4. பவாரணாக்க²ந்த⁴கோ
அபா²ஸுவிஹாரகதா²தி³வண்ணனா
209. பவாரணாக்க²ந்த⁴கே பிண்டா³ய படிக்கமெய்யாதி பிண்டா³ய சரித்வா படிக்கமெய்ய. அவக்காரபாதிந்தி அதிரேகபிண்ட³பாதட²பனகங் ஏகங் பா⁴ஜனங். அவிஸய்ஹந்தி உக்கி²பிதுங் அஸக்குணெய்யங். விலங்க⁴னங் உக்கி²பனங் விலங்கோ⁴, ஸோ ஏவ விலங்க⁴கோ, ஹத்தே²ஹி விலங்க⁴கோ ஹத்த²விலங்க⁴கோதி ஆஹ ‘‘ஹத்து²க்கே²பகேனா’’தி. அத² வா விலங்க⁴கேன உக்கே²பகேன ஹத்தே²னாதிபி அத்தோ², அஞ்ஞமஞ்ஞங் ஸங்ஸிப்³பி³தஹத்தே²ஹீதி வுத்தங் ஹோதி.
213. ஸசே பன வுட்³ட⁴தரோ ஹோதீதி பவாரணாதா³யகோ பி⁴க்கு² வுட்³ட⁴தரோ ஹோதி. ஏவஞ்ஹி தேன தஸ்ஸத்தா²ய பவாரிதங் ஹோதீதி எத்த² ஏவங் தேன அப்பவாரிதோபி தஸ்ஸ ஸங்க⁴ப்பத்திமத்தேன ஸங்க⁴பவாரணாகம்மங் ஸமக்³க³கம்மமேவ ஹோதீதி த³ட்ட²ப்³ப³ங். தேன ச பி⁴க்கு²னாதி பவாரணாதா³யகேன பி⁴க்கு²னா.
234. ப³ஹூபி ஸமானவஸ்ஸா ஏகதோ பவாரேதுங் லப⁴ந்தீதி ஏகஸ்மிங் ஸங்வச்ச²ரே லத்³தூ⁴பஸம்பத³தாய ஸமானுபஸம்பன்னவஸ்ஸா ஸப்³பே³ ஏகதோ பவாரேதுங் லப⁴ந்தீதி அத்தோ².
237. பாளியங் மிச்சா²தி³ட்டீ²தி ‘‘நத்தி² தி³ன்ன’’ந்திஆதி³ (தீ³॰ நி॰ 1.171; ம॰ நி॰ 1.445; 2.94, 95, 225; 3.91, 116, 136; ஸங்॰ நி॰ 3.210; த⁴॰ ஸ॰ 1221) நயப்பவத்தா. அந்தக்³கா³ஹிகாதி ஸஸ்ஸதுச்சே²த³ஸங்கா²தஸ்ஸ அந்தஸ்ஸ கா³ஹிகா. யங் கோ² த்வந்திஆதீ³ஸு யங் பவாரணங் ட²பேஸி, தங் தி³ட்டே²ன ட²பேஸீதி தங்-ஸத்³த³ங் அஜ்ஜா²ஹரித்வா யோஜேதப்³ப³ங்.
239. வத்து²ங் பகாஸெந்தோதி புக்³க³லே பரிஸங்குப்பத்தியா நிமித்தபூ⁴தங் வத்து²மத்தங்யேவ ஸந்தா⁴ய வுத்தங் ‘‘புரிமனயேனேவ சோரேஹீ’’திஆதி³. பி⁴க்கு²னோ ஸரீரே மாலாக³ந்த⁴ஞ்ச அரிட்ட²க³ந்த⁴ஞ்ச தி³ஸ்வா ஏவங் ‘‘வத்து² ச புக்³க³லோ ச பஞ்ஞாயதீ’’தி வுத்தந்தி வேதி³தப்³ப³ங்.
அபா²ஸுவிஹாரகதா²தி³வண்ணனா நிட்டி²தா.
ப⁴ண்ட³னகாரகவத்து²கதா²வண்ணனா
240. த்³வே சாதுத்³த³ஸிகா ஹொந்தீதி ததியபக்கே² சாதுத்³த³ஸியா ஸத்³தி⁴ங் த்³வே சாதுத்³த³ஸிகா ஹொந்தி. ‘‘ப⁴ண்ட³னகாரகானங் தேரஸே வா சாதுத்³த³ஸே வா இமே பன்னரஸீபவாரணங் பவாரெஸ்ஸந்தீ’’தி இமினா யதா²ஸகங் உபோஸத²கரணதி³வஸதோ பட்டா²ய பி⁴க்கூ²னங் சாதுத்³த³ஸீபன்னரஸீவோஹாரோ, ந சந்த³க³திஸித்³தி⁴யா திதி²யா வஸேனாதி த³ஸ்ஸேதி. கிஞ்சாபி ஏவங் ‘‘அனுஜானாமி, பி⁴க்க²வே, ராஜூனங் அனுவத்திது’’ந்தி (மஹாவ॰ 186) வசனதோ பனெத்த² லோகியானங் திதி²ங் அனுவத்தந்தேஹிபி அத்தனோ உபோஸத²க்கமேன சாதுத்³த³ஸிங் பன்னரஸிங் வா, பன்னரஸிங் சாதுத்³த³ஸிங் வா கரொந்தேஹேவ அனுவத்திதப்³ப³ங், ந பன ஸோளஸமதி³வஸங் வா தேரஸமதி³வஸங் வா உபோஸத²தி³வஸங் கரொந்தேஹி. தேனேவ பாளியம்பி ‘‘த்³வே தயோ உபோஸதே² சாதுத்³த³ஸிகே காது’’ந்தி வுத்தங். அஞ்ஞதா² த்³வாத³ஸியங், தேரஸியங் வா உபோஸதோ² காதப்³போ³தி வத்தப்³ப³தோ. ‘‘ஸகிங் பக்க²ஸ்ஸ சாதுத்³த³ஸே, பன்னரஸே வா’’திஆதி³வசனம்பி உபவுத்த²க்கமேனேவ வுத்தங், ந திதி²க்கமேனாதி க³ஹேதப்³ப³ங்.
ப⁴ண்ட³னகாரகவத்து²கதா²வண்ணனா நிட்டி²தா.
பவாரணாஸங்க³ஹகதா²வண்ணனா
241. ‘‘பவாரெத்வா பன அந்தராபி சாரிகங் பக்கமிதுங் லப⁴ந்தீ’’தி இமினா பவாரணாஸங்க³ஹே கதே அந்தரா பக்கமிதுகாமா ஸங்க⁴ங் ஸன்னிபாதாபெத்வா பவாரேதுங் லப⁴ந்தீதி த³ஸ்ஸேதி.
பவாரணாஸங்க³ஹகதா²வண்ணனா நிட்டி²தா.
பவாரணாக்க²ந்த⁴கவண்ணனானயோ நிட்டி²தோ.