்ஸானங் அனுபத்³த³வதா, அத² கோ² பு³த்³தா⁴னுபா⁴வேனாதி த³ஸ்ஸேதி. பு³த்³தா⁴னுபா⁴வேனேவ ஹி தா ஆரக்க²ங் க³ண்ஹந்தி. பங்ஸுபிஸாசகாத³யோதி பங்ஸுனிஸ்ஸிதபிஸாசகாத³யோ ஆதி³ஸத்³தே³ன பூ⁴தரக்க²ஸாதீ³னங் க³ஹணங். இதா³னி பு³த்³தா⁴னுபா⁴வமேவ பாகடங் கத்வா த³ஸ்ஸேதுங் ‘‘அபிசா’’திஆதி³ வுத்தங்.
அனுஸாஸிதப்³போ³ ஸங்கோ⁴ நாம ஸப்³போ³பி வேனெய்யஜனஸமூஹோ. ஸயங் உப்பாதி³தோ ஸங்கோ⁴ நாம நிப்³ப³த்திதஅரியபுக்³க³லஸமூஹோ. ‘‘தாதி³ஸோ’’தி இமினா ‘‘ஸயங் வா உப்பாதி³தோ’’தி வுத்தவிகப்போ ஏவ பச்சாமட்டோ² அனந்தரஸ்ஸ விதி⁴ படிஸேதோ⁴வாதி கத்வா, தஸ்மா ‘‘புரிமபத³ஸ்ஸேவ வா’’தி விகப்பந்தரக³ஹணந்தி ஆசரியேன (தீ³॰ நி॰ டீ॰ 1.304) வுத்தங். தத்ராயமதி⁴ப்பாயோ – காமங் ‘‘க³ணீ’’தி இத³ங் ‘‘ஸங்கீ⁴’’தி பத³ஸ்ஸேவ வேவசனங், அத்த²மத்தங் பன த³ஸ்ஸேதுங் யதா²வுத்தவிகப்பத்³வயே து³தியவிகப்பமேவ பச்சாமஸித்வா ‘‘தாதி³ஸோவஸ்ஸ க³ணோ அத்தீ²’’தி வுத்தத்தா அவஸிட்ட²ஸ்ஸபி பட²மவிகப்பஸ்ஸ ஸங்க³ஹணத்த²ங் ‘‘புரிமபத³ஸ்ஸேவ வா வேவசனமேத’’ந்தி வுத்தந்தி. ஏவம்பி வத³ந்தி – த⁴ம்மஸேனாபதித்தே²ராதீ³னங் பச்சேகக³ணீனங் க³ணங், ஸுத்தந்திகாதி³க³ணங் வா ஸந்தா⁴ய ‘‘தாதி³ஸோ’’திஆதி³ வுத்தங். தத்தா²பி ஹி ஸப்³போ³வ பி⁴க்கு²க³ணோ அனுஸாஸிதப்³போ³ நாம, நிப்³ப³த்திதஅரியக³ணோ பன ஸயங் உப்பாதி³தோ நாம, தஸ்மா ‘‘தாதி³ஸோ’’தி இமினா விகப்பத்³வயஸ்ஸாபி பச்சாமஸனங் உபபன்னங் ஹோதி. ஏவங் பத³த்³வயஸ்ஸ விஸேஸத்த²தங் த³ஸ்ஸெத்வா ஸப்³ப³தா² ஸமானத்த²தங் த³ஸ்ஸேதுங் ‘‘புரிமபத³ஸ்ஸேவா’’திஆதி³ வுத்தந்தி. பூரணமக்க²லிஆதீ³னங் ப³ஹூனங் தித்த²கரானங், நித்³தா⁴ரணே சேதங் ஸாமிவசனங். அசேலகாதி³மத்தகேனபி காரணேனாதி நிச்சோளதாதி³மத்தகேனபி அப்பிச்ச²ஸந்துட்ட²தாதி³ஸமாரோபனலக்க²ணேன காரணேன.
நவகாதி அபி⁴னவா. பாஹுனகாதி பஹேணகங் படிக்³க³ண்ஹிதுமனுச்ச²விகா, ஏதேன து³விதே⁴ஸு ஆக³ந்துகேஸு புரேதரமாக³தவஸேன இத⁴ அதிதி²னோ, ந போ⁴ஜனவேலாயமாக³தவஸேன பரியாபுணாமீதி பரிச்சி²ந்தி³துங் ஜானாமி, தா⁴த்வத்த²மத்தங் பன த³ஸ்ஸேதுங் ‘‘ஜானாமீ’’தி வுத்தங்.
கப்பம்பீதி ஆயுகப்பம்பி, ப⁴ணெய்ய சேதி ஸம்ப³ந்தோ⁴. சிரங் சிரகாலே கப்போ கீ²யேத², தீ³க⁴மந்தரே தீ³க⁴காலந்தரேபி ததா²க³தஸ்ஸ வண்ணோ ந கீ²யேதா²தி யோஜனா. ‘‘சிர’’ந்தி செத்த² வத்தப்³பே³பி ச²ந்த³ஹானிப⁴யா ரஸ்ஸத்த²ங் நிக்³க³ஹிதலோபோ, அதிதீ³க⁴காலங் வா ஸந்தா⁴ய ‘‘சிரதீ³க⁴மந்தரே’’தி வுத்தங், உப⁴யத்த² ஸம்ப³ந்தி⁴தப்³ப³மேதங், கிரியாரஹாதி³யோகே³ விய ச அந்தரயோகே³ அதி⁴கக்க²ரபாதோ³ அனுபவஜ்ஜோ, அயஞ்ச கா³தா² அபூ⁴தபரிகப்பனாவஸேன அட்ட²கதா²ஸு (தீ³॰ நி॰ அட்ட²॰ 1.304; 3.141; ம॰ நி॰ அட்ட²॰ 2.425; உதா³॰ அட்ட²॰ 53; பு³॰ வங்॰ அட்ட²॰ 4.4; சரியா॰ அட்ட²॰ நிதா³னகதா², பகிண்ணககதா²; அப॰ அட்ட²॰ 2.7.20) வுத்தா
305. நந்தி ஆசரியங். அலங்-ஸத்³தோ³ இத⁴ அரஹத்தோ² ‘‘அலமேவ நிப்³பி³ந்தி³து’’ந்திஆதீ³ஸு (தீ³॰ நி॰ 2.272; ஸங்॰ நி॰ 2.134, 143) வியாதி ஆஹ ‘‘யுத்தமேவா’’தி. புடேன நெத்வா அஸிதப்³ப³தோ பரிபு⁴ஞ்ஜிதப்³ப³தோ புடோஸங் வுச்சதி பாதெ²ய்யங். இத்த²ம்பூ⁴தலக்க²ணே கரணவசனங் த³ஸ்ஸேதி ‘‘தங் க³ஹெத்வா’’தி இமினா. பாளியங் புடங்ஸேனபி குலபுத்தேனாதி ஸம்ப³ந்த⁴ங் த³ஸ்ஸேதுங் ‘‘தேன புடங்ஸேனா’’தி வுத்தங். ‘‘அங்ஸேனா’’திஆதி³ அதி⁴ப்பாயமத்தத³ஸ்ஸனங், வஹந்தேன குலபுத்தேன உபஸங்கமிதுங் அலமேவாதி அத்தோ².
ஸோணத³ண்ட³பரிவிதக்கவண்ணனா
306-7. ந இத⁴ திரோ-ஸத்³தோ³ ‘‘திரோகுட்³டே³ வா திரோபாகாரே வா ச²ட்³டெ³ய்ய வா ச²ட்³டா³பெய்ய வா’’திஆதீ³ஸு (பாசி॰ 825) விய ப³ஹிஅத்தோ²தி ஆஹ ‘‘அந்தோவனஸண்டே³ க³தஸ்ஸா’’தி. தத்த² விஹாரோபி வனஸண்ட³பரியாபன்னோதி த³ஸ்ஸேதி ‘‘விஹாரப்³ப⁴ந்தரங் பவிட்ட²ஸ்ஸா’’தி இமினா. ஏதே அஞ்ஜலிங் பணாமெத்வா நிஸின்னா மிச்சா²தி³ட்டி²வஸேன உப⁴தோபக்கி²கா, ‘‘இதரே பன ஸம்மாதி³ட்டி²வஸேன ஏகதோபக்கி²கா’’தி அத்த²தோ ஆபன்னோ ஹோதி. த³லித்³த³த்தா, ஞாதிபாரிஜுஞ்ஞாதி³னா ஜிண்ணத்தா ச நாமகொ³த்தவஸேன அபாகடா ஹுத்வா பாகடா ப⁴விதுகாமா ஏவமகங்ஸூதி அதி⁴ப்பாயோ. கேராடிகாதி ஸடா². தத்தா²தி த்³வீஸு ஜனேஸு. ததோதி விஸ்ஸாஸதோ, தா³னதோ வா.
ப்³ராஹ்மணபஞ்ஞத்திவண்ணனா
309. அனோனதகாயவஸேன த²த்³த⁴க³த்தோ, ந மானவஸேன. தேன பாளியங் வக்க²தி ‘‘அப்³பு⁴ன்னாமெத்வா’’தி. சேதோவிதக்கங் ஸந்தா⁴ய சித்தஸீஸேன ‘‘சித்தங் அஞ்ஞாஸீ’’தி வுத்தங். விகா⁴தந்தி சித்தது³க்க²ங்.
311. ஸகஸமயேதி ப்³ராஹ்மணலத்³தி⁴யங். மீயமானோதி மரியமானோ. தி³ட்டி²ஸஞ்ஜானநேனேவாதி அத்தனோ லத்³தி⁴ஸஞ்ஜானநேனேவ. ஸுஜந்தி ஹோமத³ப்³பி³ங், நிப்³ப³சனங் வுத்தமேவ. க³ண்ஹந்தேஸூதி ஜுஹனத்த²ங் க³ண்ஹனகேஸு, இருவிஜ்ஜேஸூதி அத்தோ². இருவேத³வஸேன ஹோமகரணதோ ஹி யஞ்ஞயஜகா ‘‘இருவிஜ்ஜா’’தி வுச்சந்தி. பட²மோ வாதி தத்த² ஸன்னிபதிதேஸு ஸுஜாகிரியாயங் ஸப்³ப³பதா⁴னோ வா. து³தியோ வாதி தத³னந்தரிகோ வா. ‘‘ஸுஜ’’ந்தி இத³ங் கரணத்தே² உபயோக³வசனந்தி ஆஹ ‘‘ஸுஜாயா’’தி. அக்³கி³ஹுத்தமுக²தாய யஞ்ஞஸ்ஸ யஞ்ஞே தி³ய்யமானங் ஸுஜாமுகே²ன தி³ய்யதி. வுத்தஞ்ச ‘‘அக்³கி³ஹுத்தமுகா² யஞ்ஞா, ஸாவித்தீ ச²ந்த³ஸோ முக²’’ந்தி (ம॰ நி॰ 2.400). தஸ்மா ‘‘தி³ய்யமான’’ந்தி அயங் பாட²ஸேஸோ விஞ்ஞாயதீதி ஆசரியேன (தீ³॰ நி॰ டீ॰ 1.311) வுத்தங். அபிச ஸுஜாய தி³ய்யமானங் ஸுஜந்தி தத்³தி⁴தவஸேன அத்த²ங் த³ஸ்ஸேதுங் ஏவமாஹ. போராணாதி அட்ட²கதா²சரியா. புரிமவாதே³ செத்த² தா³னவஸேன பட²மோ வா து³தியோ வா, பச்சி²மவாதே³ ஆதா³னவஸேனாதி அயமேதேஸங் விஸேஸோ. விஸேஸதோதி விஜ்ஜாசரணவிஸேஸதோ, ந ப்³ராஹ்மணேஹி இச்சி²தவிஜ்ஜாசரணமத்ததோ. உத்தமப்³ராஹ்மணஸ்ஸாதி அனுத்தரத³க்கி²ணெய்யதாய உக்கட்ட²ப்³ராஹ்மணஸ்ஸ. யதா²தி⁴ப்பேதஸ்ஸ ஹி விஜ்ஜாசரணவிஸேஸதீ³பகஸ்ஸ ‘‘கதமங் பன தங் ப்³ராஹ்மணஸீலங், கதமா ஸா பஞ்ஞா’’திஆதி³வசனஸ்ஸ ஓகாஸகரணத்த²மேவ ‘‘இமேஸங் பன ப்³ராஹ்மண பஞ்சன்னங் அங்கா³ன’’ந்திஆதி³வசனங் ப⁴க³வா அவோச, தஸ்மா பதா⁴னவசனானுரூபமனுஸந்தி⁴ங் த³ஸ்ஸேதுங் ‘‘ப⁴க³வா பனா’’திஆதி³ வுத்தந்தி த³ட்ட²ப்³ப³ங்.
313. அபவத³தீதி வண்ணாதீ³னி அபனெத்வா வத³தி, அத்த²மத்தங் பன த³ஸ்ஸேதுங் ‘‘படிக்கி²பதீ’’தி வுத்தங். இத³ந்தி ‘‘மா ப⁴வங் ஸோணத³ண்டோ³ ஏவங் அவசா’’திஆதி³வசனங். ப்³ராஹ்மணஸமயந்தி ப்³ராஹ்மணஸித்³த⁴ந்தங். மா பி⁴ந்தீ³தி மா வினாஸேஸி.
316. ஸமோயேவ ஹுத்வா ஸமோதி ஸமஸமோ, ஸப்³ப³தா² ஸமோதி அத்தோ². பரியாயத்³வயஞ்ஹி அதிஸயத்த²தீ³பகங் யதா² ‘‘து³க்க²து³க்க²ங், ரூபரூப’’ந்தி. ஏகதே³ஸமத்ததோ பன அங்க³கேன மாணவேன தேஸங் ஸமபா⁴வதோ ‘‘ட²பெத்வா ஏகதே³ஸமத்த’’ந்திஆதி³மாஹ. குலகோடிபரிதீ³பனந்தி குலஸ்ஸ ஆதி³பரிதீ³பனங். யஸ்மா அத்தனோ ப⁴கி³னியா…பே॰… ந ஜானிஸ்ஸதி, தஸ்மா ந தஸ்ஸ மாதாபிதுமத்தங் ஸந்தா⁴ய வத³தி, குலகோடிபரிதீ³பனங் பன ஸந்தா⁴ய வத³தீதி அதி⁴ப்பாயோ. ‘‘அத்த²ப⁴ஞ்ஜனக’’ந்தி இமினா கம்மபத²பத்தங் வத³தி. கு³ணேதி யதா²வுத்தே பஞ்சஸீலே. அதா²பி ஸியாதி யதி³பி தும்ஹாகங் ஏவங் பரிவிதக்கோ ஸியா, பி⁴ன்னஸீலஸ்ஸாபி புன பகதிஸீலே டி²தஸ்ஸ ப்³ராஹ்மணபா⁴வங் வண்ணாத³யோ ஸாதெ⁴ந்தீதி ஏவங் ஸியாதி அத்தோ². ‘‘ஸாதே⁴தீ’’தி பாடே² ‘‘வண்ணோ’’தி கத்தா ஆசரியேன (தீ³॰ நி॰ டீ॰ 1.316) அஜ்ஜா²ஹடோ, நித³ஸ்ஸனஞ்சேதங். மந்தஜாதீஸுபி ஹி ஏஸேவ நயோ. ஸீலமேவாதி புன பகதிபூ⁴தங் ஸீலமேவ ப்³ராஹ்மணபா⁴வங் ஸாதெ⁴ஸ்ஸதி, கஸ்மாதி சே ‘‘தஸ்மிங் ஹி…பே॰… வண்ணாத³யோ’’தி. தத்த² ஸம்மோஹமத்தங் வண்ணாத³யோதி வண்ணமந்தஜாதியோ ப்³ராஹ்மணபா⁴வஸ்ஸ அங்க³ந்தி ஸம்மோஹமத்தமேதங், அஸமவெக்கி²த்வா கதி²தமித³ங்.
ஸீலபஞ்ஞாகதா²வண்ணனா
317. கதி²தோ ப்³ராஹ்மணேன பஞ்ஹோதி ‘‘ஸீலவா ச ஹோதீ’’திஆதி³னா த்³வின்னமேவ அங்கா³னங் வஸேன யதா²புச்சி²தோ பஞ்ஹோ யாதா²வதோ விஸ்ஸஜ்ஜிதோ. எத்தா²தி யதா²விஸ்ஸஜ்ஜிதே அத்தே², அங்க³த்³வயே வா. தஸ்ஸாதி ஸோணத³ண்ட³ஸ்ஸ. யதி³ ஏகமங்க³ங் ட²பெய்ய, அத² பதிட்டா²துங் ந ஸக்குணெய்ய. யதி³ பன ந ட²பெய்ய, அத² ஸக்குணெய்ய, கிங் பனேஸ ததா² ஸக்கி²ஸ்ஸதி நு கோ², நோதி வீமங்ஸனத்த²மேவ ஏவமாஹ, ந து ஏகஸ்ஸ அங்க³ஸ்ஸ ட²பனீயத்தாதி வுத்தங் ஹோதி. ததா² சாஹ ‘‘ஏவமேதங் ப்³ராஹ்மணா’’திஆதி³. தோ⁴விதத்தாவ பரிஸுஜ்ஜ²னந்தி ஆஹ ‘‘ஸீலபரிஸுத்³தா⁴’’தி, ஸீலஸம்பத்தியா ஸப்³ப³ஸோ ஸுத்³தா⁴ அனுபக்கிலிட்டா²தி அத்தோ². குதோ து³ஸ்ஸீலே பஞ்ஞா அஸமாஹிதத்தா தஸ்ஸ. குதோ வா பஞ்ஞாரஹிதே ஜளே ஏளமூகே³ ஸீலங் ஸீலவிபா⁴க³ஸ்ஸ, ஸீலபரிஸோத⁴னூபாயஸ்ஸ ச அஜானநதோ. ஏளா முகே² க³ளதி யஸ்ஸாதி ஏளமூகோ³ க²-காரஸ்ஸ க³-காரங் கத்வா, ஏலமுகோ², ஏலமூகோ வா. இதி ப³ஹுதா⁴ பாடோ²தி ப⁴யபே⁴ரவஸுத்தட்ட²கதா²யங் (ம॰ நி॰ அட்ட²॰ 1.48) வுத்தோ. பகட்ட²ங் உக்கட்ட²ங் ஞாணங் பஞ்ஞாணந்தி கத்வா பாகதிகங் ஞாணங் நிவத்தேதுங் ‘‘பஞ்ஞாண’’ந்தி வுத்தங். விபஸ்ஸனாதி³ஞாணஞ்ஹி இதா⁴தி⁴ப்பேதங், ததே³தங் பகாரேஹி ஜானநதோ பஞ்ஞாவாதி ஆஹ ‘‘பஞ்ஞாயேவா’’தி.
சதுபாரிஸுத்³தி⁴ஸீலேன தோ⁴தாதி ஸமாதி⁴பத³ட்டா²னேன சதுபாரிஸுத்³தி⁴ஸீலேன ஸகலஸங்கிலேஸமலவிஸுத்³தி⁴யா தோ⁴விதா விஸுத்³தா⁴. தேனாஹ ‘‘கத²ங் பனா’’திஆதி³. தத்த² தோ⁴வதீதி ஸுஜ்ஜ²தி. ஸட்டி²அஸீதிவஸ்ஸானீதி ஸட்டி²வஸ்ஸானி வா அஸீதிவஸ்ஸானி வா. மரணகாலேபி, பகே³வ அஞ்ஞஸ்மிங் காலே. மஹாஸட்டி²வஸ்ஸத்தே²ரோ வியாதி ஸட்டி²வஸ்ஸமஹாதே²ரோ விய. வேத³னாபரிக்³க³ஹமத்தம்பீதி எத்த² வேத³னாபரிக்³க³ஹோ நாம யதா²உப்பன்னங் வேத³னங் ஸபா⁴வஸரஸதோ உபதா⁴ரெத்வா புன பத³ட்டா²னதோ ‘‘அயங் வேத³னா ப²ஸ்ஸங் படிச்ச உப்பஜ்ஜதி, ஸோ ச ப²ஸ்ஸோ அனிச்சோ து³க்கோ² விபரிணாமத⁴ம்மோ’’தி லக்க²ணத்தயங் ஆரோபெத்வா பவத்திதவிபஸ்ஸனா. ஏவங் பஸ்ஸந்தேன ஹி ஸுகே²ன ஸக்கா ஸா வேத³னா அதி⁴வாஸேதுங் ‘‘வேத³னா ஏவ வேத³யதீ’’தி. வேத³னங் விக்க²ம்பெ⁴த்வாதி யதா²உப்பன்னங் து³க்க²வேத³னங் அனுவத்தித்வா விபஸ்ஸனங் ஆரபி⁴த்வா வீதி²படிபன்னாய விபஸ்ஸனாய தங் வினோதெ³த்வா. ஸங்ஸுமாரபதிதேனாதி கும்பீ⁴லேன விய பூ⁴மியங் உரேன நிபஜ்ஜமானேன. ‘‘நாஹ’’ந்திஆதி³ங் ததா² ஸீலரக்க²ணமேவ து³க்கரந்தி கத்வா வத³தி. ஸீலே பதிட்டி²தஸ்ஸ ஹி அரஹத்தங் ஹத்த²க³தங்யேவ. யதா²ஹ ‘‘ஸீலே பதிட்டா²ய…பே॰… விஜடயே ஜட’’ந்தி (ஸங்॰ நி॰ 1.23, 192; பேடகோ॰ 22; மி॰ ப॰ 2.9) சதூஸு புக்³க³லேஸு உக்³கா⁴டிதஞ்ஞுனோ ஏவாயங் விஸயோதி ஆஹ ‘‘உக்³கா⁴டிதஞ்ஞுதாயா’’தி. பஞ்ஞாய ஸீலங் தோ⁴வித்வாதி ஸீலங் ஆதி³மஜ்ஜ²பரியோஸானேஸு அக²ண்டா³தி³பா⁴வாபாத³னேன ஸந்ததிமஹாமத்தவத்து² த⁴ம்மபதே³ (த⁴॰ ப॰ அட்ட²॰ 2.ஸந்திமஹாமத்தவத்து²).
318. ‘‘கஸ்மா ஆஹா’’தி உபரிதே³ஸனாய காரணங் புச்ச²தி. லஜ்ஜா நாம ‘‘ஸீலஸ்ஸ ச ஜாதியா ச கு³ணதோ³ஸப்பகாஸனேன ஸமணேன கோ³தமேன புச்சி²தபஞ்ஹங் விஸ்ஸஜ்ஜேஸீ’’தி பரிஸாய பஞ்ஞாததா, ஸா ததா² விஸ்ஸஜ்ஜிதுமஸமத்த²தாய பி⁴ஜ்ஜிஸ்ஸதீதி அத்தோ², பட²மங் அலஜ்ஜமானோபி இதா³னி லஜ்ஜிஸ்ஸாமீதி வுத்தங் ஹோதி. பரமந்தி பமாணங். ‘‘எத்தகபரமா மய’’ந்தி பதா³னங் துல்யாதி⁴கரணதங் த³ஸ்ஸேதுங் ‘‘தே மய’’ந்தி வுத்தங். இத³ங் வுத்தங் ஹோதி – ‘‘ஸீலபஞ்ஞாண’’ந்தி வசனமேவ அம்ஹாகங் பரமங், தத³த்த²பூ⁴தானி பஞ்சஸீலானி, வேத³த்தயவிபா⁴வனங் பஞ்ஞஞ்ச லக்க²ணாதி³தோ நித்³தா⁴ரெத்வா ஜானநங் நத்தி², கேவலங் தத்த² வசீபரமாவ மயந்தி. அயங் பனெத்த² அட்ட²கதா²முத்தகனயோ – எத்தகபரமாதி எத்தகஉக்கங்ஸகோடிகா, பட²மங் பஞ்ஹாவிஸ்ஸஜ்ஜனாவ அம்ஹாகங் பரந்தி அதிரேகங். பா⁴ஸிதஸ்ஸாதி வசனஸ்ஸ ஸத்³த³ஸ்ஸ.
அயங் பன விஸேஸோதி ஸீலனித்³தே³ஸே நிய்யாதனமத்தங் அபெக்கி²த்வா வுத்தங். தேனாஹ ‘‘ஸீலமிச்சேவ நிய்யாதித’’ந்தி. ஸாமஞ்ஞப²லஸுத்தே (தீ³॰ நி॰ 1.150) ஹி ஸீலங் நிய்யாதெத்வாபி புன ஸாமஞ்ஞப²லமிச்சேவ நிய்யாதிதங். ஸப்³பே³ஸம்பி மஹக்³க³தசித்தானங் ஞாணஸம்பயுத்தத்தா, ஜா²னானஞ்ச தங் ஸம்பயோக³தோ ‘‘அத்த²தோ பஞ்ஞாஸம்பதா³’’தி வுத்தங். பஞ்ஞானித்³தே³ஸே ஹி ஜா²னபஞ்ஞங் அதி⁴ட்டா²னங் கத்வா பட²மங் விபஸ்ஸனாபஞ்ஞா நிய்யாதிதா. தேனாஹ ‘‘விபஸ்ஸனாபஞ்ஞாயா’’திஆதி³.
ஸோணத³ண்ட³உபாஸகத்தபடிவேத³னாகதா²வண்ணனா
321. த³ஹரோ யுவாதி எத்த² த³ஹரவசனேன பட²மயொப்³ப³னபா⁴வங் த³ஸ்ஸேதி. பட²மயொப்³ப³னகாலக³தோ ஹி ‘‘த³ஹரோ’’தி வுச்சதி. புத்தஸ்ஸ புத்தோ நத்தா நாம. நப்பஹோதீதி ந ஸம்பஜ்ஜதி, புத்தனத்தப்பமாணோபி ந ஹோதீதி அத்தோ². ‘‘ஆஸனா மே தங் வுட்டா²ன’’ந்தி ஏதஸ்ஸ அத்தா²பத்திங் த³ஸ்ஸேதுங் ‘‘மம அகா³ரவேனா’’திஆதி³ வுத்தங். ஏதந்தி அஞ்ஜலிபக்³க³ஹணங். அயஞ்ஹி யதா² ததா² அத்தனோ மஹாஜனஸ்ஸ ஸம்பா⁴வனங் உப்பாதெ³த்வா கோஹஞ்ஞேன பரே விம்ஹாபெத்வா லாபு⁴ப்பாத³னங் நிஜிகீ³ஸந்தோ விசரதி, தஸ்மாஸ்ஸ அதிவிய குஹகபா⁴வங் த³ஸ்ஸெந்தோ ‘‘இமினா கிரா’’திஆதி³ங் வத³தி அகா³ரவங் நாம நத்தீ²தி அகா³ரவவசனங் நாம நத்தி², நாயங் ப⁴க³வதி அகா³ரவேன ‘‘அஹஞ்சேவ கோ² பனா’’திஆதி³மாஹ, அத² கோ² அத்தனோ லாப⁴பரிஹானிப⁴யேனேவாதி வுத்தங் ஹோதி.
322. தங்க²ணானுரூபாயாதி யாதி³ஸீ ததா³ தஸ்ஸ அஜ்ஜா²ஸயப்பவத்தி, தத³னுரூபாயாதி மஜ்ஜே²பத³லோபேன அத்தோ². ததா³ தஸ்ஸ விவட்டஸன்னிஸ்ஸிதஸ்ஸ தாதி³ஸஸ்ஸ ஞாணபரிபாகஸ்ஸ அபா⁴வதோ கேவலங் அப்³பு⁴த³யஸன்னிஸ்ஸிதோ ஏவ அத்தோ² த³ஸ்ஸிதோதி ஆஹ ‘‘தி³ட்ட²த⁴ம்மிகஸம்பராயிகங் அத்த²ங் ஸந்த³ஸ்ஸெத்வா’’தி, பச்சக்க²தோ விபா⁴வெத்வாதி அத்தோ². குஸலே த⁴ம்மேதி தேபூ⁴மகே குஸலத⁴ம்மே, அயமெத்த² நிப்பரியாயதோ அத்தோ². பரியாயதோ பன ‘‘சதுபூ⁴மகே’’திபி வத்துங் வட்டதி லோகுத்தரகுஸலஸ்ஸபி ஆயதிங் லப்³ப⁴மானத்தா. ததா² ஹி வக்க²தி ‘‘ஆயதிங் நிப்³பா³னத்தா²ய, வாஸனாபா⁴கி³யாய தத்தா²தி குஸலே த⁴ம்மே யதா²ஸமாத³பிதே. நந்தி ஸோணத³ண்ட³ப்³ராஹ்மணங். ஸமுத்தேஜெத்வாதி ஸம்மதே³வ உபரூபரி நிஸானெத்வா புஞ்ஞகிரியாய திக்க²விஸத³பா⁴வமாபாதெ³த்வா. தங் பன அத்த²தோ தத்த² உஸ்ஸாஹஜனநமேவ ஹோதீதி ஆஹ ‘‘ஸஉஸ்ஸாஹங் கத்வா’’தி. தாய ச ஸஉஸ்ஸாஹதாயாதி ஏவங் புஞ்ஞகிரியாய ஸஉஸ்ஸாஹதா நியமதோ தி³ட்ட²த⁴ம்மிகாதி³அத்த²ஸம்பாத³னீதி யதா²வுத்தாய ஸஉஸ்ஸாஹதாய ச ஸம்பஹங்ஸெத்வாதி ஸம்ப³ந்தோ⁴. அஞ்ஞேஹி ச விஜ்ஜமானகு³ணேஹீதி ஏவரூபா தே கு³ணஸமங்கி³தா ச ஏகந்தேன தி³ட்ட²த⁴ம்மிகாதி³அத்த²னிப்பா²த³னீதி தஸ்மிங் விஜ்ஜமானேஹி, அஞ்ஞேஹி ச கு³ணேஹி ஸம்பஹங்ஸெத்வா ஸம்மதே³வ ஹட்ட²துட்ட²பா⁴வமாபாதெ³த்வாதி அத்தோ².
யதி³ ப⁴க³வா த⁴ம்மரதனவஸ்ஸங் வஸ்ஸி, அத² கஸ்மா ஸோ விஸேஸங் நாதி⁴க³ச்சீ²தி சோத³னங் ஸோதே⁴துங் ‘‘ப்³ராஹ்மணோ பனா’’திஆதி³ வுத்தங். குஹகதாயாதி வுத்தனயேன கோஹஞ்ஞகத்தா, இமினா பயோக³ஸம்பத்திஅபா⁴வங் த³ஸ்ஸேதி. யஜ்ஜேவங் கஸ்மா ப⁴க³வா தஸ்ஸ ததா² த⁴ம்மரதனவஸ்ஸங் வஸ்ஸீதி படிசோத³னம்பி ஸோதெ⁴ந்தோ ‘‘கேவலமஸ்ஸா’’திஆதி³மாஹ. தத்த² கேவலந்தி நிப்³பே³தா⁴ஸெக்க²பா⁴கி³யேன அஸம்மிஸ்ஸங். நிப்³பா³னத்தா²யாதி நிப்³பா³னாதி⁴க³மத்தா²ய, பரினிப்³பா³னத்தா²ய வா. ஆயதிங் விஸேஸாதி⁴க³மனூபாயபூ⁴தா புஞ்ஞகிரியாஸு பரிசயஸங்கா²தா வாஸனா ஏவ பா⁴கோ³, தஸ்மிங் உபாயபா⁴வேன பவத்தாதி வாஸனாபா⁴கி³யா. ந ஹி ப⁴க³வதோ நிரத்த²கா சதுப்பதி³ககா³தா²மத்தாபி த⁴ம்மதே³ஸனா அத்தி². தேனாஹ ‘‘ஸப்³பா³ புரிமபச்சி²மகதா²’’தி. ஆதி³தோ செத்த² பபு⁴தி யாவ ப்³ராஹ்மணஸ்ஸ விஸ்ஸஜ்ஜனாபரியோஸானங், தாவ புரிமகதா², ப⁴க³வதோ பன ஸீலபஞ்ஞாவிஸ்ஸஜ்ஜனா பச்சி²மகதா². ப்³ராஹ்மணேன வுத்தாபி ஹி பு³த்³த⁴கு³ணாதி³படிஸஞ்ஞுத்தா கதா² ஆயதிங் நிப்³பா³னத்தா²ய வாஸனாபா⁴கி³யா ஏவாதி. ஸேஸங் ஸுவிஞ்ஞெய்யமேவ.
இதி ஸுமங்க³லவிலாஸினியா தீ³க⁴னிகாயட்ட²கதா²ய பரமஸுகு²மக³ம்பீ⁴ரது³ரனுபோ³த⁴த்த²பரிதீ³பனாய ஸுவிமலவிபுலபஞ்ஞாவெய்யத்தியஜனநாய
ஸோணத³ண்ட³ஸுத்தவண்ணனா நிட்டி²தா.