9. பாதிமொக்க²ட்ட²பனக்க²ந்த⁴கோ
பாதிமொக்கு²த்³தே³ஸயாசனகதா²வண்ணனா
383. பாதிமொக்க²ட்ட²பனக்க²ந்த⁴கே நந்தி³முகி²யாதி ஓதா³ததி³ஸாமுக²தாய துட்ட²முகி²யா. ‘‘உத்³த⁴ஸ்தங் அருண’’ந்தி வத்வாபி ‘‘உத்³தி³ஸது, ப⁴ந்தே, ப⁴க³வா’’தி பாதிமொக்கு²த்³தே³ஸயாசனங் அனுபோஸதே² உபோஸத²கரணபடிக்கே²பஸ்ஸ ஸிக்கா²பத³ஸ்ஸ அபஞ்ஞத்தத்தா தே²ரேன கதந்தி த³ட்ட²ப்³ப³ங். கஸ்மா பன ப⁴க³வா ஏவங் துண்ஹீபூ⁴தோவ தியாமரத்திங் வீதினாமேஸீதி? அபரிஸுத்³தா⁴ய பரிஸாய உபோஸதா²தி³ஸங்வாஸகரணஸ்ஸ ஸாவஜ்ஜதங் பி⁴க்கு²ஸங்கே⁴ பாகடங் காதுங், தஞ்ச ஆயதிங் பி⁴க்கூ²னங் ததா²படிபஜ்ஜனத்த²ங் ஸிக்கா²பத³ங் ஞாபேதுங். கேசி பனெத்த² ‘‘அபரிஸுத்³த⁴ம்பி புக்³க³லங் தஸ்ஸ ஸம்முகா² ‘அபரிஸுத்³தோ⁴’தி வத்துங் மஹாகருணாய அவிஸஹந்தோ ப⁴க³வா ததா² நிஸீதீ³’’தி காரணங் வத³ந்தி. தங் அகாரணங் பச்சா²பி அவத்தப்³ப³தோ, மஹாமொக்³க³ல்லானத்தே²ரேனாபி தங் பா³ஹாயங் க³ஹெத்வா ப³ஹி நீஹரணஸ்ஸ அகத்தப்³ப³தாபஸங்க³தோ. தஸ்மா யதா²வுத்தமேவெத்த² காரணந்தி. தேனேவ ‘‘அட்டா²னமேதங், பி⁴க்க²வே, அனவகாஸோ, யங் ததா²க³தோ அபரிஸுத்³தா⁴ய பரிஸாய உபோஸத²ங் கரெய்ய, பாதிமொக்க²ங் உத்³தி³ஸெய்யா’’தி (அ॰ நி॰ 8.20; சூளவ॰ 386; உதா³॰ 45) வத்வா ‘‘ந ச, பி⁴க்க²வே, ஸாபத்திகேன பாதிமொக்க²ங் ஸோதப்³ப³’’ந்திஆதி³னா (சூளவ॰ 386) ஸாபத்திகபரிஸாய கத்தப்³ப³விதி⁴ த³ஸ்ஸிதோ.
ஸங்கஸ்ஸரஸமாசாரந்தி கிஞ்சிதே³வ அஸாருப்பங் தி³ஸ்வா ‘‘இத³ங் இமினா கதங் ப⁴விஸ்ஸதீ’’தி பரேஹி ஸங்காய ஸரிதப்³ப³ஸமாசாரங், அத்தனா வா ‘‘மம அனாசாரங் ஏதே ஜானந்தீ’’தி ஸங்காய ஸரிதப்³ப³ஸமாசாரங். ஸமணவேஸதா⁴ரணேன, ஸங்கி⁴கபச்சயபா⁴க³க³ஹணாதி³னா ச ஜீவிகங் கப்பெந்தோ ‘‘அஹங் ஸமணோ’’தி படிஞ்ஞங் அதெ³ந்தோபி அத்த²தோ தெ³ந்தோ விய ஹோதீதி ‘‘ஸமணபடிஞ்ஞங் ப்³ரஹ்மசாரிபடிஞ்ஞ’’ந்தி வுத்தங். அவஸ்ஸுதந்தி கிலேஸாவஸ்ஸனேன திந்தங். ஸஞ்ஜாதது³ஸ்ஸில்யகசவரத்தா கஸம்பு³ஜாதங் ப³ஹித்³வாரகொட்ட²கா நிக்கா²மெத்வாதி த்³வாரஸாலதோ ப³ஹி நிக்க²மாபெத்வா.
384. மஹாஸமுத்³தே³ அபி⁴ரமந்தீதி ப³ஹுஸோ த³ஸ்ஸனபவிஸனாதி³னா மஹாஸமுத்³தே³ அபி⁴ரதிங் விந்த³ந்தி. ந ஆயதகேனேவ பபாதோதி சி²ன்னதடமஹாஸொப்³போ⁴ விய ந ஆதி³தோவ நின்னோதி அத்தோ². டி²தத⁴ம்மோதி அவட்டி²தஸபா⁴வோ. பூரத்தந்தி புண்ணத்தங். நாகா³தி ஸப்பஜாதிகா.
பாதிமொக்கு²த்³தே³ஸயாசனகதா²வண்ணனா நிட்டி²தா.
பாதிமொக்க²ஸவனாரஹகதா²தி³வண்ணனா
386. உதா³ஹரிதப்³ப³ந்தி பாளியா அவத்வா தமத்த²ங் யாய காயசி பா⁴ஸாய உதா³ஹடம்பி உதா³ஹடமேவாதி த³ட்ட²ப்³ப³ங்.
புரே வா பச்சா² வாதி ஞத்திஆரம்ப⁴தோ புப்³பே³ வா ஞத்தினிட்டா²னதோ பச்சா² வா.
387. கதஞ்ச அகதஞ்ச உப⁴யங் க³ஹெத்வாதி யஸ்ஸ கதாபி அத்தி² அகதாபி. தஸ்ஸ தது³ப⁴யங் க³ஹெத்வா. த⁴ம்மிகங் ஸாமக்³கி³ந்தி த⁴ம்மிகங் ஸமக்³க³கம்மங். பச்சாதி³யதீதி உக்கோடனாதி⁴ப்பாயேன புன காதுங் ஆதி³யதி.
388. ஆகாராதி³ஸஞ்ஞா வேதி³தப்³பா³தி ஆகாரலிங்க³னிமித்தனாமானி வுத்தானீதி வேதி³தப்³பா³னி.
பாதிமொக்க²ஸவனாரஹகதா²தி³வண்ணனா நிட்டி²தா.
அத்தாதா³னஅங்க³கதா²தி³வண்ணனா
398. புன சோதே³துங் அத்தனா ஆதா³தப்³ப³ங் க³ஹேதப்³ப³ங் அதி⁴கரணங் அத்தாதா³னந்தி ஆஹ ‘‘ஸாஸனங் ஸோதே⁴துகாமோ’’திஆதி³. வஸ்ஸாரத்தோதி வஸ்ஸகாலோ. ஸோபி ஹி து³ப்³பி⁴க்கா²தி³காலோ விய அதி⁴கரணவூபஸமத்த²ங் லஜ்ஜிபரிஸாய தூ³ரதோ ஆனயனஸ்ஸ, ஆக³தானஞ்ச பிண்டா³ய சரணாதி³ஸமாசாரஸ்ஸ து³க்கரத்தா அகாலோ ஏவ.
ஸமனுஸ்ஸரணகரணந்தி விக³தூபக்கிலேஸ…பே॰… ஸங்வத்ததீதி எத்த² யதா²
399. அதி⁴க³தங் மெத்தசித்தந்தி அப்பனாப்பத்தங் மெத்தஜா²னங்.
400-1. ‘‘தோ³ஸந்தரோ’’தி எத்த² அந்தர-ஸத்³தோ³ சித்தபரியாயோதி ஆஹ ‘‘ந து³ட்ட²சித்தோ ஹுத்வா’’தி.
காருஞ்ஞங் நாம கருணா ஏவாதி ஆஹ ‘‘காருஞ்ஞதாதி கருணாபா⁴வோ’’தி. கருணந்தி அப்பனாப்பத்தங் வத³தி. ததா² மெத்தந்தி.
அத்தாதா³னஅங்க³கதா²தி³வண்ணனா நிட்டி²தா.
பாதிமொக்க²ட்ட²பனக்க²ந்த⁴கவண்ணனானயோ நிட்டி²தோ.