(8) 3. யமகவக்³கோ³
1-2. ஸத்³தா⁴ஸுத்தத்³வயவண்ணனா
71-72. அட்ட²மஸ்ஸ நோ ச ஸீலவாதி ந ஸீலேஸு பரிபூரகாரீ. ஸமந்தபாஸாதி³கோதி ஸமந்ததோ பஸாத³ஜனகோ. ஸப்³பா³காரபரிபூரோதி ஸப்³பே³ஹி ஸமணாகாரேஹி ஸமணத⁴ம்மகொட்டா²ஸேஹி பரிபூரோ. து³தியே ஸந்தாதி பச்சனீகஸந்ததாய ஸந்தா. விமொக்கா²தி பச்சனீகத⁴ம்மேஹி விமுத்தத்தா ச விமொக்கா².
3-9. மரணஸ்ஸதிஸுத்தத்³வயாதி³வண்ணனா
73-79. ததியே பா⁴வேத² நோதி பா⁴வேத² நு. ஸாஸனந்தி அனுஸிட்டி². ஆஸவானங் க²யாயாதி அரஹத்தப²லத்தா²ய. சதுத்தே² பதிஹிதாயாதி படிபன்னாய. ஸோ மமஸ்ஸ அந்தராயோதி ஸோ மம ஜீவிதந்தராயோபி, புது²ஜ்ஜனகாலகிரியங் கரொந்தஸ்ஸ ஸக்³க³ந்தராயோபி மக்³க³ந்தராயோபி அஸ்ஸ. ஸத்த²கா வா மே வாதாதி ஸத்த²ங் விய அங்க³மங்கா³னி கந்தந்தீதி ஸத்த²கா. பஞ்சமாதீ³னி வுத்தனயானேவ. நவமே ஸங்ஸக்³கா³ராமதாதி பஞ்சவிதே⁴ ஸங்ஸக்³கே³ ஆராமதா.
10. குஸீதாரம்ப⁴வத்து²ஸுத்தவண்ணனா
80. த³ஸமே குஸீதவத்தூ²னீதி குஸீதஸ்ஸ அலஸஸ்ஸ வத்தூ²னி பதிட்டா², கோஸஜ்ஜகாரணானீதி அத்தோ². கம்மங் கத்தப்³ப³ங் ஹோதீதி சீவரவிசாரணாதி³கம்மங் கத்தப்³ப³ங் ஹோதி. ந வீரியங் ஆரப⁴தீதி து³வித⁴ம்பி வீரியங் நாரப⁴தி. அப்பத்தஸ்ஸாதி ஜா²னவிபஸ்ஸனாமக்³க³ப²லத⁴ம்மஸ்ஸ அப்பத்தஸ்ஸ பத்தியா. அனதி⁴க³தஸ்ஸாதி தஸ்ஸேவ அனதி⁴க³தஸ்ஸ அதி⁴க³மத்தா²ய. அஸச்சி²கதஸ்ஸாதி ததே³வ அஸச்சி²கதஸ்ஸ ஸச்சி²கரணத்தா²ய. இத³ங் பட²மந்தி இத³ங் ‘‘ஹந்தா³ஹங் நிபஜ்ஜாமீ’’தி ஏவங் ஓஸீத³னங் பட²மங் குஸீதவத்து². இமினா நயேன ஸப்³ப³த்த² அத்தோ² வேதி³தப்³போ³. மாஸாசிதகங் மஞ்ஞேதி எத்த² பன மாஸாசிதங் நாம திந்தமாஸோ. யதா² திந்தமாஸோ க³ருகோ ஹோதி, ஏவங் க³ருகோதி அதி⁴ப்பாயோ கி³லானா வுட்டி²தோ ஹோதீதி கி³லானோ ஹுத்வா பச்சா² வுட்டி²தோ ஹோதி. ஆரம்ப⁴வத்தூ²னீதி வீரியகாரணானி. தேஸம்பி இமினாவ நயேன அத்தோ² வேதி³தப்³போ³. ஸேஸங் ஸப்³ப³த்த² உத்தானமேவாதி.
யமகவக்³கோ³ அட்ட²மோ.