5. கஸ்ஸபஸங்யுத்தங்
1. ஸந்துட்ட²ஸுத்தவண்ணனா
144. ஸந்துட்டோ²தி ‘‘இதரீதரேனா’’திஆதி³. தத்த² து³வித⁴ங் இதரீதரங் – பாகதிகங், ஞாணஸஞ்ஜனிதஞ்சாதி. தத்த² பாகதிகங் படிக்கி²பித்வா ஞாணஸஞ்ஜனிதமேவ த³ஸ்ஸெந்தோ ‘‘தூ²லஸுகு²மா’’திஆதி³மாஹ. இதரங் வுச்சதி ஹீனங் பணீததோ அஞ்ஞத்தா. ததா² பணீதம்பி இதரங் ஹீனதோ அஞ்ஞத்தா. அபெக்கா²ஸத்³தா³ ஹி இதரீதராதி. இதி யேன கேனசி ஹீனேன வா பணீதேன வா சீவராதி³பச்சயேன ஸந்துஸ்ஸிதோ ததா²பவத்தோ அலோபோ⁴ இதரீதரபச்சயஸந்தோஸோ, தங்ஸமங்கி³தாய ஸந்துட்டோ². யதா²லாப⁴ங் அத்தனோ லாபா⁴னுரூபங் ஸந்தோஸோ யதா²லாப⁴ஸந்தோஸோ. ஸேஸபத³த்³வயேபி ஏஸேவ நயோ. லப்³ப⁴தீதி வா லாபோ⁴, யோ யோ லாபோ⁴ யதா²லாபோ⁴, தேன ஸந்தோஸோ யதா²லாப⁴ஸந்தோஸோ. ப³லந்தி காயப³லங். ஸாருப்பந்தி பி⁴க்கு²னோ அனுச்ச²விகதா.
யதா²லத்³த⁴தோ அஞ்ஞஸ்ஸ அபத்த²னா நாம ஸியா அப்பிச்ச²தாய பவத்திஆகாரோதி ததோ வினிவத்திதமேவ ஸந்தோஸஸ்ஸ ஸரூபங் த³ஸ்ஸெந்தோ ‘‘லப⁴ந்தோபி ந க³ண்ஹாதீ’’தி ஆஹ. தங் பரிவத்தெத்வாதி பகதிது³ப்³ப³லாதீ³னங் க³ருசீவரங் ந பா²ஸுபா⁴வாவஹங் ஸரீரபா³தா⁴வஹஞ்ச ஹோதீதி பயோஜனவஸேன, நாத்ரிச்ச²தாதி³வஸேன பரிவத்தெத்வா. லஹுகசீவரபரிபோ⁴கே³ ஸந்தோஸவிரோதி⁴ ந ஹோதீதி ஆஹ ‘‘லஹுகேன யாபெந்தோபி ஸந்துட்டோ²வ ஹோதீ’’தி. மஹக்³க⁴சீவரங் ப³ஹூனி வா சீவரானி லபி⁴த்வா தானி விஸ்ஸஜ்ஜெத்வா அஞ்ஞஸ்ஸ க³ஹணங் யதா²ஸாருப்பனயே டி²தத்தா ந ஸந்தோஸவிரோதீ⁴தி ஆஹ ‘‘தேஸங்…பே॰… தா⁴ரெந்தோபி ஸந்துட்டோ²வ ஹோதீ’’தி. ஏவங் ஸேஸபச்சயேஸு யதா²ப³லயதா²ஸாருப்பனித்³தே³ஸேஸு அபி-ஸத்³த³க்³க³ஹணே அதி⁴ப்பாயோ வேதி³தப்³போ³.
பகதீதி வாசாபகதிஆதி³கா. அவஸேஸனித்³தா³ய அபி⁴பூ⁴தத்தா படிபு³ஜ்ஜ²தோ ஸஹஸா பாபகா விதக்கா பாதுப⁴வந்தீதி.
முத்தஹரீதகந்தி பு³த்³தா⁴தீ³ஹி வண்ணிதந்தி ‘‘பூதிமுத்தபே⁴ஸஜ்ஜங் நிஸ்ஸாய யா பப்³ப³ஜ்ஜா’’திஆதி³னா ஸம்மாஸம்பு³த்³தா⁴தீ³ஹி பஸத்த²ங்.
ஏகோ ஏகச்சோ ஸந்துட்டோ² ஹோதி, ஸந்தோஸஸ்ஸ வண்ணங் ந கதே²தி ஸெய்யதா²பி ஆயஸ்மா பா³குலத்தே²ரோ. ந ஸந்துட்டோ ஹோதி, ஸந்தோஸஸ்ஸ வண்ணங் கதே²தி ஸெய்யதா²பி தே²ரோ உபனந்தோ³ ஸக்யபுத்தோ. நேவ ஸந்துட்டோ² ஹோதி, ந ஸந்தோஸஸ்ஸ வண்ணங் கதே²தி ஸெய்யதா²பி தே²ரோ லாளுதா³யீ. அயந்தி ஆயஸ்மா மஹாகஸ்ஸபோ. அனேஸனந்தி அயோனிஸோ மிச்சா²ஜீவவஸேன பச்சயபரியேஸனங். உத்தஸதீதி ‘‘கத²ங் நு கோ² லபெ⁴ய்ய’’ந்தி ஜாதுத்தாஸேன உத்தஸதி. ததா² பரிதஸ்ஸதி. அயந்தி மஹாகஸ்ஸபத்தே²ரோ. ஏவங் யதா²வுத்தஏகச்சபி⁴க்கு² விய ந பரிதஸ்ஸதி, அலாப⁴பரித்தாஸேன விகா⁴தப்பத்தியா ந பரித்தாஸங் ஆபஜ்ஜதி. லோபோ⁴யேவ ஆரம்மணேன ஸத்³தி⁴ங் க³ந்த²னட்டே²ன ப³ஜ்ஜ²னட்டே²ன கே³தோ⁴ லோப⁴கே³தோ⁴. முச்ச²ந்தி கே³த⁴ங் மோமூஹத்தபா⁴வங். ஆதீ³னவந்தி தோ³ஸங். நிஸ்ஸரணமேவாதி சீவரே இத³மத்தி²தாத³ஸ்ஸனபுப்³ப³கங் அலக்³க³பா⁴வஸங்கா²தனிய்யானமேவ பஜானந்தோ. யதா²லத்³தா⁴தீ³னந்தி யதா²லத்³த⁴பிண்ட³பாதாதீ³னங். நித்³தா⁴ரணே சேதங் ஸாமிவசனங்.
யதா² மஹாகஸ்ஸபத்தே²ரோதி அத்தனா வத்தப்³ப³னியாமேன வத³தி, ப⁴க³வதா பன வத்தப்³ப³னியாமேன ‘‘யதா² கஸ்ஸபோ பி⁴க்கூ²’’தி ப⁴விதப்³ப³ங். கஸ்ஸபேன நித³ஸ்ஸனபூ⁴தேன. கத²னங் நாம பா⁴ரோ ‘‘முத்தோ மோசெய்ய’’ந்தி படிஞ்ஞானுரூபத்தா. படிபத்திங் பரிபூரங் கத்வா பூரணங் பா⁴ரோ ஸத்து² ஆணாய ஸிரஸா ஸம்படிச்சி²தப்³ப³தோ.
ஸந்துட்ட²ஸுத்தவண்ணனா நிட்டி²தா.
2. அனொத்தப்பீஸுத்தவண்ணனா
145. தேன ரஹிதோதி தேன ஸம்மாவாயாமேன ரஹிதோ. நிப்³ப⁴யோதி ப⁴யரஹிதோ. குஸலானுப்பாத³னம்பி ஹி ஸாவஜ்ஜமேவ அஞ்ஞாணாலஸியஹேதுகத்தா. ஸம்பு³ஜ்ஜ²னத்தா²யாதி அரியமக்³கே³ஹி ஸம்பு³ஜ்ஜ²னாய. யோகே³ஹி கே²மங் தேஹி அனுபத்³து³தத்தா.
மனுஞ்ஞவத்து²ந்தி யதா² வா ததா² வாதி ஸுப⁴ஸுகா²தி³வஸேன. தேதி லோபா⁴த³யோ. அனுப்பன்னாதி வேதி³தப்³பா³ ததா²ரூபே வத்தா²ரம்மணே ததா² அனுப்பன்னபுப்³ப³த்தா. அஞ்ஞதா²தி வுத்தனயேனேவ வத்தா²ரம்மணேஹி அயோஜெத்வா க³ய்ஹமானே. வத்து²ம்ஹீதி உபட்டா²காதி³சீவராதி³வத்து²ம்ஹி. ஆரம்மணேதி மனாபியாதி³பே⁴தே³ ஆரம்மணே. தாதி³ஸேன பச்சயேனாதி அயோனிஸோமனஸிகாரஸதிவொஸ்ஸக்³கா³தி³பச்சயேன இமேதி வுத்தனயேன பச்சயலாபே⁴ன பச்சா² உப்பஜ்ஜமானா பாளியங் ததா² வுத்தாதி த³ட்ட²ப்³ப³ங். ஏவங் உப்பஜ்ஜமானதாய நப்பஹீயந்தி நாம. அனுப்பாதோ³ ஹி பரமத்த²தோ பஹானங் கதி²தங், தஸ்மா தத்த² கதி²தனயேனேவ க³ஹேதப்³ப³ந்தி அதி⁴ப்பாயோ.
அப்படிலத்³தா⁴தி அனுப்பத்தியா. தேதி யதா²வுத்தஸீலாதி³அனவஜ்ஜத⁴ம்மா. படிலத்³தா⁴தி அதி⁴க³தா. ‘‘ஸீலாதி³த⁴ம்மா’’தி எத்த² யதி³ மக்³க³ப²லானிபி க³ஹிதானி, அத² கஸ்மா ‘‘பரிஹானிவஸேனா’’தி வுத்தந்தி ஆஹ ‘‘எத்த² சா’’திஆதி³. இமஸ்ஸ பன ஸம்மப்பதா⁴னஸ்ஸாதி சதுத்த²ஸ்ஸ ஸம்மப்பதா⁴னஸ்ஸ வஸேன. அயங் தே³ஸனாதி ‘‘உப்பன்னா மே குஸலா த⁴ம்மா நிருஜ்ஜ²மானா அனத்தா²ய ஸங்வத்தெய்யு’’ந்தி அயங் தே³ஸனா கதா. து³தியமக்³கோ³ வா…பே॰… ஸங்வத்தெய்யாதி இத³ங் ஆயதிங் ஸத்தஸு அத்தபா⁴வேஸு உப்பஜ்ஜமானது³க்க²ஸங்கா²தஅனத்து²ப்பத்திங் ஸந்தா⁴ய வுத்தங். ‘‘ஆதாபீ ஒத்தப்பீ ப⁴ப்³போ³ ஸம்போ³தா⁴யா’’திஆதி³வசனதோ ‘‘இமே சத்தாரோ ஸம்மப்பதா⁴னா புப்³ப³பா⁴க³விபஸ்ஸனாவஸேன கதி²தா’’தி வுத்தங்.
அனொத்தப்பீஸுத்தவண்ணனா நிட்டி²தா.
3. சந்தூ³பமஸுத்தவண்ணனா
146. பியமனாபனிச்சனவகாதி³கு³ணேஹி சந்தோ³ உபமா ஏதேஸந்தி சந்தூ³பமா. ஸந்த²வாதீ³னி பதா³னி அஞ்ஞமஞ்ஞவேவசனானி. பரியுட்டா²னங் புன சித்தே கிலேஸாதி⁴க³மோ. ஸப்³பே³ஹிபி பதே³ஹி கத்த²சி ஸத்தே அனுரோத⁴ரோதா⁴பா⁴வமாஹ. அத்தனோ பன ஸொம்மபா⁴வேன மஹாஜனஸ்ஸ பியோ மனாபோ. யத³த்த²மெத்த² சந்தூ³பமா ஆஹடா, தங் த³ஸ்ஸெந்தோ ‘‘ஏவ’’ந்திஆதி³மாஹ. ந கேவலங் சந்தூ³பமதாய எத்தகோ ஏவ கு³ணோ, அத² கோ² அஞ்ஞேபி ஸந்தீதி தே த³ஸ்ஸேதுங் ‘‘அபிசா’’திஆதி³ வுத்தங். ஏவமாதீ³ஹீதி ஆதி³-ஸத்³தே³ன யதா². சந்தோ³
அபகஸ்ஸித்வாதி கிலேஸகாமவத்து²காமேஹி விவேசெத்வா. தங் நெக்க²ம்மாபி⁴முக²ங் காயசித்தானங் ஆகட்³ட⁴னங் காயதோ அபனயனஞ்ச ஹோதீதி ஆஹ ‘‘ஆகட்³டி⁴த்வா அபனெத்வாதி அத்தோ²’’தி. சதுக்கஞ்செத்த² ஸம்ப⁴வதீதி தங் த³ஸ்ஸேதுங் ‘‘யோ ஹி பி⁴க்கூ²’’திஆதி³ வுத்தங்.
நிச்சனவயாதி ஏவங் விசரிங்ஸூதி கிஞ்ஜக்க²வஸேன பரிக்³க³ஹாபா⁴வேன யதா² இமே, ஏவங் விசரிங்ஸு அஞ்ஞேதி அனுகம்பமானா.
த்³வேபா⁴திகவத்தூ²தி த்³வேபா⁴திகத்தே²ரபடிப³த்³த⁴ங் வத்து²ங். அப்பதிரூபகரணந்தி பி⁴க்கூ²னங் அஸாருப்பகரணங். ஆதா⁴யித்வாதி ஆரோபனங் ட²பெத்வா. ததா²தி யதா² ஸங்க⁴மஜ்ஜே² க³ணமஜ்ஜே² ச, ததா² வுட்³ட⁴தரே புக்³க³லே அப்பதிரூபகரணங். ஏவமாதீ³தி ஆதி³-ஸத்³தே³ன அந்தரக⁴ரப்பவேஸனே அஞ்ஞத்த² ச யதா²வுத்ததோ அஞ்ஞங் அஸாருப்பகிரியங் ஸங்க³ண்ஹாதி. தத்தே²வாதி ஸங்க⁴மஜ்ஜே² க³ணமஜ்ஜே² புக்³க³லஸ்ஸ ச வுட்³ட⁴ஸ்ஸ ஸந்திகே.
யதா²வுத்தேஸு அஞ்ஞேஸு ச தேஸு டா²னேஸு. பாபிச்ச²தாபி மனோபாக³ப்³பி⁴யந்தி ஏதேனேவ கோதூ⁴பனாஹாதீ³னங் ஸமுதா³சாரோ மனோபாக³ப்³பி⁴யந்தி த³ஸ்ஸிதங் ஹோதி.
ஏகதோ பா⁴ரியந்தி பிட்டி²பஸ்ஸதோ ஓனதங். வாயுபத்த²ம்ப⁴ந்தி சித்தஸமுட்டா²னவாயுனா உபத்த²ம்ப⁴னங். அனுப்³பே³ஜெத்வா சித்தந்தி ஆனெத்வா ஸம்ப³ந்தோ⁴. சித்தஸ்ஸ ஹி ததோ அனுப்³பே³ஜனங் தத³னுனயனங். தேனாஹ ‘‘ஸம்பியாயமானோ ஓலோகேதீ’’தி. வாயுபத்த²ம்ப⁴கங் கா³ஹாபெத்வாதி காயங் ததா² உபத்த²ம்ப⁴கங் கத்வா.
ஓபம்மஸங்ஸந்த³னங் ஹீனாதி⁴முத்திகோ, அவிஸுத்³த⁴ஸீலாசாரதாய மிச்சா²படிபன்னோ.
அங்கு³லீஹி நிக்க²ந்தபபா⁴ ஆகாஸஸஞ்சலனேன தி³கு³ணா ஹுத்வா ஆகாஸே விசரிங்ஸூதி ஆஹ ‘‘யமகவிஜ்ஜுதங் சாரயமானோ வியா’’தி. ‘‘ஆகாஸே பாணிங் சாலேஸீ’’தி பத³ஸ்ஸ அஞ்ஞத்த² அனாக³தத்தா ‘‘அஸம்பி⁴ன்னபத³’’ந்தி வுத்தங். அத்தமனோதி பீதிஸோமனஸ்ஸேஹி க³ஹிதமனோ. யஞ்ஹி சித்தங் அனவஜ்ஜங் பீதிஸோமனஸ்ஸஸஹிதங், தங் ஸஸந்தகங் ஹிதஸுகா²வஹத்தா. தேனாஹ ‘‘ஸகமனோ’’திஆதி³. ந தோ³மனஸ்ஸேன…பே॰… க³ஹிதமனோ ஸகசித்தஸ்ஸ தப்³பி³ருத்³த⁴த்தா. புரிமனயேனேவாதி ‘‘இதா³னி யோ ஹீனாதி⁴முத்திகோ’’திஆதி³னா புப்³பே³ வுத்தனயேனேவ.
பஸன்னாகாரந்தி பஸன்னேஹி காதப்³ப³கிரியங். தங் ஸரூபதோ த³ஸ்ஸேதி ‘‘சீவராத³யோ பச்சயே த³தெ³ய்யு’’ந்தி. தத²பா⁴வாயாதி யத³த்த²ங் ப⁴க³வதா த⁴ம்மோ தே³ஸிதோ, யத³த்த²ஞ்ச ஸாஸனே பப்³ப³ஜ்ஜா, தத³த்தா²ய ரக்க²ணபா⁴வந்தி அபாயப⁴யதோ ச ரக்க²ணஜ்ஜா²ஸயங். சந்தோ³பமாதி³வஸேனாதி ஆதி³-ஸத்³தே³ன ஆகாஸே சலிதபாணி விய கத்த²சி அலக்³க³தாய பரிஸுத்³த⁴ஜ்ஜா²ஸயதா ஸத்தேஸு காருஞ்ஞந்தி ஏவமாதீ³னங் ஸங்க³ஹோ.
சந்தூ³பமஸுத்தவண்ணனா நிட்டி²தா.
4. குலூபகஸுத்தவண்ணனா
147. குலானி உபக³ச்ச²தீதி குலூபகோ. ஸந்தீ³யதீதி ஸப்³ப³ஸோ தீ³யதி, அவக²ண்டீ³யதீதி அத்தோ². ஸா பன அவக²ண்டி³யனா து³க்கா²பனா அட்டியனா ஹோதீதி வுத்தங் ‘‘அட்டீயதீ’’தி. தேனாஹ ப⁴க³வா ‘‘ஸோ ததோனிதா³னங் து³க்க²ங் தோ³மனஸ்ஸங் படிஸங்வேத³யதீ’’தி. வுத்தனயானுஸாரேன ஹெட்டா² வுத்தனயஸ்ஸ அனுஸரணேன.
குலூபகஸுத்தவண்ணனா நிட்டி²தா.
5. ஜிண்ணஸுத்தவண்ணனா
148. சி²ன்னபி⁴ன்னட்டா²னே நிப்³ப³ஸனானீதி சிரனிஸேவிதவஸனகிச்சானி, பரிபோ⁴க³ஜிண்ணானீதி அத்தோ². தேனாஹ ‘‘புப்³பே³…பே॰… லத்³த⁴னாமானீ’’தி, ஸஞ்ஞாபுப்³ப³கோ விதி⁴ அனிச்சோதி ‘‘க³ஹபதானீ’’தி வுத்தங் யதா² ‘‘வீரிய’’ந்தி.
ஸேனாபதிந்தி ஸேனாபதிபா⁴வினங், ஸேனாபச்சாரஹந்தி அத்தோ². அத்தனோ கம்மேனாதி அத்தனா காதப்³ப³கம்மேன. ஸோதி ஸத்தா². தஸ்மிந்தி மஹாகஸ்ஸபத்தே²ரே கரோதீதி ஸம்ப³ந்தோ⁴. ந கரோதீதி வுத்தமத்த²ங் விவரந்தோ ‘‘கஸ்மா’’திஆதி³மாஹ. யதி³ ஸத்தா² து⁴தங்கா³னி ந விஸ்ஸஜ்ஜாபேதுகாமோ, அத² கஸ்மா ‘‘ஜிண்ணோஸி தா³னி த்வ’’ந்திஆதி³மவோசாதி ஆஹ ‘‘யதா² பனா’’திஆதி³.
தி³ட்ட²த⁴ம்மஸுக²விஹாரந்தி இமஸ்மிங்யேவ அத்தபா⁴வே பா²ஸுவிஹாரங். அமானுஸிகா ஸவனரதீதி அதிக்கந்தமானுஸிகாய அரஞ்ஞஸத்³து³ப்பத்தியா அரஞ்ஞேஹங் வஸாமீதி விவேகவாஸூபனிஸ்ஸயாதீ⁴னஸத்³த³ஸவனபச்சயா த⁴ம்மரதி உப்பஜ்ஜதி. அபரோதி அஞ்ஞோ, து³தியோதி அத்தோ². தத்தே²வாதி தஸ்மிங்யேவ ஏகஸ்ஸ விஹரணட்டா²னே விஹரணஸமயே ச பா²ஸு ப⁴வதி சித்தவிவேகஸம்ப⁴வதோ. தேனாஹ ‘‘ஏகஸ்ஸ ரமதோ வனே’’தி.
ததா²தி ‘‘அகாலசாரீ’’திஆதி³ வுத்தங்.
அம்ஹாகங் ஸலாகங் க³ஹெத்வா ப⁴த்தத்தா²ய கே³ஹங் அனாக³ச்ச²ந்தஸ்ஸ ஸத்தாஹங் ந பாதேதப்³ப³ந்தி ஸாமிகேஹி தி³ன்னத்தா ஸத்தாஹங் ஸலாகங் ந லப⁴தி, ந கதிகவஸேன. பிண்ட³சாரிகவத்தே அவத்தனதோ ‘‘யஸ்ஸ சேஸா’’திஆதி³ வுத்தங்.
பட²மதரங் காதப்³ப³ங் யங், தங் வத்தங், இதரங் படிவத்தங். மஹந்தங் வா வத்தங், கு²த்³த³கங் படிவத்தங். கேசி ‘‘வத்தபடிபத்தி’’ந்தி பட²ந்தி, வத்தஸ்ஸ கரணந்தி அத்தோ². உத்³த⁴ரண-அதிஹரண-வீதிஹரணவொஸ்ஸஜ்ஜன-ஸன்னிக்கே²பன-ஸன்னிரும்ப⁴னானங் ச² கொட்டா²ஸே. க³ருபா⁴வேனாதி தி²ரபா⁴வேன.
‘‘அமுகஸ்மிங் ஸேனாஸனே வஸந்தா ப³ஹுங் வஸ்ஸவாஸிகங் லப⁴ந்தீ’’தி ததா² ந வஸ்ஸவாஸிகங் பரியேஸந்தோ சரதி வஸ்ஸவாஸிகஸ்ஸேவ அக்³க³ஹணதோ. தஸ்மா ஸேனாஸனபா²ஸுகங்யேவ சிந்தேதி. தேன ப³ஹுபரிக்கா²ரபா⁴வேன பா²ஸுவிஹாரோ நத்தி² பரிக்கா²ரானங் ரக்க²ணபடிஜக்³க³னாதி³து³க்க²ப³ஹுலதாய. அப்பிச்சா²தீ³னந்தி அப்பிச்ச²ஸந்துட்டா²தீ³னங்யேவ லப்³ப⁴தி தி³ட்ட²த⁴ம்மஸுக²விஹாரோ.
ஜிண்ணஸுத்தவண்ணனா நிட்டி²தா.
6. ஓவாத³ஸுத்தவண்ணனா
149. அத்தனோ டா²னேதி ஸப்³ரஹ்மசாரீனங் ஓவாத³கவிஞ்ஞாபகபா⁴வேன அத்தனோ மஹாஸாவகட்டா²னே ட²பனத்த²ங். அத² வா யஸ்மா ‘‘அஹங் தா³னி ந சிரங் ட²ஸ்ஸாமி, ததா² ஸாரிபுத்தமொக்³க³ல்லானா, அயங் பன வீஸங்வஸ்ஸதாயுகோ, ஓவத³ந்தோ அனுஸாஸந்தோ மமச்சயேன பி⁴க்கூ²னங் மயா காதப்³ப³கிச்சங் கரிஸ்ஸதீ’’தி அதி⁴ப்பாயேன ப⁴க³வா இமங் தே³ஸனங் ஆரபி⁴. தஸ்மா அத்தனோ டா²னேதி ஸத்தா²ரா காதப்³ப³ஓவாத³தா³யகட்டா²னே. தேனாஹ ‘‘ஏவங் பனஸ்ஸா’’திஆதி³. யதா²ஹ ப⁴க³வா ‘‘ஓவத³, கஸ்ஸப…பே॰… த்வங் வா’’தி. து³க்கே²ன வத்தப்³பா³ அப்பத³க்கி²ணக்³கா³ஹிபா⁴வதோ. து³ப்³ப³சபா⁴வகரணேஹீதி கோதூ⁴பனாஹாதீ³ஹி. அனுஸாஸனியா பத³க்கி²ணக்³க³ஹணங் நாம அனுத⁴ம்மசரணங், சி²ன்னபடிபத்தி கதா வாமக்³கா³ஹோ நாமாதி ஆஹ ‘‘அனுஸாஸனி’’ந்திஆதி³. அதிக்கம்ம வத³ந்தேதி அஞ்ஞமஞ்ஞங் அதிக்கமித்வா அதிமஞ்ஞித்வா வத³ந்தே. ப³ஹுங் பா⁴ஸிஸ்ஸதீதி த⁴ம்மங் கதெ²ந்தோ கோ விபுலங் அஸஹிதந்தி புப்³பே³னாபரங் நஸஹிதங் ஹேதுபமாவிரஹிதங். அமது⁴ரந்தி ந மது⁴ரங் ந கண்ணஸுக²ங் ந பேமனீயங். லஹுஞ்ஞேவ உட்டா²தி அப்பவத்தனேன கூலட்டா²னங் விய தஸ்ஸ கத²னங்.
ஓவாத³ஸுத்தவண்ணனா நிட்டி²தா.
7. து³தியஓவாத³ஸுத்தவண்ணனா
150. ஓகப்பனஸத்³தா⁴தி குஸலத⁴ம்மஜானநபஞ்ஞாதி அனவஜ்ஜத⁴ம்மானங் ஸப்³ப³ஸோ ஜானநபஞ்ஞா. பரிஹானந்தி ஸப்³பா³ஹி ஸம்பத்தீஹி பரிஹானங். ந ஹி கல்யாணமித்தரஹிதஸ்ஸ காசி ஸம்பத்தி நாம அத்தீ²தி.
து³தியஓவாத³ஸுத்தவண்ணனா நிட்டி²தா.
8. ததியஓவாத³ஸுத்தவண்ணனா
151. புப்³பே³தி பட²மபோ³தி⁴யங். ஏதரஹீதி ததோ பச்சி²மே காலே. காரணபட்ட²பனேதி காரணாரம்பே⁴. தேஸு வுத்தகு³ணயுத்தேஸு தே²ரேஸு. தஸ்மிந்தி தஸ்மிங் யதா²வுத்தகு³ணயுத்தே புக்³க³லே. ஏவங் ஸக்காரே கயிரமானேதி ‘‘ப⁴த்³த³கோ வதாயங் பி⁴க்கூ²’’தி ஆத³ரஜாதேஹி பி⁴க்கூ²ஹி ஸக்காரே கயிரமானே. இமே ஸப்³ரஹ்மசாரீ. ‘‘ஏஹி பி⁴க்கூ²’’தி தங் பி⁴க்கு²ங் அத்தனோ முகா²பி⁴முக²ங் கரொந்தா வத³ந்தி. யஞ்ஹி தந்தி எத்த² தந்தி நிபாதமத்தங் உபத்³த³வோதி வுச்சதி அனத்த²ஜனநதோ. பத்த²யதி ப⁴ஜதி ப³ஜ்ஜ²தீதி பத்த²னா, அபி⁴ஸங்கோ³தி ஆஹ ‘‘அபி⁴பத்த²னாதி அதி⁴மத்தபத்த²னா’’தி.
ததியஓவாத³ஸுத்தவண்ணனா நிட்டி²தா.
9. ஜா²னாபி⁴ஞ்ஞஸுத்தவண்ணனா
152. யாவதே³வாதி இமினா ஸமானத்த²ங் ‘‘யாவதே³’’தி இத³ங் பத³ந்தி ஆஹ ‘‘யாவதே³ ஆகங்கா²மீதி யாவதே³வ இச்சா²மீ’’தி. யதி³ச்ச²கங் ஜா²னஸமாபத்தீஸு வஸீபா⁴வத³ஸ்ஸனத்த²ங் ததே³தங் ஆரத்³த⁴ங். வித்தா²ரிதமேவ, தஸ்மா தத்த² வித்தா²ரிதமேவ க³ஹேதப்³ப³ந்தி அதி⁴ப்பாயோ. ஆஸவானங் க²யாதி ஆஸவானங் க²யஹேது அரியமக்³கே³ன ஸப்³ப³ஸோ ஆஸவானங் கே²பிதத்தா. அபச்சயபூ⁴தந்தி ஆரம்மணபச்சயபா⁴வேன அபச்சயபூ⁴தங்.
ஜா²னாபி⁴ஞ்ஞஸுத்தவண்ணனா நிட்டி²தா.
10. உபஸ்ஸயஸுத்தவண்ணனா
153. லாப⁴ஸக்காரஹேதுபி ‘‘கம்மட்டா²னத்தி²கா’’திஆதி³. ஏஸோ ஹி ஆனந்த³த்தே²ரோ உஸ்ஸுக்காபெத்வா படிபத்திகு³ணங் த³ஸ்ஸெந்தோ யஸ்மா தா பி⁴க்கு²னியோ சதுஸச்சகம்மட்டா²னிகா, தஸ்மா பஞ்சன்னங் உபாதா³னக்க²ந்தா⁴னங் உத³யப்³ப³யாதி³பகாஸனியா த⁴ம்மகதா²ய விபஸ்ஸனாபடிபத்திஸம்பத³ங் த³ஸ்ஸேஸி. அனிச்சாதி³லக்க²ணானி சேவ உத³யப்³ப³யாதி³கே ச ஸம்மா த³ஸ்ஸேஸி. ஹத்தே²ன க³ஹெத்வா விய பச்சக்க²தோ த³ஸ்ஸேஸி. ஸமாத³பேஸீதி தத்த² லக்க²ணாரம்மணிகவிபஸ்ஸனங் ஸமாத³பேஸி. யதா² வீதி²படிபன்னோ ஹுத்வா பவத்ததி, ஏவங் க³ண்ஹாபேஸி. ஸமுத்தேஜேஸீதி விபஸ்ஸனாய ஆரத்³தா⁴ய ஸங்கா²ரானங் உத³யப்³ப³யாதீ³ஸு உபட்ட²ஹந்தேஸு யதா²காலங் பக்³க³ஹஸமுபெக்க²ணேஹி பொ³ஜ்ஜ²ங்கா³னங் அனுபவத்தனேன பா⁴வனாமஜ்ஜி²மவீதி²ங் பாபெத்வா யதா² விபஸ்ஸனாஞாணங் ஸுப்பஸன்னங் ஹுத்வா வஹதி, ஏவங் இந்த்³ரியானங் விஸத³பா⁴வகரணேன விபஸ்ஸனாசித்தங் ஸம்மா உத்தேஜேஸி, நிப்³பா³னவஸேன வா ஸமாத³பேஸி. ஸம்பஹங்ஸேஸீதி ததா² பவத்தியமானாய விபஸ்ஸனாய ஸமப்பவத்தபா⁴வனாவஸேன உபரி லத்³த⁴ப்³ப³பா⁴வனாவஸேன சித்தங் ஸம்பஹங்ஸேஸி, லத்³த⁴ஸ்ஸாத³வஸேன ஸுட்டு² தோஸேஸி. ஏவமெத்த² அத்தோ² வேதி³தப்³போ³.
மனுதே பரிஞ்ஞாதி³வஸேன ஸச்சானி பு³ஜ்ஜ²தீதி முனி. தேதி தங். உபயோக³த்தே² ஹி இத³ங் ஸாமிவசனங். உத்தரீதி உபரி, தவ யதா²பூ⁴தஸபா⁴வதோ பரதோதி அத்தோ². பக்க²பதிதோ அக³திக³மனங் அதிரேகஓகாஸோ. உபபரிக்கீ²தி அனுவிச்ச நிவாரகோ ந ப³ஹுமதோ. பு³த்³த⁴படிபா⁴கோ³ தே²ரோ. ‘‘பா³லா பி⁴க்கு²னீ து³ப்³பா⁴ஸிதங் ஆஹா’’தி அவத்வா ‘‘க²மத², ப⁴ந்தே’’தி வத³ந்தேன பக்க²பாதேன விய வுத்தங் ஹோதீதி ஆஹ ‘‘ஏகா பி⁴க்கு²னீ ந வாரிதா’’திஆதி³.
சுதா ஸலிங்க³தோ நட்டா², தே³ஸந்தரபக்கமேன அத³ஸ்ஸனங் ந க³தா. கண்டகஸாகா² வியாதி குரண்டகஅபாமக்³க³கண்டகலஸிகாஹி ஸாகா² விய.
உபஸ்ஸயஸுத்தவண்ணனா நிட்டி²தா.
11. சீவரஸுத்தவண்ணனா
154. ராஜக³ஹஸ்ஸ ‘‘த³க்கி²ணாகி³ரீ’’தி வுச்சதி, ‘‘கி³ரிதோ த³க்கி²ணபா⁴கோ³’’தி ஏகதி³வஸேனாதி ஏகேன தி³வஸேன உப்பப்³பா³ஜேஸுங் தேஸங் ஸத்³தா⁴பப்³ப³ஜிதாபா⁴வதோ.
யத்த² சத்தாரோ வா உத்தரி வா பி⁴க்கூ² அகப்பியனிமந்தனங் ஸாதி³யித்வா பஞ்சன்னங் போ⁴ஜனானங் அஞ்ஞதரங் போ⁴ஜனங் ஏகதோ படிக்³க³ண்ஹித்வா பு⁴ஞ்ஜந்தி, ஏதங் க³ணபோ⁴ஜனங் நாம, தங் திண்ணங் பி⁴க்கூ²னங் பு⁴ஞ்ஜிதுங் வட்டதீதி ‘‘திகபோ⁴ஜனங் பஞ்ஞத்த’’ந்தி வசனேன க³ணபோ⁴ஜனங் படிக்கி²த்தந்தி வுத்தங் ஹோதி. தயோ அத்த²வஸே படிச்ச அனுஞ்ஞாதத்தாபி ‘‘திகபோ⁴ஜன’’ந்தி வத³ந்தி.
‘‘து³ம்மங்கூனங் நிக்³க³ஹோ ஏவ பேஸலானங் பா²ஸுவிஹாரோ’’தி இத³ங் ஏகங் அங்க³ங். தேனேவாஹ ‘‘து³ம்மங்கூனங் நிக்³க³ஹேனேவா’’திஆதி³. ‘‘யதா² தே³வத³த்தோ…பே॰… ஸங்க⁴ங் பி⁴ந்தெ³ய்யு’’ந்தி இமினா காரணேன திகபோ⁴ஜனங் பஞ்ஞத்தங்.
அத² கிஞ்சரஹீதி அத² கஸ்மா த்வங் அஸம்பன்னக³ணங் ப³ந்தி⁴த்வா சரஸீதி அதி⁴ப்பாயோ. அஸம்பன்னாய பரிஸாய சாரிகாசரணங் குலானுத்³த³யாய ந ஹோதி, குலானங் கா⁴திதத்தாதி அதி⁴ப்பாயேன தே²ரோ ‘‘ஸஸ்ஸகா⁴தங் மஞ்ஞே சரஸீ’’திஆதி³மவோச.
ஸோதெ⁴ந்தோ தஸ்ஸா அதிவிய பரிஸுத்³த⁴பா⁴வத³ஸ்ஸனேன. உத்³தி³ஸிதுங் ந ஜானாமி ததா² சித்தஸ்ஸேவ அனுப்பன்னபுப்³ப³த்தா. கிஞ்சனங் கிலேஸவத்து². ஸங்க³ஹேதப்³ப³கெ²த்தவத்து² பலிபோ³தோ⁴, ஆலயோ அபெக்கா². ஓகாஸாபா⁴வதோதி ப³ஹுகிச்சகரணீயதாய குஸலகிரியாய ஓகாஸாபா⁴வதோ. ஸன்னிபாதட்டா²னதோதி ஸங்கேதங் கத்வா விய கிலேஸரஜானங் தத்த² ஸன்னிஜ்ஜ²பவத்தனதோ.
ஸிக்க²த்தயப்³ரஹ்மசரியந்தி அதி⁴ஸீலஸிக்கா²தி³ஸிக்க²த்தயஸங்க³ஹங் ப்³ரஹ்மங் ஸெட்ட²ங் சரியங். க²ண்டா³தி³பா⁴வாபாத³னேன அக²ண்ட³ங் கத்வா. லக்க²ணவசனஞ்ஹேதங். கிஞ்சி ஸிக்கே²கதே³ஸங் அஸேஸெத்வா ஏகந்தேனேவ பரிபூரேதப்³ப³தாய ஏகந்தபரிபுண்ணங். சித்துப்பாத³மத்தம்பி ஸங்கிலேஸமலங் அனுப்பாதெ³த்வா அச்சந்தமேவ விஸுத்³த⁴ங் கத்வா பரிஹரிதப்³ப³தாய ஏகந்தபரிஸுத்³த⁴ங். ததோ ஏவ ஸங்க²ங் விய லிகி²தந்தி ஸங்க²லிகி²தங். தேனாஹ ‘‘லிகி²தஸங்க²ஸதி³ஸ’’ந்தி. தா³டி²காபி தக்³க³ஹணேனேவ க³ஹெத்வா காஸாயானி.
வங்க³ஸாடகோதி வங்க³தே³ஸே உப்பன்னஸாடகோ. ஏஸாதி மஹாகஸ்ஸபத்தே²ரோ. அபி⁴னீஹாரதோ பட்டா²ய பணிதா⁴னதோ பபு⁴தி, அயங் இதா³னி வுச்சமானா. அக்³க³ஸாவகத்³வயங் உபாதா³ய ததியத்தா ‘‘ததியஸாவக’’ந்தி அட்ட²ஸட்டி²பி⁴க்கு²ஸதஸஹஸ்ஸந்தி பி⁴க்கூ²னங் ஸதஸஹஸ்ஸஞ்சேவ ஸட்டி²ஸஹஸ்ஸானி ச அட்ட² ச ஸஹஸ்ஸானி.
அயஞ்ச அயஞ்ச கு³ணோதி ஸீலதோ பட்டா²ய யாவ அக்³க³ப²லா கு³ணோதி கித்தெந்தோ மஹாஸமுத்³த³ங் பூரயமானோ விய கதே²ஸி.
கோலாஹலந்தி தே³வதாஹி நிப்³ப³த்திதோ கோலாஹலோ.
கு²த்³த³காதி³வஸேன பஞ்சவண்ணா. தரணங் வா ஹோது மரணங் வாதி மஹோக⁴ங் ஓகா³ஹந்தோ புரிஸோ விய மச்சே²ரஸமுத்³த³ங் உத்தரந்தோ பச்சா²பி…பே॰… பாத³மூலே ட²பேஸி ப⁴க³வதோ த⁴ம்மதே³ஸனாய மச்சே²ரபஹானஸ்ஸ கதி²தத்தா.
ஸத்து² கு³ணா கதி²தா நாம ஹொந்தீதி வுத்தங் ‘‘ஸத்து² கு³ணே கதெ²ந்தஸ்ஸா’’தி. ததோ பட்டா²யாதி ததா³ ஸத்து² ஸம்முகா² த⁴ம்மஸ்ஸவனதோ பட்டா²ய.
ததா²க³தமஞ்சஸ்ஸாதி ததா²க³தஸ்ஸ பரிபோ⁴க³மஞ்சஸ்ஸ. தா³னங் த³த்வா ப்³ராஹ்மணஸ்ஸ புரோஹிதட்டா²னே ட²பேஸி. தாதி³ஸஸ்ஸேவ ஸெட்டி²னோ தீ⁴தா ஹுத்வா.
அதி³ன்னவிபாகஸ்ஸாதி புப்³பே³ கதூபசிதஸ்ஸ ஸப்³ப³ஸோ ந தி³ன்னவிபாகஸ்ஸ. தஸ்ஸ கம்மஸ்ஸாதி தஸ்ஸ பச்சேகபு³த்³த⁴ஸ்ஸ பத்தே பிண்ட³பாதங் சி²ந்தி³த்வா கலலபூரணகம்மஸ்ஸ. தஸ்மிங்யேவ அத்தபா⁴வே ஸத்தஸு டா²னேஸு து³க்³க³ந்த⁴ஸரீரதாய படினிவத்திதா. இட்ட²கபந்தீதி ஸுவண்ணிட்ட²கபந்தி. க⁴டனிட்ட²காயாதி தஸ்ஸ பந்தியங் பட²மங் ட²பிதஇட்ட²காய ஸத்³தி⁴ங் க⁴டேதப்³ப³இட்ட²காய ஊனா ஹோதி. ப⁴த்³த³கே காலேதி ஈதி³ஸியா இட்ட²காய இச்சி²தகாலேயேவ ஆக³தாஸி. தேன ப³ந்த⁴னேனாதி தேன ஸிலேஸஸம்ப³ந்தே⁴ன.
ஓலம்ப³காதி புஞ்ஞந்தி நத்தி² நோ புஞ்ஞங் தங், யங் நிமித்தங் யங் காரணா இதோ ஸுகு²மதரஸ்ஸ படிலாபோ⁴ ஸியாதி அத்தோ². புஞ்ஞனியாமேனாதி புஞ்ஞானுபா⁴வஸித்³தே⁴ன நியாமேன. ஸோ ச அஸ்ஸ பா³ராணஸிரஜ்ஜங் தா³துங் கதோகாஸோ.
பு²ஸ்ஸரத²ந்தி மங்க³லரத²ங். உண்ஹீஸங் வாலபீ³ஜனீ க²க்³கோ³ மணிபாது³கா ஸேதச்ச²த்தந்தி பஞ்சவித⁴ங் ராஜககுத⁴ப⁴ண்ட³ங்
பஞ்ச சங்கமனஸதானீதி எத்த² இதி-ஸத்³தே³ன ஆதி³அத்தே²ன அக்³கி³ஸாலாதீ³னி பப்³ப³ஜிதஸாருப்பட்டா²னானி ஸங்க³ண்ஹாதி.
ஸாது⁴கீளிதந்தி அரியானங் பரினிப்³பு³தட்டா²னே காதப்³ப³ஸக்காரங் வத³தி.
நப்பமஜ்ஜி நிரோகா³ அய்யாதி புச்சி²தாகாரத³ஸ்ஸனங். பரினிப்³பு³தா தே³வாதி தே³வீ படிவசனங் அதா³ஸி. படியாதெ³த்வாதி நிய்யாதெத்வா. ஸமணகபப்³ப³ஜ்ஜந்தி ஸமிதபாபேஹி அரியேஹி அனுட்டா²தப்³ப³பப்³ப³ஜ்ஜங். ஸோ ஹி ராஜா பச்சேகபு³த்³தா⁴னங் வேஸஸ்ஸ தி³ட்ட²த்தா ‘‘இத³மேவ ப⁴த்³த³க’’ந்தி தாதி³ஸங்யேவ லிங்க³ங் க³ண்ஹி.
தத்தே²வாதி ப்³ரஹ்மலோகேயேவ. வீஸதிமே வஸ்ஸே ஸம்பத்தேதி ஆஹரித்வா ஸம்ப³ந்தோ⁴. ப்³ரஹ்மலோகதோ ஆக³ந்த்வா நிப்³ப³த்தத்தா ப்³ரஹ்மசரியாதி⁴காரஸ்ஸ சிரகாலங் ஸங்க³ஹிதத்தா ‘‘ஏவரூபங் கத²ங் மா கதே²தா²’’திஆதி³மாஹ.
வீஸதி த⁴ரணானி ‘‘நிக்க²’’ந்தி வத³ந்தி. அலப⁴ந்தோ ந வஸாமீதி ஸஞ்ஞாபெஸ்ஸாமீதி ஸம்ப³ந்தோ⁴.
இத்தா²கரோதி இத்தி²ரதனஸ்ஸ உப்பத்திட்டா²னங். அய்யதீ⁴தாதி அம்ஹாகங் அய்யஸ்ஸ தீ⁴தா, ப⁴த்³த³காபிலானீதி அத்தோ². பஸாத³ரூபேன நிப்³பி³ஸிட்ட²தாய ‘‘மஹாகீ³வ’’ந்தி படிமாய ஸதி³ஸபா⁴வமாஹ. தேனாஹ ‘‘அய்யதீ⁴தாயா’’திஆதி³.
ஸமானபண்ணந்தி ஸதி³ஸபண்ணங், குமாரஸ்ஸ குமாரியா ச வுத்தந்தபண்ணங். இதோ ச எத்தோ சாதி தே புரிஸா ஸமாக³மட்டா²னதோ மக³த⁴ரட்டே² மஹாதித்த²கா³மங்
புப்ப²தா³மந்தி ஹத்தி²ஹத்த²ப்பமாணங் புப்ப²தா³மங். தானி புப்ப²தா³மானி. தேதி உபோ⁴ ப⁴த்³தா³ சேவ பிப்பலிகுமாரோ ச. லோகாமிஸேனாதி கே³ஹஸ்ஸிதபேமேன, காமஸ்ஸாதே³னாதி அத்தோ². அஸங்ஸட்டா²தி ந ஸங்ஸட்டா² யந்தப³த்³தா⁴னீதி ஸஸ்ஸஸம்பாத³னத்த²ங் தத்த² தத்த² இட்ட²கத்³வாரகவாடயோஜனவஸேன யந்தப³த்³த⁴உத³கனிக்க²மனதும்பா³னி. கம்மந்தோதி கஸிகம்மகரணட்டா²னங். தா³ஸகா³மாதி தா³ஸானங் வஸனகா³மா.
ஓஸாபெத்வாதி பக்கி²பித்வா. ஆகப்பகுத்தவஸேனாதி ஆகாரவஸேன கிரியாவஸேன ச. அனநுச்ச²விகந்தி பப்³ப³ஜிதவேஸஸ்ஸ அனநுரூபங். தஸ்ஸ மத்த²கேதி த்³வேதா⁴பத²ஸ்ஸ த்³விதா⁴பூ⁴தட்டா²னே.
ஏதேஸங் ஸங்க³ஹங் காதுங் வட்டதீதி நிஸீதீ³தி ஸம்ப³ந்தோ⁴. ஸா பன ஸத்து² தத்த² நிஸஜ்ஜா ஏதி³ஸீதி த³ஸ்ஸேதுங் ‘‘நிஸீத³ந்தோ பனா’’திஆதி³ வுத்தங். தத்த² யா பு³த்³தா⁴னங் அபரிமிதகாலஸங்க³ஹிதா அசிந்தெய்யாபரிமெய்யபுஞ்ஞஸம்பா⁴ரூபசயனிப்³ப³த்தா நிரூபிதஸபா⁴வபு³த்³த⁴கு³ணவிஜ்ஜோதிதா லக்க²ணானுப்³யஞ்ஜனஸமுஜ்ஜலா ப்³யாமப்பபா⁴கேதுமாலாலங்கதா ஸபா⁴வஸித்³த⁴தாய அகித்திமா ரூபகாயஸிரீ, தங்யேவ மஹாகஸ்ஸபஸ்ஸ அதி³ட்ட²புப்³ப³ங் பஸாத³ஸங்வட்³ட⁴னத்த²ங் அனிக்³க³ஹெத்வா நிஸின்னோ ப⁴க³வா ‘‘பு³த்³த⁴வேஸங் க³ஹெத்வா…பே॰… நிஸீதீ³’’தி வுத்தோ. அஸீதிஹத்த²ங் பதே³ஸங் ப்³யாபெத்வா பவத்தியா ‘‘அஸீதிஹத்தா²’’தி வுத்தா. ஸதஸாகோ²தி ப³ஹுஸாகோ² அனேகஸாகோ². ஸுவண்ணவண்ணோ அஹோஸி நிரந்தரங் பு³த்³த⁴ரஸ்மீஹி ஸமந்ததோ ஸமோகிண்ணத்தா. ஏவங் வுத்தப்பகாரேன வேதி³தப்³பா³.
ராஜக³ஹங் நாளந்த³ந்தி ச ஸாமிஅத்தே² உபயோக³வசனங் அந்தராஸத்³த³யோக³தோதி ஆஹ ‘‘ராஜக³ஹஸ்ஸ நாளந்தா³ய சா’’தி. ந ஹி மே இதோ அஞ்ஞேன ஸத்தா²ரா ப⁴விதுங் ஸக்கா தி³ட்ட²த⁴ம்மிகஸம்பராயிகபரமத்தே²ஹி ஸத்தானங் யதா²ரஹங் அனுஸாஸனஸமத்த²ஸ்ஸ அஞ்ஞஸ்ஸ ஸதே³வகே அபா⁴வதோ. ந ஹி மே இதோ அஞ்ஞேன ஸுக³தேன ப⁴விதுங் ஸக்கா ஸோப⁴னக³மனகு³ணக³ணயுத்தஸ்ஸ அஞ்ஞஸ்ஸ அபா⁴வதோ. ந ஹி மே இதோ அஞ்ஞேன ஸம்மாஸம்பு³த்³தே⁴ன ப⁴விதுங் ஸக்கா ஸம்மா ஸப்³ப³த⁴ம்மானங் ஸயம்பு⁴ஞாணேன அபி⁴ஸம்பு³த்³த⁴ஸ்ஸ அபா⁴வதோ. இமினாதி ‘‘ஸத்தா² மே, ப⁴ந்தே’’தி இமினா வசனேன.
அஜானமானோவ ஸப்³ப³சேதஸாதி ஸப்³ப³அஜ்ஜ²த்திகங்க³பரிபுண்ணசேதஸா. ஸமன்னாக³தந்தி ஸம்பன்னங் ஸம்மதே³வ அனு அனு ஆக³தங் உபக³தங். ப²லெய்யாதி விதா³லெய்ய. விலயந்தி வினாஸங்.
ஏவங் ஸிக்கி²தப்³ப³ந்தி இதா³னி வுச்சமானாகாரேன. ஹிரொத்தப்பஸ்ஸ ப³ஹலதா நாம விபுலதாதி ஆஹ ‘‘மஹந்த’’ந்தி. பட²மதரமேவாதி பகே³வ உபஸங்கமனதோ. ததா² அதிமானபஹீனோ அஸ்ஸ, ஹிரிஒத்தப்பங் குஸலஸன்னிஸ்ஸிதந்தி அனவஜ்ஜத⁴ம்மனிஸ்ஸிதங். அட்டி²கந்தி தேன த⁴ம்மேன அட்டி²கங். ஆதி³தோ பட்டா²ய யாவ பரியோஸானா ஸவனசித்தங் ‘‘ஸப்³ப³சேதோ’’தி அதி⁴ப்பேதந்தி ஆஹ ‘‘சித்தஸ்ஸ தோ²கம்பி ப³ஹி க³ந்துங் அதெ³ந்தோ’’தி. தேன ஸமோதா⁴னங் த³ஸ்ஸேதி. ஸப்³பே³ன…பே॰… ஸமன்னாஹரித்வா ஆரம்ப⁴தோ பபு⁴தி யாவ தே³ஸனா நிப்ப²ன்னா, தாவ அந்தரந்தரா பவத்தேன ஸப்³பே³ன ஸமன்னாஹாரசித்தேன த⁴ம்மங்யேவ ஸமன்னாஹரித்வா. ட²பிதஸோதோதி த⁴ம்மே நிஹிதஸோதோ. ஓத³ஹித்வாதி அபிஹிதங் கத்வா. பட²மஜ்ஜா²னவஸேனாதி இத³ங் அஸுபே⁴ஸு தஸ்ஸேவ இஜ்ஜ²தோ, இதரத்த²ஞ்ச ஸுக²ஸம்பயுத்ததா வுத்தா.
ஸங்ஸாரஸாக³ரே பரிப்³ப⁴மந்தஸ்ஸ இணட்டா²னே திட்ட²ந்தி கிலேஸா ஆஸவஸபா⁴வாபாத³னதோதி ஆஹ ‘‘ஸரணோதி ஸகிலேஸோ’’தி. சத்தாரோ ஹி பரிபோ⁴கா³திஆதீ³ஸு யங் வத்தப்³ப³ங், தங் விஸுத்³தி⁴மக்³க³த்தங் ஸங்வண்ணனாஸு வுத்தனயேனேவ வேதி³தப்³ப³ங். எத்த² ச ப⁴க³வா பட²மங் ஓவாத³ங் தே²ரஸ்ஸ ப்³ராஹ்மணஜாதிகத்தா ஜாதிமானபஹானத்த²மபா⁴ஸி, து³தியங் பா³ஹுஸச்சங் நிஸ்ஸாய உப்பஜ்ஜனகஅஹங்காரபஹானத்த²ங், ததியங் உபதி⁴ஸம்பத்திங் நிஸ்ஸாய உப்பஜ்ஜனகஅத்தஸினேஹபஹானத்த²ங். அட்ட²மே தி³வஸேதி ப⁴க³வதா ஸமாக³ததி³வஸதோ அட்ட²மே தி³வஸே.
மக்³க³தோ ஓக்கமனங் பட²மதரங் ப⁴க³வதா ஸமாக³ததி³வஸேயேவ அஹோஸி. யதி³ அரஹத்தாதி⁴க³மோ பச்சா², அத² கஸ்மா பாளியங் பகே³வ ஸித்³த⁴ங் விய வுத்தந்தி ஆஹ ‘‘தே³ஸனாவாரஸ்ஸா’’திஆதி³. ‘‘ஸத்தாஹமேவ க்²வாஹங், ஆவுஸோ ஸரணோ, ரட்ட²பிண்ட³ங் பு⁴ஞ்ஜி’’ந்தி வத்வா அவஸரப்பத்தங் அரஹத்தங் பவேதெ³ந்தோ ‘‘அட்ட²மியா அஞ்ஞா உத³பாதீ³’’தி ஆஹ. அயமெத்த² தே³ஸனாவாரஸ்ஸ ஆக³மோ. ததோ பரங் ப⁴க³வதா அத்தனோ கதங் அனுக்³க³ஹங் சீவரபரிவத்தனங் த³ஸ்ஸெந்தோ ‘‘அத² கோ², ஆவுஸோ’’திஆதி³மாஹ.
அந்தந்தேனாதி ஜாதிபங்ஸுகூலிகேன…பே॰… ப⁴விதுங் வட்டதீதி ஏதேன புப்³பே³ ஜாதிஆரஞ்ஞகக்³க³ஹணேன ச தேரஸ து⁴தங்கா³ க³ஹிதா ஏவாதி த³ட்ட²ப்³ப³ங். அனுச்ச²விகங் காதுந்தி அனுரூபங் படிபத்திங் படிபஜ்ஜிதுங். தே²ரோ பாருபீதி ஸம்ப³ந்தோ⁴.
ப⁴க³வதோ ஓவாத³ங் ப⁴க³வதோ வா த⁴ம்மகாயங் நிஸ்ஸாய உரஸ்ஸ வஸேன ஜாதோதி ஓரஸோ. ப⁴க³வதோ வா த⁴ம்மஸரீரஸ்ஸ முக²தோ ஸத்ததிங்ஸபோ³தி⁴பக்கி²யதோ ஜாதோ. தேனேவ த⁴ம்மஜாதத⁴ம்மனிம்மிதபா⁴வோபி ஸங்வண்ணிதோதி த³ட்ட²ப்³போ³. ஓவாத³த⁴ம்மோ ஏவ ஸத்தா²ரா தா³தப்³ப³தோ தே²ரேன ஆதா³தப்³ப³தோ ஓவாத³த⁴ம்மதா³யாதோ³, ஓவாத³த⁴ம்மதா³யஜ்ஜோதி அத்தோ², தங் அரஹதீதி. ஏஸ நயோ ஸேஸபதே³ஸுபி.
‘‘பப்³ப³ஜ்ஜா ச பரிஸோதி⁴தா’’தி வத்வா தஸ்ஸா ஸம்மதே³வ ஸோதி⁴தபா⁴வங் ப்³யதிரேகமுகே²ன த³ஸ்ஸேதுங், ‘‘ஆவுஸோ, யஸ்ஸா’’திஆதி³ வுத்தங். தத்த² ஏவந்தி யதா² அஹங் லபி⁴ங், ஏவங் ஸோ ஸத்து² ஸந்திகா லப⁴தீதி யோஜனா. ஸீஹனாத³ங் நதி³துந்தி எத்தா²பி ஸீஹனாத³னத³னா நாம தே³ஸனாவ, தே²ரோ ஸத்தா²ரா அத்தனோ கதானுக்³க³ஹமேவ அனந்தரஸுத்தே வுத்தனயேன உல்லிங்கே³தி, ந அஞ்ஞதா². ந ஹி மஹாதே²ரோ கேவலங் அத்தனோ கு³ணானுபா⁴வங் விபா⁴வேதி. ஸேஸந்தி யங் இத⁴ அஸங்வண்ணிதங். புரிமனயேனேவாதி அனந்தரஸுத்தே வுத்தனயேனேவ.
சீவரஸுத்தவண்ணனா நிட்டி²தா.
12. பரங்மரணஸுத்தவண்ணனா
155. யதா² அதீதகப்பே அதீதாஸு ஜாதீஸு கம்மகிலேஸவஸேன ஆக³தோ, ததா² ஏதரஹிபி ஆக³தோதி ததா²க³தோ, யதா² யதா² வா பன கம்மங் கதூபசிதங், ததா² தங் தங் அத்தபா⁴வங் ஆக³தோ உபக³தோ உபபன்னோதி ததா²க³தோ, ஸத்தோதி ஆஹ ‘‘ததா²க³தோதி ஸத்தோ’’தி. ஏதந்தி ‘‘ஏவங் ஹோதி ப⁴வதி திட்ட²தி ஸஸ்ஸதிஸம’’ந்தி ஏவங் பவத்தங் தி³ட்டி²க³தங். அத்த²ஸன்னிஸ்ஸிதங் ந ஹோதீதி தி³ட்ட²த⁴ம்மிகஸம்பராயிகபரமத்த²தோ ஸுக²ந்தி பஸத்த²ஸன்னிஸ்ஸிதங் ந ஹோதி. ஆதி³ப்³ரஹ்மசரியகந்தி எத்த² மக்³க³ப்³ரஹ்மசரியங் அதி⁴ப்பேதங் தஸ்ஸ பதா⁴னபா⁴வதோ. தஸ்ஸ பன ஏதங் தி³ட்டி²க³தங் ஆதி³படிபதா³மத்தங்
பரங்மரணஸுத்தவண்ணனா நிட்டி²தா.
13. ஸத்³த⁴ம்மப்பதிரூபகஸுத்தவண்ணனா
156. ஆஜானாதி ஹெட்டி²மமக்³கே³ஹி ஞாதமரியாத³ங் அனதிக்கமித்வாவ ஜானாதி படிவிஜ்ஜ²தீதி அஞ்ஞா, அக்³க³மக்³க³பஞ்ஞா. அஞ்ஞஸ்ஸ அயந்தி அஞ்ஞா, அரஹத்தப²லங். தேனாஹ ‘‘அரஹத்தே’’தி.
ஓபா⁴ஸேதி ஓபா⁴ஸனிமித்தங். ‘‘சித்தங் விகம்பதீ’’தி பத³த்³வயங் ஆனெத்வா ஸம்ப³ந்தோ⁴. ஓபா⁴ஸேதி ‘‘யேஹி சித்தங் பவேத⁴தீ’’தி. ஸேஸேஸுபி ஏஸேவ நயோ.
உபட்டா²னேதி ஸதியங். உபெக்கா²ய சாதி விபஸ்ஸனுபெக்கா²ய ச. எத்த² ச விபஸ்ஸனாசித்தஸமுட்டா²னஸந்தானவினிமுத்தங் பபா⁴ஸனங் ரூபாயதனங் ஓபா⁴ஸோ. ஞாணாத³யோ விபஸ்ஸனாசித்தஸம்பயுத்தாவ. ஸகஸககிச்சே ஸவிஸேஸோ ஹுத்வா பவத்தோ அதி⁴மொக்கோ² ஸத்³தா⁴தி⁴மொக்கோ². உபட்டா²னங் ஸதி. உபெக்கா²தி ஆவஜ்ஜனுபெக்கா². ஸா ஹி ஆவஜ்ஜனசித்தஸம்பயுத்தா சேதனா. ஆவஜ்ஜனஅஜ்ஜு²பெக்க²னவஸேன பவத்தியா இத⁴ ‘‘ஆவஜ்ஜனுபெக்கா²’’தி வுச்சதி. புன உபெக்கா²யாதி விபஸ்ஸனுபெக்கா²வ அனேன ஸமஜ்ஜ²த்ததாய ஏவங் வுத்தா. நிகந்தி நாம விபஸ்ஸனாய நிகாமனா அபெக்கா². ஸுகு²மதரகிலேஸோ வா ஸியா து³விஞ்ஞெய்யோ.
இமானி த³ஸ டா²னானீதி இமானி ஓபா⁴ஸாதீ³னி உபக்கிலேஸுப்பத்தியா டா²னானி உபக்கிலேஸவத்தூ²னி. பஞ்ஞா யஸ்ஸ பரிசிதாதி யஸ்ஸ பஞ்ஞா பரிசிதவதீ யாதா²வதோ ஜானாதி. ‘‘இமானி நிஸ்ஸாய அத்³தா⁴ மக்³க³ப்பத்தோ ப²லப்பத்தோ அஹ’’ந்தி பவத்தஅதி⁴மானோ த⁴ம்முத்³த⁴ச்சங் த⁴ம்மூபனிஸ்ஸயோ விக்கே²போ. தத்த² குஸலோ ஹி தங் யாதா²வதோ ஜானந்தோ ந ச தத்த² ஸம்மோஹங் க³ச்ச²தி.
அதி⁴க³மஸத்³த⁴ம்மப்பதிரூபகங் நாம அனதி⁴க³தே அதி⁴க³தமானிபா⁴வாவஹத்தா. யத³க்³கே³ன விபஸ்ஸனாஞாணஸ்ஸ உபக்கிலேஸோ, தத³க்³கே³ன படிபத்திஸத்³த⁴ம்மப்பதிரூபகோதிபி ஸக்கா விஞ்ஞாதுங். தா⁴துகதா²தி மஹாதா⁴துகத²ங் வத³தி. வேத³ல்லபிடகந்தி வேதுல்லபிடகங். தங் நாக³ப⁴வனதோ ஆனீதந்தி வத³ந்தி. வாத³பா⁴ஸிதந்தி அபரே. அபு³த்³த⁴வசனங் பு³த்³த⁴வசனேன விருஜ்ஜ²னதோ. ந ஹி ஸம்பு³த்³தோ⁴ புப்³பா³பரவிருத்³த⁴ங் வத³தி. தத்த² ஸல்லங் உபட்ட²பெந்தி கிலேஸவினயங் ந ஸந்தி³ஸ்ஸதி, அஞ்ஞத³த்து² கிலேஸுப்பத்தியா பச்சயோ ஹோதீதி.
அவிக்கயமானந்தி விக்கயங் அக³ச்ச²ந்தங். தந்தி ஸுவண்ணப⁴ண்ட³ங்.
ந ஸக்கி²ங்ஸு ஞாணஸ்ஸ அவிஸத³பா⁴வதோ. ஏஸ நயோ இதோ பரேஸுபி.
இதா³னி ‘‘பி⁴க்கூ² படிஸம்பி⁴தா³ப்பத்தா அஹேஸு’’ந்திஆதி³னா வுத்தமேவ அத்த²ங் காரணதோ விபா⁴வேதுங் புன ‘‘பட²மபோ³தி⁴யங் ஹீ’’திஆதி³ வுத்தங். தத்த² படிபத்திங் பூரயிங்ஸூதி அதீதே கதா³ தே படிஸம்பி⁴தா³வஹங் ததா³ படிபத்திஸத்³த⁴ம்மோ அந்தரஹிதோ நாம ப⁴விஸ்ஸதீதி ஏதேன அரியமக்³கே³ன ஆஸன்னா ஏவ புப்³ப³பா⁴க³படிபதா³ படிபத்திஸத்³த⁴ம்மோதி த³ஸ்ஸேதி.
த்³வீஸூதி ஸுத்தாபி⁴த⁴ம்மபிடகேஸு அந்தரஹிதேஸுபி. அனந்தரஹிதமேவ அதி⁴ஸீலஸிக்கா²யங் டி²தஸ்ஸ இதரஸிக்கா²த்³வயஸமுட்டா²பிததோ. கிங் காரணாதி கேன காரணேன, அஞ்ஞஸ்மிங் த⁴ம்மே அந்தரஹிதே அஞ்ஞதரஸ்ஸ த⁴ம்மஸ்ஸ அனந்தரதா⁴னங் வுச்சதீதி அதி⁴ப்பாயோ. படிபத்தியா பச்சயோ ஹோதி அனவஸேஸதோ படிபத்திக்கமஸ்ஸ பரிதீ³பனதோ. படிபத்தி அதி⁴க³மஸ்ஸ பச்சயோ விஸேஸலக்க²ணபடிவேத⁴பா⁴வதோ. பரியத்தியேவ பமாணங் ஸாஸனஸ்ஸ டி²தியாதி அதி⁴ப்பாயோ.
நனு ச ஸாஸனங் ஓஸக்கிதங் பரியத்தியா வத்தமானாயாதி அதி⁴ப்பாயோ. அனாராத⁴கபி⁴க்கூ²தி ஸீலமத்தஸ்ஸபி ந ஆராத⁴கோ து³ஸ்ஸீலோ. இமஸ்மிந்தி இமஸ்மிங் பாதிமொக்கே². வத்தந்தாதி ‘‘ஸீலங் அகோபெத்வா டி²தா அத்தீ²’’தி புச்சி².
ஏதேஸூதி தஸ்மாதி யஸ்மா அஞ்ஞேன கேனசி அதிமஹந்தேனபி ஸத்³த⁴ம்மோ ந அந்தரதா⁴யதி, ஸமயந்தரேன பன வத்தப்³ப³மேவ நத்தி², தஸ்மா. ஏவமாஹாதி இதா³னி வுச்சமானாகாரங் வத³தி.
ஆதா³னங் ஆதி³, ஆதி³ ஏவ ஆதி³கந்தி ஆஹ ‘‘ஆதி³கேனாதி ஆதா³னேனா’’தி. ஹெட்டா²க³மனீயாதி அதோ⁴பா⁴க³க³மனீயா, அபாயது³க்க²ஸ்ஸ ஸங்ஸாரது³க்க²ஸ்ஸ ச நிப்³ப³த்தகாதி அத்தோ². கா³ரவரஹிதாதி க³ருகாரரஹிதா. பதிஸ்ஸயனங் நீசபா⁴வேன பதிப³த்³த⁴வுத்திதா, பதிஸ்ஸோ பதிஸ்ஸயோதி அத்த²தோ ஏகங், ஸோ ஏதேஸங் நத்தீ²தி ஆஹ ‘‘அப்பதிஸ்ஸாதி அப்பதிஸ்ஸயா அனீசவுத்திகா’’தி. ஸேஸங் ஸுவிஞ்ஞெய்யமேவ.
ஸத்³த⁴ம்மப்பதிரூபகஸுத்தவண்ணனா நிட்டி²தா.
ஸாரத்த²ப்பகாஸினியா ஸங்யுத்தனிகாய-அட்ட²கதா²ய
கஸ்ஸபஸங்யுத்தவண்ணனாய லீனத்த²ப்பகாஸனா ஸமத்தா.