(9) 4. தே²ரவக்³கோ³
1. ரஜனீயஸுத்தவண்ணனா
81. சதுத்த²ஸ்ஸ ரஜனீயேஸூதி ராக³ஸ்ஸ பச்சயேஸு ஆரம்மணேஸு. ஸேஸேஸுபி ஏஸேவ நயோ.
2. வீதராக³ஸுத்தவண்ணனா
82. து³தியே மக்கீ²தி கு³ணமக்க²கோ. பளாஸீதி யுக³க்³கா³ஹலக்க²ணேன பளாஸேன ஸமன்னாக³தோ.
3. குஹகஸுத்தவண்ணனா
83. ததியே குஹகோதி தீஹி குஹனவத்தூ²ஹி ஸமன்னாக³தோ. லபகோதி லாப⁴ஸன்னிஸ்ஸிதாய லபனாய ஸமன்னாக³தோ. நேமித்திகோதி நிமித்தகிரியகாரகோ. நிப்பேஸிகோதி நிப்பேஸனகதாய ஸமன்னாக³தோ. லாபே⁴ன ச லாப⁴ங் நிஜிகீ³ஸிதாதி லாபே⁴ன லாப⁴க³வேஸகோ. ஸுக்கபக்கோ² வுத்தவிபல்லாஸவஸேன வேதி³தப்³போ³. சதுத்த²ங் உத்தானமேவ.
5. அக்க²மஸுத்தவண்ணனா
85. பஞ்சமே அக்க²மோ ஹோதி ரூபானந்தி ரூபாரம்மணானங் அனதி⁴வாஸகோ ஹோதி, ததா³ரம்மணேஹி ராகா³தீ³ஹி அபி⁴பு⁴ய்யதி. ஏஸேவ நயோ ஸப்³ப³த்த².
6. படிஸம்பி⁴தா³ப்பத்தஸுத்தவண்ணனா
86. ச²ட்டே² அத்த²படிஸம்பி⁴தா³ப்பத்தோதி பஞ்சஸு அத்தே²ஸு பபே⁴த³க³தங் ஞாணங் பத்தோ. த⁴ம்மபடிஸம்பி⁴தா³ப்பத்தோதி சதுப்³பி³தே⁴ த⁴ம்மே பபே⁴த³க³தங் ஞாணங் பத்தோ. நிருத்திபடிஸம்பி⁴தா³ப்பத்தோதி த⁴ம்மனிருத்தீஸு பபே⁴த³க³தங் ஞாணங் பத்தோ. படிபா⁴னபடிஸம்பி⁴தா³ப்பத்தோதி தேஸு தீஸு ஞாணேஸு பபே⁴த³க³தங் ஞாணங் பத்தோ. ஸோ பன தானி தீணி ஞாணானேவ ஜானாதி, ந தேஸங் கிச்சங் கரோதி. உச்சாவசானீதி மஹந்தகு²த்³த³கானி. கிங்கரணீயானீதி இதி கத்தப்³பா³னி.
7. ஸீலவந்தஸுத்தவண்ணனா
87. ஸத்தமங்
8. தே²ரஸுத்தவண்ணனா
88. அட்ட²மே தே²ரோதி தி²ரபா⁴வப்பத்தோ. ரத்தஞ்ஞூதி பப்³ப³ஜிததி³வஸதோ பட்டா²ய அதிக்கந்தானங் ப³ஹூனங் ரத்தீனங் ஞாதா. ஞாதோதி பஞ்ஞாதோ பாகடோ. யஸஸ்ஸீதி யஸனிஸ்ஸிதோ. மிச்சா²தி³ட்டி²கோதி அயாதா²வதி³ட்டி²கோ. ஸத்³த⁴ம்மா வுட்டா²பெத்வாதி த³ஸகுஸலகம்மபத²த⁴ம்மதோ வுட்டா²பெத்வா. அஸத்³த⁴ம்மே பதிட்டா²பேதீதி அகுஸலகம்மபதே²ஸு பதிட்டா²பேதி.
9. பட²மஸேக²ஸுத்தவண்ணனா
89. நவமே ஸேக²ஸ்ஸாதி ஸிக்க²கஸ்ஸ ஸகரணீயஸ்ஸ. பரிஹானாயாதி உபரிகு³ணேஹி பரிஹானத்தா²ய. கம்மாராமதாதி நவகம்மே ரமனகபா⁴வோ. ப⁴ஸ்ஸாராமதாதி நித்³தா³ராமதாதி நித்³தா³யனே ரமனகபா⁴வோ. ஸங்க³ணிகாராமதாதி க³ணஸங்க³ணிகாய ரமனகபா⁴வோ. யதா²விமுத்தங் சித்தங் ந பச்சவெக்க²தீதி யதா² யங் சித்தங் விமுத்தங், யே ச தோ³ஸா பஹீனா, கு³ணா ச படிலத்³தா⁴, தே பச்சவெக்கி²த்வா உபரிகு³ணபடிலாபா⁴ய வாயாமங் ந கரோதீதி அத்தோ². இதி இமஸ்மிங் ஸுத்தே ஸத்தன்னங் ஸேகா²னங் உபரிகு³ணேஹி பரிஹானிகாரணஞ்ச வுத்³தி⁴காரணஞ்ச கதி²தங். யஞ்ச நாம ஸேக²ஸ்ஸ பரிஹானகாரணங், தங் புது²ஜ்ஜனஸ்ஸ பட²மமேவ ஹோதீதி.
10. து³தியஸேக²ஸுத்தவண்ணனா
90. த³ஸமே வியத்தோதி ப்³யத்தோ சே²கோ. கிங்கரணீயேஸூதி இதி கத்தப்³பே³ஸு. சேதோஸமத²ந்தி ஸமாதி⁴கம்மட்டா²னங். அனநுலோமிகேனாதி ஸாஸனஸ்ஸ அனநுச்ச²விகேன. அதிகாலேனாதி அதிபாதோவ. அதிதி³வாதி தி³வா வுச்சதி மஜ்ஜ²ன்ஹிகோ, தங் அதிக்கமித்வா. ஆபி⁴ஸல்லேகி²காதி அதிவிய கிலேஸஸல்லேகி²கா. சேதோவிவரணஸப்பாயாதி சித்தவிவரணஸங்கா²தானங் ஸமத²விபஸ்ஸனானங் ஸப்பாயா. அப்பிச்ச²கதா²தி அப்பிச்சா² ஹோதா²தி ஸந்துட்டி²கதா²தி சதூஹி பச்சயேஹி ஸந்துட்டா² ஹோதா²தி கத²னகதா². பவிவேககதா²தி தீஹி விவேகேஹி விவித்தா ஹோதா²தி கத²னகதா². அஸங்ஸக்³க³கதா²தி பஞ்சவிதே⁴ன ஸங்ஸக்³கே³ன அஸங்ஸட்டா² ஹோதா²தி கத²னகதா². வீரியாரம்ப⁴கதா²தி து³வித⁴ங் வீரியங் ஆரப⁴தா²தி கத²னகதா². ஸீலகதா²தீ³ஸு ஸீலங் ஆரப்³ப⁴ கதா² ஸீலகதா². ஸமாதி⁴ங் ஆரப்³ப⁴, பஞ்ஞங் ஆரப்³ப⁴, பஞ்சவித⁴ங் ந நிகாமலாபீ⁴திஆதீ³ஸு ந இச்சி²திச்சி²தலாபீ⁴, து³க்க²லாபீ⁴ ந விபுலலாபீ⁴தி அத்தோ². ஸேஸங் உத்தானத்த²மேவாதி.
தே²ரவக்³கோ³ சதுத்தோ².