பட²மகா³தா²ஸங்க³ணிகங்
ஸத்தனக³ரேஸு பஞ்ஞத்தஸிக்கா²பத³வண்ணனா
335. ஏகங்ஸங் சீவரங் கத்வாதி ஏகஸ்மிங் அங்ஸகூடே சீவரங் கத்வா; ஸாது⁴கங் உத்தராஸங்க³ங் கத்வாதி அத்தோ². பக்³க³ண்ஹித்வான அஞ்ஜலிந்தி த³ஸனக²ஸமோதா⁴னஸமுஜ்ஜலங் அஞ்ஜலிங் உக்கி²பித்வா. ஆஸீஸமானரூபோ வாதி பச்சாஸீஸமானரூபோ விய. கிஸ்ஸ த்வங் இத⁴ மாக³தோதி கேன காரணேன கிமத்த²ங் பத்த²யமானோ த்வங் இத⁴ ஆக³தோ. கோ ஏவமாஹ? ஸம்மாஸம்பு³த்³தோ⁴. கங் ஏவமாஹ? ஆயஸ்மந்தங் உபாலிங். இதி ஆயஸ்மா உபாலி ப⁴க³வந்தங்
தத்த² ப⁴த்³த³கோ தே உம்மங்கோ³தி ப⁴த்³த³கா தே பஞ்ஹா; பஞ்ஹா ஹி அவிஜ்ஜந்த⁴காரதோ உம்முஜ்ஜித்வா டி²தத்தா ‘‘உம்மங்கோ³’’தி வுச்சதி. தக்³கா⁴தி காரணத்தே² நிபாதோ. யஸ்மா மங் புச்ச²ஸி, தஸ்மா தே அஹமக்கி²ஸ்ஸந்தி அத்தோ². ஸம்படிச்ச²னத்தே² வா, ‘‘தக்³கா⁴’’தி ஹி இமினா வசனங் ஸம்படிச்சி²த்வா அக்கி²ஸ்ஸந்தி ஆஹ. ‘‘ஸமாத³ஹித்வா விஸிப்³பெ³ந்தி, ஸாமிஸேன, ஸஸித்த²க’’ந்தி இமானி தீணியேவ ஸிக்கா²பதா³னி ப⁴க்³கே³ஸு பஞ்ஞத்தானி.
சதுவிபத்திவண்ணனா
336. யங் தங் புச்சி²ம்ஹாதி யங் த்வங் அபுச்சி²ம்ஹா. அகித்தயீதி அபா⁴ஸி. நோதி அம்ஹாகங் தங் தங் ப்³யாகதந்தி யங் யங் புட்ட²ங், தங் ததே³வ ப்³யாகதங். அனஞ்ஞதா²தி அஞ்ஞதா² அகத்வா ப்³யாகதங்.
யே து³ட்டு²ல்லா ஸா ஸீலவிபத்தீதி எத்த² கிஞ்சாபி ஸீலவிபத்தி நாம பஞ்ஹே நத்தி², அத² கோ² து³ட்டு²ல்லங் விஸ்ஸஜ்ஜேதுகாமதாயேதங் வுத்தங். சதூஸு ஹி விபத்தீஸு து³ட்டு²ல்லங் ஏகாய விபத்தியா ஸங்க³ஹிதங், அது³ட்டு²ல்லங் தீஹி விபத்தீஹி ஸங்க³ஹிதங். தஸ்மா ‘‘யே து³ட்டு²ல்லா ஸா ஸீலவிபத்தீ’’தி வத்வா தமேவ வித்தா²ரதோ த³ஸ்ஸேதுங் ‘‘பாராஜிகங் ஸங்கா⁴தி³ஸேஸோ ஸீலவிபத்தீதி வுச்சதீ’’தி ஆஹ.
இதா³னி யோ சாயங், அக்கோஸதி ஹஸாதி⁴ப்பாயோதி இத³ங் து³ப்³பா⁴ஸிதஸ்ஸ வத்து²த³ஸ்ஸனத்த²ங் வுத்தங்.
அப்³பா⁴சிக்க²ந்தீதி ‘‘ததா²ஹங் ப⁴க³வதா த⁴ம்மங் தே³ஸிதங் ஆஜானாமீ’’தி வத³ந்தா அப்³பா⁴சிக்க²ந்தி.
அயங் ஸா ஆஜீவவிபத்திஸம்மதாதி அயங் ச²ஹி ஸிக்கா²பதே³ஹி ஸங்க³ஹிதா ஆஜீவவிபத்தி நாம சதுத்தா² விபத்தி ஸம்மதாதி எத்தாவதா ‘‘அது³ட்டு²ல்ல’’ந்தி இத³ங் விஸ்ஸஜ்ஜிதங் ஹோதி.
இதா³னி ‘‘யே ச யாவததியகா’’தி பஞ்ஹங் விஸ்ஸஜ்ஜேதுங் ‘‘ஏகாத³ஸா’’திஆதி³மாஹ.
சே²த³னகாதி³வண்ணனா
337. யஸ்மா பன ‘‘யே ச யாவததியகா’’தி அயங் பஞ்ஹோ ‘‘ஏகாத³ஸ யாவததியகா’’தி ஏவங் ஸங்கா²வஸேன விஸ்ஸஜ்ஜிதோ, தஸ்மா ஸங்கா²னுஸந்தி⁴வஸேனேவ ‘‘கதி சே²த³னகானீ’’திஆதி³கே அஞ்ஞே அந்தராபஞ்ஹே புச்சி². தேஸங் விஸ்ஸஜ்ஜனத்த²ங் ‘‘ச² சே²த³னகானீ’’திஆதி³ வுத்தங். தத்த² ‘‘ஏகங் ஏகங் பே⁴த³னகந்தி ஸூசிக⁴ரங். ஏகங் உத்³தா³லனகந்தி தூலோனத்³த⁴மஞ்சபீட²ங். ஸோத³ஸாதி ஸோளஸ. ஜானந்தி பஞ்ஞத்தாதி ‘‘ஜான’’ந்தி ஏவங் வத்வா பஞ்ஞத்தா, தே ஏவங் வேதி³தப்³பா³ – ‘‘ஜானங் ஸங்கி⁴கங் லாப⁴ங் பரிணதங்
அஸாதா⁴ரணாதி³வண்ணனா
338. இதா³னி ‘‘வீஸங் த்³வே ஸதானீ’’திஆதி³மாஹ. தத்த² பி⁴க்கு²னீஹி அஸாதா⁴ரணேஸு ச² ஸங்கா⁴தி³ஸேஸாதி விஸ்ஸட்டி², காயஸங்ஸக்³கோ³, து³ட்டு²ல்லங், அத்தகாம, குடி, விஹாரோதி. த்³வே அனியதேஹி அட்டா²தி த்³வீஹி அனியதேஹி ஸத்³தி⁴ங் அட்ட² இமே.
நிஸ்ஸக்³கி³யானி த்³வாத³ஸாதி –
தோ⁴வனஞ்ச படிக்³க³ஹோ, கோஸெய்யஸுத்³த⁴த்³வேபா⁴கா³;
ச²ப்³ப³ஸ்ஸானி நிஸீத³னங், த்³வே லோமா பட²மோ பத்தோ;
வஸ்ஸிகா ஆரஞ்ஞகேன சாதி – இமே த்³வாத³ஸ.
த்³வேவீஸதி கு²த்³த³காதி –
ஸகலோ பி⁴க்கு²னீவக்³கோ³, பரம்பரஞ்ச போ⁴ஜனங்;
அனதிரித்தங் அபி⁴ஹடங், பணீதஞ்ச அசேலகங்;
ஊனங் து³ட்டு²ல்லசா²த³னங்.
மாதுகா³மேன
ஸந்தங்
நிஸீத³னே ச யா ஸிக்கா², வஸ்ஸிகா யா ச ஸாடிகா;
த்³வாவீஸதி இமா ஸிக்கா², கு²த்³த³கேஸு பகாஸிதாதி.
பி⁴க்கூ²ஹி அஸாதா⁴ரணேஸுபி ஸங்க⁴ம்ஹா த³ஸ நிஸ்ஸரேதி ‘‘ஸங்க⁴ம்ஹா நிஸ்ஸாரீயதீ’’தி ஏவங் விப⁴ங்கே³ வுத்தா, மாதிகாயங் பன ‘‘நிஸ்ஸாரணீயங் ஸங்கா⁴தி³ஸேஸ’’ந்தி ஏவங் ஆக³தா த³ஸ. நிஸ்ஸக்³கி³யானி த்³வாத³ஸாதி பி⁴க்கு²னிவிப⁴ங்கே³ விப⁴த்தானி நிஸ்ஸக்³கி³யானேவ. கு²த்³த³காபி தத்த² விப⁴த்தகு²த்³த³கா ஏவ. ததா² சத்தாரோ பாடிதே³ஸனீயா, இதி ஸதஞ்சேவ திங்ஸஞ்ச ஸிக்கா² விப⁴ங்கே³ பி⁴க்கு²னீனங் பி⁴க்கூ²ஹி அஸாதா⁴ரணா. ஸேஸங் இமஸ்மிங் ஸாதா⁴ரணாஸாதா⁴ரணவிஸ்ஸஜ்ஜனே உத்தானமேவ.
இதா³னி விபத்தியோ ச ‘‘யேஹி ஸமதே²ஹி ஸம்மந்தீ’’தி இத³ங் பஞ்ஹங் விஸ்ஸஜ்ஜெந்தோ அட்டே²வ பாராஜிகாதிஆதி³மாஹ. தத்த² து³ராஸதா³தி இமினா தேஸங் ஸப்படிப⁴யதங் தாலவத்து²ஸமூபமாதி ஸப்³ப³ங் தாலங் உத்³த⁴ரித்வா தாலஸ்ஸ வத்து²மத்தகரணேன ஸமூபமா. யதா² வத்து²மத்தகதோ தாலோ ந புன பாகதிகோ ஹோதி, ஏவங் ந புன பாகதிகா ஹொந்தி.
ஏவங் ஸாதா⁴ரணங் உபமங் த³ஸ்ஸெத்வா புன ஏகேகஸ்ஸ வுத்தங் உபமங் த³ஸ்ஸெந்தோ பண்டு³பலாஸோதிஆதி³மாஹ. அவிருள்ஹீ ப⁴வந்தி தேதி யதா² ஏதே பண்டு³பலாஸாத³யோ புனஹரிதாதி³பா⁴வேன அவிருள்ஹித⁴ம்மா ஹொந்தி; ஏவங் பாராஜிகாபி புன பகதிஸீலாபா⁴வேன அவிருள்ஹித⁴ம்மா ஹொந்தீதி அத்தோ². எத்தாவதா ‘‘விபத்தியோ ச யேஹி ஸமதே²ஹி ஸம்மந்தீ’’தி எத்த² இமா தாவ அட்ட² பாராஜிகவிபத்தியோ கேஹிசி ஸமதே²ஹி ந ஸம்மந்தீதி ஏவங் த³ஸ்ஸிதங் ஹோதி. யா பன விபத்தியோ ஸம்மந்தி, தா த³ஸ்ஸேதுங் தேவீஸதி ஸங்கா⁴தி³ஸேஸாதிஆதி³ வுத்தங். தத்த² தீஹி ஸமதே²ஹீதி ஸப்³ப³ஸங்கா³ஹிகவசனமேதங். ஸங்கா⁴தி³ஸேஸா ஹி த்³வீஹி ஸமதே²ஹி ஸம்மந்தி, ந திணவத்தா²ரகேன. ஸேஸா தீஹிபி ஸம்மந்தி.
த்³வே உபோஸதா² த்³வே பவாரணாதி இத³ங் பி⁴க்கூ²னஞ்ச பி⁴க்கு²னீனஞ்ச வஸேன வுத்தங். விப⁴த்திமத்தத³ஸ்ஸனேனேவ சத்தாரி கம்மானீதி அத⁴ம்மேனவக்³கா³தீ³னி உபோஸத²கம்மானி. பஞ்சேவ உத்³தே³ஸா சதுரோ ப⁴வந்தி அனஞ்ஞதா²தி பி⁴க்கூ²னங் பஞ்ச உத்³தே³ஸா பி⁴க்கு²னீனங் சதுரோ ப⁴வந்தி, அஞ்ஞதா² ந ப⁴வந்தி; இமா அபராபி விப⁴த்தியோ. ஆபத்திக்க²ந்தா⁴ ச ப⁴வந்தி ஸத்த, அதி⁴கரணானி சத்தாரீதி இமா பன விப⁴த்தியோ ஸமதே²ஹி ஸம்மந்தி, தஸ்மா ஸத்தஹி ஸமதே²ஹீதிஆதி³மாஹ. அத² வா ‘‘த்³வே உபோஸதா² த்³வே பவாரணா சத்தாரி கம்மானி பஞ்சேவ உத்³தே³ஸா சதுரோ ப⁴வந்தி, அனஞ்ஞதா²’’தி இமாபி சதஸ்ஸோ விப⁴த்தியோ நிஸ்ஸாய ‘‘நஸ்ஸந்தேதே வினஸ்ஸந்தேதே’’திஆதி³னா நயேன யா ஆபத்தியோ ஆபஜ்ஜந்தி, தா யஸ்மா வுத்தப்பகாரேஹேவ ஸமதே²ஹி ஸம்மந்தி, தஸ்மா தங்மூலகானங் ஆபத்தீனங் ஸமத²த³ஸ்ஸனத்த²ம்பி தா விப⁴த்தியோ வுத்தாதி வேதி³தப்³பா³. கிச்சங் ஏகேனாதி கிச்சாதி⁴கரணங் ஏகேன ஸமதே²ன ஸம்மதி.
பாராஜிகாதி³ஆபத்திவண்ணனா
339. ஏவங் பாராஜிகந்திஆதி³மாஹ. தத்த² பாராஜிகந்தி கா³தா²ய அயமத்தோ² – யதி³த³ங் புக்³க³லாபத்திஸிக்கா²பத³பாராஜிகேஸு ஆபத்திபாராஜிகங் நாம வுத்தங், தங் ஆபஜ்ஜந்தோ புக்³க³லோ யஸ்மா பராஜிதோ பராஜயமாபன்னோ ஸத்³த⁴ம்மா சுதோ பரத்³தோ⁴ ப⁴ட்டோ² நிரங்கதோ ச ஹோதி, அனிஹதே தஸ்மிங் புக்³க³லே புன உபோஸத²ப்பவாரணாதி³பே⁴தோ³ ஸங்வாஸோ நத்தி². தேனேதங் இதி வுச்சதீதி தேன காரணேன ஏதங் ஆபத்திபாராஜிகந்தி வுச்சதி. அயஞ்ஹெத்த² ஸங்கே²பத்தோ² – யஸ்மா பராஜிதோ ஹோதி தேன, தஸ்மா ஏதங் பாராஜிகந்தி வுச்சதி.
து³தியகா³தா²யபி ப்³யஞ்ஜனங் அனாதி³யித்வா அத்த²மத்தமேவ த³ஸ்ஸேதுங் ஸங்கோ⁴வ தே³தி பரிவாஸந்திஆதி³ வுத்தங். அயங் பனெத்த² அத்தோ² – இமங் ஆபத்திங் ஆபஜ்ஜித்வா வுட்டா²துகாமஸ்ஸ யங் தங் ஆபத்திவுட்டா²னங் தஸ்ஸ ஆதி³ம்ஹி சேவ பரிவாஸதா³னத்தா²ய ஆதி³தோ ஸேஸே மஜ்ஜே² மானத்ததா³னத்தா²ய மூலாயபடிகஸ்ஸனேன வா ஸஹ மானத்ததா³னத்தா²ய, அவஸானே அப்³பா⁴னத்தா²ய ச ஸங்கோ⁴ இச்சி²தப்³போ³, ந ஸங்கா⁴தி³ஸேஸோ.
ததியகா³தா²ய அனியதோ ந நியதோதி யஸ்மா ந நியதோ, தஸ்மா அனியதோ அயமாபத்திக்க²ந்தோ⁴தி அத்தோ². கிங் காரணா ந நியதோதி? அனேகங்ஸிகதங் பத³ங், யஸ்மா இத³ங் ஸிக்கா²பத³ங் அனேகங்ஸேன கதந்தி அத்தோ². கத²ங் அனேகங்ஸேன? திண்ணமஞ்ஞதரங் டா²னங், திண்ணங் த⁴ம்மானங் அஞ்ஞதரேன காரேதப்³போ³தி ஹி தத்த² வுத்தங், தஸ்மா ‘‘அனியதோ’’தி பவுச்சதி, ஸோ ஆபத்திக்க²ந்தோ⁴ அனியதோதி வுச்சதி. யதா² ச திண்ணங் அஞ்ஞதரங் டா²னங், ஏவங் த்³வின்னங் த⁴ம்மானங் அஞ்ஞதரங் டா²னங் யத்த² வுத்தங், ஸோபி அனியதோ ஏவ.
சதுத்த²கா³தா²ய அச்சயோ தேன ஸமோ நத்தீ²தி தே³ஸனாகா³மினீஸு அச்சயேஸு தேன ஸமோ தூ²லோ அச்சயோ நத்தி², தேனேதங் இதி வுச்சதி; தூ²லத்தா அச்சயஸ்ஸ ஏதங் து²ல்லச்சயந்தி வுச்சதீதி அத்தோ².
பஞ்சமகா³தா²ய நிஸ்ஸஜ்ஜித்வான தே³ஸேதி தேனேதந்தி நிஸ்ஸஜ்ஜித்வா தே³ஸேதப்³ப³தோ நிஸ்ஸக்³கி³யந்தி வுச்சதீதி அத்தோ².
ச²ட்ட²கா³தா²ய பாதேதி குஸலங் த⁴ம்மந்தி ஸஞ்சிச்ச ஆபஜ்ஜந்தஸ்ஸ குஸலத⁴ம்மஸங்கா²தங் குஸலசித்தங் பாதேதி, தஸ்மா பாதேதி சித்தந்தி பாசித்தியங். யங் பன சித்தங் பாதேதி, தங் யஸ்மா அரியமக்³க³ங் அபரஜ்ஜ²தி, சித்தஸம்மோஹகாரணஞ்ச ஹோதி, தஸ்மா ‘‘அரியமக்³க³ங் அபரஜ்ஜ²தி, சித்தஸம்மோஹனட்டா²ன’’ந்தி ச வுத்தங்.
பாடிதே³ஸனீயகா³தா²ஸு ‘‘கா³ரய்ஹங் ஆவுஸோ த⁴ம்மங் ஆபஜ்ஜி’’ந்தி வுத்தகா³ரய்ஹபா⁴வகாரணத³ஸ்ஸனத்த²மேவ பி⁴க்கு² அஞ்ஞாதகோ ஸந்தோதிஆதி³ வுத்தங். படிதே³ஸேதப்³ப³தோ பன ஸா ஆபத்தி பாடிதே³ஸனீயாதி வுச்சதி.
து³க்கடகா³தா²ய அபரத்³த⁴ங் விரத்³த⁴ஞ்ச க²லிதந்தி ஸப்³ப³மேதங் ‘‘யஞ்ச து³க்கட’’ந்தி எத்த² வுத்தஸ்ஸ து³க்கடஸ்ஸ பரியாயவசனங். யஞ்ஹி து³ட்டு² கதங் விரூபங் வா கதங், தங் து³க்கடங். தங் பனேதங் யதா² ஸத்தா²ரா வுத்தங்; ஏவங் அகதத்தா அபரத்³த⁴ங், குஸலங் விரஜ்ஜி²த்வா பவத்தத்தா விரத்³த⁴ங், அரியவத்தபடிபத³ங் அனாருள்ஹத்தா க²லிதங். யங் மனுஸ்ஸோ கரேதி இத³ங் பனஸ்ஸ ஓபம்மனித³ஸ்ஸனங். தஸ்ஸத்தோ² – யதா² ஹி யங் லோகே மனுஸ்ஸோ ஆவி வா யதி³ வா ரஹோ பாபங் கரோதி, தங் து³க்கடந்தி பவேதெ³ந்தி; ஏவமித³ம்பி பு³த்³த⁴ப்படிகுட்டே²ன லாமகபா⁴வேன பாபங், தஸ்மா து³க்கடந்தி வேதி³தப்³ப³ங்.
து³ப்³பா⁴ஸிதகா³தா²ய து³ப்³பா⁴ஸிதங் து³ராப⁴ட்ட²ந்தி து³ட்டு² ஆப⁴ட்ட²ங் பா⁴ஸிதங் லபிதந்தி து³ராப⁴ட்ட²ங். யங் து³ராப⁴ட்ட²ங், தங் து³ப்³பா⁴ஸிதந்தி அத்தோ². கிஞ்ச பி⁴ய்யோ? ஸங்கிலிட்ட²ஞ்ச யங் பத³ங், ஸங்கிலிட்ட²ங் யஸ்மா தங் பத³ங் ஹோதீதி அத்தோ². ததா² யஞ்ச விஞ்ஞூ க³ரஹந்தி, யஸ்மா ச நங் தேனேதங் இதி வுச்சதீதி தேன ஸங்கிலிட்ட²பா⁴வேன ச விஞ்ஞுக³ரஹனேனாபி ச ஏதங் இதி வுச்சதி; ‘‘து³ப்³பா⁴ஸித’’ந்தி ஏவங் வுச்சதீதி அத்தோ².
ஸேகி²யகா³தா²ய ‘‘ஆதி³ சேதங் சரணஞ்சா’’திஆதி³னா நயேன ஸேக²ஸ்ஸ ஸந்தகபா⁴வங் தீ³பேதி. தஸ்மா ஸேக²ஸ்ஸ இத³ங் ஸேகி²யந்தி அயமெத்த² ஸங்கே²பத்தோ². இத³ங் ‘‘க³ருகலஹுகஞ்சாபீ’’திஆதி³பஞ்ஹேஹி அஸங்க³ஹிதஸ்ஸ ‘‘ஹந்த³ வாக்யங் ஸுணோம தே’’தி இமினா பன ஆயாசனவசனேன ஸங்க³ஹிதஸ்ஸ அத்த²ஸ்ஸ தீ³பனத்த²ங் வுத்தந்தி வேதி³தப்³ப³ங்.
ச²ன்னமதிவஸ்ஸதீதிஆதி³ம்ஹிபி ச²ன்னமதிவஸ்ஸதீதி கே³ஹங் தாவ திணாதீ³ஹி அச்ச²ன்னங் அதிவஸ்ஸதி. இத³ங் பன ஆபத்திஸங்கா²தங் கே³ஹங் ச²ன்னங் அதிவஸ்ஸதி; மூலாபத்திஞ்ஹி சா²தெ³ந்தோ அஞ்ஞங் நவங் ஆபத்திங் ஆபஜ்ஜதி. விவடங் நாதிவஸ்ஸதீதி கே³ஹங் தாவ அவிவடங் ஸுச்ச²ன்னங் நாதிவஸ்ஸதி. இத³ங் பன ஆபத்திஸங்கா²தங் கே³ஹங் விவடங் நாதிவஸ்ஸதி; மூலாபத்திஞ்ஹி விவரந்தோ தே³ஸனாகா³மினிங் தே³ஸெத்வா வுட்டா²னகா³மினிதோ வுட்ட²ஹித்வா ஸுத்³த⁴ந்தே பதிட்டா²தி. ஆயதிங் ஸங்வரந்தோ அஞ்ஞங் ஆபத்திங் நாபஜ்ஜதி. தஸ்மா ச²ன்னங் விவரேதா²தி தேன காரணேன தே³ஸனாகா³மினிங் தே³ஸெந்தோ வுட்டா²னகா³மினிதோ ச வுட்ட²ஹந்தோ ச²ன்னங் விவரேத². ஏவங் தங் நாதிவஸ்ஸதீதி ஏவஞ்சேதங் விவடங் நாதிவஸ்ஸதீதி அத்தோ².
க³தி மிகா³னங் பவனந்தி அஜ்ஜோ²காஸே ப்³யக்³கா⁴தீ³ஹி பரிபாதியமானானங் மிகா³னங் பவனங் ருக்கா²தி³க³ஹனங் அரஞ்ஞங் க³தி படிஸரணங் ஹோதி, தங் பத்வா தே அஸ்ஸாஸந்தி. ஏதேனேவ நயேன ஆகாஸோ பக்கீ²னங் க³தி. அவஸ்ஸங் உபக³மனட்டே²ன பன விப⁴வோ க³தி த⁴ம்மானங், ஸப்³பே³ஸம்பி ஸங்க²தத⁴ம்மானங் வினாஸோவ தேஸங் க³தி. ந ஹி தே வினாஸங் அக³ச்ச²ந்தா டா²துங் ஸக்கொந்தி. ஸுசிரம்பி நிப்³பா³னங் அரஹதோ க³தி, கீ²ணாஸவஸ்ஸ அரஹதோ அனுபாதி³ஸேஸனிப்³பா³னதா⁴து ஏகங்ஸேன க³தீதி அத்தோ².
பட²மகா³தா²ஸங்க³ணிகவண்ணனா நிட்டி²தா.