ஏகுத்தரிகனயோ
ஏககவாரவண்ணனா
321. மூலவிஸுத்³தி⁴யா அந்தராபத்தீதி அந்தராபத்திங் ஆபஜ்ஜித்வா மூலாயபடிகஸ்ஸனங் கத்வா டி²தேன ஆபன்னா. ‘‘அக்³க⁴விஸுத்³தி⁴யா அந்தராபத்தீதி ஸம்ப³ஹுலா ஆபத்தியோ ஆபஜ்ஜித்வா தாஸு ஸப்³ப³சிரபடிச்ச²ன்னவஸேன அக்³க⁴ஸமோதா⁴னங் க³ஹெத்வா வஸந்தேன ஆபன்னாபத்தீ’’தி க³ண்டி²பதே³ஸு வுத்தங். ஸஉஸ்ஸாஹேனேவ சித்தேனாதி ‘‘புனபி ஆபஜ்ஜிஸ்ஸாமீ’’தி ஸஉஸ்ஸாஹேனேவ சித்தேன. பி⁴க்கு²னீனங் அட்ட²வத்து²காய வஸேன சேதங் வுத்தங். தேனேவாஹ ‘‘அட்ட²மே வத்து²ஸ்மிங் பி⁴க்கு²னியா பாராஜிகமேவ ஹோதீ’’தி. ‘‘த⁴ம்மிகஸ்ஸ படிஸ்ஸவஸ்ஸ அஸச்சாபனே’’தி வுத்தத்தா அத⁴ம்மிகபடிஸ்ஸவஸ்ஸ விஸங்வாதே³ து³க்கடங் ந ஹோதி. ‘‘தும்ஹே விப்³ப⁴மதா²’’தி ஹி வுத்தே ஸுத்³த⁴சித்தோ ‘‘ஸாதூ⁴’’தி படிஸ்ஸுணித்வா ஸசே ந விப்³ப⁴மதி, அனாபத்தி. ஏவங் ஸப்³ப³த்த². பஞ்சத³ஸஸு த⁴ம்மேஸூதி ‘‘காலேன வக்கா²மி, நோ அகாலேனா’’திஆதி³னா வுத்தபஞ்சத³ஸத⁴ம்மேஸு. ஆபத்திங் ஆபஜ்ஜிதுங் ப⁴ப்³ப³தாய ப⁴ப்³பா³பத்திகா.
ஏககவாரவண்ணனா நிட்டி²தா.
து³கவாரவண்ணனா
322. து³கேஸு நித³ஹனேதி ஆதபே அதிசிரங் ட²பெத்வா நித³ஹனே. வத்து²ஸபா⁴க³ங் தே³ஸெந்தோ தே³ஸெந்தோ ஆபஜ்ஜதி, ஆபன்னங் ஆபத்திங் ந தே³ஸெஸ்ஸாமீதி து⁴ரங் நிக்கி²பந்தோ ந தே³ஸெந்தோ ஆபஜ்ஜதி. ரோமஜனபதே³ ஜாதங் ரோமகங். பக்காலகந்தி யவக்கா²ரங். அனுஞ்ஞாதலோணத்தா லோணானிபி து³கேஸு வுத்தானி.
து³கவாரவண்ணனா நிட்டி²தா.
திகவாரவண்ணனா
323. திகேஸு வசீஸம்பயுத்தங் காயகிரியங் கத்வாதி காயேன நிபச்சகாரங் கத்வா. முகா²லம்ப³ரகரணாதி³பே⁴தோ³தி முக²பே⁴ரிவாத³னாதி³ப்பபே⁴தோ³. யஸ்ஸ ஸிக்கா²பத³ஸ்ஸ வீதிக்கமே காயஸமுட்டா²னா ஆபத்தியோ, தங் காயத்³வாரே பஞ்ஞத்தஸிக்கா²பத³ங். உபகா⁴தேதீதி வினாஸேதி. ந ஆதா³தப்³ப³ந்தி ‘‘இமஸ்மா விஹாரா பரம்பி மா நிக்க²ம, வினயத⁴ரானங் வா ஸந்திகங் ஆக³ச்ச² வினிச்ச²யங் தா³து’’ந்தி வுத்தே தஸ்ஸ வசனங் ந க³ஹேதப்³ப³ந்தி அத்தோ².
அகுஸலானி சேவ மூலானி சாதி அகோஸல்லஸம்பூ⁴தட்டே²ன ஏகந்தாகுஸலபா⁴வதோ அகுஸலானி, அத்தனா ஸம்பயுத்தத⁴ம்மானங் ஸுப்பதிட்டி²தபா⁴வஸாத⁴னதோ மூலானி, ந அகுஸலபா⁴வஸாத⁴னதோ. ந ஹி மூலதோ அகுஸலானங் அகுஸலபா⁴வோ, குஸலாதீ³னங் வா குஸலாதி³பா⁴வோ. ததா² ச ஸதி மோமூஹசித்தத்³வயமோஹஸ்ஸ அகுஸலபா⁴வோ ந ஸியா.
து³ட்டு² சரிதானீதி பச்சயதோ ஸம்பயுத்தத⁴ம்மதோ பவத்திஆகாரதோ ச ந ஸுட்டு² அஸம்மாபவத்திதானி. விரூபானீதி பீ³ப⁴ச்சா²னி ஸம்பதி ஆயதிஞ்ச அனிட்ட²ரூபத்தா. ஸுட்டு² சரிதானீதிஆதீ³ஸு வுத்தவிபரியாயேன அத்தோ² வேதி³தப்³போ³. த்³வேபி சேதே திகா பண்ணத்தியா வா கம்மபதே²ஹி வா கதே²தப்³பா³. பண்ணத்தியா தாவ காயத்³வாரே பஞ்ஞத்தஸிக்கா²பத³ஸ்ஸ வீதிக்கமோ காயது³ச்சரிதங், அவீதிக்கமோ காயஸுசரிதங். வசீத்³வாரே பஞ்ஞத்தஸிக்கா²பத³ஸ்ஸ வீதிக்கமோ வசீது³ச்சரிதங், அவீதிக்கமோ வசீஸுசரிதங். உப⁴யத்த² பஞ்ஞத்தஸிக்கா²பத³ஸ்ஸ வீதிக்கமோ மனோது³ச்சரிதங் மனொத்³வாரே பஞ்ஞத்தஸிக்கா²பத³ஸ்ஸ அபா⁴வதோ. தயித³ங் த்³வாரத்³வயே அகிரியஸமுட்டா²னாய ஆபத்தியா வஸேன வேதி³தப்³ப³ங். யதா²வுத்தாய ஆபத்தியா அவீதிக்கமோவ மனோஸுசரிதங். அயங் பண்ணத்திகதா².
பாணாதிபாதாத³யோ பன திஸ்ஸோ சேதனா காயத்³வாரே வசீத்³வாரேபி உப்பன்னா காயது³ச்சரிதங் த்³வாரந்தரே உப்பன்னஸ்ஸபி கம்மஸ்ஸ ஸனாமாபரிச்சாக³தோ யேபு⁴ய்யவுத்தியா தப்³ப³ஹுலவுத்தியா ச. தேனாஹு அட்ட²கதா²சரியா –
‘‘த்³வாரே சரந்தி கம்மானி, ந த்³வாரா த்³வாரசாரினோ;
தஸ்மா த்³வாரேஹி கம்மானி, அஞ்ஞமஞ்ஞங் வவத்தி²தா’’தி. (த⁴॰ ஸ॰ அட்ட²॰ காமாவசரகுஸல த்³வாரகதா², காயகம்மத்³வார);
ததா² கம்மபத²கதா².
திகவாரவண்ணனா நிட்டி²தா.
சதுக்கவாரவண்ணனா
324. சதுக்கேஸு அனரியவோஹாராதி அனரியானங் லாமகானங் வோஹாரா ஸங்வோஹாரா அபி⁴லாபவாசா. அரியவோஹாராதி அரியானங் ஸப்புரிஸானங் வோஹாரா. தி³ட்ட²வாதி³தாதி ‘‘தி³ட்ட²ங் மயா’’தி ஏவங்வாதி³தா. எத்த² ச தங்தங்ஸமுட்டா²பகசேதனாவஸேன அத்தோ² வேதி³தப்³போ³.
பட²மகப்பிகேஸு பட²மங் புரிஸலிங்க³மேவ உப்பஜ்ஜதீதி ஆஹ ‘‘பட²மங் உப்பன்னவஸேனா’’தி. புரிமங் புரிஸலிங்க³ங் பஜஹதீதி யதா²வுத்தேனத்தே²ன புப்³ப³ங்க³மபா⁴வதோ புரிமஸங்கா²தங் புரிஸலிங்க³ங் ஜஹதி. ஸதங் திங்ஸஞ்ச ஸிக்கா²பதா³னீதி திங்ஸாதி⁴கானி ஸதங் ஸிக்கா²பதா³னி.
பி⁴க்கு²ஸ்ஸ ச பி⁴க்கு²னியா ச சதூஸு பாராஜிகேஸூதி ஸாதா⁴ரணேஸுயேவ சதூஸு பாராஜிகேஸு. பட²மோ பஞ்ஹோதி ‘‘அத்தி² வத்து²னானத்ததா, நோ ஆபத்தினானத்ததா’’தி அயங் பஞ்ஹோ. ‘‘அத்தி² ஆபத்திஸபா⁴க³தா, நோ வத்து²ஸபா⁴க³தா’’தி அயங் இத⁴ து³தியோ நாம.
அனாபத்திவஸ்ஸச்சே²த³ஸ்ஸாதி நத்தி² ஏதஸ்மிங் வஸ்ஸச்சே²தே³ ஆபத்தீதி அனாபத்திவஸ்ஸச்சே²தோ³, தஸ்ஸ, அனாபத்திகஸ்ஸ வஸ்ஸச்சே²த³ஸ்ஸாதி அத்தோ². மந்தாபா⁴ஸாதி
நவமபி⁴க்கு²னிதோ பட்டா²ய உபஜ்ஜா²யாபி அபி⁴வாத³னாரஹா நோ பச்சுட்டா²னாரஹாதி யஸ்மா ‘‘அனுஜானாமி, பி⁴க்க²வே, ப⁴த்தக்³கே³ அட்ட²ன்னங் பி⁴க்கு²னீனங் யதா²வுட்³ட⁴ங் அவஸேஸானங் யதா²க³திக’’ந்தி வத³ந்தேன ப⁴க³வதா ப⁴த்தக்³கே³ ஆதி³தோ பட்டா²ய அட்ட²ன்னங்யேவ பி⁴க்கு²னீனங் யதா²வுட்³ட⁴ங் அனுஞ்ஞாதங், அவஸேஸானங் ஆக³தபடிபாடியா, தஸ்மா நவமபி⁴க்கு²னிதோ பட்டா²ய ஸசே உபஜ்ஜா²யாபி பி⁴க்கு²னீ பச்சா² ஆக³ச்ச²தி, ந பச்சுட்டா²னாரஹா, யதா²னிஸின்னாஹியேவ ஸீஸங் உக்கி²பித்வா அபி⁴வாதே³தப்³ப³த்தா அபி⁴வாத³னாரஹா. ஆதி³தோ நிஸின்னாஸு பன அட்ட²ஸு யா அப்³ப⁴ந்தரிமா அஞ்ஞா வுட்³ட⁴தரா ஆக³ச்ச²தி, ஸா அத்தனோ நவகதரங் வுட்டா²பெத்வா நிஸீதி³துங் லப⁴தி. தஸ்மா ஸா தாஹி அட்ட²ஹி பி⁴க்கு²னீஹி பச்சுட்டா²னாரஹா. யா பன அட்ட²ஹிபி நவகதரா, ஸா ஸசேபி ஸட்டி²வஸ்ஸா ஹோதி, ஆக³தபடிபாடியாவ நிஸீதி³துங் லப⁴தி.
இத⁴ ந கப்பந்தீதி வத³ந்தோதி பச்சந்திமஜனபதே³ஸு ட²த்வா ‘‘இத⁴ ந கப்பந்தீ’’தி வத³ந்தோ வினயாதிஸாரது³க்கடங் ஆபஜ்ஜதி. கப்பியஞ்ஹி ‘‘ந கப்பதீ’’தி வத³ந்தோ பஞ்ஞத்தங் ஸமுச்சி²ந்த³தி நாம. இத⁴ கப்பந்தீதிஆதீ³ஸுபி ஏஸேவ நயோ.
சதுக்கவாரவண்ணனா நிட்டி²தா.
பஞ்சகவாரவண்ணனா
325. பஞ்சகேஸு ‘‘நிமந்திதோ ஸப⁴த்தோ ஸமானோ ஸந்தங் பி⁴க்கு²ங் அனாபுச்சா²’’தி (பாசி॰ 294-297) வசனதோ அகப்பியனிமந்தனங் ஸாதி³யந்தஸ்ஸேவ அனாமந்தசாரோ ந வட்டதீதி ‘‘பிண்ட³பாதிகஸ்ஸ கப்பந்தீ’’தி வுத்தங். க³ணபோ⁴ஜனாதீ³ஸுபி ஏஸேவ நயோ. அதி⁴ட்ட²ஹித்வா போ⁴ஜனந்தி ‘‘கி³லானஸமயோ’’திஆதி³னா ஆபோ⁴க³ங் கத்வா போ⁴ஜனங். அவிகப்பனாதி ‘‘மய்ஹங் ப⁴த்தபச்சாஸங் இத்த²ன்னாமஸ்ஸ த³ம்மீ’’தி ஏவங் அவிகப்பனா.
அயஸதோ வா க³ரஹதோ வாதி எத்த² பரம்முகா² அகு³ணவசனங் அயஸோ. ஸம்முகா² க³ரஹா. வியஸதீதி ப்³யஸனங், ஹிதஸுக²ங் கி²பதி வித்³த⁴ங்ஸேதீதி அத்தோ². ஞாதீனங் ஞாதிப்³யஸனங், சோரரோக³ப⁴யாதீ³ஹி ஞாதிவினாஸோதி அத்தோ². போ⁴கா³னங் ப்³யஸனங் போ⁴க³ப்³யஸனங், ராஜசோராதி³வஸேன போ⁴க³வினாஸோதி அத்தோ². ரோகோ³ ஏவ ப்³யஸனங் ரோக³ப்³யஸனங். ரோகோ³ ஹி ஆரொக்³யங் ப்³யஸதி வினாஸேதீதி ப்³யஸனங். ஸீலஸ்ஸ ப்³யஸனங் ஸீலப்³யஸனங், து³ஸ்ஸீல்யஸ்ஸேதங் நாமங். ஸம்மாதி³ட்டி²ங் வினாஸயமானா உப்பன்னா தி³ட்டி²யேவ ப்³யஸனங் தி³ட்டி²ப்³யஸனங். ஞாதிஸம்பதா³தி ஞாதீனங் ஸம்பதா³ பாரிபூரி ப³ஹுபா⁴வோ போ⁴க³ஸம்பதா³யபி ஏஸேவ நயோ. ஆரொக்³யஸ்ஸ ஸம்பதா³ ஆரொக்³யஸம்பதா³. பாரிபூரி தீ³க⁴ரத்தங் அரோக³தா. ஸீலதி³ட்டி²ஸம்பதா³ஸுபி ஏஸேவ நயோ.
வத்தங் பரிச்சி²ந்தீ³தி தஸ்மிங் தி³வஸே காதப்³ப³வத்தங் நிட்டா²பேஸி. அட்ட² கப்பே அனுஸ்ஸரீதிஆதி³னா தஸ்மிங் க²ணே ஜா²னங் நிப்³ப³த்தெத்வா புப்³பே³னிவாஸஞாணங் நிப்³ப³த்தேஸீதி தீ³பேதி. ஞத்தியா கம்மப்பத்தோ ஹுத்வாதி ஞத்தியா ட²பிதாய அனுஸ்ஸாவனகம்மப்பத்தோ ஹுத்வாதி அத்தோ².
மந்த³த்தா மோமூஹத்தாதி நேவ ஸமாதா³னங் ஜானாதி, ந ஆனிஸங்ஸங், அத்தனோ பன மந்த³த்தா மோமூஹத்தா அஞ்ஞாணேனேவ ஆரஞ்ஞிகோ ஹோதி. பாபிச்சோ² இச்சா²பகதோதி ‘‘அரஞ்ஞே மே விஹரந்தஸ்ஸ ‘அயங் ஆரஞ்ஞிகோ’தி சதுப்பச்சயஸக்காரங் கரிஸ்ஸந்தி, ‘அயங் பி⁴க்கு² லஜ்ஜீ பவிவித்தோ’திஆதீ³ஹி ச கு³ணேஹி ஸம்பா⁴வெஸ்ஸந்தீ’’தி ஏவங் பாபிகாய இச்சா²ய ட²த்வா தாய ஏவ இச்சா²ய அபி⁴பூ⁴தோ ஹுத்வா ஆரஞ்ஞிகோ ஹோதீதி அத்தோ². தேனாஹ ‘‘அரஞ்ஞவாஸேன பச்சயலாப⁴ங் பத்த²யமானோ’’தி. உம்மாத³வஸேன அரஞ்ஞங் பவிஸித்வா விஹரந்தோ உம்மாதா³ சித்தக்கே²பா ஆரஞ்ஞிகோ நாம ஹோதி. வண்ணிதந்தி இத³ங் ஆரஞ்ஞிகங்க³ங் நாம பு³த்³தே⁴ஹி பு³த்³த⁴ஸாவகேஹி ச வண்ணிதங் பஸத்த²ந்தி ஆரஞ்ஞிகோ ஹோதி.
பஞ்சகவாரவண்ணனா நிட்டி²தா.
ச²க்கவாரவண்ணனா
326. ச²க்கேஸு ச²ப்³ப³ஸ்ஸபரமதா தா⁴ரேதப்³ப³ந்தி பத³பா⁴ஜனங் த³ஸ்ஸிதங். ஸேஸங் உத்தானமேவ.
ச²க்கவாரவண்ணனா நிட்டி²தா.
ஸத்தகவாரவண்ணனா
327. ஸத்தகேஸு ச²க்கே வுத்தானியேவ ஸத்தகவஸேன யோஜேதப்³பா³னீதி ச²க்கே வுத்தசுத்³த³ஸபரமானி த்³விதா⁴ கத்வா த்³வின்னங் ஸத்தகானங் வஸேன யோஜேதப்³பா³னி.
ஆபத்திங் ஜானாதீதி ஆபத்திங்யேவ ‘‘ஆபத்தீ’’தி ஜானாதி. ஸேஸபதே³ஸுபி ஏஸேவ நயோ. ஆபி⁴சேதஸிகானந்தி அபி⁴சேதோதி பாகதிககாமாவசரசித்தேஹி ஸுந்த³ரதாய படிபக்க²தோ விஸுத்³த⁴த்தா ச அபி⁴க்கந்தங் விஸுத்³த⁴சித்தங் வுச்சதி, உபசாரஜ்ஜா²னசித்தஸ்ஸேதங் அதி⁴வசனங். அபி⁴சேதஸி ஜாதானி ஆபி⁴சேதஸிகானி, அபி⁴சேதோஸன்னிஸ்ஸிதானீதி வா ஆபி⁴சேதஸிகானி. தி³ட்ட²த⁴ம்மஸுக²விஹாரானந்தி தி³ட்ட²த⁴ம்மே ஸுக²விஹாரானங். தி³ட்ட²த⁴ம்மோதி பச்சக்கோ² அத்தபா⁴வோ வுச்சதி, தத்த² ஸுக²விஹாரபூ⁴தானந்தி அத்தோ². ரூபாவசரஜ்ஜா²னானமேதங் அதி⁴வசனங். தானி ஹி அப்பெத்வா நிஸின்னா ஜா²யினோ இமஸ்மிஞ்ஞேவ அத்தபா⁴வே அஸங்கிலிட்ட²ங் நெக்க²ம்மஸுக²ங் விந்த³ந்தி, தஸ்மா ‘‘தி³ட்ட²த⁴ம்மஸுக²விஹாரானீ’’தி வுச்சந்தி. நிகாமலாபீ⁴தி நிகாமேன லாபீ⁴, அத்தனோ இச்சா²வஸேன லாபீ⁴, இச்சி²திச்சி²தக்க²ணே ஸமாபஜ்ஜிதுங் ஸமத்தோ²தி வுத்தங் ஹோதி. அகிச்ச²லாபீ⁴தி ஸுகே²னேவ பச்சனீகத⁴ம்மே விக்க²ம்பெ⁴த்வா ஸமாபஜ்ஜிதுங் ஸமத்தோ²தி வுத்தங் ஹோதி. அகஸிரலாபீ⁴தி அகஸிரானங் லாபீ⁴ விபுலானங், யதா²பரிச்சே²தே³னேவ வுட்டா²துங் ஸமத்தோ²தி வுத்தங் ஹோதி. ஏகச்சோ ஹி லாபீ⁴யேவ ஹோதி, ந பன ஸக்கோதி இச்சி²திச்சி²தக்க²ணே ஸமாபஜ்ஜிதுங். ஏகச்சோ ஸக்கோதி ததா² ஸமாபஜ்ஜிதுங், பாரிபந்தி²கே பன கிச்சே²ன விக்க²ம்பே⁴தி. ஏகச்சோ ததா² ச ஸமாபஜ்ஜதி, பாரிபந்தி²கே ச அகிச்சே²னேவ விக்க²ம்பே⁴தி, ந ஸக்கோதி காலமானநாளிகயந்தங் விய யதா²பரிச்சே²தே³யேவ வுட்டா²துங்.
ஆஸவானங் க²யாதி அரஹத்தமக்³கே³ன ஸப்³ப³கிலேஸானங் க²யா. அனாஸவந்தி ஆஸவவிரஹிதங். சேதோவிமுத்திங் பஞ்ஞாவிமுத்திந்தி எத்த² சேதோ-வசனேன அரஹத்தப²லஸம்பயுத்தோ ஸமாதி⁴, பஞ்ஞா-வசனேன தங்ஸம்பயுத்தா ச பஞ்ஞா வுத்தா. தத்த² ச ஸமாதி⁴ ராக³தோ விமுத்தத்தா சேதோவிமுத்தி, பஞ்ஞா அவிஜ்ஜாய விமுத்தத்தா பஞ்ஞாவிமுத்தீதி வேதி³தப்³பா³. வுத்தஞ்ஹேதங் ப⁴க³வதா ‘‘யோ ஹிஸ்ஸ, பி⁴க்க²வே, ஸமாதி⁴, தத³ஸ்ஸ ஸமாதி⁴ந்த்³ரியங் (ஸங்॰ நி॰ 5.520). யா ஹிஸ்ஸ, பி⁴க்க²வே, பஞ்ஞா, தத³ஸ்ஸ பஞ்ஞிந்த்³ரியங் தி³ட்டே²வ த⁴ம்மேதி இமஸ்மிங்யேவ அத்தபா⁴வே. ஸயங் அபி⁴ஞ்ஞா ஸச்சி²கத்வாதி அத்தனாயேவ பஞ்ஞாய பச்சக்க²ங் கத்வா, அபரப்பச்சயேன ஞத்வாதி அத்தோ². ஸுதமயஞாணாதி³னா விய பரப்பச்சயதங் நயக்³கா³ஹஞ்ச முஞ்சித்வா பரதோகோ⁴ஸானுக³தபா⁴வனாதி⁴க³மபூ⁴தாய அத்தனோயேவ பஞ்ஞாய பச்சக்க²ங் கத்வா, ந ஸயம்பூ⁴ஞாணபூ⁴தாயாதி அதி⁴ப்பாயோ. உபஸம்பஜ்ஜ விஹரதீதி பாபுணித்வா ஸம்பாதெ³த்வா விஹரதி.
ஸத்தகவாரவண்ணனா நிட்டி²தா.
அட்ட²கவாரவண்ணனா
328. அட்ட²கேஸு அட்டா²னிஸங்ஸே ஸம்பஸ்ஸமானேனாதி –
‘‘இத⁴ பன, பி⁴க்க²வே, பி⁴க்கு² ஆபத்திங் ஆபன்னோ ஹோதி, ஸோ தஸ்ஸா ஆபத்தியா அனாபத்திதி³ட்டி² ஹோதி, அஞ்ஞே பி⁴க்கூ² தஸ்ஸா ஆபத்தியா ஆபத்திதி³ட்டி²னோ ஹொந்தி, தே சே, பி⁴க்க²வே, பி⁴க்கூ² தங் பி⁴க்கு²ங் ஏவங் ஜானந்தி ‘அயங் கோ² ஆயஸ்மா ப³ஹுஸ்ஸுதோ ஆக³தாக³மோ த⁴ம்மத⁴ரோ வினயத⁴ரோ மாதிகாத⁴ரோ பண்டி³தோ ப்³யத்தோ மேதா⁴வீ லஜ்ஜீ குக்குச்சகோ ஸிக்கா²காமோ, ஸசே மயங் இமங் பி⁴க்கு²ங் ஆபத்தியா அத³ஸ்ஸனே உக்கி²பிஸ்ஸாம, ந மயங் இமினா பி⁴க்கு²னா ஸத்³தி⁴ங் உபோஸத²ங் கரிஸ்ஸாம, வினா இமினா பி⁴க்கு²னா உபோஸத²ங் கரிஸ்ஸாம, ப⁴விஸ்ஸதி ஸங்க⁴ஸ்ஸ ததோனிதா³னங் ப⁴ண்ட³னங் கலஹோ விக்³க³ஹோ விவாதோ³ ஸங்க⁴பே⁴தோ³ ஸங்க⁴ராஜி ஸங்க⁴வவத்தா²னங் ஸங்க⁴னானாகரண’ந்தி, பே⁴த³க³ருகேஹி, பி⁴க்க²வே, பி⁴க்கூ²ஹி ந ஸோ பி⁴க்கு² ஆபத்தியா அத³ஸ்ஸனே உக்கி²பிதப்³போ³’’தி (மஹாவ॰ 453) –
ஆதி³னா வுத்தஅட்டா²னிஸங்ஸே ஸம்பஸ்ஸமானேன. தேன ஹி ஸத்³தி⁴ங் உபோஸதா²தி³அகரணங் ஆதீ³னவோ பே⁴தா³ய ஸங்வத்தனதோ, கரணங் ஆனிஸங்ஸோ
து³தியஅட்ட²கேபி அட்டா²னிஸங்ஸே ஸம்பஸ்ஸமானேனாதி –
‘‘இத⁴ பன, பி⁴க்க²வே, பி⁴க்கு² ஆபத்திங் ஆபன்னோ ஹோதி, ஸோ தஸ்ஸா ஆபத்தியா அனாபத்திதி³ட்டி² ஹோதி, அஞ்ஞே பி⁴க்கூ² தஸ்ஸா ஆபத்தியா ஆபத்திதி³ட்டி²னோ ஹொந்தி, ஸோ சே, பி⁴க்க²வே, பி⁴க்கு² தே பி⁴க்கூ² ஏவங் ஜானாதி ‘இமே கோ² ஆயஸ்மந்தோ ப³ஹுஸ்ஸுதா ஆக³தாக³மா த⁴ம்மத⁴ரா வினயத⁴ரா மாதிகாத⁴ரா பண்டி³தா ப்³யத்தா மேதா⁴வினோ லஜ்ஜினோ குக்குச்சகா ஸிக்கா²காமா, நாலங் மமங் வா காரணா அஞ்ஞேஸங் வா காரணா ச²ந்தா³ தோ³ஸா மோஹா ப⁴யா அக³திங் க³ந்துங், ஸசே மங் இமே பி⁴க்கூ² ஆபத்தியா அத³ஸ்ஸனே உக்கி²பிஸ்ஸந்தி, ந மயா ஸத்³தி⁴ங் உபோஸத²ங் கரிஸ்ஸந்தி, வினா மயா உபோஸத²ங் கரிஸ்ஸந்தி, ப⁴விஸ்ஸதி ஸங்க⁴ஸ்ஸ ததோனிதா³னங் ப⁴ண்ட³னங் கலஹோ விக்³க³ஹோ விவாதோ³ ஸங்க⁴பே⁴தோ³ ஸங்க⁴ராஜி ஸங்க⁴வவத்தா²னங் ஸங்க⁴னானாகரண’ந்தி, பே⁴த³க³ருகேன, பி⁴க்க²வே, பி⁴க்கு²னா பரேஸம்பி ஸத்³தா⁴ய ஸா ஆபத்தி தே³ஸேதப்³பா³’’தி (மஹாவ॰ 453) –
ஆதி³னா
பாளியங் ஆக³தேஹி ஸத்தஹீதி ‘‘புப்³பே³வஸ்ஸ ஹோதி ‘முஸா ப⁴ணிஸ்ஸ’ந்தி, ப⁴ணந்தஸ்ஸ ஹோதி ‘முஸா ப⁴ணாமீ’தி, ப⁴ணிதஸ்ஸ ஹோதி ‘முஸா மயா ப⁴ணித’ந்தி வினிதா⁴ய தி³ட்டி²ங், வினிதா⁴ய க²ந்திங், வினிதா⁴ய ருசிங், வினிதா⁴ய பா⁴வ’’ந்தி (பாரா॰ 220) ஏவமாக³தேஹி ஸத்தஹி.
அப்³ரஹ்மசரியாதி அஸெட்ட²சரியதோ. ரத்திங் ந பு⁴ஞ்ஜெய்ய விகாலபோ⁴ஜனந்தி உபோஸத²ங் உபவுத்தோ² ரத்திபோ⁴ஜனஞ்ச தி³வாவிகாலபோ⁴ஜனஞ்ச ந பு⁴ஞ்ஜெய்ய. மஞ்சே ச²மாயங்வ ஸயேத² ஸந்த²தேதி கப்பியமஞ்சே வா ஸுதா⁴தி³பரிகம்மகதாய பூ⁴மியங் வா திணபண்ணபலாலாதீ³னி ஸந்த²ரித்வா கதே ஸந்த²தே வா ஸயேதா²தி அத்தோ². ஏதஞ்ஹி அட்ட²ங்கீ³கமாஹுபோஸத²ந்தி ஏதங் பாணாதிபாதாதீ³னி அஸமாசரந்தேன உபவுத்த²உபோஸத²ங் அட்ட²ஹி அங்கே³ஹி ஸமன்னாக³தத்தா ‘‘அட்ட²ங்கி³க’’ந்தி வத³ந்தி.
‘‘அகப்பியகதங் அட்ட² அனதிரித்தா நாம. ஸப்பிஆதி³ அட்ட²மே அருணுக்³க³மனே நிஸ்ஸக்³கி³யங் ஹோதி. அட்ட²கவஸேன யோஜெத்வா வேதி³தப்³பா³னீதி புரிமானி அட்ட² ஏகங் அட்ட²கங், ததோ ஏகங் அபனெத்வா ஸேஸேஸுபி ஏகேகங் பக்கி²பித்வாதி ஏவமாதி³னா நயேன அஞ்ஞானிபி அட்ட²கானி காதப்³பா³னீதி அத்தோ².
அட்ட²கவாரவண்ணனா நிட்டி²தா.
நவகவாரவண்ணனா
329. நவகேஸு ஆகா⁴தவத்தூ²னீதி (தீ³॰ நி॰ அட்ட²॰ 3.340; அ॰ நி॰ அட்ட²॰ 3.9.29) ஆகா⁴தகாரணானி. ஆகா⁴தபடிவினயானீதி ஆகா⁴தஸ்ஸ படிவினயகாரணானி. தங் குதெத்த² லப்³பா⁴தி ‘‘தங் அனத்த²சரணங் மா அஹோஸீ’’தி ஏதஸ்மிங் புக்³க³லே குதோ லப்³பா⁴ கேன காரணேன ஸக்கா லத்³து⁴ங். ‘‘பரோ நாம பரஸ்ஸ அத்தனோ சித்தருசியா அனத்த²ங் கரோதீ’’தி ஏவங் சிந்தெத்வா ஆகா⁴தங் படிவினோதே³தி. அத² வா ஸசாஹங் படிக்கோபங் கரெய்யங், தங் கோபகரணங் எத்த² புக்³க³லே குதோ லப்³பா⁴, கேன காரணேன லத்³த⁴ப்³ப³ங் நிரத்த²கபா⁴வதோதி அத்தோ². கம்மஸ்ஸகா ஹி ஸத்தா, தே கஸ்ஸ ருசியா து³க்கி²தா ஸுகி²தா வா ப⁴வந்தி, தஸ்மா கேவலங் தஸ்மிங் மய்ஹங் குஜ்ஜ²னமத்தமேவாதி அதி⁴ப்பாயோ. அத² வா தங் கோபகரணங் எத்த² புக்³க³லே குதோ லப்³பா⁴ பரமத்த²தோ குஜ்ஜி²தப்³ப³ஸ்ஸ தந்தி நிபாதமத்தமேவ ஹோதி.
தண்ஹங் படிச்சாதி (தீ³॰ நி॰ அட்ட²॰ 2.103; அ॰ நி॰ அட்ட²॰ 3.9.23) த்³வே தண்ஹா ஏஸனதண்ஹா ஏஸிததண்ஹா ச. யாய தண்ஹாய அஜபத²ஸங்குபதா²தீ³னி படிபஜ்ஜித்வா போ⁴கே³ ஏஸதி க³வேஸதி, அயங் ஏஸனதண்ஹா நாம. யா தேஸு ஏஸிதேஸு க³வேஸிதேஸு படிலத்³தே⁴ஸு ஏஸிததண்ஹா நாம. இத⁴ ஏஸிததண்ஹா த³ட்ட²ப்³பா³. பரியேஸனாதி ரூபாதி³ஆரம்மணபரியேஸனா. ஸா ஹி ஏஸனதண்ஹாய ஸதி ஹோதி. லாபோ⁴தி ரூபாதி³ஆரம்மணப்படிலாபோ⁴. ஸோ ஹி பரியேஸனாய ஸதி ஹோதி. வினிச்ச²யோ பன ஞாணதண்ஹாதி³ட்டி²விதக்கவஸேன சதுப்³பி³தோ⁴. தத்த² ‘‘ஸுக²வினிச்ச²யங் ஜஞ்ஞா, ஸுக²வினிச்ச²யங் ஞத்வா அஜ்ஜ²த்தங் ஸுக²மனுயுஞ்ஜெய்யா’’தி (ம॰ நி॰ 3.323) அயங் ஞாணவினிச்ச²யோ. ‘‘வினிச்ச²யோதி த்³வே வினிச்ச²யா தண்ஹாவினிச்ச²யோ ச தி³ட்டி²வினிச்ச²யோ சா’’தி (மஹானி॰ 102) ஏவங் ஆக³தானி அட்ட²ஸததண்ஹாவிசரிதானி தண்ஹாவினிச்ச²யோ. த்³வாஸட்டி² தி³ட்டி²யோ தி³ட்டி²வினிச்ச²யோ. ‘‘ச²ந்தோ³ கோ², தே³வானமிந்த³, விதக்கனிதா³னோ’’தி (தீ³॰ நி॰ 2.358) இமஸ்மிங் பன ஸுத்தே இத⁴ வினிச்ச²யோதி வுத்தோ விதக்கோயேவ ஆக³தோ. லாப⁴ங் லபி⁴த்வா ஹி இட்டா²னிட்ட²ங் ஸுந்த³ராஸுந்த³ரஞ்ச விதக்கேன வினிச்சி²னாதி ‘‘எத்தகங் மே ரூபாரம்மணத்தா²ய ப⁴விஸ்ஸதி, எத்தகங் ஸத்³தா³ரம்மணத்தா²ய, எத்தகங் மய்ஹங் ப⁴விஸ்ஸதி, எத்தகங் பரஸ்ஸ, எத்தகங் பரிபு⁴ஞ்ஜிஸ்ஸாமி, எத்தகங் நித³ஹிஸ்ஸாமீ’’தி. தேன வுத்தங் ‘‘லாப⁴ங் படிச்ச வினிச்ச²யோ’’தி.
ச²ந்த³ராகோ³தி ஏவங் அகுஸலவிதக்கேன விதக்கிதே வத்து²ஸ்மிங் து³ப்³ப³லராகோ³ ச ப³லவராகோ³ ச உப்பஜ்ஜதி. அஜ்ஜோ²ஸானந்தி ‘‘அஹங், மம’’ந்தி ப³லவஸன்னிட்டா²னங். பரிக்³க³ஹோதி தண்ஹாதி³ட்டி²வஸேன பரிக்³க³ஹகரணங். மச்ச²ரியந்தி பரேஹி ஸாதா⁴ரணபா⁴வஸ்ஸ அஸஹனதா. தேனேவஸ்ஸ போராணா ஏவங் வசனத்த²ங் வத³ந்தி ‘‘இத³ங் அச்ச²ரியங் மய்ஹேவ ஹோது, மா அஞ்ஞஸ்ஸ அச்ச²ரியங் ஹோதூதி பவத்தத்தா மச்ச²ரியந்தி வுச்சதீ’’தி. ஆரக்கோ²தி த்³வாரபித³ஹனமஞ்ஜூஸாகோ³பனாதி³வஸேன ஸுட்டு² ரக்க²ணங். அதி⁴ கரோதீதி அதி⁴கரணங், காரணஸ்ஸேதங் நாமங். ஆரக்கா²தி⁴கரணந்தி பா⁴வனபுங்ஸகங், ஆரக்க²ஹேதூதி அத்தோ². த³ண்டா³தா³னாதீ³ஸு பரனிஸேத⁴னத்த²ங் த³ண்ட³ஸ்ஸ ஆதா³னங் த³ண்டா³தா³னங். ஏகதோதா⁴ராதி³னோ ஸத்த²ஸ்ஸ ஆதா³னங் ஸத்தா²தா³னங். கலஹோதி காயகலஹோபி வாசாகலஹோபி. புரிமோ புரிமோ விரோதோ⁴ விக்³க³ஹோ, பச்சி²மோ பச்சி²மோ விவாதோ³. துவங் துவந்தி அகா³ரவவஸேன ‘‘துவங் துவ’’ந்தி வசனங்.
அதி⁴ட்டி²தகாலதோ பட்டா²ய ந விகப்பேதப்³பா³னீதி விகப்பெந்தேன அதி⁴ட்டா²னதோ புப்³பே³ வா
விகப்பேதப்³ப³ங், விஜஹிதாதி⁴ட்டா²னங் வா பச்சா²விகப்பேதப்³ப³ங். அவிஜஹிதாதி⁴ட்டா²னங் து³க்கடவஸேன வுத்தானீதி ‘‘வக்³க³ங் பி⁴க்கு²னிஸங்க⁴ங் வக்³க³ஸஞ்ஞீ ஓவத³தீ’’திஆதி³னா (பாசி॰ 150) நயேன அத⁴ம்மகம்மே த்³வே நவகானி து³க்கடவஸேன வுத்தானி.
நவகவாரவண்ணனா நிட்டி²தா.
த³ஸகவாரவண்ணனா
330. த³ஸகேஸு நத்தி² தி³ன்னந்திஆதி³வஸேன வேதி³தப்³பா³தி ‘‘நத்தி² தி³ன்னங், நத்தி² யிட்ட²ங், நத்தி² ஹுதங், நத்தி² ஸுகதது³க்கடானங் கம்மானங் ப²லங் விபாகோ, நத்தி² அயங் லோகோ, நத்தி² பரோ லோகோ, நத்தி² மாதா, நத்தி² பிதா, நத்தி² ஸத்தா ஓபபாதிகா, நத்தி² லோகே ஸமணப்³ராஹ்மணா ஸம்மக்³க³தா ஸம்மாபடிபன்னா, யே இமஞ்ச லோகங் பரஞ்ச லோகங் ஸயங் அபி⁴ஞ்ஞா ஸச்சி²கத்வா பவேதெ³ந்தீ’’தி (ம॰ நி॰ 2.94, 225; 3.91, 116; ஸங்॰ நி॰ 3.210) ஏவமாக³தங் ஸந்தா⁴ய வுத்தங். ஸஸ்ஸதோ லோகோதிஆதி³வஸேனாதி ‘‘ஸஸ்ஸதோ லோகோதி வா, அஸஸ்ஸதோ லோகோதி வா, அந்தவா லோகோதி வா, அனந்தவா லோகோதி வா, தங் ஜீவங் தங் ஸரீரந்தி வா, அஞ்ஞங் ஜீவங் அஞ்ஞங் ஸரீரந்தி வா, ஹோதி ததா²க³தோ பரங் மரணாதி வா, ந ஹோதி ததா²க³தோ பரங் மரணாதி வா, ஹோதி ச ந ச ஹோதி ததா²க³தோ பரங் மரணாதி வா, நேவ ஹோதி ந ந ஹோதி ததா²க³தோ பரங் மரணாதி வா’’தி (ம॰ நி॰ 1.269) ஏவமாக³தங் ஸங்க³ண்ஹாதி.
மிச்சா²தி³ட்டி²ஆத³யோ மிச்சா²விமுத்திபரியோஸானாதி ‘‘மிச்சா²தி³ட்டி² மிச்சா²ஸங்கப்போ மிச்சா²வாசா மிச்சா²கம்மந்தோ மிச்சா²ஆஜீவோ மிச்சா²வாயாமோ மிச்சா²ஸதி மிச்சா²ஸமாதி⁴ மிச்சா²ஞாணங் மிச்சா²விமுத்தீ’’தி (விப⁴॰ 970) ஏவமாக³தங் ஸந்தா⁴ய வத³தி. தத்த² மிச்சா²ஞாணந்தி பாபகிரியாஸு உபாயசிந்தாவஸேன பாபகங் கத்வா ‘‘ஸுகதங் மயா’’தி பச்சவெக்க²ணாகாரேன ச உப்பன்னோ மோஹோ. மிச்சா²விமுத்தீதி அவிமுத்தஸ்ஸேவ ஸதோ விமுத்திஸஞ்ஞிதா. ஸமத²க்க²ந்த⁴கே நித்³தி³ட்டா²தி ‘‘ஓரமத்தகங் அதி⁴கரணங் ஹோதி, ந ச க³திக³தங், ந ச ஸரிதஸாரித’’ந்திஆதி³னா (சூளவ॰ 204) நித்³தி³ட்டா². ஸமத²க்க²ந்த⁴கே வுத்தேஹி ஸமன்னாக³தோ ஹோதீதி த³ஸ இத்தி²யோ. த⁴னக்கீதாத³யோ த³ஸ ப⁴ரியாயோ.
த³ஸகவாரவண்ணனா நிட்டி²தா.
ஏகாத³ஸகவாரவண்ணனா
331. ஏகாத³ஸகேஸு ந வோதா³யந்தீதி ந பகாஸந்தி. ஸுயுத்தயானஸதி³ஸாய கதாயாதி இச்சி²திச்சி²தகாலே ஸுகே²ன பவத்தேதப்³ப³த்தா யுத்தயானங் விய கதாய. யதா² பதிட்டா² ஹோதீதி ஸம்பத்தீனங் யதா² பதிட்டா² ஹோதி. அனு அனு பவத்திதாயாதி பா⁴வனாப³ஹுலீகாரேஹி அனு அனு பவத்திதாய.
ஸுக²ங் ஸுபதீதிஆதீ³ஸு (அ॰ நி॰ அட்ட²॰ 3.11.15; விஸுத்³தி⁴ 1.258) யதா² ஸேஸஜனா ஸம்பரிவத்தமானா காகச்ச²மானா து³க்க²ங் ஸுபந்தி, ஏவங் அஸுபித்வா ஸுக²ங் ஸுபதி, நித்³த³ங் ஓக்கந்தோபி ஸமாபத்திங் ஸமாபன்னோ விய ஹோதி. ஸுக²ங் படிபு³ஜ்ஜ²தீதி யதா² அஞ்ஞே நித்து²னந்தா விஜம்ப⁴ந்தா ஸம்பரிவத்தந்தா து³க்க²ங் படிபு³ஜ்ஜ²ந்தி, ஏவங் அப்படிபு³ஜ்ஜி²த்வா விகஸமானமிவ பது³மங் ஸுக²ங் நிப்³பி³காரங் படிபு³ஜ்ஜ²தி. அனுபூ⁴தபுப்³ப³வஸேன தே³வதூபஸங்ஹாரவஸேன சஸ்ஸ ப⁴த்³த³கமேவ ஸுபினங் ஹோதி, ந பாபகந்தி ஆஹ ‘‘பாபகமேவ ந பஸ்ஸதீ’’திஆதி³. தா⁴துக்கோ²ப⁴ஹேதுகம்பி சஸ்ஸ ப³ஹுலங் ப⁴த்³த³கமேவ ஸியா யேபு⁴ய்யேன சித்தஜரூபானுகு³ணதாய உதுஆஹாரஜரூபானங். தத்த² பாபகமேவ ந பஸ்ஸதீதி யதா² அஞ்ஞே அத்தானங் சோரேஹி ஸம்பரிவாரிதங் விய, வாளேஹி உபத்³து³தங் விய, பபாதே பதந்தங் விய ச பஸ்ஸந்தி, ஏவங் பாபகமேவ ஸுபினங் ந பஸ்ஸதி. ப⁴த்³ரகங் பன வுட்³டி⁴காரணபூ⁴தங் பஸ்ஸதீதி சேதியங் வந்த³ந்தோ விய, பூஜங் கரொந்தோ விய, த⁴ம்மங் ஸுணந்தோ விய ச ஹோதி.
மனுஸ்ஸானங் பியோ ஹோதீதி உரே ஆமுக்கமுத்தாஹாரோ விய, ஸீஸே பிளந்த⁴மாலா விய ச மனுஸ்ஸானங் பியோ ஹோதி மனாபோ. அமனுஸ்ஸானங் பியோ ஹோதீதி யதே²வ ச மனுஸ்ஸானங் பியோ, ஏவங் அமனுஸ்ஸானம்பி பியோ ஹோதி விஸாக²த்தே²ரோ விய. நாஸ்ஸ அக்³கி³ வா விஸங் வா ஸத்த²ங் வா கமதீதி மெத்தாவிஹாரிஸ்ஸ காயே உத்தராய உபாஸிகாய விய அக்³கி³ வா, ஸங்யுத்தபா⁴ணகசூளஸீவத்தே²ரஸ்ஸேவ கி²ப்பங் ஸமாதி⁴யதீதி கேனசி பரிபந்தே²ன பரிஹீனஜ்ஜா²னஸ்ஸ ப்³யாபாத³ஸ்ஸ தூ³ரஸமனுஸ்ஸரிதபா⁴வதோ கி²ப்பமேவ ஸமாதி⁴யதி. முக²வண்ணோ விப்பஸீத³தீதி ப³ந்த⁴னா பமுத்ததாலபக்கங் விய சஸ்ஸ விப்பஸன்னவண்ணங் முக²ங் ஹோதி. அஸம்மூள்ஹோ காலங் கரோதீதி மெத்தாவிஹாரினோ ஸம்மோஹமரணங் நாம நத்தி², அஸம்மூள்ஹோவ நித்³த³ங் ஓக்கமந்தோ விய காலங் கரோதி.
ஏகாத³ஸகவாரவண்ணனா நிட்டி²தா.
ஏகுத்தரிகனயவண்ணனா நிட்டி²தா.