7. கதி²னக்க²ந்த⁴கங்
கதி²னானுஜானநகதா²வண்ணனா
306. கதி²னக்க²ந்த⁴கே ஸீஸவஸேனாதி பதா⁴னங்க³வஸேன. ‘‘கதி²னந்தி பஞ்சானிஸங்ஸே அந்தோகரணஸமத்த²தாய தி²ரந்தி அத்தோ²’’தி க³ண்டி²பதே³ஸு வுத்தங். ‘‘ஸோ நேஸங் ப⁴விஸ்ஸதீ’’தி யுஜ்ஜதீதி ‘‘ஸோ தும்ஹாக’’ந்தி அவத்வா ‘‘நேஸ’’ந்தி வசனங் யுஜ்ஜதி. யே அத்த²தகதி²னாதி ந கேவலங் தும்ஹாகமேவ, யே அஞ்ஞேபி அத்த²தகதி²னா, தேஸம்பி ப⁴விஸ்ஸதீதி அத்தோ². அனாமந்தெத்வா சரணந்தி சாரித்தஸிக்கா²பதே³ வுத்தனயேன அனாபுச்சி²த்வா குலேஸு சரணங். மதகசீவரந்தி மதஸ்ஸ ஸந்தகங் சீவரங். தத்ருப்பாதே³ன ஆப⁴தந்தி விஹாரஸந்தகேன கெ²த்தவத்து²ஆதி³னா ஆனீதங்.
பட²மபவாரணாய பவாரிதாதி இத³ங் வஸ்ஸச்சே²த³ங் அகத்வா வஸ்ஸங்வுத்த²பா⁴வஸந்த³ஸ்ஸனத்த²ங் வுத்தங் அந்தராயேன அப்பவாரிதானம்பி வுத்த²வஸ்ஸானங் கதி²னத்தா²ரஸம்ப⁴வதோ. தேனேவ ‘‘அப்பவாரிதா வா’’தி அவத்வா ‘‘சி²ன்னவஸ்ஸா வா பச்சி²மிகாய உபக³தா வா ந லப⁴ந்தீ’’தி எத்தகமேவ வுத்தங். அஞ்ஞஸ்மிங் விஹாரே வுத்த²வஸ்ஸாபி ந லப⁴ந்தீதி நானாஸீமாய அஞ்ஞஸ்மிங் விஹாரே வுத்த²வஸ்ஸா இமஸ்மிங் விஹாரே கதி²னத்தா²ரங் ந லப⁴ந்தீதி அத்தோ². க²லிமக்கி²தஸாடகோதி அஹதவத்த²ங் ஸந்தா⁴ய வுத்தங். தா³னகம்மவாசாதி கதி²னது³ஸ்ஸதா³னகம்மவாசா. அகாதுங் ந லப்³ப⁴தீதி இமினா அனாத³ரியேன அகரொந்தஸ்ஸ து³க்கடந்தி தீ³பேதி. கம்மவாசா பன ஏகாயேவ வட்டதீதி கதி²னத்தா²ரஸாடகஸ்ஸ தா³னகாலே வுத்தா ஏகாயேவ கம்மவாசா வட்டதி. புன தஸ்ஸ அஞ்ஞஸ்மிங் வத்தே² தி³ய்யமானே கம்மவாசாய தா³தப்³ப³கிச்சங் நத்தி², அபலோகனமேவ அலந்தி அதி⁴ப்பாயோ.
308. மஹாபூ⁴மிகந்தி மஹாவிஸயங், சதுவீஸதிஆகாரவந்ததாய மஹாவித்தா²ரிகந்தி வுத்தங் ஹோதி. பஞ்சகந்தி பஞ்சக²ண்ட³ங். ஏஸ நயோ ஸேஸேஸுபி. பட²மசிமிலிகாதி கதி²னவத்த²தோ அஞ்ஞா அத்தனோ பகதிசிமிலிகா. ‘‘குச்சி²சிமிலிகங் கத்வா ஸிப்³பி³தமத்தேனாதி தி²ரஜிண்ணானங் சிமிலிகானங் ஏகதோ கத்வா ஸிப்³ப³னஸ்ஸேதங் அதி⁴வசன’’ந்தி க³ண்டி²பதே³ஸு வுத்தங். மஹாபச்சரியங் குருந்தி³யஞ்ச பிட்டி²அனுவாதாரோபனமத்தேனாதி தீ³க⁴தோ அனுவாதஸ்ஸ ஆரோபனமத்தேன. குச்சி²அனுவாதாரோபனமத்தேனாதி புது²லதோ அனுவாதஸ்ஸ ஆரோபனமத்தேன. ஸாருப்பங் ஹோதீதி ஸமணஸாருப்பங் ஹோதி. ரத்தினிஸ்ஸக்³கி³யேனாதி ரத்திஅதிக்கந்தேன.
கதி²னானுஜானநகதா²வண்ணனா நிட்டி²தா.
ஆதா³யஸத்தகாதி³கதா²வண்ணனா
311. அயந்தி ஆஸாவச்சே²தி³கோ கதி²னுத்³தா⁴ரோ. இத⁴ ந வுத்தோதி பாளியங் மாதிகாபத³பா⁴ஜனே ஸவனந்திகானந்தரங் ந வுத்தோ. தத்தா²தி தஸ்மிங் ஸீமாதிக்கந்திகே கதி²னுத்³தா⁴ரே. ‘‘ஸீமாதிக்கந்திகோ நாம சீவரகாலஸீமாதிக்கந்திகோ’’தி கேனசி வுத்தங். ‘‘ப³ஹிஸீமாயங் சீவரகாலஸமயஸ்ஸ அதிக்கந்தத்தா ஸீமாதிக்கந்திகோ’’தி அயங் அம்ஹாகங் க²ந்தி. ஸஹுப்³பா⁴ரே ‘‘ஸோ கதசீவரோ’’தி பாடோ² தி³ஸ்ஸதி, ஏவஞ்ச ஸதி சீவரபலிபோ³தோ⁴ பட²மங் சி²ஜ்ஜதீதி விஞ்ஞாயதி, இத⁴ பன பரிவாரபாளியஞ்ச ‘‘த்³வே பலிபோ³தா⁴ அபுப்³ப³ங் அசரிமங் சி²ஜ்ஜந்தீ’’தி (பரி॰ 415) வசனதோ தங் ந ஸமேதி, தஸ்மா வீமங்ஸிதப்³ப³மெத்த² காரணங்.
312. ‘‘ஸமாதா³யவாரோ ஆதா³யவாரஸதி³ஸோ, உபஸக்³க³மத்தமெத்த² விஸேஸோ’’தி க³ண்டி²பதே³ஸு வுத்தங். கேசி பன ‘‘ஸப்³ப³ங் அத்தனோ பரிக்கா²ரங் அனவஸேஸெத்வா பக்கமந்தோ ‘ஸமாதா³ய பக்கமதீ’தி வுச்சதீ’’தி வத³ந்தி. புன ஸமாதா³யவாரேபி தேயேவ த³ஸ்ஸிதாதி ஸம்ப³ந்தோ⁴. விப்பகதசீவரே பக்கமனந்திகஸ்ஸ கதி²னுத்³தா⁴ரஸ்ஸ அஸம்ப⁴வதோ ‘‘யதா²ஸம்ப⁴வ’’ந்தி வுத்தங். பக்கமனந்திகோ ஹி கதி²னுத்³தா⁴ரோ நிட்டி²தசீவரஸ்ஸேவ வஸேன வுத்தோ ‘‘பி⁴க்கு² அத்த²தகதி²னோ கதசீவரங் ஆதா³ய பக்கமதீ’’தி வுத்தத்தா, தஸ்மா ஸோ விப்பகதசீவரோ ந ஸம்ப⁴வதீதி ச²ளேவ உப்³பா⁴ரா தத்த² த³ஸ்ஸிதா.
தத்ராயங் ஆதி³தோ பட்டா²ய வாரவிபா⁴வனா – ஆதா³யவாரா ஸத்த, ததா² ஸமாதா³யவாராதி த்³வே ஸத்தகவாரா, ததோ பக்கமனந்திகங் வஜ்ஜெத்வா விப்பகதசீவரஸ்ஸ ஆதா³யஸமாதா³யவாரவஸேன த்³வே ச²க்கவாரா, ததோ பரங் அனதி⁴ட்டி²த-பதே³ன விஸேஸெத்வா பவத்தங், அத்த²தோ பட²மத்திகேன ஸமேதி. அனதி⁴ட்டி²தேனாதி ச ‘‘பச்செஸ்ஸங் ந பச்செஸ்ஸ’’ந்தி ஏவங் அனதி⁴ட்டி²தேன, அனியமிதேனாதி அத்தோ². ததியத்திகானந்தரங் சதுத்த²த்திகங் ஸம்ப⁴வந்தங் அந்தோஸீமாயங் ‘‘பச்செஸ்ஸ’’ந்தி வசனவிஸேஸேன ஸம்ப⁴வதி. ததா² ச யோஜியமானங் இதரேஹி ஸவனந்திகாதீ³ஹி அவிருத்³த⁴ங் ஹோதீதி சதுத்த²த்திகங் அஹுத்வா ச²க்கங் ஜாதந்தி வேதி³தப்³ப³ங். ஏவங் தீணி திகானி ஏகங் ச²க்கஞ்சாதி பட²மங் பன்னரஸகங் வேதி³தப்³ப³ங்.
316-320. ததோ இத³மேவ பன்னரஸகங் உபஸக்³க³விஸேஸேன து³தியங் ஸமாதா³யபன்னரஸகங் நாம கதங். புன ‘‘விப்பகதசீவரங் ஆதா³யா’’தி ததியங் பன்னரஸகங், ‘‘ஸமாதா³யா’’தி சதுத்த²ங் பன்னரஸகங் த³ஸ்ஸிதந்தி ஏவங் சத்தாரி பன்னரஸகானி வேதி³தப்³பா³னி. தத்த² பட²மது³தியேஸு பன்னரஸகேஸு ஸப்³பே³ன ஸப்³ப³ங் அகதசீவரங் அதி⁴ப்பேதங், இதரேஸு த்³வீஸு விப்பகதந்தி வேதி³தப்³ப³ங். ததோ பரங் ‘‘சீவராஸாய பக்கமதீ’’திஆதி³னா நயேன நிட்டா²னஸன்னிட்டா²னநாஸனஆஸாவச்சே²தி³கவஸேன ஏகோ வாரோதி இத³மேகங் சதுக்கங் ஜாதங், தஸ்மா புப்³பே³ வுத்தானி திகானி ஆஸாவச்சே²தி³கானி தீணி ச திகானீதி ஏதங் அனாஸாயத்³வாத³ஸகந்தி வேதி³தப்³ப³ங். தத³னந்தரே ஆஸாயத்³வாத³ஸகே கிஞ்சாபி பட²மங் த்³வாத³ஸகங் லப்³ப⁴தி, ததா²பி தங் நிப்³பி³ஸேஸந்தி தமேகங் த்³வாத³ஸகங் அவுத்தஸித்³த⁴ங் கத்வா விஸேஸதோ த³ஸ்ஸேதுங் ஆதி³தோ பட்டா²ய ‘‘அந்தோஸீமாயங் பச்செஸ்ஸ’’ந்தி வுத்தங். தங் து³தியசதுக்கே ‘‘ஸோ ப³ஹிஸீமக³தோ ஸுணாதீ’’திஆதி³வசனஸ்ஸ ததியசதுக்கே ஸவனந்திகாதீ³னஞ்ச ஓகாஸகரணத்த²ந்தி வேதி³தப்³ப³ங். இத³ங் பன த்³வாத³ஸகங் அனாஸாயவஸேனபி லப்³ப⁴மானங் இமினா அவுத்தஸித்³த⁴ங் கத்வா ந த³ஸ்ஸிதந்தி வேதி³தப்³ப³ங். ஏவமெத்த² த்³வே த்³வாத³ஸகானி உத்³த⁴ரிதப்³பா³னி. கரணீயத்³வாத³ஸகேபி யதா²த³ஸ்ஸிதங் அனாஸாயத்³வாத³ஸகங் அவுத்தஸித்³த⁴ங் ஆஸாயத்³வாத³ஸகஞ்சாதி த்³வே த்³வாத³ஸகானி உத்³த⁴ரிதப்³பா³னி.
321-322. யஸ்மா தி³ஸங்க³மிகனவகே ‘‘தி³ஸங்க³மிகோ பக்கமதீ’’தி வசனேனேவ ‘‘ந பச்செஸ்ஸ’’ந்தி இத³ங் அவுத்தஸித்³த⁴மேவ, தஸ்மா தங் ந வுத்தங். எத்தாவதா சீவரபடிவீஸங் அபவிலாயமானோதி இமினா சீவரபலிபோ³த⁴ஸமங்கி³தமஸ்ஸ த³ஸ்ஸேதி. தத்த² சீவரபடிவீஸந்தி அத்தனோ பத்தப்³ப³சீவரபா⁴க³ங். அபவிலாயமானோதி ஆகங்க²மானோ. தஸ்ஸ சீவரலாபே⁴ ஸதி வஸ்ஸங்வுத்தா²வாஸே நிட்டா²னஸன்னிட்டா²னநாஸனந்திகானங் வஸேன ஏகங் திகங், தேஸங்யேவ வஸேன அந்தராமக்³கே³ ஏகங், க³தட்டா²னே ஏகந்தி திண்ணங் திகானங் வஸேன ஏகங் நவகங் வேதி³தப்³ப³ங்.
324. ததோ
ஆதா³யஸத்தகாதி³கதா²வண்ணனா நிட்டி²தா.
கதி²னக்க²ந்த⁴கவண்ணனா நிட்டி²தா.