நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ
அங்கு³த்தரனிகாயோ
நவகனிபாதபாளி
1. பட²மபண்ணாஸகங்
1. ஸம்போ³தி⁴வக்³கோ³
1. ஸம்போ³தி⁴ஸுத்தங்
1. ஏவங் மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தத்ர கோ² ப⁴க³வா பி⁴க்கூ² ஆமந்தேஸி –
‘‘ஸசே, பி⁴க்க²வே, அஞ்ஞதித்தி²யா பரிப்³பா³ஜகா ஏவங் புச்செ²ய்யுங் – ‘ஸம்போ³தி⁴பக்கி²கானங் ஸம்போ³த⁴பக்கி²கானங் (ஸீ॰ ஸ்யா॰ பீ॰), ஆவுஸோ, த⁴ம்மானங் கா உபனிஸா பா⁴வனாயா’தி, ஏவங் புட்டா² தும்ஹே, பி⁴க்க²வே, தேஸங் அஞ்ஞதித்தி²யானங் பரிப்³பா³ஜகானங் கிந்தி ப்³யாகரெய்யாதா²’’தி? ‘‘ப⁴க³வங்மூலகா நோ, ப⁴ந்தே, த⁴ம்மா…பே॰… ப⁴க³வதோ ஸுத்வா பி⁴க்கூ² தா⁴ரெஸ்ஸந்தீ’’தி.
‘‘தேன ஹி, பி⁴க்க²வே, ஸுணாத², ஸாது⁴கங் மனஸி கரோத²; பா⁴ஸிஸ்ஸாமீ’’தி. ‘‘ஏவங், ப⁴ந்தே’’தி கோ² தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –
‘‘ஸசே, பி⁴க்க²வே, அஞ்ஞதித்தி²யா பரிப்³பா³ஜகா ஏவங் புச்செ²ய்யுங் – ‘ஸம்போ³தி⁴பக்கி²கானங், ஆவுஸோ, த⁴ம்மானங் கா உபனிஸா பா⁴வனாயா’தி, ஏவங் புட்டா² தும்ஹே, பி⁴க்க²வே, தேஸங் அஞ்ஞதித்தி²யானங் பரிப்³பா³ஜகானங் ஏவங் ப்³யாகரெய்யாத² –
‘‘இதா⁴வுஸோ, பி⁴க்கு² கல்யாணமித்தோ ஹோதி கல்யாணஸஹாயோ கல்யாணஸம்பவங்கோ . ஸம்போ³தி⁴பக்கி²கானங், ஆவுஸோ, த⁴ம்மானங் அயங் பட²மா உபனிஸா பா⁴வனாய.
‘‘புன சபரங், ஆவுஸோ, பி⁴க்கு² ஸீலவா ஹோதி, பாதிமொக்க²ஸங்வரஸங்வுதோ விஹரதி ஆசாரகோ³சரஸம்பன்னோ அணுமத்தேஸு வஜ்ஜேஸு ப⁴யத³ஸ்ஸாவீ, ஸமாதா³ய ஸிக்க²தி ஸிக்கா²பதே³ஸு. ஸம்போ³தி⁴பக்கி²கானங், ஆவுஸோ, த⁴ம்மானங் அயங் து³தியா உபனிஸா பா⁴வனாய.
‘‘புன சபரங், ஆவுஸோ, பி⁴க்கு² யாயங் கதா² அபி⁴ஸல்லேகி²கா சேதோவிவரணஸப்பாயா, ஸெய்யதி²த³ங் – அப்பிச்ச²கதா² ஸந்துட்டி²கதா² பவிவேககதா² அஸங்ஸக்³க³கதா² வீரியாரம்ப⁴கதா² ஸீலகதா² ஸமாதி⁴கதா² பஞ்ஞாகதா² விமுத்திகதா² விமுத்திஞாணத³ஸ்ஸனகதா², ஏவரூபியா கதா²ய நிகாமலாபீ⁴ ஹோதி அகிச்ச²லாபீ⁴ அகஸிரலாபீ⁴. ஸம்போ³தி⁴பக்கி²கானங், ஆவுஸோ, த⁴ம்மானங் அயங் ததியா உபனிஸா பா⁴வனாய.
‘‘புன சபரங், ஆவுஸோ, பி⁴க்கு² ஆரத்³த⁴வீரியோ விஹரதி அகுஸலானங் த⁴ம்மானங் பஹானாய, குஸலானங் த⁴ம்மானங் உபஸம்பதா³ய, தா²மவா த³ள்ஹபரக்கமோ அனிக்கி²த்தது⁴ரோ குஸலேஸு த⁴ம்மேஸு. ஸம்போ³தி⁴பக்கி²கானங், ஆவுஸோ, த⁴ம்மானங் அயங் சதுத்தீ² உபனிஸா பா⁴வனாய.
‘‘புன சபரங், ஆவுஸோ, பி⁴க்கு² பஞ்ஞவா ஹோதி உத³யத்த²கா³மினியா பஞ்ஞாய ஸமன்னாக³தோ அரியாய நிப்³பே³தி⁴காய ஸம்மா து³க்க²க்க²யகா³மினியா. ஸம்போ³தி⁴பக்கி²கானங், ஆவுஸோ, த⁴ம்மானங் அயங் பஞ்சமீ உபனிஸா பா⁴வனாய’’.
‘‘கல்யாணமித்தஸ்ஸேதங் , பி⁴க்க²வே, பி⁴க்கு²னோ பாடிகங்க²ங் கல்யாணஸஹாயஸ்ஸ கல்யாணஸம்பவங்கஸ்ஸ – ஸீலவா ப⁴விஸ்ஸதி, பாதிமொக்க²ஸங்வரஸங்வுதோ விஹரிஸ்ஸதி ஆசாரகோ³சரஸம்பன்னோ அணுமத்தேஸு வஜ்ஜேஸு ப⁴யத³ஸ்ஸாவீ, ஸமாதா³ய ஸிக்கி²ஸ்ஸதி ஸிக்கா²பதே³ஸு.
‘‘கல்யாணமித்தஸ்ஸேதங், பி⁴க்க²வே, பி⁴க்கு²னோ பாடிகங்க²ங் கல்யாணஸஹாயஸ்ஸ கல்யாணஸம்பவங்கஸ்ஸ – யாயங் கதா² அபி⁴ஸல்லேகி²கா சேதோவிவரணஸப்பாயா, ஸெய்யதி²த³ங் – அப்பிச்ச²கதா² ஸந்துட்டி²கதா² பவிவேககதா² அஸங்ஸக்³க³கதா² வீரியாரம்ப⁴கதா² ஸீலகதா² ஸமாதி⁴கதா² பஞ்ஞாகதா² விமுத்திகதா² விமுத்திஞாணத³ஸ்ஸனகதா², ஏவரூபியா கதா²ய நிகாமலாபீ⁴ ப⁴விஸ்ஸதி அகிச்ச²லாபீ⁴ அகஸிரலாபீ⁴.
‘‘கல்யாணமித்தஸ்ஸேதங், பி⁴க்க²வே, பி⁴க்கு²னோ பாடிகங்க²ங் கல்யாணஸஹாயஸ்ஸ கல்யாணஸம்பவங்கஸ்ஸ – ஆரத்³த⁴வீரியோ விஹரிஸ்ஸதி அகுஸலானங் த⁴ம்மானங் பஹானாய, குஸலானங் த⁴ம்மானங் உபஸம்பதா³ய, தா²மவா த³ள்ஹபரக்கமோ அனிக்கி²த்தது⁴ரோ குஸலேஸு த⁴ம்மேஸு.
‘‘கல்யாணமித்தஸ்ஸேதங், பி⁴க்க²வே, பி⁴க்கு²னோ பாடிகங்க²ங் கல்யாணஸஹாயஸ்ஸ கல்யாணஸம்பவங்கஸ்ஸ – பஞ்ஞவா ப⁴விஸ்ஸதி உத³யத்த²கா³மினியா பஞ்ஞாய ஸமன்னாக³தோ அரியாய நிப்³பே³தி⁴காய ஸம்மா து³க்க²க்க²யகா³மினியா.
‘‘தேன ச பன, பி⁴க்க²வே, பி⁴க்கு²னா இமேஸு பஞ்சஸு த⁴ம்மேஸு பதிட்டா²ய சத்தாரோ த⁴ம்மா உத்தரி உத்தரிங் (ஸீ॰ ஸ்யா॰ பீ॰) பா⁴வேதப்³பா³ – அஸுபா⁴ பா⁴வேதப்³பா³ ராக³ஸ்ஸ பஹானாய, மெத்தா பா⁴வேதப்³பா³ ப்³யாபாத³ஸ்ஸ பஹானாய, ஆனாபானஸ்ஸதி ஆனாபானஸதி (ஸீ॰ பீ॰) பா⁴வேதப்³பா³ விதக்குபச்சே²தா³ய, அனிச்சஸஞ்ஞா பா⁴வேதப்³பா³ அஸ்மிமானஸமுக்³கா⁴தாய. அனிச்சஸஞ்ஞினோ, பி⁴க்க²வே, அனத்தஸஞ்ஞா ஸண்டா²தி. அனத்தஸஞ்ஞீ அஸ்மிமானஸமுக்³கா⁴தங் பாபுணாதி தி³ட்டே²வ த⁴ம்மே நிப்³பா³ன’’ந்தி . பட²மங்.
2. நிஸ்ஸயஸுத்தங்
2. அத² கோ² அஞ்ஞதரோ பி⁴க்கு² யேன ப⁴க³வா தேனுபஸங்கமி; உபஸங்கமித்வா ப⁴க³வந்தங்…பே॰… ஏகமந்தங் நிஸின்னோ கோ² ஸோ பி⁴க்கு² ப⁴க³வந்தங் ஏதத³வோச – ‘‘‘நிஸ்ஸயஸம்பன்னோ நிஸ்ஸயஸம்பன்னோ’தி, ப⁴ந்தே, வுச்சதி. கித்தாவதா நு கோ², ப⁴ந்தே, பி⁴க்கு² நிஸ்ஸயஸம்பன்னோ ஹோதீ’’தி? ‘‘ஸத்³த⁴ங் சே, பி⁴க்கு², பி⁴க்கு² நிஸ்ஸாய அகுஸலங் பஜஹதி குஸலங் பா⁴வேதி, பஹீனமேவஸ்ஸ தங் அகுஸலங் ஹோதி. ஹிரிங் சே, பி⁴க்கு², பி⁴க்கு² நிஸ்ஸாய…பே॰… ஒத்தப்பங் சே, பி⁴க்கு², பி⁴க்கு² நிஸ்ஸாய…பே॰… வீரியங் சே, பி⁴க்கு², பி⁴க்கு² நிஸ்ஸாய…பே॰… பஞ்ஞங் சே, பி⁴க்கு², பி⁴க்கு² நிஸ்ஸாய அகுஸலங் பஜஹதி குஸலங் பா⁴வேதி, பஹீனமேவஸ்ஸ தங் அகுஸலங் ஹோதி . தங் ஹிஸ்ஸ பி⁴க்கு²னோ அகுஸலங் பஹீனங் ஹோதி ஸுப்பஹீனங், யங்ஸ அரியாய பஞ்ஞாய தி³ஸ்வா பஹீனங்’’.
‘‘தேன ச பன, பி⁴க்கு², பி⁴க்கு²னா இமேஸு பஞ்சஸு த⁴ம்மேஸு பதிட்டா²ய சத்தாரோ உபனிஸ்ஸாய விஹாதப்³பா³. கதமே சத்தாரோ? இத⁴, பி⁴க்கு², பி⁴க்கு² ஸங்கா²யேகங் படிஸேவதி, ஸங்கா²யேகங் அதி⁴வாஸேதி, ஸங்கா²யேகங் பரிவஜ்ஜேதி, ஸங்கா²யேகங் வினோதே³தி. ஏவங் கோ², பி⁴க்கு², பி⁴க்கு² நிஸ்ஸயஸம்பன்னோ ஹோதீ’’தி. து³தியங்.
3. மேகி⁴யஸுத்தங்
3. ஏகங் ஸமயங் ப⁴க³வா சாலிகாயங் விஹரதி சாலிகாபப்³ப³தே. தேன கோ² பன ஸமயேன ஆயஸ்மா மேகி⁴யோ ப⁴க³வதோ உபட்டா²கோ ஹோதி. அத² கோ² ஆயஸ்மா மேகி⁴யோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் அட்டா²ஸி. ஏகமந்தங் டி²தோ கோ² ஆயஸ்மா மேகி⁴யோ ப⁴க³வந்தங் ஏதத³வோச – ‘‘இச்சா²மஹங், ப⁴ந்தே, ஜந்துகா³மங் ஜதுகா³மங் (ஸீ॰ அட்ட²॰, ஸ்யா॰ அட்ட²॰), ஜத்துகா³மங் (க॰ அட்ட²கதா²யம்பி பாட²ந்தரங்) பிண்டா³ய பவிஸிது’’ந்தி. ‘‘யஸ்ஸ தா³னி த்வங், மேகி⁴ய, காலங் மஞ்ஞஸீ’’தி.
அத² கோ² ஆயஸ்மா மேகி⁴யோ புப்³ப³ண்ஹஸமயங் நிவாஸெத்வா பத்தசீவரமாதா³ய ஜந்துகா³மங் பிண்டா³ய பாவிஸி. ஜந்துகா³மே பிண்டா³ய சரித்வா பச்சா²ப⁴த்தங் பிண்ட³பாதபடிக்கந்தோ யேன கிமிகாளாய நதி³யா தீரங் தேனுபஸங்கமி. அத்³த³ஸா கோ² ஆயஸ்மா மேகி⁴யோ கிமிகாளாய நதி³யா தீரே ஜங்கா⁴விஹாரங் ஜங்க⁴விஹாரங் (ஸ்யா॰ க॰) அனுசங்கமமானோ அனுவிசரமானோ அம்ப³வனங் பாஸாதி³கங் ரமணீயங். தி³ஸ்வானஸ்ஸ ஏதத³ஹோஸி – ‘‘பாஸாதி³கங் வதித³ங் அம்ப³வனங் ரமணீயங், அலங் வதித³ங் குலபுத்தஸ்ஸ பதா⁴னத்தி²கஸ்ஸ பதா⁴னாய. ஸசே மங் ப⁴க³வா அனுஜானெய்ய, ஆக³ச்செ²ய்யாஹங் இமங் அம்ப³வனங் பதா⁴னாயா’’தி.
அத² கோ² ஆயஸ்மா மேகி⁴யோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா மேகி⁴யோ ப⁴க³வந்தங் ஏதத³வோச – ‘‘இதா⁴ஹங், ப⁴ந்தே, புப்³ப³ண்ஹஸமயங் நிவாஸெத்வா பத்தசீவரமாதா³ய ஜந்துகா³மங் பிண்டா³ய பாவிஸிங். ஜந்துகா³மே பிண்டா³ய சரித்வா பச்சா²ப⁴த்தங் பிண்ட³பாதபடிக்கந்தோ யேன கிமிகாளாய நதி³யா தீரங் தேனுபஸங்கமிங். அத்³த³ஸங் கோ² அஹங், ப⁴ந்தே, கிமிகாளாய நதி³யா தீரே ஜங்கா⁴விஹாரங் அனுசங்கமமானோ அனுவிசரமானோ அம்ப³வனங் பாஸாதி³கங் ரமணீயங். தி³ஸ்வான மே ஏதத³ஹோஸி – ‘பாஸாதி³கங் வதித³ங் அம்ப³வனங் ரமணீயங். அலங் வதித³ங் குலபுத்தஸ்ஸ பதா⁴னத்தி²கஸ்ஸ பதா⁴னாய. ஸசே மங் ப⁴க³வா அனுஜானெய்ய, ஆக³ச்செ²ய்யாஹங் இமங் அம்ப³வனங் பதா⁴னாயா’தி. ஸசே மங் ப⁴க³வா அனுஜானெய்ய, க³ச்செ²ய்யாஹங் தங் அம்ப³வனங் பதா⁴னாயா’’தி. ‘‘ஆக³மேஹி தாவ, மேகி⁴ய ! ஏககம்ஹி ஏககம்ஹா (ஸீ॰ பீ॰) தாவ வத (க॰) யாவ அஞ்ஞோபி கோசி பி⁴க்கு² ஆக³ச்ச²தீ’’தி தி³ஸ்ஸதூதி (ஸப்³ப³த்த², டீகாயம்பி பாட²ந்தரங்), ஆக³ச்ச²தூதி, தி³ஸ்ஸதீதி (டீகாயங் பாட²ந்தரானி).
து³தியம்பி கோ² ஆயஸ்மா மேகி⁴யோ ப⁴க³வந்தங் ஏதத³வோச – ‘‘ப⁴க³வதோ, ப⁴ந்தே, நத்தி² கிஞ்சி உத்தரி கரணீயங், நத்தி² கதஸ்ஸ படிசயோ. மய்ஹங் கோ² பன, ப⁴ந்தே, அத்தி² உத்தரி கரணீயங், அத்தி² கதஸ்ஸ படிசயோ. ஸசே மங் ப⁴க³வா அனுஜானெய்ய, க³ச்செ²ய்யாஹங் தங் அம்ப³வனங் பதா⁴னாயா’’தி. ‘‘ஆக³மேஹி தாவ, மேகி⁴ய, ஏககம்ஹி தாவ யாவ அஞ்ஞோபி கோசி பி⁴க்கு² ஆக³ச்ச²தீ’’தி.
ததியம்பி கோ² ஆயஸ்மா மேகி⁴யோ ப⁴க³வந்தங் ஏதத³வோச – ‘‘ப⁴க³வதோ, ப⁴ந்தே, நத்தி² கிஞ்சி உத்தரி கரணீயங், நத்தி² கதஸ்ஸ படிசயோ. மய்ஹங் கோ² பன, ப⁴ந்தே, அத்தி² உத்தரி கரணீயங், அத்தி² கதஸ்ஸ படிசயோ. ஸசே மங் ப⁴க³வா அனுஜானெய்ய, க³ச்செ²ய்யாஹங் தங் அம்ப³வனங் பதா⁴னாயா’’தி. ‘‘பதா⁴னந்தி கோ², மேகி⁴ய, வத³மானங் கிந்தி வதெ³ய்யாம! யஸ்ஸ தா³னி த்வங், மேகி⁴ய, காலங் மஞ்ஞஸீ’’தி.
அத² கோ² ஆயஸ்மா மேகி⁴யோ உட்டா²யாஸனா ப⁴க³வந்தங் அபி⁴வாதெ³த்வா பத³க்கி²ணங் கத்வா யேன தங் அம்ப³வனங் தேனுபஸங்கமி; உபஸங்கமித்வா தங் அம்ப³வனங் அஜ்ஜோ²கா³ஹெத்வா அஞ்ஞதரஸ்மிங் ருக்க²மூலே தி³வாவிஹாரங் நிஸீதி³. அத² கோ² ஆயஸ்மதோ மேகி⁴யஸ்ஸ தஸ்மிங் அம்ப³வனே விஹரந்தஸ்ஸ யேபு⁴ய்யேன தயோ பாபகா அகுஸலா விதக்கா ஸமுதா³சரந்தி, ஸெய்யதி²த³ங் – காமவிதக்கோ, ப்³யாபாத³விதக்கோ, விஹிங்ஸாவிதக்கோ. அத² கோ² ஆயஸ்மதோ மேகி⁴யஸ்ஸ ஏதத³ஹோஸி – ‘‘அச்ச²ரியங் வத போ⁴, அப்³பு⁴தங் வத போ⁴! ஸத்³தா⁴ய ச வதம்ஹா அகா³ரஸ்மா அனகா³ரியங் பப்³ப³ஜிதா; அத² ச பனிமேஹி தீஹி பாபகேஹி அகுஸலேஹி விதக்கேஹி அன்வாஸத்தா – காமவிதக்கேன, ப்³யாபாத³விதக்கேன, விஹிங்ஸாவிதக்கேனா’’தி.
அத² கோ² ஆயஸ்மா மேகி⁴யோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா மேகி⁴யோ ப⁴க³வந்தங் ஏதத³வோச –
‘‘இத⁴ மய்ஹங், ப⁴ந்தே, தஸ்மிங் அம்ப³வனே விஹரந்தஸ்ஸ யேபு⁴ய்யேன தயோ பாபகா அகுஸலா விதக்கா ஸமுதா³சரந்தி, ஸெய்யதி²த³ங் – காமவிதக்கோ, ப்³யாபாத³விதக்கோ, விஹிங்ஸாவிதக்கோ. தஸ்ஸ மய்ஹங், ப⁴ந்தே, ஏதத³ஹோஸி – ‘அச்ச²ரியங் வத போ⁴, அப்³பு⁴தங் வத போ⁴! ஸத்³தா⁴ய ச வதம்ஹா அகா³ரஸ்மா அனகா³ரியங் பப்³ப³ஜிதா; அத² ச பனிமேஹி தீஹி பாபகேஹி அகுஸலேஹி விதக்கேஹி அன்வாஸத்தா – காமவிதக்கேன, ப்³யாபாத³விதக்கேன, விஹிங்ஸாவிதக்கேனாதி’’’.
‘‘அபரிபக்காய, மேகி⁴ய, சேதோவிமுத்தியா பஞ்ச த⁴ம்மா பரிபக்காய ஸங்வத்தந்தி. கதமே பஞ்ச? இத⁴, மேகி⁴ய, பி⁴க்கு² கல்யாணமித்தோ ஹோதி கல்யாணஸஹாயோ கல்யாணஸம்பவங்கோ. அபரிபக்காய, மேகி⁴ய, சேதோவிமுத்தியா அயங் பட²மோ த⁴ம்மோ பரிபக்காய ஸங்வத்ததி.
‘‘புன சபரங், மேகி⁴ய, பி⁴க்கு² ஸீலவா ஹோதி, பாதிமொக்க²ஸங்வரஸங்வுதோ விஹரதி ஆசாரகோ³சரஸம்பன்னோ அணுமத்தேஸு வஜ்ஜேஸு ப⁴யத³ஸ்ஸாவீ, ஸமாதா³ய ஸிக்க²தி ஸிக்கா²பதே³ஸு. அபரிபக்காய, மேகி⁴ய, சேதோவிமுத்தியா அயங் து³தியோ த⁴ம்மோ பரிபக்காய ஸங்வத்ததி.
‘‘புன சபரங், மேகி⁴ய, யாயங் கதா² அபி⁴ஸல்லேகி²கா சேதோவிவரணஸப்பாயா, ஸெய்யதி²த³ங் – அப்பிச்ச²கதா² ஸந்துட்டி²கதா² பவிவேககதா² அஸங்ஸக்³க³கதா² வீரியாரம்ப⁴கதா² ஸீலகதா² ஸமாதி⁴கதா² பஞ்ஞாகதா² விமுத்திகதா² விமுத்திஞாணத³ஸ்ஸனகதா², ஏவரூபியா கதா²ய நிகாமலாபீ⁴ ஹோதி அகிச்ச²லாபீ⁴ அகஸிரலாபீ⁴. அபரிபக்காய, மேகி⁴ய, சேதோவிமுத்தியா அயங் ததியோ த⁴ம்மோ பரிபக்காய ஸங்வத்ததி.
‘‘புன சபரங், மேகி⁴ய, பி⁴க்கு² ஆரத்³த⁴வீரியோ விஹரதி அகுஸலானங் த⁴ம்மானங் பஹானாய, குஸலானங் த⁴ம்மானங் உபஸம்பதா³ய, தா²மவா த³ள்ஹபரக்கமோ அனிக்கி²த்தது⁴ரோ குஸலேஸு த⁴ம்மேஸு. அபரிபக்காய, மேகி⁴ய, சேதோவிமுத்தியா அயங் சதுத்தோ² த⁴ம்மோ பரிபக்காய ஸங்வத்ததி.
‘‘புன சபரங், மேகி⁴ய, பி⁴க்கு² பஞ்ஞவா ஹோதி உத³யத்த²கா³மினியா பஞ்ஞாய ஸமன்னாக³தோ அரியாய நிப்³பே³தி⁴காய ஸம்மா து³க்க²க்க²யகா³மினியா. அபரிபக்காய, மேகி⁴ய, சேதோவிமுத்தியா அயங் பஞ்சமோ த⁴ம்மோ பரிபக்காய ஸங்வத்ததி.
‘‘கல்யாணமித்தஸ்ஸேதங் , மேகி⁴ய, பி⁴க்கு²னோ பாடிகங்க²ங் கல்யாணஸஹாயஸ்ஸ கல்யாணஸம்பவங்கஸ்ஸ – ‘ஸீலவா ப⁴விஸ்ஸதி…பே॰ … ஸமாதா³ய ஸிக்கி²ஸ்ஸதி ஸிக்கா²பதே³ஸு’’’.
‘‘கல்யாணமித்தஸ்ஸேதங், மேகி⁴ய, பி⁴க்கு²னோ பாடிகங்க²ங் கல்யாணஸஹாயஸ்ஸ கல்யாணஸம்பவங்கஸ்ஸ – ‘யாயங் கதா² அபி⁴ஸல்லேகி²கா சேதோவிவரணஸப்பாயா, ஸெய்யதி²த³ங் – அப்பிச்ச²கதா²…பே॰… விமுத்திஞாணத³ஸ்ஸனகதா², ஏவரூபியா கதா²ய நிகாமலாபீ⁴ ப⁴விஸ்ஸதி அகிச்ச²லாபீ⁴ அகஸிரலாபீ⁴’’’.
‘‘கல்யாணமித்தஸ்ஸேதங், மேகி⁴ய, பி⁴க்கு²னோ பாடிகங்க²ங் கல்யாணஸஹாயஸ்ஸ கல்யாணஸம்பவங்கஸ்ஸ – ‘ஆரத்³த⁴வீரியோ விஹரிஸ்ஸதி…பே॰… அனிக்கி²த்தது⁴ரோ குஸலேஸு த⁴ம்மேஸு’’’.
‘‘கல்யாணமித்தஸ்ஸேதங் , மேகி⁴ய, பி⁴க்கு²னோ பாடிகங்க²ங் கல்யாணஸஹாயஸ்ஸ கல்யாணஸம்பவங்கஸ்ஸ – ‘பஞ்ஞவா ப⁴விஸ்ஸதி…பே॰… ஸம்மாது³க்க²க்க²யகா³மினியா’’’.
‘‘தேன ச பன, மேகி⁴ய, பி⁴க்கு²னா இமேஸு பஞ்சஸு த⁴ம்மேஸு பதிட்டா²ய சத்தாரோ த⁴ம்மா உத்தரி பா⁴வேதப்³பா³ – அஸுபா⁴ பா⁴வேதப்³பா³ ராக³ஸ்ஸ பஹானாய, மெத்தா பா⁴வேதப்³பா³ ப்³யாபாத³ஸ்ஸ பஹானாய, ஆனாபானஸ்ஸதி பா⁴வேதப்³பா³ விதக்குபச்சே²தா³ய, அனிச்சஸஞ்ஞா பா⁴வேதப்³பா³ அஸ்மிமானஸமுக்³கா⁴தாய. அனிச்சஸஞ்ஞினோ, மேகி⁴ய, அனத்தஸஞ்ஞா ஸண்டா²தி. அனத்தஸஞ்ஞீ அஸ்மிமானஸமுக்³கா⁴தங் பாபுணாதி தி³ட்டே²வ த⁴ம்மே நிப்³பா³ன’’ந்தி. ததியங்.
4. நந்த³கஸுத்தங்
4. ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஆயஸ்மா நந்த³கோ உபட்டா²னஸாலாயங் பி⁴க்கூ² த⁴ம்மியா கதா²ய ஸந்த³ஸ்ஸேதி ஸமாத³பேதி ஸமுத்தேஜேதி ஸம்பஹங்ஸேதி. அத² கோ² ப⁴க³வா ஸாயன்ஹஸமயங் படிஸல்லானா வுட்டி²தோ யேனுபட்டா²னஸாலா தேனுபஸங்கமி; உபஸங்கமித்வா ப³ஹித்³வாரகொட்ட²கே அட்டா²ஸி கதா²பரியோஸானங் ஆக³மயமானோ. அத² கோ² ப⁴க³வா கதா²பரியோஸானங் விதி³த்வா உக்காஸெத்வா அக்³க³ளங் ஆகோடேஸி. விவரிங்ஸு கோ² தே பி⁴க்கூ² ப⁴க³வதோ த்³வாரங்.
அத² கோ² ப⁴க³வா உபட்டா²னஸாலங் பவிஸித்வா பஞ்ஞத்தாஸனே நிஸீதி³. நிஸஜ்ஜ கோ² ப⁴க³வா ஆயஸ்மந்தங் நந்த³கங் ஏதத³வோச – ‘‘தீ³கோ⁴ கோ² த்யாயங், நந்த³க, த⁴ம்மபரியாயோ பி⁴க்கூ²னங் படிபா⁴ஸி. அபி மே பிட்டி² ஆகி³லாயதி ப³ஹித்³வாரகொட்ட²கே டி²தஸ்ஸ கதா²பரியோஸானங் ஆக³மயமானஸ்ஸா’’தி.
ஏவங் வுத்தே ஆயஸ்மா நந்த³கோ ஸாரஜ்ஜமானரூபோ ப⁴க³வந்தங் ஏதத³வோச – ‘‘ந கோ² பன மயங், ப⁴ந்தே, ஜானாம ‘ப⁴க³வா ப³ஹித்³வாரகொட்ட²கே டி²தோ’தி. ஸசே ஹி மயங், ப⁴ந்தே, ஜானெய்யாம ‘ப⁴க³வா ப³ஹித்³வாரகொட்ட²கே டி²தோ’தி, எத்தகம்பி ( ) (த⁴ம்மங்) கத்த²சி நோ நப்படிபா⁴ஸெய்யா’’தி.
அத² கோ² ப⁴க³வா ஆயஸ்மந்தங் நந்த³கங் ஸாரஜ்ஜமானரூபங் விதி³த்வா ஆயஸ்மந்தங் நந்த³கங் ஏதத³வோச – ‘‘ஸாது⁴, ஸாது⁴, நந்த³க! ஏதங் கோ², நந்த³க, தும்ஹாகங் பதிரூபங் குலபுத்தானங் ஸத்³தா⁴ய அகா³ரஸ்மா அனகா³ரியங் பப்³ப³ஜிதானங், யங் தும்ஹே த⁴ம்மியா கதா²ய ஸன்னிஸீதெ³ய்யாத². ஸன்னிபதிதானங் வோ, நந்த³க, த்³வயங் கரணீயங் – த⁴ம்மீ வா கதா² அரியோ வா துண்ஹீபா⁴வோ. அ॰ நி॰ 8.71; 9.1 ஸத்³தோ⁴ ச, நந்த³க, பி⁴க்கு² ஹோதி, நோ ச ஸீலவா. ஏவங் ஸோ தேனங்கே³ன அபரிபூரோ ஹோதி. தேன தங் அங்க³ங் பரிபூரேதப்³ப³ங் – ‘கிந்தாஹங் ஸத்³தோ⁴ ச அஸ்ஸங் ஸீலவா சா’தி. யதோ ச கோ², நந்த³க, பி⁴க்கு² ஸத்³தோ⁴ ச ஹோதி ஸீலவா ச, ஏவங் ஸோ தேனங்கே³ன பரிபூரோ ஹோதி.
‘‘ஸத்³தோ⁴ ச, நந்த³க, பி⁴க்கு² ஹோதி ஸீலவா ச, நோ ச லாபீ⁴ அஜ்ஜ²த்தங் சேதோஸமாதி⁴ஸ்ஸ. ஏவங் ஸோ தேனங்கே³ன அபரிபூரோ ஹோதி. தேன தங் அங்க³ங் பரிபூரேதப்³ப³ங் – ‘கிந்தாஹங் ஸத்³தோ⁴ ச அஸ்ஸங் ஸீலவா ச லாபீ⁴ ச அஜ்ஜ²த்தங் சேதோஸமாதி⁴ஸ்ஸா’தி. யதோ ச கோ², நந்த³க, பி⁴க்கு² ஸத்³தோ⁴ ச ஹோதி ஸீலவா ச லாபீ⁴ ச அஜ்ஜ²த்தங் சேதோஸமாதி⁴ஸ்ஸ, ஏவங் ஸோ தேனங்கே³ன பரிபூரோ ஹோதி.
‘‘ஸத்³தோ⁴ ச, நந்த³க, பி⁴க்கு² ஹோதி ஸீலவா ச லாபீ⁴ ச அஜ்ஜ²த்தங் சேதோஸமாதி⁴ஸ்ஸ, ந லாபீ⁴ அதி⁴பஞ்ஞாத⁴ம்மவிபஸ்ஸனாய. ஏவங் ஸோ தேனங்கே³ன அபரிபூரோ ஹோதி. ஸெய்யதா²பி, நந்த³க, பாணகோ சதுப்பாத³கோ அஸ்ஸ. தஸ்ஸ ஏகோ பாதோ³ ஓமகோ லாமகோ. ஏவங் ஸோ தேனங்கே³ன அபரிபூரோ அஸ்ஸ. ஏவமேவங் கோ², நந்த³க, பி⁴க்கு² ஸத்³தோ⁴ ச ஹோதி ஸீலவா ச லாபீ⁴ ச அஜ்ஜ²த்தங் சேதோஸமாதி⁴ஸ்ஸ, ந லாபீ⁴ அதி⁴பஞ்ஞாத⁴ம்மவிபஸ்ஸனாய. ஏவங் ஸோ தேனங்கே³ன அபரிபூரோ ஹோதி. தேன தங் அங்க³ங் பரிபூரேதப்³ப³ங் – ‘கிந்தாஹங் ஸத்³தோ⁴ ச அஸ்ஸங் ஸீலவா ச லாபீ⁴ ச அஜ்ஜ²த்தங் சேதோஸமாதி⁴ஸ்ஸ லாபீ⁴ ச அதி⁴பஞ்ஞாத⁴ம்மவிபஸ்ஸனாயா’’’தி.
‘‘யதோ ச கோ², நந்த³க, பி⁴க்கு² ஸத்³தோ⁴ ச ஹோதி ஸீலவா ச லாபீ⁴ ச அஜ்ஜ²த்தங் சேதோஸமாதி⁴ஸ்ஸ லாபீ⁴ ச அதி⁴பஞ்ஞாத⁴ம்மவிபஸ்ஸனாய, ஏவங் ஸோ தேனங்கே³ன பரிபூரோ ஹோதீ’’தி. இத³மவோச ப⁴க³வா. இத³ங் வத்வான ஸுக³தோ உட்டா²யாஸனா விஹாரங் பாவிஸி.
அத² கோ² ஆயஸ்மா நந்த³கோ அசிரபக்கந்தஸ்ஸ ப⁴க³வதோ பி⁴க்கூ² ஆமந்தேஸி – ‘‘இதா³னி, ஆவுஸோ, ப⁴க³வா சதூஹி பதே³ஹி கேவலபரிபுண்ணங் பரிஸுத்³த⁴ங் ப்³ரஹ்மசரியங் பகாஸெத்வா உட்டா²யாஸனா விஹாரங் பவிட்டோ² – ‘ஸத்³தோ⁴ ச, நந்த³க, பி⁴க்கு² ஹோதி, நோ ச ஸீலவா. ஏவங் ஸோ தேனங்கே³ன அபரிபூரோ ஹோதி. தேன தங் அங்க³ங் பரிபூரேதப்³ப³ங் – கிந்தாஹங் ஸத்³தோ⁴ ச அஸ்ஸங் ஸீலவா சா’தி. யதோ ச கோ² நந்த³க பி⁴க்கு² ஸத்³தோ⁴ ச ஹோதி ஸீலவா ச, ஏவங் ஸோ தேனங்கே³ன பரிபூரோ ஹோதி. ஸத்³தோ⁴ ச நந்த³க பி⁴க்கு² ஹோதி ஸீலவா ச, நோ ச லாபீ⁴ அஜ்ஜ²த்தங் சேதோஸமாதி⁴ஸ்ஸ…பே॰… லாபீ⁴ ச அஜ்ஜ²த்தங் சேதோஸமாதி⁴ஸ்ஸ, ந லாபீ⁴ அதி⁴பஞ்ஞாத⁴ம்மவிபஸ்ஸனாய, ஏவங் ஸோ தேனங்கே³ன அபரிபூரோ ஹோதி. ஸெய்யதா²பி நந்த³க பாணகோ சதுப்பாத³கோ அஸ்ஸ, தஸ்ஸ ஏகோ பாதோ³ ஓமகோ லாமகோ, ஏவங் ஸோ தேனங்கே³ன அபரிபூரோ அஸ்ஸ. ஏவமேவங் கோ², நந்த³க, பி⁴க்கு² ஸத்³தோ⁴ ச ஹோதி ஸீலவா ச, லாபீ⁴ ச அஜ்ஜ²த்தங் சேதோஸமாதி⁴ஸ்ஸ, ந லாபீ⁴ அதி⁴பஞ்ஞாத⁴ம்மவிபஸ்ஸனாய, ஏவங் ஸோ தேனங்கே³ன அபரிபூரோ ஹோதி, தேன தங் அங்க³ங் பரிபூரேதப்³ப³ங் ‘கிந்தாஹங் ஸத்³தோ⁴ ச அஸ்ஸங் ஸீலவா ச, லாபீ⁴ ச அஜ்ஜ²த்தங் சேதோஸமாதி⁴ஸ்ஸ, லாபீ⁴ ச அதி⁴பஞ்ஞாத⁴ம்மவிபஸ்ஸனாயா’தி. யதோ ச கோ², நந்த³க, பி⁴க்கு² ஸத்³தோ⁴ ச ஹோதி ஸீலவா ச லாபீ⁴ ச அஜ்ஜ²த்தங் சேதோஸமாதி⁴ஸ்ஸ லாபீ⁴ ச அதி⁴பஞ்ஞாத⁴ம்மவிபஸ்ஸனாய, ஏவங் ஸோ தேனங்கே³ன பரிபூரோ ஹோதீ’’தி.
‘‘பஞ்சிமே, ஆவுஸோ, ஆனிஸங்ஸா காலேன த⁴ம்மஸ்ஸவனே காலேன த⁴ம்மஸாகச்சா²ய. கதமே பஞ்ச? இதா⁴வுஸோ, பி⁴க்கு² பி⁴க்கூ²னங் த⁴ம்மங் தே³ஸேதி ஆதி³கல்யாணங் மஜ்ஜே²கல்யாணங் பரியோஸானகல்யாணங் ஸாத்த²ங் ஸப்³யஞ்ஜனங், கேவலபரிபுண்ணங் பரிஸுத்³த⁴ங் ப்³ரஹ்மசரியங் பகாஸேதி. யதா² யதா², ஆவுஸோ, பி⁴க்கு² பி⁴க்கூ²னங் த⁴ம்மங் தே³ஸேதி ஆதி³கல்யாணங் மஜ்ஜே²கல்யாணங் பரியோஸானகல்யாணங் ஸாத்த²ங் ஸப்³யஞ்ஜனங், கேவலபரிபுண்ணங் பரிஸுத்³த⁴ங் ப்³ரஹ்மசரியங் பகாஸேதி , ததா² ததா² ஸோ ஸத்து² பியோ ச ஹோதி மனாபோ ச க³ரு ச பா⁴வனீயோ ச. அயங், ஆவுஸோ, பட²மோ ஆனிஸங்ஸோ காலேன த⁴ம்மஸ்ஸவனே காலேன த⁴ம்மஸாகச்சா²ய.
‘‘புன சபரங், ஆவுஸோ, பி⁴க்கு² பி⁴க்கூ²னங் த⁴ம்மங் தே³ஸேதி ஆதி³கல்யாணங் மஜ்ஜே²கல்யாணங் பரியோஸானகல்யாணங் ஸாத்த²ங் ஸப்³யஞ்ஜனங், கேவலபரிபுண்ணங் பரிஸுத்³த⁴ங் ப்³ரஹ்மசரியங் பகாஸேதி. யதா² யதா², ஆவுஸோ, பி⁴க்கு² பி⁴க்கூ²னங் த⁴ம்மங் தே³ஸேதி ஆதி³கல்யாணங்…பே॰… ப்³ரஹ்மசரியங் பகாஸேதி, ததா² ததா² ஸோ தஸ்மிங் த⁴ம்மே அத்த²ப்படிஸங்வேதீ³ ச ஹோதி த⁴ம்மப்படிஸங்வேதீ³ ச. அயங், ஆவுஸோ, து³தியோ ஆனிஸங்ஸோ காலேன த⁴ம்மஸ்ஸவனே காலேன த⁴ம்மஸாகச்சா²ய.
‘‘புன சபரங், ஆவுஸோ, பி⁴க்கு² பி⁴க்கூ²னங் த⁴ம்மங் தே³ஸேதி ஆதி³கல்யாணங் மஜ்ஜே²கல்யாணங் பரியோஸானகல்யாணங் ஸாத்த²ங் ஸப்³யஞ்ஜனங், கேவலபரிபுண்ணங் பரிஸுத்³த⁴ங் ப்³ரஹ்மசரியங் பகாஸேதி. யதா² யதா², ஆவுஸோ, பி⁴க்கு² பி⁴க்கூ²னங் த⁴ம்மங் தே³ஸேதி ஆதி³கல்யாணங்…பே॰… ப்³ரஹ்மசரியங் பகாஸேதி, ததா² ததா² ஸோ தஸ்மிங் த⁴ம்மே க³ம்பீ⁴ரங் அத்த²பத³ங் பஞ்ஞாய அதிவிஜ்ஜ² பஸ்ஸதி. அயங், ஆவுஸோ, ததியோ ஆனிஸங்ஸோ காலேன த⁴ம்மஸ்ஸவனே காலேன த⁴ம்மஸாகச்சா²ய.
‘‘புன சபரங், ஆவுஸோ, பி⁴க்கு² பி⁴க்கூ²னங் த⁴ம்மங் தே³ஸேதி ஆதி³கல்யாணங்…பே॰… ப்³ரஹ்மசரியங் பகாஸேதி. யதா² யதா², ஆவுஸோ, பி⁴க்கு² பி⁴க்கூ²னங் த⁴ம்மங் தே³ஸேதி ஆதி³கல்யாணங்…பே॰… ப்³ரஹ்மசரியங் பகாஸேதி, ததா² ததா² நங் ஸப்³ரஹ்மசாரீ உத்தரி ஸம்பா⁴வெந்தி – ‘அத்³தா⁴ அயமாயஸ்மா பத்தோ வா பஜ்ஜதி வா’. அயங், ஆவுஸோ, சதுத்தோ² ஆனிஸங்ஸோ காலேன த⁴ம்மஸ்ஸவனே காலேன த⁴ம்மஸாகச்சா²ய.
‘‘புன சபரங், ஆவுஸோ, பி⁴க்கு² பி⁴க்கூ²னங் த⁴ம்மங் தே³ஸேதி ஆதி³கல்யாணங் மஜ்ஜே²கல்யாணங் பரியோஸானகல்யாணங் ஸாத்த²ங் ஸப்³யஞ்ஜனங், கேவலபரிபுண்ணங் பரிஸுத்³த⁴ங் ப்³ரஹ்மசரியங் பகாஸேதி. யதா² யதா², ஆவுஸோ, பி⁴க்கு² பி⁴க்கூ²னங் த⁴ம்மங் தே³ஸேதி ஆதி³கல்யாணங் மஜ்ஜே²கல்யாணங் பரியோஸானகல்யாணங் ஸாத்த²ங் ஸப்³யஞ்ஜனங் , கேவலபரிபுண்ணங் பரிஸுத்³த⁴ங் ப்³ரஹ்மசரியங் பகாஸேதி, தத்த² யே கோ² பி⁴க்கூ² ஸேகா² அப்பத்தமானஸா அனுத்தரங் யோக³க்கே²மங் பத்த²யமானா விஹரந்தி, தே தங் த⁴ம்மங் ஸுத்வா வீரியங் ஆரப⁴ந்தி அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாய. யே பன தத்த² பி⁴க்கூ² அரஹந்தோ கீ²ணாஸவா வுஸிதவந்தோ கதகரணீயா ஓஹிதபா⁴ரா அனுப்பத்தஸத³த்தா² பரிக்கீ²ணப⁴வஸங்யோஜனா ஸம்மத³ஞ்ஞாவிமுத்தா, தே தங் த⁴ம்மங் ஸுத்வா தி³ட்ட²த⁴ம்மஸுக²விஹாரங்யேவ அனுயுத்தா விஹரந்தி. அயங், ஆவுஸோ, பஞ்சமோ ஆனிஸங்ஸோ காலேன த⁴ம்மஸ்ஸவனே காலேன த⁴ம்மஸாகச்சா²ய. இமே கோ², ஆவுஸோ, பஞ்ச ஆனிஸங்ஸா காலேன த⁴ம்மஸ்ஸவனே காலேன த⁴ம்மஸாகச்சா²யா’’தி. சதுத்த²ங்.
5. ப³லஸுத்தங்
5. ‘‘சத்தாரிமானி, பி⁴க்க²வே, ப³லானி. கதமானி சத்தாரி? பஞ்ஞாப³லங், வீரியப³லங், அனவஜ்ஜப³லங், ஸங்கா³ஹப³லங். கதமஞ்ச, பி⁴க்க²வே, பஞ்ஞாப³லங்? யே த⁴ம்மா குஸலா குஸலஸங்கா²தா யே த⁴ம்மா அகுஸலா அகுஸலஸங்கா²தா யே த⁴ம்மா ஸாவஜ்ஜா ஸாவஜ்ஜஸங்கா²தா யே த⁴ம்மா அனவஜ்ஜா அனவஜ்ஜஸங்கா²தா யே த⁴ம்மா கண்ஹா கண்ஹஸங்கா²தா யே த⁴ம்மா ஸுக்கா ஸுக்கஸங்கா²தா யே த⁴ம்மா ஸேவிதப்³பா³ ஸேவிதப்³ப³ஸங்கா²தா யே த⁴ம்மா அஸேவிதப்³பா³ அஸேவிதப்³ப³ஸங்கா²தா யே த⁴ம்மா நாலமரியா நாலமரியஸங்கா²தா யே த⁴ம்மா அலமரியா அலமரியஸங்கா²தா, த்யாஸ்ஸ த⁴ம்மா பஞ்ஞாய வோதி³ட்டா² ஹொந்தி வோசரிதா. இத³ங் வுச்சதி, பி⁴க்க²வே, பஞ்ஞாப³லங்.
‘‘கதமஞ்ச , பி⁴க்க²வே, வீரியப³லங்? யே த⁴ம்மா அகுஸலா அகுஸலஸங்கா²தா யே த⁴ம்மா ஸாவஜ்ஜா ஸாவஜ்ஜஸங்கா²தா யே த⁴ம்மா கண்ஹா கண்ஹஸங்கா²தா யே த⁴ம்மா அஸேவிதப்³பா³ அஸேவிதப்³ப³ஸங்கா²தா யே த⁴ம்மா நாலமரியா நாலமரியஸங்கா²தா, தேஸங் த⁴ம்மானங் பஹானாய ச²ந்த³ங் ஜனேதி வாயமதி வீரியங் ஆரப⁴தி சித்தங் பக்³க³ண்ஹாதி பத³ஹதி. யே த⁴ம்மா குஸலா குஸலஸங்கா²தா யே த⁴ம்மா அனவஜ்ஜா அனவஜ்ஜஸங்கா²தா யே த⁴ம்மா ஸுக்கா ஸுக்கஸங்கா²தா யே த⁴ம்மா ஸேவிதப்³பா³ ஸேவிதப்³ப³ஸங்கா²தா யே த⁴ம்மா அலமரியா அலமரியஸங்கா²தா, தேஸங் த⁴ம்மானங் படிலாபா⁴ய ச²ந்த³ங் ஜனேதி வாயமதி வீரியங் ஆரப⁴தி சித்தங் பக்³க³ண்ஹாதி பத³ஹதி. இத³ங் வுச்சதி, பி⁴க்க²வே, வீரியப³லங்.
‘‘கதமஞ்ச, பி⁴க்க²வே, அனவஜ்ஜப³லங்? இத⁴, பி⁴க்க²வே, அரியஸாவகோ அனவஜ்ஜேன காயகம்மேன ஸமன்னாக³தோ ஹோதி, அனவஜ்ஜேன வசீகம்மேன ஸமன்னாக³தோ ஹோதி, அனவஜ்ஜேன மனோகம்மேன ஸமன்னாக³தோ ஹோதி. இத³ங் வுச்சதி, பி⁴க்க²வே, அனவஜ்ஜப³லங்.
‘‘கதமஞ்ச , பி⁴க்க²வே, ஸங்கா³ஹப³லங்? சத்தாரிமானி, பி⁴க்க²வே, ஸங்க³ஹவத்தூ²னி – தா³னங், பெய்யவஜ்ஜங், அத்த²சரியா, ஸமானத்ததா. ஏதத³க்³க³ங், பி⁴க்க²வே, தா³னானங் யதி³த³ங் த⁴ம்மதா³னங். ஏதத³க்³க³ங், பி⁴க்க²வே, பெய்யவஜ்ஜானங் யதி³த³ங் அத்தி²கஸ்ஸ ஓஹிதஸோதஸ்ஸ புனப்புனங் த⁴ம்மங் தே³ஸேதி. ஏதத³க்³க³ங், பி⁴க்க²வே, அத்த²சரியானங் யதி³த³ங் அஸ்ஸத்³த⁴ங் ஸத்³தா⁴ஸம்பதா³ய ஸமாத³பேதி நிவேஸேதி பதிட்டா²பேதி, து³ஸ்ஸீலங் ஸீலஸம்பதா³ய… பே॰… மச்ச²ரிங் சாக³ஸம்பதா³ய…பே॰… து³ப்பஞ்ஞங் பஞ்ஞாஸம்பதா³ய ஸமாத³பேதி நிவேஸேதி பதிட்டா²பேதி. ஏதத³க்³க³ங், பி⁴க்க²வே, ஸமானத்ததானங் யதி³த³ங் ஸோதாபன்னோ ஸோதாபன்னஸ்ஸ ஸமானத்தோ, ஸகதா³கா³மீ ஸகதா³கா³மிஸ்ஸ ஸமானத்தோ, அனாகா³மீ அனாகா³மிஸ்ஸ ஸமானத்தோ, அரஹா அரஹதோ ஸமானத்தோ. இத³ங் வுச்சதி, பி⁴க்க²வே, ஸங்கா³ஹப³லங். இமானி கோ², பி⁴க்க²வே, சத்தாரி ப³லானி.
‘‘இமேஹி கோ², பி⁴க்க²வே, சதூஹி ப³லேஹி ஸமன்னாக³தோ அரியஸாவகோ பஞ்ச ப⁴யானி ஸமதிக்கந்தோ ஹோதி. கதமானி பஞ்ச? ஆஜீவிகப⁴யங், அஸிலோகப⁴யங், பரிஸஸாரஜ்ஜப⁴யங், மரணப⁴யங் , து³க்³க³திப⁴யங். ஸ கோ² ஸோ, பி⁴க்க²வே, அரியஸாவகோ இதி படிஸஞ்சிக்க²தி – ‘நாஹங் ஆஜீவிகப⁴யஸ்ஸ பா⁴யாமி. கிஸ்ஸாஹங் ஆஜீவிகப⁴யஸ்ஸ பா⁴யிஸ்ஸாமி? அத்தி² மே சத்தாரி ப³லானி – பஞ்ஞாப³லங், வீரியப³லங், அனவஜ்ஜப³லங், ஸங்கா³ஹப³லங். து³ப்பஞ்ஞோ கோ² ஆஜீவிகப⁴யஸ்ஸ பா⁴யெய்ய. குஸீதோ ஆஜீவிகப⁴யஸ்ஸ பா⁴யெய்ய. ஸாவஜ்ஜகாயகம்மந்தவசீகம்மந்தமனோகம்மந்தோ ஆஜீவிகப⁴யஸ்ஸ பா⁴யெய்ய. அஸங்கா³ஹகோ ஆஜீவிகப⁴யஸ்ஸ பா⁴யெய்ய. நாஹங் அஸிலோகப⁴யஸ்ஸ பா⁴யாமி…பே॰… நாஹங் பரிஸஸாரஜ்ஜப⁴யஸ்ஸ பா⁴யாமி…பே॰… நாஹங் மரணப⁴யஸ்ஸ பா⁴யாமி…பே॰… நாஹங் து³க்³க³திப⁴யஸ்ஸ பா⁴யாமி. கிஸ்ஸாஹங் து³க்³க³திப⁴யஸ்ஸ பா⁴யிஸ்ஸாமி? அத்தி² மே சத்தாரி ப³லானி – பஞ்ஞாப³லங், வீரியப³லங், அனவஜ்ஜப³லங், ஸங்கா³ஹப³லங். து³ப்பஞ்ஞோ கோ² து³க்³க³திப⁴யஸ்ஸ பா⁴யெய்ய. குஸீதோ து³க்³க³திப⁴யஸ்ஸ பா⁴யெய்ய. ஸாவஜ்ஜகாயகம்மந்தவசீகம்மந்தமனோகம்மந்தோ து³க்³க³திப⁴யஸ்ஸ பா⁴யெய்ய. அஸங்கா³ஹகோ து³க்³க³திப⁴யஸ்ஸ பா⁴யெய்ய. இமேஹி கோ², பி⁴க்க²வே, சதூஹி ப³லேஹி ஸமன்னாக³தோ அரியஸாவகோ இமானி பஞ்ச ப⁴யானி ஸமதிக்கந்தோ ஹோதீ’’தி. பஞ்சமங்.
6. ஸேவனாஸுத்தங்
6. தத்ர கோ² ஆயஸ்மா ஸாரிபுத்தோ பி⁴க்கூ² ஆமந்தேஸி…பே॰… ஆயஸ்மா ஸாரிபுத்தோ ஏதத³வோச –
‘‘புக்³க³லோபி , ஆவுஸோ, து³விதே⁴ன வேதி³தப்³போ³ – ஸேவிதப்³போ³பி அஸேவிதப்³போ³பி. சீவரம்பி, ஆவுஸோ, து³விதே⁴ன வேதி³தப்³ப³ங் – ஸேவிதப்³ப³ம்பி அஸேவிதப்³ப³ம்பி. பிண்ட³பாதோபி, ஆவுஸோ, து³விதே⁴ன வேதி³தப்³போ³ – ஸேவிதப்³போ³பி அஸேவிதப்³போ³பி. ஸேனாஸனம்பி, ஆவுஸோ, து³விதே⁴ன வேதி³தப்³ப³ங் – ஸேவிதப்³ப³ம்பி அஸேவிதப்³ப³ம்பி. கா³மனிக³மோபி, ஆவுஸோ, து³விதே⁴ன வேதி³தப்³போ³ – ஸேவிதப்³போ³பி அஸேவிதப்³போ³பி. ஜனபத³பதே³ஸோபி ஆவுஸோ, து³விதே⁴ன வேதி³தப்³போ³ – ஸேவிதப்³போ³பி அஸேவிதப்³போ³பி.
‘‘‘புக்³க³லோபி, ஆவுஸோ, து³விதே⁴ன வேதி³தப்³போ³ – ஸேவிதப்³போ³பி அஸேவிதப்³போ³பீ’தி, இதி கோ² பனேதங் வுத்தங். கிஞ்சேதங் படிச்ச வுத்தங்? தத்த² யங் ஜஞ்ஞா புக்³க³லங் – ‘இமங் கோ² மே புக்³க³லங் ஸேவதோ அகுஸலா த⁴ம்மா அபி⁴வட்³ட⁴ந்தி, குஸலா த⁴ம்மா பரிஹாயந்தி; யே ச கோ² மே பப்³ப³ஜிதேன ஜீவிதபரிக்கா²ரா ஸமுதா³னேதப்³பா³ சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரா தே ச கஸிரேன ஸமுதா³க³ச்ச²ந்தி; யஸ்ஸ சம்ஹி அத்தா²ய அகா³ரஸ்மா அனகா³ரியங் பப்³ப³ஜிதோ ஸோ ச மே ஸாமஞ்ஞத்தோ² ந பா⁴வனாபாரிபூரிங் க³ச்ச²தீ’தி, தேனாவுஸோ, புக்³க³லேன ஸோ புக்³க³லோ ரத்திபா⁴க³ங் வா தி³வஸபா⁴க³ங் வா ஸங்கா²பி அனாபுச்சா² பக்கமிதப்³ப³ங் நானுப³ந்தி⁴தப்³போ³.
‘‘தத்த² யங் ஜஞ்ஞா புக்³க³லங் – ‘இமங் கோ² மே புக்³க³லங் ஸேவதோ அகுஸலா த⁴ம்மா அபி⁴வட்³ட⁴ந்தி, குஸலா த⁴ம்மா பரிஹாயந்தி; யே ச கோ² மே பப்³ப³ஜிதேன ஜீவிதபரிக்கா²ரா ஸமுதா³னேதப்³பா³ சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரா தே ச அப்பகஸிரேன ஸமுதா³க³ச்ச²ந்தி; யஸ்ஸ சம்ஹி அத்தா²ய அகா³ரஸ்மா அனகா³ரியங் பப்³ப³ஜிதோ ஸோ ச மே ஸாமஞ்ஞத்தோ² ந பா⁴வனாபாரிபூரிங் க³ச்ச²தீ’தி, தேனாவுஸோ, புக்³க³லேன ஸோ புக்³க³லோ ஸங்கா²பி அனாபுச்சா² பக்கமிதப்³ப³ங் நானுப³ந்தி⁴தப்³போ³.
‘‘தத்த² யங் ஜஞ்ஞா புக்³க³லங் – ‘இமங் கோ² மே புக்³க³லங் ஸேவதோ அகுஸலா த⁴ம்மா பரிஹாயந்தி, குஸலா த⁴ம்மா அபி⁴வட்³ட⁴ந்தி; யே ச கோ² மே பப்³ப³ஜிதேன ஜீவிதபரிக்கா²ரா ஸமுதா³னேதப்³பா³ சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரா தே ச கஸிரேன ஸமுதா³க³ச்ச²ந்தி; யஸ்ஸ சம்ஹி அத்தா²ய அகா³ரஸ்மா அனகா³ரியங் பப்³ப³ஜிதோ ஸோ ச மே ஸாமஞ்ஞத்தோ² பா⁴வனாபாரிபூரிங் க³ச்ச²தீ’தி, தேனாவுஸோ, புக்³க³லேன ஸோ புக்³க³லோ ஸங்கா²பி அனுப³ந்தி⁴தப்³போ³ ந பக்கமிதப்³ப³ங்.
‘‘தத்த² யங் ஜஞ்ஞா புக்³க³லங் – ‘இமங் கோ² மே புக்³க³லங் ஸேவதோ அகுஸலா த⁴ம்மா பரிஹாயந்தி, குஸலா த⁴ம்மா அபி⁴வட்³ட⁴ந்தி; யே ச கோ² மே பப்³ப³ஜிதேன ஜீவிதபரிக்கா²ரா ஸமுதா³னேதப்³பா³ சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரா தே ச அப்பகஸிரேன ஸமுதா³க³ச்ச²ந்தி; யஸ்ஸ சம்ஹி அத்தா²ய அகா³ரஸ்மா அனகா³ரியங் பப்³ப³ஜிதோ ஸோ ச மே ஸாமஞ்ஞத்தோ² பா⁴வனாபாரிபூரிங் க³ச்ச²தீ’தி, தேனாவுஸோ, புக்³க³லேன ஸோ புக்³க³லோ யாவஜீவங் அனுப³ந்தி⁴தப்³போ³ ந பக்கமிதப்³ப³ங் அபி பனுஜ்ஜமானேன பணுஜ்ஜமானேன (?). ‘புக்³க³லோபி, ஆவுஸோ, து³விதே⁴ன வேதி³தப்³போ³ – ஸேவிதப்³போ³பி அஸேவிதப்³போ³பீ’தி, இதி யங் தங் வுத்தங், இத³மேதங் படிச்ச வுத்தங்.
‘‘‘சீவரம்பி, ஆவுஸோ, து³விதே⁴ன வேதி³தப்³ப³ங் – ஸேவிதப்³ப³ம்பி அஸேவிதப்³ப³ம்பீ’தி, இதி கோ² பனேதங் வுத்தங். கிஞ்சேதங் படிச்ச வுத்தங்? தத்த² யங் ஜஞ்ஞா சீவரங் – ‘இத³ங் கோ² மே சீவரங் ஸேவதோ அகுஸலா த⁴ம்மா அபி⁴வட்³ட⁴ந்தி, குஸலா த⁴ம்மா பரிஹாயந்தீ’தி, ஏவரூபங் சீவரங் ந ஸேவிதப்³ப³ங் . தத்த² யங் ஜஞ்ஞா சீவரங் – ‘இத³ங் கோ² மே சீவரங் ஸேவதோ அகுஸலா த⁴ம்மா பரிஹாயந்தி, குஸலா த⁴ம்மா அபி⁴வட்³ட⁴ந்தீ’தி, ஏவரூபங் சீவரங் ஸேவிதப்³ப³ங். ‘சீவரம்பி , ஆவுஸோ, து³விதே⁴ன வேதி³தப்³ப³ங் – ஸேவிதப்³ப³ம்பி அஸேவிதப்³ப³ம்பீ’தி, இதி யங் தங் வுத்தங், இத³மேதங் படிச்ச வுத்தங்.
‘‘‘பிண்ட³பாதோபி, ஆவுஸோ, து³விதே⁴ன வேதி³தப்³போ³ – ஸேவிதப்³போ³பி அஸேவிதப்³போ³பீ’தி, இதி கோ² பனேதங் வுத்தங். கிஞ்சேதங் படிச்ச வுத்தங்? தத்த² யங் ஜஞ்ஞா பிண்ட³பாதங் – ‘இமங் கோ² மே பிண்ட³பாதங் ஸேவதோ அகுஸலா த⁴ம்மா அபி⁴வட்³ட⁴ந்தி, குஸலா த⁴ம்மா பரிஹாயந்தீ’தி, ஏவரூபோ பிண்ட³பாதோ ந ஸேவிதப்³போ³. தத்த² யங் ஜஞ்ஞா பிண்ட³பாதங் – ‘இமங் கோ² மே பிண்ட³பாதங் ஸேவதோ அகுஸலா த⁴ம்மா பரிஹாயந்தி, குஸலா த⁴ம்மா அபி⁴வட்³ட⁴ந்தீ’தி, ஏவரூபோ பிண்ட³பாதோ ஸேவிதப்³போ³. ‘பிண்ட³பாதோபி, ஆவுஸோ, து³விதே⁴ன வேதி³தப்³போ³ – ஸேவிதப்³போ³பி அஸேவிதப்³போ³பீ’தி, இதி யங் தங் வுத்தங், இத³மேதங் படிச்ச வுத்தங்.
‘‘‘ஸேனாஸனம்பி, ஆவுஸோ, து³விதே⁴ன வேதி³தப்³ப³ங் – ஸேவிதப்³ப³ம்பி அஸேவிதப்³ப³ம்பீ’தி, இதி கோ² பனேதங் வுத்தங். கிஞ்சேதங் படிச்ச வுத்தங்? தத்த² யங் ஜஞ்ஞா ஸேனாஸனங் – ‘‘இத³ங் கோ² மே ஸேனாஸனங் ஸேவதோ அகுஸலா த⁴ம்மா அபி⁴வட்³ட⁴ந்தி, குஸலா த⁴ம்மா பரிஹாயந்தீ’தி, ஏவரூபங் ஸேனாஸனங் ந ஸேவிதப்³ப³ங். தத்த² யங் ஜஞ்ஞா ஸேனாஸனங் – ‘இத³ங் கோ² மே ஸேனாஸனங் ஸேவதோ அகுஸலா த⁴ம்மா பரிஹாயந்தி , குஸலா த⁴ம்மா அபி⁴வட்³ட⁴ந்தீ’தி, ஏவரூபங் ஸேனாஸனங் ஸேவிதப்³ப³ங். ‘ஸேனாஸனம்பி, ஆவுஸோ, து³விதே⁴ன வேதி³தப்³ப³ங் – ஸேவிதப்³ப³ம்பி அஸேவிதப்³ப³ம்பீ’தி, இதி யங் தங் வுத்தங், இத³மேதங் படிச்ச வுத்தங்.
‘‘‘கா³மனிக³மோபி, ஆவுஸோ, து³விதே⁴ன வேதி³தப்³போ³ – ஸேவிதப்³போ³பி அஸேவிதப்³போ³பீ’தி, இதி கோ² பனேதங் வுத்தங். கிஞ்சேதங் படிச்ச வுத்தங்? தத்த² யங் ஜஞ்ஞா கா³மனிக³மங் – ‘இமங் கோ² மே கா³மனிக³மங் ஸேவதோ அகுஸலா த⁴ம்மா அபி⁴வட்³ட⁴ந்தி, குஸலா த⁴ம்மா பரிஹாயந்தீ’தி, ஏவரூபோ கா³மனிக³மோ ந ஸேவிதப்³போ³. தத்த² யங் ஜஞ்ஞா கா³மனிக³மங் – ‘இமங் கோ², மே கா³மனிக³மங் ஸேவதோ அகுஸலா த⁴ம்மா பரிஹாயந்தி, குஸலா த⁴ம்மா அபி⁴வட்³ட⁴ந்தீ’தி, ஏவரூபோ கா³மனிக³மோ ஸேவிதப்³போ³. ‘கா³மனிக³மோபி, ஆவுஸோ, து³விதே⁴ன வேதி³தப்³போ³ – ஸேவிதப்³போ³பி அஸேவிதப்³போ³பீ’தி, இதி யங் தங் வுத்தங், இத³மேதங் படிச்ச வுத்தங்.
‘‘‘ஜனபத³பதே³ஸோபி , ஆவுஸோ, து³விதே⁴ன வேதி³தப்³போ³ – ஸேவிதப்³போ³பி அஸேவிதப்³போ³பீ’தி, இதி கோ² பனேதங் வுத்தங். கிஞ்சேதங் படிச்ச வுத்தங்? தத்த² யங் ஜஞ்ஞா ஜனபத³பதே³ஸங் – ‘இமங் கோ² மே ஜனபத³பதே³ஸங் ஸேவதோ அகுஸலா த⁴ம்மா அபி⁴வட்³ட⁴ந்தி, குஸலா த⁴ம்மா பரிஹாயந்தீ’தி, ஏவரூபோ ஜனபத³பதே³ஸோ ந ஸேவிதப்³போ³. தத்த² யங் ஜஞ்ஞா ஜனபத³பதே³ஸங் – ‘இமங் கோ² மே ஜனபத³பதே³ஸங் ஸேவதோ அகுஸலா த⁴ம்மா பரிஹாயந்தி, குஸலா த⁴ம்மா அபி⁴வட்³ட⁴ந்தீ’தி, ஏவரூபோ ஜனபத³பதே³ஸோ ஸேவிதப்³போ³. ‘ஜனபத³பதே³ஸோபி, ஆவுஸோ, து³விதே⁴ன வேதி³தப்³போ³ – ஸேவிதப்³போ³பி அஸேவிதப்³போ³பீ’தி, இதி யங் தங் வுத்தங், இத³மேதங் படிச்ச வுத்த’’ந்தி. ச²ட்ட²ங்.
7. ஸுதவாஸுத்தங்
7. ஏகங் ஸமயங் ப⁴க³வா ராஜக³ஹே விஹரதி கி³ஜ்ஜ²கூடே பப்³ப³தே. அத² கோ² ஸுதவா பரிப்³பா³ஜகோ யேன ப⁴க³வா தேனுபஸங்கமி; உபஸங்கமித்வா ப⁴க³வதா ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³. ஏகமந்தங் நிஸின்னோ கோ² ஸுதவா பரிப்³பா³ஜகோ ப⁴க³வந்தங் ஏதத³வோச –
‘‘ஏகமிதா³ஹங், ப⁴ந்தே, ஸமயங் ப⁴க³வா இதே⁴வ ராஜக³ஹே விஹராமி கி³ரிப்³ப³ஜே. தத்ர மே, ப⁴ந்தே, ப⁴க³வதோ ஸம்முகா² ஸுதங் ஸம்முகா² படிக்³க³ஹிதங் – ‘யோ ஸோ, ஸுதவா ஸுதவ (ஸ்யா॰), பி⁴க்கு² அரஹங் கீ²ணாஸவோ வுஸிதவா கதகரணீயோ ஓஹிதபா⁴ரோ அனுப்பத்தஸத³த்தோ² பரிக்கீ²ணப⁴வஸங்யோஜனோ ஸம்மத³ஞ்ஞாவிமுத்தோ, அப⁴ப்³போ³ ஸோ பஞ்ச டா²னானி அஜ்ஜா²சரிதுங் – அப⁴ப்³போ³ கீ²ணாஸவோ பி⁴க்கு² ஸஞ்சிச்ச பாணங் ஜீவிதா வோரோபேதுங், அப⁴ப்³போ³ கீ²ணாஸவோ பி⁴க்கு² அதி³ன்னங் தெ²ய்யஸங்கா²தங் ஆதா³துங், அப⁴ப்³போ³ கீ²ணாஸவோ பி⁴க்கு² மேது²னங் த⁴ம்மங் படிஸேவிதுங், அப⁴ப்³போ³ கீ²ணாஸவோ பி⁴க்கு² ஸம்பஜானமுஸா ஸம்பஜானங் முஸா (க॰ ஸீ॰) பா⁴ஸிதுங், அப⁴ப்³போ³ கீ²ணாஸவோ பி⁴க்கு² ஸன்னிதி⁴காரகங் காமே பரிபு⁴ஞ்ஜிதுங் ஸெய்யதா²பி புப்³பே³ அகா³ரியபூ⁴தோ’தி. கச்சி மேதங், ப⁴ந்தே, ப⁴க³வதோ ஸுஸ்ஸுதங் ஸுக்³க³ஹிதங் ஸுமனஸிகதங் ஸூபதா⁴ரித’’ந்தி?
‘‘தக்³க⁴ தே ஏதங், ஸுதவா, ஸுஸ்ஸுதங் ஸுக்³க³ஹிதங் ஸுமனஸிகதங் ஸூபதா⁴ரிதங். புப்³பே³ சாஹங், ஸுதவா, ஏதரஹி ச ஏவங் வதா³மி – ‘யோ ஸோ பி⁴க்கு² அரஹங் கீ²ணாஸவோ வுஸிதவா கதகரணீயோ ஓஹிதபா⁴ரோ அனுப்பத்தஸத³த்தோ² பரிக்கீ²ணப⁴வஸங்யோஜனோ ஸம்மத³ஞ்ஞாவிமுத்தோ, அப⁴ப்³போ³ ஸோ நவ டா²னானி அஜ்ஜா²சரிதுங் – அப⁴ப்³போ³ கீ²ணாஸவோ பி⁴க்கு² ஸஞ்சிச்ச பாணங் ஜீவிதா வோரோபேதுங், அப⁴ப்³போ³ கீ²ணாஸவோ பி⁴க்கு² அதி³ன்னங் தெ²ய்யஸங்கா²தங் ஆதா³துங், அப⁴ப்³போ³ கீ²ணாஸவோ பி⁴க்கு² மேது²னங் த⁴ம்மங் படிஸேவிதுங், அப⁴ப்³போ³ கீ²ணாஸவோ பி⁴க்கு² ஸம்பஜானமுஸா பா⁴ஸிதுங், அப⁴ப்³போ³ கீ²ணாஸவோ பி⁴க்கு² ஸன்னிதி⁴காரகங் காமே பரிபு⁴ஞ்ஜிதுங் ஸெய்யதா²பி புப்³பே³ அகா³ரியபூ⁴தோ, அப⁴ப்³போ³ கீ²ணாஸவோ பி⁴க்கு² ச²ந்தா³க³திங் க³ந்துங், அப⁴ப்³போ³ கீ²ணாஸவோ பி⁴க்கு² தோ³ஸாக³திங் க³ந்துங், அப⁴ப்³போ³ கீ²ணாஸவோ பி⁴க்கு² மோஹாக³திங் க³ந்துங், அப⁴ப்³போ³ கீ²ணாஸவோ பி⁴க்கு² ப⁴யாக³திங் க³ந்துங்’. புப்³பே³ சாஹங், ஸுதவா, ஏதரஹி ச ஏவங் வதா³மி – ‘யோ ஸோ பி⁴க்கு² அரஹங் கீ²ணாஸவோ வுஸிதவா கதகரணீயோ ஓஹிதபா⁴ரோ அனுப்பத்தஸத³த்தோ² பரிக்கீ²ணப⁴வஸங்யோஜனோ ஸம்மத³ஞ்ஞாவிமுத்தோ, அப⁴ப்³போ³ ஸோ இமானி நவ டா²னானி அஜ்ஜா²சரிது’’’ந்தி. ஸத்தமங்.
8. ஸஜ்ஜ²ஸுத்தங்
8. ஏகங் ஸமயங் ப⁴க³வா ராஜக³ஹே விஹரதி கி³ஜ்ஜ²கூடே பப்³ப³தே. அத² கோ² ஸஜ்ஜோ² பரிப்³பா³ஜகோ யேன ப⁴க³வா தேனுபஸங்கமி; உபஸங்கமித்வா ப⁴க³வதா ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³. ஏகமந்தங் நிஸின்னோ கோ² ஸஜ்ஜோ² பரிப்³பா³ஜகோ ப⁴க³வந்தங் ஏதத³வோச –
‘‘ஏகமிதா³ஹங், ப⁴ந்தே, ஸமயங் ப⁴க³வா இதே⁴வ ராஜக³ஹே விஹராமி கி³ரிப்³ப³ஜே. தத்ர மே, ப⁴ந்தே, ப⁴க³வதோ ஸம்முகா² ஸுதங் ஸம்முகா² படிக்³க³ஹிதங் – ‘யோ ஸோ, ஸஜ்ஜ², பி⁴க்கு² அரஹங் கீ²ணாஸவோ வுஸிதவா கதகரணீயோ ஓஹிதபா⁴ரோ அனுப்பத்தஸத³த்தோ² பரிக்கீ²ணப⁴வஸங்யோஜனோ ஸம்மத³ஞ்ஞாவிமுத்தோ, அப⁴ப்³போ³ ஸோ பஞ்ச டா²னானி அஜ்ஜா²சரிதுங் – அப⁴ப்³போ³ கீ²ணாஸவோ பி⁴க்கு² ஸஞ்சிச்ச பாணங் ஜீவிதா வோரோபேதுங், அப⁴ப்³போ³ கீ²ணாஸவோ பி⁴க்கு² அதி³ன்னங் தெ²ய்யஸங்கா²தங் ஆதா³துங், அப⁴ப்³போ³ கீ²ணாஸவோ பி⁴க்கு² மேது²னங் த⁴ம்மங் படிஸேவிதுங், அப⁴ப்³போ³ கீ²ணாஸவோ பி⁴க்கு² ஸம்பஜானமுஸா பா⁴ஸிதுங், அப⁴ப்³போ³ கீ²ணாஸவோ பி⁴க்கு² ஸன்னிதி⁴காரகங் காமே பரிபு⁴ஞ்ஜிதுங் ஸெய்யதா²பி புப்³பே³ அகா³ரியபூ⁴தோ’தி. கச்சி மேதங், ப⁴ந்தே, ப⁴க³வதோ ஸுஸ்ஸுதங் ஸுக்³க³ஹிதங் ஸுமனஸிகதங் ஸூபதா⁴ரித’’ந்தி?
‘‘தக்³க⁴ தே ஏதங், ஸஜ்ஜ², ஸுஸ்ஸுதங் ஸுக்³க³ஹிதங் ஸுமனஸிகதங் ஸூபதா⁴ரிதங். புப்³பே³ சாஹங், ஸஜ்ஜ² , ஏதரஹி ச ஏவங் வதா³மி – ‘யோ ஸோ பி⁴க்கு² அரஹங் கீ²ணாஸவோ வுஸிதவா கதகரணீயோ ஓஹிதபா⁴ரோ அனுப்பத்தஸத³த்தோ² பரிக்கீ²ணப⁴வஸங்யோஜனோ ஸம்மத³ஞ்ஞாவிமுத்தோ, அப⁴ப்³போ³ ஸோ நவ டா²னானி அஜ்ஜா²சரிதுங் – அப⁴ப்³போ³ கீ²ணாஸவோ பி⁴க்கு² ஸஞ்சிச்ச பாணங் ஜீவிதா வோரோபேதுங்…பே॰… அப⁴ப்³போ³ கீ²ணாஸவோ பி⁴க்கு² ஸன்னிதி⁴காரகங் காமே பரிபு⁴ஞ்ஜிதுங் ஸெய்யதா²பி புப்³பே³ அகா³ரியபூ⁴தோ, அப⁴ப்³போ³ கீ²ணாஸவோ பி⁴க்கு² பு³த்³த⁴ங் பச்சக்கா²துங், அப⁴ப்³போ³ கீ²ணாஸவோ பி⁴க்கு² த⁴ம்மங் பச்சக்கா²துங், அப⁴ப்³போ³ கீ²ணாஸவோ பி⁴க்கு² ஸங்க⁴ங் பச்சக்கா²துங், அப⁴ப்³போ³ கீ²ணாஸவோ பி⁴க்கு² ஸிக்க²ங் பச்சக்கா²துங்’. புப்³பே³ சாஹங், ஸஜ்ஜ², ஏதரஹி ச ஏவங் வதா³மி – ‘யோ ஸோ பி⁴க்கு² அரஹங் கீ²ணாஸவோ வுஸிதவா கதகரணீயோ ஓஹிதபா⁴ரோ அனுப்பத்தஸத³த்தோ² பரிக்கீ²ணப⁴வஸங்யோஜனோ ஸம்மத³ஞ்ஞாவிமுத்தோ, அப⁴ப்³போ³ ஸோ இமானி நவ டா²னானி அஜ்ஜா²சரிது’’’ந்தி. அட்ட²மங்.
9. புக்³க³லஸுத்தங்
9. ‘‘நவயிமே, பி⁴க்க²வே, புக்³க³லா ஸந்தோ ஸங்விஜ்ஜமானா லோகஸ்மிங். கதமே நவ? அரஹா, அரஹத்தாய படிபன்னோ, அனாகா³மீ, அனாகா³மிப²லஸச்சி²கிரியாய படிபன்னோ, ஸகதா³கா³மீ, ஸகதா³கா³மிப²லஸச்சி²கிரியாய படிபன்னோ , ஸோதாபன்னோ, ஸோதாபத்திப²லஸச்சி²கிரியாய படிபன்னோ, புது²ஜ்ஜனோ – இமே கோ², பி⁴க்க²வே, நவ புக்³க³லா ஸந்தோ ஸங்விஜ்ஜமானா லோகஸ்மி’’ந்தி. நவமங்.
10. ஆஹுனெய்யஸுத்தங்
10. ‘‘நவயிமே , பி⁴க்க²வே, புக்³க³லா ஆஹுனெய்யா பாஹுனெய்யா த³க்கி²ணெய்யா அஞ்ஜலிகரணீயா அனுத்தரங் புஞ்ஞக்கெ²த்தங் லோகஸ்ஸ. கதமே நவ? அரஹா, அரஹத்தாய படிபன்னோ, அனாகா³மீ, அனாகா³மிப²லஸச்சி²கிரியாய படிபன்னோ, ஸகதா³கா³மீ, ஸகதா³கா³மிப²லஸச்சி²கிரியாய படிபன்னோ, ஸோதாபன்னோ, ஸோதாபத்திப²லஸச்சி²கிரியாய படிபன்னோ, கொ³த்ரபூ⁴ – இமே கோ², பி⁴க்க²வே, நவ புக்³க³லா ஆஹுனெய்யா…பே॰… அனுத்தரங் புஞ்ஞக்கெ²த்தங் லோகஸ்ஸா’’தி. த³ஸமங்.
ஸம்போ³தி⁴வக்³கோ³ பட²மோ.
தஸ்ஸுத்³தா³னங் –
ஸம்போ³தி⁴ நிஸ்ஸயோ சேவ, மேகி⁴ய நந்த³கங் ப³லங்;
ஸேவனா ஸுதவா ஸஜ்ஜோ², புக்³க³லோ ஆஹுனெய்யேன சாதி.