6. மொக்³க³ல்லானஸங்யுத்தங்
1-8. பட²மஜ்ஜா²னபஞ்ஹஸுத்தாதி³வண்ணனா
332-339. காமஸஹக³தேஸு ‘‘காமஸஹக³தாதி பஞ்சனீவரணஸஹக³தா’’தி. நீவரணானஞ்ஹெத்த² நித³ஸ்ஸனமத்தமேதங், யதி³த³ங் காமக்³க³ஹணங். பஹீனாவஸேஸா செத்த² நீவரணா வேதி³தப்³பா³, தஸ்மா பஞ்சக்³க³ஹணங் ந கத்தப்³ப³ங். தஸ்ஸாதி மஹாமொக்³க³ல்லானத்தே²ரஸ்ஸ ஸந்ததோ உபட்ட²ஹிங்ஸு அசிண்ணவஸிதாய. தேனாஹ ‘‘ஹானபா⁴கி³யங் நாம அஹோஸீ’’தி. ஆரம்மண…பே॰… ஸஹக³தந்தி வுத்தங் இதரேஸங் அபா⁴வதோ.
பட²மஜ்ஜா²னபஞ்ஹஸுத்தாதி³வண்ணனா நிட்டி²தா.
9. அனிமித்தபஞ்ஹஸுத்தவண்ணனா
340. விபஸ்ஸனாஸமாதி⁴ங்யேவ, ந ப²லஸமாதி⁴ங். சே²ஜ்ஜகிச்சங் ந நிப்ப²ஜ்ஜதி அவிச்சே²த³வஸேன அப்பவத்தனதோ. நிகந்தீதி விபஸ்ஸனங் அஸ்ஸாதெ³ந்தீ பவத்ததண்ஹா. ஸாதே⁴துங் நாஸக்கி² உபக்கிலிட்ட²த்தா. நிமித்தானுஸாரீதி நிச்சஸுக²அத்தனிமித்தானங் அபூரணதோ ராக³தோ³ஸமோஹனிமித்தானிபெத்த² நிமித்தானேவ. வுட்டா²ன…பே॰… ஸமாதி⁴ந்தி ஏதேன யாவ மக்³கோ³ நாதி⁴க³தோ, தாவ வுட்டா²னகா³மினிவிபஸ்ஸனமனுயுஞ்ஜந்தோபி யதா²ரஹங் அனிமித்தங் அப்பணிஹிதங் ஸுஞ்ஞதங் சேதோஸமாதி⁴ங் அனுயுத்தோ விஹரதீதி வத்தப்³ப³தங் அரஹதீதி த³ஸ்ஸேதி. விபஸ்ஸனாஸம்பயுத்தந்தி விபஸ்ஸனாஸங்கா²தஞாணஸம்பயுத்தங். சேதோஸமாதி⁴ந்தி சித்தஸீஸேன விபஸ்ஸனாஸமாதி⁴மாஹ. உபரிமக்³க³ப²லஸமாதி⁴ந்தி பட²மமக்³க³ஸமாதி⁴ஸ்ஸ பகே³வ அதி⁴க³தத்தா.
அனிமித்தபஞ்ஹஸுத்தவண்ணனா நிட்டி²தா.
10-11. ஸக்கஸுத்தாதி³வண்ணனா
341-342. அவேச்சப்பஸாதே³னாதி ‘‘அசலப்பஸாதே³னா’’தி. அபி⁴ப⁴வந்தி அத்தனோ புஞ்ஞானுபா⁴வேன.
ஸக்கஸுத்தாதி³வண்ணனா நிட்டி²தா.
மொக்³க³ல்லானஸங்யுத்தவண்ணனா நிட்டி²தா.