5. கு²த்³த³கவத்து²க்க²ந்த⁴கங்
கு²த்³த³கவத்தூ²னி
243. தேன ஸமயேன பு³த்³தோ⁴ ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன ச²ப்³ப³க்³கி³யா பி⁴க்கூ² நஹாயமானா ருக்கே² காயங் உக்³க⁴ங்ஸெந்தி, ஊரும்பி பா³ஹும்பி உரம்பி பிட்டி²ம்பி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஸமணா ஸக்யபுத்தியா நஹாயமானா ருக்கே² காயங் உக்³க⁴ங்ஸெஸ்ஸந்தி, ஊரும்பி பா³ஹும்பி உரம்பி பிட்டி²ம்பி, ஸெய்யதா²பி மல்லமுட்டி²கா கா³மமொத்³த³வா’’தி கா³மபொத்³த³வா (ஸீ॰), கா³மபூதவா (ஸ்யா॰)! அஸ்ஸோஸுங் கோ² பி⁴க்கூ² தேஸங் மனுஸ்ஸானங் உஜ்ஜா²யந்தானங் கி²ய்யந்தானங் விபாசெந்தானங். அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங். அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே பி⁴க்கு²ஸங்க⁴ங் ஸன்னிபாதாபெத்வா பி⁴க்கூ² படிபுச்சி² – ‘‘ஸச்சங் கிர, பி⁴க்க²வே, ச²ப்³ப³க்³கி³யா பி⁴க்கூ² நஹாயமானா ருக்கே² காயங் உக்³க⁴ங்ஸெந்தி, ஊரும்பி பா³ஹும்பி உரம்பி பிட்டி²ம்பீ’’தி? ‘‘ஸச்சங் ப⁴க³வா’’தி. விக³ரஹி பு³த்³தோ⁴ ப⁴க³வா – ‘‘அனநுச்ச²விகங், பி⁴க்க²வே , தேஸங் மோக⁴புரிஸானங் அனநுலோமிகங் அப்பதிரூபங் அஸ்ஸாமணகங் அகப்பியங் அகரணீயங். கத²ஞ்ஹி நாம தே, பி⁴க்க²வே, மோக⁴புரிஸா நஹாயமானா ருக்கே² காயங் உக்³க⁴ங்ஸெஸ்ஸந்தி, ஊரும்பி பா³ஹும்பி உரம்பி பிட்டி²ம்பி? நேதங், பி⁴க்க²வே, அப்பஸன்னானங் வா பஸாதா³ய…பே॰… விக³ரஹித்வா…பே॰… த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘ந, பி⁴க்க²வே, நஹாயமானேன பி⁴க்கு²னா ருக்கே² காயோ உக்³க⁴ங்ஸேதப்³போ³. யோ உக்³க⁴ங்ஸெய்ய, ஆபத்தி து³க்கடஸ்ஸா’’தி.
தேன கோ² பன ஸமயேன ச²ப்³ப³க்³கி³யா பி⁴க்கூ² நஹாயமானா த²ம்பே⁴ காயங் உக்³க⁴ங்ஸெந்தி, ஊரும்பி பா³ஹும்பி உரம்பி பிட்டி²ம்பி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஸமணா ஸக்யபுத்தியா நஹாயமானா த²ம்பே⁴ காயங் உக்³க⁴ங்ஸெஸ்ஸந்தி, ஊரும்பி பா³ஹும்பி உரம்பி பிட்டி²ம்பி, ஸெய்யதா²பி மல்லமுட்டி²கா கா³மமொத்³த³வா’’தி! அஸ்ஸோஸுங் கோ² பி⁴க்கூ² தேஸங் மனுஸ்ஸானங் உஜ்ஜா²யந்தானங் கி²ய்யந்தானங் விபாசெந்தானங். அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங்…பே॰… ‘‘ஸச்சங் ப⁴க³வா’’தி…பே॰… விக³ரஹித்வா…பே॰… த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘ந, பி⁴க்க²வே, நஹாயமானேன பி⁴க்கு²னா த²ம்பே⁴ காயோ உக்³க⁴ங்ஸேதப்³போ³. யோ உக்³க⁴ங்ஸெய்ய, ஆபத்தி து³க்கடஸ்ஸா’’தி.
தேன கோ² பன ஸமயேன ச²ப்³ப³க்³கி³யா பி⁴க்கூ² நஹாயமானா குட்டே குட்³டே³ (ஸீ॰ ஸ்யா॰) காயங் உக்³க⁴ங்ஸெந்தி, ஊரும்பி பா³ஹும்பி உரம்பி பிட்டி²ம்பி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஸமணா ஸக்யபுத்தியா நஹாயமானா குட்டே காயங் உக்³க⁴ங்ஸெஸ்ஸந்தி, ஊரும்பி பா³ஹும்பி உரம்பி பிட்டி²ம்பி, ஸெய்யதா²பி மல்லமுட்டி²கா கா³மமொத்³த³வா’’தி…பே॰… ‘‘ந, பி⁴க்க²வே, நஹாயமானேன பி⁴க்கு²னா குட்டே காயோ உக்³க⁴ங்ஸேதப்³போ³. யோ உக்³க⁴ங்ஸெய்ய, ஆபத்தி து³க்கடஸ்ஸா’’தி.
தேன கோ² பன ஸமயேன ச²ப்³ப³க்³கி³யா பி⁴க்கூ² அட்டானே அட்டா²னே (ஸீ॰ ஸ்யா॰) நஹாயந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி…பே॰… ஸெய்யதா²பி கி³ஹீ காமபோ⁴கி³னோதி ! அஸ்ஸோஸுங் கோ² பி⁴க்கூ² தேஸங் மனுஸ்ஸானங் உஜ்ஜா²யந்தானங் கி²யந்தானங் விபாசெந்தானங். அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங்…பே॰… ‘‘ஸச்சங் ப⁴க³வா’’தி…பே॰… விக³ரஹித்வா…பே॰… த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘ந, பி⁴க்க²வே, அட்டானே நஹாயிதப்³ப³ங். யோ நஹாயெய்ய, ஆபத்தி து³க்கடஸ்ஸா’’தி.
தேன கோ² பன ஸமயேன ச²ப்³ப³க்³கி³யா பி⁴க்கூ² க³ந்த⁴ப்³ப³ஹத்த²கேன நஹாயந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி…பே॰… ஸெய்யதா²பி கி³ஹீ காமபோ⁴கி³னோதி! அஸ்ஸோஸுங் கோ² பி⁴க்கூ² தேஸங் மனுஸ்ஸானங் உஜ்ஜா²யந்தானங் கி²ய்யந்தானங் விபாசெந்தானங். அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங்…பே॰… ‘‘ந, பி⁴க்க²வே, க³ந்த⁴ப்³ப³ஹத்த²கேன நஹாயிதப்³ப³ங். யோ நஹாயெய்ய, ஆபத்தி து³க்கடஸ்ஸா’’தி.
தேன கோ² பன ஸமயேன ச²ப்³ப³க்³கி³யா பி⁴க்கூ² குருவிந்த³கஸுத்தியா நஹாயந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி…பே॰… ஸெய்யதா²பி கி³ஹீ காமபோ⁴கி³னோதி! ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, குருவிந்த³கஸுத்தியா நஹாயிதப்³ப³ங். யோ நஹாயெய்ய, ஆபத்தி து³க்கடஸ்ஸா’’தி.
தேன கோ² பன ஸமயேன ச²ப்³ப³க்³கி³யா பி⁴க்கூ² விக்³க³ய்ஹ பரிகம்மங் காராபெந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி…பே॰… ஸெய்யதா²பி கி³ஹீ காமபோ⁴கி³னோதி! ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, விக்³க³ய்ஹ பரிகம்மங் காராபேதப்³ப³ங். யோ காராபெய்ய, ஆபத்தி து³க்கடஸ்ஸா’’தி.
தேன கோ² பன ஸமயேன ச²ப்³ப³க்³கி³யா பி⁴க்கூ² மல்லகேன நஹாயந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி…பே॰… ஸெய்யதா²பி கி³ஹீ காமபோ⁴கி³னோதி! ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, மல்லகேன நஹாயிதப்³ப³ங். யோ நஹாயெய்ய, ஆபத்தி து³க்கடஸ்ஸா’’தி.
244. தேன கோ² பன ஸமயேன அஞ்ஞதரஸ்ஸ பி⁴க்கு²னோ கச்சு²ரோகா³பா³தோ⁴ ஹோதி. ந தஸ்ஸ வினா மல்லகேன பா²ஸு ஹோதி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, கி³லானஸ்ஸ அகதமல்லக’’ந்தி.
தேன கோ² பன ஸமயேன அஞ்ஞதரோ பி⁴க்கு² ஜராது³ப்³ப³லோ நஹாயமானோ ந ஸக்கோதி அத்தனோ காயங் உக்³க⁴ங்ஸேதுங். ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, உக்காஸிக’’ந்தி.
தேன கோ² பன ஸமயேன பி⁴க்கூ² பிட்டி²பரிகம்மங் காதுங் குக்குச்சாயந்தி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, புது²பாணிக’’ந்தி.
245. தேன கோ² பன ஸமயேன ச²ப்³ப³க்³கி³யா பி⁴க்கூ² வல்லிகங் தா⁴ரெந்தி…பே॰… பாமங்க³ங் தா⁴ரெந்தி…பே॰… கண்ட²ஸுத்தகங் தா⁴ரெந்தி…பே॰… கடிஸுத்தகங் தா⁴ரெந்தி…பே॰… ஓவட்டிகங் தா⁴ரெந்தி…பே॰… காயுரங் தா⁴ரெந்தி…பே॰… ஹத்தா²ப⁴ரணங் தா⁴ரெந்தி…பே॰… அங்கு³லிமுத்³தி³கங் தா⁴ரெந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி…பே॰… ஸெய்யதா²பி கி³ஹீ காமபோ⁴கி³னோதி! அஸ்ஸோஸுங் கோ² பி⁴க்கூ² தேஸங் மனுஸ்ஸானங் உஜ்ஜா²யந்தானங் கி²ய்யந்தானங் விபாசெந்தானங். அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங். ‘‘ஸச்சங் கிர, பி⁴க்க²வே, ச²ப்³ப³க்³கி³யா பி⁴க்கூ² வல்லிகங் தா⁴ரெந்தி…பே॰… பாமங்க³ங் தா⁴ரெந்தி, கண்ட²ஸுத்தகங் தா⁴ரெந்தி, கடிஸுத்தகங் தா⁴ரெந்தி, ஓவட்டிகங் தா⁴ரெந்தி, காயுரங் தா⁴ரெந்தி, ஹத்தா²ப⁴ரணங் தா⁴ரெந்தி, அங்கு³லிமுத்³தி³கங் தா⁴ரெந்தீ’’தி? ‘‘ஸச்சங் ப⁴க³வா’’தி…பே॰… விக³ரஹித்வா…பே॰… த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘ந, பி⁴க்க²வே, வல்லிகா தா⁴ரேதப்³பா³…பே॰… ந பாமங்கோ³ தா⁴ரேதப்³போ³… ந கண்ட²ஸுத்தகங் தா⁴ரேதப்³ப³ங்… ந கடிஸுத்தகங் தா⁴ரேதப்³ப³ங்… ந ஓவட்டிகங் தா⁴ரேதப்³ப³ங்… ந காயுரங் தா⁴ரேதப்³ப³ங்… ந ஹத்தா²ப⁴ரணங் தா⁴ரேதப்³ப³ங்… ந அங்கு³லிமுத்³தி³கா தா⁴ரேதப்³பா³. யோ தா⁴ரெய்ய, ஆபத்தி து³க்கடஸ்ஸா’’தி.
246. தேன கோ² பன ஸமயேன ச²ப்³ப³க்³கி³யா பி⁴க்கூ² தீ³கே⁴ கேஸே தா⁴ரெந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ஸெய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, தீ³கா⁴ கேஸா தா⁴ரேதப்³பா³. யோ தா⁴ரெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, து³மாஸிகங் வா து³வங்கு³லங் வா’’தி.
தேன கோ² பன ஸமயேன ச²ப்³ப³க்³கி³யா பி⁴க்கூ² கொச்சே²ன கேஸே ஓஸண்டெ²ந்தி ஓஸண்ஹெந்தி (ஸீ॰ ஸ்யா॰) …பே॰… ப²ணகேன கேஸே ஓஸண்டெ²ந்தி, ஹத்த²ப²ணகேன கேஸே ஓஸண்டெ²ந்தி, ஸித்த²தேலகேன கேஸே ஓஸண்டெ²ந்தி, உத³கதேலகேன கேஸே ஓஸண்டெ²ந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ஸெய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, கொச்சே²ன கேஸா ஓஸண்டே²தப்³பா³…பே॰… ந ஸித்த²தேலகேன கேஸா ஓஸண்டே²தப்³பா³… ந உத³கதேலகேன கேஸா ஓஸண்டே²தப்³பா³. யோ ஓஸண்டெ²ய்ய, ஆபத்தி து³க்கடஸ்ஸா’’தி.
247. தேன கோ² பன ஸமயேன ச²ப்³ப³க்³கி³யா பி⁴க்கூ² ஆதா³ஸேபி உத³கபத்தேபி முக²னிமித்தங் ஓலோகெந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ஸெய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, ஆதா³ஸே வா உத³கபத்தே வா முக²னிமித்தங் ஓலோகேதப்³ப³ங். யோ ஓலோகெய்ய, ஆபத்தி து³க்கடஸ்ஸா’’தி.
தேன கோ² பன ஸமயேன அஞ்ஞதரஸ்ஸ பி⁴க்கு²னோ முகே² வணோ ஹோதி. ஸோ பி⁴க்கூ² புச்சி² – ‘‘கீதி³ஸோ மே, ஆவுஸோ, வணோ’’தி? பி⁴க்கூ² ஏவமாஹங்ஸு – ‘‘ஏதி³ஸோ தே, ஆவுஸோ வணோ’’தி. ஸோ ந ஸத்³த³ஹதி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, ஆபா³த⁴ப்பச்சயா ஆதா³ஸே வா உத³கபத்தே வா முக²னிமித்தங் ஓலோகேது’’ந்தி.
தேன கோ² பன ஸமயேன ச²ப்³ப³க்³கி³யா பி⁴க்கூ² முக²ங் ஆலிம்பந்தி…பே॰… முக²ங் உம்மத்³தெ³ந்தி, முக²ங் சுண்ணெந்தி, மனோஸிலிகாய முக²ங் லஞ்செ²ந்தி, அங்க³ராக³ங் கரொந்தி, முக²ராக³ங் கரொந்தி, அங்க³ராக³முக²ராக³ங் கரொந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ஸெய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, முக²ங் ஆலிம்பிதப்³ப³ங்…பே॰… ந முக²ங் உம்மத்³தி³தப்³ப³ங், ந முக²ங் சுண்ணேதப்³ப³ங், ந மனோஸிலிகாய முக²ங் லஞ்சே²தப்³ப³ங், ந அங்க³ராகோ³ காதப்³போ³, ந முக²ராகோ³ காதப்³போ³ , ந அங்க³ராக³முக²ராகோ³ காதப்³போ³. யோ கரெய்ய, ஆபத்தி து³க்கடஸ்ஸா’’தி.
தேன கோ² பன ஸமயேன அஞ்ஞதரஸ்ஸ பி⁴க்கு²னோ சக்கு²ரோகா³பா³தோ⁴ ஹோதி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, ஆபா³த⁴ப்பச்சயா முக²ங் ஆலிம்பிது’’ந்தி.
248. தேன கோ² பன ஸமயேன ராஜக³ஹே கி³ரக்³க³ஸமஜ்ஜோ ஸமஜ்ஜா (அபி⁴தா⁴னக³ந்தே²ஸு) ஹோதி. ச²ப்³ப³க்³கி³யா பி⁴க்கூ² கி³ரக்³க³ஸமஜ்ஜங் த³ஸ்ஸனாய அக³மங்ஸு. மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஸமணா ஸக்யபுத்தியா நச்சம்பி கீ³தம்பி வாதி³தம்பி த³ஸ்ஸனாய க³ச்சி²ஸ்ஸந்தி, ஸெய்யதா²பி கி³ஹீ காமபோ⁴கி³னோ’’தி! ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, நச்சங் வா கீ³தங் வா வாதி³தங் வா த³ஸ்ஸனாய க³ந்தப்³ப³ங். யோ க³ச்செ²ய்ய, ஆபத்தி து³க்கடஸ்ஸா’’தி.
249. தேன கோ² பன ஸமயேன ச²ப்³ப³க்³கி³யா பி⁴க்கூ² ஆயதகேன கீ³தஸ்ஸரேன த⁴ம்மங் கா³யந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘யதே²வ யதா² ச (க॰) மயங் கா³யாம, ஏவமேவிமே ஸமணா ஸக்யபுத்தியா ஆயதகேன கீ³தஸ்ஸரேன த⁴ம்மங் கா³யந்தீ’’தி! அஸ்ஸோஸுங் கோ² பி⁴க்கூ² தேஸங் மனுஸ்ஸானங் உஜ்ஜா²யந்தானங் கி²ய்யந்தானங் விபாசெந்தானங். யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² ஆயதகேன கீ³தஸ்ஸரேன த⁴ம்மங் கா³யிஸ்ஸந்தீ’’தி! அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங். ‘‘ஸச்சங் கிர, பி⁴க்க²வே…பே॰… ‘‘ஸச்சங் ப⁴க³வா’’தி…பே॰… த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘பஞ்சிமே, பி⁴க்க²வே, ஆதீ³னவா ஆயதகேன கீ³தஸ்ஸரேன த⁴ம்மங் கா³யந்தஸ்ஸ. அத்தனாபி தஸ்மிங் ஸரே ஸாரஜ்ஜதி, பரேபி தஸ்மிங் ஸரே ஸாரஜ்ஜந்தி, க³ஹபதிகாபி உஜ்ஜா²யந்தி, ஸரகுத்திம்பி நிகாமயமானஸ்ஸ ஸமாதி⁴ஸ்ஸ ப⁴ங்கோ³ ஹோதி, பச்சி²மா ஜனதா தி³ட்டா²னுக³திங் ஆபஜ்ஜதி – இமே கோ², பி⁴க்க²வே, பஞ்ச ஆதீ³னவா ஆயதகேன கீ³தஸ்ஸரேன த⁴ம்மங் கா³யந்தஸ்ஸ. ந, பி⁴க்க²வே, ஆயதகேன கீ³தஸ்ஸரேன த⁴ம்மோ கா³யிதப்³போ³. யோ கா³யெய்ய, ஆபத்தி து³க்கடஸ்ஸா’’தி.
தேன கோ² பன ஸமயேன பி⁴க்கூ² ஸரப⁴ஞ்ஞே குக்குச்சாயந்தி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, ஸரப⁴ஞ்ஞ’’ந்தி.
‘‘தேன கோ² பன ஸமயேன ச²ப்³ப³க்³கி³யா பி⁴க்கூ² பா³ஹிரலோமிங் பா³ஹியலோமிங் (க॰) உண்ணிங் தா⁴ரெந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ஸெய்யதா²பி கி³ஹீ காமபோ⁴கி³னோதி . ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, பா³ஹியலோமி உண்ணி தா⁴ரேதப்³பா³. யோ தா⁴ரெய்ய, ஆபத்தி து³க்கடஸ்ஸா’’தி.
250. தேன கோ² பன ஸமயேன ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ ஆராமே அம்பா³ ப²லினோ ஹொந்தி. ரஞ்ஞா மாக³தே⁴ன ஸேனியேன பி³ம்பி³ஸாரேன அனுஞ்ஞாதங் ஹோதி – ‘‘யதா²ஸுக²ங் அய்யா அம்ப³ங் பரிபு⁴ஞ்ஜந்தூ’’தி. ச²ப்³ப³க்³கி³யா பி⁴க்கூ² தருணஞ்ஞேவ அம்ப³ங் பாதாபெத்வா பரிபு⁴ஞ்ஜிங்ஸு. ரஞ்ஞோ ச மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ அம்பே³ன அத்தோ² ஹோதி. அத² கோ² ராஜா மாக³தோ⁴ ஸேனியோ பி³ம்பி³ஸாரோ மனுஸ்ஸே ஆணாபேஸி – ‘‘க³ச்ச²த², ப⁴ணே, ஆராமங் க³ந்த்வா அம்ப³ங் ஆஹரதா²’’தி . ‘‘ஏவங் தே³வா’’தி கோ² தே மனுஸ்ஸா ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ படிஸ்ஸுத்வா ஆராமங் க³ந்த்வா ஆராமபாலங் ஏதத³வோசுங் – ‘‘தே³வஸ்ஸ, ப⁴ணே, அம்பே³ன அத்தோ², அம்ப³ங் தே³தா²’’தி. ‘‘நத்தா²ய்யா அம்ப³ங். தருணஞ்ஞேவ அம்ப³ங் பாதாபெத்வா பி⁴க்கூ² பரிபு⁴ஞ்ஜிங்ஸூ’’தி. அத² கோ² தே மனுஸ்ஸா ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ ஏதமத்த²ங் ஆரோசேஸுங். ‘‘ஸுபரிபு⁴த்தங், ப⁴ணே, அய்யேஹி அம்ப³ங், அபி ச ப⁴க³வதா மத்தா வண்ணிதா’’தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஸமணா ஸக்யபுத்தியா ந மத்தங் ஜானித்வா ரஞ்ஞோ அம்ப³ங் பரிபு⁴ஞ்ஜிஸ்ஸந்தீ’’தி! அஸ்ஸோஸுங் கோ² பி⁴க்கூ² தேஸங் மனுஸ்ஸானங் உஜ்ஜா²யந்தானங் கி²ய்யந்தானங் விபாசெந்தானங். அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, அம்ப³ங் பரிபு⁴ஞ்ஜிதப்³ப³ங். யோ பரிபு⁴ஞ்ஜெய்ய, ஆபத்தி து³க்கடஸ்ஸா’’தி.
தேன கோ² பன ஸமயேன அஞ்ஞதரஸ்ஸ பூக³ஸ்ஸ ஸங்க⁴ப⁴த்தங் ஹோதி. ஸூபே அம்ப³பேஸிகாயோ பக்கி²த்தா ஹொந்தி. பி⁴க்கூ² குக்குச்சாயந்தா நப்படிக்³க³ண்ஹந்தி. ‘‘படிக்³க³ண்ஹத², பி⁴க்க²வே, பரிபு⁴ஞ்ஜத². அனுஜானாமி, பி⁴க்க²வே, அம்ப³பேஸிக’’ந்தி.
தேன கோ² பன ஸமயேன அஞ்ஞதரஸ்ஸ பூக³ஸ்ஸ ஸங்க⁴ப⁴த்தங் ஹோதி. தே ந பரியாபுணிங்ஸு அம்ப³பேஸிகங் காதுங், ப⁴த்தக்³கே³ ஸகலேஹேவ அம்பே³ஹி தெ³ந்தி. பி⁴க்கூ² குக்குச்சாயந்தா நப்படிக்³க³ண்ஹந்தி. ‘‘படிக்³க³ண்ஹத² , பி⁴க்க²வே, பரிபு⁴ஞ்ஜத². அனுஜானாமி, பி⁴க்க²வே, பஞ்சஹி ஸமணகப்பேஹி ப²லங் பரிபு⁴ஞ்ஜிதுங் – அக்³கி³பரிசிதங் , ஸத்த²பரிசிதங், நக²பரிசிதங், அபீ³ஜங், நிப்³ப³த்தபீ³ஜஞ்ஞேவ நிப்³ப³ட்டபீ³ஜங் (ஸீ॰ ஸ்யா॰) பஞ்சமங். அனுஜானாமி, பி⁴க்க²வே, இமேஹி பஞ்சஹி ஸமணகப்பேஹி ப²லங் பரிபு⁴ஞ்ஜிது’’ந்தி.
251. தேன கோ² பன ஸமயேன அஞ்ஞதரோ பி⁴க்கு² அஹினா த³ட்டோ² காலங்கதோ ஹோதி. ப⁴க³வதோ ஏதமத்த²ங் ஆரோசேஸுங். ‘‘ந ஹி நூன ஸோ, பி⁴க்க²வே, பி⁴க்கு² இமானி சத்தாரி அஹிராஜகுலானி மெத்தேன சித்தேன ப²ரி. ஸசே ஹி ஸோ, பி⁴க்க²வே, பி⁴க்கு² இமானி சத்தாரி அஹிராஜகுலானி மெத்தேன சித்தேன ப²ரெய்ய, ந ஹி ஸோ, பி⁴க்க²வே, பி⁴க்கு² அஹினா த³ட்டோ² காலங்கரெய்ய. கதமானி சத்தாரி அஹிராஜகுலானி? விரூபக்க²ங் அஹிராஜகுலங், ஏராபத²ங் அஹிராஜகுலங், ச²ப்³யாபுத்தங் அஹிராஜகுலங், கண்ஹாகோ³தமங் அஹிராஜகுலங் . ந ஹி நூன ஸோ, பி⁴க்க²வே, பி⁴க்கு² இமானி சத்தாரி அஹிராஜகுலானி மெத்தேன சித்தேன ப²ரி. ஸசே ஹி ஸோ, பி⁴க்க²வே, பி⁴க்கு² இமானி சத்தாரி அஹிராஜகுலானி மெத்தேன சித்தேன ப²ரெய்ய, ந ஹி ஸோ, பி⁴க்க²வே, பி⁴க்கு² அஹினா த³ட்டோ² காலங்கரெய்ய. அனுஜானாமி, பி⁴க்க²வே, இமானி சத்தாரி அஹிராஜகுலானி மெத்தேன சித்தேன ப²ரிதுங், அத்தகு³த்தியா அத்தரக்கா²ய அத்தபரித்தங் காதுங். ஏவஞ்ச பன, பி⁴க்க²வே, காதப்³ப³ங் –
ஜா॰ 1.2.105-106; அ॰ நி॰ 4.67 இத³ங் வத்து² ஆக³தங் ‘‘விரூபக்கே²ஹி மே மெத்தங், மெத்தங் ஏராபதே²ஹி மே;
ச²ப்³யாபுத்தேஹி மே மெத்தங், மெத்தங் கண்ஹாகோ³தமகேஹி ச.
‘‘அபாத³கேஹி மே மெத்தங், மெத்தங் த்³விபாத³கேஹி மே;
சதுப்பதே³ஹி மே மெத்தங், மெத்தங் ப³ஹுப்பதே³ஹி மே.
‘‘மா மங் அபாத³கோ ஹிங்ஸி, மா மங் ஹிங்ஸி த்³விபாத³கோ;
மா மங் சதுப்பதோ³ ஹிங்ஸி, மா மங் ஹிங்ஸி ப³ஹுப்பதோ³.
‘‘ஸப்³பே³ ஸத்தா ஸப்³பே³ பாணா, ஸப்³பே³ பூ⁴தா ச கேவலா;
ஸப்³பே³ ப⁴த்³ரானி பஸ்ஸந்து, மா கிஞ்சி பாபமாக³மா.
‘‘அப்பமாணோ பு³த்³தோ⁴, அப்பமாணோ த⁴ம்மோ,
அப்பமாணோ ஸங்கோ⁴, பமாணவந்தானி ஸரீஸபானி ஸிரிங்ஸபானி (ஸீ॰ ஸ்யா॰).
‘‘அஹி விச்சி²கா ஸதபதீ³, உண்ணனாபி⁴ ஸரபூ³ மூஸிகா;
கதா மே ரக்கா² கதங் மே பரித்தங், படிக்கமந்து பூ⁴தானி.
‘‘ஸோஹங் நமோ ப⁴க³வதோ, நமோ ஸத்தன்னங் ஸம்மாஸம்பு³த்³தா⁴ன’’ந்தி.
தேன கோ² பன ஸமயேன அஞ்ஞதரோ பி⁴க்கு² அனபி⁴ரதியா பீளிதோ அத்தனோ அங்க³ஜாதங் சி²ந்தி³. ப⁴க³வதோ ஏதமத்த²ங் ஆரோசேஸுங். ‘‘அஞ்ஞம்ஹி ஸோ, பி⁴க்க²வே, மோக⁴புரிஸோ சே²தப்³ப³ம்ஹி, அஞ்ஞங் சி²ந்தி³. ந, பி⁴க்க²வே, அத்தனோ அங்க³ஜாதங் சே²தப்³ப³ங். யோ சி²ந்தெ³ய்ய, ஆபத்தி து²ல்லச்சயஸ்ஸா’’தி.
252. தேன கோ² பன ஸமயேன ராஜக³ஹகஸ்ஸ ஸெட்டி²ஸ்ஸ மஹக்³க⁴ஸ்ஸ சந்த³னஸ்ஸ சந்த³னஸாரஸ்ஸ (ஸீ॰ ஸ்யா॰) சந்த³னக³ண்டி² உப்பன்னா ஹோதி. அத² கோ² ராஜக³ஹகஸ்ஸ ஸெட்டி²ஸ்ஸ ஏதத³ஹோஸி – ‘‘யங்னூனாஹங் இமாய சந்த³னக³ண்டி²யா பத்தங் லேகா²பெய்யங். லேக²ஞ்ச மே பரிபோ⁴க³ங் ப⁴விஸ்ஸதி, பத்தஞ்ச தா³னங் த³ஸ்ஸாமீ’’தி. அத² கோ² ராஜக³ஹகோ ஸெட்டி² தாய சந்த³னக³ண்டி²யா பத்தங் லேகா²பெத்வா ஸிக்காய உட்³டி³த்வா வாஹித்வா (ஸீ॰) வேளக்³கே³ ஆலக்³கெ³த்வா வேளுபரம்பராய ப³ந்தி⁴த்வா வாஹித்வா (ஸ்யா॰) ஏவமாஹ – ‘‘யோ ஸமணோ வா ப்³ராஹ்மணோ வா அரஹா சேவ இத்³தி⁴மா ச தி³ன்னங்யேவ பத்தங் ஓஹரதூ’’தி. அத² கோ² பூரணோ கஸ்ஸபோ யேன ராஜக³ஹகோ ஸெட்டி² தேனுபஸங்கமி, உபஸங்கமித்வா ராஜக³ஹகங் ஸெட்டி²ங் ஏதத³வோச – ‘‘அஹஞ்ஹி, க³ஹபதி, அரஹா சேவ இத்³தி⁴மா ச, தே³ஹி மே பத்த’’ந்தி. ‘‘ஸசே, ப⁴ந்தே, ஆயஸ்மா அரஹா சேவ இத்³தி⁴மா ச தி³ன்னங்யேவ பத்தங் ஓஹரதூ’’தி. அத² கோ² மக்க²லி கோ³ஸாலோ… அஜிதோ கேஸகம்ப³லோ… பகுதோ⁴ கச்சாயனோ… ஸஞ்சயோ பே³லட்ட²புத்தோ ஸஞ்ஜயோ பே³ல்லட்டி²புத்தோ (ஸீ॰) … நிக³ண்டோ² நாடபுத்தோ நாத²புத்தோ (ஸீ॰) யேன ராஜக³ஹகோ ஸெட்டி² தேனுபஸங்கமி, உபஸங்கமித்வா ராஜக³ஹகங் ஸெட்டி²ங் ஏதத³வோச – ‘‘அஹஞ்ஹி, க³ஹபதி, அரஹா சேவ இத்³தி⁴மா ச, தே³ஹி மே பத்த’’ந்தி. ‘‘ஸசே, ப⁴ந்தே, ஆயஸ்மா அரஹா சேவ இத்³தி⁴மா ச, தி³ன்னங்யேவ பத்தங் ஓஹரதூ’’தி.
தேன கோ² பன ஸமயேன ஆயஸ்மா ச மஹாமொக்³க³ல்லானோ ஆயஸ்மா ச பிண்டோ³லபா⁴ரத்³வாஜோ புப்³ப³ண்ஹஸமயங் நிவாஸெத்வா பத்தசீவரமாதா³ய ராஜக³ஹங் பிண்டா³ய பவிஸிங்ஸு. அத² கோ² ஆயஸ்மா பிண்டோ³லபா⁴ரத்³வாஜோ ஆயஸ்மந்தங் மஹாமொக்³க³ல்லானங் ஏதத³வோச – ‘‘ஆயஸ்மா கோ² மஹாமொக்³க³ல்லானோ அரஹா சேவ இத்³தி⁴மா ச. க³ச்சா²வுஸோ, மொக்³க³ல்லான, ஏதங் பத்தங் ஓஹர. துய்ஹேஸோ பத்தோ’’தி. ‘‘ஆயஸ்மா கோ² பா⁴ரத்³வாஜோ அரஹா சேவ இத்³தி⁴மா ச. க³ச்சா²வுஸோ, பா⁴ரத்³வாஜ, ஏதங் பத்தங் ஓஹர. துய்ஹேஸோ பத்தோ’’தி. அத² கோ² ஆயஸ்மா பிண்டோ³லபா⁴ரத்³வாஜோ வேஹாஸங் அப்³பு⁴க்³க³ந்த்வா தங் பத்தங் க³ஹெத்வா திக்க²த்துங் ராஜக³ஹங் அனுபரியாயி.
தேன கோ² பன ஸமயேன ராஜக³ஹகோ ஸெட்டி² ஸபுத்ததா³ரோ ஸகே நிவேஸனே டி²தோ ஹோதி பஞ்ஜலிகோ நமஸ்ஸமானோ – இதே⁴வ, ப⁴ந்தே, அய்யோ பா⁴ரத்³வாஜோ அம்ஹாகங் நிவேஸனே பதிட்டா²தூதி. அத² கோ² ஆயஸ்மா பிண்டோ³லபா⁴ரத்³வாஜோ ராஜக³ஹகஸ்ஸ ஸெட்டி²ஸ்ஸ நிவேஸனே பதிட்டா²ஸி. அத² கோ² ராஜக³ஹகோ ஸெட்டி² ஆயஸ்மதோ பிண்டோ³லபா⁴ரத்³வாஜஸ்ஸ ஹத்த²தோ பத்தங் க³ஹெத்வா மஹக்³க⁴ஸ்ஸ கா²த³னீயஸ்ஸ பூரெத்வா ஆயஸ்மதோ பிண்டோ³லபா⁴ரத்³வாஜஸ்ஸ அதா³ஸி. அத² கோ² ஆயஸ்மா பிண்டோ³லபா⁴ரத்³வாஜோ தங் பத்தங் க³ஹெத்வா ஆராமங் அக³மாஸி. அஸ்ஸோஸுங் கோ² மனுஸ்ஸா – அய்யேன கிர பிண்டோ³லபா⁴ரத்³வாஜேன ராஜக³ஹகஸ்ஸ ஸெட்டி²ஸ்ஸ பத்தோ ஓஹாரிதோதி. தே ச மனுஸ்ஸா உச்சாஸத்³தா³ மஹாஸத்³தா³ ஆயஸ்மந்தங் பிண்டோ³லபா⁴ரத்³வாஜங் பிட்டி²தோ பிட்டி²தோ அனுப³ந்தி⁴ங்ஸு.
அஸ்ஸேஸி கோ² ப⁴க³வா உச்சாஸத்³த³ங் மஹாஸத்³த³ங்; ஸுத்வான ஆயஸ்மந்தங் ஆனந்த³ங் ஆமந்தேஸி – ‘‘கிங் நு கோ² ஸோ, ஆனந்த³, உச்சாஸத்³தோ³ மஹாஸத்³தோ³’’தி? ‘‘ஆயஸ்மதா, ப⁴ந்தே, பிண்டோ³லபா⁴ரத்³வாஜேன ராஜக³ஹகஸ்ஸ ஸெட்டி²ஸ்ஸ பத்தோ ஓஹாரிதோ. அஸ்ஸோஸுங் கோ², ப⁴ந்தே, மனுஸ்ஸா – அய்யேன கிர பிண்டோ³லபா⁴ரத்³வாஜேன ராஜக³ஹகஸ்ஸ ஸெட்டி²ஸ்ஸ பத்தோ ஓஹாரிதோதி. தே ச, ப⁴ந்தே, மனுஸ்ஸா உச்சாஸத்³தா³ மஹாஸத்³தா³ ஆயஸ்மந்தங் பிண்டோ³லபா⁴ரத்³வாஜங் பிட்டி²தோ பிட்டி²தோ அனுப³ந்தா⁴. ஸோ ஏஸோ, ப⁴ந்தே, ப⁴க³வா உச்சாஸத்³தோ³ மஹாஸத்³தோ³’’தி. அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே பி⁴க்கு²ஸங்க⁴ங் ஸன்னிபாதாபெத்வா ஆயஸ்மந்தங் பிண்டோ³லபா⁴ரத்³வாஜங் படிபுச்சி² – ‘‘ஸச்சங் கிர தயா, பா⁴ரத்³வாஜ, ராஜக³ஹகஸ்ஸ ஸெட்டி²ஸ்ஸ பத்தோ ஓஹாரிதோ’’தி? ‘‘ஸச்சங் ப⁴க³வா’’தி. விக³ரஹி பு³த்³தோ⁴ ப⁴க³வா – ‘‘அனநுச்ச²விகங், பா⁴ரத்³வாஜ, அனநுலோமிகங் அப்பதிரூபங் அஸ்ஸாமணகங் அகப்பியங் அகரணீயங். கத²ஞ்ஹி நாம த்வங், பா⁴ரத்³வாஜ, ச²வஸ்ஸ தா³ருபத்தஸ்ஸ காரணா கி³ஹீனங் உத்தரிமனுஸ்ஸத⁴ம்மங் இத்³தி⁴பாடிஹாரியங் த³ஸ்ஸெஸ்ஸஸி! ஸெய்யதா²பி, பா⁴ரத்³வாஜ, மாதுகா³மோ ச²வஸ்ஸ மாஸகரூபஸ்ஸ காரணா கோபினங் த³ஸ்ஸேதி, ஏவமேவ கோ² தயா, பா⁴ரத்³வாஜ, ச²வஸ்ஸ தா³ருபத்தஸ்ஸ காரணா கி³ஹீனங் உத்தரிமனுஸ்ஸத⁴ம்மங் இத்³தி⁴பாடிஹாரியங் த³ஸ்ஸிதங். நேதங், பா⁴ரத்³வாஜ, அப்பஸன்னானங் வா பஸாதா³ய…பே॰… விக³ரஹித்வா…பே॰… த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘ந, பி⁴க்க²வே, கி³ஹீனங் உத்தரிமனுஸ்ஸத⁴ம்மங் இத்³தி⁴பாடிஹாரியங் த³ஸ்ஸேதப்³ப³ங். யோ த³ஸ்ஸெய்ய, ஆபத்தி து³க்கடஸ்ஸ. பி⁴ந்த³தே²தங், பி⁴க்க²வே, தா³ருபத்தங் ஸகலிகங் ஸகலிகங் கத்வா , பி⁴க்கூ²னங் அஞ்ஜனுபபிஸனங் தே³த². ந ச, பி⁴க்க²வே, தா³ருபத்தோ தா⁴ரேதப்³போ³. யோ தா⁴ரெய்ய, ஆபத்தி து³க்கடஸ்ஸா’’தி.
தேன கோ² பன ஸமயேன ச²ப்³ப³க்³கி³யா பி⁴க்கூ² உச்சாவசே பத்தே தா⁴ரெந்தி ஸோவண்ணமயங் ரூபியமயங். மனுஸ்ஸா உஜ்ஜா²யந்தி கி²ய்யந்தி விபாசெந்தி – ஸெய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, ஸோவண்ணமயோ பத்தோ தா⁴ரேதப்³போ³…பே॰… ந ரூபியமயோ பத்தோ தா⁴ரேதப்³போ³… ந மணிமயோ பத்தோ தா⁴ரேதப்³போ³… ந வேளுரியமயோ பத்தோ தா⁴ரேதப்³போ³… ந ப²லிகமயோ பத்தோ தா⁴ரேதப்³போ³… ந கங்ஸமயோ பத்தோ தா⁴ரேதப்³போ³… ந காசமயோ பத்தோ தா⁴ரேதப்³போ³… ந திபுமயோ பத்தோ தா⁴ரேதப்³போ³… ந ஸீஸமயோ பத்தோ தா⁴ரேதப்³போ³… ந தம்ப³லோஹமயோ பத்தோ தா⁴ரேதப்³போ³. யோ தா⁴ரெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, த்³வே பத்தே – அயோபத்தங், மத்திகாபத்த’’ந்தி.
253. தேன கோ² பன ஸமயேன பத்தமூலங் க⁴ங்ஸியதி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, பத்தமண்ட³ல’’ந்தி.
தேன கோ² பன ஸமயேன ச²ப்³ப³க்³கி³யா பி⁴க்கூ² உச்சாவசானி பத்தமண்ட³லானி தா⁴ரெந்தி ஸோவண்ணமயங் ரூபியமயங். மனுஸ்ஸா உஜ்ஜா²யந்தி கி²ய்யந்தி விபாசெந்தி – ஸெய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, உச்சாவசானி பத்தமண்ட³லானி தா⁴ரேதப்³பா³னி. யோ தா⁴ரெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, த்³வே பத்தமண்ட³லானி – திபுமயங், ஸீஸமய’’ந்தி. ப³ஹலானி மண்ட³லானி ந அச்சு²பியந்தி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, லிகி²து’’ந்தி. வலீ சலீ (க॰) ஹொந்தி . ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, மகரத³ந்தகங் சி²ந்தி³து’’ந்தி.
தேன கோ² பன ஸமயேன ச²ப்³ப³க்³கி³யா பி⁴க்கூ² சித்ரானி பத்தமண்ட³லானி தா⁴ரெந்தி ரூபகாகிண்ணானி பி⁴த்திகம்மகதானி. தானி ரதி²காயபி த³ஸ்ஸெந்தா ஆஹிண்ட³ந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ஸெய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, சித்ரானி பத்தமண்ட³லானி தா⁴ரேதப்³பா³னி ரூபகாகிண்ணானி பி⁴த்திகம்மகதானி. யோ தா⁴ரெய்ய, ஆபத்தி து³க்கடஸ்ஸ. ‘‘அனுஜானாமி, பி⁴க்க²வே, பகதிமண்ட³ல’’ந்தி.
254. தேன கோ² பன ஸமயேன பி⁴க்கூ² ஸோத³கங் பத்தங் படிஸாமெந்தி. பத்தோ து³ஸ்ஸதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, ஸோத³கோ பத்தோ படிஸாமேதப்³போ³. யோ படிஸாமெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, ஓதாபெத்வா பத்தங் படிஸாமேது’’ந்தி.
தேன கோ² பன ஸமயேன பி⁴க்கூ² ஸோத³கங் ஸஉத³கங் (க॰) பத்தங் ஓதாபெந்தி. பத்தோ து³க்³க³ந்தோ⁴ ஹோதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, ஸோத³கோ பத்தோ ஓதாபேதப்³போ³. யோ ஓதாபெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, வோத³கங் கத்வா ஓதாபெத்வா பத்தங் படிஸாமேது’’ந்தி.
தேன கோ² பன ஸமயேன பி⁴க்கூ² உண்ஹே பத்தங் நித³ஹந்தி. பத்தஸ்ஸ வண்ணோ து³ஸ்ஸதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, உண்ஹே பத்தோ நித³ஹிதப்³போ³. யோ நித³ஹெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, முஹுத்தங் உண்ஹே ஓதாபெத்வா பத்தங் படிஸாமேது’’ந்தி.
தேன கோ² பன ஸமயேன ஸம்ப³ஹுலா பத்தா அஜ்ஜோ²காஸே அனாதா⁴ரா நிக்கி²த்தா ஹொந்தி. வாதமண்ட³லிகாய ஆவட்டெத்வா பத்தா பி⁴ஜ்ஜிங்ஸு . ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, பத்தாதா⁴ரக’’ந்தி.
தேன கோ² பன ஸமயேன பி⁴க்கூ² மிட்³ட⁴ந்தே பத்தங் நிக்கி²பந்தி. பரிபதித்வா பரிவட்டித்வா (ஸ்யா॰) பத்தோ பி⁴ஜ்ஜதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, மிட்³ட⁴ந்தே பத்தோ நிக்கி²பிதப்³போ³. யோ நிக்கி²பெய்ய, ஆபத்தி து³க்கடஸ்ஸா’’தி.
தேன கோ² பன ஸமயேன பி⁴க்கூ² பரிப⁴ண்ட³ந்தே பத்தங் நிக்கி²பந்தி. பரிபதித்வா பத்தோ பி⁴ஜ்ஜதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, பரிப⁴ண்ட³ந்தே பத்தோ நிக்கி²பிதப்³போ³. யோ நிக்கி²பெய்ய, ஆபத்தி து³க்கடஸ்ஸா’’தி.
தேன கோ² பன ஸமயேன பி⁴க்கூ² ச²மாய பத்தங் நிக்குஜ்ஜந்தி. ஒட்டோ² க⁴ங்ஸியதி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, திணஸந்தா²ரக’’ந்தி. திணஸந்தா²ரகோ உபசிகாஹி க²ஜ்ஜதி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, சோளக’’ந்தி. சோளகங் உபசிகாஹி க²ஜ்ஜதி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, பத்தமாளக’’ந்தி. பத்தமாளகோ பரிபதித்வா பத்தோ பி⁴ஜ்ஜதி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, பத்தகுண்டோ³லிக’’ந்தி. பத்தகுண்டோ³லிகாய பத்தோ க⁴ங்ஸியதி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, பத்தத²விக’’ந்தி . அங்ஸப³த்³த⁴கோ ந ஹோதி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, அங்ஸப³த்³த⁴கங் ப³ந்த⁴னஸுத்தக’’ந்தி.
தேன கோ² பன ஸமயேன பி⁴க்கூ² பி⁴த்திகி²லேபி நாக³த³ந்தகேபி பத்தங் லக்³கெ³ந்தி. பரிபதித்வா பத்தோ பி⁴ஜ்ஜதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, பத்தோ லக்³கே³தப்³போ³. யோ லக்³கெ³ய்ய, ஆபத்தி து³க்கடஸ்ஸா’’தி.
தேன கோ² பன ஸமயேன பி⁴க்கூ² மஞ்சே பத்தங் நிக்கி²பந்தி, ஸதிஸம்மோஸா நிஸீத³ந்தா ஒத்த²ரித்வா பத்தங் பி⁴ந்தெ³ந்தி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, மஞ்சே பத்தோ நிக்கி²பிதப்³போ³. யோ நிக்கி²பெய்ய, ஆபத்தி து³க்கடஸ்ஸா’’தி.
தேன கோ² பன ஸமயேன பி⁴க்கூ² பீடே² பத்தங் நிக்கி²பந்தி, ஸதிஸம்மோஸா நிஸீத³ந்தா ஒத்த²ரித்வா பத்தங் பி⁴ந்தெ³ந்தி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, பீடே² பத்தோ நிக்கி²பிதப்³போ³. யோ நிக்கி²பெய்ய, ஆபத்தி து³க்கடஸ்ஸா’’தி.
தேன கோ² பன ஸமயேன பி⁴க்கூ² அங்கே பத்தங் நிக்கி²பந்தி, ஸதிஸம்மோஸா உட்ட²ஹந்தி. பரிபதித்வா பத்தோ பி⁴ஜ்ஜதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, அங்கே பத்தோ நிக்கி²பிதப்³போ³. யோ நிக்கி²பெய்ய, ஆபத்தி து³க்கடஸ்ஸா’’தி.
தேன கோ² பன ஸமயேன பி⁴க்கூ² ச²த்தே பத்தங் நிக்கி²பந்தி. வாதமண்ட³லிகாய ச²த்தங் உக்கி²பியதி பரிபதித்வா பத்தோ பி⁴ஜ்ஜதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, ச²த்தே பத்தோ நிக்கி²பிதப்³போ³. யோ நிக்கி²பெய்ய, ஆபத்தி து³க்கடஸ்ஸா’’தி.
255. தேன கோ² பன ஸமயேன பி⁴க்கூ² பத்தஹத்தா² கவாடங் பணாமெந்தி. கவாடோ ஆவட்டித்வா பத்தோ பி⁴ஜ்ஜதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, பத்தஹத்தே²ன கவாடங் பணாமேதப்³ப³ங் கவாடோ பணாமேதப்³போ³ (க॰). யோ பணாமெய்ய, ஆபத்தி து³க்கடஸ்ஸா’’தி.
தேன கோ² பன ஸமயேன பி⁴க்கூ² தும்ப³கடாஹே பிண்டா³ய சரந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ஸெய்யதா²பி தித்தி²யாதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, தும்ப³கடாஹே பிண்டா³ய சரிதப்³ப³ங். யோ சரெய்ய, ஆபத்தி து³க்கடஸ்ஸா’’தி.
தேன கோ² பன ஸமயேன பி⁴க்கூ² க⁴டிகடாஹே க⁴டிகடாஹேன (ஸ்யா॰) பிண்டா³ய சரந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ஸெய்யதா²பி தித்தி²யாதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, க⁴டிகடாஹே பிண்டா³ய சரிதப்³ப³ங். யோ சரெய்ய, ஆபத்தி து³க்கடஸ்ஸா’’தி.
தேன கோ² பன ஸமயேன அஞ்ஞதரோ பி⁴க்கு² ஸப்³ப³பங்ஸுகூலிகோ ஹோதி. ஸோ ச²வஸீஸஸ்ஸ பத்தங் தா⁴ரேதி. அஞ்ஞதரா இத்தீ² பஸ்ஸித்வா பீ⁴தா விஸ்ஸரமகாஸி – ‘‘அபு⁴ங் மே பிஸாசோ வதாய’’ந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஸமணா ஸக்யபுத்தியா ச²வஸீஸஸ்ஸ பத்தங் தா⁴ரெஸ்ஸந்தி, ஸெய்யதா²பி பிஸாசில்லிகா’’தி! ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, ச²வஸீஸஸ்ஸ பத்தோ தா⁴ரேதப்³போ³. யோ தா⁴ரெய்ய, ஆபத்தி து³க்கடஸ்ஸ. ந ச, பி⁴க்க²வே, ஸப்³ப³பங்ஸுகூலிகேன ப⁴விதப்³ப³ங். யோ ப⁴வெய்ய, ஆபத்தி து³க்கடஸ்ஸா’’தி.
தேன கோ² பன ஸமயேன பி⁴க்கூ² சலகானிபி அட்டி²கானிபி உச்சி²ட்டோ²த³கம்பி பத்தேன நீஹரந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘யஸ்மிங் யேவிமே ஸமணா ஸக்யபுத்தியா பு⁴ஞ்ஜந்தி ஸோவ நேஸங் படிக்³க³ஹோ’’தி. ப⁴க³வதோ ஏதமத்த²ங் ஆரோசேஸுங். ‘‘ந பி⁴க்க²வே, சலகானி வா அட்டி²கானி வா உச்சி²ட்டோ²த³கங் வா பத்தேன நீஹரிதப்³ப³ங். யோ நீஹரெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, படிக்³க³ஹ’’ந்தி.
256. தேன கோ² பன ஸமயேன பி⁴க்கூ² ஹத்தே²ன விப்பா²ளெத்வா சீவரங் ஸிப்³பெ³ந்தி. சீவரங் விலோமிகங் ஹோதி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, ஸத்த²கங் நமதக’’ந்தி.
தேன கோ² பன ஸமயேன ஸங்க⁴ஸ்ஸ த³ண்ட³ஸத்த²கங் உப்பன்னங் ஹோதி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, த³ண்ட³ஸத்த²க’’ந்தி .
தேன கோ² பன ஸமயேன ச²ப்³ப³க்³கி³யா பி⁴க்கூ² உச்சாவசே ஸத்த²கத³ண்டே³ தா⁴ரெந்தி ஸோவண்ணமயங் ரூபியமயங். மனுஸ்ஸா உஜ்ஜா²யந்தி கி²ய்யந்தி விபாசெந்தி – ஸெய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, உச்சாவசா ஸத்த²கத³ண்டா³ தா⁴ரேதப்³பா³. யோ தா⁴ரெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, அட்டி²மயங் த³ந்தமயங் விஸாணமயங் நளமயங் வேளுமயங் கட்ட²மயங் ஜதுமயங் ப²லமயங் லோஹமயங் ஸங்க²னாபி⁴மய’’ந்தி.
தேன கோ² பன ஸமயேன பி⁴க்கூ² குக்குடபத்தேனபி வேளுபேஸிகாயபி சீவரங் ஸிப்³பெ³ந்தி. சீவரங் து³ஸ்ஸிப்³பி³தங் ஹோதி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, ஸூசி’’ந்தி. ஸூசியோ கண்ணகிதாயோ ஹொந்தி…பே॰… ‘‘அனுஜானாமி, பி⁴க்க²வே , ஸூசினாளிக’’ந்தி. ஸூசினாளிகாயபி கண்ணகிதாயோ ஹொந்தி…பே॰… ‘‘அனுஜானாமி, பி⁴க்க²வே, கிண்ணேன பூரேது’’ந்தி. கிண்ணேபி கண்ணகிதாயோ ஹொந்தி…பே॰… ‘‘அனுஜானாமி, பி⁴க்க²வே, ஸத்துயா பூரேது’’ந்தி. ஸத்துயாபி கண்ணகிதாயோ ஹொந்தி…பே॰… ‘‘அனுஜானாமி, பி⁴க்க²வே, ஸரிதக’’ந்தி. ஸரிதகேபி கண்ணகிதாயோ ஹொந்தி…பே॰… ‘‘அனுஜானாமி, பி⁴க்க²வே, மது⁴ஸித்த²கேன ஸாரேது’’ந்தி. ஸரிதகங் பரிபி⁴ஜ்ஜதி. ‘‘அனுஜானாமி, பி⁴க்க²வே, ஸரிதகஸிபாடிக’’ந்தி.
தேன கோ² பன ஸமயேன பி⁴க்கூ² தத்த² தத்த² கி²லங் நிக்க²ணித்வா ஸம்ப³ந்தி⁴த்வா சீவரங் ஸிப்³பெ³ந்தி. சீவரங் விகண்ணங் ஹோதி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, கதி²னங் கதி²னரஜ்ஜுங் கடி²னங் கடி²னரஜ்ஜுங் (ஸீ॰ ஸ்யா॰) தத்த² தத்த² ஓப³ந்தி⁴த்வா சீவரங் ஸிப்³பே³து’’ந்தி. விஸமே கதி²னங் பத்த²ரந்தி. கதி²னங் பரிபி⁴ஜ்ஜதி…பே॰… ‘‘ந, பி⁴க்க²வே, விஸமே கதி²னங் பத்த²ரிதப்³ப³ங். யோ பத்த²ரெய்ய, ஆபத்தி து³க்கடஸ்ஸா’’தி.
ச²மாய கதி²னங் பத்த²ரந்தி. கதி²னங் பங்ஸுகிதங் ஹோதி…பே॰… ‘‘அனுஜானாமி, பி⁴க்க²வே, திணஸந்தா²ரக’’ந்தி. கதி²னஸ்ஸ அந்தோ ஜீரதி…பே॰… ‘‘அனுஜானாமி, பி⁴க்க²வே, அனுவாதங் பரிப⁴ண்ட³ங் ஆரோபேது’’ந்தி. கதி²னங் நப்பஹோதி…பே॰… ‘‘அனுஜானாமி, பி⁴க்க²வே, த³ண்ட³கதி²னங் பி³த³லகங் ஸலாகங் வினந்த⁴னரஜ்ஜுங் வினந்த⁴னஸுத்தங் வினந்தி⁴த்வா சீவரங் ஸிப்³பே³து’’ந்தி. ஸுத்தந்தரிகாயோ விஸமா ஹொந்தி…பே॰… ‘‘அனுஜானாமி , பி⁴க்க²வே, களிம்ப⁴க’’ந்தி. ஸுத்தா வங்கா ஹொந்தி…பே॰… ‘‘அனுஜானாமி, பி⁴க்க²வே, மோக⁴ஸுத்தக’’ந்தி.
தேன கோ² பன ஸமயேன பி⁴க்கூ² அதோ⁴தேஹி பாதே³ஹி கதி²னங் அக்கமந்தி. கதி²னங் து³ஸ்ஸதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, அதோ⁴தேஹி பாதே³ஹி கதி²னங் அக்கமிதப்³ப³ங். யோ அக்கமெய்ய, ஆபத்தி து³க்கடஸ்ஸா’’தி.
தேன கோ² பன ஸமயேன பி⁴க்கூ² அல்லேஹி பாதே³ஹி கதி²னங் அக்கமந்தி. கதி²னங் து³ஸ்ஸதி. ப⁴க³வதோ ஏதமத்த²ங் ஆரோசேஸுங். ‘‘ந , பி⁴க்க²வே, அல்லேஹி பாதே³ஹி கதி²னங் அக்கமிதப்³ப³ங். யோ அக்கமெய்ய, ஆபத்தி து³க்கடஸ்ஸா’’தி.
தேன கோ² பன ஸமயேன பி⁴க்கூ² ஸஉபாஹனா கதி²னங் அக்கமந்தி. கதி²னங் து³ஸ்ஸதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, ஸஉபாஹனேன கதி²னங் அக்கமிதப்³ப³ங். யோ அக்கமெய்ய, ஆபத்தி து³க்கடஸ்ஸா’’தி.
தேன கோ² பன ஸமயேன பி⁴க்கூ² சீவரங் ஸிப்³ப³ந்தா அங்கு³லியா படிக்³க³ண்ஹந்தி. அங்கு³லியோ து³க்கா² ஹொந்தி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, படிக்³க³ஹ’’ந்தி.
257. தேன கோ² பன ஸமயேன ச²ப்³ப³க்³கி³யா பி⁴க்கூ² உச்சாவசே படிக்³க³ஹே தா⁴ரெந்தி ஸோவண்ணமயங் ரூபியமயங். மனுஸ்ஸா உஜ்ஜா²யந்தி கி²ய்யந்தி விபாசெந்தி – ஸெய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, உச்சாவசா படிக்³க³ஹா தா⁴ரேதப்³பா³. யோ தா⁴ரெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, அட்டி²மயங்…பே॰… ஸங்க²னாபி⁴மய’’ந்தி.
தேன கோ² பன ஸமயேன ஸூசியோபி ஸத்த²காபி படிக்³க³ஹாபி நஸ்ஸந்தி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, ஆவேஸனவித்த²க’’ந்தி. ஆவேஸனவித்த²கே ஸமாகுலா ஹொந்தி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, படிக்³க³ஹத²விக’’ந்தி. அங்ஸப³த்³த⁴கோ ந ஹோதி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, அங்ஸப³த்³த⁴கங் ப³ந்த⁴னஸுத்தக’’ந்தி.
தேன கோ² பன ஸமயேன பி⁴க்கூ² அப்³போ⁴காஸே சீவரங் ஸிப்³ப³ந்தா ஸீதேனபி உண்ஹேனபி கிலமந்தி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, கதி²னஸாலங் கதி²னமண்ட³ப’’ந்தி. கதி²னஸாலா நீசவத்து²கா ஹோதி, உத³கேன ஒத்த²ரிய்யதி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே உச்சவத்து²கங் காது’’ந்தி. சயோ பரிபததி…பே॰… ‘‘அனுஜானாமி, பி⁴க்க²வே, சினிதுங் தயோ சயே – இட்ட²காசயங், ஸிலாசயங், தா³ருசய’’ந்தி. ஆரோஹந்தா விஹஞ்ஞந்தி…பே॰… ‘‘அனுஜானாமி, பி⁴க்க²வே, தயோ ஸோபானே – இட்ட²காஸோபானங், ஸிலாஸோபானங், தா³ருஸோபான’’ந்தி. ஆரோஹந்தா பரிபதந்தி…பே॰… ‘‘அனுஜானாமி, பி⁴க்க²வே, ஆலம்ப³னபா³ஹ’’ந்தி. கதி²னஸாலாய திணசுண்ணங் பரிபததி…பே॰… ‘‘அனுஜானாமி, பி⁴க்க²வே, ஓகு³ம்பெ²த்வா ஓகு³ம்பெ³த்வா (ஸீ॰ ஸ்யா॰) உல்லித்தாவலித்தங் காதுங் – ஸேதவண்ணங் காளவண்ணங் கே³ருகபரிகம்மங் மாலாகம்மங் லதாகம்மங் மகரத³ந்தகங் பஞ்சபடிகங் சீவரவங்ஸங் சீவரரஜ்ஜுக’’ந்தி.
தேன கோ² பன ஸமயேன பி⁴க்கூ² சீவரங் ஸிப்³பெ³த்வா தத்தே²வ கதி²னங் உஜ்ஜி²த்வா பக்கமந்தி, உந்தூ³ரேஹிபி உபசிகாஹிபி க²ஜ்ஜதி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, கதி²னங் ஸங்க⁴ரிது’’ந்தி. கதி²னங் பரிபி⁴ஜ்ஜதி…பே॰… ‘‘அனுஜானாமி, பி⁴க்க²வே, கோ³க⁴ங்ஸிகாய கதி²னங் ஸங்க⁴ரிது’’ந்தி. கதி²னங் வினிவேடி²யதி…பே॰… ‘‘அனுஜானாமி, பி⁴க்க²வே, ப³ந்த⁴னரஜ்ஜு’’ந்தி .
தேன கோ² பன ஸமயேன பி⁴க்கூ² குட்டேபி த²ம்பே⁴பி கதி²னங் உஸ்ஸாபெத்வா பக்கமந்தி. பரிபதித்வா கதி²னங் பி⁴ஜ்ஜதி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, பி⁴த்திகி²லே வா நாக³த³ந்தே வா லக்³கே³து’’ந்தி.
258. அத² கோ² ப⁴க³வா ராஜக³ஹே யதா²பி⁴ரந்தங் விஹரித்வா யேன வேஸாலீ தேன சாரிகங் பக்காமி. தேன கோ² பன ஸமயேன பி⁴க்கூ² ஸூசிகம்பி ஸத்த²கம்பி பே⁴ஸஜ்ஜம்பி பத்தேன ஆதா³ய க³ச்ச²ந்தி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, பே⁴ஸஜ்ஜத்த²விக’’ந்தி. அங்ஸப³த்³த⁴கோ ந ஹோதி…பே॰… ‘‘அனுஜானாமி, பி⁴க்க²வே, அங்ஸப³த்³த⁴கங் ப³ந்த⁴னஸுத்தக’’ந்தி.
தேன கோ² பன ஸமயேன அஞ்ஞதரோ பி⁴க்கு² உபாஹனாயோ காயப³ந்த⁴னேன ப³ந்தி⁴த்வா கா³மங் பிண்டா³ய பாவிஸி. அஞ்ஞதரோ உபாஸகோ தங் பி⁴க்கு²ங் அபி⁴வாதெ³ந்தோ உபாஹனாயோ ஸீஸேன க⁴ட்டேதி. ஸோ பி⁴க்கு² மங்கு அஹோஸி. அத² கோ² ஸோ பி⁴க்கு² ஆராமங் க³ந்த்வா பி⁴க்கூ²னங் ஏதமத்த²ங் ஆரோசேஸி. பி⁴க்கூ² ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, உபாஹனத்த²விக’’ந்தி. அங்ஸப³த்³த⁴கோ ந ஹோதி…பே॰… ‘‘அனுஜானாமி, பி⁴க்க²வே, அங்ஸப³த்³த⁴கங் ப³ந்த⁴னஸுத்தக’’ந்தி.
தேன கோ² பன ஸமயேன அந்தராமக்³கே³ உத³கங் அகப்பியங் ஹோதி. பரிஸ்ஸாவனங் ந ஹோதி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி , பி⁴க்க²வே, பரிஸ்ஸாவன’’ந்தி. சோளகங் நப்பஹோதி…பே॰… ‘‘அனுஜானாமி, பி⁴க்க²வே, கடச்சு²பரிஸ்ஸாவன’’ந்தி. சோளகங் நப்பஹோதி…பே॰… ‘‘அனுஜானாமி, பி⁴க்க²வே, த⁴ம்மகரண’’ந்தி த⁴ம்மகரணங் (ஸீ॰ ஸ்யா॰), த⁴மகரணங் (க॰).
259. தேன கோ² பன ஸமயேன த்³வே பி⁴க்கூ² கோஸலேஸு ஜனபதே³ அத்³தா⁴னமக்³க³ப்படிபன்னா ஹொந்தி. ஏகோ பி⁴க்கு² அனாசாரங் ஆசரதி. து³தியோ பி⁴க்கு² தங் பி⁴க்கு²ங் ஏதத³வோச – ‘‘மா, ஆவுஸோ, ஏவரூபங் அகாஸி. நேதங் கப்பதீ’’தி. ஸோ தஸ்மிங் உபனந்தி⁴. அத² கோ² ஸோ பி⁴க்கு² பிபாஸாய பீளிதோ உபனத்³த⁴ங் பி⁴க்கு²ங் ஏதத³வோச – ‘‘தே³ஹி மே, ஆவுஸோ, பரிஸ்ஸாவனங், பானீயங் பிவிஸ்ஸாமீ’’தி. உபனத்³தோ⁴ பி⁴க்கு² ந அதா³ஸி. ஸோ பி⁴க்கு² பிபாஸாய பீளிதோ காலமகாஸி. அத² கோ² ஸோ பி⁴க்கு² ஆராமங் க³ந்த்வா பி⁴க்கூ²னங் ஏதமத்த²ங் ஆரோசேஸி. ‘‘கிங் பன த்வங், ஆவுஸோ, பரிஸ்ஸாவனங் யாசியமானோ ந அதா³ஸீ’’தி? ‘‘ஏவமாவுஸோ’’தி. யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பி⁴க்கு² பரிஸ்ஸாவனங் யாசியமானோ ந த³ஸ்ஸதீ’’தி! அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங். அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே பி⁴க்கு²ஸங்க⁴ங் ஸன்னிபாதாபெத்வா தங் பி⁴க்கு²ங் படிபுச்சி² – ‘‘ஸச்சங் கிர த்வங், பி⁴க்கு², பரிஸ்ஸாவனங் யாசியமானோ ந அதா³ஸீ’’தி? ‘‘ஸச்சங் ப⁴க³வா’’தி. விக³ரஹி பு³த்³தோ⁴ ப⁴க³வா – ‘‘அனநுச்ச²விகங், மோக⁴புரிஸ, அனநுலோமிகங் அப்பதிரூபங் அஸ்ஸாமணகங் அகப்பியங் அகரணீயங். கத²ஞ்ஹி நாம த்வங், மோக⁴புரிஸ, பரிஸ்ஸாவனங் யாசியமானோ ந த³ஸ்ஸஸி. நேதங், மோக⁴புரிஸ , அப்பஸன்னானங் வா பஸாதா³ய…பே॰… விக³ரஹித்வா…பே॰… த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘ந பி⁴க்க²வே, அத்³தா⁴னமக்³க³ப்படிபன்னேன பி⁴க்கு²னா பரிஸ்ஸாவனங் யாசியமானேன ந தா³தப்³ப³ங். யோ ந த³தெ³ய்ய, ஆபத்தி து³க்கடஸ்ஸ. ந ச, பி⁴க்க²வே, அபரிஸ்ஸாவனகேன அத்³தா⁴னோ படிபஜ்ஜிதப்³போ³. யோ படிபஜ்ஜெய்ய, ஆபத்தி து³க்கடஸ்ஸ. ஸசே ந ஹோதி பரிஸ்ஸாவனங் வா த⁴ம்மகரணோ வா, ஸங்கா⁴டிகண்ணோபி அதி⁴ட்டா²தப்³போ³ – இமினா பரிஸ்ஸாவெத்வா பிவிஸ்ஸாமீ’’தி. அத² கோ² ப⁴க³வா அனுபுப்³பே³ன சாரிகங் சரமானோ யேன வேஸாலீ தத³வஸரி. தத்ர ஸுத³ங் ப⁴க³வா வேஸாலியங் விஹரதி மஹாவனே கூடாகா³ரஸாலாயங் . தேன கோ² பன ஸமயேன பி⁴க்கூ² நவகம்மங் கரொந்தி. பரிஸ்ஸாவனங் ந ஸம்மதி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, த³ண்ட³பரிஸ்ஸாவன’’ந்தி. த³ண்ட³பரிஸ்ஸாவனங் ந ஸம்மதி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, ஒத்த²ரக’’ந்தி.
தேன கோ² பன ஸமயேன பி⁴க்கூ² மகஸேஹி உப்³பா³ள்ஹா ஹொந்தி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, மகஸகுடிக’’ந்தி.
260. தேன கோ² பன ஸமயேன வேஸாலியங் பணீதானங் ப⁴த்தானங் ப⁴த்தபடிபாடி அட்டி²தா ஹோதி. பி⁴க்கூ² பணீதானி போ⁴ஜனானி பு⁴ஞ்ஜித்வா அபி⁴ஸன்னகாயா ஹொந்தி ப³ஹ்வாபா³தா⁴ ப³வ்ஹாபா³தா⁴ (ஸீ॰). அத² கோ² ஜீவகோ கோமாரப⁴ச்சோ வேஸாலிங் அக³மாஸி கேனசிதே³வ கரணீயேன. அத்³த³ஸா கோ² ஜீவகோ கோமாரப⁴ச்சோ பி⁴க்கூ² அபி⁴ஸன்னகாயே ப³ஹ்வாபா³தே⁴. தி³ஸ்வான யேன ப⁴க³வா தேனுபஸங்கமி, உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஜீவகோ கோமாரப⁴ச்சோ ப⁴க³வந்தங் ஏதத³வோச – ‘‘ஏதரஹி, ப⁴ந்தே, பி⁴க்கூ² அபி⁴ஸன்னகாயா ப³ஹ்வாபா³தா⁴. ஸாது⁴, ப⁴ந்தே, ப⁴க³வா பி⁴க்கூ²னங் சங்கமஞ்ச ஜந்தாக⁴ரஞ்ச அனுஜானாது. ஏவங் பி⁴க்கூ² அப்பாபா³தா⁴ ப⁴விஸ்ஸந்தீ’’தி. அத² கோ² ப⁴க³வா ஜீவகங் கோமாரப⁴ச்சங் த⁴ம்மியா கதா²ய ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹங்ஸேஸி. அத² கோ² ஜீவகோ கோமாரப⁴ச்சோ ப⁴க³வதா த⁴ம்மியா கதா²ய ஸந்த³ஸ்ஸிதோ ஸமாத³பிதோ ஸமுத்தேஜிதோ ஸம்பஹங்ஸிதோ உட்டா²யாஸனா ப⁴க³வந்தங் அபி⁴வாதெ³த்வா பத³க்கி²ணங் கத்வா பக்காமி. அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, சங்கமஞ்ச ஜந்தாக⁴ரஞ்சா’’தி.
தேன கோ² பன ஸமயேன பி⁴க்கூ² விஸமே சங்கமே சங்கமந்தி. பாதா³ து³க்கா² ஹொந்தி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, ஸமங் காது’’ந்தி. சங்கமோ நீசவத்து²கோ ஹோதி. உத³கேன ஒத்த²ரிய்யதி…பே॰… ‘‘அனுஜானாமி, பி⁴க்க²வே, உச்சவத்து²கங் காது’’ந்தி. சயோ பரிபததி…பே॰… ‘‘அனுஜானாமி, பி⁴க்க²வே, சினிதுங் தயோ சயே – இட்ட²காசயங், ஸிலாசயங், தா³ருசய’’ந்தி. ஆரோஹந்தா விஹஞ்ஞந்தி…பே॰… ‘‘அனுஜானாமி, பி⁴க்க²வே, தயோ ஸோபானே – இட்ட²காஸோபானங், ஸிலாஸோபானங், தா³ருஸோபான’’ந்தி. ஆரோஹந்தா பரிபதந்தி…பே॰… ‘‘அனுஜானாமி, பி⁴க்க²வே, ஆலம்ப³னபா³ஹ’’ந்தி.
தேன கோ² பன ஸமயேன பி⁴க்கூ² சங்கமே சங்கமந்தா பரிபதந்தி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, சங்கமனவேதி³க’’ந்தி.
தேன கோ² பன ஸமயேன பி⁴க்கூ² அஜ்ஜோ²காஸே சங்கமந்தா ஸீதேனபி உண்ஹேனபி கிலமந்தி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, சங்கமனஸால’’ந்தி. சங்கமனஸாலாயங் திணசுண்ணங் பரிபததி…பே॰… ‘‘அனுஜானாமி, பி⁴க்க²வே, ஓகு³ம்பெ²த்வா உல்லித்தாவலித்தங் காதுங் – ஸேதவண்ணங் காளவண்ணங் கே³ருகபரிகம்மங் மாலாகம்மங் லதாகம்மங் மகரத³ந்தகங் பஞ்சபடிகங் சீவரவங்ஸங் சீவரரஜ்ஜு’’ந்தி. ஜந்தாக⁴ரங் நீசவத்து²கங் ஹோதி, உத³கேன ஒத்த²ரிய்யதி…பே॰… ‘‘அனுஜானாமி, பி⁴க்க²வே, உச்சவத்து²கங் காது’’ந்தி. சயோ பரிபததி…பே॰… ‘‘அனுஜானாமி, பி⁴க்க²வே, சினிதுங் தயோ சயே – இட்ட²காசயங், ஸிலாசயங், தா³ருசய’’ந்தி. ஆரோஹந்தா விஹஞ்ஞந்தி…பே॰… ‘‘அனுஜானாமி, பி⁴க்க²வே, தயோ ஸோபானே – இட்ட²காஸோபானங், ஸிலாஸோபானங், தா³ருஸோபான’’ந்தி. ஆரோஹந்தா பரிபதந்தி…பே॰… ‘‘அனுஜானாமி, பி⁴க்க²வே, ஆலம்ப³னபா³ஹ’’ந்தி . ஜந்தாக⁴ரஸ்ஸ கவாடங் ந ஹோதி…பே॰… ‘‘அனுஜானாமி, பி⁴க்க²வே, கவாடங் பிட்ட²ஸங்கா⁴டங் பீட²ஸங்கா⁴டங் (க॰) உது³க்க²லிகங் உத்தரபாஸகங் அக்³க³ளவட்டிகங் கபிஸீஸகங் ஸூசிகங் க⁴டிகங் தாளச்சி²த்³த³ங் ஆவிஞ்ச²னசி²த்³த³ங் ஆவிஞ்ச²னரஜ்ஜு’’ந்தி . ஜந்தாக⁴ரஸ்ஸ குட்டபாதோ³ ஜீரதி…பே॰… ‘‘அனுஜானாமி, பி⁴க்க²வே, மண்ட³லிகங் காது’’ந்தி. ஜந்தாக⁴ரஸ்ஸ தூ⁴மனெத்தங் ந ஹோதி…பே॰… ‘‘அனுஜானாமி, பி⁴க்க²வே, தூ⁴மனெத்த’’ந்தி.
தேன கோ² பன ஸமயேன பி⁴க்கூ² கு²த்³த³கே ஜந்தாக⁴ரே மஜ்ஜே² அக்³கி³ட்டா²னங் கரொந்தி. உபசாரோ ந ஹோதி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, கு²த்³த³கே ஜந்தாக⁴ரே ஏகமந்தங் அக்³கி³ட்டா²னங் காதுங், மஹல்லகே மஜ்ஜே²’’தி. ஜந்தாக⁴ரே அக்³கி³ முக²ங் ட³ஹதி…பே॰… ‘‘அனுஜானாமி, பி⁴க்க²வே, முக²மத்திக’’ந்தி. ஹத்தே² மத்திகங் தேமெந்தி…பே॰… ‘‘அனுஜானாமி, பி⁴க்க²வே, மத்திகாதோ³ணிக’’ந்தி. மத்திகா து³க்³க³ந்தா⁴ ஹோதி…பே॰… ‘‘அனுஜானாமி, பி⁴க்க²வே, வாஸேது’’ந்தி. ஜந்தாக⁴ரே அக்³கி³ காயங் ட³ஹதி…பே॰… ‘‘அனுஜானாமி, பி⁴க்க²வே, உத³கங் அதிஹரிது’’ந்தி. பாதியாபி பத்தேனபி உத³கங் அதிஹரந்தி…பே॰… ‘‘அனுஜானாமி, பி⁴க்க²வே, உத³கட்டா²னங், உத³கஸராவக’’ந்தி. ஜந்தாக⁴ரங் திணச்ச²த³னங் ந ஸேதே³தி திணச்சா²த³னேன சா²தே³தி (க॰) …பே॰… ‘‘அனுஜானாமி, பி⁴க்க²வே, ஓகு³ம்பெ²த்வா உல்லித்தாவலித்தங் காது’’ந்தி. ஜந்தாக⁴ரங் சிக்க²ல்லங் ஹோதி…பே॰… ‘‘அனுஜானாமி, பி⁴க்க²வே, ஸந்த²ரிதுங் தயோ ஸந்த²ரே – இட்ட²காஸந்த²ரங், ஸிலாஸந்த²ரங் , தா³ருஸந்த²ர’’ந்தி. சிக்க²ல்லங்யேவ ஹோதி…பே॰… ‘‘அனுஜானாமி, பி⁴க்க²வே, தோ⁴விது’’ந்தி. உத³கங் ஸந்திட்ட²தி…பே॰… ‘‘அனுஜானாமி, பி⁴க்க²வே, உத³கனித்³த⁴மன’’ந்தி.
தேன கோ² பன ஸமயேன பி⁴க்கூ² ஜந்தாக⁴ரே ச²மாய நிஸீத³ந்தி, க³த்தானி கண்டூ³வந்தி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, ஜந்தாக⁴ரபீட²’’ந்தி. தேன கோ² பன ஸமயேன ஜந்தாக⁴ரங் அபரிக்கி²த்தங் ஹோதி…பே॰… ‘‘அனுஜானாமி, பி⁴க்க²வே, பரிக்கி²பிதுங் தயோ பாகாரே – இட்ட²காபாகாரங், ஸிலாபாகாரங், தா³ருபாகார’’ந்தி. கொட்ட²கோ ந ஹோதி…பே॰… ‘‘அனுஜானாமி, பி⁴க்க²வே, கொட்ட²க’’ந்தி. கொட்ட²கோ நீசவத்து²கோ ஹோதி, உத³கேன ஒத்த²ரிய்யதி…பே॰… ‘‘அனுஜானாமி, பி⁴க்க²வே, உச்சவத்து²கங் காது’’ந்தி. சயோ பரிபததி…பே॰… ‘‘அனுஜானாமி, பி⁴க்க²வே, சினிதுங் தயோ சயே – இட்ட²காசயங், ஸிலாசயங், தா³ருசய’’ந்தி. ஆரோஹந்தா விஹஞ்ஞந்தி…பே॰… ‘‘அனுஜானாமி, பி⁴க்க²வே, தயோ ஸோபானே – இட்ட²காஸோபானங், ஸிலாஸோபானங், தா³ருஸோபான’’ந்தி. ஆரோஹந்தா பரிபதந்தி…பே॰… ‘‘அனுஜானாமி, பி⁴க்க²வே, ஆலம்ப³னபா³ஹ’’ந்தி. கொட்ட²கஸ்ஸ கவாடங் ந ஹோதி…பே॰… ‘‘அனுஜானாமி, பி⁴க்க²வே, கவாடங் பிட்ட²ஸங்கா⁴டங் உது³க்க²லிகங் உத்தரபாஸகங் அக்³க³ளவட்டிங் கபிஸீஸகங் ஸூசிகங் க⁴டிகங் தாளச்சி²த்³த³ங் ஆவிஞ்ச²னசி²த்³த³ங் ஆவிஞ்ச²னரஜ்ஜு’’ந்தி. கொட்ட²கே திணசுண்ணங் பரிபததி…பே॰… ‘‘அனுஜானாமி, பி⁴க்க²வே, ஓகு³ம்பெ²த்வா உல்லித்தாவலித்தங் காதுங் – ஸேதவண்ணங் காளவண்ணங் கே³ருகபரிகம்மங் மாலாகம்மங் லதாகம்மங் மகரத³ந்தகங் பஞ்சபடிகந்தி. பரிவேணங் சிக்க²ல்லங் ஹோதி…பே॰… ‘‘அனுஜானாமி, பி⁴க்க²வே, மரும்ப³ங் உபகிரிது’’ந்தி. ந பரியாபுணந்தி…பே॰… ‘‘அனுஜானாமி, பி⁴க்க²வே, பத³ரஸிலங் நிக்கி²பிது’’ந்தி. உத³கங் ஸந்திட்ட²தி…பே॰… ‘‘அனுஜானாமி, பி⁴க்க²வே, உத³கனித்³த⁴மன’’ந்தி.
261. தேன கோ² பன ஸமயேன பி⁴க்கூ² நக்³கா³ நக்³க³ங் அபி⁴வாதெ³ந்தி…பே॰… நக்³கா³ நக்³க³ங் அபி⁴வாதா³பெந்தி, நக்³கா³ நக்³க³ஸ்ஸ பரிகம்மங் கரொந்தி, நக்³கா³ நக்³க³ஸ்ஸ பரிகம்மங் காராபெந்தி, நக்³கா³ நக்³க³ஸ்ஸ தெ³ந்தி, நக்³கா³ படிக்³க³ண்ஹந்தி, நக்³கா³ கா²த³ந்தி, நக்³கா³ பு⁴ஞ்ஜந்தி, நக்³கா³ ஸாயந்தி, நக்³கா³ பிவந்தி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, நக்³கே³ன இத³ங் பத³ங் கத்த²சி நத்தி² நக்³கோ³ அபி⁴வாதே³தப்³போ³…பே॰… ந நக்³கே³ன அபி⁴வாதே³தப்³ப³ங்… ந நக்³கே³ன இத³ங் பத³ங் கத்த²சி நத்தி² நக்³கோ³ அபி⁴வாதா³பேதப்³போ³… ந நக்³கே³ன அபி⁴வாதா³பேதப்³ப³ங்… ந நக்³கே³ன நக்³க³ஸ்ஸ பரிகம்மங் காதப்³ப³ங்… ந நக்³கே³ன நக்³க³ஸ்ஸ பரிகம்மங் காராபேதப்³ப³ங்… ந நக்³கே³ன நக்³க³ஸ்ஸ தா³தப்³ப³ங்… ந நக்³கே³ன படிக்³க³ஹேதப்³ப³ங்… ந நக்³கே³ன கா²தி³தப்³ப³ங்… ந நக்³கே³ன பு⁴ஞ்ஜிதப்³ப³ங்… ந நக்³கே³ன ஸாயிதப்³ப³ங்… ந நக்³கே³ன பாதப்³ப³ங். யோ பிவெய்ய, ஆபத்தி து³க்கடஸ்ஸா’’தி.
தேன கோ² பன ஸமயேன பி⁴க்கூ² ஜந்தாக⁴ரே ச²மாய சீவரங் நிக்கி²பந்தி. சீவரங் பங்ஸுகிதங் ஹோதி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, சீவரவங்ஸங் சீவரரஜ்ஜு’’ந்தி. தே³வே வஸ்ஸந்தே சீவரங் ஓவஸ்ஸதி…பே॰… ‘‘அனுஜானாமி, பி⁴க்க²வே , ஜந்தாக⁴ரஸால’’ந்தி. ஜந்தாக⁴ரஸாலா நீசவத்து²கா ஹோதி, உத³கேன ஒத்த²ரிய்யதி…பே॰… ‘‘அனுஜானாமி, பி⁴க்க²வே, உச்சவத்து²கங் காது’’ந்தி. சயோ பரிபததி…பே॰… ‘‘அனுஜானாமி, பி⁴க்க²வே, சினிதுங்…பே॰… ஆரோஹந்தா விஹஞ்ஞந்தி…பே॰… ஆரோஹந்தா பரிபதந்தி…பே॰… ‘‘அனுஜானாமி, பி⁴க்க²வே, ஆலம்ப³னபா³ஹ’’ந்தி. ஜந்தாக⁴ரஸாலாய திணசுண்ணங் பரிபததி…பே॰… ‘‘அனுஜானாமி, பி⁴க்க²வே, ஓகு³ம்பெ²த்வா உல்லித்தாவலித்தங் காதுங்…பே॰… சீவரவங்ஸங் சீவரரஜ்ஜு’’ந்தி.
தேன கோ² பன ஸமயேன பி⁴க்கூ² ஜந்தாக⁴ரேபி உத³கேபி பரிகம்மங் காதுங் குக்குச்சாயந்தி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, திஸ்ஸோ படிச்சா²தி³யோ – ஜந்தாக⁴ரபடிச்சா²தி³ங், உத³கபடிச்சா²தி³ங், வத்த²படிச்சா²தி³’’ந்தி.
தேன கோ² பன ஸமயேன ஜந்தாக⁴ரே உத³கங் ந ஹோதி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி , பி⁴க்க²வே, உத³பான’’ந்தி. உத³பானஸ்ஸ கூலங் லுஜ்ஜதி…பே॰… ‘‘அனுஜானாமி, பி⁴க்க²வே, சினிதுங் தயோ சயே – இட்ட²காசயங், ஸிலாசயங், தா³ருசய’’ந்தி. உத³பானோ நீசவத்து²கோ ஹோதி, உத³கேன ஒத்த²ரிய்யதி…பே॰… ‘‘அனுஜானாமி, பி⁴க்க²வே, உச்சவத்து²கங் காது’’ந்தி. சயோ பரிபததி…பே॰… ஆரோஹந்தா விஹஞ்ஞந்தி…பே॰… ஆரோஹந்தா பரிபதந்தி…பே॰… ‘‘அனுஜானாமி, பி⁴க்க²வே, ஆலம்ப³னபா³ஹ’’ந்தி.
262. தேன கோ² பன ஸமயேன பி⁴க்கூ² வல்லிகாயபி காயப³ந்த⁴னேனபி உத³கங் வாஹெந்தி வாஹந்தி (க॰). ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, உத³கவாஹனரஜ்ஜு’’ந்தி. ஹத்தா² து³க்கா² ஹொந்தி…பே॰… ‘‘அனுஜானாமி, பி⁴க்க²வே, துலங் கரகடகங் சக்கவட்டக’’ந்தி. பா⁴ஜனா ப³ஹூ பி⁴ஜ்ஜந்தி…பே॰… ‘‘அனுஜானாமி, பி⁴க்க²வே, தயோ வாரகே – லோஹவாரகங், தா³ருவாரகங், சம்மக்க²ண்ட³’’ந்தி.
தேன கோ² பன ஸமயேன பி⁴க்கூ² அஜ்ஜோ²காஸே உத³கங் வாஹெந்தா ஸீதேனபி உண்ஹேனபி கிலமந்தி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, உத³பானஸால’’ந்தி. உத³பானஸாலாய திணசுண்ணங் பரிபததி…பே॰… ‘‘அனுஜானாமி, பி⁴க்க²வே, ஓகு³ம்பெ²த்வா உல்லித்தாவலித்தங் காதுங் – ஸேதவண்ணங் காளவண்ணங் கே³ருகபரிகம்மங் மாலாகம்மங் லதாகம்மங் மகரத³ந்தகங் பஞ்சபடிகங் சீவரவங்ஸங் சீவரரஜ்ஜு’’ந்தி. உத³பானோ அபாருதோ ஹோதி, திணசுண்ணேஹிபி பங்ஸுகேஹிபி ஓகிரிய்யதி…பே॰… ‘‘அனுஜானாமி, பி⁴க்க²வே, அபிதா⁴ன’’ந்தி. உத³கபா⁴ஜனங் ந ஸங்விஜ்ஜதி…பே॰… ‘‘அனுஜானாமி, பி⁴க்க²வே, உத³கதோ³ணிங் உத³ககடாஹ’’ந்தி.
தேன கோ² பன ஸமயேன பி⁴க்கூ² ஆராமே தஹங் தஹங் நஹாயந்தி. ஆராமோ சிக்க²ல்லோ ஹோதி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, சந்த³னிக’’ந்தி. சந்த³னிகா பாகடா ஹோதி. பி⁴க்கூ² ஹிரியந்தி நஹாயிதுங்…பே॰… ‘‘அனுஜானாமி, பி⁴க்க²வே, பரிக்கி²பிதுங் தயோ பாகாரே – இட்ட²காபாகாரங், ஸிலாபாகாரங், தா³ருபாகார’’ந்தி. சந்த³னிகா சிக்க²ல்லா ஹோதி…பே॰… ‘‘அனுஜானாமி, பி⁴க்க²வே, ஸந்த²ரிதுங் தயோ ஸந்த²ரே – இட்ட²காஸந்த²ரங், ஸிலாஸந்த²ரங், தா³ருஸந்த²ர’’ந்தி. உத³கங் ஸந்திட்ட²தி…பே॰… ‘‘அனுஜானாமி, பி⁴க்க²வே, உத³கனித்³த⁴மன’’ந்தி.
தேன கோ² பன ஸமயேன பி⁴க்கூ²னங் க³த்தானி ஸீதிக³தானி ஹொந்தி. ப⁴க³வதோ ஏதமத்த²ங் ஆரோசேஸுங்…பே॰… ‘‘அனுஜானாமி, பி⁴க்க²வே, உத³கபுஞ்ச²னிங் சோளகேனபி பச்சுத்³த⁴ரிது’’ந்தி.
263. தேன கோ² பன ஸமயேன அஞ்ஞதரோ உபாஸகோ ஸங்க⁴ஸ்ஸ அத்தா²ய பொக்க²ரணிங் காரேதுகாமோ ஹோதி. ப⁴க³வதோ ஏதமத்த²ங் ஆரோசேஸுங்…பே॰… ‘‘அனுஜானாமி, பி⁴க்க²வே, பொக்க²ரணி’’ந்தி. பொக்க²ரணியா கூலங் லுஜ்ஜதி…பே॰… ‘‘அனுஜானாமி, பி⁴க்க²வே, சினிதுங் தயோ சயே – இட்ட²காசயங், ஸிலாசயங், தா³ருசய’’ந்தி. ஆரோஹந்தா விஹஞ்ஞந்தி…பே॰… ‘‘அனுஜானாமி, பி⁴க்க²வே, தயோ ஸோபானே – இட்ட²காஸோபானங், ஸிலாஸோபானங், தா³ருஸோபான’’ந்தி. ஆரோஹந்தா பரிபதந்தி…பே॰… ‘‘அனுஜானாமி, பி⁴க்க²வே, ஆலம்ப³னபா³ஹ’’ந்தி. பொக்க²ரணியா உத³கங் புராணங் ஹோதி…பே॰… ‘‘அனுஜானாமி, பி⁴க்க²வே, உத³கமாதிகங் உத³கனித்³த⁴மன’’ந்தி.
தேன கோ² பன ஸமயேன அஞ்ஞதரோ பி⁴க்கு² ஸங்க⁴ஸ்ஸ அத்தா²ய நில்லேக²ங் ஜந்தாக⁴ரங் கத்துகாமோ ஹோதி. ப⁴க³வதோ ஏதமத்த²ங் ஆரோசேஸுங்…பே॰… ‘‘அனுஜானாமி, பி⁴க்க²வே, நில்லேக²ங் ஜந்தாக⁴ர’’ந்தி.
தேன கோ² பன ஸமயேன ச²ப்³ப³க்³கி³யா பி⁴க்கூ² சாதுமாஸங் நிஸீத³னேன விப்பவஸந்தி. ப⁴க³வதோ ஏதமத்த²ங் ஆரோசேஸுங்…பே॰… ‘‘ந, பி⁴க்க²வே, சாதுமாஸங் நிஸீத³னேன விப்பவஸிதப்³ப³ங். யோ விப்பவஸெய்ய, ஆபத்தி து³க்கடஸ்ஸா’’தி.
264. தேன கோ² பன ஸமயேன ச²ப்³ப³க்³கி³யா பி⁴க்கூ² புப்பா²பி⁴கிண்ணேஸு ஸயனேஸு ஸயந்தி. மனுஸ்ஸா விஹாரசாரிகங் ஆஹிண்ட³ந்தா பஸ்ஸித்வா உஜ்ஜா²யந்தி கி²ய்யந்தி விபாசெந்தி – ஸெய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, புப்பா²பி⁴கிண்ணேஸு ஸயனேஸு ஸயிதப்³ப³ங். யோ ஸயெய்ய, ஆபத்தி து³க்கடஸ்ஸா’’தி .
தேன கோ² பன ஸமயேன மனுஸ்ஸா க³ந்த⁴ம்பி மாலம்பி ஆதா³ய ஆராமங் ஆக³ச்ச²ந்தி. பி⁴க்கூ² குக்குச்சாயந்தா ந படிக்³க³ண்ஹந்தி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, க³ந்த⁴ங் க³ஹெத்வா கவாடே பஞ்சங்கு³லிகங் தா³துங், புப்ப²ங் க³ஹெத்வா விஹாரே ஏகமந்தங் நிக்கி²பிது’’ந்தி.
தேன கோ² பன ஸமயேன ஸங்க⁴ஸ்ஸ நமதகங் உப்பன்னங் ஹோதி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, நமதக’’ந்தி. அத² கோ² பி⁴க்கூ²னங் ஏதத³ஹோஸி – ‘‘நமதகங் அதி⁴ட்டா²தப்³ப³ங் நு கோ² உதா³ஹு விகப்பேதப்³ப³’’ந்தி…பே॰… ‘‘ந, பி⁴க்க²வே, நமதகங் அதி⁴ட்டா²தப்³ப³ங், ந விகப்பேதப்³ப³’’ந்தி.
தேன கோ² பன ஸமயேன ச²ப்³ப³க்³கி³யா பி⁴க்கூ² ஆஸித்தகூபதா⁴னே பு⁴ஞ்ஜந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ஸெய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ங் ஆரோசேஸுங்…பே॰… ‘‘ந, பி⁴க்க²வே, ஆஸித்தகூபதா⁴னே பு⁴ஞ்ஜிதப்³ப³ங். யோ பு⁴ஞ்ஜெய்ய, ஆபத்தி து³க்கடஸ்ஸா’’தி .
தேன கோ² பன ஸமயேன அஞ்ஞதரோ பி⁴க்கு² கி³லானோ ஹோதி. ஸோ பு⁴ஞ்ஜமானோ ந ஸக்கோதி ஹத்தே²ன பத்தங் ஸந்தா⁴ரேதுங். ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, மளோரிக’’ந்தி.
தேன கோ² பன ஸமயேன ச²ப்³ப³க்³கி³யா பி⁴க்கூ² ஏகபா⁴ஜனேபி பு⁴ஞ்ஜந்தி…பே॰… ஏகதா²லகேபி பிவந்தி, ஏகமஞ்சேபி துவட்டெந்தி, ஏகத்த²ரணாபி துவட்டெந்தி, ஏகபாவுரணாபி துவட்டெந்தி, ஏகத்த²ரணபாவுரணாபி துவட்டெந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ஸெய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, ஏகபா⁴ஜனே பு⁴ஞ்ஜிதப்³ப³ங்…பே॰… ந ஏகதா²லகே பாதப்³ப³ங்… ந ஏகமஞ்சே துவட்டிதப்³ப³ங்… ந ஏகத்த²ரணா ந ஏகத்த²ரணே துவட்டிதப்³ப³ங்… ந ஏகபாவுரணா ந ஏகபாவுரணே துவட்டிதப்³ப³ங்… ந ஏகத்த²ரணபாவுரணா ந ஏகத்த²ரணபாவுரணே (ஸ்யா॰) துவட்டிதப்³ப³ங். யோ துவட்டெய்ய, ஆபத்தி து³க்கடஸ்ஸா’’தி.
265. தேன கோ² பன ஸமயேன வட்³டோ⁴ லிச்ச²வீ மெத்தியபூ⁴மஜகானங் பி⁴க்கூ²னங் ஸஹாயோ ஹோதி. அத² கோ² வட்³டோ⁴ லிச்ச²வீ யேன மெத்தியபூ⁴மஜகா பி⁴க்கூ² தேனுபஸங்கமி, உபஸங்கமித்வா மெத்தியபூ⁴மஜகே பி⁴க்கூ² ஏதத³வோச – ‘‘வந்தா³மி அய்யா’’தி. ஏவங் வுத்தே மெத்தியபூ⁴மஜகா பி⁴க்கூ² நாலபிங்ஸு. து³தியம்பி கோ² வட்³டோ⁴ லிச்ச²வீ மெத்தியபூ⁴மஜகே பி⁴க்கூ² ஏதத³வோச – ‘‘வந்தா³மி அய்யா’’தி. து³தியம்பி கோ² மெத்தியபூ⁴மஜகா பி⁴க்கூ² நாலபிங்ஸு. ததியம்பி கோ² வட்³டோ⁴ லிச்ச²வீ மெத்தியபூ⁴மஜகே பி⁴க்கூ² ஏதத³வோச – ‘‘வந்தா³மி அய்யா’’தி. ததியம்பி கோ² மெத்தியபூ⁴மஜகா பி⁴க்கூ² நாலபிங்ஸு. ‘‘க்யாஹங் அய்யானங் அபரஜ்ஜா²மி, கிஸ்ஸ மங் அய்யா நாலபந்தீ’’தி? ‘‘ததா² ஹி பன த்வங், ஆவுஸோ வட்³ட⁴, அம்ஹே த³ப்³பே³ன மல்லபுத்தேன விஹேடி²யமானே அஜ்ஜு²பெக்க²ஸீ’’தி. ‘‘க்யாஹங் அய்யா கரோமீ’’தி? ‘‘ஸசே கோ² த்வங், ஆவுஸோ வட்³ட⁴, இச்செ²ய்யாஸி, அஜ்ஜேவ ப⁴க³வா ஆயஸ்மந்தங் த³ப்³ப³ங் மல்லபுத்தங் நாஸாபெய்யா’’தி. ‘‘க்யாஹங் அய்யா கரோமி, கிங் மயா ஸக்கா காது’’ந்தி? ‘‘ஏஹி த்வங், ஆவுஸோ வட்³ட⁴, யேன ப⁴க³வா தேனுபஸங்கம, உபஸங்கமித்வா ப⁴க³வந்தங் ஏவங் வதே³ஹி – ‘இத³ங், ப⁴ந்தே, நச்ச²ன்னங் நப்பதிரூபங். யாயங், ப⁴ந்தே, தி³ஸா அப⁴யா அனீதிகா அனுபத்³த³வா ஸாயங் தி³ஸா ஸப⁴யா ஸஈதிகா ஸஉபத்³த³வா; யதோ நிவாதங் ததோ ஸவாதங் ; உத³கங் மஞ்ஞே ஆதி³த்தங்; அய்யேன மே த³ப்³பே³ன மல்லபுத்தேன பஜாபதி தூ³ஸிதா’’’தி. ‘‘ஏவங் அய்யா’’தி கோ² வட்³டோ⁴ லிச்ச²வீ மெத்தியபூ⁴மஜகானங் பி⁴க்கூ²னங் படிஸ்ஸுத்வா யேன ப⁴க³வா தேனுபஸங்கமி, உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² வட்³டோ⁴ லிச்ச²வீ ப⁴க³வந்தங் ஏதத³வோச – ‘‘இத³ங், ப⁴ந்தே, நச்ச²ன்னங் நப்பதிரூபங். யாயங், ப⁴ந்தே, தி³ஸா அப⁴யா அனீதிகா அனுபத்³த³வா ஸாயங் தி³ஸா ஸப⁴யா ஸஈதிகா ஸஉபத்³த³வா; யதோ நிவாதங் ததோ ஸவாதங்; உத³கங் மஞ்ஞே ஆதி³த்தங்; அய்யேன மே த³ப்³பே³ன மல்லபுத்தேன பஜாபதி தூ³ஸிதா’’தி.
அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே பி⁴க்கு²ஸங்க⁴ங் ஸன்னிபாதாபெத்வா ஆயஸ்மந்தங் த³ப்³ப³ங் மல்லபுத்தங் படிபுச்சி² – ‘‘ஸரஸி த்வங், த³ப்³ப³, ஏவரூபங் கத்தா யதா²யங் வட்³டோ⁴ ஆஹா’’தி? ‘‘யதா² மங், ப⁴ந்தே, ப⁴க³வா ஜானாதீ’’தி. து³தியம்பி கோ² ப⁴க³வா…பே॰… ததியம்பி கோ² ப⁴க³வா ஆயஸ்மந்தங் த³ப்³ப³ங் மல்லபுத்தங் ஏதத³வோச – ‘‘ஸரஸி த்வங், த³ப்³ப³, ஏவரூபங் கத்தா யதா²யங் வட்³டோ⁴ ஆஹா’’தி? ‘‘யதா² மங், ப⁴ந்தே, ப⁴க³வா ஜானாதீ’’தி. ‘‘ந கோ², த³ப்³ப³, த³ப்³பா³ ஏவங் நிப்³பே³டெ²ந்தி. ஸசே தயா கதங், கதந்தி வதே³ஹி; ஸசே அகதங், அகதந்தி வதே³ஹீ’’தி. ‘‘யதோ அஹங், ப⁴ந்தே, ஜாதோ நாபி⁴ஜானாமி ஸுபினந்தேனபி மேது²னங் த⁴ம்மங் படிஸேவிதா, பகே³வ ஜாக³ரோ’’தி. அத² கோ² ப⁴க³வா பி⁴க்கூ² ஆமந்தேஸி – ‘‘தேன ஹி, பி⁴க்க²வே, ஸங்கோ⁴ வட்³ட⁴ஸ்ஸ லிச்ச²விஸ்ஸ பத்தங் நிக்குஜ்ஜது, அஸம்போ⁴க³ங் ஸங்கே⁴ன கரோது.
‘‘அட்ட²ஹி, பி⁴க்க²வே, அங்கே³ஹி ஸமன்னாக³தஸ்ஸ உபாஸகஸ்ஸ பத்தோ நிக்குஜ்ஜிதப்³போ³ – பி⁴க்கூ²னங் அலாபா⁴ய பரிஸக்கதி, பி⁴க்கூ²னங் அனத்தா²ய பரிஸக்கதி, பி⁴க்கூ²னங் அவாஸாய அனாவாஸாய (ஸ்யா॰) பரிஸக்கதி, பி⁴க்கூ² அக்கோஸதி பரிபா⁴ஸதி, பி⁴க்கூ² பி⁴க்கூ²ஹி பே⁴தே³தி, பு³த்³த⁴ஸ்ஸ அவண்ணங் பா⁴ஸதி, த⁴ம்மஸ்ஸ அவண்ணங் பா⁴ஸதி, ஸங்க⁴ஸ்ஸ அவண்ணங் பா⁴ஸதி. அனுஜானாமி, பி⁴க்க²வே, இமேஹி அட்ட²ஹங்கே³ஹி ஸமன்னாக³தஸ்ஸ உபாஸகஸ்ஸ பத்தங் நிக்குஜ்ஜிதுங். ஏவஞ்ச பன, பி⁴க்க²வே, நிக்குஜ்ஜிதப்³போ³. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –
266. ‘‘ஸுணாது மே, ப⁴ந்தே, ஸங்கோ⁴. வட்³டோ⁴ லிச்ச²வீ ஆயஸ்மந்தங் த³ப்³ப³ங் மல்லபுத்தங் அமூலிகாய ஸீலவிபத்தியா அனுத்³த⁴ங்ஸேதி. யதி³ ஸங்க⁴ஸ்ஸ பத்தகல்லங், ஸங்கோ⁴ வட்³ட⁴ஸ்ஸ லிச்ச²விஸ்ஸ பத்தங் நிக்குஜ்ஜெய்ய, அஸம்போ⁴க³ங் ஸங்கே⁴ன கரெய்ய. ஏஸா ஞத்தி.
‘‘ஸுணாது மே, ப⁴ந்தே, ஸங்கோ⁴. வட்³டோ⁴ லிச்ச²வீ ஆயஸ்மந்தங் த³ப்³ப³ங் மல்லபுத்தங் அமூலிகாய ஸீலவிபத்தியா அனுத்³த⁴ங்ஸேதி. ஸங்கோ⁴ வட்³ட⁴ஸ்ஸ லிச்ச²விஸ்ஸ பத்தங் நிக்குஜ்ஜதி, அஸம்போ⁴க³ங் ஸங்கே⁴ன கரோதி . யஸ்ஸாயஸ்மதோ க²மதி வட்³ட⁴ஸ்ஸ லிச்ச²விஸ்ஸ பத்தஸ்ஸ நிக்குஜ்ஜனா, அஸம்போ⁴க³ங் ஸங்கே⁴ன கரணங், ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘நிக்குஜ்ஜிதோ ஸங்கே⁴ன வட்³ட⁴ஸ்ஸ லிச்ச²விஸ்ஸ பத்தோ, அஸம்போ⁴கோ³ ஸங்கே⁴ன. க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி.
அத² கோ² ஆயஸ்மா ஆனந்தோ³ புப்³ப³ண்ஹஸமயங் நிவாஸெத்வா பத்தசீவரமாதா³ய யேன வட்³ட⁴ஸ்ஸ லிச்ச²விஸ்ஸ நிவேஸனங் தேனுபஸங்கமி, உபஸங்கமித்வா வட்³ட⁴ங் லிச்ச²விங் ஏதத³வோச – ‘‘ஸங்கே⁴ன தே, ஆவுஸோ வட்³ட⁴, பத்தோ நிக்குஜ்ஜிதோ. அஸம்போ⁴கோ³ஸி ஸங்கே⁴னா’’தி. அத² கோ² வட்³டோ⁴ லிச்ச²வீ – ஸங்கே⁴ன கிர மே பத்தோ நிக்குஜ்ஜிதோ, அஸம்போ⁴கொ³ம்ஹி கிர ஸங்கே⁴னாதி – தத்தே²வ முச்சி²தோ பபதோ. அத² கோ² வட்³ட⁴ஸ்ஸ லிச்ச²விஸ்ஸ மித்தாமச்சா ஞாதிஸாலோஹிதா வட்³ட⁴ங் லிச்ச²விங் ஏதத³வோசுங் – ‘‘அலங், ஆவுஸோ வட்³ட⁴, மா ஸோசி, மா பரிதே³வி. மயங் ப⁴க³வந்தங் பஸாதெ³ஸ்ஸாம பி⁴க்கு²ஸங்க⁴ஞ்சா’’தி.
அத² கோ² வட்³டோ⁴ லிச்ச²வீ ஸபுத்ததா³ரோ ஸமித்தாமச்சோ ஸஞாதிஸாலோஹிதோ அல்லவத்தோ² அல்லகேஸோ யேன ப⁴க³வா தேனுபஸங்கமி, உபஸங்கமித்வா ப⁴க³வதோ பாதே³ஸு ஸிரஸா நிபதித்வா ப⁴க³வந்தங் ஏதத³வோச – ‘‘அச்சயோ மங், ப⁴ந்தே, அச்சக³மா யதா²பா³லங் யதா²மூள்ஹங் யதா²அகுஸலங், யோஹங் அய்யங் த³ப்³ப³ங் மல்லபுத்தங் அமூலிகாய ஸீலவிபத்தியா அனுத்³த⁴ங்ஸேஸிங். தஸ்ஸ மே, ப⁴ந்தே, ப⁴க³வா அச்சயங் அச்சயதோ படிக்³க³ண்ஹாது ஆயதிங் ஸங்வராயா’’தி. ‘‘தக்³க⁴ த்வங், ஆவுஸோ வட்³ட⁴, அச்சயோ அச்சக³மா யதா²பா³லங் யதா²மூள்ஹங் யதா²அகுஸலங், யங் த்வங் த³ப்³ப³ங் மல்லபுத்தங் அமூலிகாய ஸீலவிபத்தியா அனுத்³த⁴ங்ஸேஸி. யதோ ச கோ² த்வங், ஆவுஸோ வட்³ட⁴, அச்சயங் அச்சயதோ தி³ஸ்வா யதா²த⁴ம்மங் படிகரோஸி, தங் தே மயங் படிக்³க³ண்ஹாம. வுட்³டி⁴ஹேஸா, ஆவுஸோ வட்³ட⁴, அரியஸ்ஸ வினயே யோ அச்சயங் அச்சயதோ தி³ஸ்வா யதா²த⁴ம்மங் படிகரோதி, ஆயதிங் ஸங்வரங் ஆபஜ்ஜதீ’’தி. அத² கோ² ப⁴க³வா பி⁴க்கூ² ஆமந்தேஸி – ‘‘தேன ஹி, பி⁴க்க²வே, ஸங்கோ⁴ வட்³ட⁴ஸ்ஸ லிச்ச²விஸ்ஸ பத்தங் உக்குஜ்ஜது, ஸம்போ⁴க³ங் ஸங்கே⁴ன கரோது.
‘‘அட்ட²ஹி, பி⁴க்க²வே, அங்கே³ஹி ஸமன்னாக³தஸ்ஸ உபாஸகஸ்ஸ பத்தோ உக்குஜ்ஜிதப்³போ³ – ந பி⁴க்கூ²னங் அலாபா⁴ய பரிஸக்கதி, ந பி⁴க்கூ²னங் அனத்தா²ய பரிஸக்கதி, ந பி⁴க்கூ²னங் அவாஸாய பரிஸக்கதி, ந பி⁴க்கூ² அக்கோஸதி பரிபா⁴ஸதி, ந பி⁴க்கூ² பி⁴க்கூ²ஹி பே⁴தே³தி, ந பு³த்³த⁴ஸ்ஸ அவண்ணங் பா⁴ஸதி, ந த⁴ம்மஸ்ஸ அவண்ணங் பா⁴ஸதி, ந ஸங்க⁴ஸ்ஸ அவண்ணங் பா⁴ஸதி. அனுஜானாமி , பி⁴க்க²வே, இமேஹி அட்ட²ஹங்கே³ஹி ஸமன்னாக³தஸ்ஸ உபாஸகஸ்ஸ பத்தங் உக்குஜ்ஜிதுங். ஏவஞ்ச பன, பி⁴க்க²வே, உக்குஜ்ஜிதப்³போ³. தேன, பி⁴க்க²வே, வட்³டே⁴ன லிச்ச²வினா ஸங்க⁴ங் உபஸங்கமித்வா ஏகங்ஸங் உத்தராஸங்க³ங் கரித்வா பி⁴க்கூ²னங் பாதே³ வந்தி³த்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா ஏவமஸ்ஸ வசனீயோ – ‘ஸங்கே⁴ன மே, ப⁴ந்தே, பத்தோ நிக்குஜ்ஜிதோ, அஸம்போ⁴கொ³ம்ஹி ஸங்கே⁴ன. ஸோஹங், ப⁴ந்தே, ஸம்மா வத்தாமி, லோமங் பாதேமி, நெத்தா²ரங் வத்தாமி, ஸங்க⁴ங் பத்துக்குஜ்ஜனங் யாசாமீ’தி. து³தியம்பி யாசிதப்³போ³. ததியம்பி யாசிதப்³போ³. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –
267. ‘‘ஸுணாது மே, ப⁴ந்தே, ஸங்கோ⁴. ஸங்கே⁴ன வட்³ட⁴ஸ்ஸ லிச்ச²விஸ்ஸ பத்தோ நிக்குஜ்ஜிதோ, அஸம்போ⁴கோ³ ஸங்கே⁴ன. ஸோ ஸம்மா வத்ததி, லோமங் பாதேதி, நெத்தா²ரங் வத்ததி, ஸங்க⁴ங் பத்துக்குஜ்ஜனங் யாசதி. யதி³ ஸங்க⁴ஸ்ஸ பத்தகல்லங், ஸங்கோ⁴ வட்³ட⁴ஸ்ஸ லிச்ச²விஸ்ஸ பத்தங் உக்குஜ்ஜெய்ய, ஸம்போ⁴க³ங் ஸங்கே⁴ன கரெய்ய. ஏஸா ஞத்தி.
‘‘ஸுணாது மே, ப⁴ந்தே, ஸங்கோ⁴. ஸங்கே⁴ன வட்³ட⁴ஸ்ஸ லிச்ச²விஸ்ஸ பத்தோ நிக்குஜ்ஜிதோ, அஸம்போ⁴கோ³ ஸங்கே⁴ன. ஸோ ஸம்மா வத்ததி, லோமங் பாதேதி, நெத்தா²ரங் வத்ததி , ஸங்க⁴ங் பத்துக்குஜ்ஜனங் யாசதி. ஸங்கோ⁴ வட்³ட⁴ஸ்ஸ லிச்ச²விஸ்ஸ பத்தங் உக்குஜ்ஜதி, ஸம்போ⁴க³ங் ஸங்கே⁴ன கரோதி. யஸ்ஸாயஸ்மதோ க²மதி வட்³ட⁴ஸ்ஸ லிச்ச²விஸ்ஸ பத்தஸ்ஸ உக்குஜ்ஜனா, ஸம்போ⁴க³ங் ஸங்கே⁴ன கரணங், ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘உக்குஜ்ஜிதோ ஸங்கே⁴ன வட்³ட⁴ஸ்ஸ லிச்ச²விஸ்ஸ பத்தோ, ஸம்போ⁴கோ³ ஸங்கே⁴ன. க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி.
268. அத² கோ² ப⁴க³வா வேஸாலியங் யதா²பி⁴ரந்தங் விஹரித்வா யேன ப⁴க்³கா³ தேன சாரிகங் பக்காமி. அனுபுப்³பே³ன சாரிகங் சரமானோ யேன ப⁴க்³கா³ தத³வஸரி. தத்ர ஸுத³ங் ப⁴க³வா ப⁴க்³கே³ஸு விஹரதி ஸுஸுமாரகி³ரே ஸுங்ஸுமாரகி³ரே (ஸீ॰ ஸ்யா॰), ஸங்ஸுமாரகி³ரே (க॰) பே⁴ஸகளாவனே மிக³தா³யே. தேன கோ² பன ஸமயேன போ³தி⁴ஸ்ஸ ராஜகுமாரஸ்ஸ கோகனதோ³ கோகனுதோ³ (க॰) நாம பாஸாதோ³ அசிரகாரிதோ ஹோதி, அனஜ்ஜா²வுத்தோ² ஸமணேன வா ப்³ராஹ்மணேன வா கேனசி வா மனுஸ்ஸபூ⁴தேன. அத² கோ² போ³தி⁴ ராஜகுமாரோ ஸஞ்ஜிகாபுத்தங் மாணவங் ஆமந்தேஸி – ‘‘ஏஹி த்வங், ஸம்ம ஸஞ்சிகாபுத்த, யேன ப⁴க³வா தேனுபஸங்கம, உபஸங்கமித்வா மம வசனேன ப⁴க³வதோ பாதே³ ஸிரஸா வந்த³; அப்பாபா³த⁴ங் அப்பாதங்கங் லஹுட்டா²னங் ப³லங் பா²ஸுவிஹாரங் புச்ச² – ‘போ³தி⁴, ப⁴ந்தே, ராஜகுமாரோ ப⁴க³வதோ பாதே³ ஸிரஸா வந்த³தி, அப்பாபா³த⁴ங் அப்பாதங்கங் லஹுட்டா²னங் ப³லங் பா²ஸுவிஹாரங் புச்ச²தீ’தி. ஏவஞ்ச வதே³ஹி – ‘அதி⁴வாஸேது கிர, ப⁴ந்தே , ப⁴க³வா போ³தி⁴ஸ்ஸ ராஜகுமாரஸ்ஸ ஸ்வாதனாய ப⁴த்தங் ஸத்³தி⁴ங் பி⁴க்கு²ஸங்கே⁴னா’’’தி. ‘‘ஏவங் போ⁴’’தி கோ² ஸஞ்சிகாபுத்தோ மாணவோ போ³தி⁴ஸ்ஸ ராஜகுமாரஸ்ஸ படிஸ்ஸுத்வா யேன ப⁴க³வா தேனுபஸங்கமி, உபஸங்கமித்வா ப⁴க³வதா ஸத்³தி⁴ங் ஸம்மோதி³, ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³. ஏகமந்தங் நிஸின்னோ கோ² ஸஞ்சிகாபுத்தோ மாணவோ ப⁴க³வந்தங் ஏதத³வோச – ‘‘போ³தி⁴ கோ² ராஜகுமாரோ போ⁴தோ கோ³தமஸ்ஸ பாதே³ ஸிரஸா வந்த³தி, அப்பாபா³த⁴ங் அப்பாதங்கங் லஹுட்டா²னங் ப³லங் பா²ஸுவிஹாரங் புச்ச²தி. ஏவஞ்ச வதே³தி – ‘அதி⁴வாஸேது கிர ப⁴வங் கோ³தமோ போ³தி⁴ஸ்ஸ ராஜகுமாரஸ்ஸ ஸ்வாதனாய ப⁴த்தங் ஸத்³தி⁴ங் பி⁴க்கு²ஸங்கே⁴னா’’’தி. அதி⁴வாஸேஸி ப⁴க³வா துண்ஹீபா⁴வேன. அத² கோ² ஸஞ்சிகாபுத்தோ மாணவோ ப⁴க³வதோ அதி⁴வாஸனங் விதி³த்வா உட்டா²யாஸனா யேன போ³தி⁴ ராஜகுமாரோ தேனுபஸங்கமி, உபஸங்கமித்வா போ³தி⁴ங் ராஜகுமாரங் ஏதத³வோச – ‘‘அவோசும்ஹ கோ² மயங் போ⁴தோ வசனேன தங் ப⁴வந்தங் கோ³தமங் – ‘போ³தி⁴ கோ² ராஜகுமாரோ போ⁴தோ கோ³தமஸ்ஸ பாதே³ ஸிரஸா வந்த³தி, அப்பாபா³த⁴ங் அப்பாதங்கங் லஹுட்டா²னங் ப³லங் பா²ஸுவிஹாரங் புச்ச²தி. ஏவஞ்ச வதே³தி – அதி⁴வாஸேது கிர ப⁴வங் கோ³தமோ போ³தி⁴ஸ்ஸ ராஜகுமாரஸ்ஸ ஸ்வாதனாய ப⁴த்தங் ஸத்³தி⁴ங் பி⁴க்கு²ஸங்கே⁴னா’தி. அதி⁴வுத்த²ஞ்ச பன ஸமணேன கோ³தமேனா’’தி.
அத² கோ² போ³தி⁴ ராஜகுமாரோ தஸ்ஸா ரத்தியா அச்சயேன பணீதங் கா²த³னீயங் போ⁴ஜனீயங் படியாதா³பெத்வா, கோகனத³ஞ்ச பாஸாத³ங் ஓதா³தேஹி து³ஸ்ஸேஹி ஸந்த²ராபெத்வா யாவ பச்சி²மஸோபானகளேவரா, ஸஞ்சிகாபுத்தங் மாணவங் ஆமந்தேஸி – ‘‘ஏஹி த்வங், ஸம்ம ஸஞ்சிகாபுத்த, யேன ப⁴க³வா தேனுபஸங்கம, உபஸங்கமித்வா ப⁴க³வதோ காலங் ஆரோசேஹி – ‘காலோ, ப⁴ந்தே நிட்டி²தங் ப⁴த்த’’’ந்தி. ‘‘ஏவங் போ⁴’’தி கோ² ஸஞ்சிகாபுத்தோ மாணவோ போ³தி⁴ஸ்ஸ ராஜகுமாரஸ்ஸ படிஸ்ஸுத்வா யேன ப⁴க³வா தேனுபஸங்கமி, உபஸங்கமித்வா ப⁴க³வதோ காலங் ஆரோசேஸி – ‘‘காலோ, போ⁴ கோ³தம, நிட்டி²தங் ப⁴த்த’’ந்தி.
அத² கோ² ப⁴க³வா புப்³ப³ண்ஹஸமயங் நிவாஸெத்வா பத்தசீவரமாதா³ய யேன போ³தி⁴ஸ்ஸ ராஜகுமாரஸ்ஸ நிவேஸனங் தேனுபஸங்கமி. தேன கோ² பன ஸமயேன போ³தி⁴ ராஜகுமாரோ ப³ஹித்³வாரகொட்ட²கே டி²தோ ஹோதி, ப⁴க³வந்தங் ஆக³மயமானோ. அத்³த³ஸா கோ² போ³தி⁴ ராஜகுமாரோ ப⁴க³வந்தங் தூ³ரதோவ ஆக³ச்ச²ந்தங். தி³ஸ்வான ததோ பச்சுக்³க³ந்த்வா ப⁴க³வந்தங் அபி⁴வாதெ³த்வா புரெக்க²த்வா யேன கோகனதோ³ பாஸாதோ³ தேனுபஸங்கமி. அத² கோ² ப⁴க³வா பச்சி²மஸோபானகளேவரங் நிஸ்ஸாய அட்டா²ஸி. அத² கோ² போ³தி⁴ ராஜகுமாரோ ப⁴க³வந்தங் ஏதத³வோச – ‘‘அக்கமது, ப⁴ந்தே, ப⁴க³வா து³ஸ்ஸானி, அக்கமது ஸுக³தோ து³ஸ்ஸானி, யங் மம அஸ்ஸ தீ³க⁴ரத்தங் ஹிதாய ஸுகா²யா’’தி. ஏவங் வுத்தே ப⁴க³வா துண்ஹீ அஹோஸி. து³தியம்பி கோ²…பே॰… ததியம்பி கோ² போ³தி⁴ ராஜகுமாரோ ப⁴க³வந்தங் ஏதத³வோச – ‘‘அக்கமது, ப⁴ந்தே, ப⁴க³வா து³ஸ்ஸானி, அக்கமது ஸுக³தோ து³ஸ்ஸானி, யங் மம அஸ்ஸ தீ³க⁴ரத்தங் ஹிதாய ஸுகா²யா’’தி. அத² கோ² ப⁴க³வா ஆயஸ்மந்தங் ஆனந்த³ங் அபலோகேஸி. அத² கோ² ஆயஸ்மா ஆனந்தோ³ போ³தி⁴ங் ராஜகுமாரங் ஏதத³வோச – ‘‘ஸங்ஹரந்து, ராஜகுமார, து³ஸ்ஸானி. ந ப⁴க³வா சேலபடிகங் சேலபத்திகங் (ஸீ॰) அக்கமிஸ்ஸதி பச்சி²மங் ஜனதங் ததா²க³தோ அனுகம்பதீ’’தி.
அத² கோ² போ³தி⁴ ராஜகுமாரோ து³ஸ்ஸானி ஸங்ஹராபெத்வா உபரிகோகனதே³ பாஸாதே³ ஆஸனங் பஞ்ஞபேஸி. அத² கோ² ப⁴க³வா கோகனத³ங் பாஸாத³ங் அபி⁴ருஹித்வா பஞ்ஞத்தே ஆஸனே நிஸீதி³ ஸத்³தி⁴ங் பி⁴க்கு²ஸங்கே⁴ன. அத² கோ² போ³தி⁴ ராஜகுமாரோ பு³த்³த⁴ப்பமுக²ங் பி⁴க்கு²ஸங்க⁴ங் பணீதேன கா²த³னீயேன போ⁴ஜனீயேன ஸஹத்தா² ஸந்தப்பெத்வா ஸம்பவாரெத்வா, ப⁴க³வந்தங் பு⁴த்தாவிங் ஓனீதபத்தபாணிங், ஏகமந்தங் நிஸீதி³. ஏகமந்தங் நிஸின்னங் கோ² போ³தி⁴ங் ராஜகுமாரங் ப⁴க³வா த⁴ம்மியா கதா²ய ஸந்த³ஸ்ஸெத்வா ஸமாத³பெத்வா ஸமுத்தேஜெத்வா ஸம்பஹங்ஸெத்வா உட்டா²யாஸனா பக்காமி. அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘ந, பி⁴க்க²வே, சேலபடிகா அக்கமிதப்³பா³. யோ அக்கமெய்ய, ஆபத்தி து³க்கடஸ்ஸா’’தி.
தேன கோ² பன ஸமயேன அஞ்ஞதரா இத்தீ² அபக³தக³ப்³பா⁴ பி⁴க்கூ² நிமந்தெத்வா து³ஸ்ஸங் பஞ்ஞபெத்வா ஏதத³வோச – ‘‘அக்கமத², ப⁴ந்தே , து³ஸ்ஸ’’ந்தி. பி⁴க்கூ² குக்குச்சாயந்தா ந அக்கமந்தி. ‘‘அக்கமத², ப⁴ந்தே, து³ஸ்ஸங் மங்க³லத்தா²யா’’தி. பி⁴க்கூ² குக்குச்சாயந்தா ந அக்கமிங்ஸு. அத² கோ² ஸா இத்தீ² உஜ்ஜா²யதி கி²ய்யதி விபாசேதி – ‘‘கத²ஞ்ஹி நாம அய்யா மங்க³லத்தா²ய யாசியமானா சேலப்படிகங் ந அக்கமிஸ்ஸந்தீ’’தி! அஸ்ஸோஸுங் கோ² பி⁴க்கூ² தஸ்ஸா இத்தி²யா உஜ்ஜா²யந்தியா கி²ய்யந்தியா விபாசெந்தியா. அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங். ‘‘கி³ஹீ, பி⁴க்க²வே, மங்க³லிகா. அனுஜானாமி, பி⁴க்க²வே, கி³ஹீனங் மங்க³லத்தா²ய யாசியமானேன சேலப்படிகங் அக்கமிது’’ந்தி.
தேன கோ² பன ஸமயேன பி⁴க்கூ² தோ⁴தபாத³கங் அக்கமிதுங் குக்குச்சாயந்தி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, தோ⁴தபாத³கங் அக்கமிது’’ந்தி.
து³தியபா⁴ணவாரோ நிட்டி²தோ.
269. அத² கோ² ப⁴க³வா ப⁴க்³கே³ஸு யதா²பி⁴ரந்தங் விஹரித்வா யேன ஸாவத்தி² தேன சாரிகங் பக்காமி. அனுபுப்³பே³ன சாரிகங் சரமானோ யேன ஸாவத்தி² தத³வஸரி. தத்ர ஸுத³ங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. அத² கோ² விஸாகா² மிகா³ரமாதா க⁴டகஞ்ச கதகஞ்ச ஸம்மஜ்ஜனிஞ்ச ஆதா³ய யேன ப⁴க³வா தேனுபஸங்கமி, உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னா கோ² விஸாகா² மிகா³ரமாதா ப⁴க³வந்தங் ஏதத³வோச – ‘‘படிக்³க³ண்ஹாது மே, ப⁴ந்தே, ப⁴க³வா க⁴டகஞ்ச கதகஞ்ச ஸம்மஜ்ஜனிஞ்ச, யங் மம அஸ்ஸ தீ³க⁴ரத்தங் ஹிதாய ஸுகா²யா’’தி. படிக்³க³ஹேஸி ப⁴க³வா க⁴டகஞ்ச ஸம்மஜ்ஜனிஞ்ச. ந ப⁴க³வா கதகங் படிக்³க³ஹேஸி. அத² கோ² ப⁴க³வா விஸாக²ங் மிகா³ரமாதரங் த⁴ம்மியா கதா²ய ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹங்ஸேஸி. அத² கோ² விஸாகா² மிகா³ரமாதா ப⁴க³வதா த⁴ம்மியா கதா²ய ஸந்த³ஸ்ஸிதா ஸமாத³பிதா ஸமுத்தேஜிதா ஸம்பஹங்ஸிதா உட்டா²யாஸனா ப⁴க³வந்தங் அபி⁴வாதெ³த்வா பத³க்கி²ணங் கத்வா பக்காமி.
அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, க⁴டகஞ்ச ஸம்மஜ்ஜனிஞ்ச. ந, பி⁴க்க²வே, கதகங் பரிபு⁴ஞ்ஜிதப்³ப³ங். யோ பரிபு⁴ஞ்ஜெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, திஸ்ஸோ பாத³க⁴ங்ஸனியோ – ஸக்க²ரங், கத²லங், ஸமுத்³த³பே²ணக’’ந்தி.
அத² கோ² விஸாகா² மிகா³ரமாதா விதூ⁴பனஞ்ச தாலவண்டஞ்ச தாலவண்ட³ஞ்ச (க॰) ஆதா³ய யேன ப⁴க³வா தேனுபஸங்கமி, உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னா கோ² விஸாகா² மிகா³ரமாதா ப⁴க³வந்தங் ஏதத³வோச – ‘‘படிக்³க³ண்ஹாது மே, ப⁴ந்தே, ப⁴க³வா விதூ⁴பனஞ்ச தாலவண்டஞ்ச, யங் மம அஸ்ஸ தீ³க⁴ரத்தங் ஹிதாய ஸுகா²யா’’தி. படிக்³க³ஹேஸி ப⁴க³வா விதூ⁴பனஞ்ச தாலவண்டஞ்ச.
அத² கோ² ப⁴க³வா விஸாக²ங் மிகா³ரமாதரங் த⁴ம்மியா கதா²ய ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹங்ஸேஸி…பே॰… பத³க்கி²ணங் கத்வா பக்காமி. அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, விதூ⁴பனஞ்ச தாலவண்டஞ்சா’’தி.
தேன கோ² பன ஸமயேன ஸங்க⁴ஸ்ஸ மகஸபீ³ஜனீ உப்பன்னா ஹோதி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, மகஸபீ³ஜனி’’ந்தி. சாமரிபீ³ஜனீ உப்பன்னா ஹோதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, சாமரிபீ³ஜனீ தா⁴ரேதப்³பா³. யோ தா⁴ரெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, திஸ்ஸோ பீ³ஜனியோ – வாகமயங், உஸீரமயங், மோரபிஞ்ச²மய’’ந்தி.
270. தேன கோ² பன ஸமயேன ஸங்க⁴ஸ்ஸ ச²த்தங் உப்பன்னங் ஹோதி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, ச²த்த’’ந்தி.
தேன கோ² பன ஸமயேன ச²ப்³ப³க்³கி³யா பி⁴க்கூ² ச²த்தப்பக்³க³ஹிதா ச²த்தங் பக்³க³ஹெத்வா (க॰) ஆஹிண்ட³ந்தி. தேன கோ² பன ஸமயேன அஞ்ஞதரோ உபாஸகோ ஸம்ப³ஹுலேஹி ஆஜீவகஸாவகேஹி ஸத்³தி⁴ங் உய்யானங் அக³மாஸி. அத்³த³ஸாஸுங் கோ² தே ஆஜீவகஸாவகா ச²ப்³ப³க்³கி³யே பி⁴க்கூ² தூ³ரதோவ ச²த்தப்பக்³க³ஹிதே ஆக³ச்ச²ந்தே. தி³ஸ்வான தங் உபாஸகங் ஏதத³வோசுங் – ‘‘ஏதே கோ², அய்யா அய்யோ (க॰), தும்ஹாகங் ப⁴த³ந்தா ச²த்தப்பக்³க³ஹிதா ஆக³ச்ச²ந்தி, ஸெய்யதா²பி க³ணகமஹாமத்தா’’தி. ‘‘நாய்யா ஏதே பி⁴க்கூ², பரிப்³பா³ஜகா’’தி. ‘பி⁴க்கூ² ந பி⁴க்கூ²’தி அப்³பு⁴தங் அகங்ஸு. அத² கோ² ஸோ உபாஸகோ உபக³தே ஸஞ்ஜானித்வா உஜ்ஜா²யதி கி²ய்யதி விபாசேதி – ‘‘கத²ஞ்ஹி நாம ப⁴த³ந்தா ச²த்தப்பக்³க³ஹிதா ஆஹிண்டி³ஸ்ஸந்தீ’’தி! அஸ்ஸோஸுங் கோ² பி⁴க்கூ² தஸ்ஸ உபாஸகஸ்ஸ உஜ்ஜா²யந்தஸ்ஸ கி²ய்யந்தஸ்ஸ விபாசெந்தஸ்ஸ. அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங். ‘‘ஸச்சங் கிர, பி⁴க்க²வே…பே॰… ‘‘ஸச்சங் ப⁴க³வா’’தி…பே॰… விக³ரஹித்வா…பே॰… த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘ந, பி⁴க்க²வே, ச²த்தங் தா⁴ரேதப்³ப³ங். யோ தா⁴ரெய்ய, ஆபத்தி து³க்கடஸ்ஸா’’தி.
தேன கோ² பன ஸமயேன அஞ்ஞதரோ பி⁴க்கு² கி³லானோ ஹோதி. தஸ்ஸ பி⁴க்கு²னோ வினா ச²த்தங் ந பா²ஸு ஹோதி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, கி³லானஸ்ஸ ச²த்தங் தா⁴ரேது’’ந்தி.
தேன கோ² பன ஸமயேன பி⁴க்கூ² – கி³லானஸ்ஸேவ ப⁴க³வதா ச²த்தங் அனுஞ்ஞாதங் நோ அகி³லானஸ்ஸாதி – ஆராமே ஆராமூபசாரே ச²த்தங் தா⁴ரேதுங் குக்குச்சாயந்தி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, அகி³லானேனபி ஆராமே ஆராமூபசாரே ச²த்தங் தா⁴ரேது’’ந்தி.
தேன கோ² பன ஸமயேன அஞ்ஞதரோ பி⁴க்கு² ஸிக்காய பத்தங் உட்டித்வா த³ண்டே³ ஆலக்³கி³த்வா விகாலே அஞ்ஞதரேன கா³மத்³வாரேன அதிக்கமதி. மனுஸ்ஸா – ‘ஏஸய்யோ சோரோ க³ச்ச²தி, அஸிஸ்ஸ விஜ்ஜோதலதீ’தி அனுபதித்வா க³ஹெத்வா ஸஞ்ஜானித்வா முஞ்சிங்ஸு. அத² கோ² ஸோ பி⁴க்கு² ஆராமங் க³ந்த்வா பி⁴க்கூ²னங் ஏதமத்த²ங் ஆரோசேஸி. ‘‘கிங் பன த்வங், ஆவுஸோ, த³ண்ட³ஸிக்கங் தா⁴ரேஸீ’’தி? ‘‘ஏவமாவுஸோ’’தி. யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பி⁴க்கு² த³ண்ட³ஸிக்கங் தா⁴ரெஸ்ஸஸீ’’தி! அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங்…பே॰… ‘‘ஸச்சங் ப⁴க³வா’’தி…பே॰… விக³ரஹித்வா…பே॰… த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘ந, பி⁴க்க²வே, த³ண்ட³ஸிக்கா தா⁴ரேதப்³பா³. யோ தா⁴ரெய்ய, ஆபத்தி து³க்கடஸ்ஸா’’தி.
தேன கோ² பன ஸமயேன அஞ்ஞதரோ பி⁴க்கு² கி³லானோ ஹோதி, ந ஸக்கோதி வினா த³ண்டே³ன ஆஹிண்டி³துங். ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, கி³லானஸ்ஸ பி⁴க்கு²னோ த³ண்ட³ஸம்முதிங் தா³துங். ஏவஞ்ச பன, பி⁴க்க²வே, தா³தப்³பா³. தேன கி³லானேன பி⁴க்கு²னா ஸங்க⁴ங் உபஸங்கமித்வா ஏகங்ஸங் உத்தராஸங்க³ங் கரித்வா வுட்³டா⁴னங் பி⁴க்கூ²னங் பாதே³ வந்தி³த்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா ஏவமஸ்ஸ வசனீயோ – ‘அஹங், ப⁴ந்தே, கி³லானோ; ந ஸக்கோமி வினா த³ண்டே³ன ஆஹிண்டி³துங். ஸோஹங், ப⁴ந்தே, ஸங்க⁴ங் த³ண்ட³ஸம்முதிங் யாசாமீ’தி. து³தியம்பி யாசிதப்³பா³. ததியம்பி யாசிதப்³பா³. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –
‘‘ஸுணாது மே, ப⁴ந்தே, ஸங்கோ⁴. அயங் இத்த²ன்னாமோ பி⁴க்கு² கி³லானோ, ந ஸக்கோதி வினா த³ண்டே³ன ஆஹிண்டி³துங். ஸோ ஸங்க⁴ங் த³ண்ட³ஸம்முதிங் யாசதி. யதி³ ஸங்க⁴ஸ்ஸ பத்தகல்லங், ஸங்கோ⁴ இத்த²ன்னாமஸ்ஸ பி⁴க்கு²னோ த³ண்ட³ஸம்முதிங் த³தெ³ய்ய. ஏஸா ஞத்தி.
‘‘ஸுணாது மே, ப⁴ந்தே, ஸங்கோ⁴. அயங் இத்த²ன்னாமோ பி⁴க்கு² கி³லானோ, ந ஸக்கோதி வினா த³ண்டே³ன ஆஹிண்டி³துங். ஸோ ஸங்க⁴ங் த³ண்ட³ஸம்முதிங் யாசதி. ஸங்கோ⁴ இத்த²ன்னாமஸ்ஸ பி⁴க்கு²னோ த³ண்ட³ஸம்முதிங் தே³தி. யஸ்ஸாயஸ்மதோ க²மதி இத்த²ன்னாமஸ்ஸ பி⁴க்கு²னோ த³ண்ட³ஸம்முதியா தா³னங், ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘தி³ன்னா ஸங்கே⁴ன இத்த²ன்னாமஸ்ஸ பி⁴க்கு²னோ த³ண்ட³ஸம்முதி. க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி.
271. தேன கோ² பன ஸமயேன அஞ்ஞதரோ பி⁴க்கு² கி³லானோ ஹோதி, ந ஸக்கோதி வினா ஸிக்காய பத்தங் பரிஹரிதுங். ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, கி³லானஸ்ஸ பி⁴க்கு²னோ ஸிக்காஸம்முதிங் தா³துங். ஏவஞ்ச பன, பி⁴க்க²வே, தா³தப்³பா³. தேன கி³லானேன பி⁴க்கு²னா ஸங்க⁴ங் உபஸங்கமித்வா ஏகங்ஸங் உத்தராஸங்க³ங் கரித்வா வுட்³டா⁴னங் பி⁴க்கூ²னங் பாதே³ வந்தி³த்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா ஏவமஸ்ஸ வசனீயோ – ‘அஹங், ப⁴ந்தே, கி³லானோ; ந ஸக்கோமி வினா ஸிக்காய பத்தங் பரிஹரிதுங். ஸோஹங், ப⁴ந்தே, ஸங்க⁴ங் ஸிக்காஸம்முதிங் யாசாமீ’தி. து³தியம்பி யாசிதப்³பா³. ததியம்பி யாசிதப்³பா³. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –
‘‘ஸுணாது மே, ப⁴ந்தே, ஸங்கோ⁴. அயங் இத்த²ன்னாமோ பி⁴க்கு² கி³லானோ, ந ஸக்கோதி வினா ஸிக்காய பத்தங் பரிஹரிதுங். ஸோ ஸங்க⁴ங் ஸிக்காஸம்முதிங் யாசதி. யதி³ ஸங்க⁴ஸ்ஸ பத்தகல்லங், ஸங்கோ⁴ இத்த²ன்னாமஸ்ஸ பி⁴க்கு²னோ ஸிக்காஸம்முதிங் த³தெ³ய்ய. ஏஸா ஞத்தி.
‘‘ஸுணாது மே, ப⁴ந்தே, ஸங்கோ⁴. அயங் இத்த²ன்னாமோ பி⁴க்கு² கி³லானோ, ந ஸக்கோதி வினா ஸிக்காய பத்தங் பரிஹரிதுங். ஸோ ஸங்க⁴ங் ஸிக்காஸம்முதிங் யாசதி. ஸங்கோ⁴ இத்த²ன்னாமஸ்ஸ பி⁴க்கு²னோ ஸிக்காஸம்முதிங் தே³தி. யஸ்ஸாயஸ்மதோ க²மதி இத்த²ன்னாமஸ்ஸ பி⁴க்கு²னோ ஸிக்காஸம்முதியா தா³னங், ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘தி³ன்னா ஸங்கே⁴ன இத்த²ன்னாமஸ்ஸ பி⁴க்கு²னோ ஸிக்காஸம்முதி. க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி.
272. தேன கோ² பன ஸமயேன அஞ்ஞதரோ பி⁴க்கு² கி³லானோ ஹோதி, ந ஸக்கோதி வினா த³ண்டே³ன ஆஹிண்டி³துங், ந ஸக்கோதி வினா ஸிக்காய பத்தங் பரிஹரிதுங். ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, கி³லானஸ்ஸ பி⁴க்கு²னோ த³ண்ட³ஸிக்காஸம்முதிங் தா³துங். ஏவஞ்ச பன, பி⁴க்க²வே, தா³தப்³பா³ . தேன கி³லானேன பி⁴க்கு²னா ஸங்க⁴ங் உபஸங்கமித்வா ஏகங்ஸங் உத்தராஸங்க³ங் கரித்வா வுட்³டா⁴னங் பி⁴க்கூ²னங் பாதே³ வந்தி³த்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா ஏவமஸ்ஸ வசனீயோ – ‘அஹங், ப⁴ந்தே, கி³லானோ; ந ஸக்கோமி வினா த³ண்டே³ன ஆஹிண்டி³துங்; ந ஸக்கோமி வினா ஸிக்காய பத்தங் பரிஹரிதுங். ஸோஹங், ப⁴ந்தே, ஸங்க⁴ங் த³ண்ட³ஸிக்காஸம்முதிங் யாசாமீ’தி. து³தியம்பி யாசிதப்³பா³. ததியம்பி யாசிதப்³பா³. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –
‘‘ஸுணாது மே, ப⁴ந்தே, ஸங்கோ⁴. அயங் இத்த²ன்னாமோ பி⁴க்கு² கி³லானோ, ந ஸக்கோதி வினா த³ண்டே³ன ஆஹிண்டி³துங், ந ஸக்கோதி வினா ஸிக்காய பத்தங் பரிஹரிதுங். ஸோ ஸங்க⁴ங் த³ண்ட³ஸிக்காஸம்முதிங் யாசதி. யதி³ ஸங்க⁴ஸ்ஸ பத்தகல்லங், ஸங்கோ⁴ இத்த²ன்னாமஸ்ஸ பி⁴க்கு²னோ த³ண்ட³ஸிக்காஸம்முதிங் த³தெ³ய்ய. ஏஸா ஞத்தி.
‘‘ஸுணாது மே, ப⁴ந்தே, ஸங்கோ⁴. அயங் இத்த²ன்னாமோ பி⁴க்கு² கி³லானோ ந ஸக்கோதி வினா த³ண்டே³ன ஆஹிண்டி³துங், ந ஸக்கோதி வினா ஸிக்காய பத்தங் பரிஹரிதுங். ஸோ ஸங்க⁴ங் த³ண்ட³ஸிக்காஸம்முதிங் யாசதி. ஸங்கோ⁴ இத்த²ன்னாமஸ்ஸ பி⁴க்கு²னோ த³ண்ட³ஸிக்காஸம்முதிங் தே³தி. யஸ்ஸாயஸ்மதோ க²மதி இத்த²ன்னாமஸ்ஸ பி⁴க்கு²னோ த³ண்ட³ஸிக்காஸம்முதியா தா³னங், ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘தி³ன்னா ஸங்கே⁴ன இத்த²ன்னாமஸ்ஸ பி⁴க்கு²னோ த³ண்ட³ஸிக்காஸம்முதி. க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி.
273. தேன கோ² பன ஸமயேன அஞ்ஞதரோ பி⁴க்கு² ரோமந்த²கோ ரோமட்ட²கோ (க॰) ஹோதி. ஸோ ரோமந்தி²த்வா ரோமந்தி²த்வா அஜ்ஜோ²ஹரதி. பி⁴க்கூ² உஜ்ஜா²யந்தி கி²ய்யந்தி விபாசெந்தி – ‘‘விகாலாயங் கத²ங் ஹி நாம விகாலாயங்(க॰) பி⁴க்கு² போ⁴ஜனங் பு⁴ஞ்ஜதீ’’தி. ப⁴க³வதோ ஏதமத்த²ங் ஆரோசேஸுங். ‘‘ஏஸோ, பி⁴க்க²வே, பி⁴க்கு² அசிரங்கோ³யோனியா சுதோ. அனுஜானாமி, பி⁴க்க²வே, ரோமந்த²கஸ்ஸ ரோமந்த²னங். ந ச, பி⁴க்க²வே, ப³ஹிமுக²த்³வாரங் நீஹரித்வா அஜ்ஜோ²ஹரிதப்³ப³ங். யோ அஜ்ஜோ²ஹரெய்ய, யதா²த⁴ம்மோ காரேதப்³போ³’’தி.
தேன கோ² பன ஸமயேன அஞ்ஞதரஸ்ஸ பூக³ஸ்ஸ ஸங்க⁴ப⁴த்தங் ஹோதி. ப⁴த்தக்³கே³ ப³ஹுஸித்தா²னி பகிரியிங்ஸு விப்பகிரீயிங்ஸு (ஸீ॰), பரிகிரிங்ஸு (ஸ்யா॰). மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஸமணா ஸக்யபுத்தியா ஓத³னே தி³ய்யமானே ந ஸக்கச்சங் படிக்³க³ஹெஸ்ஸந்தி, ஏகமேகங் ஸித்த²ங் கம்மஸதேன நிட்டா²யதீ’’தி! அஸ்ஸோஸுங் கோ² பி⁴க்கூ² தேஸங் மனுஸ்ஸானங் உஜ்ஜா²யந்தானங் கி²ய்யந்தானங் விபாசெந்தானங். அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, யங் தி³ய்யமானங் பததி, தங் ஸாமங் க³ஹெத்வா பரிபு⁴ஞ்ஜிதுங். பரிச்சத்தங் தங், பி⁴க்க²வே, தா³யகேஹீ’’தி.
274. தேன கோ² பன ஸமயேன அஞ்ஞதரோ பி⁴க்கு² தீ³கே⁴ஹி நகே²ஹி பிண்டா³ய சரதி. அஞ்ஞதரா இத்தீ² பஸ்ஸித்வா தங் பி⁴க்கு²ங் ஏதத³வோச – ‘‘ஏஹி, ப⁴ந்தே, மேது²னங் த⁴ம்மங் படிஸேவா’’தி. ‘‘அலங், ப⁴கி³னி, நேதங் கப்பதீ’’தி. ‘‘ஸசே கோ² த்வங், ப⁴ந்தே, நப்படிஸேவிஸ்ஸஸி, இதா³னாஹங் அத்தனோ நகே²ஹி க³த்தானி விலிகி²த்வா குப்பங் கரிஸ்ஸாமி – அயங் மங் பி⁴க்கு² விப்பகரோதீ’’தி. ‘‘பஜானாஹி த்வங், ப⁴கி³னீ’’தி. அத² கோ² ஸா இத்தீ² அத்தனோ நகே²ஹி க³த்தானி விலிகி²த்வா குப்பங் அகாஸி – அயங் மங் பி⁴க்கு² விப்பகரோதீதி. மனுஸ்ஸா உபதா⁴வித்வா தங் பி⁴க்கு²ங் அக்³க³ஹேஸுங். அத்³த³ஸாஸுங் கோ² தே மனுஸ்ஸா தஸ்ஸா இத்தி²யா நகே² ச²விம்பி லோஹிதம்பி. தி³ஸ்வான – இமிஸ்ஸாயேவ இத்தி²யா இத³ங் கம்மங், அகாரகோ பி⁴க்கூ²தி – தங் பி⁴க்கு²ங் முஞ்சிங்ஸு. அத² கோ² ஸோ பி⁴க்கு² ஆராமங் க³ந்த்வா பி⁴க்கூ²னங் ஏதமத்த²ங் ஆரோசேஸி. ‘‘கிங் பன த்வங், ஆவுஸோ, தீ³கே⁴ நகே² தா⁴ரேஸீ’’தி? ‘‘ஏவமாவுஸோ’’தி. யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பி⁴க்கு² தீ³கே⁴ நகே² தா⁴ரெஸ்ஸஸீ’’தி! அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, தீ³கா⁴ நகா² தா⁴ரேதப்³பா³. யோ தா⁴ரெய்ய, ஆபத்தி து³க்கடஸ்ஸா’’தி.
தேன கோ² பன ஸமயேன பி⁴க்கூ² நகே²னபி நக²ங் சி²ந்த³ந்தி, முகே²னபி நக²ங் சி²ந்த³ந்தி, குட்டேபி க⁴ங்ஸந்தி. அங்கு³லியோ து³க்கா² ஹொந்தி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, நக²ச்சே²த³ன’’ந்தி. ஸலோஹிதங் நக²ங் சி²ந்த³ந்தி. அங்கு³லியோ து³க்கா² ஹொந்தி…பே॰… ‘‘அனுஜானாமி, பி⁴க்க²வே, மங்ஸப்பமாணேன நக²ங் சி²ந்தி³து’’ந்தி.
தேன கோ² பன ஸமயேன ச²ப்³ப³க்³கி³யா பி⁴க்கூ² வீஸதிமட்ட²ங் வீஸதிமட்டங் (ஸீ॰) காராபெந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ஸெய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ங் ஆரோசேஸுங். ‘‘ந , பி⁴க்க²வே, வீஸதிமட்ட²ங் காராபேதப்³ப³ங். யோ காராபெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, மலமத்தங் அபகட்³டி⁴து’’ந்தி.
275. தேன கோ² பன ஸமயேன பி⁴க்கூ²னங் கேஸா தீ³கா⁴ ஹொந்தி. ப⁴க³வதோ ஏதமத்த²ங் ஆரோசேஸுங். ‘‘உஸ்ஸஹந்தி பன, பி⁴க்க²வே, பி⁴க்கூ² அஞ்ஞமஞ்ஞங் கேஸே ஓரோபேது’’ந்தி? ‘‘உஸ்ஸஹந்தி ப⁴க³வா’’தி . அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே பி⁴க்கு²ஸங்க⁴ங் ஸன்னிபாதாபெத்வா…பே॰… பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, கு²ரங் கு²ரஸிலங் கு²ரஸிபாடிகங் நமதகங் ஸப்³ப³ங் கு²ரப⁴ண்ட³’’ந்தி.
தேன கோ² பன ஸமயேன ச²ப்³ப³க்³கி³யா பி⁴க்கூ² மஸ்ஸுங் கப்பாபெந்தி…பே॰… மஸ்ஸுங் வட்³டா⁴பெந்தி… கோ³லோமிகங் காராபெந்தி… சதுரஸ்ஸகங் காராபெந்தி… பரிமுக²ங் காராபெந்தி… அட்³ட⁴து³கங் அட்³டு⁴ரகங் (ஸீ॰), அட்³ட⁴ருகங் (ஸ்யா॰) காராபெந்தி… தா³டி²கங் ட²பெந்தி… ஸம்பா³தே⁴ லோமங் ஸங்ஹராபெந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ஸெய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே , மஸ்ஸு கப்பாபேதப்³ப³ங்…பே॰… ந மஸ்ஸு வட்³டா⁴பேதப்³ப³ங்… ந கோ³லோமிகங் காராபேதப்³ப³ங்… ந சதுரஸ்ஸகங் காராபேதப்³ப³ங்… ந பரிமுக²ங் காராபேதப்³ப³ங்… ந அட்³ட⁴து³கங் காராபேதப்³ப³ங்… ந தா³டி²கா ட²பேதப்³பா³… ந ஸம்பா³தே⁴ லோமங் ஸங்ஹராபேதப்³ப³ங். யோ ஸங்ஹராபெய்ய, ஆபத்தி து³க்கடஸ்ஸா’’தி.
தேன கோ² பன ஸமயேன அஞ்ஞதரஸ்ஸ பி⁴க்கு²னோ ஸம்பா³தே⁴ வணோ ஹோதி. பே⁴ஸஜ்ஜங் ந ஸந்திட்ட²தி. ப⁴க³வதோ ஏதமத்த²ங் ஆரோசேஸுங் . ‘‘அனுஜானாமி, பி⁴க்க²வே, ஆபா³த⁴ப்பச்சயா ஸம்பா³தே⁴ லோமங் ஸங்ஹராபேது’’ந்தி.
தேன கோ² பன ஸமயேன ச²ப்³ப³க்³கி³யா பி⁴க்கூ² கத்தரிகாய கேஸே சே²தா³பெந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ஸெய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, கத்தரிகாய கேஸா சே²தா³பேதப்³பா³. யோ சே²தா³பெய்ய, ஆபத்தி து³க்கடஸ்ஸா’’தி.
தேன கோ² பன ஸமயேன அஞ்ஞதரஸ்ஸ பி⁴க்கு²னோ ஸீஸே வணோ ஹோதி, ந ஸக்கோதி கு²ரேன கேஸே ஓரோபேதுங். ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, ஆபா³த⁴ப்பச்சயா கத்தரிகாய கேஸே சே²தா³பேது’’ந்தி.
தேன கோ² பன ஸமயேன பி⁴க்கூ² தீ³கா⁴னி நாஸிகாலோமானி தா⁴ரெந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ஸெய்யதா²பி பிஸாசில்லிகாதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, தீ³க⁴ங் நாஸிகாலோமங் தா⁴ரேதப்³ப³ங். யோ தா⁴ரெய்ய, ஆபத்தி து³க்கடஸ்ஸா’’தி.
தேன கோ² பன ஸமயேன பி⁴க்கூ² ஸக்க²ரிகாயபி மது⁴ஸித்த²கேனபி நாஸிகாலோமங் கா³ஹாபெந்தி. நாஸிகா து³க்கா² ஹொந்தி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, ஸண்டா³ஸ’’ந்தி.
தேன கோ² பன ஸமயேன ச²ப்³ப³க்³கி³யா பி⁴க்கூ² பலிதங் கா³ஹாபெந்தி . மனுஸ்ஸா உஜ்ஜா²யந்தி கி²ய்யந்தி விபாசெந்தி – ஸெய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, பலிதங் கா³ஹாபேதப்³ப³ங். யோ கா³ஹாபெய்ய, ஆபத்தி து³க்கடஸ்ஸா’’தி.
276. தேன கோ² பன ஸமயேன அஞ்ஞதரஸ்ஸ பி⁴க்கு²னோ கண்ணகூ³த²கேஹி கண்ணா த²கிதா ஹொந்தி . ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, கண்ணமலஹரணி’’ந்தி.
தேன கோ² பன ஸமயேன ச²ப்³ப³க்³கி³யா பி⁴க்கூ² உச்சாவசா கண்ணமலஹரணியோ தா⁴ரெந்தி ஸோவண்ணமயங் ரூபியமயங். மனுஸ்ஸா உஜ்ஜா²யந்தி கி²ய்யந்தி விபாசெந்தி – ஸெய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, உச்சாவசா கண்ணமலஹரணியோ தா⁴ரேதப்³பா³. யோ தா⁴ரெய்ய, ஆபத்தி து³க்கடஸ்ஸாதி. அனுஜானாமி, பி⁴க்க²வே, அட்டி²மயங் த³ந்தமயங் விஸாணமயங் நளமயங் வேளுமயங் கட்ட²மயங் ஜதுமயங் ப²லமயங் லோஹமயங் ஸங்க²னாபி⁴மய’’ந்தி.
277. தேன கோ² பன ஸமயேன ச²ப்³ப³க்³கி³யா பி⁴க்கூ² ப³ஹுங் லோஹப⁴ண்ட³ங் கங்ஸப⁴ண்ட³ங் ஸன்னிசயங் கரொந்தி. மனுஸ்ஸா விஹாரசாரிகங் ஆஹிண்ட³ந்தா பஸ்ஸித்வா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஸமணா ஸக்யபுத்தியா ப³ஹுங் லோஹப⁴ண்ட³ங் கங்ஸப⁴ண்ட³ங் ஸன்னிசயங் கரிஸ்ஸந்தி , ஸெய்யதா²பி கங்ஸபத்த²ரிகா’’தி! ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, ப³ஹுங் லோஹப⁴ண்ட³ங் கங்ஸப⁴ண்ட³ங் ஸன்னிசயோ காதப்³போ³. யோ கரெய்ய, ஆபத்தி து³க்கடஸ்ஸா’’தி.
தேன கோ² பன ஸமயேன பி⁴க்கூ² அஞ்ஜனிம்பி அஞ்ஜனிஸலாகம்பி கண்ணமலஹரணிம்பி ப³ந்த⁴னமத்தம்பி குக்குச்சாயந்தி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, அஞ்ஜனிங் அஞ்ஜனிஸலாகங் கண்ணமலஹரணிங் ப³ந்த⁴னமத்த’’ந்தி.
தேன கோ² பன ஸமயேன ச²ப்³ப³க்³கி³யா பி⁴க்கூ² ஸங்கா⁴டிபல்லத்தி²காய நிஸீத³ந்தி. ஸங்கா⁴டியா பத்தா லுஜ்ஜந்தி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, ஸங்கா⁴டிபல்லத்தி²காய நிஸீதி³தப்³ப³ங். யோ நிஸீதெ³ய்ய, ஆபத்தி து³க்கடஸ்ஸா’’தி.
தேன கோ² பன ஸமயேன அஞ்ஞதரோ பி⁴க்கு² கி³லானோ ஹோதி. தஸ்ஸ வினா ஆயோகே³ன ஆயோகா³ (ஸீ॰ ஸ்யா॰) ந பா²ஸு ஹோதி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, ஆயோக³’’ந்தி. அத² கோ² பி⁴க்கூ²னங் ஏதத³ஹோஸி – ‘‘கத²ங் நு கோ² ஆயோகோ³ காதப்³போ³’’தி? ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, தந்தகங் வேமங் கவடங் வேமகங் வட்டங் (ஸீ॰), வேமகங் வடங் (ஸ்யா॰) ஸலாகங் ஸப்³ப³ங் தந்தப⁴ண்ட³க’’ந்தி.
278. தேன கோ² பன ஸமயேன அஞ்ஞதரோ பி⁴க்கு² அகாயப³ந்த⁴னோ கா³மங் பிண்டா³ய பாவிஸி. தஸ்ஸ ரதி²காய அந்தரவாஸகோ பப⁴ஸ்ஸித்த². மனுஸ்ஸா உக்குட்டி²மகங்ஸு . ஸோ பி⁴க்கு² மங்கு அஹோஸி . அத² கோ² ஸோ பி⁴க்கு² ஆராமங் க³ந்த்வா பி⁴க்கூ²னங் ஏதமத்த²ங் ஆரோசேஸி. பி⁴க்கூ² ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, அகாயப³ந்த⁴னேன கா³மோ பவிஸிதப்³போ³. யோ பவிஸெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, காயப³ந்த⁴ன’’ந்தி.
தேன கோ² பன ஸமயேன ச²ப்³ப³க்³கி³யா பி⁴க்கூ² உச்சாவசானி காயப³ந்த⁴னானி தா⁴ரெந்தி – கலாபு³கங், தெ³ட்³டு³ப⁴கங், முரஜங், மத்³த³வீணங். மனுஸ்ஸா உஜ்ஜா²யந்தி கி²ய்யந்தி விபாசெந்தி – ஸெய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, உச்சாவசானி காயப³ந்த⁴னானி தா⁴ரேதப்³பா³னி – கலாபு³கங், தெ³ட்³டு³ப⁴கங், முரஜங், மத்³த³வீணங். யோ தா⁴ரெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, த்³வே காயப³ந்த⁴னானி – பட்டிகங், ஸூகரந்தக’’ந்தி. காயப³ந்த⁴னஸ்ஸ த³ஸா ஜீரந்தி…பே॰… ‘‘அனுஜானாமி, பி⁴க்க²வே, முரஜங் மத்³த³வீண’’ந்தி. காயப³ந்த⁴னஸ்ஸ அந்தோ ஜீரதி…பே॰… ‘‘அனுஜானாமி, பி⁴க்க²வே, ஸோப⁴ணங் கு³ணக’’ந்தி. காயப³ந்த⁴னஸ்ஸ பவனந்தோ ஜீரதி…பே॰… ‘‘அனுஜானாமி, பி⁴க்க²வே, வித⁴’’ந்தி வீத²ந்தி (ஸீ॰ ஸ்யா॰).
தேன கோ² பன ஸமயேன ச²ப்³ப³க்³கி³யா பி⁴க்கூ² உச்சாவசே விதே⁴ தா⁴ரெந்தி ஸோவண்ணமயங் ரூபியமயங். மனுஸ்ஸா உஜ்ஜா²யந்தி கி²ய்யந்தி விபாசெந்தி – ஸெய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, உச்சாவசா விதா⁴ தா⁴ரேதப்³பா³. யோ தா⁴ரெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, அட்டி²மயங்…பே॰… ஸங்க²னாபி⁴மயங் ஸுத்தமய’’ந்தி.
279. தேன கோ² பன ஸமயேன ஆயஸ்மா ஆனந்தோ³ லஹுகா ஸங்கா⁴டியோ பாருபித்வா கா³மங் பிண்டா³ய பாவிஸி. வாதமண்ட³லிகாய ஸங்கா⁴டியோ உக்கி²பியிங்ஸு. அத² கோ² ஆயஸ்மா ஆனந்தோ³ ஆராமங் க³ந்த்வா பி⁴க்கூ²னங் ஏதமத்த²ங் ஆரோசேஸி. பி⁴க்கூ² ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, க³ண்டி²கங் பாஸக’’ந்தி.
தேன கோ² பன ஸமயேன ச²ப்³ப³க்³கி³யா பி⁴க்கூ² உச்சாவசா க³ண்டி²காயோ தா⁴ரெந்தி ஸோவண்ணமயங் ரூபியமயங். மனுஸ்ஸா உஜ்ஜா²யந்தி கி²ய்யந்தி விபாசெந்தி – ஸெய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, உச்சாவசா க³ண்டி²கா தா⁴ரேதப்³பா³. யோ தா⁴ரெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, அட்டி²மயங் த³ந்தமயங் விஸாணமயங் நளமயங் வேளுமயங் கட்ட²மயங் ஜதுமயங் ப²லமயங் லோஹமயங் ஸங்க²னாபி⁴மயங் ஸுத்தமய’’ந்தி.
தேன கோ² பன ஸமயேன பி⁴க்கூ² க³ண்டி²கம்பி பாஸகம்பி சீவரே அப்பெந்தி. சீவரங் ஜீரதி . ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, க³ண்டி²கப²லகங் பாஸகப²லக’’ந்தி. க³ண்டி²கப²லகம்பி பாஸகப²லகம்பி அந்தே அப்பெந்தி. கொட்டோ கோணோ (ஸீ॰ ஸ்யா॰) விவரியதி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, க³ண்டி²கப²லகங் அந்தே அப்பேதுங்; பாஸகப²லகங் ஸத்தங்கு³லங் வா அட்ட²ங்கு³லங் வா ஓகா³ஹெத்வா அப்பேது’’ந்தி.
280. தேன கோ² பன ஸமயேன ச²ப்³ப³க்³கி³யா பி⁴க்கூ² கி³ஹினிவத்த²ங் நிவாஸெந்தி – ஹத்தி²ஸொண்ட³கங், மச்ச²வாளகங், சதுகண்ணகங், தாலவண்டகங், ஸதவலிகங். மனுஸ்ஸா உஜ்ஜா²யந்தி கி²ய்யந்தி விபாசெந்தி – ஸெய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, கி³ஹினிவத்த²ங் நிவாஸேதப்³ப³ங் – ஹத்தி²ஸொண்ட³கங், மச்ச²வாளகங், சதுகண்ணகங், தாலவண்டகங், ஸதவலிகங். யோ நிவாஸெய்ய, ஆபத்தி து³க்கடஸ்ஸா’’தி.
தேன கோ² பன ஸமயேன ச²ப்³ப³க்³கி³யா பி⁴க்கூ² கி³ஹிபாருதங் பாருபந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ஸெய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, கி³ஹிபாருதங் பாருபிதப்³ப³ங். யோ பாருபெய்ய, ஆபத்தி து³க்கடஸ்ஸா’’தி.
தேன கோ² பன ஸமயேன ச²ப்³ப³க்³கி³யா பி⁴க்கூ² ஸங்வேல்லியங் நிவாஸெந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ஸெய்யதா²பி ரஞ்ஞோ முண்ட³வட்டீதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, ஸங்வேல்லியங் நிவாஸேதப்³ப³ங். யோ நிவாஸெய்ய, ஆபத்தி து³க்கடஸ்ஸா’’தி.
281. தேன கோ² பன ஸமயேன ச²ப்³ப³க்³கி³யா பி⁴க்கூ² உப⁴தோகாஜங் ஹரந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ஸெய்யதா²பி ரஞ்ஞோ முண்ட³வட்டீதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, உப⁴தோகாஜங் ஹரிதப்³ப³ங். யோ ஹரெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, ஏகதோகாஜங் அந்தராகாஜங் ஸீஸபா⁴ரங் க²ந்த⁴பா⁴ரங் கடிபா⁴ரங் ஓலம்ப³க’’ந்தி.
282. தேன கோ² பன ஸமயேன பி⁴க்கூ² த³ந்தகட்ட²ங் ந கா²த³ந்தி. முக²ங் து³க்³க³ந்த⁴ங் ஹோதி. ப⁴க³வதோ ஏதமத்த²ங் ஆரோசேஸுங்.
‘‘பஞ்சிமே , பி⁴க்க²வே, ஆதீ³னவா த³ந்தகட்ட²ஸ்ஸ அகா²த³னே. அசக்கு²ஸ்ஸங், முக²ங் து³க்³க³ந்த⁴ங் ஹோதி, ரஸஹரணியோ ந விஸுஜ்ஜ²ந்தி, பித்தங் ஸெம்ஹங் ப⁴த்தங் பரியோனந்த⁴தி, ப⁴த்தமஸ்ஸ நச்சா²தே³தி – இமே கோ², பி⁴க்க²வே, பஞ்ச ஆதீ³னவா த³ந்தகட்ட²ஸ்ஸ அகா²த³னே.
‘‘பஞ்சிமே, பி⁴க்க²வே, ஆனிஸங்ஸா த³ந்தகட்ட²ஸ்ஸ கா²த³னே. சக்கு²ஸ்ஸங், முக²ங் ந து³க்³க³ந்த⁴ங் ஹோதி, ரஸஹரணியோ விஸுஜ்ஜ²ந்தி, பித்தங் ஸெம்ஹங் ப⁴த்தங் ந பரியோனந்த⁴தி, ப⁴த்தமஸ்ஸ சா²தே³தி – இமே கோ², பி⁴க்க²வே, பஞ்ச ஆனிஸங்ஸா த³ந்தகட்ட²ஸ்ஸ கா²த³னே. அனுஜானாமி, பி⁴க்க²வே, த³ந்தகட்ட²’’ந்தி.
தேன கோ² பன ஸமயேன ச²ப்³ப³க்³கி³யா பி⁴க்கூ² தீ³கா⁴னி த³ந்தகட்டா²னி கா²த³ந்தி, தேஹேவ ஸாமணேரங் ஆகோடெந்தி. ப⁴க³வதோ ஏதமத்த²ங் ஆரோசேஸுங். ‘‘ந , பி⁴க்க²வே, தீ³க⁴ங் த³ந்தகட்ட²ங் கா²தி³தப்³ப³ங். யோ கா²தெ³ய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, அட்ட²ங்கு³லபரமங் த³ந்தகட்ட²ங், ந ச தேன ஸாமணேரோ ஆகோடேதப்³போ³. யோ ஆகோடெய்ய, ஆபத்தி து³க்கடஸ்ஸா’’தி.
தேன கோ² பன ஸமயேன அஞ்ஞதரஸ்ஸ பி⁴க்கு²னோ அதிமடாஹகங் த³ந்தகட்ட²ங் கா²த³ந்தஸ்ஸ கண்டே² விலக்³க³ங் ஹோதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, அதிமடாஹகங் த³ந்தகட்ட²ங் கா²தி³தப்³ப³ங். யோ கா²தெ³ய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, சதுரங்கு³லபச்சி²மங் சதுரங்கு³லங் பச்சி²மங் (க॰) த³ந்தகட்ட²’’ந்தி.
283. தேன கோ² பன ஸமயேன ச²ப்³ப³க்³கி³யா பி⁴க்கூ² தா³யங் ஆலிம்பெந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ஸெய்யதா²பி த³வடா³ஹகாதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, தா³யோ ஆலிம்பிதப்³போ³. யோ ஆலிம்பெய்ய, ஆபத்தி து³க்கடஸ்ஸா’’தி.
தேன கோ² பன ஸமயேன விஹாரா திணக³ஹனா ஹொந்தி, த³வடா³ஹே ட³ய்ஹமானே விஹாரா ட³ய்ஹந்தி. பி⁴க்கூ² குக்குச்சாயந்தி படக்³கி³ங் தா³துங், பரித்தங் காதுங். ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, த³வடா³ஹே ட³ய்ஹமானே படக்³கி³ங் தா³துங், பரித்தங் காது’’ந்தி.
284. தேன கோ² பன ஸமயேன ச²ப்³ப³க்³கி³யா பி⁴க்கூ² ருக்க²ங் அபி⁴ருஹந்தி, ருக்கா² ருக்க²ங் ஸங்கமந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ஸெய்யதா²பி மக்கடாதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, ருக்கோ² அபி⁴ருஹிதப்³போ³. யோ அபி⁴ருஹெய்ய, ஆபத்தி து³க்கடஸ்ஸா’’தி.
தேன கோ² பன ஸமயேன அஞ்ஞதரஸ்ஸ பி⁴க்கு²னோ கோஸலேஸு ஜனபதே³ ஸாவத்தி²ங் க³ச்ச²ந்தஸ்ஸ அந்தராமக்³கே³ ஹத்தீ² பரியுட்டா²தி. அத² கோ² ஸோ பி⁴க்கு² ருக்க²மூலங் உபதா⁴வித்வா குக்குச்சாயந்தோ ருக்க²ங் ந அபி⁴ருஹி. ஸோ ஹத்தீ² அஞ்ஞேன அக³மாஸி. அத² கோ² ஸோ பி⁴க்கு² ஸாவத்தி²ங் க³ந்த்வா பி⁴க்கூ²னங் ஏதமத்த²ங் ஆரோசேஸி. பி⁴க்கூ² ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, ஸதி கரணீயே போரிஸங் ருக்க²ங் அபி⁴ருஹிதுங் ஆபதா³ஸு யாவத³த்த²’’ந்தி.
285. தேன கோ² பன ஸமயேன யமேளகேகுடா நாம யமேளுதேகுலா நாம (ஸீ॰), மெட்ட²கோகுட்டா² நாம (ஸ்யா॰) பி⁴க்கூ² த்³வே பா⁴திகா ஹொந்தி ப்³ராஹ்மணஜாதிகா கல்யாணவாசா கல்யாணவாக்கரணா. தே யேன ப⁴க³வா தேனுபஸங்கமிங்ஸு, உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³ங்ஸு. ஏகமந்தங் நிஸின்னா கோ² தே பி⁴க்கூ² ப⁴க³வந்தங் ஏதத³வோசுங் – ‘‘ஏதரஹி, ப⁴ந்தே, பி⁴க்கூ² நானானாமா நானாகொ³த்தா நானாஜச்சா நானாகுலா பப்³ப³ஜிதா. தே ஸகாய நிருத்தியா பு³த்³த⁴வசனங் தூ³ஸெந்தி. ஹந்த³ மயங், ப⁴ந்தே, பு³த்³த⁴வசனங் ச²ந்த³ஸோ ஆரோபேமா’’தி. விக³ரஹி பு³த்³தோ⁴ ப⁴க³வா…பே॰… ‘‘கத²ஞ்ஹி நாம தும்ஹே, மோக⁴புரிஸா, ஏவங் வக்க²த² – ‘ஹந்த³ மயங், ப⁴ந்தே, பு³த்³த⁴வசனங் ச²ந்த³ஸோ ஆரோபேமா’தி. நேதங், மோக⁴புரிஸா, அப்பஸன்னானங் வா பஸாதா³ய…பே॰… விக³ரஹித்வா…பே॰… த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘ந, பி⁴க்க²வே, பு³த்³த⁴வசனங் ச²ந்த³ஸோ ஆரோபேதப்³ப³ங். யோ ஆரோபெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, ஸகாய நிருத்தியா பு³த்³த⁴வசனங் பரியாபுணிது’’ந்தி.
286. தேன கோ² பன ஸமயேன ச²ப்³ப³க்³கி³யா பி⁴க்கூ² லோகாயதங் பரியாபுணந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ஸெய்யதா²பி கி³ஹீ காமபோ⁴கி³னோதி. அஸ்ஸோஸுங் கோ² பி⁴க்கூ² தேஸங் மனுஸ்ஸானங் உஜ்ஜா²யந்தானங் கி²ய்யந்தானங் விபாசெந்தானங். அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங். ‘‘அபி நு கோ², பி⁴க்க²வே, லோகாயதே ஸாரத³ஸ்ஸாவீ இமஸ்மிங் த⁴ம்மவினயே வுத்³தி⁴ங் விருள்ஹிங் வேபுல்லங் ஆபஜ்ஜெய்யா’’தி? ‘‘நோஹேதங் ப⁴ந்தே’’. ‘‘இமஸ்மிங் வா பன த⁴ம்மவினயே ஸாரத³ஸ்ஸாவீ லோகாயதங் பரியாபுணெய்யா’’தி? ‘‘நோஹேதங் ப⁴ந்தே’’. ‘‘ந, பி⁴க்க²வே, லோகாயதங் பரியாபுணிதப்³ப³ங். யோ பரியாபுணெய்ய, ஆபத்தி து³க்கடஸ்ஸா’’தி.
தேன கோ² பன ஸமயேன ச²ப்³ப³க்³கி³யா பி⁴க்கூ² லோகாயதங் வாசெந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ஸெய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, லோகாயதங் வாசேதப்³ப³ங். யோ வாசெய்ய, ஆபத்தி து³க்கடஸ்ஸா’’தி.
287. தேன கோ² பன ஸமயேன ச²ப்³ப³க்³கி³யா பி⁴க்கூ² திரச்சா²னவிஜ்ஜங் பரியாபுணந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ஸெய்யதா²பி கி³ஹீ காமபோ⁴கி³னோதி . ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, திரச்சா²னவிஜ்ஜா பரியாபுணிதப்³பா³. யோ பரியாபுணெய்ய, ஆபத்தி து³க்கடஸ்ஸா’’தி.
தேன கோ² பன ஸமயேன ச²ப்³ப³க்³கி³யா பி⁴க்கூ² திரச்சா²னவிஜ்ஜங் வாசெந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ஸெய்யதா²பி கி³ஹீ காமபோ⁴கி³னோதி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, திரச்சா²னவிஜ்ஜா வாசேதப்³பா³. யோ வாசெய்ய, ஆபத்தி து³க்கடஸ்ஸா’’தி.
288. தேன கோ² பன ஸமயேன ப⁴க³வா மஹதியா பரிஸாய பரிவுதோ த⁴ம்மங் தே³ஸெந்தோ கி²பி. பி⁴க்கூ² – ‘ஜீவது, ப⁴ந்தே, ப⁴க³வா; ஜீவது ஸுக³தோ’தி – உச்சாஸத்³த³ங் மஹாஸத்³த³ங் அகங்ஸு. தேன ஸத்³தே³ன த⁴ம்மகதா² அந்தரா அஹோஸி. அத² கோ² ப⁴க³வா பி⁴க்கூ² ஆமந்தேஸி – ‘‘அபி நு கோ², பி⁴க்க²வே, கி²பிதே ‘ஜீவா’தி வுத்தோ வுத்தே (க॰) தப்பச்சயா ஜீவெய்ய வா மரெய்ய வா’’தி? ‘‘நோஹேதங் ப⁴ந்தே’’. ‘‘ந, பி⁴க்க²வே, கி²பிதே ‘ஜீவா’தி வத்தப்³போ³. யோ வதெ³ய்ய, ஆபத்தி து³க்கடஸ்ஸா’’தி.
தேன கோ² பன ஸமயேன மனுஸ்ஸா பி⁴க்கூ²னங் கி²பிதே ‘ஜீவத² ப⁴ந்தே’தி வத³ந்தி. பி⁴க்கூ² குக்குச்சாயந்தா நாலபந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஸமணா ஸக்யபுத்தியா ‘ஜீவத² ப⁴ந்தே’தி வுச்சமானா நாலபிஸ்ஸந்தீ’’தி! ப⁴க³வதோ ஏதமத்த²ங் ஆரோசேஸுங். ‘‘கி³ஹீ, பி⁴க்க²வே, மங்க³லிகா. அனுஜானாமி, பி⁴க்க²வே, கி³ஹீனங் ‘ஜீவத² ப⁴ந்தே’தி வுச்சமானேன ‘சிரங் ஜீவா’தி வத்து’’ந்தி.
289. தேன கோ² பன ஸமயேன ப⁴க³வா மஹதியா பரிஸாய பரிவுதோ த⁴ம்மங் தே³ஸெந்தோ நிஸின்னோ ஹோதி. அஞ்ஞதரேன பி⁴க்கு²னா லஸுணங் கா²யிதங் ஹோதி. ஸோ – மா பி⁴க்கூ² ப்³யாபா³தி⁴ங்ஸூதி – ஏகமந்தங் நிஸீதி³. அத்³த³ஸா கோ² ப⁴க³வா தங் பி⁴க்கு²ங் ஏகமந்தங் நிஸின்னங். தி³ஸ்வான பி⁴க்கூ² ஆமந்தேஸி – ‘‘கிங் நு கோ² ஸோ, பி⁴க்க²வே, பி⁴க்கு² ஏகமந்தங் நிஸின்னோ’’தி ? ‘‘ஏதேன, ப⁴ந்தே, பி⁴க்கு²னா லஸுணங் கா²யிதங். ஸோ – மா பி⁴க்கூ² ப்³யாபா³தி⁴ங்ஸூதி – ஏகமந்தங் நிஸின்னோ’’தி. ‘‘அபி நு கோ², பி⁴க்க²வே பி⁴க்க²வே பி⁴க்கு²னா (ஸ்யா॰), தங் கா²தி³தப்³ப³ங், யங் கா²தி³த்வா ஏவரூபாய த⁴ம்மகதா²ய பரிபா³ஹியோ அஸ்ஸா’’தி? ‘‘நோஹேதங் ப⁴ந்தே’’. ‘‘ந, பி⁴க்க²வே, லஸுணங் கா²தி³தப்³ப³ங். யோ கா²தெ³ய்ய, ஆபத்தி து³க்கடஸ்ஸா’’தி.
தேன கோ² பன ஸமயேன ஆயஸ்மதோ ஸாரிபுத்தஸ்ஸ உத³ரவாதாபா³தோ⁴ ஹோதி. அத² கோ² ஆயஸ்மா மஹாமொக்³க³ல்லானோ யேனாயஸ்மா ஸாரிபுத்தோ தேனுபஸங்கமி, உபஸங்கமித்வா ஆயஸ்மந்தங் ஸாரிபுத்தங் ஏதத³வோச – ‘‘புப்³பே³ தே, ஆவுஸோ ஸாரிபுத்த, உத³ரவாதாபா³தோ⁴ கேன பா²ஸு ஹோதீ’’தி? ‘‘லஸுணேன மே, ஆவுஸோ’’தி அத² கோ² ஆயஸ்மா ஸாரிபுத்தோ ஆயஸ்மந்தங் மஹாமொக்³க³ல்லானங் ஏதத³வோச ‘‘புப்³பே³ கோ² மே ஆவுஸோ மொக்³க³ல்லான உத³ரவாதாபா³தோ⁴ லஸுணேன பா²ஸு ஹோதீ’’தி (க॰). ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, ஆபா³த⁴ப்பச்சயா லஸுணங் கா²தி³து’’ந்தி.
290. தேன கோ² பன ஸமயேன பி⁴க்கூ² ஆராமே தஹங் தஹங் பஸ்ஸாவங் கரொந்தி. ஆராமோ து³ஸ்ஸதி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, ஏகமந்தங் பஸ்ஸாவங் காது’’ந்தி . ஆராமோ து³க்³க³ந்தோ⁴ ஹோதி…பே॰… ‘‘அனுஜானாமி, பி⁴க்க²வே, பஸ்ஸாவகும்பி⁴’’ந்தி. து³க்க²ங் நிஸின்னா பஸ்ஸாவங் கரொந்தி…பே॰… ‘‘அனுஜானாமி, பி⁴க்க²வே, பஸ்ஸாவபாது³க’’ந்தி. பஸ்ஸாவபாது³கா பாகடா ஹொந்தி. பி⁴க்கூ² ஹிரியந்தி பஸ்ஸாவங் காதுங்…பே॰… ‘‘அனுஜானாமி, பி⁴க்க²வே, பரிக்கி²பிதுங் தயோ பாகாரே – இட்ட²காபாகாரங், ஸிலாபாகாரங், தா³ருபாகார’’ந்தி. பஸ்ஸாவகும்பீ⁴ அபாருதா து³க்³க³ந்தா⁴ ஹோதி…பே॰… ‘‘அனுஜானாமி, பி⁴க்க²வே, அபிதா⁴ன’’ந்தி.
291. தேன கோ² பன ஸமயேன பி⁴க்கூ² ஆராமே தஹங் தஹங் வச்சங் கரொந்தி. ஆராமோ து³ஸ்ஸதி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி , பி⁴க்க²வே, ஏகமந்தங் வச்சங் காது’’ந்தி. ஆராமோ து³க்³க³ந்தோ⁴ ஹோதி…பே॰… ‘‘அனுஜானாமி, பி⁴க்க²வே, வச்சகூப’’ந்தி. வச்சகூபஸ்ஸ கூலங் லுஜ்ஜதி…பே॰… ‘‘அனுஜானாமி, பி⁴க்க²வே, சினிதுங் தயோ சயே – இட்ட²காசயங், ஸிலாசயங், தா³ருசய’’ந்தி. வச்சகூபோ நீசவத்து²கோ ஹோதி, உத³கேன ஒத்த²ரிய்யதி…பே॰… ‘‘அனுஜானாமி, பி⁴க்க²வே, உச்சவத்து²கங் காது’’ந்தி. சயோ பரிபததி…பே॰… ‘‘அனுஜானாமி, பி⁴க்க²வே, சினிதுங் தயோ சயே – இட்ட²காசயங், ஸிலாசயங், தா³ருசய’’ந்தி. ஆரோஹந்தா விஹஞ்ஞந்தி…பே॰… ‘‘அனுஜானாமி, பி⁴க்க²வே, தயோ ஸோபானே – இட்ட²காஸோபானங், ஸிலாஸோபானங், தா³ருஸோபான’’ந்தி. ஆரோஹந்தா பரிபதந்தி…பே॰… ‘‘அனுஜானாமி, பி⁴க்க²வே, ஆலம்ப³னபா³ஹ’’ந்தி. அந்தே நிஸின்னா வச்சங் கரொந்தா பரிபதந்தி…பே॰… ‘‘அனுஜானாமி, பி⁴க்க²வே, ஸந்த²ரித்வா மஜ்ஜே² சி²த்³த³ங் கத்வா வச்சங் காது’’ந்தி . து³க்க²ங் நிஸின்னா வச்சங் கரொந்தி…பே॰… ‘‘அனுஜானாமி, பி⁴க்க²வே, வச்சபாது³க’’ந்தி. ப³ஹித்³தா⁴ பஸ்ஸாவங் கரொந்தி…பே॰… ‘‘அனுஜானாமி, பி⁴க்க²வே, பஸ்ஸாவதோ³ணிக’’ந்தி. அவலேக²னகட்ட²ங் ந ஹோதி…பே॰… ‘‘அனுஜானாமி, பி⁴க்க²வே, அவலேக²னகட்ட²’’ந்தி. அவலேக²னபிட²ரோ ந ஹோதி…பே॰… ‘‘அனுஜானாமி, பி⁴க்க²வே, அவலேக²னபிட²ர’’ந்தி. வச்சகூபோ அபாருதோ து³க்³க³ந்தோ⁴ ஹோதி…பே॰… ‘‘அனுஜானாமி, பி⁴க்க²வே, அபிதா⁴ன’’ந்தி. அஜ்ஜோ²காஸே வச்சங் கரொந்தா ஸீதேனபி உண்ஹேனபி கிலமந்தி…பே॰… ‘‘அனுஜானாமி, பி⁴க்க²வே, வச்சகுடி’’ந்தி. வச்சகுடியா கவாடங் ந ஹோதி…பே॰… ‘‘அனுஜானாமி, பி⁴க்க²வே, கவாடங் பிட்ட²ஸங்கா⁴டங் உது³க்க²லிகங் உத்தரபாஸகங் அக்³க³ளவட்டிங் கபிஸீஸகங் ஸூசிகங் க⁴டிகங் தாளச்சி²த்³த³ங் ஆவிஞ்ச²னச்சி²த்³த³ங் ஆவிஞ்ச²னரஜ்ஜு’’ந்தி. வச்சகுடியா திணசுண்ணங் பரிபததி…பே॰… ‘‘அனுஜானாமி, பி⁴க்க²வே, ஓகு³ம்பெ²த்வா உல்லித்தாவலித்தங் காதுங் – ஸேதவண்ணங் காளவண்ணங் கே³ருகபரிகம்மங் மாலாகம்மங் லதாகம்மங் மகரத³ந்தகங் பஞ்சபடிகங் சீவரவங்ஸங் சீவரரஜ்ஜு’’ந்தி.
292. தேன கோ² பன ஸமயேன அஞ்ஞதரோ பி⁴க்கு² ஜராது³ப்³ப³லோ வச்சங் கத்வா வுட்ட²ஹந்தோ பரிபததி. ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, ஓலம்ப³க’’ந்தி. வச்சகுடி அபரிக்கி²த்தா ஹோதி…பே॰… ‘‘அனுஜானாமி, பி⁴க்க²வே, பரிக்கி²பிதுங் தயோ பாகாரே – இட்ட²காபாகாரங், ஸிலாபாகாரங், தா³ருபாகார’’ந்தி. கொட்ட²கோ ந ஹோதி…பே॰… (‘‘அனுஜானாமி, பி⁴க்க²வே, கொட்ட²க’’ந்தி. கொட்ட²கஸ்ஸ கவாடங் ந ஹோதி) (அனுஜானாமி பி⁴க்க²வே கொட்ட²கந்தி. கொட்ட²கோ நீசவத்து²கோ ஹோதி…பே॰… அனுஜானாமி பி⁴க்க²வே உச்சவத்து²கங் காதுந்தி. சயோ பரிபததி…பே॰… அனுஜானாமி பி⁴க்க²வே சினிதுங் தயோ சயே இட்ட²காசயங் ஸிலாசயங் தா³ருசயந்தி. ஆரோஹந்தா விஹஞ்ஞந்தி…பே॰… அனுஜானாமி பி⁴க்க²வே தயோ ஸோபானே இட்ட²காஸோபானங் ஸிலாஸோபானங் தா³ருஸோபானந்தி. ஆரோஹந்தா பரிபதந்தி…பே॰… அனுஜானாமி பி⁴க்க²வே ஆலம்ப³னபா³ஹந்தி. கொட்ட²கஸ்ஸ கவாடங் ந ஹோதி.) (ஸ்யா॰ கங்॰) …பே॰… ‘‘அனுஜானாமி, பி⁴க்க²வே, கவாடங் பிட்ட²ஸங்கா⁴டங் உது³க்க²லிகங் உத்தரபாஸகங் அக்³க³ளவட்டிங் கபிஸீஸகங் ஸூசிகங் க⁴டிகங் தாளச்சி²த்³த³ங் ஆவிஞ்ச²னச்சி²த்³த³ங் ஆவிஞ்ச²னரஜ்ஜு’’ந்தி. கொட்ட²கே திணசுண்ணங் பரிபததி…பே॰… ‘‘அனுஜானாமி, பி⁴க்க²வே, ஓகு³ம்பெ²த்வா உல்லித்தாவலித்தங் காதுங் – ஸேதவண்ணங் காளவண்ணங் கே³ருகபரிகம்மங் மாலாகம்மங் லதாகம்மங் மகரத³ந்தகங் பஞ்சபடிக’’ந்தி. பரிவேணங் சிக்க²ல்லங் ஹோதி…பே॰… ‘‘அனுஜானாமி, பி⁴க்க²வே, மரும்ப³ங் பகிரிது’’ந்தி. ந பரியாபுணந்தி…பே॰… ‘‘அனுஜானாமி, பி⁴க்க²வே, பத³ரஸிலங் பட்டஸிலங் (க॰) நிக்கி²பிது’’ந்தி. உத³கங் ஸந்திட்ட²தி…பே॰… ‘‘அனுஜானாமி, பி⁴க்க²வே, உத³கனித்³த⁴மன’’ந்தி. ஆசமனகும்பீ⁴ ந ஹோதி…பே॰… ‘‘அனுஜானாமி, பி⁴க்க²வே, ஆசமனகும்பி⁴’’ந்தி. ஆசமனஸராவகோ ந ஹோதி…பே॰… ‘‘அனுஜானாமி, பி⁴க்க²வே, ஆசமனஸராவக’’ந்தி. து³க்க²ங் நிஸின்னா ஆசமெந்தி…பே॰… ‘‘அனுஜானாமி, பி⁴க்க²வே, ஆசமனபாது³க’’ந்தி. ஆசமனபாது³கா பாகடா ஹொந்தி, பி⁴க்கூ² ஹிரியந்தி ஆசமேதுங்…பே॰… ‘‘அனுஜானாமி, பி⁴க்க²வே, பரிக்கி²பிதுங் தயோ பாகாரே – இட்ட²காபாகாரங், ஸிலாபாகாரங், தா³ருபாகார’’ந்தி. ஆசமனகும்பீ⁴ அபாருதா ஹோதி, திணசுண்ணேஹிபி பங்ஸுகேஹிபி ஓகிரிய்யதி…பே॰… ‘‘அனுஜானாமி, பி⁴க்க²வே, அபிதா⁴ன’’ந்தி.
293. தேன கோ² பன ஸமயேன ச²ப்³ப³க்³கி³யா பி⁴க்கூ² ஏவரூபங் அனாசாரங் ஆசரந்தி – மாலாவச்ச²ங் ரோபெந்திபி ரோபாபெந்திபி, ஸிஞ்சந்திபி ஸிஞ்சாபெந்திபி, ஓசினந்திபி ஓசினாபெந்திபி, க³ந்தெ²ந்திபி க³ந்தா²பெந்திபி, ஏகதோவண்டிகமாலங் கரொந்திபி காராபெந்திபி, உப⁴தோவண்டிகமாலங் கரொந்திபி காராபெந்திபி, மஞ்ஜரிகங் கரொந்திபி காராபெந்திபி, விதூ⁴திகங் கரொந்திபி காராபெந்திபி, வடங்ஸகங் கரொந்திபி காராபெந்திபி, ஆவேளங் கரொந்திபி காராபெந்திபி, உரச்ச²த³ங் கரொந்திபி காராபெந்திபி. தே குலித்தீ²னங் குலதீ⁴தானங் குலகுமாரீனங் குலஸுண்ஹானங் குலதா³ஸீனங் ஏகதோவண்டிகமாலங் ஹரந்திபி ஹராபெந்திபி, உப⁴தோவண்டிகமாலங் ஹரந்திபி ஹராபெந்திபி, மஞ்ஜரிகங் ஹரந்திபி ஹராபெந்திபி, விதூ⁴திகங் ஹரந்திபி ஹராபெந்திபி, வடங்ஸகங் ஹரந்திபி ஹராபெந்திபி, ஆவேளங் ஹரந்திபி ஹராபெந்திபி, உரச்ச²த³ங் ஹரந்திபி ஹராபெந்திபி. தே குலித்தீ²ஹி குலதீ⁴தாஹி குலகுமாரீஹி குலஸுண்ஹாஹி குலதா³ஸீஹி ஸத்³தி⁴ங் ஏகபா⁴ஜனேபி பு⁴ஞ்ஜந்தி, ஏகதா²லகேபி பிவந்தி, ஏகாஸனேபி நிஸீத³ந்தி, ஏகமஞ்சேபி துவட்டெந்தி, ஏகத்த²ரணாபி துவட்டெந்தி, ஏகபாவுரணாபி துவட்டெந்தி, ஏகத்த²ரணபாவுரணாபி துவட்டெந்தி, விகாலேபி பு⁴ஞ்ஜந்தி, மஜ்ஜம்பி பிவந்தி, மாலாக³ந்த⁴விலேபனம்பி தா⁴ரெந்தி, நச்சந்திபி, கா³யந்திபி, வாதெ³ந்திபி, லாஸெந்திபி; நச்சந்தியாபி நச்சந்தி, நச்சந்தியாபி கா³யந்தி, நச்சந்தியாபி வாதெ³ந்தி, நச்சந்தியாபி லாஸெந்தி…பே॰… லாஸெந்தியாபி நச்சந்தி, லாஸெந்தியாபி கா³யந்தி, லாஸெந்தியாபி வாதெ³ந்தி, லாஸெந்தியாபி லாஸெந்தி; அட்ட²பதே³பி கீளந்தி, த³ஸபதே³பி கீளந்தி, ஆகாஸேபி கீளந்தி, பரிஹாரபதே²பி கீளந்தி, ஸந்திகாயபி கீளந்தி, க²லிகாயபி கீளந்தி, க⁴டிகாயபி கீளந்தி, ஸலாகஹத்தே²னபி கீளந்தி, அக்கே²னபி கீளந்தி, பங்க³சீரேனபி கீளந்தி, வங்ககேனபி கீளந்தி, மொக்க²சிகாயபி கீளந்தி, சிங்கு³லகேனபி கீளந்தி, பத்தாள்ஹகேனபி கீளந்தி, ரத²கேனபி கீளந்தி, த⁴னுகேனபி கீளந்தி , அக்க²ரிகாயபி கீளந்தி, மனேஸிகாயபி கீளந்தி, யதா²வஜ்ஜேனபி கீளந்தி; ஹத்தி²ஸ்மிம்பி ஸிக்க²ந்தி, அஸ்ஸஸ்மிம்பி ஸிக்க²ந்தி, ரத²ஸ்மிம்பி ஸிக்க²ந்தி, த⁴னுஸ்மிம்பி ஸிக்க²ந்தி; த²ருஸ்மிம்பி ஸிக்க²ந்தி; ஹத்தி²ஸ்ஸபி புரதோ தா⁴வந்தி, அஸ்ஸஸ்ஸபி புரதோ தா⁴வந்தி, ரத²ஸ்ஸபி புரதோ தா⁴வந்திபி ஆதா⁴வந்திபி; உஸ்ஸேளெந்திபி, அப்போ²டெந்திபி, நிப்³பு³ஜ்ஜ²ந்திபி, முட்டீ²ஹிபி யுஜ்ஜ²ந்தி; ரங்க³மஜ்ஜே²பி ஸங்கா⁴டிங் பத்த²ரித்வா நச்சகிங் ஏவங் வத³ந்தி – ‘‘இத⁴, ப⁴கி³னி, நச்சஸ்ஸூ’’தி; நலாடிகம்பி தெ³ந்தி; விவித⁴ம்பி அனாசாரங் ஆசரந்தி. ப⁴க³வதோ ஏதமத்த²ங் ஆரோசேஸுங்…பே॰… ‘‘ந, பி⁴க்க²வே, விவித⁴ங் அனாசாரங் ஆசரிதப்³ப³ங். யோ ஆசரெய்ய, யதா²த⁴ம்மோ காரேதப்³போ³’’தி.
தேன கோ² பன ஸமயேன ஆயஸ்மந்தே உருவேலகஸ்ஸபே பப்³ப³ஜிதே ஸங்க⁴ஸ்ஸ ப³ஹுங் லோஹப⁴ண்ட³ங் தா³ருப⁴ண்ட³ங் மத்திகாப⁴ண்ட³ங் உப்பன்னங் ஹோதி. அத² கோ² பி⁴க்கூ²னங் ஏதத³ஹோஸி – ‘‘கிங் நு கோ² ப⁴க³வதா லோஹப⁴ண்ட³ங் அனுஞ்ஞாதங், கிங் அனநுஞ்ஞாதங்; கிங் தா³ருப⁴ண்ட³ங் அனுஞ்ஞாதங், கிங் அனநுஞ்ஞாதங்; கிங் மத்திகாப⁴ண்ட³ங் அனுஞ்ஞாதங், கிங் அனநுஞ்ஞாத’’ந்தி? ப⁴க³வதோ ஏதமத்த²ங் ஆரோசேஸுங். அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, ட²பெத்வா பஹரணிங் ஸப்³ப³ங் லோஹப⁴ண்ட³ங், ட²பெத்வா ஆஸந்தி³ங் பல்லங்கங் தா³ருபத்தங் தா³ருபாது³கங் ஸப்³ப³ங் தா³ருப⁴ண்ட³ங், ட²பெத்வா கதகஞ்ச கும்ப⁴காரிகஞ்ச ஸப்³ப³ங் மத்திகாப⁴ண்ட³’’ந்தி.
கு²த்³த³கவத்து²க்க²ந்த⁴கோ பஞ்சமோ.
தஸ்ஸுத்³தா³னங் –
ருக்கே² த²ம்பே⁴ ச குட்டே ச, அட்டானே க³ந்த⁴ஸுத்தியா;
விக³ய்ஹ மல்லகோ கச்சு², ஜரா ச புது²பாணிகா.
வல்லிகாபி ச பாமங்கோ³, கண்ட²ஸுத்தங் ந தா⁴ரயே;
கடி ஓவட்டி காயுரங், ஹத்தா²ப⁴ரணமுத்³தி³கா.
தீ³கே⁴ கொச்சே² ப²ணே ஹத்தே², ஸித்தா² உத³கதேலகே;
ஆதா³ஸுத³பத்தவணா, ஆலேபொம்மத்³த³சுண்ணனா.
லஞ்செ²ந்தி அங்க³ராக³ஞ்ச, முக²ராக³ங் ததூ³ப⁴யங்;
சக்கு²ரோக³ங் கி³ரக்³க³ஞ்ச, ஆயதங் ஸரபா³ஹிரங்.
அம்ப³பேஸிஸகலேஹி, அஹிச்சி²ந்தி³ ச சந்த³னங்;
உச்சாவசா பத்தமூலா, ஸுவண்ணோ ப³ஹலா வலீ.
சித்ரா து³ஸ்ஸதி து³க்³க³ந்தோ⁴, உண்ஹே பி⁴ஜ்ஜிங்ஸு மிட்³டி⁴யா;
பரிப⁴ண்ட³ங் திணங் சோளங், மாலங் குண்டோ³லிகாய ச.
த²விகா அங்ஸப³த்³த⁴ஞ்ச, ததா² ப³ந்த⁴னஸுத்தகா;
கி²லே மஞ்சே ச பீடே² ச, அங்கே ச²த்தே பணாமனா.
தும்ப³க⁴டிச²வஸீஸங், சலகானி படிக்³க³ஹோ;
விப்பா²லித³ண்ட³ஸோவண்ணங், பத்தே பேஸி ச நாளிகா.
கிண்ணஸத்து ஸரிதஞ்ச, மது⁴ஸித்த²ங் ஸிபாடிகங்;
விகண்ணங் ப³ந்தி⁴விஸமங், ச²மாஜிரபஹோதி ச.
களிம்ப⁴ங் மோக⁴ஸுத்தஞ்ச, அதோ⁴தல்லங் உபாஹனா;
அங்கு³லே படிக்³க³ஹஞ்ச, வித்த²கங் த²விகப³த்³த⁴கா.
அஜ்ஜோ²காஸே நீசவத்து², சயோ சாபி விஹஞ்ஞரே;
பரிபதி திணசுண்ணங், உல்லித்தஅவலித்தகங்.
ஸேதங் காளகவண்ணஞ்ச, பரிகம்மஞ்ச கே³ருகங்;
மாலாகம்மங் லதாகம்மங், மகரத³ந்தகபாடிகங்.
சீவரவங்ஸங் ரஜ்ஜுஞ்ச, அனுஞ்ஞாஸி வினாயகோ;
உஜ்ஜி²த்வா பக்கமந்தி ச, கதி²னங் பரிபி⁴ஜ்ஜதி.
வினிவேடி²யதி குட்டேபி, பத்தேனாதா³ய க³ச்ச²ரே;
த²விகா ப³ந்த⁴ஸுத்தஞ்ச, ப³ந்தி⁴த்வா ச உபாஹனா.
உபாஹனத்த²விகஞ்ச, அங்ஸப³த்³த⁴ஞ்ச ஸுத்தகங்;
உத³காகப்பியங் மக்³கே³, பரிஸ்ஸாவனசோளகங்.
த⁴ம்மகரணங் த்³வே பி⁴க்கூ², வேஸாலிங் அக³மா முனி;
த³ண்ட³ங் ஒத்த²ரகங் தத்த², அனுஞ்ஞாஸி பரிஸ்ஸாவனங்.
மகஸேஹி பணீதேன, ப³ஹ்வாபா³தா⁴ ச ஜீவகோ;
சங்கமனஜந்தாக⁴ரங் , விஸமே நீசவத்து²கோ.
தயோ சயே விஹஞ்ஞந்தி, ஸோபானாலம்ப³வேதி³கங்;
அஜ்ஜோ²காஸே திணசுண்ணங், உல்லித்தஅவலித்தகங்.
ஸேதகங் காளவண்ணஞ்ச, பரிகம்மஞ்ச கே³ருகங்;
மாலாகம்மங் லதாகம்மங், மகரத³ந்தகபாடிகங்.
வங்ஸங் சீவரரஜ்ஜுஞ்ச, உச்சஞ்ச வத்து²கங் கரே;
சயோ ஸோபானபா³ஹஞ்ச, கவாடங் பிட்ட²ஸங்கா⁴டங்.
உது³க்க²லுத்தரபாஸகங், வட்டிஞ்ச கபிஸீஸகங்;
ஸூசிக⁴டிதாளச்சி²த்³த³ங், ஆவிஞ்ச²னஞ்ச ரஜ்ஜுகங்.
மண்ட³லங் தூ⁴மனெத்தஞ்ச, மஜ்ஜே² ச முக²மத்திகா;
தோ³ணி து³க்³க³ந்தா⁴ த³ஹதி, உத³கட்டா²னங் ஸராவகங்.
ந ஸேதே³தி ச சிக்க²ல்லங், தோ⁴வி நித்³த⁴மனங் கரே;
பீட²ஞ்ச கொட்ட²கே கம்மங், மரும்பா³ ஸிலா நித்³த⁴மனங்.
நக்³கா³ ச²மாய வஸ்ஸந்தே, படிச்சா²தீ³ தயோ தஹிங்;
உத³பானங் லுஜ்ஜதி நீசங், வல்லியா காயப³ந்த⁴னே.
துலங் கடகடங் சக்கங், ப³ஹூ பி⁴ஜ்ஜந்தி பா⁴ஜனா;
லோஹதா³ருசம்மக²ண்ட³ங், ஸாலாதிணாபிதா⁴னி ச.
தோ³ணிசந்த³னி பாகாரங், சிக்க²ல்லங் நித்³த⁴மனேன ச;
ஸீதிக³தங் பொக்க²ரணிங், புராணஞ்ச நில்லேக²ணங்.
சாதுமாஸங் ஸயந்தி ச, நமதகஞ்ச க³ந்த⁴புப்ப²ங் (ஸ்யா॰) நதி⁴ட்ட²ஹே;
ஆஸித்தகங் மளோரிகங், பு⁴ஞ்ஜந்தேகங் துவட்டெய்யுங்.
வட்³டோ⁴ போ³தி⁴ ந அக்கமி, க⁴டங் கதகஸம்மஜ்ஜனி;
ஸக்க²ரங் கத²லஞ்சேவ, பே²ணகங் பாத³க⁴ங்ஸனீ.
விதூ⁴பனங் தாலவண்டங், மகஸஞ்சாபி சாமரீ;
ச²த்தங் வினா ச ஆராமே, தயோ ஸிக்காய ஸம்முதி.
ரோமஸித்தா² நகா² தீ³கா⁴, சி²ந்த³ந்தங்கு³லிகா து³க்கா²;
ஸலோஹிதங் பமாணஞ்ச, வீஸதி தீ³க⁴கேஸதா.
கு²ரங் ஸிலங் ஸிபாடிகங், நமதகங் கு²ரப⁴ண்ட³கங்;
மஸ்ஸுங் கப்பெந்தி வட்³டெ⁴ந்தி, கோ³லோமிசதுரஸ்ஸகங்.
பரிமுக²ங் அட்³ட⁴து³கஞ்ச, தா³டி²ஸம்பா³த⁴ஸங்ஹரே;
ஆபா³தா⁴ கத்தரிவணோ, தீ³க⁴ங் ஸக்க²ரிகாய ச.
பலிதங் த²கிதங் உச்சா, லோஹப⁴ண்ட³ஞ்ஜனீ ஸஹ;
பல்லத்தி²கஞ்ச ஆயோகோ³, வடங் ஸலாகப³ந்த⁴னங்.
கலாபு³கங் தெ³ட்³டு³ப⁴கங், முரஜங் மத்³த³வீணகங்;
பட்டிகா ஸூகரந்தஞ்ச, த³ஸா முரஜவேணிகா;
அந்தோ ஸோப⁴ங் கு³ணகஞ்ச, பவனந்தோபி ஜீரதி.
க³ண்டி²கா உச்சாவசஞ்ச, ப²லகந்தேபி ஓகா³ஹே;
கி³ஹிவத்த²ங் ஹத்தி²ஸொண்ட³ங், மச்ச²கங் சதுகண்ணகங்.
தாலவண்டங் ஸதவலி, கி³ஹிபாருதபாருபங்;
ஸங்வேல்லி உப⁴தோகாஜங், த³ந்தகட்ட²ங் ஆகோடனே.
கண்டே² விலக்³க³ங் தா³யஞ்ச, படக்³கி³ ருக்க²ஹத்தி²னா;
யமேளே லோகாயதகங், பரியாபுணிங்ஸு வாசயுங்.
திரச்சா²னகதா² விஜ்ஜா, கி²பி மங்க³லங் கா²தி³ ச;
வாதாபா³தோ⁴ து³ஸ்ஸதி ச, து³க்³க³ந்தோ⁴ து³க்க²பாது³கா.
ஹிரியந்தி பாருது³க்³க³ந்தோ⁴, தஹங் தஹங் கரொந்தி ச;
து³க்³க³ந்தோ⁴ கூபங் லுஜ்ஜந்தி, உச்சவத்து² சயேன ச.
ஸோபானாலம்ப³னபா³ஹா அந்தே, து³க்க²ஞ்ச பாது³கா;
ப³ஹித்³தா⁴ தோ³ணி கட்ட²ஞ்ச, பிட²ரோ ச அபாருதோ.
வச்சகுடிங் கவாடஞ்ச, பிட்ட²ஸங்கா⁴டமேவ ச;
உது³க்க²லுத்தரபாஸோ, வட்டிஞ்ச கபிஸீஸகங்.
ஸூசிக⁴டிதாளச்சி²த்³த³ங், ஆவிஞ்ச²னச்சி²த்³த³மேவ ச;
ரஜ்ஜு உல்லித்தாவலித்தங், ஸேதவண்ணஞ்ச காளகங்.
மாலாகம்மங் லதாகம்மங், மகரங் பஞ்சபடிகங்;
சீவரவங்ஸங் ரஜ்ஜுஞ்ச, ஜராது³ப்³ப³லபாகாரங்.
கொட்ட²கே சாபி ததே²வ, மரும்ப³ங் பத³ரஸிலா;
ஸந்திட்ட²தி நித்³த⁴மனங், கும்பி⁴ஞ்சாபி ஸராவகங்.
து³க்க²ங் ஹிரி அபிதா⁴னங், அனாசாரஞ்ச ஆசருங்;
லோஹப⁴ண்ட³ங் அனுஞ்ஞாஸி, ட²பயித்வா பஹரணிங்.
ட²பயித்வா ஸந்தி³பல்லங்கங், தா³ருபத்தஞ்ச பாது³கங்;
ஸப்³ப³ங் தா³ருமயங் ப⁴ண்ட³ங், அனுஞ்ஞாஸி மஹாமுனி.
கதகங் கும்ப⁴காரஞ்ச, ட²பயித்வா ததா²க³தோ;
ஸப்³ப³ம்பி மத்திகாப⁴ண்ட³ங், அனுஞ்ஞாஸி அனுகம்பகோ.
யஸ்ஸ வத்து²ஸ்ஸ நித்³தே³ஸோ, புரிமேன யதி³ ஸமங்;
தம்பி ஸங்கி²த்தங் உத்³தா³னே, நயதோ தங் விஜானியா.
ஏவங் த³ஸஸதா வத்தூ², வினயே கு²த்³த³கவத்து²கே;
ஸத்³த⁴ம்மட்டி²திகோ சேவ, பேஸலானஞ்சனுக்³க³ஹோ.
ஸுஸிக்கி²தோ வினயத⁴ரோ, ஹிதசித்தோ ஸுபேஸலோ;
பதீ³பகரணோ தீ⁴ரோ, பூஜாரஹோ ப³ஹுஸ்ஸுதோதி.
கு²த்³த³கவத்து²க்க²ந்த⁴கங் நிட்டி²தங்.