(10) 5. லோணகபல்லவக்³கோ³
1. அச்சாயிகஸுத்தவண்ணனா
93. பஞ்சமஸ்ஸ அச்சாயிகானீதி அதிபாதிகானி. கரணீயானீதி அவஸ்ஸகிச்சானி. யஞ்ஹி ந அவஸ்ஸங் காதப்³ப³ங், தங் கிச்சந்தி வுச்சதி. அவஸ்ஸங் காதப்³ப³ங் கரணீயங் நாம. ஸீக⁴ங் ஸீக⁴ந்தி வேகே³ன வேகே³ன. தஸ்ஸ கோ² தந்தி எத்த² தந்தி நிபாதமத்தங். நத்தி² ஸா இத்³தி⁴ வா ஆனுபா⁴வோ வாதி ஸா வா இத்³தி⁴ ஸோ வா ஆனுபா⁴வோ நத்தி². உத்தரஸ்வேதி ததியதி³வஸே. உதுபரிணாமினீதி லத்³த⁴உதுபரிணாமானி ஹுத்வா. ஜாயந்திபீதி ததியதி³வஸே நிக்க²ந்தஸேதங்குரானி ஹொந்தி, ஸத்தாஹே பத்தே நீலங்குரானி ஹொந்தி. க³ப்³பீ⁴னிபி ஹொந்தீதி தி³யட்³ட⁴மாஸங் பத்வா க³ஹிதக³ப்³பா⁴னி ஹொந்தி. பச்சந்திபீதி தயோ மாஸே பத்வா பச்சந்தி. இதா³னி யஸ்மா பு³த்³தா⁴னங் க³ஹபதிகேன வா ஸஸ்ஸேஹி வா அத்தோ² நத்தி², ஸாஸனே பன தப்படிரூபகங் புக்³க³லங் வா அத்த²ங் வா த³ஸ்ஸேதுங் தங் தங் ஓபம்மங் ஆஹரந்தி. தஸ்மா யமத்த²ங் த³ஸ்ஸேதுகாமேன ஏதங் ஆப⁴தங், தங் த³ஸ்ஸெந்தோ ஏவமேவ கோ²திஆதி³மாஹ. தங் அத்த²தோ உத்தானமேவ. ஸிக்கா² பன இதா⁴பி மிஸ்ஸிகா ஏவ கதி²தா.
2. பவிவேகஸுத்தவண்ணனா
94. து³தியே சீவரபவிவேகந்தி சீவரங் நிஸ்ஸாய உப்பஜ்ஜனககிலேஸேஹி விவித்தபா⁴வங். ஸேஸத்³வயேபி ஏஸேவ நயோ. ஸாணானீதி ஸாணவாகசேலானி. மஸாணானீதி மிஸ்ஸகசேலானி. ச²வது³ஸ்ஸானீதி மதஸரீரதோ ச²ட்³டி³தவத்தா²னி, ஏரகதிணாதீ³னி வா க³ந்தெ²த்வா கதனிவாஸனானி. பங்ஸுகூலானீதி பத²வியங் ச²ட்³டி³தனந்தகானி. திரீடானீதி ருக்க²தசவத்தா²னி. அஜினானீதி அஜினக்கி²பந்தி ததே³வ மஜ்ஜே² பா²லிதங், ஸஹகு²ரகந்திபி வத³ந்தி. குஸசீரந்தி குஸதிணானி க³ந்தெ²த்வா கதசீரங். வாகசீரப²லகசீரேஸுபி ஏஸேவ நயோ. கேஸகம்ப³லந்தி மனுஸ்ஸகேஸேஹி கதகம்ப³லங். வாலகம்ப³லந்தி அஸ்ஸவாலாதீ³ஹி கதகம்ப³லங். உலூகபக்கி²கந்தி உலூகபத்தானி க³ந்தெ²த்வா கதனிவாஸனங்.
ஸாகப⁴க்கா²தி ஸாமாகப⁴க்கா²தி ஸாமாகதண்டு³லப⁴க்கா². நீவாராதீ³ஸு நீவாரா நாம அரஞ்ஞே ஸயங் ஜாதவீஹிஜாதி. த³த்³து³லந்தி சம்மகாரேஹி சம்மங் லிகி²த்வா ச²ட்³டி³தகஸடங். ஹடங் வுச்சதி ஸிலேஸோபி ஸேவாலோபி கணிகாராதி³ருக்க²னிய்யாஸோபி. கணந்தி குண்ட³கங். ஆசாமோதி ப⁴த்தஉக்க²லிகாய லக்³கோ³ ஜா²மஓத³னோ. தங் ச²ட்³டி³தட்டா²னே க³ஹெத்வா கா²த³ந்தி, ஓத³னகஞ்ஜியந்திபி வத³ந்தி. பிஞ்ஞாகாத³யோ பாகடாவ. பவத்தப²லபோ⁴ஜீதி பதிதப²லபோ⁴ஜீ. பு⁴ஸாகா³ரந்தி க²லஸாலங்.
ஸீலவாதி சதுபாரிஸுத்³தி⁴ஸீலேன ஸமன்னாக³தோ. து³ஸ்ஸீல்யஞ்சஸ்ஸ பஹீனங் ஹோதீதி பஞ்ச து³ஸ்ஸீல்யானி பஹீனானி ஹொந்தி. ஸம்மாதி³ட்டி²கோதி யாதா²வதி³ட்டி²கோ. மிச்சா²தி³ட்டீ²தி அயாதா²வதி³ட்டி². ஆஸவாதி சத்தாரோ ஆஸவா. அக்³க³ப்பத்தோதி ஸீலக்³க³ப்பத்தோ. ஸாரப்பத்தோதி ஸீலஸாரங் பத்தோ. ஸுத்³தோ⁴தி பரிஸுத்³தோ⁴. ஸாரே பதிட்டி²தோதி ஸீலஸமாதி⁴பஞ்ஞாஸாரே பதிட்டி²தோ.
ஸெய்யதா²பீதி யதா² நாம. ஸம்பன்னந்தி ஸங்க⁴ராபெய்யாதி ஸங்கட்³டா⁴பெய்ய. உப்³ப³ஹாபெய்யாதி க²லட்டா²னங் ஆஹராபெய்ய. பு⁴ஸிகந்தி பு⁴ஸங். கொட்டாபெய்யாதி உது³க்க²லே பக்கி²பாபெத்வா முஸலேஹி பஹராபெய்ய. அக்³க³ப்பத்தானீதி தண்டு³லக்³க³ங் பத்தானி. ஸாரப்பத்தாதீ³ஸுபி ஏஸேவ நயோ. ஸேஸங் உத்தானமேவ. யங் பனெத்த² ‘‘து³ஸ்ஸீல்யஞ்சஸ்ஸ பஹீனங் மிச்சா²தி³ட்டி² சஸ்ஸ பஹீனா’’தி வுத்தங், தங் ஸோதாபத்திமக்³கே³ன பஹீனபா⁴வங் ஸந்தா⁴ய வுத்தந்தி வேதி³தப்³ப³ங்.
3. ஸரத³ஸுத்தவண்ணனா
95. ததியே வித்³தே⁴தி வலாஹகவிக³மேன தூ³ரீபூ⁴தே. தே³வேதி ஆகாஸே. அபி⁴விஹச்சாதி அபி⁴விஹனித்வா. யதோதி யஸ்மிங் காலே. விரஜந்தி ராக³ரஜாதி³ரஹிதங். தேஸங்யேவ மலானங் விக³தத்தா வீதமலங். த⁴ம்மசக்கு²ந்தி சதுஸச்சத⁴ம்மபரிக்³கா³ஹகங் ஸோதாபத்திமக்³க³சக்கு²ங். நத்தி² தங் ஸங்யோஜனந்தி து³வித⁴மேவஸ்ஸ ஸங்யோஜனங் நத்தி², இதரம்பி பன புன இமங் லோகங் ஆனேதுங் அஸமத்த²தாய நத்தீ²தி வுத்தங். இமஸ்மிங் ஸுத்தே ஜா²னானாகா³மீ நாம கதி²தோதி.
4. பரிஸாஸுத்தவண்ணனா
96. சதுத்தே² ந பா³ஹுலிகா ஹொந்தீதி பச்சயபா³ஹுல்லிகா ந ஹொந்தி. ந ஸாத²லிகாதி திஸ்ஸோ ஸிக்கா² ஸிதி²லங் கத்வா ந க³ண்ஹந்தி. ஓக்கமனே நிக்கி²த்தது⁴ராதி பவிவேகே புப்³ப³ங்க³மாதி காயசித்தஉபதி⁴விவேகஸங்கா²தே திவிதே⁴பி விவேகே புப்³ப³ங்க³மா. வீரியங் ஆரப⁴ந்தீதி து³வித⁴ம்பி வீரியங் பக்³க³ண்ஹந்தி. அப்பத்தஸ்ஸாதி ஜா²னவிபஸ்ஸனாமக்³க³ப²லஸங்கா²தஸ்ஸ அப்பத்தவிஸேஸஸ்ஸ. ஸேஸபத³த்³வயேபி ஏஸேவ நயோ. பச்சி²மா ஜனதாதி ஸத்³தி⁴விஹாரிகஅந்தேவாஸிகாத³யோ. தி³ட்டா²னுக³திங் ஆபஜ்ஜதீதி ஆசரியுபஜ்ஜா²யேஹி கதங் அனுகரோதி. யங் தாய ஜனதாய ஆசரியுபஜ்ஜா²யேஸு தி³ட்ட²ங், தஸ்ஸ அனுக³திங் ஆபஜ்ஜதி நாம. அயங் வுச்சதி, பி⁴க்க²வே, அக்³க³வதீ பரிஸாதி, பி⁴க்க²வே, அயங் பரிஸா அக்³க³புக்³க³லவதீ நாம வுச்சதி.
ப⁴ண்ட³னஜாதாதி ஜாதப⁴ண்ட³னா. கலஹஜாதாதி ஜாதகலஹா. ப⁴ண்ட³னந்தி செத்த² கலஹஸ்ஸ புப்³ப³பா⁴கோ³, ஹத்த²பராமாஸாதி³வஸேன வீதிக்கமோ கலஹோ நாம. விவாதா³பன்னாதி விருத்³த⁴வாத³ங் ஆபன்னா. முக²ஸத்தீஹீதி கு³ணவிஜ்ஜ²னட்டே²ன ப²ருஸா வாசா ‘‘முக²ஸத்தியோ’’தி வுச்சந்தி, தாஹி முக²ஸத்தீஹி. விதுத³ந்தா விஹரந்தீதி விஜ்ஜ²ந்தா விசரந்தி.
ஸமக்³கா³தி ஸஹிதா. ஸம்மோத³மானாதி ஸமப்பவத்தமோதா³. கீ²ரோத³கீபூ⁴தாதி கீ²ரோத³கங் விய பூ⁴தா. பியசக்கூ²ஹீதி உபஸந்தேஹி மெத்தசக்கூ²ஹி. பீதி ஜாயதீதி பஞ்சவண்ணா பீதி உப்பஜ்ஜதி. காயோ பஸ்ஸம்ப⁴தீதி நாமகாயோபி ரூபகாயோபி விக³தத³ரதோ² ஹோதி. பஸ்ஸத்³த⁴காயோதி அஸாரத்³த⁴காயோ. ஸுக²ங் வேதி³யதீதி காயிகசேதஸிகஸுக²ங் வேதி³யதி. ஸமாதி⁴யதீதி ஆரம்மணே ஸம்மா ட²பீயதி.
து²ல்லபு²ஸிதகேதி மஹாபு²ஸிதகே. பப்³ப³தகந்த³ரபத³ரஸாகா²தி எத்த² கந்த³ரோ நாம ‘‘க’’ந்தி லத்³த⁴னாமேன உத³கேன தா³ரிதோ உத³கபி⁴ன்னோ பப்³ப³தப்பதே³ஸோ, யோ ‘‘நிதம்போ⁴’’திபி ‘‘நதி³குஞ்ஜோ’’திபி வுச்சதி. பத³ரங் நாம அட்ட² மாஸே தே³வே அவஸ்ஸந்தே ப²லிதோ பூ⁴மிப்பதே³ஸோ. ஸாகா²தி குஸொப்³ப⁴கா³மினியோ கு²த்³த³கமாதிகாயோ. குஸொப்³பா⁴தி கு²த்³த³கஆவாடா. மஹாஸொப்³பா⁴தி மஹாஆவாடா. குன்னதி³யோதி கு²த்³த³கனதி³யோ. மஹானதி³யோதி
5-7. பட²மஆஜானீயஸுத்தாதி³வண்ணனா
97-99. பஞ்சமே அங்கே³ஹீதி கு³ணங்கே³ஹி. ராஜாரஹோதி ரஞ்ஞோ அரஹோ அனுச்ச²விகோ. ராஜபொ⁴க்³கோ³தி ரஞ்ஞோ உபபோ⁴க³பூ⁴தோ. ரஞ்ஞோ அங்க³ந்தி ரஞ்ஞோ ஹத்த²பாதா³தி³அங்க³ஸமதாய அங்க³ந்தேவ ஸங்க²ங் க³ச்ச²தி. வண்ணஸம்பன்னோதி ஸரீரவண்ணேன ஸம்பன்னோ. ப³லஸம்பன்னோதி காயப³லேன ஸம்பன்னோ. ஆஹுனெய்யோதி ஆஹுதிஸங்கா²தங் பிண்ட³பாதங் படிக்³க³ஹேதுங் யுத்தோ. பாஹுனெய்யோதி பாஹுனகப⁴த்தஸ்ஸ அனுச்ச²விகோ. த³க்கி²ணெய்யோதி த³ஸவித⁴தா³னவத்து²பரிச்சாக³வஸேன ஸத்³தா⁴தா³னஸங்கா²தாய த³க்கி²ணாய அனுச்ச²விகோ. அஞ்ஜலிகரணீயோதி அஞ்ஜலிபக்³க³ஹணஸ்ஸ அனுச்ச²விகோ. அனுத்தரங் புஞ்ஞக்கெ²த்தங் லோகஸ்ஸாதி ஸப்³ப³லோகஸ்ஸ அஸதி³ஸங் புஞ்ஞவிருஹனட்டா²னங்.
வண்ணஸம்பன்னோதி கு³ணவண்ணேன ஸம்பன்னோ. ப³லஸம்பன்னோதி வீரியப³லேன ஸம்பன்னோ. ஜவஸம்பன்னோதி ஞாணஜவேன ஸம்பன்னோ. தா²மவாதி ஞாணதா²மேன ஸமன்னாக³தோ. த³ள்ஹபரக்கமோதி தி²ரபரக்கமோ. அனிக்கி²த்தது⁴ரோதி அட்ட²பிதது⁴ரோ பக்³க³ஹிதது⁴ரோ, அக்³க³ப²லங் அரஹத்தங் அப்பத்வா வீரியது⁴ரங் ந நிக்கி²பிஸ்ஸாமீதி ஏவங் படிபன்னோ. இமஸ்மிங் ஸுத்தே சதுஸச்சவஸேன ஸோதாபத்திமக்³கோ³, ஸோதாபத்திமக்³கே³ன ச ஞாணஜவஸம்பன்னதா கதி²தாதி. ச²ட்டே² தீணி ச மக்³கா³னி தீணி ச ப²லானி, தீஹி மக்³க³ப²லேஹி ச ஞாணஜவஸம்பன்னதா கதி²தா. ஸத்தமே அரஹத்தப²லங், அரஹத்தப²லேனேவ ச மக்³க³கிச்சங் கதி²தங். ப²லங் பன ஜவிதஜவேன உப்பஜ்ஜனதோ ஜவோதி ச வத்துங் வட்டதி.
8. பொத்த²கஸுத்தவண்ணனா
100. அட்ட²மே நவோதி கரணங் உபாதா³ய வுச்சதி. பொத்த²கோதி வாகமயவத்த²ங். மஜ்ஜி²மோதி பரிபோ⁴க³மஜ்ஜி²மோ. ஜிண்ணோதி பரிபோ⁴க³ஜிண்ணோ. உக்க²லிபரிமஜ்ஜனந்தி உக்க²லிபரிபுஞ்ச²னங் து³ஸ்ஸீலோதி நிஸ்ஸீலோ. து³ப்³ப³ண்ணதாயாதி கு³ணவண்ணாபா⁴வேன து³ப்³ப³ண்ணதாய. தி³ட்டா²னுக³திங் ஆபஜ்ஜந்தீதி தேன கதங் அனுகரொந்தி. ந மஹப்ப²லங் ஹோதீதி விபாகப²லேன மஹப்ப²லங் ந ஹோதி. ந மஹானிஸங்ஸந்தி விபாகானிஸங்ஸேனேவ ந மஹானிஸங்ஸங். அப்பக்³க⁴தாயாதி காஸிகங் வத்த²ந்தி தீஹி கப்பாஸஅங்ஸூஹி ஸுத்தங் கந்தித்வா கதவத்த²ங், தஞ்ச கோ² காஸிரட்டே²யேவ உட்டி²தங். ஸேஸங் உத்தானமேவ. ஸீலங் பனெத்த² மிஸ்ஸகங் கதி²தந்தி.
9. லோணகபல்லஸுத்தவண்ணனா
101. நவமே யதா² யதா²யந்தி யதா² யதா² அயங். ததா² ததா² தந்தி ததா² ததா² தங் கம்மங். இத³ங் வுத்தங் ஹோதி – யோ ஏவங் வதெ³ய்ய – ‘‘யதா² யதா² கம்மங் கரோதி, ததா² ததா²ஸ்ஸ விபாகங் படிஸங்வேதி³யதேவ. ந ஹி ஸக்கா கதஸ்ஸ கம்மஸ்ஸ விபாகங் படிஸேதே⁴துங். தஸ்மா யத்தகங் கம்மங் கரோதி, தத்தகஸ்ஸ விபாகங் படிஸங்வேதி³யதேவா’’தி. ஏவங் ஸந்தந்தி ஏவங் ஸந்தே. ப்³ரஹ்மசரியவாஸோ ந ஹோதீதி யங் மக்³க³பா⁴வனதோ புப்³பே³ உபபஜ்ஜவேத³னீயங் கம்மங் கதங், தஸ்ஸ அவஸ்ஸங் படிஸங்வேத³னீயத்தா ப்³ரஹ்மசரியங் வுத்த²ம்பி அவுத்த²மேவ ஹோதி. ஓகாஸோ ந பஞ்ஞாயதி ஸம்மா து³க்க²ஸ்ஸ அந்தகிரியாயாதி யஸ்மா ச ஏவங் ஸந்தே தேன கம்மாயூஹனஞ்சேவ விபாகானுப⁴வனா ச ஹோதி, தஸ்மா ஹேதுனா நயேன வட்டது³க்க²ஸ்ஸ அந்தகிரியாய ஓகாஸோ ந பஞ்ஞாயதி நாம.
யதா² யதா² வேத³னீயந்தி யேன யேனாகாரேன வேதி³தப்³ப³ங். ததா² ததா²ஸ்ஸ விபாகங் படிஸங்வேதி³யதீதி தேன தேனாகாரேன அஸ்ஸ விபாகங் பச்சனுபோ⁴தி. இத³ங் வுத்தங் ஹோதி – யதே³தங் ஸத்தஸு ஜவனேஸு பட²மஜவனகம்மங் ஸதி பச்சயே விபாகவாரங் லப⁴ந்தமேவ தி³ட்ட²த⁴ம்மவேத³னீயங் ஹோதி, அஸதி அஹோஸிகம்மங் நாம. யஞ்ச ஸத்தமஜவனகம்மங் ஸதி பச்சயே உபபஜ்ஜவேத³னீயங் ஹோதி, அஸதி அஹோஸிகம்மங் நாம. யஞ்ச மஜ்ஜே² பஞ்சஜவனகம்மங் யாவ ஸங்ஸாரப்பவத்தி, தாவ அபரபரியாயவேத³னீயங் நாம ஹோதி. ஏதேஸு ஆகாரேஸு யேன யேனாகாரேன வேதி³தப்³ப³ங் கம்மங் அயங் புரிஸோ கரோதி, தேன தேனேவஸ்ஸ விபாகங் படிஸங்வேதி³யதி நாம. அட்ட²கதா²யஞ்ஹி லத்³த⁴விபாகவாரமேவ கம்மங் யதா²வேத³னீயங் கம்மங் நாமாதி வுத்தங். ஏவங் ஸந்தங், பி⁴க்க²வே, ப்³ரஹ்மசரியவாஸோ ஹோதீதி கம்மக்க²யகரஸ்ஸ ப்³ரஹ்மசரியஸ்ஸ கே²பேதப்³ப³கம்மஸம்ப⁴வதோ வாஸோ நாம ஹோதி, வுத்த²ங் ஸுவுத்த²மேவ ஹோதீதி ஓகாஸோ பஞ்ஞாயதி ஸம்மா து³க்க²ஸ்ஸ அந்தகிரியாயாதி யஸ்மா ஏவங் ஸந்தே தேன தேன மக்³கே³ன அபி⁴ஸங்கா²ரவிஞ்ஞாணஸ்ஸ நிரோதே⁴ன தேஸு தேஸு ப⁴வேஸு ஆயதிங் வட்டது³க்க²ங் ந உப்பஜ்ஜதி, தஸ்மா ஓகாஸோ பஞ்ஞாயதி ஸம்மா து³க்க²ஸ்ஸ அந்தகிரியாய.
இதா³னி தங் யதா²வேத³னீயகம்மஸபா⁴வங் த³ஸ்ஸெந்தோ இத⁴, பி⁴க்க²வே, ஏகச்சஸ்ஸாதிஆதி³மாஹ. தத்த² அப்பமத்தகந்தி பரித்தங் தோ²கங் மந்த³ங் லாமகங். தாதி³ஸங்யேவாதி தங்ஸரிக்க²கமேவ. தி³ட்ட²த⁴ம்மவேத³னீயந்தி தஸ்மிங் கம்மேயேவ தி³ட்ட²த⁴ம்மே விபச்சிதப்³ப³ங் விபாகவாரங் லப⁴ந்தங் தி³ட்ட²த⁴ம்மவேத³னீயங் ஹோதி. நாணுபி கா²யதீதி து³தியே அத்தபா⁴வே அணுபி ந கா²யதி, அணுமத்தம்பி து³தியே அத்தபா⁴வே ப³ஹுதே³வாதி அபா⁴விதகாயோதிஆதீ³ஹி காயபா⁴வனாரஹிதோ வட்டகா³மீ புது²ஜ்ஜனோ த³ஸ்ஸிதோ. பரித்தோதி பரித்தகு³ணோ. அப்பாதுமோதி ஆதுமா வுச்சதி அத்தபா⁴வோ, தஸ்மிங் மஹந்தேபி கு³ணபரித்ததாய அப்பாதுமோயேவ. அப்பது³க்க²விஹாரீதி அப்பகேனபி பாபேன து³க்க²விஹாரீ. பா⁴விதகாயோதிஆதீ³ஹி கீ²ணாஸவோ த³ஸ்ஸிதோ. ஸோ ஹி காயானுபஸ்ஸனாஸங்கா²தாய காயபா⁴வனாய பா⁴விதகாயோ நாம. காயஸ்ஸ வா வட்³டி⁴தத்தா பா⁴விதகாயோ. பா⁴விதஸீலோதி வட்³டி⁴தஸீலோ. ஸேஸபத³த்³வயேபி ஏஸேவ நயோ. பஞ்சத்³வாரபா⁴வனாய வா பா⁴விதகாயோ. ஏதேன இந்த்³ரியஸங்வரஸீலங் வுத்தங், பா⁴விதஸீலோதி இமினா ஸேஸானி தீணி ஸீலானி. அபரித்தோதி ந பரித்தகு³ணோ. மஹத்தோதி அத்தபா⁴வே பரித்தேபி கு³ணமஹந்ததாய மஹத்தோ. அப்பமாணவிஹாரீதி கீ²ணாஸவஸ்ஸேதங் நாமமேவ. ஸோ ஹி பமாணகரானங் ராகா³தீ³னங் அபா⁴வேன அப்பமாணவிஹாரீ நாம.
பரித்தேதி கு²த்³த³கே. உத³கமல்லகேதி உத³கஸராவே. ஓரப்³பி⁴கோதி உரப்³ப⁴ஸாமிகோ. உரப்³ப⁴கா⁴தகோதி ஸூனகாரோ. ஜாபேதுங் வாதி த⁴னஜானியா ஜாபேதுங். ஜா²பேதுந்திபி பாடோ², அயமேவத்தோ². யதா²பச்சயங் வா காதுந்தி யதா² இச்ச²தி, ததா² காதுங். உரப்³ப⁴த⁴னந்தி ஏளகஅக்³க⁴னகமூலங். ஸோ பனஸ்ஸ ஸசே இச்ச²தி, தே³தி. நோ சே இச்ச²தி, கீ³வாயங் க³ஹெத்வா
10. பங்ஸுதோ⁴வகஸுத்தவண்ணனா
102. த³ஸமே தோ⁴வதீதி விக்கா²லேதி. ஸந்தோ⁴வதீதி ஸுட்டு² தோ⁴வதி, புனப்புனங் தோ⁴வதி. நித்³தோ⁴வதீதி நிக்³க³ண்ஹித்வா தோ⁴வதி. அனித்³த⁴ந்தகஸாவந்தி அனீஹததோ³ஸங் அனபனீதகஸாவங். பப⁴ங்கூ³தி பபி⁴ஜ்ஜனஸபா⁴வங், அதி⁴கரணீயங் ட²பெத்வா முட்டி²காய பஹடமத்தங் பி⁴ஜ்ஜதி. பட்டிகாயாதி ஸுவண்ணபட்டகாய. கீ³வெய்யகேதி கீ³வாலங்காரே.
அதி⁴சித்தந்தி ஸமத²விபஸ்ஸனாசித்தங். அனுயுத்தஸ்ஸாதி பா⁴வெந்தஸ்ஸ. ஸசேதஸோதி சித்தஸம்பன்னோ. த³ப்³ப³ஜாதிகோதி பண்டி³தஜாதிகோ. காமவிதக்காதீ³ஸு காமே ஆரப்³ப⁴ உப்பன்னோ விதக்கோ காமவிதக்கோ. ப்³யாபாத³விஹிங்ஸஸம்பயுத்தா விதக்கா ப்³யாபாத³விஹிங்ஸவிதக்கா நாம. ஞாதிவிதக்காதீ³ஸு ‘‘அம்ஹாகங் ஞாதகா ப³ஹூ புஞ்ஞவந்தா’’திஆதி³னா நயேன ஞாதகே ஆரப்³ப⁴ உப்பன்னோ ஞாதிவிதக்கோ. ‘‘அஸுகோ ஜனபதோ³ கே²மோ ஸுபி⁴க்கோ²’’திஆதி³னா நயேன ஜனபத³மாரப்³ப⁴ உப்பன்னோ விதக்கோ ஜனபத³விதக்கோ. ‘‘அஹோ வத மங் பரே ந அவஜானெய்யு’’ந்தி ஏவங் உப்பன்னோ விதக்கோ அனவஞ்ஞத்திபடிஸங்யுத்தோ விதக்கோ நாம. த⁴ம்மவிதக்காவஸிஸ்ஸந்தீதி த⁴ம்மவிதக்கா நாம த³ஸவிபஸ்ஸனுபக்கிலேஸவிதக்கா. ஸோ ஹோதி ஸமாதி⁴ ந சேவ ஸந்தோதி ஸோ அவஸிட்ட²த⁴ம்மவிதக்கோ விபஸ்ஸனாஸமாதி⁴ அவூபஸந்தகிலேஸத்தா ஸந்தோ ந ஹோதி. ந பணீதோதி ந அதப்பகோ. நப்படிப்பஸ்ஸத்³தி⁴லத்³தோ⁴தி ந ஏகோதி³பா⁴வாதி⁴க³தோதி ந ஏகக்³க³பா⁴வப்பத்தோ. ஸஸங்கா²ரனிக்³க³ய்ஹவாரிதக³தோதி ஸஸங்கா²ரேன ஸப்பயோகே³ன கிலேஸே நிக்³க³ண்ஹித்வா வாரெத்வா வாரிதோ, ந கிலேஸானங் சி²ன்னந்தே உப்பன்னோ, கிலேஸே பன வாரெத்வா உப்பன்னோ.
ஹோதி ஸோ, பி⁴க்க²வே, ஸமயோதி எத்த² ஸமயோ நாம உதுஸப்பாயங் ஆஹாரஸப்பாயங் ஸேனாஸனஸப்பாயங் புக்³க³லஸப்பாயங் த⁴ம்மஸ்ஸவனஸப்பாயந்தி இமேஸங் பஞ்சன்னங் ஸப்பாயானங் படிலாப⁴காலோ. யங் தங் சித்தந்தி யஸ்மிங் ஸமயே தங் விபஸ்ஸனாசித்தங். அஜ்ஜ²த்தங்யேவ ஸந்திட்ட²தீதி அத்தனியேவ திட்ட²தி. நியகஜ்ஜ²த்தஞ்ஹி இத⁴ அஜ்ஜ²த்தங் நாம. கோ³சரஜ்ஜ²த்தம்பி வட்டதி. புது²த்தாரம்மணங் பஹாய ஏகஸ்மிங் நிப்³பா³னகோ³சரேயேவ திட்ட²தீதி வுத்தங் ஹோதி. ஸன்னிஸீத³தீதி ஸுட்டு² நிஸீத³தி. ஏகோதி³ ஹோதீதி ஏகக்³க³ங் ஹோதி. ஸமாதி⁴யதீதி ஸம்மா ஆதி⁴யதி. ஸந்தோதிஆதீ³ஸு பச்சனீககிலேஸவூபஸமேன ஸந்தோ. அதப்பகட்டே²ன பணீதோ. கிலேஸபடிப்பஸ்ஸத்³தி⁴யா லத்³த⁴த்தா படிப்பஸ்ஸத்³த⁴லத்³தோ⁴. ஏகக்³க³பா⁴வங் க³தத்தா ஏகோதி³பா⁴வாதி⁴க³தோ. கிலேஸானங் சி²ன்னந்தே உப்பன்னத்தா ந ஸப்பயோகே³ன கிலேஸே நிக்³க³ண்ஹித்வா வாரெத்வா வாரிதோதி ந ஸஸங்கா²ரனிக்³க³ய்ஹவாரிதக³தோ. எத்தாவதா அயங் பி⁴க்கு² விவட்டெத்வா அரஹத்தங் பத்தோ நாம ஹோதி.
இதா³னி கீ²ணாஸவஸ்ஸ ஸதோ அபி⁴ஞ்ஞாபடிபத³ங் த³ஸ்ஸெந்தோ யஸ்ஸ யஸ்ஸ சாதிஆதி³மாஹ. தத்த² அபி⁴ஞ்ஞா ஸச்சி²கரணீயஸ்ஸாதி அபி⁴ஜானித்வா பச்சக்க²ங் காதப்³ப³ஸ்ஸ. ஸதி ஸதிஆயதனேதி புப்³ப³ஹேதுஸங்கா²தே சேவ இதா³னி ச படிலத்³த⁴ப்³பே³ அபி⁴ஞ்ஞாபாத³கஜ்ஜா²னாதி³பே⁴தே³ ச ஸதி ஸதிகாரணே. வித்தா²ரதோ ஆஸவானங் க²யாதிஆதி³ செத்த² ப²லஸமாபத்திவஸேன வுத்தந்தி வேதி³தப்³ப³ங்.
11. நிமித்தஸுத்தவண்ணனா
103. ஏகாத³ஸமேபி அதி⁴சித்தங் ஸமத²விபஸ்ஸனாசித்தமேவ. தீணி நிமித்தானீதி தீணி காரணானி. காலேன காலந்தி காலே காலே, யுத்தகாலேதி அத்தோ². காலேன காலங் ஸமாதி⁴னிமித்தங் மனஸிகாதப்³ப³ந்திஆதீ³ஸு தங் தங் காலங் ஸல்லக்கெ²த்வா ஏகக்³க³தாய யுத்தகாலே ஏகக்³க³தா மனஸிகாதப்³பா³. ஏகக்³க³தா ஹி இத⁴ ஸமாதி⁴னிமித்தந்தி வுத்தா. தத்ர வசனத்தோ² – ஸமாதி⁴யேவ நிமித்தங் ஸமாதி⁴னிமித்தங். ஸேஸபத³த்³வயேபி ஏஸேவ நயோ. பக்³க³ஹோதி பன வீரியஸ்ஸ நாமங், உபெக்கா²தி மஜ்ஜ²த்தபா⁴வஸ்ஸ. தஸ்மா டா²னங் தங் சித்தங் கோஸஜ்ஜாய ஸங்வத்தெய்யாதி காரணங் விஜ்ஜதி யேன தங் சித்தங் கோஸஜ்ஜபா⁴வே திட்டெ²ய்ய. இதரேஸுபி ஏஸேவ நயோ. உபெக்கா²னிமித்தங்யேவ மனஸி கரெய்யாதி எத்த² ச ஞாணஜவங் உபெக்கெ²ய்யாதி அயமத்தோ². ஆஸவானங் க²யாயாதி அரஹத்தப²லத்தா²ய.
உக்கங் ப³ந்தெ⁴ய்யாதி அங்கா³ரகபல்லங் ஸஜ்ஜெய்ய. ஆலிம்பெய்யாதி தத்த² அங்கா³ரே பக்கி²பித்வா அக்³கி³ங் த³த்வா நாளிகாய த⁴மந்தோ அக்³கி³ங் கா³ஹாபெய்ய. உக்காமுகே² பக்கி²பெய்யாதி அங்கா³ரே வியூஹித்வா அங்கா³ரமத்த²கே வா ட²பெய்ய, மூஸாய வா பக்கி²பெய்ய. அஜ்ஜு²பெக்க²தீதி பக்காபக்கபா⁴வங் உபதா⁴ரேதி.
ஸம்மா ஸமாதி⁴யதி ஆஸவானங் க²யாயாதி அரஹத்தப²லத்தா²ய ஸம்மா ட²பீயதி. எத்தாவதா யஸ்ஸ யஸ்ஸ சாதிஆதி³மாஹ. தங் ஹெட்டா² வுத்தனயேனேவ வேதி³தப்³ப³ங்.
லோணகபல்லவக்³கோ³ பஞ்சமோ.
து³தியபண்ணாஸகங் நிட்டி²தங்.
3. ததியபண்ணாஸகங்