6. கிலேஸஸங்யுத்தவண்ணனா
322-331. ஏஸோதி உபக்கிலேஸோ. சித்தஸ்ஸாதி ஸாமஞ்ஞவசனங் அனிச்ச²ந்தோ சோத³கோ ‘‘கதரசித்தஸ்ஸா’’தி ஆஹ. இதரோ காமங் உபதாபனமலீனபா⁴வகரணவஸேன உபக்கிலேஸோ லோகுத்தரஸ்ஸ நத்தி², விபா³த⁴னட்டோ² பன அத்தே²வ உப்பத்தினிவாரணதோதி அதி⁴ப்பாயேனாஹ ‘‘சதுபூ⁴மகசித்தஸ்ஸா’’தி. சோத³கோ ‘‘தேபூ⁴மகா’’திஆதி³னா அத்தனோ அதி⁴ப்பாயங் விவரதி, இதரோ ‘‘உப்பத்தினிவாரணதோ’’திஆதி³னா. அரியப²லபடிப்பஸ்ஸத்³தி⁴பஹானவஸேன பவத்தியா ‘‘நெக்க²ம்மனின்னந்தி நவலோகுத்தரத⁴ம்மனின்ன’’ந்தி. அபி⁴ஜானித்வாதி அபி⁴முக²பா⁴வேன ஜானித்வா. ஸச்சி²காதப்³பே³ஸூதி பச்சக்க²காதப்³பே³ஸு. ச²ளபி⁴ஞ்ஞாத⁴ம்மேஸூதி அரியமக்³க³ஸம்பயுத்தத⁴ம்மேஸு.
கிலேஸஸங்யுத்தவண்ணனா நிட்டி²தா.