2. பாரிவாஸிகக்க²ந்த⁴கோ
பாரிவாஸிகவத்தகதா²வண்ணனா
75. பாரிவாஸிகக்க²ந்த⁴கே அந்தமஸோ மூலாயபடிகஸ்ஸனாரஹாதீ³னம்பீதி ஆதி³-ஸத்³தே³ன மானத்தாரஹமானத்தசாரிகஅப்³பா⁴னாரஹே ஸங்க³ண்ஹாதி. தே ஹி பாரிவாஸிகானங், பாரிவாஸிகா ச தேஸங் பகதத்தட்டா²னே ஏவ திட்ட²ந்தி. அதோ⁴தபாத³ட்ட²பனகந்தி யத்த² ட²த்வா பாதே³ தோ⁴வந்தி, தாதி³ஸங் தா³ருப²லகக²ண்டா³தி³ங். பாத³க⁴ங்ஸனந்தி ஸக்க²ரகத²லாதி³ங். ‘‘வத்தங் கரொந்தீ’’தி எத்தகமத்தஸ்ஸேவ வுத்தத்தா ஸத்³தி⁴விஹாரிகாதீ³ஹிபி அபி⁴வாத³னாதி³ங் காதுங் ந வட்டதி.
‘‘பாரிஸுத்³தி⁴உபோஸதே² கரியமானே’’தி இத³ங் பவாரணாதி³வஸேஸு ஸங்கே⁴ பவாரெந்தே அனுபக³தசி²ன்னவஸ்ஸாதீ³ஹி கரியமானபாரிஸுத்³தி⁴உபோஸத²ம்பி ஸந்தா⁴ய வுத்தங். அத்தனோ பாளியாதி நவகானங் புரதோ.
‘‘பாரிவாஸிகஸ்ஸேவா’’தி இத³ங் அப்³பா⁴னாரஹபரியோஸானே ஸப்³பே³ க³ருகட்டே² ஸந்தா⁴ய வுத்தங். தேஸம்பி பச்சேகங் ஓணோஜனஸ்ஸ அனுஞ்ஞாதத்தா தத³வஸேஸா பகதத்தா ஏவ தங் ந லப⁴ந்தி.
சதுஸ்ஸாலப⁴த்தந்தி போ⁴ஜனஸாலாய படிபாடியா தி³ய்யமானப⁴த்தங். ஹத்த²பாஸே டி²தேனாதி தா³யகஸ்ஸ ஹத்த²பாஸே படிக்³க³ஹணருஹனட்டா²னேதி அதி⁴ப்பாயோ. மஹாபேளப⁴த்தேபீதி மஹந்தேஸு ப⁴த்தபச்சி²ஆதி³பா⁴ஜனேஸு ட²பெத்வா தி³ய்யமானப⁴த்தேஸுபி.
76. பாபிட்ட²தராதி பாராஜிகாபத்தீதி உக்கங்ஸவஸேன வுத்தங். ஸஞ்சரித்தாதி³பண்ணத்திவஜ்ஜதோ பன ஸுக்கவிஸ்ஸட்டா²தி³கா லோகவஜ்ஜாவ, தத்தா²பி ஸங்க⁴பே⁴தா³தி³கா பாபிட்ட²தரா ஏவ.
‘‘கம்மந்தி பாரிவாஸிககம்மவாசா’’தி ஏதேன கம்மபூ⁴தா வாசாதி கம்மவாசா-ஸத்³த³ஸ்ஸ அத்தோ²பி ஸித்³தோ⁴தி வேதி³தப்³போ³. ஸவசனீயந்தி எத்த² ‘‘ஸதோ³ஸ’’ந்தி (ஸாரத்த²॰ டீ॰ சூளவக்³க³॰ 3.76) அத்த²ங் வத³தி. அத்தனோ வசனே பவத்தனகம்மந்தி ஏவமெத்த² அத்தோ² த³ட்ட²ப்³போ³, ‘‘மா பக்கமாஹீ’’தி வா ‘‘ஏஹி வினயத⁴ரானங் ஸம்முகீ²பா⁴வ’’ந்தி வா
ரஜோஹதபூ⁴மீதி பண்ணஸாலாவிஸேஸனங். பச்சயந்தி வஸ்ஸாவாஸிகசீவரங். ஸேனாஸனங் ந லப⁴தீதி வஸ்ஸக்³கே³ன ந லப⁴தி.
அபண்ணகபடிபதா³தி அவிரத்³த⁴படிபதா³. ஸசே வாயமந்தோபீதி எத்த² அவிஸயபா⁴வங் ஞத்வா அவாயமந்தோபி ஸங்க³ய்ஹதி.
81. அவிஸேஸேனாதி பாரிவாஸிகுக்கி²த்தகானங் ஸாமஞ்ஞேன. பஞ்சவண்ணச்ச²த³னப³த்³த⁴ட்டா²னேஸூதி பஞ்சப்பகாரச்ச²த³னேஹி ச²ன்னட்டா²னேஸு.
ஓப³த்³த⁴ந்தி உட்டா²னாதி³ப்³யாபாரபடிப³த்³த⁴ங். பீளிதந்தி அத்தோ². மஞ்சே வா பீடே² வாதி எத்த² வா-ஸத்³தோ³ ஸமுச்சயத்தோ², தேன தட்டிகாசம்மக²ண்டா³தீ³ஸு தீ³கா⁴ஸனேஸுபி நிஸீதி³துங் ந வட்டதீதி தீ³பிதங் ஹோதி.
ந வத்தபே⁴த³து³க்கடந்தி வுட்³ட⁴தரஸ்ஸ ஜானந்தஸ்ஸாபி வத்தபே⁴தே³ து³க்கடங் நத்தீ²தி த³ஸ்ஸேதி. ‘‘வத்தங் நிக்கி²பாபெத்வா’’தி இத³ங் பாரிவாஸாதி³மேவ ஸந்தா⁴ய வுத்தங்.
பாரிவாஸிகவத்தகதா²வண்ணனா நிட்டி²தா.
பாரிவாஸிகக்க²ந்த⁴கவண்ணனானயோ நிட்டி²தோ.