6. பே⁴ஸஜ்ஜக்க²ந்த⁴கங்
பஞ்சபே⁴ஸஜ்ஜாதி³கதா²வண்ணனா
261. பே⁴ஸஜ்ஜக்க²ந்த⁴கே நச்சா²தெ³ந்தீதி ருசிங் ந உப்பாதெ³ந்தி.
262. ஸுஸுகாதி ஸமுத்³தே³ ப⁴வா ஏகா மச்ச²ஜாதி. கும்பீ⁴லாதிபி வத³ந்தி. ஸங்ஸட்ட²ந்தி பரிஸ்ஸாவிதங். தேலபரிபோ⁴கே³னாதி ஸத்தாஹகாலிகபரிபோ⁴க³ங் ஸந்தா⁴ய வுத்தங்.
263. பிட்டே²ஹீதி பிஸிதேஹி. உப்³பி⁴த³ங் நாம ஊஸரபங்ஸுமயங்.
264. ச²கணந்தி கோ³மயங். பாகதிகசுண்ணங் நாம அபக்ககஸாவசுண்ணங். தேன ட²பெத்வா க³ந்த⁴சுண்ணங் ஸப்³ப³ங் வட்டதீதி வத³ந்தி.
265. ஸுவண்ணகே³ருகோதி ஸுவண்ணதுத்தா²தி³. அஞ்ஜனூபபிஸனந்தி அஞ்ஜனத்தா²ய உபபிஸிதப்³ப³ங் யங் கிஞ்சி சுண்ணஜாதங்.
268. ஸாமங் க³ஹெத்வாதி எத்த² ஸப்பத³ட்ட²ஸ்ஸ அத்தா²ய அஞ்ஞேன பி⁴க்கு²னா க³ஹிதம்பி ஸாமங் க³ஹிதஸங்க²மேவ க³ச்ச²தீதி வேதி³தப்³ப³ங்.
269. க⁴ரதி³ன்னகாபா³தோ⁴ நாம வஸீகரணத்தா²ய க⁴ரணியா தி³ன்னபே⁴ஸஜ்ஜஸமுட்டி²தோ ஆபா³தோ⁴. தேனாஹ ‘‘வஸீகரணபாணகஸமுட்டி²தரோகோ³’’தி. க⁴ர-ஸத்³தோ³ செத்த² அபே⁴தே³ன க⁴ரணியா வத்தமானோ அதி⁴ப்பேதோ. ‘‘அகடயூஸேனாதி அனபி⁴ஸங்க²தேன முக்³க³யூஸேன. கடாகடேனாதி முக்³கே³ பசித்வா அசாலெத்வாவ பரிஸ்ஸாவிதேன முக்³க³ஸூபேனா’’தி க³ண்டி²பதே³ஸு வுத்தங்.
கு³ளாதி³அனுஜானநகதா²வண்ணனா
272. கு³ளகரணந்தி
274. அவிஸ்ஸத்தா²தி ஸாஸங்கா.
276. அப்பமத்தகேபி பவாரெந்தீதி அப்பமத்தகேபி க³ஹிதே பவாரெந்தி, ‘‘ப³ஹும்ஹி க³ஹிதே அஞ்ஞேஸங் நப்பஹோதீ’’தி மஞ்ஞமானா அப்பமத்தகங் க³ஹெத்வா பவாரெந்தீதி அதி⁴ப்பாயோ. படிஸங்கா²பி படிக்கி²பந்தீதி ‘‘தி³வா போ⁴ஜனத்தா²ய ப⁴விஸ்ஸதீ’’தி ஸல்லக்கெ²த்வாபி படிக்கி²பந்தி.
279. ஸம்பா³தே⁴ த³ஹனகம்மங் படிக்கே²பாபா⁴வோ வட்டதி.
280. உப⁴தோபஸன்னாதி உப⁴யதோ பஸன்னா. மாகா⁴தோதி ‘‘மா கா⁴தேத² பாணினோ’’தி ஏவங் மாகா⁴தகோ⁴ஸிததி³வஸோ.
யாகு³மது⁴கோ³ளகாதி³கதா²வண்ணனா
282. மது⁴கோ³ளகந்தி ஸக்கராதி³ஸங்யுத்தபூவங். ஆயுங் தே³தீதி ஆயுதா³னங் தே³தி. வண்ணந்தி ஸரீரவண்ணங். ஸுக²ந்தி காயிகசேதஸிகஸுக²ங். ப³லந்தி ஸரீரதா²மங். படிபா⁴னந்தி யுத்தமுத்தபடிபா⁴னங். வாதங் அனுலோமேதீதி வாதங் அனுலோமெத்வா ஹரதி. வத்தி²ங் ஸோதே⁴தீதி த⁴மனியோ ஸுத்³த⁴ங் கரோதி. ஆமாவஸேஸங் பாசேதீதி ஸசே ஆமாவஸேஸகங் ஹோதி, தங் பாசேதி. அனுப்பவெச்ச²தீதி தே³தி. வாதஞ்ச ப்³யபனேதீதி ஸம்ப³ந்தி⁴தப்³ப³ங்.
283. நனு ச ‘‘பரம்பரபோ⁴ஜனேன காரேதப்³போ³’’தி கஸ்மா வுத்தங். பரம்பரபோ⁴ஜனஞ்ஹி பஞ்சன்னங் போ⁴ஜனானங் அஞ்ஞதரேன நிமந்திதஸ்ஸ தங் ட²பெத்வா அஞ்ஞங் பஞ்சன்னங் போ⁴ஜனானங் அஞ்ஞதரங் பு⁴ஞ்ஜந்தஸ்ஸ ஹோதி, இமே ச பி⁴க்கூ² போ⁴ஜ்ஜயாகு³ங் பரிபு⁴ஞ்ஜிங்ஸு, பஞ்சஸு போ⁴ஜனேஸு அஞ்ஞதரந்தி ஆஹ ‘‘போ⁴ஜ்ஜயாகு³யா ஹி பவாரணா ஹோதீ’’தி. யஸ்மா பஞ்சன்னங் போ⁴ஜனானங் அஞ்ஞதரங் படிக்கி²பந்தஸ்ஸ வுத்தா பவாரணா போ⁴ஜ்ஜயாகு³ங் படிக்கி²பந்தஸ்ஸபி ஹோதியேவ, தஸ்மா போ⁴ஜ்ஜயாகு³பி ஓத³னக³திகாயேவாதி அதி⁴ப்பாயோ.
284. ஸுகு²மோஜங் பக்கி²பிங்ஸூதி ‘‘ப⁴க³வா பரிபு⁴ஞ்ஜிஸ்ஸதீ’’தி மஞ்ஞமானா பக்கி²பிங்ஸு.
பாடலிகா³மவத்து²கதா²வண்ணனா
285. பாடலிகா³மோதி தத³வஸரீதி தங் பாடலிகா³மங் அவஸரி அனுபாபுணி. பாடலிகா³மிகாதி பாடலிகா³மவாஸினோ. உபாஸகாதி தே கிர ப⁴க³வதோ பட²மத³ஸ்ஸனேன கேசி ஸரணேஸு ச ஸீலேஸு ச பதிட்டி²தா. தேன வுத்தங் ‘‘உபாஸகா’’தி. யேன ப⁴க³வா தேனுபஸங்கமிங்ஸூதி பாடலிகா³மே கிர அஜாதஸத்துனோ லிச்ச²விராஜூனஞ்ச மனுஸ்ஸா காலேன காலங் க³ந்த்வா கே³ஹஸாமிகே கே³ஹதோ நீஹரித்வா மாஸம்பி அட்³ட⁴மாஸம்பி வஸந்தி. தேன பாடலிகா³மவாஸினோ மனுஸ்ஸா நிச்சுபத்³து³தா ‘‘ஏதேஸஞ்சேவ ஆக³தகாலே வஸனட்டா²னங் ப⁴விஸ்ஸதீதி ஏகபஸ்ஸே இஸ்ஸரானங் ப⁴ண்ட³படிஸாமனட்டா²னங், ஏகபஸ்ஸே வஸனட்டா²னங், ஏகபஸ்ஸே ஆக³ந்துகானங் அத்³தி⁴கமனுஸ்ஸானங், ஏகபஸ்ஸே த³லித்³தா³னங் கபணமனுஸ்ஸானங், ஏகபஸ்ஸே கி³லானானங் வஸனட்டா²னங் ப⁴விஸ்ஸதீ’’தி ஸப்³பே³ஸங் அஞ்ஞமஞ்ஞங் அக⁴ட்டெத்வா வஸனப்பஹோனகங் நக³ரமஜ்ஜே² மஹதிங் ஸாலங் காரேஸுங், தஸ்ஸ நாமங் ஆவஸதா²கா³ரந்தி. ஆக³ந்த்வா வஸந்தி எத்த² ஆக³ந்துகாதி ஆவஸதோ², ததே³வ ஆகா³ரங் ஆவஸதா²கா³ரங்.
தங் தி³வஸஞ்ச தங் நிட்டா²னங் அக³மாஸி. தே தத்த² க³ந்த்வா இட்ட²ககம்மஸுதா⁴கம்மசித்தகம்மாதி³வஸேன ஸுபரினிட்டி²தங் ஸுஸஜ்ஜிதங் தே³வவிமானஸதி³ஸங் த்³வாரகொட்ட²கதோ பட்டா²ய ஓலோகெத்வா ‘‘இத³ங் ஆவஸதா²கா³ரங் அதிவிய மனோரமங் ஸஸ்ஸிரிகங், கேன நு கோ² பட²மங் பரிபு⁴த்தங் அம்ஹாகங் தீ³க⁴ரத்தங் ஹிதாய ஸுகா²ய அஸ்ஸா’’தி சிந்தேஸுங், தஸ்மிங்யேவ ச க²ணே ‘‘ப⁴க³வா தங் கா³மங் அனுப்பத்தோ’’தி அஸ்ஸோஸுங், தேன தே உப்பன்னபீதிஸோமனஸ்ஸா ‘‘அம்ஹேஹி ப⁴க³வா க³ந்த்வாபி ஆனேதப்³போ³ ஸியா, ஸோ ஸயமேவ அம்ஹாகங் வஸனட்டா²னங் ஸம்பத்தோ, அஜ்ஜ மயங் ப⁴க³வந்தங் இத⁴ வஸாபெத்வா பட²மங் பரிபு⁴ஞ்ஜாபெஸ்ஸாம, ததா² பி⁴க்கு²ஸங்க⁴ங், பி⁴க்கு²ஸங்கே⁴ ஆக³தே தேபிடகங் பு³த்³த⁴வசனங் ஆக³தமேவ ப⁴விஸ்ஸதி, ஸத்தா²ரங் மங்க³லங் வதா³பெஸ்ஸாம, த⁴ம்மங் கதா²பெஸ்ஸாம, இதி தீஹி ரதனேஹி பரிபு⁴த்தே பச்சா² அம்ஹாகங் பரேஸஞ்ச பரிபோ⁴கோ³ ப⁴விஸ்ஸதி, ஏவங் நோ தீ³க⁴ரத்தங் ஹிதாய ஸுகா²ய ப⁴விஸ்ஸதீ’’தி ஸன்னிட்டா²னங் கத்வா ஏதத³த்த²மேவ ப⁴க³வந்தங் உபஸங்கமிங்ஸு. தஸ்மா ஏவமாஹங்ஸு ‘‘அதி⁴வாஸேது நோ, ப⁴ந்தே, ப⁴க³வா ஆவஸதா²கா³ர’’ந்தி. தேனுபஸங்கமிங்ஸூதி (தீ³॰ நி॰ அட்ட²॰ 3.297-298; ம॰ நி॰ அட்ட²॰ 2.22) கிஞ்சாபி தங் தி³வஸமேவ பரினிட்டி²தத்தா தே³வவிமானங் ஸப்³ப³ஸந்த²ரிங் ஆவஸதா²கா³ரங் ஸந்த²ரித்வாதி எத்த² ஸந்த²ரணங் ஸந்த²ரி, ஸப்³போ³ ஸகலோ ஸந்த²ரி எத்தா²தி ஸப்³ப³ஸந்த²ரி. அத² வா ஸந்த²தந்தி ஸந்த²ரி, ஸப்³ப³ங் ஸந்த²ரி ஸப்³ப³ஸந்த²ரி, தங் ஸப்³ப³ஸந்த²ரிங். பா⁴வனபுங்ஸகனித்³தே³ஸோவாயங், யதா² ஸப்³ப³மேவ ஸந்த²தங் ஹோதி, ஏவங் ஸந்த²ரித்வாதி அத்தோ². ஸப்³ப³பட²மங் தாவ ‘‘கோ³மயங் நாம ஸப்³ப³மங்க³லேஸு வட்டதீ’’தி ஸுதா⁴பரிகம்மகதம்பி பூ⁴மிங் அல்லகோ³மயேன ஓபுஞ்ஜாபெத்வா பரிஸுக்க²பா⁴வங் ஞத்வா யதா² அக்கந்தட்டா²னே பத³ங் பஞ்ஞாயதி, ஏவங் சாதுஜ்ஜாதியக³ந்தே⁴ஹி லிம்பெத்வா உபரி நானாவண்ணகடஸாரகே ஸந்த²ரித்வா தேஸங் உபரி மஹாபிட்டி²ககோஜவே ஆதி³ங் கத்வா ஹத்த²த்த²ரணாதீ³ஹி நானாவண்ணேஹி அத்த²ரணேஹி ஸந்த²ரிதப்³ப³யுத்தகங் ஸப்³போ³காஸங் ஸந்த²ராபேஸுங். தேன வுத்தங் ‘‘ஸப்³ப³ஸந்த²ரிங் ஆவஸதா²கா³ரங் ஸந்த²ரித்வா’’தி.
ஆஸனானீதி மஜ்ஜ²ட்டா²னே தாவ மங்க³லத்த²ம்ப⁴ங் நிஸ்ஸாய மஹாரஹங் பு³த்³தா⁴ஸனங் பஞ்ஞபெத்வா தத்த² யங் யங் முது³கஞ்ச மனோரமஞ்ச பச்சத்த²ரணங், தங் தங் அத்த²ரித்வா உப⁴தோலோஹிதகங் மனுஞ்ஞத³ஸ்ஸனங் உபதா⁴னங் உபத³ஹித்வா உபரி ஸுவண்ணரஜததாரகவிசித்தவிதானங் ப³ந்தி⁴த்வா க³ந்த⁴தா³மபுப்ப²தா³மபத்தாதா³மாதீ³ஹி அலங்கரித்வா ஸமந்தா த்³வாத³ஸஹத்தே² டா²னே புப்ப²ஜாலங் காரெத்வா திங்ஸஹத்த²மத்தங் டா²னங் படஸாணியா பரிக்கி²பாபெத்வா பச்சி²மபி⁴த்திங் நிஸ்ஸாய பி⁴க்கு²ஸங்க⁴ஸ்ஸ பல்லங்கபீட²அபஸ்ஸயபீட²முண்ட³பீடா²தீ³னி பஞ்ஞபாபெத்வா உபரி ஸேதபச்சத்த²ரணேஹி பச்சத்த²ராபெத்வா ஸாலாய பாசீனபஸ்ஸங் அத்தனோ நிஸஜ்ஜாயொக்³க³ங் காரேஸுங். தங் ஸந்தா⁴ய வுத்தங் ‘‘ஆஸனானி பஞ்ஞபெத்வா’’தி.
உத³கமணிகந்தி மஹாகுச்சி²கங் ஸமேக²லங் உத³கசாடிங். ஏவங் ப⁴க³வா பி⁴க்கு²ஸங்கோ⁴ ச யதா²ருசியா ஹத்த²பாதே³ தோ⁴விஸ்ஸந்தி, முக²ங் விக்கா²லெஸ்ஸந்தீதி தேஸு தேஸு டா²னேஸு மணிவண்ணஸ்ஸ உத³கஸ்ஸ பூரெத்வா வாஸத்தா²ய நானாபுப்பா²னி
தேலபதீ³பங் ஆரோபெத்வாதி ரஜதஸுவண்ணாதி³மயத³ண்டா³ஸு த³ண்ட³தீ³பிகாஸு யோனகரூபகாதீ³னங் ஹத்தே² ட²பிதஸுவண்ணரஜதாதி³மயகபல்லிகாஸு ச தேலபதீ³பே ஜலயித்வா. யேன ப⁴க³வா தேனுபஸங்கமிங்ஸூதி எத்த² பன தே பாடலிகா³மிகஉபாஸகா ந கேவலங் ஆவஸதா²கா³ரமேவ, அத² கோ² ஸகலஸ்மிம்பி கா³மே வீதி²யோ ஸஜ்ஜாபெத்வா த⁴ஜே உஸ்ஸாபெத்வா கே³ஹத்³வாரேஸு புண்ணக⁴டே ச கத³லிஆத³யோ ச ட²பாபெத்வா
அத² கோ² ப⁴க³வா நிவாஸெத்வா பத்தசீவரமாதா³ய ஸத்³தி⁴ங் பி⁴க்கு²ஸங்கே⁴ன யேன ஆவஸதா²கா³ரங் தேனுபஸங்கமீதி ‘‘யஸ்ஸ தா³னி, ப⁴ந்தே, ப⁴க³வா காலங் மஞ்ஞதீ’’தி ஏவங் கிர தேஹி காலே ஆரோசிதே ப⁴க³வா லாகா²ரஸேன திந்தரத்தகோவிளாரபுப்ப²வண்ணங் ஸுரத்தங் து³பட்டங் கத்தரியா பது³மங் கந்தெந்தோ விய, ஸங்விதா⁴ய திமண்ட³லங் படிச்சா²தெ³ந்தோ நிவாஸெத்வா ஸுவண்ணபாமங்கே³ன பது³மகலாபங் பரிக்கி²பந்தோ விய, விஜ்ஜுலதாஸஸ்ஸிரிகங் காயப³ந்த⁴னங் ப³ந்தி⁴த்வா ரத்தகம்ப³லேன க³ஜகும்ப⁴ங் பரியோனந்த⁴ந்தோ விய, ரதனஸதுப்³பே³தே⁴ ஸுவண்ணக்³கி⁴கே பவாளஜாலங் கி²பமானோ விய, மஹதி ஸுவண்ணசேதியே ரத்தகம்ப³லகஞ்சுகங் படிமுஞ்சந்தோ விய, க³ச்ச²ந்தங் புண்ணசந்த³ங் ரத்தவலாஹகேன படிச்சா²த³யமானோ விய, கஞ்சனகி³ரிமத்த²கே ஸுபக்கலாகா²ரஸங் பரிஸிஞ்சந்தோ விய, சித்தகூடபப்³ப³தமத்த²கங் விஜ்ஜுலதாஜாலேன பரிக்கி²பந்தோ விய ச ஸசக்கவாளஸினேருயுக³ந்த⁴ரமஹாபத²விங் சாலெத்வா க³ஹிதனிக்³ரோத⁴பல்லவஸமானவண்ணங் ரத்தவரபங்ஸுகூலங் பாருபித்வா வனக³ஹனதோ கேஸரஸீஹோ விய, உத³யபப்³ப³தகூடதோ புண்ணசந்தோ³ விய, பா³லஸூரியோ விய ச அத்தனா நிஸின்னதருஸண்ட³தோ நிக்க²மி.
அத²ஸ்ஸ காயதோ மேக⁴முக²தோ விஜ்ஜுகலாபா விய ரஸ்மியோ நிக்க²மித்வா ஸுவண்ணரஸதா⁴ராபரிஸேகபிஞ்ஜரபத்தபுப்ப²ப²லஸாகா²விடபே விய ஸமந்ததோ
இதி ப⁴க³வா ஸயங் வீதராகோ³ வீதராகே³ஹி, வீததோ³ஸோ வீததோ³ஸேஹி, வீதமோஹோ வீதமோஹேஹி
அத²ஸ்ஸ புரத்தி²மகாயதோ ஸுவண்ணவண்ணா க⁴னபு³த்³த⁴ரஸ்மியோ உட்ட²ஹித்வா அஸீதிஹத்த²ங் டா²னங் அக்³க³ஹேஸுங், பச்சி²மகாயதோ த³க்கி²ணபஸ்ஸதோ வாமபஸ்ஸதோ ஸுவண்ணவண்ணா க⁴னரஸ்மியோ உட்ட²ஹித்வா அஸீதிஹத்த²ங் டா²னங் அக்³க³ஹேஸுங், உபரிகேஸந்ததோ பட்டா²ய ஸப்³ப³கேஸாவத்தேஹி மோரகீ³வவண்ணா க⁴னபு³த்³த⁴ரஸ்மியோ உட்ட²ஹித்வா க³க³னதலே அஸீதிஹத்த²ங் டா²னங் அக்³க³ஹேஸுங், ஹெட்டா²பாத³தலேஹி பவாளவண்ணா ரஸ்மியோ உட்ட²ஹித்வா க⁴னபத²வியங் அஸீதிஹத்த²ங் டா²னங் அக்³க³ஹேஸுங், த³ந்ததோ அக்கீ²னங் ஸேதட்டா²னதோ, நகா²னஞ்ச மங்ஸவினிமுத்தட்டா²னதோ ஓதா³தா க⁴னபு³த்³த⁴ரஸ்மியோ உட்ட²ஹித்வா அஸீதிஹத்த²ங் டா²னங் அக்³க³ஹேஸுங், ரத்தபீதவண்ணானங் ஸம்பி⁴ன்னட்டா²னதோ மஞ்ஜிட்ட²வண்ணா ரஸ்மியோ உட்ட²ஹித்வா அஸீதிஹத்த²ங் டா²னங் அக்³க³ஹேஸுங், ஸப்³ப³த்த²கமேவ பப⁴ஸ்ஸரா ரஸ்மியோ உட்ட²ஹிங்ஸு. ஏவங் ஸமந்தா அஸீதிஹத்த²மத்தங் டா²னங் ச²ப்³ப³ண்ணா பு³த்³த⁴ரஸ்மியோ விஜ்ஜோதமானா விப்ப²ந்த³மானா
ப⁴க³வதோபி அஸீதிஅனுப்³யஞ்ஜனப்³யாமப்பபா⁴பரிக்கே²பஸமுஜ்ஜலங் த்³வத்திங்ஸமஹாபுரிஸலக்க²ணபடிமண்டி³தங் ஸரீரங் அப்³ப⁴மஹிகாதி³உபக்கிலேஸவிமுத்தங் ஸமுஜ்ஜலதாரகபபா⁴ஸிதங் விய க³க³னதலங், விகஸிதங் விய பது³மவனங், ஸப்³ப³பாலிபு²ல்லோ விய யோஜனஸதிகோ பாரிச்ச²த்தகோ, படிபாடியா ட²பிதானங் த்³வத்திங்ஸசந்தா³னங் த்³வத்திங்ஸஸூரியானங் த்³வத்திங்ஸசக்கவத்தீனங் த்³வத்திங்ஸதே³வராஜானங் த்³வத்திங்ஸமஹாப்³ரஹ்மானங் ஸிரியா ஸிரிங் அபி⁴ப⁴வமானங் விய விரோசித்த², யதா² தங் த³ஸஹி பாரமீஹி த³ஸஹி உபபாரமீஹி த³ஸஹி பரமத்த²பாரமீஹீதி ஸம்மதே³வ பரிபூரிதாஹி ஸமதிங்ஸாய பாரமீஹி அலங்கதங் கப்பஸதஸஹஸ்ஸாதி⁴கானி சத்தாரி அஸங்க்²யெய்யானி தி³ன்னேன தா³னேன ரக்கி²தேன ஸீலேன கதேன கல்யாணகம்மேன ஏகஸ்மிங் அத்தபா⁴வே ஸமோஸரித்வா விபாகங் தா³துங் ஓகாஸங் அலப⁴மானேன ஸம்பா³த⁴ப்பத்தேன
இமாய பு³த்³த⁴ரஸ்மியா ஓபா⁴ஸமானஸ்ஸபி ப⁴க³வதோ புரதோ அனேகானி த³ண்ட³தீ³பிகாஸஹஸ்ஸானி உக்கி²பிங்ஸு, ததா² பச்ச²தோ வாமபஸ்ஸே த³க்கி²ணபஸ்ஸே. ஜாதிஸுமனசம்பகவனமாலிகாரத்துப்பலனீலுப்பலப³குலஸிந்து³வாராதி³புப்பா²னி சேவ நீலபீதாதி³வண்ணஸுக³ந்த⁴க³ந்த⁴சுண்ணானி ச சாதுத்³தீ³பிகமஹஆமேக⁴விஸ்ஸட்டா² ஸலிலவுட்டி²யோ விய விப்பகிரிங்ஸு. பஞ்சங்கி³கதூரியனிக்³கோ⁴ஸா சேவ பு³த்³த⁴த⁴ம்மஸங்க⁴கு³ணபடிஸங்யுத்தா து²திகோ⁴ஸா ச ஸப்³பா³ தி³ஸா பூரயமானா முக²ரா விய அகங்ஸு. தே³வஸுபண்ணனாக³யக்க²க³ந்த⁴ப்³ப³மனுஸ்ஸானங் அக்கீ²னி அமதபானங் விய லபி⁴ங்ஸு. இமஸ்மிங் பன டா²னே ட²த்வா பத³ஸஹஸ்ஸேஹி க³மனவண்ணங் வத்துங் வட்டதி. தத்ரித³ங் முக²மத்தங் (ம॰ நி॰ அட்ட²॰ 2.22; உதா³॰ அட்ட²॰ 76) –
‘‘ஏவங்
அஹேட²யந்தோ பாணானி, யாதி லோகவினாயகோ.
‘‘த³க்கி²ணங் பட²மங் பாத³ங், உத்³த⁴ரந்தோ நராஸபோ⁴;
க³ச்ச²ந்தோ ஸிரிஸம்பன்னோ, ஸோப⁴தே த்³விபது³த்தமோ.
‘‘க³ச்ச²தோ பு³த்³த⁴ஸெட்ட²ஸ்ஸ, ஹெட்டா²பாத³தலங் முது³;
ஸமங் ஸம்பு²ஸதே பூ⁴மிங், ரஜஸானுபலிம்பதி.
‘‘நின்னங் டா²னங் உன்னமதி, க³ச்ச²ந்தே லோகனாயகே;
உன்னதஞ்ச ஸமங் ஹோதி, பத²வீ ச அசேதனா.
‘‘பாஸாணா ஸக்க²ரா சேவ, கத²லா கா²ணுகண்டகா;
ஸப்³பே³ மக்³கா³ விவஜ்ஜந்தி, க³ச்ச²ந்தே லோகனாயகே.
‘‘நாதிதூ³ரே உத்³த⁴ரதி, நாச்சாஸன்னே ச நிக்கி²பங்;
அக⁴ட்டயந்தோ நிய்யாதி, உபோ⁴ ஜாணூ ச கொ³ப்ப²கே.
‘‘நாதிஸீக⁴ங்
ந சாதிஸணிகங் யாதி, க³ச்ச²மானோ ஸமாஹிதோ.
‘‘உத்³த⁴ங் அதோ⁴ திரியஞ்ச, தி³ஸஞ்ச விதி³ஸங் ததா²;
ந பெக்க²மானோ ஸோ யாதி, யுக³மத்தஞ்ஹி பெக்க²தி.
‘‘நாக³விக்கந்தசாரோ ஸோ, க³மனே ஸோப⁴தே ஜினோ;
சாரு க³ச்ச²தி லோகக்³கோ³, ஹாஸயந்தோ ஸதே³வகே.
‘‘உஸப⁴ராஜாவ ஸோப⁴ந்தோ, சாதுசாரீவ கேஸரீ;
தோஸயந்தோ ப³ஹூ ஸத்தே, கா³மஸெட்ட²ங் உபாக³மீ’’தி. (ம॰ நி॰ அட்ட²॰ 2.22; உதா³॰ அட்ட²॰ 76);
வண்ணகாலோ நாம கிரேஸ. ஏவங்விதே⁴ஸு காலேஸு ப⁴க³வதோ ஸரீரவண்ணே வா கு³ணவண்ணே வா த⁴ம்மகதி²கஸ்ஸ தா²மோயேவ பமாணங். சுண்ணியபதே³ஹி கா³தா²ப³ந்தே⁴ஹி வா யத்தகங் ஸக்கோதி, தத்தகங் வத்தப்³ப³ங், ‘‘து³க்கதி²த’’ந்தி வா ‘‘அதித்தே²ன பக்க²ந்தோ³’’தி வா ந வத்தப்³போ³. அபரிமாணவண்ணா ஹி பு³த்³தா⁴ ப⁴க³வந்தோ, தேஸங் பு³த்³தா⁴பி அனவஸேஸதோ வண்ணங் வத்துங் அஸமத்தா². ஸகலம்பி ஹி கப்பங் வத³ந்தா பரியோஸாபேதுங் ந ஸக்கொந்தி, பகே³வ இதரா பஜாதி. இமினா ஸிரிவிலாஸேன அலங்கதபடியத்தங் பாடலிகா³மங் பவிஸித்வா ப⁴க³வா பஸன்னசித்தேன ஜனேன புப்ப²க³ந்த⁴தூ⁴மவாஸசுண்ணாதீ³ஹி பூஜியமானோ ஆவஸதா²கா³ரங்
பாதே³ பக்கா²லெத்வாதி யதி³பி ப⁴க³வதோ பாதே³ ரஜோஜல்லங் ந உபலிம்பதி, தேஸங் பன உபாஸகானங் குஸலாபி⁴வுத்³தி⁴ங் ஆகங்க²ந்தோ பரேஸங் தி³ட்டா²னுக³திங் ஆபஜ்ஜனத்த²ங் ப⁴க³வா பாதே³ பக்கா²லேஸி. அபிச உபாதி³ன்னகஸரீரங் நாம ஸீதிகாதப்³ப³ம்பி ஹோதீதி தத³த்த²ம்பி ப⁴க³வா நஹானபாத³தோ⁴வனானி கரோதியேவ. ப⁴க³வந்தங்யேவ புரக்க²த்வாதி ப⁴க³வந்தங் புரதோ கத்வா. தத்த² ப⁴க³வா பி⁴க்கூ²னஞ்சேவ உபாஸகானஞ்ச மஜ்ஜே² நிஸின்னோ க³ந்தோ⁴த³கேன நஹாபெத்வா து³கூலசும்ப³டேன வோத³கங் கத்வா ஜாதிஹிங்கு³லகேன மஜ்ஜித்வா ரத்தகம்ப³லபலிவேடி²தே பீடே² ட²பிதா ரத்தஸுவண்ணக⁴னபடிமா விய அதிவிய விரோசித்த². அயங் பனெத்த² போராணானங் வண்ணப⁴ணனமக்³கோ³ –
‘‘க³ந்த்வான
ஓபா⁴ஸயந்தோ லோகக்³கோ³, நிஸீதி³ வரமாஸனே.
‘‘தஹிங் நிஸின்னோ நரத³ம்மஸாரதி²,
தே³வாதிதே³வோ ஸதபுஞ்ஞலக்க²ணோ;
பு³த்³தா⁴ஸனே மஜ்ஜ²க³தோ விரோசதி,
ஸுவண்ணனெக்க²ங் விய பண்டு³கம்ப³லே.
‘‘நெக்க²ங் ஜம்போ³னத³ஸ்ஸேவ, நிக்கி²த்தங் பண்டு³கம்ப³லே;
விரோசதி வீதமலோ, மணி வேரோசனோ யதா².
‘‘மஹாஸாலோவ ஸம்பு²ல்லோ, மேருராஜாவலங்கதோ;
ஸுவண்ணதூ²பஸங்காஸோ, பது³மோ கோஸகோ யதா².
‘‘ஜலந்தோ தீ³பருக்கோ²வ, பப்³ப³தக்³கே³ யதா² ஸிகீ²;
தே³வானங் பாரிச்ச²த்தோவ, ஸப்³ப³பு²ல்லோ விரோசதா²’’தி. (ம॰ நி॰ அட்ட²॰ 2.22; உதா³॰ அட்ட²॰ 76);
பாடலிகா³மிகே உபாஸகே ஆமந்தேஸீதி யஸ்மா தேஸு உபாஸகேஸு ப³ஹூ ஜனா ஸீலே பதிட்டி²தா, தஸ்மா பட²மங் தாவ ஸீலவிபத்தியா ஆதீ³னவங் பகாஸெத்வா பச்சா² ஸீலஸம்பதா³ய ஆனிஸங்ஸங் த³ஸ்ஸேதுங் ‘‘பஞ்சிமே க³ஹபதயோ’’திஆதி³னா த⁴ம்மதே³ஸனத்த²ங் ஆமந்தேஸி. தத்த² து³ஸ்ஸீலோதி து³-ஸத்³தோ³ ‘‘து³ப்பஞ்ஞோ’’திஆதீ³ஸு விய. ஸீலவிபன்னோதி விபன்னஸீலோ பி⁴ன்னஸங்வரோ. எத்த² ச ‘‘து³ஸ்ஸீலோ’’தி பதே³ன புக்³க³லஸ்ஸ ஸீலாபா⁴வோ வுத்தோ. ஸோ பனஸ்ஸ ஸீலாபா⁴வோ து³விதோ⁴ அஸமாதா³னேன வா ஸமாதி³ன்னஸ்ஸ பே⁴தே³ன வாதி. தேஸு புரிமோ ந ததா² ஸாவஜ்ஜோ, யதா² து³தியோ ஸாவஜ்ஜதரோ. யதா²தி⁴ப்பேதாதீ³னவனிமித்தங் ஸீலாபா⁴வங் புக்³க³லாதி⁴ட்டா²னாய தே³ஸனாய த³ஸ்ஸேதுங் ‘‘ஸீலவிபன்னோ’’தி வுத்தங், தேன ‘‘து³ஸ்ஸீலோ’’தி பத³ஸ்ஸ அத்த²ங் த³ஸ்ஸேதி. பமாதா³தி⁴கரணந்தி பமாத³காரணா. இத³ஞ்ச ஸுத்தங் க³ஹட்டா²னங் வஸேன ஆக³தங், பப்³ப³ஜிதானம்பி பன லப்³ப⁴தேவ. க³ஹட்டோ² ஹி யேன யேன ஸிப்பட்டா²னேன ஜீவிகங் கப்பேதி யதி³ கஸியா யதி³ வணிஜ்ஜாய யதி³ கோ³ரக்கே²ன. பாணாதிபாதாதி³வஸேன பமத்தோ தங் தங் யதா²காலங் ஸம்பாதே³துங் ந ஸக்கோதி, அத²ஸ்ஸ
பாபகோ கித்திஸத்³தோ³தி க³ஹட்ட²ஸ்ஸ ‘‘அஸுகோ அஸுககுலே ஜாதோ து³ஸ்ஸீலோ பாபத⁴ம்மோ பரிச்சத்தஇத⁴லோகபரலோகோ ஸலாகப⁴த்தமத்தம்பி ந தே³தீ’’தி சதுபரிஸமஜ்ஜே² பாபகோ கித்திஸத்³தோ³ அப்³பு⁴க்³க³ச்ச²தி. பப்³ப³ஜிதஸ்ஸ ‘‘அஸுகோ நாம ஸத்து²ஸாஸனே பப்³ப³ஜித்வா நாஸக்கி² ஸீலானி ரக்கி²துங், ந பு³த்³த⁴வசனங் உக்³க³ஹேதுங், வேஜ்ஜகம்மாதீ³ஹி ஜீவதி, ச²ஹி அகா³ரவேஹி ஸமன்னாக³தோ’’தி ஏவங் பாபகோ கித்திஸத்³தோ³ அப்³பு⁴க்³க³ச்ச²தி.
அவிஸாரதோ³தி க³ஹட்டோ² தாவ ‘‘அவஸ்ஸங் ப³ஹூனங் ஸன்னிபாதட்டா²னே கோசி மம கம்மங் ஜானிஸ்ஸதி, அத² மங் நிக்³க³ண்ஹிஸ்ஸந்தீ’’தி வா, ‘‘ராஜகுலஸ்ஸ வா த³ஸ்ஸந்தீ’’தி ஸப⁴யோ உபஸங்கமதி, மங்குபூ⁴தோ பத்தக்க²ந்தோ⁴ அதோ⁴முகோ² நிஸீத³தி, விஸாரதோ³ ஹுத்வா கதே²துங் ந ஸக்கோதி. பப்³ப³ஜிதோபி ‘‘ப³ஹூ பி⁴க்கூ² ஸன்னிபதிதா, அவஸ்ஸங் கோசி மம கம்மங் ஜானிஸ்ஸதி, அத² மே உபோஸத²ம்பி பவாரணம்பி ட²பெத்வா ஸாமஞ்ஞதோ சாவெத்வா நிக்கட்³டி⁴ஸ்ஸந்தீ’’தி ஸப⁴யோ உபஸங்கமதி, விஸாரதோ³ ஹுத்வா கதே²துங் ந ஸக்கோதி. ஏகச்சோ பன து³ஸ்ஸீலோபி ஸமானோ த³ப்பிதோ விய வத³தி, ஸோபி அஜ்ஜா²ஸயேன மங்கு ஹோதியேவ விப்படிஸாரீபா⁴வதோ.
ஸம்மூள்ஹோ காலங் கரோதீதி து³ஸ்ஸீலஸ்ஸ ஹி மரணமஞ்சே நிபன்னஸ்ஸ து³ஸ்ஸீல்யகம்மானங் ஸமாதா³ய வத்திதட்டா²னானி ஆபாத²மாக³ச்ச²ந்தி. ஸோ உம்மீலெத்வா அத்தனோ புத்ததா³ராதி³த³ஸ்ஸனவஸேன இத⁴லோகங் பஸ்ஸதி, நிமீலெத்வா க³தினிமித்துபட்டா²னவஸேன பரலோகங் பஸ்ஸதி, தஸ்ஸ சத்தாரோ அபாயா கம்மானுரூபங் உபட்ட²ஹந்தி. ஸத்திஸதேன பஹரியமானோ விய அக்³கி³ஜாலாய ஆலிங்கி³யமானோ விய ச ஹோதி. ஸோ ‘‘வாரேத² வாரேதா²’’தி விரவந்தோவ மரதி. தேன வுத்தங் ‘‘ஸம்மூள்ஹோ காலங் கரோதீ’’தி.
காயஸ்ஸ பே⁴தா³தி உபாதி³ன்னகக்க²ந்த⁴பரிச்சாகா³. பரங் மரணாதி தத³னந்தரங் அபி⁴னிப்³ப³த்தக்க²ந்த⁴க்³க³ஹணே. அத² வா காயஸ்ஸ பே⁴தா³தி ஜீவிதிந்த்³ரியஸ்ஸ உபச்சே²தா³. பரங் மரணாதி சுதிதோ உத்³த⁴ங். அபாயந்திஆதி³ ஸப்³ப³ங் நிரயவேவசனங். நிரயோ ஹி ஸக்³க³மொக்க²ஹேதுபூ⁴தா புஞ்ஞஸங்கா²தா அயா அபேதத்தா, ஸுகா²னங் வா ஆயஸ்ஸ ஆக³மனஸ்ஸ அபா⁴வா அபாயோ. து³க்க²ஸ்ஸ க³தி படிஸரணந்தி து³க்³க³தி, தோ³ஸப³ஹுலதாய வா து³ட்டே²ன கம்முனா நிப்³ப³த்தா க³தீதி து³க்³க³தி. விவஸா வினிபாதோ, வினஸ்ஸந்தா வா எத்த² நிபதந்தி ஸங்பி⁴ஜ்ஜமானங்க³பச்சங்கா³தி வினிபாதோ. நத்தி² எத்த² அஸ்ஸாத³ஸஞ்ஞிதோ அயோதி நிரயோ.
அத² வா அபாயக்³க³ஹணேன திரச்சா²னயோனிங் தீ³பேதி. திரச்சா²னயோனி ஹி அபாயோ ஸுக³திதோ அபேதத்தா, ந து³க்³க³தி மஹேஸக்கா²னங் நாக³ராஜாதீ³னங் ஸம்ப⁴வதோ. து³க்³க³திக்³க³ஹணேன பெத்திவிஸயங் தீ³பேதி. ஸோ ஹி அபாயோ சேவ து³க்³க³தி ச ஸுக³திதோ அபேதத்தா து³க்க²ஸ்ஸ ச க³திபூ⁴தத்தா, ந து வினிபாதோ அஸுரஸதி³ஸங் அவினிபதிதத்தா. பேதமஹித்³தி⁴கானங் விமானானிபி நிப்³ப³த்தந்தி. வினிபாதக்³க³ஹணேன அஸுரகாயங் தீ³பேதி. ஸோ ஹி யதா²வுத்தேனத்தே²ன அபாயோ சேவ து³க்³க³தி ச ஸப்³ப³ஸம்பத்திஸமுஸ்ஸயேஹி வினிபாதத்தா வினிபாதோதி ச வுச்சதி. நிரயக்³க³ஹணேன பன அவீசிஆதி³கங் அனேகப்பகாரங் நிரயமேவ தீ³பேதி. உபபஜ்ஜதீதி நிப்³ப³த்ததி.
ஆனிஸங்ஸகதா² வுத்தவிபரியாயேன வேதி³தப்³பா³. அயங் பன விஸேஸோ – ஸீலவாதி ஸமாதா³னவஸேன ஸீலவா. ஸீலஸம்பன்னோதி பரிஸுத்³த⁴ங் பரிபுண்ணஞ்ச கத்வா ஸீலஸ்ஸ ஸம்பாத³னேன ஸீலஸம்பன்னோ. போ⁴க³க்க²ந்த⁴ந்தி போ⁴க³ராஸிங். ஸுக³திங் ஸக்³க³ங் லோகந்தி எத்த² ஸுக³திக்³க³ஹணேன மனுஸ்ஸக³திபி ஸங்க³ய்ஹதி, ஸக்³க³க்³க³ஹணேன தே³வக³தி ஏவ. தத்த² ஸுந்த³ரா க³தீதி ஸுக³தி, ரூபாதீ³ஹி ஸக்³கோ³, ஸோ ஸப்³போ³பி லுஜ்ஜனபலுஜ்ஜனட்டே²ன லோகோதி.
பாடலிகா³மிகே உபாஸகே ப³ஹுதே³வ ரத்திங் த⁴ம்மியா கதா²யாதி அஞ்ஞாயபி பாளிமுத்தாய த⁴ம்மகதா²ய சேவ ஆவஸதா²னுமோத³னகதா²ய ச. ததா³ ஹி ப⁴க³வா யஸ்மா அஜாதஸத்துனா தத்த² பாடலிபுத்தனக³ரங் மாபெந்தேன அஞ்ஞாஸு கா³மனிக³மராஜதா⁴னீஸு யே ஸீலாசாரஸம்பன்னா குடும்பி³கா, தே ஆனெத்வா த⁴னத⁴ஞ்ஞானி க⁴ரவத்து²கெ²த்தவத்தா²தீ³னி சேவ பரிஹாரஞ்ச தா³பெத்வா நிவேஸியந்தி, தஸ்மா பாடலிகா³மிகா உபாஸகா ஆனிஸங்ஸத³ஸ்ஸாவிதாய விஸேஸதோ ஸீலக³ருகாதி ஸப்³ப³கு³ணானஞ்ச ஸீலஸ்ஸ அதி⁴ட்டா²னபா⁴வதோ தேஸங் பட²மங் ஸீலானிஸங்ஸே பகாஸெத்வா ததோ பரங் ஆகாஸக³ங்க³ங் ஓதாரெந்தோ விய பத²வோஜங் ஆகட்³ட⁴ந்தோ விய மஹாஜம்பு³ங் மத்த²கே க³ஹெத்வா சாலெந்தோ விய யோஜனப்பமாணங் மஹாமது⁴ங் சக்கயந்தேன பீளெத்வா ஸுமது⁴ரரஸங் பாயமானோ விய ச பாடலிகா³மிகானங் உபாஸகானங் ஹிதஸுகா²வஹங் பகிண்ணககத²ங் கதெ²ந்தோபி ‘‘ஆவாஸதா³னங் நாமேதங் க³ஹபதயோ மஹந்தங் புஞ்ஞங், தும்ஹாகங் ஆவாஸோ மயா பரிபு⁴த்தோ, பி⁴க்கு²ஸங்கே⁴ன பரிபு⁴த்தோ, மயா ச பி⁴க்கு²ஸங்கே⁴ன ச பரிபு⁴த்தே த⁴ம்மரதனேனபி பரிபு⁴த்தோயேவ ஹோதி, ஏவங் தீஹி ரதனேஹி பரிபு⁴த்தே அபரிமெய்யோவ விபாகோ, அபிச ஆவாஸதா³னஸ்மிங் தி³ன்னே ஸப்³ப³தா³னங் தி³ன்னமேவ ஹோதி, பூ⁴மட்ட²கபண்ணஸாலாய வா ஸாகா²மண்ட³பஸ்ஸ வா ஸங்க⁴ங் உத்³தி³ஸ்ஸ கதஸ்ஸ ஆனிஸங்ஸோ பரிச்சி²ந்தி³துங் ந ஸக்கா. ஆவாஸதா³னானுபா⁴வேன
‘‘ஸீதங் உண்ஹங் படிஹந்தி, ததோ வாளமிகா³னி ச;
ஸரீஸபே ச மகஸே, ஸிஸிரே சாபி வுட்டி²யோ.
‘‘ததோ வாதாதபோ கோ⁴ரோ, ஸஞ்ஜாதோ படிஹஞ்ஞதி;
லேணத்த²ஞ்ச ஸுக²த்த²ஞ்ச, ஜா²யிதுஞ்ச விபஸ்ஸிதுங்.
‘‘விஹாரதா³னங் ஸங்க⁴ஸ்ஸ, அக்³க³ங் பு³த்³தே⁴ன வண்ணிதங்;
தஸ்மா ஹி பண்டி³தோ போஸோ, ஸம்பஸ்ஸங் அத்த²மத்தனோ.
‘‘விஹாரே
தேஸங் அன்னஞ்ச பானஞ்ச, வத்த²ஸேனாஸனானி ச.
‘‘த³தெ³ய்ய உஜுபூ⁴தேஸு, விப்பஸன்னேன சேதஸா;
தே தஸ்ஸ த⁴ம்மங் தே³ஸெந்தி, ஸப்³ப³து³க்கா²பனூத³னங்;
யங் ஸோ த⁴ம்மங் இத⁴ஞ்ஞாய, பரினிப்³பா³தி அனாஸவோ’’தி. (சூளவ॰ 295, 315) –
ஏவங் அயம்பி ஆவாஸதா³னே ஆனிஸங்ஸோ அயம்பி ஆவாஸதா³னே ஆனிஸங்ஸோதி ப³ஹுதே³வ ரத்திங் அதிரேகதி³யட்³ட⁴யாமங் ஆவாஸதா³னானிஸங்ஸங் கதே²ஸி. தத்த² இமா கா³தா²வ ஸங்க³ஹங் ஆருள்ஹா, பகிண்ணகத⁴ம்மதே³ஸனா பன ஸங்க³ஹங் ந ஆரோஹதி. ஸந்த³ஸ்ஸெத்வாதிஆதீ³னி வுத்தத்தா²னேவ.
அபி⁴க்கந்தாதி அதிக்கந்தா த்³வே யாமா க³தா. யஸ்ஸதா³னி தும்ஹே காலங் மஞ்ஞதா²தி யஸ்ஸ க³மனஸ்ஸ தும்ஹே காலங் மஞ்ஞத², க³மனகாலோ தும்ஹாகங், க³ச்ச²தா²தி வுத்தங் ஹோதி. கஸ்மா பன ப⁴க³வா தே உய்யோஜேஸீதி? அனுகம்பாய. தியாமரத்திஞ்ஹி நிஸீதி³த்வா வீதினாமெந்தானங் தேஸங் ஸரீரே ஆபா³தோ⁴ உப்பஜ்ஜெய்ய, பி⁴க்கு²ஸங்கோ⁴பி ச மஹா, தஸ்ஸ ஸயனநிஸஜ்ஜானங் ஓகாஸங் லத்³து⁴ங் வட்டதி, இதி உப⁴யானுகம்பாய உய்யோஜேஸி.
ஸுஞ்ஞாகா³ரந்தி
பாடலிகா³மவத்து²கதா²வண்ணனா நிட்டி²தா.
ஸுனித⁴வஸ்ஸகாரவத்து²கதா²வண்ணனா
286. ஸுனித⁴வஸ்ஸகாராதி (தீ³॰ நி॰ 2.153; உதா³॰ அட்ட²॰ 76) ஸுனிதோ⁴ ச வஸ்ஸகாரோ ச த்³வே ப்³ராஹ்மணா. மக³த⁴மஹாமத்தாதி மக³த⁴ரஞ்ஞோ மஹாஅமச்சா, மக³த⁴ரட்டே² வா மஹாமத்தா, மஹதியா இஸ்ஸரியமத்தாய ஸமன்னாக³தாதி மக³த⁴மஹாமத்தா. பாடலிகா³மே நக³ரங் மாபெந்தீதி பாடலிகா³மந்தஸங்கா²தே பூ⁴மிப்பதே³ஸே நக³ரங் மாபெந்தி, புப்³பே³ ‘‘பாடலிகா³மோ’’தி லத்³த⁴னாமங் டா²னங் இதா³னி நக³ரங் கத்வா மாபெந்தீதி அத்தோ². வஜ்ஜீனங் படிபா³ஹாயாதி லிச்ச²விராஜூனங் ஆயமுக²பச்சி²ந்த³னத்த²ங். வத்தூ²னீதி க⁴ரவத்தூ²னி க⁴ரபதிட்டா²பனட்டா²னானி. சித்தானி நமந்தி நிவேஸனானி மாபேதுந்தி ரஞ்ஞோ ராஜமஹாமத்தானஞ்ச நிவேஸனானி மாபேதுங் வத்து²விஜ்ஜாபாட²கானங் சித்தானி நமந்தி. தே கிர அத்தனோ ஸிப்பானுபா⁴வேன ஹெட்டா²பத²வியங் திங்ஸஹத்த²மத்தே டா²னே ‘‘இத⁴ நாகா³னங் நிவாஸபரிக்³க³ஹோ, இத⁴ யக்கா²னங், இத⁴ பூ⁴தானங் நிவாஸபரிக்³க³ஹோ, இத⁴ பாஸாணோ வா கா²ணுகோ வா அத்தீ²’’தி ஜானந்தி, தே ததா³ ஸிப்பங் ஜப்பித்வா தாதி³ஸங் ஸாரம்ப⁴ட்டா²னங் பரிஹரித்வா அனாரம்பே⁴ டா²னே தாஹி வத்து²பரிக்³கா³ஹிகாஹி தே³வதாஹி ஸத்³தி⁴ங் மந்தயமானா விய தங்தங்கே³ஹானி மாபெந்தி.
அத² வா நேஸங் ஸரீரே தே³வதா அதி⁴முச்சித்வா தத்த² தத்த² நிவேஸனானி மாபேதுங் சித்தங் நாமெந்தி. தா சதூஸு கோணேஸு கா²ணுகே கொட்டெத்வா வத்து²ம்ஹி க³ஹிதமத்தே படிவிக³ச்ச²ந்தி. ஸத்³தா⁴னங் குலானங்
தாவதிங்ஸேஹீதி ஸெய்யதா²பீதிஆதி³னா தே³வேஹி தாவதிங்ஸேஹி ஸத்³தி⁴ங் மந்தெத்வா விய ஸுனித⁴வஸ்ஸகாரா நக³ரங் மாபெந்தீதி த³ஸ்ஸேதி.
யாவதா அரியங் ஆயதனந்தி யத்தகங் அரியமனுஸ்ஸானங் ஓஸரணட்டா²னங் நாம அத்தி². யாவதா வணிப்பதோ²தி யத்தகங் வாணிஜானங் ஆஹடப⁴ண்ட³ஸ்ஸ ராஸிவஸேனேவ கயவிக்கயட்டா²னங் நாம, வாணிஜானங் வஸனட்டா²னங் வா அத்தி². இத³ங் அக்³க³னக³ரந்தி தேஸங் அரியாயதனவணிப்பதா²னங் இத³ங் நக³ரங் அக்³க³ங் ப⁴விஸ்ஸதி ஜெட்ட²கங் பாமொக்க²ங். புடபே⁴த³னந்தி ப⁴ண்ட³புடபே⁴த³னட்டா²னங், ப⁴ண்ட³க³ந்தி²கானங் மோசனட்டா²னந்தி வுத்தங் ஹோதி. ஸகலஜம்பு³தீ³பே அலத்³த⁴ப⁴ண்ட³ம்பி ஹி இதே⁴வ லபி⁴ஸ்ஸதி, அஞ்ஞத்த² விக்கயங் அக³ச்ச²ந்தம்பி இத⁴ விக்கயங் க³ச்சி²ஸ்ஸதி, தஸ்மா இதே⁴வ புடங் பி⁴ந்தி³ஸ்ஸதீதி அத்தோ². ஆயந்தி யானி சதூஸு த்³வாரேஸு சத்தாரி, ஸபா⁴யங் ஏகந்தி ஏவங் தி³வஸே தி³வஸே பஞ்சஸதஸஹஸ்ஸானி தத்த² உட்ட²ஹிஸ்ஸந்தி, தானிஸ்ஸ பா⁴வீனி ஆயானி த³ஸ்ஸேதி. அக்³கி³தோ வாதிஆதீ³ஸு ச-காரத்தோ² வா-ஸத்³தோ³, அக்³கி³னா ச உத³கேன ச மிது²பே⁴தே³ன ச நஸ்ஸிஸ்ஸதீதி அத்தோ². தஸ்ஸ ஹி ஏகோ கொட்டா²ஸோ அக்³கி³னா நஸ்ஸிஸ்ஸதி, நிப்³பா³பேதும்பி நங் ந ஸக்கி²ஸ்ஸதி, ஏகங் கொட்டா²ஸங் க³ங்கா³ க³ஹெத்வா க³மிஸ்ஸதி, ஏகோ இமினா அகதி²தங் அமுஸ்ஸ, அமுனா அகதி²தங் இமஸ்ஸ வத³ந்தானங் பிஸுணவாசானங் வஸேன பி⁴ன்னானங் மனுஸ்ஸானங் அஞ்ஞமஞ்ஞபே⁴தே³ன வினஸ்ஸிஸ்ஸதி.
ஏவங் வத்வா ப⁴க³வா பச்சூஸகாலே க³ங்கா³தீரங் க³ந்த்வா கதமுக²தோ⁴வனோ பி⁴க்கா²சாரகாலங் ஆக³மயமானோ நிஸீதி³. ஸுனித⁴வஸ்ஸகாராபி ‘‘அம்ஹாகங் ராஜா ஸமணஸ்ஸ கோ³தமஸ்ஸ உபட்டா²கோ, ஸோ அம்ஹே உபக³தே புச்சி²ஸ்ஸதி ‘ஸத்தா² கிர பாடலிகா³மங் அக³மாஸி, கிங் தஸ்ஸ ஸந்திகங் உபஸங்கமித்த², ந உபஸங்கமித்தா²’தி, ‘உபஸங்கமிம்ஹா’தி ச வுத்தே ‘நிமந்தயித்த², ந நிமந்தயித்தா²’தி ‘‘அத² கோ² ஸுனித⁴வஸ்ஸகாரா’’திஆதி³. புப்³ப³ண்ஹஸமயந்தி புப்³ப³ண்ஹகாலே. நிவாஸெத்வாதி கா³மப்பவேஸனநீஹாரேன நிவாஸனங் நிவாஸெத்வா காயப³ந்த⁴னங் ப³ந்தி⁴த்வா. பத்தசீவரமாதா³யாதி பத்தஞ்ச சீவரஞ்ச ஆதி³யித்வா காயபடிப³த்³த⁴ங் கத்வா, சீவரங் பாருபித்வா பத்தங் ஹத்தே²ன க³ஹெத்வாதி அத்தோ².
ஸீலவந்தெத்தா²தி ஸீலவந்தே எத்த² அத்தனோ வஸனட்டா²னே. ஸஞ்ஞதேதி காயவாசாசித்தேஹி ஸஞ்ஞதே. தாஸங் த³க்கி²ணமாதி³ஸேதி ஸங்க⁴ஸ்ஸ தி³ன்னே சத்தாரோ பச்சயே தாஸங் க⁴ரதே³வதானங் ஆதி³ஸெய்யபத்திங் த³தெ³ய்ய. பூஜிதா பூஜயந்தீதி ‘‘இமே மனுஸ்ஸா அம்ஹாகங் ஞாதகாபி ந ஹொந்தி, ததா²பி நோ பத்திங் தெ³ந்தீதி ஆரக்க²ங் ஸுஸங்விஹிதங் கரோதா²’’தி ஸுட்டு² ஆரக்க²ங் கரொந்தி. மானிதா மானயந்தீதி காலானுகாலங் ப³லிகம்மகரணேன மானிதா ‘‘ஏதே மனுஸ்ஸா அம்ஹாகங் ஞாதகாபி ந ஹொந்தி, ததா²பி சதுமாஸச²மாஸந்தரே நோ ப³லிகம்மங் கரொந்தீ’’தி மானெந்தி உப்பன்னபரிஸ்ஸயங் ஹரந்தி. ததோ நந்தி ததோ நங் பண்டி³தஜாதிகங் மனுஸ்ஸங். ஓரஸந்தி உரே ட²பெத்வா ஸங்வட்³டி⁴தங், யதா² மாதா ஓரஸங் புத்தங் அனுகம்பதி, உப்பன்னபரிஸ்ஸயஹரணத்த²மேவஸ்ஸ வாயமதி, ஏவங் அனுகம்பந்தீதி அத்தோ². ப⁴த்³ரானி பஸ்ஸதீதி ஸுந்த³ரானி பஸ்ஸதி.
அனுமோதி³த்வாதி தேஹி ததா³ பஸுதபுஞ்ஞஸ்ஸ அனுமோத³னவஸேன தேஸங் த⁴ம்மகத²ங் கத்வா. ஸுனித⁴வஸ்ஸகாராபி ‘‘யா தத்த² தே³வதா ஆஸுங், தாஸங் த³க்கி²ணமாதி³ஸே’’தி ப⁴க³வதோ வசனங் ஸுத்வா தே³வதானங் பத்திங் அத³ங்ஸு. தங் கோ³தமத்³வாரங் நாம அஹோஸீதி தஸ்ஸ நக³ரஸ்ஸ யேன த்³வாரேன ப⁴க³வா நிக்க²மி, தங் கோ³தமத்³வாரங் நாம அஹோஸி. க³ங்கா³ய பன உத்தரணத்த²ங் அனோதிண்ணத்தா கோ³தமதித்த²ங் நாம நாஹோஸி. பூராதி புண்ணா. ஸமதித்திகாதி தீரஸமங் உத³கஸ்ஸ தித்தா ப⁴ரிதா. காகபெய்யாதி தீரே டி²தகாகேஹி பாதுங் ஸக்குணெய்யஉத³கா. தீஹிபி பதே³ஹி உப⁴தோகூலஸமங் பரிபுண்ணபா⁴வமேவ வத³தி. உளும்பந்தி பாரக³மனத்தா²ய லஹுகே தா³ருத³ண்டே³ க³ஹெத்வா கவாடப²லகே விய அஞ்ஞமஞ்ஞஸம்ப³ந்தே⁴ காதுங் ஆணியோ கொட்டெத்வா நாவாஸங்கே²பேன கதங். குல்லந்தி வேளுனளாதி³கே ஸங்க⁴ரித்வா வல்லிஆதீ³ஹி கலாபவஸேன ப³ந்தி⁴த்வா கதங்.
ஏதமத்த²ங் விதி³த்வாதி ஏதங் மஹாஜனஸ்ஸ க³ங்கு³த³கமத்தஸ்ஸபி கேவலங் தரிதுங் அஸமத்த²தங், அத்தனோ பன பி⁴க்கு²ஸங்க⁴ஸ்ஸ ச அதிக³ம்பீ⁴ரவித்த²தங் ஸங்ஸாரமஹண்ணவங் தரித்வா டி²தபா⁴வஞ்ச ஸப்³பா³காரதோ உத³கட்டா²னஸ்ஸேதங் அதி⁴வசனந்தி யதா²வுத்தஸ்ஸ யஸ்ஸ கஸ்ஸசி உத³கட்டா²னஸ்ஸ ஏதங் அண்ணவந்தி அதி⁴வசனங், ந ஸமுத்³த³ஸ்ஸேவாதி அதி⁴ப்பாயோ. ஸரந்தி இத⁴ நதீ³ அதி⁴ப்பேதா ஸரதி ஸந்த³தீதி கத்வா. க³ம்பீ⁴ரங் வித்த²தந்தி அகா³த⁴ட்டே²ன க³ம்பீ⁴ரங், ஸகலலோகத்தயப்³யாபிதாய வித்த²தங். விஸஜ்ஜாதி அனாஸஜ்ஜ அப்பத்வா ஏவ பல்லலானி தேஸங் அதரணதோ. குல்லஞ்ஹி ஜனோ ப³ந்த⁴தீதி குல்லங் ப³ந்தி⁴துங் ஆயாஸங் ஆபஜ்ஜதி. வினா ஏவ குல்லேனாதி ஈதி³ஸங் உத³கங் குல்லேன ஈதி³ஸேன வினா ஏவ. திண்ணா மேதா⁴வினோ ஜனாதி அரியமக்³க³ஞாணஸங்கா²தாய மேதா⁴ய ஸமன்னாக³தத்தா மேதா⁴வினோ பு³த்³தா⁴ ச பு³த்³த⁴ஸாவகா ச திண்ணா பரதீரே பதிட்டி²தா.
ஸுனித⁴வஸ்ஸகாரவத்து²கதா²வண்ணனா நிட்டி²தா.
கோடிகா³மே ஸச்சகதா²வண்ணனா
287. கோடிகா³மோதி மஹாபனாத³ஸ்ஸ ரஞ்ஞோ பாஸாத³கோடியங் கதகா³மோ, பதிதஸ்ஸ பாஸாத³ஸ்ஸ து²பிகாய பதிட்டி²தட்டா²னே நிவிட்ட²கா³மோதி அத்தோ². அரியஸச்சானந்தி யே படிவிஜ்ஜ²ந்தி, தேஸங் அரியபா⁴வகரானங் ஸச்சானங். அனநுபோ³தா⁴தி அபு³ஜ்ஜ²னேன அஜானநேன. அப்படிவேதா⁴தி அப்படிவிஜ்ஜ²னேன. அனுபோ³தோ⁴ செத்த² புப்³ப³பா⁴கி³யஞாணங், படிவேதோ⁴ மக்³க³ஞாணேன அபி⁴ஸமயோ. தத்த² யஸ்மா அனுபோ³த⁴புப்³ப³கோ படிவேதோ⁴ அனுபோ³தே⁴ன வினா ந ஹோதி, அனுபோ³தோ⁴பி ஏகச்சோ படிவேத⁴ஸம்ப³ந்தோ⁴ தது³ப⁴யாபா⁴வஹேதுகஞ்ச வட்டே ஸங்ஸரணங், தஸ்மா வுத்தங் ‘‘அனநுபோ³தா⁴…பே॰… தும்ஹாகஞ்சா’’தி. தத்த² ஸந்தா⁴விதந்தி படிஸந்தி⁴க்³க³ஹணவஸேன ப⁴வதோ ப⁴வந்தருபக³மனேன ஸந்தா⁴விதங். ஸங்ஸரிதந்தி அபராபரங் சவனுபபஜ்ஜனவஸேன ஸங்ஸரிதங். மமஞ்சேவ தும்ஹாகஞ்சாதி மயா ச தும்ஹேஹி ச. அத² வா ஸந்தா⁴விதங் ஸங்ஸரிதந்தி ஸந்தா⁴வனங் ஸங்ஸரணங் மமஞ்சேவ தும்ஹாகஞ்ச அஹோஸீதி ஏவமெத்த² அத்தோ² வேதி³தப்³போ³.
ஸங்ஸிதந்தி ப⁴வனெத்தி ஸமூஹதாதி தீ³க⁴ரஜ்ஜுயா ப³த்³த⁴ஸகுணங் விய ரஜ்ஜுஹத்தோ² புரிஸோ தே³ஸந்தரங், தண்ஹாரஜ்ஜுயா ப³த்³த⁴ஸத்தஸந்தானங் அபி⁴ஸங்கா²ரோ ப⁴வந்தரங் நேதி ஏதாயாதி ப⁴வனெத்தி, ஸா ப⁴வதோ ப⁴வங் நயனஸமத்தா² தண்ஹாரஜ்ஜு அரியமக்³க³ஸத்தே²ன ஸுட்டு² ஹதா சி²ன்னா அப்பவத்திகதாதி ப⁴வனெத்தி ஸமூஹதா.
அம்ப³பாலீவத்து²கதா²வண்ணனா
288. யானஸ்ஸ பூ⁴மீதி யத்த² ஸக்கா ஹோதி யானங் ஆருய்ஹ யானேன க³ந்துங், அயங் யானஸ்ஸ பூ⁴மி நாம. யானா பச்சோரோஹித்வாதி விஹாரஸ்ஸ ப³ஹித்³வாரகொட்ட²கே யானதோ ஓரோஹித்வா.
லிச்ச²வீவத்து²கதா²வண்ணனா
289. நீலாதி இத³ங் ஸப்³ப³ஸங்கா³ஹகவசனங். நீலவண்ணாதிஆதி³ தஸ்ஸேவ விபா⁴க³த³ஸ்ஸனத்த²ங். தத்த² ந தேஸங் பகதிவண்ணோ நீலோ, நீலவிலேபனவிலித்தத்தா பனேதங் வுத்தங். நீலவத்தா²தி படது³கூலகோஸெய்யாதீ³னிபி நேஸங் நீலானேவ ஹொந்தி. நீலாலங்காராதி நீலமணிஅலங்காரேஹி நீலபுப்பே²ஹி ச அலங்கதா. தே கிர அலங்காரா ஸுவண்ணவிசித்தாபி இந்த³னீலமணிஓபா⁴ஸேஹி ஏகனீலா விய கா²யந்தி, ரதா²பி நேஸங் நீலமணிக²சிதா நீலவத்த²பரிக்கி²த்தா நீலத⁴ஜனீலவம்மிகேஹி நீலாப⁴ரணேஹி நீலஅஸ்ஸேஹி யுத்தா, பதோத³யட்டி²யோபி நீலாயேவாதி இமினா நயேன ஸப்³ப³பதே³ஸு அத்தோ² வேதி³தப்³போ³. படிவட்டேஸீதி பஹரி. கிஸ்ஸ ஜே அம்ப³பாலீதி ஜே-தி ஆலபனங், போ⁴தி அம்ப³பாலி கிங்காரணாதி வுத்தங் ஹோதி. ஸாஹாரந்தி எத்த² ஆஹரந்தி இமஸ்மா ராஜபுரிஸா ப³லிந்தி ஆஹாரோ, தப்³பு⁴த்தஜனபதோ³. தேன ஸஹிதங் ஸாஹாரங், ஸஜனபத³ந்தி அத்தோ². அங்கு³லிங் போ²டேஸுந்தி அங்கு³லிங் சாலேஸுங். அம்ப³காயாதி மாதுகா³மேன. உபசாரவசனஞ்ஹேதங், இத்தீ²ஸு யதி³த³ங் அம்ப³கா மாதுகா³மோ ஜனநிகாதி. ஓலோகேதா²தி பஸ்ஸத². அபலோகேதா²தி அபவத்தித்வா ஓலோகேத², புனப்புனங் பஸ்ஸதா²தி அத்தோ². உபஸங்ஹரதா²தி உபனேத², இமங் லிச்ச²வீபரிஸங் தும்ஹாகங் சித்தேன தாவதிங்ஸஸதி³ஸங் உபஸங்ஹரத² உபனேத² அல்லீயாபேத². யதே²வ தாவதிங்ஸா
கஸ்மா பன ப⁴க³வா அனேகஸதேஹி ஸுத்தேஹி சக்கா²தீ³னங் ரூபாதீ³ஸு நிமித்தக்³கா³ஹங் படிஸேதெ⁴த்வா இத⁴ மஹந்தேன உஸ்ஸாஹேன நிமித்தக்³கா³ஹே நியோஜேதீதி? ஹிதகாமதாய தேஸங் பி⁴க்கூ²னங் யதா² ஆயஸ்மதோ நந்த³ஸ்ஸ ஹிதகாமதாய ஸக்³க³ஸம்பத்தித³ஸ்ஸனத்த²ங். தத்ர கிர ஏகச்சே பி⁴க்கூ² ஓஸன்னவீரியா, தே ஸம்பத்தியா பலோபெ⁴ந்தோ ‘‘அப்பமாதே³ன ஸமணத⁴ம்மங் கரொந்தானங் ஏவரூபா இஸ்ஸரியஸம்பத்தி ஸுலபா⁴’’தி ஸமணத⁴ம்மே உஸ்ஸாஹஜனநத்த²ங் ஆஹ. அத² வா நயித³ங் நிமித்தக்³கா³ஹே நியோஜனங், கேவலங் பன ‘‘தி³ப்³ப³ஸம்பத்திஸதி³ஸா ஏதேஸங் ராஜூனங் இஸ்ஸரியஸம்பத்தீ’’தி அனுபுப்³பி³கதா²ய ஸம்பத்திகத²னங் விய த³ட்ட²ப்³ப³ங். அனிச்சலக்க²ணவிபா⁴வனத்த²ஞ்சாபி ஏவமாஹ. ந சிரஸ்ஸேவ
அதி⁴வாஸேதூதி அம்ப³பாலியா நிமந்திதபா⁴வங் ஞத்வாபி கஸ்மா நிமந்தெந்தீதி? அஸத்³த³ஹனதாய ச வத்தஸீஸேன ச. ஸா ஹி து⁴த்தா இத்தீ² அனிமந்தெத்வாபி ‘‘நிமந்தேஸி’’ந்தி வதெ³ய்யாதி தேஸங் அஹோஸி. த⁴ம்மங் ஸுத்வா க³மனகாலே ச நிமந்தெத்வா க³மனங் நாம மனுஸ்ஸானங் வத்தமேவ.
லிச்ச²வீவத்து²கதா²வண்ணனா நிட்டி²தா.
ஸீஹஸேனாபதிவத்து²கதா²வண்ணனா
290. அபி⁴ஞ்ஞாதாதி (அ॰ நி॰ அட்ட²॰ 3.8.12) ஞாதா பஞ்ஞாதா பாகடா. ஸந்தா²கா³ரேதி மஹாஜனஸ்ஸ ஸந்த²ம்ப⁴னாகா³ரே விஸ்ஸமனத்தா²ய கதே அகா³ரே. ஸா கிர ஸந்தா²கா³ரஸாலா நக³ரமஜ்ஜே² அஹோஸி, சதூஸு த்³வாரேஸு டி²தானங் பஞ்ஞாயதி, சதூஹி தி³ஸாஹி ஆக³தமனுஸ்ஸா பட²மங் தத்த² விஸ்ஸமித்வா பச்சா² அத்தனோ அத்தனோ பா²ஸுகட்டா²னங் க³ச்ச²ந்தி. ராஜகுலானங் ரஜ்ஜகிச்சஸந்த²ரணத்த²ங் கதங் ஸன்னிஸின்னாதி தேஸங் நிஸீத³னத்த²ங்யேவ பஞ்ஞத்தேஸு மஹாரஹபச்சத்த²ரணேஸு ஸமுஸ்ஸிதஸேதச்ச²த்தேஸு ஆஸனேஸு ஸன்னிஸின்னா. அனேகபரியாயேன பு³த்³த⁴ஸ்ஸ வண்ணங் பா⁴ஸந்தீதி ராஜகுலகிச்சஞ்சேவ லோகத்த²கிரியஞ்ச விசாரெத்வா அனேகேஹி காரணேஹி பு³த்³த⁴ஸ்ஸ வண்ணங் பா⁴ஸந்தி. பண்டி³தா ஹி தே ராஜானோ ஸத்³தா⁴ஸம்பன்னா ஸோதாபன்னாபி ஸகதா³கா³மினோபி அனாகா³மினோபி அரியஸாவகா, தே ஸப்³பே³பி லோகியஜடங் பி⁴ந்தி³த்வா பு³த்³தா⁴தீ³னங் திண்ணங் ரதனானங் வண்ணங் பா⁴ஸந்தி.
தத்த² திவிதோ⁴ பு³த்³த⁴வண்ணோ நாம சரியவண்ணோ ஸரீரவண்ணோ கு³ணவண்ணோதி. தத்ரிமே ராஜானோ சரியாய வண்ணங் ஆரபி⁴ங்ஸு – ‘‘து³க்கரங் வத கதங் ஸம்மாஸம்பு³த்³தே⁴ன கப்பஸதஸஹஸ்ஸாதி⁴கானி சத்தாரி அஸங்க்²யெய்யானி த³ஸ பாரமியோ த³ஸ உபபாரமியோ த³ஸ பரமத்த²பாரமியோதி ஸமதிங்ஸ பாரமியோ பூரெந்தேன ஞாதத்த²சரியங் லோகத்த²சரியங் பு³த்³த⁴த்த²சரியங் மத்த²கங் பாபெத்வா பஞ்ச மஹாபரிச்சாகே³ பரிச்சஜந்தேனா’’தி அட்³ட⁴ச்ச²க்கேஹி ஜாதகஸதேஹி பு³த்³த⁴வண்ணங் கதெ²ந்தா துஸிதப⁴வனங் பாபெத்வா
ஸீஹோ ஸேனாபதீதி ஏவங்னாமகோ ஸேனாய அதி⁴பதி. வேஸாலியஞ்ஹி ஸத்த ஸஹஸ்ஸானி ஸத்த ஸதானி ஸத்த ச ராஜானோ, தே ஸப்³பே³பி ஸன்னிபதித்வா ஸப்³பே³ஸங் மனங் க³ஹெத்வா ‘‘ரட்ட²ங் விசாரேதுங் ஸமத்த²ங் ஏகங் விசினதா²’’தி விசினந்தா ஸீஹராஜகுமாரங் தி³ஸ்வா ‘‘அயங் ஸக்கி²ஸ்ஸதீ’’தி ஸன்னிட்டா²னங் கத்வா தஸ்ஸ நிக³ண்ட²ஸாவகோதி நிக³ண்ட²ஸ்ஸ நாடபுத்தஸ்ஸ பச்சயதா³யகோ உபட்டா²கோ. ஜம்பு³தீ³பதலஸ்மிஞ்ஹி தயோ ஜனா நிக³ண்டா²னங் அக்³கு³பட்டா²கா – நாளந்தா³யங் உபாலி க³ஹபதி, கபிலபுரே வப்போ ஸக்கோ, வேஸாலியங் அயங் ஸீஹோ ஸேனாபதீதி. நிஸின்னோ ஹோதீதி ஸேஸராஜூனம்பி பரிஸாய அந்தரே ஆஸனானி பஞ்ஞாபயிங்ஸு, ஸீஹஸ்ஸ பன மஜ்ஜே² டா²னேதி தஸ்மிங் பஞ்ஞத்தே மஹாரஹே ராஜாஸனே நிஸின்னோ ஹோதி. நிஸ்ஸங்ஸயந்தி நிப்³பி³சிகிச்ச²ங் அத்³தா⁴ ஏகங்ஸேன. ந ஹேதே யஸ்ஸ வா தஸ்ஸ வா அப்பேஸக்க²ஸ்ஸ ஏவங் அனேகஸதேஹி காரணேஹி வண்ணங் பா⁴ஸந்தி.
யேன நிக³ண்டோ² நாடபுத்தோ தேனுபஸங்கமீதி நிக³ண்டோ² கிர நாடபுத்தோ ‘‘ஸசாயங் ஸீஹோ கஸ்ஸசிதே³வ ஸமணஸ்ஸ கோ³தமஸ்ஸ வண்ணங் கதெ²ந்தஸ்ஸ ஸுத்வா ஸமணங் கோ³தமங் த³ஸ்ஸனாய உபஸங்கமிஸ்ஸதி, மய்ஹங் பரிஹானி ப⁴விஸ்ஸதீ’’தி சிந்தெத்வா பட²மதரங்யேவ ஸீஹங் ஸேனாபதிங் ஏதத³வோச ‘‘ஸேனாபதி இமஸ்மிங் லோகே ‘அஹங் பு³த்³தோ⁴ அஹங் பு³த்³தோ⁴’தி ப³ஹூ வத³ந்தி, ஸசே த்வங் கஞ்சி த³ஸ்ஸனாய உபஸங்கமிதுகாமோ அஹோஸி, மங் புச்செ²ய்யாஸி, அஹங் தே யுத்தட்டா²னஞ்ஞேவ பேஸெஸ்ஸாமி, அயுத்தட்டா²னதோ நிவாரெஸ்ஸாமீ’’தி. ஸோ தங் கத²ங் அனுஸ்ஸரித்வா ‘‘ஸசே மங் பேஸெஸ்ஸதி, க³மிஸ்ஸாமி. நோ சே, ந க³மிஸ்ஸாமீ’’தி சிந்தெத்வா யேன நிக³ண்டோ² நாடபுத்தோ தேனுபஸங்கமி.
அத²ஸ்ஸ வசனங் ஸுத்வா நிக³ண்டோ² மஹாபப்³ப³தேன விய ப³லவஸோகேன ஒத்த²டோ ‘‘யத்த² தா³னிஸ்ஸாஹங் ‘‘கிங் பன த்வ’’ந்திஆதி³மாஹ. ஏவங் வத³ந்தோ சரந்தங் கோ³ணங் துண்டே³ பஹரந்தோ விய ஜலமானங் பதீ³பங் நிப்³பா³பெந்தோ விய ப⁴த்தப⁴ரிதங் பத்தங் நிகுஜ்ஜந்தோ விய ச ஸீஹஸ்ஸ உப்பன்னங் பீதிங் வினாஸேஸி. க³மிகாபி⁴ஸங்கா²ரோதி ஹத்தி²யானாதீ³னங் யோஜாபனக³ந்த⁴மாலாதி³க்³க³ஹணவஸேன பவத்தோ பயோகோ³. ஸோ படிப்பஸ்ஸம்பீ⁴தி ஸோ வூபஸந்தோ.
து³தியம்பி கோ²தி து³தியவாரம்பி. இமஸ்மிஞ்ச வாரே பு³த்³த⁴ஸ்ஸ வண்ணங் பா⁴ஸந்தா துஸிதப⁴வனதோ பட்டா²ய யாவ மஹாபோ³தி⁴பல்லங்கா த³ஸப³லஸ்ஸ ஹெட்டா² பாத³தலேஹி
ததியவாரே பன பு³த்³த⁴ஸ்ஸ வண்ணங் பா⁴ஸமானா ‘‘இதிபி ஸோ ப⁴க³வா’’தி ஸுத்தந்தபரியாயேனேவ பு³த்³த⁴கு³ணே கத²யிங்ஸு, ‘‘ஸ்வாக்கா²தோ ப⁴க³வதா த⁴ம்மோ’’திஆதி³னா ஸுத்தந்தபரியாயேனேவ த⁴ம்மகு³ணே, ‘‘ஸுப்படிபன்னோ ப⁴க³வதோ ஸாவகஸங்கோ⁴’’திஆதி³னா ஸுத்தந்தபரியாயேனேவ ஸங்க⁴கு³ணே ச கத²யிங்ஸு. ததோ ஸீஹோ சிந்தேஸி ‘‘இமேஸங் லிச்ச²வீராஜகுலானங் ததியதி³வஸதோ பட்டா²ய பு³த்³த⁴த⁴ம்மஸங்க⁴கு³ணே கதெ²ந்தானங் முக²ங் நப்பஹோதி, அத்³தா⁴ அனோமகு³ணஸமன்னாக³தோ ஸோ ப⁴க³வா, இமங் தா³னி உப்பன்னங் பீதிங் அவிஜஹித்வாவ அஹங் அஜ்ஜ ஸம்மாஸம்பு³த்³த⁴ங் பஸ்ஸிஸ்ஸாமீ’’தி. அத²ஸ்ஸ ‘‘கிஞ்ஹி மே கரிஸ்ஸந்தி நிக³ண்டா²’’தி விதக்கோ உத³பாதி³. தத்த² கிஞ்ஹி மே கரிஸ்ஸந்தீதி கிங் நாம மய்ஹங் நிக³ண்டா² கரிஸ்ஸந்தி. அபலோகிதா வா அனபலோகிதா வாதி ஆபுச்சி²தா வா அனாபுச்சி²தா வா. ந ஹி மே தே ஆபுச்சி²தா யானவாஹனஸம்பத்திஇஸ்ஸரியயஸவிஸேஸங் த³ஸ்ஸந்தி, நாபி அனாபுச்சி²தா மாரெஸ்ஸந்தி, அப²லங் ஏதேஸங் ஆபுச்ச²னந்தி அதி⁴ப்பாயோ.
தி³வா தி³வஸ்ஸாதி தி³வஸ்ஸ தி³வா மஜ்ஜ²ன்ஹிகே அதிக்கந்தமத்தே. வேஸாலியா நிய்யாஸீதி யதா² ஹி கி³ம்ஹகாலே தே³வே வுட்டே² உத³கங் ஸந்த³மானங் நதி³ங் ஓதரித்வா தோ²கமேவ க³ந்த்வா திட்ட²தி நப்பவத்ததி, ஏவங் ஸீஹஸ்ஸ பட²மதி³வஸே ‘‘த³ஸப³லங் பஸ்ஸிஸ்ஸாமீ’’தி உப்பன்னாய பீதியா நிக³ண்டே²ன படிபா³ஹிதகாலோ, யதா² து³தியதி³வஸே தே³வே வுட்டே² உத³கங் ஸந்த³மானங் நதி³ங் ஓதரித்வா தோ²கங்
யேன ப⁴க³வா தேனுபஸங்கமீதி ஆராமங் பவிஸந்தோ தூ³ரதோவ அஸீதிஅனுப்³யஞ்ஜனப்³யாமப்பபா⁴த்³வத்திங்ஸமஹாபுரிஸலக்க²ணானி ச²ப்³ப³ண்ணா க⁴னபு³த்³த⁴ரஸ்மியோ தி³ஸ்வா ‘‘ஏவரூபங் நாம புரிஸங் ஏவங் ஆஸன்னே வஸந்தங் எத்தகங் காலங் நாத்³த³ஸங், வஞ்சிதோ வதம்ஹி, அலாபா⁴ வத மே’’தி சிந்தெத்வா மஹானிதி⁴ங் தி³ஸ்வா த³லித்³த³புரிஸோ விய ஸஞ்ஜாதபீதிபாமோஜ்ஜோ யேன ப⁴க³வா தேனுபஸங்கமி. த⁴ம்மஸ்ஸ சானுத⁴ம்மங் ப்³யாகரொந்தீதி போ⁴தா கோ³தமேன வுத்தகாரணஸ்ஸ அனுகாரணங் கதெ²ந்தி. காரணவசனோ ஹெத்த² த⁴ம்ம-ஸத்³தோ³ ‘‘ஹேதும்ஹி ஞாணங் த⁴ம்மபடிஸம்பி⁴தா³’’திஆதீ³ஸு (விப⁴॰ 720) விய. காரணந்தி செத்த² ததா²பவத்தஸ்ஸ ஸத்³த³ஸ்ஸ அத்தோ² அதி⁴ப்பேதோ தஸ்ஸ பவத்திஹேதுபா⁴வதோ. அத்த²ப்பயுத்தோ ஹி ஸத்³த³ப்பயோகோ³. அனுகாரணந்தி ச ஸோ ஏவங் பரேஹி ததா² வுச்சமானோ. ஸஹத⁴ம்மிகோ வாதா³னுவாதோ³தி பரேஹி வுத்தகாரணேன ஸகாரணோ ஹுத்வா தும்ஹாகங் வாதோ³ வா ததோ பரங் தஸ்ஸ அனுவாதோ³ வா கோசி அப்பமத்தகோபி விஞ்ஞூஹி க³ரஹிதப்³ப³ங் டா²னங் காரணங் ந ஆக³ச்ச²தி. இத³ங் வுத்தங் ஹோதி – கிங் ஸப்³பா³காரேனபி தவ வாதே³ கா³ரய்ஹகாரணங் நத்தீ²தி. அனப்³ப⁴க்கா²துகாமாதி ந அபூ⁴தேன வத்துகாமா.
291-292. அத்தி² ஸீஹ பரியாயோதிஆதீ³னங் அத்தோ² வேரஞ்ஜகண்டே³ ஆக³தனயேனேவ வேதி³தப்³போ³. பரமேன அஸ்ஸாஸேனாதி சதுமக்³க³சதுப²லஸங்கா²தேன உத்தமஅஸ்ஸாஸேன. அஸ்ஸாஸாய த⁴ம்மங் தே³ஸேதீதி அஸ்ஸாஸனத்தா²ய ஸந்த²ம்ப⁴னத்தா²ய த⁴ம்மங் தே³ஸேதி. இதி ப⁴க³வா அட்ட²ஹங்கே³ஹி ஸீஹஸேனாபதிஸ்ஸ த⁴ம்மங் தே³ஸேதி.
293. அனுவிச்சகாரந்தி ஸாது⁴ ஹோதீதி ஸுந்த³ரோ ஹோதி. தும்ஹாதி³ஸஸ்மிஞ்ஹி மங் தி³ஸ்வா மங் ஸரணங் க³ச்ச²ந்தே நிக³ண்ட²ங் தி³ஸ்வா படாகங் பரிஹரெய்யுந்தி தே கிர ஏவரூபங் ஸாவகங் லபி⁴த்வா ‘‘அஸுகோ நாம ராஜா வா ராஜமஹாமத்தோ வா ஸெட்டி² வா அம்ஹாகங் ஸரணங் க³தோ ஸாவகோ ஜாதோ’’தி படாகங் உக்கி²பித்வா நக³ரே கோ⁴ஸெந்தா ஆஹிண்ட³ந்தி. கஸ்மா? ‘‘ஏவங் நோ மஹந்தபா⁴வோ ஆவி ப⁴விஸ்ஸதீ’’தி ச, ஸசே பனஸ்ஸ ‘‘கிமஹங் ஏதே ஸரணங் க³தோ’’தி விப்படிஸாரோ உப்பஜ்ஜெய்ய, தம்பி ஸோ ‘‘ஏதேஸங் மே ஸரணக³தபா⁴வங் ப³ஹூ ஜானந்தி, து³க்கரங் தா³னி படினிவத்திது’’ந்தி வினோதெ³த்வா ந படிக்கமிஸ்ஸதீதி ச. தேனாஹ ‘‘படாகங் பரிஹரெய்யு’’ந்தி. ஓபானபூ⁴தந்தி படியத்தஉத³பானோ விய டி²தங். குலந்தி தவ நிவேஸனங். தா³தப்³ப³ங் மஞ்ஞெய்யாஸீதி புப்³பே³பி த³ஸபி வீஸதிபி ஸட்டி²பி ஜனே ஆக³தே தி³ஸ்வா நத்தீ²தி அவத்வா தே³ஸி, இதா³னி மங் ஸரணங் க³தகாரணமத்தேனேவ மா இமேஸங் தெ³ய்யத⁴ம்மங் உபச்சி²ந்தி³த்த², ஸம்பத்தானஞ்ஹி தா³தப்³ப³மேவாதி ஓவத³தி. ஸுதங் மே தங் ப⁴ந்தேதி குதோ ஸுதங்? நிக³ண்டா²னங் ஸந்திகா. தே கிர குலக⁴ரேஸு ஏவங் பகாஸெந்தி ‘‘மயங் யஸ்ஸ கஸ்ஸசி ஸம்பத்தஸ்ஸ தா³தப்³ப³ந்தி வதா³ம, ஸமணோ பன கோ³தமோ ‘மய்ஹமேவ தா³னங் தா³தப்³ப³ங்…பே॰… ந அஞ்ஞேஸங் ஸாவகானங் தி³ன்னங் மஹப்ப²ல’ந்தி ஏவங் வத³தீ’’தி. தங் ஸந்தா⁴ய அயங் ‘‘ஸுதங் மே த’’ந்திஆதி³மாஹ.
294. பவத்தமங்ஸந்தி பகதியா பவத்தங் கப்பியமங்ஸங், மூலங் க³ஹெத்வா அந்தராபணே பரியேஸாஹீதி அதி⁴ப்பாயோ. ஸம்ப³ஹுலா நிக³ண்டா²தி பஞ்சஸதமத்தா நிக³ண்டா². தூ²லங் பஸுந்தி தூ²லங் மஹாஸரீரங் கோ³கண்ணமஹிங்ஸஸூகரஸங்கா²தங் பஸுங். உத்³தி³ஸ்ஸகதந்தி அத்தானங் உத்³தி³ஸித்வா கதங், மாரிதந்தி அத்தோ². படிச்சகம்மந்தி எத்த² கம்ம-ஸத்³தோ³ கம்மஸாத⁴னோ அதீதகாலிகோதி ஆஹ ‘‘அத்தானங் படிச்ச கத’’ந்தி. நிமித்தகம்மஸ்ஸேதங் அதி⁴வசனங் ‘‘படிச்ச கம்மங் பு²ஸதீ’’திஆதீ³ஸு (ஜா॰ 1.4.75) விய. நிமித்தகம்மஸ்ஸாதி நிமித்தபா⁴வேன லத்³த⁴ப்³ப³கம்மஸ்ஸ, ந கரணகாராபனவஸேன. படிச்சகம்மங் எத்த² அத்தீ²தி மங்ஸங் படிச்சகம்மங் யதா² ‘‘பு³த்³த⁴ங் ஏதஸ்ஸ அத்தீ²தி பு³த்³தோ⁴’’தி. அத² வா படிச்ச கம்மங் பு²ஸதீதி உபகண்ணகேதி கண்ணமூலே. அலந்தி படிக்கே²பவசனங், ஹோது கிங் இமினாதி அத்தோ². ந ச பன தேதி ஏதே ஆயஸ்மந்தா தீ³க⁴ரத்தங் அவண்ணகாமா ஹுத்வா அவண்ணங் பா⁴ஸந்தாபி அப்³பா⁴சிக்க²ந்தா ந ஜிரித³ந்தி, அப்³ப⁴க்கா²னஸ்ஸ அந்தங் ந க³ச்ச²ந்தீதி அத்தோ². அத² வா லஜ்ஜனத்தே² இத³ங் ஜிரித³ந்தீதி பத³ங் த³ட்ட²ப்³ப³ங், ந லஜ்ஜந்தீதி அத்தோ².
ஸீஹஸேனாபதிவத்து²கதா²வண்ணனா நிட்டி²தா.
கப்பியபூ⁴மிஅனுஜானநகதா²வண்ணனா
295. அபி⁴லாபமத்தந்தி ஆமிஸகா²த³னத்தா²யாதி தத்த² தத்த² ச²ட்³டி³தஸ்ஸ ஆமிஸஸ்ஸ கா²த³னத்தா²ய. அனுப்பகே³யேவாதி பாதோயேவ. ஓரவஸத்³த³ந்தி மஹாஸத்³த³ங். தங் பன அவத்வாபீதி அந்த⁴கட்ட²கதா²யங்வுத்தனயேன அவத்வாபி. பி-ஸத்³தே³ன ததா² வசனம்பி அனுஜானாதி. அட்ட²கதா²ஸு வுத்தனயேனாதி ஸேஸஅட்ட²கதா²ஸு வுத்தனயேன. ‘‘கப்பியகுடிங் கரோமா’தி வா, ‘கப்பியகுடீ’தி வா வுத்தே ஸாதா⁴ரணலக்க²ண’’ந்தி ஸப்³ப³அட்ட²கதா²ஸு வுத்தஉஸ்ஸாவனந்திகாகுடிகரணலக்க²ணங். சயந்தி அதி⁴ட்டா²னங். யதோ பட்டா²யாதி யதோ இட்ட²கதோ ஸிலதோ மத்திகாபிண்ட³தோ வா பட்டா²ய. பட²மிட்ட²காதீ³னங் ஹெட்டா² ந வட்டந்தீதி பி⁴த்தியா பட²மிட்ட²காதீ³னங் ஹெட்டா² பூ⁴மியங் பதிட்டா²பியமானா இட்ட²காத³யோ பூ⁴மிக³திகத்தா ‘‘கப்பியகுடிங் கரோமா’’தி வத்வா பதிட்டா²பேதுங் ந வட்டந்தி. யதி³ ஏவங் பூ⁴மியங் நிக²ணித்வா பதிட்டா²பியமானா த²ம்பா⁴ கஸ்மா ததா² வத்வா பதிட்டா²பேதுங் வட்டந்தீதி ஆஹ ‘‘த²ம்பா⁴ பன…பே॰… வட்டந்தீ’’தி. ஸங்க⁴ஸந்தகமேவாதி வாஸத்தா²ய கதங் ஸங்கி⁴கஸேனாஸனங் ஸந்தா⁴ய வத³தி. பி⁴க்கு²ஸந்தகந்தி வாஸத்தா²ய ஏவ கதங் பி⁴க்கு²ஸ்ஸ புக்³க³லிகஸேனாஸனங். முக²ஸன்னிதீ⁴தி இமினா அந்தோவுத்த²து³க்கடமேவ தீ³பிதங்.
கப்பியபூ⁴மிஅனுஜானநகதா²வண்ணனா நிட்டி²தா.
கேணியஜடிலவத்து²கதா²வண்ணனா
300. யேன ஆபணங் தத³வஸரீதிஆதீ³ஸு ஆபணந்தி ஏகஸ்ஸ நிக³மஸ்ஸேதங் அதி⁴வசனங். தஸ்மிங் கிர நிக³மே வீஸதி ஆபணமுக²ஸஹஸ்ஸானி விப⁴த்தானி அஹேஸுங். இதி ஸோ ஆபணானங் உஸ்ஸன்னத்தா ‘‘ஆபண’’ந்த்வேவ ஸங்க²ங் க³தோ. தஸ்ஸ பன நிக³மஸ்ஸ அவிதூ³ரே நதீ³தீரே க⁴னச்சா²யோ ரமணீயபூ⁴மிபா⁴கோ³ மஹாவனஸண்டோ³, தஸ்மிங் ப⁴க³வா விஹரதி. கேணியோதி தஸ்ஸ நாமங். ஜடிலோதி ஆஹரிமஜடாத⁴ரோ தாபஸோ. ஸோ கிர ப்³ராஹ்மணமஹாஸாலோ, த⁴னரக்க²ணத்தா²ய பன தாபஸபப்³ப³ஜ்ஜங் ஸமாதா³ய ரஞ்ஞோ பண்ணாகாரங் த³த்வா பூ⁴மிபா⁴க³ங் க³ஹெத்வா தத்த² அஸ்ஸமங் காரெத்வா பஞ்சஹி ஸகடஸதேஹி வணிஜ்ஜங் பயோஜெத்வா குலஸஹஸ்ஸஸ்ஸ நிஸ்ஸயோ ஹுத்வா வஸதி. அஸ்ஸமேபி சஸ்ஸ ஏகோ தாலருக்கோ² தி³வஸே தி³வஸே ஏகங் ஸோவண்ணமயங் ப²லங் முஞ்சதீதி வத³ந்தி. ஸோ தி³வா காஸாவானி தா⁴ரேதி, ஜடா ச ப³ந்த⁴தி, ரத்திங் காமஸம்பத்திங் அனுப⁴வதி.
பவத்தாரோதி (தீ³॰ நி॰ அட்ட²॰ 1.285; ம॰ நி॰ அட்ட²॰ 2.427; அ॰ நி॰ அட்ட²॰ 3.5.192) பவத்தயிதாரோ யேஸந்தி யேஸங் ஸந்தகங். மந்தபத³ந்தி மந்தஸத்³தே³ ப³ஹிகத்வா ரஹோ பா⁴ஸிதப்³ப³ட்டே²ன மந்தா ஏவ தங்தங்அத்த²படிபத்திஹேதுதாய பத³ந்தி மந்தபத³ங், வேத³வசனங். கீ³தந்தி அட்ட²காதீ³ஹி த³ஸஹி போராணப்³ராஹ்மணேஹி உதா³த்தானுதா³த்தாதி³ஸரஸம்பத்திவஸேன ஸஜ்ஜா²யிதங். பவுத்தந்தி பாவசனவஸேன அஞ்ஞேஸங் வுத்தங், வாசிதந்தி அத்தோ². ஸமிஹிதந்தி ஸமுபப்³யூள்ஹங் ராஸிகதங், இருவேத³யஜுவேத³ஸாமவேதா³தி³வஸேன தத்தா²பி பச்சேகங் மந்தப்³ராஹ்மணாதி³வஸேன ஸஜ்ஜா²யனவாசகாதி³வஸேன ச பிண்ட³ங் கத்வா ட²பிதந்தி அத்தோ². தத³னுகா³யந்தீதி ஏதரஹி ப்³ராஹ்மணா தங் தேஹி புப்³பே³ கீ³தங் அனுகா³யந்தி அனுஸஜ்ஜா²யந்தி. தத³னுபா⁴ஸந்தீதி தங் அனுபா⁴ஸந்தி, இத³ங் புரிமஸ்ஸேவ வேவசனங். பா⁴ஸிதமனுபா⁴ஸந்தீதி தேஹி பா⁴ஸிதங் ஸஜ்ஜா²யிதங் அனுஸஜ்ஜா²யந்தி. வாசிதமனுவாசெந்தீதி தேஹி அஞ்ஞேஸங் வாசிதங் அனுவாசெந்தி. ஸெய்யதி²த³ந்தி தே கதமேதி அத்தோ². அட்ட²கோதிஆதீ³னி தேஸங் நாமானி. தே கிர தி³ப்³ப³சக்கு²பரிப⁴ண்டே³ன யதா²கம்மூபக³ஞாணேன ஸத்தானங் கம்மஸ்ஸகதாதி³ங் புப்³பே³னிவாஸஞாணேன ரத்தூபரதா. அதிக்கந்தே மஜ்ஜ²ன்ஹிகே யாவ ஸூரியத்த²ங்க³மனா போ⁴ஜனங் விகாலபோ⁴ஜனங் நாம, ததோ விரதத்தா விரதா விகாலபோ⁴ஜனா. படியாதா³பெத்வாதி ஸப்பிமது⁴ஸக்கராதீ³ஹி சேவ மரிசேஹி ச ஸுஸங்க²தங் பானங் படியாதா³பெத்வா.
‘‘மஹா கோ² கேணிய பி⁴க்கு²ஸங்கோ⁴’’தி கஸ்மா ப⁴க³வா புனப்புனங் படிக்கி²பி? தித்தி²யானங் படிக்கே²பபஸன்னதாய. தித்தி²யா ஹி ‘‘அஹோ வதாயங் அப்பிச்சோ², யோ நிமந்தியமானோபி ந ஸாதி³யதீ’’தி உபனிமந்தியமானஸ்ஸ படிக்கே²பே பஸீத³ந்தீதி கேசி, அகாரணஞ்சேதங். நத்தி² பு³த்³தா⁴னங் பச்சயஹேது ஏவரூபங் கோஹஞ்ஞங், அயங் பன அட்³ட⁴தேலஸானி பி⁴க்கு²ஸதானி தி³ஸ்வா எத்தகானங்யேவ பி⁴க்க²ங் படியாதெ³ஸ்ஸதி, ஸ்வேவ ஸேலோ ப்³ராஹ்மணோ தீஹி புரிஸஸதேஹி ஸத்³தி⁴ங் பப்³ப³ஜிஸ்ஸதி, அயுத்தங் கோ² பன நவகே அஞ்ஞதோ பேஸெத்வா இமேஹேவ ஸத்³தி⁴ங் க³ந்துங், இமே வா அஞ்ஞதோ பேஸெத்வா நவகேஹி ஸத்³தி⁴ங் க³ந்துங். அதா²பி ஸப்³பே³வ க³ஹெத்வா க³மிஸ்ஸாமி, பி⁴க்கா²ஹாரோ நப்பஹொஸ்ஸதி. ததோ பி⁴க்கூ²ஸு பிண்டா³ய சரந்தேஸு மனுஸ்ஸா உஜ்ஜா²யிஸ்ஸந்தி ‘‘சிரஸ்ஸம்பி கேணியோ ஸமணங் கோ³தமங் நிமந்தெத்வா யாபனமத்தங் தா³துங் நாஸக்கீ²’’தி, ஸயஞ்ச விப்படிஸாரீ ப⁴விஸ்ஸதி. படிக்கே²பே பன கதே ‘‘ஸமணோ கோ³தமோ புனப்புனங் ‘த்வஞ்ச ப்³ராஹ்மணேஸு அபி⁴ப்பஸன்னோ’தி ப்³ராஹ்மணானங் நாமங் க³ண்ஹாதீ’’தி சிந்தெத்வா ப்³ராஹ்மணேபி நிமந்தேதுகாமோ ப⁴விஸ்ஸதி, ததோ கிஞ்சாபி கோ² போ⁴ கோ³தமாதி இமினா இத³ங் தீ³பேதி ‘‘போ⁴ கோ³தம, கிங் ஜாதங், யதி³ அஹங் ப்³ராஹ்மணேஸு அபி⁴ப்பஸன்னோ, அதி⁴வாஸேது ப⁴வங் கோ³தமோ, அஹங் ப்³ராஹ்மணானம்பி தா³துங் ஸக்கோமி தும்ஹாகம்பீ’’தி. ட²பெத்வா த⁴ஞ்ஞப²லரஸந்தி எத்த² தண்டு³லதோ⁴வனோத³கம்பி த⁴ஞ்ஞரஸோயேவாதி வத³ந்தி. அனுஜானாமி, பி⁴க்க²வே, உச்சு²ரஸந்தி எத்த² நிக்கஸடோ உச்சு²ரஸோ ஸத்தாஹகாலிகோதி வேதி³தப்³ப³ங்.
இமாஹி கா³தா²ஹீதி (ம॰ நி॰ அட்ட²॰ 2.400) இமாஹி கேணியஸ்ஸ சித்தானுகூலாஹி கா³தா²ஹி. தத்த² அக்³கி³பரிசரியங் வினா ப்³ராஹ்மணானங் யஞ்ஞாபா⁴வதோ ‘‘அக்³கி³ஹுத்தமுகா² யஞ்ஞா’’தி வுத்தங், அக்³கி³ஹுத்தஸெட்டா² அக்³கி³ஜுஹனப்பதா⁴னாதி அத்தோ². ப்³ராஹ்மணா ஹி ‘‘அக்³கி³முகா² தே³வா’’தி அக்³கி³ஜுஹனபுப்³ப³கங் யஞ்ஞங் வித³ஹந்தி. வேதே³ ஸஜ்ஜா²யந்தேஹி பட²மங் ஸஜ்ஜா²யிதப்³ப³தோ ஸாவித்தீ ‘‘ச²ந்த³ஸோ முக²’’ந்தி வுத்தா, ஸாவித்தீ வேத³ஸ்ஸ புப்³ப³ங்க³மாதி அத்தோ² தங்புப்³ப³கத்தா வேத³ஸவனஸ்ஸ. மனுஸ்ஸானங் ஸெட்ட²பா⁴வதோ ராஜா ‘‘முக²’’ந்தி வுத்தோ. ஓகா³ஹந்தீனங் நதீ³னங் ஆதா⁴ரபா⁴வதோ க³ந்தப்³ப³ட்டா²னபா⁴வேன படிஸரணதோ ச ஸாக³ரோ ‘‘முக²’’ந்தி வுத்தோ. சந்த³ஸமாயோகே³ன ‘‘அஜ்ஜ கத்திகா, அஜ்ஜ ரோஹிணீ’’தி ஸஞ்ஞாயனதோ நக்க²த்தானி அபி⁴ப⁴வித்வா ஆலோககரணதோ நக்க²த்தேஹி அதிவிஸேஸஸொம்மபா⁴வதோ ச ‘‘நக்க²த்தானங் முக²ங் சந்தோ³’’தி வுத்தங். ‘‘தீ³பஸிகா² அக்³கி³ஜாலா அஸனிவிசக்க’’ந்தி ஏவமாதீ³னங் தபந்தானங் விஜ்ஜுலதானங் அக்³க³த்தா ஆதி³ச்சோ ‘‘தபதங் முக²’’ந்தி வுத்தோ. த³க்கி²ணெய்யானங் பன அக்³க³த்தா விஸேஸேன தஸ்மிங் ஸமயே பு³த்³த⁴ப்பமுக²ங் ஸங்க⁴ங் ஸந்தா⁴ய ‘‘புஞ்ஞங் ஆகங்க²மானானங், ஸங்கோ⁴ வே யஜதங் முக²’’ந்தி வுத்தங். தேன ஸங்கோ⁴ புஞ்ஞஸ்ஸ ஆயமுக²ங் அக்³க³த³க்கி²ணெய்யபா⁴வேனாதி த³ஸ்ஸேதி.
கேணியஜடிலவத்து²கதா²வண்ணனா நிட்டி²தா.
ரோஜமல்லவத்து²கதா²வண்ணனா
301. ரோஜவத்து²ம்ஹி விஹாரோதி க³ந்த⁴குடிங் ஸந்தா⁴ய ஆஹங்ஸு. அதரமானோதி அதுரந்தோ, ஸணிகங் பத³ப்பமாணட்டா²னே பத³ங் நிக்கி²பந்தோ வத்தங் கத்வா ஸுஸம்மட்ட²ங் முத்தாத³லஸிந்து³வாரஸந்த²ரஸதி³ஸங் வாலிகங் அவினாஸெந்தோதி அத்தோ². ஆளிந்த³ந்தி பமுக²ங். உக்காஸித்வாதி உக்காஸிதஸத்³த³ங் கத்வா. அக்³க³ளந்தி கவாடங். ஆகோடேஹீதி அக்³க³னகே²ன ஈஸகங் குஞ்சிகசி²த்³த³ஸமீபே கோடேஹீதி வுத்தங் ஹோதி. த்³வாரங் கிர அதிஉபரி அமனுஸ்ஸா, அதிஹெட்டா² திரச்சா²னஜாதிகா கோடெந்தி, ததா² அகோடெத்வா மஜ்ஜே² சி²த்³த³ஸமீபே மனுஸ்ஸா விவரி ப⁴க³வா த்³வாரந்தி ந ப⁴க³வா உட்டா²ய த்³வாரங் விவரி, விவரதூதி பன ஹத்த²ங் பஸாரேஸி. ததோ ‘‘ப⁴க³வா தும்ஹேஹி அனேகாஸு கப்பகோடீஸு தா³னங் த³த³மானேஹி ந ஸஹத்தா² த்³வாரவிவரணகம்மங் கத’’ந்தி ஸயமேவ த்³வாரங் விவடங். தங் பன யஸ்மா ப⁴க³வதோ மனேன விவடங், தஸ்மா ‘‘விவரி ப⁴க³வா த்³வார’’ந்தி வுத்தங்.
ரோஜமல்லவத்து²கதா²வண்ணனா நிட்டி²தா.
வுட்³ட⁴பப்³ப³ஜிதவத்து²கதா²வண்ணனா
303. ஆதுமாவத்து²ம்ஹி அஞ்ஞதரோ வுட்³ட⁴பப்³ப³ஜிதோதி ஸுப⁴த்³தோ³ நாம அஞ்ஞதரோ பி⁴க்கு² வுட்³ட⁴காலே பப்³ப³ஜிதத்தா ‘‘வுட்³ட⁴பப்³ப³ஜிதோ’’தி வுத்தோ. த்³வே தா³ரகாதி ஸாமணேரபூ⁴மியங் டி²தா த்³வே புத்தா. நாளியாவாபகேனாதி நாளியா சேவ த²விகாய ச. ஸங்ஹரிங்ஸூதி யஸ்மா மனுஸ்ஸா தே தா³ரகே மஞ்ஜுபா⁴ணினே படிபா⁴னவந்தே தி³ஸ்வா காரேதுகாமாபி அகாரேதுகாமாபி காரெந்தியேவ, கதகாலே ச ‘‘கிங் க³ண்ஹிஸ்ஸத² தாதா’’தி புச்ச²ந்தி. தே வத³ந்தி ‘‘ந அம்ஹாகங் அஞ்ஞேன கேனசி அத்தோ², பிதா பன நோ ப⁴க³வதோ ஆக³தகாலே யாகு³தா³னங் காதுகாமோ’’தி. தங் ஸுத்வா மனுஸ்ஸா அபரிக³ணெத்வாவ யங் தே ஸக்கொந்தி ஹரிதுங், ஸப்³ப³ங் தெ³ந்தி. யம்பி ந ஸக்கொந்தி, மனுஸ்ஸேஹி பேஸெந்தி. தஸ்மா தே தா³ரகா ப³ஹுங் லோணம்பி தேலம்பி ஸப்பிம்பி தண்டு³லம்பி கா²த³னீயம்பி ஸங்ஹரிங்ஸு.
ஆதுமாயங் விஹரதீதி ஆதுமங் நிஸ்ஸாய விஹரதி. பு⁴ஸாகா³ரேதி பு⁴ஸமயே அகா³ரகே. தத்த² கிர மஹந்தங் பலாலபுஞ்ஜங் அப்³ப⁴ந்தரதோ பலாலங் நிக்கட்³டி⁴த்வா ஸாலாஸதி³ஸங் பப்³ப³ஜிதானங் வஸனயொக்³க³ட்டா²னஸதி³ஸங் கதங், ததா³ ப⁴க³வா தத்த² வஸி. அத² ப⁴க³வதி ஆதுமங் ஆக³ந்த்வா பு⁴ஸாகா³ரகங் பவிட்டே² ஸுப⁴த்³தோ³ ஸாயன்ஹஸமயங் கா³மத்³வாரங் க³ந்த்வா மனுஸ்ஸே ஆமந்தேஸி ‘‘உபாஸகா நாஹங் தும்ஹாகங் ஸந்திகா அஞ்ஞங் கிஞ்சி பச்சாஸீஸாமி, மய்ஹங் தா³ரகேஹி ஆனீததேலாதீ³னியேவ ஸங்க⁴ஸ்ஸ பஹொந்தி, ஹத்த²கம்மமத்தங் மே தே³தா²’’தி. கிங், ப⁴ந்தே, கரோமாதி? ‘‘இத³ஞ்சித³ஞ்ச க³ண்ஹதா²’’தி ஸப்³பூ³பகரணானி கா³ஹெத்வா விஹாரே உத்³த⁴னானி காரெத்வா ஏகங் காளகங் காஸாவங் நிவாஸெத்வா தாதி³ஸமேவ பாருபித்வா ‘‘இத³ங் கரோத², இத³ங் கரோதா²’’தி ஸப்³ப³ரத்திங் விசாரெந்தோ ஸதஸஹஸ்ஸங் விஸ்ஸஜ்ஜெத்வா போ⁴ஜ்ஜயாகு³ஞ்ச போ⁴ஜ்ஜயாகு³ நாம பட²மங் பு⁴ஞ்ஜித்வா பாதப்³ப³யாகு³, தத்த² ஸப்பிமது⁴பா²ணிதமச்ச²மங்ஸபுப்ப²ப²லரஸாதி³ யங்கிஞ்சி கா²த³னீயங் நாம, ஸப்³ப³ங் பவிஸதி, கீளிதுகாமானங் ஸீஸமக்க²னயொக்³கா³ ஹோதி ஸுக³ந்த⁴க³ந்தா⁴.
அத² ‘‘அத² கோ² ஸோ வுட்³ட⁴பப்³ப³ஜிதோ தஸ்ஸா ரத்தியா அச்சயேன ப³ஹுதரங் யாகு³ங் படியாதா³பெத்வா ப⁴க³வதோ உபனாமேஸீ’’தி. ஜானந்தாபி ததா²க³தா புச்ச²ந்தீதிஆதி³ வுத்தனயமேவ. குதாயந்தி குதோ அயங். ஸேஸமெத்த² உத்தானமேவ.
304. த³ஸபா⁴க³ங் த³த்வாதி த³ஸமபா⁴க³ங் த³த்வா. தேனேவாஹ ‘‘த³ஸ கொட்டா²ஸே கத்வா ஏகோ கொட்டா²ஸோ பூ⁴மிஸாமிகானங் தா³தப்³போ³’’தி.
வுட்³ட⁴பப்³ப³ஜிதவத்து²கதா²வண்ணனா நிட்டி²தா.
சதுமஹாபதே³ஸகதா²வண்ணனா
305. பரிமத்³த³ந்தாதி உபபரிக்க²ந்தா. பத்துண்ணதே³ஸே ஸஞ்ஜாதவத்த²ங் பத்துண்ணங். கோஸெய்யவிஸேஸோதி ஹி அபி⁴தா⁴னகோஸே வுத்தங். சீனதே³ஸே ஸோமாரதே³ஸே ச ஸஞ்ஜாதவத்தா²னி சீனஸோமாரபடானி. பத்துண்ணாதீ³னி தீணி கோஸெய்யஸ்ஸ அனுலோமானி பாணகேஹி கதஸுத்தமயத்தா. இத்³தி⁴மயிகங் ஏஹிபி⁴க்கூ²னங் புஞ்ஞித்³தி⁴யா நிப்³ப³த்தசீவரங். தங் கோ²மாதீ³னங் அஞ்ஞதரங் ஹோதீதி தேஸங்யேவ அனுலோமங். தே³வதாஹி தி³ன்னசீவரங் தே³வத³த்தியங். தங் கப்பருக்கே² நிப்³ப³த்தங் ஜாலினீதே³வகஞ்ஞாய அனுருத்³த⁴த்தே²ரஸ்ஸ தி³ன்னவத்த²ஸதி³ஸங். தம்பி கோ²மாதீ³னஞ்ஞேவ அனுலோமங் ஹோதி தேஸு அஞ்ஞதரபா⁴வதோ. த்³வே படா தே³ஸனாமேனேவ வுத்தாதி தேஸங் ஸரூபத³ஸ்ஸனபரமேதங், நாஞ்ஞங் நிவத்தனபரங் பத்துண்ணபடஸ்ஸபி தே³ஸனாமேனேவ வுத்தத்தா. தும்பா³தி பா⁴ஜனானி ப²லதும்போ³தி லாபு³ஆதி³. உத³கதும்போ³தி உத³குக்கி²பனககுடகோ. கிலஞ்ஜச்ச²த்தந்தி வேளுவிலீவேஹி வாயித்வா கதச²த்தங். ஸம்பி⁴ன்னரஸந்தி ஸம்மிஸ்ஸிதரஸங். பானகங் படிக்³க³ஹிதங் ஹோதீதி அம்ப³பானாதி³பானகங் படிக்³க³ஹிதங் தேன தத³ஹுபடிக்³க³ஹிதேன ஸத்³தி⁴ந்தி தேன ஸத்தாஹகாலிகேன தத³ஹுபடிக்³க³ஹிதேன ஸத்³தி⁴ங். ஸேஸமெத்த² ஸுவிஞ்ஞெய்யமேவ.
சதுமஹாபதே³ஸகதா²வண்ணனா நிட்டி²தா.
பே⁴ஸஜ்ஜக்க²ந்த⁴கவண்ணனா நிட்டி²தா.