9. சம்பெய்யக்க²ந்த⁴கங்
கஸ்ஸபகொ³த்தபி⁴க்கு²வத்து²கதா²வண்ணனா
380. சம்பெய்யக்க²ந்த⁴கே சம்பாயந்தி ஏவங்னாமகே நக³ரே. தஸ்ஸ ஹி நக³ரஸ்ஸ ஆராமபொக்க²ரணீஆதீ³ஸு தேஸு தேஸு டா²னேஸு சம்பகருக்கா²வ உஸ்ஸன்னா அஹேஸுங், தஸ்மா ‘‘சம்பா’’தி ஸங்க²ங் அக³மாஸி. க³க்³க³ராய பொக்க²ரணியா தீரேதி தஸ்ஸ சம்பானக³ரஸ்ஸ அவிதூ³ரே க³க்³க³ராய நாம ராஜமஹேஸியா க²ணிதத்தா ‘‘க³க்³க³ரா’’தி லத்³த⁴வோஹாரா பொக்க²ரணீ அத்தி², தஸ்ஸா தீரே ஸமந்ததோ நீலாதி³பஞ்சவண்ணகுஸுமபடிமண்டி³தங் மஹந்தங் சம்பகவனங், தஸ்மிங் ப⁴க³வா குஸுமக³ந்த⁴ஸுக³ந்தே⁴ சம்பகவனே விஹரதி. தங் ஸந்தா⁴ய ‘‘க³க்³க³ராய பொக்க²ரணியா தீரே’’தி வுத்தங். தந்திப³த்³தோ⁴தி தந்தி வுச்சதி ப்³யாபாரோ, தத்த² ப³த்³தோ⁴ பஸுதோ உஸ்ஸுக்கங் ஆபன்னோதி அத்தோ², தஸ்மிங் ஆவாஸே அகதங் ஸேனாஸனங் கரோதி, ஜிண்ணங் படிஸங்க²ரோதி, கதே இஸ்ஸரோ ஹோதீதி அதி⁴ப்பாயோ. தேனாஹ ‘‘தஸ்மிங் ஆவாஸே கத்தப்³ப³த்தா தந்திபடிப³த்³தோ⁴’’தி, கத்தப்³ப³கம்மே உஸ்ஸாஹமாபன்னோதி அத்தோ².
ஞத்திவிபன்னகம்மாதி³கதா²வண்ணனா
385-387. படிக்கோஸந்தேஸூதி நிவாரெந்தேஸு. ஹாபனங் வா அஞ்ஞதா² கரணங் வா நத்தீ²தி ஞத்திகம்மஸ்ஸ ஏகாய ஏவ ஞத்தியா கத்தப்³ப³த்தா ததோ ஹாபனங் ந ஸம்ப⁴வதி, அனுஸ்ஸாவனாய அபா⁴வதோ பச்சா² ஞத்திட²பனவஸேன த்³வீஹி ஞத்தீஹி கரணவஸேன ச அஞ்ஞதா² கரணங் நத்தி².
சதுவக்³க³கரணாதி³கதா²வண்ணனா
389. உக்கே²பனீயகம்மகதோ கம்மனானாஸங்வாஸகோ, உக்கி²த்தானுவத்தகோ லத்³தி⁴னானாஸங்வாஸகோ.
த்³வேனிஸ்ஸாரணாதி³கதா²வண்ணனா
395. அப்பத்தோ நிஸ்ஸாரணந்தி எத்த² நிஸ்ஸாரணகம்மங் நாம குலதூ³ஸகானஞ்ஞேவ அனுஞ்ஞாதங், அயஞ்ச ‘‘பா³லோ ஹோதி அப்³யத்தோ’’திஆதி³னா நித்³தி³ட்டோ² குலதூ³ஸகோ ந ஹோதி, தஸ்மா ‘‘அப்பத்தோ’’தி வுத்தோ ‘‘தஞ்சேஸ…பே॰… தஸ்மா ஸுனிஸ்ஸாரிதோ ஹோதீ’’தி. தத்த² தந்தி பப்³பா³ஜனீயகம்மங். ஏஸோதி ‘‘பா³லோ’’திஆதி³னா நித்³தி³ட்டோ². ஆவேணிகேன லக்க²ணேனாதி பப்³பா³ஜனீயகம்மஸ்ஸ ஆவேணிகபூ⁴தேன குலதூ³ஸகபா⁴வலக்க²ணேன.
தஞ்சே ஸங்கோ⁴ நிஸ்ஸாரேதி, ஸுனிஸ்ஸாரிதோதி எத்த² அதி⁴ப்பேதஸ்ஸ பப்³பா³ஜனீயகம்மஸ்ஸ வஸேன அத்த²ங் த³ஸ்ஸெத்வா இதா³னி யதி³ ‘‘தஞ்சே ஸங்கோ⁴ நிஸ்ஸாரேதீ’’தி தஜ்ஜனீயாதி³கம்மவஸேன நிஸ்ஸாரணா அதி⁴ப்பேதா, ததா³ நிஸ்ஸாரணங் ஸம்பத்தோயேவ தஜ்ஜனீயாதி³வஸேன ஸுனிஸ்ஸாரிதோதி ப்³யதிரேகமுகே²ன அத்த²ங் த³ஸ்ஸேதுங் புன ‘‘தஞ்சே ஸங்கோ⁴ நிஸ்ஸாரேதீ’’தி உல்லிங்கெ³த்வா அத்தோ² கதி²தோ. நத்தி² ஏதஸ்ஸ அபதா³னங் அவக²ண்ட³னங் ஆபத்திபரியந்தோதி அனபதா³னோ. ஏகேகேனபி அங்கே³ன நிஸ்ஸாரணா அனுஞ்ஞாதாதி கம்மக்க²ந்த⁴கே அனுஞ்ஞாதா. ஸேஸமெத்த² பாளிதோ அட்ட²கதா²தோ ச ஸுவிஞ்ஞெய்யமேவ.
த்³வேனிஸ்ஸாரணாதி³கதா²வண்ணனா நிட்டி²தா.
சம்பெய்யக்க²ந்த⁴கவண்ணனா நிட்டி²தா.