8. சீவரக்க²ந்த⁴கங்
ஜீவகவத்து²கதா²வண்ணனா
329-330. சீவரக்க²ந்த⁴கே கம்மவிபாகந்தி கம்மஜரோக³ங். ஸங்யமஸ்ஸாதி ஆனிஸங்ஸஸ்ஸ, உபயோக³த்தே² சேதங் ஸாமிவசனங்.
பஜ்ஜோதராஜவத்து²கதா²தி³வண்ணனா
334-336. விச்சி²கஸ்ஸ ஜாதோதி தஸ்ஸ கிர மாதுயா உதுஸமயே ஸயனக³தாய விச்சி²கோ நாபி⁴ப்பதே³ஸங் ஆருள்ஹோ, ஸா தஸ்ஸ ஸம்ப²ஸ்ஸேன க³ப்³ப⁴ங் க³ண்ஹி. தங் ஸந்தா⁴ய வுத்தங் ‘‘விச்சி²கஸ்ஸ ஜாதோ’’தி. உஸ்ஸன்னதோ³ஸோதி ஸஞ்சிதபித்தாதி³தோ³ஸோ.
வரயாசனகதா²வண்ணனா
337. இதரீதரேனாதி இதரேன இதரேன. இதர-ஸத்³தோ³ பன அனியமவசனோ த்³விக்க²த்துங் வுச்சமானோ யங்கிஞ்சி-ஸத்³தே³ஹி ஸமானத்தோ² ஹோதீதி வுத்தங் ‘‘அப்பக்³கே⁴னபி மஹக்³கே⁴னபி யேன கேனசீ’’தி. மஹாபிட்டி²யகோஜவந்தி ஹத்தி²பிட்டீ²ஸு அத்த²ரிதப்³ப³தாய மஹாபிட்டி²யந்தி லத்³த⁴ஸமஞ்ஞங் சதுரங்கு³லபுப்ப²ங் கோஜவங்.
கம்ப³லானுஜானநாதி³கதா²வண்ணனா
340. உபசாரேதி ஸுஸானஸ்ஸ ஆஸன்னே பதே³ஸே. ச²ட்³டெ³த்வா க³தாதி கிஞ்சி அவத்வாயேவ ச²ட்³டெ³த்வா க³தா. ஸோ ஏவ ஸாமீதி அகதாய கதிகாய யேன க³ஹிதங், ஸோவ ஸாமீ.
சீவரபடிக்³கா³ஹகஸம்முதிஆதி³கதா²வண்ணனா
342-343. து⁴ரவிஹாரட்டா²னேதி விஹாரமஜ்ஜே²யேவ ஸம்மன்னிதப்³ப³ந்தி ஸப்³பே³ஸங் ஜானநத்தா²ய விஹாரமஜ்ஜே²யேவ நிஸின்னேஹி ஸம்மன்னிதப்³ப³ங். துலாபூ⁴தோதி துலாஸதி³ஸோ. வண்ணாவண்ணங் கத்வாதி ஸப்³ப³கொட்டா²ஸே அக்³க⁴தோ ஸமகே கத்வா. தேனேவாஹ ‘‘ஸமே படிவீஸே ட²பெத்வா’’தி. இத³ந்தி ஸாமணேரானங் உபட்³ட⁴படிவீஸஸ்ஸ தா³னங். பா²திகம்மந்தி ஸம்முஞ்ஜனீப³ந்த⁴னாதி³ஹத்த²கம்மங் உக்குட்டி²ங் கரொந்தீதி மஹாஸத்³த³ங் கரொந்தி. ஸமபடிவீஸோ தா³தப்³போ³தி கரிஸ்ஸாமாதி யாசந்தானங் படிஞ்ஞாமத்தேனபி ஸமகொட்டா²ஸோ தா³தப்³போ³.
சீவரரஜனகதா²வண்ணனா
344. ரஜனகும்பி⁴யா மஜ்ஜே² ட²பெத்வாதி அந்தோரஜனகும்பி⁴யா மஜ்ஜே² ட²பெத்வா ஏவங் வட்டாதா⁴ரகே அந்தோரஜனகும்பி⁴யா பக்கி²த்தே மஜ்ஜே² உத³கங் திட்ட²தி, வட்டாதா⁴ரகதோ ப³ஹி ஸமந்தா அந்தோகும்பி⁴யங் ரஜனச்ச²ல்லி. ரஜனங் பக்கி²பிதுந்தி ரஜனச்ச²ல்லிங் பக்கி²பிதுங்.
திசீவரானுஜானநகதா²வண்ணனா
346. உத்³த⁴ஸ்தே அருணேதி உக்³க³தே அருணஸீஸே. நந்தி³முகி²யாதி துட்ட²முகி²யா.
அதிரேகசீவராதி³கதா²வண்ணனா
348. அச்சு²பெய்யந்தி பதிட்ட²பெய்யங். ஹதவத்த²கானந்தி காலாதீதவத்தா²னங். உத்³த⁴ரித்வா அல்லீயாபனக²ண்ட³ந்தி து³ப்³ப³லட்டா²னங் அபனெத்வா அல்லீயாபனவத்த²க²ண்ட³ங்.
விஸாகா²வத்து²கதா²வண்ணனா
349-351. விஸாகா²வத்து²ம்ஹி கல்லகாயாதி அகிலந்தகாயா பீதிஸோமனஸ்ஸேஹி பு²டஸரீரா. க³தீதி ஞாணக³தி ஞாணாதி⁴க³மோ. அபி⁴ஸம்பராயோதி ஞாணாபி⁴ஸம்பராயோ ஞாணஸஹிதோ பேச்சபா⁴வோ.
தங் ப⁴க³வா ப்³யாகரிஸ்ஸதீதி ‘‘ஸோ பி⁴க்கு² ஸோதாபன்னோ ஸகதா³கா³மீ’’திஆதி³னா தஸ்ஸ தங் ஞாணக³திங், ததோ பரங் ‘‘நியதோ ஸம்போ³தி⁴பராயணோ ஸகிதே³வ இமங் லோகங் ஆக³ந்த்வா து³க்க²ஸ்ஸந்தங் கரிஸ்ஸதீ’’திஆதி³னா (ஸங்॰ நி॰ 5.1004) ஞாணாபி⁴ஸம்பராயஞ்ச ஆவி கரிஸ்ஸதி. ஸோவக்³கி³கந்தி ஸக்³க³ஸங்வத்தனிகங். ஸோகங் நுத³தி வினோதே³தீதி ஸோகனுத³ங்.
நிஸீத³னாதி³அனுஜானநகதா²வண்ணனா
353. து³க்க²ங் ஸுபதீதி நானாவித⁴ஸுபினங் பஸ்ஸந்தோ து³க்க²ங் ஸுபதி. து³க்க²ங் படிபு³ஜ்ஜ²தீதி படிபு³ஜ்ஜ²ந்தோபி உத்தஸித்வா ஸலோமஹங்ஸோ து³க்க²ங் படிபு³ஜ்ஜ²தி.
பச்சி²மவிகப்பனுபக³சீவராதி³கதா²வண்ணனா
359-362. அட்ட²பத³கச்ச²ன்னேன பத்தமுக²ங் ஸிப்³பி³துந்தி அட்ட²பத³ப²லகாகாரேன பத்தமுகே² தத்த² தத்த² க³ப்³ப⁴ங் த³ஸ்ஸெத்வா ஸிப்³பி³துங். அக்³க³ளகு³த்தியேவ பமாணந்தி இமேஹி சதூஹி நிக்கே²பகாரணேஹி ட²பெந்தேனபி அக்³க³ளகு³த்திவிஹாரேயேவ ட²பேதுங் வட்டதீதி அதி⁴ப்பாயோ.
ஸங்கி⁴கசீவருப்பாத³கதா²வண்ணனா
363. பஞ்ச மாஸேதி அச்சந்தஸங்யோகே³ உபயோக³வசனங். வட்³டி⁴ங் பயோஜெத்வா ட²பிதஉபனிக்கே²பதோதி வஸ்ஸாவாஸிகத்தா²ய வெய்யாவச்சகரேஹி வட்³டி⁴ங் பயோஜெத்வா ட²பிதஉபனிக்கே²பதோ. தத்ருப்பாத³தோதி நாளிகேரஆராமாதி³தத்ருப்பாத³தோ. ‘‘வஸ்ஸாவாஸிகலாப⁴வஸேன வா மதகசீவரவஸேன வா தத்ருப்பாத³வஸேன வா அஞ்ஞேன வா கேனசி ஆகாரேன ஸங்க⁴ங் உத்³தி³ஸ்ஸ உப்பன்னசீவரங், ஸப்³ப³ங் தஸ்ஸேவ அத்த²தகதி²னஸ்ஸ பஞ்ச மாஸே, அனத்த²தகதி²னஸ்ஸ ஏகங் சீவரமாஸங் பாபுணாதீ’’தி அவிஸேஸதோ வத்வாபி புன வஸ்ஸாவாஸிகலாப⁴வஸேன உப்பன்னே லப்³ப⁴மானவிஸேஸங் த³ஸ்ஸேதுங் ‘‘யங் பன இத³’’ந்திஆதி³ ஆரத்³த⁴ங். தத்த² இதா⁴தி அபி⁴லாபமத்தமேதங். ‘‘வஸ்ஸங்வுத்த²ஸங்க⁴ஸ்ஸ தே³மா’’தி வுத்தேபி ஸோயேவ நயோ. அனத்த²தகதி²னஸ்ஸபி பஞ்ச மாஸே பாபுணாதீதி வஸ்ஸாவாஸிகலாப⁴வஸேன உப்பன்னத்தா அனத்த²தகதி²னஸ்ஸபி வுத்த²வஸ்ஸஸ்ஸ பஞ்ச மாஸே பாபுணாதி. கேனசி பன ‘‘இத⁴-ஸத்³தே³ன நியமிதத்தா’’தி காரணங் வுத்தங், தங் அகாரணங். ததா² ஹி இத⁴-ஸத்³தே³ன அனியமெத்வாபி ‘‘வஸ்ஸங்வுத்த²ஸங்க⁴ஸ்ஸ தே³மா’’தி வா ‘‘வஸ்ஸாவாஸிகங் தே³மா’’தி வா அந்தோஹேமந்தே வஸ்ஸாவாஸிகலாப⁴வஸேன தி³ன்னங் சீவரங் அனத்த²தகதி²னஸ்ஸபி வுத்த²வஸ்ஸஸ்ஸ பஞ்ச மாஸே பாபுணாதி, தேனேவ ததோ பரந்தி பஞ்சமாஸதோ பரங், கி³ம்ஹானஸ்ஸ பட²மதி³வஸதோ பட்டா²யாதி அத்தோ².
‘‘கஸ்மா? பிட்டி²ஸமயே உப்பன்னத்தா’’தி இத³ங் ‘‘உதா³ஹு அனாக³தவஸ்ஸே’’தி இமஸ்ஸானந்தரங் த³ட்ட²ப்³ப³ங். கி³ம்ஹானஸ்ஸ பட²மதி³வஸதோ பட்டா²ய உப்பன்னமேவ ஹி பிட்டி²ஸமயே உப்பன்னத்தா ‘‘கிங் அதீதவஸ்ஸே இத³ங் வஸ்ஸாவாஸிக’’ந்திஆதி³னா புச்சி²தப்³ப³ங், தேனேவ பரதோபி வக்க²தி ‘‘கி³ம்ஹானங் பட²மதி³வஸதோ பட்டா²ய வுத்தே பன மாதிகா ஆரோபேதப்³பா³ ‘அதீதவஸ்ஸாவாஸஸ்ஸ பஞ்ச மாஸா அதிக்கந்தா, அனாக³தோ சாதுமாஸச்சயேன ப⁴விஸ்ஸதி, கதரவஸ்ஸாவாஸஸ்ஸ தே³ஸீ’தி. ஸசே ‘அதீதவஸ்ஸங்வுத்தா²னங் த³ம்மீ’தி வத³தி, தங்அந்தோவஸ்ஸங்வுத்தா²னமேவ பாபுணாதீ’’தி (மஹாவ॰ அட்ட²॰ 379). பொத்த²கேஸு பன ‘‘அனத்த²தகதி²னஸ்ஸபி பஞ்ச மாஸே பாபுணாதீ’’தி இமஸ்ஸானந்தரங் ‘‘கஸ்மா? பிட்டி²ஸமயே உப்பன்னத்தா’’தி இத³ங் லிக²ந்தி, தங் ந யுஜ்ஜதி. ந ஹி பிட்டி²ஸமயே உப்பன்னங் ஸந்தா⁴ய ‘‘அனத்த²தகதி²னஸ்ஸபி பஞ்ச மாஸே பாபுணாதீ’’தி வுத்தங், ந ச பிட்டி²ஸமயே உப்பன்னங் வுத்த²வஸ்ஸஸ்ஸேவ பாபுணாதி, ஸம்முகீ²பூ⁴தானங் ஸப்³பே³ஸங் பாபுணாதி, தேனேவ பரதோ வக்க²தி ‘‘அஸுகவிஹாரே வஸ்ஸங்வுத்த²ஸங்க⁴ஸ்ஸாதி வத³தி, தத்ர வஸ்ஸங்வுத்தா²னமேவ யாவ கதி²னஸ்ஸுப்³பா⁴ரா பாபுணாதி. ஸசே பன கி³ம்ஹானங் பட²மதி³வஸதோ பட்டா²ய ஏவங் வத³தி, தத்ர ஸம்முகீ²பூ⁴தானங் ஸப்³பே³ஸங் பாபுணாதி. கஸ்மா? பிட்டி²ஸமயே உப்பன்னத்தா’’தி (மஹாவ॰ அட்ட²॰ 379).
டி²திகா பன ந திட்ட²தீதி எத்த² அட்டி²தாய டி²திகாய புன அஞ்ஞஸ்மிங் சீவரே உப்பன்னே ஸசே ஏகோ பி⁴க்கு² ஆக³ச்ச²தி, மஜ்ஜே² சி²ந்தி³த்வா த்³வீஹிபி க³ஹேதப்³ப³ங். டி²தாய பன டி²திகாய புன அஞ்ஞஸ்மிங் சீவரே உப்பன்னே ஸசே நவகதரோ ஆக³ச்ச²தி, டி²திகா ஹெட்டா² க³ச்ச²தி. ஸசே வுட்³ட⁴தரோ ஆக³ச்ச²தி, டி²திகா உத்³த⁴மாரோஹதி. அத² அஞ்ஞோ நத்தி², புன அத்தனோ பாபெத்வா க³ஹேதப்³ப³ங். து³க்³க³ஹிதானி ஹொந்தீதி எத்த² ஸங்கி⁴கானேவ ஹொந்தீதி அதி⁴ப்பாயோ. க³ஹிதமேவ நாமாதி ‘‘இமஸ்ஸ இத³ங் பத்த’’ந்தி கிஞ்சாபி ந விதி³தங், தே பன பா⁴கா³ அத்த²தோ தேஸங் பத்தாயேவாதி அதி⁴ப்பாயோ. இதோவாதி தே²ரானங் தா³தப்³ப³தோயேவ.
ஸங்கி⁴கசீவருப்பாத³கதா²வண்ணனா நிட்டி²தா.
உபனந்த³ஸக்யபுத்தவத்து²கதா²வண்ணனா
364. ஸத்தாஹவாரேன அருணமேவ உட்டா²பேதீதி ஏதங் வசனமத்தமேவ ஏகஸ்மிங் விஹாரே ஸத்தாஹகிச்சாபா⁴வதோ. இத³ந்தி ஏகாதி⁴ப்பாயதா³னங். நானாலாபே⁴ஹீதிஆதீ³ஸு நானா விஸுங் விஸுங் லாபோ⁴ ஏதேஸூதி நானாலாபா⁴, த்³வே விஹாரா, தேஹி நானாலாபே⁴ஹி. நானா விஸுங் விஸுங் பாகாராதீ³ஹி பரிச்சி²ன்னோ உபசாரோ ஏதேஸந்தி நானூபசாரா, தேஹி நானூபசாரேஹி. ஏகஸீமவிஹாரேஹீதி ஏகூபசாரஸீமாயங் த்³வீஹி விஹாரேஹி.
கி³லானவத்து²கதா²வண்ணனா
365. பலிபன்னோதி நிமுக்³கோ³, மக்கி²தோதி அத்தோ². உச்சாரெத்வாதி உக்கி²பித்வா. ஸமானாசரியகோதி எத்த² ஸசேபி ஏகஸ்ஸ ஆசரியஸ்ஸ ஏகோ அந்தேவாஸிகோ ஹோதி, ஏகோ ஸத்³தி⁴விஹாரிகோ, ஏதேபி அஞ்ஞமஞ்ஞங் ஸமானாசரியகா ஏவாதி வத³ந்தி.
366. பே⁴ஸஜ்ஜங் யோஜேதுங் அஸமத்தோ² ஹோதீதி வேஜ்ஜேன ‘‘இத³ஞ்சித³ஞ்ச பே⁴ஸஜ்ஜங் க³ஹெத்வா இமினா யோஜெத்வா தா³தப்³ப³’’ந்தி வுத்தே ததா² காதுங் அஸமத்தோ²தி அத்தோ². நீஹாதுந்தி நீஹரிதுங், ச²ட்³டே³துந்தி அத்தோ².
மதஸந்தககதா²வண்ணனா
367-369. பி⁴க்கு²ஸ்ஸ காலகதேதி எத்த² காலகத-ஸத்³தோ³ பா⁴வஸாத⁴னோதி ஆஹ ‘‘காலகிரியாயா’’தி. தத்த² தத்த² ஸங்க⁴ஸ்ஸாதி தஸ்மிங் தஸ்மிங் விஹாரே ஸங்க⁴ஸ்ஸ.
ஸங்கே⁴ பி⁴ன்னே சீவருப்பாத³கதா²வண்ணனா
376. யத்த² பன த³க்கி²ணோத³கங் பமாணந்தி பி⁴க்கூ² யஸ்மிங் ரட்டே² த³க்கி²ணோத³கபஅக்³க³ஹணமத்தேனபி தெ³ய்யத⁴ம்மஸ்ஸ ஸாமினோ ஹொந்தீதி அதி⁴ப்பாயோ. பரஸமுத்³தே³தி ஜம்பு³தீ³பே.
378. மதகசீவரங் அதி⁴ட்டா²தீதி எத்த² மக்³க³ங் க³ச்ச²ந்தோ தஸ்ஸ காலகிரியங் ஸுத்வா அவிஹாரட்டா²னே
அட்ட²சீவரமாதிகாகதா²வண்ணனா
379. புக்³க³லாதி⁴ட்டா²னநயேன வுத்தந்தி ‘‘ஸீமாயதா³ன’’ந்திஆதி³னா வத்தப்³பே³ ‘‘ஸீமாய தே³தீ’’திஆதி³ புக்³க³லாதி⁴ட்டா²னநயேன வுத்தங். பரிக்கே²பாரஹட்டா²னேன பரிச்சி²ன்னாதி இமினா அபரிக்கி²த்தஸ்ஸ விஹாரஸ்ஸ து⁴வஸன்னிபாதட்டா²னாதி³தோ பட²மலெட்³டு³பாதஸ்ஸ அந்தோ உபசாரஸீமாதி த³ஸ்ஸேதி. இதா³னி து³தியலெட்³டு³பாதஸ்ஸ அந்தோபி உபசாரஸீமாயேவாதி த³ஸ்ஸேதுங் ‘‘அபிசா’’திஆதி³ ஆரத்³த⁴ங். து⁴வஸன்னிபாதட்டா²னம்பி பரியந்தக³தமேவ க³ஹேதப்³ப³ங். பி⁴க்கு²னீனங் ஆராமப்பவேஸனஸேனாஸனாபுச்ச²னாதி³ பரிவாஸமானத்தாரோசனவஸ்ஸச்சே²த³னிஸ்ஸயஸேனாஸனக்³கா³ஹாதி³ விதா⁴னந்தி இத³ங் ஸப்³ப³ங் இமிஸ்ஸாயேவ உபசாரஸீமாய வஸேன வேதி³தப்³ப³ங். லாப⁴த்தா²ய ட²பிதஸீமா லாப⁴ஸீமா. ஸமானஸங்வாஸஅவிப்பவாஸஸீமாஸு தி³ன்னஸ்ஸ இத³ங் நானத்தங் – ‘‘அவிப்பவாஸஸீமாய த³ம்மீ’’தி தி³ன்னங் கா³மட்டா²னங் ந பாபுணாதி. கஸ்மா? ‘‘ட²பெத்வா கா³மஞ்ச கா³மூபசாரஞ்சா’’தி வுத்தத்தா. ‘‘ஸமானஸங்வாஸகஸீமாய த³ம்மீ’’தி தி³ன்னங் பன கா³மே டி²தானம்பி பாபுணாதீதி.
பு³த்³தா⁴தி⁴வுத்தோ²தி பு³த்³தே⁴ன ப⁴க³வதா அதி⁴வுத்தோ². ஏகஸ்மிந்தி ஏகஸ்மிங் விஹாரே. பாகவட்டந்தி தா³னவட்டங். வத்ததீதி பவத்ததி. பங்ஸுகூலிகானம்பி வட்டதீதி ‘‘துய்ஹங் தே³மா’’தி அவத்வா ‘‘பி⁴க்கூ²னங் தே³ம, தே²ரானங் தே³மா’’தி வுத்தத்தா பங்ஸுகூலிகானங் வட்டதி. விசாரிதமேவாதி உபாஹனத்த²விகாதீ³னமத்தா²ய விசாரிதமேவ.
உபட்³ட⁴ங் தா³தப்³ப³ந்தி யங் உப⁴தோஸங்க⁴ஸ்ஸ தி³ன்னங், ததோ உபட்³ட⁴ங் பி⁴க்கூ²னங், உபட்³ட⁴ங் பி⁴க்கு²னீனங் தா³தப்³ப³ங். ஸசேபி ஏகோ பி⁴க்கு² ஹோதி ஏகா வா பி⁴க்கு²னீ, அந்தமஸோ அனுபஸம்பன்னஸ்ஸபி உபட்³ட⁴மேவ தா³தப்³ப³ங். ‘‘பி⁴க்கு²ஸங்க⁴ஸ்ஸ ச பி⁴க்கு²னீனஞ்ச துய்ஹஞ்சா’’தி வுத்தே பன புக்³க³லோ விஸுங் ந லப⁴தீதி இத³ங் அட்ட²கதா²பமாணேனேவ க³ஹேதப்³ப³ங். ந ஹெத்த² விஸேஸகாரணங் உபலப்³ப⁴தி. ததா² ஹி ‘‘உப⁴தோஸங்க⁴ஸ்ஸ ச துய்ஹஞ்ச த³ம்மீ’’தி வுத்தே ஸாமஞ்ஞவிஸேஸவசனேஹி ஸங்க³ஹிதத்தா யதா² புக்³க³லோ விஸுங் லப⁴தி, ஏவமிதா⁴பி ‘‘பி⁴க்கு²ஸங்க⁴ஸ்ஸ ச துய்ஹஞ்சா’’தி ஸாமஞ்ஞவிஸேஸவசனஸப்³பா⁴வதோ ப⁴விதப்³ப³மேவ விஸுங் புக்³க³லபடிவீஸேனாதி விஞ்ஞாயதி, தஸ்மா அட்ட²கதா²வசனமேவெத்த² பமாணங். பாபுணனட்டா²னதோ ஏகமேவ லப⁴தீதி அத்தனோ வஸ்ஸக்³கே³ன பத்தட்டா²னதோ ஏகமேவ ‘‘கஸ்மா? பி⁴க்கு²ஸங்க⁴க்³க³ஹணேன க³ஹிதத்தா’’தி, பி⁴க்கு²ஸங்க⁴க்³க³ஹணேனேவ புக்³க³லஸ்ஸபி க³ஹிதத்தாதி பி⁴க்கு²ஸங்க⁴ஸ்ஸ ஹராதி வுத்தேபி ஹரிதப்³ப³ந்தி ஈதி³ஸங் கி³ஹிவெய்யாவச்சங் ந ஹோதீதி கத்வா வுத்தங்.
லக்க²ணஞ்ஞூ வத³ந்தீதி இத³ங் ஸன்னிட்டா²னவசனங், அட்ட²கதா²ஸு அனாக³தத்தா பன ஏவங் வுத்தங். ப³ஹிஉபசாரஸீமாயங்…பே॰… ஸப்³பே³ஸங் பாபுணாதீதி யத்த² கத்த²சி வுத்த²வஸ்ஸானங் ஸப்³பே³ஸங் பாபுணாதீதி அதி⁴ப்பாயோ. தேனேவ மாதிகாட்ட²கதா²யம்பி (கங்கா²॰ அட்ட²॰ அகாலசீவரஸிக்கா²பத³வண்ணனா) ‘‘ஸசே பன ப³ஹிஉபசாரஸீமாயங் டி²தோ ‘வஸ்ஸங்வுத்த²ஸங்க⁴ஸ்ஸா’தி வத³தி, யத்த² கத்த²சி வுத்த²வஸ்ஸானங் ஸப்³பே³ஸங் ஸம்பத்தானங் பாபுணாதீ’’தி வுத்தங். க³ண்டி²பதே³ஸு பன ‘‘வஸ்ஸாவாஸஸ்ஸ அனநுரூபே பதே³ஸே ட²த்வா வுத்தத்தா வஸ்ஸங்வுத்தா²னங் அவுத்தா²னஞ்ச ஸப்³பே³ஸங் பாபுணாதீ’’தி வுத்தங், தங் ந க³ஹேதப்³ப³ங். ந ஹி ‘‘வஸ்ஸங்வுத்த²ஸங்க⁴ஸ்ஸ த³ம்மீ’’தி வுத்தே அவுத்த²வஸ்ஸானங் பாபுணாதி. ஏவங் வத³தீதி ‘‘வஸ்ஸங்வுத்த²ஸங்க⁴ஸ்ஸ த³ம்மீ’’தி வத³தி. உத்³தே³ஸங் க³ஹேதுங் ஆக³தோதி தஸ்ஸ ஸந்திகே உத்³தே³ஸங் அக³ஹிதபுப்³ப³ஸ்ஸபி உத்³தே³ஸங் க³ண்ஹிஸ்ஸாமீதி ஆக³தகாலதோ பட்டா²ய அந்தேவாஸிகபா⁴வூபக³மனதோ வுத்தங். ஸேஸமெத்த² ஸுவிஞ்ஞெய்யமேவ.
அட்ட²சீவரமாதிகாகதா²வண்ணனா நிட்டி²தா.
சீவரக்க²ந்த⁴கவண்ணனா நிட்டி²தா.