9. அஸங்க²தஸங்யுத்தங்
1. பட²மவக்³கோ³
1-11. காயக³தாஸதிஸுத்தாதி³வண்ணனா
366-376. அஸங்க²தந்தி ‘‘அகத’’ந்தி. ஹிதங் ஏஸந்தேனாதி மெத்தாயந்தேன. அனுகம்பமானேனாதி கருணாயந்தேன. உபாதா³யாதி ஆதி³யித்வாதி அயமத்தோ²திஆஹ ‘‘சித்தேன பரிக்³க³ஹெத்வா’’தி. அவிபரீதத⁴ம்மதே³ஸனாதி அவிபரீதத⁴ம்மஸ்ஸ தே³ஸனா, படிபத்திம்பி ஸாவகா விய க³ருகோ ப⁴க³வா. தா³யஜ்ஜங் அத்தனோ அதி⁴ட்டி²தங் நிய்யாதேதி.
பி⁴க்கா²ஸம்பத்திகாலாதீ³னங் ஸத்தன்னங் ஸப்பாயானங் ஸம்பத்தியா லப்³ப⁴னகாலே. விபத்திகாலே பன எத்த² வுத்தவிபரியாயேன அத்தோ² வேதி³தப்³போ³. பா⁴ரியந்தி து³க்க²ப³ஹுலதாய தா³ருணங். அம்ஹாகங் ஸந்திகா லத்³த⁴ப்³பா³. தும்ஹாகங் அனுஸாஸனீதி தும்ஹாகங் தா³தப்³பா³ அனுஸாஸனீ.
காயக³தாஸதிஸுத்தாதி³வண்ணனா நிட்டி²தா.
2. து³தியவக்³கோ³
23-33. அஸங்க²தஸுத்தாதி³வண்ணனா
377-409. தத்த² ச நத்தி² எத்த² தண்ஹாஸங்கா²தங் நதங், நத்தி² ஏதஸ்மிங் வா அதி⁴க³தே புக்³க³லபா⁴வோதி அனதங். அனாஸவந்தி எத்தா²பி ஏஸேவ நயோ. ஸச்சத⁴ம்மதாய ஸச்சங். வட்டது³க்க²தோ பாரமேதீதி பாரங். ஸண்ஹட்டே²னாதி ஸுகு²மட்டே²ன நிபுணங். ததோ ஏவ து³த்³த³ஸதாய. அஜஜ்ஜரங் நிச்சஸபா⁴வத்தா. நத்தி² ஏதஸ்ஸ நித³ஸ்ஸனந்தி வா அனித³ஸ்ஸனங். ஏதஸ்மிங் அதி⁴க³தே நத்தி² ஸங்ஸாரே. பபஞ்சந்தி வா நிப்பபஞ்சங்.
ஏதஸ்மிங் அமதங். அதப்பகட்டே²ன வா பணீதங். ஸுக²ஹேதுதாய வா ஸிவங். தண்ஹா கீ²யந்தி எத்தா²தி தண்ஹக்க²யங்.
அஞ்ஞஸ்ஸ தாதி³ஸஸ்ஸ அபா⁴வதோ விம்ஹாபனீயதாய அபூ⁴தமேவாதி. குதோசி பச்சயதோ அனிப்³ப³த்தமேவ ஹுத்வா பூ⁴தங் விஜ்ஜமானங். தேனாஹ ‘‘அஜாதங் ஹுத்வா அத்தீ²’’தி. நத்தி² எத்த² து³க்க²ந்தி நித்³து³க்க²ங், தஸ்ஸ பா⁴வோ நித்³து³க்க²த்தங். தஸ்மா அனீதிகங் ஈதிரஹிதங். வானங் வுச்சதி தண்ஹா, தத³பா⁴வேன நிப்³பா³னங். ப்³யாப³ஜ்ஜ²ங் வுச்சதி து³க்க²ங், தத³பா⁴வேன அப்³யாப³ஜ்ஜ²ங். பரமத்த²தோ ஸச்சதோ ஸுத்³தி⁴பா⁴வேன. காமா ஏவ புது²ஜ்ஜனேஹி அல்லீயிதப்³ப³தோ ஆலயா. ஏஸ நயோ ஸேஸேஸுபி. பதிட்ட²ட்டே²னாதி பதிட்டா²பா⁴வேன வட்டது³க்க²தோ முச்சிதுகாமானங் தீ³பஸதி³ஸங் ஓகே⁴ஹி அனஜ்ஜொ²த்த²ரணீயத்தா. அல்லீயிதப்³ப³யுத்தட்டே²னாதி அல்லீயிதுங் அரஹபா⁴வதோ. தாயனட்டே²னாதி ஸபரதாயனட்டே²ன. ப⁴யஸரணட்டே²னாதி ப⁴யஸ்ஸ ஹிங்ஸனட்டே²ன. ஸெட்ட²ங் உத்தமங். க³தீதி க³ந்த⁴ப்³ப³ட்டா²னங்.
அஸங்க²தஸுத்தாதி³வண்ணனா நிட்டி²தா.
அஸங்க²தஸங்யுத்தவண்ணனா நிட்டி²தா.