8. ஸஹஸ்ஸவக்³கோ³
1. தம்ப³தா³டி²கசோரகா⁴தகவத்து²
ஸஹஸ்ஸமபி சே வாசாதி இமங் த⁴ம்மதே³ஸனங் ஸத்தா² வேளுவனே விஹரந்தோ தம்ப³தா³டி²கசோரகா⁴தகங் ஆரப்³ப⁴ கதே²ஸி.
ஏகூனபஞ்சஸதா கிர சோரா கா³மகா⁴தகாதீ³னி கரொந்தா ஜீவிகங் கப்பேஸுங். அதே²கோ புரிஸோ நிப்³பி³த்³த⁴பிங்க³லோ தம்ப³தா³டி²கோ தேஸங் ஸந்திகங் க³ந்த்வா ‘‘அஹம்பி தும்ஹேஹி ஸத்³தி⁴ங் ஜீவிஸ்ஸாமீ’’தி ஆஹ. அத² நங் சோரஜெட்ட²கஸ்ஸ த³ஸ்ஸெத்வா ‘‘அயம்பி அம்ஹாகங் ஸந்திகே வஸிதுங் இச்ச²தீ’’தி ஆஹங்ஸு. அத² நங் சோரஜெட்ட²கோ ஓலோகெத்வா ‘‘அயங் மாது த²னங் சி²ந்தி³த்வா பிது வா க³லலோஹிதங் நீஹரித்வா கா²த³னஸமத்தோ² அதிகக்க²ளோ’’தி சிந்தெத்வா ‘‘நத்தே²தஸ்ஸ அம்ஹாகங் ஸந்திகே வஸனகிச்ச’’ந்தி படிக்கி²பி. ஸோ ஏவங் படிக்கி²த்தோபி ஆக³ந்த்வா ஏகங் தஸ்ஸேவ அந்தேவாஸிகங் உபட்ட²ஹந்தோ ஆராதே⁴ஸி. ஸோ தங் ஆதா³ய சோரஜெட்ட²கங் உபஸங்கமித்வா, ‘‘ஸாமி, ப⁴த்³த³கோ ஏஸ, அம்ஹாகங் உபகாரகோ, ஸங்க³ண்ஹத² ந’’ந்தி யாசித்வா சோரஜெட்ட²கங் படிச்சா²பேஸி. அதே²கதி³வஸங் நாக³ரா ராஜபுரிஸேஹி ஸத்³தி⁴ங் ஏகதோ ஹுத்வா தே சோரே க³ஹெத்வா வினிச்ச²யமஹாமச்சானங் ஸந்திகங் நயிங்ஸு. அமச்சா தேஸங் ப²ரஸுனா ஸீஸச்சே²த³ங் ஆணாபேஸுங். ததோ ‘‘கோ நு கோ² இமே மாரெஸ்ஸதீ’’தி பரியேஸந்தா தே மாரேதுங் இச்ச²ந்தங் கஞ்சி அதி³ஸ்வா சோரஜெட்ட²கங் ஆஹங்ஸு – ‘‘த்வங் இமே மாரெத்வா ஜீவிதஞ்சேவ லபி⁴ஸ்ஸஸி ஸம்மானஞ்ச, மாரேஹி நே’’தி. ஸோபி அத்தானங் நிஸ்ஸாய வஸிதத்தா தே மாரேதுங் ந இச்சி². ஏதேனூபாயேன ஏகூனபஞ்சஸதே புச்சி²ங்ஸு, ஸப்³பே³பி ந இச்சி²ங்ஸு. ஸப்³ப³பச்சா² தங் நிப்³பி³த்³த⁴பிங்க³லங் தம்ப³தா³டி²கங் புச்சி²ங்ஸு. ஸோ ‘‘ஸாதூ⁴’’தி ஸம்படிச்சி²த்வா தே ஸப்³பே³பி மாரெத்வா ஜீவிதஞ்சேவ ஸம்மானஞ்ச லபி⁴. ஏதேனூபாயேன நக³ரஸ்ஸ த³க்கி²ணதோபி பஞ்ச சோரஸதானி ஆனெத்வா அமச்சானங் த³ஸ்ஸெத்வா தேஹி தேஸம்பி ஸீஸச்சே²தே³ ஆணத்தே சோரஜெட்ட²கங் ஆதி³ங் கத்வா புச்ச²ந்தா கஞ்சி மாரேதுங் இச்ச²ந்தங் அதி³ஸ்வா ‘‘புரிமதி³வஸே ஏகோ புரிஸோ பஞ்சஸதே சோரே மாரேஸி, கஹங் நு கோ² ஸோ’’தி. ‘‘அஸுகட்டா²னே அம்ஹேதி தி³ட்டோ²’’தி வுத்தே தங் பக்கோஸாபெத்வா ‘‘இமே மாரேஹி, ஸம்மானங் லச்ச²ஸீ’’தி ஆணாபேஸுங். ஸோ ‘‘ஸாதூ⁴’’தி ஸம்படிச்சி²த்வா தே ஸப்³பே³பி மாரெத்வா ஸம்மானங் லபி⁴. அத² நங் ‘‘ப⁴த்³த³கோ அயங் புரிஸோ, நிப³த்³த⁴ங் சோரகா⁴தகமேவ ஏதங் கரிஸ்ஸாமா’’தி மந்தெத்வா தஸ்ஸ தங் டா²னந்தரங் த³த்வாவ ஸம்மானங் கரிங்ஸு. ஸோ பச்சி²மதி³ஸதோபி உத்தரதி³ஸதோபி ஆனீதே பஞ்சஸதே பஞ்சஸதே சோரே கா⁴தேஸியேவ. ஏவங் சதூஹி தி³ஸாஹி ஆனீதானி த்³வே ஸஹஸ்ஸானி மாரெத்வா ததோ பட்டா²ய தே³வஸிகங் ஏகங் த்³வேதி ஆனீதே தே மனுஸ்ஸே மாரெத்வா பஞ்சபண்ணாஸ ஸங்வச்ச²ரானி சோரகா⁴தககம்மங் அகாஸி.
ஸோ மஹல்லககாலே ஏகப்பஹாரேனேவ ஸீஸங் சி²ந்தி³துங் ந ஸக்கோதி, த்³வே தயோ வாரே பஹரந்தோ மனுஸ்ஸே கிலமேதி. நாக³ரா சிந்தயிங்ஸு – ‘‘அஞ்ஞோபி சோரகா⁴தகோ உப்பஜ்ஜிஸ்ஸதி, அயங் அதிவிய மனுஸ்ஸே கிலமேதி, கிங் இமினா’’தி தஸ்ஸ தங் டா²னந்தரங் ஹரிங்ஸு. ஸோ புப்³பே³ சோரகா⁴தககம்மங் கரொந்தோ ‘‘அஹதஸாடகே நிவாஸேதுங், நவஸப்பினா ஸங்க²தங் கீ²ரயாகு³ங் பிவிதுங், ஸுமனபுப்பா²னி பிலந்தி⁴துங், க³ந்தே⁴ விலிம்பிது’’ந்தி இமானி சத்தாரி ந லபி⁴. ஸோ டா²னா சாவிததி³வஸே ‘‘கீ²ரயாகு³ங் மே பசதா²’’தி வத்வா அஹதவத்த²ஸுமனமாலாவிலேபனானி கா³ஹாபெத்வா நதி³ங் க³ந்த்வா ந்ஹத்வா அஹதவத்தா²னி நிவாஸெத்வா மாலா பிலந்தி⁴த்வா க³ந்தே⁴ஹி அனுலித்தக³த்தோ கே³ஹங் ஆக³ந்த்வா நிஸீதி³. அத²ஸ்ஸ நவஸப்பினா ஸங்க²தங் கீ²ரயாகு³ங் புரதோ ட²பெத்வா ஹத்த²தோ⁴வனோத³கங் ஆஹரிங்ஸு. தஸ்மிங் க²ணே ஸாரிபுத்தத்தே²ரோ ஸமாபத்திதோ வுட்டா²ய ‘‘கத்த² நு கோ² அஜ்ஜ மயா க³ந்தப்³ப³’’ந்தி அத்தனோ பி⁴க்கா²சாரங் ஓலோகெந்தோ தஸ்ஸ கே³ஹே கீ²ரயாகு³ங் தி³ஸ்வா ‘‘கரிஸ்ஸதி நு கோ² மே புரிஸோ ஸங்க³ஹ’’ந்தி உபதா⁴ரெந்தோ ‘‘மங் தி³ஸ்வா மம ஸங்க³ஹங் கரிஸ்ஸதி, கரித்வா ச பன மஹாஸம்பத்திங் லபி⁴ஸ்ஸதி அயங் குலபுத்தோ’’தி ஞத்வா சீவரங் பாருபித்வா பத்தங் ஆதா³ய தஸ்ஸ கே³ஹத்³வாரே டி²தமேவ அத்தானங் த³ஸ்ஸேஸி.
ஸோ தே²ரங் தி³ஸ்வா பஸன்னசித்தோ சிந்தேஸி – ‘‘மயா சிரங் சோரகா⁴தககம்மங் கதங், ப³ஹூ மனுஸ்ஸா மாரிதா, இதா³னி மே கே³ஹே கீ²ரயாகு³ படியத்தா, தே²ரோ ஆக³ந்த்வா மம கே³ஹத்³வாரே டி²தோ, இதா³னி மயா அய்யஸ்ஸ தெ³ய்யத⁴ம்மங் தா³துங் வட்டதீ’’தி புரதோ ட²பிதயாகு³ங் அபனெத்வா தே²ரங் உபஸங்கமித்வா வந்தி³த்வா அந்தோகே³ஹே நிஸீதா³பெத்வா பத்தே கீ²ரயாகு³ங் ஆகிரித்வா நவஸப்பிங் ஆஸிஞ்சித்வா தே²ரங் பீ³ஜமானோ அட்டா²ஸி. அத²ஸ்ஸ ச தீ³க⁴ரத்தங் அலத்³த⁴புப்³ப³தாய கீ²ரயாகு³ங் பாதுங் ப³லவஅஜ்ஜா²ஸயோ அஹோஸி. தே²ரோ தஸ்ஸ அஜ்ஜா²ஸயங் ஞத்வா ‘‘த்வங், உபாஸக, அத்தனோ யாகு³ங் பிவா’’தி ஆஹ. ஸோ அஞ்ஞஸ்ஸ ஹத்தே² பீ³ஜனிங் த³த்வா யாகு³ங் பிவி. தே²ரோ பீ³ஜமானங் புரிஸங் ‘‘க³ச்ச², உபாஸகமேவ பீ³ஜாஹீ’’தி ஆஹ. ஸோ பீ³ஜியமானோ குச்சி²பூரங் யாகு³ங் பிவித்வா ஆக³ந்த்வா தே²ரங் பீ³ஜமானோ ட²த்வா கதாஹாரகிச்சஸ்ஸ தே²ரஸ்ஸ பத்தங் அக்³க³ஹேஸி. தே²ரோ தஸ்ஸ அனுமோத³னங் ஆரபி⁴. ஸோ அத்தனோ சித்தங் தே²ரஸ்ஸ த⁴ம்மதே³ஸனானுக³ங் காதுங் நாஸக்கி². தே²ரோ ஸல்லக்கெ²த்வா, ‘‘உபாஸக, கஸ்மா சித்தங் தே³ஸனானுக³ங் காதுங் ந ஸக்கோஸீ’’தி புச்சி². ‘‘ப⁴ந்தே, மயா தீ³க⁴ரத்தங் கக்க²ளகம்மங் கதங், ப³ஹூ மனுஸ்ஸா மாரிதா, தமஹங் அத்தனோ கம்மங் அனுஸ்ஸரந்தோ சித்தங் அய்யஸ்ஸ தே³ஸனானுக³ங் காதுங் நாஸக்கி²’’ந்தி. தே²ரோ ‘‘வஞ்செஸ்ஸாமி ந’’ந்தி சிந்தெத்வா ‘‘கிங் பன த்வங் அத்தனோ ருசியா அகாஸி, அஞ்ஞேஹி காரிதோஸீ’’தி? ‘‘ராஜா மங் காரேஸி, ப⁴ந்தே’’தி. ‘‘கிங் நு கோ² தே, உபாஸக, ஏவங் ஸந்தே அகுஸலங் ஹோதீ’’தி? மந்த³தா⁴துகோ உபாஸகோ தே²ரேனேவங் வுத்தே ‘‘நத்தி² மய்ஹங் அகுஸல’’ந்தி ஸஞ்ஞீ ஹுத்வா தேன ஹி, ‘‘ப⁴ந்தே, த⁴ம்மங் கதே²தா²’’தி. ஸோ தே²ரே அனுமோத³னங் கரொந்தே ஏகக்³க³சித்தோ ஹுத்வா த⁴ம்மங் ஸுணந்தோ ஸோதாபத்திமக்³க³ஸ்ஸ ஓரதோ அனுலோமிகங் க²ந்திங் நிப்³ப³த்தேஸி. தே²ரோபி அனுமோத³னங் கத்வா பக்காமி.
உபாஸகங் தே²ரங் அனுக³ந்த்வா நிவத்தமானங் ஏகா யக்கி²னீ தே⁴னுவேஸேன ஆக³ந்த்வா உரே பஹரித்வா மாரேஸி. ஸோ காலங் கத்வா துஸிதபுரே நிப்³ப³த்தி. பி⁴க்கூ² த⁴ம்மஸபா⁴யங் கத²ங் ஸமுட்டா²பேஸுங் ‘‘சோரகா⁴தகோ பஞ்சபண்ணாஸ வஸ்ஸானி கக்க²ளகம்மங் கத்வா அஜ்ஜேவ ததோ முத்தோ, அஜ்ஜேவ தே²ரஸ்ஸ பி⁴க்க²ங் த³த்வா அஜ்ஜேவ காலங் கதோ, கஹங் நு கோ² நிப்³ப³த்தோ’’தி. ஸத்தா² ஆக³ந்த்வா ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா’’தி புச்சி²த்வா ‘‘இமாய நாமா’’தி வுத்தே , ‘‘பி⁴க்க²வே, துஸிதபுரே நிப்³ப³த்தோ’’தி ஆஹ. ‘‘கிங், ப⁴ந்தே, வதே³த², எத்தகங் காலங் எத்தகே மனுஸ்ஸே கா⁴தெத்வா துஸிதவிமானே நிப்³ப³த்தோ’’தி. ‘‘ஆம, பி⁴க்க²வே, மஹந்தோ தேன கல்யாணமித்தோ லத்³தோ⁴, ஸோ ஸாரிபுத்தஸ்ஸ த⁴ம்மதே³ஸனங் ஸுத்வா அனுலோமஞாணங் நிப்³ப³த்தெத்வா இதோ சுதோ துஸிதவிமானே நிப்³ப³த்தோ’’தி வத்வா இமங் கா³த²மாஹ –
‘‘ஸுபா⁴ஸிதங் ஸுணித்வான, நக³ரே சோரகா⁴தகோ;
அனுலோமக²ந்திங் லத்³தா⁴ன, மோத³தீ திதி³வங் க³தோ’’தி.
‘‘ப⁴ந்தே , அனுமோத³னகதா² நாம ந ப³லவா, தேன கதங் அகுஸலகம்மங் மஹந்தங், கத²ங் எத்தகேன விஸேஸங் நிப்³ப³த்தேஸீ’’தி. ஸத்தா² ‘‘கிங், பி⁴க்க²வே, ‘மயா தே³ஸிதத⁴ம்மஸ்ஸ அப்பங் வா ப³ஹுங் வா’தி மா பமாணங் க³ண்ஹத². ஏகவாசாபி ஹி அத்த²னிஸ்ஸிதா ஸெய்யாவா’’தி வத்வா அனுஸந்தி⁴ங் க⁴டெத்வா த⁴ம்மங் தே³ஸெந்தோ இமங் கா³த²மாஹ –
100.
‘‘ஸஹஸ்ஸமபி சே வாசா, அனத்த²பத³ஸங்ஹிதா;
ஏகங் அத்த²பத³ங் ஸெய்யோ, யங் ஸுத்வா உபஸம்மதீ’’தி.
தத்த² ஸஹஸ்ஸமபீதி பரிச்சே²த³வசனங், ஏகங் ஸஹஸ்ஸங் த்³வே ஸஹஸ்ஸானீதி ஏவங் ஸஹஸ்ஸேன சேபி பரிச்சி²ன்னவாசா ஹொந்தி, தா ச பன அனத்த²பத³ஸங்ஹிதா ஆகாஸவண்ணனாபப்³ப³தவண்ணனாவனவண்ணனாதீ³னி பகாஸகேஹி அனிய்யானதீ³பகேஹி அனத்த²கேஹி பதே³ஹி ஸங்ஹிதா யாவ ப³ஹுகா ஹோதி, தாவ பாபிகா ஏவாதி அத்தோ². ஏகங் அத்த²பத³ந்தி யங் பன ‘‘அயங் காயோ, அயங் காயக³தாஸதி, திஸ்ஸோ விஜ்ஜா அனுப்பத்தோ, கதங் பு³த்³த⁴ஸ்ஸ ஸாஸன’’ந்தி ஏவரூபங் ஏகங் அத்த²பத³ங் ஸுத்வா ராகா³தி³வூபஸமேன உபஸம்மதி, தங் அத்த²ஸாத⁴கங் நிப்³பா³னப்படிஸங்யுத்தங் க²ந்த⁴தா⁴துஆயதனஇந்த்³ரியப³லபொ³ஜ்ஜ²ங்க³ஸதிபட்டா²னபரிதீ³பகங் ஏகம்பி பத³ங் ஸெய்யோயேவாதி அத்தோ².
தே³ஸனாவஸானே ப³ஹூ ஸோதாபத்திப²லாதீ³னி பாபுணிங்ஸூதி.
தம்ப³தா³டி²கசோரகா⁴தகவத்து² பட²மங்.
2. பா³ஹியதா³ருசீரியத்தே²ரவத்து²
ஸஹஸ்ஸமபி சே கா³தா²தி இமங் த⁴ம்மதே³ஸனங் ஸத்தா² ஜேதவனே விஹரந்தோ தா³ருசீரியத்தே²ரங் ஆரப்³ப⁴ கதே²ஸி.
ஏகஸ்மிஞ்ஹி காலே ப³ஹூ மனுஸ்ஸா நாவாய மஹாஸமுத்³த³ங் பக்க²ந்தி³த்வா அந்தோமஹாஸமுத்³தே³ பி⁴ன்னாய நாவாய மச்ச²கச்ச²பப⁴க்கா² அஹேஸுங். ஏகோவெத்த² ஏகங் ப²லகங் க³ஹெத்வா வாயமந்தோ ஸுப்பாரகபட்டனதீரங் ஓக்கமி, தஸ்ஸ நிவாஸனபாருபனங் நத்தி². ஸோ அஞ்ஞங் கிஞ்சி அபஸ்ஸந்தோ ஸுக்க²கட்ட²த³ண்ட³கே வாகேஹி பலிவேடெ²த்வா நிவாஸனபாருபனங் கத்வா தே³வகுலதோ கபாலங் க³ஹெத்வா ஸுப்பாரகபட்டனங் அக³மாஸி, மனுஸ்ஸா தங் தி³ஸ்வா யாகு³ப⁴த்தாதீ³னி த³த்வா ‘‘அயங் ஏகோ அரஹா’’தி ஸம்பா⁴வேஸுங். ஸோ வத்தே²ஸு உபனீதேஸு ‘‘ஸசாஹங் நிவாஸெஸ்ஸாமி வா பாருபிஸ்ஸாமி வா, லாப⁴ஸக்காரோ மே பரிஹாயிஸ்ஸதீ’’தி தானி வத்தா²னி படிக்கி²பித்வா தா³ருசீரானேவ பரித³ஹி. அத²ஸ்ஸ ப³ஹூஹி ‘‘அரஹா அரஹா’’தி வுச்சமானஸ்ஸ ஏவங் சேதஸோ பரிவிதக்கோ உத³பாதி³ ‘‘யே கோ² கேசி லோகே அரஹந்தோ வா அரஹத்தமக்³க³ங் வா ஸமாபன்னா, அஹங் தேஸங் அஞ்ஞதரோ’’தி. அத²ஸ்ஸ புராணஸாலோஹிதா தே³வதா ஏவங் சிந்தேஸி.
புராணஸாலோஹிதாதி புப்³பே³ ஏகதோ கதஸமணத⁴ம்மா. புப்³பே³ கிர கஸ்ஸபத³ஸப³லஸ்ஸ ஸாஸனே ஓஸக்கமானே ஸாமணேராதீ³னங் விப்பகாரங் தி³ஸ்வா ஸத்த பி⁴க்கூ² ஸங்வேக³ப்பத்தா ‘‘யாவ ஸாஸனஸ்ஸ அந்தரதா⁴னங் ந ஹோதி, தாவ அத்தனோ பதிட்ட²ங் கரிஸ்ஸாமா’’தி ஸுவண்ணசேதியங் வந்தி³த்வா அரஞ்ஞங் பவிட்டா² ஏகங் பப்³ப³தங் தி³ஸ்வா ‘‘ஜீவிதே ஸாலயா நிவத்தந்து. நிராலயா இமங் பப்³ப³தங் அபி⁴ருஹந்தூ’’தி வத்வா நிஸ்ஸேணிங் ப³ந்தி⁴த்வா ஸப்³பே³பி தங் அபி⁴ருய்ஹ நிஸ்ஸேணிங் பாதெத்வா ஸமணத⁴ம்மங் கரிங்ஸு. தேஸு ஸங்க⁴த்தே²ரோ ஏகரத்தாதிக்கமேனேவ அரஹத்தங் பாபுணி. ஸோ அனோதத்தத³ஹே நாக³லதாத³ந்தகட்ட²ங் கா²தி³த்வா உத்தரகுருதோ பிண்ட³பாதங் ஆஹரித்வா தே பி⁴க்கூ² ஆஹ – ‘‘ஆவுஸோ, இமங் த³ந்தகட்ட²ங் கா²தி³த்வா முக²ங் தோ⁴வித்வா இமங் பிண்ட³பாதங் பரிபு⁴ஞ்ஜதா²’’தி. கிங் பன, ப⁴ந்தே, அம்ஹேஹி ஏவங் கதிகா கதா ‘‘யோ பட²மங் அரஹத்தங் பாபுணாதி, தேனாப⁴தங் பிண்ட³பாதங் அவஸேஸா பரிபு⁴ஞ்ஜிஸ்ஸந்தீ’’தி? ‘‘நோ ஹேதங், ஆவுஸோ’’தி. ‘‘தேன ஹி ஸசே மயம்பி தும்ஹே விய விஸேஸங் நிப்³ப³த்தெஸ்ஸாம, ஸயங் ஆஹரித்வா பரிபு⁴ஞ்ஜிஸ்ஸாமா’’தி ந இச்சி²ங்ஸு. து³தியதி³வஸே து³தியத்தே²ரோ அனாகா³மிப²லங் பாபுணி. ஸோபி ததே²வ பிண்ட³பாதங் ஆஹரித்வா இதரே நிமந்தேஸி. தே ஏவமாஹங்ஸு – ‘‘கிங் பன, ப⁴ந்தே, அம்ஹேஹி ஏவங் கதிகா கதா ‘மஹாதே²ரேன ஆப⁴தங் பிண்ட³பாதங் அபு⁴ஞ்ஜித்வா அனுதே²ரேன ஆப⁴தங் பு⁴ஞ்ஜிஸ்ஸாமா’’’தி? ‘‘நோ ஹேதங், ஆவுஸோ’’தி. ‘‘ஏவங் ஸந்தே தும்ஹே விய மயம்பி விஸேஸங் நிப்³ப³த்தெத்வா அத்தனோ புரிஸகாரேன பு⁴ஞ்ஜிதுங் ஸக்கொந்தா பு⁴ஞ்ஜிஸ்ஸாமா’’தி ந இச்சி²ங்ஸு. தேஸு அரஹத்தங் பத்தோ பி⁴க்கு² பரினிப்³பா³யி, அனாகா³மீ ப்³ரஹ்மலோகே நிப்³ப³த்தி. இதரே பஞ்ச தே²ரா விஸேஸங் நிப்³ப³த்தேதுங் அஸக்கொந்தா ஸுஸ்ஸித்வா ஸத்தமே தி³வஸே காலங் கத்வா தே³வலோகே நிப்³ப³த்தித்வா இமஸ்மிங் பு³த்³து⁴ப்பாதே³ ததோ சவித்வா தத்த² தத்த² குலக⁴ரேஸு நிப்³ப³த்திங்ஸு. தேஸு ஏகோ புக்குஸாதி ராஜா (ம॰ நி॰ 3.342) அஹோஸி, ஏகோ குமாரகஸ்ஸபோ (ம॰ நி॰ 1.249), ஏகோ தா³ருசீரியோ (உதா³॰ 10), ஏகோ த³ப்³போ³ மல்லபுத்தோ (பாரா॰ 380; உதா³॰ 79) ஏகோ ஸபி⁴யோ பரிப்³பா³ஜகோதி (ஸு॰ நி॰ ஸபி⁴யஸுத்தங்). தத்த² யோ ப்³ரஹ்மலோகே நிப்³ப³த்தோ பி⁴க்கு² தங் ஸந்தா⁴யேதங் வுத்தங் ‘‘புராணஸாலோஹிதா தே³வதா’’தி.
தஸ்ஸ ஹி ப்³ரஹ்முனோ ஏதத³ஹோஸி – ‘‘அயங் மயா ஸத்³தி⁴ங் நிஸ்ஸேணிங் ப³ந்தி⁴த்வா பப்³ப³தங் அபி⁴ருஹித்வா ஸமணத⁴ம்மங் அகாஸி, இதா³னி இமங் லத்³தி⁴ங் க³ஹெத்வா விசரந்தோ வினஸ்ஸெய்ய, ஸங்வேஜெஸ்ஸாமி ந’’ந்தி. அத² நங் உபஸங்கமித்வா ஏவமாஹ – ‘‘நேவ கோ² த்வங், பா³ஹிய, அரஹா, நபி அரஹத்தமக்³க³ங் வா ஸமாபன்னோ, ஸாபி தே படிபதா³ நத்தி², யாய த்வங் அரஹா வா அஸ்ஸ அரஹத்தமக்³க³ங் வா ஸமாபன்னோ’’தி. பா³ஹியோ ஆகாஸே ட²த்வா கதெ²ந்தங் மஹாப்³ரஹ்மானங் ஓலோகெத்வா சிந்தேஸி – ‘‘அஹோ பா⁴ரியங் கம்மங் கதங், அஹங் ‘அரஹந்தொம்ஹீ’தி சிந்தேஸிங், அயஞ்ச மங் ‘ந த்வங் அரஹா, நபி அரஹத்தமக்³க³ங் வா ஸமாபன்னோஸீ’தி வத³தி, அத்தி² நு கோ² லோகே அஞ்ஞோ அரஹா’’தி. அத² நங் புச்சி² – ‘‘அத்தி² நு கோ² ஏதரஹி தே³வதே லோகே அரஹா வா அரஹத்தமக்³க³ங் வா ஸமாபன்னோ’’தி. அத²ஸ்ஸ தே³வதா ஆசிக்கி² – ‘‘அத்தி², பா³ஹிய, உத்தரேஸு ஜனபதே³ஸு ஸாவத்தி² நாம நக³ரங், தத்த² ஸோ ப⁴க³வா ஏதரஹி விஹரதி அரஹங் ஸம்மாஸம்பு³த்³தோ⁴. ஸோ ஹி, பா³ஹிய, ப⁴க³வா அரஹா சேவ அரஹத்தத்தா²ய ச த⁴ம்மங் தே³ஸேதீ’’தி.
பா³ஹியோ ரத்திபா⁴கே³ தே³வதாய கத²ங் ஸுத்வா ஸங்விக்³க³மானஸோ தங் க²ணங்யேவ ஸுப்பாரகா நிக்க²மித்வா ஏகரத்திவாஸேன ஸாவத்தி²ங் அக³மாஸி, ஸப்³ப³ங் வீஸயோஜனஸதிகங் மக்³க³ங் ஏகரத்திவாஸேனேவ அக³மாஸி. க³ச்ச²ந்தோ ச பன தே³வதானுபா⁴வேன க³தோ. ‘‘பு³த்³தா⁴னுபா⁴வேனா’’திபி வத³ந்தியேவ. தஸ்மிங் பன க²ணே ஸத்தா² ஸாவத்தி²ங் பிண்டா³ய பவிட்டோ² ஹோதி. ஸோ பு⁴த்தபாதராஸே காயஆலஸியவிமோசனத்த²ங் அப்³போ⁴காஸே சங்கமந்தே ஸம்ப³ஹுலே பி⁴க்கூ² ‘‘கஹங் ஏதரஹி ஸத்தா²’’தி புச்சி². பி⁴க்கூ² ‘‘ப⁴க³வா ஸாவத்தி²ங் பிண்டா³ய பவிட்டோ²’’தி வத்வா தங் புச்சி²ங்ஸு – ‘‘த்வங் பன குதோ ஆக³தோஸீ’’தி? ‘‘ஸுப்பாரகா ஆக³தொம்ஹீ’’தி. ‘‘கதா³ நிக்க²ந்தோஸீ’’தி? ‘‘ஹிய்யோ ஸாயங் நிக்க²ந்தொம்ஹீ’’தி. ‘‘தூ³ரதோஸி ஆக³தோ, நிஸீத³, தவ பாதே³ தோ⁴வித்வா தேலேன மக்கெ²த்வா தோ²கங் விஸ்ஸமாஹி, ஆக³தகாலே ஸத்தா²ரங் த³க்கி²ஸ்ஸஸீ’’தி. ‘‘அஹங், ப⁴ந்தே, ஸத்து² வா அத்தனோ வா ஜீவிதந்தராயங் ந ஜானாமி, ஏகரத்தேனேவம்ஹி கத்த²சி அட்ட²த்வா அனிஸீதி³த்வா வீஸயோஜனஸதிகங் மக்³க³ங் ஆக³தோ, ஸத்தா²ரங் பஸ்ஸித்வாவ விஸ்ஸமிஸ்ஸாமீ’’தி. ஸோ ஏவங் வத்வா தரமானரூபோ ஸாவத்தி²ங் பவிஸித்வா ப⁴க³வந்தங் அனோபமாய பு³த்³த⁴ஸிரியா பிண்டா³ய சரந்தங் தி³ஸ்வா ‘‘சிரஸ்ஸங் வத மே கோ³தமோ ஸம்மாஸம்பு³த்³தோ⁴ தி³ட்டோ²’’தி தி³ட்ட²ட்டா²னதோ பட்டா²ய ஓனதஸரீரோ க³ந்த்வா அந்தரவீதி²யமேவ பஞ்சபதிட்டி²தேன வந்தி³த்வா கொ³ப்ப²கேஸு த³ள்ஹங் க³ஹெத்வா ஏவமாஹ – ‘‘தே³ஸேது மே, ப⁴ந்தே, ப⁴க³வா த⁴ம்மங், தே³ஸேது ஸுக³தோ த⁴ம்மங், யங் மமஸ்ஸ தீ³க⁴ரத்தங் ஹிதாய ஸுகா²யா’’தி. அத² நங் ஸத்தா² ‘‘அகாலோ கோ² தாவ, பா³ஹிய, அந்தரக⁴ரங் பவிட்ட²ம்ஹா பிண்டா³யா’’தி படிக்கி²பி.
தங் ஸுத்வா பா³ஹியோ, ப⁴ந்தே, ஸங்ஸாரே ஸங்ஸரந்தேன கப³ளீகாராஹாரோ ந அலத்³த⁴புப்³போ³, தும்ஹாகங் வா மய்ஹங் வா ஜீவிதந்தராயங் ந ஜானாமி, தே³ஸேது மே த⁴ம்மந்தி. ஸத்தா² து³தியம்பி படிக்கி²பியேவ. ஏவங் கிரஸ்ஸ அஹோஸி – ‘‘இமஸ்ஸ மங் தி³ட்ட²காலதோ பட்டா²ய ஸகலஸரீரங் பீதியா நிரந்தரங் அஜ்ஜொ²த்த²டங் ஹோதி, ப³லவபீதிவேகோ³ த⁴ம்மங் ஸுத்வாபி ந ஸக்கி²ஸ்ஸதி படிவிஜ்ஜி²துங், மஜ்ஜ²த்துபெக்கா²ய தாவ திட்ட²து, ஏகரத்தேனேவ வீஸயோஜனஸதிகங் மக்³க³ங் ஆக³தத்தா த³ரதோ²பிஸ்ஸ ப³லவா, ஸோபி தாவ படிப்பஸ்ஸம்ப⁴தூ’’தி. தஸ்மா த்³விக்க²த்துங் படிக்கி²பித்வா ததியங் யாசிதோ அந்தரவீதி²யங் டி²தோவ ‘‘தஸ்மாதிஹ தே, பா³ஹிய, ஏவங் ஸிக்கி²தப்³ப³ங் ‘தி³ட்டே² தி³ட்ட²மத்தங் ப⁴விஸ்ஸதீ’’’திஆதி³னா (உதா³॰ 10) நயேன த⁴ம்மங் தே³ஸேஸி. ஸோ ஸத்து² த⁴ம்மங் ஸுணந்தோயேவ ஸப்³பா³ஸவே கே²பெத்வா ஸஹ படிஸம்பி⁴தா³ஹி அரஹத்தங் பாபுணி. தாவதே³வ ச பன ப⁴க³வந்தங் பப்³ப³ஜ்ஜங் யாசி, ‘‘பரிபுண்ணங் தே பத்தசீவர’’ந்தி புட்டோ² ‘‘ந பரிபுண்ண’’ந்தி ஆஹ. அத² நங் ஸத்தா² ‘‘தேன ஹி பத்தசீவரங் பரியேஸாஹீ’’தி வத்வா பக்காமி.
‘‘ஸோ கிர வீஸதி வஸ்ஸஸஹஸ்ஸானி ஸமணத⁴ம்மங் கரொந்தோ ‘பி⁴க்கு²னா நாம அத்தனா பச்சயே லபி⁴த்வா அஞ்ஞங் அனோலோகெத்வா ஸயமேவ பரிபு⁴ஞ்ஜிதுங் வட்டதீ’தி ஏகபி⁴க்கு²ஸ்ஸாபி பத்தேன வா சீவரேன வா ஸங்க³ஹங் ந அகாஸி , தேனஸ்ஸ இத்³தி⁴மயபத்தசீவரங் ந உபஜ்ஜிஸ்ஸதீ’’தி ஞத்வா ஏஹிபி⁴க்கு²பா⁴வேன பப்³ப³ஜ்ஜங் ந அதா³ஸி. தம்பி பத்தசீவரங் பரியேஸமானமேவ ஏகா யக்கி²னீ தே⁴னுரூபேன ஆக³ந்த்வா உரம்ஹி பஹரித்வா ஜீவிதக்க²யங் பாபேஸி. ஸத்தா² பிண்டா³ய சரித்வா கதப⁴த்தகிச்சோ ஸம்ப³ஹுலேஹி பி⁴க்கூ²ஹி ஸத்³தி⁴ங் நிக்க²ந்தோ பா³ஹியஸ்ஸ ஸரீரங் ஸங்காரட்டா²னே பதிதங் தி³ஸ்வா பி⁴க்கூ² ஆணாபேஸி, ‘‘பி⁴க்க²வே, ஏகஸ்மிங் கே³ஹத்³வாரே ட²த்வா மஞ்சகங் ஆஹராபெத்வா இமங் ஸரீரங் நக³ரதோ நீஹரித்வா ஜா²பெத்வா தூ²பங் கரோதா²’’தி. பி⁴க்கூ² ததா² கரிங்ஸு, கத்வா ச பன விஹாரங் க³ந்த்வா ஸத்தா²ரங் உபஸங்கமித்வா அத்தனா கதகிச்சங் ஆரோசெத்வா தஸ்ஸ அபி⁴ஸம்பராயங் புச்சி²ங்ஸு. அத² நேஸங் ப⁴க³வா தஸ்ஸ பரினிப்³பு³தபா⁴வங் ஆசிக்கி²த்வா ‘‘ஏதத³க்³க³ங், பி⁴க்க²வே, மம ஸாவகானங் பி⁴க்கூ²னங் கி²ப்பாபி⁴ஞ்ஞானங் யதி³த³ங் பா³ஹியோ தா³ருசீரியோ’’தி (அ॰ நி॰ 1.216) ஏதத³க்³கே³ ட²பேஸி. அத² நங் பி⁴க்கூ² புச்சி²ங்ஸு – ‘‘ப⁴ந்தே, தும்ஹே ‘பா³ஹியோ அரஹத்தங் பத்தோ’தி வதே³த², கதா³ ஸோ அரஹத்தங் பத்தோ’’தி? ‘‘மம த⁴ம்மங் ஸுதகாலே, பி⁴க்க²வே’’தி. ‘‘கதா³ பனஸ்ஸ, ப⁴ந்தே, தும்ஹேஹி த⁴ம்மோ கதி²தோ’’தி? ‘‘பிண்டா³ய சரந்தேன அந்தரவீதி²யங் ட²த்வா’’தி. ‘‘அப்பமத்தகோ ஹி, ப⁴ந்தே, தும்ஹேஹி அந்தரவீதி²யங் ட²த்வா கதி²தத⁴ம்மோ கத²ங் ஸோ தாவத்தகேன விஸேஸங் நிப்³ப³த்தேஸீ’’தி, அத² நே ஸத்தா² ‘‘கிங், பி⁴க்க²வே, மம த⁴ம்மங் ‘அப்பங் வா ப³ஹுங் வா’தி மா பமாணங் க³ண்ஹத². அனேகானிபி ஹி கா³தா²ஸஹஸ்ஸானி அனத்த²னிஸ்ஸிதானி ந ஸெய்யோ, அத்த²னிஸ்ஸிதங் பன ஏகம்பி கா³தா²பத³ங் ஸெய்யோ’’தி வத்வா அனுஸந்தி⁴ங் க⁴டெத்வா த⁴ம்மங் தே³ஸெந்தோ இமங் கா³த²மாஹ –
101.
‘‘ஸஹஸ்ஸமபி சே கா³தா², அனத்த²பத³ஸங்ஹிதா;
ஏகங் கா³தா²பத³ங் ஸெய்யோ, யங் ஸுத்வா உபஸம்மதீ’’தி.
தத்த² ஏகங் கா³தா²பத³ங் ஸெய்யோதி ‘‘அப்பமாதோ³ அமதபத³ங்…பே॰… யதா² மயா’’தி (த⁴॰ ப॰ 21) ஏவரூபா ஏகா கா³தா²பி ஸெய்யோதி அத்தோ². ஸேஸங் புரிமனயேனேவ வேதி³தப்³ப³ங்.
தே³ஸனாவஸானே ப³ஹூ ஸோதாபத்திப²லாதீ³னி பாபுணிங்ஸூதி.
பா³ஹியதா³ருசீரியத்தே²ரவத்து² து³தியங்.
3. குண்ட³லகேஸித்தே²ரீவத்து²
யோ ச கா³தா²ஸதங் பா⁴ஸேதி இமங் த⁴ம்மதே³ஸனங் ஸத்தா² ஜேதவனே விஹரந்தோ குண்ட³லகேஸிங் ஆரப்³ப⁴ கதே²ஸி.
ராஜக³ஹே கிர ஏகா ஸெட்டி²தீ⁴தா ஸோளஸவஸ்ஸுத்³தே³ஸிகா அபி⁴ரூபா அஹோஸி த³ஸ்ஸனீயா பாஸாதி³கா. தஸ்மிஞ்ச வயே டி²தா நாரியோ புரிஸஜ்ஜா²ஸயா ஹொந்தி புரிஸலோலா. அத² நங் மாதாபிதரோ ஸத்தபூ⁴மிகஸ்ஸ பாஸாத³ஸ்ஸ உபரிமதலே ஸிரிக³ப்³பே⁴ நிவாஸாபேஸுங். ஏகமேவஸ்ஸா தா³ஸிங் பரிசாரிகங் அத³ங்ஸு. அதே²கங் குலபுத்தங் சோரகம்மங் கரொந்தங் க³ஹெத்வா பச்சா²பா³ஹங் ப³ந்தி⁴த்வா சதுக்கே சதுக்கே கஸாஹி பஹரித்வா ஆகா⁴தனங் நயிங்ஸு. ஸெட்டி²தீ⁴தா மஹாஜனஸ்ஸ ஸத்³த³ங் ஸுத்வா ‘‘கிங் நு கோ² ஏத’’ந்தி பாஸாத³தலே ட²த்வா ஓலோகெந்தீ தங் தி³ஸ்வா படிப³த்³த⁴சித்தா ஹுத்வா தங் பத்த²யமானா ஆஹாரங் படிக்கி²பித்வா மஞ்சகே நிபஜ்ஜி. அத² நங் மாதா புச்சி² – ‘‘கிங் இத³ங், அம்மா’’தி? ‘‘ஸசே ஏதங் ‘சோரோ’தி க³ஹெத்வா நிய்யமானங் புரிஸங் லபி⁴ஸ்ஸாமி, ஜீவிஸ்ஸாமி. நோ சே லபி⁴ஸ்ஸாமி, ஜீவிதங் மே நத்தி², இதே⁴வ மரிஸ்ஸாமீ’’தி. ‘‘அம்ம, மா ஏவங் கரி, அம்ஹாகங் ஜாதியா ச கொ³த்தேன ச போ⁴கே³ன ச ஸதி³ஸங் அஞ்ஞங் ஸாமிகங் லபி⁴ஸ்ஸஸீ’’தி. ‘‘மய்ஹங் அஞ்ஞேன கிச்சங் நத்தி², இமங் அலப⁴மானா மரிஸ்ஸாமீ’’தி. மாதா தீ⁴தரங் ஸஞ்ஞாபேதுங் அஸக்கொந்தீ பிதுனோ ஆரோசேஸி. ஸோபி நங் ஸஞ்ஞாபேதுங் அஸக்கொந்தோ ‘‘கிங் ஸக்கா காது’’ந்தி சிந்தெத்வா தங் சோரங் க³ஹெத்வா க³ச்ச²ந்தஸ்ஸ ராஜபுரிஸஸ்ஸ ஸஹஸ்ஸப⁴ண்டி³கங் பேஸேஸி – ‘‘இமங் க³ஹெத்வா ஏதங் புரிஸங் மய்ஹங் தே³ஹீ’’தி. ஸோ ‘‘ஸாதூ⁴’’தி கஹாபணே க³ஹெத்வா தங் முஞ்சித்வா அஞ்ஞங் மாரெத்வா ‘‘மாரிதோ, தே³வ, சோரோ’’தி ரஞ்ஞோ ஆரோசேஸி. ஸெட்டி²பி தஸ்ஸ தீ⁴தரங் அதா³ஸி.
ஸா ததோ பட்டா²ய ‘‘ஸாமிகங் ஆராதெ⁴ஸ்ஸாமீ’’தி ஸப்³பா³ப⁴ரணபடிமண்டி³தா ஸயமேவ தஸ்ஸ யாகு³ஆதீ³னி ஸங்வித³ஹதி, சோரோ கதிபாஹச்சயேன சிந்தேஸி – ‘‘கதா³ நு கோ² இமங் மாரெத்வா ஏதிஸ்ஸா ஆப⁴ரணானி க³ஹெத்வா ஏகஸ்மிங் ஸுராகே³ஹே விக்கிணித்வா கா²தி³துங் லபி⁴ஸ்ஸாமீ’’தி? ஸோ ‘‘அத்தே²கோ உபாயோ’’தி சிந்தெத்வா ஆஹாரங் படிக்கி²பித்வா மஞ்சகே நிபஜ்ஜி, அத² நங் ஸா உபஸங்கமித்வா ‘‘கிங் தே, ஸாமி, ருஜ்ஜதீ’’தி புச்சி². ‘‘ந கிஞ்சி மே, ப⁴த்³தே³தி, கச்சி பன மே மாதாபிதரோ துய்ஹங் குத்³தா⁴’’தி? ‘‘ந குஜ்ஜ²ந்தி, ப⁴த்³தே³’’தி . அத² ‘‘கிங் நாமேத’’ந்தி? ‘‘ப⁴த்³தே³, அஹங் தங் தி³வஸங் ப³ந்தி⁴த்வா நிய்யமானோ சோரபபாதே அதி⁴வத்தா²ய தே³வதாய ப³லிகம்மங் படிஸ்ஸுணித்வா ஜீவிதங் லபி⁴ங், த்வம்பி மயா தஸ்ஸா ஏவ ஆனுபா⁴வேன லத்³தா⁴, ‘தங் மே தே³வதாய ப³லிகம்மங் ட²பித’ந்தி சிந்தேமி, ப⁴த்³தே³’’தி. ‘‘ஸாமி, மா சிந்தயி, கரிஸ்ஸாமி ப³லிகம்மங், வதே³ஹி , கேனத்தோ²’’தி? ‘‘அப்போத³கமது⁴பாயஸேன ச லாஜபஞ்சமகபுப்பே²ஹி சா’’தி. ‘‘ஸாது⁴, ஸாமி, அஹங் படியாதெ³ஸ்ஸாமீ’’தி ஸா ஸப்³ப³ங் ப³லிகம்மங் படியாதெ³த்வா ‘‘ஏஹி, ஸாமி, க³ச்சா²மா’’தி ஆஹ. ‘‘தேன ஹி, ப⁴த்³தே³, தவ ஞாதகே நிவத்தெத்வா மஹக்³கா⁴னி வத்தா²ப⁴ரணானி க³ஹெத்வா அத்தானங் அலங்கரோஹி, ஹஸந்தா கீளந்தா ஸுக²ங் க³மிஸ்ஸாமா’’தி. ஸா ததா² அகாஸி.
அத² நங் ஸோ பப்³ப³தபாத³ங் க³தகாலே ஆஹ – ‘‘ப⁴த்³தே³, இதோ பரங் உபோ⁴வ ஜனா க³மிஸ்ஸாம, ஸேஸஜனங் யானகேன ஸத்³தி⁴ங் நிவத்தாபெத்வா ப³லிகம்மபா⁴ஜனங் ஸயங் உக்கி²பித்வா க³ண்ஹாஹீ’’தி. ஸா ததா² அகாஸி. சோரோ தங் க³ஹெத்வா சோரபபாதபப்³ப³தங் அபி⁴ருஹி. தஸ்ஸ ஹி ஏகேன பஸ்ஸேன மனுஸ்ஸா அபி⁴ருஹந்தி, ஏகங் பஸ்ஸங் சி²ன்னபபாதங். பப்³ப³தமத்த²கே டி²தா தேன பஸ்ஸேன சோரே பாதெந்தி. தே க²ண்டா³க²ண்ட³ங் ஹுத்வா பூ⁴மியங் பதந்தி. தஸ்மா ‘‘சோரபபாதோ’’தி வுச்சதி. ஸா தஸ்ஸ பப்³ப³தஸ்ஸ மத்த²கே ட²த்வா ‘‘ப³லிகம்மங் தே, ஸாமி, கரோஹீ’’தி ஆஹ. ஸோ துண்ஹீ அஹோஸி. புன தாய ‘‘கஸ்மா, ஸாமி, துண்ஹீபூ⁴தோஸீ’’தி வுத்தே தங் ஆஹ – ‘‘ந மய்ஹங் ப³லிகம்மேனத்தோ², வஞ்செத்வா பன தங் ஆதா³ய ஆக³தொம்ஹீ’’தி. ‘‘கிங் காரணா, ஸாமீ’’தி? ‘‘தங் மாரெத்வா தவ ஆப⁴ரணானி க³ஹெத்வா பலாயனத்தா²யா’’தி. ஸா மரணப⁴யதஜ்ஜிதா ஆஹ – ‘‘ஸாமி, அஹஞ்ச ஆப⁴ரணானி ச தவ ஸந்தகானேவ, கஸ்மா ஏவங் வதே³ஸீ’’தி? ஸோ, ‘‘மா ஏவங் கரோஹீ’’தி, புனப்புனங் யாசியமானோபி ‘‘மாரேமி ஏவா’’தி ஆஹ. ‘‘ஏவங் ஸந்தே கிங் தே மம மரணேன? இமானி ஆப⁴ரணானி க³ஹெத்வா மய்ஹங் ஜீவிதங் தே³ஹி, இதோ பட்டா²ய மங் ‘மதா’தி தா⁴ரேஹி, தா³ஸீ வா தே ஹுத்வா கம்மங் கரிஸ்ஸாமீ’’தி வத்வா இமங் கா³த²மாஹ –
‘‘இத³ங் ஸுவண்ணகேயூரங், முத்தா வேளுரியா ப³ஹூ;
ஸப்³ப³ங் ஹரஸ்ஸு ப⁴த்³த³ந்தே, மங் ச தா³ஸீதி ஸாவயா’’தி. (அப॰ தே²ரீ 2.3.27);
தங் ஸுத்வா சோரோ ‘‘ஏவங் கதே த்வங் க³ந்த்வா மாதாபிதூனங் ஆசிக்கி²ஸ்ஸஸி, மாரெஸ்ஸாமியேவ, மா த்வங் பா³ள்ஹங் பரிதே³வஸீ’’தி வத்வா இமங் கா³த²மாஹ –
‘‘மா பா³ள்ஹங் பரிதே³வேஸி, கி²ப்பங் ப³ந்தா⁴ஹி ப⁴ண்டி³கங்;
ந துய்ஹங் ஜீவிதங் அத்தி², ஸப்³ப³ங் க³ண்ஹாமி ப⁴ண்ட³க’’ந்தி. –
ஸா சிந்தேஸி – ‘‘அஹோ இத³ங் கம்மங் பா⁴ரியங். பஞ்ஞா நாம ந பசித்வா கா²த³னத்தா²ய கதா, அத² கோ² விசாரணத்தா²ய கதா, ஜானிஸ்ஸாமிஸ்ஸ கத்தப்³ப³’’ந்தி, அத² நங் ஆஹ – ‘‘ஸாமி, யதா³ த்வங் ‘சோரோ’தி க³ஹெத்வா நீயஸி, ததா³ஹங் மாதாபிதூனங் ஆசிக்கி²ங், தே ஸஹஸ்ஸங் விஸ்ஸஜ்ஜெத்வா தங் ஆஹராபெத்வா கே³ஹே கரிங்ஸு. ததோ பட்டா²ய அஹங் துய்ஹங் உபகாரிகா, அஜ்ஜ மே ஸுதி³ட்ட²ங் கத்வா அத்தானங் வந்தி³துங் தே³ஹீ’’தி. ஸோ ‘‘ஸாது⁴, ப⁴த்³தே³, ஸுதி³ட்ட²ங் கத்வா வந்தா³ஹீ’’தி வத்வா பப்³ப³தந்தே அட்டா²ஸி. அத² நங் ஸா திக்க²த்துங் பத³க்கி²ணங் கத்வா சதூஸு டா²னேஸு வந்தி³த்வா, ‘‘ஸாமி, இத³ங் தே பச்சி²மத³ஸ்ஸனங், இதா³னி துய்ஹங் வா மம த³ஸ்ஸனங், மய்ஹங் வா தவ த³ஸ்ஸனங் நத்தீ²’’தி புரதோ ச பச்ச²தோ ச ஆலிங்கி³த்வா பமத்தங் ஹுத்வா பப்³ப³தந்தே டி²தங் பிட்டி²பஸ்ஸே ட²த்வா ஏகேன ஹத்தே²ன க²ந்தே⁴ க³ஹெத்வா ஏகேன பிட்டி²கச்சா²ய க³ஹெத்வா பப்³ப³தபபாதே கி²பி. ஸோ பப்³ப³தகுச்சி²யங் படிஹதோ க²ண்டா³க²ண்டி³கங் ஹுத்வா பூ⁴மியங் பதி. சோரபபாதமத்த²கே அதி⁴வத்தா² தே³வதா தேஸங் த்³வின்னம்பி கிரியங் தி³ஸ்வா தஸ்ஸா இத்தி²யா ஸாது⁴காரங் த³த்வா இமங் கா³த²மாஹ –
‘‘ந ஹி ஸப்³பே³ஸு டா²னேஸு, புரிஸோ ஹோதி பண்டி³தோ;
இத்தீ²பி பண்டி³தா ஹோதி, தத்த² தத்த² விசக்க²ணா’’தி. (அப॰ தே²ரீ 2.3.31);
ஸாபி சோரங் பபாதே கி²பித்வா சிந்தேஸி – ‘‘ஸசாஹங் கே³ஹங் க³மிஸ்ஸாமி, ‘ஸாமிகோ தே குஹி’ந்தி புச்சி²ஸ்ஸந்தி, ஸசாஹங் ஏவங் புட்டா² ‘மாரிதோ மே’தி வக்கா²மி, ‘து³ப்³பி³னீதே ஸஹஸ்ஸங் த³த்வா தங் ஆஹராபெத்வா இதா³னி நங் மாரேஸீ’தி மங் முக²ஸத்தீஹி விஜ்ஜி²ஸ்ஸந்தி, ‘ஆப⁴ரணத்தா²ய ஸோ மங் மாரேதுகாமோ அஹோஸீ’தி வுத்தேபி ந ஸத்³த³ஹிஸ்ஸந்தி, அலங் மே கே³ஹேனா’’தி தத்தே²வாப⁴ரணானி ச²ட்³டெ³த்வா அரஞ்ஞங் பவிஸித்வா அனுபுப்³பே³ன விசரந்தீ ஏகங் பரிப்³பா³ஜகானங் அஸ்ஸமங் பத்வா வந்தி³த்வா ‘‘மய்ஹங், ப⁴ந்தே, தும்ஹாகங் ஸந்திகே பப்³ப³ஜ்ஜங் தே³தா²’’தி ஆஹ. அத² நங் பப்³பா³ஜேஸுங். ஸா பப்³ப³ஜித்வாவ புச்சி² – ‘‘ப⁴ந்தே, தும்ஹாகங் பப்³ப³ஜ்ஜாய கிங் உத்தம’’ந்தி? ‘‘ப⁴த்³தே³, த³ஸஸு வா கஸிணேஸு பரிகம்மங் கத்வா ஜா²னங் நிப்³ப³த்தேதப்³ப³ங் , வாத³ஸஹஸ்ஸங் வா உக்³க³ண்ஹிதப்³ப³ங், அயங் அம்ஹாகங் பப்³ப³ஜ்ஜாய உத்தமத்தோ²’’தி. ‘‘ஜா²னங் தாவ நிப்³ப³த்தேதுங் அஹங் ந ஸக்கி²ஸ்ஸாமி, வாத³ஸஹஸ்ஸங் பன உக்³க³ண்ஹிஸ்ஸாமி, அய்யா’’தி. அத² நங் தே வாத³ஸஹஸ்ஸங் உக்³க³ண்ஹாபெத்வா ‘‘உக்³க³ஹிதங் தே ஸிப்பங், இதா³னி த்வங் ஜம்பு³தீ³பதலே விசரித்வா அத்தனா ஸத்³தி⁴ங் பஞ்ஹங் கதே²துங் ஸமத்த²ங் ஓலோகேஹீ’’தி தஸ்ஸ ஹத்தே² ஜம்பு³ஸாக²ங் த³த்வா உய்யோஜேஸுங் – ‘‘க³ச்ச², ப⁴த்³தே³, ஸசே கோசி கி³ஹிபூ⁴தோ தயா ஸத்³தி⁴ங் பஞ்ஹங் கதே²துங் ஸக்கோதி, தஸ்ஸேவ பாத³பரிசாரிகா ப⁴வாஹி, ஸசே பப்³ப³ஜிதோ ஸக்கோதி, தஸ்ஸ ஸந்திகே பப்³ப³ஜாஹீ’’தி.
ஸா நாமேன ஜம்பு³பரிப்³பா³ஜிகா நாம ஹுத்வா ததோ நிக்க²மித்வா தி³ட்டே² தி³ட்டே² பஞ்ஹங் புச்ச²ந்தீ விசரதி. தாய ஸத்³தி⁴ங் கதே²துங் ஸமத்தோ² நாம நாஹோஸி. ‘‘இதோ ஜம்பு³பரிப்³பா³ஜிகா ஆக³ச்ச²தீ’’தி ஸுத்வாவ மனுஸ்ஸா பலாயந்தி. ஸா கா³மங் வா நிக³மங் வா பி⁴க்கா²ய பவிஸந்தீ கா³மத்³வாரே வாலுகராஸிங் கத்வா தத்த² ஜம்பு³ஸாக²ங் ட²பெத்வா ‘‘மயா ஸத்³தி⁴ங் கதே²துங் ஸமத்தோ² ஜம்பு³ஸாக²ங் மத்³த³தூ’’தி வத்வா கா³மங் பாவிஸி. தங் டா²னங் உபஸங்கமிதுங் ஸமத்தோ² நாம நாஹோஸி. ஸாபி மிலாதாய ஜம்பு³ஸாகா²ய அஞ்ஞங் ஜம்பு³ஸாக²ங் க³ண்ஹாதி, இமினா நீஹாரேன விசரந்தீ ஸாவத்தி²ங் பத்வா கா³மத்³வாரே வாலுகராஸிங் கத்வா ஜம்பு³ஸாக²ங் ட²பெத்வா வுத்தனயேனேவ வத்வா பி⁴க்கா²ய பாவிஸி. ஸம்ப³ஹுலா கா³மதா³ரகா ஜம்பு³ஸாக²ங் பரிவாரெத்வா அட்ட²ங்ஸு. ததா³ ஸாரிபுத்தத்தே²ரோ பிண்டா³ய சரித்வா கதப⁴த்தகிச்சோ நக³ரா நிக்க²ந்தோ தே தா³ரகே ஜம்பு³ஸாக²ங் பரிவாரெத்வா டி²தே தி³ஸ்வா ‘‘கிங் இத³’’ந்தி புச்சி². தா³ரகா தே²ரஸ்ஸ தங் பவத்திங் ஆசிக்கி²ங்ஸு. ‘‘தேன ஹி தா³ரகா இமங் ஸாக²ங் மத்³த³தா²’’தி. ‘‘பா⁴யாம, ப⁴ந்தே’’தி . ‘‘அஹங் பஞ்ஹங் கதெ²ஸ்ஸாமி, மத்³த³த² தும்ஹே’’தி. தே தே²ரஸ்ஸ வசனேன ஸஞ்ஜாதுஸ்ஸாஹா ததா² கத்வா மத்³த³ந்தா ஜம்பு³ஸாக²ங் உக்கி²பிங்ஸு. பரிப்³பா³ஜிகா ஆக³ந்த்வா தே பரிபா⁴ஸித்வா ‘‘தும்ஹேஹி ஸத்³தி⁴ங் மம பஞ்ஹேன கிச்சங் நத்தி², கஸ்மா மே ஸாக²ங் மத்³த³தா²’’தி ஆஹ. ‘‘அய்யேனம்ஹா மத்³தா³பிதா’’தி ஆஹங்ஸு. ‘‘ப⁴ந்தே, தும்ஹேஹி மே ஸாகா² மத்³தா³பிதா’’தி? ‘‘ஆம, ப⁴கி³னீ’’தி. ‘‘தேன ஹி மயா ஸத்³தி⁴ங் பஞ்ஹங் கதே²தா²’’தி. ‘‘ஸாது⁴ கதெ²ஸ்ஸாமீ’’தி.
ஸா வட்³ட⁴மானகச்சா²யாய பஞ்ஹங் புச்சி²துங் தே²ரஸ்ஸ ஸந்திகங் அக³மாஸி, ஸகலனக³ரங் ஸங்கு²பி⁴. ‘‘த்³வின்னங் பண்டி³தானங் கத²ங் ஸுணிஸ்ஸாமா’’தி நாக³ரா தாய ஸத்³தி⁴ங்யேவ க³ந்த்வா தே²ரங் வந்தி³த்வா ஏகமந்தங் நிஸீதி³ங்ஸு. பரிப்³பா³ஜிகா தே²ரங் ஆஹ – ‘‘ப⁴ந்தே, புச்சா²மி தே பஞ்ஹ’’ந்தி. ‘‘புச்ச², ப⁴கி³னீ’’தி. ஸா வாத³ஸஹஸ்ஸங் புச்சி², புச்சி²தங் புச்சி²தங் தே²ரோ விஸ்ஸஜ்ஜேஸி. அத² நங் தே²ரோ ஆஹ – ‘‘எத்தகா ஏவ தே பஞ்ஹா, அஞ்ஞேபி அத்தீ²’’தி? ‘‘எத்தகா ஏவ, ப⁴ந்தே’’தி. ‘‘தயா ப³ஹூ பஞ்ஹா புட்டா², மயம்பி ஏகங் புச்சா²ம, விஸ்ஸஜ்ஜிஸ்ஸஸி நோ’’தி? ‘‘ஜானமானா விஸ்ஸஜ்ஜிஸ்ஸாமி புச்ச²த², ப⁴ந்தே’’தி. தே²ரோ ‘‘ஏகங் நாம கி’’ந்தி (கு²॰ பா॰ 4.1) பஞ்ஹங் புச்சி². ஸா ‘‘ஏவங் நாமேஸ விஸ்ஸஜ்ஜேதப்³போ³’’தி அஜானந்தீ ‘‘கிங் நாமேதங், ப⁴ந்தே’’தி புச்சி². ‘‘பு³த்³த⁴பஞ்ஹோ நாம, ப⁴கி³னீ’’தி. ‘‘மய்ஹம்பி தங் தே³த², ப⁴ந்தே’’தி. ‘‘ஸசே மாதி³ஸா ப⁴விஸ்ஸஸி, த³ஸ்ஸாமீ’’தி. ‘‘தேன ஹி மங் பப்³பா³ஜேதா²’’தி. தே²ரோ பி⁴க்கு²னீனங் ஆசிக்கி²த்வா பப்³பா³ஜேஸி. ஸா பப்³ப³ஜித்வா லத்³தூ⁴பஸம்பதா³ குண்ட³லகேஸித்தே²ரீ நாம ஹுத்வா கதிபாஹச்சயேனேவ ஸஹ படிஸம்பி⁴தா³ஹி அரஹத்தங் பாபுணி.
பி⁴க்கூ² த⁴ம்மஸபா⁴யங் கத²ங் ஸமுட்டா²பேஸுங் – ‘‘குண்ட³லகேஸித்தே²ரியா த⁴ம்மஸ்ஸவனஞ்ச ப³ஹுங் நத்தி², பப்³ப³ஜிதகிச்சஞ்சஸ்ஸா மத்த²கங் பத்தங், ஏகேன கிர சோரேன ஸத்³தி⁴ங் மஹாஸங்கா³மங் கத்வா ஜினித்வா ஆக³தா’’தி. ஸத்தா² ஆக³ந்த்வா ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா’’தி புச்சி²த்வா ‘‘இமாய நாமா’’தி வுத்தே, ‘‘பி⁴க்க²வே, மயா தே³ஸிதத⁴ம்மங் ‘அப்பங் வா ப³ஹுங் வா’தி பமாணங் மா க³ண்ஹத², அனத்த²கங் பத³ஸதம்பி ஸெய்யோ ந ஹோதி, த⁴ம்மபத³ங் பன ஏகம்பி ஸெய்யோவ. அவஸேஸசோரே ஜினந்தஸ்ஸ ச ஜயோ நாம ந ஹோதி, அஜ்ஜ²த்திககிலேஸசோரே ஜினந்தஸ்ஸேவ பன ஜயோ நாம ஹோதீ’’தி வத்வா அனுஸந்தி⁴ங் க⁴டெத்வா த⁴ம்மங் தே³ஸெந்தோ இமா கா³தா² அபா⁴ஸி –
102.
‘‘யோ ச கா³தா²ஸதங் பா⁴ஸே, அனத்த²பத³ஸங்ஹிதா;
ஏகங் த⁴ம்மபத³ங் ஸெய்யோ, யங் ஸுத்வா உபஸம்மதி.
103.
‘‘யோ ஸஹஸ்ஸங் ஸஹஸ்ஸேன, ஸங்கா³மே மானுஸே ஜினே;
ஏகஞ்ச ஜெய்யமத்தானங், ஸ வே ஸங்கா³மஜுத்தமோ’’தி.
தத்த² கா³தா²ஸதந்தி யோ ச புக்³க³லோ ஸதபரிச்சே²தா³ ப³ஹூபி கா³தா² பா⁴ஸெய்யாதி அத்தோ². அனத்த²பத³ஸங்ஹிதாதி ஆகாஸவண்ணனாதி³வஸேன அனத்த²கேஹி பதே³ஹி ஸங்ஹிதா. த⁴ம்மபத³ந்தி அத்த²ஸாத⁴கங் க²ந்தா⁴தி³படிஸங்யுத்தங், ‘‘சத்தாரிமானி பரிப்³பா³ஜகா த⁴ம்மபதா³னி. கதமானி சத்தாரி? அனபி⁴ஜ்ஜா² பரிப்³பா³ஜகா த⁴ம்மபத³ங், அப்³யாபாதோ³ பரிப்³பா³ஜகா த⁴ம்மபத³ங், ஸம்மாஸதி பரிப்³பா³ஜகா த⁴ம்மபத³ங் , ஸம்மாஸமாதி⁴ பரிப்³பா³ஜகா த⁴ம்மபத³’’ந்தி (அ॰ நி॰ 4.30) ஏவங் வுத்தேஸு சதூஸு த⁴ம்மபதே³ஸு ஏகம்பி த⁴ம்மபத³ங் ஸெய்யோ. யோ ஸஹஸ்ஸங் ஸஹஸ்ஸேனாதி யோ ஏகோ ஸங்கா³மயோதோ⁴ ஸஹஸ்ஸேன கு³ணிதங் ஸஹஸ்ஸங் மானுஸே ஏகஸ்மிங் ஸங்கா³மே ஜினெய்ய, த³ஸமனுஸ்ஸஸதஸஹஸ்ஸங் ஜினித்வா ஜயங் ஆஹரெய்ய, அயம்பி ஸங்கா³மஜினதங் உத்தமோ பவரோ நாம ந ஹோதி. ஏகஞ்ச ஜெய்யமத்தானந்தி யோ ரத்திட்டா²னதி³வாட்டா²னேஸு அஜ்ஜ²த்திககம்மட்டா²னங் ஸம்மஸந்தோ அத்தனோ லோபா⁴தி³கிலேஸஜயேன அத்தானங் ஜினெய்ய . ஸ வே ஸங்கா³மஜுத்தமோதி ஸோ ஸங்கா³மஜினானங் உத்தமோ பவரோ ஸங்கா³மஸீஸயோதோ⁴தி.
தே³ஸனாவஸானே ப³ஹூ ஸோதாபத்திப²லாதீ³னி பாபுணிங்ஸூதி.
குண்ட³லகேஸித்தே²ரீவத்து² ததியங்.
4. அனத்த²புச்ச²கப்³ராஹ்மணவத்து²
அத்தா ஹவேதி இமங் த⁴ம்மதே³ஸனங் ஸத்தா² ஜேதவனே விஹரந்தோ அனத்த²புச்ச²கங் ப்³ராஹ்மணங் ஆரப்³ப⁴ கதே²ஸி.
ஸோ கிர ப்³ராஹ்மணோ ‘‘கிங் நு கோ² ஸம்மாஸம்பு³த்³தோ⁴ அத்த²மேவ ஜானாதி, உதா³ஹு அனத்த²ம்பி, புச்சி²ஸ்ஸாமி ந’’ந்தி ஸத்தா²ரங் உபஸங்கமித்வா புச்சி² – ‘‘ப⁴ந்தே, தும்ஹே அத்த²மேவ ஜானாத² மஞ்ஞே, நோ அனத்த²’’ந்தி? ‘‘அத்த²ஞ்சாஹங், ப்³ராஹ்மண, ஜானாமி அனத்த²ஞ்சா’’தி. ‘‘தேன ஹி மே அனத்த²ங் கதே²தா²’’தி. அத²ஸ்ஸ ஸத்தா² இமங் கா³த²மாஹ –
‘‘உஸ்ஸூரஸெய்யங் ஆலஸ்யங், சண்டி³க்கங் தீ³க⁴ஸொண்டி³யங்;
ஏகஸ்ஸத்³தா⁴னக³மனங் பரதா³ரூபஸேவனங்;
ஏதங் ப்³ராஹ்மண ஸேவஸ்ஸு, அனத்த²ங் தே ப⁴விஸ்ஸதீ’’தி.
தங் ஸுத்வா ப்³ராஹ்மணோ ஸாது⁴காரமதா³ஸி ‘‘ஸாது⁴ ஸாது⁴, க³ணாசரிய, க³ணஜெட்ட²க, தும்ஹே அத்த²ஞ்ச ஜானாத² அனத்த²ஞ்சா’’தி . ‘‘ஏவங் கோ², ப்³ராஹ்மண, அத்தா²னத்த²ஜானநகோ நாம மயா ஸதி³ஸோ நத்தீ²’’தி. அத²ஸ்ஸ ஸத்தா² அஜ்ஜா²ஸயங் உபதா⁴ரெத்வா, ‘‘ப்³ராஹ்மண, கேன கம்மேன ஜீவஸீ’’தி புச்சி². ‘‘ஜூதகம்மேன, போ⁴ கோ³தமா’’தி. ‘‘கிங் பன தே ஜயோ ஹோதி பராஜயோ’’தி . ‘‘ஜயோபி ஹோதி பராஜயோபீ’’தி வுத்தே, ‘‘ப்³ராஹ்மண, அப்பமத்தகோ ஏஸ, பரங் ஜினந்தஸ்ஸ ஜயோ நாம ந ஸெய்யோ. யோ பன கிலேஸஜயேன அத்தானங் ஜினாதி, தஸ்ஸ ஜயோ ஸெய்யோ. ந ஹி தங் ஜயங் கோசி அபஜயங் காதுங் ஸக்கோதீ’’தி வத்வா அனுஸந்தி⁴ங் க⁴டெத்வா த⁴ம்மங் தே³ஸெந்தோ இமா கா³தா² அபா⁴ஸி –
104.
‘‘அத்தா ஹவே ஜிதங் ஸெய்யோ, யா சாயங் இதரா பஜா;
அத்தத³ந்தஸ்ஸ போஸஸ்ஸ, நிச்சங் ஸஞ்ஞதசாரினோ.
105.
‘‘நேவ தே³வோ ந க³ந்த⁴ப்³போ³, ந மாரோ ஸஹ ப்³ரஹ்முனா;
ஜிதங் அபஜிதங் கயிரா, ததா²ரூபஸ்ஸ ஜந்துனோ’’தி.
தத்த² ஹவேதி நிபாதோ. ஜிதந்தி லிங்க³விபல்லாஸோ, அத்தனோ கிலேஸஜயேன அத்தா ஜிதோ ஸெய்யோதி அத்தோ². யா சாயங் இதரா பஜாதி யா பனாயங் அவஸேஸா பஜா ஜூதேன வா த⁴னஹரணேன வா ஸங்கா³மேன வா ப³லாபி⁴ப⁴வேன வா ஜிதா ப⁴வெய்ய, தங் ஜினந்தேன யங் ஜிதங், ந தங் ஸெய்யோதி அத்தோ². கஸ்மா பன ததே³வ ஜிதங் ஸெய்யோ, இத³ங் ந ஸெய்யோதி? யஸ்மா அத்தத³ந்தஸ்ஸ…பே॰… ததா²ரூபஸ்ஸ ஜந்துனோதி. இத³ங் வுத்தங் ஹோதி – யஸ்மா ஹி ய்வாயங் நிக்கிலேஸதாய அத்தத³ந்தோ போஸோ, தஸ்ஸ அத்தத³ந்தஸ்ஸ காயாதீ³ஹி நிச்சங் ஸஞ்ஞதசாரினோ ஏவரூபஸ்ஸ இமேஹி காயஸஞ்ஞமாதீ³ஹி ஸஞ்ஞதஸ்ஸ ஜந்துனோ தே³வோ வா க³ந்த⁴ப்³போ³ வா மாரோ வா ப்³ரஹ்முனா ஸஹ உட்ட²ஹித்வா ‘‘அஹமஸ்ஸ ஜிதங் அபஜிதங் கரிஸ்ஸாமி, மக்³க³பா⁴வனாய பஹீனே கிலேஸே புன உப்பாதெ³ஸ்ஸாமீ’’தி க⁴டெந்தோபி வாயமந்தோபி யதா² த⁴னாதீ³ஹி பராஜிதோ பக்க²ந்தரோ ஹுத்வா இதரேன ஜிதங் புன ஜினந்தோ அபஜிதங் கரெய்ய, ‘‘ஏவங் அபஜிதங் காதுங் நேவ ஸக்குணெய்யா’’தி.
தே³ஸனாவஸானே ப³ஹூ ஸோதாபத்திப²லாதீ³னி பாபுணிங்ஸூதி.
அனத்த²புச்ச²கப்³ராஹ்மணவத்து² சதுத்த²ங்.
5. ஸாரிபுத்தத்தே²ரஸ்ஸ மாதுலப்³ராஹ்மணவத்து²
மாஸே மாஸேதி இமங் த⁴ம்மதே³ஸனங் ஸத்தா² வேளுவனே விஹரந்தோ ஸாரிபுத்தத்தே²ரஸ்ஸ மாதுலப்³ராஹ்மணங் ஆரப்³ப⁴ கதே²ஸி.
தே²ரோ கிர தஸ்ஸ ஸந்திகங் க³ந்த்வா ஆஹ – ‘‘கிங் நு கோ², ப்³ராஹ்மண, கிஞ்சிதே³வ குஸலங் கரோஸீ’’தி? ‘‘கரோமி, ப⁴ந்தே’’தி. ‘‘கிங் கரோஸீ’’தி? ‘‘மாஸே மாஸே ஸஹஸ்ஸபரிச்சாகே³ன தா³னங் த³ம்மீ’’தி. ‘‘கஸ்ஸ தே³ஸீ’’தி? ‘‘நிக³ண்டா²னங், ப⁴ந்தே’’தி. ‘‘கிங் பத்த²யந்தோ’’தி? ‘‘ப்³ரஹ்மலோகங், ப⁴ந்தே’’தி. ‘‘கிங் பன ப்³ரஹ்மலோகஸ்ஸ அயங் மக்³கோ³’’தி? ‘‘ஆம, ப⁴ந்தே’’தி. ‘‘கோ ஏவமாஹா’’தி? ‘‘ஆசரியேஹி மே கதி²தங், ப⁴ந்தே’’தி. ‘‘நோ த்வங் ப்³ரஹ்மலோகஸ்ஸ மக்³க³ங் ஜானாஸி, நாபி தே ஆசரியா, ஸத்தா²வ ஏகோ ஜானாதி, ஏஹி, ப்³ராஹ்மண, ப்³ரஹ்மலோகஸ்ஸ தே மக்³க³ங் கதா²பெஸ்ஸாமீ’’தி தங் ஆதா³ய ஸத்து² ஸந்திகங் நெத்வா, ‘‘ப⁴ந்தே, அயங் ப்³ராஹ்மணோ ஏவமாஹா’’தி, ‘‘தங் பவத்திங் ஆரோசெத்வா ஸாது⁴ வதஸ்ஸ ப்³ரஹ்மலோகஸ்ஸ மக்³க³ங் கதே²தா²’’தி. ஸத்தா² ‘‘ஏவங் கிர, ப்³ராஹ்மணா’’தி புச்சி²த்வா ‘‘ஆம, போ⁴ கோ³தமா’’தி வுத்தே, ‘‘ப்³ராஹ்மண, தயா ஏவங் த³த³மானேன வஸ்ஸஸதங் தி³ன்னதா³னதோபி முஹுத்தமத்தங் பஸன்னசித்தேன மம ஸாவகஸ்ஸ ஓலோகனங் வா கடச்சு²பி⁴க்கா²மத்ததா³னங் வா மஹப்ப²லதர’’ந்தி வத்வா அனுஸந்தி⁴ங் க⁴டெத்வா த⁴ம்மங் தே³ஸெந்தோ இமங் கா³த²மாஹ –
106.
‘‘மாஸே மாஸே ஸஹஸ்ஸேன, யோ யஜேத² ஸதங் ஸமங்;
ஏகஞ்ச பா⁴விதத்தானங், முஹுத்தமபி பூஜயே;
ஸாயேவ பூஜனா ஸெய்யோ, யஞ்சே வஸ்ஸஸதங் ஹுத’’ந்தி.
தத்த² ஸஹஸ்ஸேனாஹி ஸஹஸ்ஸபரிச்சாகே³ன. யோ யஜேத² ஸதங் ஸமந்தி யோ வஸ்ஸஸதங் மாஸே மாஸே ஸஹஸ்ஸங் பரிச்சஜந்தோ லோகியமஹாஜனஸ்ஸ தா³னங் த³தெ³ய்ய, ஏகஞ்ச பா⁴விதத்தானந்தி யோ பன ஏகங் ஸீலாதி³கு³ணவிஸேஸேன வட்³டி⁴தஅத்தானங் ஹெட்டி²மகோடியா ஸோதாபன்னங், உபரிமகோடியா கீ²ணாஸவங் க⁴ரத்³வாரங் ஸம்பத்தங் கடச்சு²பி⁴க்கா²தா³னவஸேன வா யாபனமத்தஆஹாரதா³னவஸேன வா தூ²லஸாடகதா³னமத்தேன வா பூஜெய்ய. யங் இதரேன வஸ்ஸஸதங் ஹுதங். ததோ ஸாயேவ பூஜனா ஸெய்யோ. ஸெட்டோ² உத்தமோதி அத்தோ²தி.
தே³ஸனாவஸானே ஸோ ப்³ராஹ்மணோ ஸோதாபத்திப²லங் பத்தோ, அஞ்ஞேபி ப³ஹூ ஸோதாபத்திப²லாதீ³னி பாபுணிங்ஸூதி.
ஸாரிபுத்தத்தே²ரஸ்ஸ மாதுலப்³ராஹ்மணவத்து² பஞ்சமங்.
6. ஸாரிபுத்தத்தே²ரஸ்ஸ பா⁴கி³னெய்யவத்து²
யோ ச வஸ்ஸஸதங் ஜந்தூதி இமங் த⁴ம்மதே³ஸனங் ஸத்தா² வேளுவனே விஹரந்தோ ஸாரிபுத்தத்தே²ரஸ்ஸ பா⁴கி³னெய்யங் ஆரப்³ப⁴ கதே²ஸி.
தம்பி ஹி தே²ரோ உபஸங்கமித்வா ஆஹ – ‘‘கிங், ப்³ராஹ்மண, குஸலங் கரோஸீ’’தி? ‘‘ஆம, ப⁴ந்தே’’தி. ‘‘கிங் கரோஸீ’’தி? ‘‘மாஸே மாஸே ஏகங் ஏகங் பஸுங் கா⁴தெத்வா அக்³கி³ங் பரிசராமீ’’தி. ‘‘கிமத்த²ங் ஏவங் கரோஸீ’’தி? ‘‘ப்³ரஹ்மலோகமக்³கோ³ கிரேஸோ’’தி. ‘‘கேனேவங் கதி²த’’ந்தி? ‘‘ஆசரியேஹி மே, ப⁴ந்தே’’தி. ‘‘நேவ த்வங் ப்³ரஹ்மலோகஸ்ஸ மக்³க³ங் ஜானாஸி, நாபி தே ஆசரியா, ஏஹி, ஸத்து² ஸந்திகங் க³மிஸ்ஸாமா’’தி தங் ஸத்து² ஸந்திகங் நெத்வா தங் பவத்திங் ஆரோசெத்வா ‘‘இமஸ்ஸ, ப⁴ந்தே, ப்³ரஹ்மலோகஸ்ஸ மக்³க³ங் கதே²தா²’’தி ஆஹ. ஸத்தா² ‘‘ஏவங் கிரா’’தி புச்சி²த்வா ‘‘ஏவங், போ⁴ கோ³தமா’’தி வுத்தே, ‘‘ப்³ராஹ்மண, வஸ்ஸஸதம்பி ஏவங் அக்³கி³ங் பரிசரந்தஸ்ஸ தவ அக்³கி³பாரிசரியா மம ஸாவகஸ்ஸ தங்க²ணமத்தங் பூஜம்பி ந பாபுணாதீ’’தி வத்வா அனுஸந்தி⁴ங் க⁴டெத்வா த⁴ம்மங் தே³ஸெந்தோ இமங் கா³த²மாஹ –
107.
‘‘யோ ச வஸ்ஸஸதங் ஜந்து, அக்³கி³ங் பரிசரே வனே;
ஏகஞ்ச பா⁴விதத்தானங், முஹுத்தமபி பூஜயே;
ஸாயேவ பூஜனா ஸெய்யோ, யஞ்சே வஸ்ஸஸதங் ஹுத’’ந்தி.
தத்த² ஜந்தூதி ஸத்தாதி⁴வசனமேதங். அக்³கி³ங் பரிசரே வனேதி நிப்பபஞ்சபா⁴வபத்த²னாய வனங் பவிஸித்வாபி தத்த² அக்³கி³ங் பரிசரெய்ய. ஸேஸங் புரிமஸதி³ஸமேவாதி.
தே³ஸனாவஸானே ஸோ ப்³ராஹ்மணோ ஸோதாபத்திப²லங் பாபுணி, அஞ்ஞேபி ப³ஹூ ஸோதாபத்திப²லாதீ³னி பாபுணிங்ஸூதி.
ஸாரிபுத்தத்தே²ரஸ்ஸ பா⁴கி³னெய்யவத்து² ச²ட்ட²ங்.
7. ஸாரிபுத்தத்தே²ரஸ்ஸ ஸஹாயகப்³ராஹ்மணவத்து²
யங் கிஞ்சி யிட்ட²ங் வாதி இமங் த⁴ம்மதே³ஸனங் ஸத்தா² வேளுவனே விஹரந்தோ ஸாரிபுத்தத்தே²ரஸ்ஸ ஸஹாயகப்³ராஹ்மணங் ஆரப்³ப⁴ கதே²ஸி.
தம்பி ஹி தே²ரோ உபஸங்கமித்வா ‘‘கிங், ப்³ராஹ்மண, கிஞ்சி குஸலங் கரோஸீ’’தி புச்சி². ‘‘ஆம, ப⁴ந்தே’’தி. ‘‘கிங் கரோஸீ’’தி? ‘‘யிட்ட²யாக³ங் யஜாமீ’’தி. ‘‘ததா³ கிர தங் யாக³ங் மஹாபரிச்சாகே³ன யஜ’’ந்தி. இதோ பரங் தே²ரோ புரிமனயேனேவ புச்சி²த்வா தங் ஸத்து² ஸந்திகங் நெத்வா தங் பவத்திங் ஆரோசெத்வா ‘‘இமஸ்ஸ, ப⁴ந்தே, ப்³ரஹ்மலோகஸ்ஸ மக்³க³ங் கதே²தா²’’தி ஆஹ. ஸத்தா², ‘‘ப்³ராஹ்மண, ஏவங் கிரா’’தி புச்சி²த்வா ‘‘ஏவங், போ⁴ கோ³தமா’’தி வுத்தே, ‘‘ப்³ராஹ்மண, தயா ஸங்வச்ச²ரங் யிட்ட²யாக³ங் யஜந்தேன லோகியமஹாஜனஸ்ஸ தி³ன்னதா³னங் பஸன்னசித்தேன மம ஸாவகானங் வந்த³ந்தானங் உப்பன்னகுஸலசேதனாய சதுபா⁴க³மத்தம்பி ந அக்³க⁴தீ’’தி வத்வா அனுஸந்தி⁴ங் க⁴டெத்வா த⁴ம்மங் தே³ஸெந்தோ இமங் கா³த²மாஹ –
108.
‘‘யங் கிஞ்சி யிட்ட²ங் வ ஹுதங் வ லோகே,
ஸங்வச்ச²ரங் யஜேத² புஞ்ஞபெக்கோ²;
ஸப்³ப³ம்பி தங் ந சதுபா⁴க³மேதி,
அபி⁴வாத³னா உஜ்ஜுக³தேஸு ஸெய்யோ’’தி.
தத்த² யங் கிஞ்சீதி அனவஸேஸபரியாதா³னவசனமேதங். யிட்ட²ந்தி யேபு⁴ய்யேன மங்க³லகிரியாதி³வஸேஸு தி³ன்னதா³னங். ஹுதந்தி அபி⁴ஸங்க²ரித்வா கதங் பாஹுனதா³னஞ்சேவ, கம்மஞ்ச ப²லஞ்ச ஸத்³த³ஹித்வா கததா³னஞ்ச. ஸங்வச்ச²ரங் யஜேதா²தி ஏகஸங்வச்ச²ரங் நிரந்தரமேவ வுத்தப்பகாரங் தா³னங் ஸகலசக்கவாளேபி லோகியமஹாஜனஸ்ஸ த³தெ³ய்ய. புஞ்ஞபெக்கோ²தி புஞ்ஞங் இச்ச²ந்தோ. உஜ்ஜுக³தேஸூதி ஹெட்டி²மகோடியா ஸோதாபன்னேஸு உபரிமகோடியா கீ²ணாஸவேஸு. இத³ங் வுத்தங் ஹோதி – ‘‘ஏவரூபேஸு பஸன்னசித்தேன ஸரீரங் ஓனமித்வா வந்த³ந்தஸ்ஸ குஸலசேதனாய யங் ப²லங், ததோ சதுபா⁴க³ம்பி ஸப்³ப³ங் தங் தா³னங் ந அக்³க⁴தி, தஸ்மா உஜுக³தேஸு அபி⁴வாத³னமேவ ஸெய்யோ’’தி.
தே³ஸனாவஸானே ஸோ ப்³ராஹ்மணோ ஸோதாபத்திப²லங் பத்தோ, அஞ்ஞேபி ப³ஹூ ஸோதாபத்திப²லாதீ³னி பாபுணிங்ஸூதி.
ஸாரிபுத்தத்தே²ரஸ்ஸ ஸஹாயகப்³ராஹ்மணவத்து² ஸத்தமங்.
8. ஆயுவட்³ட⁴னகுமாரவத்து²
அபி⁴வாத³னஸீலிஸ்ஸாதி இமங் த⁴ம்மதே³ஸனங் ஸத்தா² தீ³க⁴லங்கி⁴கங் நிஸ்ஸாய அரஞ்ஞகுடியங் விஹரந்தோ தீ³கா⁴யுகுமாரங் ஆரப்³ப⁴ கதே²ஸி.
தீ³க⁴லங்கி⁴கனக³ரவாஸினோ கிர த்³வே ப்³ராஹ்மணா பா³ஹிரகபப்³ப³ஜ்ஜங் பப்³ப³ஜித்வா அட்ட²சத்தாலீஸ வஸ்ஸானி தபசரணங் கரிங்ஸு. தேஸு ஏகோ ‘‘பவேணி மே நஸ்ஸிஸ்ஸதி, விப்³ப⁴மிஸ்ஸாமீ’’தி சிந்தெத்வா அத்தனா கதங் தபங் பரேஸங் விக்கிணித்வா கோ³ஸதேன சேவ கஹாபணஸதேன ச ஸத்³தி⁴ங் ப⁴ரியங் லபி⁴த்வா குடும்ப³ங் ஸண்ட²பேஸி. அத²ஸ்ஸ ப⁴ரியா புத்தங் விஜாயி. இதரோ பனஸ்ஸ ஸஹாயகோ பவாஸங் க³ந்த்வா புனதே³வ தங் நக³ரங் பச்சாக³மி. ஸோ தஸ்ஸ ஆக³தபா⁴வங் ஸுத்வா புத்ததா³ரங் ஆதா³ய ஸஹாயகஸ்ஸ த³ஸ்ஸனத்தா²ய அக³மாஸி. க³ந்த்வா புத்தங் மாது ஹத்தே² த³த்வா ஸயங் தாவ வந்தி³, மாதாபி புத்தங் பிது ஹத்தே² த³த்வா வந்தி³. ஸோ ‘‘தீ³கா⁴யுகா ஹோதா²’’தி ஆஹ, புத்தே பன வந்தா³பிதே துண்ஹீ அஹோஸி. அத² நங் ‘‘கஸ்மா, ப⁴ந்தே, அம்ஹேஹி வந்தி³தே ‘தீ³கா⁴யுகா ஹோதா²’தி வத்வா இமஸ்ஸ வந்த³னகாலே கிஞ்சி ந வதே³தா²’’தி ஆஹ. ‘‘இமஸ்ஸேகோ அந்தராயோ அத்தி², ப்³ராஹ்மணா’’தி. ‘‘கித்தகங் ஜீவிஸ்ஸதி, ப⁴ந்தே’’தி? ‘‘ஸத்தாஹங், ப்³ராஹ்மணா’’தி. ‘‘படிபா³ஹனகாரணங் அத்தி², ப⁴ந்தே’’தி? ‘‘நாஹங் படிபா³ஹனகாரணங் ஜானாமீ’’தி. ‘‘கோ பன ஜானெய்ய, ப⁴ந்தே’’தி? ‘‘ஸமணோ கோ³தமோ ஜானெய்ய, தஸ்ஸ ஸந்திகங் க³ந்த்வா புச்சா²ஹீ’’தி. ‘‘தத்த² க³ச்ச²ந்தோ தபபரிஹானிதோ பா⁴யாமீ’’தி. ‘‘ஸசே தே புத்தஸினேஹோ அத்தி², தபபரிஹானிங் அசிந்தெத்வா தஸ்ஸ ஸந்திகங் க³ந்த்வா புச்சா²ஹீ’’தி.
ஸோ ஸத்து² ஸந்திகங் க³ந்த்வா ஸயங் தாவ வந்தி³. ஸத்தா² ‘‘தீ³கா⁴யுகோ ஹோஹீ’’தி ஆஹ, பஜாபதியா வந்த³னகாலேபி தஸ்ஸா ததே²வ வத்வா புத்தஸ்ஸ வந்தா³பனகாலே துண்ஹீ அஹோஸி. ஸோ புரிமனயேனேவ ஸத்தா²ரங் புச்சி², ஸத்தா²பி ததே²வ ப்³யாகாஸி. ஸோ கிர ப்³ராஹ்மணோ ஸப்³ப³ஞ்ஞுதஞ்ஞாணங் அபடிவிஜ்ஜி²த்வாவ அத்தனோ மந்தங் ஸப்³ப³ஞ்ஞுதஞ்ஞாணேன ஸங்ஸந்தே³ஸி, படிபா³ஹனூபாயங் பன ந ஜானாதி. ப்³ராஹ்மணோ ஸத்தா²ரங் புச்சி² – ‘‘அத்தி² பன, ப⁴ந்தே, படிபா³ஹனூபாயோ’’தி? ‘‘ப⁴வெய்ய, ப்³ராஹ்மணா’’தி. ‘‘கிங் ப⁴வெய்யா’’தி? ‘‘ஸசே த்வங் அத்தனோ கே³ஹத்³வாரே மண்ட³பங் காரெத்வா தஸ்ஸ மஜ்ஜே² பீடி²கங் காரெத்வா தங் பரிக்கி²பந்தோ அட்ட² வா ஸோளஸ வா ஆஸனானி பஞ்ஞாபெத்வா தேஸு மம ஸாவகே நிஸீதா³பெத்வா ஸத்தாஹங் நிரந்தரங் பரித்தங் காதுங் ஸக்குணெய்யாஸி, ஏவமஸ்ஸ அந்தராயோ நஸ்ஸெய்யா’’தி. ‘‘போ⁴ கோ³தம, மயா மண்ட³பாதீ³னி ஸக்கா காதுங், தும்ஹாகங் பன ஸாவகே கத²ங் லச்சா²மீ’’தி? ‘‘தயா எத்தகே கதே அஹங் மம ஸாவகே பஹிணிஸ்ஸாமீ’’தி. ‘‘ஸாது⁴, போ⁴ கோ³தமா’’தி ஸோ அத்தனோ கே³ஹத்³வாரே ஸப்³ப³ங் கிச்சங் நிட்டா²பெத்வா ஸத்து² ஸந்திகங் அக³மாஸி. ஸத்தா² பி⁴க்கூ² பஹிணி, தே க³ந்த்வா தத்த² நிஸீதி³ங்ஸு, தா³ரகம்பி பீடி²காயங் நிபஜ்ஜாபேஸுங், பி⁴க்கூ² ஸத்தரத்திந்தி³வங் நிரந்தரங் பரித்தங் ப⁴ணிங்ஸு, ஸத்தமே தி³வஸே ஸாயங் ஸத்தா² ஆக³ச்சி². தஸ்மிங் ஆக³தே ஸப்³ப³சக்கவாளதே³வதா ஸன்னிபதிங்ஸு. ஏகோ பன அவருத்³த⁴கோ நாம யக்கோ² த்³வாத³ஸ ஸங்வச்ச²ரானி வெஸ்ஸவணங் உபட்ட²ஹித்வா தஸ்ஸ ஸந்திகா வரங் லப⁴ந்தோ ‘‘இதோ ஸத்தமே தி³வஸே இமங் தா³ரகங் க³ண்ஹெய்யாஸீ’’தி லபி⁴. தஸ்மா ஸோபி ஆக³ந்த்வா அட்டா²ஸி.
ஸத்த²ரி பன தத்த² க³தே மஹேஸக்கா²ஸு தே³வதாஸு ஸன்னிபதிதாஸு அப்பேஸக்கா² தே³வதா ஓஸக்கித்வா ஓஸக்கித்வா ஓகாஸங் அலப⁴மானா த்³வாத³ஸ யோஜனானி படிக்கமிங்ஸு. அவருத்³த⁴கோபி ததே²வ படிக்கமி, ஸத்தா²பி ஸப்³ப³ரத்திங் பரித்தமகாஸி. ஸத்தாஹே வீதிவத்தே அவருத்³த⁴கோ தா³ரகங் ந லபி⁴. அட்ட²மே பன தி³வஸே அருணே உக்³க³தமத்தே தா³ரகங் ஆனெத்வா ஸத்தா²ரங் வந்தா³பேஸுங். ஸத்தா² ‘‘தீ³கா⁴யுகோ ஹோஹீ’’தி ஆஹ. ‘‘கீவசிரங் பன, போ⁴ கோ³தம, தா³ரகோ ட²ஸ்ஸதீ’’தி? ‘‘வீஸவஸ்ஸஸதங், ப்³ராஹ்மணா’’தி. அத²ஸ்ஸ ‘‘ஆயுவட்³ட⁴னகுமாரோ’’தி நாமங் கரிங்ஸு. ஸோ வுத்³தி⁴மன்வாய பஞ்சஹி உபாஸகஸதேஹி பரிவுதோ விசரி. அதே²கதி³வஸங் த⁴ம்மஸபா⁴யங் பி⁴க்கூ² கத²ங் ஸமுட்டா²பேஸுங் ‘‘பஸ்ஸதா²வுஸோ, ஆயுவட்³ட⁴னகுமாரேன கிர ஸத்தமே தி³வஸே மரிதப்³ப³ங் அப⁴விஸ்ஸ, ஸோ இதா³னி வீஸவஸ்ஸஸதட்டா²யீ ஹுத்வா பஞ்சஹி உபாஸகஸதேஹி பரிவுதோ விசரதி, அத்தி² மஞ்ஞே இமேஸங் ஸத்தானங் ஆயுவட்³ட⁴னகாரண’’ந்தி. ஸத்தா² ஆக³ந்த்வா ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா’’தி புச்சி²த்வா ‘‘இமாய நாமா’’தி வுத்தே, ‘‘பி⁴க்க²வே, ந கேவலங் ஆயுவட்³ட⁴னமேவ, இமே பன ஸத்தா கு³ணவந்தே வந்த³ந்தா அபி⁴வாதெ³ந்தா சதூஹி காரணேஹி வட்³ட⁴ந்தி, பரிஸ்ஸயதோ முச்சந்தி, யாவதாயுகமேவ திட்ட²ந்தீ’’தி வத்வா அனுஸந்தி⁴ங் க⁴டெத்வா த⁴ம்மங் தே³ஸெந்தோ இமங் கா³த²மாஹ –
109.
‘‘அபி⁴வாத³னஸீலிஸ்ஸ , நிச்சங் வுட்³டா⁴பசாயினோ;
சத்தாரோ த⁴ம்மா வட்³ட⁴ந்தி, ஆயு வண்ணோ ஸுக²ங் ப³ல’’ந்தி.
தத்த² அபி⁴வாத³னஸீலிஸ்ஸாதி வந்த³னஸீலிஸ்ஸ, அபி⁴ண்ஹங் வந்த³னகிச்சபஸுதஸ்ஸாதி அத்தோ². வுட்³டா⁴பசாயினோதி கி³ஹிஸ்ஸ வா தத³ஹுபப்³ப³ஜிதே த³ஹரஸாமணேரேபி, பப்³ப³ஜிதஸ்ஸ வா பன பப்³ப³ஜ்ஜாய வா உபஸம்பதா³ய வா வுட்³ட⁴தரே கு³ணவுட்³டே⁴ அபசாயமானஸ்ஸ, அபி⁴வாத³னேன வா நிச்சங் பூஜெந்தஸ்ஸாதி அத்தோ². சத்தாரோ த⁴ம்மா வட்³ட⁴ந்தீதி ஆயும்ஹி வட்³ட⁴மானே யத்தகங் காலங் தங் வட்³ட⁴தி, தத்தகங் இதரேபி வட்³ட⁴ந்தியேவ. யேன ஹி பஞ்ஞாஸவஸ்ஸஆயுஸங்வத்தனிகங் குஸலங் கதங், பஞ்சவீஸதிவஸ்ஸகாலே சஸ்ஸ ஜீவிதந்தராயோ உப்பஜ்ஜெய்ய, ஸோ அபி⁴வாத³னஸீலதாய படிப்பஸ்ஸம்ப⁴தி, ஸோ யாவதாயுகமேவ திட்ட²தி, வண்ணாத³யோபிஸ்ஸ ஆயுனாவ ஸத்³தி⁴ங் வட்³ட⁴ந்தி. இதோ உத்தரிபி ஏஸேவ நயோ. அனந்தராயேன பவத்தஸ்ஸாயுனோ வட்³ட⁴னங் நாம நத்தி².
தே³ஸனாவஸானே ஆயுவட்³ட⁴னகுமாரோ பஞ்சஹி உபாஸகஸதேஹி ஸத்³தி⁴ங் ஸோதாபத்திப²லே பதிட்ட²ஹி, அஞ்ஞேபி ப³ஹூ ஸோதாபத்திப²லாதீ³னி பாபுணிங்ஸூதி.
ஆயுவட்³ட⁴னகுமாரவத்து² அட்ட²மங்.
9. ஸங்கிச்சஸாமணேரவத்து²
யோ ச வஸ்ஸஸதங் ஜீவேதி இமங் த⁴ம்மதே³ஸனங் ஸத்தா² ஜேதவனே விஹரந்தோ ஸங்கிச்சஸாமணேரங் ஆரப்³ப⁴ கதே²ஸி.
ஸாவத்தி²யங் கிர திங்ஸமத்தா குலபுத்தா ஸத்து² த⁴ம்மகத²ங் ஸுத்வா ஸாஸனே உரங் த³த்வா பப்³ப³ஜிங்ஸு. தே உபஸம்பதா³ய பஞ்சவஸ்ஸா ஹுத்வா ஸத்தா²ரங் உபஸங்கமித்வா க³ந்த²து⁴ரங் விபஸ்ஸனாது⁴ரந்தி த்³வே து⁴ரானீதி ஸுத்வா ‘‘மயங் மஹல்லககாலே பப்³ப³ஜிதா’’தி க³ந்த²து⁴ரே உஸ்ஸாஹங் அகத்வா விபஸ்ஸனாது⁴ரங் பூரேதுகாமா யாவ அரஹத்தா கம்மட்டா²னங் கதா²பெத்வா, ‘‘ப⁴ந்தே, ஏகங் அரஞ்ஞாயதனங் க³மிஸ்ஸாமா’’தி ஸத்தா²ரங் ஆபுச்சி²ங்ஸு. ஸத்தா² ‘‘கதரங் டா²னங் க³மிஸ்ஸதா²’’தி புச்சி²த்வா ‘‘அஸுகங் நாமா’’தி வுத்தே ‘‘தத்த² தேஸங் ஏகங் விகா⁴ஸாத³ங் நிஸ்ஸாய ப⁴யங் உப்பஜ்ஜிஸ்ஸதி, தஞ்ச பன ஸங்கிச்சஸாமணேரே க³தே வூபஸமிஸ்ஸதி, அத² நேஸங் பப்³ப³ஜிதகிச்சங் பாரிபூரிங் க³மிஸ்ஸதீ’’தி அஞ்ஞாஸி.
ஸங்கிச்சஸாமணேரோ நாம ஸாரிபுத்தத்தே²ரஸ்ஸ ஸாமணேரோ ஸத்தவஸ்ஸிகோ ஜாதியா. தஸ்ஸ கிர மாதா ஸாவத்தி²யங் அட்³ட⁴குலஸ்ஸ தீ⁴தா. ஸா தஸ்மிங் குச்சி²க³தே ஏகேன ப்³யாதி⁴னா தங்க²ணஞ்ஞேவ காலமகாஸி. தஸ்ஸா ஜா²பியமானாய ட²பெத்வா க³ப்³ப⁴மங்ஸங் ஸேஸங் ஜா²யி. அத²ஸ்ஸா க³ப்³ப⁴மங்ஸங் சிதகதோ ஓதாரெத்வா த்³வீஸு தீஸு டா²னேஸு ஸூலேஹி விஜ்ஜி²ங்ஸு. ஸூலகோடி தா³ரகஸ்ஸ அக்கி²கோடிங் பஹரி. ஏவங் க³ப்³ப⁴மங்ஸங் விஜ்ஜி²த்வா அங்கா³ரராஸிம்ஹி கி²பித்வா அங்கா³ரேஹேவ படிச்சா²தெ³த்வா பக்கமிங்ஸு. க³ப்³ப⁴மங்ஸங் ஜா²யி, அங்கா³ரமத்த²கே பன ஸுவண்ணபி³ம்ப³ஸதி³ஸோ தா³ரகோ பது³மக³ப்³பே⁴ நிபன்னோ விய அஹோஸி. பச்சி²மப⁴விகஸ்ஸ ஸத்தஸ்ஸ ஹி ஸினேருனா ஒத்த²ரியமானஸ்ஸபி அரஹத்தங் அப்பத்வா ஜீவிதக்க²யோ நாம நத்தி². புனதி³வஸே ‘‘சிதகங் நிப்³பா³பெஸ்ஸாமா’’தி ஆக³தா ததா²னிபன்னங் தா³ரகங் தி³ஸ்வா அச்ச²ரியப்³பு⁴தசித்தஜாதா ‘‘கத²ஞ்ஹி நாம எத்தகேஸு தா³ரூஸு கீ²யமானேஸு ஸகலஸரீரே ஜா²பியமானே தா³ரகோ ந ஜா²யி, கிங் நு கோ² ப⁴விஸ்ஸதீ’’தி தா³ரகங் ஆதா³ய அந்தோகா³மங் க³ந்த்வா நேமித்தகே புச்சி²ங்ஸு. நேமித்தகா ‘‘ஸசே அயங் தா³ரகோ அகா³ரங் அஜ்ஜா²வஸ்ஸிஸ்ஸதி, யாவ ஸத்தமா குலபரிவட்டா ஞாதகா து³க்³க³தா ப⁴விஸ்ஸந்தி? ஸசே பப்³ப³ஜிஸ்ஸதி, பஞ்சஹி ஸமணஸதேஹி பரிவுதோ விசரிஸ்ஸதீ’’தி ஆஹங்ஸு. தஸ்ஸ ஸங்குனா அக்கி²கோடியா பி⁴ன்னத்தா ஸங்கிச்சந்தி நாமங் கரிங்ஸு. ஸோ அபரேன ஸமயேன ஸங்கிச்சோதி பஞ்ஞாயி. அத² நங் ஞாதகா ‘‘ஹோது, வட்³டி⁴தகாலே அம்ஹாகங் அய்யஸ்ஸ ஸாரிபுத்தஸ்ஸ ஸந்திகே பப்³பா³ஜெஸ்ஸாமா’’தி போஸிங்ஸு. ஸோ ஸத்தவஸ்ஸிககாலே ‘‘தவ மாதுகுச்சி²யங் வஸனகாலே மாதா தே காலமகாஸி, தஸ்ஸா ஸரீரே ஜா²பியமானேபி த்வங் ந ஜா²யீ’’தி குமாரகானங் கத²ங் ஸுத்வா ‘‘அஹங் கிர ஏவரூபா ப⁴யா முத்தோ, கிங் மே க⁴ராவாஸேன, பப்³ப³ஜிஸ்ஸாமீ’’தி ஞாதகானங் ஆரோசேஸி. தே ‘‘ஸாது⁴, தாதா’’தி ஸாரிபுத்தத்தே²ரஸ்ஸ ஸந்திகங் நெத்வா, ‘‘ப⁴ந்தே, இமங் பப்³பா³ஜேதா²’’தி அத³ங்ஸு. தே²ரோ தசபஞ்சககம்மட்டா²னங் த³த்வா பப்³பா³ஜேஸி. ஸோ கு²ரக்³கே³யேவ ஸஹ படிஸம்பி⁴தா³ஹி அரஹத்தங் பாபுணி. அயங் ஸங்கிச்சஸாமணேரோ நாம.
ஸத்தா² ‘‘ஏதஸ்மிங் க³தே தங் ப⁴யங் வூபஸமிஸ்ஸதி, அத² நேஸங் பப்³ப³ஜிதகிச்சங் பாரிபூரிங் க³மிஸ்ஸதீ’’தி ஞத்வா, ‘‘பி⁴க்க²வே, தும்ஹாகங் ஜெட்ட²பா⁴திகங் ஸாரிபுத்தத்தே²ரங் ஓலோகெத்வா க³ச்ச²தா²’’தி ஆஹ. தே ‘‘ஸாதூ⁴’’தி வத்வா தே²ரஸ்ஸ ஸந்திகங் க³ந்த்வா ‘‘கிங், ஆவுஸோ’’தி வுத்தே மயங் ஸத்து² ஸந்திகே கம்மட்டா²னங் க³ஹெத்வா அரஞ்ஞங் பவிஸிதுகாமா ஹுத்வா ஆபுச்சி²ம்ஹா, அத² நோ ஸத்தா² ஏவமாஹ – ‘‘தும்ஹாகங் ஜெட்ட²பா⁴திகங் ஓலோகெத்வா க³ச்ச²தா²’’தி? ‘‘தேனம்ஹா இதா⁴க³தா’’தி. தே²ரோ ‘‘ஸத்தா²ரா இமே ஏகங் காரணங் தி³ஸ்வா இத⁴ பஹிதா ப⁴விஸ்ஸந்தி, கிங் நு கோ² ஏத’’ந்தி ஆவஜ்ஜெந்தோ தமத்த²ங் ஞத்வா ஆஹ – ‘‘அத்தி² பன வோ, ஆவுஸோ, ஸாமணேரோ’’தி? ‘‘நத்தி², ஆவுஸோ’’தி. ‘‘ஸசே நத்தி², இமங் ஸங்கிச்சஸாமணேரங் க³ஹெத்வா க³ச்ச²தா²’’தி. ‘‘அலங், ஆவுஸோ, ஸாமணேரங் நிஸ்ஸாய நோ பலிபோ³தோ⁴ ப⁴விஸ்ஸதி, கிங் அரஞ்ஞே வஸந்தானங் ஸாமணேரேனா’’தி? ‘‘நாவுஸோ , இமங் நிஸ்ஸாய தும்ஹாகங் பலிபோ³தோ⁴, அபிச கோ² பன தும்ஹே நிஸ்ஸாய இமஸ்ஸ பலிபோ³தோ⁴ ப⁴விஸ்ஸதி. ஸத்தா²பி தும்ஹே மம ஸந்திகங் பஹிணந்தோ தும்ஹேஹி ஸத்³தி⁴ங் ஸாமணேரஸ்ஸ பஹிணனங் பச்சாஸீஸந்தோ பஹிணி, இமங் க³ஹெத்வா க³ச்ச²தா²’’தி. தே ‘‘ஸாதூ⁴’’தி அதி⁴வாஸெத்வா ஸாமணேரேன ஸத்³தி⁴ங் ஏகதிங்ஸ ஜனா தே²ரங் அபலோகெத்வா விஹாரா நிக்க²ம்ம சாரிகங் சரந்தா வீஸயோஜனஸதமத்த²கே ஏகங் ஸஹஸ்ஸகுலங் கா³மங் பாபுணிங்ஸு.
மனுஸ்ஸா தே தி³ஸ்வா பஸன்னசித்தா ஸக்கச்சங் பரிவிஸித்வா, ‘‘ப⁴ந்தே, கத்த² க³மிஸ்ஸதா²’’தி புச்சி²த்வா ‘‘யதா²பா²ஸுகட்டா²னங், ஆவுஸோ’’தி வுத்தே பாத³மூலே நிபஜ்ஜித்வா ‘‘மயங், ப⁴ந்தே, அய்யேஸு இமங் டா²னங் நிஸ்ஸாய அந்தோவஸ்ஸங் வஸந்தேஸு பஞ்சஸீலங் ஸமாதா³ய உபோஸத²கம்மங் கரிஸ்ஸாமா’’தி யாசிங்ஸு. தே²ரா அதி⁴வாஸேஸுங். அத² நேஸங் மனுஸ்ஸா ரத்திட்டா²னதி³வாட்டா²னசங்கமனபண்ணஸாலாயோ ஸங்வித³ஹித்வா ‘‘அஜ்ஜ மயங், ஸ்வே மய’’ந்தி உஸ்ஸாஹப்பத்தா உபட்டா²னமகங்ஸு. தே²ரா வஸ்ஸூபனாயிகதி³வஸே கதிகவத்தங் கரிங்ஸு, ‘‘ஆவுஸோ, அம்ஹேஹி த⁴ரமானகபு³த்³த⁴ஸ்ஸ ஸந்திகே கம்மட்டா²னங் க³ஹிதங், ந கோ² பன ஸக்கா அஞ்ஞத்ர படிபத்திஸம்பதா³ய பு³த்³தே⁴ ஆராதே⁴துங், அம்ஹாகஞ்ச அபாயத்³வாரானி விவடானேவ, தஸ்மா அஞ்ஞத்ர பாதோ பி⁴க்கா²சாரவேலங், ஸாயங் தே²ரூபட்டா²னவேலஞ்ச ஸேஸகாலே த்³வே ஏகட்டா²னே ந ப⁴விஸ்ஸாம, யஸ்ஸ அபா²ஸுகங் ப⁴விஸ்ஸதி, தேன க⁴ண்டி³யா பஹடாய தஸ்ஸ ஸந்திகங் க³ந்த்வா பே⁴ஸஜ்ஜங் கரிஸ்ஸாம, இதோ அஞ்ஞஸ்மிங் ரத்திபா⁴கே³ வா தி³வஸபா⁴கே³ வா அப்பமத்தா கம்மட்டா²னமனுயுஞ்ஜிஸ்ஸாமா’’தி.
தேஸு ஏவங் கதிகங் கத்வா விஹரந்தேஸு ஏகோ து³க்³க³தபுரிஸோ தீ⁴தரங் உபனிஸ்ஸாய ஜீவந்தோ தஸ்மிங் டா²னே து³ப்³பி⁴க்கே² உப்பன்னே அபரங் தீ⁴தரங் உபனிஸ்ஸாய ஜீவிதுகாமோ மக்³க³ங் படிபஜ்ஜி. தே²ராபி கா³மே பிண்டா³ய சரித்வா வஸனட்டா²னங் ஆக³ச்ச²ந்தா அந்தராமக்³கே³ ஏகிஸ்ஸா நதி³யா ந்ஹத்வா வாலுகபுலினே நிஸீதி³த்வா ப⁴த்தகிச்சங் கரிங்ஸு. தஸ்மிங் க²ணே ஸோ புரிஸோ தங் டா²னங் பத்வா ஏகமந்தங் அட்டா²ஸி. அத² நங் தே²ரா ‘‘கஹங் க³ச்ச²ஸீ’’தி புச்சி²ங்ஸு. ஸோ தமத்த²ங் ஆரோசேஸி. தே²ரா தஸ்மிங் காருஞ்ஞங் உப்பாதெ³த்வா, ‘‘உபாஸக, அதிவிய சா²தோஸி, க³ச்ச², பண்ணங் ஆஹர, ஏகமேகங் தே ப⁴த்தபிண்ட³ங் த³ஸ்ஸாமா’’தி வத்வா தேன பண்ணே ஆஹடே அத்தனா அத்தனா பு⁴ஞ்ஜனநியாமேனேவ ஸூபப்³யஞ்ஜனேஹி ஸன்னஹித்வா ஏகமேகங் பிண்ட³ங் அத³ங்ஸு. ஏததே³வ கிர வத்தங், யங் போ⁴ஜனகாலே ஆக³தஸ்ஸ ப⁴த்தங் த³த³மானேன பி⁴க்கு²னா அக்³க³ப⁴த்தங் அத³த்வா அத்தனா பு⁴ஞ்ஜனநியாமேனேவ தோ²கங் வா ப³ஹுங் வா தா³தப்³ப³ங். தஸ்மா தேபி ததா² அத³ங்ஸு. ஸோ கதப⁴த்தகிச்சோ தே²ரே வந்தி³த்வா புச்சி² – ‘‘கிங், ப⁴ந்தே, அய்யா, கேனசி நிமந்திதா’’தி? ‘‘நத்தி², உபாஸக, நிமந்தனங், மனுஸ்ஸா தே³வஸிகங் ஏவரூபமேவ ஆஹாரங் தெ³ந்தீ’’தி. ஸோ சிந்தேஸி – ‘‘மயங் நிச்சகாலங் உட்டா²ய ஸமுட்டா²ய கம்மங் கரொந்தாபி ஏவரூபங் ஆஹாரங் லத்³து⁴ங் ந ஸக்கோம, கிங் மே அஞ்ஞத்த² க³தேன, இமேஸங் ஸந்திகேயேவ ஜீவிஸ்ஸாமீ’’தி. அத² நே ஆஹ – ‘‘அஹங் வத்தபடிவத்தங் கத்வா அய்யானங் ஸந்திகே வஸிதுங் இச்சா²மீ’’தி. ‘‘ஸாது⁴, உபாஸகா’’தி. ஸோ தேஹி ஸத்³தி⁴ங் தேஸங் வஸனட்டா²னங் க³ந்த்வா ஸாது⁴கங் வத்தபடிவத்தங் கரொந்தோ பி⁴க்கூ² அதிவிய ஆராதெ⁴த்வா த்³வேமாஸச்சயேன தீ⁴தரங் த³ட்டு²காமோ ஹுத்வா ‘‘ஸசே, அய்யே, ஆபுச்சி²ஸ்ஸாமி, ந மங் விஸ்ஸஜ்ஜிஸ்ஸந்தி, அனாபுச்சா² க³மிஸ்ஸாமீ’’தி தேஸங் அனாசிக்கி²த்வாவ நிக்க²மி. எத்தகமேவ கிரஸ்ஸ ஓளாரிகங் க²லிதங் அஹோஸி, யங் பி⁴க்கூ²னங் அனாரோசெத்வா பக்காமி.
தஸ்ஸ பன க³மனமக்³கே³ ஏகா அடவீ அத்தி². தத்த² பஞ்சஸதானங் சோரானங் ‘‘யோ இமங் அடவிங் பவிஸதி, தங் மாரெத்வா தஸ்ஸ மங்ஸலோஹிதேன துய்ஹங் ப³லிகம்மங் கரிஸ்ஸாமா’’தி தே³வதாய ஆயாசனங் கத்வா வஸந்தானங் ஸத்தமோ தி³வஸோ ஹோதி. தஸ்மா ஸத்தமே தி³வஸே சோரஜெட்ட²கோ ருக்க²ங் ஆருய்ஹ ஓலோகெந்தோ தங் ஆக³ச்ச²ந்தங் தி³ஸ்வா சோரானங் ஸஞ்ஞமதா³ஸி. தே தஸ்ஸ அடவிமஜ்ஜ²ங் பவிட்ட²பா⁴வங் ஞத்வா பரிக்கி²பித்வா தங் க³ண்ஹித்வா கா³ள்ஹப³ந்த⁴னங் கத்வா அரணிஸஹிதேன அக்³கி³ங் நிப்³ப³த்தெத்வா தா³ரூனி ஸங்கட்³டி⁴த்வா மஹந்தங் அக்³கி³க்க²ந்த⁴ங் கத்வா ஸூலானி தச்சி²ங்ஸு. ஸோ தேஸங் தங் கிரியங் தி³ஸ்வா, ‘‘ஸாமி, இமஸ்மிங் டா²னே நேவ ஸூகரா, ந மிகா³த³யோ தி³ஸ்ஸந்தி, கிங் காரணா இத³ங் கரோதா²’’தி புச்சி². ‘‘தங் மாரெத்வா தவ மங்ஸலோஹிதேன தே³வதாய ப³லிகம்மங் கரிஸ்ஸாமா’’தி. ஸோ மரணப⁴யதஜ்ஜிதோ பி⁴க்கூ²னங் தங் உபகாரங் அசிந்தெத்வா கேவலங் அத்தனோ ஜீவிதமேவ ரக்க²மானோ ஏவமாஹ – ‘‘ஸாமி, அஹங் விகா⁴ஸாதோ³, உச்சி²ட்ட²ப⁴த்தங் பு⁴ஞ்ஜித்வா வட்³டி⁴தோ, விகா⁴ஸாதோ³ நாம காளகண்ணிகோ, அய்யா பன யதோ ததோ நிக்க²மித்வா பப்³ப³ஜிதாபி க²த்தியாவ, அஸுகஸ்மிங் டா²னே ஏகதிங்ஸ பி⁴க்கூ² வஸந்தி, தே மாரெத்வா ப³லிகம்மங் கரோத², அதிவிய வோ தே³வதா துஸ்ஸிஸ்ஸதீ’’தி. தங் ஸுத்வா சோரா ‘‘ப⁴த்³த³கங் ஏஸ வதே³தி, கிங் இமினா காளகண்ணினா, க²த்தியே மாரெத்வா ப³லிகம்மங் கரிஸ்ஸாமா’’தி சிந்தெத்வா ‘‘ஏஹி, நேஸங் வஸனட்டா²னங் த³ஸ்ஸேஹீ’’தி தமேவ மக்³க³தே³ஸகங் கத்வா தங் டா²னங் பத்வா விஹாரமஜ்ஜே² பி⁴க்கூ² அதி³ஸ்வா ‘‘கஹங் பி⁴க்கூ²’’தி நங் புச்சி²ங்ஸு. ஸோ த்³வே மாஸே வஸிதத்தா தேஸங் கதிகவத்தங் ஜானந்தோ ஏவமாஹ – ‘‘அத்தனோ தி³வாட்டா²னரத்திட்டா²னேஸு நிஸின்னா, ஏதங் க⁴ண்டி³ங் பஹரத², க⁴ண்டி³ஸத்³தே³ன ஸன்னிபதிஸ்ஸந்தீ’’தி. சோரஜெட்ட²கோ க⁴ண்டி³ங் பஹரி.
பி⁴க்கூ² க⁴ண்டி³ஸத்³த³ங் ஸுத்வா ‘‘அகாலே க⁴ண்டி³ பஹடா, கஸ்ஸசி அபா²ஸுகங் ப⁴விஸ்ஸதீ’’தி ஆக³ந்த்வா விஹாரமஜ்ஜே² படிபாடியா பஞ்ஞத்தேஸு பாஸாணப²லகேஸு நிஸீதி³ங்ஸு. ஸங்க⁴த்தே²ரோ சோரே ஓலோகெத்வா புச்சி² – ‘‘உபாஸகா கேனாயங் க⁴ண்டி³ பஹடா’’தி? சோரஜெட்ட²கோ ஆஹ – ‘‘மயா, ப⁴ந்தே’’தி. ‘‘கிங் காரணா’’தி? ‘‘அம்ஹேஹி அடவிதே³வதாய ஆயாசிதங் அத்தி², தஸ்ஸா ப³லிகம்மகரணத்தா²ய ஏகங் பி⁴க்கு²ங் க³ஹெத்வா க³மிஸ்ஸாமா’’தி. தங் ஸுத்வா மஹாதே²ரோ பி⁴க்கூ² ஆஹ – ‘‘ஆவுஸோ, பா⁴திகானங் உப்பன்னகிச்சங் நாம ஜெட்ட²பா⁴திகேன நித்த²ரிதப்³ப³ங், அஹங் அத்தனோ ஜீவிதங் தும்ஹாகங் பரிச்சஜித்வா இமேஹி ஸத்³தி⁴ங் க³மிஸ்ஸாமி, மா ஸப்³பே³ஸங் அந்தராயோ ஹோது, அப்பமத்தா ஸமணத⁴ம்மங் கரோதா²’’தி. அனுதே²ரோ ஆஹ – ‘‘ப⁴ந்தே, ஜெட்ட²பா⁴து கிச்சங் நாம கனிட்ட²ஸ்ஸ பா⁴ரோ, அஹங் க³மிஸ்ஸாமி, தும்ஹே அப்பமத்தா ஹோதா²’’தி. இமினா உபாயேன ‘‘அஹமேவ அஹமேவா’’தி வத்வா படிபாடியா திங்ஸபி ஜனா உட்ட²ஹிங்ஸு, ஏவங் தே நேவ ஏகிஸ்ஸா மாதுயா புத்தா, ந ஏகஸ்ஸ பிதுனோ, நாபி வீதராகா³, அத² ச பன அவஸேஸானங் அத்தா²ய படிபாடியா ஜீவிதங் பரிச்சஜிங்ஸு. தேஸு ஏகோபி ‘‘த்வங் யாஹீ’’தி வத்துங் ஸமத்தோ² நாம நாஹோஸி.
ஸங்கிச்சஸாமணேரோ தேஸங் கத²ங் ஸுத்வா, ‘‘ப⁴ந்தே, தும்ஹே திட்ட²த² , அஹங் தும்ஹாகங் ஜீவிதங் பரிச்சஜித்வா க³மிஸ்ஸாமீ’’தி ஆஹ. தே ஆஹங்ஸு – ‘‘ஆவுஸோ, மயங் ஸப்³பே³ ஏகதோ மாரியமானாபி தங் ஏககங் ந விஸ்ஸஜ்ஜெஸ்ஸாமா’’தி. ‘‘கிங் காரணா, ப⁴ந்தே’’தி? ‘‘‘ஆவுஸோ, த்வங் த⁴ம்மஸேனாபதிஸாரிபுத்தத்தே²ரஸ்ஸ ஸாமணேரோ, ஸசே தங் விஸ்ஸஜ்ஜெஸ்ஸாம, ஸாமணேரங் மே ஆதா³ய க³ந்த்வா சோரானங் நிய்யாதி³ங்ஸூ’தி தே²ரோ நோ க³ரஹிஸ்ஸதி, தங் நிந்த³ங் நித்த²ரிதுங் ந ஸக்கி²ஸ்ஸாம, தேன தங் ந விஸ்ஸஜ்ஜெஸ்ஸாமா’’தி. ‘‘ப⁴ந்தே, ஸம்மாஸம்பு³த்³தோ⁴ தும்ஹே மம உபஜ்ஜா²யஸ்ஸ ஸந்திகங் பஹிணந்தோபி, மம உபஜ்ஜா²யோ மங் தும்ஹேஹி ஸத்³தி⁴ங் பஹிணந்தோபி இத³மேவ காரணங் தி³ஸ்வா பஹிணி, திட்ட²த² தும்ஹே, அஹமேவ க³மிஸ்ஸாமீ’’தி ஸோ திங்ஸ பி⁴க்கூ² வந்தி³த்வா ‘‘ஸசே, ப⁴ந்தே, மே தோ³ஸோ அத்தி², க²மதா²’’தி வத்வா நிக்க²மி. ததா³ பி⁴க்கூ²னங் மஹாஸங்வேகோ³ உப்பஜ்ஜி, அக்கீ²னி அஸ்ஸுபுண்ணானி ஹத³யமங்ஸங் பவேதி⁴. மஹாதே²ரோ சோரே ஆஹ – ‘‘உபாஸகா அயங் த³ஹரகோ தும்ஹே அக்³கி³ங் கரொந்தே, ஸூலானி தச்ச²ந்தே, பண்ணானி அத்த²ரந்தே தி³ஸ்வா பா⁴யிஸ்ஸதி, இமங் ஏகமந்தே ட²பெத்வா தானி கிச்சானி கரெய்யாதா²’’தி. சோரா ஸாமணேரங் ஆதா³ய க³ந்த்வா ஏகமந்தே ட²பெத்வா ஸப்³ப³கிச்சானி கரிங்ஸு.
கிச்சபரியோஸானே சோரஜெட்ட²கோ அஸிங் அப்³பா³ஹித்வா ஸாமணேரங் உபஸங்கமி. ஸாமணேரோ நிஸீத³மானோ ஜா²னங் ஸமாபஜ்ஜித்வாவ நிஸீதி³. சோரஜெட்ட²கோ அஸிங் பரிவத்தெத்வா ஸாமணேரஸ்ஸ க²ந்தே⁴ பாதேஸி, அஸி நமித்வா தா⁴ராய தா⁴ரங் பஹரி, ஸோ ‘‘ந ஸம்மா பஹரி’’ந்தி மஞ்ஞமானோ புன தங் உஜுகங் கத்வா பஹரி. அஸி தாலபண்ணங் விய வேட²யமானோ த²ருமூலங் அக³மாஸி. ஸாமணேரஞ்ஹி தஸ்மிங் காலே ஸினேருனா அவத்த²ரந்தோபி மாரேதுங் ஸமத்தோ² நாம நத்தி², பகே³வ அஸினா. தங் பாடிஹாரியங் தி³ஸ்வா சோரஜெட்ட²கோ சிந்தேஸி – ‘‘புப்³பே³ மே அஸி ஸிலாத²ம்ப⁴ங் வா க²தி³ரகா²ணுங் வா களீரங் விய சி²ந்த³தி, இதா³னி ஏகவாரங் நமி, ஏகவாரங் தாலபத்தவேட²கோ விய ஜாதோ. அயங் நாம அஸி அசேதனா ஹுத்வாபி இமஸ்ஸ கு³ணங் ஜானாதி, அஹங் ஸசேதனோபி ந ஜானாமீ’’தி. ஸோ அஸிங் பூ⁴மியங் கி²பித்வா தஸ்ஸ பாத³மூலே உரேன நிபஜ்ஜித்வா, ‘‘ப⁴ந்தே, மயங் த⁴னகாரணா அடவிங் பவிட்டா²ம்ஹா, அம்ஹே தூ³ரதோவ தி³ஸ்வா ஸஹஸ்ஸமத்தாபி மனுஸ்ஸா பவேத⁴ந்தி, த்³வே திஸ்ஸோ கதா² கதே²துங் ந ஸக்கொந்தி. தவ பன ஸந்தாஸமத்தம்பி நத்தி², உக்காமுகே² ஸுவண்ணங் விய ஸுபுப்பி²தகணிகாரங் விய ச தே முக²ங் விரோசதி, கிங் நு கோ² காரண’’ந்தி புச்ச²ந்தோ இமங் கா³த²மாஹ –
‘‘தஸ்ஸ தே நத்தி² பீ⁴தத்தங், பி⁴ய்யோ வண்ணோ பஸீத³தி;
கஸ்மா ந பரிதே³வேஸி, ஏவரூபே மஹப்³ப⁴யே’’தி. (தே²ரகா³॰ 706);
ஸாமணேரோ ஜா²னா வுட்டா²ய தஸ்ஸ த⁴ம்மங் தே³ஸெந்தோ, ‘‘ஆவுஸோ கா³மணி, கீ²ணாஸவஸ்ஸ அத்தபா⁴வோ நாம ஸீஸே ட²பிதபா⁴ரோ விய ஹோதி, ஸோ தஸ்மிங் பி⁴ஜ்ஜந்தே வா நஸ்ஸந்தே வா துஸ்ஸதேவ, ந பா⁴யதீ’’தி வத்வா இமா கா³தா² அபா⁴ஸி –
‘‘நத்தி² சேதஸிகங் து³க்க²ங், அனபெக்க²ஸ்ஸ கா³மணி;
அதிக்கந்தா ப⁴யா ஸப்³பே³, கீ²ணஸங்யோஜனஸ்ஸ வே.
‘‘கீ²ணாய ப⁴வனெத்தியா, தி³ட்டே² த⁴ம்மே யதா²ததே²;
ந ப⁴யங் மரணே ஹோதி, பா⁴ரனிக்கே²பனே யதா²’’தி. (தே²ரகா³॰ 707-708);
ஸோ தஸ்ஸ கத²ங் ஸுத்வா பஞ்ச சோரஸதானி ஓலோகெத்வா ஆஹ – ‘‘தும்ஹே கிங் கரிஸ்ஸதா²’’தி? ‘‘தும்ஹே பன, ஸாமீ’’தி. ‘‘மம தாவ, போ⁴, ‘ஏவரூபங் பாடிஹாரியங் தி³ஸ்வா அகா³ரமஜ்ஜே² கம்மங் நத்தி², அய்யஸ்ஸ ஸந்திகே பப்³ப³ஜிஸ்ஸாமீ’தி. மயம்பி ததே²வ கரிஸ்ஸாமா’’தி. ‘‘ஸாது⁴, தாதா’’தி ததோ பஞ்சஸதாபி சோரா ஸாமணேரங் வந்தி³த்வா பப்³ப³ஜ்ஜங் யாசிங்ஸு . ஸோ தேஸங் அஸிதா⁴ராஹி ஏவ கேஸே சேவ வத்த²த³ஸா ச சி²ந்தி³த்வா தம்ப³மத்திகாய ரஜித்வா தானி காஸாயானி அச்சா²தா³பெத்வா த³ஸஸு ஸீலேஸு பதிட்டா²பெத்வா தே ஆதா³ய க³ச்ச²ந்தோ சிந்தேஸி – ‘‘ஸசாஹங் தே²ரே அதி³ஸ்வாவ க³மிஸ்ஸாமி, தே ஸமணத⁴ம்மங் காதுங் ந ஸக்கி²ஸ்ஸந்தி. சோரானஞ்ஹி மங் க³ஹெத்வா நிக்க²ந்தகாலதோ பட்டா²ய தேஸு ஏகோபி அஸ்ஸூனி ஸந்தா⁴ரேதுங் நாஸக்கி², ‘மாரிதோ நு கோ² ஸாமணேரோ, நோ’தி சிந்தெந்தானங் கம்மட்டா²னங் அபி⁴முக²ங் ந ப⁴விஸ்ஸதி, தஸ்மா தி³ஸ்வாவ நே க³மிஸ்ஸாமீ’’தி. ஸோ பஞ்சஸதபி⁴க்கு²பரிவாரோ தத்த² க³ந்த்வா அத்தனோ த³ஸ்ஸனேன படிலத்³த⁴அஸ்ஸாஸேஹி தேஹி ‘‘கிங், ஸப்புரிஸ, ஸங்கிச்ச, லத்³த⁴ங் தே ஜீவித’’ந்தி வுத்தே, ‘‘ஆம, ப⁴ந்தே, இமே மங் மாரேதுகாமா ஹுத்வா மாரேதுங் அஸக்கொந்தா மம கு³ணே பஸீதி³த்வா த⁴ம்மங் ஸுத்வா பப்³ப³ஜிதா, அஹங் ‘தும்ஹே தி³ஸ்வாவ க³மிஸ்ஸாமீ’தி ஆக³தோ, அப்பமத்தா ஸமணத⁴ம்மங் கரோத², அஹங் ஸத்து² ஸந்திகங் க³மிஸ்ஸாமீ’’தி தே பி⁴க்கூ² வந்தி³த்வா இதரே ஆதா³ய உபஜ்ஜா²யஸ்ஸ ஸந்திகங் க³ந்த்வா ‘‘கிங் ஸங்கிச்ச, அந்தேவாஸிகா தே லத்³தா⁴’’தி வுத்தே, ‘‘ஆம, ப⁴ந்தே’’தி தங் பவத்திங் ஆரோசேஸி. தே²ரேன ‘‘க³ச்ச² ஸங்கிச்ச, ஸத்தா²ரங் பஸ்ஸாஹீ’’தி வுத்தே, ‘‘ஸாதூ⁴’’தி தே²ரங் வந்தி³த்வா தே ஆதா³ய ஸத்து² ஸந்திகங் க³ந்த்வா ஸத்தா²ராபி ‘‘கிங் ஸங்கிச்ச, அந்தேவாஸிகா தே லத்³தா⁴’’தி வுத்தே, ‘‘ஆம, ப⁴ந்தே’’தி தங் பவத்திங் ஆரோசேஸி. ஸத்தா² ‘‘ஏவங் கிர, பி⁴க்க²வே’’தி புச்சி²த்வா, ‘‘ஆம, ப⁴ந்தே’’தி வுத்தே, ‘‘பி⁴க்க²வே, தும்ஹாகங் சோரகம்மங் கத்வா து³ஸ்ஸீலே பதிட்டா²ய வஸ்ஸஸதங் ஜீவனதோ இதா³னி ஸீலே பதிட்டா²ய ஏகதி³வஸம்பி ஜீவிதங் ஸெய்யோ’’தி வத்வா அனுஸந்தி⁴ங் க⁴டெத்வா த⁴ம்மங் தே³ஸெந்தோ இமங் கா³த²மாஹ –
110.
‘‘யோ ச வஸ்ஸஸதங் ஜீவே, து³ஸ்ஸீலோ அஸமாஹிதோ;
ஏகாஹங் ஜீவிதங் ஸெய்யோ, ஸீலவந்தஸ்ஸ ஜா²யினோ’’தி.
தத்த² து³ஸ்ஸீலோதி நிஸ்ஸீலோ. ஸீலவந்தஸ்ஸாதி து³ஸ்ஸீலஸ்ஸ வஸ்ஸஸதங் ஜீவனதோ ஸீலவந்தஸ்ஸ த்³வீஹி ஜா²னேஹி ஜா²யினோ ஏகதி³வஸம்பி ஏகமுஹுத்தம்பி ஜீவிதங் ஸெய்யோ, உத்தமந்தி அத்தோ².
தே³ஸனாவஸானே தே பஞ்சஸதாபி பி⁴க்கூ² ஸஹ படிஸம்பி⁴தா³ஹி அரஹத்தங் பாபுணிங்ஸு, ஸம்பத்தமஹாஜனஸ்ஸாபி ஸாத்தி²கா த⁴ம்மதே³ஸனா அஹோஸீதி.
அபரேன ஸமயேன ஸங்கிச்சோ உபஸம்பத³ங் லபி⁴த்வா த³ஸவஸ்ஸோ ஹுத்வா ஸாமணேரங் க³ண்ஹி. ஸோ பன தஸ்ஸேவ பா⁴கி³னெய்யோ அதி⁴முத்தஸாமணேரோ நாம. அத² நங் தே²ரோ பரிபுண்ணவஸ்ஸகாலே ஆமந்தெத்வா ‘‘உபஸம்பத³ங் தே கரிஸ்ஸாமி, க³ச்ச², ஞாதகானங் ஸந்திகே வஸ்ஸபரிமாணங் புச்சி²த்வா ஏஹீ’’தி உய்யோஜேஸி. ஸோ மாதாபிதூனங் ஸந்திகங் க³ச்ச²ந்தோ அந்தராமக்³கே³ பஞ்சஸதேஹி சோரேஹி ப³லிகம்மத்தா²ய மாரியமானோ தேஸங் த⁴ம்மங் தே³ஸெத்வா பஸன்னசித்தேஹி தேஹி ‘‘ந தே இமஸ்மிங் டா²னே அம்ஹாகங் அத்தி²பா⁴வோ கஸ்ஸசி ஆரோசேதப்³போ³’’தி விஸ்ஸட்டோ² படிபதே² மாதாபிதரோ ஆக³ச்ச²ந்தே தி³ஸ்வா தமேவ மக்³க³ங் படிபஜ்ஜந்தானம்பி தேஸங் ஸச்சமனுரக்க²ந்தோ நாரோசேஸி. தேஸங் சோரேஹி விஹேடி²யமானானங் ‘‘த்வம்பி சோரேஹி ஸத்³தி⁴ங் ஏகதோ ஹுத்வா மஞ்ஞே, அம்ஹாகங் நாரோசேஸீ’’தி பரிதே³வந்தானங் ஸத்³த³ங் ஸுத்வா தே மாதாபிதூனம்பி அனாரோசிதபா⁴வங் ஞத்வா பஸன்னசித்தா பப்³ப³ஜ்ஜங் யாசிங்ஸு. ஸோபி ஸங்கிச்சஸாமணேரோ விய தே ஸப்³பே³ பப்³பா³ஜெத்வா உபஜ்ஜா²யஸ்ஸ ஸந்திகங் ஆனெத்வா தேன ஸத்து² ஸந்திகங் பேஸிதோ க³ந்த்வா தங் பவத்திங் ஆரோசேஸி. ஸத்தா² ‘‘ஏவங் கிர, பி⁴க்க²வே’’தி புச்சி²த்வா, ‘‘ஆம, ப⁴ந்தே’’தி வுத்தே புரிமனயேனேவ அனுஸந்தி⁴ங் க⁴டெத்வா த⁴ம்மங் தே³ஸெந்தோ இமமேவ கா³த²மாஹ –
‘‘யோ ச வஸ்ஸஸதங் ஜீவே, து³ஸ்ஸீலோ அஸமாஹிதோ;
ஏகாஹங் ஜீவிதங் ஸெய்யோ, ஸீலவந்தஸ்ஸ ஜா²யினோ’’தி.
இத³ம்பி அதி⁴முத்தஸாமணேரவத்து² வுத்தனயமேவாதி.
ஸங்கிச்சஸாமணேரவத்து² நவமங்.
10. கா²ணுகொண்ட³ஞ்ஞத்தே²ரவத்து²
யோ ச வஸ்ஸஸதங் ஜீவேதி இமங் த⁴ம்மதே³ஸனங் ஸத்தா² ஜேதவனே விஹரந்தோ கா²ணுகொண்ட³ஞ்ஞத்தே²ரங் ஆரப்³ப⁴ கதே²ஸி.
ஸோ கிர தே²ரோ ஸத்து² ஸந்திகே கம்மட்டா²னங் க³ஹெத்வா அரஞ்ஞே விஹரந்தோ அரஹத்தங் பத்வா ‘‘ஸத்து² ஆரோசெஸ்ஸாமீ’’தி ததோ ஆக³ச்ச²ந்தோ அந்தராமக்³கே³ கிலந்தோ மக்³கா³ ஓக்கம்ம ஏகஸ்மிங் பிட்டி²பாஸாணே நிஸின்னோ ஜா²னங் ஸமாபஜ்ஜி. அதே²கங் கா³மங் விலும்பித்வா பஞ்சஸதா சோரா அத்தனோ ப³லானுரூபேன ப⁴ண்டி³கங் ப³ந்தி⁴த்வா ஸீஸேனாதா³ய க³ச்ச²ந்தா தூ³ரங் க³ந்த்வா கிலந்தரூபா ‘‘தூ³ரங் ஆக³தாம்ஹ, இமஸ்மிங் பிட்டி²பாஸாணே விஸ்ஸமிஸ்ஸாமா’’தி மக்³கா³ ஓக்கம்ம பிட்டி²பாஸாணஸ்ஸ ஸந்திகங் க³ந்த்வா தே²ரங் தி³ஸ்வாபி ‘‘கா²ணுகோ அய’’ந்தி ஸஞ்ஞினோ அஹேஸுங். அதே²கோ சோரோ தே²ரஸ்ஸ ஸீஸே ப⁴ண்டி³கங் ட²பேஸி, அபரோபி தங் நிஸ்ஸாய ப⁴ண்டி³கங் ட²பேஸி. ஏவங் பஞ்சஸதாபி சோரா பஞ்சஹி ப⁴ண்டி³கஸதேஹி தே²ரங் பரிக்கி²பித்வா ஸயம்பி நிஸின்னா நித்³தா³யித்வா அருணுக்³க³மனகாலே பபு³ஜ்ஜி²த்வா அத்தனோ அத்தனோ ப⁴ண்டி³கங் க³ண்ஹந்தா தே²ரங் தி³ஸ்வா ‘‘அமனுஸ்ஸோ’’தி ஸஞ்ஞாய பலாயிதுங் ஆரபி⁴ங்ஸு. அத² நே தே²ரோ ஆஹ – ‘‘மா பா⁴யித்த² உபாஸகா, பப்³ப³ஜிதோ அஹ’’ந்தி. தே தே²ரஸ்ஸ பாத³மூலே நிபஜ்ஜித்வா ‘‘க²மத², ப⁴ந்தே, மயங் கா²ணுகஸஞ்ஞினோ அஹும்ஹா’’தி தே²ரங் க²மாபெத்வா சோரஜெட்ட²கேன ‘‘அஹங் அய்யஸ்ஸ ஸந்திகே பப்³ப³ஜிஸ்ஸாமீ’’தி வுத்தே ஸேஸா ‘‘மயம்பி பப்³ப³ஜிஸ்ஸாமா’’தி வத்வா ஸப்³பே³பி ஏகச்ச²ந்தா³ ஹுத்வா தே²ரங் பப்³ப³ஜ்ஜங் யாசிங்ஸு. தே²ரோ ஸங்கிச்சஸாமணேரோ விய ஸப்³பே³பி தே பப்³பா³ஜேஸி. ததோ பட்டா²ய கா²ணுகொண்ட³ஞ்ஞோதி பஞ்ஞாயி. ஸோ தேஹி பி⁴க்கூ²ஹி ஸத்³தி⁴ங் ஸத்து² ஸந்திகங் க³ந்த்வா ஸத்தா²ரா ‘‘கிங், கொண்ட³ஞ்ஞ, அந்தேவாஸிகா தே லத்³தா⁴’’தி வுத்தே தங் பவத்திங் ஆரோசேஸி. ஸத்தா² ‘‘ஏவங் கிர, பி⁴க்க²வே’’தி புச்சி²த்வா, ‘‘ஆம, ப⁴ந்தே, ந நோ அஞ்ஞஸ்ஸ ஏவரூபோ ஆனுபா⁴வோ தி³ட்ட²புப்³போ³, தேனம்ஹா பப்³ப³ஜிதா’’தி வுத்தே, ‘‘பி⁴க்க²வே, ஏவரூபே து³ப்பஞ்ஞகம்மே பதிட்டா²ய வஸ்ஸஸதங் ஜீவனதோ இதா³னி வோ பஞ்ஞாஸம்பதா³ய வத்தமானானங் ஏகாஹம்பி ஜீவிதங் ஸெய்யோ’’தி வத்வா அனுஸந்தி⁴ங் க⁴டெத்வா த⁴ம்மங் தே³ஸெந்தோ இமங் கா³த²மாஹ –
111.
‘‘யோ ச வஸ்ஸஸதங் ஜீவே, து³ப்பஞ்ஞோ அஸமாஹிதோ;
ஏகாஹங் ஜீவிதங் ஸெய்யோ, பஞ்ஞவந்தஸ்ஸ ஜா²யினோ’’தி.
தத்த² து³ப்பஞ்ஞோ நிப்பஞ்ஞோ. பஞ்ஞவந்தஸ்ஸாதி ஸப்பஞ்ஞஸ்ஸ. ஸேஸங் புரிமஸதி³ஸமேவாதி.
தே³ஸனாவஸானே பஞ்சஸதாபி தே பி⁴க்கூ² ஸஹ படிஸம்பி⁴தா³ஹி அரஹத்தங் பாபுணிங்ஸு. ஸம்பத்தமஹாஜனஸ்ஸாபி ஸாத்தி²கா த⁴ம்மதே³ஸனா அஹோஸீதி.
கா²ணுகொண்ட³ஞ்ஞத்தே²ரவத்து² த³ஸமங்.
11. ஸப்பதா³ஸத்தே²ரவத்து²
யோ ச வஸ்ஸஸதங் ஜீவேதி இமங் த⁴ம்மதே³ஸனங் ஸத்தா² ஜேதவனே விஹரந்தோ ஸப்பதா³ஸத்தே²ரங் ஆரப்³ப⁴ கதே²ஸி.
ஸாவத்தி²யங் கிரேகோ குலபுத்தோ ஸத்து² த⁴ம்மதே³ஸனங் ஸுத்வா பப்³ப³ஜித்வா லத்³தூ⁴பஸம்பதோ³ அபரேன ஸமயேன உக்கண்டி²த்வா ‘‘மாதி³ஸஸ்ஸ குலபுத்தஸ்ஸ கி³ஹிபா⁴வோ நாம அயுத்தோ, பப்³ப³ஜ்ஜாய ட²த்வா மரணம்ஹி மே ஸெய்யோ’’தி சிந்தெத்வா அத்தனோ மரணூபாயங் சிந்தெந்தோ விசரதி. அதே²கதி³வஸங் பாதோவ கதப⁴த்தகிச்சா பி⁴க்கூ² விஹாரங் க³ந்த்வா அக்³கி³ஸாலாய ஸப்பங் தி³ஸ்வா தங் ஏகஸ்மிங் குடே பக்கி²பித்வா குடங் பித³ஹித்வா ஆதா³ய விஹாரா நிக்க²மிங்ஸு. உக்கண்டி²தபி⁴க்கு²பி ப⁴த்தகிச்சங் கத்வா ஆக³ச்ச²ந்தோ தே பி⁴க்கூ² தி³ஸ்வா ‘‘கிங் இத³ங், ஆவுஸோ’’தி புச்சி²த்வா ‘‘ஸப்போ, ஆவுஸோ’’தி வுத்தே இமினா ‘‘கிங் கரிஸ்ஸதா²’’தி? ‘‘ச²ட்³டெ³ஸ்ஸாம ந’’ந்தி. தேஸங் வசனங் ஸுத்வா ‘‘இமினா அத்தானங் ட³ங்ஸாபெத்வா மரிஸ்ஸாமீ’’தி ‘‘ஆஹரத², அஹங் தங் ச²ட்³டெ³ஸ்ஸாமீ’’தி தேஸங் ஹத்த²தோ குடங் க³ஹெத்வா ஏகஸ்மிங் டா²னே நிஸின்னோ தேன ஸப்பேன அத்தானங் ட³ங்ஸாபேதி, ஸப்போ ட³ங்ஸிதுங் ந இச்ச²தி. ஸோ குடே ஹத்த²ங் ஓதாரெத்வா இதோ சிதோ ச ஆலோலேதி, கோ⁴ரஸப்பஸ்ஸ முக²ங் விவரித்வா அங்கு³லிங் பக்கி²பதி, நேவ நங் ஸப்போ ட³ங்ஸி. ஸோ ‘‘நாயங் ஆஸீவிஸோ, க⁴ரஸப்போ ஏஸோ’’தி தங் பஹாய விஹாரங் அக³மாஸி. அத² நங் பி⁴க்கூ² ‘‘ச²ட்³டி³தோ தே, ஆவுஸோ, ஸப்போ’’தி ஆஹங்ஸு. ‘‘ந ஸோ, ஆவுஸோ, கோ⁴ரஸப்போ, க⁴ரஸப்போ ஏஸோ’’தி. ‘‘கோ⁴ரஸப்போயேவாவுஸோ, மஹந்தங் ப²ணங் கத்வா ஸுஸுயந்தோ து³க்கே²ன அம்ஹேஹி க³ஹிதோ, கிங் காரணா ஏவங் த்வங் வதே³ஸீ’’தி ஆஹங்ஸு. ‘‘அஹங், ஆவுஸோ, தேன அத்தானங் ட³ங்ஸாபெந்தோபி முகே² அங்கு³லிங் பக்கி²பெந்தோபி தங் ட³ங்ஸாபேதுங் நாஸக்கி²’’ந்தி. தங் ஸுத்வா பி⁴க்கூ² துண்ஹீ அஹேஸுங்.
அதே²கதி³வஸங் ந்ஹாபிதோ த்³வே தயோ கு²ரே ஆதா³ய விஹாரங் க³ந்த்வா ஏகங் பூ⁴மியங் ட²பெத்வா ஏகேன பி⁴க்கூ²னங் கேஸே ஓஹாரேதி. ஸோ பூ⁴மியங் ட²பிதங் கு²ரங் க³ஹெத்வா ‘‘இமினா கீ³வங் சி²ந்தி³த்வா மரிஸ்ஸாமீ’’தி ஏகஸ்மிங் ருக்கே² கீ³வங் உபனிதா⁴ய கு²ரதா⁴ரங் க³லனாளியங் கத்வா டி²தோ உபஸம்பதா³மாளதோ பட்டா²ய அத்தனோ ஸீலங் ஆவஜ்ஜெந்தோ விமலசந்த³மண்ட³லங் விய ஸுதோ⁴தமணிக²ந்த⁴மிவ ச நிம்மலங் ஸீலங் அத்³த³ஸ. தஸ்ஸ தங் ஓலோகெந்தஸ்ஸ ஸகலஸரீரங் ப²ரந்தீ பீதி உப்பஜ்ஜி. ஸோ பீதிங் விக்க²ம்பெ⁴த்வா விபஸ்ஸனங் வட்³டெ⁴ந்தோ ஸஹ படிஸம்பி⁴தா³ஹி அரஹத்தங் பத்வா கு²ரங் ஆதா³ய விஹாரமஜ்ஜ²ங் பாவிஸி. அத² நங் பி⁴க்கூ² ‘‘கஹங் க³தோஸி, ஆவுஸோ’’தி புச்சி²ங்ஸு. ‘‘‘இமினா கு²ரேன க³லனாளிங் சி²ந்தி³த்வா மரிஸ்ஸாமீ’தி க³தொம்ஹி , ஆவுஸோ’’தி. அத² ‘‘கஸ்மா ந மதோஸீ’’தி? இதா³னிம்ஹி ஸத்த²ங் ஆஹரிதுங் அப⁴ப்³போ³ ஜாதோ. அஹஞ்ஹி ‘‘இமினா கு²ரேன க³லனாளிங் சி²ந்தி³ஸ்ஸாமீ’’தி ஞாணகு²ரேன ஸப்³ப³கிலேஸே சி²ந்தி³ந்தி. பி⁴க்கூ² ‘‘அயங் அபூ⁴தேன அஞ்ஞங் ப்³யாகரோதீ’’தி ப⁴க³வதோ ஆரோசேஸுங். ப⁴க³வா தேஸங் கத²ங் ஸுத்வா ஆஹ – ‘‘ந, பி⁴க்க²வே, கீ²ணாஸவா நாம ஸஹத்தா² அத்தானங் ஜீவிதா வோரோபெந்தீ’’தி. ப⁴ந்தே, தும்ஹே இமங் ‘‘கீ²ணாஸவோ’’தி வத³த², ஏவங் அரஹத்தூபனிஸ்ஸயஸம்பன்னோ பனாயங் கஸ்மா உக்கண்ட²தி, கிமஸ்ஸ அரஹத்தூபனிஸ்ஸயகாரணங் ‘‘கஸ்மா ஸோ ஸப்போ ஏதங் ந ட³ங்ஸதீ’’தி? ‘‘பி⁴க்க²வே, ஸோ தாவ ஸப்போ இமஸ்ஸ இதோ ததியே அத்தபா⁴வே தா³ஸோ அஹோஸி, ஸோ அத்தனோ ஸாமிகஸ்ஸ ஸரீரங் ட³ங்ஸிதுங் ந விஸஹதீ’’தி. ஏவங் தாவ நேஸங் ஸத்தா² ஏகங் காரணங் ஆசிக்கி². ததோ பட்டா²ய ச ஸோ பி⁴க்கு² ஸப்பதா³ஸோ நாம ஜாதோ.
கஸ்ஸபஸம்மாஸம்பு³த்³த⁴காலே கிரேகோ குலபுத்தோ ஸத்து² த⁴ம்மகத²ங் ஸுத்வா உப்பன்னஸங்வேகோ³ பப்³ப³ஜித்வா லத்³தூ⁴பஸம்பதோ³ அபரேன ஸமயேன அனபி⁴ரதியா உப்பன்னாய ஏகஸ்ஸ ஸஹாயகஸ்ஸ பி⁴க்கு²னோ ஆரோசேஸி. ஸோ தஸ்ஸ அபி⁴ண்ஹங் கி³ஹிபா⁴வே ஆதீ³னவங் கதே²ஸி. தங் ஸுத்வா இதரோ ஸாஸனே அபி⁴ரமித்வா புப்³பே³ அனபி⁴ரதகாலே மலக்³க³ஹிதே ஸமணபரிக்கா²ரே ஏகஸ்மிங் ஸொண்டி³தீரே நிம்மலே கரொந்தோ நிஸீதி³. ஸஹாயகோபிஸ்ஸ ஸந்திகேயேவ நிஸின்னோ. அத² நங் ஸோ ஏவமாஹ – ‘‘அஹங், ஆவுஸோ, உப்பப்³ப³ஜந்தோ இமே பரிக்கா²ரே துய்ஹங் தா³துகாமோ அஹோஸி’’ந்தி. ஸோ லோப⁴ங் உப்பாதெ³த்வா சிந்தேஸி – ‘‘இமினா மய்ஹங் பப்³ப³ஜிதேன வா உப்பப்³ப³ஜிதேன வா கோ அத்தோ², இதா³னி பரிக்கா²ரே க³ண்ஹிஸ்ஸாமீ’’தி. ஸோ ததோ பட்டா²ய ‘‘கிங் தா³னாவுஸோ, அம்ஹாகங் ஜீவிதேன, யே மயங் கபாலஹத்தா² பரகுலேஸு பி⁴க்கா²ய சராம, புத்ததா³ரேஹி ஸத்³தி⁴ங் ஆலாபஸல்லாபங் ந கரோமா’’திஆதீ³னி வத³ந்தோ கி³ஹிபா⁴வஸ்ஸ கு³ணங் கதே²ஸி. ஸோ தஸ்ஸ கத²ங் ஸுத்வா புன உக்கண்டி²தோ ஹுத்வா சிந்தேஸி – ‘‘அயங் மயா ‘உக்கண்டி²தொம்ஹீ’தி வுத்தே பட²மங் கி³ஹிபா⁴வே ஆதீ³னவங் கதெ²த்வா இதா³னி அபி⁴ண்ஹங் கு³ணங் கதே²தி, ‘கிங் நு கோ² காரண’’’ந்தி சிந்தெந்தோ ‘‘இமேஸு ஸமணபரிக்கா²ரேஸு லோபே⁴னா’’தி ஞத்வா ஸயமேவ அத்தனோ சித்தங் நிவத்தேஸி. ஏவமஸ்ஸ கஸ்ஸபஸம்மாஸம்பு³த்³த⁴காலே ஏகஸ்ஸ பி⁴க்கு²னோ உக்கண்டா²பிதத்தா இதா³னி அனபி⁴ரதி உப்பன்னா. யோ பன தேனேவ ததா³ வீஸதி வஸ்ஸஸஹஸ்ஸானி ஸமணத⁴ம்மோ கதோ, ஸ்வஸ்ஸ ஏதரஹி அரஹத்தூபனிஸ்ஸயோ ஜாதோதி.
இமமத்த²ங் தே பி⁴க்கூ² ப⁴க³வதோ ஸந்திகா ஸுத்வா உத்தரிங் புச்சி²ங்ஸு – ‘‘ப⁴ந்தே, அயங் கிர பி⁴க்கு² கு²ரதா⁴ரங் க³லனாளியங் கத்வா டி²தோவ அரஹத்தங் பாபுணாதி, உப்பஜ்ஜிஸ்ஸதி நு கோ² எத்தகேன க²ணேன அரஹத்தமக்³கோ³’’தி. ‘‘ஆம, பி⁴க்க²வே, ஆரத்³த⁴வீரியஸ்ஸ பி⁴க்கு²னோ பாத³ங் உக்கி²பித்வா பூ⁴மியங் ட²பெந்தஸ்ஸ பாதே³ பூ⁴மியங் அஸம்பத்தேயேவ அரஹத்தமக்³கோ³ உப்பஜ்ஜதி. குஸீதஸ்ஸ புக்³க³லஸ்ஸ ஹி வஸ்ஸஸதங் ஜீவனதோ ஆரத்³த⁴வீரியஸ்ஸ க²ணமத்தம்பி ஜீவிதங் ஸெய்யோ’’தி வத்வா அனுஸந்தி⁴ங் க⁴டெத்வா இமங் கா³த²மாஹ –
112.
‘‘யோ ச வஸ்ஸஸதங் ஜீவே, குஸீதோ ஹீனவீரியோ;
ஏகாஹங் ஜீவிகங் ஸெய்யோ, வீரியமாரப⁴தோ த³ள்ஹ’’ந்தி.
தத்த² குஸீதோதி காமவிதக்காதீ³ஹி தீஹி விதக்கேஹி வீதினாமெந்தோ புக்³க³லோ. ஹீனவீரியோதி நிப்³பீ³ரியோ. வீரியமாரப⁴தோ த³ள்ஹந்தி து³வித⁴ஜ்ஜா²னநிப்³ப³த்தனஸமத்த²ங் தி²ரங் வீரியங் ஆரப⁴ந்தஸ்ஸ. ஸேஸங் புரிமஸதி³ஸமேவ.
தே³ஸனாவஸானே ப³ஹூ ஸோதாபத்திப²லாதீ³னி பாபுணிங்ஸூதி.
ஸப்பதா³ஸத்தே²ரவத்து² ஏகாத³ஸமங்.
12. படாசாராதே²ரீவத்து²
யோ ச வஸ்ஸஸதங் ஜீவேதி இமங் த⁴ம்மதே³ஸனங் ஸத்தா² ஜேதவனே விஹரந்தோ படாசாரங் தே²ரிங் ஆரப்³ப⁴ கதே²ஸி.
ஸா கிர ஸாவத்தி²யங் சத்தாலீஸகோடிவிப⁴வஸ்ஸ ஸெட்டி²னோ தீ⁴தா அஹோஸி அபி⁴ரூபா. தங் ஸோளஸவஸ்ஸுத்³தே³ஸிககாலே ஸத்தபூ⁴மிகஸ்ஸ பாஸாத³ஸ்ஸ உபரிமதலே ரக்க²ந்தா வஸாபேஸுங். ஏவங் ஸந்தேபி ஸா ஏகேன அத்தனோ சூளூபட்டா²கேன ஸத்³தி⁴ங் விப்படிபஜ்ஜி . அத²ஸ்ஸா மாதாபிதரோ ஸமஜாதிககுலே ஏகஸ்ஸ குமாரஸ்ஸ படிஸ்ஸுணித்வா விவாஹதி³வஸங் ட²பேஸுங். தஸ்மிங் உபகட்டே² ஸா தங் சூளூபட்டா²கங் ஆஹ – ‘‘மங் கிர அஸுககுலஸ்ஸ நாம த³ஸ்ஸந்தி, மயி பதிகுலங் க³தே மம பண்ணாகாரங் க³ஹெத்வா ஆக³தோபி தத்த² பவேஸனங் ந லபி⁴ஸ்ஸஸி, ஸசே தே மயி ஸினேஹோ அத்தி², இதா³னேவ மங் க³ஹெத்வா யேன வா தேன வா பலாயஸ்ஸூ’’தி. ‘‘ஸோ ஸாது⁴, ப⁴த்³தே³’’தி. ‘‘தேன ஹி அஹங் ஸ்வே பாதோவ நக³ரத்³வாரஸ்ஸ அஸுகட்டா²னே நாம ட²ஸ்ஸாமி, த்வங் ஏகேன உபாயேன நிக்க²மித்வா தத்த² ஆக³ச்செ²ய்யாஸீ’’தி வத்வா து³தியதி³வஸே ஸங்கேதட்டா²னே அட்டா²ஸி. ஸாபி பாதோவ கிலிட்ட²ங் வத்த²ங் நிவாஸெத்வா கேஸே விக்கிரித்வா குண்ட³கேன ஸரீரங் மக்கி²த்வா குடங் ஆதா³ய தா³ஸீஹி ஸத்³தி⁴ங் க³ச்ச²ந்தீ விய க⁴ரா நிக்க²மித்வா தங் டா²னங் அக³மாஸி. ஸோ தங் ஆதா³ய தூ³ரங் க³ந்த்வா ஏகஸ்மிங் கா³மே நிவாஸங் கப்பெத்வா அரஞ்ஞே கெ²த்தங் கஸித்வா தா³ருபண்ணாதீ³னி ஆஹரதி. இதரா குடேன உத³கங் ஆஹரித்வா ஸஹத்தா² கொட்டனபசனாதீ³னி கரொந்தீ அத்தனோ பாபஸ்ஸ ப²லங் அனுபோ⁴தி. அத²ஸ்ஸா குச்சி²யங் க³ப்³போ⁴ பதிட்டா²ஸி. ஸா பரிபுண்ணக³ப்³பா⁴ ‘‘இத⁴ மே கோசி உபகாரகோ நத்தி², மாதாபிதரோ நாம புத்தேஸு முது³ஹத³யா ஹொந்தி, தேஸங் ஸந்திகங் மங் நேஹி, தத்த² மே க³ப்³ப⁴வுட்டா²னங் ப⁴விஸ்ஸதீ’’தி ஸாமிகங் யாசி. ஸோ ‘‘கிங், ப⁴த்³தே³, கதே²ஸி, மங் தி³ஸ்வா தவ மாதாபிதரோ விவிதா⁴ கம்மகாரணா கரெய்யுங், ந ஸக்கா மயா தத்த² க³ந்து’’ந்தி படிக்கி²பி. ஸா புனப்புனங் யாசித்வாபி க³மனங் அலப⁴மானா தஸ்ஸ அரஞ்ஞங் க³தகாலே படிவிஸ்ஸகே ஆமந்தெத்வா ‘‘ஸசே ஸோ ஆக³ந்த்வா மங் அபஸ்ஸந்தோ ‘கஹங் க³தா’தி புச்சி²ஸ்ஸதி, மம அத்தனோ குலக⁴ரங் க³தபா⁴வங் ஆசிக்கெ²ய்யாதா²’’தி வத்வா கே³ஹத்³வாரங் பித³ஹித்வா பக்காமி. ஸோபி ஆக³ந்த்வா தங் அபஸ்ஸந்தோ படிவிஸ்ஸகே புச்சி²த்வா தங் பவத்திங் ஸுத்வா ‘‘நிவத்தெஸ்ஸாமி ந’’ந்தி அனுப³ந்தி⁴த்வா தங் தி³ஸ்வா நானப்பகாரங் யாசியமானோபி நிவத்தேதுங் நாஸக்கி². அத²ஸ்ஸா ஏகஸ்மிங் டா²னே கம்மஜவாதா சலிங்ஸு. ஸா ஏகங் க³ச்ச²ந்தரங் பவிஸித்வா, ‘‘ஸாமி, கம்மஜவாதா மே சலிதா’’தி வத்வா பூ⁴மியங் நிபஜ்ஜித்வா ஸம்பரிவத்தமானா கிச்சே²ன தா³ரகங் விஜாயித்வா ‘‘யஸ்ஸத்தா²யாஹங் குலக⁴ரங் க³ச்செ²ய்யங், ஸோ அத்தோ² நிப்ப²ன்னோ’’தி புனதே³வ தேன ஸத்³தி⁴ங் கே³ஹங் ஆக³ந்த்வா வாஸங் கப்பேஸி.
தஸ்ஸா அபரேன ஸமயேன புன க³ப்³போ⁴ பதிட்ட²ஹி. ஸா பரிபுண்ணக³ப்³பா⁴ ஹுத்வா புரிமனயேனேவ ஸாமிகங் யாசித்வா க³மனங் அலப⁴மானா புத்தங் அங்கேனாதா³ய ததே²வ பக்கமித்வா தேன அனுப³ந்தி⁴த்வா ‘‘திட்டா²ஹீ’’தி வுத்தே நிவத்திதுங் ந இச்சி². அத² நேஸங் க³ச்ச²ந்தானங் மஹா அகாலமேகோ⁴ உத³பாதி³ ஸமந்தா விஜ்ஜுலதாஹி ஆதி³த்தங் விய மேக⁴த்த²னிதேஹி, பி⁴ஜ்ஜமானங் விய உத³கதா⁴ரானிபாதனிரந்தரங் நப⁴ங் அஹோஸி. தஸ்மிங் க²ணே தஸ்ஸா கம்மஜவாதா சலிங்ஸு. ஸா ஸாமிகங் ஆமந்தெத்வா, ‘‘ஸாமி, கம்மஜவாதா மே சலிதா, ந ஸக்கோமி ஸந்தா⁴ரேதுங், அனோவஸ்ஸகட்டா²னங் மே ஜானாஹீ’’தி ஆஹ. ஸோ ஹத்த²க³தாய வாஸியா இதோ சிதோ ச உபதா⁴ரெந்தோ ஏகஸ்மிங் வம்மிகமத்த²கே ஜாதங் கு³ம்ப³ங் தி³ஸ்வா சி²ந்தி³துங் ஆரபி⁴. அத² நங் வம்மிகதோ நிக்க²மித்வா கோ⁴ரவிஸோ ஆஸீவிஸோ ட³ங்ஸி. தங்க²ணஞ்ஞேவஸ்ஸ ஸரீரங் அந்தோஸமுட்டி²தாஹி அக்³கி³ஜாலாஹி ட³ய்ஹமானங் விய நீலவண்ணங் ஹுத்வா தத்தே²வ பதி. இதராபி மஹாது³க்க²ங் அனுப⁴வமானா தஸ்ஸ ஆக³மனங் ஓலோகெந்தீபி தங் அதி³ஸ்வாவ அபரம்பி புத்தங் விஜாயி. த்³வே தா³ரகா வாதவுட்டி²வேக³ங் அஸஹமானா மஹாவிரவங் விரவந்தி. ஸா உபோ⁴பி தே உரந்தரே கத்வா த்³வீஹி ஜண்ணுகேஹி சேவ ஹத்தே²ஹி ச பூ⁴மியங் உப்பீளெத்வா ததா² டி²தாவ ரத்திங் வீதினாமேஸி. ஸகலஸரீரங் நில்லோஹிதங் விய பண்டு³பலாஸவண்ணங் அஹோஸி. ஸா உட்டி²தே அருணே மங்ஸபேஸிவண்ணங் ஏகங் புத்தங் அங்கேனாதா³ய இதரங் அங்கு³லியா க³ஹெத்வா ‘‘ஏஹி, தாத, பிதா தே இதோ க³தோ’’தி வத்வா ஸாமிகஸ்ஸ க³தமக்³கே³ன க³ச்ச²ந்தீ தங் வம்மிகமத்த²கே காலங் கத்வா பதிதங் நீலவண்ணங் த²த்³த⁴ஸரீரங் தி³ஸ்வா ‘‘மங் நிஸ்ஸாய மம ஸாமிகோ பந்தே² மதோ’’தி ரோத³ந்தீ பரிதே³வந்தீ பாயாஸி.
ஸா ஸகலரத்திங் தே³வேன வுட்ட²த்தா அசிரவதிங் நதி³ங் ஜண்ணுப்பமாணேன கடிப்பமாணேன த²னப்பமாணேன உத³கேன பரிபுண்ணங் தி³ஸ்வா அத்தனோ மந்த³பு³த்³தி⁴தாய த்³வீஹி தா³ரகேஹி ஸத்³தி⁴ங் உத³கங் ஓதரிதுங் அவிஸஹந்தீ ஜெட்ட²புத்தங் ஓரிமதீரே ட²பெத்வா இதரங் ஆதா³ய பரதீரங் க³ந்த்வா ஸாகா²ப⁴ங்க³ங் அத்த²ரித்வா நிபஜ்ஜாபெத்வா ‘‘இதரஸ்ஸ ஸந்திகங் க³மிஸ்ஸாமீ’’தி பா³லபுத்தகங் பஹாய தரிதுங் அஸக்கொந்தீ புனப்புனங் நிவத்தித்வா ஓலோகயமானா பாயாஸி. அத²ஸ்ஸா நதீ³மஜ்ஜ²ங் க³தகாலே ஏகோ ஸேனோ தங் குமாரங் தி³ஸ்வா ‘‘மங்ஸபேஸீ’’தி ஸஞ்ஞாய ஆகாஸதோ ப⁴ஸ்ஸி. ஸா தங் புத்தஸ்ஸத்தா²ய ப⁴ஸ்ஸந்தங் தி³ஸ்வா உபோ⁴ ஹத்தே² உக்கி²பித்வா ‘‘ஸூஸூ’’தி திக்க²த்துங் மஹாஸத்³த³ங் நிச்சா²ரேஸி. ஸேனோ தூ³ரபா⁴வேன தங் அஸுத்வாவ குமாரகங் க³ஹெத்வா வேஹாஸங் உப்பதித்வா க³தோ. ஓரிமதீரே டி²தபுத்தோ மாதரங் நதீ³மஜ்ஜே² உபோ⁴ ஹத்தே² உக்கி²பித்வா மஹாஸத்³த³ங் நிச்சா²ரயமானங் தி³ஸ்வா ‘‘மங் பக்கோஸதீ’’தி ஸஞ்ஞாய வேகே³ன உத³கே பதி. இதிஸ்ஸா பா³லபுத்தங் ஸேனோ ஹரி, ஜெட்ட²புத்தோ உத³கேன வூள்ஹோ.
ஸா ‘‘ஏகோ மே புத்தோ ஸேனேன க³ஹிதோ, ஏகோ உத³கேன வூள்ஹோ, பந்தே² மே பதி மதோ’’தி ரோத³ந்தீ பரிதே³வந்தீ க³ச்ச²மானா ஸாவத்தி²தோ ஆக³ச்ச²ந்தங் ஏகங் புரிஸங் தி³ஸ்வா புச்சி² – ‘‘கத்த² வாஸிகோஸி, தாதா’’தி? ‘‘ஸாவத்தி²வாஸிகொம்ஹி, அம்மா’’தி. ‘‘ஸாவத்தி²னக³ரே அஸுகவீதி²யங் ஏவரூபங் அஸுககுலங் நாம அத்தி², ஜானாஸி, தாதா’’தி? ‘‘ஜானாமி, அம்ம, தங் பன மா புச்சி², ஸசே அஞ்ஞங் ஜானாஸி புச்சா²’’தி. ‘‘அஞ்ஞேன மே கம்மங் நத்தி², ததே³வ புச்சா²மி, தாதா’’தி. ‘‘அம்ம, த்வங் அத்தனோ அனாசிக்கி²துங் ந தே³ஸி, அஜ்ஜ தே ஸப்³ப³ரத்திங் தே³வோ வஸ்ஸந்தோ தி³ட்டோ²’’தி. ‘‘தி³ட்டோ² மே, தாத, மய்ஹமேவேஸோ ஸப்³ப³ரத்திங் வுட்டோ², ந அஞ்ஞஸ்ஸ. மய்ஹங் பன வுட்ட²காரணங் பச்சா² தே கதெ²ஸ்ஸாமி, ஏதஸ்மிங் தாவ மே ஸெட்டி²கே³ஹே பவத்திங் கதே²ஹீ’’தி. ‘‘அம்ம, அஜ்ஜ ரத்திங் ஸெட்டி²ஞ்ச ஸெட்டி²ப⁴ரியஞ்ச ஸெட்டி²புத்தஞ்சாதி தயோபி ஜனே அவத்த²ரமானங் கே³ஹங் பதி, தே ஏகசிதகஸ்மிங் ஜா²யந்தி. ஏஸ தூ⁴மோ பஞ்ஞாயதி, அம்மா’’தி. ஸா தஸ்மிங் க²ணே நிவத்த²வத்த²ங் பதமானங் ந ஸஞ்ஜானி, உம்மத்திகபா⁴வங் பத்வா யதா²ஜாதாவ ரோத³ந்தீ பரிதே³வந்தீ –
‘‘உபோ⁴ புத்தா காலகதா, பந்தே² மய்ஹங் பதீ மதோ;
மாதா பிதா ச பா⁴தா ச, ஏகசிதம்ஹி ட³ய்ஹரே’’தி. (அப॰ தே²ரீ 2.2.498) –
விலபந்தீ பரிப்³ப⁴மி. மனுஸ்ஸா தங் தி³ஸ்வா ‘‘உம்மத்திகா உம்மத்திகா’’தி கசவரங் க³ஹெத்வா பங்ஸுங் க³ஹெத்வா மத்த²கே ஓகிரந்தா லெட்³டூ³ஹி பஹரந்தி. ஸத்தா² ஜேதவனமஹாவிஹாரே அட்ட²பரிஸமஜ்ஜே² நிஸீதி³த்வா த⁴ம்மங் தே³ஸெந்தோ தங் ஆக³ச்ச²மானங் அத்³த³ஸ கப்பஸதஸஹஸ்ஸங் பூரிதபாரமிங் அபி⁴னீஹாரஸம்பன்னங்.
ஸா கிர பது³முத்தரபு³த்³த⁴காலே பது³முத்தரஸத்தா²ரா ஏகங் வினயத⁴ரத்தே²ரிங் பா³ஹாய க³ஹெத்வா நந்த³னவனே ட²பெந்தங் விய ஏதத³க்³க³ட்டா²னே ட²பியமானங் தி³ஸ்வா ‘‘அஹம்பி தும்ஹாதி³ஸஸ்ஸ பு³த்³த⁴ஸ்ஸ ஸந்திகே வினயத⁴ரத்தே²ரீனங் அக்³க³ட்டா²னங் லபெ⁴ய்ய’’ந்தி அதி⁴காரங் கத்வா பத்த²னங் ட²பேஸி. பது³முத்தரபு³த்³தோ⁴ அனாக³தங்ஸஞாணங் பத்த²ரித்வா பத்த²னாய ஸமிஜ்ஜ²னபா⁴வங் ஞத்வா ‘‘அனாக³தே கோ³தமபு³த்³த⁴ஸ்ஸ நாம ஸாஸனே அயங் படாசாரா நாமேன வினயத⁴ரத்தே²ரீனங் அக்³கா³ ப⁴விஸ்ஸதீ’’தி ப்³யாகாஸி. தங் ஏவங் பத்தி²தபத்த²னங் அபி⁴னீஹாரஸம்பன்னங் ஸத்தா² தூ³ரதோவ ஆக³ச்ச²ந்திங் தி³ஸ்வா ‘‘இமிஸ்ஸா ட²பெத்வா மங் அஞ்ஞோ அவஸ்ஸயோ ப⁴விதுங் ஸமத்தோ² நாம நத்தீ²’’தி சிந்தெத்வா தங் யதா² விஹாராபி⁴முக²ங் ஆக³ச்ச²தி, ஏவங் அகாஸி. பரிஸா தங் தி³ஸ்வாவ ‘‘இமிஸ்ஸா உம்மத்திகாய இதோ ஆக³ந்துங் மா த³தி³த்தா²’’தி ஆஹ. ஸத்தா² ‘‘அபேத², மா நங் வாரயித்தா²’’தி வத்வா அவிதூ³ரட்டா²னங் ஆக³தகாலே ‘‘ஸதிங் படிலப⁴ ப⁴கி³னீ’’தி ஆஹ. ஸா தங் க²ணங்யேவ பு³த்³தா⁴னுபா⁴வேன ஸதிங் படிலபி⁴. தஸ்மிங்காலே நிவத்த²வத்த²ஸ்ஸ பதிதபா⁴வங் ஸல்லக்கெ²த்வா ஹிரொத்தப்பங் பச்சுபட்டா²பெத்வா உக்குடிகங் நிஸீதி³. அத²ஸ்ஸா ஏகோ புரிஸோ உத்தரஸாடகங் கி²பி. ஸா தங் நிவாஸெத்வா ஸத்தா²ரங் உபஸங்கமித்வா ஸுவண்ணவண்ணேஸு பாதே³ஸு பஞ்சபதிட்டி²தேன வந்தி³த்வா, ‘‘ப⁴ந்தே, அவஸ்ஸயோ மே ஹோத², பதிட்டா² மே ஹோத². ஏகஞ்ஹி மே புத்தங் ஸேனோ க³ண்ஹி, ஏகோ உத³கேன வூள்ஹோ, பந்தே² மே பதி மதோ, மாதாபிதரோ சேவ மே பா⁴தா ச கே³ஹேன அவத்த²டா ஏகசிதகஸ்மிங் ஜா²யந்தீ’’தி.
ஸத்தா² தஸ்ஸா வசனங் ஸுத்வா ‘‘படாசாரே, மா சிந்தயி, தவ தாணங் ஸரணங் அவஸ்ஸயோ ப⁴விதுங் ஸமத்த²ஸ்ஸேவ ஸந்திகங் ஆக³தாஸி. யதா² ஹி தவ இதா³னி ஏகோ புத்தகோ ஸேனேன க³ஹிதோ, ஏகோ உத³கேன வூள்ஹோ, பந்தே² பதி மதோ, மாதாபிதரோ சேவ பா⁴தா ச கே³ஹேன அவத்த²டா; ஏவமேவ இமஸ்மிங் ஸங்ஸாரே புத்தாதீ³னங் மதகாலே தவ ரோத³ந்தியா பக்³க⁴ரிதஅஸ்ஸு சதுன்னங் மஹாஸமுத்³தா³னங் உத³கதோ ப³ஹுதர’’ந்தி வத்வா இமங் கா³த²மாஹ –
‘‘சதூஸு ஸமுத்³தே³ஸு ஜலங் பரித்தகங்,
ததோ ப³ஹுங் அஸ்ஸுஜலங் அனப்பகங்;
து³க்கே²ன பு²ட்ட²ஸ்ஸ நரஸ்ஸ ஸோசனா,
கிங் காரணா அம்ம துவங் பமஜ்ஜஸீ’’தி.
ஏவங் ஸத்த²ரி அனமதக்³க³பரியாயங் கதெ²ந்தே தஸ்ஸ ஸரீரே ஸோகோ தனுத்தங் அக³மாஸி. அத² நங் தனுபூ⁴தஸோகங் ஞத்வா புன ஸத்தா² ஆமந்தெத்வா ‘‘படாசாரே புத்தாத³யோ நாம பரலோகங் க³ச்ச²ந்தஸ்ஸ தாணங் வா லேணங் வா ஸரணங் வா ப⁴விதுங் ந ஸக்கொந்தி, தஸ்மா விஜ்ஜமானாபி தே ந ஸந்தியேவ, பண்டி³தேன பன ஸீலங் விஸோதெ⁴த்வா அத்தனோ நிப்³பா³னகா³மிமக்³க³ங் கி²ப்பமேவ ஸோதே⁴துங் வட்டதீ’’தி வத்வா த⁴ம்மங் தே³ஸெந்தோ இமா கா³தா² அபா⁴ஸி –
‘‘ந ஸந்தி புத்தா தாணாய, ந பிதா நாபி ப³ந்த⁴வா;
அந்தகேனாதி⁴பன்னஸ்ஸ, நத்தி² ஞாதீஸு தாணதா. (த⁴॰ ப॰ 288; அப॰ தே²ரீ 2.2.501);
‘‘ஏதமத்த²வஸ்ஸங் ஞத்வா, பண்டி³தோ ஸீலஸங்வுதோ;
நிப்³பா³னக³மனங் மக்³க³ங், கி²ப்பமேவ விஸோத⁴யே’’தி. (த⁴॰ ப॰ 289);
தே³ஸனாவஸானே படாசாரா மஹாபத²வியங் பங்ஸுபரிமாணே கிலேஸே ஜா²பெத்வா ஸோதாபத்திப²லே பதிட்ட²ஹி, அஞ்ஞேபி ப³ஹூ ஸோதாபத்திப²லாதீ³னி பாபுணிங்ஸூதி. ஸா பன ஸோதாபன்னா ஹுத்வா ஸத்தா²ரங் பப்³ப³ஜ்ஜங் யாசி. ஸத்தா² தங் பி⁴க்கு²னீனங் ஸந்திகங் பஹிணித்வா பப்³பா³ஜேஸி. ஸா லத்³தூ⁴பஸம்பதா³ படிதாசாரத்தா படாசாராத்வேவ பஞ்ஞாயி. ஸா ஏகதி³வஸங் குடேன உத³கங் ஆதா³ய பாதே³ தோ⁴வந்தீ உத³கங் ஆஸிஞ்சி, தங் தோ²கங் க³ந்த்வா பச்சி²ஜ்ஜி. து³தியவாரே ஆஸித்தங் ததோ தூ³ரதரங் அக³மாஸி. ததியவாரே ஆஸித்தங் ததோபி தூ³ரதரந்தி. ஸா ததே³வ ஆரம்மணங் க³ஹெத்வா தயோ வயே பரிச்சி²ந்தி³த்வா ‘‘மயா பட²மங் ஆஸித்தங் உத³கங் விய இமே ஸத்தா பட²மவயேபி மரந்தி, ததோ தூ³ரதரங் க³தங் து³தியவாரே ஆஸித்தங் உத³கங் விய மஜ்ஜி²மவயேபி மரந்தி, ததோபி தூ³ரதரங் க³தங் ததியவாரே ஆஸித்தங் உத³கங் விய பச்சி²மவயேபி மரந்தியேவா’’தி சிந்தேஸி. ஸத்தா² க³ந்த⁴குடியங் நிஸின்னோவ ஓபா⁴ஸங் ப²ரித்வா தஸ்ஸா ஸம்முகே² ட²த்வா கதெ²ந்தோ விய ‘‘ஏவமேதங் படாசாரே, பஞ்சன்னம்பி க²ந்தா⁴னங் உத³யப்³ப³யங் அபஸ்ஸந்தஸ்ஸ வஸ்ஸஸதங் ஜீவனதோ தேஸங் உத³யப்³ப³யங் பஸ்ஸந்தஸ்ஸ ஏகாஹம்பி ஏகக்க²ணம்பி ஜீவிதங் ஸெய்யோ’’தி வத்வா அனுஸந்தி⁴ங் க⁴டெத்வா த⁴ம்மங் தே³ஸெந்தோ கா³த²மாஹ –
113.
‘‘யோ ச வஸ்ஸஸதங் ஜீவே, அபஸ்ஸங் உத³யப்³ப³யங்;
ஏகாஹங் ஜீவிதங் ஸெய்யோ, பஸ்ஸதோ உத³யப்³ப³ய’’ந்தி.
தத்த² அபஸ்ஸங் உத³யப்³ப³யந்தி பஞ்சன்னங் க²ந்தா⁴னங் பஞ்சவீஸதியா லக்க²ணேஹி உத³யஞ்ச வயஞ்ச அபஸ்ஸந்தோ. பஸ்ஸதோ உத³யப்³ப³யந்தி தேஸங் உத³யஞ்ச வயஞ்ச பஸ்ஸந்தஸ்ஸ. இதரஸ்ஸ ஜீவனதோ ஏகாஹம்பி ஜீவிதங் ஸெய்யோதி.
தே³ஸனாவஸானே படாசாரா ஸஹ படிஸம்பி⁴தா³ஹி அரஹத்தங் பாபுணி.
படாசாராதே²ரீவத்து² த்³வாத³ஸமங்.
13. கிஸாகோ³தமீவத்து²
யோ ச வஸ்ஸஸதங் ஜீவேதி இமங் த⁴ம்மதே³ஸனங் ஸத்தா² ஜேதவனே விஹரந்தோ கிஸாகோ³தமிங் ஆரப்³ப⁴ கதே²ஸி.
ஸாவத்தி²யங் கிரேகஸ்ஸ ஸெட்டி²ஸ்ஸ கே³ஹே சத்தாலீஸகோடித⁴னங் அங்கா³ரா ஏவ ஹுத்வா அட்டா²ஸி. ஸெட்டி² தங் தி³ஸ்வா உப்பன்னஸோகோ ஆஹாரங் படிக்கி²பித்வா மஞ்சகே நிபஜ்ஜி. தஸ்ஸேகோ ஸஹாயகோ கே³ஹங் க³ந்த்வா, ‘‘ஸம்ம, கஸ்மா ஸோசஸீ’’தி புச்சி²த்வா தங் பவத்திங் ஸுத்வா, ‘‘ஸம்ம, மா ஸோசி, அஹங் ஏகங் உபாயங் ஜானாமி, தங் கரோஹீ’’தி. ‘‘கிங் கரோமி, ஸம்மா’’தி? அத்தனோ ஆபணே கிலஞ்ஜங் பஸாரெத்வா தத்த² தே அங்கா³ரே ராஸிங் கத்வா விக்கிணந்தோ விய நிஸீத³, ஆக³தாக³தேஸு மனுஸ்ஸேஸு யே ஏவங் வத³ந்தி – ‘‘ஸேஸஜனா வத்த²தேலமது⁴பா²ணிதாதீ³னி விக்கிணந்தி, த்வங் பன அங்கா³ரே விக்கிணந்தோ நிஸின்னோ’’தி. தே வதெ³ய்யாஸி – ‘‘அத்தனோ ஸந்தகங் அவிக்கிணந்தோ கிங் கரோமீ’’தி? யோ பன தங் ஏவங் வத³தி ‘‘ஸேஸஜனா வத்த²தேலமது⁴பா²ணிதாதீ³னி விக்கிணந்தி, த்வங் பன ஹிரஞ்ஞஸுவண்ணங் விக்கிணந்தோ நிஸின்னோ’’தி. தங் வதெ³ய்யாஸி ‘‘கஹங் ஹிரஞ்ஞஸுவண்ண’’ந்தி. ‘‘இத³’’ந்தி ச வுத்தே ‘‘ஆஹர, தாவ ந’’ந்தி ஹத்தே²ஹி படிச்செ²ய்யாஸி. ஏவங் தி³ன்னங் தவ ஹத்தே² ஹிரஞ்ஞஸுவண்ணங் ப⁴விஸ்ஸதி. ஸா பன ஸசே குமாரிகா ஹோதி, தவ கே³ஹே புத்தஸ்ஸ நங் ஆஹரித்வா சத்தாலீஸகோடித⁴னங் தஸ்ஸா நிய்யாதெ³த்வா தாய தி³ன்னங் வலஞ்ஜெய்யாஸி. ஸசே குமாரகோ ஹோதி, தவ கே³ஹே வயப்பத்தங் தீ⁴தரங் தஸ்ஸ த³த்வா சத்தாலீஸகோடித⁴னங் நிய்யாதெ³த்வா தேன தி³ன்னங் வலஞ்ஜெய்யாஸீதி. ஸோ ‘‘ப⁴த்³த³கோ உபாயோ’’தி அத்தனோ ஆபணே அங்கா³ரே ராஸிங் கத்வா விக்கிணந்தோ விய நிஸீதி³. யே பன நங் ஏவமாஹங்ஸு – ‘‘ஸேஸஜனா வத்த²தேலமது⁴பா²ணிதாதீ³னி விக்கிணந்தி, கிங் பன த்வங் அங்கா³ரே விக்கிணந்தோ நிஸின்னோ’’தி? தேஸங் ‘‘அத்தனோ ஸந்தகங் அவிக்கிணந்தோ கிங் கரோமீ’’தி படிவசனங் அதா³ஸி. அதே²கா கோ³தமீ நாம குமாரிகா கிஸஸரீரதாய கிஸாகோ³தமீதி பஞ்ஞாயமானா பரிஜிண்ணகுலஸ்ஸ தீ⁴தா அத்தனோ ஏகேன கிச்சேன ஆபணத்³வாரங் க³ந்த்வா தங் ஸெட்டி²ங் தி³ஸ்வா ஏவமாஹ – ‘‘கிங், தாத, ஸேஸஜனா வத்த²தேலமது⁴பா²ணிதாதீ³னி விக்கிணந்தி, த்வங் ஹிரஞ்ஞஸுவண்ணங் விக்கிணந்தோ நிஸின்னோ’’தி? ‘‘கஹங், அம்ம, ஹிரஞ்ஞஸுவண்ண’’ந்தி ? ‘‘நனு ‘த்வங் ததே³வ க³ஹெத்வா நிஸின்னோஸீ’தி, ஆஹர, தாவ நங், அம்மா’’தி. ஸா ஹத்த²பூரங் க³ஹெத்வா தஸ்ஸ ஹத்தே²ஸு ட²பேஸி, தங் ஹிரஞ்ஞஸுவண்ணமேவ அஹோஸி.
அத² நங் ஸெட்டி² ‘‘கதரங் தே, அம்ம, கே³ஹ’’ந்தி புச்சி²த்வா ‘‘அஸுகங் நாமா’’தி வுத்தே தஸ்ஸா அஸ்ஸாமிகபா⁴வங் ஞத்வா த⁴னங் படிஸாமெத்வா தங் அத்தனோ புத்தஸ்ஸ ஆனெத்வா சத்தாலீஸகோடித⁴னங் படிச்சா²பேஸி. ஸப்³ப³ங் ஹிரஞ்ஞஸுவண்ணமேவ அஹோஸி. தஸ்ஸா அபரேன ஸமயேன க³ப்³போ⁴ பதிட்ட²ஹி. ஸா த³ஸமாஸச்சயேன புத்தங் விஜாயி. ஸோ பத³ஸா க³மனகாலே காலமகாஸி. ஸா அதி³ட்ட²புப்³ப³மரணதாய தங் ஜா²பேதுங் நீஹரந்தே வாரெத்வா ‘‘புத்தஸ்ஸ மே பே⁴ஸஜ்ஜங் புச்சி²ஸ்ஸாமீ’’தி மதகளேவரங் அங்கேனாதா³ய ‘‘அபி நு மே புத்தஸ்ஸ பே⁴ஸஜ்ஜங் ஜானாதா²’’தி புச்ச²ந்தீ க⁴ரபடிபாடியா விசரதி. அத² நங் மனுஸ்ஸா, ‘‘அம்ம, த்வங் உம்மத்திகா ஜாதா, மதகபுத்தஸ்ஸ பே⁴ஸஜ்ஜங் புச்ச²ந்தீ விசரஸீ’’தி வத³ந்தி. ஸா ‘‘அவஸ்ஸங் மம புத்தஸ்ஸ பே⁴ஸஜ்ஜங் ஜானநகங் லபி⁴ஸ்ஸாமீ’’தி மஞ்ஞமானா விசரதி. அத² நங் ஏகோ பண்டி³தபுரிஸோ தி³ஸ்வா, ‘‘அயங் மம தீ⁴தா பட²மங் புத்தகங் விஜாதா ப⁴விஸ்ஸதி அதி³ட்ட²புப்³ப³மரணா, மயா இமிஸ்ஸா அவஸ்ஸயேன ப⁴விதுங் வட்டதீ’’தி சிந்தெத்வா ஆஹ – ‘‘அம்ம, அஹங் பே⁴ஸஜ்ஜங் ந ஜானாமி, பே⁴ஸஜ்ஜஜானநகங் பன ஜானாமீ’’தி. ‘‘கோ ஜானாதி, தாதா’’தி? ‘‘ஸத்தா², அம்ம, ஜானாதி, க³ச்ச², தங் புச்சா²ஹீ’’தி. ஸா ‘‘க³மிஸ்ஸாமி, தாத, புச்சி²ஸ்ஸாமி, தாதா’’தி வத்வா ஸத்தா²ரங் உபஸங்கமித்வா வந்தி³த்வா ஏகமந்தங் டி²தா புச்சி² – ‘‘தும்ஹே கிர மே புத்தஸ்ஸ பே⁴ஸஜ்ஜங் ஜானாத², ப⁴ந்தே’’தி? ‘‘ஆம, ஜானாமீ’’தி. ‘‘கிங் லத்³து⁴ங் வட்டதீ’’தி? ‘‘அச்ச²ரக்³க³ஹணமத்தே ஸித்³த⁴த்த²கே லத்³து⁴ங் வட்டதீ’’தி. ‘‘லபி⁴ஸ்ஸாமி, ப⁴ந்தே’’. ‘‘கஸ்ஸ பன கே³ஹே லத்³து⁴ங் வட்டதீ’’தி? ‘‘யஸ்ஸ கே³ஹே புத்தோ வா தீ⁴தா வா ந கோசி மதபுப்³போ³’’தி. ஸா ‘‘ஸாது⁴, ப⁴ந்தே’’தி ஸத்தா²ரங் வந்தி³த்வா மதபுத்தகங் அங்கேனாதா³ய அந்தோகா³மங் பவிஸித்வா பட²மகே³ஹஸ்ஸ த்³வாரே ட²த்வா ‘‘அத்தி² நு கோ² இமஸ்மிங் கே³ஹே ஸித்³த⁴த்த²கோ, புத்தஸ்ஸ கிர மே பே⁴ஸஜ்ஜங் ஏத’’ந்தி வத்வா ‘‘அத்தீ²’’தி வுத்தே தேன ஹி தே³தா²தி. தேஹி ஆஹரித்வா ஸித்³த⁴த்த²கேஸு தி³ய்யமானேஸு ‘‘இமஸ்மிங் கே³ஹே புத்தோ வா தீ⁴தா வா மதபுப்³போ³ கோசி நத்தி², அம்மா’’தி புச்சி²த்வா ‘‘கிங் வதே³ஸி, அம்ம? ஜீவமானா ஹி கதிபயா, மதகா ஏவ ப³ஹுகா’’தி வுத்தே ‘‘தேன ஹி க³ண்ஹத² வோ ஸித்³த⁴த்த²கே, நேதங் மம புத்தஸ்ஸ பே⁴ஸஜ்ஜ’’ந்தி படிஅதா³ஸி.
ஸா இமினா நீயாமேன ஆதி³தோ பட்டா²ய நங் புச்ச²ந்தீ விசரி. ஸா ஏககே³ஹேபி ஸித்³த⁴த்த²கே அக³ஹெத்வா ஸாயன்ஹஸமயே சிந்தேஸி – ‘‘அஹோ பா⁴ரியங் கம்மங், அஹங் ‘மமேவ புத்தோ மதோ’தி ஸஞ்ஞமகாஸிங், ஸகலகா³மேபி பன ஜீவந்தேஹி மதகாவ ப³ஹுதரா’’தி. தஸ்ஸா ஏவங் சிந்தயமானாய புத்தஸினேஹங் முது³கஹத³யங் த²த்³த⁴பா⁴வங் அக³மாஸி. ஸா புத்தங் அரஞ்ஞே ச²ட்³டெ³த்வா ஸத்து² ஸந்திகங் க³ந்த்வா வந்தி³த்வா ஏகமந்தங் அட்டா²ஸி. அத² நங் ஸத்தா² ‘‘லத்³தா⁴ தே ஏகச்ச²ரமத்தா ஸித்³த⁴த்த²கா’’தி ஆஹ. ‘‘ந லத்³தா⁴, ப⁴ந்தே, ஸகலகா³மே ஜீவந்தேஹி மதகாவ ப³ஹுதரா’’தி. அத² நங் ஸத்தா² ‘‘த்வங் ‘மமேவ புத்தோ மதோ’தி ஸல்லக்கே²ஸி, து⁴வத⁴ம்மோ ஏஸ ஸத்தானங். மச்சுராஜா ஹி ஸப்³ப³ஸத்தே அபரிபுண்ணஜ்ஜா²ஸயே ஏவ மஹோகோ⁴ விய பரிகட்³ட⁴மானோயேவ அபாயஸமுத்³தே³ பக்கி²பதீ’’தி வத்வா த⁴ம்மங் தே³ஸெந்தோ இமங் கா³த²மாஹ –
‘‘தங் புத்தபஸுஸம்மத்தங், ப்³யாஸத்தமனஸங் நரங்;
ஸுத்தங் கா³மங் மஹோகோ⁴வ, மச்சு ஆதா³ய க³ச்ச²தீ’’தி. (த⁴॰ ப॰ 287);
கா³தா²பரியோஸானே கிஸாகோ³தமீ ஸோதாபத்திப²லே பதிட்ட²ஹி, அஞ்ஞேபி ப³ஹூ ஸோதாபத்திப²லாதீ³னி பாபுணிங்ஸூதி.
ஸா பன ஸத்தா²ரங் பப்³ப³ஜ்ஜங் யாசி, ஸத்தா² தங் பி⁴க்கு²னீனங் ஸந்திகங் பேஸெத்வா பப்³பா³ஜேஸி. ஸா லத்³தூ⁴பஸம்பதா³ கிஸாகோ³தமீ தே²ரீதி பஞ்ஞாயி. ஸா ஏகதி³வஸங் உபோஸதா²கா³ரே வாரங் பத்வா தீ³பங் ஜாலெத்வா நிஸின்னா தீ³பஜாலா உப்பஜ்ஜந்தியோ ச பி⁴ஜ்ஜந்தியோ ச தி³ஸ்வா ‘‘ஏவமேவ இமே ஸத்தா உப்பஜ்ஜந்தி சேவ நிருஜ்ஜ²ந்தி ச, நிப்³பா³னப்பத்தா ஏவ ந பஞ்ஞாயந்தீ’’தி ஆரம்மணங் அக்³க³ஹேஸி. ஸத்தா² க³ந்த⁴குடியங் நிஸின்னோவ ஓபா⁴ஸங் ப²ரித்வா தஸ்ஸா ஸம்முகே² நிஸீதி³த்வா கதெ²ந்தோ விய ‘‘ஏவமேவ, கோ³தமி, இமே ஸத்தா தீ³பஜாலா விய உப்பஜ்ஜந்தி சேவ நிருஜ்ஜ²ந்தி ச, நிப்³பா³னப்பத்தா ஏவ ந பஞ்ஞாயந்தி, ஏவங் நிப்³பா³னங் அபஸ்ஸந்தானங் வஸ்ஸஸதங் ஜீவனதோ நிப்³பா³னங் பஸ்ஸந்தஸ்ஸ க²ணமத்தம்பி ஜீவிதங் ஸெய்யோ’’தி வத்வா அனுஸந்தி⁴ங் க⁴டெத்வா த⁴ம்மங் தே³ஸெந்தோ இமங் கா³த²மாஹ –
114.
‘‘யோ ச வஸ்ஸஸதங் ஜீவே, அபஸ்ஸங் அமதங் பத³ங்;
ஏகாஹங் ஜீவிதங் ஸெய்யோ, பஸ்ஸதோ அமதங் பத³’’ந்தி.
தத்த² அமதங் பத³ந்தி மரணவிரஹிதகொட்டா²ஸங், அமதமஹானிப்³பா³னந்தி அத்தோ². ஸேஸங் புரிமஸதி³ஸமேவ.
தே³ஸனாவஸானே கிஸாகோ³தமீ யதா²னிஸின்னாவ ஸஹ படிஸம்பி⁴தா³ஹி அரஹத்தே பதிட்ட²ஹீதி.
கிஸாகோ³தமீவத்து² தேரஸமங்.
14. ப³ஹுபுத்திகத்தே²ரீவத்து²
யோ ச வஸ்ஸஸதங் ஜீவேதி இமங் த⁴ம்மதே³ஸனங் ஸத்தா² ஜேதவனே விஹரந்தோ ப³ஹுபுத்திகங் தே²ரிங் ஆரப்³ப⁴ கதே²ஸி.
ஸாவத்தி²யங் கிரேகஸ்மிங் குலே ஸத்த புத்தா ஸத்த ச தீ⁴தரோ அஹேஸுங். தே ஸப்³பே³பி வயப்பத்தா கே³ஹே பதிட்ட²ஹித்வா அத்தனோ த⁴ம்மதாய ஸுக²ப்பத்தா அஹேஸுங். தேஸங் அபரேன ஸமயேன பிதா காலமகாஸி. மஹாஉபாஸிகா ஸாமிகே நட்டே²பி ந தாவ குடும்ப³ங் விப⁴ஜதி. அத² நங் புத்தா ஆஹங்ஸு – ‘‘அம்ம, அம்ஹாகங் பிதரி நட்டே² துய்ஹங் கோ அத்தோ² குடும்பே³ன, கிங் மயங் தங் உபட்டா²துங் ந ஸக்கோமா’’தி. ஸா தேஸங் கத²ங் ஸுத்வா துண்ஹீ ஹுத்வா புனப்புனங் தேஹி வுச்சமானா ‘‘புத்தா மங் படிஜக்³கி³ஸ்ஸந்தி, கிங் மே விஸுங் குடும்பே³னா’’தி ஸப்³ப³ங் ஸாபதெய்யங் மஜ்ஜே² பி⁴ந்தி³த்வா அதா³ஸி. அத² நங் கதிபாஹச்சயேன ஜெட்ட²புத்தஸ்ஸ ப⁴ரியா ‘‘அஹோ அம்ஹாகங், அய்யா, ‘ஜெட்ட²புத்தோ மே’தி த்³வே கொட்டா²ஸே த³த்வா விய இமமேவ கே³ஹங் ஆக³ச்ச²தீ’’தி ஆஹ. ஸேஸபுத்தானங் ப⁴ரியாபி ஏவமேவ வதி³ங்ஸு. ஜெட்ட²தீ⁴தரங் ஆதி³ங் கத்வா தாஸங் கே³ஹங் க³தகாலேபி நங் ஏவமேவ வதி³ங்ஸு. ஸா அவமானப்பத்தா ஹுத்வா ‘‘கிங் இமேஸங் ஸந்திகே வுட்டே²ன, பி⁴க்கு²னீ ஹுத்வா ஜீவிஸ்ஸாமீ’’தி பி⁴க்கு²னீஉபஸ்ஸயங் க³ந்த்வா பப்³ப³ஜ்ஜங் யாசி. தா நங் பப்³பா³ஜேஸுங். ஸா லத்³தூ⁴பஸம்பதா³ ஹுத்வா ப³ஹுபுத்திகத்தே²ரீதி பஞ்ஞாயி. ஸா ‘‘அஹங் மஹல்லககாலே பப்³ப³ஜிதா, அப்பமத்தாய மே ப⁴விதப்³ப³’’ந்தி பி⁴க்கு²னீனங் வத்தபடிவத்தங் கரொந்தீ ‘‘ஸப்³ப³ரத்திங் ஸமணத⁴ம்மங் கரிஸ்ஸாமீ’’தி ஹெட்டா²பாஸாதே³ ஏகங் த²ம்ப⁴ங் ஹத்தே²ன க³ஹெத்வா தங் ஆவிஞ்ச²மானாவ ஸமணத⁴ம்மங் கரோதி, சங்கமமானாபி ‘‘அந்த⁴காரட்டா²னே மே ருக்கே² வா கத்த²சி வா ஸீஸங் படிஹஞ்ஞெய்யா’’தி தங் ருக்க²ங் ஹத்தே²ன க³ஹெத்வா தங் ஆவிஞ்ச²மானாவ ஸமணத⁴ம்மங் கரோதி, ‘‘ஸத்தா²ரா தே³ஸிதத⁴ம்மமேவ கரிஸ்ஸாமீ’’தி த⁴ம்மங் ஆவஜ்ஜெத்வா த⁴ம்மங் அனுஸ்ஸரமானாவ ஸமணத⁴ம்மங் கரோதி. அத² ஸத்தா² க³ந்த⁴குடியங் நிஸின்னோவ ஓபா⁴ஸங் ப²ரித்வா ஸம்முகே² நிஸின்னோ விய தாய ஸத்³தி⁴ங் கதெ²ந்தோ ‘‘ப³ஹுபுத்திகே மயா தே³ஸிதங் த⁴ம்மங் அனாவஜ்ஜெந்தஸ்ஸ அபஸ்ஸந்தஸ்ஸ வஸ்ஸஸதங் ஜீவனதோ மயா தே³ஸிதங் த⁴ம்மங் பஸ்ஸந்தஸ்ஸ முஹுத்தம்பி ஜீவிதங் ஸெய்யோ’’தி வத்வா அனுஸந்தி⁴ங் க⁴டெத்வா த⁴ம்மங் தே³ஸெந்தோ இமங் கா³த²மாஹ –
115.
‘‘யோ ச வஸ்ஸஸதங் ஜீவே, அபஸ்ஸங் த⁴ம்மமுத்தமங்;
ஏகாஹங் ஜீவிதங் ஸெய்யோ, பஸ்ஸதோ த⁴ம்மமுத்தம’’ந்தி.
தத்த² த⁴ம்மமுத்தமந்தி நவவித⁴ங் லோகுத்தரத⁴ம்மங். ஸோ ஹி உத்தமோ த⁴ம்மோ நாம. யோ ஹி தங் ந பஸ்ஸதி, தஸ்ஸ வஸ்ஸஸதம்பி ஜீவனதோ தங் த⁴ம்மங் பஸ்ஸந்தஸ்ஸ படிவிஜ்ஜ²ந்தஸ்ஸ ஏகாஹம்பி ஏகக்க²ணம்பி ஜீவிதங் ஸெய்யோதி.
கா³தா²பரியோஸானே ப³ஹுபுத்திகத்தே²ரீ ஸஹ படிஸம்பி⁴தா³ஹி அரஹத்தே பதிட்ட²ஹீதி.
ப³ஹுபுத்திகத்தே²ரீவத்து² சுத்³த³ஸமங்.
ஸஹஸ்ஸவக்³க³வண்ணனா நிட்டி²தா.
அட்ட²மோ வக்³கோ³.
நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ
கு²த்³த³கனிகாயே
த⁴ம்மபத³-அட்ட²கதா²
(து³தியோ பா⁴கோ³)