10. அப்³யாகதஸங்யுத்தங்
1. கே²மாஸுத்தவண்ணனா
410. பி³ம்பி³ஸாரஸ்ஸ உபாஸிகாதி பி³ம்பி³ஸாரஸ்ஸ ஓரோத⁴பூ⁴தா உபாஸிகா. பண்டி³ச்சங் ஸிக்கி²தபா⁴வேன. வெய்யத்தியங் விஸாரத³பா⁴வேன. விஸாரதா³ நாம திஹேதுகபடிஸந்தி⁴ஸித்³த⁴ஸாபா⁴விகபஞ்ஞா, தாய ஸமன்னாக³தா.
அச்சி²த்³த³கக³ணனாய குஸலோதி நவந்தக³ணனாய குஸலோ. அங்கு³லிமுத்³தா³ய க³ணனாய குஸலோதி அங்கு³லிகாய ஏவ க³ணனாய குஸலோ ஸெய்யதா²பி பாத³ஸிகா. பிண்ட³க³ணனாயாதி ஸங்கலனபடுப்பன்னகாரினோ பிண்ட³வஸேன க³ணனா. ததா²க³தோதி கீ²ணாஸவோ, ததா²க³தங் ஸந்தா⁴ய புச்ச²தீதி கீ²ணாஸவோதி சஸ்ஸ அரஹத்தப²லவஸிபா⁴விதக²ந்தே⁴ உபாதா³ய அயங் பஞ்ஞத்தி ஹோதி. தேஸு க²ந்தே⁴ஸு ஸதி கீ²ணாஸவா ஸத்தஸங்கா²தா ஹொந்தீதி வோஹாரேன பஞ்ஞபேதுங் ஸக்கா ப⁴வெய்ய, அஸந்தேஸு ந ஸக்கா, தஸ்மா பரங் மரணாதி வுத்தத்தா தேஸங் அபா⁴வா ‘‘அப்³யாகதமேத’’ந்தி வுத்தங். யதி³ ஏவங் தேஸங் அபா⁴வதோ ‘‘ந ஹோதி ததா²க³தோ பரங் மரணா’’தி புட்டா²ய ‘‘ஆமா’’தி படிஜானிதப்³பா³ ஸியா, தங் பன ஸத்தஸங்கா²தஸ்ஸ புச்சி²தத்தா ந படிஞ்ஞாதந்தி த³ட்ட²ப்³ப³ங். யேன ரூபேனாதி ஸத்தததா²க³தே வுத்தரூபங் ஸப்³ப³ஞ்ஞுததா²க³தே படிக்கி²பிதுங் ‘‘தங் ரூப’’ந்திஆதி³ வுத்தங். யங் உபாதா³யாதி யங் க²ந்த⁴பஞ்சகங் உபாதா³ய. தத³பா⁴வேனாதி தஸ்ஸ க²ந்த⁴பஞ்சகஸ்ஸ அபா⁴வேன. தஸ்ஸா பஞ்ஞத்தியாதி ஸத்தபஞ்ஞத்தியா அபா⁴வங். நிருத்³த⁴ங் ந நித³ஸ்ஸேதி.
கே²மாய தே²ரியா வுத்தங் பட²மங் ஸுத்தங் ப⁴க³வதோ ஸெட்ட²த்த²தீ³பனதோ அக்³க³பதா³வசரங்வ ஹோதீதி வுத்தங் ‘‘அக்³க³பத³ஸ்மி’’ந்தி.
கே²மாஸுத்தவண்ணனா நிட்டி²தா.
2. அனுராத⁴ஸுத்தவண்ணனா
411. இத⁴ ஸளாயதனவக்³கே³ ஸங்கா³யனவஸேன ஸங்கீ³திகாரேஹி வுத்தங்.
3-8. பட²மஸாரிபுத்தகொட்டி²கஸுத்தாதி³வண்ணனா
412-417. ரூபமத்தந்தி மத்த-ஸத்³தோ³ விஸேஸனிவத்திஅத்தோ². கோ பன ஸோ விஸேஸோதி? யோ பா³ஹிரபரிகப்பிதோ இத⁴ ததா²க³தோதி வுச்சமானோ அத்தா. அனுபலப்³பி⁴யஸபா⁴வோதி அனுபலப்³பி⁴யத்தா.
பட²மஸாரிபுத்தகொட்டி²கஸுத்தாதி³வண்ணனா நிட்டி²தா.
9. குதூஹலஸாலாஸுத்தவண்ணனா
418. நானாவித⁴ந்தி தங்தங்தி³ட்டி²வாத³படிஸங்யுத்தங் அஞ்ஞம்பி வா நானாவித⁴ங் திரச்சா²னகத²ங். ப³ஹூனங் குதூஹலுப்பத்திட்டா²னதோதி யோஜனா. யாவ ஆப⁴ஸ்ஸரப்³ரஹ்மலோகா க³ச்ச²தீதி அக்³கி³னா கப்பவுட்டா²னகாலே க³ச்ச²தி, தங் ஸந்தா⁴ய வுத்தங். இமஞ்ச காயந்தி இமங் ரூபகாயங். சுதிசித்தேன நிக்கி²பதீதி சுதிசித்தேன பி⁴ஜ்ஜமானேன நிக்கி²பதி. சுதிசித்தஸ்ஸ ஹி ஓரங் ஸத்தரஸமஸ்ஸ சித்தஸ்ஸ உப்பாத³க்க²ணே உப்பன்னங் கம்மஜரூபங் சுதிசித்தேன ஸத்³தி⁴ங் நிருஜ்ஜ²தி, ததோ பரங் கம்மஜரூபங் ந உப்பஜ்ஜதி. யதி³ உப்பஜ்ஜெய்ய, மரணங் ந ஸியா, சுதிசித்தங் ரூபங் ந ஸமுட்டா²பேதி, ஆஹாரஜஸ்ஸ ச அஸம்ப⁴வோ ஏவ, உதுஜங் பன வத்ததேவ. யஸ்மா படிஸந்தி⁴க்க²ணே ஸத்தோ அஞ்ஞதரணாய உபபஜ்ஜதி நாம, சுதிக்க²ணே படிஸந்தி⁴சித்தங் அலத்³த⁴ங் அஞ்ஞதரணாய, தஸ்மா வுத்தங் ‘‘சுதிக்க²ணே…பே॰… ஹோதீ’’தி.
குதூஹலஸாலாஸுத்தவண்ணனா நிட்டி²தா.
10. ஆனந்த³ஸுத்தவண்ணனா
419. தேஸங் லத்³தி⁴யாதி தேஸங் ஸஸ்ஸதவாதா³னங் லத்³தி⁴யா ஸத்³தி⁴ங் ஏதங் ‘‘அத்த²த்தா’’தி வசனங் ஏகங் அப⁴விஸ்ஸ. ததோ ஏவ அனுலோமங் தங் நாப⁴விஸ்ஸ ஞாணஸ்ஸாதி அஸாரங் ஏதந்தி அதி⁴ப்பாயோ. அபி நு மேதஸ்ஸாதி மே ஏதஸ்ஸ அனத்தாதி விபஸ்ஸனாஞாணஸ்ஸ அனுலோமங் அபி நு அப⁴விஸ்ஸ, விலோமகமேவ தஸ்ஸ ஸியாதி அத்தோ².
ஆனந்த³ஸுத்தவண்ணனா நிட்டி²தா.
11. ஸபி⁴யகச்சானஸுத்தவண்ணனா
420. யஸ்ஸப’ஸ்ஸாதி
ஸபி⁴யகச்சானஸுத்தவண்ணனா நிட்டி²தா.
அப்³யாகதஸங்யுத்தவண்ணனா நிட்டி²தா.
ஸாரத்த²ப்பகாஸினியா ஸங்யுத்தனிகாய-அட்ட²கதா²ய
ஸளாயதனவக்³க³வண்ணனாய லீனத்த²ப்பகாஸனா ஸமத்தா.