8. லக்க²ணஸங்யுத்தங்
1. பட²மவக்³கோ³
1. அட்டி²ஸுத்தங்
202. ஏவங் மே ஸுதங் – ஏகங் ஸமயங் ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன ஆயஸ்மா ச லக்க²ணோ ஆயஸ்மா ச மஹாமொக்³க³ல்லானோ மஹாமொக்³க³லானோ (க॰) கி³ஜ்ஜ²கூடே பப்³ப³தே விஹரந்தி. அத² கோ² ஆயஸ்மா மஹாமொக்³க³ல்லானோ புப்³ப³ண்ஹஸமயங் நிவாஸெத்வா பத்தசீவரமாதா³ய யேனாயஸ்மா லக்க²ணோ தேனுபஸங்கமி; உபஸங்கமித்வா ஆயஸ்மந்தங் லக்க²ணங் ஏதத³வோச – ‘‘ஆயாமாவுஸோ ஏஹி ஆவுஸோ (ஸ்யா॰ கங்॰ க॰) லக்க²ண, ராஜக³ஹங் பிண்டா³ய பவிஸிஸ்ஸாமா’’தி. ‘‘ஏவமாவுஸோ’’தி கோ² ஆயஸ்மா லக்க²ணோ ஆயஸ்மதோ மஹாமொக்³க³ல்லானஸ்ஸ பச்சஸ்ஸோஸி. அத² கோ² ஆயஸ்மா மஹாமொக்³க³ல்லானோ கி³ஜ்ஜ²கூடா பப்³ப³தா ஓரோஹந்தோ அஞ்ஞதரஸ்மிங் பதே³ஸே ஸிதங் பாத்வாகாஸி. அத² கோ² ஆயஸ்மா லக்க²ணோ ஆயஸ்மந்தங் மஹாமொக்³க³ல்லானங் ஏதத³வோச – ‘‘கோ நு கோ², ஆவுஸோ மொக்³க³ல்லான, ஹேது கோ பச்சயோ ஸிதஸ்ஸ பாதுகம்மாயா’’தி? ‘‘அகாலோ கோ², ஆவுஸோ லக்க²ண, ஏதஸ்ஸ பஞ்ஹஸ்ஸ. ப⁴க³வதோ மங் ஸந்திகே ஏதங் பஞ்ஹங் புச்சா²’’தி.
அத² கோ² ஆயஸ்மா ச லக்க²ணோ ஆயஸ்மா ச மஹாமொக்³க³ல்லானோ ராஜக³ஹே பிண்டா³ய சரித்வா பச்சா²ப⁴த்தங் பிண்ட³பாதபடிக்கந்தா யேன ப⁴க³வா தேனுபஸங்கமிங்ஸு; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³ங்ஸு. ஏகமந்தங் நிஸின்னோ கோ² ஆயஸ்மா லக்க²ணோ ஆயஸ்மந்தங் மஹாமொக்³க³ல்லானங் ஏதத³வோச – ‘‘இதா⁴யஸ்மா மஹாமொக்³க³ல்லானோ கி³ஜ்ஜ²கூடா பப்³ப³தா ஓரோஹந்தோ அஞ்ஞதரஸ்மிங் பதே³ஸே ஸிதங் பாத்வாகாஸி. கோ நு கோ², ஆவுஸோ மொக்³க³ல்லான, ஹேது கோ பச்சயோ ஸிதஸ்ஸ பாதுகம்மாயா’’தி?
‘‘இதா⁴ஹங், ஆவுஸோ, கி³ஜ்ஜ²கூடா பப்³ப³தா ஓரோஹந்தோ அத்³த³ஸங் அட்டி²கஸங்க²லிகங் வேஹாஸங் க³ச்ச²ந்திங். தமேனங் கி³ஜ்ஜா²பி காகாபி குலலாபி அனுபதித்வா அனுபதித்வா பா²ஸுளந்தரிகாஹி விதுதெ³ந்தி விதச்செ²ந்தி விராஜெந்தி விதுதெ³ந்தி (ஸீ॰), விதச்செ²ந்தி விப⁴ஜெந்தி (பீ॰ க॰). ஸா ஸுத³ங் அட்டஸ்ஸரங் கரோதி. தஸ்ஸ மய்ஹங், ஆவுஸோ, ஏதத³ஹோஸி – ‘அச்ச²ரியங் வத, போ⁴, அப்³பு⁴தங் வத, போ⁴! ஏவரூபோபி நாம ஸத்தோ ப⁴விஸ்ஸதி! ஏவரூபோபி நாம யக்கோ² ப⁴விஸ்ஸதி! ஏவரூபோபி நாம அத்தபா⁴வபடிலாபோ⁴ ப⁴விஸ்ஸதீ’’’தி!!
அத² கோ² ப⁴க³வா பி⁴க்கூ² ஆமந்தேஸி – ‘‘சக்கு²பூ⁴தா வத, பி⁴க்க²வே, ஸாவகா விஹரந்தி; ஞாணபூ⁴தா வத, பி⁴க்க²வே, ஸாவகா விஹரந்தி, யத்ர ஹி நாம ஸாவகோ ஏவரூபங் ஞஸ்ஸதி வா த³க்க²தி வா ஸக்கி²ங் வா கரிஸ்ஸதி. புப்³பே³வ மே ஸோ, பி⁴க்க²வே, ஸத்தோ தி³ட்டோ² அஹோஸி, அபி சாஹங் ந ப்³யாகாஸிங். அஹஞ்சேதங் அஹமேவேதங் (ஸீ॰) ப்³யாகரெய்யங், பரே ச மே பரே மே (ஸீ॰) ந ஸத்³த³ஹெய்யுங். யே மே ந ஸத்³த³ஹெய்யுங், தேஸங் தங் அஸ்ஸ தீ³க⁴ரத்தங் அஹிதாய து³க்கா²ய. ஏஸோ, பி⁴க்க²வே, ஸத்தோ இமஸ்மிங்யேவ ராஜக³ஹே கோ³கா⁴தகோ அஹோஸி. ஸோ தஸ்ஸ கம்மஸ்ஸ விபாகேன ப³ஹூனி வஸ்ஸானி ப³ஹூனி வஸ்ஸஸதானி ப³ஹூனி வஸ்ஸஸஹஸ்ஸானி ப³ஹூனி வஸ்ஸஸதஸஹஸ்ஸானி நிரயே பச்சித்வா தஸ்ஸேவ கம்மஸ்ஸ விபாகாவஸேஸேன ஏவரூபங் அத்தபா⁴வபடிலாப⁴ங் படிஸங்வேத³யதீ’’தி. (ஸப்³பே³ஸங் ஸுத்தந்தானங் ஏஸேவ பெய்யாலோ). பட²மங்.
2. பேஸிஸுத்தங்
203. ‘‘இதா⁴ஹங், ஆவுஸோ, கி³ஜ்ஜ²கூடா பப்³ப³தா ஓரோஹந்தோ அத்³த³ஸங் மங்ஸபேஸிங் வேஹாஸங் க³ச்ச²ந்திங். தமேனங் கி³ஜ்ஜா²பி காகாபி குலலாபி அனுபதித்வா அனுபதித்வா விதச்செ²ந்தி விராஜெந்தி விராஜெந்தி (ஸீ॰ ஸ்யா॰ கங்॰), விப⁴ஜெந்தி (பீ॰ க॰). ஸா ஸுத³ங் அட்டஸ்ஸரங் கரோதி…பே॰… ஏஸோ, பி⁴க்க²வே, ஸத்தோ இமஸ்மிங்யேவ ராஜக³ஹே கோ³கா⁴தகோ அஹோஸி…பே॰…. து³தியங்.
3. பிண்ட³ஸுத்தங்
204. ‘‘இதா⁴ஹங், ஆவுஸோ, கி³ஜ்ஜ²கூடா பப்³ப³தா ஓரோஹந்தோ அத்³த³ஸங் மங்ஸபிண்ட³ங் வேஹாஸங் க³ச்ச²ந்தங். தமேனங் கி³ஜ்ஜா²பி காகாபி குலலாபி அனுபதித்வா அனுபதித்வா விதச்செ²ந்தி விராஜெந்தி . ஸா ஸுத³ங் அட்டஸ்ஸரங் கரோதி…பே॰… ஏஸோ, பி⁴க்க²வே, ஸத்தோ இமஸ்மிங்யேவ ராஜக³ஹே ஸாகுணிகோ அஹோஸி…பே॰…. ததியங்.
4. நிச்ச²விஸுத்தங்
205. ‘‘இதா⁴ஹங் , ஆவுஸோ, கி³ஜ்ஜ²கூடா பப்³ப³தா ஓரோஹந்தோ அத்³த³ஸங் நிச்ச²விங் புரிஸங் வேஹாஸங் க³ச்ச²ந்தங். தமேனங் கி³ஜ்ஜா²பி காகாபி குலலாபி அனுபதித்வா அனுபதித்வா விதச்செ²ந்தி விராஜெந்தி. ஸோ ஸுத³ங் அட்டஸ்ஸரங் கரோதி…பே॰… ஏஸோ, பி⁴க்க²வே, ஸத்தோ இமஸ்மிங்யேவ ராஜக³ஹே ஓரப்³பி⁴கோ அஹோஸி…பே॰…. சதுத்த²ங்.
5. அஸிலோமஸுத்தங்
206. ‘‘இதா⁴ஹங் , ஆவுஸோ, கி³ஜ்ஜ²கூடா பப்³ப³தா ஓரோஹந்தோ அத்³த³ஸங் அஸிலோமங் புரிஸங் வேஹாஸங் க³ச்ச²ந்தங். தஸ்ஸ தே அஸீ உப்பதித்வா உப்பதித்வா தஸ்ஸேவ காயே நிபதந்தி. ஸோ ஸுத³ங் அட்டஸ்ஸரங் கரோதி…பே॰… ஏஸோ, பி⁴க்க²வே, ஸத்தோ இமஸ்மிங்யேவ ராஜக³ஹே ஸூகரிகோ அஹோஸி…பே॰…. பஞ்சமங்.
6. ஸத்திஸுத்தங்
207. ‘‘இதா⁴ஹங், ஆவுஸோ, கி³ஜ்ஜ²கூடா பப்³ப³தா ஓரோஹந்தோ அத்³த³ஸங் ஸத்திலோமங் புரிஸங் வேஹாஸங் க³ச்ச²ந்தங். தஸ்ஸ தா ஸத்தியோ உப்பதித்வா உப்பதித்வா தஸ்ஸேவ காயே நிபதந்தி. ஸோ ஸுத³ங் அட்டஸ்ஸரங் கரோதி…பே॰… ஏஸோ, பி⁴க்க²வே, ஸத்தோ இமஸ்மிங்யேவ ராஜக³ஹே மாக³விகோ அஹோஸி…பே॰…. ச²ட்ட²ங்.
7. உஸுலோமஸுத்தங்
208. ‘‘இதா⁴ஹங், ஆவுஸோ, கி³ஜ்ஜ²கூடா பப்³ப³தா ஓரோஹந்தோ அத்³த³ஸங் உஸுலோமங் புரிஸங் வேஹாஸங் க³ச்ச²ந்தங். தஸ்ஸ தே உஸூ உப்பதித்வா உப்பதித்வா தஸ்ஸேவ காயே நிபதந்தி. ஸோ ஸுத³ங் அட்டஸ்ஸரங் கரோதி…பே॰… ஏஸோ, பி⁴க்க²வே, ஸத்தோ இமஸ்மிங்யேவ ராஜக³ஹே காரணிகோ அஹோஸி…பே॰…. ஸத்தமங்.
8. ஸூசிலோமஸுத்தங்
209. ‘‘இதா⁴ஹங், ஆவுஸோ, கி³ஜ்ஜ²கூடா பப்³ப³தா ஓரோஹந்தோ அத்³த³ஸங் ஸூசிலோமங் புரிஸங் வேஹாஸங் க³ச்ச²ந்தங். தஸ்ஸ தா ஸூசியோ உப்பதித்வா உப்பதித்வா தஸ்ஸேவ காயே நிபதந்தி. ஸோ ஸுத³ங் அட்டஸ்ஸரங் கரோதி…பே॰… ஏஸோ , பி⁴க்க²வே, ஸத்தோ இமஸ்மிங்யேவ ராஜக³ஹே ஸூதோ ஸாரதி²கோ (க॰ வினயேபி) அஹோஸி…பே॰…. அட்ட²மங்.
9. து³தியஸூசிலோமஸுத்தங்
210. ‘‘இதா⁴ஹங், ஆவுஸோ, கி³ஜ்ஜ²கூடா பப்³ப³தா ஓரோஹந்தோ அத்³த³ஸங் ஸூசிலோமங் புரிஸங் வேஹாஸங் க³ச்ச²ந்தங். தஸ்ஸ தா ஸூசியோ ஸீஸே பவிஸித்வா முக²தோ நிக்க²மந்தி; முகே² பவிஸித்வா உரதோ நிக்க²மந்தி; உரே பவிஸித்வா உத³ரதோ நிக்க²மந்தி; உத³ரே பவிஸித்வா ஊரூஹி நிக்க²மந்தி; ஊரூஸு பவிஸித்வா ஜங்கா⁴ஹி நிக்க²மந்தி; ஜங்கா⁴ஸு பவிஸித்வா பாதே³ஹி நிக்க²மந்தி; ஸோ ஸுத³ங் அட்டஸ்ஸரங் கரோதி…பே॰… ஏஸோ, பி⁴க்க²வே, ஸத்தோ இமஸ்மிங்யேவ ராஜக³ஹே ஸூசகோ அஹோஸி…பே॰…. நவமங்.
10. கும்ப⁴ண்ட³ஸுத்தங்
211. ‘‘இதா⁴ஹங், ஆவுஸோ, கி³ஜ்ஜ²கூடா பப்³ப³தா ஓரோஹந்தோ அத்³த³ஸங் கும்ப⁴ண்ட³ங் புரிஸங் வேஹாஸங் க³ச்ச²ந்தங். ஸோ க³ச்ச²ந்தோபி தேவ அண்டே³ க²ந்தே⁴ ஆரோபெத்வா க³ச்ச²தி. நிஸீத³ந்தோபி தெஸ்வேவ அண்டே³ஸு நிஸீத³தி. தமேனங் கி³ஜ்ஜா²பி காகாபி குலலாபி அனுபதித்வா அனுபதித்வா விதச்செ²ந்தி விராஜெந்தி. ஸோ ஸுத³ங் அட்டஸ்ஸரங் கரோதி…பே॰… ஏஸோ, பி⁴க்க²வே, ஸத்தோ இமஸ்மிங்யேவ ராஜக³ஹே கா³மகூடகோ அஹோஸி…பே॰…. த³ஸமங்.
பட²மோ வக்³கோ³.
தஸ்ஸுத்³தா³னங் –
அட்டி² பேஸி உபோ⁴ கா³வகா⁴தகா,
பிண்டோ³ ஸாகுணியோ நிச்ச²வோரப்³பி⁴;
அஸி ஸூகரிகோ ஸத்திமாக³வி,
உஸு காரணிகோ ஸூசி ஸாரதி²;
யோ ச ஸிப்³பி³யதி ஸூசகோ ஹி ஸோ,
அண்ட³பா⁴ரி அஹு கா³மகூடகோதி.
2. து³தியவக்³கோ³
1. ஸஸீஸகஸுத்தங்
212. ஏவங் மே ஸுதங் – ஏகங் ஸமயங் ராஜக³ஹே வேளுவனே. ‘‘இதா⁴ஹங், ஆவுஸோ, கி³ஜ்ஜ²கூடா பப்³ப³தா ஓரோஹந்தோ அத்³த³ஸங் புரிஸங் கூ³த²கூபே ஸஸீஸகங் நிமுக்³க³ங்…பே॰… ஏஸோ, பி⁴க்க²வே, ஸத்தோ இமஸ்மிங்யேவ ராஜக³ஹே பாரதா³ரிகோ அஹோஸி…பே॰…. பட²மங்.
2. கூ³த²கா²த³ஸுத்தங்
213. ‘‘இதா⁴ஹங், ஆவுஸோ, கி³ஜ்ஜ²கூடா பப்³ப³தா ஓரோஹந்தோ அத்³த³ஸங் புரிஸங் கூ³த²கூபே நிமுக்³க³ங் உபோ⁴ஹி ஹத்தே²ஹி கூ³த²ங் கா²த³ந்தங்…பே॰… ஏஸோ, பி⁴க்க²வே, ஸத்தோ இமஸ்மிங்யேவ ராஜக³ஹே து³ட்ட²ப்³ராஹ்மணோ அஹோஸி. ஸோ கஸ்ஸபஸ்ஸ ஸம்மாஸம்பு³த்³த⁴ஸ்ஸ பாவசனே பி⁴க்கு²ஸங்க⁴ங் ப⁴த்தேன நிமந்தெத்வா தோ³ணியோ தோ³ணியா (ஸ்யா॰ கங்॰ பீ॰ க॰) கூ³த²ஸ்ஸ பூராபெத்வா ஏதத³வோச – அஹோ பொ⁴ந்தோ, யாவத³த்த²ங் பு⁴ஞ்ஜந்து சேவ ஹரந்து சாதி…பே॰…. து³தியங்.
3. நிச்ச²வித்தி²ஸுத்தங்
214. ‘‘இதா⁴ஹங் , ஆவுஸோ, கி³ஜ்ஜ²கூடா பப்³ப³தா ஓரோஹந்தோ அத்³த³ஸங் நிச்ச²விங் இத்தி²ங் வேஹாஸங் க³ச்ச²ந்திங். தமேனங் கி³ஜ்ஜா²பி காகாபி குலலாபி அனுபதித்வா அனுபதித்வா விதச்செ²ந்தி விராஜெந்தி. ஸா ஸுத³ங் அட்டஸ்ஸரங் கரோதி…பே॰… ஏஸா, பி⁴க்க²வே, இத்தீ² இமஸ்மிங்யேவ ராஜக³ஹே அதிசாரினீ அஹோஸி…பே॰…. ததியங்.
4. மங்கு³லித்தி²ஸுத்தங்
215. ‘‘இதா⁴ஹங் , ஆவுஸோ, கி³ஜ்ஜ²கூடா பப்³ப³தா ஓரோஹந்தோ அத்³த³ஸங் இத்தி²ங் து³க்³க³ந்த⁴ங் மங்கு³லிங் வேஹாஸங் க³ச்ச²ந்திங். தமேனங் கி³ஜ்ஜா²பி காகாபி குலலாபி அனுபதித்வா அனுபதித்வா விதச்செ²ந்தி விராஜெந்தி. ஸா ஸுத³ங் அட்டஸ்ஸரங் கரோதி…பே॰… ஏஸா, பி⁴க்க²வே, இத்தீ² இமஸ்மிங்யேவ ராஜக³ஹே இக்க²ணிகா அஹோஸி…பே॰…. சதுத்த²ங்.
5. ஓகிலினீஸுத்தங்
216. ‘‘இதா⁴ஹங் , ஆவுஸோ, கி³ஜ்ஜ²கூடா பப்³ப³தா ஓரோஹந்தோ அத்³த³ஸங் இத்தி²ங் உப்பக்கங் ஓகிலினிங் ஓகிரினிங் வேஹாஸங் க³ச்ச²ந்திங். ஸா ஸுத³ங் அட்டஸ்ஸரங் கரோதி…பே॰… ஏஸா, பி⁴க்க²வே, இத்தீ² கலிங்க³ஸ்ஸ ரஞ்ஞோ அக்³க³மஹேஸீ அஹோஸி. ஸா இஸ்ஸாபகதா ஸபத்திங் அங்கா³ரகடாஹேன ஓகிரி…பே॰…. பஞ்சமங்.
6. அஸீஸகஸுத்தங்
217. ‘‘இதா⁴ஹங், ஆவுஸோ, கி³ஜ்ஜ²கூடா பப்³ப³தா ஓரோஹந்தோ அத்³த³ஸங் அஸீஸகங் கப³ந்த⁴ங் கவந்த⁴ங் (ஸீ॰ பீ॰) வேஹாஸங் க³ச்ச²ந்தங். தஸ்ஸ உரே அக்கீ²னி சேவ ஹொந்தி முக²ஞ்ச. தமேனங் கி³ஜ்ஜா²பி காகாபி குலலாபி அனுபதித்வா அனுபதித்வா விதச்செ²ந்தி விராஜெந்தி. ஸோ ஸுத³ங் அட்டஸ்ஸரங் கரோதி…பே॰… ஏஸோ, பி⁴க்க²வே, ஸத்தோ இமஸ்மிங்யேவ ராஜக³ஹே ஹாரிகோ நாம சோரகா⁴தகோ அஹோஸி…பே॰…. ச²ட்ட²ங்.
7. பாபபி⁴க்கு²ஸுத்தங்
218. ‘‘இதா⁴ஹங் , ஆவுஸோ, கி³ஜ்ஜ²கூடா பப்³ப³தா ஓரோஹந்தோ அத்³த³ஸங் பி⁴க்கு²ங் வேஹாஸங் க³ச்ச²ந்தங். தஸ்ஸ ஸங்கா⁴டிபி ஆதி³த்தா ஸம்பஜ்ஜலிதா ஸஜோதிபூ⁴தா ஸஞ்ஜோதிபூ⁴தா (ஸ்யா॰ கங்॰), பத்தோபி ஆதி³த்தோ ஸம்பஜ்ஜலிதோ ஸஜோதிபூ⁴தோ, காயப³ந்த⁴னம்பி ஆதி³த்தங் ஸம்பஜ்ஜலிதங் ஸஜோதிபூ⁴தங், காயோபி ஆதி³த்தோ ஸம்பஜ்ஜலிதோ ஸஜோதிபூ⁴தோ. ஸோ ஸுத³ங் அட்டஸ்ஸரங் கரோதி…பே॰… ஏஸோ, பி⁴க்க²வே, பி⁴க்கு² கஸ்ஸபஸ்ஸ ஸம்மாஸம்பு³த்³த⁴ஸ்ஸ பாவசனே பாபபி⁴க்கு² அஹோஸி…பே॰…. ஸத்தமங்.
8. பாபபி⁴க்கு²னீஸுத்தங்
219. ‘‘அத்³த³ஸங் பி⁴க்கு²னிங் வேஹாஸங் க³ச்ச²ந்திங். தஸ்ஸா ஸங்கா⁴டிபி ஆதி³த்தா…பே॰… பாபபி⁴க்கு²னீ அஹோஸி…பே॰…. அட்ட²மங்.
9. பாபஸிக்க²மானஸுத்தங்
220. ‘‘அத்³த³ஸங் ஸிக்க²மானங் வேஹாஸங் க³ச்ச²ந்திங். தஸ்ஸா ஸங்கா⁴டிபி ஆதி³த்தா…பே॰… பாபஸிக்க²மானா அஹோஸி…பே॰…. நவமங்.
10. பாபஸாமணேரஸுத்தங்
221. ‘‘அத்³த³ஸங் ஸாமணேரங் வேஹாஸங் க³ச்ச²ந்தங். தஸ்ஸ ஸங்கா⁴டிபி ஆதி³த்தா…பே॰… பாபஸாமணேரோ அஹோஸி…பே॰…. த³ஸமங்.
11. பாபஸாமணேரீஸுத்தங்
222. ‘‘இதா⁴ஹங், ஆவுஸோ, கி³ஜ்ஜ²கூடா பப்³ப³தா ஓரோஹந்தோ அத்³த³ஸங் ஸாமணேரிங் வேஹாஸங் க³ச்ச²ந்திங். தஸ்ஸா ஸங்கா⁴டிபி ஆதி³த்தா ஸம்பஜ்ஜலிதா ஸஜோதிபூ⁴தா, பத்தோபி ஆதி³த்தோ ஸம்பஜ்ஜலிதோ ஸஜோதிபூ⁴தோ, காயப³ந்த⁴னம்பி ஆதி³த்தங் ஸம்பஜ்ஜலிதங் ஸஜோதிபூ⁴தங், காயோபி ஆதி³த்தோ ஸம்பஜ்ஜலிதோ ஸஜோதிபூ⁴தோ. ஸா ஸுத³ங் அட்டஸ்ஸரங் கரோதி. தஸ்ஸ மய்ஹங், ஆவுஸோ, ஏதத³ஹோஸி – ‘அச்ச²ரியங் வத, போ⁴, அப்³பு⁴தங் வத, போ⁴! ஏவரூபோபி நாம ஸத்தோ ப⁴விஸ்ஸதி! ஏவரூபோபி நாம யக்கோ² ப⁴விஸ்ஸதி! ஏவரூபோபி நாம அத்தபா⁴வபடிலாபோ⁴ ப⁴விஸ்ஸதீ’’’தி!!
அத² கோ² ப⁴க³வா பி⁴க்கூ² ஆமந்தேஸி – ‘‘சக்கு²பூ⁴தா வத, பி⁴க்க²வே, ஸாவகா விஹரந்தி; ஞாணபூ⁴தா வத, பி⁴க்க²வே, ஸாவகா விஹரந்தி, யத்ர ஹி நாம ஸாவகோ ஏவரூபங் ஞஸ்ஸதி வா த³க்க²தி வா ஸக்கி²ங் வா கரிஸ்ஸதி. புப்³பே³வ மே ஸா, பி⁴க்க²வே, ஸாமணேரீ தி³ட்டா² அஹோஸி. அபி சாஹங் ந ப்³யாகாஸிங். அஹஞ்சேதங் ப்³யாகரெய்யங், பரே ச மே ந ஸத்³த³ஹெய்யுங். யே மே ந ஸத்³த³ஹெய்யுங், தேஸங் தங் அஸ்ஸ தீ³க⁴ரத்தங் அஹிதாய து³க்கா²ய. ஏஸா, பி⁴க்க²வே, ஸாமணேரீ கஸ்ஸபஸ்ஸ ஸம்மாஸம்பு³த்³த⁴ஸ்ஸ பாவசனே பாபஸாமணேரீ அஹோஸி. ஸா தஸ்ஸ கம்மஸ்ஸ விபாகேன ப³ஹூனி வஸ்ஸானி ப³ஹூனி வஸ்ஸஸதானி ப³ஹூனி வஸ்ஸஸஹஸ்ஸானி ப³ஹூனி வஸ்ஸஸதஸஹஸ்ஸானி நிரயே பச்சித்வா தஸ்ஸேவ கம்மஸ்ஸ விபாகாவஸேஸேன ஏவரூபங் அத்தபா⁴வபடிலாப⁴ங் படிஸங்வேத³யதீ’’தி. ஏகாத³ஸமங்.
து³தியோ வக்³கோ³.
தஸ்ஸுத்³தா³னங் –
கூபே நிமுக்³கோ³ ஹி ஸோ பாரதா³ரிகோ;
கூ³த²கா²தி³ அஹு து³ட்ட²ப்³ராஹ்மணோ.
நிச்ச²வித்தி² அதிசாரினீ அஹு;
மங்கு³லித்தி² அஹு இக்க²ணித்தி²கா.
ஓகிலினி ஸபத்தங்கா³ரோகிரி;
ஸீஸச்சி²ன்னோ அஹு சோரகா⁴தகோ.
பி⁴க்கு² பி⁴க்கு²னீ ஸிக்க²மானா;
ஸாமணேரோ அத² ஸாமணேரிகா.
கஸ்ஸபஸ்ஸ வினயஸ்மிங் பப்³ப³ஜ்ஜங்;
பாபகம்மங் கரிங்ஸு தாவதே³தி.
லக்க²ணஸங்யுத்தங் ஸமத்தங்.