நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ
மஜ்ஜி²மனிகாயே
மஜ்ஜி²மபண்ணாஸடீகா
1. க³ஹபதிவக்³கோ³
1. கந்த³ரகஸுத்தவண்ணனா
1. ஆராமபொக்க²ரணீஆதீ³ஸூதி உஸ்ஸன்னாதி ப³ஹுலா. அஸோககணிகாரகோவிளாரகும்பீ⁴ராஜருக்கே²ஹி ஸம்மிஸ்ஸதாய தங் சம்பகவனங் நீலாதி³பஞ்சவண்ணகுஸுமபடிமண்டி³தந்தி த³ட்ட²ப்³ப³ங், ந சம்பகருக்கா²னங்யேவ நீலாதி³பஞ்சவண்ணகுஸுமதாயாதி வத³ந்தி. ப⁴க³வா குஸுமக³ந்த⁴ஸுக³ந்தே⁴ சம்பகவனே விஹரதீதி இமினா ந மாபனகாலே ஏவ தஸ்மிங் நக³ரே சம்பகருக்கா² உஸ்ஸன்னா, அத² கோ² அபரபா⁴கே³பீதி த³ஸ்ஸேதி. ‘‘பஞ்சஸதமத்தேஹி அட்³ட⁴தேளஸேஹீ’’தி ஏவங் அத³ஸ்ஸிதபரிச்சே²தே³ன. ஹத்தி²னோ சாரேதி ஸிக்கா²பேதீதி ஹத்தா²சரியோ ஹத்தீ²னங் ஸிக்கா²பகோ, தஸ்ஸ புத்தோதி ஆஹ ‘‘ஹத்தா²சரியஸ்ஸ புத்தோ’’தி. ததா³ ப⁴க³வா தேஸங் பஸாத³ஜனநத்த²ங் அத்தனோ பு³த்³தா⁴னுபா⁴வங் அனிகு³ஹித்வாவ நிஸின்னோதி த³ஸ்ஸெந்தோ ‘‘ச²ப்³ப³ண்ணானங் க⁴னபு³த்³த⁴ரஸ்மீன’’ந்திஆதி³மாஹ. ப⁴க³வதோ சேவ கா³ரவேனாதி ப⁴க³வதோ க³ருபா⁴வேன, ப⁴க³வதி கா³ரவேனாதி வா பாடோ².
நிச்சங் ந ஹோதீதி அபி⁴ண்ஹங் ந ஹோதி, கதா³சிதே³வ ஹோதீதி அத்தோ². அபி⁴ண்ஹனிச்சதா ஹி இத⁴ அதி⁴ப்பேதா, ந கூடட்ட²னிச்சதா. லோகே கிஞ்சி விம்ஹயாவஹங் தி³ஸ்வா ஹத்த²விகாரம்பி கரொந்தி, அங்கு³லிங் வா போ²டயந்தி, தங் ஸந்தா⁴ய வுத்தங் ‘‘அச்ச²ரங் பஹரிதுங் யுத்த’’ந்தி. அபூ⁴தபுப்³ப³ங் பூ⁴தந்தி அயங் நிருத்தினயோ யேபு⁴ய்யேன உபாதா³ய ருள்ஹீவஸேன வுத்தோதி வேதி³தப்³போ³. ததா² ஹி பாளியங் ‘‘யேபி தே, போ⁴ கோ³தம, அஹேஸுங் அதீதமத்³தா⁴ன’’ந்திஆதி³ வுத்தங், கிஞ்சி அகத்தப்³ப³ம்பி கரியமானங் து³க்கரபா⁴வேன விம்ஹயாவஹங் ஹோதி, ததா² கிஞ்சி கத்தப்³ப³ங், புரிமங் க³ரஹச்ச²ரியங், பச்சி²மங் பஸங்ஸச்ச²ரியங், தது³ப⁴யங் ஸுத்தபத³ஸோ த³ஸ்ஸேதுங் ‘‘தத்தா²’’திஆதி³ வுத்தங்.
ஸம்மா படிபாதி³தோதி ஸம்மாபடிபதா³யங் ட²பிதோ. ஏஸா படிபதா³ பரமாதி ஏதபரமங், பா⁴வனபுங்ஸகனித்³தே³ஸோயங் யதா² ‘‘விஸமங் சந்தி³மஸூரியா பரிவத்தந்தீ’’தி (அ॰ நி॰ 4.70). அயஞ்ஹெத்த² அத்தோ² – ப⁴க³வா பி⁴க்கு²ஸங்கோ⁴ படிபதா³ய தும்ஹேஹி படிபாதி³தோ, அதீதேபி காலே பு³த்³தா⁴ ஏதபரமங்யேவ பி⁴க்கு²ஸங்க⁴ங் ஸம்மா படிபாதே³ஸுங், அனாக³தேபி காலே ஏதபரமங்யேவ பி⁴க்கு²ஸங்க⁴ங் ஸம்மா படிபாதெ³ஸ்ஸந்தீதி பரிப்³பா³ஜகோ நயக்³கா³ஹேன தி³ட்டே²ன அதி³ட்ட²ங் அனுமினந்தோ ஸப்³பே³ஸம்பி பு³த்³தா⁴னங் ஸாஸனே ஸங்க⁴ஸுப்படிபத்திங் மஜ்ஜே² பி⁴ன்னஸுவண்ணங் விய ஸமஸமங் கத்வா த³ஸ்ஸேதி, ஏவங் த³ஸ்ஸெந்தோ ச தேஸங் ஸுத⁴ம்மதஞ்ச ததா² த³ஸ்ஸேதி ஏவாதி வேதி³தப்³போ³, பு³த்³த⁴ஸுபு³த்³த⁴தா பன நேஸங் ஸரூபேனேவ த³ஸ்ஸிதாதி. ந இதோ பி⁴ய்யோதி இமினா பாளியங் ஏதபரமங்யேவாதி அவதா⁴ரணேன நிவத்திதங் த³ஸ்ஸேதி ஸீலபத³ட்டா²னத்தா ஸமாதி⁴ஸ்ஸ, ஸமாதி⁴பத³ட்டா²னத்தா ச பஞ்ஞாய ஸீலேபி ச அபி⁴ஸமாசாரிகபுப்³ப³கத்தா ஆதி³ப்³ரஹ்மசரியகஸ்ஸ வுத்தங் ‘‘ஆபி⁴ஸமாசாரிகவத்தங் ஆதி³ங் கத்வா’’தி.
2. புச்சா²னுஸந்தி⁴ஆதீ³ஸு அனந்தோக³த⁴த்தா ‘‘பாடிஏக்கோ அனுஸந்தீ⁴’’தி வத்வா தமேவத்த²ங் பாகடங் காதுங் ‘‘ப⁴க³வா கிரா’’திஆதி³ வுத்தங். உபஸந்தகாரணந்தி உபஸந்தபா⁴வகாரணங். தஞ்ஹி அரியானங்யேவ விஸயோ, தத்தா²பி ச பு³த்³தா⁴னங் ஏவ அனவஸேஸதோ விஸயோதி இமமத்த²ங் ப்³யதிரேகதோ அன்வயதோ ச த³ஸ்ஸேதுங் ந ஹி த்வந்திஆதி³ வுத்தங். தத்த² ஞாதத்த²சரியா காகஜாதகாதி³வஸேன வேதி³தப்³பா³, லோகத்த²சரியா தங்தங்பாரமிபூரணவஸேன, பு³த்³த⁴த்த²சரியா மஹாபோ³தி⁴ஜாதகாதி³வஸேன. அச்ச²ரியங் போ⁴ கோ³தமாதிஆதி³னா கந்த³ரகேன கதங் பஸாத³பவேத³னங் த³ஸ்ஸேதி.
யேபி தேதிஆதி³னா தேன வுத்தமத்த²ங் பச்சனுபா⁴ஸந்தேன ப⁴க³வதா ஸம்படிச்சி²தந்தி சரிதத்தா ஆஹ – ‘‘ஸந்தி ஹி கந்த³ரகாதி அயம்பி பாடியேக்கோ அனுஸந்தீ⁴’’தி ‘‘ஸந்தி ஹீ’’திஆதி³னா தே³ஸனங் ஆரபி⁴. தேனாஹ ‘‘ப⁴க³வதோ கிர ஏதத³ஹோஸீ’’ கப்பெத்வாதி அஞ்ஞதா² ஸந்தமேவ அத்தானங் அஞ்ஞதா² விதா⁴ய. பகப்பெத்வாதி ஸனித³ஸ்ஸனவஸேன க³ஹெத்வா. தேனாஹ ‘‘குஹகபா⁴வேனா’’திஆதி³. படிபத³ங் பூரயமானாதி காமங் அவிஸேஸேன ஸெக்கா² வுச்சந்தி, தே பன அதி⁴க³தமக்³க³வஸேன ‘‘பூரயமானா’’தி ந வத்தப்³பா³ கிச்சஸ்ஸ நிட்டி²தத்தா. மக்³கோ³ ஹி ஏகசித்தக்க²ணிகோதி ஆஹ ‘‘உபரிமக்³க³ஸ்ஸ விபஸ்ஸனாய உபஸந்தா’’தி. இதோ முத்தாதி மக்³கே³னாக³தூபஸமதோ முத்தா. கல்யாணபுது²ஜ்ஜனே ஸந்தா⁴ய வத³தி. தேனாஹ ‘‘சதூஹி ஸதிபட்டா²னேஹி உபஸந்தா’’தி.
ஸததஸீலாதி அவிச்சி²ன்னஸீலா. ஸாதிஸயோ ஹி ஏதேஸங் ஸீலஸ்ஸ அக²ண்டா³தி³பா⁴வோ. ஸுபரிஸுத்³த⁴ஸீலதாவஸேன ஸந்ததா வுத்தி ஏதேஸந்தி ஸந்ததவுத்தினோதி ஆஹ ‘‘தஸ்ஸேவ வேவசன’’ந்தி. ஏவங் ஸீலவுத்திவஸேன ‘‘ஸந்ததவுத்தினோ’’தி பத³ஸ்ஸ அத்த²ங் வத்வா இதா³னி ஜீவிதவுத்திவஸேன த³ஸ்ஸெந்தோ ‘‘ஸந்ததஜீவிகாவாதி அத்தோ²’’தி ஆஹ. ஸாஸனஸ்ஸ ஜீவிதவுத்தி ஸீலஸன்னிஸ்ஸிதா ஏவாதி ஆஹ ‘‘தஸ்மி’’ந்திஆதி³.
நிபயதி விஸோஸேதி ராகா³தி³ஸங்கிலேஸங், ததோ வா அத்தானங் நிபாதீதி நிபகோ, பஞ்ஞவா. தேனாஹ ‘‘பஞ்ஞவந்தோ’’தி. பஞ்ஞாய ட²த்வா ஜீவிகாகப்பனங் நாம பு³த்³த⁴படிகுட்ட²மிச்சா²ஜீவங் பஹாய ஸம்மாஜீவேன ஜீவனந்தி தங் த³ஸ்ஸெந்தோ ‘‘யதா² ஏகச்சோ’’திஆதி³மாஹ. தத்த² யங் வத்தப்³ப³ங், தங் விஸுத்³தி⁴மக்³கே³ (விஸுத்³தி⁴॰ 1.14) தங்ஸங்வண்ணனாயஞ்ச (விஸுத்³தி⁴॰ மஹாடீ॰ 1.14) வுத்தனயேனேவ வேதி³தப்³ப³ங். ரத²வினீதபடிபதா³த³யோ தேஸு தேஸு ஸுத்தேஸு வுத்தனயேன வேதி³தப்³பா³. இதோ அஞ்ஞத்த² மஹாகோ³பாலகஸுத்தாதீ³ஸு (ம॰ நி॰ 1.346 ஆத³யோ) லோகுத்தரஸதிபட்டா²னா கதி²தாதி ஆஹ – ‘‘இத⁴ பன லோகியலோகுத்தரமிஸ்ஸகா ஸதிபட்டா²னா கதி²தா’’தி, ஸதிபட்டா²னஸுத்தேபி (தீ³॰ நி॰ 2.373-374; ம॰ நி॰ 1.106 ஆத³யோ) வோமிஸ்ஸகாவ கதி²தாதி. எத்தகேனாதி எத்தகாய தே³ஸனாய.
3. காரகபா⁴வந்தி பி⁴க்கு²ஸங்க⁴ஞ்ச உக்கி²பதி. தேனாஹ ‘‘அயஞ்ஹெத்த² அதி⁴ப்பாயோ’’திஆதி³. நானாரம்மணேஸு அபராபரங் உப்பஜ்ஜமானானங் ராகா³தி³கிலேஸானங் க⁴னஜடிதஸங்கா²தாகாரேன பவத்தி கிலேஸக³ஹனேன க³ஹனதா, தேனாஹ ‘‘அந்தோ ஜடா ப³ஹி ஜடா, ஜடாய ஜடிதா பஜா’’தி (ஸங்॰ நி॰ 1.23, 192). மனுஸ்ஸானங் அஜ்ஜா²ஸயக³ஹணேன ஸாடெ²ய்யம்பீதி த³ஸ்ஸெந்தோ ஆஹ ‘‘கஸடஸாடெ²ய்யேஸுபி ஏஸேவ நயோ’’தி. யதா² ஸப்பிமது⁴பா²ணிதாதீ³ஸு கசவரபா⁴வோ, ‘‘அபரிஸுத்³த⁴ட்டே²ன கஸடதா’’தி. அத்தனி அஸந்தகு³ணஸம்பா⁴வனங் கேராடியட்டோ². ஜானாதீதி ‘‘இத³ங் அஹிதங் ந ஸேவிதப்³ப³ங், இத³ங் ஹிதங் ஸேவிதப்³ப³’’ந்தி விசாரேதி தே³ஸேதி. விசாரணத்தோ²பி ஹி ஹோதி ஜானாதி-ஸத்³தோ³ யதா² ‘‘ஆயஸ்மா ஜானாதீ’’தி. ஸப்³பா³பி…பே॰… அதி⁴ப்பேதா ‘‘பஸுபாலகா’’திஆதீ³ஸு விய. இத⁴ அந்தர-ஸத்³தோ³ ‘‘விஜ்ஜந்தரிகாயா’’திஆதீ³ஸு (ம॰ நி॰ 2.149) விய க²ணத்தோ²தி ஆஹ ‘‘யத்தகேன க²ணேனா’’தி. தேனாதி ஹத்தி²னா. தானீதி ஸாடெ²ய்யாதீ³னி.
அத்த²தோ காயசித்துஜுகதாபடிபக்க²பூ⁴தாவ லோப⁴ஸஹக³தசித்துப்பாத³ஸ்ஸ பவத்திஆகாரவிஸேஸாதி தானி பவத்திஆகாரேன த³ஸ்ஸேதுங் ‘‘தத்தா²’’திஆதி³ வுத்தங். தத்த² யஸ்ஸாதி பாணபூ⁴தஸ்ஸ அஸ்ஸஸ்ஸ வா ஹத்தி²னோ வா. ட²ஸ்ஸாமீதி தத்தே²வ ஸப்படிப⁴யே டா²னே க³ந்த்வா ட²ஸ்ஸாமீதி ந ஹோதி. இமஸ்ஸ ஸாடெ²ய்யதாய பாகடகரணங் வஞ்சனாதி⁴ப்பாயபா⁴வதோ. ததா² ஹி சதூஸு டா²னேஸு ‘‘வஞ்செத்வா’’ இச்சேவ வுத்தங், நிகு³ஹந்தோ பன தத்தே²வ க³ந்த்வா திட்டெ²ய்ய. ஏஸ நயோ ஸேஸேஸுபி. படிமக்³க³ங் ஆரோஹிதுகாமஸ்ஸாதி ஆக³தமக்³க³மேவ நிவத்தித்வா க³ந்துகாமஸ்ஸ. லெண்ட³விஸ்ஸஜ்ஜனாதீ³ஸு காலந்தராபெக்கா²பா⁴வங் ‘‘ததா²’’தி இமினா உபஸங்ஹரதி.
அந்தோஜாதகாதி அத்தனோ தா³ஸியா குச்சி²ம்ஹி ஜாதா. த⁴னக்கீதாதி த⁴னங் த³த்வா தா³ஸபா⁴வேன க³ஹிதா. கரமரானீதாதி தா³ஸபா⁴வேன கரமரக்³கா³ஹக³ஹிதா. தா³ஸப்³யந்தி தா³ஸபா⁴வங். பெஸ்ஸாதி அதா³ஸா ஏவ ஹுத்வா வெய்யாவச்சகரா. இமங் விஸ்ஸஜ்ஜெத்வாதி இமங் அத்தனோ ஹத்த²க³தங் விஸ்ஸஜ்ஜெத்வா. இமங் க³ண்ஹந்தாதி இமங் தஸ்ஸ ஹத்த²க³தங் க³ண்ஹந்தா. ஸம்முக²தோ அஞ்ஞதா² பரம்முக²காலே காயவாசாஸமுதா³சாரத³ஸ்ஸனேனேவ சித்தஸ்ஸ நேஸங் அஞ்ஞதா² டி²தபா⁴வோ நித்³தி³ட்டோ²தி வேதி³தப்³போ³.
4. அயம்பி பாடியேக்கோ அனுஸந்தீ⁴தி எத்தா²பி அனந்தரே வுத்தனயேனேவ அனுஸந்தி⁴யோஜனா வேதி³தப்³பா³. தேனேவாஹ ‘‘அயஞ்ஹீ’’திஆதி³. சதுத்தோ² ஹிதபடிபத³ங் படிபன்னோதி யோஜனா. புக்³க³லஸீஸேன புக்³க³லபடிபத்திங் த³ஸ்ஸெந்தோ ‘‘புக்³க³லே பஹாயா’’தி ஆஹ. படிபத்தி ஹி இத⁴ பஹாதப்³பா³, ந புக்³க³லா. யதா² அஸ்ஸத்³தா⁴தி³புக்³க³லபரிவஜ்ஜனேன ஸத்³தி⁴ந்த்³ரியாதி³பா⁴வனா இஜ்ஜ²ந்தி, ஏவங் மிச்சா²படிபன்னபுக்³க³லபரிவஜ்ஜனேன மிச்சா²படிபதா³ வஜ்ஜிதப்³பா³தி ஆஹ – ‘‘புரிமே தயோ புக்³க³லே பஹாயா’’தி. சதுத்த²புக்³க³லஸ்ஸாதி இமஸ்மிங் சதுக்கே வுத்தசதுத்த²புக்³க³லஸ்ஸ ஹிதபடிபத்தியங்யேவ படிபாதே³மி பவத்தேமீதி த³ஸ்ஸெந்தோ. ஸந்தாதி ஸமங் வினாஸங் நிரோத⁴ங் பத்தாதி அயமெத்த² அத்தோ²தி ஆஹ ‘‘நிருத்³தா⁴ ஸந்தாதி வுத்தா’’தி. புன ஸந்தாதி பா⁴வனாவஸேன கிலேஸபரிளாஹவிக³மதோ ஸந்தாதி ‘‘நிப்³பு³தா’’தி. ஸந்தாதி ஆனெத்வா யோஜனா. ஸந்தோ ஹவேதி எத்த² ஸமபா⁴வகரேன ஸாது⁴பா⁴வஸ்ஸ விஸேஸபச்சயபூ⁴தேன பண்டி³ச்சேன ஸமன்னாக³தா அரியா ‘‘ஸந்தோ’’தி வுத்தாதி ஆஹ – ‘‘ஸந்தோ ஹவே…பே॰… பண்டி³தா’’தி.
ஆஹிதோ அஹங்மானோ எத்தா²தி அத்தா (அ॰ நி॰ டீ॰ 2.4.198) அத்தபா⁴வோ, இத⁴ பன யோ பரோ ந ஹோதி, ஸோ அத்தா, தங் அத்தானங். பரந்தி அத்ததோ அஞ்ஞங். சா²தங் வுச்சதி தண்ஹா ஜிக⁴ச்சா²ஹேதுதாய. அந்தோ தாபனகிலேஸானந்தி அத்தனோ ஸந்தானே அத்தபரிளாஹஜனநஸந்தப்பனகிலேஸானங். சித்தங் ஆராதே⁴தீதி சித்தங் பஸாதே³தி, ஸம்பஹங்ஸேதீதி அத்தோ². யஸ்மா பன ததா²பூ⁴தோ சித்தங் ஸம்பாதெ³ந்தோ அஜ்ஜா²ஸயங் க³ண்ஹந்தோ நாம ஹோதி, தஸ்மா வுத்தங் ‘‘சித்தங் ஸம்பாதே³தீ’’திஆதி³.
5. து³க்க²ங் படிக்கூலங் ஜேகு³ச்ச²ங் ஏதஸ்ஸாதி து³க்க²படிக்கூலோ தங் து³க்க²படிக்கூலங். விஸேஸனவிஸேஸிதப்³ப³தா ஹி காமசாரா. அட்ட²கதா²யங் பன து³க்க²ஸ்ஸ விஸேஸிதப்³ப³தங் ஸந்தா⁴ய பா³ஹிரத்த²ஸமாஸங் அனாதி³யித்வா ‘‘து³க்க²ஸ்ஸ படிக்கூல’’ந்தி அத்தோ² வுத்தோ. யேன ஹி பா⁴கே³ன புரிஸஸ்ஸ து³க்க²ங் படிக்கூலங், தேன து³க்க²ஸ்ஸ புரிஸோபீதி. தேனாஹ – ‘‘பச்சனீகஸண்டி²த’’ந்தி.
6. சதூஹி காரணேஹீதி தா⁴துகுஸலதாதீ³ஹி சதூஹி காரணேஹி. கம்மங் கரோதீதி யோக³கம்மங் கரோதி. யஸ்மா ஸம்பு³த்³தா⁴ பரேஸங் மக்³க³ப²லாதி⁴க³மாய உஸ்ஸாஹஜாதா, தத்த² நிரந்தரங் யுத்தப்பயுத்தா ஏவ ஹொந்தி, தே படிச்ச தேஸங் அந்தராயோ ந ஹோதியேவாதி ஆஹ ‘‘ந பன பு³த்³தே⁴ படிச்சா’’தி. கிரியபரிஹானியா தே³ஸகஸ்ஸ தஸ்ஸேவ வா புக்³க³லஸ்ஸ தஜ்ஜபயோகா³பா⁴வதோ. ‘‘தே³ஸகஸ்ஸ வா’’தி இத³ங் ஸாவகானங் வஸேன த³ட்ட²ப்³ப³ங். மஹதா அத்தே²னாதி எத்த² அத்த²-ஸத்³தோ³ ஆனிஸங்ஸபரியாயோதி ஆஹ ‘‘த்³வீஹி ஆனிஸங்ஸேஹீ’’தி. பஸாத³ங் படிலப⁴தி ‘‘அரஹந்தோ’’திஆதி³னா ஸங்க⁴ஸுப்படிபத்தியா ஸுதத்தா. அபி⁴னவோ நயோ உத³பாதி³ ஸந்ததஸீலதாதி³வஸேன அனத்தந்தபதாதி³வஸேன, ஸோபி தங் ஸுத்வா தா³ஸாதீ³ஸு ஸவிஸேஸங் லஜ்ஜீ த³யாபன்னோ ஹிதானுகம்பீ ஹுத்வா ஸெக்க²படிபத³ங் ஸீலங் ஸாதெ⁴ந்தோ அனுக்கமேன ஸதிபட்டா²னபா⁴வனங் பரிப்³ரூஹேதி. தேனாஹ ப⁴க³வா ‘‘மஹதா அத்தே²ன ஸங்யுத்தோ’’தி.
8. பரேஸங் ஹனநகா⁴தனாதி³னா ரோதா³பனதோ லுத்³தோ³, ததா² விகா⁴தகபா⁴வேன காயசித்தானங் விதா³ரணதோ தா³ருணோ, விருத்³த⁴வாத³தாய கக்க²ளோ, ப³ந்த⁴னாகா³ரே நியுத்தோ ப³ந்த⁴னாகா³ரிகோ.
9. க²த்தியாபி⁴ஸேகேனாதி ஸந்தா²கா³ரந்தி ஸந்தா²ரவஸேன கதங் அகா³ரங் யஞ்ஞாவாடங். ஸப்பிதேலேனாதி ஸப்பிமயேன தேலேன, யமகஸ்னேஹேன ஹி ததா³ காயங் அப்³ப⁴ஞ்ஜதி. வச்ச²பா⁴வங் தரித்வா டி²தோ வச்ச²தரோ. பரிக்கே²பகரணத்தா²யாதி வனமாலாஹி ஸத்³தி⁴ங் த³ப்³பே⁴ஹி வேதி³யா பரிக்கே²பனத்தா²ய. யஞ்ஞபூ⁴மியந்தி அவஸேஸயஞ்ஞட்டா²னே. யங் பனெத்த² அத்த²தோ அவிப⁴த்தங் தங் ஸுவிஞ்ஞெய்யமேவ.
கந்த³ரகஸுத்தவண்ணனாய லீனத்த²ப்பகாஸனா ஸமத்தா.
2. அட்ட²கனாக³ரஸுத்தவண்ணனா
17. அவிதூ³ரேதி ஸாரப்பத்தகுலக³ணனாயாதி (அ॰ நி॰ டீ॰ 3.11.16) மஹாஸாரமஹப்பத்தகுலக³ணனாய. த³ஸமே டா²னேதி அஞ்ஞே அஞ்ஞேதி த³ஸக³ணனட்டா²னே. அட்ட²கனக³ரே ஜாதோ ப⁴வோ அட்ட²கனாக³ரோ. குக்குடாராமோதி பாடலிபுத்தே குக்குடாராமோ, ந கோஸம்பி³யங்.
18. பகதத்த²னித்³தே³ஸோ த-ஸத்³தோ³தி தஸ்ஸ ‘‘ப⁴க³வதா’’திஆதீ³ஹி பதே³ஹி ஸமானாதி⁴கரணபா⁴வேன வுத்தஸ்ஸ யேன அபி⁴ஸம்பு³த்³த⁴பா⁴வேன ப⁴க³வா பகதோ அதி⁴க³தோ ஸுபாகடோ ச, தங் அபி⁴ஸம்பு³த்³த⁴பா⁴வங் ஸத்³தி⁴ங் ஆக³மனீயபடிபதா³ய அத்த²பா⁴வேன த³ஸ்ஸெந்தோ ‘‘யோ ஸோ…பே॰… அபி⁴ஸம்பு³த்³தோ⁴’’தி ஆஹ. ஸதிபி ஞாணத³ஸ்ஸன-ஸத்³தா³னங் இத⁴ பஞ்ஞாவேவசனபா⁴வே தேன தேன விஸேஸேன தேஸங் விஸயவிஸேஸே பவத்தித³ஸ்ஸனத்த²ங் அஸாதா⁴ரணஞாணவிஸேஸவஸேன விஜ்ஜாத்தயவஸேன விஜ்ஜாஅபி⁴ஞ்ஞானாவரணஞாணவஸேன ஸப்³ப³ஞ்ஞுதஞாணமங்ஸசக்கு²வஸேன படிவேத⁴தே³ஸனாஞாணவஸேன ச தத³த்த²ங் யோஜெத்வா த³ஸ்ஸெந்தோ ‘‘தேஸங் தேஸ’’ந்திஆதி³மாஹ. தத்த² ஆஸயானுஸயங் ஜானதா ஆஸயானுஸயஞாணேன ஸப்³ப³ங் ஞெய்யத⁴ம்மங் பஸ்ஸதா ஸப்³ப³ஞ்ஞுதானாவரணஞாணேஹி. புப்³பே³னிவாஸாதீ³ஹீதி புப்³பே³னிவாஸாஸவக்க²யஞாணேஹி. படிவேத⁴பஞ்ஞாயாதி அரியமக்³க³பஞ்ஞாய. தே³ஸனாபஞ்ஞாய பஸ்ஸதாதி தே³ஸேதப்³ப³த⁴ம்மானங் தே³ஸேதப்³ப³ப்பகாரங் போ³த⁴னெய்யபுக்³க³லானஞ்ச ஆஸயானுஸயசரிதாதி⁴முத்திஆதி³பே⁴த³ங் த⁴ம்மதே³ஸனாபஞ்ஞாய யாதா²வதோ பஸ்ஸதா. அரீனந்தி கிலேஸாரீனங், பஞ்சவித⁴மாரானங் வா, ஸாஸனஸ்ஸ வா பச்சத்தி²கானங் அஞ்ஞதித்தி²யானங் தேஸங் பன ஹனநங் பாடிஹாரியேஹி அபி⁴ப⁴வனங் அப்படிபா⁴னதாகரணங் அஜ்ஜு²பெக்க²னமேவ வா, கேஸிவினயஸுத்தஞ்செத்த² நித³ஸ்ஸனங்.
ததா² டா²னாட்டா²னாதி³விபா⁴க³ங் ஜானதா யதா²கம்மூபக³ஸத்தே பஸ்ஸதா, ஸவாஸனானங் ஆஸவானங் கீ²ணத்தா அரஹதா, அபி⁴ஞ்ஞெய்யாதி³பே⁴தே³ த⁴ம்மே அபி⁴ஞ்ஞெய்யாதி³தோ அவிபரீதாவபோ³த⁴தோ ஸம்மாஸம்பு³த்³தே⁴ன. அத² வா தீஸு காலேஸு அப்படிஹதஞாணதாய ஜானதா, காயகம்மாதி³வஸேன திண்ணங் கம்மானங் ஞாணானுபரிவத்திதோ நிஸம்மகாரிதாய பஸ்ஸதா, த³வாதீ³னங் அபா⁴வஸாதி⁴காய அரஹதா, ச²ந்தா³தீ³னங் அஹானிஹேதுபூ⁴தாய அக்க²யபடிபா⁴னஸாதி⁴காய ஸப்³ப³ஞ்ஞுதாய ஸம்மாஸம்பு³த்³தே⁴னாதி ஏவங் த³ஸப³லஅட்டா²ரஸஆவேணிகபு³த்³த⁴த⁴ம்மவஸேனபி யோஜனா காதப்³பா³.
19. அபி⁴ஸங்க²தந்தி ‘‘உப்பாதி³த’’ந்தி. தே சஸ்ஸ பச்சயா சேதனாபதா⁴னாதி த³ஸ்ஸேதுங் பாளியங் ‘‘அபி⁴ஸங்க²தங் அபி⁴ஸஞ்சேதயித’’ந்தி வுத்தந்தி ‘‘சேதயிதங் பகப்பித’’ந்தி அத்த²மாஹ. அபி⁴ஸங்க²தங் அபி⁴ஸஞ்சேதயிதந்தி ச ஜா²னஸ்ஸ பாதுபா⁴வத³ஸ்ஸனமுகே²ன வித்³த⁴ங்ஸனபா⁴வங் உல்லிங்கே³தி யஞ்ஹி அஹுத்வா ஸம்ப⁴வதி, தங் ஹுத்வா படிவேதி. தேனாஹ பாளியங் ‘அபி⁴ஸங்க²த’ந்திஆதி³. ஸமத²விபஸ்ஸனாத⁴ம்மே டி²தோதி ஸமத²த⁴ம்மே டி²தத்தா ஸமாஹிதோ விபஸ்ஸனங் பட்ட²பெத்வா அனிச்சானுபஸ்ஸனாதீ³ஹி நிச்சஸஞ்ஞாத³யோ பஜஹந்தோ அனுக்கமேன தங் அனுலோமஞாணங் பாபேதா ஹுத்வா விபஸ்ஸனாத⁴ம்மே டி²தோ. ஸமத²விபஸ்ஸனாஸங்கா²தேஸு த⁴ம்மேஸு ரஞ்ஜனட்டே²ன ராகோ³, நந்த³னட்டே²ன நந்தீ³தி. தத்த² ஸுகு²மா அபெக்கா² வுத்தா, யா ‘‘நிகந்தீ’’தி வுச்சதி.
ஏவங் ஸந்தேதி ஏவங் யதா²ருதவஸேன ச இமஸ்ஸ ஸுத்தபத³ஸ்ஸ அத்தே² க³ஹேதப்³பே³ ஸதி. ஸமத²விபஸ்ஸனாஸு ச²ந்த³ராகோ³ கத்தப்³போ³தி அனாகா³மிப²லங் நிப்³ப³த்தெத்வா தத³த்தா²ய ஸமத²விபஸ்ஸனாபி அனிப்³ப³த்தெத்வா கேவலங் தத்த² ச²ந்த³ராகோ³ கத்தப்³போ³ ப⁴விஸ்ஸதி. கஸ்மா? தேஸு ஸமத²விபஸ்ஸனாஸங்கா²தேஸு த⁴ம்மேஸு ச²ந்த³ராக³மத்தேன அனாகா³மினா லத்³த⁴ப்³ப³ஸ்ஸ அலத்³தா⁴னாகா³மிப²லேன லத்³த⁴ப்³ப³த்தா ததா² ஸதி தேன அனாகா³மிப²லம்பி லத்³த⁴ப்³ப³மேவ நாம ஹோதி. தேனாஹ – ‘‘அனாகா³மிப²லங் படிவித்³த⁴ங் ப⁴விஸ்ஸதீ’’தி. ஸபா⁴வதோ ரஸிதப்³ப³த்தா அவிபரீதோ அத்தோ² ஏவ அத்த²ரஸோ. அஞ்ஞாபி காசி ஸுக³தியோதி வினிபாதிகே ஸந்தா⁴யாஹ. அஞ்ஞாபி காசி து³க்³க³தியோதி அஸுரகாயமாஹ.
ஸமத²து⁴ரமேவ து⁴ரங் ஸமத²யானிகஸ்ஸ வஸேன தே³ஸனாய ஆக³தத்தா. மஹாமாலுக்யோவாதே³ ‘‘விவிச்ச அகுஸலேஹி த⁴ம்மேஹி ஸவிதக்கங் ஸவிசார’’ந்தி பாத³கஜ்ஜா²னங் கத்வா ‘‘ஸோ யதே³வ தத்த² ஹோதி ரூபக³தங் வேத³னாக³த’’ந்திஆதி³னா விபஸ்ஸனங் வித்தா²ரெத்வா ‘‘ஸோ தத்த² டி²தோ ஆஸவானங் க²யங் ‘‘மஹாமாலுக்யோவாதே³ விபஸ்ஸனாவ து⁴ர’’ந்தி ஆஹ. மஹாஸதிபட்டா²னஸுத்தே (தீ³॰ நி॰ 2.373 ஆத³யோ; ம॰ நி॰ 1.106 ஆத³யோ) ஸப்³ப³த்த²கமேவ திக்க²தராய விபஸ்ஸனாய ஆக³தத்தா வுத்தங் ‘‘விபஸ்ஸனுத்தரங் கதி²த’’ந்தி. காயக³தாஸதிஸுத்தே (ம॰ நி॰ 3.153-154) ஆனாபானஜ்ஜா²னாதி³வஸேன ஸவிஸேஸங் ஸமத²விபஸ்ஸனாய ஆக³தத்தா வுத்தங் ‘‘ஸமது²த்தரங் கதி²த’’ந்தி.
அப்பங் யாசிதேன ப³ஹுங் தெ³ந்தேன உளாரபுரிஸேன விய ஏகங் த⁴ம்மங் புச்சி²தேன ‘‘அயம்பி ஏகத⁴ம்மோ’’தி கதி²தத்தா ஏகாத³ஸபி த⁴ம்மா புச்சா²வஸேன ஏகத⁴ம்மோ நாம ஜாதோ பச்சேகங் வாக்யபரிஸமாபனஞாயேன. ஏகவீஸதி பப்³பா³னி தேஹி போ³தி⁴யமானாய படிபதா³ய ஏகரூபத்தா படிபதா³வஸேன ஏகத⁴ம்மோ நாம ஜாதோதி. இத⁴ இமஸ்மிங் அட்ட²கனாக³ரஸுத்தே. நேவஸஞ்ஞானாஸஞ்ஞாயதனத⁴ம்மானங் ஸங்கா²ராவஸேஸஸுகு²மபா⁴வப்பத்ததாய தத்த² ஸாவகானங் து³க்கரந்தி ந சதுத்தா²ருப்பவஸேனெத்த² தே³ஸனா ஆக³தாதி சதுன்னங் ப்³ரஹ்மவிஹாரானங், ஹெட்டி²மானங் திண்ணங் ஆருப்பானஞ்ச வஸேன ஏகாத³ஸ. புச்சா²வஸேனாதி ‘‘அத்தி² நு கோ², ப⁴ந்தே ஆனந்த³, தேன…பே॰… ஸம்மாஸம்பு³த்³தே⁴ன ஏகத⁴ம்மோ அக்கா²தோ’’தி (ம॰ நி॰ 2.18) ஏவங் பவத்தபுச்சா²வஸேன. அமதுப்பத்தியத்தே²னாதி அமதபா⁴வஸ்ஸ உப்பத்திஹேதுதாய, ஸப்³பா³னிபி கம்மட்டா²னானி ஏகரஸம்பி அமதாதி⁴க³மபடிபத்தியாதி அத்தோ², ஏவமெத்த² அக்³க³ப²லபூ⁴மி அனாகா³மிப²லபூ⁴மீதி த்³வேவ பூ⁴மியோ ஸரூபதோ ஆக³தா, நானந்தரியதாய பன ஹெட்டி²மாபி த்³வே பூ⁴மியோ அத்த²தோ ஆக³தா ஏவாதி த³ட்ட²ப்³பா³.
21. பஞ்ச ஸதானி அக்³கோ⁴ ஏதஸ்ஸாதி பஞ்சஸதங். ஸேஸங் உத்தானமேவ.
அட்ட²கனாக³ரஸுத்தவண்ணனாய லீனத்த²ப்பகாஸனா ஸமத்தா.
3. ஸேக²ஸுத்தவண்ணனா
22. ஸந்தா²கா³ரந்தி ‘‘உய்யோக³காலாதீ³ஸூ’’திஆதி³. ஆதி³-ஸத்³தே³ன மங்க³லமஹாதீ³னங் ஸங்க³ஹோ த³ட்ட²ப்³போ³. ஸந்த²ம்ப⁴ந்தீதி விஸ்ஸமந்தி, பரிஸ்ஸமங் வினோதெ³ந்தீதி அத்தோ². ஸஹாதி ஸன்னிவேஸவஸேன ஸஹ அத்தா²னுஸாஸனங் அகா³ரந்தி ஏதஸ்மிங் அத்தே² த்த²-காரஸ்ஸ ந்த²-காரங் கத்வா ஸந்தா²கா³ரந்தி வுத்தந்தி த³ட்ட²ப்³ப³ங். ஸந்த²ரந்தீதி ஸம்மந்தனவஸேன திட்ட²ந்தி.
தேபிடகங் பு³த்³த⁴வசனங் ஆக³தமேவ ப⁴விஸ்ஸதீதி பு³த்³த⁴வசனஸ்ஸ ஆக³மனஸீஸேன அரியப²லத⁴ம்மானம்பி ஆக³மனங் வுத்தமேவ, தியாமரத்திங் தத்த² வஸந்தானங் ப²லஸமாபத்திவளஞ்ஜனங் ஹோதீதி. தஸ்மிஞ்ச பி⁴க்கு²ஸங்கே⁴ கல்யாணபுது²ஜ்ஜனா விபஸ்ஸனங் உஸ்ஸுக்காபெந்தா ஹொந்தீதி சே? அரியமக்³க³த⁴ம்மானங் தத்த² ஆக³மனங் ஹோதியேவ.
அல்லகோ³மயேனாதி அச்சே²ன அல்லகோ³மயரஸேன. ஓபுஞ்சா²பெத்வாதி விலிம்பித்வா. சதுஜ்ஜாதியக³ந்தே⁴ஹீதி தக³ரகுங்குமயவனபுப்ப²தமாலபத்தானி பிஸித்வா கதக³ந்தே⁴ஹி நானாவண்ணேதி நீலாதி³வஸேன நானாவண்ணே, ந பி⁴த்திவிஸேஸவஸேன. பி⁴த்திவிஸேஸவஸேன பன நானாஸண்டா²னரூபமேவ. மஹாபிட்டி²ககோஜவகேதி ஹத்தி²பிட்டீ²ஸு அத்த²ரிதப்³ப³தாய மஹாபிட்டி²காதி லத்³த⁴ஸமஞ்ஞே கோஜவேதி வத³ந்தி. குத்தகே பன ஸந்தா⁴யேதங் வுத்தங் ஹத்த²த்த²ரணா ஹத்தி²ரூபவிசித்தா. அஸ்ஸத்த²ரகஸீஹத்த²ரகாத³யோபி அஸ்ஸஸீஹரூபாதி³விசித்தா ஏவ அத்த²ரகா, சித்தத்த²ரகங் நானாரூபேஹி சேவ நானாவித⁴மாலாகம்மாதீ³ஹி ச விசித்தங் அத்த²ரகங்.
உபதா⁴னந்தி அபஸ்ஸயனங் உபத³ஹித்வாதி அபஸ்ஸயயொக்³க³பா⁴வேன ட²பெத்வா க³ந்தே⁴ஹி கதமாலா க³ந்த⁴தா³மங், தமாலபத்தாதீ³ஹி கதங் பத்ததா³மங். ஆதி³-ஸத்³தே³ன ஹிங்கு³லதக்கோலஜாதிப²லஜாதிபுப்பா²தீ³ஹி கததா³மங் ஸங்க³ண்ஹாதி. பல்லங்காகாரேன கதபீட²ங் பல்லங்கபீட²ங், தீஸு பஸ்ஸேஸு, ஏகபஸ்ஸே ஏவ வா ஸஉபஸ்ஸயங் அபஸ்ஸயபீட²ங், அனபஸ்ஸயங் முண்ட³பீட²ங் யோஜனாவட்டேதி யோஜனபரிக்கே²பே.
ஸங்விதா⁴யாதி அந்தரவாஸகஸ்ஸ கோணபதே³ஸஞ்ச இதரபதே³ஸஞ்ச ஸமங் கத்வா விதா⁴ய. தேனாஹ – ‘‘கத்தரியா பது³மங் கந்தந்தோ வியா’’தி திமண்ட³லங் படிச்சா²தெ³ந்தோதி எத்த² ச யஸ்மா பு³த்³தா⁴னங் ரூபஸம்பதா³ விய ஆகப்பஸம்பதா³பி பரமுக்கங்ஸக³தா, தஸ்மா ததா³ ப⁴க³வா ஏவங் ஸோப⁴தீதி ‘‘ஸுவண்ணபாமங்கே³னா’’திஆதி³மாஹ, தத்த² அஸமேன பு³த்³த⁴வேஸேனாதிஆதி³னா ‘‘அஸீதிஹத்த²ட்டா²னங் அக்³க³ஹேஸீ’’தி நீலபீதலோஹிதோதா³தமஞ்ஜிட்ட²பப⁴ஸ்ஸரானங் வஸேன ச²ப்³ப³ண்ணா பு³த்³த⁴ரஸ்மியோ.
ஸப்³ப³பாலிபு²ல்லோதி மூலதோ பட்டா²ய யாவ அக்³கா³ பு²ல்லோ விகஸிதோ. படிபாடியா ட²பிதானந்திஆதி³ பரிகப்பூபமா. யதா² தங்…பே॰… அலங்கதங் அஞ்ஞோ விரோசதி, ஏவங் விரோசித்த², ஸமதிங்ஸாய பாரமிதாஹி அபி⁴ஸங்க²தத்தா ஏவங் விரோசித்தா²தி வுத்தங் ஹோதி. பஞ்சவீஸதியா நதீ³னந்தி க³ங்கா³தீ³னங் சந்த³பா⁴கா³பரியோஸானானங் பஞ்சவீஸதியா மஹானதீ³னங். ஸம்பி⁴ஜ்ஜாதி ஸம்பே⁴த³ங் மிஸ்ஸீபா⁴வங் பத்வா முக²த்³வாரேதி ஸமுத்³த³ங் பவிட்ட²ட்டா²னே.
தே³வமனுஸ்ஸனாக³ஸுபண்ணக³ந்த⁴ப்³ப³யக்கா²தீ³னங் அக்கீ²னீதி சேதங் பரிகப்பனவஸேன வுத்தங். ஸஹஸ்ஸேனாதி பத³ஸஹஸ்ஸேன, பா⁴ணவாரப்பமாணேன க³ந்தே²னாதி அத்தோ².
கம்பயந்தோ வஸுந்த⁴ரந்தி அத்தனோ கு³ணவிஸேஸேஹி பத²வீகம்பங் உப்பாதெ³ந்தோ, ஏவங்பூ⁴தோபி அஹேட²யந்தோ பாணானி. ஸப்³ப³த³க்கி²ணத்தா பு³த்³தா⁴னங் த³க்கி²ணங் பட²மங் பாத³ங் உத்³த⁴ரந்தோ. ஸமங் ஸம்பு²ஸதே பூ⁴மிங் ஸுப்பதிட்டி²தபாத³தாய. யதி³பி பூ⁴மிங் ஸமங் பு²ஸதி, ரஜஸானுபலிப்பதி ஸுகு²மத்தா ச²வியா. நின்னட்டா²னங் உன்னமதீதிஆதி³ பு³த்³தா⁴னங் ஸுப்பதிட்டி²தபாத³ஸங்கா²தஸ்ஸ மஹாபுரிஸலக்க²ணபடிலாப⁴ஸ்ஸ நிஸ்ஸந்த³ப²லங். நாதிதூ³ரே உத்³த⁴ரதீதி அதிதூ³ரே ட²பேதுங் ந உத்³த⁴ரதி. நச்சாஸன்னே ச நிக்கி²பந்தி அச்சாஸன்னே ச டா²னே அனிக்கி²பந்தோ நிய்யாதி. ஹாஸயந்தோ ஸதே³வகே லோகே தோஸயந்தோ. சதூஹி பாதே³ஹி சரதீதி சதுசாரீ.
பு³த்³தா⁴னுபா⁴வஸ்ஸ பகாஸனவஸேன க³தத்தா வண்ணகாலோ நாம கிரேஸ. ஸரீரவண்ணே வா கு³ணவண்ணே வா கதி²யமானே து³க்கதி²தந்தி ந வத்தப்³ப³ங். கஸ்மா? அபரிமாணவண்ணா ஹி பு³த்³தா⁴ ப⁴க³வந்தோ, பு³த்³த⁴கு³ணஸங்வண்ணனா ஜானந்தஸ்ஸ யதா²த⁴ம்மஸங்வண்ணனங்யேவ அனுபவிஸதீதி.
து³கூலசும்ப³டகேனாதி நாக³விக்கந்தசரணோதி ஹத்தி²னாக³ஸதி³ஸபத³னிக்கே²போ. ஸதபுஞ்ஞலக்க²ணோதி அனேகஸதபுஞ்ஞனிம்மிதமஹாபுரிஸலக்க²ணோ மணிவேரோசனோ யதா²தி அதிவிய விரோசமானோ மணி விய வேரோசனோ நாம ஏகோ மணிவிஸேஸோதி கேசி மஹாஸாலோவாதி பது³மோ கோகனதோ³ யதா²தி கோகனத³ஸங்கா²தங் மஹாபது³மங் விய, விகஸமானபது³மங் விய வா.
ஆகாஸக³ங்க³ங் ஓதாரெந்தோ வியாதிஆதி³ தஸ்ஸா பகிண்ணககதா²ய அஞ்ஞேஸங் து³க்கரபா⁴வத³ஸ்ஸனஞ்சேவ ஸுணந்தானங் அச்சந்தஸுகா²வஹபா⁴வத³ஸ்ஸனஞ்ச பத²வீஜங் ஆகட்³டெ⁴ந்தோ வியாதி நாளியந்தங் யோஜெத்வா மஹாபத²வியா ஹெட்டி²மதலே பப்படகோஜங் உத்³த⁴ங்முக²ங் கத்வா ஆகட்³டெ⁴ந்தோ விய யோஜனிகந்தி யோஜனப்பமாணங் மது⁴ப⁴ண்ட³ந்தி மது⁴படலங்.
மஹந்தந்தி உளாரங். ஸப்³ப³தா³னங் தி³ன்னமேவ ஹோதீதி ஸப்³ப³மேவ பச்சயஜாதங் ஆவாஸதா³யகேன தி³ன்னமேவ ஹோதி. ததா²ஹி த்³வே தயோ கா³மே பிண்டா³ய சரித்வா கிஞ்சி அலத்³தா⁴ ஆக³தஸ்ஸபி சா²யூத³கஸம்பன்னங் ஆராமங் பவிஸித்வா ந்ஹாயித்வா படிஸ்ஸயே முஹுத்தங் நிபஜ்ஜித்வா உட்டா²ய நிஸின்னஸ்ஸ காயே ப³லங் ஆஹரித்வா பக்கி²த்தங் விய ஹோதி. ப³ஹி விசரந்தஸ்ஸ ச காயே வண்ணதா⁴து வாதாதபேஹி கிலமதி, படிஸ்ஸயங் பவிஸித்வா த்³வாரங் பிதா⁴ய முஹுத்தங் நிஸின்னஸ்ஸ விஸபா⁴க³ஸந்ததி வூபஸம்மதி, ஸபா⁴க³ஸந்ததி பதிட்டா²தி, வண்ணதா⁴து ஆஹரித்வா பக்கி²த்தா விய ஹோதி, ப³ஹி விசரந்தஸ்ஸ ச பாதே³ கண்டகோ விஜ்ஜ²தி, கா²ணு பஹரதி, ஸரீஸபாதி³பரிஸ்ஸயோ சேவ சோரப⁴யஞ்ச உப்பஜ்ஜதி, படிஸ்ஸயங் பவிஸித்வா த்³வாரங் பிதா⁴ய நிபன்னஸ்ஸ பன ஸப்³பே³ பரிஸ்ஸயா ந ஹொந்தி, அஜ்ஜ²யந்தஸ்ஸ த⁴ம்மபீதிஸுக²ங், கம்மட்டா²னங் மனஸிகரொந்தஸ்ஸ உபஸமஸுக²ங் உப்பஜ்ஜதி ப³ஹித்³தா⁴ விக்கே²பாபா⁴வதோ, ப³ஹி விசரந்தஸ்ஸ ச காயே ஸேதா³ முச்சந்தி, அக்கீ²னி ப²ந்த³ந்தி, ஸேனாஸனங் பவிஸனக்க²ணே மஞ்சபீடா²தீ³னி ந பஞ்ஞாயந்தி, முஹுத்தங் நிஸின்னஸ்ஸ பன அக்கி²பஸாதோ³ ஆஹரித்வா பக்கி²த்தோ விய ஹோதி, த்³வாரவாதபானமஞ்சபீடா²தீ³னி பஞ்ஞாயந்தி, ஏதஸ்மிம்பி ச ஆவாஸே வஸந்தங் தி³ஸ்வா மனுஸ்ஸா சதூஹி பச்சயேஹி ஸக்கச்சங் உபட்ட²ஹந்தி. தேன வுத்தங் – ‘‘ஆவாஸதா³னஸ்மிங் தி³ன்னே ஸப்³ப³ங் தா³னங் தி³ன்னமேவ ஹோதீ’’தி. பூ⁴மட்ட²க…பே॰… ந ஸக்காதி அயமத்தோ² மஹாஸுத³ஸ்ஸனவத்து²னா (தீ³॰ நி॰ 2.241 ஆத³யோ) தீ³பேதப்³போ³.
ஸீதந்தி உண்ஹந்தி அக்³கி³ஸந்தாபங். தஸ்ஸ பன த³வதா³ஹாதீ³ஸு ஸம்ப⁴வோ த³ட்ட²ப்³போ³. படிஹந்தீதி படிபா³ஹதி. யதா² தது³ப⁴யவஸேன காயசித்தானங் பா³த⁴னானி ந ஹொந்தி, ஏவங் கரோதி. ஸீதுண்ஹப்³பா⁴ஹதே ஹி ஸரீரே விக்கி²த்தசித்தோ பி⁴க்கு² யோனிஸோ பத³ஹிதுங் ந ஸக்கோதி. வாளமிகா³னீதி ஸீஹப்³யக்³கா⁴தி³வாளமிகே³. கு³த்தஸேனாஸனஞ்ஹி பவிஸித்வா த்³வாரங் பிதா⁴ய நிஸின்னஸ்ஸ தே பரிஸ்ஸயா ந ஹொந்தி ஸரீஸபேதி யே கேசி ஸரந்தா க³ச்ச²ந்தே தீ³க⁴ஜாதிகே. மகஸேதி நித³ஸ்ஸனமேதங், ட³ங்ஸாதீ³னங் ஏதேனேவ ஸங்க³ஹோ த³ட்ட²ப்³போ³. ஸிஸிரேதி ஸீதகாலவஸேன ஸத்தாஹவத்³த³லிகாதி³வஸேன ச உப்பன்னே ஸிஸிரஸம்ப²ஸ்ஸே. வுட்டி²யோதி யதா³ ததா³ உப்பன்னா வஸ்ஸவுட்டி²யோ படிஹனதீதி யோஜனா.
வாதாதபோ கோ⁴ரோதி ருக்க²க³ச்சா²தீ³னங் உம்மூலப⁴ஞ்ஜனவஸேன பவத்தியா கோ⁴ரோ ஸரஜஅரஜாதி³பே⁴தோ³ வாதோ சேவ கி³ம்ஹபரிளாஹஸமயேஸு உப்பத்தியா கோ⁴ரோ ஸூரியாதபோ ச. படிஹஞ்ஞதீதி படிபா³ஹீயதி. லேணத்த²ந்தி நானாரம்மணதோ சித்தங் நிவத்தெத்வா படிஸல்லானாராமத்த²ங். ஸுக²த்த²ந்தி வுத்தபரிஸ்ஸயாபா⁴வேன பா²ஸுவிஹாரத்த²ங். ஜா²யிதுந்தி அட்ட²திங்ஸாரம்மணேஸு யத்த² கத்த²சி சித்தங் உபனிஜ்ஜா²யிதுங். விபஸ்ஸிதுந்தி அனிச்சாதி³தோ ஸப்³ப³ஸங்கா²ரே ஸம்மஸிதுங்.
விஹாரேதி படிஸ்ஸயே. காரயேதி காராபெய்ய. ரம்மேதி மனோரமே நிவாஸஸுகே². வாஸயெத்த² ப³ஹுஸ்ஸுதேதி காரெத்வா பன எத்த² விஹாரேஸு ப³ஹுஸ்ஸுதே ஸீலவந்தே கல்யாணத⁴ம்மே நிவாஸெய்ய. தே நிவாஸெந்தோ பன தேஸங் ப³ஹுஸ்ஸுதானங் யதா² பச்சயேஹி கிலமதோ² ந ஹோதி, ஏவங் அன்னஞ்ச பானஞ்ச வத்த²ஸேனாஸனானி ச த³தெ³ய்ய உஜுபூ⁴தேஸு அஜ்ஜா²ஸயஸம்பன்னேஸு கம்மப²லானங் ரதனத்தயகு³ணானஞ்ச ஸத்³த³ஹனேன விப்பஸன்னேன சேதஸா.
இதா³னி க³ஹட்ட²பப்³ப³ஜிதானங் அஞ்ஞமஞ்ஞூபகாரதங் த³ஸ்ஸேதுங் ‘‘தே தஸ்ஸா’’தி கா³த²மாஹ. தத்த² தேதி ப³ஹுஸ்ஸுதா தஸ்ஸாதி உபாஸகஸ்ஸ. த⁴ம்மங் தே³ஸெந்தீதி ஸகலவட்டது³க்க²பனுத³னங் த⁴ம்மங் தே³ஸெந்தி. யங் ஸோ த⁴ம்மங் இத⁴ஞ்ஞாயாதி ஸோ புக்³க³லோ யங் ஸத்³த⁴ம்மங் இமஸ்மிங் ஸாஸனே ஸம்மாபடிபஜ்ஜனேன ஜானித்வா அக்³க³மக்³கா³தி⁴க³மேன அனாஸவோ ஹுத்வா பரினிப்³பா³யதி.
பூஜாஸக்காரவஸேனேவ ‘‘அதிரேகதரங் தி³யட்³ட⁴யாம’’ந்தி. ஸந்த³ஸ்ஸேஸீதி ஆனிஸங்ஸங் த³ஸ்ஸேஸி, ஆவாஸதா³னபடிஸங்யுத்தங் த⁴ம்மிங் கத²ங் ஸுத்வா ததோ பரங், ‘‘மஹாராஜ, இதிபி ஸீலங், இதிபி ஸமாதி⁴, இதிபி பஞ்ஞா’’தி ஸீலாதி³கு³ணே தேஸங் ஸம்மா த³ஸ்ஸேஸி, ஹத்தே²ன க³ஹெத்வா விய பச்சக்க²தோ பகாஸேஸி. ஸமாத³பேஸீதி ‘‘ஏவங் ஸீலங் ஸமாதா³தப்³ப³ங், ஸீலே பதிட்டி²தேன ஏவங் ஸமாதி⁴, ஏவங் பஞ்ஞா பா⁴வேதப்³பா³’’தி யதா² தே ஸீலாதி³கு³ணே ஆதி³யந்தி, ததா² க³ண்ஹாபேஸி. ஸமுத்தேஜேஸீதி யதா² ஸமாதி³ன்னங் ஸீலங் ஸுவிஸுத்³த⁴ங் ஹோதி, ஸமத²விபஸ்ஸனா ச பா⁴வியமானா யதா² ஸுட்டு² விஸோதி⁴தா உபரிவிஸேஸாவஹா ஹொந்தி, ஏவங் சித்தங் ஸமுத்தேஜேஸி நிஸாமனவஸேன வோதா³பேஸி. ஸம்பஹங்ஸேஸீதி யதா²னுஸிட்ட²ங் டி²தஸீலாதி³கு³ணேஹி ஸம்பதி லத்³த⁴கு³ணானிஸங்ஸேஹி
ஸமுதா³யவசனோபி அஸீதிமஹாதே²ர-ஸத்³தோ³ ததே³கதே³ஸேபி நிருள்ஹோதி ஆஹ ‘‘அஸீதிமஹாதே²ரேஸு விஜ்ஜமானேஸூ’’தி. ஆனந்த³த்தே²ரோபி ஹி அந்தோக³தோ⁴ ஏவாதி. ஸாகியமண்ட³லேதி ஸாகியராஜஸமூஹே.
படிபதா³ய நியுத்தத்தா பாடிபதோ³. தேனாஹ – ‘‘படிபன்னகோ’’தி. ஸிக்க²னஸீலதாதி³னா ஸேகோ², ஓதி⁴ஸோ ஸமிதபாபதாய ஸமணோ. ஸேகோ² பாடிபதோ³ படிபஜ்ஜனபுக்³க³லாதி⁴ட்டா²னேன படிபதா³தே³ஸனங் நியமெந்தோ படிபதா³ய புக்³க³லங் நியமேதி நாமாதி ‘‘படிபதா³ய புக்³க³லங் நியமெத்வா த³ஸ்ஸேதீ’’தி. ஸேக²ப்படிபதா³ ஸாஸனே மங்க³லபடிபதா³ ஸம்மதே³வ அஸேவிதப்³ப³பரிவஜ்ஜனேன ஸேவிதப்³ப³ஸமாதா³னேன உக்கங்ஸவத்தூ²ஸு ச பா⁴வதோ அஸேக²த⁴ம்மபாரிபூரியா ஆவஹத்தா ச வட்³ட⁴மானகபடிபதா³. அகிலமந்தாவ ஸல்லக்கெ²ஸ்ஸந்தீதி இத³ங் ததா³ தேஸங் அஸேக²பூ⁴மிஅதி⁴க³மாய அயொக்³யதாய வுத்தங். அகிலமந்தாவாதி இமினா படிஸம்பி⁴தா³ப்பத்தஸ்ஸபி அனதி⁴க³தமக்³க³ஸஞ்ஞாபனா பா⁴ரியாதி த³ஸ்ஸேதி. ஓஸடாதி அனுப்பவிட்டா². ஸகலங் வினயபிடகங் கதி²தமேவ ஹோதி தஸ்ஸ ஸீலகதா²பா³ஹுல்லதோ ஸேஸத்³வயேபி ஏஸேவ நயோ. தீஹி பிடகேஹீதி கரணத்தே² கரணவசனங். தேன தங்தங்பிடகானங் தஸ்ஸா தஸ்ஸா ஸிக்கா²ய ஸாத⁴கதமபா⁴வங் த³ஸ்ஸேதி.
பிட்டி²வாதோ உப்பஜ்ஜதி உபாதி³ன்னகஸரீரஸ்ஸ ததா²ரூபத்தா ஸங்கா²ரானஞ்ச அனிச்சதாய து³க்கா²னுப³ந்த⁴த்தா. அகாரணங் வா ஏதந்தி யேனாதி⁴ப்பாயேன வுத்தங், தமேவ அதி⁴ப்பாயங் விவரிதுங் ‘‘பஹோதீ’’திஆதி³ வுத்தங். சதூஹி இரியாபதே²ஹி பரிபு⁴ஞ்ஜிதுகாமோ அஹோஸி ஸக்யராஜூனங் அஜ்ஜா²ஸயவஸேன. ததா² ஹி வக்க²தி ‘‘ஸத்தா²பி ததே³வ ஸந்தா⁴ய தத்த² ஸங்கா⁴டிங் பஞ்ஞபெத்வா நிபஜ்ஜீதீ’’தி. யதி³ ஏவங் ‘‘பிட்டி² மே ஆகி³லாயதீ’’தி இத³ங் கத²ந்தி ஆஹ ‘‘உபாதி³ன்னகஸரீரஞ்ச நாமா’’திஆதி³.
23. ‘‘இமினா பாதிமொக்க²ஸங்வரேன…பே॰… ஸம்பன்னோ’’திஆதீ³ஸு (விப⁴॰ 511) ஸமன்னாக³தத்தோ² ஸம்பன்ன-ஸத்³தோ³, இத⁴ பன பாரிபூரிஅத்தோ²தி த³ஸ்ஸேதுங் ‘‘பரிபுண்ணஸீலோதி அத்தோ²’’தி வுத்தங். யோ பன ஸம்பன்னஸீலோயேவ, ஸோ பரிபுண்ணஸீலோ. பரிஸுத்³த⁴ஞ்ஹி ஸீலங் ‘‘பரிபுண்ண’’ந்தி வுச்சதி, ந ஸப³லங் கம்மாஸங் வா. ஸுந்த³ரத⁴ம்மேஹீதி ஸோப⁴னத⁴ம்மேஹி. யஸ்மிங் ஸந்தானே உப்பன்னா தஸ்ஸ ஸோப⁴னபா⁴வதோ. தேஹி ஸப்புரிஸபா⁴வஸாத⁴னதோ ஸப்புரிஸானங் த⁴ம்மேஹி.
24. இமினா எத்தகேன டா²னேனாதி ‘‘இத⁴, மஹானாம, அரியஸாவகோ’’தி ஆரபி⁴த்வா யாவ ‘‘அகஸிரலாபீ⁴’’தி பத³ங் இமினா எத்தகேன உத்³தே³ஸபதே³ன மாதிகங் ட²பெத்வா. படிபாடியாதி உத்³தே³ஸபடிபாடியா. ஏவமாஹாதி ‘‘ஏவங் கத²ஞ்ச, மஹானாமா’’திஆதி³னா இதா³னி வுச்சமானேன த³ஸ்ஸிதாகாரேன ஆஹ.
25. ஹிரீயதீதி லஜ்ஜீயதி பீளீயதி. யஸ்மா ஹிரீ பாபஜிகு³ச்ச²னலக்க²ணா, தஸ்மா ‘‘ஜிகு³ச்ச²தீதி அத்தோ²’’தி வுத்தங். ஒத்தப்பதீதி உத்தப்பதி. பாபுத்ராஸலக்க²ணஞ்ஹி ஒத்தப்பங். பக்³க³ஹிதவீரியோதி ஸங்கோசங் அனாபன்னவீரியோ. தேனாஹ ‘‘அனோஸக்கிதமானஸோ’’தி. பஹானத்தா²யாதி ஸமுச்சி²ந்த³னத்தா²ய. குஸலானங் த⁴ம்மானங் உபஸம்பதா³ நாம அதி⁴க³மோ ஏவாதி ஆஹ ‘‘படிலாப⁴த்தா²யா’’தி. ஸதினேபக்கேனாதி ஸதியா நேபக்கேன திக்க²விஸத³ஸூரபா⁴வேன. அட்ட²கதா²யங் பன நேபக்கங் நாம பஞ்ஞாதி அதி⁴ப்பாயேன ‘‘ஸதியா ச நிபகபா⁴வேன சா’’தி அத்தோ² வுத்தோ, ஏவங் ஸதி அஞ்ஞோ நித்³தி³ட்டோ² நாம ஹோதி. ஸதிமாதி ச இமினாவ விஸேஸா ஸதி க³ஹிதா, பரதோ ‘‘சிரகதம்பி ஸதினேபக்கேனாதி ஸதியா நேபக்கபா⁴வேனாதி ஸக்கா விஞ்ஞாதுங். தேனேவ ஹி பச்சயவிஸேஸவஸேன அஞ்ஞத⁴ம்மனிரபெக்கோ² ஸதியா ப³லவபா⁴வோ. ததா² ஹி ஞாணவிப்பயுத்தசித்தேனபி அஜ்ஜ²யனஸம்மஸனானி ஸம்ப⁴வந்தி.
சேதியங்க³ணவத்தாதீ³தி ஆதி³-ஸத்³தே³ன போ³தி⁴யங்க³ணவத்தாதீ³னி ஸங்க³ண்ஹாதி. அஸீதிமஹாவத்தபடிபத்திபூரணந்தி எத்த² அஸீதிவத்தபடிபத்திபூரணங் மஹாவத்தபடிபத்திபூரணந்தி வத்தபடிபத்திபூரண-ஸத்³தோ³ பச்சேகங் யோஜேதப்³போ³. தத்த² மஹாவத்தானி (விப⁴॰ மூலடீ॰ 406) நாம வத்தக²ந்த⁴கே (சூளவ॰ 356 ஆத³யோ) வுத்தானி ஆக³ந்துகவத்தங் ஆவாஸிகங் க³மிகங் அனுமோத³னங் ப⁴த்தக்³க³ங் பிண்ட³சாரிகங் ஆரஞ்ஞிகங் ஸேனாஸனங் ஜந்தாக⁴ரங் வச்சகுடி உபஜ்ஜா²யங் ஸத்³தி⁴விஹாரிகங் ஆசரியங் அந்தேவாஸிகவத்தந்தி சுத்³த³ஸ. ததோ அஞ்ஞானி பன கதா³சி தஜ்ஜனீயகம்மகதாதி³காலே பாரிவாஸிகாதி³காலே ச சரிதப்³பா³னி அஸீதி கு²த்³த³கவத்தானி ஸப்³பா³ஸு அவத்தா²ஸு ந சரிதப்³பா³னி, தஸ்மா மஹாவத்தேஸு, அக்³க³ஹிதானி. தத்த² ‘‘பாரிவாஸிகானங் பி⁴க்கூ²னங் வத்தங் பஞ்ஞபெஸ்ஸாமீ’’தி ஆரபி⁴த்வா ‘‘ந உபஸம்பாதே³தப்³ப³ங்…பே॰… ந ச²மாயங் சங்கமந்தே சங்கமே சங்கமிதப்³ப³’’ந்தி (சூளவ॰ 81) வுத்தானி பகப⁴த்தே சரிதப்³ப³வத்தாவஸானானி ச²ஸட்டி², ததோ பரங் ‘‘ந, பி⁴க்க²வே, பாரிவாஸிகேன பி⁴க்கு²னா பாரிவாஸிகவுட்³ட⁴தரேன பி⁴க்கு²னா ஸத்³தி⁴ங் மூலாயபடிகஸ்ஸனாரஹேன மானத்தாரஹேன மானத்தசாரிகேன அப்³பா⁴னாரஹேன பி⁴க்கு²னா ஸத்³தி⁴ங் ஏகச்ச²ன்னே ஆவாஸே வத்தப்³ப³’’ந்திஆதீ³னி (சூளவ॰ 82) பகதத்தே சரிதப்³பே³ஹி அனஞ்ஞத்தா விஸுங் விஸுங் அக³ணெத்வா பாரிவாஸிகவுட்³ட⁴தராதீ³ஸு புக்³க³லந்தரேஸு
ஸக்கச்சங் உத்³தி³ஸனங் ஸக்கச்சங் உத்³தி³ஸாபனந்தி பச்சேகங் ஸக்கச்சங்-ஸத்³தோ³ யோஜேதப்³போ³. உத்³தி³ஸனங் உத்³தே³ஸக்³க³ஹணங். த⁴ம்மோஸாரணங் த⁴ம்மஸ்ஸ உச்சாரணங். த⁴ம்மதே³ஸனா –
‘‘ஆதி³ம்ஹி ஸீலங் தே³ஸெய்ய, மஜ்ஜே² ஜா²னங் விபஸ்ஸனங்;
பரியோஸானே ச நிப்³பா³னங், ஏஸா கதி²கஸண்டி²தீ’’தி. (தீ³॰ நி॰ அட்ட²॰ 1.190; ஸங்॰ நி॰ அட்ட²॰ 3.4.246) –
ஏவங் கதி²தலக்க²ணா த⁴ம்மகதா². உபக³ந்த்வா நிஸின்னஸ்ஸ யஸ்ஸ கஸ்ஸசி க³ஹட்ட²ஸ்ஸ பப்³ப³ஜிதஸ்ஸ வா தங்க²ணானுரூபா த⁴ம்மீ கதா² உபனிஸின்னகதா². ப⁴த்தானுமோத³னகதா² அனுமோத³னியா. ஸரிதாதி எத்த² ந கேவலங் சிரகதசிரபா⁴ஸிதானங் ஸரணமனுஸ்ஸரணமத்தங் அதி⁴ப்பேதங், அத² கோ² ததா²பவத்தரூபாரூபத⁴ம்மானங் பரிக்³க³ஹமுகே²ன பவத்தவிபஸ்ஸனாசாரே ஸதிஸம்பொ³ஜ்ஜ²ங்க³ஸமுட்டா²பனந்தி த³ஸ்ஸேதுங் ‘‘தஸ்மிங் காயேன சிரகதே’’திஆதி³ வுத்தங். ஸகிம்பி ஸரணேனாதி ஏகவாரங் ஸரணேன. புனப்புனங் ஸரணேனாதி அனு அனு ஸரணேன. ஸதிஸம்பொ³ஜ்ஜ²ங்க³ம்பி விவேகனிஸ்ஸிதங் விராக³னிஸ்ஸிதங் நிரோத⁴னிஸ்ஸிதங் வோஸக்³க³பரிணாமிஞ்ச கத்வா ஸரந்தோ தத்த² தத்த² ஜவனவாரே ஸரணஜவனவாரே பரித்தஜவனவஸேன அனுஸ்ஸரிதாதி வேதி³தப்³பா³.
க³திஅத்தா² தா⁴துஸத்³தா³ பு³த்³தி⁴அத்தா² ஹொந்தீதி ஆஹ – ‘‘உத³யஞ்ச வயஞ்ச படிவிஜ்ஜி²துங் ஸமத்தா²யா’’தி. மிஸ்ஸகனயேனாயங் தே³ஸனா ஆக³தாதி ஆஹ – ‘‘விக்க²ம்ப⁴னவஸேன ச ஸமுச்சே²த³வஸேன சா’’தி. தேனாஹ ‘‘விபஸ்ஸனாபஞ்ஞாய சேவா’’திஆதி³. விபஸ்ஸனாபஞ்ஞாய நிப்³பே³தி⁴கபரியாயதோ. ஸா ச கோ² பதே³ஸிகாதி நிப்பதே³ஸிகங் கத்வா த³ஸ்ஸேதுங் ‘‘மக்³க³பஞ்ஞாய படிலாப⁴ஸங்வத்தனதோ சா’’தி வுத்தங். து³க்க²க்க²யகா³மினிபா⁴வேபி ஏஸேவ நயோ. ஸம்மாதி யாதா²வதோ. அகுப்பத⁴ம்மதாய ‘‘ஹேதுனா நயேனா’’தி.
26. அதி⁴கங் சேதோ அபி⁴சேதோ, மஹக்³க³தசித்தங், தஸ்ஸ பன அதி⁴கதா காமச்ச²ந்தா³தி³படிபக்க²விக³மேன விஸிட்ட²பா⁴வப்பத்தி, தன்னிஸ்ஸிதானி ஆபி⁴சேதஸிகானி. தேனாஹ ‘‘அபி⁴சித்தங் ஸெட்ட²சித்தங் ஸிதான’’ந்தி. தி³ட்ட²த⁴ம்மஸுக²விஹாரானந்தி இமஸ்மிங்யேவ அத்தபா⁴வே பா²ஸுவிஹாரபூ⁴தானங். தேஹி ‘‘அப்பிதப்பிதக்க²ணே ஸுக²படிலாப⁴ஹேதூன’’ந்தி. இச்சி²திச்சி²தக்க²ணே ஸமாபஜ்ஜிதாதி இமினா தேஸு ஜா²னேஸு ஸமாபஜ்ஜனவஸீபா⁴வமாஹ, ‘‘நிகாமலாபீ⁴’’தி பன வசனதோ ஆவஜ்ஜனாதி⁴ட்டா²னா பச்சவெக்க²ணவஸியோ ச வுத்தா ஏவாதி வேதி³தப்³பா³. நிது³க்க²லாபீ⁴தி இமினா தேஸங் ஜா²னானங் ஸுக²படிபதா³கி²ப்பாபி⁴ஞ்ஞதங் த³ஸ்ஸேதி, விபுலலாபீ⁴தி இமினா பகு³ணதங் தப்பமாணத³ஸ்ஸிதபா⁴வதீ³பனதோ. தேனாஹ ‘‘பகு³ணபா⁴வேனா’’திஆதி³. ஸமாபஜ்ஜிதுங் ஸக்கோதி ஸமாபஜ்ஜனவஸீபா⁴வதாய ஸாதி⁴தத்தா. ஸமாதி⁴பாரிபந்தி²கத⁴ம்மேதி வஸீபா⁴வஸ்ஸ பச்சனீகத⁴ம்மே. ஜா²னாதி⁴க³மஸ்ஸ பன பச்சனீகத⁴ம்மா பகே³வ விக்க²ம்பி⁴தா, அஞ்ஞதா² ஜா²னாதி⁴க³மோ ஏவ ந ஸியா. அகிலமந்தோ விக்க²ம்பே⁴துங் ந ஸக்கோதீதி கிச்சே²ன விக்க²ம்பே⁴தி விஸோதே⁴தி, காமாதீ³னவபச்சவெக்க²ணாதீ³ஹி காமச்ச²ந்தா³தீ³னங் அஞ்ஞேஸங் ஸமாதி⁴பாரிபந்தி²கானங் தூ³ரஸமுஸ்ஸாரணங் இத⁴ விக்க²ம்ப⁴னங் விஸோத⁴னந்தி வேதி³தப்³ப³ங்.
27. விபஸ்ஸனாஹிதாய உபரூபரிவிஸேஸாவஹத்தா வட்³ட⁴மானாய புப்³ப³பா⁴க³ஸீலாதி³படிபதா³ய. ஸா ஏவ புப்³ப³பா⁴க³படிபதா³ யதா²பா⁴விததாய அவஸ்ஸங் பா⁴வினங் விஸேஸங் பரிக்³க³ஹிதத்தா அண்ட³ங் வியாதி அண்ட³ங், கிலேஸேஹி அதூ³ஸிததாய அபூதி அண்ட³ங் ஏதஸ்ஸாதி அபுச்சண்டோ³, விபஸ்ஸனங் உஸ்ஸுக்காபெத்வா டி²தபுக்³க³லோ, தஸ்ஸ பா⁴வோ அபுச்சண்ட³தா. விபஸ்ஸனாதி³ஞாணப்பபே⁴தா³யாதி புப்³பே³னிவாஸஞாணாதி³ஞாணபபே⁴தா³ய. தத்தா²தி சேதோகி²லஸுத்தே (ம॰ நி॰ 1.185) ‘‘ஸ கோ² ஸோ, பி⁴க்க²வே, ஏவங் உஸ்ஸொள்ஹிபன்னரஸங்க³ஸமன்னாக³தோ பி⁴க்கு² ப⁴ப்³போ³ அபி⁴னிப்³பி³தா³யா’’தி ஆக³தத்தா உஸ்ஸொள்ஹிபன்னரஸேஹி அங்கே³ஹி ஸமன்னாக³தபா⁴வோதி ஏவங் யங் ஓபம்மஸங்ஸந்த³னங் ஆக³தங், தங் ஓபம்மஸங்ஸந்த³னங் இத⁴ இமஸ்மிங் ஸேக²ஸுத்தே யோஜெத்வா வேதி³தப்³ப³ந்தி ஸம்ப³ந்தோ⁴.
28. மஹக்³க³தாதி³பா⁴வேன ஹெட்டி²மானங் ஜா²னானங் அனுரூபம்பி அத்தனோ விஸேஸேன தே உத்தரித்வா அதிக்கமித்வான டி²தந்தி அனுத்தரங், தேனாஹ – ‘‘பட²மாதி³ஜ்ஜா²னேஹி அஸதி³ஸங் உத்தம’’ந்தி. து³தியாதீ³ஸுபி ‘‘புப்³பே³னிவாஸஞாணேன பட²மங் ஜாயதீ’’தி, ஸேஸஞாணத்³வயேபி ஏஸேவ நயோ.
29. சரணஸ்மிந்தி பச்சத்தே பு⁴ம்மவசனந்தி ஆஹ ‘‘சரணங் நாம ஹோதீதி அத்தோ²’’தி. தேனாதி கரணத்தே² கரணவசனங் அக³தபுப்³ப³தி³ஸாக³மனே தேஸங் ஸாத⁴கதமபா⁴வதோ.
அட்ட² ஞாணானீதி இத⁴ ஆக³தானி ச அனாக³தானி ச அம்ப³ட்ட²ஸுத்தாதீ³ஸு (தீ³॰ நி॰ 1.254 ஆத³யோ) ஆக³தானி க³ஹெத்வா வத³தி. வினிவிஜ்ஜி²த்வாதி புப்³பே³னிவாஸபடிச்சா²த³காதி³கிலேஸதமங் பி⁴ந்தி³த்வா பதா³லெத்வா.
30. ஸனங்குமாரேனாதி ஸனந்தனகுமாரேன. ததே³வ ஹி தஸ்ஸ ஸனந்தனகுமாரதங் த³ஸ்ஸேதுங் ‘‘சிரகாலதோ பட்டா²யா’’தி வுத்தங். ஸோ அத்தபா⁴வோதி யேன அத்தபா⁴வேன மனுஸ்ஸபதே² ஜா²னங் நிப்³ப³த்தேஸி, ஸோ குமாரத்தபா⁴வோ, தஸ்மா ப்³ரஹ்மபூ⁴தோபி தாதி³ஸேன குமாரத்தபா⁴வேன சரதி.
ஜனிதஸ்மிங்-ஸத்³தோ³ ஏவ இ-காரஸ்ஸ ஏ-காரங் கத்வா ‘‘ஜனேதஸ்மி’’ந்தி வுத்தோ, ஜனிதஸ்மிந்தி ச ஜனஸ்மிந்தி அத்தோ² வேதி³தப்³போ³. ஜனிதஸ்மிந்தி ஸாமஞ்ஞக்³க³ஹணேபி யத்த² சதுவண்ணஸமஞ்ஞா, தத்தே²வ மனுஸ்ஸலோகே. க²த்தியோ ஸெட்டோ²தி லோகஸமஞ்ஞாபி மனுஸ்ஸலோகேயேவ, ந தே³வகாயே ப்³ரஹ்மகாயே வாதி த³ஸ்ஸேதுங் ‘‘யே கொ³த்தபடிஸாரினோ’’தி வுத்தங். படிஸரந்தீதி ‘‘அஹங் கோ³தமோ, அஹங் கஸ்ஸபோ’’தி பதி பதி அத்தனோ கொ³த்தங் அனுஸரந்தி படிஜானந்தி வாதி அத்தோ².
எத்தாவதாதி ‘‘ஸாது⁴ ஸாது⁴ ஆனந்தா³’’தி எத்தகேன ஸாது⁴காரதா³னேன. ஜினபா⁴ஸிதங் நாம ஜாதந்திஆதி³தோ பட்டா²ய யாவ பரியோஸானா தே²ரபா⁴ஸிதங் பு³த்³த⁴பா⁴ஸிதமேவ நாம ஜாதங். ‘‘கிம்பனித³ங் ஸுத்தங் ஸத்து²தே³ஸனானுவிதா⁴னதோ ஜினபா⁴ஸிதங், உதா³ஹு ஸாது⁴காரதா³னமத்தேனா’’தி ஏவரூபா சோத³னா இத⁴ அனோகாஸா தே²ரஸ்ஸ தே³ஸனாய ப⁴க³வதோ தே³ஸனானுவிதா⁴னஹேதுகத்தா ஸாது⁴காரதா³னஸ்ஸாதி. யங் பனெத்த² அத்த²தோ அவிப⁴த்தங், தங் ஸுவிஞ்ஞெய்யமேவ.
ஸேக²ஸுத்தவண்ணனாய லீனத்த²ப்பகாஸனா ஸமத்தா.
4. போதலியஸுத்தவண்ணனா
31. அங்கா³ ‘‘அங்கா³யேவ ஸோ ஜனபதோ³’’தி. மஹியா பனஸ்ஸ உத்தரேன யா ஆபோதி மஹியா நதி³யா யா ஆபோ தஸ்ஸ ஜனபத³ஸ்ஸ உத்தரேன ஹொந்தி. தாஸங் அவிதூ³ரத்தா ஸோ ஜனபதோ³ உத்தராபோதி வுச்சதி. ஸா பன மஹீ கத்த²சி கத்த²சி பி⁴ஜ்ஜித்வா க³தாதி ஆஹ ‘‘கதரமஹியா உத்தரேன யா ஆபோ’’தி. தத்தா²தி தஸ்ஸா மஹியா ஆக³மனதோ பட்டா²ய அயங் ஆவிபா⁴வகதா². யஸ்மா (அ॰ நி॰ டீ॰ 3.8.19) லோகியா ஜம்பு³தீ³போ ஹிமவா தத்த² பதிட்டி²தஸமுத்³த³த³ஹபப்³ப³தனதி³யோதி ஏதேஸு யங் யங் ந மனுஸ்ஸகோ³சரங், தத்த² ஸயங் ஸம்மூள்ஹா அஞ்ஞேபி ஸம்மோஹயந்தி, தத்த² தத்த² ஸம்மோஹவித⁴மனத்த²ங் ‘‘அயங் கிர ஜம்பு³தீ³போ’’திஆதி³மாரத்³த⁴ங். த³ஸஸஹஸ்ஸயோஜனபரிமாணோ ஆயாமதோ ச வித்தா²ரதோ சாதி அதி⁴ப்பாயோ. தேனாஹ ‘‘தத்தா²’’திஆதி³. உத³கேன அஜ்ஜொ²த்த²டோ தது³பபோ⁴கி³ஸத்தானங் புஞ்ஞக்க²யேன.
ஸுந்த³ரத³ஸ்ஸனங் கூடந்தி ஸுத³ஸ்ஸனகூடங், யங் லோகே ‘‘ஹேமகூட’’ந்தி வுச்சதி. மூலக³ந்தோ⁴ காளானுஸாரியாதி³. ஸாரக³ந்தோ⁴ சந்த³னாதி³. பெ²க்³கு³க³ந்தோ⁴ ஸலலாதி³. தசக³ந்தோ⁴ லவங்கா³தி³. பபடிகக³ந்தோ⁴ கபி³த்தா²தி³. ரஸக³ந்தோ⁴ ஸஜ்ஜாதி³, பத்தக³ந்தோ⁴ தமாலஹிரிவேராதி³. புப்ப²க³ந்தோ⁴ நாக³குங்குமாதி³. ப²லக³ந்தோ⁴ ஜாதிப²லாதி³. க³ந்த⁴க³ந்தோ⁴ ஸப்³பே³ஸங் க³ந்தா⁴னங் க³ந்தோ⁴. யஸ்ஸ ஹி ருக்க²ஸ்ஸ ஸப்³பே³ஸம்பி மூலாதீ³னங் க³ந்தோ⁴ அத்தி², ஸோ இத⁴ க³ந்தோ⁴ நாம. தஸ்ஸ க³ந்த⁴ஸ்ஸ க³ந்தோ⁴ க³ந்த⁴க³ந்தோ⁴. ஸப்³பா³னி புது²லதோ பஞ்ஞாஸயோஜனானி, ஆயாமதோ பன உப்³பே³த⁴தோ விய த்³வியோஜனஸதானேவாதி வத³ந்தி.
மனோஹரஸிலாதலானீதி ஓதரணத்தா²ய மனுஞ்ஞஸோபானஸிலாதலானி. ஸுபடியத்தானீதி தது³பபோ⁴கி³ஸத்தானங் ஸாதா⁴ரணகம்மானுபா⁴வேன ஸுட்டு² படியத்தானி ஸுப்பவத்திதானி ஹொந்தி. மச்ச²கச்ச²பாத³யோ உத³கங் மலினங் கரொந்தி, தத³பா⁴வதோ ப²லிகஸதி³ஸனிம்மலுத³கானி. திரியதோ தீ³க⁴ங் உக்³க³தகூடந்தி ‘‘திரச்சா²னபப்³ப³த’’ந்தி ஆஹ.
ஆபணானி ‘‘ஆபணமுக²ஸஹஸ்ஸானீ’’தி. விப⁴த்தானீதி வஸனட்டா²னந்தி அத்தனோ யதா²பா²ஸுகங் வஸிதப்³ப³ட்டா²னங். ஆஸதி எத்தா²தி ஆஸனங், நிஸீதி³தப்³ப³ட்டா²னானி.
அஸாருப்பங் படிச்ச உப்பஜ்ஜனகஸ்ஸ சா²த³னதோ ச²ன்னங் அனுச்ச²விகங், ததே³வ அஜ்ஜா²ஸயஸம்பத்திங் பதிரூபேதி பகாஸேதீதி பதிரூபங். தேனாஹ ‘‘நப்பதிரூப’’ந்தி. காரணவேவசனானீதி ஞாபககாரணவேவசனானி. ஞாபகஞ்ஹி காரணங் அதி⁴ப்பேதங். அத்த²ங் ஆகரோதி பகாஸேதீதி ஆகாரோ, தமேவ லீனங் கு³ள்ஹங் அத்த²ங் க³மேதீதி லிங்க³ங், ஸோ தேன நிமீயதீதி நிமித்தந்தி வுச்சதி. இதா³னி தமேவத்த²ங் விவரிதுங் ‘‘தீ³க⁴த³ஸவத்த²…பே॰… நிமித்தாதி வுத்தா’’தி ஆஹ. தேதி ஆகாராத³யோ. ததா² ஹி பன மேதிஆதி³னா போதலியோ க³ஹபதி ‘‘பரிப்³பா³ஜகனியாமேன அஹங் ஜீவாமி, தஸ்மா க³ஹபதி ந ஹோமீதி வத³தி. ஓவத³ந்தோதி அனுஸாஸந்தோ. உபவத³ந்தோதி பரிபா⁴ஸந்தோ.
32. கே³த⁴பூ⁴தோ லோபோ⁴தி கி³ஜ்ஜ²னஸபா⁴வோ லோபோ⁴. அகி³ஜ்ஜ²னலக்க²ணோ ந லோபோ⁴, அனிந்தா³பூ⁴தங் அக⁴ட்டனந்தி நிந்தா³ய படிபக்க²பூ⁴தங் பரேஸங் அக⁴ட்டனங். நிந்தா³க⁴ட்டனாதி நிந்தா³வஸேன பரேஸங் க⁴ட்டனா அக்கோஸனா. ப்³யவஹாரவோஹாரோபீதி கயவிக்கயலக்க²ணோ ஸப்³யோஹாரோபி தா³னக்³க³ஹணங் வோஹாரோ. ‘‘த³த்தோ திஸ்ஸோ’’ திஆதி³னா வோஹரணங் பஞ்ஞாபனந்தி பஞ்ஞத்தி வோஹாரோ. யதா²தி⁴ப்பேதஸ்ஸ அத்த²ஸ்ஸ வோஹரணங் கத²னங் போ³த⁴னந்தி வசனங் வோஹாரோ. யாதா²வதோ அயாதா²வதோ ச வோஹரதி ஏதேனாதி வோஹாரோ, சேதனா. அயமிதா⁴தி⁴ப்பேதோதி அயங் சேதனாலக்க²ணோ வோஹாரோ இத⁴ இமஸ்மிங் அத்தே² அதி⁴ப்பேதோ, ஸோ ச கோ² ஸாவஜ்ஜோவ ஸமுச்சே²த³ஸ்ஸ இச்சி²தத்தா. இதா³னி சதுப்³பி³த⁴ஸ்ஸபி வோஹாரஸ்ஸ இத⁴ ஸம்ப⁴வங் த³ஸ்ஸேதுங் ‘‘யஸ்மா வா’’திஆதி³ வுத்தங். கி³ஹீதி சேதனா நத்தீ²தி அஹங் கி³ஹீதி சேதனாபவத்தி நத்தி². கி³ஹீதி வசனங் நத்தீ²தி கி³ஹீதி அத்தனோ பரேஸஞ்ச வசனப்பவத்தி நத்தி². கி³ஹீதி பண்ணத்தி நத்தீ²தி கி³ஹீதி ஸமஞ்ஞா நத்தி². கி³ஹீதி ப்³யவஹாரோ நத்தீ²தி ஸமுதா³சாரோ நத்தி².
33. பாணாதிபாதோவ ஸங்யோஜனங். கஸ்மா? ப³ந்த⁴னபா⁴வேன பவத்தனதோ நிஸ்ஸரிதுங் அப்பதா³னதோ. பாணாதிபாதஸ்ஸ அத்தி²தாய ஸோ புக்³க³லோ ‘‘பாணாதிபாதஸ்ஸ…பே॰… ஹோதீ’’தி. யஞ்ஹி யஸ்ஸ அத்தி², தேன ஸோ அபதி³ஸ்ஸதீதி. ப³ஹுதாயாதி அசக்கு²காதி³பே⁴தே³ன ப³ஹுபா⁴வதோ. பாணாதிபாதஸ்ஸ படிபக்கோ² அபாணாதிபாதோ. ஸோ பன அத்த²தோ காயத்³வாரிகோ ஸீலஸங்வரோதி ஆஹ ‘‘காயிகஸீலஸங்வரேனா’’தி. அத்தாபி மங் உபவதெ³ய்யாதிஆதி³ பாணாதிபாதே ஆதீ³னவத³ஸ்ஸனங். ஆதீ³னவத³ஸ்ஸினோ ஹி ததோ ஓரமணங். தே³ஸனாவஸேனாதி ஸங்யோஜனந்திபி நீவரணந்திபி இத⁴ வுத்தங். கஸ்மா? தத³த்த²ஸம்ப⁴வதோ. தேனாஹ – ‘‘வட்டப³ந்த⁴னட்டே²ன ஹிதப்படிச்சா²த³னட்டே²ன சா’’தி, பாணாதிபாதோ ஹி அபாணாதிபாதபச்சயங் ஹிதங் படிச்சா²தெ³ந்தோவ உப்பஜ்ஜதீதி. ஏகோ அவிஜ்ஜாஸவோதி இத³ங் ஸஹஜாதவஸேன வுத்தங், உபனிஸ்ஸயவஸேன பன இதரேஸம்பி ஆஸவானங் யதா²ரஹங் ஸம்ப⁴வோ வேதி³தப்³போ³. பாணாதிபாதீ ஹி புக்³க³லோ ‘‘தப்பச்சயங் அத்த²ங் கரிஸ்ஸாமீ’’தி காமே பத்தே²தி. தி³ட்டி²ங் க³ண்ஹாதி, ப⁴வவிஸேஸங் பச்சாஸீஸதி. தத்த² உப்பன்னங் விஹனதி பா³த⁴தீதி விகா⁴தோ, து³க்க²ங், பரிளாஹனங் அனத்து²ப்பாத³வஸேன உபதாபனங் பரிளாஹோ, அயமேதேஸங் விஸேஸோ. ஸப்³ப³த்தா²தி ஸப்³பே³ஸு வாரேஸு. இமினா உபாயேனாதி அதிதே³ஸேன பன பரிக்³க³ஹிதோ அத்தோ² பரதோ ஆக³மிஸ்ஸதீதி.
34-40. இமஸ்மிங் பதே³தி ஏதேன ஸத்தஸுபி வாரேஸு ததா² ஆக³தங் பத³ங் ஸாமஞ்ஞதோ க³ஹிதங். தேனாஹ ‘‘இமினா’’திஆதி³. ரோஸனங் காயிகங் வாசஸிகஞ்சாதி தப்படிபக்கோ² அரோஸோபி ததா² து³விதோ⁴தி ஆஹ ‘‘காயிகவாசஸிகஸங்வரேனா’’தி. யதா² அபி⁴ஜ்ஜா² லோபோ⁴, அனபி⁴ஜ்ஜா² அலோபோ⁴, ஏவங் அகோதூ⁴பாயாஸோ அப்³யாபாதோ³, ஸங்வரே ஸுக²ந்தி ஸங்வரோதி த³ட்ட²ப்³போ³, அனதிலோபோ⁴ பன ஸதிஸங்வரே, அனதிமானோ ஞாணஸங்வரே ஸங்க³ஹங் க³ச்ச²தீதி த³ட்ட²ப்³ப³ங். இமேஸு பன பதே³ஸு ஏவங் ஸப்³ப³வாரேஸு யோஜனா காதப்³பா³தி ஸம்ப³ந்தோ⁴.
ஏவங் ஆஸவுப்பத்தி வேதி³தப்³பா³தி எத்த² வுத்தஸ்ஸபி ஏகஜ்ஜ²ங் வுச்சமானத்தா ‘‘புன அயங் ஸங்கே²பவினிச்ச²யோ’’தி வுத்தங். அஸம்மோஹத்த²ங் ஆரம்மணஸ்ஸ. புரிமேஸு தாவ சதூஸு வாரேஸு விரமிதுங் ந ஸக்கோமீதி வத்தப்³ப³ங். ‘‘அத்தாபி மங் உபவதெ³ய்யா’’தி ஏதஸ்ஸ பத³ஸ்ஸ அத்த²வண்ணனாயங் ‘‘ந ஸக்கோமீ’’தி, ‘‘அனுவிஜ்ஜாபி மங் விஞ்ஞூ க³ரஹெய்யு’’ந்தி ஏதஸ்ஸ பத³ஸ்ஸ அத்த²வண்ணனாயங் ‘‘ந ஸக்கோதீ’’தி வத்தப்³ப³ங், இமினா நயேன பச்சி²மேஸுபி சதூஸு யதா²ரஹங் யோஜனா வேதி³தப்³பா³. அதிமானே ப⁴வாஸவஅவிஜ்ஜாஸவாதி வுத்தங் மானேன ஸஹ தி³ட்டி²யா அனுப்பஜ்ஜனதோ, அதிமானோ பன காமராகே³னபி உப்பஜ்ஜதேவாதி ‘‘அதிமானே காமாஸவஅவிஜ்ஜாஸவா’’தி வத்தப்³ப³ங் ஸியா, ஸ்வாயங் நயோ வுத்தனயத்தா ஸுவிஞ்ஞெய்யோதி ந த³ஸ்ஸிதோ. பாதிமொக்க²ஸங்வரஸீலங் கதி²தங் ஆதி³தோ சதூஹி ச²ட்டே²ன வாதி பஞ்சஹி வாரேஹி, ஸேஸேஹி தீஹி பாதிமொக்க²ஸங்வரஸீலே டி²தஸ்ஸ பி⁴க்கு²னோ படிஸங்கா²பஹானங், ஸப்³பே³ஹிபி பன பி⁴க்கு²பா⁴வே டி²தஸ்ஸ கி³ஹிவோஹாரஸமுச்சே²தோ³ கதி²தோ. தத்த² ஸப்³ப³த்த² வத்தங் ‘‘இத³ஞ்சித³ஞ்ச மய்ஹங் காதுங் நப்பதிரூப’’ந்தி படிஸங்கா²னவஸேன அகரணங் பஜஹனஞ்ச படிஸங்கா²பஹானங்.
காமாதீ³னவகதா²வண்ணனா
42. உபஸும்பெ⁴ய்யாதி உப-ஸத்³தோ³ ஸமீபத்தோ², ஸும்ப⁴னங் விக்கே²பனங். தேனேவ தமேனந்தி பு⁴ம்மத்தே² உபயோக³வசனந்தி ஆஹ – ‘‘தஸ்ஸ ஸமீபே கி²பெய்யா’’தி, தஸ்ஸ குக்குரஸ்ஸ ஸமீபே அட்டி²கங்கலங் கி²பெய்யாதி அத்தோ². நிம்மங்ஸத்தா கங்கலந்தி வுச்சதீதி இமினா விக³தமங்ஸாய அட்டி²கங்கலிகாய உரட்டி²ம்ஹி வா பிட்டி²கண்டகே வா ஸீஸட்டி²ம்ஹி வா கங்கல-ஸத்³தோ³ நிருள்ஹோதி த³ஸ்ஸேதி. ஸுனிக்கந்தந்தி நில்லிகி²தங் கத்வாவ நிப்³பி³ஸேஸங் லிகி²தங்.
ஏகத்துபட்டா²னஸ்ஸ அஜ்ஜு²பெக்க²னவஸேன பவத்தியா ஏகத்தா. தேனாஹ ‘‘சதுத்த²ஜா²னுபெக்கா²’’தி. யஸ்மா பனஸ்ஸ ஆரம்மணம்பி ஏகஸபா⁴வமேவ, தஸ்மா ஆஹ ‘‘ஸா ஹீ’’திஆதி³. லோகாமிஸஸங்கா²தாதி அபரிஞ்ஞாதவத்து²னா லோகேன ஆமஸிதப்³ப³தோ, லோகே வா ஆமிஸோதி ஸங்க²ங் க³தாய வஸேன காமகு³ணானங் காமபா⁴வோ ச ஆமிஸபா⁴வோ ச, ஸோ ஏவ நிப்பரியாயதோ ஆமிஸந்தி வத்தப்³ப³தங் அரஹதி. காமகு³ணாமிஸாதி காமகு³ணே ச²ந்த³ராகா³. க³ஹணட்டே²ன பு⁴ஸங் ஆதா³னட்டே²ன.
43. ட³யனங் ஆகாஸேன க³மனந்தி ஆஹ ‘‘உப்பதித்வா க³ச்செ²ய்யா’’தி. கி³ஜ்ஜா²தீ³னங் வாஸிப²ரஸு ந ஹோதீதி ஆஹ – ‘‘முக²துண்ட³கேன ட³ஸந்தா தச்செ²ய்யு’’ந்தி. விஸ்ஸஜ்ஜெய்யுந்தி எத்த² ‘‘விஸ்ஸஜ்ஜன’’ந்தி ஆகட்³ட⁴னங் அதி⁴ப்பேதங் அனேகத்த²த்தா தா⁴தூனங், ஆகட்³ட⁴னஞ்ச அனுப³ந்தி⁴த்வா பாதனந்தி ஆஹ ‘‘மங்ஸபேஸிங் நகே²ஹி கட்³டி⁴த்வா பாதெய்யு’’ந்தி.
47. புரிஸஸ்ஸ போரிஸெய்யங்.
48. ஸம்பன்னங் ஸுந்த³ரங் ப²லமஸ்ஸாதி ஸம்பன்னப²லங். ப²லூபபன்னந்தி ப²லேஹி உபேதந்தி ஆஹ ‘‘ப³ஹுப²ல’’ந்தி.
50. ஸுவிதூ³ரவிதூ³ரேதி அரியஸ்ஸ வினயே வோஹாரஸமுச்சே²த³தோ ஸுட்டு² விதூ³ரபூ⁴தே ஏவ விதூ³ரே அஹங் டி²தோ. கஸ்ஸசி நாம அத்த²ஸ்ஸபி அஜானநதோ ந ஆஜானந்தீதி அனாஜானீயாதி கத்துஸாத⁴னமஸ்ஸ த³ஸ்ஸெந்தோ அஜானநகேதி அஜானந்தபோ⁴ஜனஸீஸேன தேஸங் தா³தப்³ப³பச்சயே வத³தி. ஸேஸங் ஸுவிஞ்ஞெய்யமேவ.
போதலியஸுத்தவண்ணனாய லீனத்த²ப்பகாஸனா ஸமத்தா.
5. ஜீவகஸுத்தவண்ணனா
51. குமாரேன கோமாரப⁴ச்சோ யதா² ‘‘பி⁴ஸக்கமேவ பே⁴ஸஜ்ஜ’’ந்தி.
ஆரப⁴ந்தீதி எத்த² ஆரப⁴-ஸத்³தோ³ காமங் காமாயூஹனயஞ்ஞுட்டா²பனஆபத்திஆபஜ்ஜனவிஞ்ஞாபனாதீ³ஸுபி ஆக³தோ, இத⁴ பன ஹிங்ஸனே இச்சி²தப்³போ³தி ஆஹ – ‘‘ஆரப⁴ந்தீதி கா⁴தெந்தீ’’தி. உத்³தி³ஸித்வா கதந்தி (அ॰ நி॰ டீ॰ 3.8.12; ஸாரத்த²॰ டீ॰ மஹாவக்³க³ 3.294) அத்தானங் உத்³தி³ஸித்வா மாரணவஸேன கதங் நிப்³ப³த்திதங். படிச்சகம்மந்தி எத்த² கம்ம-ஸத்³தோ³ கம்மஸாத⁴னோ அதீதகாலிகோதி ஆஹ – ‘‘அத்தானங் படிச்ச கத’’ந்தி. நிமித்தகம்மஸ்ஸேதங் அதி⁴வசனங் ‘‘படிச்ச கம்மங் பு²ஸதீ’’திஆதீ³ஸு (ஜா॰ 1.4.75) விய. நிமித்தகம்மஸ்ஸாதி நிமித்தபா⁴வேன லத்³த⁴ப்³ப³கம்மஸ்ஸ, ந கரணகாராபனவஸேன. படிச்சகம்மங் எத்த² அத்தீ²தி மங்ஸங் படிச்சகம்மங் யதா² ‘‘பு³த்³த⁴ங் ஏதஸ்ஸ அத்தீ²தி பு³த்³தோ⁴’’தி. தேஸந்தி நிக³ண்டா²னங். அஞ்ஞேபி ப்³ராஹ்மணாத³யோ தங்லத்³தி⁴கா அத்தே²வ.
காரணந்தி எத்த² யுத்தி அதி⁴ப்பேதா, ஸா ஏவ ச த⁴ம்மதோ அனபேதத்தா ‘‘த⁴ம்மோ’’தி வுத்தாதி ஆஹ – ‘‘காரணங் நாம திகோடிபரிஸுத்³த⁴மச்ச²மங்ஸபரிபோ⁴கோ³’’தி. அனுகாரணங் நாம மஹாஜனஸ்ஸ ததா² ப்³யாகரணங் யுத்தியா த⁴ம்மஸ்ஸ அனுரூபபா⁴வதோ மங்ஸங் பரிபு⁴ஞ்ஜிதப்³ப³ந்தி அனுஞ்ஞாதங் ததே²வ கத²னந்தி கத்வா. தந்தி ‘‘ஜானங் உத்³தி³ஸ்ஸகதங் மங்ஸங் பரிபு⁴ஞ்ஜதீ’’தி ஏவங் வுத்தங் பரிபு⁴ஞ்ஜனங் நேவ காரணங் ஹோதி ததா² ப்³யாகரணந்தி ‘‘ஜானங் உத்³தி³ஸ்ஸகதங் மங்ஸங் பரிபு⁴ஞ்ஜதீ’’தி கத²னங் யுத்தியா த⁴ம்மஸ்ஸ அனநுரூபபா⁴வதோ ந அனுகாரணங் ஹோதி. பரேஹி வுத்தகாரணேன ஸகாரணோ ஹுத்வாதி பரே தித்தி²யா ‘ஜான’ந்திஆதி³னா த⁴ம்மங் கதெ²ந்தி வத³ந்தி, தேன காரணபூ⁴தேன ஸகாரணோ ஹுத்வா. தேஹி ததா² வத்தப்³போ³ ஏவ ஹுத்வா தும்ஹாகங் வாதோ³ வா அனுவாதோ³ வா ‘‘மங்ஸங் பரிபு⁴ஞ்ஜிதப்³ப³’’ந்தி பவத்தா தும்ஹாகங் கதா² வா பரதோ பரேஹி ததா² பவத்திதா தஸ்ஸா அனுகதா² வா. விஞ்ஞூஹி க³ரஹிதப்³ப³காரணந்தி தித்தி²யா தாவ திட்ட²ந்து, ததோ அஞ்ஞேஹி பண்டி³தேஹி க³ரஹிதப்³ப³காரணங். கோசி ந ஆக³ச்ச²தீதி க³ரஹிதப்³ப³தங் ந ஆபஜ்ஜதீதி அத்தோ². அபி⁴ப⁴வித்வா ஆசிக்க²ந்தீதி அபி⁴பு⁴ய்ய மத்³தி³த்வா கதெ²ந்தி, அபி⁴பூ⁴தேன அக்கோஸந்தீதி அத்தோ².
52. காரணேஹீதி ‘‘தி³ட்டா²தீ³ஸூ’’திஆதி³ வுத்தங். தத்த² தது³ப⁴யவிமுத்தபரிஸங்கிதந்தி ‘‘தி³ட்ட²ங் ஸுத’’ந்தி இமங் உப⁴யங் அனிஸ்ஸாய – ‘‘கிங் நு கோ² இமங் பி⁴க்கு²ங் உத்³தி³ஸ்ஸ வதி⁴த்வா ஸம்பாதி³த’’ந்தி கேவலமேவ பரிஸங்கிதங். ஸப்³ப³ஸங்கா³ஹகோதி ஸப்³பே³ஸங் திண்ணங் பரிஸங்கிதானங் ஸங்க³ண்ஹனகோ.
மங்க³லாதீ³னந்தி ஆதி³-ஸத்³தே³ன ஆஹுனபாஹுனாதி³கங் ஸங்க³ண்ஹாதி. நிப்³பே³மதிகா ஹொந்தீதி ஸப்³பே³ன ஸப்³ப³ங் பரிஸங்கிதாபா⁴வமாஹ. இதரேஸந்தி அஜானந்தானங் வட்டதி, ஜானதோ ஏவெத்த² ஆபத்தி ஹோதி. தேயேவாதி யே உத்³தி³ஸ்ஸ கதங், தேயேவ.
உத்³தி³ஸ்ஸகதமங்ஸபரிபோ⁴க³தோ அகப்பியமங்ஸபரிபோ⁴க³ஸ்ஸ விஸேஸங் த³ஸ்ஸேதுங் ‘‘அகப்பியமங்ஸங் பனா’’திஆதி³ வுத்தங். புரிமஸ்மிங் ஸசித்தகா ஆபத்தி, இதரஸ்மிங் அசித்தகா. தேனாஹ – ‘‘அகப்பியமங்ஸங் அஜானித்வா பு⁴த்தஸ்ஸபி ஆபத்தியேவா’’தி. பரிபோ⁴க³ந்தி பரிபு⁴ஞ்ஜிதப்³ப³ந்தி வதா³மீதி அத்தோ².
53. தாதி³ஸஸ்ஸாதி திகோடிபரிஸுத்³த⁴ஸ்ஸ மச்ச²மங்ஸஸ்ஸ பரிபோ⁴கே³. மெத்தாவிஹாரினோபீதி அபி-ஸத்³தே³ன அமெத்தாவிஹாரினோபி. மெத்தாவிஹாரினோ பரிபோ⁴கே³ ஸிகா²ப்பத்தா அனவஜ்ஜதாதி த³ஸ்ஸேதுங் ‘‘இத⁴, ஜீவக, பி⁴க்கூ²’’திஆதி³ அனியமெத்வாதி அவிஸேஸெத்வா ஸாமஞ்ஞதோ. யஸ்மா ப⁴க³வதா – ‘‘யதோ கோ², வச்ச², பி⁴க்கு²னோ தண்ஹா பஹீனா ஹோதீ’’திஆதி³னா மஹாவச்ச²கொ³த்தஸுத்தே (ம॰ நி॰ 2.194) அத்தா அனியமெத்வா வுத்தோ. ததா² ஹி வச்ச²கொ³த்தோ – ‘‘திட்ட²து ப⁴வங் கோ³தமோ, அத்தி² பன போ⁴தோ கோ³தமஸ்ஸ ஏகபி⁴க்கு²பி ஸாவகோ ஆஸவானங் க²யா…பே॰… உபஸம்பஜ்ஜ விஹரதீ’’தி ஆஹ, ‘‘இத⁴, பா⁴ரத்³வாஜ, பி⁴க்கு² அஞ்ஞதரங் கா³மங் வா நிக³மங் வா உபனிஸ்ஸாய விஹரதீ’’திஆதி³னா சங்கீஸுத்தே (ம॰ நி॰ 2.430) அத்தா அனியமெத்வா வுத்தோ. ததா² ஹி தத்த² பரதோ – ‘‘யங் கோ² பன அயமாயஸ்மா த⁴ம்மங் தே³ஸேதி, க³ம்பீ⁴ரோ ஸோ த⁴ம்மோ து³த்³த³ஸோ து³ரனுபோ³தோ⁴ ஸந்தோ பணீதோ அதக்காவசரோ நிபுணோ பண்டி³தவேத³னீயோ, ந ஸோ த⁴ம்மோ ஸுதே³ஸனீயோ லுத்³தே³னா’’திஆதி³னா தே³ஸனா ஆக³தா, தஸ்மா வுத்தங் ‘‘ப⁴க³வதா ஹி மஹாவச்ச²கொ³த்தஸுத்தே, சங்கீஸுத்தே இமஸ்மிங் ஸுத்தேதி தீஸு டா²னேஸு அத்தானங்யேவ ஸந்தா⁴ய தே³ஸனா கதா’’தி. மங்ஸூபஸேசனோவ அதி⁴ப்பேதோ மச்ச²மங்ஸஸஹிதஸ்ஸ ஆஹாரஸ்ஸ பரிபோ⁴க³பா⁴வதோ மச்ச²மங்ஸஸ்ஸ ச இத⁴ அதி⁴ப்பேதத்தா.
அக³தி²தோ தண்ஹாமுச்ச²னாயாதி தண்ஹாயனவஸேன முச்சா²பத்தியா. அனஜ்ஜோ²பன்னோ தண்ஹாய அபி⁴ப⁴வித்வா ந அஜ்ஜொ²த்த²டோ, கி³லித்வா பரினிட்ட²பெத்வா ந ஸண்டி²தோதி அத்தோ². தேனாஹ – ‘‘ஸப்³ப³ங் ஆலும்பித்வா’’திஆதி³. இத⁴ ஆதீ³னவோ ஆஹாரஸ்ஸ படிகூலபா⁴வோதி ஆஹ ‘‘ஏகரத்திவாஸேனா’’திஆதி³. அயமத்தோ² ஆஹாரபரிபோ⁴கோ³தி அத்த²ஸங்யோஜனபரிச்சே²தி³கா ‘‘யாவதே³வ இமஸ்ஸ காயஸ்ஸ டி²தியா’’திஆதி³னா (தீ³॰ நி॰ 3.182; ம॰ நி॰ 1.23; 2.24; 3.75; ஸங்॰ நி॰ 4.120) பவத்தா ஆஹாரபடிப³த்³த⁴ச²ந்த³ராக³னிஸ்ஸரணபூ⁴தா பஞ்ஞா அஸ்ஸ அத்தீ²தி நிஸ்ஸரணபஞ்ஞோ. இத³மத்த²ந்தி ஏதமத்தா²ய. ஏவங் ஸந்தேதி ‘‘ப்³ரஹ்மாதி ச மெத்தாவிஹாரினோ ஸமஞ்ஞா’’தி அவத்வா யே த⁴ம்மா மெத்தாவிஹாரஸ்ஸ படிபக்க²பூ⁴தா, தத்த² ஸாவஸேஸங் பஹாஸி ப்³ரஹ்மா, அனவஸேஸங் பஹாஸி ப⁴க³வாதி ஸசே தே இத³ங் ஸந்தா⁴ய பா⁴ஸிதங், ஏவங் ஸந்தே தவ இத³ங் யதா²வுத்தவசனங் அனுஜானாமி, ந மெத்தாவிஹாரிதாஸாமஞ்ஞமத்ததோதி அத்தோ².
55. ‘‘பாடியேக்கோ அனுஸந்தீ⁴’’தி வத்வா விஸுங் அனுஸந்தி⁴பா⁴வங் த³ஸ்ஸேதுங் ‘‘இமஸ்மிங் ஹீ’’திஆதி³ வுத்தங். த்³வாரங் த²கேதீதி மச்ச²மங்ஸபரிபோ⁴கா³னுஞ்ஞாய அஞ்ஞேஸங் வசனத்³வாரங் பித³ஹதி, சோத³னாபத²ங் நிருந்த⁴தி. கத²ங் ஸத்தானுத்³த³யங் த³ஸ்ஸேதி? ஸத்தானுத்³த³யமுகே²ன பா³ஹிரகானங் மச்ச²மங்ஸபரிபோ⁴க³படிக்கே²போ தயித³ங் மிச்சா², திகோடிபரிஸுத்³த⁴ஸ்ஸேவ மச்ச²மங்ஸஸ்ஸ பரிபோ⁴கோ³ ப⁴க³வதா அனுஞ்ஞாதோ. ததா² ஹி வுத்தங் – ‘தீஹி கோ² அஹங், ஜீவக, டா²னேஹி மங்ஸங் பரிபோ⁴க³ந்தி வதா³மீ’திஆதி³ (ம॰ நி॰ 2.52). வினயேபி (பாரா॰ 409; சூளவ॰ 343) வுத்தங் – ‘‘திகோடிபரிஸுத்³த⁴ங், தே³வத³த்த, மச்ச²மங்ஸங் மயா அனுஞ்ஞாத’’ந்தி. திகோடிபரிஸுத்³த⁴ஞ்ச பு⁴ஞ்ஜந்தானங் ஸத்தேஸு அனுத்³த³யா நிச்சலா. ‘‘ஸத்தானுத்³த³யங் த³ஸ்ஸேதீ’’தி ஸங்கே²பதோ வுத்தமத்த²ங் விவரந்தோ ‘‘ஸசே ஹீ’’திஆதி³மாஹ.
பட²மேன காரணேனாதி தே³ஸனாவஸேனபி பயோக³வஸேனபி பட²மேன பரூபகா⁴தஹேதுனா. கட்³டி⁴தோ ஸோ பாணோ. க³லேன பவேதெ⁴ந்தேனாதி யொத்தக³லேன கரணேன அஸய்ஹமானேன. ப³ஹுபுஞ்ஞமேவ ஹோதி ஆஸாத³னாபெக்கா²ய அபா⁴வதோ, ஹிதஜ்ஜா²ஸயத்தா வாதி அதி⁴ப்பாயோ. ஏஸாஹங், ப⁴ந்தேதிஆதி³ கஸ்மா வுத்தங், ஸரணக³மனவஸேனேவ க³ஹிதஸரணோதி சோத³னங் ஸந்தா⁴யாஹ ‘‘அய’’ந்திஆதி³. ஓகா³ஹந்தோதிஆதி³தோ பட்டா²ய யாவ பரியோஸானா ஸுத்தங் அனுஸ்ஸரந்தோ அத்த²ங் உபதா⁴ரெந்தோ. ஸேஸங் ஸுவிஞ்ஞெய்யமேவ.
ஜீவகஸுத்தவண்ணனாய லீனத்த²ப்பகாஸனா ஸமத்தா.
6. உபாலிஸுத்தவண்ணனா
56. பாவாரங் ‘‘து³ஸ்ஸபாவாரிகஸெட்டி²னோ’’தி. தீ³க⁴த்தா தீ³க⁴தமத்தா. ஸோ கிர பமாணதோ உபவச்ச²யதோ தி³யட்³ட⁴ரதனங் அதிக்கம்ம டி²தோ. ஏவங்லத்³த⁴னாமோதி ‘‘தீ³க⁴தபஸ்ஸீ’’தி லத்³த⁴ஸமஞ்ஞோ. பா³ஹிராயதனேதி தித்தி²யஸமயே பிண்ட³பாதோதி வோஹாரோ நத்தி², தஸ்மா ஸாஸனவோஹாரேன ‘‘பிண்ட³பாதப்படிக்கந்தோ’’தி வுத்தந்தி அதி⁴ப்பாயோ.
த³ஸ்ஸேதீதி ட²பேதீதி அஞ்ஞமஞ்ஞஸங்கரதோ வவத்த²பேதி. கிரியாயாதி கரணேன. பவத்தியாதி பவத்தனேன. த³ண்டா³னி பஞ்ஞபேதீதி எத்த² கஸ்மா ப⁴க³வதா ஆதி³தோவ ததா² ந புச்சி²தந்தி? யஸ்மா ஸா தஸ்மிங் அத்தே² ஸபா⁴வனிருத்தி ந ஹோதி, ஸாஸனே லோகே ஸமயந்தரேஸு ச தாதி³ஸோ ஸமுதா³சாரோ நத்தி², கேவலங் பன தஸ்ஸேவ நிக³ண்ட²ஸ்ஸாயங் கொட்டா²லகஸதி³ஸோ ஸமுதா³சாரோதி இமமத்த²ங் த³ஸ்ஸேதுங் ‘‘கம்மானி பஞ்ஞபேதி’’ இச்சேவாஹ. அசித்தகந்தி சித்தரஹிதங், சித்தேன அஸமுட்டா²பிதந்தி அத்தோ². கத²ங் பன தது³ப⁴யஸ்ஸ சித்தேன வினா ஸம்ப⁴வோதி சோத³னங் ஸந்தா⁴ய தத்த² நித³ஸ்ஸனமாஹ ‘‘யதா² கிரா’’திஆதி³. படிவிப⁴த்தானந்தி அத்த²தோ பி⁴ன்னானங். படிவிஸிட்டா²னந்தி விஸேஸனபத³வஸேன ஸத்³த³தோபி பி⁴ன்னானங். வசனங் பதிட்ட²பேதுகாமோதி தீ³க⁴தபஸ்ஸினோ யதா²வுத்தவசனங் பதிட்ட²பேதுகாமோ. தஸ்மிஞ்ஹி பதிட்டா²பிதே தேனப்பஸங்கே³ன ஆக³தோ, உபாலி க³ஹபதி தஸ்மிங் பதே³ஸே த⁴ம்மங் தி³ஸ்வா ஸாஸனே அபி⁴ப்பஸீதி³ஸ்ஸதி.
கதா² ஏவ உபரி வாதா³ரோபனஸ்ஸ வத்து²பா⁴வதோ கதா²வத்து². கதா²யங் பதிட்ட²பேஸீதி கதா²வத்து²ஸ்மிங், தத³த்தே² வா பதிட்ட²பேஸி. யதா² தங் வாதா³ரோபனப⁴யேன ந அவஜானாதி, ஏவங் தஸ்ஸங் கதா²யங், தஸ்மிங் வா அத்தே² தீ³க⁴தபஸ்ஸிங் யாவததியங் வாதே³ பதிட்ட²பேஸி. வாத³ந்தி தோ³ஸங்.
57. இதா³னி சேதனாஸம்பயுத்தத⁴ம்மம்பி க³ஹெத்வா காயகம்மாதி³வஸேன ஸங்க³ஹெத்வா த³ஸ்ஸேதுங் ‘‘அபிசா’’திஆதி³ வுத்தங். தத்த² திவித⁴ங் காயது³ச்சரிதங் காயகம்மங் நாமாதிஆதி³ ‘‘கம்மஸ்ஸ கிரியாயா’’தி பாளியங் அகுஸலகம்மஸ்ஸ அதி⁴க³தத்தா வுத்தங், புப்³பே³ பன அட்ட²காமாவசரகுஸலசேதனாதிஆதி³ ஸாவஜ்ஜங் அனவஜ்ஜஞ்ச ஸாமஞ்ஞதோ ஏகஜ்ஜ²ங் கத்வா த³ஸ்ஸிதங். கஸ்மா பனெத்த² சேதனா ந க³ஹிதாதி ஆஹ ‘‘இமஸ்மிங் ஸுத்தே கம்மங் து⁴ர’’ந்தி. காயகம்மாதி³பே⁴த³ங் கம்மமேவ து⁴ரங் ஜெட்ட²கங் புப்³ப³ங்க³மங், ந சேதனாமத்தமேவ. ஏவமாக³தேபீதி கம்மானீதி ஏவங் நாமேன ஆக³தேபி சேதனா து⁴ரங், தத்த² சேதனங் ஜெட்ட²கங் புப்³ப³ங்க³மங் கத்வா வுத்தந்தி அதி⁴ப்பாயோ. கத²ங் பன தத்த² கம்மந்தி வா கம்மானீதி வா ஆக³தே தேஸங் சேதனாய து⁴ரபா⁴வோதி ஆஹ ‘‘யத்த² கத்த²சி…பே॰… லப⁴தீ’’தி. தத்த² யத்த² கத்த²சீதி யஸ்மிங் கிஸ்மிஞ்சி த்³வாரே. ஸா வுத்தாவாதி ஸா சேதனா வுத்தாவ, யா காயஸங்கா²ராதி³பரியாயேன (யஸ்ஸ கஸ்ஸசி கம்மஸ்ஸ காயத்³வாராதீ³ஸு பவத்தாபனசேதனா) ஸம்பயுத்தத⁴ம்மாபி
மஹந்தந்தி கடுகப²லங். ந கிலமதி ஸப்பாடிஹாரியத்தா படிஞ்ஞாய. இதா³னி தேஸங் ஸப்பாடிஹாரியதங் த³ஸ்ஸேதுங் ‘‘ததா² ஹீ’’திஆதி³ வுத்தங். யதி³ அகுஸலங் பத்வா காயகம்மங் வசீகம்மங் மஹந்தந்தி வத³ந்தோ ந கிலமதி, அத² கஸ்மா ப⁴க³வா இத⁴ அகுஸலங் மனோகம்மங் மஹாஸாவஜ்ஜங் கதே²ஸீதி ஆஹ ‘‘இமஸ்மிங் பன டா²னே’’திஆதி³. யாவததியங் பதிட்டா²பனமத்தேன க³தமக்³க³ங் படிபஜ்ஜந்தோ. தேனாஹ ‘‘கிஞ்சி அத்த²னிப்ப²த்திங் அபஸ்ஸந்தோபீ’’தி.
58. நிவாஸட்டா²னபூ⁴தோ பா³லகோ ஏதிஸ்ஸா அத்தீ²தி பா³லகினீ. ஸத்து²படிஞ்ஞாததாய நிக³ண்டா²னங் மஹாதி ஸம்பா⁴விதத்தா மஹானிக³ண்டோ².
60. ஆவட்டேதி புரிமாகாரதோ நிவத்தேதி அத்தனோ வஸே வத்தேதி ஏதாயாதி ஆவட்டனீ, மாயா. தேனாஹ ‘‘ஆவட்டெத்வா க³ஹணமாய’’ந்தி. ஸத்து²படிஞ்ஞானங் பு³த்³த⁴த³ஸ்ஸனே சித்தமேவ ந உப்பஜ்ஜதி, அயமெத்த² த⁴ம்மதா. ஸசே பன ஸோ தங் படிஞ்ஞங் அப்பஹாய பு³த்³தா⁴னங் ஸம்முகீ²பா⁴வங் உபக³ச்செ²ய்ய, ஸத்ததா⁴ முத்³தா⁴ ப²லெய்ய, தஸ்மா ப⁴க³வா ‘‘மா அயங் பா³லோ வினஸ்ஸீ’’திஆதி³தோவ யதா² ஸம்முகீ²பா⁴வங் ந லப⁴தி, ததா² கரோதி. ஸ்வாயமத்தோ² பாதி²கபுத்தஸமாக³மேன தீ³பேதப்³போ³. த³ஸ்ஸனஸம்பத்தினியாமமாஹ ‘‘ததா²க³தங் ஹீ’’திஆதி³. ஆக³மா நு கோ² இத⁴ தும்ஹாகங் ஸந்திகங்.
61. வசீஸச்சே பதிட்ட²ஹித்வாதி யதா²படிஞ்ஞாதாய படிஞ்ஞாய ட²த்வா.
62. ஸீதோத³கே அமதா பாணா பானகாலே பன மரந்தி, தேபி தேன ஸீதோத³கபரிபோ⁴கே³ன மாரிதா ஹொந்தி, தஸ்மா தபஸ்ஸினா நாம ஸப்³பே³ன ஸப்³ப³ங் ஸீதோத³கங் ந பரிபு⁴ஞ்ஜிதப்³ப³ந்தி தேஸங் லத்³தி⁴. பாகதிகங் வா உத³கங் ஸத்தோதி புராதனானங் நிக³ண்டா²னங் லத்³தி⁴. தேனாஹ ‘‘ஸத்தஸஞ்ஞாய ஸீதோத³கங் படிக்கி²பந்தீ’’தி. தேஸங் தங் அது⁴னாதனநிக³ண்டா²னங் வாதே³ன விருஜ்ஜ²தி. தே ஹி பத²வீஆதி³னவபத³த்த²தோ ‘‘தேனஸ்ஸ மனோத³ண்டோ³ தத்தே²வ பி⁴ஜ்ஜதீ’’தி. தேனாதி ஸீதோத³கங் பாதுங் பரிபு⁴ஞ்ஜிதுஞ்ச இச்ச²னேன. அஸ்ஸாதி யதா²வுத்தஸ்ஸ நிக³ண்ட²ஸ்ஸ. தத்தே²வாதி ததா²சித்துப்பாத³னே ஏவ. பி⁴ஜ்ஜதி ஸங்வரஸ்ஸ விகோபிதத்தா. ததா²பூ⁴தோ ஸோ நிக³ண்டோ² ஸீதோத³கங் ‘‘ஸீதோத³கங் அலப⁴மானோ காலங் கரெய்யா’’தி. கஸ்மா? யஸ்மா ஸீதோத³கங் பிவாய ஸன்னிஸ்ஸிதசித்தஸ்ஸ மரணங் ஹோதி, தஸ்மா வுத்தங் ‘‘மனோத³ண்டோ³ பன பி⁴ன்னோபி சுதிம்பி ஆகட்³ட⁴தீ’’தி. யஸ்மா பன ததா²பூ⁴தசித்தஸ்ஸ நிக³ண்ட²ஸ்ஸ மனோஸத்தேஸு நாம தே³வேஸு உபபத்தி ஹோதீதி தித்தி²யானங் லத்³தி⁴, தஸ்மா வுத்தங் ‘‘மனோத³ண்டோ³ பன பி⁴ன்னோபி படிஸந்தி⁴ம்பி ஆகட்³ட⁴தீ’’தி. இதீதி ஏவங் ‘‘இதா⁴ஸ்ஸ நிக³ண்டோ²’’திஆதி³ஆகாரேன. நந்தி உபாலிங் க³ஹபதிங். மஹந்தோதி வதா³பேஸி ‘‘மனோபடிப³த்³தோ⁴ காலங்கரோதீ’’தி வத³ந்தோதி அதி⁴ப்பாயோ.
உபாஸகஸ்ஸாதி உபாலிஸ்ஸ க³ஹபதிஸ்ஸ. முச்சா²வஸேனாதிஆதி³னா அன்வயதோ ப்³யதிரேகதோ ச மனோத³ண்ட³ஸ்ஸ மஹந்ததங் விபா⁴வேதி. சித்தஸந்ததிப்பவத்திமத்தேனேவாதி வினா காயத³ண்டே³ன வசீத³ண்டே³ன ச கேவலங் சித்தஸந்ததிப்பவத்திமத்தேன. பி⁴ஜ்ஜித்வாபீதி எத்த² பி-ஸத்³தே³ன அபி⁴ஜ்ஜித்வாபி. அனிய்யானிகாதி அப்பாடிஹீரா, அயுத்தாதி அத்தோ². ஸல்லக்கே²ஸி உபாஸகோதி விப⁴த்திங் விபரிணாமெத்வா யோஜனா. பஞ்ஹபடிபா⁴னானீதி ஞாதுங் இச்சி²தே அத்தே² உப்பஜ்ஜனகபடிபா⁴னானி.
‘‘மனோபடிப³த்³தோ⁴ காலங் கரோதீ’’தி வத³ந்தேன அத்த²தோ மனோத³ண்ட³ஸ்ஸ தது³த்தரபா⁴வோ படிஞ்ஞாதோ ஹோதீதி ஆஹ ‘‘இதா³னி மனோத³ண்டோ³ மஹந்தோதி இத³ங் வசன’’ந்தி. ததா² சேவ வுத்தங் – ‘‘மனோத³ண்டோ³வ ப³லவா மஹந்தோதி வதா³பேஸீ’’தி.
63. பாணாதிபாதாதி³தோ யமனங் யாமோ, சதுப்³பி³தோ⁴ யாமோ சதுயாமோ, சதுயாமஸங்கா²தேன ஸங்வரேன ஸங்வுதோ சாதுயாமஸங்வரஸங்வுதோ. அட்ட²கதா²யங் பன யாம-ஸத்³தோ³ கொட்டா²ஸபரியாயோதி ‘‘இமினா சதுகொட்டா²ஸேனா’’தி வுத்தங். பியஜாதிகங் ரூபாதி³ஆரம்மணங் ராக³வஸேன பா³லேஹி பா⁴வனீயத்தா ‘‘பா⁴வித’’ந்தி வுச்சதீதி ஆஹ ‘‘பா⁴விதந்தி பஞ்ச காமகு³ணா’’தி.
யோ ஸப்³ப³ங் பாபங் ஆஸவஞ்ச வாரேதீதி ஸப்³ப³வாரீ, தஸ்ஸ நவஸு பத³த்தே²ஸு ஸத்தமோ பத³த்தோ², தேன ஸப்³ப³வாரினா பாபங் வாரித்வா டி²தோதி ஸப்³ப³வாரிவாரிதோ ‘‘ஸப்³பே³ன பாபவாரணேன வாரிதபாபோ’’தி. ஸப்³ப³வாரிது⁴தோ. வாரிதப்³ப³ஸ்ஸ நிவாரணவஸேன ஸப்³ப³வாரினோ பு²டோ பு²ஸிதோதி ஸப்³ப³வாரிபு²டோ. ஸங்கா⁴தந்தி ஸஹஸா ஹனநங், அஸஞ்சேதனிகவத⁴ந்தி அத்தோ². கதரஸ்மிங் கொட்டா²ஸேதி தீஸு த³ண்ட³கொட்டா²ஸேஸு கதரகொட்டா²ஸே.
64. க²லியதி ஸமாதி³யதீதி க²லங், ராஸீதி ஆஹ – ‘‘ஏகங் மங்ஸக²லந்தி ஏகங் மங்ஸராஸி’’ந்தி. விஜ்ஜாத⁴ரஇத்³தி⁴யா இத்³தி⁴மா. ஸா பன இத்³தி⁴ யஸ்மா ஆனுபா⁴வஸம்பன்னஸ்ஸேவ இஜ்ஜ²தி, ந யஸ்ஸ கஸ்ஸசி. தஸ்மா ஆஹ ‘‘ஆனுபா⁴வஸம்பன்னோ’’தி. விஜ்ஜானுபா⁴வவஸேனேவ ஆனுபா⁴வஸம்பன்னோ. சித்தே வஸீபா⁴வப்பத்தோ ஆனுபா⁴வாய ஏவ விஜ்ஜாய பகு³ணபா⁴வாபாத³னேன. ஏதேன வஸீபா⁴வங் லோகியஸமஞ்ஞாவஸேன ப⁴க³வா உபாலிங் க³ஹபதிங் பஞ்ஞபேதுகாமோ ஏவமாஹ. லோகிகா ஹி ‘‘பா⁴வனாமயஇத்³தி⁴யா இத்³தி⁴மா சேதோவஸீபா⁴வப்பத்தோ பரூபகா⁴தங் கரோதீ’’தி மஞ்ஞந்தி. ததா² ஹி தே இஸயோ பரேஸங் ஸங்வண்ணெந்தி, இஸீனங் ஆனுபா⁴வங் கித்தெந்தி. யங் பனெத்த² வத்தப்³ப³ங், தங் பரதோ ஆக³மிஸ்ஸதீதி.
65. அரஞ்ஞமேவ ஹுத்வாதி ஸப்³ப³ஸோ அரஞ்ஞமேவ ஹுத்வா. அரஞ்ஞபா⁴வேன அரஞ்ஞங் ஜாதங், ந நாமமத்தேன. இஸீனங் அத்தா²யாதி இஸீனங் ஆஸாத³னத்தா²ய.
கோ³தா⁴வரீதீரதோ நாதிதூ³ரே. உஸூயமானோதி ‘‘ந மங் ஏஸ ஜனோ பரிவாரேதீ’’தி உஸூயங் கரொந்தோ. கிலிட்டோ² வதாதி பங்கத³ந்தரஜஸிரதாதீ³ஹி கிலிட்ட²ஸரீரோ. அனஞ்ஜிதமண்டி³தோதி அனஞ்ஜிதக்கி²கோ ஸப்³பே³ன, ஸப்³ப³ங் அமண்டி³தோ ச. தஸ்மிங் காலே ‘‘காலஸ்ஸேவ அக்கீ²னங் அஞ்ஜனங் மங்க³ல’’ந்தி மனுஸ்ஸானங் லத்³தி⁴, தஸ்மா அனஞ்ஜனங் விஸுங் க³ஹிதங்.
ராஜா தஸ்ஸ வசனங் க³ஹெத்வாதி ‘‘வேதே³ஸு ஈதி³ஸங் ஆக³தங் ப⁴விஸ்ஸதீதி ஏவங், ப⁴ந்தே’’தி ராஜா தஸ்ஸ புரோஹிதஸ்ஸ வசனங் க³ஹெத்வா. உஸுமஜாதஹத³யோதி உத்தத்தஹத³யோ. நாஸிகானங் அப்பஹொந்தே முகே²ன அஸ்ஸஸந்தோ.
விஜிதஜயேஹி ஆக³ந்த்வா நக்க²த்தயுத்தங் ஆக³மெந்தேஹி நிஸீதி³தப்³ப³ட்டா²னங் ஜயக²ந்தா⁴வாரட்டா²னங். உத³கவுட்டி²பாதனாதி³ தஸ்மிங் பாபகம்மே அஸமங்கி³பூ⁴தானம்பி ஸமனுஞ்ஞதாய கதப⁴ண்ட³வுட்டீ²தி ஆப⁴ரணவஸ்ஸங். மஹாஜனோ ஸமனுஞ்ஞோ ஜாதோதி யோஜனா. மாதுபோஸகராமோதி மாதரி ஸம்மாபடிபன்னோ ராமோ நாம ஏகோ புரிஸோ. அஸமங்கி³பூ⁴தானந்தி அஸமனுஞ்ஞானங்.
அவகிரியாதி பு²லிங்கா³னீதி அக்³கி³கணானி. பதந்தி காயேதி காயே இதோ சிதோ நிபதந்தி. ஏதே கிர நிரயங் விவரித்வா மஹாஜனஸ்ஸ த³ஸ்ஸெந்தி.
யதா²பா²ஸுகட்டா²னந்தி மயங் கஞ்சிபி தே³ஸங் உத்³தி³ஸ்ஸ ந க³ச்சா²ம, யத்த² பன வஸந்தஸ்ஸ பப்³ப³ஜிதஸ்ஸ பா²ஸு ஹோதி, தங் யதா²பா²ஸுகட்டா²னங் க³ச்சா²மாதி அதி⁴ப்பாயோ. ஸங்கா⁴தி ஸங்ஹதா. க³ணாதி தங்தங்ஸேணிபா⁴வேன க³ணிதப்³ப³தாய க³ணா. க³ணீபூ⁴தாதி ஏகஜ்ஜா²ஸயா ஹுத்வா ராஸிபூ⁴தா. அதி³ன்னாதா³னந்திஆதீ³ஸுபி நிரயே பச்சித்வா மனுஸ்ஸலோகங் ஆக³தஸ்ஸ விபாகாவஸேஸேனாதி ஆனெத்வா யோஜேதப்³ப³ங்.
பக்³க³ண்ஹிஸ்ஸாமீதி ஸம்பா⁴வனங் உப்பாதெ³ஸ்ஸாமி. நேஸங் கத்தப்³ப³ந்தி சிந்தேஸீதி யோஜனா. கிங் சிந்தேஸி? ஆகா⁴தங் உப்பாதெ³த்வா அனத்த²கரணூபாயங். தேனாஹ ‘‘ஸோ த⁴ம்மகதா²பரியோஸானே’’திஆதி³. நாக³ப³லபிச்சி²ல்லாதீ³னந்தி நாக³ப³லஸாஸபஅங்கோலதேலகணிகாரனிய்யாஸாதீ³னங் சிக்க²ல்லானங். விஹேட²யிங்ஸு நிரயாதி³கதா²ஹி க⁴ட்டெந்தா. ச²த்³வாராரம்மணேதி சக்கா²தீ³னங் ச²ன்னங் த்³வாரானங் ஆரம்மணபூ⁴தே ரூபாதி³விஸயே.
நவ வுட்டி²யோதி உத³கவுட்டி² ஸுமனபுப்ப²வுட்டி² மாஸகவுட்டி² கஹாபணவுட்டி² ஆப⁴ரணவுட்டி² ஆவுத⁴வுட்டி² அங்கா³ரவுட்டி² பாஸாணவுட்டி² வாலிகாவுட்டீ²தி இமா நவ வுட்டி²யோ. அவஞ்சயீதி ஸக்காரங் கரொந்தோ விய ஹுத்வா அஸக்காரங் கரொந்தோ அனத்த²சரணேன வஞ்சயி. அதூ³ஸகேதி அனபராதே⁴.
‘‘தி³ட்ட²மங்க³லிகா ப்³ராஹ்மணகஞ்ஞா’’தி ஜாதகட்ட²கதா²தீ³ஸு (ஜா॰ அட்ட²॰ 4.15.மாதங்க³ஜாதகவண்ணனா) ஆக³தங், இத⁴ பன ‘‘ஸெட்டி²தீ⁴தா’’தி. வாரெய்யத்தா²யாதி ஆவாஹத்தா²ய, அஸ்ஸாதி பேஸிதபுக்³க³லஸ்ஸ. தாதி³ஸேன நீசகுலஸங்வத்தனியேன கம்முனா லத்³தோ⁴காஸேன சண்டா³லயோனியங் நிப்³ப³த்தோ.
சம்மகே³ஹேதி மாதங்கொ³த்வேவஸ்ஸ நாமங் அஹோஸி ஜாதிஸமுதா³க³தங். தந்தி க⁴ண்டங். வாதெ³ந்தோ தாலனேன ஸத்³த³ங் கரொந்தோ. மஹாபத²ங் படிபஜ்ஜி தி³ட்ட²மங்க³லிகாய கே³ஹத்³வாரஸமீபேன.
தஸ்ஸா வெய்யாவச்சகரா சேவ உபட்டா²கமனுஸ்ஸா படிப³த்³தா⁴ ச ஸுராஸொண்டா³த³யோ ஜாணுகப்பராதீ³ஹி ஸுகொட்டிதங் கொட்டிதபா⁴வேன முச்ச²ங் ஆபன்னத்தா மதோதி ஸஞ்ஞாய ச²ட்³டே³ஸுங்.
அத² போ³தி⁴ஸத்தோ ‘‘மஹாபுரிஸோ’’திஆதி³. கே³ஹங்க³ணேதி கே³ஹஸ்ஸ மஹாத்³வாரதோ ப³ஹி விவடங்க³ணே. பதிதோதி பாதங் கத்வா இச்சி²தத்த²னிப்ப²த்திங் அந்தரங் கத்வா அனுப்பவேஸேன நிபன்னோ. தி³ட்ட²மங்க³லிகாயாதி தி³ட்ட²மங்க³லிகாகாரணேன.
யஸந்தி விப⁴வங் கித்திஸத்³த³ஞ்ச. சந்த³ந்தி சந்த³மண்ட³லங், சந்த³விமானந்தி அத்தோ². உச்சி²ட்ட²கே³ஹேதி பரேஹி பரிபு⁴த்தகே³ஹே. மண்ட³பேதி நக³ரமஜ்ஜே² மஹாமண்ட³பே.
கீ²ரமணிமூலந்தி கீ²ரமூலங், பாதே³ஸு ப³த்³த⁴மணிமூலஞ்ச. யாவதா வாசுக்³க³தா பரியத்தீதி யத்தகோ மனுஸ்ஸவசீத்³வாரதோ உக்³க³தோ நிக்க²ந்தோ பவத்தோ, யங்கிஞ்சி வசீமயந்தி அத்தோ². ஆகாஸங்க³ணேதி விவடங்க³ணே.
து³ம்மவாஸீதி தூ⁴மோ தூ⁴ஸரோ, அனஞ்ஜிதாமண்டி³தோதி அதி⁴ப்பாயோ. ஓதல்லகோதி நிஹீனஜ்ஜா²ஸயோ, அப்பானுபா⁴வோதி அத்தோ². படிமுஞ்ச கண்டே²தி யாவ க³லவாடகா பாருபித்வா. கோ ரே துவந்தி அரே கோ நாம த்வங்.
பகதந்தி படியத்தங் நானப்பகாரதோ அபி⁴ஸங்க²தங். உத்திட்ட²பிண்ட³ந்தி அந்தரக⁴ரங் உபக³ம்ம ட²த்வா லத்³த⁴ப்³ப³பிண்ட³ங், பி⁴க்கா²ஹாரந்தி அத்தோ². லப⁴தந்தி லச்ச²து. ஸபாகோதி மஹாஸத்தோ ஜாதிவஸேன யதா²பூ⁴தங் அத்தானங் ஆவிகரோதி.
அத்த²த்தி²தங் ஸத்³த³ஹதோதி ஸம்பராயிகஸ்ஸ அத்த²ஸ்ஸ அத்தி²பா⁴வங் ஸத்³த³ஹந்தஸ்ஸ. அபேஹீதி அபக³ச்ச². எத்தோதி இமஸ்மா டா²னா. ஜம்மாதி லாமக.
அனூபகெ²த்தேதி ஏதாய ஸத்³தா⁴ய த³தா³ஹி தா³னந்தி நின்னங் த²லஞ்ச பூரெந்தோ மேகோ⁴ விய கு³ணவந்தே நிக்³கு³ணே ச தா³னங் தே³ஹி, ஏவங் தெ³ந்தோ ச அப்பேவ ஆராத⁴யே த³க்கி²ணெய்யேதி. த³க்கி²ணெய்யேதி ஸீலாதி³கு³ணஸமன்னாக³தே.
தானீதி தே ப்³ராஹ்மணா. வேணுபத³ரேனாதி வேளுவிலீவேன.
கி³ரிங் நகே²ன க²ணஸீதி பப்³ப³தங் அத்தனோ நகே²ன க²ணந்தோ விய அஹோஸி. அயோதி காலலோஹங். பத³ஹஸீதி அபி⁴ப⁴வஸி, அத்தனோ ஸரீரேன அபி⁴ப⁴வந்தோ விய அஹோஸி.
ஆவேதி⁴தந்தி சலிதங் விபரிவத்தெத்வா டி²தங். பிட்டி²தோதி பிட்டி²பஸ்ஸேன. பா³ஹுங் பஸாரேதி அகம்மனெய்யந்தி அகம்மக்க²மங் பா³ஹுத்³வயங் த²த்³த⁴ங் ஸுக்க²த³ண்ட³கங் விய கேவலங் பஸாரேதி, ந ஸமிஞ்ஜேதி, ஸேதானி அக்கீ²னி பரிவத்தனேன கண்ஹமண்ட³லஸ்ஸ அதி³ஸ்ஸனதோ.
ஜீவிதந்தி ஜீவனங்.
வேஹாயஸந்தி ஆகாஸே. பத²த்³து⁴னோதி பத²பூ⁴தத்³து⁴னோ விய.
ஸஞ்ஞம்பி ந கரோதீதி ‘‘இமே குலப்பஸுதா’’தி ஸஞ்ஞாமத்தம்பி ந கரோதி. த³ந்தகட்ட²குச்சி²ட்ட²கந்தி கா²தி³தத³ந்தகட்ட²த்தா வுத்தங். ஏதஸ்ஸேவ உபரி பதிஸ்ஸதி அப்பது³ட்ட²பதோ³ஸபா⁴வதோ, மஹாஸத்தஸ்ஸ ததா³ உக்கங்ஸக³தகெ²த்தபா⁴வதோ. இத்³தி⁴விஸயோ நாம அசிந்தெய்யோ, தஸ்மா கத²ங் ஸூரியஸ்ஸ உக்³க³ந்துங் நாதா³ஸீதி ந சிந்தேதப்³ப³ங். அருணுக்³க³ங் ந பஞ்ஞாயதீதி தஸ்மிங் பதே³ஸே அருணபபா⁴ ந பஞ்ஞாயதி, அந்த⁴காரோ ஏவ ஹோதி.
யக்கா²வட்டோ நு கோ² அயங் காலவிபரியாயோ. மஹாபஞ்ஞந்தி மஹந்தானங் பஞ்ஞானங் அதி⁴ட்டா²னபூ⁴தங். ஜனபத³ஸ்ஸ முக²ங் பஸ்ஸதா²தி இமஸ்ஸ ஜனபத³வாஸினோ ஜனஸ்ஸ உபத்³த³வேன மங்குபூ⁴தங் முக²ங் பஸ்ஸத².
ஏதஸ்ஸ கதா² ஏதஸ்ஸேவ உபரி பதிஸ்ஸதீதி யாஹி தேன பாரமிதாபரிபா⁴வனஸமித்³தா⁴ஹி நானாஸமாபத்திவிஹாரபரிபூரிதாஹி ஸீலதி³ட்டி²ஸம்பதா³ஹி ஸுஸங்க²தஸந்தானே மஹாகருணாதி⁴வாஸே மஹாஸத்தே அரியூபவாத³கம்மஅபி⁴ஸபஸங்கா²தா ப²ருஸவாசா பவத்திதா, ஸா அபி⁴ஸபி தஸ்ஸ கெ²த்தவிஸேஸபா⁴வதோ தஸ்ஸ ச அஜ்ஜா²ஸயப²ருஸதாய தி³ட்ட²த⁴ம்மவேத³னியகம்மங் ஹுத்வா சரியாபிடகே (சரியா॰ 2.64) –
‘‘யங் ஸோ
தஸ்ஸேவ மத்த²கே நிபதி, யோகே³ன தங் பமோசயி’’ந்தி.
யஞ்ஹி தத்த² ஸத்தமே தி³வஸே போ³தி⁴ஸத்தேன ஸூரியுக்³க³மனநிவாரணங் கதங், அயமெத்த² யோகோ³தி அதி⁴ப்பேதோ. யோகே³ன ஹி உப்³ப³ள்ஹா ஸராஜிகா பரிஸா நக³ரவாஸினோ நேக³மா சேவ ஜானபதா³ ச போ³தி⁴ஸத்தஸ்ஸ ஸந்திகங் தாபஸங் ஆனெத்வா க²மாபேஸுங். ஸோ ச போ³தி⁴ஸத்தஸ்ஸ கு³ணே ஜானித்வா தஸ்மிங் சித்தங் பஸாதே³ஸி. யங் பனஸ்ஸ மத்த²கே மத்திகாபிண்ட³ஸ்ஸ ட²பனங், தஸ்ஸ ச ஸத்ததா⁴ பா²லனங் கதங், தங் மனுஸ்ஸானங் சித்தானுரக்க²ணத்த²ங். அஞ்ஞதா² ஹி – ‘‘இமே பப்³ப³ஜிதா ஸமானா சித்தஸ்ஸ வஸே வத்தந்தி, ந பன சித்தங் அத்தனோ வஸே வத்தாபெந்தீ’’தி மஹாஸத்தம்பி தேன ஸதி³ஸங் கத்வா க³ண்ஹெய்யுங், தத³ஸ்ஸ தேஸங் தீ³க⁴ரத்தங் அஹிதாய து³க்கா²யாதி. தேனாஹ ‘‘அத²ஸ்ஸா’’திஆதி³.
லோஹகூடவஸ்ஸந்தி அயகு³ளவஸ்ஸங். ததா³ ஹி ரதனமத்தானி தி³யட்³ட⁴ரதனமத்தானிபி திகி²ணங்ஸானி அயகு³ளமண்ட³லானி இதோ சிதோ ச நிபதந்தா மனுஸ்ஸானங் ஸரீரானி க²ண்ட³க²ண்ட³கானி அகங்ஸு. கலலவஸ்ஸந்தி தனுககத்³த³மபடலகத்³த³மங். உபஹச்சாதி ஆகா⁴டெத்வா. ததே³வ மஜ்ஜா²ரஞ்ஞங்.
67. அனுவிச்சகாரந்தி அனுவிச்சகரணங். காரணேஹி த்³வீஹி அனிய்யானிகஸாஸனே டி²தானங் அத்தனோ ஸாவகத்தங் உபக³தே பக்³க³ஹனிக்³க³ஹானி த³ஸ்ஸேதுங் ‘‘கஸ்மா’’திஆதி³ வுத்தங்.
69. அனுபுப்³பி³ங் கத²ந்தி (தீ³॰ நி॰ டீ॰ 2.75-76; அ॰ நி॰ டீ॰ 3.8.12) அனுபுப்³பி³யா அனுபுப்³ப³ங் கதே²தப்³ப³கத²ங், கா பன ஸா? தா³னாதி³கதா². தா³னகதா² தாவ பசுரஜனேஸுபி பவத்தியா ஸப்³ப³ஸாதா⁴ரணத்தா ஸுகரத்தா ஸீலே பதிட்டா²னஸ்ஸ உபாயபா⁴வதோ ச ஆதி³தோவ கதி²தா ஸீலகதா² கதி²தா. தஞ்ச ஸீலங் வட்டனிஸ்ஸிதங், அயங் ப⁴வஸம்பத்தி தஸ்ஸ ப²லந்தி த³ஸ்ஸனத்த²ங், இமேஹி ச தா³னஸீலமயேஹி பணீதசரியபே⁴த³பி⁴ன்னேஹி புஞ்ஞகிரியவத்தூ²ஹி ஏதா சாதுமஹாராஜிகாதீ³ஸு பணீததராதி³பே⁴த³பி⁴ன்னா அபரிமெய்யா போ⁴க³ப⁴வஸம்பத்தியோதி த³ஸ்ஸனத்த²ங் தத³னந்தரங் ஸக்³க³கதா². ஸ்வாயங் ஸக்³கோ³ ராகா³தீ³ஹி உபக்கிலிட்டோ² ஸப்³ப³தா³ அனுபக்கிலிட்டோ² அரியமக்³கோ³தி த³ஸ்ஸனத்த²ங் ஸக்³கா³னந்தரங் மக்³கோ³, மக்³க³ஞ்ச கதெ²ந்தேன ஆதீ³னவோ. ஹீனா க³ம்மா போது²ஜ்ஜனிகா அனரியா அனத்த²ஸஞ்ஹிதாதி தேஸங் ஓகாரோ லாமகபா⁴வோ, ஸப்³பே³பி ப⁴வா கிலேஸானங் வத்து²பூ⁴தாதி தத்த² ஸங்கிலேஸோ. ஸப்³ப³ஸோ கிலேஸவிப்பமுத்தங் நிப்³பா³னந்தி நெக்க²ம்மே ஆனிஸங்ஸோ ச கதே²தப்³போ³தி அயமத்தோ² மக்³க³ந்தீதி எத்த² இதி-ஸத்³தே³ன த³ஸ்ஸிதோதி வேதி³தப்³ப³ங்.
ஸுகா²னங் நிதா³னந்தி தி³ட்ட²த⁴ம்மிகானங் ஸம்பராயிகானங் நிப்³பா³னஸஞ்ஹிதானஞ்சாதி ஸப்³பே³ஸம்பி ஸுகா²னங் காரணங். யஞ்ஹி கிஞ்சி லோகே போ⁴க³ஸுக²ங் நாம, தங் ஸப்³ப³ங் தா³னநிதா³னந்தி பாகடோ அயமத்தோ². யங் பன ஜா²னவிபஸ்ஸனாமக்³க³ப²லனிப்³பா³னபடிஸங்யுத்தங் ஸுக²ங், தஸ்ஸபி தா³னங் உபனிஸ்ஸயபச்சயோ ஹோதியேவ. ஸம்பத்தீனங் மூலந்தி யா இமா லோகே பதே³ஸரஜ்ஜஸிரிஸ்ஸரியஸத்தரதனஸமுஜ்ஜலசக்கவத்திஸம்பதா³தி ஏவங்பபே⁴தா³ மானுஸிகா ஸம்பத்தியோ, யா ச சாதுமஹாராஜாதி³க³தா தி³ப்³பா³ ஸம்பத்தியோ, யா வா பனஞ்ஞாபி ஸம்பத்தியோ, தாஸங் ஸப்³பா³ஸங் இத³ங் மூலகாரணங். போ⁴கா³னந்தி பு⁴ஞ்ஜிதப்³ப³ட்டே²ன ‘‘போ⁴கோ³’’ந்தி லத்³த⁴னாமானங் மனாபியரூபாதீ³னங், தன்னிஸ்ஸயானங் வா உபபோ⁴க³ஸுகா²னங், பதிட்டா² நிச்சலாதி⁴ட்டா²னதாய. விஸமக³தஸ்ஸாதி ப்³யஸனப்பத்தஸ்ஸ. தாணந்தி ரக்கா² ததோ பரிபாலனதோ. லேணந்தி ப்³யஸனேஹி பரிபாதியமானஸ்ஸ ஓலீயனபதே³ஸோ. க³தீதி க³ந்தப்³ப³ட்டா²னங். பராயணந்தி படிஸரணங். அவஸ்ஸயோதி வினிபதிதுங் அதெ³ந்தோ நிஸ்ஸயோ. ஆரம்மணந்தி ஓலுப்³பா⁴ரம்மணங்.
ரதனமயஸீஹாஸனஸதி³ஸந்தி மஹாபத²விஸதி³ஸங் க³தக³தட்டா²னே பதிட்டா²ஸம்ப⁴வதோ. யதா² து³ப்³ப³லஸ்ஸ புரிஸஸ்ஸ ஆலம்ப³னரஜ்ஜு உத்திட்ட²தோ திட்ட²தோ ச உபத்த²ம்போ⁴, ஏவங் தா³னங் ஸத்தானங் ஸம்பத்திப⁴வே உபபத்தியா டி²தியா ச பச்சயோ ஹோதீதி ஆஹ ‘‘ஆலம்ப³னட்டே²ன ஆலம்ப³னரஜ்ஜுஸதி³ஸ’’ந்தி. து³க்க²னித்த²ரணட்டே²னாதி து³க்³க³திது³க்க²னித்த²ரணட்டே²ன. ஸமஸ்ஸாஸனட்டே²னாதி லோப⁴மச்ச²ரியாதி³படிஸத்துபத்³த³வதோ ஸம்மதே³வ அஸ்ஸாஸனட்டே²ன. ப⁴யபரித்தாணட்டே²னாதி தா³லித்³தி³யப⁴யதோ பரிபாலனட்டே²ன. மச்சே²ரமலாதீ³ஹீதி மச்சே²ரலோப⁴தோ³ஸஇஸ்ஸாமிச்சா²தி³ட்டி²விசிகிச்சா²தி³ சித்தமலேஹி. அனுபலித்தட்டே²னாதி அனுபக்கிலிட்ட²தாய. தேஸந்தி மச்சே²ரமலாதீ³னங். ஏதேஸங் ஏவ து³ராஸத³ட்டே²ன. அஸந்தாஸனட்டே²னாதி அஸந்தாஸஹேதுபா⁴வேன. யோ ஹி தா³யகோ தா³னபதி, ஸோ ஸம்பதிபி ந குதோசி ஸந்தஸதி, பகே³வ ஆயதிங். ப³லவந்தட்டே²னாதி மஹாப³லவதாய. தா³யகோ ஹி தா³னபதி ஸம்பதி பக்க²ப³லேன ப³லவா ஹோதி, ஆயதிங் பன காயப³லாதீ³ஹி. அபி⁴மங்க³லஸம்மதட்டே²னாதி ‘‘வுட்³டி⁴காரண’’ந்தி அபி⁴ஸம்மதபா⁴வேன. விபத்திதோ ஸம்பத்தியா நயனங் கே²மந்தபூ⁴மிஸம்பாபனங்.
இதா³னி தா³னங் நாமேதந்திஆதி³ வுத்தங். தத்த² அத்தானங் நிய்யாதெ³ந்தேனாதி ஏதேன தா³னப²லங் ஸம்மதே³வ பஸ்ஸந்தா மஹாபுரிஸா அத்தனோ ஜீவிதம்பி பரிச்சஜந்தி, தஸ்மா கோ நாம விஞ்ஞுஜாதிகோ பா³ஹிரே வத்து²ம்ஹி ஸங்க³ங் கரெய்யாதி ஓவாத³ங் தே³தி. இதா³னி யா லோகியா லோகுத்தரா ச உக்கங்ஸக³தா ஸம்பத்தியோ, தா ஸப்³பா³ தா³னதோயேவ பவத்தந்தீதி த³ஸ்ஸெந்தோ ‘‘தா³னஞ்ஹீ’’திஆதி³மாஹ. தத்த² ஸக்கமாரப்³ரஹ்மஸம்பத்தியோ அத்தஹிதாய ஏவ, சக்கவத்திஸம்பத்தி பன அத்தஹிதாய ச பரஹிதாய சாதி த³ஸ்ஸேதுங் ஸா தாஸங் பரதோ வுத்தா. ஏதா லோகியா, இமா பன லோகுத்தராதி த³ஸ்ஸேதுங் ‘‘ஸாவகபாரமீஞாண’’ந்திஆதி³ வுத்தங். தாஸுபி உக்கட்டு²க்கட்ட²தருக்கட்ட²தமமேவ த³ஸ்ஸேதுங் கமேன ஞாணத்தயங் வுத்தங். தேஸங் பன தா³னஸ்ஸ பச்சயபா⁴வோ ஹெட்டா² வுத்தோயேவ. ஏதேனேவ தஸ்ஸ ப்³ரஹ்மஸம்பத்தியாபி பச்சயபா⁴வோ தீ³பிதோதி வேதி³தப்³போ³.
தா³னஞ்ச நாம ஹிதஜ்ஜா²ஸயேன, பூஜாவஸேன வா அத்தனோ ஸந்தகஸ்ஸ பரேஸங் பரிச்சஜனங், தஸ்மா தா³யகோ புரிஸபுக்³க³லோ பரேஸங் ஸந்தகங் ஹரிஸ்ஸதீதி ‘‘தா³னங் த³த³ந்தோ ஸீலங் ஸமாதா³துங் ஸக்கோதீ’’தி. ஸீலாலங்காரஸதி³ஸோ அலங்காரோ நத்தி² ஸோபா⁴விஸேஸாவஹத்தா ஸீலஸ்ஸ. ஸீலபுப்ப²ஸதி³ஸங் புப்ப²ங் நத்தீ²தி எத்தா²பி ஏஸேவ நயோ. ஸீலக³ந்த⁴ஸதி³ஸோ க³ந்தோ⁴ நத்தீ²தி எத்த² ‘‘சந்த³னங் தக³ரங் வாபீ’’திஆதி³கா (த⁴॰ ப॰ 55; மி॰ ப॰ 4.1.1) கா³தா² – ‘‘க³ந்தோ⁴ இஸீனங் சிரதி³க்கி²தானங், காயா சுதோ க³ச்ச²தி மாலுதேனா’’திஆதி³கா (ஜா॰ 2.17.55) ஜாதககா³தா²யோ ச ஆஹரித்வா வத்தப்³பா³, ஸீலஞ்ஹி ஸத்தானங் ஆப⁴ரணஞ்சேவ அலங்காரோ ச க³ந்த⁴விலேபனஞ்ச த³ஸ்ஸனீயபா⁴வாவஹஞ்ச. தேனாஹ ‘‘ஸீலாலங்காரேன ஹீ’’திஆதி³.
அயங் ஸக்³கோ³ லப்³ப⁴தீதி இத³ங் மஜ்ஜி²மேஹி ச²ந்தா³தீ³ஹி ஸமாதா³னஸீலங் ஸந்தா⁴யாஹ. தேனாஹ ஸக்கோ தே³வராஜா –
‘‘ஹீனேன ப்³ரஹ்மசரியேன, க²த்தியே உபபஜ்ஜதி;
மஜ்ஜி²மேன ச தே³வத்தங், உத்தமேன விஸுஜ்ஜ²தீ’’தி. (ஜா॰ 1.8.75; 2.22.429; தீ³॰ நி॰ டீ॰ 2.75-76);
இட்டோ²தி ஸுகோ². கந்தோதி கமனீயோ. மனாபோதி மனவட்³ட⁴னகோ. தங் பன தஸ்ஸ இட்டா²தி³பா⁴வங் த³ஸ்ஸேதுங் ‘‘நிச்சமெத்த² கீளா’’திஆதி³ வுத்தங்.
தோ³ஸோதி அனிச்சதாதி³னா அப்பஸ்ஸாதா³தி³னா ச தூ³ஸிதபா⁴வோ, யதோ தே விஞ்ஞூனங் சித்தங் நாராதெ⁴ந்தி ஆதீ³னவோ, பரமகபணதா. ததா² ச காமா யதா²பூ⁴தங் பச்சவெக்க²ந்தானங் பச்சுபதிட்ட²ந்தி. லாமகபா⁴வோதி அஸெட்டே²ஹி ஸேவிதப்³போ³, ஸெட்டே²ஹி ந ஸேவிதப்³போ³ நிஹீனபா⁴வோ. ஸங்கிலிஸ்ஸனந்தி விபா³த⁴கதா உபதாபதா ச.
நெக்க²ம்மே ஆனிஸங்ஸந்தி எத்த² யத்தகா காமேஸு ஆதீ³னவா, தப்படிபக்க²தோ தத்தகா நெக்க²ம்மே ஆனிஸங்ஸா. அபிச – ‘‘நெக்க²ம்மங் நாமேதங் அஸம்பா³த⁴ங் அஸங்கிலிட்ட²ங் நிக்க²ந்தங் காமேஹி, நிக்க²ந்தங் காமஸஞ்ஞாய, நிக்க²ந்தங் காமவிதக்கேஹி, நிக்க²ந்தங் காமபரிளாஹேஹி, நிக்க²ந்தங் ப்³யாபாத³ஸஞ்ஞாயா’’திஆதி³னா (ஸாரத்த²॰ டீ॰ மஹாவக்³க³ 3.26; தீ³॰ நி॰ டீ॰ 2.75-76) நயேன நெக்க²ம்மே ஆனிஸங்ஸே பகாஸேஸி, பப்³ப³ஜ்ஜாய ஜா²னாதீ³ஸு ச கு³ணே விபா⁴வேஸி வண்ணேஸி. கல்லசித்தந்தி ஹெட்டா² பவத்திததே³ஸனாய அஸ்ஸத்³தி⁴யாதீ³னங் சித்ததோ³ஸானங் விக³தத்தா உபரிதே³ஸனாய பா⁴ஜனபா⁴வூபக³மனேன கம்மக்க²மசித்தங். அட்ட²கதா²யங் பன யஸ்மா அஸ்ஸத்³தி⁴யாத³யோ சித்தஸ்ஸ ரோக³பூ⁴தா ‘‘அரோக³சித்த’’ந்தி. தி³ட்டி²மானாதி³கிலேஸவிக³மேன முது³சித்தங். காமச்ச²ந்தா³தி³விக³மேன வினீவரணசித்தங். ஸம்மாபடிபத்தியங் உளாரபீதிபாமோஜ்ஜயோகே³ன உத³க்³க³சித்தங். தத்த² ஸத்³தா⁴ஸம்பத்தியா பஸன்னசித்தங். யதா³ ப⁴க³வா அஞ்ஞாஸீதி ஸம்ப³ந்தோ⁴. அத² வா கல்லசித்தந்தி காமச்ச²ந்த³விக³மேன அரோக³சித்தங். முது³சித்தந்தி ப்³யாபாத³விக³மேன மெத்தாவஸேன அகதி²னசித்தங். வினீவரணசித்தந்தி உத்³த⁴ச்சகுக்குச்சவிக³மேன விக்கே²பஸ்ஸ விக³தத்தா தேன அபிஹிதசித்தங். உத³க்³க³சித்தந்தி தி²னமித்³த⁴விக³மேன ஸம்பக்³க³ஹிதவஸேன அலீனசித்தங். பஸன்னசித்தந்தி விசிகிச்சா²விக³மேன ஸம்மாபடிபத்தியங் அதி⁴முத்தசித்தந்தி ஏவமெத்த² ஸேஸபதா³னங் அத்தோ² வேதி³தப்³போ³.
ஸெய்யதா²பீதிஆதி³னா உபமாவஸேன உபாலிஸ்ஸ ஸங்கிலேஸப்பஹானங் அரியமக்³க³னிப்பா²த³னஞ்ச த³ஸ்ஸேதி. அபக³தகாளகந்தி விக³தகாளகங். ஸம்மதே³வாதி ஸுட்டு² ஏவ. ரஜனந்தி நீலபீதாதி³ரங்க³ஜாதங். படிக்³க³ண்ஹெய்யாதி க³ண்ஹெய்ய பப⁴ஸ்ஸரங் ப⁴வெய்ய. தஸ்மிங்யேவ ஆஸனேதி திஸ்ஸங் ஏவ நிஸஜ்ஜாயங். ஏதேனஸ்ஸ லஹுவிபஸ்ஸகதா திக்க²பஞ்ஞதா ஸுக²படிபதா³கி²ப்பாபி⁴ஞ்ஞதா ச த³ஸ்ஸிதா ஹோதி. விரஜந்தி அபாயக³மனீயராக³ரஜாதீ³னங் விக³மேன விரஜங். அனவஸேஸதி³ட்டி²விசிகிச்சா²மலாபக³மேன வீதமலங். திண்ணங் மக்³கா³னந்தி ஹெட்டி²மானங் திண்ணங் மக்³கா³னங். தஸ்ஸ உப்பத்திஆகாரத³ஸ்ஸனந்தி கஸ்மா வுத்தங்? நனு மக்³க³ஞாணங் அஸங்க²தத⁴ம்மாரம்மணந்தி சோத³னங் ஸந்தா⁴யாஹ ‘‘தங் ஹீ’’திஆதி³. தத்த² படிவிஜ்ஜ²ந்தந்தி அஸம்மோஹபடிவேத⁴வஸேன படிவிஜ்ஜ²ந்தங். தேனாஹ ‘‘கிச்சவஸேனா’’தி.
தத்ரித³ங்
தி³ட்ட²த⁴ம்மோதி வத்வா த³ஸ்ஸனங் நாம ஞாணத³ஸ்ஸனதோ அஞ்ஞம்பி அத்தீ²தி தன்னிவத்தனத்த²ங் ‘‘பத்தத⁴ம்மோ’’தி வுத்தங். பத்தி ச ஞாணஸம்பத்திதோ அஞ்ஞாபி விஜ்ஜதீதி ‘‘விதி³தத⁴ம்மோ’’தி வுத்தங். ஸா பனேஸா விதி³தத⁴ம்மதா த⁴ம்மேஸு ஏகதே³ஸனாபி ஹோதீதி நிப்பதே³ஸதோ விதி³தபா⁴வங் த³ஸ்ஸேதுங் ‘‘பரியோகா³ள்ஹத⁴ம்மோ’’தி வுத்தங். தேனஸ்ஸ ஸச்சாபி⁴ஸம்போ³த⁴ங்யேவ தீ³பேதி. மக்³க³ஞாணஞ்ஹி ஏகாபி⁴ஸமயவஸேன பரிஞ்ஞாதி³கிச்சங் ஸாதெ⁴ந்தங் நிப்பதே³ஸேன சதுஸச்சத⁴ம்மங் ஸமந்ததோ ஓகா³ஹந்தங் நாம ஹோதி. தேனாஹ – ‘‘தி³ட்டோ² அரியஸச்சத⁴ம்மோ ஏதேனாதி தி³ட்ட²த⁴ம்மோ’’தி. திண்ணா விசிகிச்சா²தி ஸப்படிப⁴யகந்தாரஸதி³ஸா ஸோளஸவத்து²கா அட்ட²வத்து²கா ச திண்ணா விசிகிச்சா² திண்ணவிசிகிச்சா². விக³தகத²ங்கதோ²தி பவத்திஆதீ³ஸு ‘‘ஏவங் நு கோ², கிங் நு கோ²’’தி ஏவங் பவத்திகா விக³தா ஸமுச்சி²ன்னா கத²ங்கதா². ஸாரஜ்ஜகரானங் பாபத⁴ம்மானங் பஹீனத்தா தப்படிபக்கே²ஸு ஸீலாதி³கு³ணேஸு ஸுப்பதிட்டி²தத்தா வேஸாரஜ்ஜங் விஸாரத³பா⁴வங் வெய்யத்தியங் பத்தோ. அத்தனா ஏவ பச்சக்க²தோ தி³ட்ட²த்தா ந தஸ்ஸ பரோ பச்சேதப்³போ³ அத்தீ²தி அபரப்பச்சயோ.
71. பண்டி³தோதி பஞ்ஞவா.
72. தேன ஹி ஸம்மாதி தோ³வாரிகேன ஸத்³தி⁴ங் ஸல்லபதியேவ, ‘‘எத்தே²வா’’தி தேன வுத்தவசனங் ஸுத்வாபி தஸ்ஸ அத்த²ங் அஸல்லக்கெ²ந்தோ. கஸ்மா? பரிதே³வதாய. தேனாஹ ‘‘ப³லவஸோகேன அபி⁴பூ⁴தோ’’தி.
73. தேனேவாதி யேன உத்தராஸங்கே³ன ஆஸனங் ஸம்மஜ்ஜதி, தேனேவ உத³ரே பரிக்கி²பந்தோ ‘‘மாஹங் ஸத்தா²ரங் மம ஸரீரேன பு²ஸி’’ந்தி அந்தரங் கரொந்தோ உத்தராஸங்கே³ன தங் உத³ரே பரிக்கி²பந்தோ பரிக்³க³ஹெத்வா. ‘‘த³த்தபஞ்ஞத்த’’ந்திஆதீ³ஸு (தீ³॰ நி॰ 1.171) விய த³த்த-ஸத்³தோ³ எத்த² பா³லபரியாயோதி ‘‘ஜளோஸி ஜாதோ’’தி. உபட்டா²கஸ்ஸ அஞ்ஞதா²பா⁴வேனாதி புப்³பே³ அத்தனோ உபட்டா²கஸ்ஸ இதா³னி அனுபட்டா²கபா⁴வேன.
75. அவிஞ்ஞாணகங் தா³ருஸாகா²தி³மயங். ப³ஹலப³ஹலங் பீதாவலேபனங் ரங்க³ஜாதந்தி அதிவிய ப³ஹலங் பீதவண்ணமஞ்ஜிட்ட²ஆதி³அவலேபனரஜனங். க⁴ட்டெத்வா உப்பாதி³தச்ச²விங், யா ரங்க³ங் பிவதி. நில்லோமதந்தி புனப்புனங் அனுலிம்பனேன. க²ண்ட³க²ண்டி³தந்தி க²ண்ட³க²ண்டி³தபா⁴வங். ரங்க³க்க²மோ ரஜனியோ. தேனாஹ ‘‘ராக³மத்தங் ஜனேதீ’’தி. அனுயோக³ந்தி சோத³னங். வீமங்ஸந்தி விசாரணங். து²ஸே கொட்டெத்வா தண்டு³லபரியேஸனங் விய கத³லியங் ஸாரபரியேஸனங் விய ச நிக³ண்ட²வாதே³ ஸாரவீமங்ஸனங். ததோ ஏவ ச தங் வீமங்ஸந்தோ
76. விஸயபரிஞ்ஞாணேன த³ஹதி படிபக்கே² ஸோதே⁴தீதி தீ⁴ரோ, ஸ்வாயமஸ்ஸ தீ⁴ரபா⁴வோ ஸப்³ப³ஸோ ஸம்மோஹவித்³த⁴ங்ஸனதாயாதி ஆஹ – ‘‘யா பஞ்ஞா…பே॰… தேன ஸமன்னாக³தஸ்ஸா’’தி. பபி⁴ன்னகீ²லஸ்ஸாதி ஸமுச்சி²ன்னஸப்³ப³சேதோகீ²லஸ்ஸ, கிலேஸமச்சுமாரவிஜயேனேவ அபி⁴ஸங்கா²ரக²ந்த⁴மாரா ஜிதாவ ஹொந்தீதி தேஸங் த்³வின்னங் இத⁴ அக்³க³ஹணங். ஈக⁴-ஸத்³தோ³ து³க்க²பரியாயோதி ஆஹ ‘‘நித்³து³க்க²ஸ்ஸா’’தி. தத்த² ஸஉபாதி³ஸேஸனிப்³பா³னப்பத்தியா கிலேஸேன நித்³து³க்க²தா, அனுபாதி³ஸேஸனிப்³பா³னப்பத்தியா விபாகது³க்கே²ன நித்³து³க்க²தா. ரஜ்ஜனது³ஸ்ஸனமுய்ஹனாதி³வஸேன விவித⁴ங் ஈஸனதோ வீஸங், வீஸமேவ வேஸங், ராகா³தீ³தி ஆஹ – ‘‘வேஸந்தரஸ்ஸாதி ராகா³தி³வீஸங் தரித்வா விதரித்வா டி²தஸ்ஸா’’தி.
துஸிதஸ்ஸாதி கருணாயனவஸேன துஸியா இதஸ்ஸ ஸங்வத்தஸ்ஸ. ஏவங் ஸதி ‘‘முதி³தஸ்ஸா’’தி இத³ங் புனருத்தமேவ ஹோதி. மனுஜஸ்ஸாதி பட²மாய ஜாதியா ப⁴க³வா மனுஸ்ஸஜாதியோ ஹுத்வா வுத்தானங் வக்க²மானானஞ்ச வஸேன ஸதே³வகங் அபி⁴ப⁴வித்வா டி²தோ அச்ச²ரியோ ப⁴க³வாதி த³ஸ்ஸேதி. ஸதே³வகங் லோகங் ஸங்ஸாரதோ நிப்³பா³னஸுக²ங் நரதி நேதி பாபேதீதி நரோ, நாயகோதி அத்தோ², தஸ்ஸ நரஸ்ஸ, தேனாஹ ‘‘புனருத்த’’ந்தி. ‘‘மனுஜஸ்ஸா’’தி வத்வா ‘‘நரஸ்ஸா’’தி புனருத்தங் பத³ங். அத்த²வஸேன அஞ்ஞதா² வுச்சமானே ஏகேககா³தா²ய த³ஸகு³ணா நப்பஹொந்தி, ந பூரெந்தீதி அத்தோ².
வினேதீதி வினயோ, வினயோ ஏவ வேனேயிகோதி ஆஹ ‘‘ஸத்தானங் வினாயகஸ்ஸா’’தி. விஞ்ஞூனங் ருசிங் ராதி, ஈரேதீதி வா ருசிரோ, ஸ்வாயமஸ்ஸ ருசிரபா⁴வோ ‘‘ஸுசித⁴ம்மஸ்ஸா’’தி. பபா⁴ஸகஸ்ஸாதி ஞாணாலோகேன பப⁴ஸ்ஸரபா⁴வகரஸ்ஸ. நிஸ்ஸங்க³ஸ்ஸாதி அட்ட²ஸுபி பரிஸாஸு, ஸதே³வே வா ஸப்³ப³ஸ்மிங் லோகே அக்³க³ண்ஹாபனபரிச்சாகே³ன நிஸ்ஸடஸ்ஸ. க³ம்பீ⁴ரகு³ணஸ்ஸாதி பரேஸங் ஞாணேன அப்பதிட்ட²பா⁴வா க³ம்பீ⁴ரகு³ணஸ்ஸ. தேனாஹ ப⁴க³வா – ‘‘அத்தி², பி⁴க்க²வே, அஞ்ஞேவ த⁴ம்மா க³ம்பீ⁴ரா’’திஆதி³ (தீ³॰ நி॰ 1.28). அரியாய வா துண்ஹீபா⁴வேன மோனப்பத்தஸ்ஸ. த⁴ம்மே டி²தஸ்ஸாதி த⁴ம்மகாயே ஸுப்பதிட்டி²தஸ்ஸ. ஸங்வுதத்தஸ்ஸாதி அரக்கி²யகாயஸமாசாராதி³தாய ஸங்வுதஸபா⁴வஸ்ஸ.
ஆகு³ங் ந கரோதீதிஆதீ³ஹி சதூஹி காரணேஹி, பந்தஸேனாஸனஸ்ஸாதி விவித்தஸேனாஸனஸ்ஸ. படிமந்தனபஞ்ஞாயாதி ஸப்³ப³பரப்பவாதா³னங் விபராவத்தமந்தனபஞ்ஞாய. மோனங் வுச்சதி ஞாணங் ஸப்³ப³தோ கிலேஸானங் நிது⁴னநதோ.
இஸிஸத்தமஸ்ஸாதி ஸப்³ப³இஸீஸு ஜெட்ட²ஸ்ஸ ஸாது⁴தமஸ்ஸ. ஸெட்ட²ப்பத்தஸ்ஸாதி ஸெட்ட²ங் உத்தமங் ஸம்மாஸம்போ³தி⁴ங் பத்தஸ்ஸ. அக்க²ராதீ³னீதி அக்க²ரபத³ப்³யஞ்ஜனாகார-நிருத்தினித்³தே³ஸ-ஸங்காஸனபகாஸன-விவரண-விப⁴ஜனுத்தானீகரணானீதி ப்³யஞ்ஜனத்த²பதா³னி. ஸமோதா⁴னெத்வா வினெய்யஜ்ஜா²ஸயானுரூபங் பகாஸனதோ கத²னதோ பத³கஸ்ஸ. புரி-ஸத்³தோ³ ‘‘புப்³பே³’’தி இமினா ஸமானத்தோ²தி ஆஹ – ‘‘புரிந்த³த³ஸ்ஸாதி ஸப்³ப³பட²மங் த⁴ம்மதா³னதா³யகஸ்ஸா’’தி. ப⁴க³வா அஸய்ஹங் ஸஹிதுங் ஸமத்தோ²தி ஆஹ ‘‘ஸமத்த²ஸ்ஸா’’தி. தேனாஹ – ‘‘ததா²க³தங் பு³த்³த⁴மஸய்ஹஸாஹின’’ந்தி (இதிவு॰ 38). தே பத்தஸ்ஸாதி தே கு³ணே அனவஸேஸதோ பத்தஸ்ஸ. வித்தா²ரெத்வா ஸங்கிலேஸவோதா³னத⁴ம்மங் ப்³யாகரோதீதி ப்³யாகரணோ, ப்³யாகரணோ ஏவ வெய்யாகரணோ. தந்திபத³ந்தி தந்திங் ஆரோபெத்வா ட²பிதங் பத³ங்.
தண்ஹாப³ந்த⁴னேன ஸப்³பே³ன வா கிலேஸப³ந்த⁴னேன அப³த்³த⁴ஸ்ஸ. மஹாபஞ்ஞாயாதி மஹானுபா⁴வாய பஞ்ஞாய, மஹாவிஸயாய வா பஞ்ஞாய. ஸப்³பா³ ஹி ப⁴க³வதோ பஞ்ஞா மஹானுபா⁴வா, யதா²ஸகங் விஸயே மஹாவிஸயா ச ஏகாதி³வஸேன அனவஸேஸதோ மஹாவிஸயா நாம ஸப்³ப³ஞ்ஞுதாவ. ஆனுபா⁴வத³ஸ்ஸனட்டே²னாதி அச்ச²ரியாசிந்தெய்யாபரிமெய்யஸ்ஸ அத்தனோ ஆனுபா⁴வஸ்ஸ லோகஸ்ஸ த³ஸ்ஸனட்டே²ன யக்க²ஸ்ஸாதி வா லோகேன பூஜனீயஸ்ஸ ‘‘ஸோதாபத்திமக்³கே³னேவ படிஸம்பி⁴தா³ ஆக³தா’’தி. கிலேஸப்பஹானவண்ணங் கதெ²ந்தோதி கிலேஸப்பஹானங் விஸயங் நிமித்தங் கத்வா வண்ணங் கதெ²ந்தோ.
77. ஸம்பிண்டி³தாதி ஸன்னிசிதா, க³ந்தி²தாதி அத்தோ². இமே ஸத்தாதி யங் யதே³வ பரிப்³ப⁴மந்தா ஸத்தா. அத்தனோவ சிந்தயந்தீதி அவீததண்ஹதாய ஸகங்யேவ பயோஜனங் சிந்தெந்தி. ததா² ஹி மதே ஞாதகே அனுஸோசந்தாபி தேஹி ஸாதே⁴தப்³ப³ஸ்ஸ அத்தனோ பயோஜனஸ்ஸேவ வஸேன அனுஸோசந்தி. உண்ஹங் அஹோஸீதி ப³லவதா சித்தஸ்ஸ ஸந்தாபேன ஸந்தத்தங் அப்³ப⁴ந்தரங் ஹத³யட்டா²னங் க²தி³ரங்கா³ரஸந்தாபிதங் விய உண்ஹங் அஹோஸி. தேனாஹ ‘‘லோஹிதங் விலீயித்தா²’’தி. பத்தமத்தந்தி ஏகபத்தபூரமத்தங். அபி⁴ஸமயஸாதி⁴காய சதுஸச்சதே³ஸனாய ஸங்கே²பேனேவ தே³ஸிதத்தா ஆஹ – ‘உக்³க⁴டிதஞ்ஞுபுக்³க³லஸ்ஸ வஸேன த⁴ம்மதே³ஸனா பரினிட்டி²தா’’தி.
உபாலிஸுத்தவண்ணனாய லீனத்த²ப்பகாஸனா ஸமத்தா.
7. குக்குரவதிகஸுத்தவண்ணனா
78. கோலியேஸூதி ஏவங்னாமகே ஜனபதே³தி அத்த²வசனங் கஸ்மா வுத்தந்தி ஆஹ ‘‘ஸோ ஹீ’’திஆதி³. ந நியமிதோதி ‘‘அஸுகம்ஹி நாம விஹாரே’’தி ந நியமெத்வா வுத்தோ. ஸேனாஸனேயேவாதி ஆவாஸேயேவ, ந ருக்க²மூலாதி³கே. வேஸகிரியா கா⁴ஸக்³க³ஹணாதி³னா ஸமாதா³தப்³ப³ட்டே²ன கோ³வதங், தஸ்மிங் நியுத்தோ கோ³வதிகோ. தேனாஹ ‘‘ஸமாதி³ன்னகோ³வதோ’’தி. யங் ஸந்தா⁴யாஹு வேத³வேதி³னோ – ‘‘க³ச்ச²ங் ப⁴க்கே²தி, திட்ட²ங் முத்தேதி, உபாஹா உத³கங் தூ⁴பேதி, திணானி சி²ந்த³தீ’’திஆதி³. அயங் அசேலோதி அசேலகபப்³ப³ஜ்ஜாவஸேன அசேலோ, புரிமோ பன கோ³வதிகோ குக்குரவதிகோதி எத்த² வுத்தனயானுஸாரேன அத்தோ² வத்தப்³போ³. பலிகுண்டி²த்வாதி உபோ⁴ ஹத்தே² உபோ⁴ பாதே³ ச ஸமிஞ்ஜித்வா. ‘‘உக்குடிகோ ஹுத்வா’’திபி வத³ந்தி. க³மனங் நிப்ப²ஜ்ஜனங் க³தீதி ஆஹ – ‘‘கா க³தீதி கா நிப்ப²த்தீ’’தி. நிப்ப²த்திபரியோஸானா ஹி விபாகத⁴ம்மப்பவத்தி. கதூபசிதகம்மவஸேன அபி⁴ஸம்பரேதி எத்தா²தி அபி⁴ஸம்பராயோ, பரலோகோ. தத்த²ஸ்ஸ ச நிப்ப²த்திங் புச்ச²தீதி ஆஹ – ‘‘அபி⁴ஸம்பராயம்ஹி கத்த² நிப்³ப³த்தீ’’தி. குக்குரவதஸமாதா³னந்தி குக்குரபா⁴வஸமாதா³னங், ‘‘அஜ்ஜ பட்டா²ய அஹங் குக்குரோ’’தி குக்குரபா⁴வாதி⁴ட்டா²னங்.
79. பரிபுண்ணந்தி யத்தகா குக்குரவிகாரா, தேஹி பரிபுண்ணங். தேனாஹ ‘‘அனூன’’ந்தி. அப்³போ³கிண்ணந்தி தேஹி அவோமிஸ்ஸங். குக்குராசாரந்தி குக்குரானங் க³மனாகாரோதிஆதி³ஆசாரேன குக்குரபா⁴வாதி⁴ட்டா²னசித்தமாஹ. ததா² ததா² ஆகப்பேதப்³ப³தோ ஆகப்போ, பவத்திஆகாரோ. ஸோ பனெத்த² க³மனாதி³கோதி ஆஹ ‘‘குக்குரானங் க³மனாகாரோ’’திஆதி³. ஆசாரேனாதி குக்குரஸீலாசாரேன. வதஸமாதா³னேனாதி குக்குரவதாதி⁴ட்டா²னேன. குக்குரசரியாதி³யேவ து³க்கரதபசரணங். தேன க³திவிபரியேஸாகாரேன பவத்தா லத்³தி⁴. அஸ்ஸ குக்குரவதிகஸ்ஸ அஞ்ஞா க³தி நத்தீ²தி இதரக³திங் படிக்கி²பதி, இதராஸங் பன ஸம்ப⁴வோ ஏவ நத்தீ²தி. நிபஜ்ஜமானந்தி வதஸீலாதீ³னங் ஸங்கோ³பனவஸேன ஸிஜ்ஜ²மானங். யதா² ஸகம்மகதா⁴துஸத்³தா³ அத்த²விஸேஸவஸேன அகம்மகா ஹொந்தி ‘‘விபு³த்³தோ⁴ புரிஸோ விபு³த்³தோ⁴ கமலஸண்டோ³’’தி, ஏவங் அத்த²விஸேஸவஸேன அகம்மகாபி ஸகம்மகா ஹொந்தீதி த³ஸ்ஸெந்தோ ‘‘ந பரிதே³வாமி ந அனுத்து²னாமீ’’திஆதி³மாஹ. அனுத்து²னஸத்³தோ³ ச ஸகம்மகவஸேன பயுஜ்ஜதி ‘‘புராணானி அனுத்து²ன’’ந்திஆதீ³ஸு. அயஞ்செத்த² பயோகோ³தி இமினா கா³தா²யஞ்ச அனுத்து²னநரோத³னங் அதி⁴ப்பேதந்தி த³ஸ்ஸேதி.
80. வுத்தனயேனேவாதி கோ³வதந்தி கோ³வதஸமாதா³னங். கோ³ஸீலந்தி க³வாசாரங். கோ³சித்தந்தி ‘‘அஜ்ஜ பட்டா²ய கோ³ஹி காதப்³ப³ங் கரிஸ்ஸாமீ’’தி உப்பன்னசித்தந்தி இமமத்த²ங் அதிதி³ஸதி. க்³வாகப்பே பன வத்தப்³ப³ங் அவஸிட்ட²ங் ‘‘குக்குராகப்பே வுத்தஸதி³ஸமேவா’’தி இமினாவ அதிதி³ட்ட²ங், விஸிட்ட²ஞ்ச யதா² பன தத்தா²திஆதி³னா வுத்தமேவ. யங் பனெத்த² வத்தப்³ப³ங், தங் குக்குரவதாதீ³ஸு வுத்தனயமேவ.
81. ஏகச்சகம்மகிரியாவஸேனாதி ஏகச்சஸ்ஸ அகுஸலகம்மஸ்ஸ குஸலகம்மஸ்ஸ கரணப்பஸங்கே³ன. இமேஸந்தி கோ³வதிககுக்குரவதிகானங். கிரியாதி கோ³வதபா⁴வனாதி³வஸேன பவத்தா கிரியா. பாகடா ப⁴விஸ்ஸதீதி ‘‘இமஸ்மிங் கம்மசதுக்கே இத³ங் நாம கம்மங் ப⁴ஜதீ’’தி பாகடா ப⁴விஸ்ஸதி.
காளகந்தி ‘‘த³ஸஅகுஸலகம்மபத²’’ந்தி. கண்ஹந்தி கண்ஹாபி⁴ஜாதிஹேதுதோ வா கண்ஹங். தேனாஹ ‘‘கண்ஹவிபாக’’ந்தி. அபாயூபபத்தி மனுஸ்ஸேஸு ச தோ³ப⁴க்³கி³யங் கண்ஹவிபாகோ, யதா² தமபா⁴வோ வுத்தோ, ஏகத்தனித்³தே³ஸேன பன ‘‘அபாயே நிப்³ப³த்தனதோ’’தி வுத்தங், நிப்³ப³த்தாபனதோதி அத்தோ². ஸுக்கந்தி ஓதா³தங், சித்தஸ்ஸ பப⁴ஸ்ஸரபா⁴வகரணந்தி அத்தோ², ஸுக்காபி⁴ஜாதிஹேதுதோ வா ஸுக்கங். தேனாஹ ‘‘ஸுக்கவிபாக’’ந்தி. ஸக்³கூ³பபத்தி மனுஸ்ஸலோகே ஸோப⁴க்³கி³யஞ்ச ஸுக்கவிபாகோ, யதா² ச ஜோதிபா⁴வோ வுத்தோ, ஏகத்தனித்³தே³ஸேன பன ‘‘ஸக்³கே³ நிப்³ப³த்தனதோ’’தி வுத்தங், நிப்³ப³த்தாபனதோதி அத்தோ², வோமிஸ்ஸககம்மந்தி காலேன கண்ஹங், காலேன ஸுக்கந்தி ஏவங் மிஸ்ஸகவஸேன கதகம்மங். ‘‘ஸுக²து³க்க²விபாக’’ந்தி வத்வா ஸுக²து³க்கா²னங் பவத்திஆகாரங் த³ஸ்ஸேதுங் ‘‘மிஸ்ஸககம்மஞ்ஹீ’’திஆதி³ வுத்தங். கம்மஸ்ஸ கண்ஹஸுக்கஸமஞ்ஞா கண்ஹஸுக்காபி⁴ஜாதிஹேதுதாயாதி, அபச்சயகா³மிதாய தது³ப⁴யவினிமுத்தஸ்ஸ கம்மக்க²யகரகம்மஸ்ஸ இத⁴ ஸுக்கபரியாயோபி ந இச்சி²தோதி ஆஹ – ‘‘உப⁴ய…பே॰… அஸுக்கந்தி வுத்த’’ந்தி. தத்த² உப⁴யவிபாகஸ்ஸாதி யதா²தி⁴க³தஸ்ஸ விபாகஸ்ஸ. ஸம்பத்திப⁴வபரியாபன்னோ ஹி விபாகோ இத⁴ ‘‘ஸுக்கவிபாகோ’’தி அதி⁴ப்பேதோ, ந அச்சந்தபரிஸுத்³தோ⁴.
ஸது³க்க²ந்தி அத்தனா உப்பாதே³தப்³பே³ன து³க்கே²ன ஸது³க்க²ங், து³க்க²ஸங்வத்தனிகந்தி அத்தோ². ‘‘இமஸ்மிங் ஸுத்தே சேதனா து⁴ரங், உபாலிஸுத்தே (ம॰ நி॰ 2.56) கம்ம’’ந்தி ஹெட்டா² வுத்தம்பி அத்த²ங் இத⁴ ஸாத⁴யதி விஜானநத்த²ங். அபி⁴ஸங்க²ரித்வாதி ஆயூஹித்வா. தங் பன பச்சயஸமவாயஸித்³தி⁴தோ ஸங்கட்³ட⁴னங் பிண்ட³னங் விய ஹோதீதி ஆஹ – ‘‘ஸங்கட்³டி⁴த்வா, பிண்ட³ங் கத்வாதி அத்தோ²’’தி, ஸது³க்க²ங் லோகந்தி விபாகப²ஸ்ஸாதி ப²ஸ்ஸஸீஸேன தத்த² விபாகபவத்தமாஹ. பூ⁴தகம்மதோதி நிப்³ப³த்தகம்மதோ அத்தனா கதூபசிதகம்மதோ. யதா²பூ⁴தந்தி யாதி³ஸங். கம்மஸபா⁴க³வஸேனாதி கம்மஸரிக்க²கவஸேன. உபபத்தி ஹோதீதி அபதா³தி³பே⁴தா³ உபபத்தி. கம்மேன விய வுத்தாதி யங் கரோதி, தேன உபபஜ்ஜதீதி ஏககம்மேனேவ ஜாயமானா விய வுத்தா அபதா³தி³பே⁴தா³. உபபத்தி ச நாம விபாகேன ஹோதி விபாகே ஸம்ப⁴வந்தே ஏகங்ஸேன தே உபபத்திவிஸேஸா ஸம்ப⁴வந்தி. யதி³ ஏவங் கஸ்மா ‘‘தேன உபபஜ்ஜதீ’’தி உபபத்திகம்மஹேதுகா வுத்தாதி ஆஹ ‘‘யஸ்மா பனா’’திஆதி³. யேன கம்மவிபாகேன நிப்³ப³த்தோதி தங்கம்மவிபாகப²ஸ்ஸாதி தஸ்ஸ தஸ்ஸ கம்மஸ்ஸ விபாகபூ⁴தா ப²ஸ்ஸா. கம்மேன தா³தப்³ப³ங் தா³யங் தப்³பி³பாகங் ஆதி³யந்தீதி கம்மதா³யாதா³, ப²ஸ்ஸா. கம்மஸ்ஸ தா³யஜ்ஜதா கம்மப²லஸ்ஸ தா³யஜ்ஜங், தஸ்மா வுத்தங் ‘‘கம்மதா³யஜ்ஜா’’தி. தேனாஹ ‘‘கம்மமேவ நேஸங் தா³யஜ்ஜங் ஸந்தக’’ந்தி.
திஸ்ஸோ ச ஹெட்டி²மஜ்ஜா²னசேதனாதி இத³ங் அப்³யாப³ஜ்ஜ²வேத³னங் வேதி³யனஏகந்தஸுகு²ப்பத்தியா ஹேதுபா⁴வஸாத⁴னங். யதி³ ஏவங் யதா²வுத்தா ஜா²னசேதனா தாவ ஹோது ஏகந்தஸுகு²ப்பத்திஹேதுபா⁴வதோ. காமாவசரா கிந்தீதி காமாவசரா பன குஸலசேதனா தங்ஸபா⁴வாபா⁴வதோ கிந்தி கேன பகாரேன அப்³யாப³ஜ்ஜ²மனோஸங்கா²ரோ நாம ஜாதோதி சோதே³தி, இதரோ பன ந ஸப்³பா³ காமாவசரகுஸலசேதனா ததா² க³ஹிதா, அத² கோ² ஏகச்சா ஜா²னசேதனானுகூலாதி த³ஸ்ஸெந்தோ ‘‘கஸிணஸஜ்ஜனகாலே கஸிணாஸேவனகாலே லப்³ப⁴ந்தீ’’தி ஆஹ. தத்த² கஸிணாஸேவனசேதனா க³ஹேதப்³பா³, ஸா உபசாரஜ்ஜா²னஸ்ஸ ஸாதி⁴கா. தேன காமாவசரசேதனா பட²மஜ்ஜா²னசேதனாய க⁴டிதாதி கஸிணஸஜ்ஜனசேதனாபி கதா³சி தாதி³ஸா ஹோதீதி க³ஹிதா. பரிகம்மாதி³வஸேன ஹி பவத்தா பா⁴வனாமயா காமாவசரகுஸலசேதனா பட²மஜ்ஜா²னஸ்ஸ ஆஸன்னதாய வுத்தா. சதுத்த²ஜ்ஜா²னசேதனா ததியஜ்ஜா²னசேதனாய க⁴டிதாதி இத³ங் ஏகத்தகாயஏகத்தஸஞ்ஞீஸத்தாவாஸவதாய தங்ஸரிக்க²கா உபெக்கா²பி ஈதி³ஸேஸு டா²னேஸு ஸுக²ஸரிக்க²தா, ஏவங் ஸந்தஸபா⁴வதா ஞாணஸஹிததா ச. கேசி பன சதுத்த²ஜ்ஜா²னசேதனானுகு³ணாதி நித³ஸ்ஸெந்தா கஸிணஸஜ்ஜனகாலே கஸிணஜ்ஜா²னகாலே கஸிணாஸேவனகாலே லப்³ப⁴தீதி ததியஜ்ஜா²னசேதனாய ஆஸன்னக⁴டிததா வுத்தாதி வத³ந்தி, தங் தேஸங் மதிமத்தங், வுத்தனயேனேவ தாஸங் க⁴டிததா வேதி³தப்³பா³. உப⁴யமிஸ்ஸகவஸேனாதி உப⁴யேஸங் குஸலாகுஸலஸங்கா²ரானங் ஸுக²து³க்கா²னஞ்ச மிஸ்ஸகபா⁴வவஸேன. வேமானிகபேதானந்தி இத³ங் பா³ஹுல்லதோ வுத்தங், இதரேஸம்பி வினிபாதிகானங் காலேன து³க்க²ங் ஹோதியேவ.
தஸ்ஸ பஹானாயாதி தஸ்ஸ யதா²வுத்தஸ்ஸ கம்மஸ்ஸ அனுப்பத்தித⁴ம்மதாபாத³னாய. யா சேதனாதி யா அபசயகா³மினிசேதனா. கம்மங் பத்வாதி ஸுக²கம்மந்தி வுச்சமானே மக்³க³சேதனாய அஞ்ஞோ பண்ட³ரதரோ த⁴ம்மோ நாம நத்தி² அகண்ஹா அஸுக்காதி ஆக³தாதி எத்த² ஸுக்கபா⁴வபடிக்கே²பகாரணங் ஹெட்டா² வுத்தனயமேவ. தேனாஹ ‘‘இத³ங் பன கம்மசதுக்கங் பத்வா’’திஆதி³.
82. அனிய்யானிகபக்கே²தி அசேளகபப்³ப³ஜ்ஜாய குக்குரவதே ச. யோகே³தி ஞாயத⁴ம்மபடிபத்தியந்தி அத்தோ². யோனேனாதி யோ தித்தி²யபரிவாஸோ தேன ப⁴க³வதா பஞ்ஞத்தோ. யங் தித்தி²யபரிவாஸங் ஸமாதி³யித்வாதி அயமெத்த² யோஜனா. க⁴ங்ஸித்வா ஸுவண்ணங் விய நிக⁴ங்ஸொப்பலே. கொட்டெத்வா ஹத்தே²ன விய குலாலபா⁴ஜனங்.
வூபகட்டோ²தி விவித்தோ ஏகீபூ⁴தோ. பேஸிதத்தோதி நிப்³பா³னங் பதி பேஸிதத்தோ. காமங் தத³னுத்தரங் ப்³ரஹ்மசரியபரியோஸானங்…பே॰… விஹாஸீதி இமினாவ அரஹத்தனிகூடேன தே³ஸனா நிட்டா²பிதா ஹோதி, ஆயஸ்மதோ பன ஸேனியஸ்ஸ படிபத்திகித்தனபரமேதங் உஜுகங் ஆபன்னஅரஹத்தபா⁴வதீ³பனங், யதி³த³ங் ‘‘அஞ்ஞதரோ கோ² பனா’’திஆதி³வசனந்தி ஆஹ ‘‘அரஹத்தனிகூடேனேவா’’தி. அரஹத்தாதி⁴க³மோயேவ தஸ்ஸ தேஸங் அப்³ப⁴ந்தரதா. ஸேஸங் ஸப்³ப³ங் ஸுவிஞ்ஞெய்யமேவ.
குக்குரவதிகஸுத்தவண்ணனாய லீனத்த²ப்பகாஸனா ஸமத்தா.
8. அப⁴யராஜகுமாரஸுத்தவண்ணனா
83. ஜாதியா ‘‘வாத³ங் ஆரோபேஹீதி தோ³ஸங் ஆரோபேஹீ’’தி. நிப்³ப³த்தவஸேன நிரயங் அரஹதி, நிரயஸங்வத்தனியேன வா கம்மேன நிரயே நியுத்தோ நேரயிகோ. ஆபாயிகோதி எத்தா²பி ஏஸேவ நயோ. அவீசிம்ஹி உப்பஜ்ஜித்வா தத்த² ஆயுகப்பஸஞ்ஞிதங் அந்தரகப்பங் திட்ட²தீதி கப்பட்டோ². நிரயூபபத்திபரிஹரணவஸேன திகிச்சி²துங் ஸக்குணெய்யோதி தேகிச்சோ², ந தேகிச்சோ² அதேகிச்சோ². த்³வே அந்தே மோசெத்வாதி ப²ருஸங் வா அப்பியங் வா கப்பெய்யாதி த்³வே கொட்டா²ஸே முஞ்சித்வா ‘‘உக்³கி³லிதுங் ப³ஹி நீஹரிதுங் ந ஸக்கி²தீ’’தி. ஏவமேவாயங் புச்சா² ந க³ஹேதப்³பா³, அயமெத்த² தோ³ஸோதி தங் அபுச்ச²ங் கரொந்தோ அபனயந்தோ ஓகி³லதி நாம, ததா² பன அஸக்கொந்தோ பதிட்டா²பெந்தோ ந ஓகி³லதி நாம, ப⁴க³வா பன தமத்த²ங் ஓகாஸம்பி அகரொந்தோ உப⁴யதா²பி அஸக்கீ²தி வேதி³தப்³போ³. கத²ங்? ப⁴க³வா ஹி ‘‘ந க்²வெத்த² ராஜகுமார ஏகங்ஸேனா’’தி வத³ந்தோ நிக³ண்ட²ஸ்ஸ அதி⁴ப்பாயங் விபரிவத்தேதி, உபோ⁴ அந்தே மோசெத்வா பஞ்ஹங் விஸ்ஸஜ்ஜேஸி, ஏவங் தாவ உக்³கி³லிதுங் அஸக்கி². ‘‘ந தத்ர ராஜகுமார ஏகங்ஸேனா’’தி வத³ந்தோ ஏவ ச ‘‘நாயங் புச்சா² ஏவங் அவிபா⁴கே³ன புச்சி²தப்³பா³, விப⁴ஜித்வா பன புச்சி²தப்³பா³’’தி புச்சா²ய தோ³ஸங் தீ³பெந்தோ தங் ஹாரெந்தோ ஓகி³லிதும்பி ஸக்க²தீதி.
உட்டா²துங் ந ஸக்கி²ஸ்ஸதி சித்தஸ்ஸ அஞ்ஞதா² பவத்தியா. அப⁴யோ த்³வே மக்³கே³ கதபரிசயோ சே²கோ நிபுணோ வாத³ஸீலோ ச ஹுத்வா விசரதி. தேனாஹ – ‘‘ஸோ வாத³ஜ்ஜா²ஸயதாய தஸ்ஸ வசனங் ஸம்படிச்ச²ந்தோ ‘ஏவங், ப⁴ந்தே’தி ஆஹா’’தி.
85. ஏவரூபந்தி யா பரேஸங் அப்பியா அமனாபா து³ருத்தவாசா, ஏவரூபா வாசா, ந பன ப²ருஸவாசா. ப²ருஸவாசாய ஹி ஸேதுகா⁴தோ ததா²க³தானங். சேதனாப²ருஸதாய ஹி ப²ருஸவாசா இச்சி²தா, ந பரேஸங் அப்பியதாமத்தேன. நட்டா² நிக³ண்டா² ஓகி³லிகாதி³ஸம்மதஸ்ஸ பஞ்ஹஸ்ஸ ஏகவசனேன வித்³த⁴ங்ஸிதத்தா.
86. தா³ரகஸ்ஸ அங்கே நிஸீத³னஸ்ஸ காரணங் த³ஸ்ஸேதுங் ‘‘லேஸவாதி³னோ’’திஆதி³ வுத்தங். தத்த² லேஸவாதி³னோதி ஓஸடஸங்கா³மோதி அனேகவாரங் பரவாத³மத்³த³னவஸேன ஓதிண்ணவாத³ஸங்கா³மோ. விஜ்ஜி²த்வாதி நகே²ன விஜ்ஜி²த்வா. இமமேவாதி ய்வாயங் தா³ரகோ அத்தனோ வாத³ப⁴ங்க³பரிஹரணத்த²ங் இமினா அங்கே நிஸீதா³பிதோ, இமமேவ அஸ்ஸ தா³ரகங் உபமங் நிஸ்ஸயங் கத்வா வாத³ங் பி⁴ந்தி³ஸ்ஸாமி. ‘‘அஸ்ஸ வாத³ங் அப்படிததாய உபமாய ப⁴ஞ்ஜிஸ்ஸாமீ’’தி சிந்தெத்வா.
அபனெய்யங் அஸ்ஸ அஹந்தி அஸ்ஸ தா³ரகஸ்ஸ முக²தோ அஹங் தங் அபனெய்யங். அபூ⁴தத்தோ²வ அபூ⁴தங் உத்தரபத³லோபேனாதி ஆஹ ‘‘அபூ⁴தந்தி அபூ⁴தத்த²’’ந்தி. அதச்ச²ந்தி தஸ்ஸேவ வேவசனந்தி ஆஹ ‘‘அதச்ச²ந்தி ந தச்ச²’’ந்தி. அபூ⁴தந்தி வா அஸந்தங் அவிஜ்ஜமானங். அதச்ச²ந்தி அததா²காரங். அனத்த²ஸங்ஹிதந்தி தி³ட்ட²த⁴ம்மிகேன, ஸம்பராயிகேன வா அனத்தே²ன ஸங்ஹிதங், அனத்தே² வா ஸங்ஹிதங், ந அத்தோ²தி வா அனத்தோ², அத்த²ஸ்ஸ படிபக்கோ² ஸபா⁴வோ, தேன ஸங்ஹிதந்தி அனத்த²ஸங்ஹிதங், பிஸுணவாசங் ஸம்ப²ப்பலாபஞ்சாதி அத்தோ². ஏவமெத்த² சதுப்³பி³த⁴ஸ்ஸபி வசீது³ச்சரிதஸ்ஸ க³ஹிததா த³ட்ட²ப்³பா³.
து³ப்பயுத்தோதி து³ப்படிபன்னோ. ந தங் ததா²க³தோ பா⁴ஸதி அபூ⁴ததாதி³தோ³ஸது³ட்ட²த்தா. தம்பி ததா²க³தோ ந பா⁴ஸதி பூ⁴தத்தே²பி அனத்த²ஸங்ஹிததாதி³தோ³ஸது³ட்ட²த்தா.
டா²னங் காரணங் ஏதிஸ்ஸா அத்தீ²தி டா²னியா க-காரஸ்ஸ ய-காரங் கத்வா, ந டா²னியாதி அட்டா²னியா, நிக்காரணா அயுத்தியுத்தா, ஸா ஏவ கதா²தி அட்டா²னியகதா². அத்தபச்சக்க²கத²ங் கதே²மாதி அத்தனா ஏவ பச்சக்க²ங் கத்வா பவத்தியமானங் ச²லகத²ங் கதே²ம.
கா³மிகமஹல்லகோ ‘‘இமே மங் வஞ்சேதுகாமா, அஹமேவ தா³னி இமே வஞ்செஸ்ஸாமீ’’தி சிந்தெத்வா ‘‘ஏவங் ப⁴விஸ்ஸதீ’’திஆதி³மாஹ. ‘‘ந மயங் தா³ஸா’’திபி வத்துங் நாஸக்கி²ங்ஸு புப்³பே³ ததா²கதிகாய கதத்தா.
ததியங் ததியமேவாதி த்³வீஸுபி பக்கே²ஸு ததியங் ததியமேவ வாசங். பா⁴ஸிதப்³ப³காலங் அனதிக்கமித்வாதி யஸ்ஸ யதா³ யதா² பா⁴ஸிதப்³ப³ங், தஸ்ஸ ததா³ ததே²வ ச பா⁴ஸனதோ பா⁴ஸிதப்³ப³ங் காரணங் பா⁴ஸிதப்³ப³காலஞ்ச அனதிக்கமித்வாவ பா⁴ஸதி.
87. டா²னுப்பத்திகஞாணேனாதி த⁴ம்மஸபா⁴வோ. த⁴ம்மே ஸபா⁴வத⁴ம்மே அனவஸேஸே வா யாதா²வதோ உபதா⁴ரேதீதி த⁴ம்மதா⁴து, ஸப்³ப³ஞ்ஞுதா. தேனாஹ ‘‘ஸப்³ப³ஞ்ஞுதஞ்ஞாணஸ்ஸேதங் அதி⁴வசன’’ந்தி. ஸுப்படிவித்³த⁴ந்தி ஸப்³ப³ங் ஞெய்யத⁴ம்மங் ஸுட்டு² படிவிஜ்ஜ²னவஸேன, ஸுட்டு² படிவித்³த⁴ந்தி அத்தோ². தேனாஹ ‘‘ஹத்த²க³தங் ப⁴க³வதோ’’தி. நெய்யபுக்³க³லவஸேன பரினிட்டி²தாதி கதா²பரிவிபா⁴கே³ன அயமேவ
அப⁴யராஜகுமாரஸுத்தவண்ணனாய லீனத்த²ப்பகாஸனா ஸமத்தா.
9. ப³ஹுவேத³னியஸுத்தவண்ணனா
88. பஞ்சகங்கோ³தி த²பதி. பண்டி³தஉதா³யித்தே²ரோ, ந காளுதா³யீ தே²ரோ.
89. பரியாயதி அத்தனோ ப²லங் வத்தேதீதி பரியாயோ, காரணங். வேத³னாஸன்னிஸ்ஸிதோ ச காயிகசேதஸிகபா⁴வோ காரணங். தேனாஹ – ‘‘காயிகசேதஸிகவஸேன த்³வே வேதி³தப்³பா³’’தி. தத்த² பஸாத³காயஸன்னிஸ்ஸிதா காயிகா, சேதோஸன்னிஸ்ஸிதா சேதஸிகா. ஸுகா²தி³வஸேன திஸ்ஸோதி எத்த² ஸுக²னது³க்க²னுபெக்க²னானி ஸுகா²தி³வேத³னாய காரணங். தானி ஹி பவத்தினிமித்தானி கத்வா தத்த² ஸுகா²தி³ஸத்³த³ப்பவத்தி, இமினா நயேன ஸேஸேஸுபி யதா²ரஹங் காரணங் நித்³தா⁴ரெத்வா வத்தப்³ப³ங். உபவிசாரவஸேனாதி ஆரம்மணங் உபேச்ச ஸவிஸேஸபவத்திவஸேன. யஸ்மிஞ்ஹி ஆரம்மணே ஸோமனஸ்ஸவேத³னா பவத்ததி, ஆரம்மணதாய தங் உபக³ந்த்வா இதரவேத³னாஹி விஸிட்ட²தாய ஸவிஸேஸங் தத்த² பவத்தி. தேனாஹ ‘‘ஸோமனஸ்ஸட்டா²னியங் ரூபங் உபவிசரதீ’’தி. ஏஸ நயோ ஸேஸவேத³னாஸு கே³ஹஸ்ஸிதானீதி கே³ஹனிஸ்ஸிதானி.
90. பரியாயேனாதி ‘‘இத³மெத்த² து³க்க²ஸ்மிந்தி வதா³மீ’’தி வுத்தட்டா²னங் ஸந்தா⁴ய வத³தி. தங் த³ஸ்ஸெந்தோதி காமஞ்செத்த² ஸுத்தே – ‘‘த்³வேபானந்த³, வேத³னா வுத்தா’’தி த்³வே ஆதி³ங் கத்வா வேத³னா த³ஸ்ஸிதா, ஏகாபி பன த³ஸ்ஸிதா ஏவாதி த³ஸ்ஸெந்தோ. உபத்த²ம்பே⁴துந்தி ஏகாபி வேத³னா வுத்தா மயா பரியாயேன, ஏவங் ஸதி த்³வேபி வத்தப்³பா³தி ஏவங் தஸ்ஸ வாத³ங் உபத்த²ம்பே⁴துங். கத²ங் பன ஏகா வேத³னா வுத்தாதி? யங் கிஞ்சி வேத³யிதங் ஸுக²ங் வா து³க்க²ங் வா அது³க்க²மஸுக²ங் வா, இத³மெத்த² து³க்க²ஸ்மிந்தி வதா³மீதி. யங் பனெத்த² வத்தப்³ப³ங், தங் இதிவுத்தகவண்ணனாயங் (இதிவு॰ அட்ட²॰ 52 ஆத³யோ) பரமத்த²தீ³பனியங் வுத்தனயேன வேதி³தப்³ப³ங்.
கத²ங் ‘‘எத்த² சா’’திஆதி³. ஸந்தட்டே²னாதி படிபக்க²த⁴ம்மானங் வூபஸந்தபா⁴வேன. பணீதட்டே²னாதி பா⁴வனாவிஸேஸவிஸிட்டே²ன அதப்பகபா⁴வேனேவ ஸெட்ட²பா⁴வேன ச, பச்சயவிஸேஸேன பதா⁴னபா⁴வங் நீதந்திபி பணீதங். வேத³யிதஸுக²ங் நாம வேத³னாபூ⁴தங் ஸுக²ந்தி கத்வா. அவேத³யிதஸுக²ங் நாம யாவதா நித்³து³க்க²தா, தாவதா ஸுக²ந்தி வுச்சதீதி.அத² வா நிரோதோ⁴ ஸுட்டு² கா²த³தி க²னதி காயிகசேதஸிகாபா³த⁴ந்தி ‘‘நித்³து³க்க²பா⁴வஸங்கா²தேன ஸுக²ட்டே²னா’’தி.
91. யஸ்மிங் யஸ்மிங் ப⁴வே, சித்துப்பாதே³, அவத்தா²ய வா நித்³து³க்க²பா⁴வோ, து³க்க²ஸ்ஸ படிபக்க²தா அனுபலப்³ப⁴னேன து³க்க²விவித்தங், தங் ஸுக²ஸ்மிங்யேவ பஞ்ஞபேதி. ஸேஸங் ஸுவிஞ்ஞெய்யமேவ.
ப³ஹுவேத³னீயஸுத்தவண்ணனாய லீனத்த²ப்பகாஸனா ஸமத்தா.
10. அபண்ணகஸுத்தவண்ணனா
93. நானாவிதா⁴தி ஸமணப்³ராஹ்மணாதி பப்³ப³ஜ்ஜாமத்தேன ஸமணா, ஜாதிமத்தேன ப்³ராஹ்மணா ச. த³ஸ்ஸனந்தி தி³ட்டி². க³ஹிதந்தி அபி⁴னிவிஸ்ஸ க³ஹிதங். இதி தே அத்தனோ த³ஸ்ஸனங் க³ஹேதுகாமா புச்ச²ந்தி. வினா த³ஸ்ஸனேன லோகோ ந நிய்யாதீதி விமொக்க²பா⁴வனாய ஏகேன த³ஸ்ஸனேன வினா லோகோ ஸங்ஸாரது³க்க²தோ ந நிக³ச்ச²தி. ஏகதி³ட்டி²யம்பி பதிட்டா²துங் நாஸக்கி²ங்ஸு ஸத்³தா⁴காராபா⁴வதோ. ததா² ஹி தே இமாய தே³ஸனாய ஸரணேஸு பதிட்ட²ஹிங்ஸு. யஸ்மா அவிபரீதே ஸத்³தெ⁴ய்யவத்து²ஸ்மிங் உப்பன்னஸத்³தா⁴ ‘‘ஆகாரவதீ’’தி அதி⁴ப்பேதா, தஸ்மா யோ லோகே அவிபரீதத⁴ம்மதே³ஸனா, அயமேவேஸாதி பவத்தா மக்³க³ஸாத⁴னக³தாய ஸத்³தா⁴ய காரணபா⁴வதோ தன்னிஸ்ஸயா ஸத்³தா⁴, ஸா ஆகாரவதீதி வுத்தா. அவத்து²ஸ்மிஞ்ஹி ஸத்³தா⁴ அயுத்தகாரணதாய ந ஆகாரவதீ. ஆகாரவதீதி எத்த² வதீ-ஸத்³தோ³ ந கேவலங் அத்தி²தாமத்ததீ³பகோ, அத² கோ² அதிஸயத்த²தீ³பகோ பாஸங்ஸத்த²தீ³பகோ வா த³ட்ட²ப்³போ³. தேன ஆகாரவதீதி ஸத்³தெ⁴ய்யவத்து²வஸேன அதிஸயகாரணவதீதி வா பாஸங்ஸகாரணவதீதி வா அபண்ணகோதி எத்த² யதா² கஞ்சி அத்த²ங் ஸாதே⁴துங் ஆரத்³த⁴ஸ்ஸ பயோகோ³ விரத்³தோ⁴, தத்த² அகாரகோ விய ஹோதி புனபி ஆரபி⁴தப்³ப³தாய. அவிரத்³தோ⁴ பன அத்த²ஸ்ஸ ஸாத⁴னதோ அபண்ணகோ, ஏவங் அயம்பி த⁴ம்மோ அபி⁴ப⁴வித்வா பவத்தனதோ ஏகங்ஸதோ ‘‘அபண்ணகோ’’தி வுத்தோ. தேனாஹ ‘‘அவிரத்³தோ⁴ அத்³வெஜ்ஜ²கா³மீ ஏகங்ஸகா³ஹிகோ’’தி.
94. தப்³பி³பச்சனீகபூ⁴தாதி தஸ்ஸா மிச்சா²தி³ட்டி²யா பச்சனீகபூ⁴தா.
95. நேஸந்தி குஸலானங் த⁴ம்மானங். அகுஸலதோ நிக்க²ந்தபா⁴வேதி அஸங்கிலிட்ட²பா⁴வே. ஆனிஸங்ஸோதி ஸுத்³த⁴விபாகதா. விஸுத்³தி⁴பக்கோ²தி விஸுத்³தி⁴பா⁴வோ பரியோதா³ததா. அபூ⁴தத⁴ம்மஸ்ஸ தி³ட்டி²பா⁴வஸ்ஸ ஸஞ்ஞாபனா ஆசிக்க²னா அபூ⁴தத⁴ம்மஸஞ்ஞாபனா. ஸாவஜ்ஜேஸு பரமவஜ்ஜே மிச்சா²த³ஸ்ஸனே பக்³க³ஹணந்தி குதோ ஸுஸீல்யஸ்ஸ பக்³க³ஹோதி ஆஹ – ‘‘மிச்சா²த³ஸ்ஸனங் க³ண்ஹந்தஸ்ஸேவ ஸுஸீல்யங் பஹீனங் ஹோதீ’’தி. மிச்சா²தி³ட்டி²ஆத³யோதி எத்த² மிச்சா²ஸங்கப்போ பரலோகாபா⁴வசிந்தா, மிச்சா²வாசா பரலோகாபா⁴வவாத³பூ⁴தோ முஸாவாதோ³, அரியானங் பச்சனீகதாத³யோ. அபராபரங் உப்பஜ்ஜனவஸேனாதி புனப்புனங் சித்தே உப்பஜ்ஜனவஸேன. பாபகா அகுஸலா த⁴ம்மாதி பச்சவெக்க²ணஸஞ்ஞாபனாதி³காலே உப்பஜ்ஜனகா ததா²பவத்தா அகுஸலக²ந்தா⁴.
கலிக்³க³ஹோதி ‘‘பராஜயக்³கா³ஹோ’’தி. து³ஸ்ஸமத்தோதி எத்த² து³-ஸத்³தோ³ ‘‘ஸமாதி³ன்னோ’’தி எத்தா²பி ஆனெத்வா யோஜேதப்³போ³தி ஆஹ ‘‘து³ப்பராமட்டோ²’’தி. யதா² து³ப்பராமட்டோ² ஹோதி, ஏவங் ஸமாதி³ன்னோ து³ஸ்ஸமத்தோ து³ஸமாதி³ன்னோ வுத்தோ. ஸகவாத³மேவ ப²ரித்வாதி அத்தனோ நத்தி²கவாத³மேவ ‘‘இத³மேவ ஸச்சங் மோக⁴மஞ்ஞ’’ந்தி (ம॰ நி॰ 2.187; 3.27-28) அவதா⁴ரெந்தோ அஞ்ஞஸ்ஸ ஓகாஸஅதா³னவஸேன ப²ரித்வா. தேனாஹ ‘‘அதி⁴முச்சித்வா’’தி. ‘‘ஸம்பு³த்³தோ⁴’’திஆதி³ அதி⁴முச்சனாகாரத³ஸ்ஸனங். ரிஞ்சதீதி விவேசேதி அபனேதி. தேனாஹ ‘‘வஜ்ஜேதீ’’தி.
96. கடக்³க³ஹோதி கதங் ஸப்³ப³ஸோ ஸித்³தி⁴மேவ கத்வா க³ஹணங். ஸோ பன ஜயலாபோ⁴ ஹோதீதி வுத்தங் ‘‘ஜயக்³கா³ஹோ’’தி. ஸுக்³க³ஹிதோதி ஸுட்டு²கரணவஸேன க³ஹிதோ. ஸுபராமட்டோ²தி ஸுட்டு² பராபரங் ஆஸேவனவஸேன ஆமட்டோ² ஸொத்தி²பா⁴வாவஹத்தஞ்ச ஸக்³கு³பபத்திஸங்வத்தனதோ பாபஸபா⁴வபஹானதோ ச.
97. ஸஹத்தா² கரொந்தஸ்ஸாதி (தீ³॰ நி॰ டீ॰ 1.166; ஸங்॰ நி॰ டீ॰ 2.3.211) ஸஹத்தே²னேவ கரொந்தஸ்ஸ. நிஸ்ஸக்³கி³யதா²வராத³யோபி இத⁴ ஸஹத்த²கரணேனேவ ஸங்க³ஹிதா. பசனங் த³ஹனங் விபா³த⁴னந்தி ஆஹ ‘‘த³ண்டே³ன பீளெந்தஸ்ஸா’’தி. ஸோகங் ஸயங் கரொந்தஸ்ஸாதி பரஸ்ஸ ஸோககாரணங் ஸயங் கரொந்தஸ்ஸ, ஸோகங் வா உப்பாதெ³ந்தஸ்ஸ. பரேஹி அத்தனோ வசனகரேஹி. ஸயம்பி ப²ந்த³தோதி பரஸ்ஸ விபா³த⁴னபயோகே³ன ஸயம்பி ப²ந்த³தோ. அதிபாதயதோதி பத³ங் ஸுத்³த⁴கத்துஅத்தே² ஹேதுகத்துஅத்தே² ச வத்ததீதி ஆஹ ‘‘ஹனந்தஸ்ஸபி ஹனாபெந்தஸ்ஸாபீ’’தி.
க⁴ரஸ்ஸ பி⁴த்தி அந்தோ ப³ஹி ச ஸந்தி⁴தா ஹுத்வா டி²தா க⁴ரஸந்தி⁴. கிஞ்சிபி அஸேஸெத்வா நிரவஸேஸமேவ லோபோதி நில்லோபோ. ஏகாகா³ரே நியுத்தோ விலோபோ ஏகாகா³ரிகோ. பரிதோ ஸப்³ப³ஸோ பந்தே² ஹனநங் பரிபந்தோ². பாபங் ந கரீயதி புப்³பே³ அஸதோ உப்பாதே³துங் அஸக்குணெய்யத்தா, தஸ்மா நத்தி² பாபங். யதி³ ஏவங் கத²ங் ஸத்தா பாபங் படிபஜ்ஜந்தீதி ஆஹ – ‘‘ஸத்தா பன கரோமாதி ஏவங்ஸஞ்ஞினோ ஹொந்தீ’’தி. ஏவங் கிரஸ்ஸ ஹோதி ‘‘இமேஸஞ்ஹி ஸத்தானங் ஹிங்ஸாதி³கிரியா ந அத்தானங் பு²ஸதி தஸ்ஸ நிச்சதாய நிப்³பி³காரத்தா, ஸரீரங் பன அசேதனங் கட்ட²கலிங்க³ரூபமங், தஸ்மிங் விகோபிதேபி ந கிஞ்சி பாப’’ந்தி. கு²ரனேமினாதி நிஸிதகு²ரமயனேமினா. க³ங்கா³ய த³க்கி²ணதி³ஸா அப்பதிரூபதே³ஸோ, உத்தரதி³ஸா பதிரூபதே³ஸோதி அதி⁴ப்பாயேன ‘‘த³க்கி²ணஞ்சே’’திஆதி³ வுத்தந்தி ‘‘த³க்கி²ணதீரே மனுஸ்ஸா கக்க²ளா’’திஆதி³மாஹ.
மஹாயாக³ந்தி ஸீலஸங்யமேனாதி காயிகவாசஸிகஸங்வரேன. ஸச்சவசனேனாதி ஸச்சவாசாய. தஸ்ஸ விஸுங் வசனங் லோகே க³ருதரபுஞ்ஞஸம்மதபா⁴வதோ. யதா² ஹி பாபத⁴ம்மேஸு முஸாவாதோ³ க³ரு, ஏவங் புஞ்ஞத⁴ம்மேஸு ஸச்சவாசா. தேனாஹ ப⁴க³வா – ‘‘ஏகங் த⁴ம்மமதீதஸ்ஸா’’திஆதி³ (த⁴॰ ப॰ 176). வுத்தனயேனேவாதி கண்ஹபக்கே² வுத்தனயேன. தத்த² ஹி – ‘‘நத்தி² பாபங், நத்தி² பாபஸ்ஸ ஆக³மோ’’தி ஆக³தங், இத⁴ ‘‘அத்தி² புஞ்ஞங், அத்தி² புஞ்ஞஸ்ஸ ஆக³மோ’’தி ஆக³தங், அயமேவ விஸேஸோ. ஸேஸங் வுத்தஸதி³ஸமேவாதி
100. உப⁴யேனாதி ஹேதுபச்சயபடிஸேத⁴வசனேன. ஸங்கிலேஸபச்சயந்தி ஸங்ஸாரே பரிப்³ப⁴மனேன கிலின்னஸ்ஸ மலினபா⁴வஸ்ஸ காரணங். வுத்தவிபரியாயேன விஸுத்³தி⁴பச்சயந்தி ஸத்³த³த்தோ² வேதி³தப்³போ³. ப³லந்திஆதீ³ஸு ஸத்தானங் ஸங்கிலேஸாவஹங் வோதா³னாவஹஞ்ச உஸ்ஸாஹஸங்கா²தங் ப³லங் வா, ஸூரவீரபா⁴வஸங்கா²தங் வீரியங் வா, புரிஸேன கத்தப்³போ³ புரிஸதா²மோ வா, ஸோ ஏவ பரங் பரங் டா²னங் அக்கமனப்பத்தியா புரிஸபரக்கமோ வா நத்தி² ந உபலப்³ப⁴தி.
ஸத்வயோக³தோ, ரூபாதீ³ஸு ஸத்தவிஸத்ததாய ச ஸத்தா. பாணனதோ அஸ்ஸாஸபஸ்ஸாஸவஸேன பவத்தியா பாணா. தே பன ஸோ ஏகிந்த்³ரியாதி³வஸேன விப⁴ஜித்வா வத³தீதி ஆஹ ‘‘ஏகிந்த்³ரியோ’’திஆதி³. அண்ட³கோஸாதீ³ஸு ப⁴வனதோ பூ⁴தாதி வுச்சந்தீதி ஆஹ ‘‘அண்ட³கோஸ…பே॰… வத³ந்தீ’’தி. ஜீவனதோ பாணங் தா⁴ரெந்தோ விய வட்³ட⁴னதோ ஜீவாதி ஏவங் ஸத்தபாணபூ⁴தஜீவேஸு ஸத்³த³த்தோ² வேதி³தப்³போ³. நத்தி² ஏதேஸங் ஸங்கிலேஸவிஸுத்³தீ⁴ஸு வஸோதி அவஸா. நத்தி² நேஸங் ப³லங் வீரியஞ்சாதி அப³லா அவீரியா. நியததாதி அச்சே²ஜ்ஜஸுத்தாவுதாபே⁴ஜ்ஜமணி விய நியதபவத்தனதாய க³திஜாதிப³ந்த⁴பஜஹவஸேன நியாமோ. தத்த² தத்த² க³மனந்தி ச²ன்னங் அபி⁴ஜாதீனங் தாஸு தாஸு க³தீஸு உபக³மனங் ஸமவாயேன ஸமாக³மோ. ஸபா⁴வோயேவாதி யதா² கண்டகஸ்ஸ திக்க²தா, கபி³ட்ட²ப²லானங் பரிமண்ட³லதா, மிக³பக்கீ²னங் விசித்தாகாரதா, ஏவங் ஸப்³ப³ஸ்ஸபி லோகஸ்ஸ ஹேதுபச்சயேன வினா ததா² ததா² பரிணாமோ, அயங் ஸபா⁴வோயேவ அகித்திமோயேவ. தேனாஹ ‘‘யேன ஹீ’’திஆதி³.
ஸகுணே ஹனதீதி ஸாகுணிகோ, ததா² ஸூகரிகோ. லுத்³தோ³தி அஞ்ஞோபி யோ கோசி மாக³விகோ நேஸாதோ³. பாபகம்மபஸுததாய கண்ஹாபி⁴ஜாதி நாம. பி⁴க்கூ²தி ஸாகியா பி⁴க்கூ², மச்ச²மங்ஸகா²த³னதோ நீலாபி⁴ஜாதீதி வத³ந்தி. ஞாயலத்³தே⁴பி பச்சயே பு⁴ஞ்ஜமானா ஆஜீவகஸமயஸ்ஸ விலோமகா³ஹிதாய ‘‘பச்சயேஸு கண்டகே பக்கி²பித்வா கா²த³ந்தீ’’தி வத³ந்தி. ஏகே பப்³ப³ஜிதா கண்டகவுத்திகாதி வுத்தா. ட²த்வா பு⁴ஞ்ஜனதா³னபடிக்கே²பாதி³வதஸமாயோகே³ன பண்ட³ரதரா. அசேலகஸாவகாதி ஆஜீவகஸாவகே வத³தி. தே கிர ஆஜீவகலத்³தி⁴யா விஸுத்³த⁴சித்ததாய நிக³ண்டே²ஹிபி பண்ட³ரதரா. நந்தா³த³யோ ஹி ததா²ரூபாய படிபத்தியா பத்தப்³பா³, தஸ்மா நந்தா³த³யோ நிக³ண்டே²ஹி ஆஜீவகஸாவகேஹி ச பண்ட³ரதராதி வுத்தா ‘‘ஸுக்காபி⁴ஜாதீ’’தி.
அயமேதேஸங் லத்³தீ⁴தி ஸாகுணிகாதி³பா⁴வூபக³மனேன கண்ஹாபி⁴ஜாதிஆதீ³ஸு து³க்க²ங் ஸுக²ஞ்ச படிஸங்வேதெ³ந்தா அனுக்கமேன மஹாகப்பானங் சுல்லாஸீதிஸஹஸ்ஸானி கே²பெத்வா ஆஜீவகபா⁴வூபக³மனேன பரமஸுக்காபி⁴ஜாதியங் ட²த்வா ஸங்ஸாரதோ ஸுஜ்ஜ²ந்தீதி அயங் தேஸங் நியதி ஆஜீவகானங் லத்³தி⁴.
‘‘நத்தி² தி³ன்ன’’ந்தி வத³ந்தோ நத்தி²கோ தா³னஸ்ஸ ப²லங் படிக்கி²பதீதி ஆஹ – ‘‘நத்தி²கதி³ட்டி² விபாகங் படிபா³ஹதீ’’தி. ததா² சேவ ஹெட்டா² ஸங்வண்ணிதங் ‘‘நத்தி²கதி³ட்டி² ஹி நத்தி²தமாஹா’’தி. அஹேதுகதி³ட்டி² உப⁴யந்தி கம்மங் விபாகஞ்ச உப⁴யங். ஸோ ஹி ‘‘அஹேதூ அபச்சயா ஸத்தா ஸங்கிலிஸ்ஸந்தி விஸுஜ்ஜ²ந்தீ’’தி வத³ந்தோ கம்மஸ்ஸ விய விபாகஸ்ஸபி ஸங்கிலேஸவிஸுத்³தீ⁴னங் பச்சயத்தாபா⁴வவசனதோ தது³ப⁴யங் படிபா³ஹதி நாம. விபாகோ படிபா³ஹிதோ ஹோதி அஸதி கம்மே விபாகாபா⁴வதோ. கம்மங் படிபா³ஹிதங் ஹோதி அஸதி விபாகே கம்மஸ்ஸ நிரத்த²கபா⁴வாபத்திதோ. அத்த²தோதி ஸரூபேன. உப⁴யபடிபா³ஹகாதி விஸுங் விஸுங் தங்தங்தி³ட்டி²தா வுத்தாபி ஸப்³பே³ தே நத்தி²காத³யோ நத்தி²கதி³ட்டி²ஆதி³வஸேன பச்சேகங் திவித⁴தி³ட்டி²கா ஏவ உப⁴யபடிபா³ஹகத்தா. ‘‘உப⁴யபடிபா³ஹகா’’தி ஹி ஹேதுவசனங். அஹேதுகவாதா³ சாதிஆதி³ படிஞ்ஞாவசனங். யோ ஹி விபாகபடிபா³ஹனேன நத்தி²கதி³ட்டி²கோ, ஸோ அத்த²தோ கம்மபடிபா³ஹனேன அகிரியதி³ட்டி²கோ, உப⁴யபடிபா³ஹனேன அஹேதுகதி³ட்டி²கோ ச ஹோதி. ஸேஸத்³வயேபி ஏஸேவ நயோ.
ஸஜ்ஜா²யந்தீதி தங் தி³ட்டி²தீ³பகங் க³ந்த²ங் உக்³க³ஹெத்வா பட²ந்தி. வீமங்ஸந்தீதி தஸ்ஸ அத்த²ங் விசாரெந்தி. தேஸந்திஆதி³ வீமங்ஸனாகாரத³ஸ்ஸனங். தஸ்மிங் ஆரம்மணேதி யதா²பரிகப்பிதகம்மப²லாபா⁴வதீ³பகே ‘‘நத்தி² தி³ன்ன’’ந்திஆதி³னயப்பவத்தாய லத்³தி⁴யா ஆரம்மணே. மிச்சா²ஸதி ஸந்திட்ட²தீதி ‘‘நத்தி² தி³ன்ன’’ந்திஆதி³வஸேன சித்தங் ஏகக்³க³ங் ஹோதீதி யதா²வுத்தவிதக்காதி³பச்சயலாபே⁴ன தஸ்மிங் ஆரம்மணே அவட்டி²ததாய அனேகக்³க³ங் பஹாய ஏகக்³க³ங் அப்பிதங் விய ஹோதி. மிச்சா²ஸமாதி⁴பி ஹி பச்சயவிஸேஸேஹி லத்³த⁴பா⁴வனாப³லேஹி கதா³சி ஸமாதா⁴னபதிரூபகிச்சகரோ ஹோதியேவ வாலவிஜ்ஜ²னாதீ³ஸு வியாதி த³ட்ட²ப்³ப³ங். ஜவனானி ஜவந்தீதி அனேகக்க²த்துங் தேனாகாரேன புப்³ப³பா⁴கி³யேஸு ஜவனவாரேஸு பவத்தேஸு ஸப்³ப³பச்சி²மே ஜவனவாரே ஸத்த ஜவனானி ஜவந்தி. பட²மஜவனே பன ஸதேகிச்சா² ஹொந்தி, ததா² து³தியாதீ³ஸூதி த⁴ம்மஸபா⁴வத³ஸ்ஸனமேதங், ந பன தஸ்மிங் க²ணே தேஸங் ஸதேகிச்ச²பா⁴வாபாத³னங் கேனசி ஸக்கா காதுங்.
தத்தா²தி தேஸு தீஸு மிச்சா²த³ஸ்ஸனேஸு. கோசி ஏகங் த³ஸ்ஸனங் ஓக்கமதீதி யஸ்ஸ ஏகஸ்மிங்யேவ அபி⁴னிவேஸோ ஆஸேவனா ச பவத்தா, ஸோ ஏகங்யேவ த³ஸ்ஸனங் ஓக்கமதி. யஸ்ஸ பன த்³வீஸு, தீஸுபி வா அபி⁴னிவேஸனா பவத்தா, ஸோ த்³வே தீணி ஓக்கமதி. ஏதேன யா புப்³பே³ உப⁴யபடிபா³ஹனதாமுகே²ன வுத்தா அத்த²ஸித்³தா⁴ ஸப்³ப³தி³ட்டி²கதா, ஸா புப்³ப³பா⁴கி³யா. யா பன மிச்ச²த்தனியாமோக்கந்தி பூ⁴தா, ஸா யதா²ஸகங் பச்சயஸமுதா³க³மஸித்³தி⁴தோ பி⁴ன்னாரம்மணானங் விய விஸேஸாதி⁴க³மானங் அஞ்ஞமஞ்ஞங் ஏகஜ்ஜ²ங் அனுப்பத்தியா அஸங்கிண்ணா ஏவாதி த³ஸ்ஸேதி. ஏகஸ்மிங் ஓக்கந்தேபீதிஆதி³னா திஸ்ஸன்னம்பி தி³ட்டீ²னங் ஸமானப³லதங் ஸமானப²லதஞ்ச த³ஸ்ஸேதி, தஸ்மா திஸ்ஸோபி சேதா ஏகஸ்ஸ உப்பன்னா அஞ்ஞமஞ்ஞங் அப்³போ³கிண்ணா ஏவ, ஏகாய விபாகே தி³ன்னே இதரா அனுப³லப்பதா³யிகா ஹொந்தி. வட்டகா²ணு நாமாதி இத³ங் வசனங் நெய்யத்த²ங், ந நீதத்த²ந்தி தங் விவரித்வா த³ஸ்ஸேதுங் கிங் பனேஸாதிஆதி³ வுத்தங், அகுஸலங் நாமேதங் அப³லங் து³ப்³ப³லங், ந குஸலங் விய மஹாப³லந்தி ஆஹ – ‘‘ஏகஸ்மிங்யேவ அத்தபா⁴வே நியதோ’’தி. அஞ்ஞதா² ஸம்மத்தனியாமோ விய மிச்ச²த்தனியாமோபி அச்சந்திகோ ஸியா. யதி³ ஏவங் வட்டகா²ணுகஜோதனா கத²ந்தி ஆஹ ‘‘ஆஸேவனவஸேன பனா’’திஆதி³, தஸ்மா யதா² ‘‘ஸகிங் நிமுக்³கோ³ ‘‘யேபு⁴ய்யேனா’’தி.
தஸ்மாதி யஸ்மா ஏவங் ஸங்ஸாரகா²ணுபா⁴வஸ்ஸபி பச்சயோ அகல்யாணஜனோ, தஸ்மா. பூ⁴திகாமோதி தி³ட்ட²த⁴ம்மிகஸம்பராயிகபரமத்தா²னங் வஸேன அத்தனோ கு³ணேஹி வட்³டி⁴காமோ. யங் பனெத்த² கேசி வத³ந்தி ‘‘யதா² சிரகாலபா⁴வனாய பரிபாகூபக³மலத்³த⁴ப³லத்தா உபனிஸ்ஸயகுஸலா அகுஸலே ஸப்³ப³ஸோ ஸமுச்சி²ந்த³ந்தி, ஏவங் அகுஸலத⁴ம்மா ததோபி சிரகாலபா⁴வனாஸம்ப⁴வதோ லத்³த⁴ப³லா ஹுத்வா கதா³சி குஸலத⁴ம்மேபி ஸமுச்சி²ந்த³ந்தி. ஏவஞ்ச கத்வா த³ள்ஹமிச்சா²பி⁴னிவேஸஸ்ஸ மிச்சா²தி³ட்டி²கஸ்ஸ வட்டகா²ணுகபா⁴வஜோதனாபி
103. ஜா²னசித்தமயாதி ஸஞ்ஞாமயாதி எத்தா²பி ஏஸேவ நயோ. தேனாஹ ‘‘அரூபஜ்ஜா²னஸஞ்ஞாயா’’தி. அயந்தி ரூபிதாபா⁴வபடிபஜ்ஜனகபுக்³க³லோ. அப்படிலத்³த⁴ஜ்ஜா²னோதி அனதி⁴க³தரூபஜ்ஜா²னோ. தஸ்ஸபீதி தக்கினோபி. ரூபஜ்ஜா²னே கங்கா² நத்தி² அனுஸ்ஸவவஸேன லத்³த⁴வினிச்ச²யத்தா.
104. ஸாராகா³யாதி ஸராக³பா⁴வாய. ஸந்திகேதி ஸமீபே, ந தா²மக³தா தி³ட்டி²னாதிதூ³ரத்தா ஸராகா³, ந ஸம்பயுத்தத்தா. ஸா ஹி ந தா²மக³தா வட்டபரியாபன்னேஸு த⁴ம்மேஸு ரஜ்ஜதீதி விஞ்ஞாயதீதி ஆஹ – ‘‘ராக³வஸேன வட்டே ரஜ்ஜனஸ்ஸா’’தி. ஸப்³பே³பி ஸங்யோஜனா தண்ஹாவஸேனேவ ஸம்ப⁴வந்தீதி ஆஹ – ‘‘தண்ஹாவஸேன ஸங்யோஜனத்தா²யா’’தி. ஆருப்பே பனஸ்ஸ கங்கா² நத்தீ²தி அனுஸ்ஸவவஸேன லத்³த⁴னிச்ச²யங் ஸந்தா⁴ய வுத்தங். காமங் து³க்³க³திது³க்கா²னங் ஏகந்தஸங்வத்தனேன நத்தி²கதி³ட்டி²ஆதீ³னங் அபண்ணகதா பாகடா ஏவ, நிப்பரியாயேன பன அனவஜ்ஜஸ்ஸ அத்த²ஸ்ஸ ஏகந்தஸாத⁴கங் அபண்ணகந்தி கத்வா சோத³னா, ஸாவஜ்ஜஸ்ஸபி அத்த²ஸ்ஸ ஸாத⁴னே ஏகங்ஸிகபா⁴வங் க³ஹெத்வா பரிஹாரோ. தேனாஹ ‘‘க³ஹணவஸேனா’’திஆதி³. தேன ருள்ஹீவஸேன ‘‘நத்தி² தி³ன்ன’’ந்திஆதீ³னி அபண்ணகங்கா³னி ஜாதானீதி த³ஸ்ஸேதி.
105. ஹெட்டா² தயோ புக்³க³லாவ ஹொந்தீதி அத்தந்தபோ பரந்தபோதி இமஸ்மிங் சதுக்கே ஹெட்டா² தயோ புக்³க³லா ஹொந்தி. யதா²வுத்தா பஞ்சபி புக்³க³லா து³ப்படிபன்னாவ, ததோ அத்தி²கவாதா³த³யோ பஞ்சபுக்³க³லா ஸம்மாபடிபன்னதாய இமஸ்மிங் சதுக்கே ஏகோ சதுத்த²புக்³க³லோவ ஹோதி. ஏதமத்த²ங் த³ஸ்ஸேதுந்தி இத⁴ ஹெட்டா² வுத்தபுக்³க³லபஞ்சகத்³வயங் இமஸ்மிங் சதுக்கே ஏவ ஸங்க³ஹங் க³ச்ச²தீதி விபா⁴கே³ன து³ப்படிபத்திஸுப்படிபத்தியோ த³ஸ்ஸேதுங் ப⁴க³வா இமங் தே³ஸனங் ஆரபீ⁴தி. யங் பனெத்த² அத்த²தோ அவிப⁴த்தங், தங் ஸுவிஞ்ஞெய்யமேவ.
அபண்ணகஸுத்தவண்ணனாய லீனத்த²ப்பகாஸனா ஸமத்தா.
நிட்டி²தா ச க³ஹபதிவக்³க³வண்ணனா.