(13) 3. கி³லானவக்³கோ³
1. கி³லானஸுத்தங்
121. ஏகங் ஸமயங் ப⁴க³வா வேஸாலியங் விஹரதி மஹாவனே கூடாகா³ரஸாலாயங். அத² கோ² ப⁴க³வா ஸாயன்ஹஸமயங் படிஸல்லானா வுட்டி²தோ யேன கி³லானஸாலா தேனுபஸங்கமி. அத்³த³ஸா கோ² ப⁴க³வா அஞ்ஞதரங் பி⁴க்கு²ங் து³ப்³ப³லங் கி³லானகங்; தி³ஸ்வா பஞ்ஞத்தே ஆஸனே நிஸீதி³. நிஸஜ்ஜ கோ² ப⁴க³வா பி⁴க்கூ² ஆமந்தேஸி –
‘‘யங் கிஞ்சி யங் கிஞ்சி (ஸ்யா॰ கங்॰), பி⁴க்க²வே, பி⁴க்கு²ங் து³ப்³ப³லங் பி⁴க்க²வே து³ப்³ப³லங் (ஸீ॰ ஸ்யா॰ கங்॰ பீ॰) கி³லானகங் பஞ்ச த⁴ம்மா ந விஜஹந்தி, தஸ்ஸேதங் பாடிகங்க²ங் – ‘நசிரஸ்ஸேவ ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரிஸ்ஸதீ’’’தி.
‘‘கதமே பஞ்ச? இத⁴, பி⁴க்க²வே, பி⁴க்கு² அஸுபா⁴னுபஸ்ஸீ காயே விஹரதி, ஆஹாரே படிகூலஸஞ்ஞீ, ஸப்³ப³லோகே அனபி⁴ரதஸஞ்ஞீ ஸப்³ப³த்த²பி ஏவமேவ தி³ஸ்ஸதி, ஸப்³ப³ஸங்கா²ரேஸு அனிச்சானுபஸ்ஸீ, மரணஸஞ்ஞா கோ² பனஸ்ஸ அஜ்ஜ²த்தங் ஸூபட்டி²தா ஹோதி. யங் கிஞ்சி, பி⁴க்க²வே, பி⁴க்கு²ங் து³ப்³ப³லங் கி³லானகங் இமே பஞ்ச த⁴ம்மா ந விஜஹந்தி, தஸ்ஸேதங் பாடிகங்க²ங் – ‘நசிரஸ்ஸேவ ஆஸவானங் க²யா…பே॰… ஸச்சி²கத்வா உபஸம்பஜ்ஜ விஹரிஸ்ஸதீ’’’தி. பட²மங்.
2. ஸதிஸூபட்டி²தஸுத்தங்
122. ‘‘யோ ஹி கோசி, பி⁴க்க²வே, பி⁴க்கு² வா பி⁴க்கு²னீ வா பஞ்ச த⁴ம்மே பா⁴வேதி பஞ்ச த⁴ம்மே ப³ஹுலீகரோதி, தஸ்ஸ த்³வின்னங் ப²லானங் அஞ்ஞதரங் ப²லங் பாடிகங்க²ங் – தி³ட்டே²வ த⁴ம்மே அஞ்ஞா, ஸதி வா உபாதி³ஸேஸே அனாகா³மிதா.
‘‘கதமே பஞ்ச? இத⁴, பி⁴க்க²வே, பி⁴க்கு²னோ அஜ்ஜ²த்தஞ்ஞேவ ஸதி ஸூபட்டி²தா ஹோதி த⁴ம்மானங் உத³யத்த²கா³மினியா பஞ்ஞாய, அஸுபா⁴னுபஸ்ஸீ காயே விஹரதி, ஆஹாரே படிகூலஸஞ்ஞீ, ஸப்³ப³லோகே அனபி⁴ரதஸஞ்ஞீ, ஸப்³ப³ஸங்கா²ரேஸு அனிச்சானுபஸ்ஸீ. யோ ஹி கோசி, பி⁴க்க²வே, பி⁴க்கு² வா பி⁴க்கு²னீ வா இமே பஞ்ச த⁴ம்மே பா⁴வேதி இமே பஞ்ச த⁴ம்மே ப³ஹுலீகரோதி, தஸ்ஸ த்³வின்னங் ப²லானங் அஞ்ஞதரங் ப²லங் பாடிகங்க²ங் – தி³ட்டே²வ த⁴ம்மே அஞ்ஞா, ஸதி வா உபாதி³ஸேஸே அனாகா³மிதா’’தி. து³தியங்.
3. பட²மஉபட்டா²கஸுத்தங்
123. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ கி³லானோ தூ³பட்டா²கோ து³பட்டா²கோ (ஸ்யா॰ கங்॰ பீ॰ க॰) மஹாவ॰ 366 ஹோதி. கதமேஹி பஞ்சஹி? அஸப்பாயகாரீ ஹோதி, ஸப்பாயே மத்தங் ந ஜானாதி, பே⁴ஸஜ்ஜங் நப்படிஸேவிதா ஹோதி, அத்த²காமஸ்ஸ கி³லானுபட்டா²கஸ்ஸ ந யதா²பூ⁴தங் ஆபா³த⁴ங் ஆவிகத்தா ஹோதி அபி⁴க்கமந்தங் வா அபி⁴க்கமதீதி படிக்கமந்தங் வா படிக்கமதீதி டி²தங் வா டி²தோதி, உப்பன்னானங் ஸாரீரிகானங் வேத³னானங் து³க்கா²னங் திப்³பா³னங் திப்பானங் (ஸீ॰) மஹாவ॰ 366 க²ரானங் கடுகானங் அஸாதானங் அமனாபானங் பாணஹரானங் அனதி⁴வாஸகஜாதிகோ ஹோதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ கி³லானோ தூ³பட்டா²கோ ஹோதி.
‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ கி³லானோ ஸூபட்டா²கோ ஹோதி. கதமேஹி பஞ்சஹி? ஸப்பாயகாரீ ஹோதி, ஸப்பாயே மத்தங் ஜானாதி, பே⁴ஸஜ்ஜங் படிஸேவிதா ஹோதி, அத்த²காமஸ்ஸ கி³லானுபட்டா²கஸ்ஸ யதா²பூ⁴தங் ஆபா³த⁴ங் ஆவிகத்தா ஹோதி அபி⁴க்கமந்தங் வா அபி⁴க்கமதீதி படிக்கமந்தங் வா படிக்கமதீதி டி²தங் வா டி²தோதி, உப்பன்னானங் ஸாரீரிகானங் வேத³னானங் து³க்கா²னங் திப்³பா³னங் க²ரானங் கடுகானங் அஸாதானங் அமனாபானங் பாணஹரானங் அதி⁴வாஸகஜாதிகோ ஹோதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ கி³லானோ ஸூபட்டா²கோ ஹோதீ’’தி. ததியங்.
4. து³தியஉபட்டா²கஸுத்தங்
124. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ கி³லானுபட்டா²கோ நாலங் கி³லானங் உபட்டா²துங். கதமேஹி பஞ்சஹி? நப்படிப³லோ ஹோதி பே⁴ஸஜ்ஜங் ஸங்விதா⁴துங்; ஸப்பாயாஸப்பாயங் ந ஜானாதி, அஸப்பாயங் உபனாமேதி, ஸப்பாயங் அபனாமேதி; ஆமிஸந்தரோ கி³லானங் உபட்டா²தி, நோ மெத்தசித்தோ ; ஜேகு³ச்சீ² ஹோதி உச்சாரங் வா பஸ்ஸாவங் வா வந்தங் வா கே²ளங் வா நீஹரிதுங்; நப்படிப³லோ ஹோதி கி³லானங் காலேன காலங் த⁴ம்மியா கதா²ய ஸந்த³ஸ்ஸேதுங் ஸமாத³பேதுங் ஸமாதா³பேதுங் (?) மஹாவ॰ 366 ஸமுத்தேஜேதுங் ஸம்பஹங்ஸேதுங். இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ கி³லானுபட்டா²கோ நாலங் கி³லானங் உபட்டா²துங்.
‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ கி³லானுபட்டா²கோ அலங் கி³லானங் உபட்டா²துங். கதமேஹி பஞ்சஹி? படிப³லோ ஹோதி பே⁴ஸஜ்ஜங் ஸங்விதா⁴துங்; ஸப்பாயாஸப்பாயங் ஜானாதி, அஸப்பாயங் அபனாமேதி, ஸப்பாயங் உபனாமேதி; மெத்தசித்தோ கி³லானங் உபட்டா²தி, நோ ஆமிஸந்தரோ; அஜேகு³ச்சீ² ஹோதி உச்சாரங் வா பஸ்ஸாவங் வா வந்தங் வா கே²ளங் வா நீஹரிதுங்; படிப³லோ ஹோதி கி³லானங் காலேன காலங் த⁴ம்மியா கதா²ய ஸந்த³ஸ்ஸேதுங் ஸமாத³பேதுங் ஸமுத்தேஜேதுங் ஸம்பஹங்ஸேதுங். இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ கி³லானுபட்டா²கோ அலங் கி³லானங் உபட்டா²து’’ந்தி. சதுத்த²ங்.
5. பட²மஅனாயுஸ்ஸாஸுத்தங்
125. ‘‘பஞ்சிமே , பி⁴க்க²வே, த⁴ம்மா அனாயுஸ்ஸா. கதமே பஞ்ச? அஸப்பாயகாரீ ஹோதி, ஸப்பாயே மத்தங் ந ஜானாதி, அபரிணதபோ⁴ஜீ ச ஹோதி, அகாலசாரீ ச ஹோதி, அப்³ரஹ்மசாரீ ச. இமே கோ², பி⁴க்க²வே, பஞ்ச த⁴ம்மா அனாயுஸ்ஸா.
‘‘பஞ்சிமே, பி⁴க்க²வே, த⁴ம்மா ஆயுஸ்ஸா. கதமே பஞ்ச? ஸப்பாயகாரீ ஹோதி, ஸப்பாயே மத்தங் ஜானாதி, பரிணதபோ⁴ஜீ ச ஹோதி, காலசாரீ ச ஹோதி, ப்³ரஹ்மசாரீ ச. இமே கோ², பி⁴க்க²வே, பஞ்ச த⁴ம்மா ஆயுஸ்ஸா’’தி. பஞ்சமங்.
6. து³தியஅனாயுஸ்ஸாஸுத்தங்
126. ‘‘பஞ்சிமே, பி⁴க்க²வே, த⁴ம்மா அனாயுஸ்ஸா. கதமே பஞ்ச? அஸப்பாயகாரீ ஹோதி, ஸப்பாயே மத்தங் ந ஜானாதி, அபரிணதபோ⁴ஜீ ச ஹோதி, து³ஸ்ஸீலோ ச, பாபமித்தோ ச. இமே கோ², பி⁴க்க²வே, பஞ்ச த⁴ம்மா அனாயுஸ்ஸா.
‘‘பஞ்சிமே, பி⁴க்க²வே, த⁴ம்மா ஆயுஸ்ஸா. கதமே பஞ்ச ? ஸப்பாயகாரீ ஹோதி, ஸப்பாயே மத்தங் ஜானாதி, பரிணதபோ⁴ஜீ ச ஹோதி, ஸீலவா ச, கல்யாணமித்தோ ச. இமே கோ², பி⁴க்க²வே, பஞ்ச த⁴ம்மா ஆயுஸ்ஸா’’தி. ச²ட்ட²ங்.
7. வபகாஸஸுத்தங்
127. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² நாலங் ஸங்க⁴ம்ஹா வபகாஸிதுங் வி + அப + காஸிதுங் = வபகாஸிதுங். கதமேஹி பஞ்சஹி? இத⁴, பி⁴க்க²வே, பி⁴க்கு² அஸந்துட்டோ² ஹோதி இதரீதரேன சீவரேன, அஸந்துட்டோ² ஹோதி இதரீதரேன பிண்ட³பாதேன, அஸந்துட்டோ² ஹோதி இதரீதரேன ஸேனாஸனேன, அஸந்துட்டோ² ஹோதி இதரீதரேன கி³லானப்பச்சயபே⁴ஸஜ்ஜபரிக்கா²ரேன, காமஸங்கப்பப³ஹுலோ ச விஹரதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ பி⁴க்கு² நாலங் ஸங்க⁴ம்ஹா வபகாஸிதுங்.
‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² அலங் ஸங்க⁴ம்ஹா வபகாஸிதுங். கதமேஹி பஞ்சஹி? இத⁴ , பி⁴க்க²வே, பி⁴க்கு² ஸந்துட்டோ² ஹோதி இதரீதரேன சீவரேன, ஸந்துட்டோ² ஹோதி இதரீதரேன பிண்ட³பாதேன, ஸந்துட்டோ² ஹோதி இதரீதரேன ஸேனாஸனேன, ஸந்துட்டோ² ஹோதி இதரீதரேன கி³லானப்பச்சயபே⁴ஸஜ்ஜபரிக்கா²ரேன , நெக்க²ம்மஸங்கப்பப³ஹுலோ ந காமஸங்கப்பப³ஹுலோ (க॰) ச விஹரதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ பி⁴க்கு² அலங் ஸங்க⁴ம்ஹா வபகாஸிது’’ந்தி. ஸத்தமங்.
8. ஸமணஸுக²ஸுத்தங்
128. ‘‘பஞ்சிமானி, பி⁴க்க²வே, ஸமணது³க்கா²னி. கதமானி பஞ்ச? இத⁴, பி⁴க்க²வே, பி⁴க்கு² அஸந்துட்டோ² ஹோதி இதரீதரேன சீவரேன, அஸந்துட்டோ² ஹோதி இதரீதரேன பிண்ட³பாதேன, அஸந்துட்டோ² ஹோதி இதரீதரேன ஸேனாஸனேன, அஸந்துட்டோ² ஹோதி இதரீதரேன கி³லானப்பச்சயபே⁴ஸஜ்ஜபரிக்கா²ரேன, அனபி⁴ரதோ ச ப்³ரஹ்மசரியங் சரதி. இமானி கோ², பி⁴க்க²வே, பஞ்ச ஸமணது³க்கா²னி.
‘‘பஞ்சிமானி, பி⁴க்க²வே, ஸமணஸுகா²னி. கதமானி பஞ்ச? இத⁴, பி⁴க்க²வே, பி⁴க்கு² ஸந்துட்டோ² ஹோதி இதரீதரேன சீவரேன, ஸந்துட்டோ² ஹோதி இதரீதரேன பிண்ட³பாதேன, ஸந்துட்டோ² ஹோதி இதரீதரேன ஸேனாஸனேன, ஸந்துட்டோ² ஹோதி இதரீதரேன கி³லானப்பச்சயபே⁴ஸஜ்ஜபரிக்கா²ரேன, அபி⁴ரதோ ச ப்³ரஹ்மசரியங் சரதி. இமானி கோ², பி⁴க்க²வே, பஞ்ச ஸமணஸுகா²னீ’’தி. அட்ட²மங்.
9. பரிகுப்பஸுத்தங்
129. ‘‘பஞ்சிமே, பி⁴க்க²வே, ஆபாயிகா நேரயிகா பரிகுப்பா அதேகிச்சா². கதமே பஞ்ச? மாதா மாதரங் (க॰) ஜீவிதா வோரோபிதா ஹோதி, பிதா பிதரங் (க॰) ஜீவிதா வோரோபிதோ வோரோபிதா (க॰) ஹோதி, அரஹங் அரஹந்தங் (க॰), அரஹா (ஸ்யா॰) ஜீவிதா வோரோபிதோ ஹோதி, ததா²க³தஸ்ஸ து³ட்டே²ன சித்தேன லோஹிதங் உப்பாதி³தங் ஹோதி, ஸங்கோ⁴ பி⁴ன்னோ ஹோதி. இமே கோ², பி⁴க்க²வே, பஞ்ச ஆபாயிகா நேரயிகா பரிகுப்பா அதேகிச்சா²’’தி. நவமங்.
10. ப்³யஸனஸுத்தங்
130. ‘‘பஞ்சிமானி , பி⁴க்க²வே, ப்³யஸனானி. கதமானி பஞ்ச? ஞாதிப்³யஸனங், போ⁴க³ப்³யஸனங், ரோக³ப்³யஸனங், ஸீலப்³யஸனங், தி³ட்டி²ப்³யஸனங். ந, பி⁴க்க²வே, ஸத்தா ஞாதிப்³யஸனஹேது வா போ⁴க³ப்³யஸனஹேது வா ரோக³ப்³யஸனஹேது வா காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங் நிரயங் உபபஜ்ஜந்தி. ஸீலப்³யஸனஹேது வா, பி⁴க்க²வே, ஸத்தா தி³ட்டி²ப்³யஸனஹேது வா காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங் நிரயங் உபபஜ்ஜந்தி. இமானி கோ², பி⁴க்க²வே, பஞ்ச ப்³யஸனானி.
‘‘பஞ்சிமா, பி⁴க்க²வே, ஸம்பதா³. கதமா பஞ்ச? ஞாதிஸம்பதா³, போ⁴க³ஸம்பதா³, ஆரொக்³யஸம்பதா³, ஸீலஸம்பதா³, தி³ட்டி²ஸம்பதா³. ந, பி⁴க்க²வே, ஸத்தா ஞாதிஸம்பதா³ஹேது வா போ⁴க³ஸம்பதா³ஹேது வா ஆரொக்³யஸம்பதா³ஹேது வா காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங் உபபஜ்ஜந்தி. ஸீலஸம்பதா³ஹேது வா, பி⁴க்க²வே, ஸத்தா தி³ட்டி²ஸம்பதா³ஹேது வா காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங் உபபஜ்ஜந்தி. இமா கோ², பி⁴க்க²வே, பஞ்ச ஸம்பதா³’’தி. த³ஸமங்.
கி³லானவக்³கோ³ ததியோ.
தஸ்ஸுத்³தா³னங் –
கி³லானோ ஸதிஸூபட்டி², த்³வே உபட்டா²கா து³வாயுஸா;
வபகாஸஸமணஸுகா², பரிகுப்பங் ப்³யஸனேன சாதி.