(12) 2. பச்சோரோஹணிவக்³கோ³
1-2. அத⁴ம்மஸுத்தத்³வயவண்ணனா
113-114. து³தியஸ்ஸ
3. ததியஅத⁴ம்மஸுத்தவண்ணனா
115. ததியே உத்³தே³ஸங் உத்³தி³ஸித்வாதி மாதிகங் நிக்கி²பித்வா. ஸத்து² சேவ ஸங்வண்ணிதோதி பஞ்சஸு டா²னேஸு ஏதத³க்³கே³ ட²பெந்தேன ஸத்தா²ரா ஸங்வண்ணிதோ. ஸம்பா⁴விதோதி கு³ணஸம்பா⁴வனாய ஸம்பா⁴விதோ. பஹோதீதி ஸக்கோதி. அதிஸித்வாதி அதிக்கமித்வா. ஜானங் ஜானாதீதி ஜானிதப்³ப³கங் பஸ்ஸங் பஸ்ஸதீதி பஸ்ஸிதப்³ப³கங் பஸ்ஸதி. சக்கு²பூ⁴தோதி சக்கு² விய பூ⁴தோ ஜாதோ நிப்³ப³த்தோ. ஞாணபூ⁴தோதி ஞாணஸபா⁴வோ. த⁴ம்மபூ⁴தோதி த⁴ம்மஸபா⁴வோ. ப்³ரஹ்மபூ⁴தோதி ஸெட்ட²ஸபா⁴வோ. வத்தாதி வத்துங் ஸமத்தோ². பவத்தாதி பவத்தேதுங் ஸமத்தோ². அத்த²ஸ்ஸ நின்னேதாதி அத்த²ங் நீஹரித்வா த³ஸ்ஸேதா. யதா² நோ ப⁴க³வாதி யதா² அம்ஹாகங் ப⁴க³வா ப்³யாகரெய்ய.
4. அஜிதஸுத்தவண்ணனா
116. சதுத்தே² அஜிதோதி ஏவங்னாமகோ. சித்தட்டா²னஸதானீதி சித்துப்பாத³ஸதானி. யேஹீதி யேஹி சித்தட்டா²னஸதேஹி அனுயுஞ்ஜியமானா. உபாரத்³தா⁴வ ஜானந்தி உபாரத்³த⁴ஸ்மாதி விரத்³தா⁴ நிக்³க³ஹிதா ஏவங் ஜானந்தி ‘‘விரத்³தா⁴ மயங், நிக்³க³ஹிதா மயங், ஆரோபிதோ நோ தோ³ஸோ’’தி. பண்டி³தவத்தூ²னீதி பண்டி³தபா⁴வத்தா²ய காரணானி.
5-6. ஸங்கா³ரவஸுத்தாதி³வண்ணனா
117-118. பஞ்சமே ஓரிமங் தீரந்தி லோகியங் ஓரிமதீரங். பாரிமங் தீரந்தி லோகுத்தரங் பாரிமதீரங். பாரகா³மினோதி நிப்³பா³னகா³மினோ. தீரமேவானுதா⁴வதீதி ஸக்காயதி³ட்டி²தீரங்யேவ அனுதா⁴வதி. த⁴ம்மே த⁴ம்மானுவத்தினோதி ஸம்மா அக்கா²தே நவவிதே⁴ லோகுத்தரத⁴ம்மே அனுத⁴ம்மவத்தினோ, தஸ்ஸ த⁴ம்மஸ்ஸானுச்ச²விகாய ஸஹஸீலாய புப்³ப³பா⁴க³படிபத்தியா பவத்தமானா. மச்சுதெ⁴ய்யங் ஸுது³த்தரந்தி மச்சுனோ டா²னபூ⁴தங் தேபூ⁴மகவட்டங் ஸுது³த்தரங் தரித்வா. பாரமெஸ்ஸந்தீதி நிப்³பா³னங் பாபுணிஸ்ஸந்தி.
ஓகா அனோகமாக³ம்மாதி வட்டதோ விவட்டங் ஆக³ம்ம. விவேகே யத்த² தூ³ரமந்தி யஸ்மிங் காயசித்தஉபதி⁴விவேகே து³ரபி⁴ரமங், தத்ராபி⁴ரதிமிச்செ²ய்ய. ஹித்வா காமேதி து³விதே⁴பி காமே பஹாய. அகிஞ்சனோதி நிப்பலிபோ³தோ⁴. ஆதா³னபடினிஸ்ஸகே³தி க³ஹணபடினிஸ்ஸக்³க³ஸங்கா²தே நிப்³பா³னே. அனுபாதா³ய யே ரதாதி சதூஹி உபாதா³னேஹி கிஞ்சிபி அனுபாதி³யித்வா யே அபி⁴ரதா. பரினிப்³பு³தாதி தே அபச்சயபரினிப்³பா³னேன பரினிப்³பு³தா நாமாதி வேதி³தப்³பா³. ச²ட்ட²ங் பி⁴க்கூ²னங் தே³ஸிதங்.
7-8. பச்சோரோஹணீஸுத்தத்³வயவண்ணனா
119-120. ஸத்தமே பச்சோரோஹணீதி பாபஸ்ஸ பச்சோரோஹணங். பத்த²ரித்வாதி ஸந்த²ரித்வா. அந்தரா ச வேலங் அந்தரா ச அக்³யாகா³ரந்தி வாலிகாராஸிஸ்ஸ ச அக்³கி³அகா³ரஸ்ஸ ச அந்தரே. அட்ட²மங் பி⁴க்கு²ஸங்க⁴ஸ்ஸ தே³ஸிதங். ஸேஸங் ஸப்³ப³த்த² உத்தானத்த²மேவாதி.
பச்சோரோஹணிவக்³கோ³ து³தியோ.