5. ஸளாயதனவக்³கோ³
1. அனாத²பிண்டி³கோவாத³ஸுத்தங்
383. ஏவங் மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன அனாத²பிண்டி³கோ க³ஹபதி ஆபா³தி⁴கோ ஹோதி து³க்கி²தோ பா³ள்ஹகி³லானோ. அத² கோ² அனாத²பிண்டி³கோ க³ஹபதி அஞ்ஞதரங் புரிஸங் ஆமந்தேஸி – ‘‘ஏஹி த்வங், அம்போ⁴ புரிஸ, யேன ப⁴க³வா தேனுபஸங்கம; உபஸங்கமித்வா மம வசனேன ப⁴க³வதோ பாதே³ ஸிரஸா வந்தா³ஹி வந்தா³ஹி ஏவஞ்ச வதே³ஹி (ஸப்³ப³த்த²) அஞ்ஞஸுத்தேஸு பன நத்தி² – ‘அனாத²பிண்டி³கோ, ப⁴ந்தே, க³ஹபதி ஆபா³தி⁴கோ து³க்கி²தோ பா³ள்ஹகி³லானோ. ஸோ ப⁴க³வதோ பாதே³ ஸிரஸா வந்த³தீ’தி. யேன சாயஸ்மா ஸாரிபுத்தோ தேனுபஸங்கம; உபஸங்கமித்வா மம வசனேன ஆயஸ்மதோ ஸாரிபுத்தஸ்ஸ பாதே³ ஸிரஸா வந்தா³ஹி வந்தா³ஹி ஏவஞ்ச வதே³ஹி (ஸப்³ப³த்த²) அஞ்ஞஸுத்தேஸு பன நத்தி² – ‘அனாத²பிண்டி³கோ, ப⁴ந்தே, க³ஹபதி ஆபா³தி⁴கோ து³க்கி²தோ பா³ள்ஹகி³லானோ. ஸோ ஆயஸ்மதோ ஸாரிபுத்தஸ்ஸ பாதே³ ஸிரஸா வந்த³தீ’தி. ஏவஞ்ச வதே³ஹி – ‘ஸாது⁴ கிர, ப⁴ந்தே, ஆயஸ்மா ஸாரிபுத்தோ யேன அனாத²பிண்டி³கஸ்ஸ க³ஹபதிஸ்ஸ நிவேஸனங் தேனுபஸங்கமது அனுகம்பங் உபாதா³யா’’’தி.
‘‘ஏவங், ப⁴ந்தே’’தி கோ² ஸோ புரிஸோ அனாத²பிண்டி³கஸ்ஸ க³ஹபதிஸ்ஸ படிஸ்ஸுத்வா யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஸோ புரிஸோ ப⁴க³வந்தங் ஏதத³வோச – ‘‘அனாத²பிண்டி³கோ, ப⁴ந்தே, க³ஹபதி ஆபா³தி⁴கோ து³க்கி²தோ பா³ள்ஹகி³லானோ. ஸோ ப⁴க³வதோ பாதே³ ஸிரஸா வந்த³தீ’’தி. யேன சாயஸ்மா ஸாரிபுத்தோ தேனுபஸங்கமி; உபஸங்கமித்வா ஆயஸ்மந்தங் ஸாரிபுத்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஸோ புரிஸோ ஆயஸ்மந்தங் ஸாரிபுத்தங் ஏதத³வோச – ‘‘அனாத²பிண்டி³கோ, ப⁴ந்தே, க³ஹபதி ஆபா³தி⁴கோ து³க்கி²தோ பா³ள்ஹகி³லானோ. ஸோ ஆயஸ்மதோ ஸாரிபுத்தஸ்ஸ பாதே³ ஸிரஸா வந்த³தி; ஏவஞ்ச வதே³தி – ‘ஸாது⁴ கிர, ப⁴ந்தே, ஆயஸ்மா ஸாரிபுத்தோ யேன அனாத²பிண்டி³கஸ்ஸ க³ஹபதிஸ்ஸ நிவேஸனங் தேனுபஸங்கமது அனுகம்பங் உபாதா³யா’’’தி. அதி⁴வாஸேஸி கோ² ஆயஸ்மா ஸாரிபுத்தோ துண்ஹீபா⁴வேன.
384. அத² கோ² ஆயஸ்மா ஸாரிபுத்தோ நிவாஸெத்வா பத்தசீவரமாதா³ய ஆயஸ்மதா ஆனந்தே³ன பச்சா²ஸமணேன யேன அனாத²பிண்டி³கஸ்ஸ க³ஹபதிஸ்ஸ நிவேஸனங் தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³. நிஸஜ்ஜ கோ² ஆயஸ்மா ஸாரிபுத்தோ அனாத²பிண்டி³கங் க³ஹபதிங் ஏதத³வோச – ‘‘கச்சி தே, க³ஹபதி, க²மனீயங், கச்சி யாபனீயங்? கச்சி தே து³க்கா² வேத³னா படிக்கமந்தி, நோ அபி⁴க்கமந்தி; படிக்கமோஸானங் பஞ்ஞாயதி, நோ அபி⁴க்கமோ’’தி?
‘‘ந மே, ப⁴ந்தே ஸாரிபுத்த, க²மனீயங் ந யாபனீயங். பா³ள்ஹா மே து³க்கா² வேத³னா அபி⁴க்கமந்தி, நோ படிக்கமந்தி; அபி⁴க்கமோஸானங் பஞ்ஞாயதி, நோ படிக்கமோ. ஸெய்யதா²பி, ப⁴ந்தே ஸாரிபுத்த, ப³லவா புரிஸோ திண்ஹேன ஸிக²ரேன முத்³த⁴னி முத்³தா⁴னங் (ஸீ॰ ஸ்யா॰ கங்॰ பீ॰) அபி⁴மத்தெ²ய்ய அபி⁴மந்தெ²ய்ய (ஸீ॰ பீ॰); ஏவமேவ கோ² மே, ப⁴ந்தே ஸாரிபுத்த, அதி⁴மத்தா வாதா முத்³த⁴னி ஓஹனந்தி (ஸ்யா॰ கங்॰) ஊஹனந்தி அதி⁴மத்தா வாதா ஸீலங் பரிகந்தந்தி (ஸீ॰ ஸ்யா॰ கங்॰). ந மே, ப⁴ந்தே ஸாரிபுத்த, க²மனீயங் ந யாபனீயங். பா³ள்ஹா மே து³க்கா² வேத³னா அபி⁴க்கமந்தி, நோ படிக்கமந்தி; அபி⁴க்கமோஸானங் பஞ்ஞாயதி, நோ படிக்கமோ. ஸெய்யதா²பி, ப⁴ந்தே ஸாரிபுத்த, ப³லவா புரிஸோ த³ள்ஹேன வரத்தக²ண்டே³ன ஸீஸே ஸீஸவேட²ங் த³தெ³ய்ய; ஏவமேவ கோ² மே, ப⁴ந்தே ஸாரிபுத்த, அதி⁴மத்தா ஸீஸே ஸீஸவேத³னா. ந மே, ப⁴ந்தே ஸாரிபுத்த, க²மனீயங் ந யாபனீயங். பா³ள்ஹா மே து³க்கா² வேத³னா அபி⁴க்கமந்தி, நோ படிக்கமந்தி; அபி⁴க்கமோஸானங் பஞ்ஞாயதி, நோ படிக்கமோ. ஸெய்யதா²பி, ப⁴ந்தே ஸாரிபுத்த, த³க்கோ² கோ³கா⁴தகோ வா கோ³கா⁴தகந்தேவாஸீ வா திண்ஹேன கோ³விகந்தனேன குச்சி²ங் பரிகந்தெய்ய; ஏவமேவ கோ² மே, ப⁴ந்தே ஸாரிபுத்த, அதி⁴மத்தா வாதா குச்சி²ங் பரிகந்தந்தி. ந மே, ப⁴ந்தே ஸாரிபுத்த, க²மனீயங் ந யாபனீயங். பா³ள்ஹா மே து³க்கா² வேத³னா அபி⁴க்கமந்தி, நோ படிக்கமந்தி; அபி⁴க்கமோஸானங் பஞ்ஞாயதி, நோ படிக்கமோ. ஸெய்யதா²பி, ப⁴ந்தே ஸாரிபுத்த, த்³வே ப³லவந்தோ புரிஸா து³ப்³ப³லதரங் புரிஸங் நானாபா³ஹாஸு க³ஹெத்வா அங்கா³ரகாஸுயா ஸந்தாபெய்யுங், ஸம்பரிதாபெய்யுங்; ஏவமேவ கோ² மே, ப⁴ந்தே ஸாரிபுத்த, அதி⁴மத்தோ காயஸ்மிங் டா³ஹோ. ந மே, ப⁴ந்தே ஸாரிபுத்த, க²மனீயங் ந யாபனீயங். பா³ள்ஹா மே து³க்கா² வேத³னா அபி⁴க்கமந்தி, நோ படிக்கமந்தி; அபி⁴க்கமோஸானங் பஞ்ஞாயதி, நோ படிக்கமோ’’தி.
385. ‘‘தஸ்மாதிஹ தே, க³ஹபதி, ஏவங் ஸிக்கி²தப்³ப³ங் – ‘ந சக்கு²ங் உபாதி³யிஸ்ஸாமி, ந ச மே சக்கு²னிஸ்ஸிதங் விஞ்ஞாணங் ப⁴விஸ்ஸதீ’தி. ஏவஞ்ஹி தே, க³ஹபதி, ஸிக்கி²தப்³ப³ங்.
‘‘தஸ்மாதிஹ தே, க³ஹபதி, ஏவங் ஸிக்கி²தப்³ப³ங் – ‘ந ஸோதங் உபாதி³யிஸ்ஸாமி, ந ச மே ஸோதனிஸ்ஸிதங் விஞ்ஞாணங் ப⁴விஸ்ஸதீ’தி. ஏவஞ்ஹி தே, க³ஹபதி, ஸிக்கி²தப்³ப³ங். தஸ்மாதிஹ தே, க³ஹபதி, ஏவங் ஸிக்கி²தப்³ப³ங் – ‘ந கா⁴னங் உபாதி³யிஸ்ஸாமி, ந ச மே கா⁴னநிஸ்ஸிதங் விஞ்ஞாணங் ப⁴விஸ்ஸதீ’தி. ஏவஞ்ஹி தே, க³ஹபதி, ஸிக்கி²தப்³ப³ங். தஸ்மாதிஹ தே, க³ஹபதி, ஏவங் ஸிக்கி²தப்³ப³ங் – ‘ந ஜிவ்ஹங் உபாதி³யிஸ்ஸாமி, ந ச மே ஜிவ்ஹானிஸ்ஸிதங் விஞ்ஞாணங் ப⁴விஸ்ஸதீ’தி. ஏவஞ்ஹி தே, க³ஹபதி, ஸிக்கி²தப்³ப³ங். தஸ்மாதிஹ தே, க³ஹபதி, ஏவங் ஸிக்கி²தப்³ப³ங் – ‘ந காயங் உபாதி³யிஸ்ஸாமி, ந ச மே காயனிஸ்ஸிதங் விஞ்ஞாணங் ப⁴விஸ்ஸதீ’தி. ஏவஞ்ஹி தே, க³ஹபதி, ஸிக்கி²தப்³ப³ங். தஸ்மாதிஹ தே, க³ஹபதி, ஏவங் ஸிக்கி²தப்³ப³ங் – ‘ந மனங் உபாதி³யிஸ்ஸாமி, ந ச மே மனோனிஸ்ஸிதங் விஞ்ஞாணங் ப⁴விஸ்ஸதீ’தி. ஏவஞ்ஹி தே, க³ஹபதி, ஸிக்கி²தப்³ப³ங்.
‘‘தஸ்மாதிஹ தே, க³ஹபதி, ஏவங் ஸிக்கி²தப்³ப³ங் – ‘ந ரூபங் உபாதி³யிஸ்ஸாமி, ந ச மே ரூபனிஸ்ஸிதங் விஞ்ஞாணங் ப⁴விஸ்ஸதீ’தி. ஏவஞ்ஹி தே, க³ஹபதி, ஸிக்கி²தப்³ப³ங். தஸ்மாதிஹ தே, க³ஹபதி, ஏவங் ஸிக்கி²தப்³ப³ங் – ‘ந ஸத்³த³ங் உபாதி³யிஸ்ஸாமி…பே॰… ந க³ந்த⁴ங் உபாதி³யிஸ்ஸாமி… ந ரஸங் உபாதி³யிஸ்ஸாமி… ந பொ²ட்ட²ப்³ப³ங் உபாதி³யிஸ்ஸாமி… ந த⁴ம்மங் உபாதி³யிஸ்ஸாமி ந ச மே த⁴ம்மனிஸ்ஸிதங் விஞ்ஞாணங் ப⁴விஸ்ஸதீ’தி. ஏவஞ்ஹி தே, க³ஹபதி, ஸிக்கி²தப்³ப³ங்.
‘‘தஸ்மாதிஹ தே, க³ஹபதி, ஏவங் ஸிக்கி²தப்³ப³ங் – ‘ந சக்கு²விஞ்ஞாணங் உபாதி³யிஸ்ஸாமி, ந ச மே சக்கு²விஞ்ஞாணனிஸ்ஸிதங் விஞ்ஞாணங் ப⁴விஸ்ஸதீ’தி. ஏவஞ்ஹி தே, க³ஹபதி, ஸிக்கி²தப்³ப³ங். தஸ்மாதிஹ தே, க³ஹபதி, ஏவங் ஸிக்கி²தப்³ப³ங் – ‘ந ஸோதவிஞ்ஞாணங் உபாதி³யிஸ்ஸாமி… ந கா⁴னவிஞ்ஞாணங் உபாதி³யிஸ்ஸாமி… ந ஜிவ்ஹாவிஞ்ஞாணங் உபாதி³யிஸ்ஸாமி… ந காயவிஞ்ஞாணங் உபாதி³யிஸ்ஸாமி… ந மனோவிஞ்ஞாணங் உபாதி³யிஸ்ஸாமி ந ச மே மனோவிஞ்ஞாணனிஸ்ஸிதங் விஞ்ஞாணங் ப⁴விஸ்ஸதீ’தி. ஏவஞ்ஹி தே, க³ஹபதி, ஸிக்கி²தப்³ப³ங்.
‘‘தஸ்மாதிஹ தே, க³ஹபதி, ஏவங் ஸிக்கி²தப்³ப³ங் – ‘ந சக்கு²ஸம்ப²ஸ்ஸங் உபாதி³யிஸ்ஸாமி, ந ச மே சக்கு²ஸம்ப²ஸ்ஸனிஸ்ஸிதங் விஞ்ஞாணங் ப⁴விஸ்ஸதீ’தி. ஏவஞ்ஹி தே, க³ஹபதி, ஸிக்கி²தப்³ப³ங். தஸ்மாதிஹ தே, க³ஹபதி, ஏவங் ஸிக்கி²தப்³ப³ங் – ‘ந ஸோதஸம்ப²ஸ்ஸங் உபாதி³யிஸ்ஸாமி… ந கா⁴னஸம்ப²ஸ்ஸங் உபாதி³யிஸ்ஸாமி… ந ஜிவ்ஹாஸம்ப²ஸ்ஸங் உபாதி³யிஸ்ஸாமி… ந காயஸம்ப²ஸ்ஸங் உபாதி³யிஸ்ஸாமி… ந மனோஸம்ப²ஸ்ஸங் உபாதி³யிஸ்ஸாமி, ந ச மே மனோஸம்ப²ஸ்ஸனிஸ்ஸிதங் விஞ்ஞாணங் ப⁴விஸ்ஸதீ’தி. ஏவஞ்ஹி தே, க³ஹபதி, ஸிக்கி²தப்³ப³ங்.
‘‘தஸ்மாதிஹ தே, க³ஹபதி, ஏவங் ஸிக்கி²தப்³ப³ங் – ‘ந சக்கு²ஸம்ப²ஸ்ஸஜங் வேத³னங் உபாதி³யிஸ்ஸாமி, ந ச மே சக்கு²ஸம்ப²ஸ்ஸஜாவேத³னானிஸ்ஸிதங் விஞ்ஞாணங் ப⁴விஸ்ஸதீ’தி. ஏவஞ்ஹி தே, க³ஹபதி, ஸிக்கி²தப்³ப³ங். தஸ்மாதிஹ தே , க³ஹபதி, ஏவங் ஸிக்கி²தப்³ப³ங் – ‘ந ஸோதஸம்ப²ஸ்ஸஜங் வேத³னங் உபாதி³யிஸ்ஸாமி… ந கா⁴னஸம்ப²ஸ்ஸஜங் வேத³னங் உபாதி³யிஸ்ஸாமி… ந ஜிவ்ஹாஸம்ப²ஸ்ஸஜங் வேத³னங் உபாதி³யிஸ்ஸாமி… ந காயஸம்ப²ஸ்ஸஜங் வேத³னங் உபாதி³யிஸ்ஸாமி… ந மனோஸம்ப²ஸ்ஸஜங் வேத³னங் உபாதி³யிஸ்ஸாமி, ந ச மே மனோஸம்ப²ஸ்ஸஜாவேத³னானிஸ்ஸிதங் விஞ்ஞாணங் ப⁴விஸ்ஸதீ’தி. ஏவஞ்ஹி தே, க³ஹபதி, ஸிக்கி²தப்³ப³ங்.
386. ‘‘தஸ்மாதிஹ தே, க³ஹபதி, ஏவங் ஸிக்கி²தப்³ப³ங் – ‘ந பத²வீதா⁴துங் உபாதி³யிஸ்ஸாமி, ந ச மே பத²வீதா⁴துனிஸ்ஸிதங் விஞ்ஞாணங் ப⁴விஸ்ஸதீ’தி. ஏவஞ்ஹி தே, க³ஹபதி, ஸிக்கி²தப்³ப³ங். தஸ்மாதிஹ தே, க³ஹபதி, ஏவங் ஸிக்கி²தப்³ப³ங் – ‘ந ஆபோதா⁴துங் உபாதி³யிஸ்ஸாமி… ந தேஜோதா⁴துங் உபாதி³யிஸ்ஸாமி… ந வாயோதா⁴துங் உபாதி³யிஸ்ஸாமி… ந ஆகாஸதா⁴துங் உபாதி³யிஸ்ஸாமி… ந விஞ்ஞாணதா⁴துங் உபாதி³யிஸ்ஸாமி, ந ச மே விஞ்ஞாணதா⁴துனிஸ்ஸிதங் விஞ்ஞாணங் ப⁴விஸ்ஸதீ’தி. ஏவஞ்ஹி தே, க³ஹபதி, ஸிக்கி²தப்³ப³ங்.
‘‘தஸ்மாதிஹ தே, க³ஹபதி, ஏவங் ஸிக்கி²தப்³ப³ங் – ‘ந ரூபங் உபாதி³யிஸ்ஸாமி, ந ச மே ரூபனிஸ்ஸிதங் விஞ்ஞாணங் ப⁴விஸ்ஸதீ’தி. ஏவஞ்ஹி தே, க³ஹபதி, ஸிக்கி²தப்³ப³ங். தஸ்மாதிஹ தே, க³ஹபதி, ஏவங் ஸிக்கி²தப்³ப³ங் – ‘ந வேத³னங் உபாதி³யிஸ்ஸாமி… ந ஸஞ்ஞங் உபாதி³யிஸ்ஸாமி… ந ஸங்கா²ரே உபாதி³யிஸ்ஸாமி… ந விஞ்ஞாணங் உபாதி³யிஸ்ஸாமி, ந ச மே விஞ்ஞாணனிஸ்ஸிதங் விஞ்ஞாணங் ப⁴விஸ்ஸதீ’தி. ஏவஞ்ஹி தே, க³ஹபதி, ஸிக்கி²தப்³ப³ங்.
‘‘தஸ்மாதிஹ தே, க³ஹபதி, ஏவங் ஸிக்கி²தப்³ப³ங் – ‘ந ஆகாஸானஞ்சாயதனங் உபாதி³யிஸ்ஸாமி , ந ச மே ஆகாஸானஞ்சாயதனநிஸ்ஸிதங் விஞ்ஞாணங் ப⁴விஸ்ஸதீ’தி . ஏவஞ்ஹி தே, க³ஹபதி, ஸிக்கி²தப்³ப³ங். தஸ்மாதிஹ தே, க³ஹபதி, ஏவங் ஸிக்கி²தப்³ப³ங் – ‘ந விஞ்ஞாணஞ்சாயதனங் உபாதி³யிஸ்ஸாமி… ந ஆகிஞ்சஞ்ஞாயதனங் உபாதி³யிஸ்ஸாமி… ந நேவஸஞ்ஞானாஸஞ்ஞாயதனங் உபாதி³யிஸ்ஸாமி ந ச மே நேவஸஞ்ஞானாஸஞ்ஞாயதனநிஸ்ஸிதங் விஞ்ஞாணங் ப⁴விஸ்ஸதீ’தி. ஏவஞ்ஹி தே, க³ஹபதி, ஸிக்கி²தப்³ப³ங்.
‘‘தஸ்மாதிஹ தே, க³ஹபதி, ஏவங் ஸிக்கி²தப்³ப³ங் – ‘ந இத⁴லோகங் உபாதி³யிஸ்ஸாமி, ந ச மே இத⁴லோகனிஸ்ஸிதங் விஞ்ஞாணங் ப⁴விஸ்ஸதீ’தி. ஏவஞ்ஹி தே, க³ஹபதி, ஸிக்கி²தப்³ப³ங். தஸ்மாதிஹ தே, க³ஹபதி, ஏவங் ஸிக்கி²தப்³ப³ங் – ‘ந பரலோகங் உபாதி³யிஸ்ஸாமி, ந ச மே பரலோகனிஸ்ஸிதங் விஞ்ஞாணங் ப⁴விஸ்ஸதீ’தி. ஏவஞ்ஹி தே, க³ஹபதி, ஸிக்கி²தப்³ப³ங். தஸ்மாதிஹ தே, க³ஹபதி, ஏவங் ஸிக்கி²தப்³ப³ங் – ‘யம்பி மே தி³ட்ட²ங் ஸுதங் முதங் விஞ்ஞாதங் பத்தங் பரியேஸிதங் அனுபரியேஸிதங் அனுசரிதங் மனஸா தம்பி ந உபாதி³யிஸ்ஸாமி, ந ச மே தங்னிஸ்ஸிதங் விஞ்ஞாணங் ப⁴விஸ்ஸதீ’தி. ஏவஞ்ஹி தே, க³ஹபதி, ஸிக்கி²தப்³ப³’’ந்தி.
387. ஏவங் வுத்தே, அனாத²பிண்டி³கோ க³ஹபதி பரோதி³, அஸ்ஸூனி பவத்தேஸி. அத² கோ² ஆயஸ்மா ஆனந்தோ³ அனாத²பிண்டி³கங் க³ஹபதிங் ஏதத³வோச – ‘‘ஓலீயஸி கோ² த்வங், க³ஹபதி, ஸங்ஸீத³ஸி கோ² த்வங், க³ஹபதீ’’தி? ‘‘நாஹங், ப⁴ந்தே ஆனந்த³, ஓலீயாமி, நபி ஸங்ஸீதா³மி; அபி ச மே தீ³க⁴ரத்தங் ஸத்தா² பயிருபாஸிதோ மனோபா⁴வனீயா ச பி⁴க்கூ²; ந ச மே ஏவரூபீ த⁴ம்மீ கதா² ஸுதபுப்³பா³’’தி. ‘‘ந கோ², க³ஹபதி, கி³ஹீனங் ஓதா³தவஸனானங் ஏவரூபீ த⁴ம்மீ கதா² படிபா⁴தி; பப்³ப³ஜிதானங் கோ², க³ஹபதி, ஏவரூபீ த⁴ம்மீ கதா² படிபா⁴தீ’’தி. ‘‘தேன ஹி, ப⁴ந்தே ஸாரிபுத்த, கி³ஹீனம்பி ஓதா³தவஸனானங் ஏவரூபீ த⁴ம்மீ கதா² படிபா⁴து. ஸந்தி ஹி, ப⁴ந்தே, குலபுத்தா அப்பரஜக்க²ஜாதிகா, அஸ்ஸவனதா த⁴ம்மஸ்ஸ பரிஹாயந்தி; ப⁴விஸ்ஸந்தி த⁴ம்மஸ்ஸ அஞ்ஞாதாரோ’’தி.
அத² கோ² ஆயஸ்மா ச ஸாரிபுத்தோ ஆயஸ்மா ச ஆனந்தோ³ அனாத²பிண்டி³கங் க³ஹபதிங் இமினா ஓவாதே³ன ஓவதி³த்வா உட்டா²யாஸனா பக்கமிங்ஸு. அத² கோ² அனாத²பிண்டி³கோ க³ஹபதி, அசிரபக்கந்தே ஆயஸ்மந்தே ச ஸாரிபுத்தே ஆயஸ்மந்தே ச ஆனந்தே³ , காலமகாஸி துஸிதங் காயங் உபபஜ்ஜி. அத² கோ² அனாத²பிண்டி³கோ தே³வபுத்தோ அபி⁴க்கந்தாய ரத்தியா அபி⁴க்கந்தவண்ணோ கேவலகப்பங் ஜேதவனங் ஓபா⁴ஸெத்வா யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் அட்டா²ஸி. ஏகமந்தங் டி²தோ கோ² அனாத²பிண்டி³கோ தே³வபுத்தோ ப⁴க³வந்தங் கா³தா²ஹி அஜ்ஜ²பா⁴ஸி –
‘‘இத³ஞ்ஹி தங் ஜேதவனங், இஸிஸங்க⁴னிஸேவிதங்;
ஆவுத்த²ங் த⁴ம்மராஜேன, பீதிஸஞ்ஜனநங் மம.
‘‘கம்மங் விஜ்ஜா ச த⁴ம்மோ ச, ஸீலங் ஜீவிதமுத்தமங்;
ஏதேன மச்சா ஸுஜ்ஜ²ந்தி, ந கொ³த்தேன த⁴னேன வா.
‘‘தஸ்மா ஹி பண்டி³தோ போஸோ, ஸம்பஸ்ஸங் அத்த²மத்தனோ;
யோனிஸோ விசினே த⁴ம்மங், ஏவங் தத்த² விஸுஜ்ஜ²தி.
‘‘ஸாரிபுத்தோவ பஞ்ஞாய, ஸீலேன உபஸமேன;
யோபி பாரங்க³தோ பி⁴க்கு², ஏதாவபரமோ ஸியா’’தி.
இத³மவோச அனாத²பிண்டி³கோ தே³வபுத்தோ. ஸமனுஞ்ஞோ ஸத்தா² அஹோஸி. அத² கோ² அனாத²பிண்டி³கோ தே³வபுத்தோ – ‘‘ஸமனுஞ்ஞோ மே ஸத்தா²’’தி ப⁴க³வந்தங் அபி⁴வாதெ³த்வா பத³க்கி²ணங் கத்வா தத்தே²வந்தரதா⁴யி.
388. அத² கோ² ப⁴க³வா தஸ்ஸா ரத்தியா அச்சயேன பி⁴க்கூ² ஆமந்தேஸி – ‘‘இமங், பி⁴க்க²வே, ரத்திங் அஞ்ஞதரோ தே³வபுத்தோ அபி⁴க்கந்தாய ரத்தியா அபி⁴க்கந்தவண்ணோ கேவலகப்பங் ஜேதவனங் ஓபா⁴ஸெத்வா யேனாஹங் தேனுபஸங்கமி; உபஸங்கமித்வா மங் அபி⁴வாதெ³த்வா ஏகமந்தங் அட்டா²ஸி. ஏகமந்தங் டி²தோ கோ² ஸோ தே³வபுத்தோ மங் கா³தா²ஹி அஜ்ஜ²பா⁴ஸி –
‘‘இத³ஞ்ஹி தங் ஜேதவனங், இஸிஸங்க⁴னிஸேவிதங்;
ஆவுத்த²ங் த⁴ம்மராஜேன, பீதிஸஞ்ஜனநங் மம.
‘‘கம்மங் விஜ்ஜா ச த⁴ம்மோ ச, ஸீலங் ஜீவிதமுத்தமங்;
ஏதேன மச்சா ஸுஜ்ஜ²ந்தி, ந கொ³த்தேன த⁴னேன வா.
‘‘தஸ்மா ஹி பண்டி³தோ போஸோ, ஸம்பஸ்ஸங் அத்த²மத்தனோ;
யோனிஸோ விசினே த⁴ம்மங், ஏவங் தத்த² விஸுஜ்ஜ²தி.
‘‘ஸாரிபுத்தோவ பஞ்ஞாய, ஸீலேன உபஸமேன;
யோபி பாரங்க³தோ பி⁴க்கு², ஏதாவபரமோ ஸியா’’தி.
‘‘இத³மவோச , பி⁴க்க²வே, ஸோ தே³வபுத்தோ. ‘ஸமனுஞ்ஞோ மே ஸத்தா²’தி மங் அபி⁴வாதெ³த்வா பத³க்கி²ணங் கத்வா தத்தே²வந்தரதா⁴யீ’’தி.
ஏவங் வுத்தே, ஆயஸ்மா ஆனந்தோ³ ப⁴க³வந்தங் ஏதத³வோச – ‘‘ஸோ ஹி நூன ஸோ, ப⁴ந்தே, அனாத²பிண்டி³கோ தே³வபுத்தோ ப⁴விஸ்ஸதி. அனாத²பிண்டி³கோ, ப⁴ந்தே, க³ஹபதி ஆயஸ்மந்தே ஸாரிபுத்தே அபி⁴ப்பஸன்னோ அஹோஸீ’’தி. ‘‘ஸாது⁴, ஸாது⁴, ஆனந்த³! யாவதகங் கோ², ஆனந்த³, தக்காய பத்தப்³ப³ங், அனுப்பத்தங் தங் தயா. அனாத²பிண்டி³கோ ஸோ, ஆனந்த³, தே³வபுத்தோ’’தி.
இத³மவோச ப⁴க³வா. அத்தமனோ ஆயஸ்மா ஆனந்தோ³ ப⁴க³வதோ பா⁴ஸிதங் அபி⁴னந்தீ³தி.
அனாத²பிண்டி³கோவாத³ஸுத்தங் நிட்டி²தங் பட²மங்.
2. ச²ன்னோவாத³ஸுத்தங்
389. ஏவங் மே ஸுதங் – ஏகங் ஸமயங் ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன ஆயஸ்மா ச ஸாரிபுத்தோ ஆயஸ்மா ச மஹாசுந்தோ³ ஆயஸ்மா ச ச²ன்னோ கி³ஜ்ஜ²கூடே பப்³ப³தே விஹரந்தி. தேன கோ² பன ஸமயேன ஆயஸ்மா ச²ன்னோ ஆபா³தி⁴கோ ஹோதி து³க்கி²தோ பா³ள்ஹகி³லானோ. அத² கோ² ஆயஸ்மா ஸாரிபுத்தோ ஸாயன்ஹஸமயங் படிஸல்லானா வுட்டி²தோ யேனாயஸ்மா மஹாசுந்தோ³ தேனுபஸங்கமி; உபஸங்கமித்வா ஆயஸ்மந்தங் மஹாசுந்த³ங் ஏதத³வோச – ‘‘ஆயாமாவுஸோ சுந்த³, யேனாயஸ்மா ச²ன்னோ தேனுபஸங்கமிஸ்ஸாம கி³லானபுச்ச²கா’’தி. ‘‘ஏவமாவுஸோ’’தி கோ² ஆயஸ்மா மஹாசுந்தோ³ ஆயஸ்மதோ ஸாரிபுத்தஸ்ஸ பச்சஸ்ஸோஸி.
அத² கோ² ஆயஸ்மா ச ஸாரிபுத்தோ ஆயஸ்மா ச மஹாசுந்தோ³ யேனாயஸ்மா ச²ன்னோ தேனுபஸங்கமிங்ஸு; உபஸங்கமித்வா ஆயஸ்மதா ச²ன்னேன ஸத்³தி⁴ங் ஸம்மோதி³ங்ஸு. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³ங்ஸு. ஏகமந்தங் நிஸின்னோ கோ² ஆயஸ்மா ஸாரிபுத்தோ ஆயஸ்மந்தங் ச²ன்னங் ஏதத³வோச – ‘‘கச்சி தே, ஆவுஸோ ச²ன்ன, க²மனீயங், கச்சி யாபனீயங்? கச்சி தே து³க்கா² வேத³னா படிக்கமந்தி, நோ அபி⁴க்கமந்தி; படிக்கமோஸானங் பஞ்ஞாயதி, நோ அபி⁴க்கமோ’’தி?
‘‘ந மே, ஆவுஸோ ஸாரிபுத்த, க²மனீயங் ந யாபனீயங். பா³ள்ஹா மே து³க்கா² வேத³னா அபி⁴க்கமந்தி, நோ படிக்கமந்தி; அபி⁴க்கமோஸானங் பஞ்ஞாயதி, நோ படிக்கமோ. ஸெய்யதா²பி , ஆவுஸோ ஸாரிபுத்த, ப³லவா புரிஸோ திண்ஹேன ஸிக²ரேன முத்³த⁴னி அபி⁴மத்தெ²ய்ய; ஏவமேவ கோ² மே, ஆவுஸோ ஸாரிபுத்த, அதி⁴மத்தா வாதா முத்³த⁴னி ஊஹனந்தி. ந மே, ஆவுஸோ ஸாரிபுத்த, க²மனீயங் ந யாபனீயங். பா³ள்ஹா மே து³க்கா² வேத³னா அபி⁴க்கமந்தி, நோ படிக்கமந்தி; அபி⁴க்கமோஸானங் பஞ்ஞாயதி நோ படிக்கமோ. ஸெய்யதா²பி, ஆவுஸோ ஸாரிபுத்த, ப³லவா புரிஸோ த³ள்ஹேன வரத்தக்க²ண்டே³ன ஸீஸே ஸீஸவேட²ங் த³தெ³ய்ய; ஏவமேவ கோ² மே, ஆவுஸோ ஸாரிபுத்த, அதி⁴மத்தா ஸீஸே ஸீஸவேத³னா. ந மே, ஆவுஸோ ஸாரிபுத்த, க²மனீயங் ந யாபனீயங். பா³ள்ஹா மே து³க்கா² வேத³னா அபி⁴க்கமந்தி, நோ படிக்கமந்தி; அபி⁴க்கமோஸானங் பஞ்ஞாயதி, நோ படிக்கமோ. ஸெய்யதா²பி, ஆவுஸோ ஸாரிபுத்த, த³க்கோ² கோ³கா⁴தகோ வா கோ³கா⁴தகந்தேவாஸீ வா திண்ஹேன கோ³விகந்தனேன குச்சி²ங் பரிகந்தெய்ய; ஏவமேவ கோ² மே, ஆவுஸோ ஸாரிபுத்த, அதி⁴மத்தா வாதா குச்சி²ங் பரிகந்தந்தி. ந மே, ஆவுஸோ ஸாரிபுத்த, க²மனீயங் ந யாபனீயங். பா³ள்ஹா மே து³க்கா² வேத³னா அபி⁴க்கமந்தி, நோ படிக்கமந்தி; அபி⁴க்கமோஸானங் பஞ்ஞாயதி, நோ படிக்கமோ. ஸெய்யதா²பி, ஆவுஸோ ஸாரிபுத்த, த்³வே ப³லவந்தோ புரிஸா து³ப்³ப³லதரங் புரிஸங் நானாபா³ஹாஸு க³ஹெத்வா அங்கா³ரகாஸுயா ஸந்தாபெய்யுங் ஸம்பரிதாபெய்யுங்; ஏவமேவ கோ² மே, ஆவுஸோ ஸாரிபுத்த, அதி⁴மத்தோ காயஸ்மிங் டா³ஹோ. ந மே, ஆவுஸோ ஸாரிபுத்த, க²மனீயங் ந யாபனீயங். பா³ள்ஹா மே து³க்கா² வேத³னா அபி⁴க்கமந்தி, நோ படிக்கமந்தி; அபி⁴க்கமோஸானங் பஞ்ஞாயதி, நோ படிக்கமோ. ஸத்த²ங், ஆவுஸோ ஸாரிபுத்த, ஆஹரிஸ்ஸாமி, நாவகங்கா²மி ஜீவித’’ந்தி.
390. ‘‘மாயஸ்மா ச²ன்னோ ஸத்த²ங் ஆஹரேஸி. யாபேதாயஸ்மா ச²ன்னோ. யாபெந்தங் மயங் ஆயஸ்மந்தங் ச²ன்னங் இச்சா²ம. ஸசே ஆயஸ்மதோ ச²ன்னஸ்ஸ நத்தி² ஸப்பாயானி போ⁴ஜனானி, அஹங் ஆயஸ்மதோ ச²ன்னஸ்ஸ ஸப்பாயானி போ⁴ஜனானி பரியேஸிஸ்ஸாமி. ஸசே ஆயஸ்மதோ ச²ன்னஸ்ஸ நத்தி² ஸப்பாயானி பே⁴ஸஜ்ஜானி, அஹங் ஆயஸ்மதோ ச²ன்னஸ்ஸ ஸப்பாயானி பே⁴ஸஜ்ஜானி பரியேஸிஸ்ஸாமி. ஸசே ஆயஸ்மதோ ச²ன்னஸ்ஸ நத்தி² பதிரூபா உபட்டா²கா, அஹங் ஆயஸ்மந்தங் ச²ன்னங் உபட்ட²ஹிஸ்ஸாமி. மாயஸ்மா ச²ன்னோ ஸத்த²ங் ஆஹரேஸி. யாபேதாயஸ்மா ச²ன்னோ. யாபெந்தங் மயங் ஆயஸ்மந்தங் ச²ன்னங் இச்சா²மா’’தி.
‘‘நபி மே, ஆவுஸோ ஸாரிபுத்த, நத்தி² ஸப்பாயானி போ⁴ஜனானி; நபி மே நத்தி² ஸப்பாயானி பே⁴ஸஜ்ஜானி; நபி மே நத்தி² பதிரூபா உபட்டா²கா; அபி சாவுஸோ ஸாரிபுத்த , பரிசிண்ணோ மே ஸத்தா² தீ³க⁴ரத்தங் மனாபேனேவ நோ அமனாபேன. ஏதஞ்ஹி, ஆவுஸோ ஸாரிபுத்த, ஸாவகஸ்ஸ பதிரூபங் யங் ஸத்தா²ரங் பரிசரெய்ய மனாபேனேவ நோ அமனாபேன. ‘அனுபவஜ்ஜங் ச²ன்னோ பி⁴க்கு² ஸத்த²ங் ஆஹரிஸ்ஸதீ’தி ஏவமேதங் ஏவமேவ கோ² த்வங் (க॰), ஆவுஸோ ஸாரிபுத்த, தா⁴ரேஹீ’’தி. ‘‘புச்செ²ய்யாம மயங் ஆயஸ்மந்தங் ச²ன்னங் கஞ்சிதே³வ தே³ஸங், ஸசே ஆயஸ்மா ச²ன்னோ ஓகாஸங் கரோதி பஞ்ஹஸ்ஸ வெய்யாகரணாயா’’தி. ‘‘புச்சா²வுஸோ ஸாரிபுத்த, ஸுத்வா வேதி³ஸ்ஸாமீ’’தி.
391. ‘‘சக்கு²ங், ஆவுஸோ ச²ன்ன, சக்கு²விஞ்ஞாணங் சக்கு²விஞ்ஞாணவிஞ்ஞாதப்³பே³ த⁴ம்மே ‘ஏதங் மம, ஏஸோஹமஸ்மி, ஏஸோ மே அத்தா’தி ஸமனுபஸ்ஸஸி? ஸோதங், ஆவுஸோ ச²ன்ன, ஸோதவிஞ்ஞாணங்…பே॰… கா⁴னங், ஆவுஸோ ச²ன்ன, கா⁴னவிஞ்ஞாணங்… ஜிவ்ஹங், ஆவுஸோ ச²ன்ன, ஜிவ்ஹாவிஞ்ஞாணங் … காயங், ஆவுஸோ ச²ன்ன, காயவிஞ்ஞாணங்… மனங், ஆவுஸோ ச²ன்ன, மனோவிஞ்ஞாணங் மனோவிஞ்ஞாணவிஞ்ஞாதப்³பே³ த⁴ம்மே ‘ஏதங் மம, ஏஸோஹமஸ்மி, ஏஸோ மே அத்தா’தி ஸமனுபஸ்ஸஸீ’’தி?
‘‘சக்கு²ங், ஆவுஸோ ஸாரிபுத்த, சக்கு²விஞ்ஞாணங் சக்கு²விஞ்ஞாணவிஞ்ஞாதப்³பே³ த⁴ம்மே ‘நேதங் மம, நேஸோஹமஸ்மி, ந மேஸோ அத்தா’தி ஸமனுபஸ்ஸாமி. ஸோதங், ஆவுஸோ ஸாரிபுத்த…பே॰… கா⁴னங், ஆவுஸோ ஸாரிபுத்த… ஜிவ்ஹங், ஆவுஸோ ஸாரிபுத்த… காயங், ஆவுஸோ ஸாரிபுத்த… மனங், ஆவுஸோ ஸாரிபுத்த, மனோவிஞ்ஞாணங் மனோவிஞ்ஞாணவிஞ்ஞாதப்³பே³ த⁴ம்மே ‘நேதங் மம, நேஸோஹமஸ்மி, ந மேஸோ அத்தா’தி ஸமனுபஸ்ஸாமீ’’தி.
392. ‘‘சக்கு²ஸ்மிங், ஆவுஸோ ச²ன்ன, சக்கு²விஞ்ஞாணே சக்கு²விஞ்ஞாணவிஞ்ஞாதப்³பே³ஸு த⁴ம்மேஸு கிங் தி³ஸ்வா கிங் அபி⁴ஞ்ஞாய சக்கு²ங் சக்கு²விஞ்ஞாணங் சக்கு²விஞ்ஞாணவிஞ்ஞாதப்³பே³ த⁴ம்மே ‘நேதங் மம, நேஸோஹமஸ்மி, ந மேஸோ அத்தா’தி ஸமனுபஸ்ஸஸி? ஸோதஸ்மிங், ஆவுஸோ ச²ன்ன, ஸோதவிஞ்ஞாணே … கா⁴னஸ்மிங், ஆவுஸோ ச²ன்ன, கா⁴னவிஞ்ஞாணே… ஜிவ்ஹாய, ஆவுஸோ ச²ன்ன, ஜிவ்ஹாவிஞ்ஞாணே… காயஸ்மிங், ஆவுஸோ ச²ன்ன, காயவிஞ்ஞாணே… மனஸ்மிங், ஆவுஸோ ச²ன்ன, மனோவிஞ்ஞாணே மனோவிஞ்ஞாணவிஞ்ஞாதப்³பே³ஸு த⁴ம்மேஸு கிங் தி³ஸ்வா கிங் அபி⁴ஞ்ஞாய மனங் மனோவிஞ்ஞாணங் மனோவிஞ்ஞாணவிஞ்ஞாதப்³பே³ த⁴ம்மே ‘நேதங் மம, நேஸோஹமஸ்மி, ந மேஸோ அத்தா’தி ஸமனுபஸ்ஸஸீ’’தி?
‘‘சக்கு²ஸ்மிங் , ஆவுஸோ ஸாரிபுத்த, சக்கு²விஞ்ஞாணே சக்கு²விஞ்ஞாணவிஞ்ஞாதப்³பே³ஸு த⁴ம்மேஸு நிரோத⁴ங் தி³ஸ்வா நிரோத⁴ங் அபி⁴ஞ்ஞாய சக்கு²ங் சக்கு²விஞ்ஞாணங் சக்கு²விஞ்ஞாணவிஞ்ஞாதப்³பே³ த⁴ம்மே ‘நேதங் மம, நேஸோஹமஸ்மி, ந மேஸோ அத்தா’தி ஸமனுபஸ்ஸாமி. ஸோதஸ்மிங், ஆவுஸோ ஸாரிபுத்த, ஸோதவிஞ்ஞாணே… கா⁴னஸ்மிங், ஆவுஸோ ஸாரிபுத்த, கா⁴னவிஞ்ஞாணே… ஜிவ்ஹாய, ஆவுஸோ ஸாரிபுத்த, ஜிவ்ஹாவிஞ்ஞாணே… காயஸ்மிங், ஆவுஸோ ஸாரிபுத்த, காயவிஞ்ஞாணே… மனஸ்மிங், ஆவுஸோ ஸாரிபுத்த, மனோவிஞ்ஞாணே மனோவிஞ்ஞாணவிஞ்ஞாதப்³பே³ஸு த⁴ம்மேஸு நிரோத⁴ங் தி³ஸ்வா நிரோத⁴ங் அபி⁴ஞ்ஞா மனங் மனோவிஞ்ஞாணங் மனோவிஞ்ஞாணவிஞ்ஞாதப்³பே³ த⁴ம்மே ‘நேதங் மம, நேஸோஹமஸ்மி, ந மேஸோ அத்தா’தி ஸமனுபஸ்ஸாமீ’’தி.
393. ஏவங் வுத்தே, ஆயஸ்மா மஹாசுந்தோ³ ஆயஸ்மந்தங் ச²ன்னங் ஏதத³வோச – ‘‘தஸ்மாதிஹ, ஆவுஸோ ச²ன்ன, இத³ம்பி தஸ்ஸ ப⁴க³வதோ ஸாஸனங் வசனங் (ஸீ॰), நிச்சகப்பங் மனஸி காதப்³ப³ங் – ‘நிஸ்ஸிதஸ்ஸ சலிதங், அனிஸ்ஸிதஸ்ஸ சலிதங் நத்தி². சலிதே அஸதி பஸ்ஸத்³தி⁴, பஸ்ஸத்³தி⁴யா ஸதி நதி ந ஹோதி. நதியா அஸதி ஆக³திக³தி ந ஹோதி. ஆக³திக³தியா அஸதி சுதூபபாதோ ந ஹோதி. சுதூபபாதே அஸதி நேவித⁴ ந ஹுரங் ந உப⁴யமந்தரேன. ஏஸேவந்தோ து³க்க²ஸ்ஸா’’’தி. அத² கோ² ஆயஸ்மா ச ஸாரிபுத்தோ ஆயஸ்மா ச மஹாசுந்தோ³ ஆயஸ்மந்தங் ச²ன்னங் இமினா ஓவாதே³ன ஓவதி³த்வா உட்டா²யாஸனா பக்கமிங்ஸு.
394. அத² கோ² ஆயஸ்மா ச²ன்னோ அசிரபக்கந்தே ஆயஸ்மந்தே ச ஸாரிபுத்தே ஆயஸ்மந்தே ச மஹாசுந்தே³ ஸத்த²ங் ஆஹரேஸி. அத² கோ² ஆயஸ்மா ஸாரிபுத்தோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா ஸாரிபுத்தோ ப⁴க³வந்தங் ஏதத³வோச – ‘‘ஆயஸ்மதா, ப⁴ந்தே, ச²ன்னேன ஸத்த²ங் ஆஹரிதங். தஸ்ஸ கா க³தி, கோ அபி⁴ஸம்பராயோ’’தி? ‘‘நனு தே, ஸாரிபுத்த, ச²ன்னேன பி⁴க்கு²னா ஸம்முகா²யேவ அனுபவஜ்ஜதா ப்³யாகதா’’தி? ‘‘அத்தி², ப⁴ந்தே, புப்³ப³ஜிரங் பப்பஜிதஞ்ஹிதங் (க॰), உபவஜ்ஜிதங் (க॰), புப்³ப³விஜ்ஜனங், புப்³ப³விஜ்ஜ²னங், புப்³ப³விசிரங் (ஸங்யுத்தகே) நாம வஜ்ஜிகா³மோ. தத்தா²யஸ்மதோ ச²ன்னஸ்ஸ மித்தகுலானி ஸுஹஜ்ஜகுலானி உபவஜ்ஜகுலானீ’’தி. ‘‘ஹொந்தி போஸந்தி (க॰) ஹேதே, ஸாரிபுத்த, ச²ன்னஸ்ஸ பி⁴க்கு²னோ மித்தகுலானி ஸுஹஜ்ஜகுலானி உபவஜ்ஜகுலானி. நாஹங், ஸாரிபுத்த, எத்தாவதா ‘ஸஉபவஜ்ஜோ’தி வதா³மி. யோ கோ², ஸாரிபுத்த, இமஞ்ச காயங் நிக்கி²பதி அஞ்ஞஞ்ச காயங் உபாதி³யதி தமஹங் ‘ஸஉபவஜ்ஜோ’தி வதா³மி. தங் ச²ன்னஸ்ஸ பி⁴க்கு²னோ நத்தி². ‘அனுபவஜ்ஜோ ச²ன்னோ பி⁴க்கு² ஸத்த²ங் ஆஹரேஸீ’தி ஏவமேதங், ஸாரிபுத்த, தா⁴ரேஹீ’’தி.
இத³மவோச ப⁴க³வா. அத்தமனோ ஆயஸ்மா ஸாரிபுத்தோ ப⁴க³வதோ பா⁴ஸிதங் அபி⁴னந்தீ³தி.
ச²ன்னோவாத³ஸுத்தங் நிட்டி²தங் து³தியங்.
3. புண்ணோவாத³ஸுத்தங்
395. ஏவங் மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. அத² கோ² ஆயஸ்மா புண்ணோ ஸாயன்ஹஸமயங் படிஸல்லானா வுட்டி²தோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா புண்ணோ ப⁴க³வந்தங் ஏதத³வோச – ‘‘ஸாது⁴ மங், ப⁴ந்தே, ப⁴க³வா ஸங்கி²த்தேன ஓவாதே³ன ஓவத³து, யமஹங் ப⁴க³வதோ த⁴ம்மங் ஸுத்வா ஏகோ வூபகட்டோ² அப்பமத்தோ ஆதாபீ பஹிதத்தோ விஹரெய்ய’’ந்தி. ‘‘தேன ஹி, புண்ண, ஸுணாஹி, ஸாது⁴கங் மனஸி கரோஹி; பா⁴ஸிஸ்ஸாமீ’’தி. ‘‘ஏவங், ப⁴ந்தே’’தி கோ² ஆயஸ்மா புண்ணோ ப⁴க³வதோ பச்சஸ்ஸோஸி. ப⁴க³வா ஏதத³வோச –
‘‘ஸந்தி கோ², புண்ண, சக்கு²விஞ்ஞெய்யா ரூபா இட்டா² கந்தா மனாபா பியரூபா காமூபஸங்ஹிதா ரஜனீயா. தங் சே பி⁴க்கு² அபி⁴னந்த³தி அபி⁴வத³தி அஜ்ஜோ²ஸாய திட்ட²தி. தஸ்ஸ தங் அபி⁴னந்த³தோ அபி⁴வத³தோ அஜ்ஜோ²ஸாய திட்ட²தோ உப்பஜ்ஜதி நந்தீ³ நந்தி³ (ஸ்யா॰ கங்॰). ‘நந்தீ³ஸமுத³யா து³க்க²ஸமுத³யோ, புண்ணா’தி வதா³மி.
‘‘ஸந்தி கோ², புண்ண, ஸோதவிஞ்ஞெய்யா ஸத்³தா³… கா⁴னவிஞ்ஞெய்யா க³ந்தா⁴… ஜிவ்ஹாவிஞ்ஞெய்யா ரஸா… காயவிஞ்ஞெய்யா பொ²ட்ட²ப்³பா³… மனோவிஞ்ஞெய்யா த⁴ம்மா இட்டா² கந்தா மனாபா பியரூபா காமூபஸங்ஹிதா ரஜனீயா. தங் சே பி⁴க்கு² அபி⁴னந்த³தி அபி⁴வத³தி அஜ்ஜோ²ஸாய திட்ட²தி. தஸ்ஸ தங் அபி⁴னந்த³தோ அபி⁴வத³தோ அஜ்ஜோ²ஸாய திட்ட²தோ உப்பஜ்ஜதி நந்தீ³. ‘நந்தீ³ஸமுத³யா து³க்க²ஸமுத³யோ, புண்ணா’தி வதா³மி.
‘‘ஸந்தி ச கோ², புண்ண, சக்கு²விஞ்ஞெய்யா ரூபா இட்டா² கந்தா மனாபா பியரூபா காமூபஸங்ஹிதா ரஜனீயா. தங் சே பி⁴க்கு² நாபி⁴னந்த³தி நாபி⁴வத³தி நாஜ்ஜோ²ஸாய திட்ட²தி. தஸ்ஸ தங் அனபி⁴னந்த³தோ அனபி⁴வத³தோ அனஜ்ஜோ²ஸாய திட்ட²தோ நந்தீ³ நிருஜ்ஜ²தி. ‘நந்தீ³னிரோதா⁴ து³க்க²னிரோதோ⁴, புண்ணா’தி வதா³மி.
‘‘ஸந்தி ச கோ², புண்ண, ஸோதவிஞ்ஞெய்யா ஸத்³தா³… கா⁴னவிஞ்ஞெய்யா க³ந்தா⁴… ஜிவ்ஹாவிஞ்ஞெய்யா ரஸா… காயவிஞ்ஞெய்யா பொ²ட்ட²ப்³பா³… மனோவிஞ்ஞெய்யா த⁴ம்மா இட்டா² கந்தா மனாபா பியரூபா காமூபஸங்ஹிதா ரஜனீயா. தங் சே பி⁴க்கு² நாபி⁴னந்த³தி நாபி⁴வத³தி நாஜ்ஜோ²ஸாய திட்ட²தி. தஸ்ஸ தங் அனபி⁴னந்த³தோ அனபி⁴வத³தோ அனஜ்ஜோ²ஸாய திட்ட²தோ நந்தீ³ நிருஜ்ஜ²தி. ‘நந்தீ³னிரோதா⁴ து³க்க²னிரோதோ⁴, புண்ணா’தி வதா³மி.
‘‘இமினா ச த்வங் புண்ண, மயா ஸங்கி²த்தேன ஓவாதே³ன ஓவதி³தோ கதரஸ்மிங் ஜனபதே³ விஹரிஸ்ஸஸீ’’தி? ‘‘இமினாஹங், ப⁴ந்தே, ப⁴க³வதா ஸங்கி²த்தேன ஓவாதே³ன ஓவதி³தோ, அத்தி² ஸுனாபரந்தோ நாம ஜனபதோ³, தத்தா²ஹங் விஹரிஸ்ஸாமீ’’தி.
396. ‘‘சண்டா³ கோ², புண்ண, ஸுனாபரந்தகா மனுஸ்ஸா; ப²ருஸா கோ², புண்ண, ஸுனாபரந்தகா மனுஸ்ஸா. ஸசே தங், புண்ண, ஸுனாபரந்தகா மனுஸ்ஸா அக்கோஸிஸ்ஸந்தி பரிபா⁴ஸிஸ்ஸந்தி, தத்த² தே, புண்ண, கிந்தி ப⁴விஸ்ஸதீ’’தி? ‘‘ஸசே மங், ப⁴ந்தே, ஸுனாபரந்தகா மனுஸ்ஸா அக்கோஸிஸ்ஸந்தி பரிபா⁴ஸிஸ்ஸந்தி, தத்த² மே ஏவங் ப⁴விஸ்ஸதி – ‘ப⁴த்³த³கா ப⁴த்³ரகா (க॰) வதிமே ஸுனாபரந்தகா மனுஸ்ஸா, ஸுப⁴த்³த³கா வதிமே ஸுனாபரந்தகா மனுஸ்ஸா, யங் மே நயிமே பாணினா பஹாரங் தெ³ந்தீ’தி. ஏவமெத்த² ஏவம்மெத்த² (?), ப⁴க³வா, ப⁴விஸ்ஸதி; ஏவமெத்த², ஸுக³த, ப⁴விஸ்ஸதீ’’தி.
‘‘ஸசே பன தே, புண்ண, ஸுனாபரந்தகா மனுஸ்ஸா பாணினா பஹாரங் த³ஸ்ஸந்தி, தத்த² பன தே, புண்ண, கிந்தி ப⁴விஸ்ஸதீ’’தி? ‘‘ஸசே மே, ப⁴ந்தே, ஸுனாபரந்தகா மனுஸ்ஸா பாணினா பஹாரங் த³ஸ்ஸந்தி, தத்த² மே ஏவங் ப⁴விஸ்ஸதி – ‘ப⁴த்³த³கா வதிமே ஸுனாபரந்தகா மனுஸ்ஸா, ஸுப⁴த்³த³கா வதிமே ஸுனாபரந்தகா மனுஸ்ஸா, யங் மே நயிமே லெட்³டு³னா பஹாரங் தெ³ந்தீ’தி. ஏவமெத்த², ப⁴க³வா, ப⁴விஸ்ஸதி; ஏவமெத்த², ஸுக³த, ப⁴விஸ்ஸதீ’’தி.
‘‘ஸசே பன தே, புண்ண, ஸுனாபரந்தகா மனுஸ்ஸா லெட்³டு³னா பஹாரங் த³ஸ்ஸந்தி, தத்த² பன தே, புண்ண, கிந்தி ப⁴விஸ்ஸதீ’’தி? ‘‘ஸசே மே, ப⁴ந்தே, ஸுனாபரந்தகா மனுஸ்ஸா லெட்³டு³னா பஹாரங் த³ஸ்ஸந்தி, தத்த² மே ஏவங் ப⁴விஸ்ஸதி – ‘ப⁴த்³த³கா வதிமே ஸுனாபரந்தகா மனுஸ்ஸா, ஸுப⁴த்³த³கா வதிமே ஸுனாபரந்தகா மனுஸ்ஸா, யங் மே நயிமே த³ண்டே³ன பஹாரங் தெ³ந்தீ’தி. ஏவமெத்த², ப⁴க³வா, ப⁴விஸ்ஸதி; ஏவமெத்த², ஸுக³த, ப⁴விஸ்ஸதீ’’தி.
‘‘ஸசே பன தே, புண்ண, ஸுனாபரந்தகா மனுஸ்ஸா த³ண்டே³ன பஹாரங் த³ஸ்ஸந்தி, தத்த² பன தே, புண்ண, கிந்தி ப⁴விஸ்ஸதீ’’தி? ‘‘ஸசே மே, ப⁴ந்தே, ஸுனாபரந்தகா மனுஸ்ஸா த³ண்டே³ன பஹாரங் த³ஸ்ஸந்தி, தத்த² மே ஏவங் ப⁴விஸ்ஸதி – ‘ப⁴த்³த³கா வதிமே ஸுனாபரந்தகா மனுஸ்ஸா, ஸுப⁴த்³த³கா வதிமே ஸுனாபரந்தகா மனுஸ்ஸா, யங் மே நயிமே ஸத்தே²ன பஹாரங் தெ³ந்தீ’தி. ஏவமெத்த², ப⁴க³வா, ப⁴விஸ்ஸதி; ஏவமெத்த², ஸுக³த, ப⁴விஸ்ஸதீ’’தி.
‘‘ஸசே பன தே, புண்ண, ஸுனாபரந்தகா மனுஸ்ஸா ஸத்தே²ன பஹாரங் த³ஸ்ஸந்தி, தத்த² பன தே, புண்ண, கிந்தி ப⁴விஸ்ஸதீ’’தி? ‘‘ஸசே மே, ப⁴ந்தே, ஸுனாபரந்தகா மனுஸ்ஸா ஸத்தே²ன பஹாரங் த³ஸ்ஸந்தி, தத்த² மே ஏவங் ப⁴விஸ்ஸதி – ‘ப⁴த்³த³கா வதிமே ஸுனாபரந்தகா மனுஸ்ஸா, ஸுப⁴த்³த³கா வதிமே ஸுனாபரந்தகா மனுஸ்ஸா, யங் மங் யங் மே (ஸீ॰ பீ॰ க॰) நயிமே திண்ஹேன ஸத்தே²ன ஜீவிதா வோரோபெந்தீ’தி. ஏவமெத்த², ப⁴க³வா, ப⁴விஸ்ஸதி; ஏவமெத்த², ஸுக³த, ப⁴விஸ்ஸதீ’’தி.
‘‘ஸசே பன தங், புண்ண, ஸுனாபரந்தகா மனுஸ்ஸா திண்ஹேன ஸத்தே²ன ஜீவிதா வோரோபெஸ்ஸந்தி, தத்த² பன தே, புண்ண, கிந்தி ப⁴விஸ்ஸதீ’’தி? ‘‘ஸசே மங், ப⁴ந்தே, ஸுனாபரந்தகா மனுஸ்ஸா திண்ஹேன ஸத்தே²ன ஜீவிதா வோரோபெஸ்ஸந்தி, தத்த² மே ஏவங் ப⁴விஸ்ஸதி – ‘ஸந்தி கோ² ப⁴க³வதோ ஸாவகா காயே ச ஜீவிதே ச அட்டீயமானா ஹராயமானா ஜிகு³ச்ச²மானா ஸத்த²ஹாரகங் பரியேஸந்தி. தங் மே இத³ங் அபரியிட்ட²ங்யேவ ஸத்த²ஹாரகங் லத்³த⁴’ந்தி. ஏவமெத்த², ப⁴க³வா, ப⁴விஸ்ஸதி; ஏவமெத்த², ஸுக³த, ப⁴விஸ்ஸதீ’’தி. ‘‘ஸாது⁴, ஸாது⁴, புண்ண! ஸக்கி²ஸ்ஸஸி கோ² த்வங், புண்ண, இமினா த³மூபஸமேன ஸமன்னாக³தோ ஸுனாபரந்தஸ்மிங் ஜனபதே³ விஹரிதுங். யஸ்ஸதா³னி த்வங், புண்ண, காலங் மஞ்ஞஸீ’’தி.
397. அத² கோ² ஆயஸ்மா புண்ணோ ப⁴க³வதோ பா⁴ஸிதங் அபி⁴னந்தி³த்வா அனுமோதி³த்வா உட்டா²யாஸனா ப⁴க³வந்தங் அபி⁴வாதெ³த்வா பத³க்கி²ணங் கத்வா ஸேனாஸனங் ஸங்ஸாமெத்வா பத்தசீவரமாதா³ய யேன ஸுனாபரந்தோ ஜனபதோ³ தேன சாரிகங் பக்காமி. அனுபுப்³பே³ன சாரிகங் சரமானோ யேன ஸுனாபரந்தோ ஜனபதோ³ தத³வஸரி. தத்ர ஸுத³ங் ஆயஸ்மா புண்ணோ ஸுனாபரந்தஸ்மிங் ஜனபதே³ விஹரதி. அத² கோ² ஆயஸ்மா புண்ணோ தேனேவந்தரவஸ்ஸேன பஞ்சமத்தானி உபாஸகஸதானி படிவேதே³ஸி படிபாதே³ஸி (ஸீ॰ பீ॰), படிதே³ஸேஸி (ஸ்யா॰ கங்॰), தேனேவந்தரவஸ்ஸேன பஞ்சமத்தானி உபாஸிகஸதானி படிவேதே³ஸி, தேனேவந்தரவஸ்ஸேன திஸ்ஸோ விஜ்ஜா ஸச்சா²காஸி. அத² கோ² ஆயஸ்மா புண்ணோ அபரேன ஸமயேன பரினிப்³பா³யி.
அத² கோ² ஸம்ப³ஹுலா பி⁴க்கூ² யேன ப⁴க³வா தேனுபஸங்கமிங்ஸு; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³ங்ஸு. ஏகமந்தங் நிஸின்னா கோ² தே பி⁴க்கூ² ப⁴க³வந்தங் ஏதத³வோசுங் – ‘‘யோ ஸோ, ப⁴ந்தே, புண்ணோ நாம குலபுத்தோ ப⁴க³வதா ஸங்கி²த்தேன ஓவாதே³ன ஓவதி³தோ ஸோ காலங்கதோ. தஸ்ஸ கா க³தி, கோ அபி⁴ஸம்பராயோ’’தி? ‘‘பண்டி³தோ, பி⁴க்க²வே, புண்ணோ குலபுத்தோ பச்சபாதி³ ஸச்சவாதீ³ த⁴ம்மவாதீ³ (க॰) த⁴ம்மஸ்ஸானுத⁴ம்மங், ந ச மங் த⁴ம்மாதி⁴கரணங் விஹேடே²ஸி. பரினிப்³பு³தோ, பி⁴க்க²வே, புண்ணோ குலபுத்தோ’’தி.
இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதங் அபி⁴னந்து³ந்தி.
புண்ணோவாத³ஸுத்தங் நிட்டி²தங் ததியங்.
4. நந்த³கோவாத³ஸுத்தங்
398. ஏவங் மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. அத² கோ² மஹாபஜாபதிகோ³தமீ பஞ்சமத்தேஹி பி⁴க்கு²னிஸதேஹி ஸத்³தி⁴ங் யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் அட்டா²ஸி. ஏகமந்தங் டி²தா கோ² மஹாபஜாபதிகோ³தமீ ப⁴க³வந்தங் ஏதத³வோச – ‘‘ஓவத³து, ப⁴ந்தே, ப⁴க³வா பி⁴க்கு²னியோ; அனுஸாஸது, ப⁴ந்தே, ப⁴க³வா பி⁴க்கு²னியோ; கரோது, ப⁴ந்தே, ப⁴க³வா பி⁴க்கு²னீனங் த⁴ம்மிங் கத²’’ந்தி த⁴ம்மிகத²ந்தி (ஸ்யா॰ கங்॰ க॰).
தேன கோ² பன ஸமயேன தே²ரா பி⁴க்கூ² பி⁴க்கு²னியோ ஓவத³ந்தி பரியாயேன. ஆயஸ்மா நந்த³கோ ந இச்ச²தி பி⁴க்கு²னியோ ஓவதி³துங் பரியாயேன. அத² கோ² ப⁴க³வா ஆயஸ்மந்தங் ஆனந்த³ங் ஆமந்தேஸி – ‘‘கஸ்ஸ நு கோ², ஆனந்த³, அஜ்ஜ பரியாயோ பி⁴க்கு²னியோ ஓவதி³துங் பரியாயேனா’’தி? ‘‘ஸப்³பே³ஹேவ, ப⁴ந்தே, கதோ நந்த³கஸ்ஸ ப⁴ந்தே (ஸீ॰ பீ॰) பரியாயோ பி⁴க்கு²னியோ ஓவதி³துங் பரியாயேன. அயங், ப⁴ந்தே, ஆயஸ்மா நந்த³கோ ந இச்ச²தி பி⁴க்கு²னியோ ஓவதி³துங் பரியாயேனா’’தி.
அத² கோ² ப⁴க³வா ஆயஸ்மந்தங் நந்த³கங் ஆமந்தேஸி – ‘‘ஓவத³, நந்த³க, பி⁴க்கு²னியோ; அனுஸாஸ, நந்த³க, பி⁴க்கு²னியோ; கரோஹி த்வங், ப்³ராஹ்மண, பி⁴க்கு²னீனங் த⁴ம்மிங் கத²’’ந்தி. ‘‘ஏவங், ப⁴ந்தே’’தி கோ² ஆயஸ்மா நந்த³கோ ப⁴க³வதோ படிஸ்ஸுத்வா புப்³ப³ண்ஹஸமயங் நிவாஸெத்வா பத்தசீவரமாதா³ய ஸாவத்தி²ங் பிண்டா³ய பாவிஸி. ஸாவத்தி²யங் பிண்டா³ய சரித்வா பச்சா²ப⁴த்தங் பிண்ட³பாதபடிக்கந்தோ அத்தது³தியோ யேன ராஜகாராமோ தேனுபஸங்கமி. அத்³த³ஸங்ஸு கோ² தா பி⁴க்கு²னியோ ஆயஸ்மந்தங் நந்த³கங் தூ³ரதோவ ஆக³ச்ச²ந்தங். தி³ஸ்வான ஆஸனங் பஞ்ஞாபேஸுங், உத³கஞ்ச பாதா³னங் உபட்ட²பேஸுங். நிஸீதி³ கோ² ஆயஸ்மா நந்த³கோ பஞ்ஞத்தே ஆஸனே. நிஸஜ்ஜ பாதே³ பக்கா²லேஸி. தாபி கோ² பி⁴க்கு²னியோ ஆயஸ்மந்தங் நந்த³கங் அபி⁴வாதெ³த்வா ஏகமந்தங் நிஸீதி³ங்ஸு. ஏகமந்தங் நிஸின்னா கோ² தா பி⁴க்கு²னியோ ஆயஸ்மா நந்த³கோ ஏதத³வோச – ‘‘படிபுச்ச²கதா² கோ², ப⁴கி³னியோ, ப⁴விஸ்ஸதி. தத்த² ஆஜானந்தீஹி – ‘ஆஜானாமா’ திஸ்ஸ வசனீயங், ந ஆஜானந்தீஹி – ‘ந ஆஜானாமா’ திஸ்ஸ வசனீயங். யஸ்ஸா வா பனஸ்ஸ கங்கா² வா விமதி வா அஹமேவ தத்த² படிபுச்சி²தப்³போ³ – ‘இத³ங், ப⁴ந்தே, கத²ங்; இமஸ்ஸ க்வத்தோ²’’’தி? ‘‘எத்தகேனபி மயங், ப⁴ந்தே, அய்யஸ்ஸ நந்த³கஸ்ஸ அத்தமனா அபி⁴ரத்³தா⁴ அபி⁴னந்தா³ம (ஸ்யா॰ கங்॰) யங் நோ அய்யோ நந்த³கோ பவாரேதீ’’தி.
399. ‘‘தங் கிங் மஞ்ஞத², ப⁴கி³னியோ, சக்கு² நிச்சங் வா அனிச்சங் வா’’தி? ‘‘அனிச்சங், ப⁴ந்தே’’. ‘‘யங் பனானிச்சங் து³க்க²ங் வா தங் ஸுக²ங் வா’’தி? ‘‘து³க்க²ங், ப⁴ந்தே’’. ‘‘யங் பனானிச்சங் து³க்க²ங் விபரிணாமத⁴ம்மங், கல்லங் நு தங் ஸமனுபஸ்ஸிதுங் – ‘ஏதங் மம, ஏஸோஹமஸ்மி, ஏஸோ மே அத்தா’’’தி? ‘‘நோ ஹேதங் , ப⁴ந்தே’’. ‘‘தங் கிங் மஞ்ஞத², ப⁴கி³னியோ, ஸோதங் நிச்சங் வா அனிச்சங் வா’’தி? ‘‘அனிச்சங், ப⁴ந்தே…பே॰… கா⁴னங் நிச்சங் வா அனிச்சங் வா’’தி? ‘‘அனிச்சங், ப⁴ந்தே’’… ‘‘ஜிவ்ஹா நிச்சா வா அனிச்சா வா’’தி? ‘‘அனிச்சா, ப⁴ந்தே’’… ‘‘காயோ நிச்சோ வா அனிச்சோ வா’’தி? ‘‘அனிச்சோ, ப⁴ந்தே’’… ‘‘மனோ நிச்சோ வா அனிச்சோ வா’’தி? ‘‘அனிச்சோ, ப⁴ந்தே’’. ‘‘யங் பனானிச்சங் து³க்க²ங் வா தங் ஸுக²ங் வா’’தி? ‘‘து³க்க²ங், ப⁴ந்தே’’. ‘‘யங் பனானிச்சங் து³க்க²ங் விபரிணாமத⁴ம்மங் , கல்லங் நு தங் ஸமனுபஸ்ஸிதுங் – ‘ஏதங் மம, ஏஸோஹமஸ்மி, ஏஸோ மே அத்தா’’’தி? ‘‘நோ ஹேதங், ப⁴ந்தே’’. ‘‘தங் கிஸ்ஸ ஹேது’’? ‘‘புப்³பே³வ நோ ஏதங், ப⁴ந்தே, யதா²பூ⁴தங் ஸம்மப்பஞ்ஞாய ஸுதி³ட்ட²ங் – ‘இதிபிமே ச² அஜ்ஜ²த்திகா ஆயதனா அனிச்சா’’’தி. ‘‘ஸாது⁴, ஸாது⁴, ப⁴கி³னியோ! ஏவஞ்ஹேதங், ப⁴கி³னியோ, ஹோதி அரியஸாவகஸ்ஸ யதா²பூ⁴தங் ஸம்மப்பஞ்ஞாய பஸ்ஸதோ’’.
400. ‘‘தங் கிங் மஞ்ஞத², ப⁴கி³னியோ, ரூபா நிச்சா வா அனிச்சா வா’’தி? ‘‘அனிச்சா, ப⁴ந்தே’’. ‘‘யங் பனானிச்சங் து³க்க²ங் வா தங் ஸுக²ங் வா’’தி? ‘‘து³க்க²ங், ப⁴ந்தே’’. ‘‘யங் பனானிச்சங் து³க்க²ங் விபரிணாமத⁴ம்மங், கல்லங் நு தங் ஸமனுபஸ்ஸிதுங் – ‘ஏதங் மம, ஏஸோஹமஸ்மி, ஏஸோ மே அத்தா’’’தி? ‘‘நோ ஹேதங், ப⁴ந்தே’’. ‘‘தங் கிங் மஞ்ஞத², ப⁴கி³னியோ, ஸத்³தா³ நிச்சா வா அனிச்சா வா’’தி? ‘‘அனிச்சா, ப⁴ந்தே…பே॰… க³ந்தா⁴ நிச்சா வா அனிச்சா வா’’தி? ‘‘அனிச்சா, ப⁴ந்தே’’… ‘‘ரஸா நிச்சா வா அனிச்சா வா’’தி? ‘‘அனிச்சா, ப⁴ந்தே’’… ‘‘பொ²ட்ட²ப்³பா³ நிச்சா வா அனிச்சா வா’’தி? ‘‘அனிச்சா , ப⁴ந்தே’’… ‘‘த⁴ம்மா நிச்சா வா அனிச்சா வா’’தி? ‘‘அனிச்சா, ப⁴ந்தே’’. ‘‘யங் பனானிச்சங் து³க்க²ங் வா தங் ஸுக²ங் வா’’தி? ‘‘து³க்க²ங், ப⁴ந்தே’’. ‘‘யங் பனானிச்சங் து³க்க²ங் விபரிணாமத⁴ம்மங், கல்லங் நு தங் ஸமனுபஸ்ஸிதுங் – ‘ஏதங் மம, ஏஸோஹமஸ்மி, ஏஸோ மே அத்தா’’’தி? ‘‘நோ ஹேதங், ப⁴ந்தே’’. ‘‘தங் கிஸ்ஸ ஹேது’’? ‘‘புப்³பே³வ நோ ஏதங், ப⁴ந்தே, யதா²பூ⁴தங் ஸம்மப்பஞ்ஞாய ஸுதி³ட்ட²ங் – ‘இதிபிமே ச² பா³ஹிரா ஆயதனா அனிச்சா’’’தி . ‘‘ஸாது⁴, ஸாது⁴, ப⁴கி³னியோ! ஏவஞ்ஹேதங், ப⁴கி³னியோ, ஹோதி அரியஸாவகஸ்ஸ யதா²பூ⁴தங் ஸம்மப்பஞ்ஞாய பஸ்ஸதோ’’.
401. ‘‘தங் கிங் மஞ்ஞத², ப⁴கி³னியோ, சக்கு²விஞ்ஞாணங் நிச்சங் வா அனிச்சங் வா’’தி? ‘‘அனிச்சங், ப⁴ந்தே’’. ‘‘யங் பனானிச்சங் து³க்க²ங் வா தங் ஸுக²ங் வா’’தி? ‘‘து³க்க²ங், ப⁴ந்தே’’. ‘‘யங் பனானிச்சங் து³க்க²ங் விபரிணாமத⁴ம்மங், கல்லங் நு தங் ஸமனுபஸ்ஸிதுங் – ‘ஏதங் மம, ஏஸோஹமஸ்மி, ஏஸோ மே அத்தா’’’தி? ‘‘நோ ஹேதங், ப⁴ந்தே’’. ‘‘தங் கிங் மஞ்ஞத², ப⁴கி³னியோ, ஸோதவிஞ்ஞாணங் நிச்சங் வா அனிச்சங் வா’’தி? ‘‘அனிச்சங், ப⁴ந்தே…பே॰… கா⁴னவிஞ்ஞாணங் நிச்சங் வா அனிச்சங் வா’’தி? ‘‘அனிச்சங், ப⁴ந்தே’’… ‘‘ஜிவ்ஹாவிஞ்ஞாணங் நிச்சங் வா அனிச்சங் வா’’தி? ‘‘அனிச்சங், ப⁴ந்தே’’… ‘‘காயவிஞ்ஞாணங் நிச்சங் வா அனிச்சங் வா’’தி? ‘‘அனிச்சங், ப⁴ந்தே’’… ‘‘மனோவிஞ்ஞாணங் நிச்சங் வா அனிச்சங் வா’’தி? ‘‘அனிச்சங், ப⁴ந்தே’’. ‘‘யங் பனானிச்சங் து³க்க²ங் வா தங் ஸுக²ங் வாதி’’? ‘‘து³க்க²ங், ப⁴ந்தே’’. ‘‘யங் பனானிச்சங் து³க்க²ங் விபரிணாமத⁴ம்மங், கல்லங் நு தங் ஸமனுபஸ்ஸிதுங் – ‘ஏதங் மம, ஏஸோஹமஸ்மி, ஏஸோ மே அத்தா’’’தி? ‘‘நோ ஹேதங், ப⁴ந்தே’’. ‘‘தங் கிஸ்ஸ ஹேது’’? ‘‘புப்³பே³வ நோ ஏதங், ப⁴ந்தே, யதா²பூ⁴தங் ஸம்மப்பஞ்ஞாய ஸுதி³ட்ட²ங் – ‘இதிபிமே ச² விஞ்ஞாணகாயா அனிச்சா’’’தி. ‘‘ஸாது⁴, ஸாது⁴, ப⁴கி³னியோ! ஏவஞ்ஹேதங், ப⁴கி³னியோ, ஹோதி அரியஸாவகஸ்ஸ யதா²பூ⁴தங் ஸம்மப்பஞ்ஞாய பஸ்ஸதோ’’.
402. ‘‘ஸெய்யதா²பி , ப⁴கி³னியோ, தேலப்பதீ³பஸ்ஸ ஜா²யதோ தேலம்பி அனிச்சங் விபரிணாமத⁴ம்மங், வட்டிபி அனிச்சா விபரிணாமத⁴ம்மா, அச்சிபி அனிச்சா விபரிணாமத⁴ம்மா, ஆபா⁴பி அனிச்சா விபரிணாமத⁴ம்மா. யோ நு கோ², ப⁴கி³னியோ, ஏவங் வதெ³ய்ய – ‘அமுஸ்ஸ தேலப்பதீ³பஸ்ஸ ஜா²யதோ தேலம்பி அனிச்சங் விபரிணாமத⁴ம்மங், வட்டிபி அனிச்சா விபரிணாமத⁴ம்மா, அச்சிபி அனிச்சா விபரிணாமத⁴ம்மா; யா ச க்²வாஸ்ஸ ஆபா⁴ ஸா நிச்சா து⁴வா ஸஸ்ஸதா அவிபரிணாமத⁴ம்மா’தி; ஸம்மா நு கோ² ஸோ, ப⁴கி³னியோ, வத³மானோ வதெ³ய்யா’’தி? ‘‘நோ ஹேதங், ப⁴ந்தே’’. ‘‘தங் கிஸ்ஸ ஹேது’’? ‘‘அமுஸ்ஸ ஹி, ப⁴ந்தே, தேலப்பதீ³பஸ்ஸ ஜா²யதோ தேலம்பி அனிச்சங் விபரிணாமத⁴ம்மங், வட்டிபி அனிச்சா விபரிணாமத⁴ம்மா, அச்சிபி அனிச்சா விபரிணாமத⁴ம்மா; பகே³வஸ்ஸ ஆபா⁴ அனிச்சா விபரிணாமத⁴ம்மா’’தி. ‘‘ஏவமேவ கோ², ப⁴கி³னியோ, யோ நு கோ² ஏவங் வதெ³ய்ய – ‘ச² கோ²மே அஜ்ஜ²த்திகா ஆயதனா அனிச்சா அனிச்சா விபரிணாமத⁴ம்மா (?); யஞ்ச கோ² ச² அஜ்ஜ²த்திகே ஆயதனே படிச்ச படிஸங்வேதே³தி ஸுக²ங் வா து³க்க²ங் வா அது³க்க²மஸுக²ங் வா தங் நிச்சங் து⁴வங் ஸஸ்ஸதங் அவிபரிணாமத⁴ம்ம’ந்தி; ஸம்மா நு கோ² ஸோ, ப⁴கி³னியோ, வத³மானோ வதெ³ய்யா’’தி? ‘‘நோ ஹேதங், ப⁴ந்தே’’. ‘‘தங் கிஸ்ஸ ஹேது’’? ‘‘தஜ்ஜங் தஜ்ஜங், ப⁴ந்தே, பச்சயங் படிச்ச தஜ்ஜா தஜ்ஜா வேத³னா உப்பஜ்ஜந்தி. தஜ்ஜஸ்ஸ தஜ்ஜஸ்ஸ பச்சயஸ்ஸ நிரோதா⁴ தஜ்ஜா தஜ்ஜா வேத³னா நிருஜ்ஜ²ந்தீ’’தி. ‘‘ஸாது⁴, ஸாது⁴, ப⁴கி³னியோ! ஏவஞ்ஹேதங், ப⁴கி³னியோ, ஹோதி அரியஸாவகஸ்ஸ யதா²பூ⁴தங் ஸம்மப்பஞ்ஞாய பஸ்ஸதோ’’.
403. ‘‘ஸெய்யதா²பி, ப⁴கி³னியோ, மஹதோ ருக்க²ஸ்ஸ திட்ட²தோ ஸாரவதோ மூலம்பி அனிச்சங் விபரிணாமத⁴ம்மங், க²ந்தோ⁴பி அனிச்சோ விபரிணாமத⁴ம்மோ, ஸாகா²பலாஸம்பி அனிச்சங் விபரிணாமத⁴ம்மங், சா²யாபி அனிச்சா விபரிணாமத⁴ம்மா. யோ நு கோ², ப⁴கி³னியோ, ஏவங் வதெ³ய்ய – ‘அமுஸ்ஸ மஹதோ ருக்க²ஸ்ஸ திட்ட²தோ ஸாரவதோ மூலம்பி அனிச்சங் விபரிணாமத⁴ம்மங், க²ந்தோ⁴பி அனிச்சோ விபரிணாமத⁴ம்மோ, ஸாகா²பலாஸம்பி அனிச்சங் விபரிணாமத⁴ம்மங், யா ச க்²வாஸ்ஸ சா²யா ஸா நிச்சா து⁴வா ஸஸ்ஸதா அவிபரிணாமத⁴ம்மா’தி; ஸம்மா நு கோ² ஸோ, ப⁴கி³னியோ, வத³மானோ வதெ³ய்யா’’தி? ‘‘நோ ஹேதங், ப⁴ந்தே’’. ‘‘தங் கிஸ்ஸ ஹேது’’? ‘‘அமுஸ்ஸ ஹி, ப⁴ந்தே, மஹதோ ருக்க²ஸ்ஸ திட்ட²தோ ஸாரவதோ மூலம்பி அனிச்சங் விபரிணாமத⁴ம்மங், க²ந்தோ⁴பி அனிச்சோ விபரிணாமத⁴ம்மோ, ஸாகா²பலாஸம்பி அனிச்சங் விபரிணாமத⁴ம்மங்; பகே³வஸ்ஸ சா²யா அனிச்சா விபரிணாமத⁴ம்மா’’தி. ‘‘ஏவமேவ கோ², ப⁴கி³னியோ, யோ நு கோ² ஏவங் வதெ³ய்ய – ‘ச² கோ²மே பா³ஹிரா ஆயதனா அனிச்சா அனிச்சா விபரிணாமத⁴ம்மா (ஸீ॰ பீ॰). யஞ்ச கோ² ச² பா³ஹிரே ஆயதனே படிச்ச படிஸங்வேதே³தி ஸுக²ங் வா து³க்க²ங் வா அது³க்க²மஸுக²ங் வா தங் நிச்சங் து⁴வங் ஸஸ்ஸதங் அவிபரிணாமத⁴ம்ம’ந்தி; ஸம்மா நு கோ² ஸோ, ப⁴கி³னியோ, வத³மானோ வதெ³ய்யா’’தி? ‘‘நோ ஹேதங், ப⁴ந்தே’’. ‘‘தங் கிஸ்ஸ ஹேது’’? ‘‘தஜ்ஜங் தஜ்ஜங், ப⁴ந்தே, பச்சயங் படிச்ச தஜ்ஜா தஜ்ஜா வேத³னா உப்பஜ்ஜந்தி. தஜ்ஜஸ்ஸ தஜ்ஜஸ்ஸ பச்சயஸ்ஸ நிரோதா⁴ தஜ்ஜா தஜ்ஜா வேத³னா நிருஜ்ஜ²ந்தீ’’தி. ‘‘ஸாது⁴, ஸாது⁴, ப⁴கி³னியோ! ஏவஞ்ஹேதங், ப⁴கி³னியோ, ஹோதி அரியஸாவகஸ்ஸ யதா²பூ⁴தங் ஸம்மப்பஞ்ஞாய பஸ்ஸதோ’’.
404. ‘‘ஸெய்யதா²பி, ப⁴கி³னியோ, த³க்கோ² கோ³கா⁴தகோ வா கோ³கா⁴தகந்தேவாஸீ வா கா³விங் வதி⁴த்வா திண்ஹேன கோ³விகந்தனேன கா³விங் ஸங்கந்தெய்ய அனுபஹச்ச அந்தரங் மங்ஸகாயங் அனுபஹச்ச பா³ஹிரங் சம்மகாயங். யங் யதே³வ தத்த² அந்தரா விலிமங்ஸங் விலிமங் (ஸீ॰ பீ॰ க॰) அந்தரா ந்ஹாரு அந்தரா ப³ந்த⁴னங் தங் ததே³வ திண்ஹேன கோ³விகந்தனேன ஸஞ்சி²ந்தெ³ய்ய ஸங்கந்தெய்ய ஸம்பகந்தெய்ய ஸம்பரிகந்தெய்ய. ஸஞ்சி²ந்தி³த்வா ஸங்கந்தித்வா ஸம்பகந்தித்வா ஸம்பரிகந்தித்வா விது⁴னித்வா பா³ஹிரங் சம்மகாயங் தேனேவ சம்மேன தங் கா³விங் படிச்சா²தெ³த்வா ஏவங் வதெ³ய்ய – ‘ததே²வாயங் கா³வீ ஸங்யுத்தா இமினாவ சம்மேனா’தி; ஸம்மா நு கோ² ஸோ, ப⁴கி³னியோ, வத³மானோ வதெ³ய்யா’’தி? ‘‘நோ ஹேதங், ப⁴ந்தே’’. ‘‘தங் கிஸ்ஸ ஹேது’’? ‘‘அமு ஹி, ப⁴ந்தே, த³க்கோ² கோ³கா⁴தகோ வா கோ³கா⁴தகந்தேவாஸீ வா கா³விங் வதி⁴த்வா திண்ஹேன கோ³விகந்தனேன கா³விங் ஸங்கந்தெய்ய அனுபஹச்ச அந்தரங் மங்ஸகாயங் அனுபஹச்ச பா³ஹிரங் சம்மகாயங். யங் யதே³வ தத்த² அந்தரா விலிமங்ஸங் அந்தரா ந்ஹாரு அந்தரா ப³ந்த⁴னங் தங் ததே³வ திண்ஹேன கோ³விகந்தனேன ஸஞ்சி²ந்தெ³ய்ய ஸங்கந்தெய்ய ஸம்பகந்தெய்ய ஸம்பரிகந்தெய்ய. ஸஞ்சி²ந்தி³த்வா ஸங்கந்தித்வா ஸம்பகந்தித்வா ஸம்பரிகந்தித்வா விது⁴னித்வா பா³ஹிரங் சம்மகாயங் தேனேவ சம்மேன தங் கா³விங் படிச்சா²தெ³த்வா கிஞ்சாபி ஸோ ஏவங் வதெ³ய்ய – ‘ததே²வாயங் கா³வீ ஸங்யுத்தா இமினாவ சம்மேனா’தி; அத² கோ² ஸா கா³வீ விஸங்யுத்தா தேனேவ சம்மேனா’’தி.
‘‘உபமா கோ² மே அயங், ப⁴கி³னியோ, கதா அத்த²ஸ்ஸ விஞ்ஞாபனாய. அயமேவெத்த² அத்தோ²; ‘அந்தரா மங்ஸகாயோ’தி கோ², ப⁴கி³னியோ, ச²ன்னேதங் அஜ்ஜ²த்திகானங் ஆயதனானங் அதி⁴வசனங்; ‘பா³ஹிரோ சம்மகாயோ’தி கோ² ப⁴கி³னியோ, ச²ன்னேதங் பா³ஹிரானங் ஆயதனானங் அதி⁴வசனங்; ‘அந்தரா விலிமங்ஸங், அந்தரா ந்ஹாரு, அந்தரா ப³ந்த⁴ன’ந்தி கோ², ப⁴கி³னியோ, நந்தீ³ராக³ஸ்ஸேதங் அதி⁴வசனங்; ‘திண்ஹங் கோ³விகந்தன’ந்தி கோ², ப⁴கி³னியோ, அரியாயேதங் பஞ்ஞாய அதி⁴வசனங்; யாயங் அரியா பஞ்ஞா அந்தரா கிலேஸங் அந்தரா ஸங்யோஜனங் அந்தரா ப³ந்த⁴னங் ஸஞ்சி²ந்த³தி ஸங்கந்ததி ஸம்பகந்ததி ஸம்பரிகந்ததி.
405. ‘‘ஸத்த கோ² பனிமே, ப⁴கி³னியோ, பொ³ஜ்ஜ²ங்கா³, யேஸங் பா⁴விதத்தா ப³ஹுலீகதத்தா பி⁴க்கு² ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி. கதமே ஸத்த? இத⁴, ப⁴கி³னியோ, பி⁴க்கு² ஸதிஸம்பொ³ஜ்ஜ²ங்க³ங் பா⁴வேதி விவேகனிஸ்ஸிதங் விராக³னிஸ்ஸிதங் நிரோத⁴னிஸ்ஸிதங் வொஸ்ஸக்³க³பரிணாமிங், த⁴ம்மவிசயஸம்பொ³ஜ்ஜ²ங்க³ங் பா⁴வேதி…பே॰… வீரியஸம்பொ³ஜ்ஜ²ங்க³ங் பா⁴வேதி… பீதிஸம்பொ³ஜ்ஜ²ங்க³ங் பா⁴வேதி… பஸ்ஸத்³தி⁴ஸம்பொ³ஜ்ஜ²ங்க³ங் பா⁴வேதி… ஸமாதி⁴ஸம்பொ³ஜ்ஜ²ங்க³ங் பா⁴வேதி… உபெக்கா²ஸம்பொ³ஜ்ஜ²ங்க³ங் பா⁴வேதி விவேகனிஸ்ஸிதங் விராக³னிஸ்ஸிதங் நிரோத⁴னிஸ்ஸிதங் வொஸ்ஸக்³க³பரிணாமிங். இமே கோ², ப⁴கி³னியோ, ஸத்த பொ³ஜ்ஜ²ங்கா³, யேஸங் பா⁴விதத்தா ப³ஹுலீகதத்தா பி⁴க்கு² ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரதீ’’தி.
406. அத² கோ² ஆயஸ்மா நந்த³கோ தா பி⁴க்கு²னியோ இமினா ஓவாதே³ன ஓவதி³த்வா உய்யோஜேஸி – ‘‘க³ச்ச²த², ப⁴கி³னியோ; காலோ’’தி. அத² கோ² தா பி⁴க்கு²னியோ ஆயஸ்மதோ நந்த³கஸ்ஸ பா⁴ஸிதங் அபி⁴னந்தி³த்வா அனுமோதி³த்வா உட்டா²யாஸனா ஆயஸ்மந்தங் நந்த³கங் அபி⁴வாதெ³த்வா பத³க்கி²ணங் கத்வா யேன ப⁴க³வா தேனுபஸங்கமிங்ஸு; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் அட்ட²ங்ஸு. ஏகமந்தங் டி²தா கோ² தா பி⁴க்கு²னியோ ப⁴க³வா ஏதத³வோச – ‘‘க³ச்ச²த², பி⁴க்கு²னியோ; காலோ’’தி. அத² கோ² தா பி⁴க்கு²னியோ ப⁴க³வந்தங் அபி⁴வாதெ³த்வா பத³க்கி²ணங் கத்வா பக்கமிங்ஸு. அத² கோ² ப⁴க³வா அசிரபக்கந்தீஸு தாஸு பி⁴க்கு²னீஸு பி⁴க்கூ² ஆமந்தேஸி – ‘‘ஸெய்யதா²பி, பி⁴க்க²வே, தத³ஹுபோஸதே² சாதுத்³த³ஸே ந ஹோதி ப³ஹுனோஜனஸ்ஸ கங்கா² வா விமதி வா – ‘ஊனோ நு கோ² சந்தோ³, புண்ணோ நு கோ² சந்தோ³’தி, அத² கோ² ஊனோ சந்தொ³த்வேவ ஹோதி. ஏவமேவ கோ², பி⁴க்க²வே, தா பி⁴க்கு²னியோ நந்த³கஸ்ஸ த⁴ம்மதே³ஸனாய அத்தமனா ஹொந்தி நோ ச கோ² பரிபுண்ணஸங்கப்பா’’தி.
407. அத² கோ² ப⁴க³வா ஆயஸ்மந்தங் நந்த³கங் ஆமந்தேஸி – ‘‘தேன ஹி த்வங், நந்த³க, ஸ்வேபி தா பி⁴க்கு²னியோ தேனேவோவாதே³ன ஓவதெ³ய்யாஸீ’’தி. ‘‘ஏவங் , ப⁴ந்தே’’தி கோ² ஆயஸ்மா நந்த³கோ ப⁴க³வதோ பச்சஸ்ஸோஸி. அத² கோ² ஆயஸ்மா நந்த³கோ தஸ்ஸா ரத்தியா அச்சயேன புப்³ப³ண்ஹஸமயங் நிவாஸெத்வா பத்தசீவரமாதா³ய ஸாவத்தி²ங் பிண்டா³ய பாவிஸி. ஸாவத்தி²யங் பிண்டா³ய சரித்வா பச்சா²ப⁴த்தங் பிண்ட³பாதபடிக்கந்தோ அத்தது³தியோ யேன ராஜகாராமோ தேனுபஸங்கமி. அத்³த³ஸங்ஸு கோ² தா பி⁴க்கு²னியோ ஆயஸ்மந்தங் நந்த³கங் தூ³ரதோவ ஆக³ச்ச²ந்தங். தி³ஸ்வான ஆஸனங் பஞ்ஞாபேஸுங், உத³கஞ்ச பாதா³னங் உபட்ட²பேஸுங். நிஸீதி³ கோ² ஆயஸ்மா நந்த³கோ பஞ்ஞத்தே ஆஸனே. நிஸஜ்ஜ பாதே³ பக்கா²லேஸி. தாபி கோ² பி⁴க்கு²னியோ ஆயஸ்மந்தங் நந்த³கங் அபி⁴வாதெ³த்வா ஏகமந்தங் நிஸீதி³ங்ஸு. ஏகமந்தங் நிஸின்னா கோ² தா பி⁴க்கு²னியோ ஆயஸ்மா நந்த³கோ ஏதத³வோச – ‘‘படிபுச்ச²கதா² கோ², ப⁴கி³னியோ, ப⁴விஸ்ஸதி. தத்த² ஆஜானந்தீஹி ‘ஆஜானாமா’ திஸ்ஸ வசனீயங், ந ஆஜானந்தீஹி ‘ந ஆஜானாமா’ திஸ்ஸ வசனீயங். யஸ்ஸா வா பனஸ்ஸ கங்கா² வா விமதி வா, அஹமேவ தத்த² படிபுச்சி²தப்³போ³ – ‘இத³ங், ப⁴ந்தே, கத²ங்; இமஸ்ஸ க்வத்தோ²’’’தி. ‘‘எத்தகேனபி மயங், ப⁴ந்தே, அய்யஸ்ஸ நந்த³கஸ்ஸ அத்தமனா அபி⁴ரத்³தா⁴ யங் நோ அய்யோ நந்த³கோ பவாரேதீ’’தி.
408. ‘‘தங் கிங் மஞ்ஞத², ப⁴கி³னியோ, சக்கு² நிச்சங் வா அனிச்சங் வா’’தி? ‘‘அனிச்சங், ப⁴ந்தே’’. ‘‘யங் பனானிச்சங் து³க்க²ங் வா தங் ஸுக²ங் வா’’தி? ‘‘து³க்க²ங், ப⁴ந்தே’’. ‘‘யங் பனானிச்சங் து³க்க²ங் விபரிணாமத⁴ம்மங், கல்லங் நு தங் ஸமனுபஸ்ஸிதுங் – ‘ஏதங் மம, ஏஸோஹமஸ்மி, ஏஸோ மே அத்தா’’’தி? ‘‘நோ ஹேதங் , ப⁴ந்தே’’. ‘‘தங் கிங் மஞ்ஞத², ப⁴கி³னியோ, ஸோதங் நிச்சங் வா அனிச்சங் வா’’தி? ‘‘அனிச்சங், ப⁴ந்தே…பே॰… கா⁴னங் நிச்சங் வா அனிச்சங் வா’’தி? ‘‘அனிச்சங், ப⁴ந்தே… ஜிவ்ஹா… காயோ… மனோ நிச்சோ வா அனிச்சோ வா’’தி? ‘‘அனிச்சோ, ப⁴ந்தே’’. ‘‘யங் பனானிச்சங் து³க்க²ங் வா தங் ஸுக²ங் வா’’தி? ‘‘து³க்க²ங், ப⁴ந்தே’’. ‘‘யங் பனானிச்சங் து³க்க²ங் விபரிணாமத⁴ம்மங், கல்லங் நு தங் ஸமனுபஸ்ஸிதுங் – ‘ஏதங் மம, ஏஸோஹமஸ்மி, ஏஸோ மே அத்தா’’’தி? ‘‘நோ ஹேதங், ப⁴ந்தே’’. ‘‘தங் கிஸ்ஸ ஹேது’’? ‘‘புப்³பே³வ நோ ஏதங், ப⁴ந்தே, யதா²பூ⁴தங் ஸம்மப்பஞ்ஞாய ஸுதி³ட்ட²ங் – ‘இதிபிமே ச² அஜ்ஜ²த்திகா ஆயதனா அனிச்சா’’’தி. ‘‘ஸாது⁴ ஸாது⁴, ப⁴கி³னியோ! ஏவஞ்ஹேதங், ப⁴கி³னியோ, ஹோதி அரியஸாவகஸ்ஸ யதா²பூ⁴தங் ஸம்மப்பஞ்ஞாய பஸ்ஸதோ’’.
409. ‘‘தங் கிங் மஞ்ஞத², ப⁴கி³னியோ, ரூபா நிச்சா வா அனிச்சா வா’’தி? ‘‘அனிச்சா, ப⁴ந்தே’’. ‘‘யங் பனானிச்சங் து³க்க²ங் வா தங் ஸுக²ங் வா’’தி? ‘‘து³க்க²ங், ப⁴ந்தே’’. ‘‘யங் பனானிச்சங் து³க்க²ங் விபரிணாமத⁴ம்மங், கல்லங் நு தங் ஸமனுபஸ்ஸிதுங் – ‘ஏதங் மம, ஏஸோஹமஸ்மி, ஏஸோ மே அத்தா’’’தி? ‘‘நோ ஹேதங், ப⁴ந்தே’’. ‘‘தங் கிங் மஞ்ஞத², ப⁴கி³னியோ, ஸத்³தா³ நிச்சா வா அனிச்சா வா’’தி? ‘‘அனிச்சா, ப⁴ந்தே…பே॰… க³ந்தா⁴ நிச்சா வா அனிச்சா வா’’தி? ‘‘அனிச்சா, ப⁴ந்தே… ரஸா நிச்சா வா அனிச்சா வா’’தி? ‘‘அனிச்சா, ப⁴ந்தே… பொ²ட்ட²ப்³பா³ நிச்சா வா அனிச்சா வா’’தி ? ‘‘அனிச்சா, ப⁴ந்தே… த⁴ம்மா நிச்சா வா அனிச்சா வா’’தி? ‘‘அனிச்சா, ப⁴ந்தே’’. ‘‘யங் பனானிச்சங் து³க்க²ங் வா தங் ஸுக²ங் வா’’தி? ‘‘து³க்க²ங், ப⁴ந்தே’’. ‘‘யங் பனானிச்சங் து³க்க²ங் விபரிணாமத⁴ம்மங், கல்லங் நு தங் ஸமனுபஸ்ஸிதுங் – ‘ஏதங் மம, ஏஸோஹமஸ்மி, ஏஸோ மே அத்தா’’’தி? ‘‘நோ ஹேதங், ப⁴ந்தே’’. ‘‘தங் கிஸ்ஸ ஹேது’’? ‘‘புப்³பே³வ நோ ஏதங், ப⁴ந்தே, யதா²பூ⁴தங் ஸம்மப்பஞ்ஞாய ஸுதி³ட்ட²ங் – ‘இதிபிமே ச² பா³ஹிரா ஆயதனா அனிச்சா’’’தி. ‘‘ஸாது⁴ ஸாது⁴, ப⁴கி³னியோ! ஏவஞ்ஹேதங், ப⁴கி³னியோ, ஹோதி அரியஸாவகஸ்ஸ யதா²பூ⁴தங் ஸம்மப்பஞ்ஞாய பஸ்ஸதோ’’.
410. ‘‘தங் கிங் மஞ்ஞத², ப⁴கி³னியோ, சக்கு²விஞ்ஞாணங் நிச்சங் வா அனிச்சங் வா’’தி? ‘‘அனிச்சங், ப⁴ந்தே…பே॰… ஸோதவிஞ்ஞாணங் நிச்சங் வா அனிச்சங் வா’’தி? ‘‘அனிச்சங், ப⁴ந்தே… கா⁴னவிஞ்ஞாணங் நிச்சங் வா அனிச்சங் வா’’தி? ‘‘அனிச்சங், ப⁴ந்தே… ஜிவ்ஹாவிஞ்ஞாணங் நிச்சங் வா அனிச்சங் வா’’தி? ‘‘அனிச்சங், ப⁴ந்தே… காயவிஞ்ஞாணங் நிச்சங் வா அனிச்சங் வா’’தி? ‘‘அனிச்சங், ப⁴ந்தே… மனோவிஞ்ஞாணங் நிச்சங் வா அனிச்சங் வா’’தி? ‘‘அனிச்சங், ப⁴ந்தே’’. ‘‘யங் பனானிச்சங் து³க்க²ங் வா தங் ஸுக²ங் வா’’தி? ‘‘து³க்க²ங், ப⁴ந்தே’’. ‘‘யங் பனானிச்சங் து³க்க²ங் விபரிணாமத⁴ம்மங், கல்லங் நு தங் ஸமனுபஸ்ஸிதுங் – ‘ஏதங் மம, ஏஸோஹமஸ்மி, ஏஸோ மே அத்தா’’’தி? ‘‘நோ ஹேதங், ப⁴ந்தே’’. ‘‘தங் கிஸ்ஸ ஹேது’’? ‘‘புப்³பே³வ நோ ஏதங், ப⁴ந்தே, யதா²பூ⁴தங் ஸம்மப்பஞ்ஞாய ஸுதி³ட்ட²ங் – ‘இதிபிமே ச² விஞ்ஞாணகாயா அனிச்சா’’’தி. ‘‘ஸாது⁴ ஸாது⁴, ப⁴கி³னியோ! ஏவஞ்ஹேதங், ப⁴கி³னியோ, ஹோதி அரியஸாவகஸ்ஸ யதா²பூ⁴தங் ஸம்மப்பஞ்ஞாய பஸ்ஸதோ’’.
411. ‘‘ஸெய்யதா²பி, ப⁴கி³னியோ, தேலப்பதீ³பஸ்ஸ ஜா²யதோ தேலம்பி அனிச்சங் விபரிணாமத⁴ம்மங், வட்டிபி அனிச்சா விபரிணாமத⁴ம்மா, அச்சிபி அனிச்சா விபரிணாமத⁴ம்மா, ஆபா⁴பி அனிச்சா விபரிணாமத⁴ம்மா. யோ நு கோ², ப⁴கி³னியோ, ஏவங் வதெ³ய்ய – ‘அமுஸ்ஸ தேலப்பதீ³பஸ்ஸ ஜா²யதோ தேலம்பி அனிச்சங் விபரிணாமத⁴ம்மங், வட்டிபி அனிச்சா விபரிணாமத⁴ம்மா, அச்சிபி அனிச்சா விபரிணாமத⁴ம்மா; யா ச க்²வாஸ்ஸ ஆபா⁴ ஸா நிச்சா து⁴வா ஸஸ்ஸதா அவிபரிணாமத⁴ம்மா’தி; ஸம்மா நு கோ² ஸோ, ப⁴கி³னியோ, வத³மானோ வதெ³ய்யா’’தி? ‘‘நோ ஹேதங், ப⁴ந்தே’’. ‘‘தங் கிஸ்ஸ ஹேது’’? ‘‘அமுஸ்ஸ ஹி, ப⁴ந்தே, தேலப்பதீ³பஸ்ஸ ஜா²யதோ தேலம்பி அனிச்சங் விபரிணாமத⁴ம்மங், வட்டிபி அனிச்சா விபரிணாமத⁴ம்மா, அச்சிபி அனிச்சா விபரிணாமத⁴ம்மா ; பகே³வஸ்ஸ ஆபா⁴ அனிச்சா விபரிணாமத⁴ம்மா’’தி. ‘‘ஏவமேவ கோ², ப⁴கி³னியோ, யோ நு கோ² ஏவங் வதெ³ய்ய – ‘ச² கோ²மே அஜ்ஜ²த்திகா ஆயதனா அனிச்சா. யஞ்ச கோ² ச² அஜ்ஜ²த்திகே ஆயதனே படிச்ச படிஸங்வேதே³தி ஸுக²ங் வா து³க்க²ங் வா அது³க்க²மஸுக²ங் வா தங் நிச்சங் து⁴வங் ஸஸ்ஸதங் அவிபரிணாமத⁴ம்ம’ந்தி; ஸம்மா நு கோ² ஸோ, ப⁴கி³னியோ, வத³மானோ வதெ³ய்யா’’தி? ‘‘நோ ஹேதங், ப⁴ந்தே’’. ‘‘தங் கிஸ்ஸ ஹேது’’? ‘‘தஜ்ஜங் தஜ்ஜங், ப⁴ந்தே, பச்சயங் படிச்ச தஜ்ஜா தஜ்ஜா வேத³னா உப்பஜ்ஜந்தி. தஜ்ஜஸ்ஸ தஜ்ஜஸ்ஸ பச்சயஸ்ஸ நிரோதா⁴ தஜ்ஜா தஜ்ஜா வேத³னா நிருஜ்ஜ²ந்தீ’’தி. ‘‘ஸாது⁴ ஸாது⁴, ப⁴கி³னியோ! ஏவஞ்ஹேதங், ப⁴கி³னியோ, ஹோதி அரியஸாவகஸ்ஸ யதா²பூ⁴தங் ஸம்மப்பஞ்ஞாய பஸ்ஸதோ’’.
412. ‘‘ஸெய்யதா²பி, ப⁴கி³னியோ, மஹதோ ருக்க²ஸ்ஸ திட்ட²தோ ஸாரவதோ மூலம்பி அனிச்சங் விபரிணாமத⁴ம்மங், க²ந்தோ⁴பி அனிச்சோ விபரிணாமத⁴ம்மோ, ஸாகா²பலாஸம்பி அனிச்சங் விபரிணாமத⁴ம்மங், சா²யாபி அனிச்சா விபரிணாமத⁴ம்மா. யோ நு கோ², ப⁴கி³னியோ, ஏவங் வதெ³ய்ய – ‘அமுஸ்ஸ மஹதோ ருக்க²ஸ்ஸ திட்ட²தோ ஸாரவதோ மூலம்பி அனிச்சங் விபரிணாமத⁴ம்மங், க²ந்தோ⁴பி அனிச்சோ விபரிணாமத⁴ம்மோ, ஸாகா²பலாஸம்பி அனிச்சங் விபரிணாமத⁴ம்மங்; யா ச க்²வாஸ்ஸ சா²யா ஸா நிச்சா து⁴வா ஸஸ்ஸதா அவிபரிணாமத⁴ம்மா’தி; ஸம்மா நு கோ² ஸோ ப⁴கி³னியோ, வத³மானோ வதெ³ய்யா’’தி? ‘‘நோ ஹேதங், ப⁴ந்தே’’. ‘‘தங் கிஸ்ஸ ஹேது’’? ‘‘அமுஸ்ஸ ஹி, ப⁴ந்தே, மஹதோ ருக்க²ஸ்ஸ திட்ட²தோ ஸாரவதோ மூலம்பி அனிச்சங் விபரிணாமத⁴ம்மங், க²ந்தோ⁴பி அனிச்சோ விபரிணாமத⁴ம்மோ, ஸாகா²பலாஸம்பி அனிச்சங் விபரிணாமத⁴ம்மங்; பகே³வஸ்ஸ சா²யா அனிச்சா விபரிணாமத⁴ம்மா’’தி. ‘‘ஏவமேவ கோ², ப⁴கி³னியோ, யோ நு கோ² ஏவங் வதெ³ய்ய – ‘ச² கோ²மே பா³ஹிரா ஆயதனா அனிச்சா. யஞ்ச கோ² பா³ஹிரே ஆயதனே படிச்ச படிஸங்வேதே³தி ஸுக²ங் வா து³க்க²ங் வா அது³க்க²மஸுக²ங் வா தங் நிச்சங் து⁴வங் ஸஸ்ஸதங் அவிபரிணாமத⁴ம்ம’ந்தி; ஸம்மா நு கோ² ஸோ, ப⁴கி³னியோ, வத³மானோ வதெ³ய்யா’’தி? ‘‘நோ ஹேதங், ப⁴ந்தே’’. ‘‘தங் கிஸ்ஸ ஹேது’’? ‘‘தஜ்ஜங் தஜ்ஜங், ப⁴ந்தே, பச்சயங் படிச்ச தஜ்ஜா தஜ்ஜா வேத³னா உப்பஜ்ஜந்தி. தஜ்ஜஸ்ஸ தஜ்ஜஸ்ஸ பச்சயஸ்ஸ நிரோதா⁴ தஜ்ஜா தஜ்ஜா வேத³னா நிருஜ்ஜ²ந்தீ’’தி. ‘‘ஸாது⁴ ஸாது⁴, ப⁴கி³னியோ! ஏவஞ்ஹேதங், ப⁴கி³னியோ, ஹோதி அரியஸாவகஸ்ஸ யதா²பூ⁴தங் ஸம்மப்பஞ்ஞாய பஸ்ஸதோ’’.
413. ‘‘ஸெய்யதா²பி, ப⁴கி³னியோ, த³க்கோ² கோ³கா⁴தகோ வா கோ³கா⁴தகந்தேவாஸீ வா கா³விங் வதி⁴த்வா திண்ஹேன கோ³விகந்தனேன கா³விங் ஸங்கந்தெய்ய அனுபஹச்ச அந்தரங் மங்ஸகாயங் அனுபஹச்ச பா³ஹிரங் சம்மகாயங். யங் யதே³வ தத்த² அந்தரா விலிமங்ஸங் அந்தரா ந்ஹாரு அந்தரா ப³ந்த⁴னங் தங் ததே³வ திண்ஹேன கோ³விகந்தனேன ஸஞ்சி²ந்தெ³ய்ய ஸங்கந்தெய்ய ஸம்பகந்தெய்ய ஸம்பரிகந்தெய்ய. ஸஞ்சி²ந்தி³த்வா ஸங்கந்தித்வா ஸம்பகந்தித்வா ஸம்பரிகந்தித்வா விது⁴னித்வா பா³ஹிரங் சம்மகாயங் தேனேவ சம்மேன தங் கா³விங் படிச்சா²தெ³த்வா ஏவங் வதெ³ய்ய – ‘ததே²வாயங் கா³வீ ஸங்யுத்தா இமினாவ சம்மேனா’தி; ஸம்மா நு கோ² ஸோ, ப⁴கி³னியோ, வத³மானோ வதெ³ய்யா’’தி? ‘‘நோ ஹேதங், ப⁴ந்தே’’. ‘‘தங் கிஸ்ஸ ஹேது’’? ‘‘அமு ஹி, ப⁴ந்தே, த³க்கோ² கோ³கா⁴தகோ வா கோ³கா⁴தகந்தேவாஸீ வா கா³விங் வதி⁴த்வா திண்ஹேன கோ³விகந்தனேன கா³விங் ஸங்கந்தெய்ய அனுபஹச்ச அந்தரங் மங்ஸகாயங் அனுபஹச்ச பா³ஹிரங் சம்மகாயங். யங் யதே³வ தத்த² அந்தரா விலிமங்ஸங் அந்தரா ந்ஹாரு அந்தரா ப³ந்த⁴னங் தங் ததே³வ திண்ஹேன கோ³விகந்தனேன ஸஞ்சி²ந்தெ³ய்ய ஸங்கந்தெய்ய ஸம்பகந்தெய்ய ஸம்பரிகந்தெய்ய. ஸஞ்சி²ந்தி³த்வா ஸங்கந்தித்வா ஸம்பகந்தித்வா ஸம்பரிகந்தித்வா விது⁴னித்வா பா³ஹிரங் சம்மகாயங் தேனேவ சம்மேன தங் கா³விங் படிச்சா²தெ³த்வா கிஞ்சாபி ஸோ ஏவங் வதெ³ய்ய – ‘ததே²வாயங் கா³வீ ஸங்யுத்தா இமினாவ சம்மேனா’தி; அத² கோ² ஸா கா³வீ விஸங்யுத்தா தேனேவ சம்மேனா’’தி.
‘‘உபமா கோ² மே அயங், ப⁴கி³னியோ, கதா அத்த²ஸ்ஸ விஞ்ஞாபனாய அயமேவெத்த² அத்தோ². ‘அந்தரா மங்ஸகாயோ’தி கோ², ப⁴கி³னியோ, ச²ன்னேதங் அஜ்ஜ²த்திகானங் ஆயதனானங் அதி⁴வசனங்; ‘பா³ஹிரோ சம்மகாயோ’தி கோ², ப⁴கி³னியோ, ச²ன்னேதங் பா³ஹிரானங் ஆயதனானங் அதி⁴வசனங்; ‘அந்தரா விலிமங்ஸங் அந்தரா ந்ஹாரு அந்தரா ப³ந்த⁴ன’ந்தி கோ², ப⁴கி³னியோ, நந்தீ³ராக³ஸ்ஸேதங் அதி⁴வசனங்; ‘திண்ஹங் கோ³விகந்தன’ந்தி கோ², ப⁴கி³னியோ, அரியாயேதங் பஞ்ஞாய அதி⁴வசனங்; யாயங் அரியா பஞ்ஞா அந்தரா கிலேஸங் அந்தரா ஸங்யோஜனங் அந்தரா ப³ந்த⁴னங் ஸஞ்சி²ந்த³தி ஸங்கந்ததி ஸம்பகந்ததி ஸம்பரிகந்ததி.
414. ‘‘ஸத்த கோ² பனிமே, ப⁴கி³னியோ, பொ³ஜ்ஜ²ங்கா³, யேஸங் பா⁴விதத்தா ப³ஹுலீகதத்தா பி⁴க்கு² ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி. கதமே ஸத்த? இத⁴, ப⁴கி³னியோ, பி⁴க்கு² ஸதிஸம்பொ³ஜ்ஜ²ங்க³ங் பா⁴வேதி விவேகனிஸ்ஸிதங் விராக³னிஸ்ஸிதங் நிரோத⁴னிஸ்ஸிதங் வொஸ்ஸக்³க³பரிணாமிங். த⁴ம்மவிசயஸம்பொ³ஜ்ஜ²ங்க³ங் பா⁴வேதி…பே॰… வீரியஸம்பொ³ஜ்ஜ²ங்க³ங் பா⁴வேதி… பீதிஸம்பொ³ஜ்ஜ²ங்க³ங் பா⁴வேதி… பஸ்ஸத்³தி⁴ஸம்பொ³ஜ்ஜ²ங்க³ங் பா⁴வேதி… ஸமாதி⁴ஸம்பொ³ஜ்ஜ²ங்க³ங் பா⁴வேதி… உபெக்கா²ஸம்பொ³ஜ்ஜ²ங்க³ங் பா⁴வேதி விவேகனிஸ்ஸிதங் விராக³னிஸ்ஸிதங் நிரோத⁴னிஸ்ஸிதங் வொஸ்ஸக்³க³பரிணாமிங். இமே கோ², ப⁴கி³னியோ, ஸத்த பொ³ஜ்ஜ²ங்கா³ யேஸங் பா⁴விதத்தா ப³ஹுலீகதத்தா பி⁴க்கு² ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரதீ’’தி.
415. அத² கோ² ஆயஸ்மா நந்த³கோ தா பி⁴க்கு²னியோ இமினா ஓவாதே³ன ஓவதி³த்வா உய்யோஜேஸி – ‘‘க³ச்ச²த², ப⁴கி³னியோ; காலோ’’தி. அத² கோ² தா பி⁴க்கு²னியோ ஆயஸ்மதோ நந்த³கஸ்ஸ பா⁴ஸிதங் அபி⁴னந்தி³த்வா அனுமோதி³த்வா உட்டா²யாஸனா ஆயஸ்மந்தங் நந்த³கங் அபி⁴வாதெ³த்வா பத³க்கி²ணங் கத்வா யேன ப⁴க³வா தேனுபஸங்கமிங்ஸு; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் அட்ட²ங்ஸு. ஏகமந்தங் டி²தா கோ² தா பி⁴க்கு²னியோ ப⁴க³வா ஏதத³வோச –‘‘க³ச்ச²த², பி⁴க்கு²னியோ; காலோ’’தி. அத² கோ² தா பி⁴க்கு²னியோ ப⁴க³வந்தங் அபி⁴வாதெ³த்வா பத³க்கி²ணங் கத்வா பக்கமிங்ஸு. அத² கோ² ப⁴க³வா அசிரபக்கந்தீஸு தாஸு பி⁴க்கு²னீஸு பி⁴க்கூ² ஆமந்தேஸி – ‘‘ஸெய்யதா²பி, பி⁴க்க²வே, தத³ஹுபோஸதே² பன்னரஸே ந ஹோதி ப³ஹுனோ ஜனஸ்ஸ கங்கா² வா விமதி வா – ‘ஊனோ நு கோ² சந்தோ³, புண்ணோ நு கோ² சந்தோ³’தி, அத² கோ² புண்ணோ சந்தொ³த்வேவ ஹோதி; ஏவமேவ கோ², பி⁴க்க²வே, தா பி⁴க்கு²னியோ நந்த³கஸ்ஸ த⁴ம்மதே³ஸனாய அத்தமனா சேவ பரிபுண்ணஸங்கப்பா ச. தாஸங், பி⁴க்க²வே, பஞ்சன்னங் பி⁴க்கு²னிஸதானங் யா பச்சி²மிதா பி⁴க்கு²னீ ஸா யா பச்சி²மா பி⁴க்கு²னீ, ஸா (ஸீ॰ ஸ்யா॰ கங்॰ பீ॰), யா பச்சி²மிகா, தா பி⁴க்கு²னியோ (க॰) ஸோதாபன்னா அவினிபாதத⁴ம்மா நியதா ஸம்போ³தி⁴பராயனா’’தி.
இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதங் அபி⁴னந்து³ந்தி.
நந்த³கோவாத³ஸுத்தங் நிட்டி²தங் சதுத்த²ங்.
5. சூளராஹுலோவாத³ஸுத்தங்
416. ஏவங் மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. அத² கோ² ப⁴க³வதோ ரஹோக³தஸ்ஸ படிஸல்லீனஸ்ஸ ஏவங் சேதஸோ பரிவிதக்கோ உத³பாதி³ – ‘‘பரிபக்கா கோ² ராஹுலஸ்ஸ விமுத்திபரிபாசனீயா த⁴ம்மா. யங்னூனாஹங் ராஹுலங் உத்தரிங் ஆஸவானங் க²யே வினெய்ய’’ந்தி. அத² கோ² ப⁴க³வா புப்³ப³ண்ஹஸமயங் நிவாஸெத்வா பத்தசீவரமாதா³ய ஸாவத்தி²ங் பிண்டா³ய பாவிஸி. ஸாவத்தி²யங் பிண்டா³ய சரித்வா பச்சா²ப⁴த்தங் பிண்ட³பாதபடிக்கந்தோ ஆயஸ்மந்தங் ராஹுலங் ஆமந்தேஸி – ‘‘க³ண்ஹாஹி, ராஹுல, நிஸீத³னங்; யேன அந்த⁴வனங் தேனுபஸங்கமிஸ்ஸாம தி³வாவிஹாராயா’’தி . ‘‘ஏவங், ப⁴ந்தே’’தி கோ² ஆயஸ்மா ராஹுலோ ப⁴க³வதோ படிஸ்ஸுத்வா நிஸீத³னங் ஆதா³ய ப⁴க³வந்தங் பிட்டி²தோ பிட்டி²தோ அனுப³ந்தி⁴.
தேன கோ² பன ஸமயேன அனேகானி தே³வதாஸஹஸ்ஸானி ப⁴க³வந்தங் அனுப³ந்தா⁴னி ஹொந்தி – ‘‘அஜ்ஜ ப⁴க³வா ஆயஸ்மந்தங் ராஹுலங் உத்தரிங் ஆஸவானங் க²யே வினெஸ்ஸதீ’’தி. அத² கோ² ப⁴க³வா அந்த⁴வனங் அஜ்ஜோ²கா³ஹெத்வா அஞ்ஞதரஸ்மிங் ருக்க²மூலே பஞ்ஞத்தே ஆஸனே நிஸீதி³. ஆயஸ்மாபி கோ² ராஹுலோ ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னங் கோ² ஆயஸ்மந்தங் ராஹுலங் ப⁴க³வா ஏதத³வோச –
417. ‘‘தங் கிங் மஞ்ஞஸி, ராஹுல, சக்கு² நிச்சங் வா அனிச்சங் வா’’தி? ‘‘அனிச்சங், ப⁴ந்தே ’’. ‘‘யங் பனானிச்சங் து³க்க²ங் வா தங் ஸுக²ங் வா’’தி? ‘‘து³க்க²ங், ப⁴ந்தே’’. ‘‘யங் பனானிச்சங் து³க்க²ங் விபரிணாமத⁴ம்மங், கல்லங் நு தங் ஸமனுபஸ்ஸிதுங் – ‘ஏதங் மம, ஏஸோஹமஸ்மி, ஏஸோ மே அத்தா’’’தி? ‘‘நோ ஹேதங், ப⁴ந்தே’’. ‘‘தங் கிங் மஞ்ஞஸி, ராஹுல, ரூபா நிச்சா வா அனிச்சா வா’’தி? ‘‘அனிச்சா, ப⁴ந்தே’’. ‘‘யங் பனானிச்சங் து³க்க²ங் வா தங் ஸுக²ங் வா’’தி? ‘‘து³க்க²ங், ப⁴ந்தே’’. ‘‘யங் பனானிச்சங் து³க்க²ங் விபரிணாமத⁴ம்மங், கல்லங் நு தங் ஸமனுபஸ்ஸிதுங் – ‘ஏதங் மம, ஏஸோஹமஸ்மி, ஏஸோ மே அத்தா’’’தி? ‘‘நோ ஹேதங், ப⁴ந்தே’’. ‘‘தங் கிங் மஞ்ஞஸி, ராஹுல, சக்கு²விஞ்ஞாணங் நிச்சங் வா அனிச்சங் வா’’தி? ‘‘அனிச்சங், ப⁴ந்தே’’. ‘‘யங் பனானிச்சங் து³க்க²ங் வா தங் ஸுக²ங் வா’’தி? ‘‘து³க்க²ங், ப⁴ந்தே’’. ‘‘யங் பனானிச்சங் து³க்க²ங் விபரிணாமத⁴ம்மங், கல்லங் நு தங் ஸமனுபஸ்ஸிதுங் – ‘ஏதங் மம, ஏஸோஹமஸ்மி, ஏஸோ மே அத்தா’’’தி? ‘‘நோ ஹேதங், ப⁴ந்தே’’. ‘‘தங் கிங் மஞ்ஞஸி, ராஹுல, சக்கு²ஸம்ப²ஸ்ஸோ நிச்சோ வா அனிச்சோ வா’’தி? ‘‘அனிச்சோ, ப⁴ந்தே’’. ‘‘யங் பனானிச்சங், து³க்க²ங் வா தங் ஸுக²ங் வா’’தி? ‘‘து³க்க²ங், ப⁴ந்தே’’. ‘‘யங் பனானிச்சங் து³க்க²ங் விபரிணாமத⁴ம்மங், கல்லங் நு தங் ஸமனுபஸ்ஸிதுங் – ‘ஏதங் மம, ஏஸோஹமஸ்மி, ஏஸோ மே அத்தா’’’தி? ‘‘நோ ஹேதங், ப⁴ந்தே’’. ‘‘தங் கிங் மஞ்ஞஸி, ராஹுல, யமித³ங் யம்பித³ங் (ஸீ॰ க॰) சக்கு²ஸம்ப²ஸ்ஸபச்சயா உப்பஜ்ஜதி வேத³னாக³தங் ஸஞ்ஞாக³தங் ஸங்கா²ரக³தங் விஞ்ஞாணக³தங் தம்பி நிச்சங் வா அனிச்சங் வா’’தி ? ‘‘அனிச்சங், ப⁴ந்தே’’. ‘‘யங் பனானிச்சங், து³க்க²ங் வா தங் ஸுக²ங் வா’’தி? ‘‘து³க்க²ங், ப⁴ந்தே’’. ‘‘யங் பனானிச்சங் து³க்க²ங் விபரிணாமத⁴ம்மங், கல்லங் நு தங் ஸமனுபஸ்ஸிதுங் – ‘ஏதங் மம, ஏஸோஹமஸ்மி, ஏஸோ மே அத்தா’’’தி? ‘‘நோ ஹேதங், ப⁴ந்தே’’.
418. ‘‘தங் கிங் மஞ்ஞஸி ராஹுல, ஸோதங் நிச்சங் வா அனிச்சங் வா’’தி? ‘‘அனிச்சங், ப⁴ந்தே…பே॰… கா⁴னங் நிச்சங் வா அனிச்சங் வா’’தி? ‘‘அனிச்சங், ப⁴ந்தே…பே॰… ஜிவ்ஹா நிச்சா வா அனிச்சா வா’’தி? ‘‘அனிச்சா, ப⁴ந்தே…பே॰… காயோ நிச்சோ வா அனிச்சோ வா’’தி? ‘‘அனிச்சோ, ப⁴ந்தே…பே॰… மனோ நிச்சோ வா அனிச்சோ வா’’தி? ‘‘அனிச்சோ, ப⁴ந்தே’’. ‘‘யங் பனானிச்சங், து³க்க²ங் வா தங் ஸுக²ங் வா’’தி? ‘‘து³க்க²ங், ப⁴ந்தே’’. ‘‘யங் பனானிச்சங் து³க்க²ங் விபரிணாமத⁴ம்மங், கல்லங் நு தங் ஸமனுபஸ்ஸிதுங் –‘ஏதங் மம, ஏஸோஹமஸ்மி, ஏஸோ மே அத்தா’’’தி? ‘‘நோ ஹேதங், ப⁴ந்தே’’. ‘‘தங் கிங் மஞ்ஞஸி ராஹுல, த⁴ம்மா நிச்சா வா அனிச்சா வா’’தி? ‘‘அனிச்சா, ப⁴ந்தே’’. ‘‘யங் பனானிச்சங், து³க்க²ங் வா தங் ஸுக²ங் வா’’தி? ‘‘து³க்க²ங், ப⁴ந்தே’’. ‘‘யங் பனானிச்சங் து³க்க²ங் விபரிணாமத⁴ம்மங், கல்லங் நு தங் ஸமனுபஸ்ஸிதுங் – ‘ஏதங் மம, ஏஸோஹமஸ்மி, ஏஸோ மே அத்தா’’’தி? ‘‘நோ ஹேதங், ப⁴ந்தே’’. ‘‘தங் கிங் மஞ்ஞஸி ராஹுல, மனோவிஞ்ஞாணங் நிச்சங் வா அனிச்சங் வா’’தி? ‘‘அனிச்சங், ப⁴ந்தே’’. ‘‘யங் பனானிச்சங், து³க்க²ங் வா தங் ஸுக²ங் வா’’தி? ‘‘து³க்க²ங், ப⁴ந்தே’’. ‘‘யங் பனானிச்சங் து³க்க²ங் விபரிணாமத⁴ம்மங், கல்லங் நு தங் ஸமனுபஸ்ஸிதுங் – ‘ஏதங் மம, ஏஸோஹமஸ்மி, ஏஸோ மே அத்தா’’’தி? ‘‘நோ ஹேதங், ப⁴ந்தே’’. ‘‘தங் கிங் மஞ்ஞஸி ராஹுல, மனோஸம்ப²ஸ்ஸோ நிச்சோ வா அனிச்சோ வா’’தி? ‘‘அனிச்சோ, ப⁴ந்தே’’. ‘‘யங் பனானிச்சங், து³க்க²ங் வா தங் ஸுக²ங் வா’’தி? ‘‘து³க்க²ங், ப⁴ந்தே’’. ‘‘யங் பனானிச்சங் து³க்க²ங் விபரிணாமத⁴ம்மங், கல்லங் நு தங் ஸமனுபஸ்ஸிதுங் – ‘ஏதங் மம, ஏஸோஹமஸ்மி, ஏஸோ மே அத்தா’’’தி? ‘‘நோ ஹேதங், ப⁴ந்தே’’. ‘‘தங் கிங் மஞ்ஞஸி, ராஹுல, யமித³ங் மனோஸம்ப²ஸ்ஸபச்சயா உப்பஜ்ஜதி வேத³னாக³தங் ஸஞ்ஞாக³தங் ஸங்கா²ரக³தங் விஞ்ஞாணக³தங், தம்பி நிச்சங் வா அனிச்சங் வா’’தி? ‘‘அனிச்சங், ப⁴ந்தே’’. ‘‘யங் பனானிச்சங், து³க்க²ங் வா தங் ஸுக²ங் வா’’தி? ‘‘து³க்க²ங், ப⁴ந்தே’’. ‘‘யங் பனானிச்சங் து³க்க²ங் விபரிணாமத⁴ம்மங் கல்லங் நு தங் ஸமனுபஸ்ஸிதுங் – ‘ஏதங் மம, ஏஸோஹமஸ்மி, ஏஸோ மே அத்தா’’’தி? ‘‘நோ ஹேதங், ப⁴ந்தே’’.
419. ‘‘ஏவங் பஸ்ஸங், ராஹுல, ஸுதவா அரியஸாவகோ சக்கு²ஸ்மிங் சக்கு²ஸ்மிம்பி (ஸ்யா॰ கங்॰) ஏவமிதரேஸுபி நிப்³பி³ந்த³தி, ரூபேஸு நிப்³பி³ந்த³தி, சக்கு²விஞ்ஞாணே நிப்³பி³ந்த³தி, சக்கு²ஸம்ப²ஸ்ஸே நிப்³பி³ந்த³தி, யமித³ங் சக்கு²ஸம்ப²ஸ்ஸபச்சயா உப்பஜ்ஜதி வேத³னாக³தங் ஸஞ்ஞாக³தங் ஸங்கா²ரக³தங் விஞ்ஞாணக³தங் தஸ்மிம்பி நிப்³பி³ந்த³தி. ஸோதஸ்மிங் நிப்³பி³ந்த³தி, ஸத்³தே³ஸு நிப்³பி³ந்த³தி…பே॰… , கா⁴னஸ்மிங் நிப்³பி³ந்த³தி, க³ந்தே⁴ஸு நிப்³பி³ந்த³தி… ஜிவ்ஹாய நிப்³பி³ந்த³தி, ரஸேஸு நிப்³பி³ந்த³தி… காயஸ்மிங் நிப்³பி³ந்த³தி, பொ²ட்ட²ப்³பே³ஸு நிப்³பி³ந்த³தி… மனஸ்மிங் நிப்³பி³ந்த³தி, த⁴ம்மேஸு நிப்³பி³ந்த³தி, மனோவிஞ்ஞாணே நிப்³பி³ந்த³தி, மனோஸம்ப²ஸ்ஸே நிப்³பி³ந்த³தி, யமித³ங் மனோஸம்ப²ஸ்ஸபச்சயா உப்பஜ்ஜதி வேத³னாக³தங் ஸஞ்ஞாக³தங் ஸங்கா²ரக³தங் விஞ்ஞாணக³தங் தஸ்மிம்பி நிப்³பி³ந்த³தி. நிப்³பி³ந்த³ங் விரஜ்ஜதி, விராகா³ விமுச்சதி. விமுத்தஸ்மிங் விமுத்தமிதி ஞாணங் ஹோதி. ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானாதீ’’தி.
இத³மவோச ப⁴க³வா. அத்தமனோ ஆயஸ்மா ராஹுலோ ப⁴க³வதோ பா⁴ஸிதங் அபி⁴னந்தீ³தி. இமஸ்மிஞ்ச பன வெய்யாகரணஸ்மிங் ப⁴ஞ்ஞமானே ஆயஸ்மதோ ராஹுலஸ்ஸ அனுபாதா³ய ஆஸவேஹி சித்தங் விமுச்சி. தாஸஞ்ச அனேகானங் தே³வதாஸஹஸ்ஸானங் விரஜங் வீதமலங் த⁴ம்மசக்கு²ங் உத³பாதி³ – ‘யங் கிஞ்சி ஸமுத³யத⁴ம்மங் ஸப்³ப³ங் தங் நிரோத⁴த⁴ம்ம’’ந்தி.
சூளராஹுலோவாத³ஸுத்தங் நிட்டி²தங் பஞ்சமங்.
6. ச²ச²க்கஸுத்தங்
420. ஏவங் மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி. ‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச – ‘‘த⁴ம்மங் வோ, பி⁴க்க²வே, தே³ஸெஸ்ஸாமி ஆதி³கல்யாணங் மஜ்ஜே²கல்யாணங் பரியோஸானகல்யாணங் ஸாத்த²ங் ஸப்³யஞ்ஜனங், கேவலபரிபுண்ணங் பரிஸுத்³த⁴ங் ப்³ரஹ்மசரியங் பகாஸெஸ்ஸாமி, யதி³த³ங் – ச² ச²க்கானி. தங் ஸுணாத², ஸாது⁴கங் மனஸி கரோத²; பா⁴ஸிஸ்ஸாமீ’’தி. ‘‘ஏவங், ப⁴ந்தே’’தி கோ² தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –
‘‘ச² அஜ்ஜ²த்திகானி ஆயதனானி வேதி³தப்³பா³னி, ச² பா³ஹிரானி ஆயதனானி வேதி³தப்³பா³னி, ச² விஞ்ஞாணகாயா வேதி³தப்³பா³, ச² ப²ஸ்ஸகாயா வேதி³தப்³பா³, ச² வேத³னாகாயா வேதி³தப்³பா³, ச² தண்ஹாகாயா வேதி³தப்³பா³.
421. ‘‘‘ச² அஜ்ஜ²த்திகானி ஆயதனானி வேதி³தப்³பா³னீ’தி – இதி கோ² பனேதங் வுத்தங். கிஞ்சேதங் படிச்ச வுத்தங்? சக்கா²யதனங், ஸோதாயதனங், கா⁴னாயதனங், ஜிவ்ஹாயதனங் , காயாயதனங், மனாயதனங். ‘ச² அஜ்ஜ²த்திகானி ஆயதனானி வேதி³தப்³பா³னீ’தி – இதி யங் தங் வுத்தங், இத³மேதங் படிச்ச வுத்தங். இத³ங் பட²மங் ச²க்கங்.
‘‘‘ச² பா³ஹிரானி ஆயதனானி வேதி³தப்³பா³னீ’தி – இதி கோ² பனேதங் வுத்தங் . கிஞ்சேதங் படிச்ச வுத்தங்? ரூபாயதனங், ஸத்³தா³யதனங், க³ந்தா⁴யதனங், ரஸாயதனங், பொ²ட்ட²ப்³பா³யதனங், த⁴ம்மாயதனங். ‘ச² பா³ஹிரானி ஆயதனானி வேதி³தப்³பா³னீ’தி – இதி யங் தங் வுத்தங், இத³மேதங் படிச்ச வுத்தங். இத³ங் து³தியங் ச²க்கங்.
‘‘‘ச² விஞ்ஞாணகாயா வேதி³தப்³பா³’தி – இதி கோ² பனேதங் வுத்தங். கிஞ்சேதங் படிச்ச வுத்தங்? சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாணங், ஸோதஞ்ச படிச்ச ஸத்³தே³ ச உப்பஜ்ஜதி ஸோதவிஞ்ஞாணங், கா⁴னஞ்ச படிச்ச க³ந்தே⁴ ச உப்பஜ்ஜதி கா⁴னவிஞ்ஞாணங், ஜிவ்ஹஞ்ச படிச்ச ரஸே ச உப்பஜ்ஜதி ஜிவ்ஹாவிஞ்ஞாணங், காயஞ்ச படிச்ச பொ²ட்ட²ப்³பே³ ச உப்பஜ்ஜதி காயவிஞ்ஞாணங், மனஞ்ச படிச்ச த⁴ம்மே ச உப்பஜ்ஜதி மனோவிஞ்ஞாணங். ‘ச² விஞ்ஞாணகாயா வேதி³தப்³பா³’தி – இதி யங் தங் வுத்தங், இத³மேதங் படிச்ச வுத்தங். இத³ங் ததியங் ச²க்கங்.
‘‘‘ச² ப²ஸ்ஸகாயா வேதி³தப்³பா³’தி – இதி கோ² பனேதங் வுத்தங். கிஞ்சேதங் படிச்ச வுத்தங்? சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாணங், திண்ணங் ஸங்க³தி ப²ஸ்ஸோ; ஸோதஞ்ச படிச்ச ஸத்³தே³ ச உப்பஜ்ஜதி ஸோதவிஞ்ஞாணங், திண்ணங் ஸங்க³தி ப²ஸ்ஸோ; கா⁴னஞ்ச படிச்ச க³ந்தே⁴ ச உப்பஜ்ஜதி கா⁴னவிஞ்ஞாணங், திண்ணங் ஸங்க³தி ப²ஸ்ஸோ; ஜிவ்ஹஞ்ச படிச்ச ரஸே ச உப்பஜ்ஜதி ஜிவ்ஹாவிஞ்ஞாணங், திண்ணங் ஸங்க³தி ப²ஸ்ஸோ; காயஞ்ச படிச்ச பொ²ட்ட²ப்³பே³ ச உப்பஜ்ஜதி காயவிஞ்ஞாணங், திண்ணங் ஸங்க³தி ப²ஸ்ஸோ; மனஞ்ச படிச்ச த⁴ம்மே ச உப்பஜ்ஜதி மனோவிஞ்ஞாணங், திண்ணங் ஸங்க³தி ப²ஸ்ஸோ. ‘ச² ப²ஸ்ஸகாயா வேதி³தப்³பா³’தி – இதி யங் தங் வுத்தங், இத³மேதங் படிச்ச வுத்தங். இத³ங் சதுத்த²ங் ச²க்கங்.
‘‘‘ச² வேத³னாகாயா வேதி³தப்³பா³’தி – இதி கோ² பனேதங் வுத்தங். கிஞ்சேதங் படிச்ச வுத்தங்? சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாணங், திண்ணங் ஸங்க³தி ப²ஸ்ஸோ, ப²ஸ்ஸபச்சயா வேத³னா; ஸோதஞ்ச படிச்ச ஸத்³தே³ ச உப்பஜ்ஜதி ஸோதவிஞ்ஞாணங், திண்ணங் ஸங்க³தி ப²ஸ்ஸோ, ப²ஸ்ஸபச்சயா வேத³னா; கா⁴னஞ்ச படிச்ச க³ந்தே⁴ ச உப்பஜ்ஜதி கா⁴னவிஞ்ஞாணங், திண்ணங் ஸங்க³தி ப²ஸ்ஸோ, ப²ஸ்ஸபச்சயா வேத³னா; ஜிவ்ஹஞ்ச படிச்ச ரஸே ச உப்பஜ்ஜதி ஜிவ்ஹாவிஞ்ஞாணங், திண்ணங் ஸங்க³தி ப²ஸ்ஸோ, ப²ஸ்ஸபச்சயா வேத³னா; காயஞ்ச படிச்ச பொ²ட்ட²ப்³பே³ ச உப்பஜ்ஜதி காயவிஞ்ஞாணங், திண்ணங் ஸங்க³தி ப²ஸ்ஸோ, ப²ஸ்ஸபச்சயா வேத³னா; மனஞ்ச படிச்ச த⁴ம்மே ச உப்பஜ்ஜதி மனோவிஞ்ஞாணங், திண்ணங் ஸங்க³தி ப²ஸ்ஸோ, ப²ஸ்ஸபச்சயா வேத³னா. ‘ச² வேத³னாகாயா வேதி³தப்³பா³’தி – இதி யங் தங் வுத்தங், இத³மேதங் படிச்ச வுத்தங். இத³ங் பஞ்சமங் ச²க்கங்.
‘‘‘ச² தண்ஹாகாயா வேதி³தப்³பா³’தி – இதி கோ² பனேதங் வுத்தங். கிஞ்சேதங் படிச்ச வுத்தங்? சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாணங், திண்ணங் ஸங்க³தி ப²ஸ்ஸோ, ப²ஸ்ஸபச்சயா வேத³னா, வேத³னாபச்சயா தண்ஹா; ஸோதஞ்ச படிச்ச ஸத்³தே³ ச உப்பஜ்ஜதி ஸோதவிஞ்ஞாணங்…பே॰… கா⁴னஞ்ச படிச்ச க³ந்தே⁴ ச உப்பஜ்ஜதி கா⁴னவிஞ்ஞாணங்… ஜிவ்ஹஞ்ச படிச்ச ரஸே ச உப்பஜ்ஜதி ஜிவ்ஹாவிஞ்ஞாணங்… காயஞ்ச படிச்ச பொ²ட்ட²ப்³பே³ ச உப்பஜ்ஜதி காயவிஞ்ஞாணங்… மனஞ்ச படிச்ச த⁴ம்மே ச உப்பஜ்ஜதி மனோவிஞ்ஞாணங், திண்ணங் ஸங்க³தி ப²ஸ்ஸோ, ப²ஸ்ஸபச்சயா வேத³னா, வேத³னாபச்சயா தண்ஹா. ‘ச² தண்ஹாகாயா வேதி³தப்³பா³’தி – இதி யங் தங் வுத்தங், இத³மேதங் படிச்ச வுத்தங். இத³ங் ச²ட்ட²ங் ச²க்கங்.
422. ‘‘‘சக்கு² அத்தா’தி யோ வதெ³ய்ய தங் ந உபபஜ்ஜதி. சக்கு²ஸ்ஸ உப்பாதோ³பி வயோபி பஞ்ஞாயதி. யஸ்ஸ கோ² பன உப்பாதோ³பி வயோபி பஞ்ஞாயதி, ‘அத்தா மே உப்பஜ்ஜதி ச வேதி சா’தி இச்சஸ்ஸ ஏவமாக³தங் ஹோதி. தஸ்மா தங் ந உபபஜ்ஜதி – ‘சக்கு² அத்தா’தி யோ வதெ³ய்ய. இதி சக்கு² அனத்தா.
‘‘‘ரூபா அத்தா’தி யோ வதெ³ய்ய தங் ந உபபஜ்ஜதி. ரூபானங் உப்பாதோ³பி வயோபி பஞ்ஞாயதி. யஸ்ஸ கோ² பன உப்பாதோ³பி வயோபி பஞ்ஞாயதி, ‘அத்தா மே உப்பஜ்ஜதி ச வேதி சா’தி இச்சஸ்ஸ ஏவமாக³தங் ஹோதி. தஸ்மா தங் ந உபபஜ்ஜதி – ‘ரூபா அத்தா’தி யோ வதெ³ய்ய. இதி சக்கு² அனத்தா, ரூபா அனத்தா.
‘‘‘சக்கு²விஞ்ஞாணங் அத்தா’தி யோ வதெ³ய்ய தங் ந உபபஜ்ஜதி. சக்கு²விஞ்ஞாணஸ்ஸ உப்பாதோ³பி வயோபி பஞ்ஞாயதி. யஸ்ஸ கோ² பன உப்பாதோ³பி வயோபி பஞ்ஞாயதி, ‘அத்தா மே உப்பஜ்ஜதி ச வேதி சா’தி இச்சஸ்ஸ ஏவமாக³தங் ஹோதி. தஸ்மா தங் ந உபபஜ்ஜதி – ‘சக்கு²விஞ்ஞாணங் அத்தா’தி யோ வதெ³ய்ய. இதி சக்கு² அனத்தா, ரூபா அனத்தா, சக்கு²விஞ்ஞாணங் அனத்தா.
‘‘‘சக்கு²ஸம்ப²ஸ்ஸோ அத்தா’தி யோ வதெ³ய்ய தங் ந உபபஜ்ஜதி. சக்கு²ஸம்ப²ஸ்ஸஸ்ஸ உப்பாதோ³பி வயோபி பஞ்ஞாயதி . யஸ்ஸ கோ² பன உப்பாதோ³பி வயோபி பஞ்ஞாயதி, ‘அத்தா மே உப்பஜ்ஜதி ச வேதி சா’தி இச்சஸ்ஸ ஏவமாக³தங் ஹோதி. தஸ்மா தங் ந உபபஜ்ஜதி – ‘சக்கு²ஸம்ப²ஸ்ஸோ அத்தா’தி யோ வதெ³ய்ய. இதி சக்கு² அனத்தா, ரூபா அனத்தா, சக்கு²விஞ்ஞாணங் அனத்தா, சக்கு²ஸம்ப²ஸ்ஸோ அனத்தா.
‘‘‘வேத³னா அத்தா’தி யோ வதெ³ய்ய தங் ந உபபஜ்ஜதி. வேத³னாய உப்பாதோ³பி வயோபி பஞ்ஞாயதி. யஸ்ஸ கோ² பன உப்பாதோ³பி வயோபி பஞ்ஞாயதி, ‘அத்தா மே உப்பஜ்ஜதி ச வேதி சா’தி இச்சஸ்ஸ ஏவமாக³தங் ஹோதி. தஸ்மா தங் ந உபபஜ்ஜதி – ‘வேத³னா அத்தா’தி யோ வதெ³ய்ய. இதி சக்கு² அனத்தா, ரூபா அனத்தா, சக்கு²விஞ்ஞாணங் அனத்தா, சக்கு²ஸம்ப²ஸ்ஸோ அனத்தா, வேத³னா அனத்தா.
‘‘‘தண்ஹா அத்தா’தி யோ வதெ³ய்ய தங் ந உபபஜ்ஜதி. தண்ஹாய உப்பாதோ³பி வயோபி பஞ்ஞாயதி. யஸ்ஸ கோ² பன உப்பாதோ³பி வயோபி பஞ்ஞாயதி, ‘அத்தா மே உப்பஜ்ஜதி ச வேதி சா’தி இச்சஸ்ஸ ஏவமாக³தங் ஹோதி. தஸ்மா தங் ந உபபஜ்ஜதி – ‘தண்ஹா அத்தா’தி யோ வதெ³ய்ய. இதி சக்கு² அனத்தா, ரூபா அனத்தா, சக்கு²விஞ்ஞாணங் அனத்தா, சக்கு²ஸம்ப²ஸ்ஸோ அனத்தா, வேத³னா அனத்தா, தண்ஹா அனத்தா.
423. ‘‘‘ஸோதங் அத்தா’தி யோ வதெ³ய்ய…பே॰… ‘கா⁴னங் அத்தா’தி யோ வதெ³ய்ய… ‘ஜிவ்ஹா அத்தா’தி யோ வதெ³ய்ய… ‘காயோ அத்தா’தி யோ வதெ³ய்ய… ‘மனோ அத்தா’தி யோ வதெ³ய்ய தங் ந உபபஜ்ஜதி. மனஸ்ஸ உப்பாதோ³பி வயோபி பஞ்ஞாயதி. யஸ்ஸ கோ² பன உப்பாதோ³பி வயோபி பஞ்ஞாயதி, ‘அத்தா மே உப்பஜ்ஜதி ச வேதி சா’தி இச்சஸ்ஸ ஏவமாக³தங் ஹோதி. தஸ்மா தங் ந உபபஜ்ஜதி – ‘மனோ அத்தா’தி யோ வதெ³ய்ய. இதி மனோ அனத்தா.
‘‘‘த⁴ம்மா அத்தா’தி யோ வதெ³ய்ய தங் ந உபபஜ்ஜதி. த⁴ம்மானங் உப்பாதோ³பி வயோபி பஞ்ஞாயதி. யஸ்ஸ கோ² பன உப்பாதோ³பி வயோபி பஞ்ஞாயதி, ‘அத்தா மே உப்பஜ்ஜதி ச வேதி சா’தி இச்சஸ்ஸ ஏவமாக³தங் ஹோதி. தஸ்மா தங் ந உபபஜ்ஜதி – ‘த⁴ம்மா அத்தா’தி யோ வதெ³ய்ய. இதி மனோ அனத்தா, த⁴ம்மா அனத்தா.
‘‘‘மனோவிஞ்ஞாணங் அத்தா’தி யோ வதெ³ய்ய தங் ந உபபஜ்ஜதி. மனோவிஞ்ஞாணஸ்ஸ உப்பாதோ³பி வயோபி பஞ்ஞாயதி. யஸ்ஸ கோ² பன உப்பாதோ³பி வயோபி பஞ்ஞாயதி, ‘அத்தா மே உப்பஜ்ஜதி ச வேதி சா’தி இச்சஸ்ஸ ஏவமாக³தங் ஹோதி. தஸ்மா தங் ந உபபஜ்ஜதி – ‘மனோவிஞ்ஞாணங் அத்தா’தி யோ வதெ³ய்ய. இதி மனோ அனத்தா, த⁴ம்மா அனத்தா, மனோவிஞ்ஞாணங் அனத்தா.
‘‘‘மனோஸம்ப²ஸ்ஸோ அத்தா’தி யோ வதெ³ய்ய தங் ந உபபஜ்ஜதி. மனோஸம்ப²ஸ்ஸஸ்ஸ உப்பாதோ³பி வயோபி பஞ்ஞாயதி. யஸ்ஸ கோ² பன உப்பாதோ³பி வயோபி பஞ்ஞாயதி, ‘அத்தா மே உப்பஜ்ஜதி ச வேதி சா’தி இச்சஸ்ஸ ஏவமாக³தங் ஹோதி. தஸ்மா தங் ந உபபஜ்ஜதி – ‘மனோஸம்ப²ஸ்ஸோ அத்தா’தி யோ வதெ³ய்ய. இதி மனோ அனத்தா, த⁴ம்மா அனத்தா, மனோவிஞ்ஞாணங் அனத்தா, மனோஸம்ப²ஸ்ஸோ அனத்தா.
‘‘‘வேத³னா அத்தா’தி யோ வதெ³ய்ய தங் ந உபபஜ்ஜதி. வேத³னாய உப்பாதோ³பி வயோபி பஞ்ஞாயதி. யஸ்ஸ கோ² பன உப்பாதோ³பி வயோபி பஞ்ஞாயதி, ‘அத்தா மே உப்பஜ்ஜதி ச வேதி சா’தி இச்சஸ்ஸ ஏவமாக³தங் ஹோதி. தஸ்மா தங் ந உபபஜ்ஜதி – ‘வேத³னா அத்தா’தி யோ வதெ³ய்ய. இதி மனோ அனத்தா, த⁴ம்மா அனத்தா, மனோவிஞ்ஞாணங் அனத்தா, மனோஸம்ப²ஸ்ஸோ அனத்தா, வேத³னா அனத்தா.
‘‘‘தண்ஹா அத்தா’தி யோ வதெ³ய்ய தங் ந உபபஜ்ஜதி. தண்ஹாய உப்பாதோ³பி வயோபி பஞ்ஞாயதி. யஸ்ஸ கோ² பன உப்பாதோ³பி வயோபி பஞ்ஞாயதி, ‘அத்தா மே உப்பஜ்ஜதி ச வேதி சா’தி இச்சஸ்ஸ ஏவமாக³தங் ஹோதி. தஸ்மா தங் ந உபபஜ்ஜதி – ‘தண்ஹா அத்தா’தி யோ வதெ³ய்ய. இதி மனோ அனத்தா, த⁴ம்மா அனத்தா, மனோவிஞ்ஞாணங் அனத்தா, மனோஸம்ப²ஸ்ஸோ அனத்தா, வேத³னா அனத்தா, தண்ஹா அனத்தா.
424. ‘‘அயங் கோ² பன, பி⁴க்க²வே, ஸக்காயஸமுத³யகா³மினீ படிபதா³ – சக்கு²ங் ‘ஏதங் மம, ஏஸோஹமஸ்மி, ஏஸோ மே அத்தா’தி ஸமனுபஸ்ஸதி; ரூபே ‘ஏதங் மம, ஏஸோஹமஸ்மி, ஏஸோ மே அத்தா’தி ஸமனுபஸ்ஸதி; சக்கு²விஞ்ஞாணங் ‘ஏதங் மம, ஏஸோஹமஸ்மி, ஏஸோ மே அத்தா’தி ஸமனுபஸ்ஸதி; சக்கு²ஸம்ப²ஸ்ஸங் ‘ஏதங் மம, ஏஸோஹமஸ்மி, ஏஸோ மே அத்தா’தி ஸமனுபஸ்ஸதி; வேத³னங் ‘ஏதங் மம , ஏஸோஹமஸ்மி, ஏஸோ மே அத்தா’தி ஸமனுபஸ்ஸதி; தண்ஹங் ‘ஏதங் மம, ஏஸோஹமஸ்மி, ஏஸோ மே அத்தா’தி ஸமனுபஸ்ஸதி; ஸோதங் ‘ஏதங் மம, ஏஸோஹமஸ்மி, ஏஸோ மே அத்தா’தி ஸமனுபஸ்ஸதி…பே॰… கா⁴னங் ‘ஏதங் மம, ஏஸோஹமஸ்மி, ஏஸோ மே அத்தா’தி ஸமனுபஸ்ஸதி…பே॰… ஜிவ்ஹங் ‘ஏதங் மம, ஏஸோஹமஸ்மி, ஏஸோ மே அத்தா’தி ஸமனுபஸ்ஸதி…பே॰… காயங் ‘ஏதங் மம, ஏஸோஹமஸ்மி, ஏஸோ மே அத்தா’தி ஸமனுபஸ்ஸதி…பே॰… மனங் ‘ஏதங் மம, ஏஸோஹமஸ்மி, ஏஸோ மே அத்தா’தி ஸமனுபஸ்ஸதி, த⁴ம்மே ‘ஏதங் மம, ஏஸோஹமஸ்மி, ஏஸோ மே அத்தா’தி ஸமனுபஸ்ஸதி, மனோவிஞ்ஞாணங் ‘ஏதங் மம, ஏஸோஹமஸ்மி, ஏஸோ மே அத்தா’தி ஸமனுபஸ்ஸதி, மனோஸம்ப²ஸ்ஸங் ‘ஏதங் மம, ஏஸோஹமஸ்மி, ஏஸோ மே அத்தா’தி ஸமனுபஸ்ஸதி, வேத³னங் ‘ஏதங் மம, ஏஸோஹமஸ்மி, ஏஸோ மே அத்தா’தி ஸமனுபஸ்ஸதி, தண்ஹங் ‘ஏதங் மம, ஏஸோஹமஸ்மி, ஏஸோ மே அத்தா’தி ஸமனுபஸ்ஸதி.
‘‘அயங் கோ² பன, பி⁴க்க²வே, ஸக்காயனிரோத⁴கா³மினீ படிபதா³ – சக்கு²ங் ‘நேதங் மம, நேஸோஹமஸ்மி, ந மேஸோ அத்தா’தி ஸமனுபஸ்ஸதி. ரூபே ‘நேதங் மம, நேஸோஹமஸ்மி, ந மேஸோ அத்தா’தி ஸமனுபஸ்ஸதி. சக்கு²விஞ்ஞாணங் ‘நேதங் மம, நேஸோஹமஸ்மி, ந மேஸோ அத்தா’தி ஸமனுபஸ்ஸதி. சக்கு²ஸம்ப²ஸ்ஸங் ‘நேதங் மம, நேஸோஹமஸ்மி, ந மேஸோ அத்தா’தி ஸமனுபஸ்ஸதி. வேத³னங் ‘நேதங் மம, நேஸோஹமஸ்மி, ந மேஸோ அத்தா’தி ஸமனுபஸ்ஸதி. தண்ஹங் ‘நேதங் மம, நேஸோஹமஸ்மி, ந மேஸோ அத்தா’தி ஸமனுபஸ்ஸதி. ஸோதங் ‘நேதங் மம, நேஸோஹமஸ்மி, ந மேஸோ அத்தா’தி ஸமனுபஸ்ஸதி…பே॰… கா⁴னங் ‘நேதங் மம, நேஸோஹமஸ்மி, ந மேஸோ அத்தா’தி ஸமனுபஸ்ஸதி… ஜிவ்ஹங் ‘நேதங் மம, நேஸோஹமஸ்மி, ந மேஸோ அத்தா’தி ஸமனுபஸ்ஸதி… காயங் ‘நேதங் மம, நேஸோஹமஸ்மி, ந மேஸோ அத்தா’தி ஸமனுபஸ்ஸதி… மனங் ‘நேதங் மம, நேஸோஹமஸ்மி, ந மேஸோ அத்தா’தி ஸமனுபஸ்ஸதி. த⁴ம்மே ‘நேதங் மம, நேஸோஹமஸ்மி, ந மேஸோ அத்தா’தி ஸமனுபஸ்ஸதி. மனோவிஞ்ஞாணங் ‘நேதங் மம, நேஸோஹமஸ்மி, ந மேஸோ அத்தா’தி ஸமனுபஸ்ஸதி. மனோஸம்ப²ஸ்ஸங் ‘நேதங் மம, நேஸோஹமஸ்மி, ந மேஸோ அத்தா’தி ஸமனுபஸ்ஸதி. வேத³னங் ‘நேதங் மம, நேஸோஹமஸ்மி, ந மேஸோ அத்தா’தி ஸமனுபஸ்ஸதி. தண்ஹங் ‘நேதங் மம, நேஸோஹமஸ்மி, ந மேஸோ அத்தா’தி ஸமனுபஸ்ஸதி.
425. ‘‘சக்கு²ஞ்ச, பி⁴க்க²வே, படிச்ச ரூபே ச உப்பஜ்ஜதி சக்கு²விஞ்ஞாணங், திண்ணங் ஸங்க³தி ப²ஸ்ஸோ, ப²ஸ்ஸபச்சயா உப்பஜ்ஜதி வேத³யிதங் ஸுக²ங் வா து³க்க²ங் வா அது³க்க²மஸுக²ங் வா. ஸோ ஸுகா²ய வேத³னாய பு²ட்டோ² ஸமானோ அபி⁴னந்த³தி அபி⁴வத³தி அஜ்ஜோ²ஸாய திட்ட²தி. தஸ்ஸ ராகா³னுஸயோ அனுஸேதி. து³க்கா²ய வேத³னாய பு²ட்டோ² ஸமானோ ஸோசதி கிலமதி பரிதே³வதி உரத்தாளிங் கந்த³தி ஸம்மோஹங் ஆபஜ்ஜதி. தஸ்ஸ படிகா⁴னுஸயோ அனுஸேதி. அது³க்க²மஸுகா²ய வேத³னாய பு²ட்டோ² ஸமானோ தஸ்ஸா வேத³னாய ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தங் நப்பஜானாதி. தஸ்ஸ அவிஜ்ஜானுஸயோ அனுஸேதி. ஸோ வத, பி⁴க்க²வே, ஸுகா²ய வேத³னாய ராகா³னுஸயங் அப்பஹாய து³க்கா²ய வேத³னாய படிகா⁴னுஸயங் அப்படிவினோதெ³த்வா அது³க்க²மஸுகா²ய வேத³னாய அவிஜ்ஜானுஸயங் அஸமூஹனித்வா அவிஜ்ஜங் அப்பஹாய விஜ்ஜங் அனுப்பாதெ³த்வா தி³ட்டே²வ த⁴ம்மே து³க்க²ஸ்ஸந்தகரோ ப⁴விஸ்ஸதீதி – நேதங் டா²னங் விஜ்ஜதி.
‘‘ஸோதஞ்ச, பி⁴க்க²வே, படிச்ச ஸத்³தே³ ச உப்பஜ்ஜதி ஸோதவிஞ்ஞாணங்…பே॰… கா⁴னஞ்ச, பி⁴க்க²வே, படிச்ச க³ந்தே⁴ ச உப்பஜ்ஜதி கா⁴னவிஞ்ஞாணங்…பே॰… ஜிவ்ஹஞ்ச, பி⁴க்க²வே, படிச்ச ரஸே ச உப்பஜ்ஜதி ஜிவ்ஹாவிஞ்ஞாணங்…பே॰… காயஞ்ச, பி⁴க்க²வே, படிச்ச பொ²ட்ட²ப்³பே³ ச உப்பஜ்ஜதி காயவிஞ்ஞாணங்…பே॰… மனஞ்ச, பி⁴க்க²வே, படிச்ச த⁴ம்மே ச உப்பஜ்ஜதி மனோவிஞ்ஞாணங், திண்ணங் ஸங்க³தி ப²ஸ்ஸோ, ப²ஸ்ஸபச்சயா உப்பஜ்ஜதி வேத³யிதங் ஸுக²ங் வா து³க்க²ங் வா அது³க்க²மஸுக²ங் வா. ஸோ ஸுகா²ய வேத³னாய பு²ட்டோ² ஸமானோ அபி⁴னந்த³தி அபி⁴வத³தி அஜ்ஜோ²ஸாய திட்ட²தி. தஸ்ஸ ராகா³னுஸயோ அனுஸேதி. து³க்கா²ய வேத³னாய பு²ட்டோ² ஸமானோ ஸோசதி கிலமதி பரிதே³வதி உரத்தாளிங் கந்த³தி ஸம்மோஹங் ஆபஜ்ஜதி. தஸ்ஸ படிகா⁴னுஸயோ அனுஸேதி. அது³க்க²மஸுகா²ய வேத³னாய பு²ட்டோ² ஸமானோ தஸ்ஸா வேத³னாய ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தங் நப்பஜானாதி. தஸ்ஸ அவிஜ்ஜானுஸயோ அனுஸேதி. ஸோ வத, பி⁴க்க²வே, ஸுகா²ய வேத³னாய ராகா³னுஸயங் அப்பஹாய து³க்கா²ய வேத³னாய படிகா⁴னுஸயங் அப்படிவினோதெ³த்வா அது³க்க²மஸுகா²ய வேத³னாய அவிஜ்ஜானுஸயங் அஸமூஹனித்வா அவிஜ்ஜங் அப்பஹாய விஜ்ஜங் அனுப்பாதெ³த்வா தி³ட்டே²வ த⁴ம்மே து³க்க²ஸ்ஸந்தகரோ ப⁴விஸ்ஸதீதி – நேதங் டா²னங் விஜ்ஜதி.
426. ‘‘சக்கு²ஞ்ச , பி⁴க்க²வே, படிச்ச ரூபே ச உப்பஜ்ஜதி சக்கு²விஞ்ஞாணங், திண்ணங் ஸங்க³தி ப²ஸ்ஸோ, ப²ஸ்ஸபச்சயா உப்பஜ்ஜதி வேத³யிதங் ஸுக²ங் வா து³க்க²ங் வா அது³க்க²மஸுக²ங் வா. ஸோ ஸுகா²ய வேத³னாய பு²ட்டோ² ஸமானோ நாபி⁴னந்த³தி நாபி⁴வத³தி நாஜ்ஜோ²ஸாய திட்ட²தி. தஸ்ஸ ராகா³னுஸயோ நானுஸேதி. து³க்கா²ய வேத³னாய பு²ட்டோ² ஸமானோ ந ஸோசதி ந கிலமதி பரிதே³வதி ந உரத்தாளிங் கந்த³தி ந ஸம்மோஹங் ஆபஜ்ஜதி. தஸ்ஸ படிகா⁴னுஸயோ நானுஸேதி. அது³க்க²மஸுகா²ய வேத³னாய பு²ட்டோ² ஸமானோ தஸ்ஸா வேத³னாய ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தங் பஜானாதி. தஸ்ஸ அவிஜ்ஜானுஸயோ நானுஸேதி. ஸோ வத, பி⁴க்க²வே, ஸுகா²ய வேத³னாய ராகா³னுஸயங் பஹாய து³க்கா²ய வேத³னாய படிகா⁴னுஸயங் படிவினோதெ³த்வா அது³க்க²மஸுகா²ய வேத³னாய அவிஜ்ஜானுஸயங் ஸமூஹனித்வா அவிஜ்ஜங் பஹாய விஜ்ஜங் உப்பாதெ³த்வா தி³ட்டே²வ த⁴ம்மே து³க்க²ஸ்ஸந்தகரோ ப⁴விஸ்ஸதீதி – டா²னமேதங் விஜ்ஜதி.
‘‘ஸோதஞ்ச, பி⁴க்க²வே, படிச்ச ஸத்³தே³ ச உப்பஜ்ஜதி ஸோதவிஞ்ஞாணங்…பே॰….
‘‘கா⁴னஞ்ச, பி⁴க்க²வே, படிச்ச க³ந்தே⁴ ச உப்பஜ்ஜதி கா⁴னவிஞ்ஞாணங்…பே॰….
‘‘ஜிவ்ஹஞ்ச, பி⁴க்க²வே, படிச்ச ரஸே ச உப்பஜ்ஜதி ஜிவ்ஹாவிஞ்ஞாணங்…பே॰… .
‘‘காயஞ்ச, பி⁴க்க²வே, படிச்ச பொ²ட்ட²ப்³பே³ ச உப்பஜ்ஜதி காயவிஞ்ஞாணங்…பே॰….
‘‘மனஞ்ச, பி⁴க்க²வே, படிச்ச த⁴ம்மே ச உப்பஜ்ஜதி மனோவிஞ்ஞாணங் திண்ணங் ஸங்க³தி ப²ஸ்ஸோ, ப²ஸ்ஸபச்சயா உப்பஜ்ஜதி வேத³யிதங் ஸுக²ங் வா து³க்க²ங் வா அது³க்க²மஸுக²ங் வா. ஸோ ஸுகா²ய வேத³னாய பு²ட்டோ² ஸமானோ நாபி⁴னந்த³தி நாபி⁴வத³தி நாஜ்ஜோ²ஸாய திட்ட²தி. தஸ்ஸ ராகா³னுஸயோ நானுஸேதி. து³க்கா²ய வேத³னாய பு²ட்டோ² ஸமானோ ந ஸோசதி ந கிலமதி ந பரிதே³வதி ந உரத்தாளிங் கந்த³தி ந ஸம்மோஹங் ஆபஜ்ஜதி. தஸ்ஸ படிகா⁴னுஸயோ நானுஸேதி. அது³க்க²மஸுகா²ய வேத³னாய பு²ட்டோ² ஸமானோ தஸ்ஸா வேத³னாய ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தங் பஜானாதி. தஸ்ஸ அவிஜ்ஜானுஸயோ நானுஸேதி. ஸோ வத, பி⁴க்க²வே, ஸுகா²ய வேத³னாய ராகா³னுஸயங் பஹாய து³க்கா²ய வேத³னாய படிகா⁴னுஸயங் படிவினோதெ³த்வா அது³க்க²மஸுகா²ய வேத³னாய அவிஜ்ஜானுஸயங் ஸமூஹனித்வா அவிஜ்ஜங் பஹாய விஜ்ஜங் உப்பாதெ³த்வா தி³ட்டே²வ த⁴ம்மே து³க்க²ஸ்ஸந்தகரோ ப⁴விஸ்ஸதீதி – டா²னமேதங் விஜ்ஜதி.
427. ‘‘ஏவங் பஸ்ஸங், பி⁴க்க²வே, ஸுதவா அரியஸாவகோ சக்கு²ஸ்மிங் சக்கு²ஸ்மிம்பி (ஸ்யா॰ கங்॰) ஏவமிதரேஸுபி நிப்³பி³ந்த³தி, ரூபேஸு நிப்³பி³ந்த³தி, சக்கு²விஞ்ஞாணே நிப்³பி³ந்த³தி, சக்கு²ஸம்ப²ஸ்ஸே நிப்³பி³ந்த³தி, வேத³னாய நிப்³பி³ந்த³தி, தண்ஹாய நிப்³பி³ந்த³தி. ஸோதஸ்மிங் நிப்³பி³ந்த³தி, ஸத்³தே³ஸு நிப்³பி³ந்த³தி…பே॰… கா⁴னஸ்மிங் நிப்³பி³ந்த³தி, க³ந்தே⁴ஸு நிப்³பி³ந்த³தி… ஜிவ்ஹாய நிப்³பி³ந்த³தி, ரஸேஸு நிப்³பி³ந்த³தி… காயஸ்மிங் நிப்³பி³ந்த³தி, பொ²ட்ட²ப்³பே³ஸு நிப்³பி³ந்த³தி… மனஸ்மிங் நிப்³பி³ந்த³தி, த⁴ம்மேஸு நிப்³பி³ந்த³தி, மனோவிஞ்ஞாணே நிப்³பி³ந்த³தி, மனோஸம்ப²ஸ்ஸே நிப்³பி³ந்த³தி, வேத³னாய நிப்³பி³ந்த³தி, தண்ஹாய நிப்³பி³ந்த³தி. நிப்³பி³ந்த³ங் விரஜ்ஜதி , விராகா³ விமுச்சதி. விமுத்தஸ்மிங் விமுத்தமிதி ஞாணங் ஹோதி. ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானாதீ’’தி.
இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதங் அபி⁴னந்து³ந்தி. இமஸ்மிங் கோ² பன வெய்யாகரணஸ்மிங் ப⁴ஞ்ஞமானே ஸட்டி²மத்தானங் பி⁴க்கூ²னங் அனுபாதா³ய ஆஸவேஹி சித்தானி விமுச்சிங்ஸூதி.
ச²ச²க்கஸுத்தங் நிட்டி²தங் ச²ட்ட²ங்.
7. மஹாஸளாயதனிகஸுத்தங்
428. ஏவங் மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி. ‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச – ‘‘மஹாஸளாயதனிகங் வோ, பி⁴க்க²வே, தே³ஸெஸ்ஸாமி. தங் ஸுணாத², ஸாது⁴கங் மனஸி கரோத²; பா⁴ஸிஸ்ஸாமீ’’தி. ‘‘ஏவங், ப⁴ந்தே’’தி கோ² தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –
429. ‘‘சக்கு²ங், பி⁴க்க²வே, அஜானங் அபஸ்ஸங் யதா²பூ⁴தங், ரூபே அஜானங் அபஸ்ஸங் யதா²பூ⁴தங், சக்கு²விஞ்ஞாணங் அஜானங் அபஸ்ஸங் யதா²பூ⁴தங், சக்கு²ஸம்ப²ஸ்ஸங் அஜானங் அபஸ்ஸங் யதா²பூ⁴தங், யமித³ங் சக்கு²ஸம்ப²ஸ்ஸபச்சயா உப்பஜ்ஜதி வேத³யிதங் ஸுக²ங் வா து³க்க²ங் வா அது³க்க²மஸுக²ங் வா தம்பி அஜானங் அபஸ்ஸங் யதா²பூ⁴தங், சக்கு²ஸ்மிங் ஸாரஜ்ஜதி, ரூபேஸு ஸாரஜ்ஜதி, சக்கு²விஞ்ஞாணே ஸாரஜ்ஜதி, சக்கு²ஸம்ப²ஸ்ஸே ஸாரஜ்ஜதி, யமித³ங் சக்கு²ஸம்ப²ஸ்ஸபச்சயா உப்பஜ்ஜதி வேத³யிதங் ஸுக²ங் வா து³க்க²ங் வா அது³க்க²மஸுக²ங் வா தஸ்மிம்பி ஸாரஜ்ஜதி.
‘‘தஸ்ஸ ஸாரத்தஸ்ஸ ஸங்யுத்தஸ்ஸ ஸம்மூள்ஹஸ்ஸ அஸ்ஸாதா³னுபஸ்ஸினோ விஹரதோ ஆயதிங் பஞ்சுபாதா³னக்க²ந்தா⁴ உபசயங் க³ச்ச²ந்தி. தண்ஹா சஸ்ஸ போனொப்³ப⁴விகா நந்தீ³ராக³ஸஹக³தா தத்ரதத்ராபி⁴னந்தி³னீ, ஸா சஸ்ஸ பவட்³ட⁴தி. தஸ்ஸ காயிகாபி த³ரதா² பவட்³ட⁴ந்தி, சேதஸிகாபி த³ரதா² பவட்³ட⁴ந்தி; காயிகாபி ஸந்தாபா பவட்³ட⁴ந்தி , சேதஸிகாபி ஸந்தாபா பவட்³ட⁴ந்தி; காயிகாபி பரிளாஹா பவட்³ட⁴ந்தி, சேதஸிகாபி பரிளாஹா பவட்³ட⁴ந்தி. ஸோ காயது³க்க²ம்பி காயிகது³க்க²ம்பி (ஸ்யா॰ கங்॰), காயிகங் து³க்க²ம்பி (க॰) சேதோது³க்க²ம்பி படிஸங்வேதே³தி.
‘‘ஸோதங் , பி⁴க்க²வே, அஜானங் அபஸ்ஸங் யதா²பூ⁴தங்…பே॰… கா⁴னங், பி⁴க்க²வே, அஜானங் அபஸ்ஸங் யதா²பூ⁴தங்…பே॰… ஜிவ்ஹங், பி⁴க்க²வே, அஜானங் அபஸ்ஸங் யதா²பூ⁴தங்…பே॰… காயங், பி⁴க்க²வே, அஜானங் அபஸ்ஸங் யதா²பூ⁴தங்…பே॰… மனங், பி⁴க்க²வே, அஜானங் அபஸ்ஸங் யதா²பூ⁴தங், த⁴ம்மே, பி⁴க்க²வே, அஜானங் அபஸ்ஸங் யதா²பூ⁴தங், மனோவிஞ்ஞாணங், பி⁴க்க²வே, அஜானங் அபஸ்ஸங் யதா²பூ⁴தங் , மனோஸம்ப²ஸ்ஸங், பி⁴க்க²வே, அஜானங் அபஸ்ஸங் யதா²பூ⁴தங், யமித³ங் மனோஸம்ப²ஸ்ஸபச்சயா உப்பஜ்ஜதி வேத³யிதங் ஸுக²ங் வா து³க்க²ங் வா அது³க்க²மஸுக²ங் வா தம்பி அஜானங் அபஸ்ஸங் யதா²பூ⁴தங், மனஸ்மிங் ஸாரஜ்ஜதி, த⁴ம்மேஸு ஸாரஜ்ஜதி, மனோவிஞ்ஞாணே ஸாரஜ்ஜதி, மனோஸம்ப²ஸ்ஸே ஸாரஜ்ஜதி, யமித³ங் மனோஸம்ப²ஸ்ஸபச்சயா உப்பஜ்ஜதி வேத³யிதங் ஸுக²ங் வா து³க்க²ங் வா அது³க்க²மஸுக²ங் வா தஸ்மிம்பி ஸாரஜ்ஜதி.
‘‘தஸ்ஸ ஸாரத்தஸ்ஸ ஸங்யுத்தஸ்ஸ ஸம்மூள்ஹஸ்ஸ அஸ்ஸாதா³னுபஸ்ஸினோ விஹரதோ ஆயதிங் பஞ்சுபாதா³னக்க²ந்தா⁴ உபசயங் க³ச்ச²ந்தி. தண்ஹா சஸ்ஸ போனொப்³ப⁴விகா நந்தீ³ராக³ஸஹக³தா தத்ரதத்ராபி⁴னந்தி³னீ, ஸா சஸ்ஸ பவட்³ட⁴தி. தஸ்ஸ காயிகாபி த³ரதா² பவட்³ட⁴ந்தி, சேதஸிகாபி த³ரதா² பவட்³ட⁴ந்தி; காயிகாபி ஸந்தாபா பவட்³ட⁴ந்தி, சேதஸிகாபி ஸந்தாபா பவட்³ட⁴ந்தி; காயிகாபி பரிளாஹா பவட்³ட⁴ந்தி, சேதஸிகாபி பரிளாஹா பவட்³ட⁴ந்தி. ஸோ காயது³க்க²ம்பி சேதோது³க்க²ம்பி படிஸங்வேதே³தி.
430. ‘‘சக்கு²ஞ்ச கோ², பி⁴க்க²வே, ஜானங் பஸ்ஸங் யதா²பூ⁴தங், ரூபே ஜானங் பஸ்ஸங் யதா²பூ⁴தங், சக்கு²விஞ்ஞாணங் ஜானங் பஸ்ஸங் யதா²பூ⁴தங், சக்கு²ஸம்ப²ஸ்ஸங் ஜானங் பஸ்ஸங் யதா²பூ⁴தங், யமித³ங் சக்கு²ஸம்ப²ஸ்ஸபச்சயா உப்பஜ்ஜதி வேத³யிதங் ஸுக²ங் வா து³க்க²ங் வா அது³க்க²மஸுக²ங் வா தம்பி ஜானங் பஸ்ஸங் யதா²பூ⁴தங், சக்கு²ஸ்மிங் ந ஸாரஜ்ஜதி, ரூபேஸு ந ஸாரஜ்ஜதி, சக்கு²விஞ்ஞாணே ந ஸாரஜ்ஜதி, சக்கு²ஸம்ப²ஸ்ஸே ந ஸாரஜ்ஜதி, யமித³ங் சக்கு²ஸம்ப²ஸ்ஸபச்சயா உப்பஜ்ஜதி வேத³யிதங் ஸுக²ங் வா து³க்க²ங் வா அது³க்க²மஸுக²ங் வா தஸ்மிம்பி ந ஸாரஜ்ஜதி.
‘‘தஸ்ஸ அஸாரத்தஸ்ஸ அஸங்யுத்தஸ்ஸ அஸம்மூள்ஹஸ்ஸ ஆதீ³னவானுபஸ்ஸினோ விஹரதோ ஆயதிங் பஞ்சுபாதா³னக்க²ந்தா⁴ அபசயங் க³ச்ச²ந்தி. தண்ஹா சஸ்ஸ போனொப்³ப⁴விகா நந்தீ³ராக³ஸஹக³தா தத்ரதத்ராபி⁴னந்தி³னீ, ஸா சஸ்ஸ பஹீயதி. தஸ்ஸ காயிகாபி த³ரதா² பஹீயந்தி, சேதஸிகாபி த³ரதா² பஹீயந்தி; காயிகாபி ஸந்தாபா பஹீயந்தி, சேதஸிகாபி ஸந்தாபா பஹீயந்தி; காயிகாபி பரிளாஹா பஹீயந்தி , சேதஸிகாபி பரிளாஹா பஹீயந்தி. ஸோ காயஸுக²ம்பி சேதோஸுக²ம்பி படிஸங்வேதே³தி.
431. ‘‘யா ததா²பூ⁴தஸ்ஸ யதா²பூ⁴தஸ்ஸ (ஸீ॰ பீ॰) தி³ட்டி² ஸாஸ்ஸ ஹோதி ஸம்மாதி³ட்டி²; யோ ததா²பூ⁴தஸ்ஸ யதா²பூ⁴தஸ்ஸ (ஸீ॰ பீ॰) ஸங்கப்போ ஸ்வாஸ்ஸ ஹோதி ஸம்மாஸங்கப்போ; யோ ததா²பூ⁴தஸ்ஸ யதா²பூ⁴தஸ்ஸ (ஸீ॰ பீ॰) வாயாமோ ஸ்வாஸ்ஸ ஹோதி ஸம்மாவாயாமோ; யா ததா²பூ⁴தஸ்ஸ யதா²பூ⁴தஸ்ஸ (ஸீ॰ பீ॰) ஸதி ஸாஸ்ஸ ஹோதி ஸம்மாஸதி; யோ ததா²பூ⁴தஸ்ஸ யதா²பூ⁴தஸ்ஸ (ஸீ॰ பீ॰) ஸமாதி⁴ ஸ்வாஸ்ஸ ஹோதி ஸம்மாஸமாதி⁴. புப்³பே³வ கோ² பனஸ்ஸ காயகம்மங் வசீகம்மங் ஆஜீவோ ஸுபரிஸுத்³தோ⁴ ஹோதி. ஏவமஸ்ஸாயங் அரியோ அட்ட²ங்கி³கோ மக்³கோ³ பா⁴வனாபாரிபூரிங் க³ச்ச²தி.
‘‘தஸ்ஸ ஏவங் இமங் அரியங் அட்ட²ங்கி³கங் மக்³க³ங் பா⁴வயதோ சத்தாரோபி ஸதிபட்டா²னா பா⁴வனாபாரிபூரிங் க³ச்ச²ந்தி, சத்தாரோபி ஸம்மப்பதா⁴னா பா⁴வனாபாரிபூரிங் க³ச்ச²ந்தி, சத்தாரோபி இத்³தி⁴பாதா³ பா⁴வனாபாரிபூரிங் க³ச்ச²ந்தி, பஞ்சபி இந்த்³ரியானி பா⁴வனாபாரிபூரிங் க³ச்ச²ந்தி, பஞ்சபி ப³லானி பா⁴வனாபாரிபூரிங் க³ச்ச²ந்தி, ஸத்தபி பொ³ஜ்ஜ²ங்கா³ பா⁴வனாபாரிபூரிங் க³ச்ச²ந்தி.
‘‘தஸ்ஸிமே த்³வே த⁴ம்மா யுக³னந்தா⁴ யுக³னத்³தா⁴ (ஸீ॰ ஸ்யா॰ கங்॰) வத்தந்தி – ஸமதோ² ச விபஸ்ஸனா ச. ஸோ யே த⁴ம்மா அபி⁴ஞ்ஞா பரிஞ்ஞெய்யா தே த⁴ம்மே அபி⁴ஞ்ஞா பரிஜானாதி. யே த⁴ம்மா அபி⁴ஞ்ஞா பஹாதப்³பா³ தே த⁴ம்மே அபி⁴ஞ்ஞா பஜஹதி. யே த⁴ம்மா அபி⁴ஞ்ஞா பா⁴வேதப்³பா³ தே த⁴ம்மே அபி⁴ஞ்ஞா பா⁴வேதி. யே த⁴ம்மா அபி⁴ஞ்ஞா ஸச்சி²காதப்³பா³ தே த⁴ம்மே அபி⁴ஞ்ஞா ஸச்சி²கரோதி.
‘‘கதமே ச, பி⁴க்க²வே, த⁴ம்மா அபி⁴ஞ்ஞா பரிஞ்ஞெய்யா? ‘பஞ்சுபாதா³னக்க²ந்தா⁴’ திஸ்ஸ வசனீயங், ஸெய்யதி²த³ங் – ரூபுபாதா³னக்க²ந்தோ⁴, வேத³னுபாதா³னக்க²ந்தோ⁴, ஸஞ்ஞுபாதா³னக்க²ந்தோ⁴, ஸங்கா²ருபாதா³னக்க²ந்தோ⁴, விஞ்ஞாணுபாதா³னக்க²ந்தோ⁴. இமே த⁴ம்மா அபி⁴ஞ்ஞா பரிஞ்ஞெய்யா.
‘‘கதமே ச, பி⁴க்க²வே, த⁴ம்மா அபி⁴ஞ்ஞா பஹாதப்³பா³? அவிஜ்ஜா ச ப⁴வதண்ஹா ச – இமே த⁴ம்மா அபி⁴ஞ்ஞா பஹாதப்³பா³.
‘‘கதமே ச, பி⁴க்க²வே, த⁴ம்மா அபி⁴ஞ்ஞா பா⁴வேதப்³பா³? ஸமதோ² ச விபஸ்ஸனா ச – இமே த⁴ம்மா அபி⁴ஞ்ஞா பா⁴வேதப்³பா³.
‘‘கதமே , பி⁴க்க²வே, த⁴ம்மா அபி⁴ஞ்ஞா ஸச்சி²காதப்³பா³? விஜ்ஜா ச விமுத்தி ச – இமே த⁴ம்மா அபி⁴ஞ்ஞா ஸச்சி²காதப்³பா³.
432. ‘‘ஸோதங் , பி⁴க்க²வே, ஜானங் பஸ்ஸங் யதா²பூ⁴தங்…பே॰… கா⁴னங் பி⁴க்க²வே, ஜானங் பஸ்ஸங் யதா²பூ⁴தங்…பே॰… ஜிவ்ஹங், பி⁴க்க²வே, ஜானங் பஸ்ஸங் யதா²பூ⁴தங்… காயங், பி⁴க்க²வே, ஜானங் பஸ்ஸங் யதா²பூ⁴தங்… மனங், பி⁴க்க²வே, ஜானங் பஸ்ஸங் யதா²பூ⁴தங், த⁴ம்மே ஜானங் பஸ்ஸங் யதா²பூ⁴தங், மனோவிஞ்ஞாணங் ஜானங் பஸ்ஸங் யதா²பூ⁴தங், மனோஸம்ப²ஸ்ஸங் ஜானங் பஸ்ஸங் யதா²பூ⁴தங், யமித³ங் மனோஸம்ப²ஸ்ஸபச்சயா உப்பஜ்ஜதி வேத³யிதங் ஸுக²ங் வா து³க்க²ங் வா அது³க்க²மஸுக²ங் வா தம்பி ஜானங் பஸ்ஸங் யதா²பூ⁴தங், மனஸ்மிங் ந ஸாரஜ்ஜதி, த⁴ம்மேஸு ந ஸாரஜ்ஜதி, மனோவிஞ்ஞாணே ந ஸாரஜ்ஜதி, மனோஸம்ப²ஸ்ஸே ந ஸாரஜ்ஜதி, யமித³ங் மனோஸம்ப²ஸ்ஸபச்சயா உப்பஜ்ஜதி வேத³யிதங் ஸுக²ங் வா து³க்க²ங் வா அது³க்க²மஸுக²ங் வா தஸ்மிம்பி ந ஸாரஜ்ஜதி.
‘‘தஸ்ஸ அஸாரத்தஸ்ஸ அஸங்யுத்தஸ்ஸ அஸம்மூள்ஹஸ்ஸ ஆதீ³னவானுபஸ்ஸினோ விஹரதோ ஆயதிங் பஞ்சுபாதா³னக்க²ந்தா⁴ அபசயங் க³ச்ச²ந்தி. தண்ஹா சஸ்ஸ போனொப்³ப⁴விகா நந்தீ³ராக³ஸஹக³தா தத்ரதத்ராபி⁴னந்தி³னீ , ஸா சஸ்ஸ பஹீயதி. தஸ்ஸ காயிகாபி த³ரதா² பஹீயந்தி, சேதஸிகாபி த³ரதா² பஹீயந்தி; காயிகாபி ஸந்தாபா பஹீயந்தி, சேதஸிகாபி ஸந்தாபா பஹீயந்தி; காயிகாபி பரிளாஹா பஹீயந்தி, சேதஸிகாபி பரிளாஹா பஹீயந்தி. ஸோ காயஸுக²ம்பி சேதோஸுக²ம்பி படிஸங்வேதே³தி.
433. ‘‘யா ததா²பூ⁴தஸ்ஸ தி³ட்டி² ஸாஸ்ஸ ஹோதி ஸம்மாதி³ட்டி²; யோ ததா²பூ⁴தஸ்ஸ ஸங்கப்போ ஸ்வாஸ்ஸ ஹோதி ஸம்மாஸங்கப்போ; யோ ததா²பூ⁴தஸ்ஸ வாயாமோ ஸ்வாஸ்ஸ ஹோதி ஸம்மாவாயாமோ; யா ததா²பூ⁴தஸ்ஸ ஸதி ஸாஸ்ஸ ஹோதி ஸம்மாஸதி; யோ ததா²பூ⁴தஸ்ஸ ஸமாதி⁴ ஸ்வாஸ்ஸ ஹோதி ஸம்மாஸமாதி⁴. புப்³பே³வ கோ² பனஸ்ஸ காயகம்மங் வசீகம்மங் ஆஜீவோ ஸுபரிஸுத்³தோ⁴ ஹோதி. ஏவமஸ்ஸாயங் அரியோ அட்ட²ங்கி³கோ மக்³கோ³ பா⁴வனாபாரிபூரிங் க³ச்ச²தி.
‘‘தஸ்ஸ ஏவங் இமங் அரியங் அட்ட²ங்கி³கங் மக்³க³ங் பா⁴வயதோ சத்தாரோபி ஸதிபட்டா²னா பா⁴வனாபாரிபூரிங் க³ச்ச²ந்தி, சத்தாரோபி ஸம்மப்பதா⁴னா பா⁴வனாபாரிபூரிங் க³ச்ச²ந்தி, சத்தாரோபி இத்³தி⁴பாதா³ பா⁴வனாபாரிபூரிங் க³ச்ச²ந்தி, பஞ்சபி இந்த்³ரியானி பா⁴வனாபாரிபூரிங் க³ச்ச²ந்தி, பஞ்சபி ப³லானி பா⁴வனாபாரிபூரிங் க³ச்ச²ந்தி, ஸத்தபி பொ³ஜ்ஜ²ங்கா³ பா⁴வனாபாரிபூரிங் க³ச்ச²ந்தி.
‘‘தஸ்ஸிமே த்³வே த⁴ம்மா யுக³னந்தா⁴ வத்தந்தி – ஸமதோ² ச விபஸ்ஸனா ச. ஸோ யே த⁴ம்மா அபி⁴ஞ்ஞா பரிஞ்ஞெய்யா தே த⁴ம்மே அபி⁴ஞ்ஞா பரிஜானாதி. யே த⁴ம்மா அபி⁴ஞ்ஞா பஹாதப்³பா³ தே த⁴ம்மே அபி⁴ஞ்ஞா பஜஹதி. யே த⁴ம்மா அபி⁴ஞ்ஞா பா⁴வேதப்³பா³ தே த⁴ம்மே அபி⁴ஞ்ஞா பா⁴வேதி. யே த⁴ம்மா அபி⁴ஞ்ஞா ஸச்சி²காதப்³பா³ தே த⁴ம்மே அபி⁴ஞ்ஞா ஸச்சி²கரோதி.
‘‘கதமே ச, பி⁴க்க²வே, த⁴ம்மா அபி⁴ஞ்ஞா பரிஞ்ஞெய்யா? ‘பஞ்சுபாதா³னக்க²ந்தா⁴’ திஸ்ஸ வசனீயங், ஸெய்யதி²த³ங் – ரூபுபாதா³னக்க²ந்தோ⁴, வேத³னுபாதா³னக்க²ந்தோ⁴, ஸஞ்ஞுபாதா³னக்க²ந்தோ⁴, ஸங்கா²ருபாதா³னக்க²ந்தோ⁴, விஞ்ஞாணுபாதா³னக்க²ந்தோ⁴. இமே த⁴ம்மா அபி⁴ஞ்ஞா பரிஞ்ஞெய்யா.
‘‘கதமே ச, பி⁴க்க²வே, த⁴ம்மா அபி⁴ஞ்ஞா பஹாதப்³பா³? அவிஜ்ஜா ச ப⁴வதண்ஹா ச – இமே த⁴ம்மா அபி⁴ஞ்ஞா பஹாதப்³பா³.
‘‘கதமே ச, பி⁴க்க²வே, த⁴ம்மா அபி⁴ஞ்ஞா பா⁴வேதப்³பா³? ஸமதோ² ச விபஸ்ஸனா ச – இமே த⁴ம்மா அபி⁴ஞ்ஞா பா⁴வேதப்³பா³.
‘‘கதமே ச, பி⁴க்க²வே, த⁴ம்மா அபி⁴ஞ்ஞா ஸச்சி²காதப்³பா³? விஜ்ஜா ச விமுத்தி ச – இமே த⁴ம்மா அபி⁴ஞ்ஞா ஸச்சி²காதப்³பா³’’தி.
இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதங் அபி⁴னந்து³ந்தி.
மஹாஸளாயதனிகஸுத்தங் நிட்டி²தங் ஸத்தமங்.
8. நக³ரவிந்தெ³ய்யஸுத்தங்
434. ஏவங் மே ஸுதங் – ஏகங் ஸமயங் ப⁴க³வா கோஸலேஸு சாரிகங் சரமானோ மஹதா பி⁴க்கு²ஸங்கே⁴ன ஸத்³தி⁴ங் யேன நக³ரவிந்த³ங் நாம கோஸலானங் ப்³ராஹ்மணானங் கா³மோ தத³வஸரி. அஸ்ஸோஸுங் கோ² நக³ரவிந்தெ³ய்யகா நக³ரவிந்தெ³ய்யா (க॰) ப்³ராஹ்மணக³ஹபதிகா – ‘‘ஸமணோ க²லு, போ⁴, கோ³தமோ ஸக்யபுத்தோ ஸக்யகுலா பப்³ப³ஜிதோ கோஸலேஸு சாரிகங் சரமானோ மஹதா பி⁴க்கு²ஸங்கே⁴ன ஸத்³தி⁴ங் நக³ரவிந்த³ங் அனுப்பத்தோ. தங் கோ² பன ப⁴வந்தங் கோ³தமங் ஏவங் கல்யாணோ கித்திஸத்³தோ³ அப்³பு⁴க்³க³தோ – ‘இதிபி ஸோ ப⁴க³வா அரஹங் ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி² ஸத்தா² தே³வமனுஸ்ஸானங் பு³த்³தோ⁴ ப⁴க³வா’தி. ஸோ இமங் லோகங் ஸதே³வகங் ஸமாரகங் ஸப்³ரஹ்மகங் ஸஸ்ஸமணப்³ராஹ்மணிங் பஜங் ஸதே³வமனுஸ்ஸங் ஸயங் அபி⁴ஞ்ஞா ஸச்சி²கத்வா பவேதே³தி. ஸோ த⁴ம்மங் தே³ஸேதி ஆதி³கல்யாணங் மஜ்ஜே²கல்யாணங் பரியோஸானகல்யாணங் ஸாத்த²ங் ஸப்³யஞ்ஜனங், கேவலபரிபுண்ணங் பரிஸுத்³த⁴ங் ப்³ரஹ்மசரியங் பகாஸேதி. ஸாது⁴ கோ² பன ததா²ரூபானங் அரஹதங் த³ஸ்ஸனங் ஹோதீ’’தி.
அத² கோ² நக³ரவிந்தெ³ய்யகா ப்³ராஹ்மணக³ஹபதிகா யேன ப⁴க³வா தேனுபஸங்கமிங்ஸு; உபஸங்கமித்வா அப்பேகச்சே ப⁴க³வந்தங் அபி⁴வாதெ³த்வா ஏகமந்தங் நிஸீதி³ங்ஸு. அப்பேகச்சே ப⁴க³வதா ஸத்³தி⁴ங் ஸம்மோதி³ங்ஸு; ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³ங்ஸு. அப்பேகச்சே யேன ப⁴க³வா தேனஞ்ஜலிங் பணாமெத்வா ஏகமந்தங் நிஸீதி³ங்ஸு. அப்பேகச்சே ப⁴க³வதோ ஸந்திகே நாமகொ³த்தங் ஸாவெத்வா ஏகமந்தங் நிஸீதி³ங்ஸு. அப்பேகச்சே துண்ஹீபூ⁴தா ஏகமந்தங் நிஸீதி³ங்ஸு. ஏகமந்தங் நிஸின்னே கோ² நக³ரவிந்தெ³ய்யகே ப்³ராஹ்மணக³ஹபதிகே ப⁴க³வா ஏதத³வோச –
435. ‘‘ஸசே வோ, க³ஹபதயோ, அஞ்ஞதித்தி²யா பரிப்³பா³ஜகா ஏவங் புச்செ²ய்யுங் – ‘கத²ங்பூ⁴தா, க³ஹபதயோ, ஸமணப்³ராஹ்மணா ந ஸக்காதப்³பா³ ந க³ருகாதப்³பா³ ந மானேதப்³பா³ ந பூஜேதப்³பா³’தி? ஏவங் புட்டா² தும்ஹே, க³ஹபதயோ, தேஸங் அஞ்ஞதித்தி²யானங் பரிப்³பா³ஜகானங் ஏவங் ப்³யாகரெய்யாத² – ‘யே தே ஸமணப்³ராஹ்மணா சக்கு²விஞ்ஞெய்யேஸு ரூபேஸு அவீதராகா³ அவீததோ³ஸா அவீதமோஹா, அஜ்ஜ²த்தங் அவூபஸந்தசித்தா, ஸமவிஸமங் சரந்தி காயேன வாசாய மனஸா, ஏவரூபா ஸமணப்³ராஹ்மணா ந ஸக்காதப்³பா³ ந க³ருகாதப்³பா³ ந மானேதப்³பா³ ந பூஜேதப்³பா³. தங் கிஸ்ஸ ஹேது? மயம்பி ஹி சக்கு²விஞ்ஞெய்யேஸு ரூபேஸு அவீதராகா³ அவீததோ³ஸா அவீதமோஹா, அஜ்ஜ²த்தங் அவூபஸந்தசித்தா, ஸமவிஸமங் சராம காயேன வாசாய மனஸா, தேஸங் நோ ஸமசரியம்பி ஹேதங் உத்தரி அபஸ்ஸதங். தஸ்மா தே பொ⁴ந்தோ ஸமணப்³ராஹ்மணா ந ஸக்காதப்³பா³ ந க³ருகாதப்³பா³ ந மானேதப்³பா³ ந பூஜேதப்³பா³. யே தே ஸமணப்³ராஹ்மணா ஸோதவிஞ்ஞெய்யேஸு ஸத்³தே³ஸு… கா⁴னவிஞ்ஞெய்யேஸு க³ந்தே⁴ஸு… ஜிவ்ஹாவிஞ்ஞெய்யேஸு ரஸேஸு… காயவிஞ்ஞெய்யேஸு பொ²ட்ட²ப்³பே³ஸு… மனோவிஞ்ஞெய்யேஸு த⁴ம்மேஸு அவீதராகா³ அவீததோ³ஸா அவீதமோஹா, அஜ்ஜ²த்தங் அவூபஸந்தசித்தா, ஸமவிஸமங் சரந்தி காயேன வாசாய மனஸா, ஏவரூபா ஸமணப்³ராஹ்மணா ந ஸக்காதப்³பா³ ந க³ருகாதப்³பா³ ந மானேதப்³பா³ ந பூஜேதப்³பா³. தங் கிஸ்ஸ ஹேது? மயம்பி ஹி மனோவிஞ்ஞெய்யேஸு த⁴ம்மேஸு அவீதராகா³ அவீததோ³ஸா அவீதமோஹா , அஜ்ஜ²த்தங் அவூபஸந்தசித்தா, ஸமவிஸமங் சராம காயேன வாசாய மனஸா, தேஸங் நோ ஸமசரியம்பி ஹேதங் உத்தரி அபஸ்ஸதங். தஸ்மா தே பொ⁴ந்தோ ஸமணப்³ராஹ்மணா ந ஸக்காதப்³பா³ ந க³ருகாதப்³பா³ ந மானேதப்³பா³ ந பூஜேதப்³பா³’தி. ஏவங் புட்டா² தும்ஹே, க³ஹபதயோ, தேஸங் அஞ்ஞதித்தி²யானங் பரிப்³பா³ஜகானங் ஏவங் ப்³யாகரெய்யாத².
436. ‘‘ஸசே பன வோ, க³ஹபதயோ, அஞ்ஞதித்தி²யா பரிப்³பா³ஜகா ஏவங் புச்செ²ய்யுங் – ‘கத²ங்பூ⁴தா, க³ஹபதயோ, ஸமணப்³ராஹ்மணா ஸக்காதப்³பா³ க³ருகாதப்³பா³ மானேதப்³பா³ பூஜேதப்³பா³’தி? ஏவங் புட்டா² தும்ஹே, க³ஹபதயோ, தேஸங் அஞ்ஞதித்தி²யானங் பரிப்³பா³ஜகானங் ஏவங் ப்³யாகரெய்யாத² – ‘யே தே ஸமணப்³ராஹ்மணா சக்கு²விஞ்ஞெய்யேஸு ரூபேஸு வீதராகா³ வீததோ³ஸா வீதமோஹா, அஜ்ஜ²த்தங் வூபஸந்தசித்தா, ஸமசரியங் சரந்தி காயேன வாசாய மனஸா, ஏவரூபா ஸமணப்³ராஹ்மணா ஸக்காதப்³பா³ க³ருகாதப்³பா³ மானேதப்³பா³ பூஜேதப்³பா³. தங் கிஸ்ஸ ஹேது? மயம்பி ஹி மயங் ஹி (?) சக்கு²விஞ்ஞெய்யேஸு ரூபேஸு அவீதராகா³ அவீததோ³ஸா அவீதமோஹா, அஜ்ஜ²த்தங் அவூபஸந்தசித்தா, ஸமவிஸமங் சராம காயேன வாசாய மனஸா, தேஸங் நோ ஸமசரியம்பி ஹேதங் உத்தரி பஸ்ஸதங். தஸ்மா தே பொ⁴ந்தோ ஸமணப்³ராஹ்மணா ஸக்காதப்³பா³ க³ருகாதப்³பா³ மானேதப்³பா³ பூஜேதப்³பா³. யே தே ஸமணப்³ராஹ்மணா ஸோதவிஞ்ஞெய்யேஸு ஸத்³தே³ஸு… கா⁴னவிஞ்ஞெய்யேஸு க³ந்தே⁴ஸு… ஜிவ்ஹாவிஞ்ஞெய்யேஸு ரஸேஸு… காயவிஞ்ஞெய்யேஸு பொ²ட்ட²ப்³பே³ஸு… மனோவிஞ்ஞெய்யேஸு த⁴ம்மேஸு வீதராகா³ வீததோ³ஸா வீதமோஹா, அஜ்ஜ²த்தங் வூபஸந்தசித்தா, ஸமசரியங் சரந்தி காயேன வாசாய மனஸா, ஏவரூபா ஸமணப்³ராஹ்மணா ஸக்காதப்³பா³ க³ருகாதப்³பா³ மானேதப்³பா³ பூஜேதப்³பா³. தங் கிஸ்ஸ ஹேது? மயம்பி ஹி மனோவிஞ்ஞெய்யேஸு த⁴ம்மேஸு அவீதராகா³ அவீததோ³ஸா அவீதமோஹா அஜ்ஜ²த்தங் அவூபஸந்தசித்தா, ஸமவிஸமங் சராம காயேன வாசாய மனஸா, தேஸங் நோ ஸமசரியம்பி ஹேதங் உத்தரி பஸ்ஸதங். தஸ்மா தே பொ⁴ந்தோ ஸமணப்³ராஹ்மணா ஸக்காதப்³பா³ க³ருகாதப்³பா³ மானேதப்³பா³ பூஜேதப்³பா³’தி . ஏவங் புட்டா² தும்ஹே, க³ஹபதயோ, தேஸங் அஞ்ஞதித்தி²யானங் பரிப்³பா³ஜகானங் ஏவங் ப்³யாகரெய்யாத².
437. ‘‘ஸசே பன வோ ஸசே தே (ஸ்யா॰ கங்॰ பீ॰ க॰), க³ஹபதயோ, அஞ்ஞதித்தி²யா பரிப்³பா³ஜகா ஏவங் புச்செ²ய்யுங் – ‘கே பனாயஸ்மந்தானங் ஆகாரா, கே அன்வயா, யேன தும்ஹே ஆயஸ்மந்தோ ஏவங் வதே³த²? அத்³தா⁴ தே ஆயஸ்மந்தோ வீதராகா³ வா ராக³வினயாய வா படிபன்னா, வீததோ³ஸா வா தோ³ஸவினயாய வா படிபன்னா, வீதமோஹா வா மோஹவினயாய வா படிபன்னா’தி? ஏவங் புட்டா² தும்ஹே, க³ஹபதயோ, தேஸங் அஞ்ஞதித்தி²யானங் பரிப்³பா³ஜகானங் ஏவங் ப்³யாகரெய்யாத² – ‘ததா² ஹி தே ஆயஸ்மந்தோ அரஞ்ஞவனபத்தா²னி பந்தானி ஸேனாஸனானி படிஸேவந்தி. நத்தி² கோ² பன தத்த² ததா²ரூபா சக்கு²விஞ்ஞெய்யா ரூபா யே தி³ஸ்வா தி³ஸ்வா அபி⁴ரமெய்யுங், நத்தி² கோ² பன தத்த² ததா²ரூபா ஸோதவிஞ்ஞெய்யா ஸத்³தா³ யே ஸுத்வா ஸுத்வா அபி⁴ரமெய்யுங், நத்தி² கோ² பன தத்த² ததா²ரூபா கா⁴னவிஞ்ஞெய்யா க³ந்தா⁴ யே கா⁴யித்வா கா⁴யித்வா அபி⁴ரமெய்யுங் , நத்தி² கோ² பன தத்த² ததா²ரூபா ஜிவ்ஹாவிஞ்ஞெய்யா ரஸா யே ஸாயித்வா ஸாயித்வா அபி⁴ரமெய்யுங், நத்தி² கோ² பன தத்த² ததா²ரூபா காயவிஞ்ஞெய்யா பொ²ட்ட²ப்³பா³ யே பு²ஸித்வா பு²ஸித்வா அபி⁴ரமெய்யுங். இமே கோ² நோ, ஆவுஸோ, ஆகாரா, இமே அன்வயா, யேன மயங் யேன மயங் ஆயஸ்மந்தோ (ஸீ॰ பீ॰), யேன மயங் ஆயஸ்மந்தே (ஸ்யா॰ கங்॰) ஏவங் வதே³ம – அத்³தா⁴ தே ஆயஸ்மந்தோ வீதராகா³ வா ராக³வினயாய வா படிபன்னா, வீததோ³ஸா வா தோ³ஸவினயாய வா படிபன்னா, வீதமோஹா வா மோஹவினயாய வா படிபன்னா’தி. ஏவங் புட்டா² தும்ஹே, க³ஹபதயோ, தேஸங் அஞ்ஞதித்தி²யானங் பரிப்³பா³ஜகானங் ஏவங் ப்³யாகரெய்யாதா²’’தி.
ஏவங் வுத்தே, நக³ரவிந்தெ³ய்யகா ப்³ராஹ்மணக³ஹபதிகா ப⁴க³வந்தங் ஏதத³வோசுங் – ‘‘அபி⁴க்கந்தங், போ⁴ கோ³தம, அபி⁴க்கந்தங், போ⁴ கோ³தம! ஸெய்யதா²பி, போ⁴ கோ³தம, நிக்குஜ்ஜிதங் வா உக்குஜ்ஜெய்ய, படிச்ச²ன்னங் வா விவரெய்ய, மூள்ஹஸ்ஸ வா மக்³க³ங் ஆசிக்கெ²ய்ய, அந்த⁴காரே வா தேலபஜ்ஜோதங் தா⁴ரெய்ய – ‘சக்கு²மந்தோ ரூபானி த³க்க²ந்தீ’தி; ஏவமேவங் போ⁴தா கோ³தமேன அனேகபரியாயேன த⁴ம்மோ பகாஸிதோ. ஏதே மயங் ப⁴வந்தங் கோ³தமங் ஸரணங் க³ச்சா²ம த⁴ம்மஞ்ச பி⁴க்கு²ஸங்க⁴ஞ்ச. உபாஸகே நோ ப⁴வங் கோ³தமோ தா⁴ரேது அஜ்ஜதக்³கே³ பாணுபேதே ஸரணங் க³தே’’தி.
நக³ரவிந்தெ³ய்யஸுத்தங் நிட்டி²தங் அட்ட²மங்.
9. பிண்ட³பாதபாரிஸுத்³தி⁴ஸுத்தங்
438. ஏவங் மே ஸுதங் – ஏகங் ஸமயங் ப⁴க³வா ராஜக³ஹே விஹரதி வேளுவனே கலந்த³கனிவாபே. அத² கோ² ஆயஸ்மா ஸாரிபுத்தோ ஸாயன்ஹஸமயங் படிஸல்லானா வுட்டி²தோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னங் கோ² ஆயஸ்மந்தங் ஸாரிபுத்தங் ப⁴க³வா ஏதத³வோச –
‘‘விப்பஸன்னானி கோ² தே, ஸாரிபுத்த, இந்த்³ரியானி, பரிஸுத்³தோ⁴ ச²விவண்ணோ பரியோதா³தோ. கதமேன கோ² த்வங், ஸாரிபுத்த, விஹாரேன ஏதரஹி ப³ஹுலங் விஹரஸீ’’தி? ‘‘ஸுஞ்ஞதாவிஹாரேன கோ² அஹங், ப⁴ந்தே, ஏதரஹி ப³ஹுலங் விஹராமீ’’தி. ‘‘ஸாது⁴, ஸாது⁴, ஸாரிபுத்த! மஹாபுரிஸவிஹாரேன கிர த்வங், ஸாரிபுத்த, ஏதரஹி ப³ஹுலங் விஹரஸி. மஹாபுரிஸவிஹாரோ ஏஸோ ஹேஸ (ஸீ॰ ஸ்யா॰ கங்॰ பீ॰), ஸாரிபுத்த, யதி³த³ங் – ஸுஞ்ஞதா. தஸ்மாதிஹ, ஸாரிபுத்த, பி⁴க்கு² ஸசே ஆகங்கெ²ய்ய – ‘ஸுஞ்ஞதாவிஹாரேன ப³ஹுலங் ஏதரஹி ப³ஹுலங் (ஸீ॰ பீ॰) விஹரெய்ய’ந்தி, தேன, ஸாரிபுத்த, பி⁴க்கு²னா இதி படிஸஞ்சிக்கி²தப்³ப³ங் – ‘யேன சாஹங் மக்³கே³ன கா³மங் பிண்டா³ய பாவிஸிங், யஸ்மிஞ்ச பதே³ஸே பிண்டா³ய அசரிங், யேன ச மக்³கே³ன கா³மதோ பிண்டா³ய படிக்கமிங், அத்தி² நு கோ² மே தத்த² சக்கு²விஞ்ஞெய்யேஸு ரூபேஸு ச²ந்தோ³ வா ராகோ³ வா தோ³ஸோ வா மோஹோ வா படிக⁴ங் வாபி சேதஸோ’தி? ஸசே, ஸாரிபுத்த, பி⁴க்கு² பச்சவெக்க²மானோ ஏவங் ஜானாதி – ‘யேன சாஹங் மக்³கே³ன கா³மங் பிண்டா³ய பாவிஸிங், யஸ்மிஞ்ச பதே³ஸே பிண்டா³ய அசரிங், யேன ச மக்³கே³ன கா³மதோ பிண்டா³ய படிக்கமிங், அத்தி² மே தத்த² சக்கு²விஞ்ஞெய்யேஸு ரூபேஸு ச²ந்தோ³ வா ராகோ³ வா தோ³ஸோ வா மோஹோ வா படிக⁴ங் வாபி சேதஸோ’தி, தேன, ஸாரிபுத்த, பி⁴க்கு²னா தேஸங்யேவ பாபகானங் அகுஸலானங் த⁴ம்மானங் பஹானாய வாயமிதப்³ப³ங். ஸசே பன, ஸாரிபுத்த, பி⁴க்கு² பச்சவெக்க²மானோ ஏவங் ஜானாதி – ‘யேன சாஹங் மக்³கே³ன கா³மங் பிண்டா³ய பாவிஸிங், யஸ்மிஞ்ச பதே³ஸே பிண்டா³ய அசரிங், யேன ச மக்³கே³ன கா³மதோ பிண்டா³ய படிக்கமிங், நத்தி² மே தத்த² சக்கு²விஞ்ஞெய்யேஸு ரூபேஸு ச²ந்தோ³ வா ராகோ³ வா தோ³ஸோ வா மோஹோ வா படிக⁴ங் வாபி சேதஸோ’தி, தேன, ஸாரிபுத்த, பி⁴க்கு²னா தேனேவ பீதிபாமோஜ்ஜேன விஹாதப்³ப³ங் அஹோரத்தானுஸிக்கி²னா குஸலேஸு த⁴ம்மேஸு.
439. ‘‘புன சபரங், ஸாரிபுத்த, பி⁴க்கு²னா இதி படிஸஞ்சிக்கி²தப்³ப³ங் – ‘யேன சாஹங் மக்³கே³ன கா³மங் பிண்டா³ய பாவிஸிங், யஸ்மிஞ்ச பதே³ஸே பிண்டா³ய அசரிங், யேன ச மக்³கே³ன கா³மதோ பிண்டா³ய படிக்கமிங், அத்தி² நு கோ² மே தத்த² ஸோதவிஞ்ஞெய்யேஸு ஸத்³தே³ஸு…பே॰… கா⁴னவிஞ்ஞெய்யேஸு க³ந்தே⁴ஸு… ஜிவ்ஹாவிஞ்ஞெய்யேஸு ரஸேஸு … காயவிஞ்ஞெய்யேஸு பொ²ட்ட²ப்³பே³ஸு… மனோவிஞ்ஞெய்யேஸு த⁴ம்மேஸு ச²ந்தோ³ வா ராகோ³ வா தோ³ஸோ வா மோஹோ வா படிக⁴ங் வாபி சேதஸோ’தி? ஸசே , ஸாரிபுத்த, பி⁴க்கு² பச்சவெக்க²மானோ ஏவங் ஜானாதி – ‘யேன சாஹங் மக்³கே³ன கா³மங் பிண்டா³ய பாவிஸிங், யஸ்மிஞ்ச பதே³ஸே பிண்டா³ய அசரிங், யேன ச மக்³கே³ன கா³மதோ பிண்டா³ய படிக்கமிங், அத்தி² மே தத்த² மனோவிஞ்ஞெய்யேஸு த⁴ம்மேஸு ச²ந்தோ³ வா ராகோ³ வா தோ³ஸோ வா மோஹோ வா படிக⁴ங் வாபி சேதஸோ’தி, தேன, ஸாரிபுத்த, பி⁴க்கு²னா தேஸங்யேவ பாபகானங் அகுஸலானங் த⁴ம்மானங் பஹானாய வாயமிதப்³ப³ங். ஸசே பன, ஸாரிபுத்த, பி⁴க்கு² பச்சவெக்க²மானோ ஏவங் ஜானாதி – ‘யேன சாஹங் மக்³கே³ன கா³மங் பிண்டா³ய பாவிஸிங், யஸ்மிஞ்ச பதே³ஸே பிண்டா³ய அசரிங், யேன ச மக்³கே³ன கா³மதோ பிண்டா³ய படிக்கமிங், நத்தி² மே தத்த² மனோவிஞ்ஞெய்யேஸு த⁴ம்மேஸு ச²ந்தோ³ வா ராகோ³ வா தோ³ஸோ வா மோஹோ வா படிக⁴ங் வாபி சேதஸோ’தி, தேன, ஸாரிபுத்த, பி⁴க்கு²னா தேனேவ பீதிபாமோஜ்ஜேன விஹாதப்³ப³ங் அஹோரத்தானுஸிக்கி²னா குஸலேஸு த⁴ம்மேஸு.
440. ‘‘புன சபரங், ஸாரிபுத்த, பி⁴க்கு²னா இதி படிஸஞ்சிக்கி²தப்³ப³ங் – ‘பஹீனா நு கோ² மே பஞ்ச காமகு³ணா’தி? ஸசே, ஸாரிபுத்த, பி⁴க்கு² பச்சவெக்க²மானோ ஏவங் ஜானாதி – ‘அப்பஹீனா கோ² மே பஞ்ச காமகு³ணா’தி, தேன, ஸாரிபுத்த, பி⁴க்கு²னா பஞ்சன்னங் காமகு³ணானங் பஹானாய வாயமிதப்³ப³ங். ஸசே பன, ஸாரிபுத்த, பி⁴க்கு² பச்சவெக்க²மானோ ஏவங் ஜானாதி – ‘பஹீனா கோ² மே பஞ்ச காமகு³ணா’தி, தேன, ஸாரிபுத்த, பி⁴க்கு²னா தேனேவ பீதிபாமோஜ்ஜேன விஹாதப்³ப³ங் அஹோரத்தானுஸிக்கி²னா குஸலேஸு த⁴ம்மேஸு.
441. ‘‘புன சபரங், ஸாரிபுத்த, பி⁴க்கு²னா இதி படிஸஞ்சிக்கி²தப்³ப³ங் – ‘பஹீனா நு கோ² மே பஞ்ச நீவரணா’தி? ஸசே, ஸாரிபுத்த, பி⁴க்கு² பச்சவெக்க²மானோ ஏவங் ஜானாதி – ‘அப்பஹீனா கோ² மே பஞ்ச நீவரணா’தி, தேன, ஸாரிபுத்த, பி⁴க்கு²னா பஞ்சன்னங் நீவரணானங் பஹானாய வாயமிதப்³ப³ங். ஸசே பன, ஸாரிபுத்த, பி⁴க்கு² பச்சவெக்க²மானோ ஏவங் ஜானாதி – ‘பஹீனா கோ² மே பஞ்ச நீவரணா’தி, தேன, ஸாரிபுத்த, பி⁴க்கு²னா தேனேவ பீதிபாமோஜ்ஜேன விஹாதப்³ப³ங் அஹோரத்தானுஸிக்கி²னா குஸலேஸு த⁴ம்மேஸு.
442. ‘‘புன சபரங், ஸாரிபுத்த, பி⁴க்கு²னா இதி படிஸஞ்சிக்கி²தப்³ப³ங் – ‘பரிஞ்ஞாதா நு கோ² மே பஞ்சுபாதா³னக்க²ந்தா⁴’தி? ஸசே, ஸாரிபுத்த, பி⁴க்கு² பச்சவெக்க²மானோ ஏவங் ஜானாதி – ‘அபரிஞ்ஞாதா கோ² மே பஞ்சுபாதா³னக்க²ந்தா⁴’தி, தேன, ஸாரிபுத்த, பி⁴க்கு²னா பஞ்சன்னங் உபாதா³னக்க²ந்தா⁴னங் பரிஞ்ஞாய வாயமிதப்³ப³ங். ஸசே பன, ஸாரிபுத்த, பி⁴க்கு² பச்சவெக்க²மானோ ஏவங் ஜானாதி – ‘பரிஞ்ஞாதா கோ² மே பஞ்சுபாதா³னக்க²ந்தா⁴’தி, தேன, ஸாரிபுத்த, பி⁴க்கு²னா தேனேவ பீதிபாமோஜ்ஜேன விஹாதப்³ப³ங் அஹோரத்தானுஸிக்கி²னா குஸலேஸு த⁴ம்மேஸு.
443. ‘‘புன சபரங், ஸாரிபுத்த, பி⁴க்கு²னா இதி படிஸஞ்சிக்கி²தப்³ப³ங் – ‘பா⁴விதா நு கோ² மே சத்தாரோ ஸதிபட்டா²னா’தி? ஸசே, ஸாரிபுத்த, பி⁴க்கு² பச்சவெக்க²மானோ ஏவங் ஜானாதி – ‘அபா⁴விதா கோ² மே சத்தாரோ ஸதிபட்டா²னா’தி, தேன, ஸாரிபுத்த, பி⁴க்கு²னா சதுன்னங் ஸதிபட்டா²னானங் பா⁴வனாய வாயமிதப்³ப³ங். ஸசே பன, ஸாரிபுத்த, பி⁴க்கு² பச்சவெக்க²மானோ ஏவங் ஜானாதி – ‘பா⁴விதா கோ² மே சத்தாரோ ஸதிபட்டா²னா’தி, தேன, ஸாரிபுத்த, பி⁴க்கு²னா தேனேவ பீதிபாமோஜ்ஜேன விஹாதப்³ப³ங் அஹோரத்தானுஸிக்கி²னா குஸலேஸு த⁴ம்மேஸு.
444. ‘‘புன சபரங், ஸாரிபுத்த, பி⁴க்கு²னா இதி படிஸஞ்சிக்கி²தப்³ப³ங் – ‘பா⁴விதா நு கோ² மே சத்தாரோ ஸம்மப்பதா⁴னா’தி? ஸசே, ஸாரிபுத்த, பி⁴க்கு² பச்சவெக்க²மானோ ஏவங் ஜானாதி – ‘அபா⁴விதா கோ² மே சத்தாரோ ஸம்மப்பதா⁴னா’தி, தேன, ஸாரிபுத்த, பி⁴க்கு²னா சதுன்னங் ஸம்மப்பதா⁴னானங் பா⁴வனாய வாயமிதப்³ப³ங். ஸசே பன, ஸாரிபுத்த, பி⁴க்கு² பச்சவெக்க²மானோ ஏவங் ஜானாதி – ‘பா⁴விதா கோ² மே சத்தாரோ ஸம்மப்பதா⁴னா’தி , தேன, ஸாரிபுத்த, பி⁴க்கு²னா தேனேவ பீதிபாமோஜ்ஜேன விஹாதப்³ப³ங் அஹோரத்தானுஸிக்கி²னா குஸலேஸு த⁴ம்மேஸு.
445. ‘‘புன சபரங், ஸாரிபுத்த, பி⁴க்கு²னா இதி படிஸஞ்சிக்கி²தப்³ப³ங் – ‘பா⁴விதா நு கோ² மே சத்தாரோ இத்³தி⁴பாதா³’தி? ஸசே, ஸாரிபுத்த, பி⁴க்கு² பச்சவெக்க²மானோ ஏவங் ஜானாதி – ‘அபா⁴விதா கோ² மே சத்தாரோ இத்³தி⁴பாதா³’தி, தேன, ஸாரிபுத்த, பி⁴க்கு²னா சதுன்னங் இத்³தி⁴பாதா³னங் பா⁴வனாய வாயமிதப்³ப³ங். ஸசே பன, ஸாரிபுத்த, பி⁴க்கு² பச்சவெக்க²மானோ ஏவங் ஜானாதி – ‘பா⁴விதா கோ² மே சத்தாரோ இத்³தி⁴பாதா³’தி, தேன, ஸாரிபுத்த, பி⁴க்கு²னா தேனேவ பீதிபாமோஜ்ஜேன விஹாதப்³ப³ங் அஹோரத்தானுஸிக்கி²னா குஸலேஸு த⁴ம்மேஸு.
446. ‘‘புன சபரங், ஸாரிபுத்த, பி⁴க்கு²னா இதி படிஸஞ்சிக்கி²தப்³ப³ங் – ‘பா⁴விதானி நு கோ² மே பஞ்சிந்த்³ரியானீ’தி? ஸசே, ஸாரிபுத்த, பி⁴க்கு² பச்சவெக்க²மானோ ஏவங் ஜானாதி – ‘அபா⁴விதானி கோ² மே பஞ்சிந்த்³ரியானீ’தி, தேன, ஸாரிபுத்த, பி⁴க்கு²னா பஞ்சன்னங் இந்த்³ரியானங் பா⁴வனாய வாயமிதப்³ப³ங். ஸசே பன, ஸாரிபுத்த, பி⁴க்கு² பச்சவெக்க²மானோ ஏவங் ஜானாதி – ‘பா⁴விதானி கோ² மே பஞ்சிந்த்³ரியானீ’தி, தேன, ஸாரிபுத்த, பி⁴க்கு²னா தேனேவ பீதிபாமோஜ்ஜேன விஹாதப்³ப³ங் அஹோரத்தானுஸிக்கி²னா குஸலேஸு த⁴ம்மேஸு.
447. ‘‘புன சபரங், ஸாரிபுத்த, பி⁴க்கு²னா இதி படிஸஞ்சிக்கி²தப்³ப³ங் – ‘பா⁴விதானி நு கோ² மே பஞ்ச ப³லானீ’தி? ஸசே, ஸாரிபுத்த, பி⁴க்கு² பச்சவெக்க²மானோ ஏவங் ஜானாதி – ‘அபா⁴விதானி கோ² மே பஞ்ச ப³லானீ’தி, தேன, ஸாரிபுத்த, பி⁴க்கு²னா பஞ்சன்னங் ப³லானங் பா⁴வனாய வாயமிதப்³ப³ங். ஸசே பன, ஸாரிபுத்த, பி⁴க்கு² பச்சவெக்க²மானோ ஏவங் ஜானாதி – ‘பா⁴விதானி கோ² மே பஞ்ச ப³லானீ’தி, தேன, ஸாரிபுத்த, பி⁴க்கு²னா தேனேவ பீதிபாமோஜ்ஜேன விஹாதப்³ப³ங் அஹோரத்தானுஸிக்கி²னா குஸலேஸு த⁴ம்மேஸு.
448. ‘‘புன சபரங், ஸாரிபுத்த, பி⁴க்கு²னா இதி படிஸஞ்சிக்கி²தப்³ப³ங் – ‘பா⁴விதா நு கோ² மே ஸத்த பொ³ஜ்ஜ²ங்கா³’தி? ஸசே, ஸாரிபுத்த, பி⁴க்கு² பச்சவெக்க²மானோ ஏவங் ஜானாதி – ‘அபா⁴விதா கோ² மே ஸத்த பொ³ஜ்ஜ²ங்கா³’தி, தேன, ஸாரிபுத்த, பி⁴க்கு²னா ஸத்தன்னங் பொ³ஜ்ஜ²ங்கா³னங் பா⁴வனாய வாயமிதப்³ப³ங். ஸசே பன, ஸாரிபுத்த, பி⁴க்கு² பச்சவெக்க²மானோ ஏவங் ஜானாதி – ‘பா⁴விதா கோ² மே ஸத்த பொ³ஜ்ஜ²ங்கா³’தி, தேன, ஸாரிபுத்த, பி⁴க்கு²னா தேனேவ பீதிபாமோஜ்ஜேன விஹாதப்³ப³ங் அஹோரத்தானுஸிக்கி²னா குஸலேஸு த⁴ம்மேஸு.
449. ‘‘புன சபரங், ஸாரிபுத்த, பி⁴க்கு²னா இதி படிஸஞ்சிக்கி²தப்³ப³ங் – ‘பா⁴விதோ நு கோ² மே அரியோ அட்ட²ங்கி³கோ மக்³கோ³’தி? ஸசே, ஸாரிபுத்த, பி⁴க்கு² பச்சவெக்க²மானோ ஏவங் ஜானாதி – ‘அபா⁴விதோ கோ² மே அரியோ அட்ட²ங்கி³கோ மக்³கோ³’தி, தேன, ஸாரிபுத்த, பி⁴க்கு²னா அரியஸ்ஸ அட்ட²ங்கி³கஸ்ஸ மக்³க³ஸ்ஸ பா⁴வனாய வாயமிதப்³ப³ங். ஸசே பன, ஸாரிபுத்த, பி⁴க்கு² பச்சவெக்க²மானோ ஏவங் ஜானாதி – ‘பா⁴விதோ கோ² மே அரியோ அட்ட²ங்கி³கோ மக்³கோ³’தி , தேன, ஸாரிபுத்த, பி⁴க்கு²னா தேனேவ பீதிபாமோஜ்ஜேன விஹாதப்³ப³ங் அஹோரத்தானுஸிக்கி²னா குஸலேஸு த⁴ம்மேஸு.
450. ‘‘புன சபரங், ஸாரிபுத்த, பி⁴க்கு²னா இதி படிஸஞ்சிக்கி²தப்³ப³ங் – ‘பா⁴விதா நு கோ² மே ஸமதோ² ச விபஸ்ஸனா சா’தி? ஸசே, ஸாரிபுத்த, பி⁴க்கு² பச்சவெக்க²மானோ ஏவங் ஜானாதி – ‘அபா⁴விதா கோ² மே ஸமதோ² ச விபஸ்ஸனா சா’தி, தேன, ஸாரிபுத்த, பி⁴க்கு²னா ஸமத²விபஸ்ஸனானங் பா⁴வனாய வாயமிதப்³ப³ங். ஸசே பன, ஸாரிபுத்த, பி⁴க்கு² பச்சவெக்க²மானோ ஏவங் ஜானாதி – ‘பா⁴விதா கோ² மே ஸமதோ² ச விபஸ்ஸனா சா’தி, தேன, ஸாரிபுத்த, பி⁴க்கு²னா தேனேவ பீதிபாமோஜ்ஜேன விஹாதப்³ப³ங் அஹோரத்தானுஸிக்கி²னா குஸலேஸு த⁴ம்மேஸு.
451. ‘‘புன சபரங், ஸாரிபுத்த, பி⁴க்கு²னா இதி படிஸஞ்சிக்கி²தப்³ப³ங் – ‘ஸச்சி²கதா நு கோ² மே விஜ்ஜா ச விமுத்தி சா’தி? ஸசே, ஸாரிபுத்த, பி⁴க்கு² பச்சவெக்க²மானோ ஏவங் ஜானாதி – ‘அஸச்சி²கதா கோ² மே விஜ்ஜா ச விமுத்தி சா’தி, தேன, ஸாரிபுத்த, பி⁴க்கு²னா விஜ்ஜாய விமுத்தியா ஸச்சி²கிரியாய வாயமிதப்³ப³ங். ஸசே பன, ஸாரிபுத்த, பி⁴க்கு² பச்சவெக்க²மானோ ஏவங் ஜானாதி – ‘ஸச்சி²கதா கோ² மே விஜ்ஜா ச விமுத்தி சா’தி, தேன, ஸாரிபுத்த, பி⁴க்கு²னா தேனேவ பீதிபாமோஜ்ஜேன விஹாதப்³ப³ங் அஹோரத்தானுஸிக்கி²னா குஸலேஸு த⁴ம்மேஸு.
452. ‘‘யே ஹி கேசி, ஸாரிபுத்த, அதீதமத்³தா⁴னங் ஸமணா வா ப்³ராஹ்மணா வா பிண்ட³பாதங் பரிஸோதே⁴ஸுங், ஸப்³பே³ தே ஏவமேவ பச்சவெக்கி²த்வா பச்சவெக்கி²த்வா பிண்ட³பாதங் பரிஸோதே⁴ஸுங். யேபி ஹி கேசி, ஸாரிபுத்த, அனாக³தமத்³தா⁴னங் ஸமணா வா ப்³ராஹ்மணா வா பிண்ட³பாதங் பரிஸோதெ⁴ஸ்ஸந்தி, ஸப்³பே³ தே ஏவமேவ பச்சவெக்கி²த்வா பச்சவெக்கி²த்வா பிண்ட³பாதங் பரிஸோதெ⁴ஸ்ஸந்தி. யேபி ஹி கேசி, ஸாரிபுத்த, ஏதரஹி ஸமணா வா ப்³ராஹ்மணா வா பிண்ட³பாதங் பரிஸோதெ⁴ந்தி, ஸப்³பே³ தே ஏவமேவ பச்சவெக்கி²த்வா பச்சவெக்கி²த்வா பிண்ட³பாதங் பரிஸோதெ⁴ந்தி. தஸ்மாதிஹ, ஸாரிபுத்த வோ ஸாரிபுத்த ஏவங் ஸிக்கி²தப்³ப³ங் (ஸீ॰ பீ॰), ‘பச்சவெக்கி²த்வா பச்சவெக்கி²த்வா பிண்ட³பாதங் பரிஸோதெ⁴ஸ்ஸாமா’தி – ஏவஞ்ஹி வோ, ஸாரிபுத்த, ஸிக்கி²தப்³ப³’’ந்தி.
இத³மவோச ப⁴க³வா. அத்தமனோ ஆயஸ்மா ஸாரிபுத்தோ ப⁴க³வதோ பா⁴ஸிதங் அபி⁴னந்தீ³தி.
பிண்ட³பாதபாரிஸுத்³தி⁴ஸுத்தங் நிட்டி²தங் நவமங்.
10. இந்த்³ரியபா⁴வனாஸுத்தங்
453. ஏவங் மே ஸுதங் – ஏகங் ஸமயங் ப⁴க³வா க³ஜங்க³லாயங் கஜங்க³லாயங் (ஸீ॰ பீ॰), கஜ்ஜங்க³லாயங் (ஸ்யா॰ கங்॰) விஹரதி ஸுவேளுவனே வேளுவனே (ஸ்யா॰ கங்॰), முகே²லுவனே (ஸீ॰ பீ॰). அத² கோ² உத்தரோ மாணவோ பாராஸிவியந்தேவாஸீ பாராஸரியந்தேவாஸீ (ஸீ॰ பீ॰), பாராஸிரியந்தேவாஸீ (ஸ்யா॰ கங்॰) யேன ப⁴க³வா தேனுபஸங்கமி; உபஸங்கமித்வா ப⁴க³வதா ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³. ஏகமந்தங் நிஸின்னங் கோ² உத்தரங் மாணவங் பாராஸிவியந்தேவாஸிங் ப⁴க³வா ஏதத³வோச – ‘‘தே³ஸேதி, உத்தர, பாராஸிவியோ ப்³ராஹ்மணோ ஸாவகானங் இந்த்³ரியபா⁴வன’’ந்தி? ‘‘தே³ஸேதி, போ⁴ கோ³தம, பாராஸிவியோ ப்³ராஹ்மணோ ஸாவகானங் இந்த்³ரியபா⁴வன’’ந்தி. ‘‘யதா² கத²ங் பன, உத்தர, தே³ஸேதி பாராஸிவியோ ப்³ராஹ்மணோ ஸாவகானங் இந்த்³ரியபா⁴வன’’ந்தி? ‘‘இத⁴, போ⁴ கோ³தம, சக்கு²னா ரூபங் ந பஸ்ஸதி, ஸோதேன ஸத்³த³ங் ந ஸுணாதி – ஏவங் கோ², போ⁴ கோ³தம, தே³ஸேதி பாராஸிவியோ ப்³ராஹ்மணோ ஸாவகானங் இந்த்³ரியபா⁴வன’’ந்தி. ‘‘ஏவங் ஸந்தே கோ², உத்தர, அந்தோ⁴ பா⁴விதிந்த்³ரியோ ப⁴விஸ்ஸதி, ப³தி⁴ரோ பா⁴விதிந்த்³ரியோ ப⁴விஸ்ஸதி; யதா² பாராஸிவியஸ்ஸ ப்³ராஹ்மணஸ்ஸ வசனங். அந்தோ⁴ ஹி, உத்தர, சக்கு²னா ரூபங் ந பஸ்ஸதி, ப³தி⁴ரோ ஸோதேன ஸத்³த³ங் ந ஸுணாதீ’’தி. ஏவங் வுத்தே, உத்தரோ மாணவோ பாராஸிவியந்தேவாஸீ துண்ஹீபூ⁴தோ மங்குபூ⁴தோ பத்தக்க²ந்தோ⁴ அதோ⁴முகோ² பஜ்ஜா²யந்தோ அப்படிபா⁴னோ நிஸீதி³.
அத² கோ² ப⁴க³வா உத்தரங் மாணவங் பாராஸிவியந்தேவாஸிங் துண்ஹீபூ⁴தங் மங்குபூ⁴தங் பத்தக்க²ந்த⁴ங் அதோ⁴முக²ங் பஜ்ஜா²யந்தங் அப்படிபா⁴னங் விதி³த்வா ஆயஸ்மந்தங் ஆனந்த³ங் ஆமந்தேஸி – ‘‘அஞ்ஞதா² கோ², ஆனந்த³, தே³ஸேதி பாராஸிவியோ ப்³ராஹ்மணோ ஸாவகானங் இந்த்³ரியபா⁴வனங், அஞ்ஞதா² ச பனானந்த³, அரியஸ்ஸ வினயே அனுத்தரா இந்த்³ரியபா⁴வனா ஹோதீ’’தி. ‘‘ஏதஸ்ஸ, ப⁴க³வா, காலோ; ஏதஸ்ஸ, ஸுக³த, காலோ யங் ப⁴க³வா அரியஸ்ஸ வினயே அனுத்தரங் இந்த்³ரியபா⁴வனங் தே³ஸெய்ய. ப⁴க³வதோ ஸுத்வா பி⁴க்கூ² தா⁴ரெஸ்ஸந்தீ’’தி. ‘‘தேனஹானந்த³, ஸுணாஹி, ஸாது⁴கங் மனஸி கரோஹி; பா⁴ஸிஸ்ஸாமீ’’தி. ‘‘ஏவங், ப⁴ந்தே’’தி கோ² ஆயஸ்மா ஆனந்தோ³ ப⁴க³வதோ பச்சஸ்ஸோஸி. ப⁴க³வா ஏதத³வோச –
454. ‘‘கத²ஞ்சானந்த³, அரியஸ்ஸ வினயே அனுத்தரா இந்த்³ரியபா⁴வனா ஹோதி? இதா⁴னந்த³, பி⁴க்கு²னோ சக்கு²னா ரூபங் தி³ஸ்வா உப்பஜ்ஜதி மனாபங், உப்பஜ்ஜதி அமனாபங், உப்பஜ்ஜதி மனாபாமனாபங். ஸோ ஏவங் பஜானாதி – ‘உப்பன்னங் கோ² மே இத³ங் மனாபங், உப்பன்னங் அமனாபங், உப்பன்னங் மனாபாமனாபங் . தஞ்ச கோ² ஸங்க²தங் ஓளாரிகங் படிச்சஸமுப்பன்னங். ஏதங் ஸந்தங் ஏதங் பணீதங் யதி³த³ங் – உபெக்கா²’தி. தஸ்ஸ தங் உப்பன்னங் மனாபங் உப்பன்னங் அமனாபங் உப்பன்னங் மனாபாமனாபங் நிருஜ்ஜ²தி; உபெக்கா² ஸண்டா²தி. ஸெய்யதா²பி, ஆனந்த³, சக்கு²மா புரிஸோ உம்மீலெத்வா வா நிமீலெய்ய, நிமீலெத்வா வா உம்மீலெய்ய; ஏவமேவ கோ², ஆனந்த³, யஸ்ஸ கஸ்ஸசி ஏவங்ஸீக⁴ங் ஏவங்துவடங் ஏவங்அப்பகஸிரேன உப்பன்னங் மனாபங் உப்பன்னங் அமனாபங் உப்பன்னங் மனாபாமனாபங் நிருஜ்ஜ²தி, உபெக்கா² ஸண்டா²தி – அயங் வுச்சதானந்த³, அரியஸ்ஸ வினயே அனுத்தரா இந்த்³ரியபா⁴வனா சக்கு²விஞ்ஞெய்யேஸு ரூபேஸு.
455. ‘‘புன சபரங், ஆனந்த³, பி⁴க்கு²னோ ஸோதேன ஸத்³த³ங் ஸுத்வா உப்பஜ்ஜதி மனாபங், உப்பஜ்ஜதி அமனாபங், உப்பஜ்ஜதி மனாபாமனாபங். ஸோ ஏவங் பஜானாதி – ‘உப்பன்னங் கோ² மே இத³ங் மனாபங், உப்பன்னங் அமனாபங், உப்பன்னங் மனாபாமனாபங். தஞ்ச கோ² ஸங்க²தங் ஓளாரிகங் படிச்சஸமுப்பன்னங். ஏதங் ஸந்தங் ஏதங் பணீதங் யதி³த³ங் – உபெக்கா²’தி. தஸ்ஸ தங் உப்பன்னங் மனாபங் உப்பன்னங் அமனாபங் உப்பன்னங் மனாபாமனாபங் நிருஜ்ஜ²தி; உபெக்கா² ஸண்டா²தி. ஸெய்யதா²பி, ஆனந்த³, ப³லவா புரிஸோ அப்பகஸிரேனேவ அச்ச²ரங் அச்ச²ரிகங் (ஸ்யா॰ கங்॰ பீ॰ க॰) பஹரெய்ய; ஏவமேவ கோ², ஆனந்த³, யஸ்ஸ கஸ்ஸசி ஏவங்ஸீக⁴ங் ஏவங்துவடங் ஏவங்அப்பகஸிரேன உப்பன்னங் மனாபங் உப்பன்னங் அமனாபங் உப்பன்னங் மனாபாமனாபங் நிருஜ்ஜ²தி, உபெக்கா² ஸண்டா²தி – அயங் வுச்சதானந்த³, அரியஸ்ஸ வினயே அனுத்தரா இந்த்³ரியபா⁴வனா ஸோதவிஞ்ஞெய்யேஸு ஸத்³தே³ஸு.
456. ‘‘புன சபரங், ஆனந்த³, பி⁴க்கு²னோ கா⁴னேன க³ந்த⁴ங் கா⁴யித்வா உப்பஜ்ஜதி மனாபங், உப்பஜ்ஜதி அமனாபங், உப்பஜ்ஜதி மனாபாமனாபங். ஸோ ஏவங் பஜானாதி – ‘உப்பன்னங் கோ² மே இத³ங் மனாபங், உப்பன்னங் அமனாபங், உப்பன்னங் மனாபாமனாபங். தஞ்ச கோ² ஸங்க²தங் ஓளாரிகங் படிச்சஸமுப்பன்னங். ஏதங் ஸந்தங் ஏதங் பணீதங் யதி³த³ங் – உபெக்கா²’தி. தஸ்ஸ தங் உப்பன்னங் மனாபங் உப்பன்னங் அமனாபங் உப்பன்னங் மனாபாமனாபங் நிருஜ்ஜ²தி; உபெக்கா² ஸண்டா²தி. ஸெய்யதா²பி, ஆனந்த³ , ஈஸகங்போணே ஈஸகபோணே (ஸீ॰ ஸ்யா॰ கங்॰ பீ॰), ஈஸகப²ணே (ஸீ॰ அட்ட²॰), ‘‘மஜ்ஜே² உச்சங் ஹுத்வா’’தி டீகாய ஸங்ஸந்தி³தப்³பா³ பது³மபலாஸே பது³மினிபத்தே (ஸீ॰ ஸ்யா॰ கங்॰ பீ॰) உத³கபு²ஸிதானி பவத்தந்தி, ந ஸண்ட²ந்தி; ஏவமேவ கோ², ஆனந்த³, யஸ்ஸ கஸ்ஸசி ஏவங்ஸீக⁴ங் ஏவங்துவடங் ஏவங்அப்பகஸிரேன உப்பன்னங் மனாபங் உப்பன்னங் அமனாபங் உப்பன்னங் மனாபாமனாபங் நிருஜ்ஜ²தி, உபெக்கா² ஸண்டா²தி – அயங் வுச்சதானந்த³, அரியஸ்ஸ வினயே அனுத்தரா இந்த்³ரியபா⁴வனா கா⁴னவிஞ்ஞெய்யேஸு க³ந்தே⁴ஸு.
457. ‘‘புன சபரங், ஆனந்த³, பி⁴க்கு²னோ ஜிவ்ஹாய ரஸங் ஸாயித்வா உப்பஜ்ஜதி மனாபங், உப்பஜ்ஜதி அமனாபங், உப்பஜ்ஜதி மனாபாமனாபங். ஸோ ஏவங் பஜானாதி – ‘உப்பன்னங் கோ² மே இத³ங் மனாபங், உப்பன்னங் அமனாபங், உப்பன்னங் மனாபாமனாபங். தஞ்ச கோ² ஸங்க²தங் ஓளாரிகங் படிச்சஸமுப்பன்னங். ஏதங் ஸந்தங் ஏதங் பணீதங் யதி³த³ங் – உபெக்கா²’தி. தஸ்ஸ தங் உப்பன்னங் மனாபங் உப்பன்னங் அமனாபங் உப்பன்னங் மனாபாமனாபங் நிருஜ்ஜ²தி; உபெக்கா² ஸண்டா²தி . ஸெய்யதா²பி, ஆனந்த³, ப³லவா புரிஸோ ஜிவ்ஹக்³கே³ கே²ளபிண்ட³ங் ஸங்யூஹித்வா அப்பகஸிரேன வமெய்ய ஸந்த⁴மெய்ய (க॰); ஏவமேவ கோ², ஆனந்த³, யஸ்ஸ கஸ்ஸசி ஏவங்ஸீக⁴ங் ஏவங்துவடங் ஏவங்அப்பகஸிரேன உப்பன்னங் மனாபங் உப்பன்னங் அமனாபங் உப்பன்னங் மனாபாமனாபங் நிருஜ்ஜ²தி, உபெக்கா² ஸண்டா²தி – அயங் வுச்சதானந்த³, அரியஸ்ஸ வினயே அனுத்தரா இந்த்³ரியபா⁴வனா ஜிவ்ஹாவிஞ்ஞெய்யேஸு ரஸேஸு.
458. ‘‘புன சபரங், ஆனந்த³, பி⁴க்கு²னோ காயேன பொ²ட்ட²ப்³ப³ங் பு²ஸித்வா உப்பஜ்ஜதி மனாபங், உப்பஜ்ஜதி அமனாபங், உப்பஜ்ஜதி மனாபாமனாபங். ஸோ ஏவங் பஜானாதி – ‘உப்பன்னங் கோ² மே இத³ங் மனாபங், உப்பன்னங் அமனாபங், உப்பன்னங் மனாபாமனாபங். தஞ்ச கோ² ஸங்க²தங் ஓளாரிகங் படிச்சஸமுப்பன்னங். ஏதங் ஸந்தங் ஏதங் பணீதங் யதி³த³ங் – உபெக்கா²’தி. தஸ்ஸ தங் உப்பன்னங் மனாபங் உப்பன்னங் அமனாபங் உப்பன்னங் மனாபாமனாபங் நிருஜ்ஜ²தி; உபெக்கா² ஸண்டா²தி. ஸெய்யதா²பி, ஆனந்த³, ப³லவா புரிஸோ ஸமிஞ்ஜிதங் வா பா³ஹங் பஸாரெய்ய, பஸாரிதங் வா பா³ஹங் ஸமிஞ்ஜெய்ய; ஏவமேவ கோ², ஆனந்த³, யஸ்ஸ கஸ்ஸசி ஏவங்ஸீக⁴ங் ஏவங்துவடங் ஏவங்அப்பகஸிரேன உப்பன்னங் மனாபங் உப்பன்னங் அமனாபங் உப்பன்னங் மனாபாமனாபங் நிருஜ்ஜ²தி, உபெக்கா² ஸண்டா²தி – அயங் வுச்சதானந்த³, அரியஸ்ஸ வினயே அனுத்தரா இந்த்³ரியபா⁴வனா காயவிஞ்ஞெய்யேஸு பொ²ட்ட²ப்³பே³ஸு.
459. ‘‘புன சபரங், ஆனந்த³, பி⁴க்கு²னோ மனஸா த⁴ம்மங் விஞ்ஞாய உப்பஜ்ஜதி மனாபங், உப்பஜ்ஜதி அமனாபங், உப்பஜ்ஜதி மனாபாமனாபங். ஸோ ஏவங் பஜானாதி – ‘உப்பன்னங் கோ² மே இத³ங் மனாபங், உப்பன்னங் அமனாபங், உப்பன்னங் மனாபாமனாபங். தஞ்ச கோ² ஸங்க²தங் ஓளாரிகங் படிச்சஸமுப்பன்னங். ஏதங் ஸந்தங் ஏதங் பணீதங் யதி³த³ங் – உபெக்கா²’தி. தஸ்ஸ தங் உப்பன்னங் மனாபங் உப்பன்னங் அமனாபங் உப்பன்னங் மனாபாமனாபங் நிருஜ்ஜ²தி; உபெக்கா² ஸண்டா²தி. ஸெய்யதா²பி, ஆனந்த³, ப³லவா புரிஸோ தி³வஸங்ஸந்தத்தே தி³வஸஸந்தெத்தே (ஸீ॰) அயோகடாஹே த்³வே வா தீணி வா உத³கபு²ஸிதானி நிபாதெய்ய. த³ந்தோ⁴, ஆனந்த³, உத³கபு²ஸிதானங் நிபாதோ, அத² கோ² நங் கி²ப்பமேவ பரிக்க²யங் பரியாதா³னங் க³ச்செ²ய்ய; ஏவமேவ கோ², ஆனந்த³, யஸ்ஸ கஸ்ஸசி ஏவங்ஸீக⁴ங் ஏவங்துவடங் ஏவங்அப்பகஸிரேன உப்பன்னங் மனாபங் உப்பன்னங் அமனாபங் உப்பன்னங் மனாபாமனாபங் நிருஜ்ஜ²தி, உபெக்கா² ஸண்டா²தி – அயங் வுச்சதானந்த³, அரியஸ்ஸ வினயே அனுத்தரா இந்த்³ரியபா⁴வனா மனோவிஞ்ஞெய்யேஸு த⁴ம்மேஸு. ஏவங் கோ², ஆனந்த³, அரியஸ்ஸ வினயே அனுத்தரா இந்த்³ரியபா⁴வனா ஹோதி.
460. ‘‘கத²ஞ்சானந்த³ , ஸேகோ² ஹோதி பாடிபதோ³? இதா⁴னந்த³, பி⁴க்கு²னோ சக்கு²னா ரூபங் தி³ஸ்வா உப்பஜ்ஜதி மனாபங், உப்பஜ்ஜதி அமனாபங், உப்பஜ்ஜதி மனாபாமனாபங். ஸோ தேன உப்பன்னேன மனாபேன உப்பன்னேன அமனாபேன உப்பன்னேன மனாபாமனாபேன அட்டீயதி ஹராயதி ஜிகு³ச்ச²தி. ஸோதேன ஸத்³த³ங் ஸுத்வா…பே॰… கா⁴னேன க³ந்த⁴ங் கா⁴யித்வா…, ஜிவ்ஹாய ரஸங் ஸாயித்வா… காயேன பொ²ட்ட²ப்³ப³ங் பு²ஸித்வா… மனஸா த⁴ம்மங் விஞ்ஞாய உப்பஜ்ஜதி மனாபங், உப்பஜ்ஜதி அமனாபங், உப்பஜ்ஜதி மனாபாமனாபங். ஸோ தேன உப்பன்னேன மனாபேன உப்பன்னேன அமனாபேன உப்பன்னேன மனாபாமனாபேன அட்டீயதி ஹராயதி ஜிகு³ச்ச²தி. ஏவங் கோ², ஆனந்த³, ஸேகோ² ஹோதி பாடிபதோ³.
461. ‘‘கத²ஞ்சானந்த³, அரியோ ஹோதி பா⁴விதிந்த்³ரியோ? இதா⁴னந்த³, பி⁴க்கு²னோ சக்கு²னா ரூபங் தி³ஸ்வா உப்பஜ்ஜதி மனாபங், உப்பஜ்ஜதி அமனாபங், உப்பஜ்ஜதி மனாபாமனாபங். ஸோ ஸசே ஆகங்க²தி – ‘படிகூலே படிக்கூலே (ஸப்³ப³த்த²) அப்படிகூலஸஞ்ஞீ விஹரெய்ய’ந்தி, அப்படிகூலஸஞ்ஞீ தத்த² விஹரதி. ஸசே ஆகங்க²தி – ‘அப்படிகூலே படிகூலஸஞ்ஞீ விஹரெய்ய’ந்தி, படிகூலஸஞ்ஞீ தத்த² விஹரதி. ஸசே ஆகங்க²தி – ‘படிகூலே ச அப்படிகூலே ச அப்படிகூலஸஞ்ஞீ விஹரெய்ய’ந்தி, அப்படிகூலஸஞ்ஞீ தத்த² விஹரதி. ஸசே ஆகங்க²தி – ‘அப்படிகூலே ச படிகூலே ச படிகூலஸஞ்ஞீ விஹரெய்ய’ந்தி, படிகூலஸஞ்ஞீ தத்த² விஹரதி. ஸசே ஆகங்க²தி – ‘படிகூலஞ்ச அப்படிகூலஞ்ச தது³ப⁴யங் அபி⁴னிவஜ்ஜெத்வா உபெக்க²கோ விஹரெய்யங் ஸதோ ஸம்பஜானோ’தி, உபெக்க²கோ தத்த² விஹரதி ஸதோ ஸம்பஜானோ.
462. ‘‘புன சபரங், ஆனந்த³, பி⁴க்கு²னோ ஸோதேன ஸத்³த³ங் ஸுத்வா…பே॰… கா⁴னேன க³ந்த⁴ங் கா⁴யித்வா… ஜிவ்ஹாய ரஸங் ஸாயித்வா… காயேன பொ²ட்ட²ப்³ப³ங் பு²ஸித்வா… மனஸா த⁴ம்மங் விஞ்ஞாய உப்பஜ்ஜதி மனாபங், உப்பஜ்ஜதி அமனாபங், உப்பஜ்ஜதி மனாபாமனாபங். ஸோ ஸசே ஆகங்க²தி – ‘படிகூலே அப்படிகூலஸஞ்ஞீ விஹரெய்ய’ந்தி, அப்படிகூலஸஞ்ஞீ தத்த² விஹரதி. ஸசே ஆகங்க²தி – ‘அப்படிகூலே படிகூலஸஞ்ஞீ விஹரெய்ய’ந்தி, படிகூலஸஞ்ஞீ தத்த² விஹரதி. ஸசே ஆகங்க²தி – ‘படிகூலே ச அப்படிகூலே ச அப்படிகூலஸஞ்ஞீ விஹரெய்ய’ந்தி, அப்படிகூலஸஞ்ஞீ தத்த² விஹரதி. ஸசே ஆகங்க²தி – ‘அப்படிகூலே ச படிகூலே ச படிகூலஸஞ்ஞீ விஹரெய்ய’ந்தி, படிகூலஸஞ்ஞீ தத்த² விஹரதி. ஸசே ஆகங்க²தி – ‘படிகூலஞ்ச அப்படிகூலஞ்ச தது³ப⁴யம்பி அபி⁴னிவஜ்ஜெத்வா உபெக்க²கோ விஹரெய்யங் ஸதோ ஸம்பஜானோ’தி, உபெக்க²கோ தத்த² விஹரதி ஸதோ ஸம்பஜானோ. ஏவங் கோ², ஆனந்த³, அரியோ ஹோதி பா⁴விதிந்த்³ரியோ.
463. ‘‘இதி கோ², ஆனந்த³, தே³ஸிதா மயா அரியஸ்ஸ வினயே அனுத்தரா இந்த்³ரியபா⁴வனா, தே³ஸிதோ ஸேகோ² பாடிபதோ³, தே³ஸிதோ அரியோ பா⁴விதிந்த்³ரியோ . யங் கோ², ஆனந்த³, ஸத்தா²ரா கரணீயங் ஸாவகானங் ஹிதேஸினா அனுகம்பகேன அனுகம்பங் உபாதா³ய, கதங் வோ தங் மயா. ஏதானி, ஆனந்த³, ருக்க²மூலானி, ஏதானி ஸுஞ்ஞாகா³ரானி, ஜா²யதா²னந்த³, மா பமாத³த்த², மா பச்சா² விப்படிஸாரினோ அஹுவத்த². அயங் வோ அம்ஹாகங் அனுஸாஸனீ’’தி.
இத³மவோச ப⁴க³வா. அத்தமனோ ஆயஸ்மா ஆனந்தோ³ ப⁴க³வதோ பா⁴ஸிதங் அபி⁴னந்தீ³தி.
இந்த்³ரியபா⁴வனாஸுத்தங் நிட்டி²தங் த³ஸமங்.
ஸளாயதனவக்³கோ³ நிட்டி²தோ பஞ்சமோ.
தஸ்ஸுத்³தா³னங் –
அனாத²பிண்டி³கோ ச²ன்னோ, புண்ணோ நந்த³கராஹுலா;
ச²ச²க்கங் ஸளாயதனிகங், நக³ரவிந்தெ³ய்யஸுத்³தி⁴கா;
இந்த்³ரியபா⁴வனா சாபி, வக்³கோ³ ஓவாத³பஞ்சமோதி.
இத³ங் வக்³கா³னமுத்³தா³னங் –
தே³வத³ஹோனுபதோ³ ச, ஸுஞ்ஞதோ ச விப⁴ங்க³கோ;
ஸளாயதனோதி வக்³கா³, உபரிபண்ணாஸகே டி²தாதி.
உபரிபண்ணாஸகங் ஸமத்தங்.
தீஹி பண்ணாஸகேஹி படிமண்டி³தோ ஸகலோ
மஜ்ஜி²மனிகாயோ ஸமத்தோ.