அந்தரபெய்யாலங்
கதிபுச்சா²வாரவண்ணனா
271. கதி ஆபத்தியோதி பாராஜிகாதீ³ஸு பஞ்சஸு ஆபத்தீஸு மேது²னாதி³ன்னாதா³னாதி³அந்தோக³த⁴பே⁴த³ங் அபெக்கி²த்வா ஜாதிவஸேன ஏகத்தங் ஆரோபெத்வா புச்சா² கதா. கதி ஆபத்திக்க²ந்தா⁴தி அந்தோக³த⁴பே⁴த³ங் அபெக்கி²த்வா பச்சேகங் ராஸட்டே²னாதி எத்தகமேவெத்த² பே⁴தோ³. வினீதானியேவ வினீதவத்தூ²னீதி ஆபத்திதோ விரமணானி ஏவ அவிப்படிஸாரபாமோஜ்ஜாதி³த⁴ம்மானங் காரணத்தா வத்தூ²னீதி வினீதவத்தூ²னி, தானி எத்த² அத்த²தோ விரதிஆதி³அனவஜ்ஜத⁴ம்மா ஏவ. வேரங் மணதீதி வேரஹேதுத்தா ‘‘வேர’’ந்தி லத்³த⁴னாமங் ராகா³தி³அகுஸலபக்க²ங் வினாஸேதி.
த⁴ம்மஸ்ஸவனக்³க³ங் பி⁴ந்தி³த்வா க³ச்ச²தீதி ப³ஹூஸு ஏகதோ நிஸீதி³த்வா த⁴ம்மங் ஸுணந்தேஸு தங் த⁴ம்மஸ்ஸவனஸமாக³மங் கோபெத்வா உட்டா²ய க³ச்ச²தி. அனாத³ரோவாதி துஸ்ஸிதப்³ப³ட்டா²னே துட்டி²ங், ஸங்விஜிதப்³ப³ட்டா²னே ஸங்வேக³ஞ்ச அபவேதெ³ந்தோ ஏவ. காயபாக³ப்³பி⁴யந்தி உன்னதிவஸேன பவத்தனகாயானாசாரங்.
274. மெத்தாய ஸம்பூ⁴தங் மெத்தங், காயகம்மங். உப⁴யேஹிபீதி நவகேஹி, தே²ரேஹி ச. பியங் கரோதீதி தங் புக்³க³லங் பேமட்டா²னங் கரோதி, கேஸந்தி ஆஹ ‘‘ஸப்³ரஹ்மசாரீன’’ந்தி.
புக்³க³லங் படிவிப⁴ஜித்வா பு⁴ஞ்ஜதீதி பகதேன ஸம்ப³ந்தோ⁴. தமேவ புக்³க³லபடிவிபா⁴க³ங் த³ஸ்ஸேதுங் ‘‘அஸுகஸ்ஸா’’திஆதி³ வுத்தங்.
பு⁴ஜிஸ்ஸபா⁴வகரணதோதி தண்ஹாதா³ஸப்³யதோ மோசெத்வா ஸமத²விபஸ்ஸனாஸு ஸேரிவிஹாரிதாகரணதோதி அத்தோ². நிய்யாதீதி பவத்ததி. ஸம்மாது³க்க²க்க²யாய ஸங்வத்ததீதி அத்தோ².
கதிபுச்சா²வாரவண்ணனா நிட்டி²தா.
ச²ஆபத்திஸமுட்டா²னவாரவண்ணனா
276. பட²மேன ஆபத்திஸமுட்டா²னேனாதி கேவலங் காயேன. பாராஜிகாபத்தியா ஏகந்தஸசித்தகஸமுட்டா²னத்தா ‘‘ந ஹீதி வத்தப்³ப³’’ந்தி வுத்தங். ஸங்கா⁴தி³ஸேஸாதீ³னங் ‘‘ஸியா’’தி வுத்தங், ஆபஜ்ஜனங் ஸியா ப⁴வெய்யாதி அத்தோ². ஹீனுக்கட்டே²ஹி ஜாதிஆதீ³ஹி ஓமஸனே ஏவ து³ப்³பா⁴ஸிதஸ்ஸ பஞ்ஞத்தத்தா ஸா ஏகந்தவாசாசித்தஸமுட்டா²னா ஏவாதி.
து³தியஸமுட்டா²னநயே வாசாய ஏவ ஸமாபஜ்ஜிதப்³ப³பாடிதே³ஸனீயஸ்ஸ அபா⁴வா ‘‘ந ஹீ’’தி வுத்தங்.
ததியே ‘‘ஸியா’’தி வுத்தங்.
ஓமஸனே பாசித்தியஸ்ஸ அதி³ன்னாதா³னஸமுட்டா²னத்தேபி தப்பச்சயா பஞ்ஞத்தஸ்ஸ து³ப்³பா⁴ஸிதஸ்ஸ பஞ்சமேனேவ ஸமுப்பத்தீதி த³ஸ்ஸேதுங் சதுத்த²வாரே ‘‘து³ப்³பா⁴ஸிதங் ஆபஜ்ஜெய்யாதி ந ஹீதி வத்தப்³ப³’’ந்தி வத்வா பஞ்சமவாரே ‘‘ஸியாதி வத்தப்³ப³’’ந்தி வுத்தங். காயவிகாரேனேவ ஓமஸந்தஸ்ஸ பனெத்த² து³ப்³பா⁴ஸிதபா⁴வேபி காயகீளாபா⁴வாபா⁴வதோ து³க்கடமேவாதி த³ட்ட²ப்³ப³ங்.
ச²ட்ட²வாரே பன விஜ்ஜமானோபி காயோ து³ப்³பா⁴ஸிதஸ்ஸ அங்க³ங் ந ஹோதி, பஞ்சமஸமுட்டா²னே ஏவ ச²ட்ட²ம்பி பவிஸதீதி த³ஸ்ஸேதுங் ‘‘ந ஹீ’’தி படிக்கி²த்தங், ந பன தத்த² ஸப்³ப³தா² து³ப்³பா⁴ஸிதேன அனாபத்தீதி த³ஸ்ஸேதுங். ந ஹி த³வகம்யதாய காயவாசாஹி ஓமஸந்தஸ்ஸ து³ப்³பா⁴ஸிதாபத்தி ந ஸம்ப⁴வதி. யஞ்ஹி பஞ்சமேனேவ ஸமாபஜ்ஜதி, தங் ச²ட்டே²னபி ஸமாபஜ்ஜதி ஏவ த⁴ம்மதே³ஸனாபத்தி வியாதி க³ஹேதப்³ப³ங். ஸேஸங் ஸமுட்டா²னவாரே ஸுவிஞ்ஞெய்யமேவ.
ச²ஆபத்திஸமுட்டா²னவாரவண்ணனா நிட்டி²தா.
கதாபத்திவாரவண்ணனா
277. து³தியே பன கதிவாரே பட²மஸமுட்டா²னேன ஆபஜ்ஜிதப்³பா³னங் ஆபத்தீனங் லஹுத³ஸ்ஸனஸுக²த்த²ங் குடிகாராதீ³னி ஏவ ஸமுத்³த⁴டானி, ந அஞ்ஞேஸங் அபா⁴வா, ஸஞ்சரித்தாதீ³னம்பி விஜ்ஜமானத்தா. ஏவங் து³தியஸமுட்டா²னாதீ³ஸுபி. ‘‘கப்பியஸஞ்ஞீ’’தி இமினா அசித்தகத்தங் த³ஸ்ஸேதி. ‘‘குடிங் கரோதீ’’தி இமினா வசீபயோகா³பா⁴வங். உப⁴யேனாபி கேவலங் காயேனேவ து³க்கடாதீ³னங் ஸம்ப⁴வங் த³ஸ்ஸேதி. ஏவங் உபரிபி யதா²னுரூபங் காதப்³ப³ங்.
‘‘ஏகேன ஸமுட்டா²னேன ஸமுட்ட²ஹந்தீ’’தி இத³ங் இத⁴ விஸேஸெத்வா த³ஸ்ஸிதானங் காயதோவ ஸமுட்டி²தானங் வஸேன வுத்தங், அவிஸேஸதோ பன தா ஆபத்தியோ இதரஸமுட்டா²னேஹிபி யதா²ரஹங் ஸமுட்ட²ஹந்தி ஏவ. ஏவங் உபரிபி.
‘‘திணவத்தா²ரகேன சா’’தி இத³ங் ஸங்கா⁴தி³ஸேஸவஜ்ஜிதானங் சதுன்னங் ஆபத்தீனங் வஸேன வுத்தங்.
279. ஸங்வித³ஹித்வா குடிங் கரோதீதி வாசாய ஸங்வித³ஹதி, ஸயஞ்ச காயேன கரோதீதி அத்தோ².
கதாபத்திவாரவண்ணனா நிட்டி²தா.
ஆபத்திஸமுட்டா²னகா³தா²வண்ணனா
283. ததியோ பன கா³தா²வாரோ து³தியவாரேன வுத்தமேவத்த²ங் ஸங்க³ஹெத்வா த³ஸ்ஸேதுங் வுத்தோ. தத்த² காயோவ காயிகோதி வத்தப்³பே³ வசனவிபல்லாஸேன ‘‘காயிகா’’தி வுத்தங். தேனாஹ ‘‘தேன ஸமுட்டி²தா’’தி, காயோ ஸமுட்டா²னங் அக்கா²தோதி அத்தோ².
விவேகத³ஸ்ஸினாதி ஸப்³ப³ஸங்க²தவிவித்தத்தா, ததோ விவித்தஹேதுத்தா ச நீவரணவிவேகஞ்ச நிப்³பா³னஞ்ச த³ஸ்ஸனஸீலேன. விப⁴ங்க³கோவிதா³தி உப⁴தோவிப⁴ங்க³குஸலாதி ஆலபனங். இத⁴ பனேவங் அஞ்ஞோ புச்ச²ந்தோ நாம நத்தி², உபாலித்தே²ரோ ஸயமேவ அத்த²ங் பாகடங் காதுங் புச்சா²விஸஜ்ஜனஞ்ச அகாஸீதி இமினா நயேன ஸப்³ப³த்த² அத்தோ² வேதி³தப்³போ³.
ஆபத்திஸமுட்டா²னகா³தா²வண்ணனா நிட்டி²தா.
விபத்திபச்சயவாரவண்ணனா
284. சதுத்தே² பன விபத்திபச்சயவாரே ஸீலவிபத்திபச்சயாதி ஸீலவிபத்திபஅச்சா²த³னபச்சயா.
286. தி³ட்டி²விபத்திபச்சயாதி தி³ட்டி²விபத்தியா அப்படினிஸ்ஸஜ்ஜனபச்சயா.
287. ஆஜீவவிபத்திபச்சயாதி ஆஜீவவிபத்தி, தஸ்ஸா ஆஜீவவிபத்தியா ஹேது, தது³ப்பாத³னதபரிபோ⁴க³னிமித்தந்தி அத்தோ².
விபத்திபச்சயவாரவண்ணனா நிட்டி²தா.
அதி⁴கரணபச்சயவாரவண்ணனா
291. பஞ்சமே கிச்சாதி⁴கரணபச்சயாதி அபலோகனவசனஞத்திகம்மவாசாஸங்க²தகம்மவாசாபச்சயா. பஞ்சாதி எத்த² அத⁴ம்மிககதிகாதி³ங் அபலோகெத்வா கரொந்தானங் அனிமித்தந்தி அத்தோ². பஞ்சமே அதி⁴கரணபச்சயவாரே கிச்சாதி⁴கரணபச்சயா அபலோகனாவஸானே து³க்கடங், அதி⁴ப்பாயாதி³னா ஞத்திகம்மாதி³ங் கரொந்தானங் து²ல்லச்சயாதி³ ச ஸங்க³ய்ஹதீதி த³ட்ட²ப்³ப³ங். அவஸேஸா ஆபத்தியோதி ஸோதாபத்திப²லஸமாபத்திஆத³யோ. ‘‘நத்த²ஞ்ஞா ஆபத்தியோ’’தி இத³ங் விபத்திஆதி³பா⁴கி³னியோ ஸாவஜ்ஜாபத்தியோ ஸந்தா⁴ய வுத்தங்.
அதி⁴கரணபச்சயவாரவண்ணனா நிட்டி²தா.