3. பா³லவக்³கோ³
22. ‘‘‘த்³வேமே , பி⁴க்க²வே, பா³லா. கதமே த்³வே? யோ ச அச்சயங் அச்சயதோ ந பஸ்ஸதி, யோ ச அச்சயங் தே³ஸெந்தஸ்ஸ யதா²த⁴ம்மங் நப்படிக்³க³ண்ஹாதி . இமே கோ², பி⁴க்க²வே, த்³வே பா³லா’தி. ‘த்³வேமே , பி⁴க்க²வே, பண்டி³தா. கதமே த்³வே? யோ ச அச்சயங் அச்சயதோ பஸ்ஸதி, யோ ச அச்சயங் தே³ஸெந்தஸ்ஸ யதா²த⁴ம்மங் படிக்³க³ண்ஹாதி. இமே கோ², பி⁴க்க²வே, த்³வே பண்டி³தா’’’தி.
23. ‘‘த்³வேமே, பி⁴க்க²வே, ததா²க³தங் அப்³பா⁴சிக்க²ந்தி. கதமே த்³வே? து³ட்டோ² வா தோ³ஸந்தரோ, ஸத்³தோ⁴ வா து³க்³க³ஹிதேன து³க்³க³ஹீதேன (ஸீ॰). இமே கோ², பி⁴க்க²வே, த்³வே ததா²க³தங் அப்³பா⁴சிக்க²ந்தீ’’தி.
24. ‘‘‘த்³வேமே, பி⁴க்க²வே, ததா²க³தங் அப்³பா⁴சிக்க²ந்தி. கதமே த்³வே? யோ ச அபா⁴ஸிதங் அலபிதங் ததா²க³தேன பா⁴ஸிதங் லபிதங் ததா²க³தேனாதி தீ³பேதி, யோ ச பா⁴ஸிதங் லபிதங் ததா²க³தேன அபா⁴ஸிதங் அலபிதங் ததா²க³தேனாதி தீ³பேதி. இமே கோ², பி⁴க்க²வே, த்³வே ததா²க³தங் அப்³பா⁴சிக்க²ந்தீ’தி. ‘த்³வேமே, பி⁴க்க²வே, ததா²க³தங் நாப்³பா⁴சிக்க²ந்தி. கதமே த்³வே? யோ ச அபா⁴ஸிதங் அலபிதங் ததா²க³தேன அபா⁴ஸிதங் அலபிதங் ததா²க³தேனாதி தீ³பேதி, யோ ச பா⁴ஸிதங் லபிதங் ததா²க³தேன பா⁴ஸிதங் லபிதங் ததா²க³தேனாதி தீ³பேதி. இமே கோ², பி⁴க்க²வே, த்³வே ததா²க³தங் நாப்³பா⁴சிக்க²ந்தீ’’’தி.
25. ‘‘த்³வேமே, பி⁴க்க²வே, ததா²க³தங் அப்³பா⁴சிக்க²ந்தி. கதமே த்³வே? யோ ச நெய்யத்த²ங் ஸுத்தந்தங் நீதத்தோ² ஸுத்தந்தோதி தீ³பேதி, யோ ச நீதத்த²ங் ஸுத்தந்தங் நெய்யத்தோ² ஸுத்தந்தோதி தீ³பேதி. இமே கோ², பி⁴க்க²வே, த்³வே ததா²க³தங் அப்³பா⁴சிக்க²ந்தீ’’தி.
26. ‘‘த்³வேமே, பி⁴க்க²வே, ததா²க³தங் நாப்³பா⁴சிக்க²ந்தி. கதமே த்³வே? யோ ச நெய்யத்த²ங் ஸுத்தந்தங் நெய்யத்தோ² ஸுத்தந்தோதி தீ³பேதி , யோ ச நீதத்த²ங் ஸுத்தந்தங் நீதத்தோ² ஸுத்தந்தோதி தீ³பேதி. இமே கோ², பி⁴க்க²வே, த்³வே ததா²க³தங் நாப்³பா⁴சிக்க²ந்தீ’’தி.
27. ‘‘படிச்ச²ன்னகம்மந்தஸ்ஸ , பி⁴க்க²வே, த்³வின்னங் க³தீனங் அஞ்ஞதரா க³தி பாடிகங்கா² – நிரயோ வா திரச்சா²னயோனி வாதி. அப்படிச்ச²ன்னகம்மந்தஸ்ஸ, பி⁴க்க²வே, த்³வின்னங் க³தீனங் அஞ்ஞதரா க³தி பாடிகங்கா² – தே³வா வா மனுஸ்ஸா வா’’தி.
28. ‘‘மிச்சா²தி³ட்டி²கஸ்ஸ , பி⁴க்க²வே, த்³வின்னங் க³தீனங் அஞ்ஞதரா க³தி பாடிகங்கா² – நிரயோ வா திரச்சா²னயோனி வா’’தி.
29. ‘‘ஸம்மாதி³ட்டி²கஸ்ஸ, பி⁴க்க²வே, த்³வின்னங் க³தீனங் அஞ்ஞதரா க³தி பாடிகங்கா² – தே³வா வா மனுஸ்ஸா வா’’தி.
30. ‘‘து³ஸ்ஸீலஸ்ஸ, பி⁴க்க²வே, த்³வே படிக்³கா³ஹா – நிரயோ வா திரச்சா²னயோனி வா. ஸீலவதோ, பி⁴க்க²வே, த்³வே படிக்³கா³ஹா – தே³வா வா மனுஸ்ஸா வா’’தி தே³வோ வா மனுஸ்ஸோ வாதி (க॰).
31. ‘‘த்³வாஹங், பி⁴க்க²வே, அத்த²வஸே ஸம்பஸ்ஸமானோ அரஞ்ஞவனபத்தா²னி அரஞ்ஞே பவனபத்தா²னி (ஸீ॰ பீ॰) பந்தானி ஸேனாஸனானி படிஸேவாமி. கதமே த்³வே? அத்தனோ ச தி³ட்ட²த⁴ம்மஸுக²விஹாரங் ஸம்பஸ்ஸமானோ, பச்சி²மஞ்ச ஜனதங் அனுகம்பமானோ. இமே கோ² அஹங், பி⁴க்க²வே, த்³வே அத்த²வஸே ஸம்பஸ்ஸமானோ அரஞ்ஞவனபத்தா²னி பந்தானி ஸேனாஸனானி படிஸேவாமீ’’தி.
32. ‘‘த்³வே மே, பி⁴க்க²வே, த⁴ம்மா விஜ்ஜாபா⁴கி³யா. கதமே த்³வே? ஸமதோ² ச விபஸ்ஸனா ச. ஸமதோ², பி⁴க்க²வே, பா⁴விதோ கமத்த² கிமத்த² (ஸ்யா॰ கங்॰), கதமத்த² (க॰) மனுபோ⁴தி? சித்தங் பா⁴வீயதி. சித்தங் பா⁴விதங் கமத்த²மனுபோ⁴தி? யோ ராகோ³ ஸோ பஹீயதி. விபஸ்ஸனா, பி⁴க்க²வே, பா⁴விதா கமத்த²மனுபோ⁴தி? பஞ்ஞா பா⁴வீயதி. பஞ்ஞா பா⁴விதா கமத்த²மனுபோ⁴தி? யா அவிஜ்ஜா ஸா பஹீயதி. ராகு³பக்கிலிட்ட²ங் வா, பி⁴க்க²வே, சித்தங் ந விமுச்சதி, அவிஜ்ஜுபக்கிலிட்டா² வா பஞ்ஞா ந பா⁴வீயதி. இதி கோ², பி⁴க்க²வே, ராக³விராகா³ சேதோவிமுத்தி, அவிஜ்ஜாவிராகா³ பஞ்ஞாவிமுத்தீ’’தி.
பா³லவக்³கோ³ ததியோ.