4. இந்த்³ரியஸங்யுத்தங்
1. ஸுத்³தி⁴கவக்³கோ³
1. ஸுத்³தி⁴கஸுத்தங்
471. ஸாவத்தி²னிதா³னங் . ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸத்³தி⁴ந்த்³ரியங், வீரியிந்த்³ரியங், ஸதிந்த்³ரியங், ஸமாதி⁴ந்த்³ரியங், பஞ்ஞிந்த்³ரியங் – இமானி கோ², பி⁴க்க²வே, பஞ்சிந்த்³ரியானீ’’தி. பட²மங்.
2. பட²மஸோதாபன்னஸுத்தங்
472. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸத்³தி⁴ந்த்³ரியங், வீரியிந்த்³ரியங், ஸதிந்த்³ரியங், ஸமாதி⁴ந்த்³ரியங், பஞ்ஞிந்த்³ரியங். யதோ கோ², பி⁴க்க²வே, அரியஸாவகோ இமேஸங் பஞ்சன்னங் இந்த்³ரியானங் அஸ்ஸாத³ஞ்ச ஸமுத³யஞ்ச அத்த²ங்க³மஞ்ச அஸ்ஸாத³ஞ்ச (ஸ்யா॰ கங்॰ பீ॰ க॰) ஸங்॰ நி॰ 2.175 ஆதீ³னவஞ்ச நிஸ்ஸரணஞ்ச யதா²பூ⁴தங் பஜானாதி – அயங் வுச்சதி, பி⁴க்க²வே, அரியஸாவகோ ஸோதாபன்னோ அவினிபாதத⁴ம்மோ நியதோ ஸம்போ³தி⁴பராயணோ’’தி. து³தியங்.
3. து³தியஸோதாபன்னஸுத்தங்
473. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸத்³தி⁴ந்த்³ரியங், வீரியிந்த்³ரியங், ஸதிந்த்³ரியங், ஸமாதி⁴ந்த்³ரியங், பஞ்ஞிந்த்³ரியங். யதோ கோ², பி⁴க்க²வே, அரியஸாவகோ இமேஸங் பஞ்சன்னங் இந்த்³ரியானங் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தங் பஜானாதி – அயங் வுச்சதி, பி⁴க்க²வே, அரியஸாவகோ ஸோதாபன்னோ அவினிபாதத⁴ம்மோ நியதோ ஸம்போ³தி⁴பராயணோ’’தி. ததியங்.
4. பட²மஅரஹந்தஸுத்தங்
474. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸத்³தி⁴ந்த்³ரியங், வீரியிந்த்³ரியங், ஸதிந்த்³ரியங், ஸமாதி⁴ந்த்³ரியங், பஞ்ஞிந்த்³ரியங். யதோ கோ², பி⁴க்க²வே, அரியஸாவகோ இமேஸங் பஞ்சன்னங் இந்த்³ரியானங் அஸ்ஸாத³ஞ்ச ஸமுத³யஞ்ச அத்த²ங்க³மஞ்ச அஸ்ஸாத³ஞ்ச (ஸ்யா॰ கங்॰ பீ॰ க॰) ஸங்॰ நி॰ 2.175 ஆதீ³னவஞ்ச நிஸ்ஸரணஞ்ச யதா²பூ⁴தங் விதி³த்வா அனுபாதா³விமுத்தோ ஹோதி – அயங் வுச்சதி, பி⁴க்க²வே, பி⁴க்கு² அரஹங் கீ²ணாஸவோ வுஸிதவா கதகரணீயோ ஓஹிதபா⁴ரோ அனுப்பத்தஸத³த்தோ² பரிக்கீ²ணப⁴வஸங்யோஜனோ ஸம்மத³ஞ்ஞா விமுத்தோ’’தி. சதுத்த²ங்.
5. து³தியஅரஹந்தஸுத்தங்
475. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸத்³தி⁴ந்த்³ரியங், வீரியிந்த்³ரியங், ஸதிந்த்³ரியங், ஸமாதி⁴ந்த்³ரியங், பஞ்ஞிந்த்³ரியங். யதோ கோ², பி⁴க்க²வே, பி⁴க்கு² இமேஸங் பஞ்சன்னங் இந்த்³ரியானங் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தங் விதி³த்வா அனுபாதா³விமுத்தோ ஹோதி – அயங் வுச்சதி, பி⁴க்க²வே, பி⁴க்கு² அரஹங் கீ²ணாஸவோ வுஸிதவா கதகரணீயோ ஓஹிதபா⁴ரோ அனுப்பத்தஸத³த்தோ² பரிக்கீ²ணப⁴வஸங்யோஜனோ ஸம்மத³ஞ்ஞா விமுத்தோ’’தி. பஞ்சமங்.
6. பட²மஸமணப்³ராஹ்மணஸுத்தங்
476. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸத்³தி⁴ந்த்³ரியங்…பே॰… பஞ்ஞிந்த்³ரியங். யே ஹி கேசி, பி⁴க்க²வே, ஸமணா வா ப்³ராஹ்மணா வா இமேஸங் பஞ்சன்னங் இந்த்³ரியானங் அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தங் நப்பஜானந்தி, ந மே தே, பி⁴க்க²வே, ஸமணா வா ப்³ராஹ்மணா வா ஸமணேஸு வா ஸமணஸம்மதா ப்³ராஹ்மணேஸு வா ப்³ராஹ்மணஸம்மதா, ந ச பனேதே ஆயஸ்மந்தோ ஸாமஞ்ஞத்த²ங் வா ப்³ரஹ்மஞ்ஞத்த²ங் வா தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தி.
‘‘யே ச கோ² கேசி யே ச கோ² தே (ஸ்யா॰ கங்॰ க॰) ஸங்॰ நி॰ 2.174, பி⁴க்க²வே, ஸமணா வா ப்³ராஹ்மணா வா இமேஸங் பஞ்சன்னங் இந்த்³ரியானங் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தங் பஜானந்தி, தே கோ² மே, பி⁴க்க²வே, ஸமணா வா ப்³ராஹ்மணா வா ஸமணேஸு சேவ ஸமணஸம்மதா ப்³ராஹ்மணேஸு ச ப்³ராஹ்மணஸம்மதா; தே ச பனாயஸ்மந்தோ ஸாமஞ்ஞத்த²ஞ்ச ப்³ரஹ்மஞ்ஞத்த²ஞ்ச தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தீ’’தி. ச²ட்ட²ங்.
7. து³தியஸமணப்³ராஹ்மணஸுத்தங்
477. ‘‘யே ஹி கேசி, பி⁴க்க²வே, ஸமணா வா ப்³ராஹ்மணா வா ஸத்³தி⁴ந்த்³ரியங் நப்பஜானந்தி, ஸத்³தி⁴ந்த்³ரியஸமுத³யங் நப்பஜானந்தி, ஸத்³தி⁴ந்த்³ரியனிரோத⁴ங் நப்பஜானந்தி, ஸத்³தி⁴ந்த்³ரியனிரோத⁴கா³மினிங் படிபத³ங் நப்பஜானந்தி; வீரியிந்த்³ரியங் நப்பஜானந்தி…பே॰… ஸதிந்த்³ரியங் நப்பஜானந்தி …பே॰… ஸமாதி⁴ந்த்³ரியங் நப்பஜானந்தி…பே॰… பஞ்ஞிந்த்³ரியங் நப்பஜானந்தி, பஞ்ஞிந்த்³ரியஸமுத³யங் நப்பஜானந்தி, பஞ்ஞிந்த்³ரியனிரோத⁴ங் நப்பஜானந்தி, பஞ்ஞிந்த்³ரியனிரோத⁴கா³மினிங் படிபத³ங் நப்பஜானந்தி, ந மே தே, பி⁴க்க²வே ஸமணா வா ப்³ராஹ்மணா வா ஸமணேஸு வா ஸமணஸம்மதா ப்³ராஹ்மணேஸு வா ப்³ராஹ்மணஸம்மதா, ந ச பனேதே ஆயஸ்மந்தோ ஸாமஞ்ஞத்த²ங் வா ப்³ரஹ்மஞ்ஞத்த²ங் வா தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தி.
‘‘யே ச கோ² கேசி, பி⁴க்க²வே, ஸமணா வா ப்³ராஹ்மணா வா ஸத்³தி⁴ந்த்³ரியங் பஜானந்தி, ஸத்³தி⁴ந்த்³ரியஸமுத³யங் பஜானந்தி, ஸத்³தி⁴ந்த்³ரியனிரோத⁴ங் பஜானந்தி, ஸத்³தி⁴ந்த்³ரியனிரோத⁴கா³மினிங் படிபத³ங் பஜானந்தி; வீரியிந்த்³ரியங் பஜானந்தி, வீரியிந்த்³ரியஸமுத³யங் பஜானந்தி, வீரியிந்த்³ரியனிரோத⁴ங் பஜானந்தி, வீரியிந்த்³ரியனிரோத⁴கா³மினிங் படிபத³ங் பஜானந்தி; ஸதிந்த்³ரியங் பஜானந்தி…பே॰… ஸமாதி⁴ந்த்³ரியங் பஜானந்தி…பே॰… பஞ்ஞிந்த்³ரியங் பஜானந்தி, பஞ்ஞிந்த்³ரியஸமுத³யங் பஜானந்தி, பஞ்ஞிந்த்³ரியனிரோத⁴ங் பஜானந்தி, பஞ்ஞிந்த்³ரியனிரோத⁴கா³மினிங் படிபத³ங் பஜானந்தி , தே கோ² மே, பி⁴க்க²வே, ஸமணா வா ப்³ராஹ்மணா வா ஸமணேஸு சேவ ஸமணஸம்மதா ப்³ராஹ்மணேஸு ச ப்³ராஹ்மணஸம்மதா, தே ச பனாயஸ்மந்தோ ஸாமஞ்ஞத்த²ஞ்ச ப்³ரஹ்மஞ்ஞத்த²ஞ்ச தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தீ’’தி. ஸத்தமங்.
8. த³ட்ட²ப்³ப³ஸுத்தங்
478. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸத்³தி⁴ந்த்³ரியங்…பே॰… பஞ்ஞிந்த்³ரியங். கத்த² ச, பி⁴க்க²வே, ஸத்³தி⁴ந்த்³ரியங் த³ட்ட²ப்³ப³ங்? சதூஸு ஸோதாபத்தியங்கே³ஸு – எத்த² ஸத்³தி⁴ந்த்³ரியங் த³ட்ட²ப்³ப³ங். கத்த² ச, பி⁴க்க²வே, வீரியிந்த்³ரியங் த³ட்ட²ப்³ப³ங்? சதூஸு ஸம்மப்பதா⁴னேஸு – எத்த² வீரியிந்த்³ரியங் த³ட்ட²ப்³ப³ங். கத்த² ச, பி⁴க்க²வே, ஸதிந்த்³ரியங் த³ட்ட²ப்³ப³ங்? சதூஸு ஸதிபட்டா²னேஸு – எத்த² ஸதிந்த்³ரியங் த³ட்ட²ப்³ப³ங். கத்த² ச, பி⁴க்க²வே, ஸமாதி⁴ந்த்³ரியங் த³ட்ட²ப்³ப³ங்? சதூஸு ஜா²னேஸு – எத்த² ஸமாதி⁴ந்த்³ரியங் த³ட்ட²ப்³ப³ங். கத்த² ச, பி⁴க்க²வே, பஞ்ஞிந்த்³ரியங் த³ட்ட²ப்³ப³ங்? சதூஸு அரியஸச்சேஸு – எத்த² பஞ்ஞிந்த்³ரியங் த³ட்ட²ப்³ப³ங். இமானி கோ², பி⁴க்க²வே, பஞ்சிந்த்³ரியானீ’’தி. அட்ட²மங்.
9. பட²மவிப⁴ங்க³ஸுத்தங்
479. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸத்³தி⁴ந்த்³ரியங்…பே॰… பஞ்ஞிந்த்³ரியங். கதமஞ்ச, பி⁴க்க²வே, ஸத்³தி⁴ந்த்³ரியங்? இத⁴, பி⁴க்க²வே, அரியஸாவகோ ஸத்³தோ⁴ ஹோதி, ஸத்³த³ஹதி ததா²க³தஸ்ஸ போ³தி⁴ங் – ‘இதிபி ஸோ ப⁴க³வா அரஹங் ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி² ஸத்தா² தே³வமனுஸ்ஸானங் பு³த்³தோ⁴ ப⁴க³வா’தி – இத³ங் வுச்சதி, பி⁴க்க²வே, ஸத்³தி⁴ந்த்³ரியங்.
‘‘கதமஞ்ச, பி⁴க்க²வே, வீரியிந்த்³ரியங்? இத⁴, பி⁴க்க²வே, அரியஸாவகோ ஆரத்³த⁴வீரியோ விஹரதி அகுஸலானங் த⁴ம்மானங் பஹானாய, குஸலானங் த⁴ம்மானங் உபஸம்பதா³ய, தா²மவா த³ள்ஹபரக்கமோ அனிக்கி²த்தது⁴ரோ குஸலேஸு த⁴ம்மேஸு – இத³ங் வுச்சதி, பி⁴க்க²வே, வீரியிந்த்³ரியங்.
‘‘கதமஞ்ச, பி⁴க்க²வே, ஸதிந்த்³ரியங்? இத⁴, பி⁴க்க²வே, அரியஸாவகோ ஸதிமா ஹோதி பரமேன ஸதினேபக்கேன ஸமன்னாக³தோ சிரகதம்பி சிரபா⁴ஸிதம்பி ஸரிதா அனுஸ்ஸரிதா – இத³ங் வுச்சதி, பி⁴க்க²வே, ஸதிந்த்³ரியங்.
‘‘கதமஞ்ச, பி⁴க்க²வே, ஸமாதி⁴ந்த்³ரியங்? இத⁴, பி⁴க்க²வே, அரியஸாவகோ வொஸ்ஸக்³கா³ரம்மணங் கரித்வா லப⁴தி ஸமாதி⁴ங், லப⁴தி சித்தஸ்ஸ ஏகக்³க³தங் – இத³ங் வுச்சதி, பி⁴க்க²வே, ஸமாதி⁴ந்த்³ரியங்.
‘‘கதமஞ்ச, பி⁴க்க²வே, பஞ்ஞிந்த்³ரியங்? இத⁴, பி⁴க்க²வே, அரியஸாவகோ பஞ்ஞவா ஹோதி உத³யத்த²கா³மினியா பஞ்ஞாய ஸமன்னாக³தோ அரியாய நிப்³பே³தி⁴காய, ஸம்மா து³க்க²க்க²யகா³மினியா – இத³ங் வுச்சதி, பி⁴க்க²வே, பஞ்ஞிந்த்³ரியங். இமானி கோ², பி⁴க்க²வே, பஞ்சிந்த்³ரியானீ’’தி. நவமங்.
10. து³தியவிப⁴ங்க³ஸுத்தங்
480. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸத்³தி⁴ந்த்³ரியங்…பே॰… பஞ்ஞிந்த்³ரியங். கதமஞ்ச, பி⁴க்க²வே, ஸத்³தி⁴ந்த்³ரியங்? இத⁴, பி⁴க்க²வே, அரியஸாவகோ ஸத்³தோ⁴ ஹோதி, ஸத்³த³ஹதி ததா²க³தஸ்ஸ போ³தி⁴ங் – ‘இதிபி ஸோ ப⁴க³வா அரஹங் ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி² ஸத்தா² தே³வமனுஸ்ஸானங் பு³த்³தோ⁴ ப⁴க³வா’தி – இத³ங் வுச்சதி, பி⁴க்க²வே, ஸத்³தி⁴ந்த்³ரியங்.
‘‘கதமஞ்ச , பி⁴க்க²வே, வீரியிந்த்³ரியங்? இத⁴, பி⁴க்க²வே, அரியஸாவகோ ஆரத்³த⁴வீரியோ விஹரதி அகுஸலானங் த⁴ம்மானங் பஹானாய, குஸலானங் த⁴ம்மானங் உபஸம்பதா³ய, தா²மவா த³ள்ஹபரக்கமோ அனிக்கி²த்தது⁴ரோ குஸலேஸு த⁴ம்மேஸு. ஸோ அனுப்பன்னானங் பாபகானங் அகுஸலானங் த⁴ம்மானங் அனுப்பாதா³ய ச²ந்த³ங் ஜனேதி வாயமதி வீரியங் ஆரப⁴தி சித்தங் பக்³க³ண்ஹாதி பத³ஹதி; உப்பன்னானங் பாபகானங் அகுஸலானங் த⁴ம்மானங் பஹானாய ச²ந்த³ங் ஜனேதி வாயமதி வீரியங் ஆரப⁴தி சித்தங் பக்³க³ண்ஹாதி பத³ஹதி; அனுப்பன்னானங் குஸலானங் த⁴ம்மானங் உப்பாதா³ய ச²ந்த³ங் ஜனேதி வாயமதி வீரியங் ஆரப⁴தி சித்தங் பக்³க³ண்ஹாதி பத³ஹதி; உப்பன்னானங் குஸலானங் த⁴ம்மானங் டி²தியா ஸமாபத்தியா (ஸ்யா॰ கங்॰ க॰) அஸம்மோஸாய பி⁴ய்யோபா⁴வாய வேபுல்லாய பா⁴வனாய பாரிபூரியா ச²ந்த³ங் ஜனேதி வாயமதி வீரியங் ஆரப⁴தி சித்தங் பக்³க³ண்ஹாதி பத³ஹதி – இத³ங் வுச்சதி, பி⁴க்க²வே, வீரியிந்த்³ரியங்.
‘‘கதமஞ்ச , பி⁴க்க²வே, ஸதிந்த்³ரியங்? இத⁴, பி⁴க்க²வே, அரியஸாவகோ ஸதிமா ஹோதி பரமேன ஸதினேபக்கேன ஸமன்னாக³தோ, சிரகதம்பி சிரபா⁴ஸிதம்பி ஸரிதா அனுஸ்ஸரிதா. ஸோ காயே காயானுபஸ்ஸீ விஹரதி ஆதாபீ ஸம்பஜானோ ஸதிமா, வினெய்ய லோகே அபி⁴ஜ்ஜா²தோ³மனஸ்ஸங்; வேத³னாஸு…பே॰… சித்தே…பே॰… த⁴ம்மேஸு த⁴ம்மானுபஸ்ஸீ விஹரதி ஆதாபீ ஸம்பஜானோ ஸதிமா, வினெய்ய லோகே அபி⁴ஜ்ஜா²தோ³மனஸ்ஸங் – இத³ங் வுச்சதி, பி⁴க்க²வே, ஸதிந்த்³ரியங்.
‘‘கதமஞ்ச, பி⁴க்க²வே, ஸமாதி⁴ந்த்³ரியங்? இத⁴, பி⁴க்க²வே, அரியஸாவகோ வொஸ்ஸக்³கா³ரம்மணங் கரித்வா லப⁴தி ஸமாதி⁴ங், லப⁴தி சித்தஸ்ஸ ஏகக்³க³தங். ஸோ விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கங் ஸவிசாரங் விவேகஜங் பீதிஸுக²ங் பட²மங் ஜா²னங் உபஸம்பஜ்ஜ விஹரதி. விதக்கவிசாரானங் வூபஸமா அஜ்ஜ²த்தங் ஸம்பஸாத³னங் சேதஸோ ஏகோதி³பா⁴வங் அவிதக்கங் அவிசாரங் ஸமாதி⁴ஜங் பீதிஸுக²ங் து³தியங் ஜா²னங் உபஸம்பஜ்ஜ விஹரதி. பீதியா ச விராகா³ உபெக்க²கோ ச விஹரதி ஸதோ ச ஸம்பஜானோ ஸுக²ஞ்ச காயேன படிஸங்வேதே³தி யங் தங் அரியா ஆசிக்க²ந்தி ‘உபெக்க²கோ ஸதிமா ஸுக²விஹாரீ’தி ததியங் ஜா²னங் உபஸம்பஜ்ஜ விஹரதி. ஸுக²ஸ்ஸ ச பஹானா து³க்க²ஸ்ஸ ச பஹானா புப்³பே³வ ஸோமனஸ்ஸதோ³மனஸ்ஸானங் அத்த²ங்க³மா அது³க்க²மஸுக²ங் உபெக்கா²ஸதிபாரிஸுத்³தி⁴ங் சதுத்த²ங் ஜா²னங் உபஸம்பஜ்ஜ விஹரதி – இத³ங் வுச்சதி, பி⁴க்க²வே, ஸமாதி⁴ந்த்³ரியங்.
‘‘கதமஞ்ச , பி⁴க்க²வே, பஞ்ஞிந்த்³ரியங்? இத⁴, பி⁴க்க²வே, அரியஸாவகோ பஞ்ஞவா ஹோதி உத³யத்த²கா³மினியா பஞ்ஞாய ஸமன்னாக³தோ அரியாய நிப்³பே³தி⁴காய, ஸம்மா து³க்க²க்க²யகா³மினியா. ஸோ ‘இத³ங் து³க்க²’ந்தி யதா²பூ⁴தங் பஜானாதி, ‘அயங் து³க்க²ஸமுத³யோ’தி யதா²பூ⁴தங் பஜானாதி, ‘அயங் து³க்க²னிரோதோ⁴’தி யதா²பூ⁴தங் பஜானாதி, ‘அயங் து³க்க²னிரோத⁴கா³மினீ படிபதா³’தி யதா²பூ⁴தங் பஜானாதி – இத³ங் வுச்சதி, பி⁴க்க²வே, பஞ்ஞிந்த்³ரியங். இமானி கோ², பி⁴க்க²வே, பஞ்சிந்த்³ரியானீ’’தி. த³ஸமங்.
ஸுத்³தி⁴கவக்³கோ³ பட²மோ.
தஸ்ஸுத்³தா³னங் –
ஸுத்³தி⁴கஞ்சேவ த்³வே ஸோதா, அரஹந்தா அபரே து³வே;
ஸமணப்³ராஹ்மணா த³ட்ட²ப்³ப³ங், விப⁴ங்கா³ அபரே து³வேதி.
2. முது³தரவக்³கோ³
1. படிலாப⁴ஸுத்தங்
481. ‘‘பஞ்சிமானி , பி⁴க்க²வே, இந்த்³ரியானி. கதமானி பஞ்ச? ஸத்³தி⁴ந்த்³ரியங்…பே॰… பஞ்ஞிந்த்³ரியங்…பே॰…. கதமஞ்ச, பி⁴க்க²வே, ஸத்³தி⁴ந்த்³ரியங்? இத⁴, பி⁴க்க²வே, அரியஸாவகோ ஸத்³தோ⁴ ஹோதி, ஸத்³த³ஹதி ததா²க³தஸ்ஸ போ³தி⁴ங் – ‘இதிபி ஸோ ப⁴க³வா அரஹங் ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி² ஸத்தா² தே³வமனுஸ்ஸானங் பு³த்³தோ⁴ ப⁴க³வா’தி – இத³ங் வுச்சதி, பி⁴க்க²வே, ஸத்³தி⁴ந்த்³ரியங்.
‘‘கதமஞ்ச, பி⁴க்க²வே, வீரியிந்த்³ரியங்? யங் கோ², பி⁴க்க²வே, சத்தாரோ ஸம்மப்பதா⁴னே ஆரப்³ப⁴ வீரியங் படிலப⁴தி – இத³ங் வுச்சதி, பி⁴க்க²வே, வீரியிந்த்³ரியங்.
‘‘கதமஞ்ச , பி⁴க்க²வே, ஸதிந்த்³ரியங்? யங் கோ², பி⁴க்க²வே, சத்தாரோ ஸதிபட்டா²னே ஆரப்³ப⁴ ஸதிங் படிலப⁴தி – இத³ங் வுச்சதி, பி⁴க்க²வே, ஸதிந்த்³ரியங்.
‘‘கதமஞ்ச, பி⁴க்க²வே, ஸமாதி⁴ந்த்³ரியங்? இத⁴, பி⁴க்க²வே, அரியஸாவகோ வொஸ்ஸக்³கா³ரம்மணங் கரித்வா லப⁴தி ஸமாதி⁴ங், லப⁴தி சித்தஸ்ஸ ஏகக்³க³தங் – இத³ங் வுச்சதி, பி⁴க்க²வே, ஸமாதி⁴ந்த்³ரியங்.
‘‘கதமஞ்ச, பி⁴க்க²வே, பஞ்ஞிந்த்³ரியங்? இத⁴, பி⁴க்க²வே, அரியஸாவகோ பஞ்ஞவா ஹோதி உத³யத்த²கா³மினியா பஞ்ஞாய ஸமன்னாக³தோ அரியாய நிப்³பே³தி⁴காய ஸம்மா து³க்க²க்க²யகா³மினியா – இத³ங் வுச்சதி, பி⁴க்க²வே, பஞ்ஞிந்த்³ரியங். இமானி கோ², பி⁴க்க²வே, பஞ்சிந்த்³ரியானீ’’தி. பட²மங்.
2. பட²மஸங்கி²த்தஸுத்தங்
482. ‘‘பஞ்சிமானி , பி⁴க்க²வே, இந்த்³ரியானி. கதமானி பஞ்ச? ஸத்³தி⁴ந்த்³ரியங்…பே॰… பஞ்ஞிந்த்³ரியங் – இமானி கோ², பி⁴க்க²வே, பஞ்சிந்த்³ரியானி. இமேஸங் கோ², பி⁴க்க²வே, பஞ்சன்னங் இந்த்³ரியானங் ஸமத்தா பரிபூரத்தா அரஹங் ஹோதி, ததோ முது³தரேஹி அனாகா³மீ ஹோதி, ததோ முது³தரேஹி ஸகதா³கா³மீ ஹோதி, ததோ முது³தரேஹி ஸோதாபன்னோ ஹோதி, ததோ முது³தரேஹி த⁴ம்மானுஸாரீ ஹோதி, ததோ முது³தரேஹி ஸத்³தா⁴னுஸாரீ ஹோதீ’’தி. து³தியங்.
3. து³தியஸங்கி²த்தஸுத்தங்
483. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸத்³தி⁴ந்த்³ரியங்…பே॰… பஞ்ஞிந்த்³ரியங் – இமானி கோ², பி⁴க்க²வே, பஞ்சிந்த்³ரியானி. இமேஸங் கோ², பி⁴க்க²வே, பஞ்சன்னங் இந்த்³ரியானங் ஸமத்தா பரிபூரத்தா அரஹங் ஹோதி, ததோ முது³தரேஹி அனாகா³மீ ஹோதி, ததோ முது³தரேஹி ஸகதா³கா³மீ ஹோதி, ததோ முது³தரேஹி ஸோதாபன்னோ ஹோதி, ததோ முது³தரேஹி த⁴ம்மானுஸாரீ ஹோதி, ததோ முது³தரேஹி ஸத்³தா⁴னுஸாரீ ஹோதி. இதி கோ², பி⁴க்க²வே, இந்த்³ரியவேமத்ததா ப²லவேமத்ததா ஹோதி, ப²லவேமத்ததா புக்³க³லவேமத்ததா’’தி. ததியங்.
4. ததியஸங்கி²த்தஸுத்தங்
484. ‘‘பஞ்சிமானி , பி⁴க்க²வே, இந்த்³ரியானி. கதமானி பஞ்ச? ஸத்³தி⁴ந்த்³ரியங்…பே॰… பஞ்ஞிந்த்³ரியங் – இமானி கோ², பி⁴க்க²வே, பஞ்சிந்த்³ரியானி. இமேஸங் கோ², பி⁴க்க²வே, பஞ்சன்னங் இந்த்³ரியானங் ஸமத்தா பரிபூரத்தா அரஹங் ஹோதி, ததோ முது³தரேஹி அனாகா³மீ ஹோதி, ததோ முது³தரேஹி ஸகதா³கா³மீ ஹோதி, ததோ முது³தரேஹி ஸோதாபன்னோ ஹோதி, ததோ முது³தரேஹி த⁴ம்மானுஸாரீ ஹோதி, ததோ முது³தரேஹி ஸத்³தா⁴னுஸாரீ ஹோதி. இதி கோ², பி⁴க்க²வே, பரிபூரங் பரிபூரகாரீ ஆராதே⁴தி, பதே³ஸங் பதே³ஸகாரீ ஆராதே⁴தி. ‘அவஞ்ஜா²னி த்வேவாஹங், பி⁴க்க²வே, பஞ்சிந்த்³ரியானீ’தி வதா³மீ’’தி. சதுத்த²ங்.
5. பட²மவித்தா²ரஸுத்தங்
485. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸத்³தி⁴ந்த்³ரியங்…பே॰… பஞ்ஞிந்த்³ரியங் – இமானி கோ², பி⁴க்க²வே, பஞ்சிந்த்³ரியானி. இமேஸங் கோ², பி⁴க்க²வே, பஞ்சன்னங் இந்த்³ரியானங் ஸமத்தா பரிபூரத்தா அரஹங் ஹோதி, ததோ முது³தரேஹி அந்தராபரினிப்³பா³யீ ஹோதி, ததோ முது³தரேஹி உபஹச்சபரினிப்³பா³யீ ஹோதி, ததோ முது³தரேஹி அஸங்கா²ரபரினிப்³பா³யீ ஹோதி, ததோ முது³தரேஹி ஸஸங்கா²ரபரினிப்³பா³யீ ஹோதி, ததோ முது³தரேஹி உத்³த⁴ங்ஸோதோ ஹோதி அகனிட்ட²கா³மீ, ததோ முது³தரேஹி ஸகதா³கா³மீ ஹோதி, ததோ முது³தரேஹி ஸோதாபன்னோ ஹோதி, ததோ முது³தரேஹி த⁴ம்மானுஸாரீ ஹோதி, ததோ முது³தரேஹி ஸத்³தா⁴னுஸாரீ ஹோதீ’’தி. பஞ்சமங்.
6. து³தியவித்தா²ரஸுத்தங்
486. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸத்³தி⁴ந்த்³ரியங்…பே॰… பஞ்ஞிந்த்³ரியங் – இமானி கோ², பி⁴க்க²வே, பஞ்சிந்த்³ரியானி. இமேஸங் கோ², பி⁴க்க²வே, பஞ்சன்னங் இந்த்³ரியானங் ஸமத்தா பரிபூரத்தா அரஹங் ஹோதி, ததோ முது³தரேஹி அந்தராபரினிப்³பா³யீ ஹோதி, ததோ முது³தரேஹி உபஹச்சபரினிப்³பா³யீ ஹோதி, ததோ முது³தரேஹி அஸங்கா²ரபரினிப்³பா³யீ ஹோதி, ததோ முது³தரேஹி ஸஸங்கா²ரபரினிப்³பா³யீ ஹோதி, ததோ முது³தரேஹி உத்³த⁴ங்ஸோதோ ஹோதி அகனிட்ட²கா³மீ, ததோ முது³தரேஹி ஸகதா³கா³மீ ஹோதி , ததோ முது³தரேஹி ஸோதாபன்னோ ஹோதி, ததோ முது³தரேஹி த⁴ம்மானுஸாரீ ஹோதி, ததோ முது³தரேஹி ஸத்³தா⁴னுஸாரீ ஹோதி. இதி கோ², பி⁴க்க²வே, இந்த்³ரியவேமத்ததா ப²லவேமத்ததா ஹோதி, ப²லவேமத்ததா புக்³க³லவேமத்ததா ஹோதீ’’தி. ச²ட்ட²ங்.
7. ததியவித்தா²ரஸுத்தங்
487. ‘‘பஞ்சிமானி , பி⁴க்க²வே, இந்த்³ரியானி. கதமானி பஞ்ச? ஸத்³தி⁴ந்த்³ரியங்…பே॰… பஞ்ஞிந்த்³ரியங் – இமானி கோ², பி⁴க்க²வே, பஞ்சிந்த்³ரியானி. இமேஸங் கோ², பி⁴க்க²வே, பஞ்சன்னங் இந்த்³ரியானங் ஸமத்தா பரிபூரத்தா அரஹங் ஹோதி, ததோ முது³தரேஹி அந்தராபரினிப்³பா³யீ ஹோதி, ததோ முது³தரேஹி உபஹச்சபரினிப்³பா³யீ ஹோதி, ததோ முது³தரேஹி அஸங்கா²ரபரினிப்³பா³யீ ஹோதி, ததோ முது³தரேஹி ஸஸங்கா²ரபரினிப்³பா³யீ ஹோதி, ததோ முது³தரேஹி உத்³த⁴ங்ஸோதோ ஹோதி அகனிட்ட²கா³மீ, ததோ முது³தரேஹி ஸகதா³கா³மீ ஹோதி, ததோ முது³தரேஹி ஸோதாபன்னோ ஹோதி, ததோ முது³தரேஹி த⁴ம்மானுஸாரீ ஹோதி, ததோ முது³தரேஹி ஸத்³தா⁴னுஸாரீ ஹோதி. இதி கோ², பி⁴க்க²வே, பரிபூரங் பரிபூரகாரீ ஆராதே⁴தி, பதே³ஸங் பதே³ஸகாரீ ஆராதே⁴தி. ‘அவஞ்ஜா²னி த்வேவாஹங், பி⁴க்க²வே, பஞ்சிந்த்³ரியானீ’தி வதா³மீ’’தி. ஸத்தமங்.
8. படிபன்னஸுத்தங்
488. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸத்³தி⁴ந்த்³ரியங்…பே॰… பஞ்ஞிந்த்³ரியங் – இமானி கோ², பி⁴க்க²வே, பஞ்சிந்த்³ரியானி. இமேஸங் கோ², பி⁴க்க²வே, பஞ்சன்னங் இந்த்³ரியானங் ஸமத்தா பரிபூரத்தா அரஹங் ஹோதி, ததோ முது³தரேஹி அரஹத்தப²லஸச்சி²கிரியாய படிபன்னோ ஹோதி, ததோ முது³தரேஹி அனாகா³மீ ஹோதி, ததோ முது³தரேஹி அனாகா³மிப²லஸச்சி²கிரியாய படிபன்னோ ஹோதி, ததோ முது³தரேஹி ஸகதா³கா³மீ ஹோதி, ததோ முது³தரேஹி ஸகதா³கா³மிப²லஸச்சி²கிரியாய படிபன்னோ ஹோதி, ததோ முது³தரேஹி ஸோதாபன்னோ ஹோதி, ததோ முது³தரேஹி ஸோதாபத்திப²லஸச்சி²கிரியாய படிபன்னோ ஹோதி. யஸ்ஸ கோ², பி⁴க்க²வே, இமானி பஞ்சிந்த்³ரியானி ஸப்³பே³ன ஸப்³ப³ங் ஸப்³ப³தா² ஸப்³ப³ங் நத்தி², தமஹங் ‘பா³ஹிரோ புது²ஜ்ஜனபக்கே² டி²தோ’தி வதா³மீ’’தி. அட்ட²மங்.
9. ஸம்பன்னஸுத்தங்
489. அத² கோ² அஞ்ஞதரோ பி⁴க்கு² யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஸோ பி⁴க்கு² ப⁴க³வந்தங் ஏதத³வோச –
‘‘‘இந்த்³ரியஸம்பன்னோ, இந்த்³ரியஸம்பன்னோ’தி, ப⁴ந்தே, வுச்சதி. கித்தாவதா நு கோ², ப⁴ந்தே, இந்த்³ரியஸம்பன்னோ ஹோதீ’’தி? ‘‘இத⁴ , பி⁴க்கு², பி⁴க்கு² ஸத்³தி⁴ந்த்³ரியங் பா⁴வேதி உபஸமகா³மிங் ஸம்போ³த⁴கா³மிங், வீரியிந்த்³ரியங் பா⁴வேதி உபஸமகா³மிங் ஸம்போ³த⁴கா³மிங், ஸதிந்த்³ரியங் பா⁴வேதி உபஸமகா³மிங் ஸம்போ³த⁴கா³மிங் , ஸமாதி⁴ந்த்³ரியங் பா⁴வேதி உபஸமகா³மிங் ஸம்போ³த⁴கா³மிங், பஞ்ஞிந்த்³ரியங் பா⁴வேதி உபஸமகா³மிங் ஸம்போ³த⁴கா³மிங். எத்தாவதா கோ², பி⁴க்கு², பி⁴க்கு² இந்த்³ரியஸம்பன்னோ ஹோதீ’’தி. நவமங்.
10. ஆஸவக்க²யஸுத்தங்
490. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸத்³தி⁴ந்த்³ரியங்…பே॰… பஞ்ஞிந்த்³ரியங் – இமானி கோ², பி⁴க்க²வே, பஞ்சிந்த்³ரியானி. இமேஸங் கோ², பி⁴க்க²வே, பஞ்சன்னங் இந்த்³ரியானங் பா⁴விதத்தா ப³ஹுலீகதத்தா பி⁴க்கு² ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரதீ’’தி. த³ஸமங்.
முது³தரவக்³கோ³ து³தியோ.
தஸ்ஸுத்³தா³னங் –
படிலாபோ⁴ தயோ ஸங்கி²த்தா, வித்தா²ரா அபரே தயோ;
படிபன்னோ ச ஸம்பன்னோ படிபன்னோ சூபஸமோ (ஸ்யா॰ கங்॰ பீ॰ க॰), த³ஸமங் ஆஸவக்க²யந்தி.
3. ச²ளிந்த்³ரியவக்³கோ³
1. புனப்³ப⁴வஸுத்தங்
491. ‘‘பஞ்சிமானி , பி⁴க்க²வே, இந்த்³ரியானி. கதமானி பஞ்ச? ஸத்³தி⁴ந்த்³ரியங்…பே॰… பஞ்ஞிந்த்³ரியங். யாவகீவஞ்சாஹங், பி⁴க்க²வே, இமேஸங் பஞ்சன்னங் இந்த்³ரியானங் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தங் நாப்³ப⁴ஞ்ஞாஸிங், நேவ தாவாஹங், பி⁴க்க²வே, ஸதே³வகே லோகே ஸமாரகே ஸப்³ரஹ்மகே ஸஸ்ஸமணப்³ராஹ்மணியா பஜாய ஸதே³வமனுஸ்ஸாய ‘அனுத்தரங் ஸம்மாஸம்போ³தி⁴ங் அபி⁴ஸம்பு³த்³தோ⁴’தி பச்சஞ்ஞாஸிங் அபி⁴ஸம்பு³த்³தோ⁴ பச்சஞ்ஞாஸிங் (ஸீ॰ ஸ்யா॰ கங்॰). யதோ ச க்²வாஹங், பி⁴க்க²வே, இமேஸங் பஞ்சன்னங் இந்த்³ரியானங் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தங் அப்³ப⁴ஞ்ஞாஸிங், அதா²ஹங், பி⁴க்க²வே, ஸதே³வகே லோகே ஸமாரகே ஸப்³ரஹ்மகே ஸஸ்ஸமணப்³ராஹ்மணியா பஜாய ஸதே³வமனுஸ்ஸாய ‘அனுத்தரங் ஸம்மாஸம்போ³தி⁴ங் அபி⁴ஸம்பு³த்³தோ⁴’தி பச்சஞ்ஞாஸிங். ஞாணஞ்ச பன மே த³ஸ்ஸனங் உத³பாதி³ – ‘அகுப்பா மே விமுத்தி சேதோவிமுத்தி (ஸீ॰ பீ॰ க॰), அயமந்திமா ஜாதி, நத்தி²தா³னி புனப்³ப⁴வோ’’’தி. பட²மங்.
2. ஜீவிதிந்த்³ரியஸுத்தங்
492. ‘‘தீணிமானி , பி⁴க்க²வே, இந்த்³ரியானி. கதமானி தீணி? இத்தி²ந்த்³ரியங், புரிஸிந்த்³ரியங், ஜீவிதிந்த்³ரியங் – இமானி கோ², பி⁴க்க²வே, தீணி இந்த்³ரியானீ’’தி. து³தியங்.
3. அஞ்ஞிந்த்³ரியஸுத்தங்
493. ‘‘தீணிமானி, பி⁴க்க²வே, இந்த்³ரியானி. கதமானி தீணி? அனஞ்ஞாதஞ்ஞஸ்ஸாமீதிந்த்³ரியங் , அஞ்ஞிந்த்³ரியங், அஞ்ஞாதாவிந்த்³ரியங் – இமானி கோ², பி⁴க்க²வே, தீணி இந்த்³ரியானீ’’தி. ததியங்.
4. ஏகபீ³ஜீஸுத்தங்
494. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸத்³தி⁴ந்த்³ரியங்…பே॰… பஞ்ஞிந்த்³ரியங் – இமானி கோ², பி⁴க்க²வே, பஞ்சிந்த்³ரியானி. இமேஸங் கோ², பி⁴க்க²வே, பஞ்சன்னங் இந்த்³ரியானங் ஸமத்தா பரிபூரத்தா அரஹங் ஹோதி, ததோ முது³தரேஹி அந்தராபரினிப்³பா³யீ ஹோதி, ததோ முது³தரேஹி உபஹச்சபரினிப்³பா³யீ ஹோதி, ததோ முது³தரேஹி அஸங்கா²ரபரினிப்³பா³யீ ஹோதி, ததோ முது³தரேஹி ஸஸங்கா²ரபரினிப்³பா³யீ ஹோதி, ததோ முது³தரேஹி உத்³த⁴ங்ஸோதோ ஹோதி அகனிட்ட²கா³மீ, ததோ முது³தரேஹி ஸகதா³கா³மீ ஹோதி, ததோ முது³தரேஹி ஏகபீ³ஜீ ஏகபீ³ஜி (க॰) ஹோதி, ததோ முது³தரேஹி கோலங்கோலோ ஹோதி, ததோ முது³தரேஹி ஸத்தக்க²த்துபரமோ ஹோதி, ததோ முது³தரேஹி த⁴ம்மானுஸாரீ ஹோதி, ததோ முது³தரேஹி ஸத்³தா⁴னுஸாரீ ஹோதீ’’தி. சதுத்த²ங்.
5. ஸுத்³த⁴கஸுத்தங்
495. ‘‘ச²யிமானி, பி⁴க்க²வே, இந்த்³ரியானி. கதமானி ச²? சக்கு²ந்த்³ரியங், ஸோதிந்த்³ரியங், கா⁴னிந்த்³ரியங் , ஜிவ்ஹிந்த்³ரியங், காயிந்த்³ரியங், மனிந்த்³ரியங் – இமானி கோ², பி⁴க்க²வே, ச² இந்த்³ரியானீ’’தி. பஞ்சமங்.
6. ஸோதாபன்னஸுத்தங்
496. ‘‘ச²யிமானி, பி⁴க்க²வே, இந்த்³ரியானி. கதமானி ச²? சக்கு²ந்த்³ரியங்…பே॰… மனிந்த்³ரியங். யதோ கோ², பி⁴க்க²வே, அரியஸாவகோ இமேஸங் ச²ன்னங் இந்த்³ரியானங் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தங் பஜானாதி – அயங் வுச்சதி, பி⁴க்க²வே, அரியஸாவகோ ஸோதாபன்னோ அவினிபாதத⁴ம்மோ நியதோ ஸம்போ³தி⁴பராயணோ’’தி. ச²ட்ட²ங்.
7. அரஹந்தஸுத்தங்
497. ‘‘ச²யிமானி , பி⁴க்க²வே, இந்த்³ரியானி. கதமானி ச²? சக்கு²ந்த்³ரியங், ஸோதிந்த்³ரியங், கா⁴னிந்த்³ரியங், ஜிவ்ஹிந்த்³ரியங், காயிந்த்³ரியங், மனிந்த்³ரியங். யதோ கோ², பி⁴க்க²வே, பி⁴க்கு² இமேஸங் ச²ன்னங் இந்த்³ரியானங் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தங் விதி³த்வா அனுபாதா³விமுத்தோ ஹோதி – அயங் வுச்சதி, பி⁴க்க²வே, ‘பி⁴க்கு² அரஹங் கீ²ணாஸவோ வுஸிதவா கதகரணீயோ ஓஹிதபா⁴ரோ அனுப்பத்தஸத³த்தோ² பரிக்கீ²ணப⁴வஸங்யோஜனோ ஸம்மத³ஞ்ஞா விமுத்தோ’’’தி. ஸத்தமங்.
8. ஸம்பு³த்³த⁴ஸுத்தங்
498. ‘‘ச²யிமானி, பி⁴க்க²வே, இந்த்³ரியானி. கதமானி ச²? சக்கு²ந்த்³ரியங், ஸோதிந்த்³ரியங், கா⁴னிந்த்³ரியங், ஜிவ்ஹிந்த்³ரியங், காயிந்த்³ரியங், மனிந்த்³ரியங். யாவகீவஞ்சாஹங் , பி⁴க்க²வே, இமேஸங் ச²ன்னங் இந்த்³ரியானங் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தங் நாப்³ப⁴ஞ்ஞாஸிங், நேவ தாவாஹங், பி⁴க்க²வே, ஸதே³வகே லோகே ஸமாரகே ஸப்³ரஹ்மகே ஸஸ்ஸ மணப்³ராஹ்மணியா பஜாய ஸதே³வமனுஸ்ஸாய ‘அனுத்தரங் ஸம்மாஸம்போ³தி⁴ங் அபி⁴ஸம்பு³த்³தோ⁴’தி பச்சஞ்ஞாஸிங். யதோ ச க்²வாஹங், பி⁴க்க²வே, இமேஸங் ச²ன்னங் இந்த்³ரியானங் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தங் அப்³ப⁴ஞ்ஞாஸிங், அதா²ஹங், பி⁴க்க²வே, ஸதே³வகே லோகே ஸமாரகே ஸப்³ரஹ்மகே ஸஸ்ஸமணப்³ராஹ்மணியா பஜாய ஸதே³வமனுஸ்ஸாய ‘அனுத்தரங் ஸம்மாஸம்போ³தி⁴ங் அபி⁴ஸம்பு³த்³தோ⁴’தி பச்சஞ்ஞாஸிங். ஞாணஞ்ச பன மே த³ஸ்ஸனங் உத³பாதி³ – ‘அகுப்பா மே விமுத்தி, அயமந்திமா ஜாதி, நத்தி²தா³னி புனப்³ப⁴வோ’’’தி. அட்ட²மங்.
9. பட²மஸமணப்³ராஹ்மணஸுத்தங்
499. ‘‘ச²யிமானி, பி⁴க்க²வே, இந்த்³ரியானி. கதமானி ச²? சக்கு²ந்த்³ரியங், ஸோதிந்த்³ரியங், கா⁴னிந்த்³ரியங், ஜிவ்ஹிந்த்³ரியங், காயிந்த்³ரியங், மனிந்த்³ரியங். யே ஹி கேசி, பி⁴க்க²வே, ஸமணா வா ப்³ராஹ்மணா வா இமேஸங் ச²ன்னங் இந்த்³ரியானங் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தங் நப்பஜானந்தி, ந மே தே, பி⁴க்க²வே, ஸமணா வா ப்³ராஹ்மணா வா ஸமணேஸு வா ஸமணஸம்மதா ப்³ராஹ்மணேஸு வா ப்³ராஹ்மணஸம்மதா, ந ச பனேதே ஆயஸ்மந்தோ ஸாமஞ்ஞத்த²ங் வா ப்³ரஹ்மஞ்ஞத்த²ங் வா தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தி’’. ‘‘யே ச கோ² கேசி, பி⁴க்க²வே, ஸமணா வா ப்³ராஹ்மணா வா இமேஸங் ச²ன்னங் இந்த்³ரியானங் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தங் பஜானந்தி, தே கோ² மே, பி⁴க்க²வே, ஸமணா வா ப்³ராஹ்மணா வா ஸமணேஸு சேவ ஸமணஸம்மதா ப்³ராஹ்மணேஸு ச ப்³ராஹ்மணஸம்மதா, தே ச பனாயஸ்மந்தோ ஸாமஞ்ஞத்த²ஞ்ச ப்³ரஹ்மஞ்ஞத்த²ஞ்ச தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தீ’’தி. நவமங்.
10. து³தியஸமணப்³ராஹ்மணஸுத்தங்
500. ‘‘யே ஹி கேசி, பி⁴க்க²வே, ஸமணா வா ப்³ராஹ்மணா வா சக்கு²ந்த்³ரியங் நப்பஜானந்தி, சக்கு²ந்த்³ரியஸமுத³யங் நப்பஜானந்தி, சக்கு²ந்த்³ரியனிரோத⁴ங் நப்பஜானந்தி, சக்கு²ந்த்³ரியனிரோத⁴கா³மினிங் படிபத³ங் நப்பஜானந்தி; ஸோதிந்த்³ரியங்…பே॰… கா⁴னிந்த்³ரியங்…பே॰… ஜிவ்ஹிந்த்³ரியங்…பே॰… காயிந்த்³ரியங்…பே॰… மனிந்த்³ரியங் நப்பஜானந்தி, மனிந்த்³ரியஸமுத³யங் நப்பஜானந்தி , மனிந்த்³ரியனிரோத⁴ங் நப்பஜானந்தி, மனிந்த்³ரியனிரோத⁴கா³மினிங் படிபத³ங் நப்பஜானந்தி. ந மே தே, பி⁴க்க²வே…பே॰… ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தி.
‘‘யே ச கோ² கேசி, பி⁴க்க²வே, ஸமணா வா ப்³ராஹ்மணா வா சக்கு²ந்த்³ரியங் பஜானந்தி, சக்கு²ந்த்³ரியஸமுத³யங் பஜானந்தி, சக்கு²ந்த்³ரியனிரோத⁴ங் பஜானந்தி, சக்கு²ந்த்³ரியனிரோத⁴கா³மினிங் படிபத³ங் பஜானந்தி, ஸோதிந்த்³ரியங்…பே॰… கா⁴னிந்த்³ரியங்…பே॰… ஜிவ்ஹிந்த்³ரியங்…பே॰… காயிந்த்³ரியங்…பே॰… மனிந்த்³ரியங் பஜானந்தி, மனிந்த்³ரியஸமுத³யங் பஜானந்தி, மனிந்த்³ரியனிரோத⁴ங் பஜானந்தி, மனிந்த்³ரியனிரோத⁴கா³மினிங் படிபத³ங் பஜானந்தி, தே கோ² மே, பி⁴க்க²வே, ஸமணா வா ப்³ராஹ்மணா வா ஸமணேஸு சேவ ஸமணஸம்மதா ப்³ராஹ்மணேஸு ச ப்³ராஹ்மணஸம்மதா, தே ச பனாயஸ்மந்தோ ஸாமஞ்ஞத்த²ஞ்ச ப்³ரஹ்மஞ்ஞத்த²ஞ்ச தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தீ’’தி. த³ஸமங்.
ச²ளிந்த்³ரியவக்³கோ³ ததியோ.
தஸ்ஸுத்³தா³னங் –
புனப்³ப⁴வோ ஜீவிதஞ்ஞாய, ஏகபீ³ஜீ ச ஸுத்³த⁴கங்;
ஸோதோ அரஹஸம்பு³த்³தோ⁴, த்³வே ச ஸமணப்³ராஹ்மணாதி.
4. ஸுகி²ந்த்³ரியவக்³கோ³
1. ஸுத்³தி⁴கஸுத்தங்
501. ‘‘பஞ்சிமானி , பி⁴க்க²வே, இந்த்³ரியானி. கதமானி பஞ்ச? ஸுகி²ந்த்³ரியங், து³க்கி²ந்த்³ரியங், ஸோமனஸ்ஸிந்த்³ரியங், தோ³மனஸ்ஸிந்த்³ரியங், உபெக்கி²ந்த்³ரியங் – இமானி கோ², பி⁴க்க²வே, பஞ்சிந்த்³ரியானீ’’தி. பட²மங்.
2. ஸோதாபன்னஸுத்தங்
502. ‘‘பஞ்சிமானி , பி⁴க்க²வே, இந்த்³ரியானி. கதமானி பஞ்ச? ஸுகி²ந்த்³ரியங், து³க்கி²ந்த்³ரியங், ஸோமனஸ்ஸிந்த்³ரியங், தோ³மனஸ்ஸிந்த்³ரியங், உபெக்கி²ந்த்³ரியங். யதோ கோ², பி⁴க்க²வே, அரியஸாவகோ இமேஸங் பஞ்சன்னங் இந்த்³ரியானங் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தங் பஜானாதி – அயங் வுச்சதி, பி⁴க்க²வே, அரியஸாவகோ ஸோதாபன்னோ அவினிபாதத⁴ம்மோ நியதோ ஸம்போ³தி⁴பராயணோ’’தி. து³தியங்.
3. அரஹந்தஸுத்தங்
503. ‘‘பஞ்சிமானி , பி⁴க்க²வே, இந்த்³ரியானி. கதமானி பஞ்ச? ஸுகி²ந்த்³ரியங், து³க்கி²ந்த்³ரியங், ஸோமனஸ்ஸிந்த்³ரியங், தோ³மனஸ்ஸிந்த்³ரியங், உபெக்கி²ந்த்³ரியங். யதோ கோ², பி⁴க்க²வே, பி⁴க்கு² இமேஸங் பஞ்சன்னங் இந்த்³ரியானங் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தங் விதி³த்வா அனுபாதா³விமுத்தோ ஹோதி – அயங் வுச்சதி, பி⁴க்க²வே, பி⁴க்கு² அரஹங் கீ²ணாஸவோ வுஸிதவா கதகரணீயோ ஓஹிதபா⁴ரோ அனுப்பத்தஸத³த்தோ² பரிக்கீ²ணப⁴வஸங்யோஜனோ ஸம்மத³ஞ்ஞா விமுத்தோ’’தி. ததியங்.
4. பட²மஸமணப்³ராஹ்மணஸுத்தங்
504. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸுகி²ந்த்³ரியங், து³க்கி²ந்த்³ரியங், ஸோமனஸ்ஸிந்த்³ரியங், தோ³மனஸ்ஸிந்த்³ரியங், உபெக்கி²ந்த்³ரியங். யே ஹி கேசி, பி⁴க்க²வே, ஸமணா வா ப்³ராஹ்மணா வா இமேஸங் பஞ்சன்னங் இந்த்³ரியானங் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தங் நப்பஜானந்தி, ந மே தே, பி⁴க்க²வே, ஸமணா வா ப்³ராஹ்மணா வா ஸமணேஸு வா ஸமணஸம்மதா ப்³ராஹ்மணேஸு வா ப்³ராஹ்மணஸம்மதா, ந ச பனேதே ஆயஸ்மந்தோ ஸாமஞ்ஞத்த²ங் வா ப்³ரஹ்மஞ்ஞத்த²ங் வா தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தி.
‘‘யே ச கோ² கேசி, பி⁴க்க²வே, ஸமணா வா ப்³ராஹ்மணா வா இமேஸங் பஞ்சன்னங் இந்த்³ரியானங் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தங் பஜானந்தி, தே கோ² மே , பி⁴க்க²வே, ஸமணா வா ப்³ராஹ்மணா வா ஸமணேஸு சேவ ஸமணஸம்மதா ப்³ராஹ்மணேஸு ச ப்³ராஹ்மணஸம்மதா, தே ச பனாயஸ்மந்தோ ஸாமஞ்ஞத்த²ஞ்ச ப்³ரஹ்மஞ்ஞத்த²ஞ்ச தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தீ’’தி. சதுத்த²ங்.
5. து³தியஸமணப்³ராஹ்மணஸுத்தங்
505. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸுகி²ந்த்³ரியங், து³க்கி²ந்த்³ரியங், ஸோமனஸ்ஸிந்த்³ரியங், தோ³மனஸ்ஸிந்த்³ரியங், உபெக்கி²ந்த்³ரியங். யே ஹி கேசி, பி⁴க்க²வே, ஸமணா வா ப்³ராஹ்மணா வா ஸுகி²ந்த்³ரியங் நப்பஜானந்தி, ஸுகி²ந்த்³ரியஸமுத³யங் நப்பஜானந்தி, ஸுகி²ந்த்³ரியனிரோத⁴ங் நப்பஜானந்தி, ஸுகி²ந்த்³ரியனிரோத⁴கா³மினிங் படிபத³ங் நப்பஜானந்தி; து³க்கி²ந்த்³ரியங் நப்பஜானந்தி…பே॰… ஸோமனஸ்ஸிந்த்³ரியங் நப்பஜானந்தி…பே॰… தோ³மனஸ்ஸிந்த்³ரியங் நப்பஜானந்தி …பே॰… உபெக்கி²ந்த்³ரியங் நப்பஜானந்தி, உபெக்கி²ந்த்³ரியஸமுத³யங் நப்பஜானந்தி, உபெக்கி²ந்த்³ரியனிரோத⁴ங் நப்பஜானந்தி, உபெக்கி²ந்த்³ரியனிரோத⁴கா³மினிங் படிபத³ங் நப்பஜானந்தி; ந மே தே, பி⁴க்க²வே, ஸமணா வா ப்³ராஹ்மணா வா ஸமணேஸு வா ஸமணஸம்மதா ப்³ராஹ்மணேஸு வா ப்³ராஹ்மணஸம்மதா, ந ச பனேதே ஆயஸ்மந்தோ ஸாமஞ்ஞத்த²ங் வா ப்³ரஹ்மஞ்ஞத்த²ங் வா தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தி.
‘‘யே ச கோ² கேசி, பி⁴க்க²வே, ஸமணா வா ப்³ராஹ்மணா வா ஸுகி²ந்த்³ரியங் பஜானந்தி, ஸுகி²ந்த்³ரியஸமுத³யங் பஜானந்தி, ஸுகி²ந்த்³ரியனிரோத⁴ங் பஜானந்தி, ஸுகி²ந்த்³ரியனிரோத⁴கா³மினிங் படிபத³ங் பஜானந்தி; து³க்கி²ந்த்³ரியங் பஜானந்தி…பே॰… ஸோமனஸ்ஸிந்த்³ரியங் பஜானந்தி… தோ³மனஸ்ஸிந்த்³ரியங் பஜானந்தி… உபெக்கி²ந்த்³ரியங் பஜானந்தி, உபெக்கி²ந்த்³ரியஸமுத³யங் பஜானந்தி, உபெக்கி²ந்த்³ரியனிரோத⁴ங் பஜானந்தி, உபெக்கி²ந்த்³ரியனிரோத⁴கா³மினிங் படிபத³ங் பஜானந்தி, தே ச கோ² மே, பி⁴க்க²வே, ஸமணா வா ப்³ராஹ்மணா வா ஸமணேஸு சேவ ஸமணஸம்மதா ப்³ராஹ்மணேஸு ச ப்³ராஹ்மணஸம்மதா, தே ச பனாயஸ்மந்தோ ஸாமஞ்ஞத்த²ஞ்ச ப்³ரஹ்மஞ்ஞத்த²ஞ்ச தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தீ’’தி. பஞ்சமங்.
6. பட²மவிப⁴ங்க³ஸுத்தங்
506. ‘‘பஞ்சிமானி , பி⁴க்க²வே, இந்த்³ரியானி. கதமானி பஞ்ச? ஸுகி²ந்த்³ரியங், து³க்கி²ந்த்³ரியங், ஸோமனஸ்ஸிந்த்³ரியங், தோ³மனஸ்ஸிந்த்³ரியங், உபெக்கி²ந்த்³ரியங்.
‘‘கதமஞ்ச , பி⁴க்க²வே, ஸுகி²ந்த்³ரியங்? யங் கோ², பி⁴க்க²வே, காயிகங் ஸுக²ங் , காயிகங் ஸாதங், காயஸம்ப²ஸ்ஸஜங் ஸுக²ங் ஸாதங் வேத³யிதங் – இத³ங் வுச்சதி, பி⁴க்க²வே, ஸுகி²ந்த்³ரியங்.
‘‘கதமஞ்ச, பி⁴க்க²வே, து³க்கி²ந்த்³ரியங்? யங் கோ², பி⁴க்க²வே, காயிகங் து³க்க²ங், காயிகங் அஸாதங், காயஸம்ப²ஸ்ஸஜங் து³க்க²ங் அஸாதங் வேத³யிதங் – இத³ங் வுச்சதி, பி⁴க்க²வே, து³க்கி²ந்த்³ரியங்.
‘‘கதமஞ்ச, பி⁴க்க²வே, ஸோமனஸ்ஸிந்த்³ரியங்? யங் கோ², பி⁴க்க²வே, சேதஸிகங் ஸுக²ங், சேதஸிகங் ஸாதங், மனோஸம்ப²ஸ்ஸஜங் ஸுக²ங் ஸாதங் வேத³யிதங் – இத³ங் வுச்சதி, பி⁴க்க²வே, ஸோமனஸ்ஸிந்த்³ரியங்.
‘‘கதமஞ்ச, பி⁴க்க²வே, தோ³மனஸ்ஸிந்த்³ரியங்? யங் கோ², பி⁴க்க²வே, சேதஸிகங் து³க்க²ங், சேதஸிகங் அஸாதங், மனோஸம்ப²ஸ்ஸஜங் து³க்க²ங் அஸாதங் வேத³யிதங் – இத³ங் வுச்சதி, பி⁴க்க²வே, தோ³மனஸ்ஸிந்த்³ரியங்.
‘‘கதமஞ்ச, பி⁴க்க²வே, உபெக்கி²ந்த்³ரியங்? யங் கோ², பி⁴க்க²வே, காயிகங் வா சேதஸிகங் வா நேவஸாதங் நாஸாதங் வேத³யிதங் – இத³ங் வுச்சதி, பி⁴க்க²வே, உபெக்கி²ந்த்³ரியங். இமானி கோ², பி⁴க்க²வே, பஞ்சிந்த்³ரியானீ’’தி. ச²ட்ட²ங்.
7. து³தியவிப⁴ங்க³ஸுத்தங்
507. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸுகி²ந்த்³ரியங், து³க்கி²ந்த்³ரியங், ஸோமனஸ்ஸிந்த்³ரியங், தோ³மனஸ்ஸிந்த்³ரியங், உபெக்கி²ந்த்³ரியங்.
‘‘கதமஞ்ச , பி⁴க்க²வே, ஸுகி²ந்த்³ரியங்? யங் கோ², பி⁴க்க²வே, காயிகங் ஸுக²ங், காயிகங் ஸாதங், காயஸம்ப²ஸ்ஸஜங் ஸுக²ங் ஸாதங் வேத³யிதங் – இத³ங் வுச்சதி, பி⁴க்க²வே, ஸுகி²ந்த்³ரியங்.
‘‘கதமஞ்ச, பி⁴க்க²வே, து³க்கி²ந்த்³ரியங்? யங் கோ², பி⁴க்க²வே, காயிகங் து³க்க²ங் , காயிகங் அஸாதங், காயஸம்ப²ஸ்ஸஜங் து³க்க²ங் அஸாதங் வேத³யிதங் – இத³ங் வுச்சதி, பி⁴க்க²வே, து³க்கி²ந்த்³ரியங்.
‘‘கதமஞ்ச, பி⁴க்க²வே, ஸோமனஸ்ஸிந்த்³ரியங்? யங் கோ², பி⁴க்க²வே, சேதஸிகங் ஸுக²ங், சேதஸிகங் ஸாதங், மனோஸம்ப²ஸ்ஸஜங் ஸுக²ங் ஸாதங் வேத³யிதங் – இத³ங் வுச்சதி, பி⁴க்க²வே, ஸோமனஸ்ஸிந்த்³ரியங்.
‘‘கதமஞ்ச , பி⁴க்க²வே, தோ³மனஸ்ஸிந்த்³ரியங்? யங் கோ², பி⁴க்க²வே, சேதஸிகங் து³க்க²ங், சேதஸிகங் அஸாதங், மனோஸம்ப²ஸ்ஸஜங் து³க்க²ங் அஸாதங் வேத³யிதங் – இத³ங் வுச்சதி, பி⁴க்க²வே, தோ³மனஸ்ஸிந்த்³ரியங்.
‘‘கதமஞ்ச, பி⁴க்க²வே, உபெக்கி²ந்த்³ரியங்? யங் கோ², பி⁴க்க²வே, காயிகங் வா சேதஸிகங் வா நேவஸாதங் நாஸாதங் வேத³யிதங் – இத³ங் வுச்சதி, பி⁴க்க²வே, உபெக்கி²ந்த்³ரியங்.
‘‘தத்ர, பி⁴க்க²வே, யஞ்ச ஸுகி²ந்த்³ரியங் யஞ்ச ஸோமனஸ்ஸிந்த்³ரியங், ஸுகா² ஸா வேத³னா த³ட்ட²ப்³பா³. தத்ர, பி⁴க்க²வே, யஞ்ச து³க்கி²ந்த்³ரியங் யஞ்ச தோ³மனஸ்ஸிந்த்³ரியங், து³க்கா² ஸா வேத³னா த³ட்ட²ப்³பா³. தத்ர, பி⁴க்க²வே, யதி³த³ங் உபெக்கி²ந்த்³ரியங், அது³க்க²மஸுகா² ஸா வேத³னா த³ட்ட²ப்³பா³. இமானி கோ², பி⁴க்க²வே, பஞ்சிந்த்³ரியானீ’’தி. ஸத்தமங்.
8. ததியவிப⁴ங்க³ஸுத்தங்
508. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸுகி²ந்த்³ரியங், து³க்கி²ந்த்³ரியங், ஸோமனஸ்ஸிந்த்³ரியங், தோ³மனஸ்ஸிந்த்³ரியங், உபெக்கி²ந்த்³ரியங்.
‘‘கதமஞ்ச , பி⁴க்க²வே, ஸுகி²ந்த்³ரியங்? யங் கோ², பி⁴க்க²வே, காயிகங் ஸுக²ங் , காயிகங் ஸாதங், காயஸம்ப²ஸ்ஸஜங் ஸுக²ங் ஸாதங் வேத³யிதங் – இத³ங் வுச்சதி, பி⁴க்க²வே, ஸுகி²ந்த்³ரியங்.
‘‘கதமஞ்ச, பி⁴க்க²வே, து³க்கி²ந்த்³ரியங்? யங் கோ², பி⁴க்க²வே, காயிகங் து³க்க²ங், காயிகங் அஸாதங், காயஸம்ப²ஸ்ஸஜங் து³க்க²ங் அஸாதங் வேத³யிதங் – இத³ங் வுச்சதி, பி⁴க்க²வே, து³க்கி²ந்த்³ரியங்.
‘‘கதமஞ்ச, பி⁴க்க²வே, ஸோமனஸ்ஸிந்த்³ரியங்? யங் கோ², பி⁴க்க²வே, சேதஸிகங் ஸுக²ங், சேதஸிகங் ஸாதங், மனோஸம்ப²ஸ்ஸஜங் ஸுக²ங் ஸாதங் வேத³யிதங் – இத³ங் வுச்சதி, பி⁴க்க²வே, ஸோமனஸ்ஸிந்த்³ரியங்.
‘‘கதமஞ்ச , பி⁴க்க²வே, தோ³மனஸ்ஸிந்த்³ரியங்? யங் கோ², பி⁴க்க²வே, சேதஸிகங் து³க்க²ங், சேதஸிகங் அஸாதங், மனோஸம்ப²ஸ்ஸஜங் து³க்க²ங் அஸாதங் வேத³யிதங் – இத³ங் வுச்சதி, பி⁴க்க²வே, தோ³மனஸ்ஸிந்த்³ரியங்.
‘‘கதமஞ்ச, பி⁴க்க²வே, உபெக்கி²ந்த்³ரியங்? யங் கோ², பி⁴க்க²வே, காயிகங் வா சேதஸிகங் வா நேவ ஸாதங் நாஸாதங் வேத³யிதங் – இத³ங் வுச்சதி, பி⁴க்க²வே, உபெக்கி²ந்த்³ரியங்.
‘‘தத்ர, பி⁴க்க²வே, யஞ்ச ஸுகி²ந்த்³ரியங் யஞ்ச ஸோமனஸ்ஸிந்த்³ரியங், ஸுகா² ஸா வேத³னா த³ட்ட²ப்³பா³. தத்ர, பி⁴க்க²வே, யஞ்ச து³க்கி²ந்த்³ரியங் யஞ்ச தோ³மனஸ்ஸிந்த்³ரியங், து³க்கா² ஸா வேத³னா த³ட்ட²ப்³பா³. தத்ர, பி⁴க்க²வே, யதி³த³ங் உபெக்கி²ந்த்³ரியங், அது³க்க²மஸுகா² ஸா வேத³னா த³ட்ட²ப்³பா³ . இதி கோ², பி⁴க்க²வே, இமானி பஞ்சிந்த்³ரியானி பஞ்ச ஹுத்வா தீணி ஹொந்தி, தீணி ஹுத்வா பஞ்ச ஹொந்தி பரியாயேனா’’தி. அட்ட²மங்.
9. கட்டோ²பமஸுத்தங்
509. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸுகி²ந்த்³ரியங், து³க்கி²ந்த்³ரியங், ஸோமனஸ்ஸிந்த்³ரியங், தோ³மனஸ்ஸிந்த்³ரியங், உபெக்கி²ந்த்³ரியங். ஸுக²வேத³னியங், பி⁴க்க²வே, ப²ஸ்ஸங் படிச்ச உப்பஜ்ஜதி ஸுகி²ந்த்³ரியங். ஸோ ஸுகி²தோவ ஸமானோ ‘ஸுகி²தொஸ்மீ’தி பஜானாதி. தஸ்ஸேவ ஸுக²வேத³னியஸ்ஸ ப²ஸ்ஸஸ்ஸ நிரோதா⁴ ‘யங் தஜ்ஜங் வேத³யிதங் ஸுக²வேத³னியங் ப²ஸ்ஸங் படிச்ச உப்பன்னங் ஸுகி²ந்த்³ரியங் தங் நிருஜ்ஜ²தி, தங் வூபஸம்மதீ’தி பஜானாதி’’.
‘‘து³க்க²வேத³னியங், பி⁴க்க²வே, ப²ஸ்ஸங் படிச்ச உப்பஜ்ஜதி து³க்கி²ந்த்³ரியங். ஸோ து³க்கி²தோவ ஸமானோ ‘து³க்கி²தொஸ்மீ’தி பஜானாதி. தஸ்ஸேவ து³க்க²வேத³னியஸ்ஸ ப²ஸ்ஸஸ்ஸ நிரோதா⁴ ‘யங் தஜ்ஜங் வேத³யிதங் து³க்க²வேத³னியங் ப²ஸ்ஸங் படிச்ச உப்பன்னங் து³க்கி²ந்த்³ரியங் தங் நிருஜ்ஜ²தி, தங் வூபஸம்மதீ’தி பஜானாதி’’.
‘‘ஸோமனஸ்ஸவேத³னியங், பி⁴க்க²வே, ப²ஸ்ஸங் படிச்ச உப்பஜ்ஜதி ஸோமனஸ்ஸிந்த்³ரியங். ஸோ ஸுமனோவ ஸமானோ ‘ஸுமனொஸ்மீ’தி பஜானாதி. தஸ்ஸேவ ஸோமனஸ்ஸவேத³னியஸ்ஸ ப²ஸ்ஸஸ்ஸ நிரோதா⁴ ‘யங் தஜ்ஜங் வேத³யிதங் ஸோமனஸ்ஸவேத³னியங் ப²ஸ்ஸங் படிச்ச உப்பன்னங் ஸோமனஸ்ஸிந்த்³ரியங் தங் நிருஜ்ஜ²தி, தங் வூபஸம்மதீ’தி பஜானாதி’’.
‘‘தோ³மனஸ்ஸவேத³னியங், பி⁴க்க²வே, ப²ஸ்ஸங் படிச்ச உப்பஜ்ஜதி தோ³மனஸ்ஸிந்த்³ரியங். ஸோ து³ம்மனோவ ஸமானோ ‘து³ம்மனொஸ்மீ’தி பஜானாதி. தஸ்ஸேவ தோ³மனஸ்ஸவேத³னியஸ்ஸ ப²ஸ்ஸஸ்ஸ நிரோதா⁴ ‘யங் தஜ்ஜங் வேத³யிதங் தோ³மனஸ்ஸவேத³னியங் ப²ஸ்ஸங் படிச்ச உப்பன்னங் தோ³மனஸ்ஸிந்த்³ரியங் தங் நிருஜ்ஜ²தி, தங் வூபஸம்மதீ’தி பஜானாதி’’.
‘‘உபெக்கா²வேத³னியங், பி⁴க்க²வே, ப²ஸ்ஸங் படிச்ச உப்பஜ்ஜதி உபெக்கி²ந்த்³ரியங். ஸோ உபெக்க²கோவ ஸமானோ ‘உபெக்க²கொஸ்மீ’தி பஜானாதி. தஸ்ஸேவ உபெக்கா²வேத³னியஸ்ஸ ப²ஸ்ஸஸ்ஸ நிரோதா⁴ ‘யங் தஜ்ஜங் வேத³யிதங் உபெக்கா²வேத³னியங் ப²ஸ்ஸங் படிச்ச உப்பன்னங் உபெக்கி²ந்த்³ரியங் தங் நிருஜ்ஜ²தி, தங் வூபஸம்மதீ’தி பஜானாதி’’.
‘‘ஸெய்யதா²பி, பி⁴க்க²வே, த்³வின்னங் கட்டா²னங் ஸங்க⁴ட்டனஸமோதா⁴னா ஸங்க⁴ட்டனாஸமோதா⁴னா (பீ॰ க॰), ஸங்க⁴டனஸமோதா⁴னா (ஸ்யா॰ கங்॰) உஸ்மா ஜாயதி, தேஜோ அபி⁴னிப்³ப³த்ததி; தேஸங்யேவ கட்டா²னங் நானாபா⁴வாவினிக்கே²பா யா நானாபா⁴வனிக்கே²பா (ஸ்யா॰ கங்॰ பீ॰ க॰) தஜ்ஜா உஸ்மா ஸா நிருஜ்ஜ²தி ஸா வூபஸம்மதி; ஏவமேவ கோ², பி⁴க்க²வே, ஸுக²வேத³னியங் ப²ஸ்ஸங் படிச்ச உப்பஜ்ஜதி ஸுகி²ந்த்³ரியங். ஸோ ஸுகி²தோவ ஸமானோ ‘ஸுகி²தொஸ்மீ’தி பஜானாதி. தஸ்ஸேவ ஸுக²வேத³னியஸ்ஸ ப²ஸ்ஸஸ்ஸ நிரோதா⁴ ‘யங் தஜ்ஜங் வேத³யிதங் ஸுக²வேத³னியங் ப²ஸ்ஸங் படிச்ச உப்பஜ்ஜதி ஸுகி²ந்த்³ரியங் தங் நிருஜ்ஜ²தி , தங் வூபஸம்மதீ’தி பஜானாதி’’.
‘‘து³க்க²வேத³னியங், பி⁴க்க²வே, ப²ஸ்ஸங் படிச்ச…பே॰… ஸோமனஸ்ஸவேத³னியங், பி⁴க்க²வே, ப²ஸ்ஸங் படிச்ச…பே॰… தோ³மனஸ்ஸவேத³னியங், பி⁴க்க²வே, ப²ஸ்ஸங் படிச்ச…பே॰… உபெக்கா²வேத³னியங், பி⁴க்க²வே, ப²ஸ்ஸங் படிச்ச உப்பஜ்ஜதி உபெக்கி²ந்த்³ரியங். ஸோ உபெக்க²கோவ ஸமானோ ‘உபெக்க²கொஸ்மீ’தி பஜானாதி. தஸ்ஸேவ உபெக்கா²வேத³னியஸ்ஸ ப²ஸ்ஸஸ்ஸ நிரோதா⁴ ‘யங் தஜ்ஜங் வேத³யிதங் உபெக்கா²வேத³னியங் ப²ஸ்ஸங் படிச்ச உப்பஜ்ஜதி உபெக்கி²ந்த்³ரியங் தங் நிருஜ்ஜ²தி, தங் வூபஸம்மதீ’தி பஜானாதி’’. நவமங்.
10. உப்படிபாடிகஸுத்தங்
510. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? து³க்கி²ந்த்³ரியங் , தோ³மனஸ்ஸிந்த்³ரியங், ஸுகி²ந்த்³ரியங், ஸோமனஸ்ஸிந்த்³ரியங், உபெக்கி²ந்த்³ரியங். இத⁴, பி⁴க்க²வே, பி⁴க்கு²னோ அப்பமத்தஸ்ஸ ஆதாபினோ பஹிதத்தஸ்ஸ விஹரதோ உப்பஜ்ஜதி து³க்கி²ந்த்³ரியங். ஸோ ஏவங் பஜானாதி – ‘உப்பன்னங் கோ² மே இத³ங் து³க்கி²ந்த்³ரியங், தஞ்ச கோ² ஸனிமித்தங் ஸனிதா³னங் ஸஸங்கா²ரங் ஸப்பச்சயங். தஞ்ச அனிமித்தங் அனிதா³னங் அஸங்கா²ரங் அப்பச்சயங் து³க்கி²ந்த்³ரியங் உப்பஜ்ஜிஸ்ஸதீதி – நேதங் டா²னங் விஜ்ஜதி’. ஸோ து³க்கி²ந்த்³ரியஞ்ச பஜானாதி, து³க்கி²ந்த்³ரியஸமுத³யஞ்ச பஜானாதி, து³க்கி²ந்த்³ரியனிரோத⁴ஞ்ச பஜானாதி, யத்த² சுப்பன்னங் து³க்கி²ந்த்³ரியங் அபரிஸேஸங் நிருஜ்ஜ²தி தஞ்ச பஜானாதி. கத்த² சுப்பன்னங் து³க்கி²ந்த்³ரியங் அபரிஸேஸங் நிருஜ்ஜ²தி? இத⁴, பி⁴க்க²வே, பி⁴க்கு² விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கங் ஸவிசாரங் விவேகஜங் பீதிஸுக²ங் பட²மங் ஜா²னங் உபஸம்பஜ்ஜ விஹரதி, எத்த² சுப்பன்னங் து³க்கி²ந்த்³ரியங் அபரிஸேஸங் நிருஜ்ஜ²தி. அயங் வுச்சதி, பி⁴க்க²வே, ‘பி⁴க்கு² அஞ்ஞாஸி து³க்கி²ந்த்³ரியஸ்ஸ நிரோத⁴ங், தத³த்தா²ய சித்தங் உபஸங்ஹரதி’’’.
‘‘இத⁴ பன, பி⁴க்க²வே, பி⁴க்கு²னோ அப்பமத்தஸ்ஸ ஆதாபினோ பஹிதத்தஸ்ஸ விஹரதோ உப்பஜ்ஜதி தோ³மனஸ்ஸிந்த்³ரியங். ஸோ ஏவங் பஜானாதி – ‘உப்பன்னங் கோ² மே இத³ங் தோ³மனஸ்ஸிந்த்³ரியங், தஞ்ச கோ² ஸனிமித்தங் ஸனிதா³னங் ஸஸங்கா²ரங் ஸப்பச்சயங். தஞ்ச அனிமித்தங் அனிதா³னங் அஸங்கா²ரங் அப்பச்சயங் தோ³மனஸ்ஸிந்த்³ரியங் உப்பஜ்ஜிஸ்ஸதீதி – நேதங் டா²னங் விஜ்ஜதி’ . ஸோ தோ³மனஸ்ஸிந்த்³ரியஞ்ச பஜானாதி, தோ³மனஸ்ஸிந்த்³ரியஸமுத³யஞ்ச பஜானாதி, தோ³மனஸ்ஸிந்த்³ரியனிரோத⁴ஞ்ச பஜானாதி, யத்த² சுப்பன்னங் தோ³மனஸ்ஸிந்த்³ரியங் அபரிஸேஸங் நிருஜ்ஜ²தி தஞ்ச பஜானாதி. கத்த² சுப்பன்னங் தோ³மனஸ்ஸிந்த்³ரியங் அபரிஸேஸங் நிருஜ்ஜ²தி? இத⁴, பி⁴க்க²வே, பி⁴க்கு² விதக்கவிசாரானங் வூபஸமா அஜ்ஜ²த்தங் ஸம்பஸாத³னங் சேதஸோ ஏகோதி³பா⁴வங் அவிதக்கங் அவிசாரங் ஸமாதி⁴ஜங் பீதிஸுக²ங் து³தியங் ஜா²னங் உபஸம்பஜ்ஜ விஹரதி, எத்த² சுப்பன்னங் தோ³மனஸ்ஸிந்த்³ரியங் அபரிஸேஸங் நிருஜ்ஜ²தி. அயங் வுச்சதி, பி⁴க்க²வே, ‘பி⁴க்கு² அஞ்ஞாஸி தோ³மனஸ்ஸிந்த்³ரியஸ்ஸ நிரோத⁴ங், தத³த்தா²ய சித்தங் உபஸங்ஹரதி’’’.
‘‘இத⁴ பன, பி⁴க்க²வே, பி⁴க்கு²னோ அப்பமத்தஸ்ஸ ஆதாபினோ பஹிதத்தஸ்ஸ விஹரதோ உப்பஜ்ஜதி ஸுகி²ந்த்³ரியங். ஸோ ஏவங் பஜானாதி – ‘உப்பன்னங் கோ² மே இத³ங் ஸுகி²ந்த்³ரியங், தஞ்ச கோ² ஸனிமித்தங் ஸனிதா³னங் ஸஸங்கா²ரங் ஸப்பச்சயங். தஞ்ச அனிமித்தங் அனிதா³னங் அஸங்கா²ரங் அப்பச்சயங் ஸுகி²ந்த்³ரியங் உப்பஜ்ஜிஸ்ஸதீதி – நேதங் டா²னங் விஜ்ஜதி’. ஸோ ஸுகி²ந்த்³ரியஞ்ச பஜானாதி, ஸுகி²ந்த்³ரியஸமுத³யஞ்ச பஜானாதி, ஸுகி²ந்த்³ரியனிரோத⁴ஞ்ச பஜானாதி, யத்த² சுப்பன்னங் ஸுகி²ந்த்³ரியங் அபரிஸேஸங் நிருஜ்ஜ²தி தஞ்ச பஜானாதி. கத்த² சுப்பன்னங் ஸுகி²ந்த்³ரியங் அபரிஸேஸங் நிருஜ்ஜ²தி? இத⁴, பி⁴க்க²வே, பி⁴க்கு² பீதியா ச விராகா³ உபெக்க²கோ ச விஹரதி ஸதோ ச ஸம்பஜானோ ஸுக²ஞ்ச காயேன படிஸங்வேதே³தி யங் தங் அரியா ஆசிக்க²ந்தி ‘உபெக்க²கோ ஸதிமா ஸுக²விஹாரீ’தி ததியங் ஜா²னங் உபஸம்பஜ்ஜ விஹரதி, எத்த² சுப்பன்னங் ஸுகி²ந்த்³ரியங் அபரிஸேஸங் நிருஜ்ஜ²தி. அயங் வுச்சதி, பி⁴க்க²வே, ‘பி⁴க்கு² அஞ்ஞாஸி ஸுகி²ந்த்³ரியஸ்ஸ நிரோத⁴ங், தத³த்தா²ய சித்தங் உபஸங்ஹரதி’’’.
‘‘இத⁴ பன, பி⁴க்க²வே, பி⁴க்கு²னோ அப்பமத்தஸ்ஸ ஆதாபினோ பஹிதத்தஸ்ஸ விஹரதோ உப்பஜ்ஜதி ஸோமனஸ்ஸிந்த்³ரியங். ஸோ ஏவங் பஜானாதி – ‘உப்பன்னங் கோ² மே இத³ங் ஸோமனஸ்ஸிந்த்³ரியங், தஞ்ச கோ² ஸனிமித்தங் ஸனிதா³னங் ஸஸங்கா²ரங் ஸப்பச்சயங். தஞ்ச அனிமித்தங் அனிதா³னங் அஸங்கா²ரங் அப்பச்சயங் ஸோமனஸ்ஸிந்த்³ரியங் உப்பஜ்ஜிஸ்ஸதீதி – நேதங் டா²னங் விஜ்ஜதி’. ஸோ ஸோமனஸ்ஸிந்த்³ரியஞ்ச பஜானாதி, ஸோமனஸ்ஸிந்த்³ரியஸமுத³யஞ்ச பஜானாதி, ஸோமனஸ்ஸிந்த்³ரியனிரோத⁴ஞ்ச பஜானாதி, யத்த² சுப்பன்னங் ஸோமனஸ்ஸிந்த்³ரியங் அபரிஸேஸங் நிருஜ்ஜ²தி தஞ்ச பஜானாதி. கத்த² சுப்பன்னங் ஸோமனஸ்ஸிந்த்³ரியங் அபரிஸேஸங் நிருஜ்ஜ²தி? இத⁴, பி⁴க்க²வே, பி⁴க்கு² ஸுக²ஸ்ஸ ச பஹானா து³க்க²ஸ்ஸ ச பஹானா புப்³பே³வ ஸோமனஸ்ஸதோ³மனஸ்ஸானங் அத்த²ங்க³மா அது³க்க²மஸுக²ங் உபெக்கா²ஸதிபாரிஸுத்³தி⁴ங் சதுத்த²ங் ஜா²னங் உபஸம்பஜ்ஜ விஹரதி, எத்த² சுப்பன்னங் ஸோமனஸ்ஸிந்த்³ரியங் அபரிஸேஸங் நிருஜ்ஜ²தி. அயங் வுச்சதி, பி⁴க்க²வே, ‘பி⁴க்கு² அஞ்ஞாஸி ஸோமனஸ்ஸிந்த்³ரியஸ்ஸ நிரோத⁴ங், தத³த்தா²ய சித்தங் உபஸங்ஹரதி’’’.
‘‘இத⁴ பன, பி⁴க்க²வே, பி⁴க்கு²னோ அப்பமத்தஸ்ஸ ஆதாபினோ பஹிதத்தஸ்ஸ விஹரதோ உப்பஜ்ஜதி உபெக்கி²ந்த்³ரியங். ஸோ ஏவங் பஜானாதி – ‘உப்பன்னங் கோ² மே இத³ங் உபெக்கி²ந்த்³ரியங், தஞ்ச கோ² ஸனிமித்தங் ஸனிதா³னங் ஸஸங்கா²ரங் ஸப்பச்சயங். தஞ்ச அனிமித்தங் அனிதா³னங் அஸங்கா²ரங் அப்பச்சயங் உபெக்கி²ந்த்³ரியங் உப்பஜ்ஜிஸ்ஸதீதி – நேதங் டா²னங் விஜ்ஜதி’. ஸோ உபெக்கி²ந்த்³ரியஞ்ச பஜானாதி, உபெக்கி²ந்த்³ரியஸமுத³யஞ்ச பஜானாதி, உபெக்கி²ந்த்³ரியனிரோத⁴ஞ்ச பஜானாதி, யத்த² சுப்பன்னங் உபெக்கி²ந்த்³ரியங் அபரிஸேஸங் நிருஜ்ஜ²தி தஞ்ச பஜானாதி. கத்த² சுப்பன்னங் உபெக்கி²ந்த்³ரியங் அபரிஸேஸங் நிருஜ்ஜ²தி? இத⁴, பி⁴க்க²வே, பி⁴க்கு² ஸப்³ப³ஸோ நேவஸஞ்ஞானாஸஞ்ஞாயதனங் ஸமதிக்கம்ம ஸஞ்ஞாவேத³யிதனிரோத⁴ங் உபஸம்பஜ்ஜ விஹரதி, எத்த² சுப்பன்னங் உபெக்கி²ந்த்³ரியங் அபரிஸேஸங் நிருஜ்ஜ²தி. அயங் வுச்சதி, பி⁴க்க²வே, ‘பி⁴க்கு² அஞ்ஞாஸி உபெக்கி²ந்த்³ரியஸ்ஸ நிரோத⁴ங், தத³த்தா²ய சித்தங் உபஸங்ஹரதீ’’’தி. த³ஸமங்.
ஸுகி²ந்த்³ரியவக்³கோ³ சதுத்தோ².
தஸ்ஸுத்³தா³னங் –
ஸுத்³தி⁴கஞ்ச ஸோதோ அரஹா, து³வே ஸமணப்³ராஹ்மணா;
விப⁴ங்கே³ன தயோ வுத்தா, கட்டோ² உப்படிபாடிகந்தி.
5. ஜராவக்³கோ³
1. ஜராத⁴ம்மஸுத்தங்
511. ஏவங் மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி புப்³பா³ராமே மிகா³ரமாதுபாஸாதே³. தேன கோ² பன ஸமயேன ப⁴க³வா ஸாயன்ஹஸமயங் படிஸல்லானா வுட்டி²தோ பச்சா²தபே நிஸின்னோ ஹோதி பிட்டி²ங் ஓதாபயமானோ.
அத² கோ² ஆயஸ்மா ஆனந்தோ³ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ப⁴க³வதோ க³த்தானி பாணினா அனோமஜ்ஜந்தோ ப⁴க³வந்தங் ஏதத³வோச – ‘‘அச்ச²ரியங், ப⁴ந்தே , அப்³பு⁴தங், ப⁴ந்தே! ந சேவங் தா³னி, ப⁴ந்தே, ப⁴க³வதோ தாவ பரிஸுத்³தோ⁴ ச²விவண்ணோ பரியோதா³தோ, ஸிதி²லானி ச க³த்தானி ஸப்³பா³னி வலியஜாதானி, புரதோ பப்³பா⁴ரோ ச காயோ, தி³ஸ்ஸதி ச இந்த்³ரியானங் அஞ்ஞத²த்தங் – சக்கு²ந்த்³ரியஸ்ஸ ஸோதிந்த்³ரியஸ்ஸ கா⁴னிந்த்³ரியஸ்ஸ ஜிவ்ஹிந்த்³ரியஸ்ஸ காயிந்த்³ரியஸ்ஸா’’தி.
‘‘ஏவஞ்ஹேதங் , ஆனந்த³, ஹோதி – ஜராத⁴ம்மோ யொப்³ப³ஞ்ஞே, ப்³யாதி⁴த⁴ம்மோ ஆரொக்³யே, மரணத⁴ம்மோ ஜீவிதே. ந சேவ தாவ பரிஸுத்³தோ⁴ ஹோதி ச²விவண்ணோ பரியோதா³தோ, ஸிதி²லானி ச ஹொந்தி க³த்தானி ஸப்³பா³னி வலியஜாதானி, புரதோ பப்³பா⁴ரோ ச காயோ, தி³ஸ்ஸதி ச இந்த்³ரியானங் அஞ்ஞத²த்தங் – சக்கு²ந்த்³ரியஸ்ஸ ஸோதிந்த்³ரியஸ்ஸ கா⁴னிந்த்³ரியஸ்ஸ ஜிவ்ஹிந்த்³ரியஸ்ஸ காயிந்த்³ரியஸ்ஸா’’தி.
‘‘இத³மவோச ப⁴க³வா. இத³ங் வத்வா ச ஸுக³தோ அதா²பரங் ஏதத³வோச ஸத்தா² –
‘‘தீ⁴ தங் ஜம்மி ஜரே அத்து², து³ப்³ப³ண்ணகரணீ ஜரே;
தாவ மனோரமங் பி³ம்ப³ங், ஜராய அபி⁴மத்³தி³தங்.
‘‘யோபி வஸ்ஸஸதங் ஜீவே, ஸோபி மச்சுபராயணோ ஸப்³பே³ மச்சுபராயனா (ஸ்யா॰ கங்॰ க॰);
ந கிஞ்சி பரிவஜ்ஜேதி, ஸப்³ப³மேவாபி⁴மத்³த³தீ’’தி. பட²மங்;
2. உண்ணாப⁴ப்³ராஹ்மணஸுத்தங்
512. ஸாவத்தி²னிதா³னங். அத² கோ² உண்ணாபோ⁴ ப்³ராஹ்மணோ யேன ப⁴க³வா தேனுபஸங்கமி; உபஸங்கமித்வா ப⁴க³வதா ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³. ஏகமந்தங் நிஸின்னோ கோ² உண்ணாபோ⁴ ப்³ராஹ்மணோ ப⁴க³வந்தங் ஏதத³வோச –
‘‘பஞ்சிமானி, போ⁴ கோ³தம, இந்த்³ரியானி நானாவிஸயானி நானாகோ³சரானி, ந அஞ்ஞமஞ்ஞஸ்ஸ கோ³சரவிஸயங் பச்சனுபொ⁴ந்தி. கதமானி பஞ்ச? சக்கு²ந்த்³ரியங், ஸோதிந்த்³ரியங், கா⁴னிந்த்³ரியங், ஜிவ்ஹிந்த்³ரியங், காயிந்த்³ரியங் . இமேஸங் நு கோ², போ⁴ கோ³தம, பஞ்சன்னங் இந்த்³ரியானங் நானாவிஸயானங் நானாகோ³சரானங் ந அஞ்ஞமஞ்ஞஸ்ஸ கோ³சரவிஸயங் பச்சனுபொ⁴ந்தானங் கிங் படிஸரணங், கோ ச நேஸங் கோ³சரவிஸயங் பச்சனுபோ⁴தீ’’தி?
‘‘பஞ்சிமானி, ப்³ராஹ்மண, இந்த்³ரியானி நானாவிஸயானி நானாகோ³சரானி ந அஞ்ஞமஞ்ஞஸ்ஸ கோ³சரவிஸயங் பச்சனுபொ⁴ந்தி. கதமானி பஞ்ச? சக்கு²ந்த்³ரியங், ஸோதிந்த்³ரியங் , கா⁴னிந்த்³ரியங், ஜிவ்ஹிந்த்³ரியங், காயிந்த்³ரியங். இமேஸங் கோ², ப்³ராஹ்மண, பஞ்சன்னங் இந்த்³ரியானங் நானாவிஸயானங் நானாகோ³சரானங் ந அஞ்ஞமஞ்ஞஸ்ஸ கோ³சரவிஸயங் பச்சனுபொ⁴ந்தானங் மனோ படிஸரணங், மனோவ நேஸங் கோ³சரவிஸயங் பச்சனுபோ⁴தீ’’தி.
‘‘மனஸ்ஸ பன, போ⁴ கோ³தம, கிங் படிஸரண’’ந்தி? ‘‘மனஸ்ஸ கோ², ப்³ராஹ்மண, ஸதி படிஸரண’’ந்தி. ‘‘ஸதியா பன, போ⁴ கோ³தம, கிங் படிஸரண’’ந்தி? ‘‘ஸதியா கோ², ப்³ராஹ்மண, விமுத்தி படிஸரண’’ந்தி. ‘‘விமுத்தியா பன, போ⁴ கோ³தம, கிங் படிஸரண’’ந்தி? ‘‘விமுத்தியா கோ², ப்³ராஹ்மண, நிப்³பா³னங் படிஸரண’’ந்தி. ‘‘நிப்³பா³னஸ்ஸ பன, போ⁴ கோ³தம, கிங் படிஸரண’’ந்தி? ‘‘அச்சயாஸி அச்சஸரா (ஸீ॰ ஸ்யா॰ கங்॰), அஜ்ஜ²பரங் (பீ॰ க॰), ப்³ராஹ்மண, பஞ்ஹங், நாஸக்கி² பஞ்ஹஸ்ஸ பரியந்தங் க³ஹேதுங். நிப்³பா³னோக³த⁴ஞ்ஹி, ப்³ராஹ்மண, ப்³ரஹ்மசரியங் வுஸ்ஸதி நிப்³பா³னபராயணங் நிப்³பா³னபரியோஸான’’ந்தி.
அத² கோ² உண்ணாபோ⁴ ப்³ராஹ்மணோ ப⁴க³வதோ பா⁴ஸிதங் அபி⁴னந்தி³த்வா அனுமோதி³த்வா உட்டா²யாஸனா ப⁴க³வந்தங் அபி⁴வாதெ³த்வா பத³க்கி²ணங் கத்வா பக்காமி.
அத² கோ² ப⁴க³வா அசிரபக்கந்தே உண்ணாபே⁴ ப்³ராஹ்மணே பி⁴க்கூ² ஆமந்தேஸி – ‘‘ஸெய்யதா²பி, பி⁴க்க²வே, கூடாகா³ரே வா கூடாகா³ரஸாலாயங் வா ரஸ்மியோ (ஸ்யா॰ க॰) பாசீனவாதபானா ஸூரியே உக்³க³ச்ச²ந்தே வாதபானேன ரஸ்மி கூடாகா³ரங் வா கூடாகா³ரஸாலங் வா உத்தராய (க॰ ஸீ॰) பவிஸித்வா க்வாஸ்ஸ காய (ஸ்யா॰ க॰) பதிட்டி²தா’’தி? ‘‘பச்சி²மாயங், ப⁴ந்தே, பி⁴த்திய’’ந்தி. ‘‘ஏவமேவ கோ², பி⁴க்க²வே, உண்ணாப⁴ஸ்ஸ ப்³ராஹ்மணஸ்ஸ ததா²க³தே ஸத்³தா⁴ நிவிட்டா² மூலஜாதா பதிட்டி²தா த³ள்ஹா அஸங்ஹாரியா ஸமணேன வா ப்³ராஹ்மணேன வா தே³வேன வா மாரேன வா ப்³ரஹ்முனா வா கேனசி வா லோகஸ்மிங். இமம்ஹி சே, பி⁴க்க²வே, ஸமயே உண்ணாபோ⁴ ப்³ராஹ்மணோ காலங்கரெய்ய, நத்தி² ஸங்யோஜனங் யேன ஸங்யோஜனேன ஸங்யுத்தோ உண்ணாபோ⁴ ப்³ராஹ்மணோ புன இமங் லோகங் ஆக³ச்செ²ய்யா’’தி. து³தியங்.
3. ஸாகேதஸுத்தங்
513. ஏவங் மே ஸுதங் – ஏகங் ஸமயங் ப⁴க³வா ஸாகேதே விஹரதி அஞ்ஜனவனே மிக³தா³யே. தத்ர கோ² ப⁴க³வா பி⁴க்கூ² ஆமந்தேஸி – ‘‘அத்தி² நு கோ², பி⁴க்க²வே , பரியாயோ யங் பரியாயங் ஆக³ம்ம யானி பஞ்சிந்த்³ரியானி தானி பஞ்ச ப³லானி ஹொந்தி, யானி பஞ்ச ப³லானி தானி பஞ்சிந்த்³ரியானி ஹொந்தீ’’தி?
‘‘ப⁴க³வங்மூலகா நோ, ப⁴ந்தே, த⁴ம்மா ப⁴க³வங்னெத்திகா ப⁴க³வங்படிஸரணா. ஸாது⁴ வத, ப⁴ந்தே, ப⁴க³வந்தங்யேவ படிபா⁴து ஏதஸ்ஸ பா⁴ஸிதஸ்ஸ அத்தோ². ப⁴க³வதோ ஸுத்வா பி⁴க்கூ² தா⁴ரெஸ்ஸந்தீ’’தி. ‘‘அத்தி², பி⁴க்க²வே, பரியாயோ யங் பரியாயங் ஆக³ம்ம யானி பஞ்சிந்த்³ரியானி தானி பஞ்ச ப³லானி ஹொந்தி, யானி பஞ்ச ப³லானி தானி பஞ்சிந்த்³ரியானி ஹொந்தி’’.
‘‘கதமோ ச, பி⁴க்க²வே, பரியாயோ யங் பரியாயங் ஆக³ம்ம யானி பஞ்சிந்த்³ரியானி தானி பஞ்ச ப³லானி ஹொந்தி, யானி பஞ்ச ப³லானி தானி பஞ்சிந்த்³ரியானி ஹொந்தி? யங், பி⁴க்க²வே, ஸத்³தி⁴ந்த்³ரியங் தங் ஸத்³தா⁴ப³லங், யங் ஸத்³தா⁴ப³லங் தங் ஸத்³தி⁴ந்த்³ரியங்; யங் வீரியிந்த்³ரியங் தங் வீரியப³லங், யங் வீரியப³லங் தங் வீரியிந்த்³ரியங்; யங் ஸதிந்த்³ரியங் தங் ஸதிப³லங், யங் ஸதிப³லங் தங் ஸதிந்த்³ரியங்; யங் ஸமாதி⁴ந்த்³ரியங் தங் ஸமாதி⁴ப³லங், யங் ஸமாதி⁴ப³லங் தங் ஸமாதி⁴ந்த்³ரியங்; யங் பஞ்ஞிந்த்³ரியங் தங் பஞ்ஞாப³லங், யங் பஞ்ஞாப³லங் தங் பஞ்ஞிந்த்³ரியங். ஸெய்யதா²பி, பி⁴க்க²வே, நதீ³ பாசீனநின்னா பாசீனபோணா பாசீனபப்³பா⁴ரா, தஸ்ஸ மஜ்ஜே² தீ³போ. அத்தி², பி⁴க்க²வே, பரியாயோ யங் பரியாயங் ஆக³ம்ம தஸ்ஸா நதி³யா ஏகோ ஸோதோ த்வேவ ஸங்க்²யங் க³ச்ச²தி ஸங்க²ங் (ஸீ॰ ஸ்யா॰ கங்॰). அத்தி² பன, பி⁴க்க²வே, பரியாயோ யங் பரியாயங் ஆக³ம்ம தஸ்ஸா நதி³யா த்³வே ஸோதானி த்வேவ ஸங்க்²யங் க³ச்ச²ந்தி.
‘‘கதமோ ச, பி⁴க்க²வே, பரியாயோ யங் பரியாயங் ஆக³ம்ம தஸ்ஸா நதி³யா ஏகோ ஸோதோ த்வேவ ஸங்க்²யங் க³ச்ச²தி? யஞ்ச, பி⁴க்க²வே, தஸ்ஸ தீ³பஸ்ஸ புரிமந்தே புரத்தி²மந்தே (ஸீ॰ ஸ்யா॰ கங்॰ பீ॰) உத³கங், யஞ்ச பச்சி²மந்தே உத³கங் – அயங் கோ², பி⁴க்க²வே, பரியாயோ யங் பரியாயங் ஆக³ம்ம தஸ்ஸா நதி³யா ஏகோ ஸோதோ த்வேவ ஸங்க்²யங் க³ச்ச²தி.
‘‘கதமோ ச, பி⁴க்க²வே, பரியாயோ யங் பரியாயங் ஆக³ம்ம தஸ்ஸா நதி³யா த்³வே ஸோதானி த்வேவ ஸங்க்²யங் க³ச்ச²ந்தி? யஞ்ச, பி⁴க்க²வே, தஸ்ஸ தீ³பஸ்ஸ உத்தரந்தே உத³கங், யஞ்ச த³க்கி²ணந்தே உத³கங் – அயங் கோ², பி⁴க்க²வே, பரியாயோ யங் பரியாயங் ஆக³ம்ம தஸ்ஸா நதி³யா த்³வே ஸோதானி த்வேவ ஸங்க்²யங் க³ச்ச²ந்தி. ஏவமேவ கோ², பி⁴க்க²வே, யங் ஸத்³தி⁴ந்த்³ரியங் தங் ஸத்³தா⁴ப³லங், யங் ஸத்³தா⁴ப³லங் தங் ஸத்³தி⁴ந்த்³ரியங்; யங் வீரியிந்த்³ரியங் தங் வீரியப³லங், யங் வீரியப³லங் தங் வீரியிந்த்³ரியங்; யங் ஸதிந்த்³ரியங் தங் ஸதிப³லங் , யங் ஸதிப³லங் தங் ஸதிந்த்³ரியங்; யங் ஸமாதி⁴ந்த்³ரியங் தங் ஸமாதி⁴ப³லங், யங் ஸமாதி⁴ப³லங் தங் ஸமாதி⁴ந்த்³ரியங்; யங் பஞ்ஞிந்த்³ரியங் தங் பஞ்ஞாப³லங், யங் பஞ்ஞாப³லங் தங் பஞ்ஞிந்த்³ரியங். பஞ்சன்னங், பி⁴க்க²வே, இந்த்³ரியானங் பா⁴விதத்தா ப³ஹுலீகதத்தா பி⁴க்கு² ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரதீ’’தி. ததியங்.
4. புப்³ப³கொட்ட²கஸுத்தங்
514. ஏவங் மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி புப்³ப³கொட்ட²கே. தத்ர கோ² ப⁴க³வா ஆயஸ்மந்தங் ஸாரிபுத்தங் ஆமந்தேஸி – ‘‘ஸத்³த³ஹஸி ஸத்³த³ஹாஸி (ஸீ॰ பீ॰) த்வங், ஸாரிபுத்த – ஸத்³தி⁴ந்த்³ரியங் பா⁴விதங் ப³ஹுலீகதங் அமதோக³த⁴ங் ஹோதி அமதபராயணங் அமதபரியோஸானங்…பே॰… பஞ்ஞிந்த்³ரியங் பா⁴விதங் ப³ஹுலீகதங் அமதோக³த⁴ங் ஹோதி அமதபராயணங் அமதபரியோஸான’’ந்தி?
‘‘ந க்²வாஹங் எத்த², ப⁴ந்தே, ப⁴க³வதோ ஸத்³தா⁴ய க³ச்சா²மி – ஸத்³தி⁴ந்த்³ரியங்…பே॰… பஞ்ஞிந்த்³ரியங் பா⁴விதங் ப³ஹுலீகதங் அமதோக³த⁴ங் ஹோதி அமதபராயணங் அமதபரியோஸானங். யேஸஞ்ஹேதங், ப⁴ந்தே, அஞ்ஞாதங் அஸ்ஸ அதி³ட்ட²ங் அவிதி³தங் அஸச்சி²கதங் அப²ஸ்ஸிதங் அபஸ்ஸிதங் (ஸீ॰ ஸ்யா॰ கங்॰ க॰), அபு²ஸிதங் (பீ॰) பஞ்ஞாய, தே தத்த² பரேஸங் ஸத்³தா⁴ய க³ச்செ²ய்யுங் – ஸத்³தி⁴ந்த்³ரியங்…பே॰… பஞ்ஞிந்த்³ரியங் பா⁴விதங் ப³ஹுலீகதங் அமதோக³த⁴ங் ஹோதி அமதபராயணங் அமதபரியோஸானங். யேஸஞ்ச கோ² ஏதங், ப⁴ந்தே, ஞாதங் தி³ட்ட²ங் விதி³தங் ஸச்சி²கதங் ப²ஸ்ஸிதங் பஞ்ஞாய, நிக்கங்கா² தே தத்த² நிப்³பி³சிகிச்சா² – ஸத்³தி⁴ந்த்³ரியங்…பே॰… பஞ்ஞிந்த்³ரியங் பா⁴விதங் ப³ஹுலீகதங் அமதோக³த⁴ங் ஹோதி அமதபராயணங் அமதபரியோஸானங். மய்ஹஞ்ச கோ² ஏதங், ப⁴ந்தே, ஞாதங் தி³ட்ட²ங் விதி³தங் ஸச்சி²கதங் ப²ஸ்ஸிதங் பஞ்ஞாய. நிக்கங்க²வாஹங் தத்த² நிப்³பி³சிகிச்சோ² ஸத்³தி⁴ந்த்³ரியங்…பே॰… பஞ்ஞிந்த்³ரியங் பா⁴விதங் ப³ஹுலீகதங் அமதோக³த⁴ங் ஹோதி அமதபராயணங் அமதபரியோஸான’’ந்தி.
‘‘ஸாது⁴ ஸாது⁴, ஸாரிபுத்த! யேஸஞ்ஹேதங், ஸாரிபுத்த, அஞ்ஞாதங் அஸ்ஸ அதி³ட்ட²ங் அவிதி³தங் அஸச்சி²கதங் அப²ஸ்ஸிதங் பஞ்ஞாய, தே தத்த² பரேஸங் ஸத்³தா⁴ய க³ச்செ²ய்யுங் – ஸத்³தி⁴ந்த்³ரியங் பா⁴விதங் ப³ஹுலீகதங் அமதோக³த⁴ங் ஹோதி அமதபராயணங் அமதபரியோஸானங்…பே॰… பஞ்ஞிந்த்³ரியங் பா⁴விதங் ப³ஹுலீகதங் அமதோக³த⁴ங் ஹோதி அமதபராயணங் அமதபரியோஸானங். யேஸஞ்ச கோ² ஏதங், ஸாரிபுத்த, ஞாதங் தி³ட்ட²ங் விதி³தங் ஸச்சி²கதங் ப²ஸ்ஸிதங் பஞ்ஞாய, நிக்கங்கா² தே தத்த² நிப்³பி³சிகிச்சா² – ஸத்³தி⁴ந்த்³ரியங் பா⁴விதங் ப³ஹுலீகதங் அமதோக³த⁴ங் ஹோதி அமதபராயணங் அமதபரியோஸானங்…பே॰… பஞ்ஞிந்த்³ரியங் பா⁴விதங் ப³ஹுலீகதங் அமதோக³த⁴ங் ஹோதி அமதபராயணங் அமதபரியோஸான’’ந்தி. சதுத்த²ங்.
5. பட²மபுப்³பா³ராமஸுத்தங்
515. ஏவங் மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி புப்³பா³ராமே மிகா³ரமாதுபாஸாதே³. தத்ர கோ² ப⁴க³வா பி⁴க்கூ² ஆமந்தேஸி – ‘‘கதினங் நு கோ², பி⁴க்க²வே, இந்த்³ரியானங் பா⁴விதத்தா ப³ஹுலீகதத்தா கீ²ணாஸவோ பி⁴க்கு² அஞ்ஞங் ப்³யாகரோதி – ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானாமீ’’தி?
ப⁴க³வங்மூலகா நோ, ப⁴ந்தே, த⁴ம்மா…பே॰… ‘‘ஏகஸ்ஸ கோ², பி⁴க்க²வே, இந்த்³ரியஸ்ஸ பா⁴விதத்தா ப³ஹுலீகதத்தா கீ²ணாஸவோ பி⁴க்கு² அஞ்ஞங் ப்³யாகரோதி – ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானாமீதி. கதமஸ்ஸ ஏகஸ்ஸ பஞ்ஞிந்த்³ரியஸ்ஸ பஞ்ஞவதோ , பி⁴க்க²வே, அரியஸாவகஸ்ஸ தத³ன்வயா ஸத்³தா⁴ ஸண்டா²தி, தத³ன்வயங் வீரியங் ஸண்டா²தி, தத³ன்வயா ஸதி ஸண்டா²தி, தத³ன்வயோ ஸமாதி⁴ ஸண்டா²தி. இமஸ்ஸ கோ², பி⁴க்க²வே, ஏகஸ்ஸ இந்த்³ரியஸ்ஸ பா⁴விதத்தா ப³ஹுலீகதத்தா கீ²ணாஸவோ பி⁴க்கு² அஞ்ஞங் ப்³யாகரோதி – ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானாமீ’’தி. பஞ்சமங்.
6. து³தியபுப்³பா³ராமஸுத்தங்
516. தங்யேவ நிதா³னங். ‘‘கதினங் நு கோ², பி⁴க்க²வே, இந்த்³ரியானங் பா⁴விதத்தா ப³ஹுலீகதத்தா கீ²ணாஸவோ பி⁴க்கு² அஞ்ஞங் ப்³யாகரோதி – ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானாமீ’’தி? ப⁴க³வங்மூலகா நோ, ப⁴ந்தே, த⁴ம்மா…பே॰… ‘‘த்³வின்னங் கோ², பி⁴க்க²வே, இந்த்³ரியானங் பா⁴விதத்தா ப³ஹுலீகதத்தா கீ²ணாஸவோ பி⁴க்கு² அஞ்ஞங் ப்³யாகரோதி – ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானாமீதி. கதமேஸங் த்³வின்னங்? அரியாய ச பஞ்ஞாய, அரியாய ச விமுத்தியா. யா ஹிஸ்ஸ, பி⁴க்க²வே, அரியா பஞ்ஞா தத³ஸ்ஸ பஞ்ஞிந்த்³ரியங். யா ஹிஸ்ஸ, பி⁴க்க²வே, அரியா விமுத்தி தத³ஸ்ஸ ஸமாதி⁴ந்த்³ரியங். இமேஸங் கோ², பி⁴க்க²வே, த்³வின்னங் இந்த்³ரியானங் பா⁴விதத்தா ப³ஹுலீகதத்தா கீ²ணாஸவோ பி⁴க்கு² அஞ்ஞங் ப்³யாகரோதி – ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானாமீ’’தி. ச²ட்ட²ங்.
7. ததியபுப்³பா³ராமஸுத்தங்
517. தங்யேவ நிதா³னங். ‘‘கதினங் நு கோ², பி⁴க்க²வே, இந்த்³ரியானங் பா⁴விதத்தா ப³ஹுலீகதத்தா கீ²ணாஸவோ பி⁴க்கு² அஞ்ஞங் ப்³யாகரோதி – ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானாமீ’’தி? ப⁴க³வங்மூலகா நோ, ப⁴ந்தே, த⁴ம்மா…பே॰… ‘‘சதுன்னங் கோ², பி⁴க்க²வே, இந்த்³ரியானங் பா⁴விதத்தா ப³ஹுலீகதத்தா கீ²ணாஸவோ பி⁴க்கு² அஞ்ஞங் ப்³யாகரோதி – ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானாமீதி. கதமேஸங் சதுன்னங்? வீரியிந்த்³ரியஸ்ஸ, ஸதிந்த்³ரியஸ்ஸ, ஸமாதி⁴ந்த்³ரியஸ்ஸ, பஞ்ஞிந்த்³ரியஸ்ஸ – இமேஸங் கோ², பி⁴க்க²வே, சதுன்னங் இந்த்³ரியானங் பா⁴விதத்தா ப³ஹுலீகதத்தா கீ²ணாஸவோ பி⁴க்கு² அஞ்ஞங் ப்³யாகரோதி – ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானாமீ’’தி. ஸத்தமங்.
8. சதுத்த²புப்³பா³ராமஸுத்தங்
518. தங்யேவ நிதா³னங். ‘‘கதினங் நு கோ², பி⁴க்க²வே, இந்த்³ரியானங் பா⁴விதத்தா ப³ஹுலீகதத்தா கீ²ணாஸவோ பி⁴க்கு² அஞ்ஞங் ப்³யாகரோதி – ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானாமீ’’தி? ப⁴க³வங்மூலகா நோ, ப⁴ந்தே, த⁴ம்மா…பே॰… ‘‘பஞ்சன்னங் கோ², பி⁴க்க²வே, இந்த்³ரியானங் பா⁴விதத்தா ப³ஹுலீகதத்தா கீ²ணாஸவோ பி⁴க்கு² அஞ்ஞங் ப்³யாகரோதி – ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானாமீதி. கதமேஸங் பஞ்சன்னங்? ஸத்³தி⁴ந்த்³ரியஸ்ஸ , வீரியிந்த்³ரியஸ்ஸ, ஸதிந்த்³ரியஸ்ஸ, ஸமாதி⁴ந்த்³ரியஸ்ஸ, பஞ்ஞிந்த்³ரியஸ்ஸ – இமேஸங் கோ², பி⁴க்க²வே, பஞ்சன்னங் இந்த்³ரியானங் பா⁴விதத்தா ப³ஹுலீகதத்தா கீ²ணாஸவோ பி⁴க்கு² அஞ்ஞங் ப்³யாகரோதி – ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானாமீ’’தி. அட்ட²மங்.
9. பிண்டோ³லபா⁴ரத்³வாஜஸுத்தங்
519. ஏவங் மே ஸுதங் – ஏகங் ஸமயங் ப⁴க³வா கோஸம்பி³யங் விஹரதி கோ⁴ஸிதாராமே. தேன கோ² பன ஸமயேன ஆயஸ்மதா பிண்டோ³லபா⁴ரத்³வாஜேன அஞ்ஞா ப்³யாகதா ஹோதி – ‘‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங் , நாபரங் இத்த²த்தாயாதி பஜானாமீ’’தி. அத² கோ² ஸம்ப³ஹுலா பி⁴க்கூ² யேன ப⁴க³வா தேனுபஸங்கமிங்ஸு; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³ங்ஸு. ஏகமந்தங் நிஸின்னா கோ² தே பி⁴க்கூ² ப⁴க³வந்தங் ஏதத³வோசுங் –
‘‘ஆயஸ்மதா, ப⁴ந்தே, பிண்டோ³லபா⁴ரத்³வாஜேன அஞ்ஞா ப்³யாகதா – ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானாமீதி. கிங் நு கோ², ப⁴ந்தே, அத்த²வஸங் ஸம்பஸ்ஸமானேன ஆயஸ்மதா பிண்டோ³லபா⁴ரத்³வாஜேன அஞ்ஞா ப்³யாகதா – ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானாமீ’’தி?
‘‘திண்ணன்னங் கோ², பி⁴க்க²வே, இந்த்³ரியானங் பா⁴விதத்தா ப³ஹுலீகதத்தா பிண்டோ³லபா⁴ரத்³வாஜேன பி⁴க்கு²னா அஞ்ஞா ப்³யாகதா – ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானாமீதி. கதமேஸங் திண்ணன்னங்? ஸதிந்த்³ரியஸ்ஸ, ஸமாதி⁴ந்த்³ரியஸ்ஸ, பஞ்ஞிந்த்³ரியஸ்ஸ – இமேஸங் கோ², பி⁴க்க²வே, திண்ணன்னங் இந்த்³ரியானங் பா⁴விதத்தா ப³ஹுலீகதத்தா பிண்டோ³லபா⁴ரத்³வாஜேன பி⁴க்கு²னா அஞ்ஞா ப்³யாகதா – ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானாமீதி. இமானி ச, பி⁴க்க²வே, தீணிந்த்³ரியானி கிமந்தானி? க²யந்தானி. கிஸ்ஸ க²யந்தானி? ஜாதிஜராமரணஸ்ஸ. ‘ஜாதிஜராமரணங் க²ய’ந்தி கோ², பி⁴க்க²வே, ஸம்பஸ்ஸமானேன பிண்டோ³லபா⁴ரத்³வாஜேன பி⁴க்கு²னா அஞ்ஞா ப்³யாகதா – ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானாமீ’’தி. நவமங்.
10. ஆபணஸுத்தங்
520. ஏவங் மே ஸுதங் – ஏகங் ஸமயங் ப⁴க³வா அங்கே³ஸு விஹரதி ஆபணங் நாம அங்கா³னங் நிக³மோ. தத்ர கோ² ப⁴க³வா ஆயஸ்மந்தங் ஸாரிபுத்தங் ஆமந்தேஸி – ‘‘யோ ஸோ, ஸாரிபுத்த, அரியஸாவகோ ததா²க³தே ஏகந்தக³தோ ஏகந்திக³தோ (ஸீ॰) அபி⁴ப்பஸன்னோ, ந ஸோ ததா²க³தே வா ததா²க³தஸாஸனே வா கங்கெ²ய்ய வா விசிகிச்செ²ய்ய வா’’தி?
‘‘யோ ஸோ, ப⁴ந்தே, அரியஸாவகோ ததா²க³தே ஏகந்தக³தோ அபி⁴ப்பஸன்னோ, ந ஸோ ததா²க³தே வா ததா²க³தஸாஸனே வா கங்கெ²ய்ய வா விசிகிச்செ²ய்ய வா. ஸத்³த⁴ஸ்ஸ ஹி, ப⁴ந்தே, அரியஸாவகஸ்ஸ ஏவங் பாடிகங்க²ங் யங் ஆரத்³த⁴வீரியோ விஹரிஸ்ஸதி – அகுஸலானங் த⁴ம்மானங் பஹானாய, குஸலானங் த⁴ம்மானங் உபஸம்பதா³ய, தா²மவா த³ள்ஹபரக்கமோ அனிக்கி²த்தது⁴ரோ குஸலேஸு த⁴ம்மேஸு. யங் ஹிஸ்ஸ, ப⁴ந்தே, வீரியங் தத³ஸ்ஸ வீரியிந்த்³ரியங்.
‘‘ஸத்³த⁴ஸ்ஸ ஹி , ப⁴ந்தே, அரியஸாவகஸ்ஸ ஆரத்³த⁴வீரியஸ்ஸ ஏதங் பாடிகங்க²ங் யங் ஸதிமா ப⁴விஸ்ஸதி, பரமேன ஸதினேபக்கேன ஸமன்னாக³தோ, சிரகதம்பி சிரபா⁴ஸிதம்பி ஸரிதா அனுஸ்ஸரிதா. யா ஹிஸ்ஸ, ப⁴ந்தே, ஸதி தத³ஸ்ஸ ஸதிந்த்³ரியங்.
‘‘ஸத்³த⁴ஸ்ஸ ஹி, ப⁴ந்தே, அரியஸாவகஸ்ஸ ஆரத்³த⁴வீரியஸ்ஸ உபட்டி²தஸ்ஸதினோ ஏதங் பாடிகங்க²ங் யங் வொஸ்ஸக்³கா³ரம்மணங் கரித்வா லபி⁴ஸ்ஸதி ஸமாதி⁴ங், லபி⁴ஸ்ஸதி சித்தஸ்ஸ ஏகக்³க³தங். யோ ஹிஸ்ஸ, ப⁴ந்தே, ஸமாதி⁴ தத³ஸ்ஸ ஸமாதி⁴ந்த்³ரியங்.
‘‘ஸத்³த⁴ஸ்ஸ ஹி, ப⁴ந்தே, அரியஸாவகஸ்ஸ ஆரத்³த⁴வீரியஸ்ஸ உபட்டி²தஸ்ஸதினோ ஸமாஹிதசித்தஸ்ஸ ஏதங் பாடிகங்க²ங் யங் ஏவங் பஜானிஸ்ஸதி – அனமதக்³கோ³ கோ² ஸங்ஸாரோ. புப்³பா³ கோடி ந பஞ்ஞாயதி அவிஜ்ஜானீவரணானங் ஸத்தானங் தண்ஹாஸங்யோஜனானங் ஸந்தா⁴வதங் ஸங்ஸரதங். அவிஜ்ஜாய த்வேவ தமோகாயஸ்ஸ அஸேஸவிராக³னிரோதோ⁴ ஸந்தமேதங் பத³ங் பணீதமேதங் பத³ங், யதி³த³ங் – ஸப்³ப³ஸங்கா²ரஸமதோ² ஸப்³பூ³பதி⁴படினிஸ்ஸக்³கோ³ தண்ஹாக்க²யோ விராகோ³ நிரோதோ⁴ நிப்³பா³னங் நிப்³பா³னந்தி (?). யா ஹிஸ்ஸ, ப⁴ந்தே, பஞ்ஞா தத³ஸ்ஸ பஞ்ஞிந்த்³ரியங்.
‘‘ஸத்³தோ⁴ ஸோ ஸ கோ² ஸோ (ஸீ॰ ஸ்யா॰ கங்॰), ப⁴ந்தே, அரியஸாவகோ ஏவங் பத³ஹித்வா பத³ஹித்வா ஏவங் ஸரித்வா ஸரித்வா ஏவங் ஸமாத³ஹித்வா ஸமாத³ஹித்வா ஏவங் பஜானித்வா பஜானித்வா ஏவங் அபி⁴ஸத்³த³ஹதி – ‘இமே கோ² தே த⁴ம்மா யே மே புப்³பே³ ஸுதவா அஹேஸுங். தேனாஹங் ஏதரஹி காயேன ச பு²ஸித்வா விஹராமி, பஞ்ஞாய ச அதிவிஜ்ஜ² படிவிஜ்ஜ² (ஸீ॰ க॰) தத³ட்ட²கதா²ஸு பன அதிவிஜ்ஜி²த்வாதி வண்ணிதங் பஸ்ஸாமீ’தி. யா ஹிஸ்ஸ, ப⁴ந்தே, ஸத்³தா⁴ தத³ஸ்ஸ ஸத்³தி⁴ந்த்³ரிய’’ந்தி.
‘‘ஸாது⁴ ஸாது⁴, ஸாரிபுத்த! யோ ஸோ, ஸாரிபுத்த, அரியஸாவகோ ததா²க³தே ஏகந்தக³தோ அபி⁴ப்பஸன்னோ, ந ஸோ ததா²க³தே வா ததா²க³தஸாஸனே வா கங்கெ²ய்ய வா விசிகிச்செ²ய்ய வா. ஸத்³த⁴ஸ்ஸ ஹி, ஸாரிபுத்த, அரியஸாவகஸ்ஸ ஏதங் பாடிகங்க²ங் யங் ஆரத்³த⁴வீரியோ விஹரிஸ்ஸதி – அகுஸலானங் த⁴ம்மானங் பஹானாய, குஸலானங் த⁴ம்மானங் உபஸம்பதா³ய, தா²மவா த³ள்ஹபரக்கமோ அனிக்கி²த்தது⁴ரோ குஸலேஸு த⁴ம்மேஸு. யங் ஹிஸ்ஸ, ஸாரிபுத்த, வீரியங் தத³ஸ்ஸ வீரியிந்த்³ரியங்.
‘‘ஸத்³த⁴ஸ்ஸ ஹி, ஸாரிபுத்த, அரியஸாவகஸ்ஸ ஆரத்³த⁴வீரியஸ்ஸ ஏதங் பாடிகங்க²ங் யங் ஸதிமா ப⁴விஸ்ஸதி, பரமேன ஸதினேபக்கேன ஸமன்னாக³தோ, சிரகதம்பி சிரபா⁴ஸிதம்பி ஸரிதா அனுஸ்ஸரிதா. யா ஹிஸ்ஸ, ஸாரிபுத்த, ஸதி தத³ஸ்ஸ ஸதிந்த்³ரியங்.
‘‘ஸத்³த⁴ஸ்ஸ ஹி, ஸாரிபுத்த, அரியஸாவகஸ்ஸ ஆரத்³த⁴வீரியஸ்ஸ உபட்டி²தஸ்ஸதினோ ஏதங் பாடிகங்க²ங் யங் வொஸ்ஸக்³கா³ரம்மணங் கரித்வா லபி⁴ஸ்ஸதி ஸமாதி⁴ங், லபி⁴ஸ்ஸதி சித்தஸ்ஸ ஏகக்³க³தங். யோ ஹிஸ்ஸ, ஸாரிபுத்த, ஸமாதி⁴ தத³ஸ்ஸ ஸமாதி⁴ந்த்³ரியங்.
‘‘ஸத்³த⁴ஸ்ஸ ஹி, ஸாரிபுத்த, அரியஸாவகஸ்ஸ ஆரத்³த⁴வீரியஸ்ஸ உபட்டி²தஸ்ஸதினோ ஸமாஹிதசித்தஸ்ஸ ஏதங் பாடிகங்க²ங் யங் ஏவங் பஜானிஸ்ஸதி – அனமதக்³கோ³ கோ² ஸங்ஸாரோ. புப்³பா³ கோடி ந பஞ்ஞாயதி அவிஜ்ஜானீவரணானங் ஸத்தானங் தண்ஹாஸங்யோஜனானங் ஸந்தா⁴வதங் ஸங்ஸரதங். அவிஜ்ஜாய த்வேவ தமோகாயஸ்ஸ அஸேஸவிராக³னிரோதோ⁴ ஸந்தமேதங் பத³ங் பணீதமேதங் பத³ங், யதி³த³ங் – ஸப்³ப³ஸங்கா²ரஸமதோ² ஸப்³பூ³பதி⁴படினிஸ்ஸக்³கோ³ தண்ஹாக்க²யோ விராகோ³ நிரோதோ⁴ நிப்³பா³னங். யா ஹிஸ்ஸ, ஸாரிபுத்த, பஞ்ஞா தத³ஸ்ஸ பஞ்ஞிந்த்³ரியங்.
‘‘ஸத்³தோ⁴ ஸோ ஸ கோ² ஸோ (ஸீ॰ ஸ்யா॰ கங்॰ பீ॰), ஸாரிபுத்த, அரியஸாவகோ ஏவங் பத³ஹித்வா பத³ஹித்வா ஏவங் ஸரித்வா ஸரித்வா ஏவங் ஸமாத³ஹித்வா ஸமாத³ஹித்வா ஏவங் பஜானித்வா பஜானித்வா ஏவங் அபி⁴ஸத்³த³ஹதி – ‘இமே கோ² தே த⁴ம்மா யே மே புப்³பே³ ஸுதவா அஹேஸுங். தேனாஹங் ஏதரஹி காயேன ச பு²ஸித்வா விஹராமி, பஞ்ஞாய ச அதிவிஜ்ஜ² படிவிஜ்ஜ² (க॰ ஸீ॰ க॰) பஸ்ஸாமீ’தி. யா ஹிஸ்ஸ, ஸாரிபுத்த, ஸத்³தா⁴ தத³ஸ்ஸ ஸத்³தி⁴ந்த்³ரிய’’ந்தி. த³ஸமங்.
ஜராவக்³கோ³ பஞ்சமோ.
தஸ்ஸுத்³தா³னங் –
ஜரா உண்ணாபோ⁴ ப்³ராஹ்மணோ, ஸாகேதோ புப்³ப³கொட்ட²கோ;
புப்³பா³ராமே ச சத்தாரி, பிண்டோ³லோ ஆபணேன சாதி ஸத்³தே⁴ன தே த³ஸாதி (ஸ்யா॰ கங்॰ க॰).
6. ஸூகரக²தவக்³கோ³
1. ஸாலஸுத்தங்
521. ஏவங் மே ஸுதங் – ஏகங் ஸமயங் ப⁴க³வா கோஸலேஸு விஹரதி ஸாலாய ப்³ராஹ்மணகா³மே. தத்ர கோ² ப⁴க³வா பி⁴க்கூ² ஆமந்தேஸி – ‘‘ஸெய்யதா²பி, பி⁴க்க²வே, யே கேசி திரச்சா²னக³தா பாணா, ஸீஹோ மிக³ராஜா தேஸங் அக்³க³மக்கா²யதி, யதி³த³ங் – தா²மேன ஜவேன ஸூரேன ஸூரியேன (ஸீ॰ ஸ்யா॰ கங்॰); ஏவமேவ கோ², பி⁴க்க²வே, யே கேசி போ³தி⁴பக்கி²யா த⁴ம்மா, பஞ்ஞிந்த்³ரியங் தேஸங் அக்³க³மக்கா²யதி, யதி³த³ங் – போ³தா⁴ய’’.
‘‘கதமே ச, பி⁴க்க²வே, போ³தி⁴பக்கி²யா த⁴ம்மா? ஸத்³தி⁴ந்த்³ரியங், பி⁴க்க²வே, போ³தி⁴பக்கி²யோ த⁴ம்மோ, தங் போ³தா⁴ய ஸங்வத்ததி; வீரியிந்த்³ரியங் போ³தி⁴பக்கி²யோ த⁴ம்மோ, தங் போ³தா⁴ய ஸங்வத்ததி; ஸதிந்த்³ரியங் போ³தி⁴பக்கி²யோ த⁴ம்மோ, தங் போ³தா⁴ய ஸங்வத்ததி; ஸமாதி⁴ந்த்³ரியங் போ³தி⁴பக்கி²யோ த⁴ம்மோ, தங் போ³தா⁴ய ஸங்வத்ததி; பஞ்ஞிந்த்³ரியங் போ³தி⁴பக்கி²யோ த⁴ம்மோ, தங் போ³தா⁴ய ஸங்வத்ததி. ஸெய்யதா²பி , பி⁴க்க²வே, யே கேசி திரச்சா²னக³தா பாணா, ஸீஹோ மிக³ராஜா தேஸங் அக்³க³மக்கா²யதி, யதி³த³ங் – தா²மேன ஜவேன ஸூரேன; ஏவமேவ கோ², பி⁴க்க²வே, யே கேசி போ³தி⁴பக்கி²யா த⁴ம்மா, பஞ்ஞிந்த்³ரியங் தேஸங் அக்³க³மக்கா²யதி, யதி³த³ங் – போ³தா⁴யா’’தி. பட²மங்.
2. மல்லிகஸுத்தங்
522. ஏவங் மே ஸுதங் – ஏகங் ஸமயங் ப⁴க³வா மல்லேஸு மல்லகேஸு (ஸீ॰ ஸ்யா॰ கங்॰), மல்லிகேஸு (க॰) விஹரதி உருவேலகப்பங் நாம மல்லானங் நிக³மோ. தத்ர கோ² ப⁴க³வா பி⁴க்கூ² ஆமந்தேஸி – ‘‘யாவகீவஞ்ச, பி⁴க்க²வே, அரியஸாவகஸ்ஸ அரியஞாணங் ந உப்பன்னங் ஹோதி நேவ தாவ சதுன்னங் இந்த்³ரியானங் ஸண்டி²தி ஹோதி, நேவ தாவ சதுன்னங் இந்த்³ரியானங் அவட்டி²தி ஹோதி. யதோ ச கோ², பி⁴க்க²வே, அரியஸாவகஸ்ஸ அரியஞாணங் உப்பன்னங் ஹோதி, அத² சதுன்னங் இந்த்³ரியானங் ஸண்டி²தி ஹோதி, அத² சதுன்னங் இந்த்³ரியானங் அவட்டி²தி ஹோதி’’.
‘‘ஸெய்யதா²பி, பி⁴க்க²வே, யாவகீவஞ்ச கூடாகா³ரஸ்ஸ கூடங் ந உஸ்ஸிதங் ஹோதி, நேவ தாவ கோ³பானஸீனங் ஸண்டி²தி ஹோதி, நேவ தாவ கோ³பானஸீனங் அவட்டி²தி ஹோதி. யதோ ச கோ², பி⁴க்க²வே, கூடாகா³ரஸ்ஸ கூடங் உஸ்ஸிதங் ஹோதி, அத² கோ³பானஸீனங் ஸண்டி²தி ஹோதி, அத² கோ³பானஸீனங் அவட்டி²தி ஹோதி. ஏவமேவ கோ², பி⁴க்க²வே, யாவகீவஞ்ச அரியஸாவகஸ்ஸ அரியஞாணங் ந உப்பன்னங் ஹோதி, நேவ தாவ சதுன்னங் இந்த்³ரியானங் ஸண்டி²தி ஹோதி, நேவ தாவ சதுன்னங் இந்த்³ரியானங் அவட்டி²தி ஹோதி. யதோ ச கோ², பி⁴க்க²வே, அரியஸாவகஸ்ஸ அரியஞாணங் உப்பன்னங் ஹோதி, அத² சதுன்னங் இந்த்³ரியானங்…பே॰… அவட்டி²தி ஹோதி.
‘‘கதமேஸங் சதுன்னங்? ஸத்³தி⁴ந்த்³ரியஸ்ஸ , வீரியிந்த்³ரியஸ்ஸ, ஸதிந்த்³ரியஸ்ஸ, ஸமாதி⁴ந்த்³ரியஸ்ஸ. பஞ்ஞவதோ, பி⁴க்க²வே, அரியஸாவகஸ்ஸ தத³ன்வயா ஸத்³தா⁴ ஸண்டா²தி, தத³ன்வயங் வீரியங் ஸண்டா²தி, தத³ன்வயா ஸதி ஸண்டா²தி, தத³ன்வயோ ஸமாதி⁴ ஸண்டா²தீ’’தி. து³தியங்.
3. ஸேக²ஸுத்தங்
523. ஏவங் மே ஸுதங் – ஏகங் ஸமயங் ப⁴க³வா கோஸம்பி³யங் விஹரதி கோ⁴ஸிதாராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘அத்தி² நு கோ², பி⁴க்க²வே, பரியாயோ யங் பரியாயங் ஆக³ம்ம ஸேகோ² பி⁴க்கு² ஸேக²பூ⁴மியங் டி²தோ ‘ஸேகொ²ஸ்மீ’தி பஜானெய்ய, அஸேகோ² பி⁴க்கு² அஸேக²பூ⁴மியங் டி²தோ ‘அஸேகொ²ஸ்மீ’தி பஜானெய்யா’’தி?
ப⁴க³வங்மூலகா நோ, ப⁴ந்தே, த⁴ம்மா…பே॰… ‘‘அத்தி², பி⁴க்க²வே, பரியாயோ யங் பரியாயங் ஆக³ம்ம ஸேகோ² பி⁴க்கு² ஸேக²பூ⁴மியங் டி²தோ ‘ஸேகொ²ஸ்மீ’தி பஜானெய்ய, அஸேகோ² பி⁴க்கு² அஸேக²பூ⁴மியங் டி²தோ ‘அஸேகொ²ஸ்மீ’தி பஜானெய்ய’’.
‘‘கதமோ ச, பி⁴க்க²வே, பரியாயோ யங் பரியாயங் ஆக³ம்ம ஸேகோ² பி⁴க்கு² ஸேக²பூ⁴மியங் டி²தோ ‘ஸேகொ²ஸ்மீ’தி பஜானாதி? இத⁴, பி⁴க்க²வே, ஸேகோ² பி⁴க்கு² ‘இத³ங் து³க்க²’ந்தி யதா²பூ⁴தங் பஜானாதி, ‘அயங் து³க்க²ஸமுத³யோ’தி யதா²பூ⁴தங் பஜானாதி, ‘அயங் து³க்க²னிரோதோ⁴’தி யதா²பூ⁴தங் பஜானாதி, ‘அயங் து³க்க²னிரோத⁴கா³மினீ படிபதா³’தி யதா²பூ⁴தங் பஜானாதி – அயம்பி கோ², பி⁴க்க²வே, பரியாயோ யங் பரியாயங் ஆக³ம்ம ஸேகோ² பி⁴க்கு² ஸேக²பூ⁴மியங் டி²தோ ‘ஸேகொ²ஸ்மீ’தி பஜானாதி’’.
‘‘புன சபரங், பி⁴க்க²வே, ஸேகோ² பி⁴க்கு² இதி படிஸஞ்சிக்க²தி – ‘அத்தி² நு கோ² இதோ ப³ஹித்³தா⁴ அஞ்ஞோ ஸமணோ வா ப்³ராஹ்மணோ வா யோ ஏவங் பூ⁴தங் தச்ச²ங் தத²ங் த⁴ம்மங் தே³ஸேதி யதா² ப⁴க³வா’தி? ஸோ ஏவங் பஜானாதி – ‘நத்தி² கோ² இதோ ப³ஹித்³தா⁴ அஞ்ஞோ ஸமணோ வா ப்³ராஹ்மணோ வா யோ ஏவங் பூ⁴தங் தச்ச²ங் தத²ங் த⁴ம்மங் தே³ஸேதி யதா² ப⁴க³வா’தி. அயம்பி கோ², பி⁴க்க²வே, பரியாயோ யங் பரியாயங் ஆக³ம்ம ஸேகோ² பி⁴க்கு² ஸேக²பூ⁴மியங் டி²தோ ‘ஸேகொ²ஸ்மீ’தி பஜானாதி’’.
‘‘புன சபரங், பி⁴க்க²வே, ஸேகோ² பி⁴க்கு² பஞ்சிந்த்³ரியானி பஜானாதி – ஸத்³தி⁴ந்த்³ரியங், வீரியிந்த்³ரியங், ஸதிந்த்³ரியங், ஸமாதி⁴ந்த்³ரியங், பஞ்ஞிந்த்³ரியங் – யங்க³திகானி யங்பரமானி யங்ப²லானி யங்பரியோஸானானி. ந ஹேவ கோ² காயேன பு²ஸித்வா விஹரதி; பஞ்ஞாய ச அதிவிஜ்ஜ² பஸ்ஸதி. அயம்பி கோ², பி⁴க்க²வே, பரியாயோ யங் பரியாயங் ஆக³ம்ம ஸேகோ² பி⁴க்கு² ஸேக²பூ⁴மியங் டி²தோ ‘ஸேகொ²ஸ்மீ’தி பஜானாதி’’.
‘‘கதமோ ச, பி⁴க்க²வே, பரியாயோ யங் பரியாயங் ஆக³ம்ம அஸேகோ² பி⁴க்கு² அஸேக²பூ⁴மியங் டி²தோ ‘அஸேகொ²ஸ்மீ’தி பஜானாதி? இத⁴, பி⁴க்க²வே, அஸேகோ² பி⁴க்கு² பஞ்சிந்த்³ரியானி பஜானாதி – ஸத்³தி⁴ந்த்³ரியங், வீரியிந்த்³ரியங், ஸதிந்த்³ரியங், ஸமாதி⁴ந்த்³ரியங், பஞ்ஞிந்த்³ரியங் – யங்க³திகானி யங்பரமானி யங்ப²லானி யங்பரியோஸானானி. காயேன ச பு²ஸித்வா விஹரதி; பஞ்ஞாய ச அதிவிஜ்ஜ² பஸ்ஸதி. அயம்பி கோ², பி⁴க்க²வே, பரியாயோ யங் பரியாயங் ஆக³ம்ம அஸேகோ² பி⁴க்கு² அஸேக²பூ⁴மியங் டி²தோ ‘அஸேகொ²ஸ்மீ’தி பஜானாதி’’.
‘‘புன சபரங், பி⁴க்க²வே, அஸேகோ² பி⁴க்கு² ச² இந்த்³ரியானி பஜானாதி. ‘சக்கு²ந்த்³ரியங், ஸோதிந்த்³ரியங், கா⁴னிந்த்³ரியங், ஜிவ்ஹிந்த்³ரியங், காயிந்த்³ரியங், மனிந்த்³ரியங் – இமானி கோ² ச² இந்த்³ரியானி ஸப்³பே³ன ஸப்³ப³ங் ஸப்³ப³தா² ஸப்³ப³ங் அபரிஸேஸங் நிருஜ்ஜி²ஸ்ஸந்தி, அஞ்ஞானி ச ச² இந்த்³ரியானி ந குஹிஞ்சி கிஸ்மிஞ்சி உப்பஜ்ஜிஸ்ஸந்தீ’தி பஜானாதி. அயம்பி கோ², பி⁴க்க²வே, பரியாயோ யங் பரியாயங் ஆக³ம்ம அஸேகோ² பி⁴க்கு² அஸேக²பூ⁴மியங் டி²தோ ‘அஸேகொ²ஸ்மீ’தி பஜானாதீ’’தி. ததியங்.
4. பத³ஸுத்தங்
524. ‘‘ஸெய்யதா²பி , பி⁴க்க²வே, யானி கானிசி ஜங்க³லானங் ஜங்க³மானங் (ஸீ॰ பீ॰) பாணானங் பத³ஜாதானி ஸப்³பா³னி தானி ஹத்தி²பதே³ ஸமோதா⁴னங் க³ச்ச²ந்தி, ஹத்தி²பத³ங் தேஸங் அக்³க³மக்கா²யதி, யதி³த³ங் – மஹந்தத்தேன; ஏவமேவ கோ², பி⁴க்க²வே, யானி கானிசி பதா³னி போ³தா⁴ய ஸங்வத்தந்தி , பஞ்ஞிந்த்³ரியங் பத³ங் தேஸங் அக்³க³மக்கா²யதி, யதி³த³ங் – போ³தா⁴ய. கதமானி ச, பி⁴க்க²வே, பதா³னி போ³தா⁴ய ஸங்வத்தந்தி? ஸத்³தி⁴ந்த்³ரியங், பி⁴க்க²வே, பத³ங், தங் போ³தா⁴ய ஸங்வத்ததி; வீரியிந்த்³ரியங் பத³ங், தங் போ³தா⁴ய ஸங்வத்ததி; ஸதிந்த்³ரியங் பத³ங், தங் போ³தா⁴ய ஸங்வத்ததி; ஸமாதி⁴ந்த்³ரியங் பத³ங், தங் போ³தா⁴ய ஸங்வத்ததி; பஞ்ஞிந்த்³ரியங் பத³ங், தங் போ³தா⁴ய ஸங்வத்ததி. ஸெய்யதா²பி, பி⁴க்க²வே, யானி கானிசி ஜங்க³லானங் பாணானங் பத³ஜாதானி ஸப்³பா³னி தானி ஹத்தி²பதே³ ஸமோதா⁴னங் க³ச்ச²ந்தி, ஹத்தி²பத³ங் தேஸங் அக்³க³மக்கா²யதி, யதி³த³ங் – மஹந்தத்தேன; ஏவமேவ கோ², பி⁴க்க²வே, யானி கானிசி பதா³னி போ³தா⁴ய ஸங்வத்தந்தி, பஞ்ஞிந்த்³ரியங் பத³ங் தேஸங் அக்³க³மக்கா²யதி, யதி³த³ங் – போ³தா⁴யா’’தி. சதுத்த²ங்.
5. ஸாரஸுத்தங்
525. ‘‘ஸெய்யதா²பி, பி⁴க்க²வே, யே கேசி ஸாரக³ந்தா⁴, லோஹிதசந்த³னங் தேஸங் அக்³க³மக்கா²யதி; ஏவமேவ கோ² பி⁴க்க²வே, யே கேசி போ³தி⁴பக்கி²யா த⁴ம்மா , பஞ்ஞிந்த்³ரியங் தேஸங் அக்³க³மக்கா²யதி, யதி³த³ங் – போ³தா⁴ய. கதமே ச, பி⁴க்க²வே, போ³தி⁴பக்கி²யா த⁴ம்மா? ஸத்³தி⁴ந்த்³ரியங், பி⁴க்க²வே, போ³தி⁴பக்கி²யோ த⁴ம்மோ, தங் போ³தா⁴ய ஸங்வத்ததி. வீரியிந்த்³ரியங்…பே॰… ஸதிந்த்³ரியங் …பே॰… ஸமாதி⁴ந்த்³ரியங்…பே॰… பஞ்ஞிந்த்³ரியங் போ³தி⁴பக்கி²யோ த⁴ம்மோ, தங் போ³தா⁴ய ஸங்வத்ததி. ஸெய்யதா²பி, பி⁴க்க²வே, யே கேசி ஸாரக³ந்தா⁴, லோஹிதசந்த³னங் தேஸங் அக்³க³மக்கா²யதி; ஏவமேவ கோ², பி⁴க்க²வே, யே கேசி போ³தி⁴பக்கி²யா த⁴ம்மா, பஞ்ஞிந்த்³ரியங் தேஸங் அக்³க³மக்கா²யதி, யதி³த³ங் – போ³தா⁴யா’’தி. பஞ்சமங்.
6. பதிட்டி²தஸுத்தங்
526. ‘‘ஏகத⁴ம்மே பதிட்டி²தஸ்ஸ, பி⁴க்க²வே, பி⁴க்கு²னோ பஞ்சிந்த்³ரியானி பா⁴விதானி ஹொந்தி ஸுபா⁴விதானி. கதமஸ்மிங் ஏகத⁴ம்மே? அப்பமாதே³. கதமோ ச பி⁴க்க²வே, அப்பமாதோ³? இத⁴, பி⁴க்க²வே, பி⁴க்கு² சித்தங் ரக்க²தி ஆஸவேஸு ச ஸாஸவேஸு ச த⁴ம்மேஸு. தஸ்ஸ சித்தங் ரக்க²தோ ஆஸவேஸு ச ஸாஸவேஸு ச த⁴ம்மேஸு ஸத்³தி⁴ந்த்³ரியம்பி பா⁴வனாபாரிபூரிங் க³ச்ச²தி. வீரியிந்த்³ரியம்பி பா⁴வனாபாரிபூரிங் க³ச்ச²தி. ஸதிந்த்³ரியம்பி பா⁴வனாபாரிபூரிங் க³ச்ச²தி. ஸமாதி⁴ந்த்³ரியம்பி பா⁴வனாபாரிபூரிங் க³ச்ச²தி. பஞ்ஞிந்த்³ரியம்பி பா⁴வனாபாரிபூரிங் க³ச்ச²தி. ஏவம்பி கோ², பி⁴க்க²வே, ஏகத⁴ம்மே பதிட்டி²தஸ்ஸ பி⁴க்கு²னோ பஞ்சிந்த்³ரியானி பா⁴விதானி ஹொந்தி ஸுபா⁴விதானீ’’தி. ச²ட்ட²ங்.
7. ஸஹம்பதிப்³ரஹ்மஸுத்தங்
527. ஏகங் ஸமயங் ப⁴க³வா உருவேலாயங் விஹரதி நஜ்ஜா நேரஞ்ஜராய தீரே அஜபாலனிக்³ரோதே⁴ பட²மாபி⁴ஸம்பு³த்³தோ⁴. அத² கோ² ப⁴க³வதோ ரஹோக³தஸ்ஸ படிஸல்லீனஸ்ஸ ஏவங் சேதஸோ பரிவிதக்கோ உத³பாதி³ – ‘‘பஞ்சிந்த்³ரியானி பா⁴விதானி ப³ஹுலீகதானி அமதோக³தா⁴னி ஹொந்தி அமதபராயணானி அமதபரியோஸானானி. கதமானி பஞ்ச? ஸத்³தி⁴ந்த்³ரியங் பா⁴விதங் ப³ஹுலீகதங் அமதோக³த⁴ங் ஹோதி அமதபராயணங் அமதபரியோஸானங். வீரியிந்த்³ரியங்…பே॰… ஸதிந்த்³ரியங்…பே॰… ஸமாதி⁴ந்த்³ரியங்…பே॰… பஞ்ஞிந்த்³ரியங் பா⁴விதங் ப³ஹுலீகதங் அமதோக³த⁴ங் ஹோதி அமதபராயணங் அமதபரியோஸானங். இமானி பஞ்சிந்த்³ரியானி பா⁴விதானி ப³ஹுலீகதானி அமதோக³தா⁴னி ஹொந்தி அமதபராயணானி அமதபரியோஸானானீ’’தி.
அத² கோ² ப்³ரஹ்மா ஸஹம்பதி ப⁴க³வதோ சேதஸா சேதோபரிவிதக்கமஞ்ஞாய – ஸெய்யதா²பி நாம ப³லவா புரிஸோ ஸமிஞ்ஜிதங் வா பா³ஹங் பஸாரெய்ய, பஸாரிதங் வா பா³ஹங் ஸமிஞ்ஜெய்ய; ஏவமேவ ப்³ரஹ்மலோகே அந்தரஹிதோ ப⁴க³வதோ புரதோ பாதுரஹோஸி. அத² கோ² ப்³ரஹ்மா ஸஹம்பதி ஏகங்ஸங் உத்தராஸங்க³ங் கரித்வா யேன ப⁴க³வா தேனஞ்ஜலிங் பணாமெத்வா ப⁴க³வந்தங் ஏதத³வோச – ‘‘ஏவமேதங், ப⁴க³வா, ஏவமேதங் ஸுக³த! பஞ்சிந்த்³ரியானி பா⁴விதானி ப³ஹுலீகதானி அமதோக³தா⁴னி ஹொந்தி அமதபராயணானி அமதபரியோஸானானி. கதமானி பஞ்ச? ஸத்³தி⁴ந்த்³ரியங் பா⁴விதங் ப³ஹுலீகதங் அமதோக³த⁴ங் ஹோதி அமதபராயணங் அமதபரியோஸானங்…பே॰… பஞ்ஞிந்த்³ரியங் பா⁴விதங் ப³ஹுலீகதங் அமதோக³த⁴ங் ஹோதி அமதபராயணங் அமதபரியோஸானங். இமானி பஞ்சிந்த்³ரியானி பா⁴விதானி ப³ஹுலீகதானி அமதோக³தா⁴னி ஹொந்தி அமதபராயணானி அமதபரியோஸானானி’’.
‘‘பூ⁴தபுப்³பா³ஹங் , ப⁴ந்தே, கஸ்ஸபே ஸம்மாஸம்பு³த்³தே⁴ ப்³ரஹ்மசரியங் அசரிங். தத்ரபி மங் ஏவங் ஜானந்தி – ‘ஸஹகோ பி⁴க்கு², ஸஹகோ பி⁴க்கூ²’தி. ஸோ க்²வாஹங், ப⁴ந்தே, இமேஸங்யேவ பஞ்சன்னங் இந்த்³ரியானங் பா⁴விதத்தா ப³ஹுலீகதத்தா காமேஸு காமச்ச²ந்த³ங் விராஜெத்வா காயஸ்ஸ பே⁴தா³ பரங் மரணா ஸுக³திங் ப்³ரஹ்மலோகங் உபபன்னோ. தத்ரபி மங் ஏவங் ஜானந்தி – ‘ப்³ரஹ்மா ஸஹம்பதி, ப்³ரஹ்மா ஸஹம்பதீ’’’தி. ‘‘ஏவமேதங், ப⁴க³வா, ஏவமேதங் ஸுக³த! அஹமேதங் ஜானாமி, அஹமேதங் பஸ்ஸாமி யதா² இமானி பஞ்சிந்த்³ரியானி பா⁴விதானி ப³ஹுலீகதானி அமதோக³தா⁴னி ஹொந்தி அமதபராயணானி அமதபரியோஸானானீ’’தி. ஸத்தமங்.
8. ஸூகரக²தஸுத்தங்
528. ஏகங் ஸமயங் ப⁴க³வா ராஜக³ஹே விஹரதி கி³ஜ்ஜ²கூடே பப்³ப³தே ஸூகரக²தாயங். தத்ர கோ² ப⁴க³வா ஆயஸ்மந்தங் ஸாரிபுத்தங் ஆமந்தேஸி – ‘‘கிங் நு கோ², ஸாரிபுத்த, அத்த²வஸங் ஸம்பஸ்ஸமானோ கீ²ணாஸவோ பி⁴க்கு² ததா²க³தே வா ததா²க³தஸாஸனே வா பரமனிபச்சகாரங் பவத்தமானோ பவத்ததீ’’தி பவத்தேதீதி (ஸீ॰)? ‘‘அனுத்தரஞ்ஹி , ப⁴ந்தே, யோக³க்கே²மங் ஸம்பஸ்ஸமானோ கீ²ணாஸவோ பி⁴க்கு² ததா²க³தே வா ததா²க³தஸாஸனே வா பரமனிபச்சகாரங் பவத்தமானோ பவத்ததீ’’தி. ‘‘ஸாது⁴ ஸாது⁴, ஸாரிபுத்த! அனுத்தரஞ்ஹி, ஸாரிபுத்த, யோக³க்கே²மங் ஸம்பஸ்ஸமானோ கீ²ணாஸவோ பி⁴க்கு² ததா²க³தே வா ததா²க³தஸாஸனே வா பரமனிபச்சகாரங் பவத்தமானோ பவத்ததீ’’தி.
‘‘கதமோ ச, ஸாரிபுத்த, அனுத்தரோ யோக³க்கே²மோ யங் ஸம்பஸ்ஸமானோ கீ²ணாஸவோ பி⁴க்கு² ததா²க³தே வா ததா²க³தஸாஸனே வா பரமனிபச்சகாரங் பவத்தமானோ பவத்ததீ’’தி? ‘‘இத⁴, ப⁴ந்தே, கீ²ணாஸவோ பி⁴க்கு² ஸத்³தி⁴ந்த்³ரியங் பா⁴வேதி உபஸமகா³மிங் ஸம்போ³த⁴கா³மிங், வீரியிந்த்³ரியங் பா⁴வேதி…பே॰… ஸதிந்த்³ரியங் பா⁴வேதி…பே॰… ஸமாதி⁴ந்த்³ரியங் பா⁴வேதி…பே॰… பஞ்ஞிந்த்³ரியங் பா⁴வேதி உபஸமகா³மிங் ஸம்போ³த⁴கா³மிங். அயங் கோ², ப⁴ந்தே, அனுத்தரோ யோக³க்கே²மோ யங் ஸம்பஸ்ஸமானோ கீ²ணாஸவோ பி⁴க்கு² ததா²க³தே வா ததா²க³தஸாஸனே வா பரமனிபச்சகாரங் பவத்தமானோ பவத்ததீ’’தி. ‘‘ஸாது⁴ ஸாது⁴, ஸாரிபுத்த! ஏஸோ ஹி, ஸாரிபுத்த, அனுத்தரோ யோக³க்கே²மோ யங் ஸம்பஸ்ஸமானோ கீ²ணாஸவோ பி⁴க்கு² ததா²க³தே வா ததா²க³தஸாஸனே வா பரமனிபச்சகாரங் பவத்தமானோ பவத்ததீ’’தி.
‘‘கதமோ ச, ஸாரிபுத்த, பரமனிபச்சகாரோ யங் கீ²ணாஸவோ பி⁴க்கு² ததா²க³தே வா ததா²க³தஸாஸனே வா பரமனிபச்சகாரங் பவத்தமானோ பவத்ததீ’’தி? ‘‘இத⁴, ப⁴ந்தே, கீ²ணாஸவோ பி⁴க்கு² ஸத்த²ரி ஸகா³ரவோ விஹரதி ஸப்பதிஸ்ஸோ ஸப்படிஸ்ஸோ (ஸ்யா॰ கங்॰ க॰), த⁴ம்மே ஸகா³ரவோ விஹரதி ஸப்பதிஸ்ஸோ, ஸங்கே⁴ ஸகா³ரவோ விஹரதி ஸப்பதிஸ்ஸோ, ஸிக்கா²ய ஸகா³ரவோ விஹரதி ஸப்பதிஸ்ஸோ, ஸமாதி⁴ஸ்மிங் ஸகா³ரவோ விஹரதி ஸப்பதிஸ்ஸோ. அயங் கோ², ப⁴ந்தே, பரமனிபச்சகாரோ யங் கீ²ணாஸவோ பி⁴க்கு² ததா²க³தே வா ததா²க³தஸாஸனே வா பரமனிபச்சகாரங் பவத்தமானோ பவத்ததீ’’தி. ‘‘ஸாது⁴ ஸாது⁴, ஸாரிபுத்த! ஏஸோ ஹி , ஸாரிபுத்த, பரமனிபச்சகாரோ யங் கீ²ணாஸவோ பி⁴க்கு² ததா²க³தே வா ததா²க³தஸாஸனே வா பரமனிபச்சகாரங் பவத்தமானோ பவத்ததீ’’தி. அட்ட²மங்.
9. பட²மஉப்பாத³ஸுத்தங்
529. ஸாவத்தி²னிதா³னங். ‘‘பஞ்சிமானி, பி⁴க்க²வே, இந்த்³ரியானி பா⁴விதானி ப³ஹுலீகதானி அனுப்பன்னானி உப்பஜ்ஜந்தி, நாஞ்ஞத்ர ததா²க³தஸ்ஸ பாதுபா⁴வா அரஹதோ ஸம்மாஸம்பு³த்³த⁴ஸ்ஸ. கதமானி பஞ்ச? ஸத்³தி⁴ந்த்³ரியங், வீரியிந்த்³ரியங், ஸதிந்த்³ரியங், ஸமாதி⁴ந்த்³ரியங், பஞ்ஞிந்த்³ரியங் – இமானி கோ², பி⁴க்க²வே, பஞ்சிந்த்³ரியானி பா⁴விதானி ப³ஹுலீகதானி அனுப்பன்னானி உப்பஜ்ஜந்தி, நாஞ்ஞத்ர ததா²க³தஸ்ஸ பாதுபா⁴வா அரஹதோ ஸம்மாஸம்பு³த்³த⁴ஸ்ஸா’’தி. நவமங்.
10. து³தியஉப்பாத³ஸுத்தங்
530. ‘‘பஞ்சிமானி , பி⁴க்க²வே, இந்த்³ரியானி பா⁴விதானி ப³ஹுலீகதானி அனுப்பன்னானி உப்பஜ்ஜந்தி, நாஞ்ஞத்ர ஸுக³தவினயா. கதமானி பஞ்ச? ஸத்³தி⁴ந்த்³ரியங், வீரியிந்த்³ரியங், ஸதிந்த்³ரியங், ஸமாதி⁴ந்த்³ரியங், பஞ்ஞிந்த்³ரியங் – இமானி கோ², பி⁴க்க²வே, பஞ்சிந்த்³ரியானி பா⁴விதானி ப³ஹுலீகதானி அனுப்பன்னானி உப்பஜ்ஜந்தி, நாஞ்ஞத்ர ஸுக³தவினயா’’தி. த³ஸமங்.
ஸூகரக²தவக்³கோ³ ச²ட்டோ².
தஸ்ஸுத்³தா³னங் –
ஸாலங் மல்லிகங் ஸேகோ² ச, பத³ங் ஸாரங் பதிட்டி²தங்;
ப்³ரஹ்மஸூகரக²தாயோ, உப்பாதா³ அபரே து³வேதி.
7. போ³தி⁴பக்கி²யவக்³கோ³
1. ஸங்யோஜனஸுத்தங்
531. ஸாவத்தி²னிதா³னங் . ‘‘பஞ்சிமானி, பி⁴க்க²வே, இந்த்³ரியானி பா⁴விதானி ப³ஹுலீகதானி ஸங்யோஜனப்பஹானாய ஸங்யோஜனானங் பஹானாய (ஸ்யா॰ க॰) ஸங்வத்தந்தி. கதமானி பஞ்ச? ஸத்³தி⁴ந்த்³ரியங்…பே॰… பஞ்ஞிந்த்³ரியங் – இமானி கோ², பி⁴க்க²வே, பஞ்சிந்த்³ரியானி பா⁴விதானி ப³ஹுலீகதானி ஸங்யோஜனப்பஹானாய ஸங்வத்தந்தீ’’தி. பட²மங்.
2. அனுஸயஸுத்தங்
532. ‘‘பஞ்சிமானி , பி⁴க்க²வே, இந்த்³ரியானி பா⁴விதானி ப³ஹுலீகதானி அனுஸயஸமுக்³கா⁴தாய ஸங்வத்தந்தி. கதமானி பஞ்ச? ஸத்³தி⁴ந்த்³ரியங்…பே॰… பஞ்ஞிந்த்³ரியங் – இமானி கோ² , பி⁴க்க²வே, பஞ்சிந்த்³ரியானி பா⁴விதானி ப³ஹுலீகதானி அனுஸயஸமுக்³கா⁴தாய ஸங்வத்தந்தீ’’தி. து³தியங்.
3. பரிஞ்ஞாஸுத்தங்
533. ‘‘பஞ்சிமானி, பி⁴க்க²வே, இந்த்³ரியானி பா⁴விதானி ப³ஹுலீகதானி அத்³தா⁴னபரிஞ்ஞாய ஸங்வத்தந்தி. கதமானி பஞ்ச? ஸத்³தி⁴ந்த்³ரியங்…பே॰… பஞ்ஞிந்த்³ரியங் – இமானி கோ², பி⁴க்க²வே, பஞ்சிந்த்³ரியானி பா⁴விதானி ப³ஹுலீகதானி அத்³தா⁴னபரிஞ்ஞாய ஸங்வத்தந்தீ’’தி. ததியங்.
4. ஆஸவக்க²யஸுத்தங்
534. ‘‘பஞ்சிமானி, பி⁴க்க²வே, இந்த்³ரியானி பா⁴விதானி ப³ஹுலீகதானி ஆஸவானங் க²யாய ஸங்வத்தந்தி. கதமானி பஞ்ச? ஸத்³தி⁴ந்த்³ரியங்…பே॰… பஞ்ஞிந்த்³ரியங் – இமானி கோ², பி⁴க்க²வே, பஞ்சிந்த்³ரியானி பா⁴விதானி ப³ஹுலீகதானி ஆஸவானங் க²யாய ஸங்வத்தந்தீ’’தி.
‘‘பஞ்சிமானி, பி⁴க்க²வே, இந்த்³ரியானி பா⁴விதானி ப³ஹுலீகதானி ஸங்யோஜனப்பஹானாய ஸங்வத்தந்தி, அனுஸயஸமுக்³கா⁴தாய ஸங்வத்தந்தி, அத்³தா⁴னபரிஞ்ஞாய ஸங்வத்தந்தி, ஆஸவானங் க²யாய ஸங்வத்தந்தி. கதமானி பஞ்ச? ஸத்³தி⁴ந்த்³ரியங்…பே॰… பஞ்ஞிந்த்³ரியங் – இமானி கோ², பி⁴க்க²வே, பஞ்சிந்த்³ரியானி பா⁴விதானி ப³ஹுலீகதானி ஸங்யோஜனப்பஹானாய ஸங்வத்தந்தி, அனுஸயஸமுக்³கா⁴தாய ஸங்வத்தந்தி, அத்³தா⁴னபரிஞ்ஞாய ஸங்வத்தந்தி, ஆஸவானங் க²யாய ஸங்வத்தந்தீ’’தி. சதுத்த²ங்.
5. பட²மப²லஸுத்தங்
535. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸத்³தி⁴ந்த்³ரியங்…பே॰… பஞ்ஞிந்த்³ரியங் – இமானி கோ², பி⁴க்க²வே, பஞ்சிந்த்³ரியானி. இமேஸங் கோ², பி⁴க்க²வே, பஞ்சன்னங் இந்த்³ரியானங் பா⁴விதத்தா ப³ஹுலீகதத்தா த்³வின்னங் ப²லானங் அஞ்ஞதரங் ப²லங் பாடிகங்க²ங் – தி³ட்டே²வ த⁴ம்மே அஞ்ஞா, ஸதி வா உபாதி³ஸேஸே அனாகா³மிதா’’தி. பஞ்சமங்.
6. து³தியப²லஸுத்தங்
536. ‘‘பஞ்சிமானி , பி⁴க்க²வே, இந்த்³ரியானி. கதமானி பஞ்ச? ஸத்³தி⁴ந்த்³ரியங்…பே॰… பஞ்ஞிந்த்³ரியங் – இமானி கோ², பி⁴க்க²வே, பஞ்சிந்த்³ரியானி. இமேஸங் கோ², பி⁴க்க²வே, பஞ்சன்னங் இந்த்³ரியானங் பா⁴விதத்தா ப³ஹுலீகதத்தா ஸத்த ப²லா ஸத்தானிஸங்ஸா பாடிகங்கா². கதமே ஸத்த ப²லா ஸத்தானிஸங்ஸா? தி³ட்டே²வ த⁴ம்மே படிகச்ச அஞ்ஞங் ஆராதே⁴தி, நோ சே தி³ட்டே²வ த⁴ம்மே படிகச்ச அஞ்ஞங் ஆராதே⁴தி, அத² மரணகாலே அஞ்ஞங் ஆராதே⁴தி. நோ சே தி³ட்டே²வ த⁴ம்மே அஞ்ஞங் ஆராதே⁴தி, நோ சே மரணகாலே அஞ்ஞங் ஆராதே⁴தி, அத² பஞ்சன்னங் ஓரம்பா⁴கி³யானங் ஸங்யோஜனானங் பரிக்க²யா அந்தராபரினிப்³பா³யீ ஹோதி, உபஹச்சபரினிப்³பா³யீ ஹோதி, அஸங்கா²ரபரினிப்³பா³யீ ஹோதி, ஸஸங்கா²ரபரினிப்³பா³யீ ஹோதி, உத்³த⁴ங்ஸோதோ ஹோதி அகனிட்ட²கா³மீ. இமேஸங் கோ², பி⁴க்க²வே, பஞ்சன்னங் இந்த்³ரியானங் பா⁴விதத்தா ப³ஹுலீகதத்தா இமே ஸத்த ப²லா ஸத்தானிஸங்ஸா பாடிகங்கா²’’தி. ச²ட்ட²ங்.
7. பட²மருக்க²ஸுத்தங்
537. ‘‘ஸெய்யதா²பி பி⁴க்க²வே, யே கேசி ஜம்பு³தீ³பகா ருக்கா², ஜம்பூ³ தேஸங் அக்³க³மக்கா²யதி; ஏவமேவ கோ² பி⁴க்க²வே, யே கேசி போ³தி⁴பக்கி²யா த⁴ம்மா, பஞ்ஞிந்த்³ரியங் தேஸங் அக்³க³மக்கா²யதி, யதி³த³ங் – போ³தா⁴ய. கதமே ச, பி⁴க்க²வே, போ³தி⁴பக்கி²யா த⁴ம்மா? ஸத்³தி⁴ந்த்³ரியங், பி⁴க்க²வே, போ³தி⁴பக்கி²யோ த⁴ம்மோ, தங் போ³தா⁴ய ஸங்வத்ததி. வீரியிந்த்³ரியங்…பே॰… ஸதிந்த்³ரியங்…பே॰… ஸமாதி⁴ந்த்³ரியங்…பே॰… பஞ்ஞிந்த்³ரியங் போ³தி⁴பக்கி²யோ த⁴ம்மோ, தங் போ³தா⁴ய ஸங்வத்ததி. ஸெய்யதா²பி, பி⁴க்க²வே, யே கேசி ஜம்பு³தீ³பகா ருக்கா², ஜம்பூ³ தேஸங் அக்³க³மக்கா²யதி; ஏவமேவ கோ², பி⁴க்க²வே, யே கேசி போ³தி⁴பக்கி²யா த⁴ம்மா, பஞ்ஞிந்த்³ரியங் தேஸங் அக்³க³மக்கா²யதி, யதி³த³ங் – போ³தா⁴யா’’தி. ஸத்தமங்.
8. து³தியருக்க²ஸுத்தங்
538. ‘‘ஸெய்யதா²பி , பி⁴க்க²வே, யே கேசி தே³வானங் தாவதிங்ஸானங் ருக்கா², பாரிச²த்தகோ தேஸங் அக்³க³மக்கா²யதி; ஏவமேவ கோ², பி⁴க்க²வே, யே கேசி போ³தி⁴பக்கி²யா த⁴ம்மா, பஞ்ஞிந்த்³ரியங் தேஸங் அக்³க³மக்கா²யதி, யதி³த³ங் – போ³தா⁴ய. கதமே ச, பி⁴க்க²வே, போ³தி⁴பக்கி²யா த⁴ம்மா? ஸத்³தி⁴ந்த்³ரியங் , பி⁴க்க²வே, போ³தி⁴பக்கி²யோ த⁴ம்மோ, தங் போ³தா⁴ய ஸங்வத்ததி. வீரியிந்த்³ரியங்…பே॰… ஸதிந்த்³ரியங்…பே॰… ஸமாதி⁴ந்த்³ரியங்…பே॰… பஞ்ஞிந்த்³ரியங் போ³தி⁴பக்கி²யோ த⁴ம்மோ, தங் போ³தா⁴ய ஸங்வத்ததி. ஸெய்யதா²பி, பி⁴க்க²வே , யே கேசி தே³வானங் தாவதிங்ஸானங் ருக்கா², பாரிச²த்தகோ தேஸங் அக்³க³மக்கா²யதி; ஏவமேவ கோ², பி⁴க்க²வே, யே கேசி போ³தி⁴பக்கி²யா த⁴ம்மா, பஞ்ஞிந்த்³ரியங் தேஸங் அக்³க³மக்கா²யதி, யதி³த³ங் – போ³தா⁴யா’’தி. அட்ட²மங்.
9. ததியருக்க²ஸுத்தங்
539. ‘‘ஸெய்யதா²பி, பி⁴க்க²வே, யே கேசி அஸுரானங் ருக்கா², சித்தபாடலி தேஸங் அக்³க³மக்கா²யதி; ஏவமேவ கோ², பி⁴க்க²வே, யே கேசி போ³தி⁴பக்கி²யா த⁴ம்மா, பஞ்ஞிந்த்³ரியங் தேஸங் அக்³க³மக்கா²யதி, யதி³த³ங் – போ³தா⁴ய. கதமே ச, பி⁴க்க²வே, போ³தி⁴பக்கி²யா த⁴ம்மா? ஸத்³தி⁴ந்த்³ரியங், பி⁴க்க²வே, போ³தி⁴பக்கி²யோ த⁴ம்மோ, தங் போ³தா⁴ய ஸங்வத்ததி…பே॰… பஞ்ஞிந்த்³ரியங் போ³தி⁴பக்கி²யோ த⁴ம்மோ, தங் போ³தா⁴ய ஸங்வத்ததி. ஸெய்யதா²பி பி⁴க்க²வே, யே கேசி அஸுரானங் ருக்கா², சித்தபாடலி தேஸங் அக்³க³மக்கா²யதி; ஏவமேவ கோ², பி⁴க்க²வே, யே கேசி போ³தி⁴பக்கி²யா த⁴ம்மா, பஞ்ஞிந்த்³ரியங் தேஸங் அக்³க³மக்கா²யதி, யதி³த³ங் – போ³தா⁴யா’’தி. நவமங்.
10. சதுத்த²ருக்க²ஸுத்தங்
540. ‘‘ஸெய்யதா²பி, பி⁴க்க²வே, யே கேசி ஸுபண்ணானங் ருக்கா², கூடஸிம்ப³லீ கோடஸிம்ப³லி (ஸ்யா॰ கங்॰) தேஸங் அக்³க³மக்கா²யதி; ஏவமேவ கோ², பி⁴க்க²வே, யே கேசி போ³தி⁴பக்கி²யா த⁴ம்மா, பஞ்ஞிந்த்³ரியங் தேஸங் அக்³க³மக்கா²யதி, யதி³த³ங் – போ³தா⁴ய. கதமே ச, பி⁴க்க²வே, போ³தி⁴பக்கி²யா த⁴ம்மா? ஸத்³தி⁴ந்த்³ரியங், பி⁴க்க²வே, போ³தி⁴பக்கி²யோ த⁴ம்மோ, தங் போ³தா⁴ய ஸங்வத்ததி…பே॰… பஞ்ஞிந்த்³ரியங் போ³தி⁴பக்கி²யோ த⁴ம்மோ, தங் போ³தா⁴ய ஸங்வத்ததி. ஸெய்யதா²பி, பி⁴க்க²வே, யே கேசி ஸுபண்ணானங் ருக்கா², கூடஸிம்ப³லீ தேஸங் அக்³க³மக்கா²யதி; ஏவமேவ கோ², பி⁴க்க²வே, யே கேசி போ³தி⁴பக்கி²யா த⁴ம்மா, பஞ்ஞிந்த்³ரியங் தேஸங் அக்³க³மக்கா²யதி, யதி³த³ங் – போ³தா⁴யா’’தி. த³ஸமங்.
போ³தி⁴பக்கி²யவக்³கோ³ ஸத்தமோ.
தஸ்ஸுத்³தா³னங் –
ஸங்யோஜனா அனுஸயா, பரிஞ்ஞா ஆஸவக்க²யா;
த்³வே ப²லா சதுரோ ருக்கா², வக்³கோ³ தேன பவுச்சதீதி.
8. க³ங்கா³பெய்யாலவக்³கோ³
1-12. பாசீனாதி³ஸுத்தத்³வாத³ஸகங்
541-552. ‘‘ஸெய்யதா²பி , பி⁴க்க²வே, க³ங்கா³ நதீ³ பாசீனநின்னா பாசீனபோணா பாசீனபப்³பா⁴ரா; ஏவமேவ கோ², பி⁴க்க²வே, பி⁴க்கு² பஞ்சிந்த்³ரியானி பா⁴வெந்தோ பஞ்சிந்த்³ரியானி ப³ஹுலீகரொந்தோ நிப்³பா³னநின்னோ ஹோதி நிப்³பா³னபோணோ நிப்³பா³னபப்³பா⁴ரோ. கத²ஞ்ச, பி⁴க்க²வே, பி⁴க்கு² பஞ்சிந்த்³ரியானி பா⁴வெந்தோ பஞ்சிந்த்³ரியானி ப³ஹுலீகரொந்தோ நிப்³பா³னநின்னோ ஹோதி நிப்³பா³னபோணோ நிப்³பா³னபப்³பா⁴ரோ? இத⁴, பி⁴க்க²வே, பி⁴க்கு² ஸத்³தி⁴ந்த்³ரியங் பா⁴வேதி விவேகனிஸ்ஸிதங் விராக³னிஸ்ஸிதங் நிரோத⁴னிஸ்ஸிதங் வொஸ்ஸக்³க³பரிணாமிங், வீரியிந்த்³ரியங்…பே॰… ஸதிந்த்³ரியங்… ஸமாதி⁴ந்த்³ரியங்… பஞ்ஞிந்த்³ரியங் பா⁴வேதி விவேகனிஸ்ஸிதங் விராக³னிஸ்ஸிதங் நிரோத⁴னிஸ்ஸிதங் வொஸ்ஸக்³க³பரிணாமிங். ஏவங் கோ², பி⁴க்க²வே, பி⁴க்கு² பஞ்சிந்த்³ரியானி பா⁴வெந்தோ பஞ்சிந்த்³ரியானி ப³ஹுலீகரொந்தோ நிப்³பா³னநின்னோ ஹோதி நிப்³பா³னபோணோ நிப்³பா³னபப்³பா⁴ரோ’’தி. த்³வாத³ஸமங்.
க³ங்கா³பெய்யாலவக்³கோ³ அட்ட²மோ.
தஸ்ஸுத்³தா³னங் –
ச² பாசீனதோ நின்னா, ச² நின்னா ச ஸமுத்³த³தோ;
த்³வேதே ச² த்³வாத³ஸ ஹொந்தி, வக்³கோ³ தேன பவுச்சதீதி.
அப்பமாத³வக்³கோ³ வித்தா²ரேதப்³போ³.
தஸ்ஸுத்³தா³னங் –
ததா²க³தங் பத³ங் கூடங், மூலங் ஸாரேன வஸ்ஸிகங்;
ராஜா சந்தி³மஸூரியா, வத்தே²ன த³ஸமங் பத³ந்தி.
ப³லகரணீயவக்³கோ³ வித்தா²ரேதப்³போ³.
தஸ்ஸுத்³தா³னங் –
ப³லங் பீ³ஜஞ்ச நாகோ³ ச, ருக்கோ² கும்பே⁴ன ஸூகியா;
ஆகாஸேன ச த்³வே மேகா⁴, நாவா ஆக³ந்துகா நதீ³தி.
ஏஸனாவக்³கோ³ வித்தா²ரேதப்³போ³.
தஸ்ஸுத்³தா³னங் –
ஏஸனா விதா⁴ ஆஸவோ, ப⁴வோ ச து³க்க²தா திஸ்ஸோ;
கி²லங் மலஞ்ச நீகோ⁴ ச, வேத³னா தண்ஹா தஸினா சாதி.
12. ஓக⁴வக்³கோ³
1-10. ஓகா⁴தி³ஸுத்தத³ஸகங்
587-596. ‘‘பஞ்சிமானி , பி⁴க்க²வே, உத்³த⁴ம்பா⁴கி³யானி ஸங்யோஜனானி. கதமானி பஞ்ச? ரூபராகோ³, அரூபராகோ³, மானோ, உத்³த⁴ச்சங், அவிஜ்ஜா – இமானி கோ², பி⁴க்க²வே, பஞ்சுத்³த⁴ம்பா⁴கி³யானி ஸங்யோஜனானி. இமேஸங் கோ², பி⁴க்க²வே, பஞ்சன்னங் உத்³த⁴ம்பா⁴கி³யானங் ஸங்யோஜனானங் அபி⁴ஞ்ஞாய பரிஞ்ஞாய பரிக்க²யாய பஹானாய பஞ்சிந்த்³ரியானி பா⁴வேதப்³பா³னி. கதமானி பஞ்ச? இத⁴, பி⁴க்க²வே, பி⁴க்கு² ஸத்³தி⁴ந்த்³ரியங் பா⁴வேதி விவேகனிஸ்ஸிதங் விராக³னிஸ்ஸிதங் நிரோத⁴னிஸ்ஸிதங் வொஸ்ஸக்³க³பரிணாமிங்…பே॰… பஞ்ஞிந்த்³ரியங் பா⁴வேதி விவேகனிஸ்ஸிதங் விராக³னிஸ்ஸிதங் நிரோத⁴னிஸ்ஸிதங் வொஸ்ஸக்³க³பரிணாமிங். இமேஸங் கோ², பி⁴க்க²வே, பஞ்சன்னங் உத்³த⁴ம்பா⁴கி³யானங் ஸங்யோஜனானங் அபி⁴ஞ்ஞாய பரிஞ்ஞாய பரிக்க²யாய பஹானாய இமானி பஞ்சிந்த்³ரியானி பா⁴வேதப்³பா³னீ’’தி. த³ஸமங். (யதா² மக்³க³ஸங்யுத்தங், ததா² வித்தா²ரேதப்³ப³ங்.)
ஓக⁴வக்³கோ³ த்³வாத³ஸமோ.
தஸ்ஸுத்³தா³னங் –
ஓகோ⁴ யோகோ³ உபாதா³னங், க³ந்தா² அனுஸயேன ச;
காமகு³ணா நீவரணா, க²ந்தா⁴ ஓருத்³த⁴ம்பா⁴கி³யாதி.
13. க³ங்கா³பெய்யாலவக்³கோ³
1-12. பாசீனாதி³ஸுத்தத்³வாத³ஸகங்
597-608. ‘‘ஸெய்யதா²பி , பி⁴க்க²வே, க³ங்கா³ நதீ³ பாசீனநின்னா பாசீனபோணா பாசீனபப்³பா⁴ரா; ஏவமேவ கோ², பி⁴க்க²வே, பி⁴க்கு² பஞ்சிந்த்³ரியானி பா⁴வெந்தோ பஞ்சிந்த்³ரியானி ப³ஹுலீகரொந்தோ நிப்³பா³னநின்னோ ஹோதி நிப்³பா³னபோணோ நிப்³பா³னபப்³பா⁴ரோ. கத²ஞ்ச, பி⁴க்க²வே, பி⁴க்கு² பஞ்சிந்த்³ரியானி பா⁴வெந்தோ பஞ்சிந்த்³ரியானி ப³ஹுலீகரொந்தோ நிப்³பா³னநின்னோ ஹோதி நிப்³பா³னபோணோ நிப்³பா³னபப்³பா⁴ரோ? இத⁴, பி⁴க்க²வே, பி⁴க்கு² ஸத்³தி⁴ந்த்³ரியங் பா⁴வேதி ராக³வினயபரியோஸானங் தோ³ஸவினயபரியோஸானங் மோஹவினயபரியோஸானங்…பே॰… பஞ்ஞிந்த்³ரியங் பா⁴வேதி ராக³வினயபரியோஸானங் தோ³ஸவினயபரியோஸானங் மோஹவினயபரியோஸானங். ஏவங் கோ², பி⁴க்க²வே, பி⁴க்கு² பஞ்சிந்த்³ரியானி பா⁴வெந்தோ பஞ்சிந்த்³ரியானி ப³ஹுலீகரொந்தோ நிப்³பா³னநின்னோ ஹோதி நிப்³பா³னபோணோ நிப்³பா³னபப்³பா⁴ரோ’’தி. த்³வாத³ஸமங்.
க³ங்கா³பெய்யாலவக்³கோ³ தேரஸமோ.
தஸ்ஸுத்³தா³னங் –
ச² பாசீனதோ நின்னா, ச² நின்னா ச ஸமுத்³த³தோ;
த்³வேதே ச² த்³வாத³ஸ ஹொந்தி, வக்³கோ³ தேன பவுச்சதீதி.
அப்பமாத³வக்³க³-ப³லகரணீயவக்³க³-ஏஸனாவக்³கா³ வித்தா²ரேதப்³பா³.
17. ஓக⁴வக்³கோ³
1-10. ஓகா⁴தி³ஸுத்தத³ஸகங்
641-650. ‘‘பஞ்சிமானி , பி⁴க்க²வே, உத்³த⁴ம்பா⁴கி³யானி ஸங்யோஜனானி. கதமானி பஞ்ச? ரூபராகோ³, அரூபராகோ³, மானோ, உத்³த⁴ச்சங், அவிஜ்ஜா – இமானி கோ², பி⁴க்க²வே, பஞ்சுத்³த⁴ம்பா⁴கி³யானி ஸங்யோஜனானி. இமேஸங் கோ², பி⁴க்க²வே, பஞ்சன்னங் உத்³த⁴ம்பா⁴கி³யானங் ஸங்யோஜனானங் அபி⁴ஞ்ஞாய பரிஞ்ஞாய பரிக்க²யாய பஹானாய பஞ்சிந்த்³ரியானி பா⁴வேதப்³பா³னி. கதமானி பஞ்ச? இத⁴, பி⁴க்க²வே, பி⁴க்கு² ஸத்³தி⁴ந்த்³ரியங் பா⁴வேதி ராக³வினயபரியோஸானங் தோ³ஸவினயபரியோஸானங் மோஹவினயபரியோஸானங். வீரியிந்த்³ரியங் …பே॰… ஸதிந்த்³ரியங்… ஸமாதி⁴ந்த்³ரியங் … பஞ்ஞிந்த்³ரியங் பா⁴வேதி ராக³வினயபரியோஸானங் தோ³ஸவினயபரியோஸானங் மோஹவினயபரியோஸானங். இமேஸங் கோ², பி⁴க்க²வே, பஞ்சன்னங் உத்³த⁴ம்பா⁴கி³யானங் ஸங்யோஜனானங் அபி⁴ஞ்ஞாய பரிஞ்ஞாய பரிக்க²யாய பஹானாய இமானி பஞ்சிந்த்³ரியானி பா⁴வேதப்³பா³னீ’’தி.
ஓக⁴வக்³கோ³ ஸத்தரஸமோ.
தஸ்ஸுத்³தா³னங் –
ஓகோ⁴ யோகோ³ உபாதா³னங், க³ந்தா² அனுஸயேன ச;
காமகு³ணா நீவரணா, க²ந்தா⁴ ஓருத்³த⁴ம்பா⁴கி³யாதி.
இந்த்³ரியஸங்யுத்தங் சதுத்த²ங்.