உபோஸதா²தி³புச்சா²விஸ்ஸஜ்ஜனா
332. ‘‘உபோஸத²கம்மஸ்ஸ ஸாமக்³கீ³ ஆதீ³தி ‘‘உபோஸத²ங் கரிஸ்ஸாமா’’தி ஸீமங் ஸோதெ⁴த்வா ச²ந்த³பாரிஸுத்³தி⁴ங் ஆஹரித்வா ஸன்னிபதிதானங் காயஸாமக்³கீ³ ஆதி³. கிரியா மஜ்ஜே²தி புப்³ப³கிச்சங் கத்வா பாதிமொக்க²ஓஸாரணகிரியா மஜ்ஜே². நிட்டா²னங் பரியோஸானந்தி ‘‘தத்த² ஸப்³பே³ஹேவ ஸமக்³கே³ஹி ஸம்மோத³மானேஹி அவிவத³மானேஹி ஸிக்கி²தப்³ப³’’ந்தி இத³ங் பாதிமொக்க²னிட்டா²னங் பரியோஸானங். பவாரணாகம்மஸ்ஸ ஸாமக்³கீ³ ஆதீ³தி ‘‘பவாரணங் கரிஸ்ஸாமா’’தி ஸீமங் ஸோதெ⁴த்வா ச²ந்த³பவாரணங் ஆஹரித்வா ஸன்னிபதிதானங் காயஸாமக்³கீ³ ஆதி³. கிரியா மஜ்ஜே²தி பவாரணாஞத்தி ச பவாரணாகதா² ச மஜ்ஜே², ஸங்க⁴னவகஸ்ஸ ‘‘பஸ்ஸந்தோ படிகரிஸ்ஸாமீ’’தி வசனங் பரியோஸானங். தஜ்ஜனீயகம்மாதீ³ஸு வத்து² நாம யேன வத்து²னா கம்மாரஹோ ஹோதி, தங் வத்து². புக்³க³லோதி யேன தங் வத்து² கதங், ஸோ புக்³க³லோ. கம்மவாசா பரியோஸானந்தி ‘‘கதங் ஸங்கே⁴ன இத்த²ன்னாமஸ்ஸ பி⁴க்கு²னோ தஜ்ஜனீயகம்மங், க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி ஏவங் தஸ்ஸா தஸ்ஸா கம்மவாசாய அவஸானவசனங் பரியோஸானங். ஸேஸங் ஸப்³ப³த்த² உத்தானமேவாதி
உபோஸதா²தி³புச்சா²விஸ்ஸஜ்ஜனாவண்ணனா நிட்டி²தா.
அத்த²வஸபகரணாவண்ணனா
334. அத்த²வஸபகரணே – த³ஸ அத்த²வஸேதிஆதீ³ஸு யங் வத்தப்³ப³ங் தங் பட²மபாராஜிகவண்ணனாயமேவ வுத்தங். யங் ஸங்க⁴ஸுட்டு² தங் ஸங்க⁴பா²ஸூதிஆதீ³ஸு உபரிமங் உபரிமங் பத³ங் ஹெட்டி²மஸ்ஸ ஹெட்டி²மஸ்ஸ பத³ஸ்ஸ அத்தோ².
அத்த²ஸதங் த⁴ம்மஸதந்திஆதி³ம்ஹி பன யதே³தங் த³ஸஸு பதே³ஸு ஏகேகங் மூலங் கத்வா த³ஸக்க²த்துங் யோஜனாய பத³ஸதங்
‘‘அத்த²ஸதங் த⁴ம்மஸதங், த்³வே நிருத்திஸதானி;
சத்தாரி ஞாணஸதானி, அத்த²வஸே பகரணே’’தி.
இதி ஹி யங் வுத்தங், இத³மேதங் படிச்ச வுத்தந்தி.
இதி ஸமந்தபாஸாதி³காய வினயஸங்வண்ணனாய
மஹாவக்³க³வண்ணனா நிட்டி²தா.