5. அக்கோஸவக்³கோ³
1. விவாத³ஸுத்தங்
41. அத² கோ² ஆயஸ்மா உபாலி யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா உபாலி ப⁴க³வந்தங் ஏதத³வோச – ‘‘கோ நு கோ², ப⁴ந்தே, ஹேது கோ பச்சயோ, யேன ஸங்கே⁴ ப⁴ண்ட³னகலஹவிக்³க³ஹவிவாதா³ உப்பஜ்ஜந்தி, பி⁴க்கூ² ச ந பா²ஸு பா²ஸுங் (?) விஹரந்தீ’’தி? ‘‘இது⁴பாலி, பி⁴க்கூ² அத⁴ம்மங் த⁴ம்மோதி தீ³பெந்தி, த⁴ம்மங் அத⁴ம்மோதி தீ³பெந்தி, அவினயங் வினயோதி தீ³பெந்தி, வினயங் அவினயோதி தீ³பெந்தி, அபா⁴ஸிதங் அலபிதங் ததா²க³தேன பா⁴ஸிதங் லபிதங் ததா²க³தேனாதி தீ³பெந்தி, பா⁴ஸிதங் லபிதங் ததா²க³தேன அபா⁴ஸிதங் அலபிதங் ததா²க³தேனாதி தீ³பெந்தி, அனாசிண்ணங் ததா²க³தேன ஆசிண்ணங் ததா²க³தேனாதி தீ³பெந்தி, ஆசிண்ணங் ததா²க³தேன அனாசிண்ணங் ததா²க³தேனாதி தீ³பெந்தி, அபஞ்ஞத்தங் ததா²க³தேன பஞ்ஞத்தங் ததா²க³தேனாதி தீ³பெந்தி, பஞ்ஞத்தங் ததா²க³தேன அபஞ்ஞத்தங் ததா²க³தேனாதி தீ³பெந்தி. அயங் கோ², உபாலி, ஹேது அயங் பச்சயோ, யேன ஸங்கே⁴ ப⁴ண்ட³னகலஹவிக்³க³ஹவிவாதா³ உப்பஜ்ஜந்தி, பி⁴க்கூ² ச ந பா²ஸு விஹரந்தீ’’தி. பட²மங்.
2. பட²மவிவாத³மூலஸுத்தங்
42. ‘‘கதி நு கோ², ப⁴ந்தே, விவாத³மூலானீ’’தி? ‘‘த³ஸ கோ², உபாலி, விவாத³மூலானி. கதமானி த³ஸ? இது⁴பாலி, பி⁴க்கூ² அத⁴ம்மங் த⁴ம்மோதி தீ³பெந்தி, த⁴ம்மங் அத⁴ம்மோதி தீ³பெந்தி, அவினயங் வினயோதி தீ³பெந்தி, வினயங் அவினயோதி தீ³பெந்தி, அபா⁴ஸிதங் அலபிதங் ததா²க³தேன பா⁴ஸிதங் லபிதங் ததா²க³தேனாதி தீ³பெந்தி , பா⁴ஸிதங் லபிதங் ததா²க³தேன அபா⁴ஸிதங் அலபிதங் ததா²க³தேனாதி தீ³பெந்தி, அனாசிண்ணங் ததா²க³தேன ஆசிண்ணங் ததா²க³தேனாதி தீ³பெந்தி, ஆசிண்ணங் ததா²க³தேன அனாசிண்ணங் ததா²க³தேனாதி தீ³பெந்தி, அபஞ்ஞத்தங் ததா²க³தேன பஞ்ஞத்தங் ததா²க³தேனாதி தீ³பெந்தி, பஞ்ஞத்தங் ததா²க³தேன அபஞ்ஞத்தங் ததா²க³தேனாதி தீ³பெந்தி. இமானி கோ², உபாலி, த³ஸ விவாத³மூலானீ’’தி. து³தியங்.
3. து³தியவிவாத³மூலஸுத்தங்
43. ‘‘கதி நு கோ², ப⁴ந்தே, விவாத³மூலானீ’’தி? ‘‘த³ஸ கோ², உபாலி, விவாத³மூலானி. கதமானி த³ஸ? இது⁴பாலி, பி⁴க்கூ² அனாபத்திங் ஆபத்தீதி தீ³பெந்தி, ஆபத்திங் அனாபத்தீதி தீ³பெந்தி, லஹுகங் ஆபத்திங் க³ருகாபத்தீதி தீ³பெந்தி , க³ருகங் ஆபத்திங் லஹுகாபத்தீதி தீ³பெந்தி, து³ட்டு²ல்லங் ஆபத்திங் அது³ட்டு²ல்லாபத்தீதி தீ³பெந்தி, அது³ட்டு²ல்லங் ஆபத்திங் து³ட்டு²ல்லாபத்தீதி தீ³பெந்தி, ஸாவஸேஸங் ஆபத்திங் அனவஸேஸாபத்தீதி தீ³பெந்தி, அனவஸேஸங் ஆபத்திங் ஸாவஸேஸாபத்தீதி தீ³பெந்தி , ஸப்படிகம்மங் ஆபத்திங் அப்படிகம்மாபத்தீதி தீ³பெந்தி, அப்படிகம்மங் ஆபத்திங் ஸப்படிகம்மாபத்தீதி தீ³பெந்தி. இமானி கோ², உபாலி, த³ஸ விவாத³மூலானீ’’தி. ததியங்.
4. குஸினாரஸுத்தங்
44. ஏகங் ஸமயங் ப⁴க³வா குஸினாராயங் விஹரதி ப³லிஹரணே வனஸண்டே³. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி. ‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –
சூளவ॰ 399; பரி॰ 436 ‘‘சோத³கேன, பி⁴க்க²வே, பி⁴க்கு²னா பரங் சோதே³துகாமேன பஞ்ச த⁴ம்மே அஜ்ஜ²த்தங் பச்சவெக்கி²த்வா பஞ்ச த⁴ம்மே அஜ்ஜ²த்தங் உபட்டா²பெத்வா பரோ சோதே³தப்³போ³. கதமே பஞ்ச த⁴ம்மா அஜ்ஜ²த்தங் பச்சவெக்கி²தப்³பா³? சோத³கேன, பி⁴க்க²வே, பி⁴க்கு²னா பரங் சோதே³துகாமேன ஏவங் பச்சவெக்கி²தப்³ப³ங் – ‘பரிஸுத்³த⁴காயஸமாசாரோ நு கொ²ம்ஹி, பரிஸுத்³தே⁴னம்ஹி காயஸமாசாரேன ஸமன்னாக³தோ அச்சி²த்³தே³ன அப்படிமங்ஸேன. ஸங்விஜ்ஜதி நு கோ² மே ஏஸோ த⁴ம்மோ உதா³ஹு நோ’தி? நோ சே, பி⁴க்க²வே, பி⁴க்கு² பரிஸுத்³த⁴காயஸமாசாரோ ஹோதி பரிஸுத்³தே⁴ன காயஸமாசாரேன ஸமன்னாக³தோ அச்சி²த்³தே³ன அப்படிமங்ஸேன, தஸ்ஸ ப⁴வந்தி வத்தாரோ – ‘இங்க⁴ தாவ ஆயஸ்மா காயிகங் ஸிக்க²ஸ்ஸூ’தி, இதிஸ்ஸ ப⁴வந்தி வத்தாரோ.
‘‘புன சபரங், பி⁴க்க²வே, சோத³கேன பி⁴க்கு²னா பரங் சோதே³துகாமேன ஏவங் பச்சவெக்கி²தப்³ப³ங் – ‘பரிஸுத்³த⁴வசீஸமாசாரோ நு கொ²ம்ஹி, பரிஸுத்³தே⁴னம்ஹி வசீஸமாசாரேன ஸமன்னாக³தோ அச்சி²த்³தே³ன அப்படிமங்ஸேன. ஸங்விஜ்ஜதி நு கோ² மே ஏஸோ த⁴ம்மோ உதா³ஹு நோ’தி? நோ சே, பி⁴க்க²வே, பி⁴க்கு² பரிஸுத்³த⁴வசீஸமாசாரோ ஹோதி பரிஸுத்³தே⁴ன வசீஸமாசாரேன ஸமன்னாக³தோ அச்சி²த்³தே³ன அப்படிமங்ஸேன, தஸ்ஸ ப⁴வந்தி வத்தாரோ – ‘இங்க⁴ தாவ ஆயஸ்மா வாசஸிகங் ஸிக்க²ஸ்ஸூ’தி, இதிஸ்ஸ ப⁴வந்தி வத்தாரோ.
‘‘புன சபரங், பி⁴க்க²வே, சோத³கேன பி⁴க்கு²னா பரங் சோதே³துகாமேன ஏவங் பச்சவெக்கி²தப்³ப³ங் – ‘மெத்தங் நு கோ² மே சித்தங் பச்சுபட்டி²தங் ஸப்³ரஹ்மசாரீஸு அனாகா⁴தங். ஸங்விஜ்ஜதி நு கோ² மே ஏஸோ த⁴ம்மோ உதா³ஹு நோ’தி? நோ சே, பி⁴க்க²வே, பி⁴க்கு²னோ மெத்தங் சித்தங் பச்சுபட்டி²தங் ஹோதி ஸப்³ரஹ்மசாரீஸு அனாகா⁴தங், தஸ்ஸ ப⁴வந்தி வத்தாரோ – ‘இங்க⁴ தாவ ஆயஸ்மா ஸப்³ரஹ்மசாரீஸு மெத்தங் சித்தங் உபட்டா²பேஹீ’தி, இதிஸ்ஸ ப⁴வந்தி வத்தாரோ.
‘‘புன சபரங், பி⁴க்க²வே, சோத³கேன பி⁴க்கு²னா பரங் சோதே³துகாமேன ஏவங் பச்சவெக்கி²தப்³ப³ங் – ‘ப³ஹுஸ்ஸுதோ நு கொ²ம்ஹி ஸுதத⁴ரோ ஸுதஸன்னிசயோ, யே தே த⁴ம்மா ஆதி³கல்யாணா மஜ்ஜே²கல்யாணா பரியோஸானகல்யாணா ஸாத்த²ங் ஸப்³யஞ்ஜனங் கேவலபரிபுண்ணங் பரிஸுத்³த⁴ங் ப்³ரஹ்மசரியங் அபி⁴வத³ந்தி, ததா²ரூபா மே த⁴ம்மா ப³ஹுஸ்ஸுதா ஹொந்தி தா⁴தா வசஸா பரிசிதா மனஸானுபெக்கி²தா தி³ட்டி²யா ஸுப்படிவித்³தா⁴. ஸங்விஜ்ஜதி நு கோ² மே ஏஸோ த⁴ம்மோ உதா³ஹு நோ’தி? நோ சே, பி⁴க்க²வே, பி⁴க்கு² ப³ஹுஸ்ஸுதோ ஹோதி ஸுதத⁴ரோ ஸுதஸன்னிசயோ, யே தே த⁴ம்மா ஆதி³கல்யாணா மஜ்ஜே²கல்யாணா பரியோஸானகல்யாணா ஸாத்த²ங் ஸப்³யஞ்ஜனங் கேவலபரிபுண்ணங் பரிஸுத்³த⁴ங் ப்³ரஹ்மசரியங் அபி⁴வத³ந்தி, ததா²ரூபாஸ்ஸ த⁴ம்மா ப³ஹுஸ்ஸுதா ஹொந்தி தா⁴தா வசஸா பரிசிதா மனஸானுபெக்கி²தா தி³ட்டி²யா ஸுப்படிவித்³தா⁴, தஸ்ஸ ப⁴வந்தி வத்தாரோ – ‘இங்க⁴ தாவ ஆயஸ்மா ஆக³மங் பரியாபுணஸ்ஸூ’தி, இதிஸ்ஸ ப⁴வந்தி வத்தாரோ.
‘‘புன சபரங், பி⁴க்க²வே, சோத³கேன பி⁴க்கு²னா பரங் சோதே³துகாமேன ஏவங் பச்சவெக்கி²தப்³ப³ங் – ‘உப⁴யானி கோ² பன மே பாதிமொக்கா²னி வித்தா²ரேன ஸ்வாக³தானி ஹொந்தி ஸுவிப⁴த்தானி ஸுப்பவத்தீனி ஸுவினிச்சி²தானி ஸுத்தஸோ அனுப்³யஞ்ஜனஸோ. ஸங்விஜ்ஜதி நு கோ² மே ஏஸோ த⁴ம்மோ உதா³ஹு நோ’தி? நோ சே, பி⁴க்க²வே, பி⁴க்கு²னோ உப⁴யானி பாதிமொக்கா²னி வித்தா²ரேன ஸ்வாக³தானி ஹொந்தி ஸுவிப⁴த்தானி ஸுப்பவத்தீனி ஸுவினிச்சி²தானி ஸுத்தஸோ அனுப்³யஞ்ஜனஸோ, ‘இத³ங் பனாயஸ்மா, கத்த² வுத்தங் ப⁴க³வதா’தி, இதி புட்டோ² ந ஸம்பாயிஸ்ஸதி. தஸ்ஸ ப⁴வந்தி வத்தாரோ – ‘இங்க⁴ தாவ ஆயஸ்மா வினயங் ஸிக்க²ஸ்ஸூ’தி, இதிஸ்ஸ ப⁴வந்தி வத்தாரோ. இமே பஞ்ச த⁴ம்மா அஜ்ஜ²த்தங் பச்சவெக்கி²தப்³பா³.
‘‘கதமே பஞ்ச த⁴ம்மா அஜ்ஜ²த்தங் உபட்டா²பேதப்³பா³? ‘காலேன வக்கா²மி, நோ அகாலேன; பூ⁴தேன வக்கா²மி, நோ அபூ⁴தேன; ஸண்ஹேன வக்கா²மி, நோ ப²ருஸேன; அத்த²ஸங்ஹிதேன வக்கா²மி, நோ அனத்த²ஸங்ஹிதேன; மெத்தசித்தோ வக்கா²மி, நோ தோ³ஸந்தரோ’தி – இமே பஞ்ச த⁴ம்மா அஜ்ஜ²த்தங் உபட்டா²பேதப்³பா³. சோத³கேன, பி⁴க்க²வே, பி⁴க்கு²னா பரங் சோதே³துகாமேன இமே பஞ்ச த⁴ம்மே அஜ்ஜ²த்தங் பச்சவெக்கி²த்வா இமே பஞ்ச த⁴ம்மே அஜ்ஜ²த்தங் உபட்டா²பெத்வா பரோ சோதே³தப்³போ³’’தி. சதுத்த²ங்.
5. ராஜந்தேபுரப்பவேஸனஸுத்தங்
45. பாசி॰ 497 ‘‘த³ஸயிமே , பி⁴க்க²வே, ஆதீ³னவா ராஜந்தேபுரப்பவேஸனே. கதமே த³ஸ? இத⁴, பி⁴க்க²வே, ராஜா மஹேஸியா ஸத்³தி⁴ங் நிஸின்னோ ஹோதி. தத்ர பி⁴க்கு² பவிஸதி. மஹேஸீ வா பி⁴க்கு²ங் தி³ஸ்வா ஸிதங் பாதுகரோதி, பி⁴க்கு² வா மஹேஸிங் தி³ஸ்வா ஸிதங் பாதுகரோதி. தத்த² ரஞ்ஞோ ஏவங் ஹோதி – ‘அத்³தா⁴ இமேஸங் கதங் வா கரிஸ்ஸந்தி வா’தி! அயங், பி⁴க்க²வே, பட²மோ ஆதீ³னவோ ராஜந்தேபுரப்பவேஸனே.
‘‘புன சபரங், பி⁴க்க²வே, ராஜா ப³ஹுகிச்சோ ப³ஹுகரணீயோ அஞ்ஞதரங் இத்தி²ங் க³ந்த்வா ந ஸரதி – ‘ஸா தேன க³ப்³ப⁴ங் க³ண்ஹாதி’. தத்த² ரஞ்ஞோ ஏவங் ஹோதி – ‘ந கோ² இத⁴ அஞ்ஞோ கோசி பவிஸதி, அஞ்ஞத்ர பப்³ப³ஜிதேன. ஸியா நு கோ² பப்³ப³ஜிதஸ்ஸ கம்ம’ந்தி. அயங், பி⁴க்க²வே, து³தியோ ஆதீ³னவோ ராஜந்தேபுரப்பவேஸனே.
‘‘புன சபரங், பி⁴க்க²வே, ரஞ்ஞோ அந்தேபுரே அஞ்ஞதரங் ரதனங் நஸ்ஸதி. தத்த² ரஞ்ஞோ ஏவங் ஹோதி – ‘ந கோ² இத⁴ அஞ்ஞோ கோசி பவிஸதி, அஞ்ஞத்ர பப்³ப³ஜிதேன. ஸியா நு கோ² பப்³ப³ஜிதஸ்ஸ கம்ம’ந்தி. அயங், பி⁴க்க²வே, ததியோ ஆதீ³னவோ ராஜந்தேபுரப்பவேஸனே.
‘‘புன சபரங், பி⁴க்க²வே, ரஞ்ஞோ அந்தேபுரே அப்³ப⁴ந்தரா கு³ய்ஹமந்தா ப³ஹித்³தா⁴ ஸம்பே⁴த³ங் க³ச்ச²ந்தி. தத்த² ரஞ்ஞோ ஏவங் ஹோதி – ‘ந கோ² இத⁴ அஞ்ஞோ கோசி பவிஸதி, அஞ்ஞத்ர பப்³ப³ஜிதேன . ஸியா நு கோ² பப்³ப³ஜிதஸ்ஸ கம்ம’ந்தி. அயங், பி⁴க்க²வே, சதுத்தோ² ஆதீ³னவோ ராஜந்தேபுரப்பவேஸனே.
‘‘புன சபரங், பி⁴க்க²வே, ரஞ்ஞோ அந்தேபுரே பிதா வா புத்தங் பத்தே²தி புத்தோ வா பிதரங் பத்தே²தி. தேஸங் ஏவங் ஹோதி – ‘ந கோ² இத⁴ அஞ்ஞோ கோசி பவிஸதி, அஞ்ஞத்ர பப்³ப³ஜிதேன. ஸியா நு கோ² பப்³ப³ஜிதஸ்ஸ கம்ம’ந்தி. அயங், பி⁴க்க²வே, பஞ்சமோ ஆதீ³னவோ ராஜந்தேபுரப்பவேஸனே.
‘‘புன சபரங், பி⁴க்க²வே, ராஜா நீசட்டா²னியங் உச்சே டா²னே ட²பேதி. யேஸங் தங் அமனாபங் தேஸங் ஏவங் ஹோதி – ‘ராஜா கோ² பப்³ப³ஜிதேன ஸங்ஸட்டோ². ஸியா நு கோ² பப்³ப³ஜிதஸ்ஸ கம்ம’ந்தி. அயங், பி⁴க்க²வே, ச²ட்டோ² ஆதீ³னவோ ராஜந்தேபுரப்பவேஸனே.
‘‘புன சபரங், பி⁴க்க²வே, ராஜா உச்சட்டா²னியங் நீசே டா²னே ட²பேதி. யேஸங் தங் அமனாபங் தேஸங் ஏவங் ஹோதி – ‘ராஜா கோ² பப்³ப³ஜிதேன ஸங்ஸட்டோ². ஸியா நு கோ² பப்³ப³ஜிதஸ்ஸ கம்ம’ந்தி. அயங், பி⁴க்க²வே, ஸத்தமோ ஆதீ³னவோ ராஜந்தேபுரப்பவேஸனே.
‘‘புன சபரங், பி⁴க்க²வே, ராஜா அகாலே ஸேனங் உய்யோஜேதி. யேஸங் தங் அமனாபங் தேஸங் ஏவங் ஹோதி – ‘ராஜா கோ² பப்³ப³ஜிதேன ஸங்ஸட்டோ². ஸியா நு கோ² பப்³ப³ஜிதஸ்ஸ கம்ம’ந்தி. அயங், பி⁴க்க²வே, அட்ட²மோ ஆதீ³னவோ ராஜந்தேபுரப்பவேஸனே.
‘‘புன சபரங், பி⁴க்க²வே, ராஜா காலே ஸேனங் உய்யோஜெத்வா அந்தராமக்³க³தோ நிவத்தாபேதி. யேஸங் தங் அமனாபங் தேஸங் ஏவங் ஹோதி – ‘ராஜா கோ² பப்³ப³ஜிதேன ஸங்ஸட்டோ². ஸியா நு கோ² பப்³ப³ஜிதஸ்ஸ கம்ம’ந்தி. அயங், பி⁴க்க²வே, நவமோ ஆதீ³னவோ ராஜந்தேபுரப்பவேஸனே.
‘‘புன சபரங், பி⁴க்க²வே, ரஞ்ஞோ அந்தேபுரங் ஹத்தி²ஸம்மத்³த³ங் அஸ்ஸஸம்மத்³த³ங் ரத²ஸம்மத்³த³ங் ரஜனீயானி ரூபஸத்³த³க³ந்த⁴ரஸபொ²ட்ட²ப்³பா³னி, யானி ந பப்³ப³ஜிதஸ்ஸ ஸாருப்பானி. அயங், பி⁴க்க²வே, த³ஸமோ ஆதீ³னவோ ராஜந்தேபுரப்பவேஸனே. இமே கோ², பி⁴க்க²வே, த³ஸ ஆதீ³னவா ராஜந்தேபுரப்பவேஸனே’’தி. பஞ்சமங்.
6. ஸக்கஸுத்தங்
46. ஏகங் ஸமயங் ப⁴க³வா ஸக்கேஸு விஹரதி கபிலவத்து²ஸ்மிங் நிக்³ரோதா⁴ராமே. அத² கோ² ஸம்ப³ஹுலா ஸக்கா உபாஸகா தத³ஹுபோஸதே² யேன ப⁴க³வா தேனுபஸங்கமிங்ஸு; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³ங்ஸு. ஏகமந்தங் நிஸின்னே கோ² ஸக்கே உபாஸகே ப⁴க³வா ஏதத³வோச – ‘‘அபி நு தும்ஹே, ஸக்கா, அட்ட²ங்க³ஸமன்னாக³தங் உபோஸத²ங் உபவஸதா²’’தி? ‘‘அப்பேகதா³ மயங், ப⁴ந்தே, அட்ட²ங்க³ஸமன்னாக³தங் உபோஸத²ங் உபவஸாம, அப்பேகதா³ ந உபவஸாமா’’தி. ‘‘தேஸங் வோ, ஸக்கா, அலாபா⁴ தேஸங் து³ல்லத்³த⁴ங், யே தும்ஹே ஏவங் ஸோகஸப⁴யே ஜீவிதே மரணஸப⁴யே ஜீவிதே அப்பேகதா³ அட்ட²ங்க³ஸமன்னாக³தங் உபோஸத²ங் உபவஸத², அப்பேகதா³ ந உபவஸத².
‘‘தங் கிங் மஞ்ஞத², ஸக்கா, இத⁴ புரிஸோ யேன கேனசி கம்மட்டா²னேன அனாபஜ்ஜ அகுஸலங் தி³வஸங் அட்³ட⁴கஹாபணங் நிப்³பி³ஸெய்ய. த³க்கோ² புரிஸோ உட்டா²னஸம்பன்னோதி அலங் வசனாயா’’தி? ‘‘ஏவங், ப⁴ந்தே’’.
‘‘தங் கிங் மஞ்ஞத², ஸக்கா, இத⁴ புரிஸோ யேன கேனசி கம்மட்டா²னேன அனாபஜ்ஜ அகுஸலங் தி³வஸங் கஹாபணங் நிப்³பி³ஸெய்ய. த³க்கோ² புரிஸோ உட்டா²னஸம்பன்னோதி அலங் வசனாயா’’தி? ‘‘ஏவங், ப⁴ந்தே’’.
‘‘தங் கிங், மஞ்ஞத², ஸக்கா, இத⁴ புரிஸோ யேன கேனசி கம்மட்டா²னேன அனாபஜ்ஜ அகுஸலங் தி³வஸங் த்³வே கஹாபணே நிப்³பி³ஸெய்ய … தயோ கஹாபணே நிப்³பி³ஸெய்ய… சத்தாரோ கஹாபணே நிப்³பி³ஸெய்ய… பஞ்ச கஹாபணே நிப்³பி³ஸெய்ய… ச² கஹாபணே நிப்³பி³ஸெய்ய… ஸத்த கஹாபணே நிப்³பி³ஸெய்ய… அட்ட² கஹாபணே நிப்³பி³ஸெய்ய… நவ கஹாபணே நிப்³பி³ஸெய்ய… த³ஸ கஹாபணே நிப்³பி³ஸெய்ய… வீஸ கஹாபணே நிப்³பி³ஸெய்ய… திங்ஸ கஹாபணே நிப்³பி³ஸெய்ய… சத்தாரீஸங் கஹாபணே நிப்³பி³ஸெய்ய… பஞ்ஞாஸங் கஹாபணே நிப்³பி³ஸெய்ய… கஹாபணஸதங் நிப்³பி³ஸெய்ய. த³க்கோ² புரிஸோ உட்டா²னஸம்பன்னோதி அலங் வசனாயா’’தி? ‘‘ஏவங், ப⁴ந்தே’’.
‘‘தங் கிங் மஞ்ஞத², ஸக்கா, அபி நு ஸோ புரிஸோ தி³வஸே தி³வஸே கஹாபணஸதங் கஹாபணஸஹஸ்ஸங் நிப்³பி³ஸமானோ லத்³த⁴ங் லத்³த⁴ங் நிக்கி²பந்தோ வஸ்ஸஸதாயுகோ வஸ்ஸஸதஜீவீ மஹந்தங் போ⁴க³க்க²ந்த⁴ங் அதி⁴க³ச்செ²ய்யா’’தி? ‘‘ஏவங், ப⁴ந்தே’’.
‘‘தங் கிங் மஞ்ஞத², ஸக்கா, அபி நு ஸோ புரிஸோ போ⁴க³ஹேது போ⁴க³னிதா³னங் போ⁴கா³தி⁴கரணங் ஏகங் வா ரத்திங் ஏகங் வா தி³வஸங் உபட்³ட⁴ங் வா ரத்திங் உபட்³ட⁴ங் வா தி³வஸங் ஏகந்தஸுக²ப்படிஸங்வேதீ³ விஹரெய்யா’’தி? ‘‘நோ ஹேதங், ப⁴ந்தே’’. ‘‘தங் கிஸ்ஸ ஹேது’’? ‘‘காமா ஹி, ப⁴ந்தே, அனிச்சா துச்சா² முஸா மோஸத⁴ம்மா’’தி.
‘‘இத⁴ பன வோ, ஸக்கா, மம ஸாவகோ த³ஸ வஸ்ஸானி அப்பமத்தோ ஆதாபீ பஹிதத்தோ விஹரந்தோ யதா² மயானுஸிட்ட²ங் ததா² படிபஜ்ஜமானோ ஸதம்பி வஸ்ஸானி ஸதம்பி வஸ்ஸஸதானி ஸதம்பி வஸ்ஸஸஹஸ்ஸானி ஏகந்தஸுக²ப்படிஸங்வேதீ³ விஹரெய்ய. ஸோ ச க்²வஸ்ஸ ஸகதா³கா³மீ வா அனாகா³மீ வா அபண்ணகங் வா ஸோதாபன்னோ. திட்ட²ந்து, ஸக்கா, த³ஸ வஸ்ஸானி.
இத⁴ மம ஸாவகோ நவ வஸ்ஸானி… அட்ட² வஸ்ஸானி… ஸத்த வஸ்ஸானி… ச² வஸ்ஸானி… பஞ்ச வஸ்ஸானி சத்தாரி வஸ்ஸானி… தீணி வஸ்ஸானி… த்³வே வஸ்ஸானி… ஏகங் வஸ்ஸங் அப்பமத்தோ ஆதாபீ பஹிதத்தோ விஹரந்தோ யதா² மயானுஸிட்ட²ங் ததா² படிபஜ்ஜமானோ ஸதம்பி வஸ்ஸானி ஸதம்பி வஸ்ஸஸதானி ஸதம்பி வஸ்ஸஸஹஸ்ஸானி ஏகந்தஸுக²ப்படிஸங்வேதீ³ விஹரெய்ய, ஸோ ச க்²வஸ்ஸ ஸகதா³கா³மீ வா அனாகா³மீ வா அபண்ணகங் வா ஸோதாபன்னோ. திட்ட²து, ஸக்கா, ஏகங் வஸ்ஸங்.
இத⁴ மம ஸாவகோ த³ஸ மாஸே அப்பமத்தோ ஆதாபீ பஹிதத்தோ விஹரந்தோ யதா² மயானுஸிட்ட²ங் ததா² படிபஜ்ஜமானோ ஸதம்பி வஸ்ஸானி ஸதம்பி வஸ்ஸஸதானி ஸதம்பி வஸ்ஸஸஹஸ்ஸானி ஏகந்தஸுக²ப்படிஸங்வேதீ³ விஹரெய்ய, ஸோ ச க்²வஸ்ஸ ஸகதா³கா³மீ வா அனாகா³மீ வா அபண்ணகங் வா ஸோதாபன்னோ. திட்ட²ந்து, ஸக்கா, த³ஸ மாஸா.
இத⁴ மம ஸாவகோ நவ மாஸே… அட்ட² மாஸே… ஸத்த மாஸே… ச² மாஸே… பஞ்ச மாஸே… சத்தாரோ மாஸே… தயோ மாஸே… த்³வே மாஸே… ஏகங் மாஸங்… அட்³ட⁴மாஸங் அப்பமத்தோ ஆதாபீ பஹிதத்தோ விஹரந்தோ யதா² மயானுஸிட்ட²ங் ததா² படிபஜ்ஜமானோ ஸதம்பி வஸ்ஸானி ஸதம்பி வஸ்ஸஸதானி ஸதம்பி வஸ்ஸஸஹஸ்ஸானி ஏகந்தஸுக²ப்படிஸங்வேதீ³ விஹரெய்ய, ஸோ ச க்²வஸ்ஸ ஸகதா³கா³மீ வா அனாகா³மீ வா அபண்ணகங் வா ஸோதாபன்னோ. திட்ட²து, ஸக்கா, அட்³ட⁴மாஸோ.
இத⁴ மம ஸாவகோ த³ஸ ரத்திந்தி³வே ரத்திதி³வே (க॰) அப்பமத்தோ ஆதாபீ பஹிதத்தோ விஹரந்தோ யதா² மயானுஸிட்ட²ங் ததா² படிபஜ்ஜமானோ ஸதம்பி வஸ்ஸானி ஸதம்பி வஸ்ஸஸதானி ஸதம்பி வஸ்ஸஸஹஸ்ஸானி ஏகந்தஸுக²ப்படிஸங்வேதீ³ விஹரெய்ய, ஸோ ச க்²வஸ்ஸ ஸகதா³கா³மீ வா அனாகா³மீ வா அபண்ணகங் வா ஸோதாபன்னோ. திட்ட²ந்து, ஸக்கா, த³ஸ ரத்திந்தி³வா.
இத⁴ மம ஸாவகோ நவ ரத்திந்தி³வே… அட்ட² ரத்திந்தி³வே… ஸத்த ரத்திந்தி³வே… ச² ரத்திந்தி³வே… பஞ்ச ரத்திந்தி³வே… சத்தாரோ ரத்திந்தி³வே… தயோ ரத்திந்தி³வே… த்³வே ரத்திந்தி³வே… ஏகங் ரத்திந்தி³வங் அப்பமத்தோ ஆதாபீ பஹிதத்தோ விஹரந்தோ யதா² மயானுஸிட்ட²ங் ததா² படிபஜ்ஜமானோ ஸதம்பி வஸ்ஸானி ஸதம்பி வஸ்ஸஸதானி ஸதம்பி வஸ்ஸஸஹஸ்ஸானி ஏகந்தஸுக²ப்படிஸங்வேதீ³ விஹரெய்ய, ஸோ ச க்²வஸ்ஸ ஸகதா³கா³மீ வா அனாகா³மீ வா அபண்ணகங் வா ஸோதாபன்னோ. தேஸங் வோ, ஸக்கா, அலாபா⁴ தேஸங் து³ல்லத்³த⁴ங், யே தும்ஹே ஏவங் ஸோகஸப⁴யே ஜீவிதே மரணஸப⁴யே ஜீவிதே அப்பேகதா³ அட்ட²ங்க³ஸமன்னாக³தங் உபோஸத²ங் உபவஸத², அப்பேகதா³ ந உபவஸதா²’’தி. ‘‘ஏதே மயங், ப⁴ந்தே, அஜ்ஜதக்³கே³ அட்ட²ங்க³ஸமன்னாக³தங் உபோஸத²ங் உபவஸிஸ்ஸாமா’’தி. ச²ட்ட²ங்.
7. மஹாலிஸுத்தங்
47. ஏகங் ஸமயங் ப⁴க³வா வேஸாலியங் விஹரதி மஹாவனே கூடாகா³ரஸாலாயங். அத² கோ² மஹாலி லிச்ச²வி யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² மஹாலி லிச்ச²வி ப⁴க³வந்தங் ஏதத³வோச – ‘‘கோ நு கோ², ப⁴ந்தே ஹேது, கோ பச்சயோ பாபஸ்ஸ கம்மஸ்ஸ கிரியாய பாபஸ்ஸ கம்மஸ்ஸ பவத்தியா’’தி? ‘‘லோபோ⁴ கோ², மஹாலி, ஹேது, லோபோ⁴ பச்சயோ பாபஸ்ஸ கம்மஸ்ஸ கிரியாய பாபஸ்ஸ கம்மஸ்ஸ பவத்தியா. தோ³ஸோ கோ², மஹாலி, ஹேது, தோ³ஸோ பச்சயோ பாபஸ்ஸ கம்மஸ்ஸ கிரியாய பாபஸ்ஸ கம்மஸ்ஸ பவத்தியா. மோஹோ கோ², மஹாலி, ஹேது, மோஹோ பச்சயோ பாபஸ்ஸ கம்மஸ்ஸ கிரியாய பாபஸ்ஸ கம்மஸ்ஸ பவத்தியா. அயோனிஸோ மனஸிகாரோ கோ², மஹாலி, ஹேது, அயோனிஸோ மனஸிகாரோ பச்சயோ பாபஸ்ஸ கம்மஸ்ஸ கிரியாய பாபஸ்ஸ கம்மஸ்ஸ பவத்தியா. மிச்சா²பணிஹிதங் கோ², மஹாலி, சித்தங் ஹேது, மிச்சா²பணிஹிதங் சித்தங் பச்சயோ பாபஸ்ஸ கம்மஸ்ஸ கிரியாய பாபஸ்ஸ கம்மஸ்ஸ பவத்தியாதி. அயங் கோ², மஹாலி, ஹேது, அயங் பச்சயோ பாபஸ்ஸ கம்மஸ்ஸ கிரியாய பாபஸ்ஸ கம்மஸ்ஸ பவத்தியா’’தி.
‘‘கோ பன, ப⁴ந்தே, ஹேது கோ பச்சயோ கல்யாணஸ்ஸ கம்மஸ்ஸ கிரியாய கல்யாணஸ்ஸ கம்மஸ்ஸ பவத்தியா’’தி? ‘‘அலோபோ⁴ கோ², மஹாலி, ஹேது, அலோபோ⁴ பச்சயோ கல்யாணஸ்ஸ கம்மஸ்ஸ கிரியாய கல்யாணஸ்ஸ கம்மஸ்ஸ பவத்தியா. அதோ³ஸோ கோ², மஹாலி, ஹேது, அதோ³ஸோ பச்சயோ கல்யாணஸ்ஸ கம்மஸ்ஸ கிரியாய கல்யாணஸ்ஸ கம்மஸ்ஸ பவத்தியா. அமோஹோ கோ², மஹாலி, ஹேது, அமோஹோ பச்சயோ கல்யாணஸ்ஸ கம்மஸ்ஸ கிரியாய கல்யாணஸ்ஸ கம்மஸ்ஸ பவத்தியா. யோனிஸோ மனஸிகாரோ கோ², மஹாலி, ஹேது, யோனிஸோ மனஸிகாரோ பச்சயோ கல்யாணஸ்ஸ கம்மஸ்ஸ கிரியாய கல்யாணஸ்ஸ கம்மஸ்ஸ பவத்தியா. ஸம்மாபணிஹிதங் கோ², மஹாலி, சித்தங் ஹேது, ஸம்மாபணிஹிதங் சித்தங் பச்சயோ கல்யாணஸ்ஸ கம்மஸ்ஸ கிரியாய கல்யாணஸ்ஸ கம்மஸ்ஸ பவத்தியா. அயங் கோ², மஹாலி, ஹேது, அயங் பச்சயோ கல்யாணஸ்ஸ கம்மஸ்ஸ கிரியாய கல்யாணஸ்ஸ கம்மஸ்ஸ பவத்தியா. இமே ச, மஹாலி, த³ஸ த⁴ம்மா லோகே ந ஸங்விஜ்ஜெய்யுங், நயித⁴ பஞ்ஞாயேத² அத⁴ம்மசரியாவிஸமசரியாதி வா த⁴ம்மசரியாஸமசரியாதி வா. யஸ்மா ச கோ², மஹாலி, இமே த³ஸ த⁴ம்மா லோகே ஸங்விஜ்ஜந்தி, தஸ்மா பஞ்ஞாயதி அத⁴ம்மசரியாவிஸமசரியாதி வா த⁴ம்மசரியாஸமசரியாதி வா’’தி. ஸத்தமங்.
8. பப்³ப³ஜிதஅபி⁴ண்ஹஸுத்தங்
48. ‘‘த³ஸயிமே, பி⁴க்க²வே, த⁴ம்மா பப்³ப³ஜிதேன அபி⁴ண்ஹங் பச்சவெக்கி²தப்³பா³ . கதமே த³ஸ? ‘வேவண்ணியம்ஹி அஜ்ஜு²பக³தோ’தி பப்³ப³ஜிதேன அபி⁴ண்ஹங் பச்சவெக்கி²தப்³ப³ங்; ‘பரபடிப³த்³தா⁴ மே ஜீவிகா’தி பப்³ப³ஜிதேன அபி⁴ண்ஹங் பச்சவெக்கி²தப்³ப³ங்; ‘அஞ்ஞோ மே ஆகப்போ கரணீயோ’தி பப்³ப³ஜிதேன அபி⁴ண்ஹங் பச்சவெக்கி²தப்³ப³ங்; ‘கச்சி நு கோ² மே அத்தா ஸீலதோ ந உபவத³தீ’தி பப்³ப³ஜிதேன அபி⁴ண்ஹங் பச்சவெக்கி²தப்³ப³ங்; ‘கச்சி நு கோ² மங் அனுவிச்ச விஞ்ஞூ ஸப்³ரஹ்மசாரீ ஸீலதோ ந உபவத³ந்தீ’தி பப்³ப³ஜிதேன அபி⁴ண்ஹங் பச்சவெக்கி²தப்³ப³ங்; ‘ஸப்³பே³ஹி மே பியேஹி மனாபேஹி நானாபா⁴வோ வினாபா⁴வோ’தி பப்³ப³ஜிதேன அபி⁴ண்ஹங் பச்சவெக்கி²தப்³ப³ங்; ‘கம்மஸ்ஸகொம்ஹி கம்மதா³யாதோ³ கம்மயோனி கம்மப³ந்து⁴ கம்மபடிஸரணோ, யங் கம்மங் கரிஸ்ஸாமி கல்யாணங் வா பாபகங் வா தஸ்ஸ தா³யாதோ³ ப⁴விஸ்ஸாமீ’தி பப்³ப³ஜிதேன அபி⁴ண்ஹங் பச்சவெக்கி²தப்³ப³ங்; ‘கத²ங்பூ⁴தஸ்ஸ மே ரத்திந்தி³வா வீதிவத்தந்தீ’தி பப்³ப³ஜிதேன அபி⁴ண்ஹங் பச்சவெக்கி²தப்³ப³ங்; ‘கச்சி நு கோ² அஹங் ஸுஞ்ஞாகா³ரே அபி⁴ரமாமீ’தி பப்³ப³ஜிதேன அபி⁴ண்ஹங் பச்சவெக்கி²தப்³ப³ங்; ‘அத்தி² நு கோ² மே உத்தரி மனுஸ்ஸத⁴ம்மோ அலமரியஞாணத³ஸ்ஸனவிஸேஸோ அதி⁴க³தோ, யேனாஹங் யோஹங் (ஸீ॰ பீ॰ க॰), ஸோஹங் (ஸ்யா॰) பச்சி²மே காலே ஸப்³ரஹ்மசாரீஹி புட்டோ² ந மங்கு ப⁴விஸ்ஸாமீ’தி பப்³ப³ஜிதேன அபி⁴ண்ஹங் பச்சவெக்கி²தப்³ப³ங். இமே கோ², பி⁴க்க²வே, த³ஸ த⁴ம்மா பப்³ப³ஜிதேன அபி⁴ண்ஹங் பச்சவெக்கி²தப்³பா³’’தி. அட்ட²மங்.
9. ஸரீரட்ட²த⁴ம்மஸுத்தங்
49. ‘‘த³ஸயிமே, பி⁴க்க²வே, த⁴ம்மா ஸரீரட்டா². கதமே த³ஸ? ஸீதங், உண்ஹங், ஜிக⁴ச்சா², பிபாஸா, உச்சாரோ, பஸ்ஸாவோ, காயஸங்வரோ, வசீஸங்வரோ, ஆஜீவஸங்வரோ, போனோப⁴விகோ போனொப்³ப⁴விகோ (க॰) ப⁴வஸங்கா²ரோ – இமே கோ², பி⁴க்க²வே, த³ஸ த⁴ம்மா ஸரீரட்டா²’’தி. நவமங்.
10. ப⁴ண்ட³னஸுத்தங்
50. ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஸம்ப³ஹுலா பி⁴க்கூ² பச்சா²ப⁴த்தங் பிண்ட³பாதபடிக்கந்தா உபட்டா²னஸாலாயங் ஸன்னிஸின்னா ஸன்னிபதிதா ப⁴ண்ட³னஜாதா கலஹஜாதா விவாதா³பன்னா அஞ்ஞமஞ்ஞங் முக²ஸத்தீஹி விதுத³ந்தா விஹரந்தி.
அத² கோ² ப⁴க³வா ஸாயன்ஹஸமயங் படிஸல்லானா வுட்டி²தோ யேன உபட்டா²னஸாலா தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³. நிஸஜ்ஜ கோ² ப⁴க³வா பி⁴க்கூ² ஆமந்தேஸி – ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா ஸன்னிபதிதா, கா ச பன வோ அந்தராகதா² விப்பகதா’’தி?
‘‘இத⁴ மயங், ப⁴ந்தே, பச்சா²ப⁴த்தங் பிண்ட³பாதபடிக்கந்தா உபட்டா²னஸாலாயங் ஸன்னிஸின்னா ஸன்னிபதிதா ப⁴ண்ட³னஜாதா கலஹஜாதா விவாதா³பன்னா அஞ்ஞமஞ்ஞங் முக²ஸத்தீஹி விதுத³ந்தா விஹராமா’’தி. ‘‘ந கோ² பனேதங், பி⁴க்க²வே, தும்ஹாகங் பதிரூபங் குலபுத்தானங் ஸத்³தா⁴ய அகா³ரஸ்மா அனகா³ரியங் பப்³ப³ஜிதானங், யங் தும்ஹே ப⁴ண்ட³னஜாதா கலஹஜாதா விவாதா³பன்னா அஞ்ஞமஞ்ஞங் முக²ஸத்தீஹி விதுத³ந்தா விஹரெய்யாத².
‘‘த³ஸயிமே, பி⁴க்க²வே, த⁴ம்மா ஸாரணீயா பியகரணா க³ருகரணா பியகராணா க³ருகராணா (?) ஸங்க³ஹாய அவிவாதா³ய ஸாமக்³கி³யா ஏகீபா⁴வாய ஸங்வத்தந்தி. கதமே த³ஸ? இத⁴, பி⁴க்க²வே, பி⁴க்கு² ஸீலவா ஹோதி, பாதிமொக்க²ஸங்வரஸங்வுதோ விஹரதி ஆசாரகோ³சரஸம்பன்னோ அணுமத்தேஸு வஜ்ஜேஸு ப⁴யத³ஸ்ஸாவீ, ஸமாதா³ய ஸிக்க²தி ஸிக்கா²பதே³ஸு. யம்பி, பி⁴க்க²வே, பி⁴க்கு² ஸீலவா ஹோதி…பே॰… ஸமாதா³ய ஸிக்க²தி ஸிக்கா²பதே³ஸு, அயம்பி த⁴ம்மோ ஸாரணீயோ பியகரணோ க³ருகரணோ ஸங்க³ஹாய அவிவாதா³ய ஸாமக்³கி³யா ஏகீபா⁴வாய ஸங்வத்ததி.
‘‘புன சபரங், பி⁴க்க²வே, பி⁴க்கு² ப³ஹுஸ்ஸுதோ ஹோதி ஸுதத⁴ரோ ஸுதஸன்னிசயோ, யே தே த⁴ம்மா ஆதி³கல்யாணா மஜ்ஜே²கல்யாணா பரியோஸானகல்யாணா ஸாத்த²ங் ஸப்³யஞ்ஜனங் கேவலபரிபுண்ணங் பரிஸுத்³த⁴ங் ப்³ரஹ்மசரியங் அபி⁴வத³ந்தி, ததா²ரூபாஸ்ஸ த⁴ம்மா ப³ஹுஸ்ஸுதா ஹொந்தி தா⁴தா வசஸா பரிசிதா மனஸானுபெக்கி²தா தி³ட்டி²யா ஸுப்படிவித்³தா⁴. யம்பி, பி⁴க்க²வே, பி⁴க்கு² ப³ஹுஸ்ஸுதோ ஹோதி…பே॰… தி³ட்டி²யா ஸுப்படிவித்³தா⁴, அயம்பி த⁴ம்மோ ஸாரணீயோ பியகரணோ க³ருகரணோ ஸங்க³ஹாய அவிவாதா³ய ஸாமக்³கி³யா ஏகீபா⁴வாய ஸங்வத்ததி.
‘‘புன சபரங், பி⁴க்க²வே, பி⁴க்கு² கல்யாணமித்தோ ஹோதி கல்யாணஸஹாயோ கல்யாணஸம்பவங்கோ. யம்பி, பி⁴க்க²வே, பி⁴க்கு² கல்யாணமித்தோ ஹோதி கல்யாணஸஹாயோ கல்யாணஸம்பவங்கோ, அயம்பி த⁴ம்மோ ஸாரணீயோ பியகரணோ க³ருகரணோ ஸங்க³ஹாய அவிவாதா³ய ஸாமக்³கி³யா ஏகீபா⁴வாய ஸங்வத்ததி.
‘‘புன சபரங், பி⁴க்க²வே, பி⁴க்கு² ஸுவசோ ஹோதி ஸோவசஸ்ஸகரணேஹி த⁴ம்மேஹி ஸமன்னாக³தோ க²மோ பத³க்கி²ணக்³கா³ஹீ அனுஸாஸனிங். யம்பி, பி⁴க்க²வே, பி⁴க்கு² ஸுவசோ ஹோதி ஸோவசஸ்ஸகரணேஹி த⁴ம்மேஹி ஸமன்னாக³தோ க²மோ பத³க்கி²ணக்³கா³ஹீ அனுஸாஸனிங், அயம்பி த⁴ம்மோ ஸாரணீயோ பியகரணோ க³ருகரணோ ஸங்க³ஹாய அவிவாதா³ய ஸாமக்³கி³யா ஏகீபா⁴வாய ஸங்வத்ததி.
‘‘புன சபரங், பி⁴க்க²வே, பி⁴க்கு² யானி தானி ஸப்³ரஹ்மசாரீனங் உச்சாவசானி கிங்கரணீயானி – தத்த² த³க்கோ² ஹோதி அனலஸோ, தத்ரூபாயாய வீமங்ஸாய ஸமன்னாக³தோ அலங் காதுங் அலங் ஸங்விதா⁴துங். யம்பி, பி⁴க்க²வே, பி⁴க்கு² யானி தானி ஸப்³ரஹ்மசாரீனங் உச்சாவசானி கிங்கரணீயானி – தத்த² த³க்கோ² ஹோதி அனலஸோ தத்ரூபாயாய வீமங்ஸாய ஸமன்னாக³தோ அலங் காதுங் அலங் ஸங்விதா⁴துங், அயம்பி த⁴ம்மோ பியகரணோ க³ருகரணோ ஸங்க³ஹாய அவிவாதா³ய ஸாமக்³கி³யா ஏகீபா⁴வாய ஸங்வத்ததி.
‘‘புன சபரங், பி⁴க்க²வே, பி⁴க்கு² த⁴ம்மகாமோ ஹோதி பியஸமுதா³ஹாரோ, அபி⁴த⁴ம்மே அபி⁴வினயே உளாரபாமோஜ்ஜோ. யம்பி, பி⁴க்க²வே, பி⁴க்கு² த⁴ம்மகாமோ ஹோதி பியஸமுதா³ஹாரோ, அபி⁴த⁴ம்மே அபி⁴வினயே உளாரபாமோஜ்ஜோ, அயம்பி த⁴ம்மோ ஸாரணீயோ பியகரணோ க³ருகரணோ ஸங்க³ஹாய அவிவாதா³ய ஸாமக்³கி³யா ஏகீபா⁴வாய ஸங்வத்ததி.
‘‘புன சபரங், பி⁴க்க²வே, பி⁴க்கு² ஆரத்³த⁴வீரியோ விஹரதி அகுஸலானங் த⁴ம்மானங் பஹானாய குஸலானங் த⁴ம்மானங் உபஸம்பதா³ய, தா²மவா த³ள்ஹபரக்கமோ அனிக்கி²த்தது⁴ரோ குஸலேஸு த⁴ம்மேஸு. யம்பி, பி⁴க்க²வே, பி⁴க்கு² ஆரத்³த⁴வீரியோ விஹரதி அகுஸலானங் த⁴ம்மானங் பஹானாய குஸலானங் த⁴ம்மானங் உபஸம்பதா³ய, தா²மவா த³ள்ஹபரக்கமோ அனிக்கி²த்தது⁴ரோ குஸலேஸு த⁴ம்மேஸு, அயம்பி த⁴ம்மோ ஸாரணீயோ பியகரணோ க³ருகரணோ ஸங்க³ஹாய அவிவாதா³ய ஸாமக்³கி³யா ஏகீபா⁴வாய ஸங்வத்ததி.
‘‘புன சபரங், பி⁴க்க²வே, பி⁴க்கு² ஸந்துட்டோ² ஹோதி இதரீதரசீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரேன. யம்பி, பி⁴க்க²வே, பி⁴க்கு² ஸந்துட்டோ² ஹோதி இதரீதரசீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரேன, அயம்பி த⁴ம்மோ ஸாரணீயோ…பே॰… ஸங்வத்ததி.
‘‘புன சபரங், பி⁴க்க²வே, பி⁴க்கு² ஸதிமா ஹோதி, பரமேன ஸதினேபக்கேன ஸமன்னாக³தோ, சிரகதம்பி சிரபா⁴ஸிதம்பி ஸரிதா அனுஸ்ஸரிதா. யம்பி , பி⁴க்க²வே, பி⁴க்கு² ஸதிமா ஹோதி, பரமேன ஸதினேபக்கேன ஸமன்னாக³தோ, சிரகதம்பி சிரபா⁴ஸிதம்பி ஸரிதா அனுஸ்ஸரிதா, அயம்பி த⁴ம்மோ ஸாரணீயோ…பே॰… ஸங்வத்ததி.
‘‘புன சபரங், பி⁴க்க²வே, பி⁴க்கு² பஞ்ஞவா ஹோதி, உத³யத்த²கா³மினியா பஞ்ஞாய ஸமன்னாக³தோ அரியாய நிப்³பே³தி⁴காய ஸம்மா து³க்க²க்க²யகா³மினியா. யம்பி, பி⁴க்க²வே, பி⁴க்கு² பஞ்ஞவா ஹோதி, உத³யத்த²கா³மினியா பஞ்ஞாய ஸமன்னாக³தோ அரியாய நிப்³பே³தி⁴காய ஸம்மா து³க்க²க்க²யகா³மினியா, அயம்பி த⁴ம்மோ ஸாரணீயோ…பே॰… ஸங்வத்ததி. இமே கோ², பி⁴க்க²வே, த³ஸ த⁴ம்மா ஸாரணீயா பியகரணா க³ருகரணா ஸங்க³ஹாய அவிவாதா³ய ஸாமக்³கி³யா ஏகீபா⁴வாய ஸங்வத்தந்தீ’’தி. த³ஸமங்.
அக்கோஸவக்³கோ³ பஞ்சமோ.
தஸ்ஸுத்³தா³னங் –
விவாதா³ த்³வே ச மூலானி, குஸினாரபவேஸனே;
ஸக்கோ மஹாலி அபி⁴ண்ஹங், ஸரீரட்டா² ச ப⁴ண்ட³னாதி.
பட²மபண்ணாஸகங் ஸமத்தங்.
2. து³தியபண்ணாஸகங்