6. மஹாலிஸுத்தவண்ணனா
ப்³ராஹ்மணதூ³தவத்து²வண்ணனா
359. ஏவங் ‘‘ஏவங் மே ஸுதங்…பே॰… வேஸாலியந்தி மஹாலிஸுத்த’’ந்தி ஆஹ. புனப்புனங் விஸாலபா⁴வூபக³மனதோதி எத்தா²யங் ஸங்கே²போ – பா³ராணஸிரஞ்ஞோ கிர அக்³க³மஹேஸியா மங்ஸபேஸிக³ப்³பே⁴ன த்³வே தா³ரகா நிப்³ப³த்தா தீ⁴தா ச புத்தோ ச, தேஸங் அஞ்ஞமஞ்ஞங் விவாஹேன ஸோளஸக்க²த்துங் புத்ததீ⁴துவஸேன த்³வே த்³வே தா³ரகா விஜாதா. ததோ தேஸங் தா³ரகானங் யதா²க்கமங் வட்³டெ⁴ந்தானங் பச்சேகங் ஸபரிவாரானங் ஆராமுய்யானநிவாஸட்டா²னபரிவாரஸம்பத்திங் க³ஹேதுங் அப்பஹோனகதாய நக³ரங் திக்க²த்துங் கா³வுதந்தரேன கா³வுதந்தரேன பரிக்கி²பிங்ஸு, ஏவங் தஸ்ஸ புனப்புனங் திபாகாரபரிக்கே²பேன விஸாலபா⁴வமுபக³தத்தா ‘‘வேஸாலீ’’த்வேவ நாமங் ஜாதங். தேன வுத்தங் ‘‘புனப்புனங் விஸாலபா⁴வூபக³மனதோ வேஸாலீதி லத்³த⁴னாமகே நக³ரே’’தி. வித்தா²ரகதா² செத்த² மஹாஸீஹனாத³ஸுத்தவண்ணனாய, (ம॰ நி॰ அட்ட²॰ 1.146) ரதனஸுத்தவண்ணனாய (கு²॰ பா॰ அட்ட²॰ வேஸாலிவத்து²; ஸு॰ நி॰ அட்ட²॰ 1.ரதனஸுத்தவண்ணனா) ச க³ஹேதப்³பா³. ப³ஹினக³ரேதி நக³ரதோ ப³ஹி, ந அம்ப³பாலிவனங் விய அந்தோனக³ரஸ்மிங். ஸயங்ஜாதந்தி ஸயமேவ ஜாதங் அரோபிமங். மஹந்தபா⁴வேனாதி ருக்க²க³ச்சா²னங், டி²தோகாஸஸ்ஸ ச மஹந்தபா⁴வேன. தேனேவாஹ ‘‘ஹிமவந்தேன ஸத்³தி⁴ங் ஏகாப³த்³த⁴ங் ஹுத்வா’’தி. யங் பன வேனயிகானங் மதேன வினயட்ட²கதா²யங் வுத்தங் –
‘‘தத்த² மஹாவனங் நாம ஸயங்ஜாதங் அரோபிமங் ஸபரிச்சே²த³ங் மஹந்தங் வனங். கபிலவத்து²ஸாமந்தா பன மஹாவனங் ஹிமவந்தேன ஸஹ ஏகாப³த்³த⁴ங் அபரிச்சே²த³ங் ஹுத்வா மஹாஸமுத்³த³ங் ஆஹச்ச டி²தங், இத³ங் தாதி³ஸங் ந ஹோதீ’’தி (பாரா॰ அட்ட²॰ 2.162).
தங் மஜ்ஜி²மட்ட²கதா²யஞ்ஹி (ம॰ நி॰ அட்ட²॰ 2.352) ஸங்யுத்தட்ட²கதா²யஞ்ச (ஸங்॰ நி॰ அட்ட²॰ 1.37) ததே²வ வுத்தங். இத⁴ பன தீ³க⁴பா⁴ணகானங் மதேன ஏவங் வுத்தந்தி த³ட்ட²ப்³ப³ங். யதி³ ச ‘‘அஹுத்வா’’தி கத்த²சி பாடோ² தி³ஸ்ஸதி, ஏவங் ஸதி ஸப்³பே³ஸம்பி கூடாகா³ரஸாலாஸங்கே²பேனாதி ஹங்ஸமண்ட³லாகாரஸங்கா²தஹங்ஸவட்டகச்ச²ன்னேன கூடாகா³ரஸாலானியாமேன, ததா² கதத்தா பாஸாதோ³யேவ ‘‘கூடாகா³ரஸாலா’’தி வுத்தோ, தப்³போ³ஹாரேன பன ஸகலோபி ஸங்கா⁴ராமோதி வுத்தங் ஹோதி. வினயட்ட²கதா²யங் (பாரா॰ அட்ட²॰ 2.162) து ஏவங் வுத்தங் –
‘‘கூடாகா³ரஸாலா பன மஹாவனங் நிஸ்ஸாய கதே ஆராமே கூடாகா³ரங் அந்தோகத்வா ஹங்ஸவட்டகச்ச²த³னேன கதா ஸப்³பா³காரஸம்பன்னா பு³த்³த⁴ஸ்ஸ ப⁴க³வதோ க³ந்த⁴குடி வேதி³தப்³பா³’’தி.
கோஸலேஸு ஜாதா, ப⁴வா, தே வா நிவாஸோ ஏதேஸந்தி கோஸலகா. ஏவங் மாக³த⁴கா. ஜனபத³வாசினோ ஹி பாயதோ புல்லிங்க³புது²வசனா. யஸ்ஸ அகரணே புக்³க³லோ மஹாஜானியோ ஹோதி, தங் கரணங் அரஹதீதி கரணீயந்தி வுச்சதி. தேனாஹ ‘‘அவஸ்ஸங் கத்தப்³ப³கம்மேனா’’தி. அகாதும்பி வட்டதி அஸதி ஸமவாயே, தஸ்மா ஸமவாயே ஸதி கத்தப்³ப³தோ தங் கிச்சந்தி வுச்சதீதி அதி⁴ப்பாயோ.
360. யா பு³த்³தா⁴னங் உப்பஜ்ஜனாரஹா நானத்தஸஞ்ஞா, தாஸங் வஸேன ‘‘நானாரம்மணசாரதோ’’தி வுத்தங், நானாரம்மணப்பவத்திதோதி அத்தோ². ஸம்ப⁴வந்தஸ்ஸேவ ஹி படிஸேதோ⁴, ந அஸம்ப⁴வந்தஸ்ஸ. படிக்கம்மாதி நிவத்தெத்வா ததா² சித்தங் அனுப்பாதெ³த்வா. ஸல்லீனோதி ஜா²னஸமாபத்தியா ஏகத்தாரம்மணங் அல்லீனோ. நிலீனோதி தஸ்ஸேவ வேவசனங். தேன வுத்தங் ‘‘ஏகீபா⁴வ’’ந்திஆதி³. ஸபரிவாரத்தா அனேகோபி ததா³ ஏகோ விய ப⁴வதீதி ஏகீபா⁴வோ, தங் ஏகீபா⁴வங். யேனாயஸ்மா நாகி³தோ, தங் ஸந்தா⁴ய ‘‘தஸ்மா டா²னா’’தி வுத்தங்.
ஒட்ட²த்³த⁴லிச்ச²விவத்து²வண்ணனா
361. அத்³தொ⁴ட்ட²தாயாதி உபட்³டொ⁴ட்ட²தாய. தஸ்ஸ கிர உத்தரொட்ட²ஸ்ஸ அப்பகதாய திரியங் பா²லெத்வா அத்³த⁴மபனீதங் விய கா²யதி சத்தாரோ த³ந்தே, த்³வே ச தா³டா² ந சா²தே³தி, தேன நங் ‘‘ஒட்ட²த்³தோ⁴’’தி வோஹரதி. கேசி பன ‘‘அதோ⁴-ஸத்³தே³ன பாட²ங் பரிகப்பெத்வா ஹெட்டா² ஒட்ட²ஸ்ஸ ஓலம்ப³கதாய ‘‘ஒட்டா²தோ⁴’’தி அத்த²ங் வத³ந்தி, தத³யுத்தமேவ ததா² பாட²ஸ்ஸ அதி³ஸ்ஸனதோ, ஆசரியேன ‘‘புரேப⁴த்த’’ந்திஆதி³. க²ந்த⁴கே, (மஹாவ॰ 289) மஹாபரினிப்³பா³னஸுத்தே (தீ³॰ நி॰ 2.161) ச ஆக³தனயேன ‘‘நீலபீதாதி³…பே॰… தாவதிங்ஸபரிஸஸப்படிபா⁴கா³யா’’தி வுத்தங். அயங் பன வேஸாலீ ப⁴க³வதோ காலே இத்³தா⁴ சேவ வேபுல்லப்பத்தா ச அஹோஸி. தத்த² ஹி ராஜூனமேவ ஸத்த ஸஹஸ்ஸானி, ஸத்த ஸதானி, ஸத்த ச ராஜானோ அஹேஸுங், ததா² யுவராஜஸேனாபதிப⁴ண்டா³கா³ரிகபபு⁴தீனம்பி, பாஸாத³கூடாகா³ரஆராமபொக்க²ரணிஆத³யோபி தப்பரிமாணாயேவ, ப³ஹுஜனா, ஆகிண்ணமனுஸ்ஸா, ஸுபி⁴க்கா² ச. தேன வுத்தங் ‘‘மஹதியா லிச்ச²விபரிஸாயா’’தி. தஸ்ஸ பன குலஸ்ஸ ஆதி³பூ⁴தானங் யதா²வுத்தானங் மங்ஸபேஸியா நிப்³ப³த்ததா³ரகானங் தாபஸேன பாயிதங் யங் கீ²ரங் உத³ரங் பவிஸதி, ஸப்³ப³ங் தங் மணிபா⁴ஜனக³தங் விய தி³ஸ்ஸதி, சரிமகப⁴வே போ³தி⁴ஸத்தே குச்சி²க³தே போ³தி⁴ஸத்தமாது விய உத³ரச்ச²வியா அதிவிப்பஸன்னதாய தே நிச்ச²வீ அஹேஸுங். அபரே பனாஹு ‘‘ஸிப்³பெ³த்வா ட²பிதா விய நேஸங் அஞ்ஞமஞ்ஞங் லீனா ச²வி அஹோஸீ’’தி. ஏவங் தே நிச்ச²விதாய வா லீனச்ச²விதாய வா லிச்ச²வீதி பஞ்ஞாயிங்ஸு, நிருத்தினயேன செத்த² பத³ஸித்³தி⁴, தப்³ப³ங்ஸே உப்பன்னா ஸப்³பே³பி லிச்ச²வயோ நாம ஜாதா. தேனாஹ ‘‘லிச்ச²விபரிஸாயா’’தி, லிச்ச²விராஜூனங், லிச்ச²விவங்ஸபூ⁴தாய வா பரிஸாயாதி அத்தோ². மஹந்தங் யஸங் லாதி க³ண்ஹாதீதி மஹாலி யதா² ‘‘ப⁴த்³தா³லீ’’தி. மூலனாமந்தி மாதாபிதூஹி கதனாமங்.
362. ஸாஸனே யுத்தபயுத்தோதி பா⁴வனமனுயுத்தோ. ஸப்³ப³த்த² ஸீஹஸமானவுத்தினோபி ப⁴க³வதோ பரிஸாய மஹத்தே ஸதி தத³ஜ்ஜா²ஸயானுரூபங் பவத்தியமானாய த⁴ம்மதே³ஸனாய விஸேஸோ ஹோதீதி ஆஹ ‘‘மஹந்தேன உஸ்ஸாஹேன த⁴ம்மங் தே³ஸெஸ்ஸதீ’’தி.
‘‘விஸ்ஸாஸிகோ’’தி வத்வா தமஸ்ஸ விஸ்ஸாஸிகபா⁴வங் விபா⁴வேதுங் ‘‘அயஞ்ஹீ’’திஆதி³ வுத்தங். தூ²லஸரீரோதி வட²ரஸரீரோ. தே²ரஸ்ஸ கீ²ணாஸவபா⁴வதோ ‘‘ஆலஸியபா⁴வோ அப்பஹீனோ’’தி ந வத்தப்³போ³, வாஸனாலேஸங் பன உபாதா³ய ‘‘ஈஸகங் அப்பஹீனோ விய ஹோதீ’’தி வுத்தங். ந ஹி ஸாவகானங் பு³த்³தா⁴னமிவ ஸவாஸனா கிலேஸா பஹீயந்தி. யதா²வுத்தங் பாஸாத³மேவ ஸந்தா⁴ய ‘‘கூடாகா³ரமஹாகே³ஹா’’தி வுத்தங். பாசீனமுகா²தி பாசீனபமுகா².
363. வினெய்யஜனானுபரோதே⁴ன ‘‘அத² கோ²’’திஆதி³. க³ந்த⁴குடிதோ நிக்க²மனவேலாயஞ்ஹி ச²ப்³ப³ண்ணா பு³த்³த⁴ரஸ்மியோ ஆவேளாவேளா யமலா ‘‘ஸங்ஸூசிதனிக்க²மனோ’’தி.
364. ‘‘அஜ்ஜா’’தி வுத்ததி³வஸதோ அதீதமனந்தரங் ஹிய்யோதி³வஸங் புரிமங் நாம, ததா² ‘‘ஹிய்யோ’’தி வுத்ததி³வஸதோ பரங் புரிமதரங் அதிஸயேன புரிமத்தா. இதி இமேஸு த்³வீஸு தி³வஸேஸு வவத்தி²தோ யதா²க்கமங் புரிமபுரிமதரபா⁴வோ. ஏவங் ஸந்தேபி யதெ³த்த² ‘‘புரிமதர’’ந்தி வுத்தங், ததோ பபு⁴தி யங் யங் ஓரங், தங் தங் புரிமங். யங் யங் பரங், தங் தங் புரிமதரந்தி த³ஸ்ஸெந்தோ ‘‘ததோ பட்டா²யா’’திஆதி³மாஹ. ஓரபாரபா⁴வஸ்ஸ விய, ஹி தி³ஸாவிதி³ஸாபா⁴வஸ்ஸ விய ச புரிமபுரிமதரபா⁴வஸ்ஸ அபெக்கா²ஸித்³தி⁴. மூலதி³வஸதோதிஆதி³தி³வஸதோ. அக்³கே³தி உபயோக³த்தே² பு⁴ம்மவசனங், உபயோக³வசனஸ்ஸ வா ஏ-காராதே³ஸோதி த³ஸ்ஸேதி ‘‘அக்³க³’’ந்தி இமினா, பட²மந்தி அத்தோ². தங் பனெத்த² பரா அதீதா கோடியேவாதி ஆஹ ‘‘பரகோடிங் கத்வா’’தி. யங்-ஸத்³தோ³ பரிச்சே²தே³ நிபாதோ, தப்பயோகே³ன சாயங் ‘‘விஹராமீ’’தி வத்தமானபயோகோ³, அத்தோ² பன அதீதவஸேன வேதி³தப்³போ³தி த³ஸ்ஸேதுங் ‘‘யாவ விஹாஸி’’ந்தி வுத்தங். தஸ்ஸாதி தி³வஸஸ்ஸ. பட²மவிகப்பே ‘‘விஹராமீ’’தி இமஸ்ஸ ‘‘யத³க்³கே³’’தி இமினா உஜுகங் தாவ ஸம்ப³ந்தி⁴த்வா பச்சா² ‘‘நசிரங் தீணி வஸ்ஸானீ’’தி பமாணவசனங் யோஜேதப்³ப³ங். து³தியவிகப்பே பன ‘‘நசிரங் தீணி வஸ்ஸானீ’’தி இமேஹிபி குடிலங் ஸம்ப³ந்தோ⁴ கத்தப்³போ³. நசிரந்தி சேதங் பா⁴வனபுங்ஸகங், அச்சந்தஸஞ்ஞோக³ங் வா. தஞ்ஹி பமாணதோ விஸேஸேதுங் ‘‘தீணி வஸ்ஸானீ’’தி வத³தி. தேனாஹ ‘‘நசிரங் விஹாஸிங் தீணியேவ வஸ்ஸானீ’’தி.
அயந்தி ஸுனக்க²த்தோ. பியஜாதிகானீதி இட்ட²ஸபா⁴வானி. ஸாதஜாதிகானீதி மது⁴ரஸபா⁴வானி. மது⁴ரஸதி³ஸதாய ஹி ‘‘மது⁴ர’’ந்தி மனோரமங் வுச்சதி. ஆரம்மணங் கரொந்தேன காமேன உபஸங்ஹிதானீதி காமூபஸங்ஹிதானி, காமனீயானி. தேனாஹ ‘‘காமஸ்ஸாத³யுத்தானீ’’தி, ஆரம்மணிகேன காமஸங்கா²தேன அஸ்ஸாதே³ன ஸஞ்ஞுத்தானி, காமஸங்கா²தஸ்ஸ வா அஸ்ஸாத³ஸ்ஸ யொக்³யானீதி அத்தோ². ஸரீரஸண்டா²னேதி ஸரீரபி³ம்பே³, ஆதா⁴ரே சேதங் பு⁴ம்மங். தஸ்மா ஸத்³தே³னாதி தங் நிஸ்ஸாய ததோ உப்பன்னேன ஸத்³தே³னாதி ப⁴விதப்³ப³பதே³னேவ ஸம்ப³ந்தி⁴தப்³ப³ங். மது⁴ரேனாதி இட்டே²ன ஸாதேன. கண்ணஸக்க²லியந்தி கண்ணபட்டிகாயங்.
எத்தாவதாதி தி³ப்³ப³ஸோதஞாணபரிகம்மஸ்ஸ அகத²னமத்தேன. ‘‘அத்தனா ஞாதம்பி ந கதே²தி, கிங் இமஸ்ஸ ஸாஸனே அதி⁴ட்டா²னேனா’’தி குஜ்ஜ²ந்தோ ப⁴க³வதி ஆகா⁴தங் ப³ந்தி⁴த்வா, ஸஹ குஜ்ஜ²னேனேவ சேஸ ஜா²னாபி⁴ஞ்ஞா பரிஹாயி. சிந்தேஸீதி ‘‘கஸ்மா நு கோ² ஸோ மய்ஹங் தங் பரிகம்மங் ந கதே²ஸீ’’தி அனுக்கமேனாதி பாதி²கஸுத்தே, (தீ³॰ நி॰ 3.3 ஆத³யோ) மஹாஸீஹனாத³ஸுத்தே (தீ³॰ நி॰ 1.381) ச ஆக³தனயேன தங் தங் அயுத்தமேவ சிந்தெந்தோ, பா⁴ஸந்தோ, கரொந்தோ ச அனுக்கமேன ப⁴க³வதி ப³த்³தா⁴கா⁴ததாய ஸாஸனே பதிட்ட²ங் அலப⁴ந்தோ கி³ஹிபா⁴வங் பத்வா தமத்த²ங் கதே²தி.
ஏகங்ஸபா⁴விதஸமாதி⁴வண்ணனா
366-371. ஏகங்ஸாயாதி தத³த்தே² சதுத்தீ²வசனங், ஏகங்ஸத்த²ந்தி அத்தோ². அங்ஸஸத்³தோ³ செத்த² கொட்டா²ஸபரியாயோ, ஸோ ச அதி⁴காரதோ தி³ப்³ப³ரூபத³ஸ்ஸனதி³ப்³ப³ஸத்³த³ஸவனவஸேன வேதி³தப்³போ³தி ஆஹ ‘‘ஏககொட்டா²ஸாயா’’திஆதி³. வா-ஸத்³தோ³ செத்த² விகப்பனே ஏகங்ஸஸ்ஸேவாதி⁴ப்பேதத்தா. அனுதி³ஸாயாதி புரத்தி²மத³க்கி²ணாதி³பே⁴தா³ய சதுப்³பி³தா⁴ய அனுதி³ஸாய. உப⁴யகொட்டா²ஸாயாதி தி³ப்³ப³ரூபத³ஸ்ஸனத்த²ங், தி³ப்³ப³ஸத்³த³ஸவனத்த²ஞ்ச. பா⁴விதோதி யதா² தி³ப்³ப³சக்கு²ஞாணங், தி³ப்³ப³ஸோதஞாணஞ்ச ஸமதி⁴க³தங் ஹோதி, ஏவங் பா⁴விதோ. தயித³ங் விஸுங் விஸுங் பரிகம்மகரணேன இஜ்ஜ²ந்தீஸு வத்தப்³ப³ங் நத்தி², ஏகஜ்ஜ²ங் இஜ்ஜ²ந்தீஸுபி கமேனேவ கிச்சஸித்³தி⁴ ப⁴வதி ஏகஜ்ஜ²ங் கிச்சஸித்³தி⁴யா அஸம்ப⁴வதோ. பாளியம்பி ஹி ‘‘தி³ப்³பா³னஞ்ச ரூபானங் த³ஸ்ஸனாய, தி³ப்³பா³னஞ்ச ஸத்³தா³னங் ஸவனாயா’’தி இத³ங் ஏகஸ்ஸ உப⁴யஸமத்த²தாஸந்த³ஸ்ஸனமேவ, ந ஏகஜ்ஜ²ங் கிச்சஸித்³தி⁴ஸம்ப⁴வஸந்த³ஸ்ஸனங். ‘‘ஏகங்ஸபா⁴விதோ ஸமாதி⁴ ஹேதூ’’தி இமினா ஸுனக்க²த்தோ தி³ப்³ப³சக்கு²ஞாணாய ஏவ பரிகம்மஸ்ஸ கதத்தா விஜ்ஜமானம்பி தி³ப்³ப³ஸத்³த³ங் நாஸ்ஸோஸீதி த³ஸ்ஸேதி.
372. தி³ப்³ப³சக்கு²ஞாணதோ தி³ப்³ப³ஸோதஞாணமேவ ஸெட்ட²ந்தி மஞ்ஞமானோ மஹாலி ஏதமத்த²ங் புச்ச²தீதி ஆஹ ‘‘இத³ங் தி³ப்³ப³ஸோதேன…பே॰… மஞ்ஞே’’தி. அபண்ணகந்தி அவிரஜ்ஜ²னகங், அனவஜ்ஜங் வா. ஸமாதி⁴யேவ பா⁴வேதப்³ப³ட்டே²ன ஸமாதி⁴பா⁴வனா ‘‘உப⁴யங்ஸபா⁴விதானங் ஸமாதீ⁴ன’’ந்தி வுத்தங். பா³ஹிரா ஏதா ஸமாதி⁴பா⁴வனா அனிய்யானிகத்தா. தா ஹி இதோ பா³ஹிரகானம்பி இஜ்ஜ²ந்தி. ந அஜ்ஜ²த்திகா ப⁴க³வதா ஸாமுக்கங்ஸிகபா⁴வேன அப்பவேதி³தத்தா. ந ஹி தே ஸச்சானி விய ஸாமுக்கங்ஸிகா. யத³த்த²ந்தி யேஸங் அத்தா²ய, அபே⁴தே³பி பே⁴த³வசனமேதங், யஸ்ஸ வா விஸேஸனபூ⁴தஸ்ஸ அத்தா²ய. தேதி அரியப²லத⁴ம்மே. ‘‘த’’ந்திபி அது⁴னா பாடோ². தே ஹி ஸச்சி²காதப்³பா³, ‘‘அத்தி² கோ² மஹாலி அஞ்ஞேவ த⁴ம்மா…பே॰… யேஸங் ஸச்சி²கிரியாஹேது பி⁴க்கூ² மயி ப்³ரஹ்மசரியங் சரந்தீ’’தி ஸச்சி²காதப்³ப³த⁴ம்மா ச இத⁴ வுத்தா.
சதுஅரியப²லவண்ணனா
373. ஸங்யோஜெந்தீதி தஸ்மாதி யஸ்மா வட்டது³க்க²ப⁴யே ஸங்யோஜனதோ தத்த² ஸத்தே ஸங்யோஜெந்தி நாம, தஸ்மா. கத்த²சி ‘‘வட்டது³க்க²மயே ரதே²’’தி பாடோ², ந போராணோ ததா² ஆசரியேன அவண்ணிதத்தா. மக்³க³ஸோதங் ஆபன்னோ, ந பஸாதா³தி³ஸோதங். ‘‘ஸோதோதி பி⁴க்க²வே அரியமக்³க³ஸ்ஸேதங் அதி⁴வசன’’ந்தி ஹி வுத்தங். ஆபன்னோதி ச ஆதி³தோ பத்தோதி அத்தோ² ஆ-உபஸக்³க³ஸ்ஸ ஆதி³கம்மனி பவத்தனதோ, இத³ங் பன ப²லட்ட²வஸேன வத³தி. அதீதகாலவசனஞ்ஹேதங், மக்³க³க்க²ணே பன மக்³க³ஸோதங் ஆபஜ்ஜதி நாம. தேனேவாஹ த³க்கி²ணவிப⁴ங்கே³ ‘‘ஸோதாபன்னே தா³னங் தே³தி, ஸோதாபத்திப²லஸச்சி²கிரியாய படிபன்னே தா³னங் தே³தீ’’தி (ம॰ நி॰ 3.379) அபதனத⁴ம்மோதி அனுபபஜ்ஜனஸபா⁴வோ. த⁴ம்மனியாமேனாதி உபரிமக்³க³த⁴ம்மனியாமேன. ஹெட்டி²மந்தேன ஸத்தமப⁴வதோ உபரி அனுபபஜ்ஜனத⁴ம்மதாய வா நியதோதி அட்ட²கதா²முத்தகனயோ. பரங் அயனங் பராக³தி அஸ்ஸ அத்தீ²தி அத்தோ². அனேனாதி புன ததியஸமாஸவசனங், வா-ஸத்³தோ³ செத்த² லுத்தனித்³தி³ட்டோ².
தனுத்தங் நாம பவத்தியா மந்த³தா, விரளதா சாதி வுத்தங் ‘‘தனுத்தா’’திஆதி³. கரஹசீதி நிபாதமத்தங், பரியாயவசனங் வா. ‘‘ஓரேன சே மாஸோ ஸேஸோ கி³ம்ஹானந்தி வஸ்ஸிகஸாடிகசீவரங் பரியேஸெய்யா’’திஆதீ³ஸு (பாரா॰ 627) விய ஓர-ஸத்³தோ³ ந அதிரேகத்தோ²தி ஆஹ ‘‘ஹெட்டா²பா⁴கி³யான’’ந்தி, ஹெட்டா²பா⁴க³ஸ்ஸ காமப⁴வஸ்ஸ பச்சயபா⁴வேன ஹிதானந்தி அத்தோ². ‘‘ஸுத்³தா⁴வாஸபூ⁴மிய’’ந்தி ஓபபாதிகோதி உபபாதிகோ உபபாதனே ஸாது⁴காரீ. தேனாஹ ‘‘ஸேஸயோனிபடிக்கே²பவசனமேத’’ந்தி பரினிப்³பா³னத⁴ம்மோதி அனுபாதி³ஸேஸாய நிப்³பா³னதா⁴துயா பரினிப்³பா³னஸபா⁴வோ. விமுச்சதீதி விமுத்தி, சித்தமேவ விமுத்தி சேதோவிமுத்தீதி வுத்தங் ‘‘சித்தவிஸுத்³தி⁴’’ந்திஆதி³. சித்தஸீஸேன செத்த² ஸமாதி⁴ க³ஹிதோ ‘‘ஸீலே பதிட்டா²ய நரோ ஸபஞ்ஞோ, சித்தங் பஞ்ஞஞ்ச பா⁴வய’’ந்திஆதீ³ஸு (ஸங்॰ நி॰ 1.23, 192; பேடகோ॰ 22; மி॰ ப॰ 1.1.9) விய. பஞ்ஞாவிமுத்திந்தி எத்தா²பி ஏஸேவ நயோ. தேனாஹ ‘‘அரஹத்தப²லபஞ்ஞாவ பஞ்ஞாவிமுத்தீ’’தி. ஸாமந்தி அத்தனாவ, அபரப்பச்சயேனாதி அத்தோ². ‘‘அபி⁴ஜானித்வா’’தி இமினா த்வாதி³பச்சயகாரியஸ்ஸ ய-காரஸ்ஸ லோபோ த³ஸ்ஸிதோ. ‘‘அபி⁴ஞ்ஞாயா’’தி இமினா பன நா-வசனகாரியஸ்ஸாதி த³ட்ட²ப்³ப³ங். ஸச்சீ²தி பச்சக்க²த்தே² நேபாதிகங். பச்சக்க²கரணங் நாம அனுஸ்ஸவாகாரபரிவிதக்காதி³கே முஞ்சித்வா ஸரூபதோ ஆரம்மணகரணங்.
அரியஅட்ட²ங்கி³கமக்³க³வண்ணனா
374-5. உப்பதித்வாதி படிபதா³, ஸா ச தஸ்ஸ புப்³ப³பா⁴கோ³ ஏவாதி அரியமக்³கோ³ புப்³ப³பா⁴க³படிபதா³னாமேன இத⁴ வுத்தோ. ஆததவிததாதி³வஸேன பஞ்சங்கி³கங். தி³ஸாவிதி³ஸானிவிட்ட²பதே³ஸேன அட்ட²ங்கி³கோ. அட்ட²ங்க³தோ முத்தோ அஞ்ஞோ கோசி அட்ட²ங்கி³கோ நாம மக்³கோ³ நத்தீ²தி ஆஹ ‘‘அட்ட²ங்க³மத்தோயேவா’’திஆதி³னா. ந ஹி அவயவவினிமுத்தோ ஸமுதா³யோ நாம கோசி அத்தீ²தி. தஸ்மா ‘‘அட்ட² அங்கா³னி அஸ்ஸாதி அஞ்ஞபத³த்த²ஸமாஸங் அகத்வா ‘அட்ட² அங்கா³னி அட்ட²ங்கா³னி, தானி அஸ்ஸ ஸந்தீதி அட்ட²ங்கி³கோ’தி ஸமாஸக³ப்³ப⁴தத்³தி⁴தவஸேன பத³ஸித்³தி⁴ காதப்³பா³’’தி (தீ³॰ நி॰ டீ॰ 1.374, 375) ஆசரியேன வுத்தங், அதி⁴ப்பாயோ செத்த² சிந்தேதப்³போ³. அஞ்ஞபத³த்த²ஸமாஸே ஹி கதே ந ஸக்கா அட்ட²ங்க³அட்ட²ங்கி³கானங் பே⁴தோ³ அஞ்ஞமஞ்ஞங் விபரியாயங் கத்வாபி நியமேதுங் ப்³யாஸே உப⁴யபத³த்த²பரபா⁴வேன ஸஹேவ ஸங்க்²யாபரிச்சே²தே³ன அத்தா²பத்திதோ. ஸமாஸக³ப்³பே⁴ பன தத்³தி⁴தே கதே ஸக்கா ஏவ தேஸங் பே⁴தோ³ அஞ்ஞமஞ்ஞங் விபரியாயங் கத்வா நியமேதுங் ஸமாஸே உத்தரபத³த்த²பரபா⁴வேன வினாவ ஸங்க்²யாபரிச்சே²தே³ன அத்தா²பத்திதோ. ஏகத்தி²பா⁴வலக்க²ணோ ஹி ஸமாஸோதி. த⁴ம்மதா³யாத³ஸுத்தந்தடீகாயங் பன ஆசரியேனேவ ஏவங் வுத்தங் ‘‘யஸ்மா மக்³க³ங்க³ஸமுதா³யே
இதா³னி அட்ட²ங்கி³கமக்³கே³ லக்க²ணதோ, கிச்சக²ணாரம்மணபே⁴த³கமதோ ச வினிச்ச²யங் த³ஸ்ஸெந்தோ ‘‘தத்தா²’’திஆதி³மாஹ. ஸம்மாத³ஸ்ஸனலக்க²ணாதி அவிபரீதங் யாதா²வதோ சதுன்னமரியஸச்சானங் பச்சக்க²மேவ த³ஸ்ஸனஸபா⁴வா. ஸம்மா அபி⁴னிரோபனலக்க²ணோதி நிப்³பா³னாரம்மணே சித்தஸ்ஸ அவிபரீதமபி⁴னிரோபனஸபா⁴வோ. ஸம்மா பரிக்³க³ஹணலக்க²ணாதி சதுரங்க³ஸமன்னாக³தா வாசா ஜனே ஸங்க³ண்ஹாதீதி தப்³பி³பக்க²தோ விரதிஸபா⁴வா ஸம்மாவாசா பே⁴த³கரமிச்சா²வாசப்பஹானேன ஜனே, ஸம்பயுத்தத⁴ம்மே ச பரிக்³க³ண்ஹனகிச்சவதீ ஹோதி, ஏவங் அவிபரீதங் பரிக்³க³ஹணஸபா⁴வா. ஸம்மா ஸமுட்டா²பனலக்க²ணோதி யதா² சீவரகம்மாதி³கோ கம்மந்தோ ஏகங் காதப்³ப³ங் ஸமுட்டா²பேதி, தங்தங்கிரியானிப்பா²த³கோ வா சேதனாஸங்கா²தோ கம்மந்தோ ஹத்த²பாத³சலனாதி³கங் கிரியங் ஸமுட்டா²பேதி, ஏவங் ஸாவஜ்ஜகத்தப்³ப³கிரியாஸமுட்டா²பகமிச்சா²கம்மந்தப்பஹானேன ஸம்மாகம்மந்தோ நிரவஜ்ஜஸமுட்டா²பனகிச்சவா ஹோதி, ஸம்பயுத்தே ச ஸமுட்டா²பெந்தோ ஏவ பவத்ததீதி அவிபரீதங் ஸமுட்டா²பனஸபா⁴வோ. ஸம்மா வோதா³பனலக்க²ணோதி காயவாசானங், க²ந்த⁴ஸந்தானஸ்ஸ ச ஸங்கிலேஸபூ⁴தமிச்சா²ஜீவப்பஹானேன அவிபரீதங் வோதா³பனஸபா⁴வோ. ஸம்மா பக்³க³ஹலக்க²ணோதி ஸஸம்பயுத்தத⁴ம்மஸ்ஸ சித்தஸ்ஸ ஸங்கிலேஸபக்கே² பதிதுமத³த்வா ஸம்மா உபட்டா²னலக்க²ணாதி தாதி³பா⁴வலக்க²ணேன அவிபரீதங் தத்த² உபட்டா²னஸபா⁴வோ. ஸம்மா ஸமாதா⁴னலக்க²ணோதி விக்கே²பவித்³த⁴ங்ஸனேன அவிபரீதங் சித்தஸ்ஸ ஸமாத³ஹனஸபா⁴வோ.
ஸஹஜேகட்ட²தாய தி³ட்டே²கட்டா² அவிஜ்ஜாத³யோ மிச்சா²தி³ட்டி²தோ அஞ்ஞே அத்தனோ பச்சனீககிலேஸா நாம. பஸ்ஸதீதி பகாஸேதி கிச்சபடிவேதே⁴ன படிவிஜ்ஜ²தி. தேனாஹ ‘‘தப்படி…பே॰… அஸம்மோஹதோ’’தி. இத³ஞ்ஹி தஸ்ஸா பஸ்ஸனாகாரத³ஸ்ஸனங். தேனேவ ஹி ஸம்மாதி³ட்டி²ஸங்கா²தேன அங்கே³ன தத்த² பச்சவெக்க²ணா பவத்ததி. புரிமானி த்³வே கிச்சானி ஸப்³பே³ஸமேவ ஸாதா⁴ரணானீதி ஆஹ ‘‘ஸம்மாஸங்கப்பாத³யோபீ’’திஆதி³. ‘‘ததே²வா’’தி இமினா ‘‘அத்தனோ பச்சனீககிலேஸேஹி ஸத்³தி⁴’’ந்தி இத³மனுகட்³ட⁴தி.
புப்³ப³பா⁴கே³தி நானக்க²ணா. அனிச்சாதி³லக்க²ணவிஸயத்தா நானாரம்மணா. மக்³க³ஸ்ஸ ஏகசித்தக்க²ணிகத்தா ஏகக்க²ணா. நிப்³பா³னாரம்மணத்தா ஏகாரம்மணா. கிச்சதோதி புப்³ப³பா⁴கே³ து³க்கா²தி³ஞாணேஹி கத்தப்³பே³ன இத⁴ ஸாதிஸயங் நிப்³ப³த்தேன கிச்சேன, இமஸ்ஸேவ வா ஞாணஸ்ஸ து³க்கா²தி³ப்பகாஸனகிச்சேன. சத்தாரி நாமானி லப⁴தி சதூஸு ஸச்சேஸு காதப்³ப³கிச்ச நிப்³ப³த்திதோ.தீணி நாமானி லப⁴தி காமஸங்கப்பாதி³ப்பஹானநிப்³ப³த்திதோ. ஸிக்கா²பத³விப⁴ங்கே³ ‘‘விரதிசேதனா, ஸப்³பே³ ஸம்பயுத்தத⁴ம்மா ச ஸிக்கா²பதா³னீ’’தி (விப⁴॰ 704) வுச்சந்தி. தத்த² பன பதா⁴னானங் விரதிசேதனானங் வஸேன ‘‘விரதியோபி ஹொந்தி சேதனாயோபீ’’தி வுத்தங், முஸாவாதா³தீ³ஹி விரமணகாலே வா விரதியோ, ஸுபா⁴ஸிதாதி³வாசாபா⁴ஸனாதி³காலே சேதனாயோ ஹொந்தீதி யோஜேதப்³பா³. சேதனானங் அமக்³க³ங்க³த்தா ‘‘மக்³க³க்க²ணே பன விரதியோவா’’தி ஆஹ. ஏகஸ்ஸேவ ஞாணஸ்ஸ து³க்கா²தி³ஞாணதா விய, ஏகாயேவ விரதியா முஸாவாதா³தி³விரதிபா⁴வோ விய ச ஏகாய ஏவ சேதனாய ஸம்மாவாசாதி³கிச்சத்தயஸாத⁴னாஸம்ப⁴வேன ஸம்மாவாசாதி³பா⁴வாஸித்³தி⁴தோ, தங்ஸித்³தி⁴யஞ்ச அங்க³த்தயத்தாஸித்³தி⁴தோ ச ஏவங் வுத்தந்திபி த³ட்ட²ப்³ப³ங். இமினா சேதாஸங் து³வித⁴தங், அபே⁴த³தஞ்ச த³ஸ்ஸேதி. ஸம்மப்பதா⁴னஸதிபட்டா²னவஸேனாதி சதுஸம்மப்பதா⁴னசதுஸதிபட்டா²னபா⁴வவஸேன.
யதி³பி ஸமாதி⁴உபகாரகானங் அபி⁴னிரோபனா நுமஜ்ஜனஸம்பியாயனு பப்³ரூஹனஸந்தானங் விதக்கவிசாரபீதிஸுகோ²பெக்கா²னங் வஸேன சதூஹி ஜா²னேஹி ஸம்மாஸமாதி⁴ விப⁴த்தோ, ததா²பி வாயாமோ விய அனுப்பன்னாகுஸலானுப்பாத³னாதி³சதுவாயாமகிச்சங், ஸதி விய ச அஸுபா⁴ஸுகா²னிச்சானத்தபூ⁴தேஸு காயாதீ³ஸு ‘‘புப்³ப³பா⁴கே³பி மக்³க³க்க²ணேபி ஸம்மாஸமாதி⁴யேவா’’தி.
தஸ்மாதி பஞ்ஞாபஜ்ஜோதத்தா அவிஜ்ஜாந்த⁴காரங் வித⁴மித்வா பஞ்ஞாஸத்த²த்தா கிலேஸசோரே கா⁴தெந்தோதி யதா²ரஹங் யோஜேதப்³ப³ங். யஸ்மா பன அனாதி³மதி ஸங்ஸாரே இமினா யோகி³னா கதா³சிபி அஸமுக்³கா⁴டிதபுப்³போ³ கிலேஸக³ணோ ‘‘யோகி³னோ ப³ஹூபகாரத்தா’’தி வுத்தங்.
தஸ்ஸாதி ஸம்மாதி³ட்டி²யா. ‘‘ப³ஹூபகாரோ’’தி வத்வா தங் ப³ஹூபகாரதங் உபமாய விபா⁴வெந்தோ ‘‘யதா² ஹீ’’திஆதி³மாஹ. அயங் தம்ப³கங்ஸாதி³மயத்தா கூடோ. தங்பரிஹரணதோ மஹாஸாரதாய சே²கோ. ஏவந்தி யதா² ஹேரஞ்ஞிகஸ்ஸ சக்கு²னா தி³ஸ்வா கஹாபணவிபா⁴க³ஜானநே கிரியாஸாத⁴கதமபா⁴வேன கரணந்தரங் ப³ஹுகாரங் யதி³த³ங் ஹத்தோ², ஏவங் யோகி³னோ பஞ்ஞாய ஓலோகெத்வா த⁴ம்மவிபா⁴க³ஜானநே புப்³ப³சாரீபா⁴வேன த⁴ம்மந்தரங் ப³ஹுகாரங் யதி³த³ங் விதக்கோ விதக்கெத்வாவ பஞ்ஞாய தத³வபோ³த⁴தோ. தஸ்மா ஸம்மாஸங்கப்போ ஸம்மாதி³ட்டி²யா ப³ஹுகாரோதி அதி⁴ப்பாயோ. து³தியஉபமாயங் ஏவந்தி யதா² தச்ச²கோ பரேன பரிவத்தெத்வா பரிவத்தெத்வா தி³ன்னங் த³ப்³ப³ஸம்பா⁴ரங் வாஸியா தச்செ²த்வா கே³ஹாதி³கரணகம்மே உபனேதி, ஏவங் யோகீ³ விதக்கேன லக்க²ணாதி³தோ விதக்கெத்வா தி³ன்னத⁴ம்மே யாதா²வதோ பரிச்சி²ந்தி³த்வா பரிஞ்ஞாபி⁴ஸமயாதி³கம்மே உபனேதீதி யோஜனா. வசீபே⁴த³ஸ்ஸ உபகாரகோ விதக்கோ ஸாவஜ்ஜானவஜ்ஜவசீபே⁴தே³ நிவத்தனபவத்தனகராய ஸம்மாவாசாயபி உபகாரகோவாதி ஆஹ ‘‘ஸ்வாய’’ந்திஆதி³. ‘‘யதா²ஹா’’திஆதி³னா த⁴ம்மதி³ன்னாய பி⁴க்கு²னியா விஸாக²ஸ்ஸ நாம க³ஹபதினோ வுத்தங் சூளவேத³ல்லஸுத்தபத³ங் (ம॰ நி॰ 1.464) ஸாத⁴கபா⁴வேன த³ஸ்ஸேதி. பி⁴ந்த³தீதி நிச்சா²ரேதி.
வசீபே⁴த³னியாமிகா வாசா காயிககிரியானியாமகஸ்ஸ கம்மந்தஸ்ஸ உபகாரிகாதி தத³த்த²ங் லோகதோ பாகடங் காதுங் ‘‘யஸ்மா பனா’’திஆதி³ வுத்தங். உப⁴யங் ஸுசரிதந்தி காயஸுசரிதங், வசீஸுசரிதஞ்ச. ஆஜீவட்ட²மகஸீலங் நாம சதுப்³பி³த⁴வசீஸுசரிததிவித⁴காயஸுசரிதேஹி ஸத்³தி⁴ங் ஸம்மாஆஜீவங் தது³ப⁴யானந்தரந்தி து³ச்சரிதத்³வயப்பஹாயகஸ்ஸ ஸுசரிதத்³வயபாரிபூரிஹேதுபூ⁴தஸ்ஸ ஸம்மாவாசாஸம்மாகம்மந்தத்³வயஸ்ஸ அனந்தரங். ஸுத்தபமத்தேனாதி அப்பொஸ்ஸுக்கங் ஸுத்தேன, பமத்தேன ச. இத³ங் வீரியந்தி சதுப்³பி³த⁴ங் ஸம்மப்பதா⁴னவீரியங். காயாதீ³ஸூதி காயவேத³னாசித்தத⁴ம்மேஸு. இந்த்³ரியஸமதாத³யோ ஸமாதி⁴ஸ்ஸ உபகாரகா. தப்³பி³து⁴ரா க³தியோதி நிப்ப²த்தியோ, கிச்சாதி³ஸபா⁴வே வா. ஸமன்வேஸித்வாதி உபதா⁴ரெத்வா, ஹேதும்ஹி சாயங் த்வாபச்சயோ.
த்³வேபப்³ப³ஜிதவத்து²வண்ணனா
376-7. கஸ்மா ஆரத்³த⁴ந்தி அனுஸந்தி⁴காரணங் புச்சி²த்வா தங் விஸ்ஸஜ்ஜேதுங் ‘‘அயங் கிரா’’திஆதி³ வுத்தங் தேன அஜ்ஜா²ஸயானுஸந்தி⁴வஸேனாயங் உபரி தே³ஸனா பவத்தாதி த³ஸ்ஸேதி. தேனாதி ததா²லத்³தி⁴கத்தா. அஸ்ஸாதி லிச்ச²விரஞ்ஞோ. தே³ஸனாயந்தி ஸண்ஹஸுகு²மாய ஸுஞ்ஞதபடிஸஞ்ஞுத்தாய யதா²தே³ஸிததே³ஸனாய. நாதி⁴முச்சதீதி ந ஸத்³த³ஹதி ந பஸீத³தி. தந்தித⁴ம்மங் நாம கதெ²ந்தோதி யேஸங் அத்தா²ய த⁴ம்மோ கதீ²யதி, தத்த² தேஸங் அஸதிபி மக்³க³படிவேதே⁴ கேவலங் ஸாஸனே பவேணீபூ⁴தங், பரியத்திபூ⁴தங் வா தந்தித⁴ம்மங் கத்வா கதெ²ந்தோ, தேன ததா³ தேஸங் மக்³க³படிவேதா⁴பா⁴வங் த³ஸ்ஸேதி. ஏவரூபஸ்ஸாதி ஸம்மாஸம்பு³த்³த⁴த்தா அவிபரீததே³ஸனதாய ஏவங்பாகடத⁴ம்மகாயஸ்ஸ ஸத்து²னோ. அஸ்ஸாதி பட²மஜ்ஜா²னாதி³ஸமதி⁴க³மேன ஸமாஹிதசித்தஸ்ஸ குலபுத்தஸ்ஸ ஏதங் ‘‘தங் ஜீவ’’ந்திஆதி³னா உச்சே²தா³தி³க³ஹணங் அபி நு யுத்தந்தி புச்ச²தி, லத்³தி⁴யா பன ஜா²னாதி⁴க³மமத்தேன ந தாவ விவேசிதத்தா ‘‘யுத்தமஸ்ஸேத’’ந்தி தேஹி வுத்தே ஜா²னலாபி⁴னோபேதங் க³ஹணங் அயுத்தமேவாதி தங் உச்சே²த³வாத³ங், ஸஸ்ஸதவாத³ங் வா ‘‘அஹங் கோ²…பே॰… ந வதா³மீ’’திஆதி³னா படிக்கி²பித்வாதி ஸாதி⁴ப்பாயத்தோ². ஏதந்தி பட²மஜ்ஜா²னாதி³கங். ஏவந்தி யதா²வுத்தனயேன. அத² ச பனாதி ஏவங் ஜானநதோ, பஸ்ஸனதோ ச. காமங் விபஸ்ஸகாதி³த³ஸ்ஸனம்பி பாளியங் கதங், அரஹத்தகூடேன பன தே³ஸனா நிட்டா²பிதாதி த³ஸ்ஸேதுங் ‘‘உத்தரி கீ²ணாஸவங் த³ஸ்ஸெத்வா’’தி வுத்தங். தே ஹி த்³வே பப்³ப³ஜிதா விபஸ்ஸகதோ பட்டா²ய ‘‘ந கல்லங் தஸ்ஸேதங் வசனாயா’’தி அவோசுங். இமஸ்ஸாதி கீ²ணாஸவஸ்ஸ. கிஞ்சாபி ‘‘அத்தமனா அஹேஸு’’ந்தி பாளியங் ந வுத்தங், ‘‘ந கல்ல’’ந்திஆதி³னா பன விஸ்ஸஜ்ஜனாவசனேனேவ தேஸங் அத்தமனதா வேதி³தப்³பா³தி ஆஹ ‘‘தே மமா’’திஆதி³. தத்த² யஸ்மா கீ²ணாஸவோ விக³தஸம்மோஹோ திண்ணவிசிகிச்சோ², தஸ்மா தஸ்ஸ ததா² வத்துமயுத்தந்தி உப்பன்னநிச்ச²யதாய தங் மம வசனங் ஸுத்வா அத்தமனா அஹேஸுந்தி ‘‘ஏவங் வுத்தே ஸோபி அத்தமனோ அஹோஸீ’’தி. யங் பனெத்த² அத்த²தோ அவிப⁴த்தங், தங் ஸுவிஞ்ஞெய்யமேவ.
இதி ஸுமங்க³லவிலாஸினியா தீ³க⁴னிகாயட்ட²கதா²ய பரமஸுகு²மக³ம்பீ⁴ரது³ரனுபோ³த⁴த்த²பரிதீ³பனாய ஸுவிமலவிபுலபஞ்ஞாவெய்யத்தியஜனநாய ஸாது⁴விலாஸினியா நாம லீனத்த²பகாஸனியா மஹாலிஸுத்தவண்ணனாய லீனத்த²பகாஸனா.
மஹாலிஸுத்தவண்ணனா நிட்டி²தா.