13. ஜா²னஸங்யுத்தங்
1. ஸமாதி⁴மூலகஸமாபத்திஸுத்தவண்ணனா
662. ஸமாதி⁴குஸலோதி ‘‘பட²மங் ஜா²ன’’ந்திஆதி³. தத்த² விதக்கவிசாரபீதிஸுகே²கக்³க³தாவஸேன பட²மங் பஞ்சங்கி³கங், பீதிஸுகே²கக்³க³தாவஸேன து³தியங் திவங்கி³கங், ஸுகே²கக்³க³தாவஸேன ததியங் து³வங்கி³கங், உபெக்கே²கக்³க³தாவஸேன சதுத்த²ங் து³வங்கி³கமேவாதி ஏவங் தஸ்மிங் தஸ்மிங் ஜா²னே தங்தங்அங்கா³னங் வவத்தா²னே குஸலோ. ஸமாபத்திகுஸலோதி ஸமாபஜ்ஜனே குஸலோ. ஹாஸெத்வாதி தோஸெத்வா. கல்லங் கத்வாதி ஸமாதா⁴னஸ்ஸ படிபக்க²த⁴ம்மானங் தூ³ரீகரணேன ஸஹகாரீகாரணஞ்ச ஸமாதா⁴னேன ஸமாபஜ்ஜனே சித்தங் ஸமத்த²ங் கத்வா. ஸேஸபதா³னீதி ஸேஸா தயோ கொட்டா²ஸா. ததியாதீ³ஸு நயேஸு அகுஸலோபி ஜா²னத்தா²ய படிபன்னத்தா ‘‘ஜா²யீதேவா’’தி வுத்தோ.
ஸமாதி⁴மூலகஸமாபத்திஸுத்தவண்ணனா நிட்டி²தா.
2-55. ஸமாதி⁴மூலகடி²திஸுத்தாதி³வண்ணனா
663-716. து³தியாதி³ஸுத்தேஸு டி²திகுஸலோதி எத்த² அந்தோக³த⁴ஹேதுஅத்தோ² டி²தி-ஸத்³தோ³, தஸ்மிஞ்ச பன குஸலோதி அத்தோ²தி ஆஹ – ‘‘ஜா²னங் ட²பேதுங் அகுஸலோ’’தி. ஸத்தட்ட²அச்ச²ராமத்தந்தி ஸத்தட்ட²அச்ச²ராமத்தங் க²ணங் ஜா²னங் ட²பேதுங் ந ஸக்கோதி அதி⁴ட்டா²னவஸீபா⁴வஸ்ஸ அனிப்பா²தி³தத்தா. யதா²பரிச்சே²தே³ன காலேன வுட்டா²துங் ந ஸக்கோதி வுட்டா²னவஸீபா⁴வஸ்ஸ அனிப்பா²தி³தத்தா. கல்லங் ஜாதங் அஸ்ஸாதி கல்லிதங், தஸ்மிங் கல்லிதே கல்லிதபா⁴வேன கஸிணாரம்மணேஸு ‘‘இத³ங் நாம அஸுகஸ்ஸா’’தி விஸயவஸேன ஸமாபஜ்ஜிதுங் அஸக்கொந்தோ ந ஸமாதி⁴ஸ்மிங் ஆரம்மணகுஸலோ. ந ஸமாதி⁴ஸ்மிங் கோ³சரகுஸலோதி ஸமாதி⁴ஸ்மிங் நிப்பா²தி³தப்³பே³ தஸ்ஸ கோ³சரே கம்மட்டா²னஸஞ்ஞிதே பவத்திட்டா²னே பி⁴க்கா²சாரகோ³சரே ச ஸதிஸம்பஜஞ்ஞவிரஹிதோ அகுஸலோ. கேசி பன ‘‘கம்மட்டா²னகோ³சரோ பட²மஜ்ஜா²னாதி³கங், ‘ஏவங் ஸமாபஜ்ஜிதப்³ப³ங், ஏவங் ப³ஹுலீகாதப்³ப³’ந்தி அஜானந்தோ தத்த² அகுஸலோ நாமா’’தி வத³ந்தி. கம்மட்டா²னங் அபி⁴னீஹரிதுந்தி கம்மட்டா²னங் விஸேஸபா⁴கி³யதாய அகுஸலோ. ஸக்கச்சகாரீதி சித்தீகாரீ. ஸாதச்சகாரீதி நியதகாரீ. ஸமாதி⁴ஸ்ஸ உபகாரகத⁴ம்மாதி அப்பனாகோஸல்லா. ஸமாபத்திஆதீ³ஹீதி ஆதி³-ஸத்³தே³ன ஸக்கச்சகாரிபதா³தீ³னங்யேவ ஸங்க³ஹோ த³ட்ட²ப்³போ³ சதுக்கானங் வுத்தத்தா. தேனாஹ ‘‘யோஜெத்வா சதுக்கா வுத்தா’’தி. லோகியஜ்ஜா²னவஸேனேவ கதி²தங் ‘‘ஸமாதி⁴குஸலோ’’திஆதி³னா நயேன தே³ஸனாய பவத்தத்தா. ந ஹி லோகுத்தரத⁴ம்மேஸு அகோஸல்லங் நாம லப்³ப⁴தி. யதி³ அகோஸல்லங், ந குஸலஸத்³தே³ன விஸேஸிதப்³ப³தா ஸியாதி.
ஸமாதி⁴மூலகடி²திஸுத்தாதி³வண்ணனா நிட்டி²தா.
ஜா²னஸங்யுத்தவண்ணனா நிட்டி²தா.
நிட்டி²தா ச ஸாரத்த²ப்பகாஸினியா
ஸங்யுத்தனிகாய-அட்ட²கதா²ய க²ந்த⁴வக்³க³வண்ணனா.